Shfrytëzimi i burimeve ujore për prodhim energjie elektrike ka qenë një nga të paktat politika të pandryshuara gjatë dekadës së fundit në Shqipëri.

Premtimet për të frenuar ndërtimin e hidrocentraleve, sidomos në zonat e mbrojtura, janë kaluar me një valë kontratash, projektesh të zvarritura dhe përplasjesh me komunitetet.

Citizens sjell një hartë të plotë të shpërndarjes së hidrocentraleve që u ndërtuan në 15 vitet e fundit.

Kush fiton dhe kush humbet nga ndërtimi i tyre? Përvoja tregon se komunitetet përreth digave nuk fitojnë gjë, përkundrazi.

Qeveritë ndërrohen, hidrocentralet vazhdojnë

Ndërsa qeveria e Kryeministrit Edi Rama, në pushtet prej vitit 2013, vazhdon ta paraqesë zhvillimin e hidrocentraleve si politikë të qëndrueshme energjitike, bilanci real mbetet i paqartë.

Pasi mori pushtetin, Rama e konsideroi “korrupsion shkatërrimtar” prirjen e qeverisë së shkuar të drejtuar nga Sali Berisha (2005-2013) për dhënien e lejeve të hidrocentraleve në zonat e mbrojtura. 

Ai tha se në këto zona ishin dhënë 113 leje, prej të cilave theksoi se 55 “nuk kanë për të filluar punë” si zotim i tij se “politika me hidrocentralet” do të ndryshonte.

Enti Rregullator i Energjisë (ERE) raportonte asokohe se vendi kishte 80 hidrocentrale private (2013) me kapacitet të përgjithshëm rreth 240 megavat (MW).

Pas kësaj, qeveria Rama shqyrtoi 103 kontrata koncesionare në një proces të gjatë, pas së cilit në vitin 2019 deklaroi anulimin e 27 prej tyre, që parashikonin ndërtimin e 80 HEC-eve.

Në këtë periudhë (2019) ERE raportonte për shumfishim të hidrocentraleve private: 197 me fuqi 827 MW.

Qeveria doli me gjykimin e përgjithshëm se hidrocentralet e vegjël ishin të padobishëm në aspektin energjetik dhe të dëmshëm në raport me mjedisin dhe komunitetet.

“Nuk do ketë më në Shqipëri, leje për asnjë HEC nën 2 MW dhe nuk do lejohet më kurrë që në emër të prodhimit të energjisë të preken zona me rëndësi nga pikëpamja natyrore dhe turistike, apo komunitete, duke arritur deri në pikën që tubat e HEC-it të futen në burimin e ujit,” u zotua Rama asokohe.

Por koha tregoi se ky zotim nuk u mbajt. Qeveria vijoi të jepte leje për HEC-et e vogla, madje ajo ndërhyri edhe në ligjin e zonave të mbrotjura duke i tkurrur edhe territoret e parqeve kombëtare në favor të dhënies së burimeve ujore për HEC-e.

Rastet konkrete janë HEC-et në Zall-Gjoçaj apo dhe në Kurdari ku “HEC Doma” po ndërtohet pavarësisht kontestimeve të komunitetit dhe faktit se ka një kapacitet prej më pak se 2 MW.

ERE raportoi në vitin 2024 për 238 hidrocentrale private të prodhimit të energjisë.

Një rritje me 41 HEC-e (17.2%) krahasuar me vitin 2019 kur qeveria u zotua për qasje të kontrolluar, 158 HEC-e (66.3%) prej vitit 2013 kur socialistët morën pushtetin.

Më shumë se gjysma e këtyre impianteve (58%; 138 HEC-e) prodhojnë energji minimale (me kapacitete 2 ose më pak se 2 MW), dhe janë ndërtuar pavarësisht dëmeve ndaj mjedisit, burimeve ujore dhe komuniteteve.

Rrjeti i hidrocentraleve në Shqipëri

Në 15 vitet e fundit, ndërtimi i hidrocentraleve në Shqipëri është shtrirë në gjithë territorin. Kjo ka prekur shumicën e bashkive duke krijuar një rrjet të dendur tubash dhe digash në rrjedhat e lumenjve kryesorë të vendit.

Sipas të dhënave të siguruara nga Citizens.al nga 61 bashkitë e vendit, gjatë kësaj periudhe u vunë në punë 211 hidrocentrale, ndërkohë 24 të tjerë janë në proces ndërtimi.

Ky zgjerim ka ndodhur përmes kontratave të lidhura në periudha të ndryshme, shpesh edhe një dekadë më parë, që vijojnë të mbahen aktive pavarësisht zvarritjeve, proceseve gjyqësore apo kundërshtimit nga komunitetet lokale.

Ndërkohë, shpërndarja e hidrocentraleve nuk është e njëtrajtshme.

Bashki si Librazhdi (21), Dibra (19), Korça (15), Maliqi (15), Skrapari (13), Mirdita (12) dhe Klosi (12) përqendrojnë numrin më të lartë të hidrocentraleve në funksion, ndërsa në disa prej tyre vijojnë projekte të reja, shpesh të shoqëruara me protesta dhe konflikte ligjore.

Ndryshe, 30 bashki të tjera nuk kanë pasur zhvillime hidrocentralesh gjatë kësaj periudhe kryesisht për shkak të mungesës së burimeve ujore të qëndrueshme, duke nxjerrë në pah varësinë e modelit energjetik nga lumenjtë malorë.

Megjithatë në zona të ndryshme si Kukësi (13), Fushë-Arrëzi (10), Mati (8) dhe Tepelena (5) janë raportuar për projekte në proces. Shumica e këtyre projekteve janë kontestuar, veçanërisht në bashkinë Tepelenë, ku prej vitit 2017 ka nisur njëproces gjyqësor kundër ndërtimit të një HEC-i në lumin e Nivicës.

Të dhënat që ofrojnë autoritetet publike janë shpesh kontradiktore, megjithatë, ato tregojnë se qasja për ndërtimin e hidrocentraleve mbetet e pandryshuar që prej vitit 2010 dhe se ndërtimi i HEC-eve ka vijuar edhe pas premtimeve për ndalimin e lejeve të reja ndërsa roli i bashkive mbetet kryesisht administrativ, pa ndikim të drejtpërdrejtë në vendimmarrjen.

Agjencisë Kombëtare të Burimeve Natyrore (AKBN), tha për Citizens.al se aktualisht janë mbi 150 projekte HEC-esh në procedura për “plotësim dokumentacioni” apo “marrje lejesh”. Kjo agjenci, në këtë pikë, mban të arkivuar si projekte në proces edhe rastet e rrëzuara me vendime gjykatash apo vendosjes së lumenjve në zona të mbrojtura, si për shembull: Kalivaçi, Shushica dhe Poçemi.

Në mungesë të një vlerësimi të plotë kombëtar për ndikimin mjedisor dhe social të këtij modeli zhvillimi, rrjeti i hidrocentraleve është konsoliduar tashmë si një realitet i pakthyeshëm, duke u shoqëruar me pikëpyetje mbi qëndrueshmërinë afatgjatë të burimeve ujore dhe marrëdhënien mes investimeve private, komuniteteve lokale dhe interesit publik.

