TIRANË, 26 nëntor /ATSH/ Kryetarja e bashkisë Durrës, Emiriana Sako mori pjesë sot në ceremoninë solemne në përkujtim të ngritjes së flamurit të pavarësisë në Durrës.

Në fjalën e saj, Sako tha se përkujtohet sot me nderim, momenti historik i 113 viteve më parë, kur më 26 nëntor 1912, kryetari i parë i bashkisë së Durrësit, Hafiz Ali Podgorica, ngriti flamurin shqiptar.

“Ky është një akt i shenjtë, një kujtesë e përhershme e sakrificave të panumërta të bëra për atdheun tonë. Sot, përulemi me respekt përpara të gjithë atyre patriotëve që dhanë gjithçka për pavarësinë e vendit”, tha Sako.

Sako tha se “26 Nëntori është edhe një ditë përkushtimi ndaj vlerave njerëzore dhe kujtimit të tragjedisë së rëndë të tërmetit të para gjashtë viteve. Humanizmi, solidariteti dhe puna e palodhur e njerëzve të këtij qyteti dhe të kombit tonë bënë të mundur kapërcimin e pasojave. Sot, kujtojmë me respekt viktimat e tërmetit”.

Sipas kryebashkiakes Sako, kjo ditë është jo vetëm përkujtim, por edhe frymëzim për të parë drejt së ardhmes me shpresë dhe vendosmëri.

“Shqipëria mbetet e përkushtuar ndaj objektivit strategjik të integrimit në Bashkimin Evropian. Me hapjen e grupkapitujve, vendi ynë ka hedhur një hap historik drejt familjes evropiane. Jemi shumë pranë anëtarësimit në BE, e cila përbën të ardhmen më të mirë dhe rrugën më të sigurt për Shqipërinë”, pohoi Sako.

/e.i/j.p/

The post 113 vite nga ngritja e flamurit të Pavarësisë në Durrës appeared first on Agjencia Telegrafike Shqiptare.

Vetëm gjashtë banesa kanë mbetur pa boshatisur, ndërsa 26 familje janë zhvendosur tashmë nga Vilat 36 dhe 38, në lagjen 13 të Durrësit. Pjesa tjetër e banesave priten të boshatisen më 13 Nëntor, afati i fundit i lëshuar nga zyra përmbarimore.

Pavarësisht protestave përpara Bashkisë përgjatë javëve, banorët nuk kanë ushtruar rezistencë për lënien e shtëpive, por ende nuk i kanë humbur shpresat se mund ti jepet një zgjidhje institucionale.

“Nuk mund ta besoj gjendjen aktuale, që po ndodh me ne. Po na nxjerrin nga shtëpitë pa asnjë lloj dëmshpërblimi, pas asnjë lloj strehimi”- tha Aledio Hoxha për Citizens.

Banorët, në terr informativ prej vitesh

32 familjet që jetojnë prej viteve 90 në kabinat e plazhit në rrugën “Albanopoli”, janë strehuar fillimisht aty me statusin e të pastrehëve.

Këto familje u vendosën në kabinat e dikurshme të plazhit si një zgjidhje e përkohshme pas përmbysjeve të viteve ’90, kur shumë banesa shtetërore u privatizuan dhe një pjesë e qytetarëve mbetën pa strehë.

Megjithatë, mungesa e investimeve dhe e statusit të qartë ligjor për banesat e tyre i ka lënë ata në pasiguri për mbi tri dekada.

Banorët pretendojnë se në vitin 2009 pati një mundësi për ta për privatizimin e banesave,  por ata nuk kanë qenë kurrë në dijeni.

Bashkia Durrës i tha Citizens se me shkresën nr. 5185, datë 19.11.2009, i ka kërkuar Këshillit Bashkiak të shpallë të pavlefshëm vendimin për privatizimin, sepse ai është në kundërshtim me ligjet që janë në fuqi.

Citizens i ka kërkuar Bashkisë Durrës vendimin ku revokohet vendimi i Këshillit Bashkiak, por ende nuk ka marrë një përgjigje.

Më pas trualli ku ndodhen këto kabina hyri në procesin e kthim kompensimit të pronave dhe që prej 2013 pronësia e tyre i kaloi pronarëve të truallit.

Banorët pretendojnë se e kanë marr vesh vite më vonë se Bashkia ka kaluar godinën “me banorë brenda”, pronarëve aktualë.

“Nuk jemi lajmëruar kur bashkia i ka dorëzuar objektet, sepse ka një akt-dorëzimi sikur objekti është bosh, ndërkohë që ne kemi qenë aty. Bashkia duhet të ndjehet borxhlie me ne dhe nga 2013 duhet të ofronte një alternativë strehimi,”- është shprehur më herët për Citizens avokatja Merita Dakovelli.

Zgjidhje nga institucionet

Banorët shprehen se nuk mund të gjykojnë dot vendimin e kalimin të pronësisë së godinave te pronarët aktualë, por kërkojnë një formë mbështetje nga institucionet.

