Ekspertët e udhëtimit kanë zbuluar disa nga destinacionet më emocionuese evropiane këtë vit, nga ishujt e paprekur në Finlandë, vendpushimet me çmime të përballueshme në Bullgari e deri te shtigjet e fshehura në Shqipëri.
“The Guardian”, gazeta e përditshme britanike, e ka renditur Shqipërinë midis 26 vendeve më emocionuese dhe të përballueshme për pushime familjare.
Vizitoni shtigjet e fshehura në Shqipëri
Vizita jonë e parë familjare me pushime në Shqipëri na la një përshtypje të paharrueshme dhe vërtetoi se largimi nga destinacionet turistike të njohura dhe të mbipopulluara shpesh sjell shpërblime më të mëdha.
Kaluam dy netë në bujtinën “Lëpushë”, një shtëpi mysafirësh e rrethuar nga pemishte, koshere bletësh dhe ferma të vogla që shtriheshin drejt një amfiteatri gjigant – që kufizohej nga majat e thepisura të Bjeshkëve të Nemuna.
Ndërsa mbërritëm në muzg, fëmijët 10 dhe 12 vjeç luanin me kotelet në verandën e shtëpisë sonë, ndërsa ne bisedonim me pronarin për jetesën në Lëpushë.
Migrimi jashtë vendit ose në qytete më të mëdha dhe turizmi janë një litar shpëtimi për këdo në rajon.
Por për fat të mirë, në Lëpushë mundësitë për zhvillim në fushën e turizmit janë të mëdha.
Ditën e parë, vizituam një vendpushim të qetë dhe u hodhëm nga shkëmbinjtë për të shijuar notin në ujërat e kristalta ngjyrë blu.
Më pas, hëngrëm djathë dhe bukë të bërë në shtëpi, në një kamp veror.
Në ditën e dytë, ne ecëm deri në majën e Majës së Nagvacit (2,412 metra e lartë) në disa shtigje pothuajse të shkreta, duke shijuar boronica të egra gjatë rrugës.
Lëpusha pret një pjesë të turistëve – që akomodohen nga banorët e Thethit aty pranë, të cilët e vizitojnë zonën për të bërë ecje në shtegun e famshëm që të çon në “Majat e Ballkanit”.
Çdo vit, turistët amerikanë po dynden në destinacione turistike si Parisi dhe Roma për pushimet e tyre.
Dhe ndërsa këto vende janë të njohura për turizëm, ekzistojnë edhe shumë destinacione të tjera në zhvillim që parashikohet të tërheqin më shumë turistë në të ardhmen, shkruan Caroline Bologna në një artikull të botuar në të përditshmen amerikane “Huffpost”.
Nga Guatemala në Norvegji e deri në Rivierën Shqiptare, ekspertët e udhëtimeve kanë rekomanduar disa destinacione të reja në trend për vitin 2026.
“Huffpost” e ka renditur Shqipërinë ndër 25 vendet më të mira për të kaluar pushimet vitin e ardhshëm.
Riviera Shqiptare
“Shqipëria ndihet si një nga perlat e fundit të fshehura të Evropës, por mendoj se viti 2026 është koha kur kjo do të ndryshojë vërtet,” tha ekspertja e udhëtimeve, Esther Susag.
Riviera Shqiptare ka të njëjtat ujëra të kaltra të pastra dhe vijë bregdetare mahnitëse – që mund të shihni në vende si Greqia apo Kroacia, por është shumë më e përballueshme dhe shumë më pak e populluar me turistë.
Ndërsa vizitorët e huaj bëhen më të vetëdijshëm për kostot dhe turmat masive, Shqipëria është kthyer në një destinacion nën radar – falë vendpushimeve të mrekullueshme, peizazheve mahnitëse dhe kulturës interesante.
TIRANË, 11 dhjetor /ATSH/ Ekonomia shqiptare ka hyrë në një fazë të re të qëndrueshmërisë së bilancit të pagesave gjatë vitit 2025, ndërsa bilanci i llogarisë korente që mat hyrjet dhe daljet e valutës nga vendi, ka shënuar sërish suficit në tremujorin e tretë.
Banka e Shqipërisë bëri të ditur se, bilanci korent për periudhën korrik-shtator arriti në 658 milionë euro, një rritje prej 90% krahasuar me të njëjtën periudhë të vitit të kaluar.
Kjo prirje pozitive ka ndikuar që ekonomia shqiptare të dalë përkohësisht nga pozicioni i jashtëm negativ. Për herë të parë, 9-mujori i parë i vitit mbyllet me një bilanc pozitiv prej 51 milionë eurosh, duke përmbysur deficitin prej 233 milionë eurosh të një viti më parë.
Turizmi, motori kryesor i përmirësimit
Rritja e fortë e të ardhurave nga turizmi mbetet faktori vendimtar pas këtij suficiti rekord. Të ardhurat nga udhëtimet në tremujorin e tretë 2025 arritën në 2,3 miliardë euro, duke shënuar rritje me 21,6%, ndërsa të ardhurat neto nga turizmi preken nivelin historik prej 1,3 miliardë eurosh. Në total, për nëntëmujorin, turizmi gjeneroi 2,1 miliardë euro të ardhura neto, në rritje me 19,6% krahasuar me vitin e kaluar.
Përveç turizmit, edhe sektori më i gjerë i shërbimeve ka ndikuar fuqishëm në përmirësimin e pozicionit të jashtëm.
Në tremujorin e tretë, shërbimet realizuan një bilanc neto prej 1,9 miliardë eurosh, me rritje 26,7% vjetore. Për të gjithë periudhën janar–shtator, sektori arriti të sigurojë 3,5 miliardë euro të ardhura neto.
PRISHTINË, 8 dhjetor /ATSH/ Agjencia e Statistikave të Kosovës bën të ditur se në tetor të këtij viti, numri i vizitorëve (vendorë dhe të huaj) në hotele ishte 60 mijë e 737, prej tyre 40,2% ishin vendorë dhe 59,7% ishin të jashtëm.