Kaçinari: “Uji në tuba” dhe një komunitet në revoltë

Në Kaçinar të Mirditës, tensioni i mbledhur ndër vite shpërtheu në fundin e muajit mars në një protestë të mirëfilltë. Qindra banorë nga fshatrat përreth, por dhe diaspora u mblodhën për të kundërshtuar ndërtimin e katër hidrocentraleve të koncesionarit “Shpërdhaza-Energji”.

Banorët e konsiderojnë cenim kryesor për jetën e tyre futjen në tuba e disa prej përrenjve malorë, të cilët historikisht janë përdorur nga fshatrat.

Rruga e vështirë drejt Qafës së Vorres, rreth 40 minuta larg nga Rrësheni, ku u zhvillua protesta, tregonte njëkohësisht degradimin e territorit dhe tensionin e autoriteteve: postblloqe policore, kontrolle makinash dhe prezencë e pajustifikuar efektivësh.

“Këtu këtë popull e kanë grabitur,” përshkroi revoltën Arben Gega, një prej protestuesve, “por kur s’na ka bërë turku të ikim, këta jo se jo, nuk do t’ia arrijnë!”.

Gjok Beqiri, nga fshati Simon, tregoi se projekti prek shtatë fshatra me mbi 3,000 familje.

Kabina e rojeve dhe kamerat e sigurisë të vendosura përreth kantierit kishin krijuar një ambient të denjë për zonë ushtarake, ndërsa banorët, në mungesë informacioni dhe të vënë përballë faktit të kryer, ngritën dyshimet se dokumentacioni i kompanisë nuk është i rregullt.

Këtë shqetësim ndanë për Citizens.al disa prej tyre, të cilët thanë se nuk ishin njoftuar kurrë për dëgjesa publike, pavarësisht pretendimeve të kompanisë.

Në muajin prill, makineritë e kompanisë “Shpërdhaza-Energji” hynë në pyllin aty pranë, një zonë me një peizazh të larmishëm buzë rrugës, për të cilën banorët druajnë se mund të vuajë pasoja nga hidrocentralet.

Pasi konstatuan pemët e para të rrëzuara nga punimet ata organizuan protesta të tjera, një prej së cilës edhe në Tiranë, para ministrisë së Infrastrukturës.

Kryetari i fshatit Simon, Gjergj Deda, ngriti dyshimet se punimet po kryheshin pa lejet e nevojshme “sepse kërkonin dhe shoqëroheshin nga policia çdo ditë”.

Për komunitetin, uji është thelbi i jetesës: mullinjtë, tokat dhe historinë e tyre. “Vllaut s’ia fal, jo më të huajit,” kanë theksuar disa prej tyre.

Ndaj ata i janë drejtuar drejtësisë. Në shtator, Gjykata e Lezhës vendosi t’ia kalojë çështjen Strukturës së Posaçme Anti-Korrupsion (SPAK) duke shpallur moskompetencë.

Ndërsa në 16 dhjetor, Gjykata e Posaçme Kundër Korrupsionit dhe Krimit të Organizuar (GJKKO) vendosi t’ia delegojë çështjen Gjykatës së Lartë, e cila do të përcaktojë gjykatën kompetente për shqyrtimin e kallëzimit të bërë nga 13 banorë të Kaçinarit, kallëzim i kryer prej 25 nëntor-it 2019.

Kurdaria: Një verë e nxehtë kundër HEC-it “Doma”

Në Kurdari të Matit, vera shënoi nisjen e punimeve për HEC-in “Doma”, një projekt i “Global Interprise Group” që pritet të shfrytëzojë lumin e Lusës dhe të hapë një trase të re rruge prej 4.4 km.

Për banorët, ky projekt vjen në një kohë kur ata vuajnë për ujë, pavarësisht investimeve në ujësjellës.

Erind Saliaj, administrator i Njësisë Administrative Suç, shpjegoi për Citizens.al se pesë fshatrat e zonës – Kurdari, Skënderaj, Kurqelaj, Suç dhe Kujtim – nuk kanë furnizim të rregullt dhe se ndërtimi i një hidrocentrali është “absurd” në këto kushte.

Tregues për situatën ishte gjendja në kafenenë më popullore të fshatit, e cila shërbente vetëm ujë të ambalazhuar, teksa çezma e oborrit të saj ishte tharë.

Procesi i dëgjesave publike ka qenë pika kryesore e tensioneve në këtë çështje, e cila është shoqëruar me protesta dhe përplasje me kompaninë.

Një ekskavator dhe furgon me gomë të çarë qëndronin të braktisur në fund të trasesë së hapur si dëshmi e përplasjeve. Ato ruheshin nga një kamerë, e cila për ironi furnizohej me panel diellor.

Sipas banorëve, dëgjesa e parë, e vitit 2018, tregoi se shumica ishin kundër hidrocentraleve, por ndryshe, në procesverbal u paraqit si shprehje dakordësie.

Rexhep Kuleni, një nga zërat më të fortë të komunitetit, tha se ky veprim përbën shkelje penale, për të cilën duhet gjetur përgjegjësia.

Ai kujton dëgjesën e dytë të mbajtur në vitin 2020, kur rreth 500 banorë u mblodhën dhe kërkuan që përfaqësuesi i kompanisë që interesohej për hidrocentralin të largohej.

Por pavarësisht kundërshtive dhe premtimeve se nuk do të rikthehej në zonë, koncesionari u shfaq sërish, duke marrë firma në mënyrë të veçuar, pa pjesëmarrje lajmëruar të komunitetit apo autoriteteve.

“Marrin ca firma në mënyrë abuzive, ku një pjesë e madhe nuk e dinë çfarë kanë firmosur,” tha Kuleni, sipas së cilit në këto dëgjesa nuk ka pasur përfaqësues të bashkisë.

Banorët thonë se mungon transparenca, të dhënat, dhe mbi të gjitha mungon uji. Për ta, hidrocentrali është kërcënim ekzistencial dhe social, jo një projekt energjetik.

Zona, e njohur dhe si “hambari i Matit” për prodhimet bujqësore është zotuar se nuk do ta lërë projektin e hidrocentralit që të zbatohet duke vijuar ndalimin e makinerive t’i bashkohen kantierit.

“Nuk do ta lëmë, me firma të vjedhura, me firma të blera, populli nuk pranon,” theksoi Enver Dava, tokat e të cilit bien krah trasesë së hidrocentralit.

Më 22 tetor 2025, duke marrë parasysh tensionin mes banorëve dhe përfaqësuesve të firmës ndërtuese të hidrocentralit një grup pune nga AKBN-ja mbërriti në terren.

Në procesverbalin e mbajtur u konstatua hapje e trasesë për të pasur akses për punimet për hidrocentralin.

“Në momentin e monitorimit shoqëria nuk po arrinte dot të kryente punimet ndërtimore”, thuhet në procesverbalin e mbajtur nga grupi i punës së AKBN-së.

Paralelisht, banorët e kanë adresuar kundërshtinë e tyre edhe në rrugë gjyqësore. Në tetor, Gjykata Administrative e Shkallës së Parë nuk i ndali punimet, ndërsa deri në një vendim në themel të çështjes, por pavarësisht kësaj banorët mbeten me shpresë për një vendim të drejtë.