Krahasuar me muajin tetor të vitit 2024 kur ishin 57 mijë e 568 vizitorë, pati rritje të numrit të përgjithshëm të vizitorëve në hotele për 5,5%.
Më tej thuhet se numri i netqëndrimeve ishte 142 mijë 672, prej tyre 48,1 për qind nga vendorët dhe 51,9 për qind nga të huajt.
Sipas ASK-së numrin më të madh të vizitorëve të brendshëm në hotele e ka Rajoni i Pejës me 7878 vizitorë dhe me 29 160 netqëndrime.
“Sa u përket vizitorëve të huaj, krahasuar me periudhën paraprake (tetor 2024) në tetor 2025 pati rritje të vizitorëve për 5,2%. Në total, 36 283 vizitorë të huaj, nga të cilët numri më i madh ishte nga: Shqipëria, Gjermania, Zvicra, Turqia etj.”, njofton ASK.
Agjencia e Statistikave të Kosovës (ASK) ka publikuar raportin mujor për Statistikat e Hotelerisë, i cili tregon se sektori hotelier në vend ka shënuar rritje të ndjeshme gjatë tetorit 2025 krahasuar me periudhën e njëjtë të vitit të kaluar.
Gjatë tetorit 2025, hotelet në Kosovë regjistruan 60 737 vizitorë, duke shënuar një rritje prej 5,5% në krahasim me tetorin 2024, kur u regjistruan 57 568 vizitorë.
Nga numri total i vizitorëve:
40,2% ishin vendorë
59,7% ishin të huaj
Po ashtu, numri i net-qëndrimeve arriti në 142 672, ku 48,1% i takojnë vizitorëve vendas dhe 51,9% atyre të jashtëm.
Sa i përket vizitorëve të brendshëm, Rajoni i Pejës kryeson listën me:
7 878 vizitorë vendorë
29 160 net-qëndrime
Kjo e konfirmon Pejën si një nga destinacionet më të kërkuara të turizmit të brendshëm, kryesisht për bukuritë natyrore dhe ofertën malore.
Numri i vizitorëve të jashtëm në tetor 2025 arriti në 36 283, çka përbën një rritje prej 5,2% krahasuar me tetorin e vitit 2024.
Shtetet nga të cilat kanë ardhur më së shumti vizitorë mbeten të njëjtat me vitet paraprake:
Shqipëria
Gjermania
Zvicra
Turqia, ndër të tjera.
Ky trend konfirmon rritjen e vazhdueshme të interesimit të turistëve ndërkombëtarë për Kosovën, si destinacion me potencial në rritje./Te
Në vitet e fundit, në hartën e preferencave të pensionistëve italianë që zgjedhin të jetojnë jashtë vendit po përfshihet gjithmonë e më shumë Shqipëria.
Mediat italiane raportojnë se, ndërkohë që fluksi drejt Portugalisë po bie ndjeshëm, sidomos pas heqjes së lehtësimeve fiskale për të ardhurit pas vitit 2024, Shqipëria po ngjitet si një ndër destinacionet më të leverdishme për shkak të politikave fiskale shumë konkurruese dhe kostos së ulët të jetesës.
Sipas të dhënave të fundit, numri total i pensionistëve italianë që transferohen jashtë vendit është ulur me 23.8% gjatë periudhës 2018–2024. Megjithatë, mes vendeve që po fitojnë terren, Shqipëria ka shënuar rritjen më të theksuar.
Nga viti 2019 deri në 2023, rreth 200 pensionistë italianë janë transferuar në Shqipëri, nga të cilët 100 vetëm gjatë vitit 2023. Në raport me përmasat e vendit dhe periudhën e shkurtër kohore, kjo rritje vihet re si jashtëzakonisht e lartë.
Pse po e zgjedhin Shqipërinë?
Shqipëria ofron një paketë të favorshme për pensionistët e huaj:
Zero tatim mbi pensionet e marra nga jashtë (nga viti 2021).
Kosto jetese shumë më e ulët se në vendet e BE-së.
Klima e butë mesdhetare.
Akses i shpejtë me Italinë përmes fluturimeve të shpeshta.
Komunitete italiane tashmë të krijuara në qytete si Tirana, Durrësi, Shkodra dhe Vlora.
Shqipëria po shndërrohet gradualisht në një “Hammamet të ri”, por me standarde më të larta urbanistike dhe afërsi gjeografike ndaj Italisë, çka e bën shumë tërheqëse për të moshuarit që kërkojnë të jetojnë me më pak kosto, por pa u shkëputur nga Italia.
Ndër destinacionet kryesore vazhdojnë të jenë Spanja dhe Tunizia. Vetëm në Spanjë jetojnë mbi 8.400 pensionistë italianë, dhe pavarësisht kostove të pjesshme më të larta, vendi ofron ulje të konsiderueshme fiskale dhe shërbime të stabilizuara.
Ndërkohë Tunizia, veçanërisht qyteti i Hammametit, ka tërhequr rreth 1000 italianë në 5 vitet e fundit, falë një sistemi që taton vetëm 20% të pensionit të importuar dhe ofron lehtësira të tjera të mëdha.
Portugalia, dikur “parajsa nr.1”, ka humbur shumë terren që nga momenti kur hoqi skemën e tatimit të reduktuar për pensionistët e rinj që hyjnë pas vitit 2024. Fluksi i të ardhurve është ulur me mbi 83% në vetëm 5 vjet.
Dikur vend që italianët e shihnin për pushime të shkurtra apo investime të izoluara, Shqipëria sot po shfaqet si një alternativë serioze e stilit të jetës për një grup gjithnjë e më të madh pensionistësh.
Pse Shqipëria po fiton terren aq shpejt?
Taksa zero mbi pensionet – një ndër ofertat fiskale më agresive në rajon.
Mjekësi private gjithnjë në rritje me çmime shumë më të ulëta se Italia.
Siguri e përmirësuar dhe turizëm në rritje që ka rritur standardet e shërbimeve.
Kosto të përballueshme banimi, sidomos jashtë qendrave të mëdha.
Afërsi kulturore, gjuhë gjithnjë e më e njohur për italianët dhe komunitet i qëndrueshëm italianësh.
Nëse trendi vazhdon me këto ritme, ekspertët parashikojnë që Shqipëria mund të futet në top 3 destinacionet kryesore të pensionistëve italianë brenda pesë viteve të ardhshme. (A2 Televizion)
Ministri i Turizmit, Kulturës dhe Sportit, Blendi Gonxhja prezantoi në Komisionin për Kulturën dhe Turizmin buxhetin 2026, duke theksuar se prioritet mbetet kthimi i Shqipërisë në një destinacion të qëndrueshëm dhe konkurrues ndërkombëtar. Gonxhja deklaroi se buxheti parashikon një rritje prej 20% krahasuar me vitin 2025, duke synuar investime më të balancuara në turizëm, kulturë…
TIRANË, 12 nëntor/ATSH/ Ministri i Turizmit, Kulturës dhe Sportit, Blendi Gonxhja gjendet në Samitin Tourise i cili mbahet në Riad (11-13 nëntor) dhe është platforma më e rëndësishme globale që po përcakton horizontet e reja të turizmit botëror.
Samiti Tourise organizohet nën kujdesin e Ministrisë së Turizmit të Arabisë Saudite, ka ndikim të lartë dhe hedh bazat e turizmit të 50 viteve të ardhshme.
“Pjesëmarrja e Shqipërisë në këtë forum shënon një mundësi të vyer për të forcuar pozicionin tonë në hartën ndërkombëtare të turizmit, për të ndarë përvojat tona të suksesit dhe për të ndërtuar ura të reja bashkëpunimi që do të ndikojnë në zhvillimin e qëndrueshëm të industrisë sonë turistike”, u shpreh ministri Gonxhja.
Në Tourise, Gonxhja u takua me Francisco Betti nga World Economic Forum, me të cilin diskutoi mbi forcimin e bashkëpunimit ndërkombëtar, përmirësimin e përvojës së udhëtarëve dhe zhvillimin e qëndrueshëm përmes standardeve të përbashkëta, edukimit dhe fuqizimit të fuqisë punëtore. “Një bisedë me vlerë që forcon vizionin tonë të përbashkët për një turizëm më të qëndrueshëm dhe gjithëpërfshirës”, e cilësoi këtë takim kreu i MTKS-së.
Më herët ministri Gonxhja u prit nga Lartësia e tij Mbretërore, princi Bader bin Abdullah bin Mohammed bin Farhan Al Saud, njëkohësisht ministër i Kulturës të Mbretërisë së Arabisë Saudite. Ministri u shpreh se, takimi ishte një mundësi e vyer për të diskutuar thellimin e bashkëpunimit kulturor ndërmjet Shqipërisë dhe Arabisë Saudite, në përputhje me vizionin “Saudi Vision 2030”.
“Biseduam mbi nxitjen e shkëmbimeve kulturore, zhvillimin e industrive krijuese, bashkëpunimin në fushën e filmit, artit pamor dhe ekspozitave, si dhe promovimin e iniciativave të përbashkëta që pasurojnë dialogun kulturor dhe lidhjet midis dy vendeve tona”, tha Gonxhja.
Qeveria italiane ka një plan të ri për të rritur taksën e sheshtë mbi qiratë deri në 30 ditë, ato që ofrohen kryesisht përmes platformave si Airbnb, si pjesë e projektbuxhetit të vitit 2026. Në Itali, për momentin ekziston një takstë e sheshtë (e njëjtë për të gjithë) mbi të ardhurat nga qiratë turistike (si […]
Shqipëria, një nga sekretet më të ruajtura të Evropës, është shndërruar në një nga destinacionet e preferuara të turistëve në vitin 2025, veçanërisht për ata që kërkojnë një vend të përballueshëm, shkruan Janire Manzanas në revistën spanjolle “OKdiario”.
I mbushur me bukuri natyrore mahnitëse, ky vend ofron një kulturë dhe histori unike, si dhe një vijë bregdetare që rivalizon plazhet më idilike të botës.
Ajo që vërtet e dallon Shqipërinë është statusi i saj si një thesar i pa eksploruar në kontinentin evropian, gjë që e mban atë një destinacion evropian të përballueshëm.
Vizitorët mund të shijojnë një birrë vendase për vetëm 1 euro dhe të shijojnë vakte të shijshme për 12 euro. Shqipëria ofron një mundësi të parezistueshme për turistët me buxhet të kufizuar.
Shqipëria është aktualisht një destinacion turistik i përballueshëm dhe tërheqës nëse doni të shijoni pushime me çmime të lira pa kompromentuar cilësinë e përvojës suaj.
Vlen të përmendet se në Tiranë, kryeqytetin e Shqipërisë, çmimet priren të jenë më të larta krahasuar me rajone të tjera të vendit, siç është Riviera piktoreske Shqiptare.
Lidhur me akomodimin, dhomat në një shtëpi lokale kushtojnë midis 10 dhe 20 euro nata.
Hotelet janë gjithashtu shumë të përballueshme, me opsione që fillojnë nga 25 euro nata.
Ndërsa, kostoja e një pjate kryesore në një restorant lokal është zakonisht midis 5 dhe 10 euro, ndërsa një birrë në një bar mund të kushtojë midis 1 deri në 2 euro.
Cilat janë vendet më interesante që duhet të vizitoni në Shqipëri?
Tirana është një vend i mbushur me histori. Ju mund të eksploroni të kaluarën e saj përmes muzeve interesante si muzeu “Shtëpia me Gjethe”, Bunk’Art 2, ose dhoma e gjerë që detajon terrorin e regjimit komunist në Muzeun Historik Kombëtar.
Shijoni një zhytje relaksuese në burimet e nxehta të Bënjës, me pamje nga malet, si një nga përvojat më të mira në Shqipëri.