Zall-Gjoçaj: HEC-et u ndërtuan, por beteja kundër tyre vazhdon

Në Zall-Gjoçaj, hidrocentralet “Sekë” dhe “Zais” morën formë mes polemikave, por qëndresa e komunitetit atje vijon prej më shumë se shtatë vitesh.

Reportazhet e emisionit “Opinion” nga Blendi Fevziu dhe portali Lexo.al nga Flogert Muça, promovuan me kërshëri gjatë muajve shtator-tetor investimet në hidrocentralet e Zall-Gjoçajt.

Materialet u përpoqën t’i jepnin një dimension tjetër investimit privat të sipërmarrësit italian Fabio Scuero. Sipas tyre tre HEC-et e ngritura në basenin e Urakës me kapacitet 30 MË, janë shoqëruar me investime për një rrjet ujësjellësi për 17 fshatra dhe rreth 90 km rrugë.

Por reportazhet ngjallën zemëratën e banorëve të Zall-Gjoçajt, të cilët prej vitit 2018 kanë protestuar kundër HEC-eve.

Në një deklaratë të përbashkët aktivistët e cilësuan atë reklamë duke kujtuar se Zall-Gjoçaj është bërë simbol rezistence pikërisht sepse HEC-et u ndërtuan brenda Parkut Kombëtar “Lurë-Mali i Dejës”, një zonë e mbrojtur që u tkurr me një vendim të qeverisë në vitin 2022 për t’i hapur rrugë projektit të HEC-it “Zais”.

Prej vitesh, banorë si Abdi Toçi, Dhimitër Koleci dhe Adem Gjokolaj kanë protestuar, kallëzuar zyrtarë publikë dhe kanë çuar çështjen e Zall-Gjoçajt në disa procese gjyqësore.

Në tetor, Gjykata Administrative e Apelit la në fuqi vendimin që legjitimonte ndërtimin e HEC-eve, duke rrëzuar padinë për shfuqizimin e kontratave dhe akteve administrative.

Avokati i tyre, Franc Terihati, tha për Citizens.al se çështja do të shkojë në Gjykatën e Lartë, ndërsa Koleci tha se një padi tjetër po hetohet nga SPAK, dhe një padi penale mbetet e hapur për dëmet e shkaktuara gjatë punimeve, nga prishja e kanalit të ujit e deri te hedhja e inertëve në varreza.

Ndërkohë, kompania ka paditur vetë aktivistë e banorë për shpifje, gjë që komuniteti e sheh si formë presioni për të heshtur rezistencën.

Në terren, pasojat sipas banorëve janë të prekshme: uji është i gjithi në tuba, burimet e fshatit janë shteruar dhe lumi nuk ka më prurjen e mëparshme. Banorët thonë se gjatë verës nuk kishin ujë as për të fikur zjarret, ndërsa bagëtia dhe bletët kanë pësuar dëme të pakthyeshme.

Për Zall-Gjoçajn, beteja nuk ka të bëjë vetëm me një projekt energjetik, por me të drejtën për të ekzistuar brenda peizazhit të tyre.

Edhe pse hidrocentralet u ndërtuan, çështjet ligjore, pasojat mjedisore dhe mosbesimi ndaj institucioneve vazhdojnë ta mbajnë fshatin në një konflikt të hapur me modelin kombëtar të zhvillimit hidroenergjetik.

Lufaj njësoj si Zall-Gjoçajt përballë thatësirës

Në Lufaj të Mirditës, banorët përballen me të njëjtin model të ndërtimit të hidrocentraleve – devijim burimesh ujore pa transparencë dhe pa dëgjesa me komunitetin.

Në korrik ata protestuan kundër kompanisë “Seka Hydropoëer”, me pretendimin se ajo nuk respektonte kontratën e shfrytëzimit të burimeve ujore të zonës duke mos lëshuar rrjedhë për nevojat e tyre.

Zona me një peizazh të mrekullueshëm, nuk ndihmohej aspak nga rruga, e cila ishte në gjendje të amortizuar. Devijimi i prurjeve kishte ulur ndjeshëm burimet duke detyruar disa familje të merrnin ujë gjetkë me mjete të improvizuara.

Banorët thanë për Citizens.al se ata kishin qenë kundër ndërtimit të HEC-ve që para vitit 2017, por që zëri i tyre nuk ishte dëgjuar.

“As nuk na ka pyetur njeri, as nuk kemi qenë dakord,” tha Agron Kaçarri, banor.

Lufaj e lidh drejtpërdrejt fatin e saj me Zall-Gjoçajt, ku hidrocentralet u ndërtuan brenda Parkut Kombëtar të Lurës dhe Malit të Dejës, duke sjellë konflikt të gjatë me komunitetin, ndërhyrje policore dhe pasoja të pakthyera në ekosistem.

“Energji e gjelbër” me kosto të errët

Modeli i hidrocentraleve në Shqipëri është shitur si “një model i gjelbër”, por në realitet ka sjellë dëme të pakthyeshme ekologjike dhe ekonomike në nivele lokale, por edhe kombëtare.

Biologu Olsi Nika, i cili drejton organizatën mjedisore “Eco Albania”, thekson për Citizens.al se shumë projekte hidroenergjetike janë miratuar mbi leje të diskutueshme dhe pa analiza të plota të ndikimit, duke krijuar një zinxhir pasojash që shkon nga shpyllëzimi te shkatërrimi i habitateve ujore.

Sipas tij, devijimi i ujërave, rezervuarët e mëdhenj, ndotja, ndryshimi i temperaturës dhe oksigjenit kanë çuar në humbje speciesh, eutrofikim dhe homogjenizim të biodiversitetit – një proces që shumë zona nuk e rikuperojnë kurrë.

Rast konkret përmendet trofta apo dhe peshq të tjerë migratorë, të cilët nuk arrijnë zonat e shumimit për shkak të devijimeve të lumit apo dhe vetë impianteve hidroenergjetike.

Studimi për Zall-Gjoçajn i biologut Melitjan Nezaj nga Qendra për Ruajtjen dhe Mbrojtjen e Mjedisit Natyror në Shqipëri (PPNEA) e konkretizon problemin.

Me lënien e një sasie minimale të ujit ekologjik, shtrati i lumit thahet pak qindra metra larg veprave të marrjes.

“Në shtratin tashmë pa ujë kanë nisur të shfaqen bimë të mjediseve të thata, një shenjë e qartë e mungesës afatgjatë të ujit,” thekson Nezaj.

Kjo ka zhdukur faunën nënujore, ka degraduar bimësinë dhe ka goditur bujqësinë e banorëve, të cilët varen nga uji për prodhim dhe blegtori.

Ndërtimet kanë lënë pas inertë, kanale të dëmtuara dhe masa rehabilituese të dështuara, shpesh me bimësi jovendase dhe vendkalime peshqish që nuk funksionojnë.

Të dy ekspertët vlerësojnë se këto dëme nuk janë thjesht teknike, por strukturore: një model zhvillimi që shpërfill ligjin dhe zonat e mbrojtura, mungesën e konsultimeve, ndikimet afatgjata dhe transparencën.

“Shumë komunitete,” thekson Nika, “mësuan për projektet e HEC-eve vetëm kur kishin nisur punimet”.