Këto burime të nxehta ndodhen në Parkun Kombëtar të Bredhit të Hotovës.
Përveç zhytjes, ju mund të vizitoni Urën Osmane të Kadiut, një urë mesjetare e ruajtur mirë – që kalon mbi ujërat bruz të lumit Langaricë që i shton hijeshinë mjedisit përreth.
Berati, i vendosur më pak se dy orë larg kryeqytetit të Shqipërisë, është një destinacion i famshëm turistik i njohur nga UNESCO si një sit i Trashëgimisë Botërore.
Me një histori që përfshin më shumë se 2000 vjet, ky qytet përfaqëson një vatër ku shkrihen disa kultura, të dëshmuara nga gjurmë të qytetërimeve të ndryshme.
Ndonëse i mungojnë monumentet e mëdha specifike, Berati qëndron si një muze i madh në ajër të hapur, duke mahnitur turistët me hijeshinë dhe trashëgiminë e pasur historike.
Gjirokastra, e përfshirë në listën e Trashëgimisë Botërore të UNESCO-s, shquhet për arkitekturën tradicionale osmane dhe njihet ndryshe si “qyteti i gurtë”.
Ajo konsiderohet si një nga shembujt më të mirë të kësaj arkitekture në Shqipëri.
Falë historisë dhe trashëgimisë kulturore të pasur dhe unike, Gjirokastra po tërheq gjithnjë e më shumë vizitorë të huaj.
Qyteti grek i Apolonisë së Ilirisë është një sit arkeologjik pranë Fierit, qyteti i dytë më i populluar në Shqipëri.
Ai spikat për tempullin e tij të Artemidës, fasada e të cilit dhe kolonat elegante korintike mbeten ende në këmbë.
Pjesa më e madhe e gjetjeve të ekspozuara në Manastirin e Shën Mërisë, shërbejne si një muze plotësues gjatë itinerarit – duke ofruar një eksperiencë të jashtëzakonshme.
Kruja, e vendosur 30 kilometra larg nga Tirana, është një qytet i domosdoshëm për t’u vizituar në Shqipëri.
E njohur si vendlindja e heroit kombëtar Skënderbeu, ajo magjeps me kështjellën e saj që ofron pamje panoramike të qendrës historike.
Përveç kësaj, ajo ka vende të ndryshme interesante si Teqeja e Dollmës dhe Muzeu i Skënderbeut.
Shqipëria krenohet me një pasuri natyrore të admirueshme, që rivalizon vendet fqinje, dhe këtë e dëshmon qartë Riviera Shqiptare.
Kjo vijë bregdetare, që shtrihet mbi 100 kilometra, ofron një koleksion plazhesh me bukuri magjepsëse dhe të jashtëzakonshme. /ATSH/
TIRANË, 19 tetor /ATSH/ Ministri i Financave Petrit Malaj, mori pjesë në aktivitetin e nivelit të lartë lartë “Turizmi i Qëndrueshëm për Punësim, Jetesë dhe Zhvillim”, në kuadër të Takimeve Vjetore 2025 të Grupit të Bankës Botërore dhe Fondit Monetar Ndërkombëtar, që u organizuan në Uashington të Shteteve të Bashkuara të Amerikës.
Gjatë aktivitetit të zhvilluar me pjesëmarrjen e ministrave të financave nga vende të ndryshme, politikëbërës dhe drejtues ndërkombëtarë, pjesëmarrësit diskutuan mbi mënyrat se si vendet mund të shfrytëzojnë potencialin e turizmit, në veçanti atij kulturor dhe të natyrës për të krijuar më shumë vende pune, për të fuqizuar komunitetet, si dhe për të nxitur një rritje të qëndrueshme ekonomike.
Gjatë bisedës në panel, me drejtoreshën e përkohshme Globale për Mjedisin në Bankën Botërore Genevieve Connors, ministri Malaj, nënvizoi rrugëtimin e Shqipërisë turistike gjatë viteve të fundit, si dhe transformimin, si një nga destinacionet më dinamikë të Mesdheut.
“Në vitin 2014, Shqipëria kishte jo më shumë se 3,6 milionë vizitorë të huaj, ndërsa në vitin 2024 ky numër arriti në rreth 12 milionë. Janë shifra që kanë kontribuar ndjeshëm në rritjen e konsumit, punësimit, rritjen ekonomike, si dhe e kanë bërë Shqipërinë një destinacion gjithnjë e më të kërkuar, unik dhe që reflekton përvojën autentike e të qëndrueshme mesdhetare”, u shpreh Malaj.
Ministri Malaj gjatë prezantimit të tij, theksoi gjithashtu, se turizmi në Shqipëri do të vijojë të jetë një kontribues i rëndësishëm për ekonominë shqiptare, ndërsa vizioni i qeverisë “Shqipëria 2030” do të mundësojë pozicionimin e vendit, si një destinacion udhëheqës në Mesdhe, i turizmit të qëndrueshëm.
“Objektivi ynë është të transformojmë Shqipërinë në një destinacion me vlerë të lartë, gjatë gjithë vitit, që ndërthur bukuritë natyrore me infrastrukturën cilësore, autenticitetin kulturor dhe zhvillimin e gjelbër. Deri në vitin 2030 ne parashikojmë të gjenerojmë 6,6 miliardë euro të ardhura vjetore nga turizmi, duke dyfishuar qëndrimet dhe duke reflektuar, si rritjen e cilësisë së shërbimeve, ashtu edhe njohjen ndërkombëtare të Shqipërisë, si një destinacion elitar turistik”, theksoi Malaj.
Kjo ambicie e qeverisë do të mbështetet nga investimet e vazhdueshme në digjitalizim, infrastrukturë, aftësimin e fuqisë punëtore në turizëm, etj, me qëllim për të siguruar që rritja të jetë gjithëpërfshirëse, miqësore me mjedisin, por edhe e integruar, në përputhje me strategjinë e përgjithshme të zhvillimit kombëtar.