Konfliktet për ujërat janë bërë tipike nga Rapuni te Kaçinari, Kurdaria, Zall-Gjoçaj e Lufaj duke treguar se përfitimet i shkojnë pak aktorëve, ndërsa kostoja bie mbi komunitete dhe ekosisteme të cenueshme.

Ata që fitojnë nga ky model mbeten disa kompani, disa prej të cilave me kapitale të huaja. Ndërsa komunitetet humbasin të tjera burime dhe mundësi zhvillimi duke pasur një arsye më shumë për t’u larguar.

Në plan më të gjerë, ekspertët argumentojnë se hidrocentralet e vogla me fuqi të ulët kanë efikasitet të diskutueshëm dhe shpesh gjurmë të larta karboni, përfshirë prodhimin e metanit nga rezervuarët.

Për biologun Nika, energjia hidroelektrike në Shqipëri duhet parë si “me karbon të ulët, por me ndikim të lartë”, ndërsa zhvillimi i qëndrueshëm kërkon orientim te burimet që nuk fragmentojnë lumenjtë: kryesisht energjia diellore dhe ajo e erës.

The post Energji në kurriz të komuniteteve; mbi 200 hidrocentrale private në 15 vjet appeared first on Citizens.al.

TIRANË, 5 dhjetor/ATSH/ Procesi i rindërtimit pas tërmetit të nëntorit 2019 ishte në qendër të dëgjesës publike për buxhetin 2026 të Bashkisë Tiranë, zhvilluar me banorët e Kombinatit.

Gjatë takimit, banorët ngritën shqetësimet për ecurinë e projekteve.

Nënkryetari i bashkisë Tiranë, Ilir Mëngra, bëri të ditur se nga 688 familje të identifikuara fillimisht, rreth 230 i kanë marrë tashmë apartamentet e reja. Po ashtu, procesi i shortit për ndarjen e banesave është në zhvillim.

“Sot dhe nesër ndahen 82 apartamente të tjera, ndërsa më 31 dhjetor do të hidhet shorti për 80 banesa. Për 75 apartamente të tjera punimet përfundojnë në shkurt”, tha Mëngra.

Ai theksoi se, për shkak të shpronësimeve të domosdoshme gjatë zbatimit të projekteve, numrit fillestar të familjeve i janë shtuar edhe rreth 200 të tjera, duke çuar totalin e apartamenteve të nevojshme në afro 1000.

Sipas tij, rindërtimi në zonën e Kombinatit pritet të përmbyllet mes viteve 2027-2028, pasi aktualisht pesë pallate ndodhen ende në fazë dokumentacioni, ndërsa tre të tjera do të nisin të ndërtohen gjatë vitit 2026.

Në fjalën e saj, nënkryetarja e bashkisë, Vasilika Vjero, u ndal tek investimet në transportin publik, pjesë e buxhetit të vitit të ardhshëm.

“Do të rikonceptohet lëvizja në tri linja kryesore të transportit: linja Kinostudio-Kombinat, ajo e Unazës dhe linja e Tiranës së Re do të kenë korrigjim të korsive dhe reduktim të vonesave në stacione”, u shpreh Vjero.

Një tjetër projekt i rëndësishëm që nis zbatimin në 2025 është pilotimi i ushqimit në shkolla, nga klasa e parë deri në të pestën, një nismë që synon të rrisë cilësinë dhe mbështetjen për nxënësit në arsimin fillor.

/a.f/r.e/

The post Rindërtimi pas tërmetit në Kombinat mbyllet në 2028-ën appeared first on Agjencia Telegrafike Shqiptare.

Gjashtë vite pas tërmetit shkatërrimtar të 26 nëntorit 2019, pallati 71 në rrugën ‘Luigj Gurakuqi’ në lagjen ‘Besëlidhja’ (ish BKT) në Lezhë nuk është rindërtuar. Shtatë familje vijojnë të pa streha pavarësisht se fondet për rindërtimin e objektit kanë thuajse një vit të buxhetuara.

Bashkia e Lezhës miratoi në buxhetin e këtij viti mbi 76 milionë lekë për pallatin. Por, siç pohon ky institucion, procesi i rindërtimit nuk ka nisur sepse nuk ka një vendim të Këshillit të Ministrave që përcakton njësinë zbatuese për projektin. Pa këtë vendim, Bashkia nuk mund të fillojë zbatimin e punimeve.

“Këshilli i Ministrave me vendimin nr. 133, datë 13.02.2020 ka caktuar vetëm Fondin Shqiptar të Zhvillimit si njësi zbatuese per procesin e rindertimit në zonë të re për zhvillim, ku në rastin konkret në këtë zonë përfshihet edhe pallati Nr. 71,”- argumenton Bashkia e Lezhës. 

Nga ana tjetër, Këshilli i Ministrave konfirmoi për Faktoje se deri më tani nuk ka marrë asnjë vendim për të përcaktuar njësinë zbatuese të pallatit 71. Bashkia Lezhë thekson se është e gatshme të nisë punimet menjëherë sapo të marrë këtë autorizim.

Pesë familje të pallatit vijojnë të marrin bonusin e qirasë, i cili do të vazhdojë deri në përfundimin e objektit. 

“Vlera e bonusit të qirasë ndryshon sipas numrit të pjesëtarëve të familjes,”- sqaron Bashkia.

50 familje të pastreha pas tërmetit

Deri tani, në Bashkinë Lezhë janë rindërtuar 5 pallate, ku janë strehuar 180 familje, ndërsa 14 banesa individuale janë rindërtuar nga donatorë dhe 175 banesa individuale janë rindërtuar nga vetë banorët përmes granteve të rindërtimit. 

Megjithatë, 50 familje ende nuk janë strehuar përfundimisht dhe vazhdojnë të trajtohen me bonus qiraje. 

Bashkia Lezhë thekson se është angazhuar të përfundojë sa më shpejt të gjithë procesin e rindërtimit, duke bashkëpunuar ngushtë me Ministrinë përgjegjëse për rindërtimin, megjithëse ende nuk ka një afat të saktë për përmbylljen e punimeve për rastet e mbetura.

Përfundim

Fillimisht, rindërtimi i Pallatit 71 në Lezhë u mor përsipër nga Fondacioni Firdeus, përmes një marrëveshje të nënshkruar me Bashkinë e Lezhës. 

Palët nuk gjetën dakordësi, dhe Bashkia thotë se Fondacioni u tërhoq nga financimi pa dhënë arsyet. Pas kësaj, Bashkia miratoi fondet për vitin 2025, por punimet nuk kanë nisur ende, pasi pret vendimin e Këshillit të Ministrave që ta caktojë si njësinë zbatuese për rindërtimin. Ndërkohë, pesë familje vijojnë të marrin bonus qiraje, ndërsa gjashtë vite pas tërmetit, 50 familje në Lezhë ende nuk janë strehuar përfundimisht.

Bazuar në informacionet e mbledhura, premtimin e kryetarit të Bashkisë së Lezhës, Pjerin Ndreu, për rindërtimin e pallatit 71 në lagjen Besëlidhja, do ta kategorizojmë pjesërisht të mbajtur. 