Ministri i Financave, gjatë fjalës së tij theksoi gjithashtu edhe rëndësinë e partneriteteve strategjikë ndërkombëtarë, veçanërisht me Bankën Botërore, që luajnë një rol thelbësor në mbështetjen ndaj reformave që po ndërmerr Shqipëria e që garantojnë një rritje ekonomike të qëndrueshme.
Turizmi vijon të jetë një ndër sektorët kryesorë të mbështetjes së ekonominë shqiptare në vitet që vijnë.
Ministri i financave Petrit Malaj gjatë fjalës së mbajtur në aktivitetin e nivelit të lartë “Turizmi i Qëndrueshëm për Punësim, Jetesë dhe Rritje të Qëndrueshme” tha se deri në vitin 2030 parashikohet që të gjenerohen 6.6 miliardë euro të ardhura vjetore nga turizmi.
Kjo do të vijë si pasojë e dyfishimit të qëndrimeve dhe njohjen ndërkombëtare të Shqipërisë, si një destinacion elitar turistik,
Gjatë aktivitetit të zhvilluar me pjesëmarrjen e ministrave të financave nga vende të ndryshme, politikëbërës dhe drejtues ndërkombëtarë, pjesëmarrësit diskutuan mbi mënyrat se si vendet mund të shfrytëzojnë potencialin e turizmit, për të nxitur një rritje të qëndrueshme ekonomike./abcnews.al
TIRANË, 19 tetor /ATSH/ Emisioni i njohur ndërkombëtarisht nga Kili “Socios por el Mundo”, i ka kushtuar një reportazh Shqipërisë dhe disa prej atraksioneve që tërheqin qindra e mijëra vizitorë vendas dhe të huaj, gjatë gjithë vitit.
Ministri i Turizmit, Kulturës dhe Sportit, Blendi Gonxhja përcolli në rrjetet sociale një video me një pjesë prezantuese nga ky dokumentar që sipas Gonxhes, “sjell Shqipërinë para miliona shikuesve në gjithë Amerikën Latine, duke treguar peizazhet mahnitëse, traditat e pasura dhe kulturën e gjallë të vendit tone”.
Sipas Gonxhes, ky emision i prodhuar nga MKZeta (Kili) në bashkëpunim me Animated Society (Shqipëri) dhe me mbështetjen e afërt të Ministrisë së Turizmit, Kulturës dhe Sportit, sjell histori autentike shqiptare dhe bukurinë e njerëzve tanë, nga veriu në jug.
Shqipëria po synon të pozicionohet si një destinacion kryesor turistik në rajonin e Mesdheut, duke ndërtuar një model zhvillimi të qëndrueshëm dhe gjithëvjetor.
Vendi ynë, po merr gjithnjë e më shumë vëmendjen e të huajve, si një destinacion në rritje në Mesdhe, falë investimeve strategjike në turizmin e qëndrueshëm dhe përmirësimin e infrastrukturës.
Sipas të dhënave zyrtare nga Ministria e Kulturës, Turizmit dhe Mjedisit, vendi ynë ka mirëpritur rreth 9 milionë vizitorë të huaj gjatë 10 muajve të parë të këtij viti, rreth 500 mijë më shumë se e njëjta periudhë e vitit 2024,
Të dhënat tregojnë se 94% e të huajve vijnë nga kontinenti evropian. Brenda këtij kontingjenti, Evropa Jugore zë vendin kryesor me 70% të hyrjeve, duke u ndjekur nga Evropa Perëndimore dhe ajo Qendrore/Lindore, secila me nga 11%.
TIRANË, 19 tetor /ATSH/ Durrësi vijon të mbetet një ofertë turistike gjithëvjetore, duke tërhequr turistë vendas dhe të huaj, nga e gjithë bota. Përpos plazheve, qyteti bregdetar ofron një gamë atraksionesh jo vetëm në muzetë e artit, trashëgimisë kulturore, por edhe aktivitete sportive dhe argëtuese në çdo periudhë të vitit.
Floreta Kërtusha, përgjegjëse e zyrës së turizmit pranë bashkisë Durrës, u shpreh për ATSH-në se edhe ky sezon turistik veror, i cili pritet të përfundojë në datë 31 tetor, ka qenë një sezon turistik mjaft i suksseshëm, duke tejkaluar pritshmëritë dhe parashikimet.
“Qyteti i Durrësit ka qenë destinacioni i parë turistik i miliona turistëve dhe vizitorëve nga rajoni, Evropa dhe e gjithë bota, çka na bën të ndihemi më shumë krenarë si edhe akoma më të përgjegjshëm në punën tonë për të garantuar turizmin gjithëvjetor. Zgjedhja e Durrësit si destinacion i preferuar turistik gjatë gjithë vitit është pa dyshim vija bregdetare e mrekullueshme prej 64 kilometrash si dhe trashëgimia e pasur kulturore e Durrësit. E gjithë vija bregdetare ofron një hapësirë të konsiderueshme dhe të larmishme me plazhe ranore dhe pjesërisht shkëmbore, si edhe struktura hoteliere apo agroturizëm të cilat ofrojnë shërbime turistike për të gjithë turistët dhe vizitorët vendas dhe të huaj. Vitet e fundit, qëllimi ynë si bashki është rivitalizimi i fshatrave turistikë si dhe krijimi i një destinacioni dhe atraksioni agroturistik, i cili i ofrohet turistëve të apasionuar pas gastronomisë, verërave, pijeve apo produkteve të tjera lokale tradicionale”, tha Kërtusha.
Sipas Kërtushës, referuar të dhënave nga Ministria e Turizmit dhe Mjedisit, vitin e kaluar ishin mbi 1 milion turistë që e vizituan qytetin e Durrësit, ndërsa këtë vit ky numër mund të arrijë deri në 1 milion e 500 mijë vizitorë deri në fund të muajit dhjetor.
“Nëse do t’i referohemi statistikave të fundit vetëm nga Drejtoria Vendore për Kufirin dhe Migracionin, shënohet një rritje e numrit të hyrjeve në Portin e Durrësit, ku vetëm për 9-mujorin e parë të vitit 2025 numërohen 403.554 hyrje në total, rreth 7% më shumë në krahasim me të njëjtën periudhë për vitin e kaluar, ku u regjistruan 377.574 hyrje në total”, theksoi ajo.
“Durrësi është qendra e investimeve strategjike kombëtare, praktikisht një destinacion për investitorët e huaj, sidomos në aspektin e investimeve infrastrukturore, industriale, turistike dhe kulturore. Durrësi tashmë është destinacion i markave ndërkombëtare, ndaj këtë vit ka patur një rritje të numrit të turistëve elitarë. Me miratimin nga ana e Qeverisë shqiptare, këtë vit kanë filluar punimet për ndërtimin e dy unazave të reja të Currilave, që do t’i japin frymëmarrje qarkullimit të mjeteve dhe këmbësorëve dhe pritet të ulin ndjeshëm problemin e trafikut të automjeteve. Një ndër ndërtimet më strategjike përgjatë vijës bregdetare është edhe përfundimi i punimeve për ndërtimin e shëtitores “Ura e Dajlanit – Konvaleshencë”, me gjatësi 3 km. Ky investim është në favor të turizmit, duke përmirësuar infrastrukturën rrugore në një nga zonat turistike që mban fluksin më të madh të turistëve. Një tjetër projekt ambicioz është ai i Akademisë Elitare Manchester City. Kjo akademi elitare do t’i shërbejë fëmijëve të Durrësit, të gjithë vendit dhe më gjerë. Një tjetër lajm i mirë për qytetin ishte krijimi i një tjetër akademie sportive prestigjioze në sportin e tenisit, Akademia e Rafael Nadal, njërit prej tenistëve më të mëdhenj të të gjitha kohërave”, pohoi Kërtusha.
Përgjegjësja e zyrës së turizmit pranë bashkisë Durrës, pohoi se ky vit shënon një rritje të numrit të strukturave akomoduese, ku janë regjistruar rreth 237 subjekte që ushtrojnë veprimtari hotelerie.
Kërtusha cilëson se disa nga eventet që kanë tërhequr më shumë vizitorë gjatë 10 muajve të këtij viti janë ART Explora Festival (prill 2025), Giro d’Italia 2025 (maj 2025), Vala Fest (korrik 2025), Panairi “Taverna e Adriatikut”, koncerti i sopranos Inva Mula (gusht 2025), Festivali Ndërkombëtar Folklorik (korrik-gusht 2025) e tjerë.
“Durrësi i cili është një qytet pothuajse 3000-vjeçar, njihet jo vetëm për turizmin bregdetar ku ju mund të shijoni ditët me diell, plazhet e shumta ranore dhe pjesërisht shkëmbore që lagen nga deti Adriatik, por edhe për turizmin kulturor. Nëse do t’i referohemi të dhënave nga Qendra Muzeore Durrës, vetëm gjatë 9-mujorit të vitit 2025, numri i vizitorëve vetëm në Amfiteatër dhe tek Torra Veneciane është 44.113 vizitorë, nga ku shënohet një rritje prej 36% në krahasim me të njëjtën periudhë për vitin 2024, ku numërohen 32.423 vizitorë”, tha Kërtusha.
Sipas Kërtushës, bashkia Durrës po punon mbi disa strategji për promovimin e ofertës turistike të qytetit bregdetar në tregjet ndërkombëtare të turizmit.
“Bashkia Durrës në kuadër të diversifikimit të ofertës turistike, duke synuar turizmin gjithëvjetor, përfshirë këtu turizmin natyror, sportiv, kulinar, kulturor e historik, përgjatë vitit 2025 ka planifikuar realizimin e aktiviteteve të ndryshme. Drejtoria e Turizmit, ka promovuar të gjithë potencialin turistik të qytetit të Durrësit në Panairin e Punës në Athinë (Greqi), në Rrjetin e Kryeqytetit Evropian të Demokracisë (European Capital of Democracy Network), në Rrjetin e vendeve të Ballkanit: B40 Balkan Cities Network etj., ku Bashkia Durrës është anëtare së bashku me qytete të tjera nga Bashkimi Evropian apo nga Ballkani. Gjithashtu, në kuadër të promovimit të potencialeve turistike të qytetit, janë ndërmarrë dhe po ndërmerren një sërë fushatash apo aktivitetesh promocionale me fokus trashëgiminë kulturore, destinacionet turistike, restorantet, subjektet e agroturizmit, shtigjet natyrore për ecje e tjerë”, përfundoi Kërtusha.
Në një fshat të vogël në Alpet austriake jeton dhe punon Chris Precht, një nga emrat më premtues të arkitekturës evropiane, i cili ka projektuar dhe po mbiqkyre procesin e ndertimit te Dukagjini Resort.
Në një intervistë për Blendi Fevziun në Opinion, Precht tregoi se nga zyra e tij ka projektuar disa prej veprave më mbresëlënëse të arkitekturës bashkëkohore, përfshirë edhe disa që po realizohen aktualisht në Shqipëri.
Kontaktin e parë me Shqipërinë arkitekti e pati gjatë pandemisë, kur mori një ftesë nga zyra e kryeministrit për të vizituar vendin. Rashë në dashuri me diversitetin e Shqipërisë, me male të ngjashme me ato të Austrisë, me një bregdet të jashtëzakonshëm që shtrihet në dy dete, dhe me gjallërinë e Tiranës që të mbush me energji", rrëfeu Precht, i cili e quan veten “djalë mali”.
Një nga pasionet e tij është përdorimi i drurit si material i preferuar, jo vetëm për estetikën, por edhe për qëndrueshmërinë dhe aspektin ekologjik.
Një nga projektet më të rëndësishme për të është "Dukagjini Resort", në Shëngjin.