Faktoje, e mbështetur nga National Endowment Democracy (NED) po monitoron 10 bashki në vend dhe po verifikon nëse janë mbajtur ose jo premtimet e dhëna nga kryebashkiakët.

The post Lezhë, dhjetra familje të pastreha 6 vite pas tërmetit appeared first on Faktoje.al.

TIRANË, 22 nëntor/ATSH/ Bashkia e Kolonjës njoftoi sot qytetarët se uji i rrjetit nuk duhet të përdoret për konsum deri në daljen e një njoftimi të ri.

Sipas njoftimit zyrtar, vendimi është marrë si masë paraprake, pasi analizat e kryera mbi ujin e rrjetit të qytetit kanë treguar prezencë ndotjeje mikrobike dhe fiziko-kimike.

“Si pasojë e reshjeve intensive të ditëve të fundit, analizat e kryera mbi ujin e rrjetit të qytetit kanë treguar prezencë ndotjeje mikrobike dhe fiziko–kimike. Uji i rrjetit nuk duhet të përdoret për konsum deri në një njoftim të dytë”, bën të ditur Bashkia.

Autoritetet u bëjnë thirrje qytetarëve të respektojnë udhëzimin deri në rikthimin e normalitetit dhe publikimin e njoftimit të radhës, ndërsa specialistët e ujësjellësit dhe të shëndetit publik ndodhen në terren për të monitoruar situatën. /j.p/

The post Ndotje nga reshjet në ujësjellës, Bashkia e Kolonjës ndalon përdorimin për konsum appeared first on Agjencia Telegrafike Shqiptare.

TIRANË, 21 nëntor/ATSH/ Brunilda Mersini mori sot zyrtarisht detyrën si kryetare e bashkisë së Vlorës.

Ceremonia e marrjes së detyrës u organizua në teatrin “Petro Marko” ku të pranishëm ishin drejtuesi politik i qarkut të Partisë Socialiste, Bledi Çuçi dhe këshilltarët bashkiakë socialistë teksa kanë munguar ata nga opozita.

Në fjalën e saj Mersini tha se “kjo detyrë është mision dhe përgjegjësi dhe falënderim për qytetarët e Vlorës, të cilat në vite kanë besuar vizionin e kryeministrit Edi Rama. Së bashku me qytetarët dhe çdo njeri që do të jetë partner në punën tonë do të krijojmë një frymë bashkëpunimi për t’i çuar përpara të gjithë projektet dhe të thithim projekte të reja në një qytet që do të jetë porta e re e Europës së bashku aeroportin”.

Mersini e cila u zgjodh kryebashkiake në zgjedhjet e pjesshme vendore në 9 nëntor, kërkoi gjithashtu bashkëpunimin e anëtarëve të këshillit bashkiak për të çuar përpara projektet për Vlorë.

Ndërkaq gjatë ditës së sotme qytetarë dhe përfaqësues të bizneseve në Vlorë kanë protestuar përpara bashkisë kundër aksionit të Inspektoriatit të Mbrojtjes së Territorit (IMT), për lirimin e hapësirave publike.

/k.s/ /a.g/

The post Mersini merr zyrtarisht detyrën si kryebashkiake e Vlorës, përfaqësues të bizneseve protestë për aksionin e IMT-së appeared first on Agjencia Telegrafike Shqiptare.

Kreu i Partisë Demokratike, Sali Berisha, reagoi pas përfundimit të zgjedhjeve të pjesshme të 9 nëntorit, ku opozita humbi në pesë bashki. Në një deklaratë për mediat, pas mbledhjes së grupit parlamentar, ai e cilësoi procesin si “farsë elektorale” dhe Shqipërinë si një “diktaturë totalitare”. Berisha falënderoi kandidatët e pavarur për guximin e treguar dhe […]

The post Berisha pas zgjedhjeve të pjesshme: Me këtë qeveri s’bën dot zgjedhje, ishin farsë appeared first on BoldNews.al.

Sali Berisha komentoi sot pas mbledhjes së grupit parlamentar të Partisë Demokratike edhe zgjedhjet e pjesshme të 9 nëntorit, ku në të pesta bashkitë kandidatët e pavarur që mbështeti opozita humbën përballë rivalëve socialistë.

Berisha i pyetur nga gazetarët për zgjedhjet, u shpreh se dje u provua ajo që Partia Demokratike kishte deklaruar pas 11 majit, se në farsa elektorale nuk bëhen zgjedhje.

Ai falënderoi të gjithë kandidatët e pavarur për guximin e treguar, duke sqaruar se PD nuk i bojkotoi zgjedhjet e pjesshme lokale, por mbështeti ata kandidatë, pavarësish farsës së partisë shtet.

“Falenderoj përzemërsisht kandidatët e pavarur për guximin e treguar dhe kjo faktoi se Shqipëria është në farsë elektorale, diktaturë totalitare dhe Shqipëria po njihet e tillë. Qytetarët dhe të gjithë e panë, ishte vetëm farsë elektorale. Ne nuk ishim në zgjedhje, në ishim në mbështetje të tyre, dhe ky nuk ishte bojkot nga ana jonë, jo. Ne bëmë thirrje për qytetarët që të votonin dhe mbështetëm kandidatët e pavarur”, tha Berisha mes të tjerash.

Për arsyet pse PD nuk vendosi kandidatët e saj në këto zgjedhje, kreu i selisë blu shpjegoi se ata kishin studiuar veprimet e partisë shtet dhe narkoshtetit, duke konstatuar se ata bëjnë vetëm farsa elektorale, që i kishin denoncuar hapur. Megjithatë ai deklaroi se opozita nuk do dorëzohet në betejën e saj, për të luftuar regjimin.

“Ishin disa veprime të studiuara mirë se kjo qeveri zgjedhje nuk bën dhe kjo e provoi. Unë mendoj se farsa duhet luftuar, se në farsë nuk ka zgjedhje”, tha ai.

The post Humbja e 5 Bashkive, Berisha: Në farsë elektorale nuk ka zgjedhje! Falenderoj kandidatët e pavarur për guximin që treguan, nuk bojkotuam por i mbështetëm ata appeared first on Albeu.com.

Ditën e djeshme 9 Nëntor 2025, u zhvilluan zgjedhjet e pjesshme lokale në pesë bashki të vendit: Vlorë, Tepelenë, Mat, Cërrik dhe Berat.

Në orët e para të mëngjesit të sotë, përfundoi procesi i numërimit për të pesta bashkitë, ku fituan kandidatët nën logon e Partisë Socialiste, përballë kandidatëve të pavarur, disa prej të cilëve ishin mbështetur nga opozita, por pa logon zyrtare të ndonjë partie të kampit përkatës.

Përjashtim bëri vetëm Cërriku, ku një prej kandidatëve ishte pjesë e Lëvizjes “Shqipëria Bëhet”.

Ajo që ra në sy në këto zgjedhje, sipas statistikave zyrtare nga KQZ, ishte pjesëmarrja e ulët në votime dhe statistikat mbi moshat e votuesve këtë të dielë.

Vihet re se të rinjtë deri në moshën 25-vjeç pothuajse refuzuan të marrin pjesë në zgjedhje, duke arritur në rastin më të mirë deri në 29 për qind.

Nga ana tjetër, ata që përcaktuan rezultatin dhe fitoren e kandidatëve socialistë ishin kryesisht votuesit e moshës së tretë, të cilët shënuan pjesëmarrje të lartë.

Kandidatët fitues:

Vlorë – Bruna Mersini (PS)

Mat – Altin Bojni (PS)

Tepelenë – Gramoz Sako (PS)

Berat – Ervin Ceca (PS)

Cërrik -Florenc Doka (PS)

The post Mosha e tretë “vulos” fitoren e PS-së në 5 Bashki, të rinjtë refuzuan votimet (FOTO) appeared first on Albeu.com.

TIRANË, 9 nëntor /ATSH/ Procesi i numërimit të votave ka nisur në bashkinë e Tepelenës.

Pas numërimit të kutisë së parë, kandidati i Partisë Socialiste, Gramoz Sako rezulton në avantazh të thellë ndaj rivalit Gabriel Guma.

Në kutinë e parë të Nivicës, kandidati i PS, Gramoz Sako, ka marrë 199 vota, ndërsa Gabriel Guma i PD-së vetëm 6 vota.

Edhe në Berat është hapur kutia e parë në KZAZ 67, ku kryeson kandidati socialist Ervin Ceca 145 vota, ndjekur nga kandidati i pavarur Pavllo Shkarpa me 8 vota, ndërsa 6 vota janë shpallur të pavlefshme.

Sot u votua në 5 bashki të vendit, Vlorë, Tepelenë, Mat, Cërrik dhe Berat. Në të gjitha qendrat e votimit të pesë bashkive kishin të drejtë vote në total 334 mijë qytetarë, ku pjesëmarrja e tyre rezultoi me 18.51%.

Pjesëmarrjen më të lartë e shënoi Bashkia Mat me 39.23%, ndërsa më e ulët ishte në Bashkinë Vlorë me 12.59%. Pjesëmarrja në bashkitë e tjera ishte: Tepelenë 34.63%, Cërrik 24.81% dhe Berat 19.81%.

Procesi i votimit në zgjedhjet e pjesshme vendore u zhvillua kryesisht në mënyrë të qetë dhe pa incidente.

/gj.m/j.p/

The post Numërohen kutitë e para në Tepelenë dhe Berat, kryesojnë kandidatët e PS appeared first on Agjencia Telegrafike Shqiptare.

Mbyllet orari zyrtar i votimit të zgjedhjeve lokale në pesë bashki të vendit. Qendrat e votimit në Mat, Cërrik, Berat, Vlorë dhe Tepelenë u hapën në ora 07:00 të mëngjesit të sotëm.

KQZ vendosi që votimet të mbylleshin në ora 18:00 dhe jo në 19:00 siç është traditë në zgjedhjet, për shkak të stinës në të cilën ndodhemi.

Deri pak momente më parë, të dhënat e KQZ-së flasin për një pjesëmarrje mjaft të ulët në votime, rreth 17.9%.

The post Mbyllet orari zyrtar i votimit për zgjedhjet e pjesshme lokale në 5 bashki appeared first on Albeu.com.

Kur duhen edhe dy orë nga përfundimi i orarit zyrtar për votimin në zgjedhjet e pjesshme lokale në 5 bashki në vend, mbetet ende e ulët përqindja e pjesëmarrjes së votuesve.

Komisioni Qëndror i Zgjedhjeve ka publikuar shifrat e pjesëmarrjes së votuesve deri në orën 16:00 (qendrat mbyllen në orën 18:00).

Përqindja totale e pjesëmarrjes është 16,93%, e mbi 330 mijë zgjedhësve në të pesta bashkitë.

Bie në sy se përqindjen më të lartë të pjesëmarrjes deri tani e ka Bashkia Mat me 37,5%, e ndjekur nga Tepelena me 31,05%, Cërriku me 23,8%, Berati me 17,2% dhe në fund Vlora me 11,36% që vijon trendin e zakonshëm të saj me pjesëmarrjet e ulëta në votime.

Duhet theksuar se këto shifra i përkasin një raportimi jo për të gjitha qendrat e votimit, pasi ka shumë qendra që ende nuk kanë dërguar informacion në KQZ.

Pothuajse në të pesta bashkitë kanë raportuar mesatarisht vetëm gjysma e qendrave të votimit, ndaj pritet që përqindja të rritet në orët në vijim.

Tabela e KQZ deri në orën 16:00:

-Bashkia Vlorë

11,36%

-Bashkia Berat

17,22%

-Bashkia Cërrik

23,83%

-Bashkia Mat

37,5%

-Bashkia Tepelenë

31,05%

Perditesimi i te dhenave ne kohe reale

Kandidatët

1- Bashkia Vlorë

Brunlida Mersini PS

Dionis Sota i pavarur, mbështetet nga PD

Gjergji Nika i pavarur

2- Bashkia Berat

Ervin Ceca PS

Pavlo Shkarpa i pavarur, mbështetet nga PD

3-Bashkia Tepelenë

Gabriel Guma i pavarur, mbështetet nga PD

Gramoz Sako PS

4- Bashkia Mat

Altin Bojni PS

Eduard Brahilika i pavarur, mbështetet nga PD

Suzana Pasha e pavarur

5- Bashkia Cërrik

Florenc Doka PS

Eligert Hima Shqipëria Bëhet

Amarildo Hoxha i pavarur, mbështetet nga PD

The post Dy orë nga përfundimi i procesit të votimit në 5 Bashki, KQZ publikon tabelat! Ja sa është pjesëmarrja e zgjedhësve dhe pritshmëritë appeared first on Albeu.com.

TIRANË, 9 nëntor/ATSH/ marseda Qefalia/ Qytetarët e Vlorës po i drejtohen sot kutive të votimit për të zgjedhur kryetarin e ri të bashkisë, në kuadër të zgjedhjeve të pjesshme vendore që po zhvillohen në pesë bashki të vendit.

Procesi i votimit ka nisur në orën 07:00 dhe do të vijojë deri në orën 18:00 në gjithsej 232 qendra votimi.

Në një prononcim për Agjencinë Telegrafike Shqiptare (ATSH), komisionerja e Qendrës së Votimit nr. 4498/1, në shkollën Industriale “Pavarësia” në Vlorë, Julka Kojani, tha se procesi ka vijuar normalisht dhe nuk janë hasur problematika deri më tani.

Megjithatë, ajo theksoi se pjesëmarrja ka qenë e ulët, çka sipas saj mund të jetë ndikuar edhe nga kushtet atmosferike.

“Pjesëmarrja është e ulët, mund të ketë ndikuar shiu që ka nisur që prej orës 12:00. Presim që në orët e fundit të shtohet fluksi i votuesve. Shpresojmë në një pjesëmarrje më të lartë deri në mbyllje të procesit”, u shpreh Kojani.

Komisionerja u bëri gjithashtu thirrje qytetarëve të dalin në votime dhe të shprehin vullnetin e tyre në mënyrë demokratike.

Sipas të dhënave të Komisionit Qendror të Zgjedhjeve, në Vlorë janë 171 895 qytetarë me të drejtë vote. Në garë për drejtimin e bashkisë janë Brunilda Mersini nga Partia Socialiste, Dionis Sota, kandidat i pavarur i mbështetur nga Partia Demokratike, dhe Gjergji Nika, kandidat i pavarur.