Ai kujton momentin kur pa terrenin: “Pamja aty është shumë e hapur, ndryshe nga Austria ku malet shpesh bllokojnë horizontin. Këtu mund të shikosh diellin teksa perëndon. Kur e projektuam projektin e Shëngjinit menduam që shikimi kah perëndimi ka nevojë për një hark në formë ylberi që ta shijosh atë si duhet. Harqet e kapin më së miri atë. Ndërtesat të japin përshtypjen se janë pjesë e peizazhit. Është një tranzicion midis arkitekturës dhe peizazhit.
Për arkitektin, sfida kryesore e projektimit në Shqipëri është relievi i thepisur, i cili kërkon kreativitet për të harmonizuar objektet me peizazhin natyror.
Precht flet me pasion edhe për një tjetër projekt të tij, “Northern Apartments”, që u bë viral për formën e tij që ndjek vijat e peizazhit: “Është pak a shumë i ngjashëm si i Shëngjinit. Peizazhi kalon në arkitekturë. Vargmali ka një kthesë dhe ndërtesa jonë do të jetë te ajo kthesa. Gjatë procesit arkitekturorë dhe atij krijues duhet të ketë njëfarë vuajtje që të përfundoj me ndjesinë e duhur. Mendoj se e projektuam tre herë. Në fund thamë, në rregull, kjo është”.
Arkitekti foli edhe për hotelin, për të cilin tha “Duket si anije që po pret të shkojë në det”.
“Do të përdorim dru, jo si material ndërtimi, por si material dekorativ që do të duket shumë bukur. Besoj që do të fillojmë për një muaj. Ky projekt mendoj që qëndron mirë me vendndodhjen e saj, por po ashtu edhe tematika e saj shkon për shtati”, tregoi ai.
Por pse arkitekti e përdor shumë drurin në projektet e tij?
“Mendoj që druri ka shumë personalitet, ka një histori. Kënaqesh duke i marr erë".
Ai e përshkruan Shqipërinë si një vend me potencial unik dhe në fazë transformimi të shpejtë: “Energjia dhe gjallëria në Tiranë janë të veçanta. Shqipëria është një tërheqje e madhe, sidomos për ata që kërkojnë një shtëpi të dytë apo dëshirojnë të pensionohen në një vend me natyrë dhe kulturë të pasur”.
Nga ana tjetër, CEO i Dukagjini Group, Korab Lluka, tha se projekti për hotelin me pesë yje në veri pritet të përfundojë në vitet 2028-2029 dhe do të plotësojë standardet më të larta ndërkombëtare, duke përdorur vetëm materiale cilësore dhe duke respektuar vendimet e arkitektit.
“Kemi punuar shumë gjatë verës dhe planifikojmë që në vitet 2028-2029 i gjithë projekti të jetë i përfunduar, bashkë më hotelin dhe me vilat. Nuk përdorim asnjë material pa vendimin e arkitektit, pasi kemi kontratë të noterizuar. Jemi të detyruar të punojmë me materiale shumë të mira, pasi tek pjesa e hotelit duhet ta bëjmë hotelin me brand standard të Swiss Hotel e cila është pjesë e Accor Group”, tha ai.
Lluka shtoi se 90% e blerësve janë shqiptarë, kryesisht nga Kosova, dhe për të huajt është planifikuar zhvillimi i një miniqyteti ekologjik në zonën e Talës, që do të jetë projekti i parë ekologjik në Shqipëri.
“Te projekti i Shëngjinit na kanë mbetur afro 35 për qind të njësive të lira. Mbi 65 për qind të apartamenteve janë me kontrata të noterizuara. Kontratën e kemi për pesë vite, por do të mundohemi që të përfundohet edhe më shpejt. E sipas të gjitha gjasave do ta arrijmë. Në Tale do të jenë minimum tre hotele. Me Chrisin e kemi biseduar që të bëjmë një hapësirë të vogël, një mini-qytet ekologjik. Për Shqipëri do të jetë projekti i parë ekologjik”.
I pyetur nga Fevziu se pse Shqipëria është atraktive për shqiptarët e Kosovës, ai tha: “Kosova mund t’i ketë të gjitha, por det nuk ka”.
TIRANË, 14 tetor/ATSH/ Vjeshta i ka dhënë Gjirokastrës ngjyra dhe pamje mbresëlënëse me turistët që ende gjallërojnë rrugët e kalldrëmta në zonën muzeale.
Tashmë Gjirokastra është një markë e njohur në tregun turistik ndërkombëtar, ndërsa po vizitohet nga një numër në rritje vizitorësh.
Kryetari bashkisë së Gjirokastrës, Flamur Golemi tha sot për ATSH-në se “edhe gjatë muajit shtator dhe deri tani në fillim të tetorit Gjirokastra është vizituar nga 56 mijë turistë, ku numri më i lartë i tyre është nga vende të ndryshme të botës”.
“Edhe përgjatë kësaj vere ashtu si në çdo stinë të vitit qyteti i gurtë mirëpriti një numër të lartë turistësh. Nga janari deri tani Gjirokastra është vizituar nga mbi 500 mijë turistë, një numër ky i lartë krahasuar me vitet paraardhëse. Numrin më të madh të turistëve e zënë ata nga Spanja, Italia, Greqia, Gjermania, Franca, Shtetet e Bashkuara të Amerikës, etj.”, tha Golemi.
Kryebashkiaku Golemi vuri në dukje se “këtë verë përgjatë rrugëve të kalldrëmta është folur në të gjitha gjuhët e botës”.
Për turistët edhe muzeumet janë një ndër ndalesat kryesore në Gjirokastër.
“Muzeu i Luftës së Ftohtë, Muzeu i Armëve, Etnografik dhe Muzeu Kadare përgjatë këtij viti janë vizituar nga 54 mijë turistë, numër më i lartë ky krahasuar me vitin e kaluar. Muzeumet shërbejnë si qendra për tërheqjen e vizitorëve por edhe për njohjen e turistëve me vlerat e historisë, traditës, figurat e shquara gjirokastrite në vite, etj. Përkujdesja për muzeumet është një ndër prioritetet e bashkisë së Gjirokastrës si për sa i përket mjediseve me standarde bashkëkohore, por edhe pasurimit me relike, materiale dhe dokumente arkivore çka do ta bënte më interesante vizitën e turistëve”, tha Golemi.