Zgjedhjet e parakohshme në bashkinë e Vlorës po zhvillohen pas dorëheqjes së kryetarit të mëparshëm, Ermal Dredha. Pas mbylljes së qendrave të votimit, pritet të nisë menjëherë procesi i numërimit të votave.

Zgjedhjet e pjesshme po mbahen sot edhe në bashkitë Berat, Cërrik, Mat dhe Tepelenë. /j.p/

The post Vijon votimi në Vlorë, komisionerja Kojani: Presim rritje të pjesëmarrjes në orët e fundit appeared first on Agjencia Telegrafike Shqiptare.

“E djathta jo vetëm që nuk është por ka bërë një veprim dinak. E ka kuptuar se nuk ka patur shance as interes për të fituar, personat që janë vënë janë qytetarë që janë vetëofruar,” kështu u shpreh në studion e ABC News, analistja Brizida Gjikondi.

“Partitë e vogla, si Lapaj, Shehja, me ligjërimin e interes qytetar, nuk kanë ofruar kandidatura të spikatura. Nuk ka ndonjë impenjim. Praktisht PS këto zgjedhje i ka me vete.

Në Mat ka një pjesëmarrje të lartë, këtë e lëxoj si investim i kryebashkiakut që ka dalë nga ajo Bashki, si një formë ‘qoke’ e qytetarëve karshi tij.

Vlora është lakmuesi se sa probleme ka e majta. E dimë shumë mirë që Vlora ka shumë dinamizëm, ky indiferentizëm flet shumë.

E mjata shqiptare është përpjekur ta shpërbëjë PD-në e Vlorës, pamë edhe një goditje nga z. Leksaj që dha dorëheqjen pak para zgjedhjeve. Vetë PD e Vlorës, nuk vuri një personazh të spikatur. Vetë vlonjatët janë të lodhur nga kandidaturat që ofron qëndra në Tiranë, duke injoruar shpirtin vlonjat.” -tha ajo./abcnews.al

Sebi Alla – Pesë bashki të vendit janë sot në provën e zgjedhjes së kryebashkiakëve të rinj, në zgjedhjet e pjesshme lokale, që do të kenë për një mandat të kufizuar deri në zgjedhjet e ardhshme lokale të vitit 2027.

Mbi 334 mijë qytetarë të pesë bashkive do të përzgjedhin mes 13 kandidatëve të ofruar.

Bashkitë Vlorë, Berat, Cërrik, Tepelenë dhe Mat zhvillojnë zgjedhjet për kryebashkiakë, pas dorëheqjes së kryetarëve të mëparshëm pasi tre u zgjodhën deputetë ish-kryebashkiaku i Beratit Ervin Demo, ai i Tepelenës Tërmet Peçi dhe i Matit Agron Malaj, që të tre në radhët e PS-së, ndërsa kryetari i Bashkisë Cërrik Andis Salla u emërua ministër i Bujqësisë dhe Zhvillimit Rural.

Në Vlorë ish-kryebashkiaku Ermal Dredha dha dorëheqjen pas disa kritikave nga kryeministri Rama për punën jo të mirë sipas tij të kësaj bashkie në kulmin e sezonit turistik.

Vlora

Në pesë bashkitë e vendit janë 13 kandidatë për të fituar postin e kryebashkiakut. Në Vlorë, tre kandidatët Brunilda Mersini e PS-së dhe dy të pavarurit Dionis Sota dhe Gjergj Nika.

Edhe pse fushata ka qenë jo shumë aktive, kandidatët në rrjetet sociale apo në daljet në media, kryesisht ato lokale kanë parashtruar projektin e tyre për bashkinë.

“E duam Vlorën edhe në dimër me të njëjtin intensitet. Sfida ime është të ndërtoj një qytet më të pastër, me ritëm të qëndrueshëm zhvillimi, ku të majtë e të djathtë bien dakord për nevojën e përbashkët për progres”, tha kandidatja e PS-së Brunilda Mersini.

Ajo u shpreh optimiste për rezultatin e zgjedhjeve duke deklaruar në podkastin e drejtuar nga kryeministri se: “Shpresoj të marr 80% të votave”.

Nga ana tjetër kandidati Dionis Sota doli si i pavarur, por që më vonë u mbështet nga opozita, ndërsa kandidatura tjetër po në siglën “i pavarur” është ajo e Gjergji Nikës, aktualisht anëtar në Këshillin Bashkiak të Vlorës, si përfaqësues i së djathtës.

Sota premton transparencë totale të buxhetit, ndërhyrje të menjëhershme në infrastrukturë e kanalizime, start-upe për të rinjtë dhe ndërtimin e lagjeve ekologjike.

Ndërsa Nika në një nga postimet e tij në rrjetet sociale shprehet se procesi politik në këtë qytet ka degraduar nga gara reale dhe alternativa e vërtetë.

“Nuk është e lehtë, madje është e dhimbshme të shohësh qytetin tënd të rrëshqasë nga një periudhë ku kandidaturat kishin qytetari, peshë, integritet, pasion dhe vizion, në një realitet ku gjithçka është kthyer në një lojë interesash, tallje dhe degradim moral”, shkruan ai, ndërsa shton se kandidati i opozitës duhet të kishte një peshë reale, dhe jo të jetë një eksperiment.

Tepelena

Në Bashkinë Tepelenë, Partia Socialiste kandidon me Gramoz Sakon, ish-Komandant i Gardës së Republikës, ndërsa si kandidat i pavarur Gabriel Guma, ai është 26 vjeç dhe ka mbaruar studimet në Fakultetin e Arkitekturës & Dizanj në Universitetin Polis.

Guma mbështetet nga opozita. Të dy kandidatët kanë shprehur vizione të ndryshme për drejtimin e Bashkisë, ku kandidati i PS-së kërkon vijimësinë, ndërsa Guma tregon për ndryshimin e nevojshëm sipas tij.

Berat

Në Bashkinë Berat Partia Socialiste vendosi të kandidojë nënkryetarin aktual të bashkisë Ervin Ceca, ndërsa përballë tij do të jetë kandidati i pavarur Pavlo Shkarpa, i mbështetur nga opozita.

I diplomuar në Ekonomi Ndërkombëtare në Universitetin e Padovës në Itali Ceca u kandidua nga socialistët si vijimësi, pasi më parë ka drejtuar edhe Këshillin Bashkiak.

Nga ana tjetër Shkarpa shprehet se “synimi ynë është të ndërtojmë një bashki që i shërben qytetarëve me transparencë, ndershmëri dhe përkushtim”.

Cërrik

Në Bashkinë Çërrik janë tre kandidatë që synojnë postin e kryebashkiakut. Nga Partia Socialiste kandidon Florenc Doka, i diplomuar në Drejtësi, në vitin 1999 duke marrë titullin jurist, si dhe në vitin 2008 me titullin avokat.

I lindur në Gramsh në vitin 1986 dhe banues në Cërrik që prej vitit 1996, Eligert Hima është prind i dy fëmijëve dhe jeton në Romë, ku ka përfunduar studimet e larta për Hetuesi dhe Kriminologji pranë Universita Popolare di Milano.