Tashmë e veçanta e turizmit në Gjirokastër është se krahas vlerave arkitektonike dhe ndërtimore të qytetit të gurtë të preferuara janë edhe turet turistike në fshatra dhe zonat rurale.
“Natyrshëm kalaja e gurtë, Pazari karakteristike, muzetë, godinat dhe banesat tradicionale tërheqin një numër të lartë turistësh. Por një fluks në rritje vizitorësh gjatë kësaj vere është regjistruar edhe në rrethinat, fshatrat dhe krahina të tilla si: Lunxhëria, Cepo, etj.”, theksoi Golemi.
Sipas kryebashkiakut, falë vlerave natyrore, historike, traditave të pasura, numrit të madh të objekteve të trashëgimisë kulturore tashmë pothuajse pjesa më e madhe e fshatrave të bashkisë së Gjirokastrës janë destinacione të preferuara për vizitorët.
“Në këtë fakt kanë ndikuar ndjeshëm edhe investimet dhe punët e kryera nga bashkia për sa i përket infrastrukturës rrugore në fshatra, nxitjes së bujqësisë dhe blegtorisë, pasjen e një mjedisi të pastër, etj.”, nënvizoi Golemi.
Projekte të tilla të gërshetuara edhe me investimet e vetë banorëve po pasurojnë hartën turistike të zonës së Gjirokastrës.
“Ky sektor është kthyer në promotorin e ekonomisë lokale në qytet dhe zonat rurale. Zhvillimi i turizmit të qëndrueshëm dhe gjithëvjetor po nxit ekonominë lokale, në qytet dhe fshatra. Sektori i turizmit sjell më shumë të ardhura për banorët ndërsa ndikon pozitivisht edhe në çeljen e vendeve të reja të punës”, theksoi Golemi.
Në këtë drejtim, shtoi kryebashkiaku, është rritur interesimi i banorëve dhe sipërmarrësve për të investuar në sektorin e turizmit dhe veçanërisht në strukturat akomoduese si bujtinat dhe hotelet.
Në qytet dhe zonat rurale përgjatë këtij viti janë çelur njësi të reja të akomodimit për turistët me kushte dhe standarde bashkëkohore. Ato ndërthurin arkitekturën karakteristike me vlerat e traditës dhe mikpritjen e banorëve duke shërbyer si mjedise tërheqëse për turistët vendas dhe të huaj.
Ka një vend në Durrës ku lashtësia, mesjeta dhe realiteti qëndrojnë së bashku. Falë motit të mirë, porta e kalasë mblodhi edhe në shtator turistë të shumtë, vetmitarë apo në grupe, të cilët vizitojnë amfiteatrin antik dhe muret mesjetare, pranë të cilave shihen edhe godina të ndërtuara vitet e fundit. “Numri i turistëve të interesuar […]
Problemet me ujin e pijshëm, menaxhimin e mbetjeve, dhe rritja e abuzive e çmimeve bëjnë që të frenohet ardhja e turistëve të huaj dhe të rritet numri i shqiptarëve që zgjedhin të pushojnë jashtë. Sezoni veror për vitin 2025 në Shqipëri nuk përmbushi pritshmëritë e krijuara nga entuziazmi i viteve të fundit. Turizmi është kthyer […]
Numri i vizitorëve që kanë zgjedhur Kosovën si destinacion turistik gjatë muajit gusht 2025 ka shënuar rritje të ndjeshme krahasuar me të njëjtën periudhë të vitit të kaluar, tregojnë të dhënat e publikuara nga Agjencia e Statistikave të Kosovës, raporton Telegrafi.
Sipas ASK-së, gjatë muajit gusht, në Kosovë kanë hyrë 92,544 vizitorë, që paraqet një rritje prej 20.3% krahasuar me gushtin e vitit 2024, kur ishin regjistruar 76,899 vizitorë.
Foto: Agjencia e Statistikave të Kosovës/Prsc
Po ashtu, edhe numri i net qëndrimeve është rritur me 17.2%, duke reflektuar një interesim më të madh për qëndrime më të gjata në vend.
Nga ky numër, 33,059 vizitorë ishin vendas, me një rritje të lehtë prej 5.3%, ndërsa 59,485 ishin të huaj, çka përbën një rritje të theksuar prej 30.7% krahasuar me vitin paraprak.
Foto: Agjencia e Statistikave t\u00eb Kosov/Prsc telegrafi.com
Të dhënat tregojnë se Peja ka qenë destinacioni më i vizituar, me 30,449 vizitorë, e pasuar nga Prishtina me 22,256 dhe Prizreni me 22,215 vizitorë – tri komunat që vazhdojnë të mbajnë peshën kryesore të turizmit vendor dhe ndërkombëtar.
Ndër vendet prej nga kanë ardhur më së shumti turistë të huaj dominojnë Gjermania, Shqipëria, Zvicra dhe Turqia, që mbeten ndër tregjet më të qëndrueshme për turizmin kosovar.
Ky trend pozitiv, sipas ekspertëve të turizmit, pasqyron përmirësimin e ofertës turistike të Kosovës, infrastrukturës dhe promovimit të destinacioneve natyrore e kulturore të vendit. /Telegrafi/
Kongresi i Unionit Ndërkombëtar për Ruajtjen e Natyrës, IUCN votoi në favor të mbrojtjes së natyrës në Shqipëri, duke e quajtur të pajustifikueshme sakrifikimin e zonave të mbrojtura për projekte në shërbim të turizmit masiv. Organizata për Mbrojtjen dhe Ruajtjen e Mjedisit Natyror në Shqipëri, PPNEA njoftoi se Unioni Ndërkombëtar për Ruajtjen e Natyrës ka […]
Login