Nga ana tjetër, Amarildo Hoxha (i pavarur). Hoxha është me profesion mjek dhe do të përfaqësojë gjithashtu PD e Cerrikut në garën për Kryetarë Bashkie në zgjedhjet e pjesshme më 9 Nëndor.

Mat

Në Bashkinë Mat janë përballë tre kandidatë me profile të ndryshme: Altin Bojni, ekonomist dhe ish-kryetar i Këshillit Bashkiak, që përfaqëson Partinë Socialiste; Eduart Brahilika, jurist dhe kandidat i mbështetur nga Partia Demokratike; si dhe Suzana Pasha, ish-drejtuesja e forumit të grave socialiste, që kandidon si e pavarur.

The post Zgjedhje në 5 bashki, kush janë 13 kandidatët dhe çfarë premtojnë appeared first on Faktoje.al.

Për analistin pranë ABC News, Artur Nura këto zgjedhje të pjesshme lokale nuk do të kenë asnjë suprizë sa i përket rezultati.

“Njëri nga kandidatët foli qartë do konfirmojmë rezultatin. Nuk do kemi asgjë të re nga kapmi i zgjedhjeve, fushata ishte e limituar, vijnë në kohë të ngjeshur.

Pala tjetër duket se është e dorëzuar plotazi. Opozita në këtë rast është e papërgatitur dhe duket e painteresuar. Është në fakt mungesë përgjegjësie, sepse këto zgjedhje lidhen drejtpërdrejt me interesat e qytetarëve.

Kur ti nuk i respekton këto si mund të të respektojë qytetari ty. Ndaj besoj se nuk do të kemi asnjë të re nga kampi i zgjedhjeve.” -tha Nura ndërsa komentoi edhe thirrjet e kreut të PD, Sali Berisha për protesta.

“Berisha ka përmendur protestat po si mund të vijnë në protesta qytetarët, ndaj mendoj se do jenë protesta të dobëta. Edhe koha me shi nuk është e favorshme. Pjesëmarrja është e ulët, edhe qytetarët nuk kanë ndonjë kuriozitet të madh sepse e dinë kush do të fitojë.” tha ai.

Ditën e sotme rreth 335 mijë qytetarë, janë thirrur në votime për të zgjedhur kryebashkiakët e rinj në pesë bashki të vendit: Vlorë, Tepelenë, Berat, Cërrik dhe Mat.

Bashkia me numrin më të madh të votuesve është Vlora, me afro 171 mijë zgjedhës, ndërsa më e vogla është Tepelena, me rreth 13 mijë votues.

Në këto zgjedhje, Partia Socialiste, ka kandiduar Brunilda Mersinin në Vlorë, Ervin Cecën në Berat, Gramoz Sakon në Tepelenë, Florenc Dokën në Cërrik dhe Altin Bojnin në Mat.

Opozita e bashkuar nuk ka paraqitur kandidatë politikë, por ka vendosur të mbështesë kandidatë të pavarur.

Në Vlorë, ajo mbështet Dionis Sotën, ndërsa në garë ndodhet edhe Gjergj Nika, anëtar i Këshillit Bashkiak i zgjedhur në listat e Partisë Demokratike në vitin 2023.

Për Bashkinë e Beratit, opozitarët mbështesin Pavlo Shkarpën, në Tepelenë garon Gabriel Guma, ndërsa në Cërrik janë në garë Amarildo Hoxha (i pavarur) dhe Eligert Hima, përfaqësues i “Lëvizja Shqipëria Bëhet”.

Në Mat, konkurrojnë Eduart Brahilika (i pavarur) dhe Suzana Pasha, ish-drejtuesja e Forumit të Gruas në PS.

Për garantimin e rendit dhe sigurisë gjatë procesit zgjedhor, Policia e Shtetit ka hartuar një plan të detajuar masash.

Mbi 600 efektivë do të jenë në terren përgjatë gjithë ditës, ndërsa janë marrë në ruajtje 473 qendra votimi dhe 9 godina ku ndodhen Komisionet Zonale të Administrimit të Zgjedhjeve (KZAZ), ku do të zhvillohet edhe numërimi i votave.

Kryebashkiakët që do të zgjidhen nga ky proces do të ushtrojnë mandatin e tyre deri në vitin 2027, kur pritet të zhvillohen zgjedhjet e radhës për pushtetin vendor në të gjithë vendin.

The post Sot zgjedhjet e pjesshme vendore, 335 mijë qytetarë votojnë në 5 Bashki appeared first on Albeu.com.

TIRANË, 8 nëntor/ATSH/- Komisioneri Shtetëror i Zgjedhjeve, Ilirjan Celibashi ka rikujtuar orarin zyrtar të hapjes dhe mbyllljes së qendrave të votimit në pesë bashki ku nesër do tê mbahen zgjedhjet për kryetar bashkie.

Celibashi deklaron se procesi i votimit nis në orën 07:00, ndërsa mbyllja e qendrave të votimit është deri në orën 18:00.

Në zgjedhjet r pjesshme vendote do të votohet për zgjedhjen e kryetarëve të rinj në pesë bashki, Vlorë, Berat, Cërrik, Mat, Tepelenë.

Komisioneri Celibashi ka ftuar të gjithë qytetarët e këtyre bashkive që të ushtrojnë të drejtën e tyre të votës, duke respektuar rregullat e procesit.

The post Celibashi publikon orarin e hapjes dhe mbylljes së qendrave të votimit appeared first on Agjencia Telegrafike Shqiptare.

Të dielën, më 9 nëntor, mbi 334 mijë qytetarë në pesë bashki të vendit do t’i drejtohen kutive të votimit për të zgjedhur kryetarët e rinj. Procesi zgjedhor zhvillohet në Mat, Cërrik, Berat, Vlorë dhe Tepelenë, si pasojë e vakancave të krijuara në drejtimin e bashkive përkatëse. Ndërsa sot, më 8 nëntor, është dita e […]

The post Nesër votohet në pesë bashki, baza materiale gati nëpër KZAZ appeared first on BoldNews.al.

Bashkia Vlorë, Cërrik, Tepelenë, Mat dhe Berat nesër do të kenë zgjedhjet e pjesshme lokale. Ndaj dhe sot ka nisur shpërndarja e bazës materiale në KZAZ nr. 84 të Bashkisë së Vlorës. Kryetari i kësaj KZAZ-je, Romarjo Meminaj, bëri të ditur se procesi po zhvillohet normalisht dhe pa probleme. Sipas tij, të gjitha qendrat e votimit janë tashmë gati për të marrë bazën materiale. Në këtë KZAZ janë…

Source

Sot është ditë heshtjeje zgjedhore në pesë bashki të vendit, ndërsa nesër qytetarët do t’u drejtohen kutive të votimit për të zgjedhur kryebashkiakët e rinj. Në total, 334.539 votues në Vlorë, Berat, Cërrik, Mat dhe Tepelenë do të kenë mundësinë të shprehin vullnetin e tyre në zgjedhje. Komisioni Qendror i Zgjedhjeve ka shpërndarë materialet zgjedhore […]

The post Sot heshtje zgjedhore, nesër qytetarë do zgjedhin kryetarët e 5 bashkive appeared first on BoldNews.al.