Bashkia Durrës i tha Citizens, se familjet nëpërmjet portalit e – albania, mund të aplikojnë duke ngarkuar dokumentacionin e kërkuar për të përfituar nga programet e strehimit social. Por pjesa më e madhe e banorëve, të cilët i përkasin shtresave vulnerabël dhe janë në moshë të thyer shprehen se nuk dinë ku të drejtohen.

Ndërsa të tjerë thonë se vetë krye bashkiakja Emiriana Sako i ka thënë në një mbledhje me dyer të mbyllur se në qytet ka rreth tre mijë të pastrehë dhe duhet të regjistroheni kur t’ju vijë radha për shqyrtim të rastit.

Situata ka sjellë që shumë të rinj dhe familje të shprehen se lënia në mes të katër rrugëve, i ka çuar të mendojnë largimin nga vendi.

“Më vjen keq shumë për vendin tim që më duhet të largohem kësaj radhë përfundimisht. Ndoshta vi ndonjëherë për ta vizituar dhe kaq…” – përmbyll Aledio Hoxha.

Paralelisht në Durrës po vijojnë edhe protestat e projektit “TID Durrës“, të cilët kundërshtojnë projektin e AADF në bashkëpunim me Bashkinë Durrës për shpronësimin e rreth 170 pronarëve të vilave të vjetra në zonën arkeologjike të qytetit.

Lexoni gjithashtu:

• Durrës, 32 familje në ish-kabinat e plazhit rrezikojnë të mbeten pa strehë

The post Durrës: Banorët përballë dëbimit, pa strehim dhe pa përgjigje appeared first on Citizens.al.

TIRANË, 7 nëntor /ATSH/ Qyteti i Durrësit do të pasurohet me një fushë të re futbolli, që po ndërtohet në ambientet e shkollës sportive “Benardina Qerraxhia”.

Kryeministri Edi Rama, ndau sot në rrjete sociale, pamje nga kantieri i punimeve që po kryhen në këtë fushë të re futbolli, ndërsa u shpreh se ato po ecin me ritme të mira.

Sipas Ramës, ky është një investim që do të shërbejë për stërvitjen e talenteve të reja të futbollit shqiptar.

Ky projekt vjen si bashkëpunim mes FSHF-së dhe bashkisë së Durrësit. Fusha është ndërtuar me tapet artificial modern, ndërsa FSHF ka marrë përsipër shtrimin e tapetit, drenazhimin, vendosjen e portave, rrethimin e fushës dhe instalimin e sistemit të ndriçimit. Nga ana tjetër, Bashkia e Durrësit ka financuar ndërtimin e bazamentit të fushës.

Fusha është ndërtuar me tapet artificial modern, ndërsa FSHF ka marrë përsipër shtrimin e tapetit, drenazhimin, vendosjen e portave, rrethimin e fushës dhe instalimin e sistemit të ndriçimit. Nga ana tjetër, Bashkia e Durrësit ka financuar ndërtimin e bazamentit të fushës.

Kjo fushë do t’i shërbejë edhe akademisë së FSHF-së “Elite Youth”, për zhvillimin e seancave stërvitore, por edhe talenteve të tjerë sportiv.

/e.i/a.f/r.e/

The post Fushë e re futbolli në Durrës për stërvitjen e talenteve të reja appeared first on Agjencia Telegrafike Shqiptare.

TIRANË, 19 tetor /ATSH/ Durrësi vijon të mbetet një ofertë turistike gjithëvjetore, duke tërhequr turistë vendas dhe të huaj, nga e gjithë bota. Përpos plazheve, qyteti bregdetar ofron një gamë atraksionesh jo vetëm në muzetë e artit, trashëgimisë kulturore, por edhe aktivitete sportive dhe argëtuese në çdo periudhë të vitit.

Floreta Kërtusha, përgjegjëse e zyrës së turizmit pranë bashkisë Durrës, u shpreh për ATSH-në se edhe ky sezon turistik veror, i cili pritet të përfundojë në datë 31 tetor, ka qenë një sezon turistik mjaft i suksseshëm, duke tejkaluar pritshmëritë dhe parashikimet.

“Qyteti i Durrësit ka qenë destinacioni i parë turistik i miliona turistëve dhe vizitorëve nga rajoni, Evropa dhe e gjithë bota, çka na bën të ndihemi më shumë krenarë si edhe akoma më të përgjegjshëm në punën tonë për të garantuar turizmin gjithëvjetor. Zgjedhja e Durrësit si destinacion i preferuar turistik gjatë gjithë vitit është pa dyshim vija bregdetare e mrekullueshme prej 64 kilometrash si dhe trashëgimia e pasur kulturore e Durrësit. E gjithë vija bregdetare ofron një hapësirë të konsiderueshme dhe të larmishme me plazhe ranore dhe pjesërisht shkëmbore, si edhe struktura hoteliere apo agroturizëm të cilat ofrojnë shërbime turistike për të gjithë turistët dhe vizitorët vendas dhe të huaj. Vitet e fundit, qëllimi ynë si bashki është rivitalizimi i fshatrave turistikë si dhe krijimi i një destinacioni dhe atraksioni agroturistik, i cili i ofrohet turistëve të apasionuar pas gastronomisë, verërave, pijeve apo produkteve të tjera lokale tradicionale”, tha Kërtusha.

Sipas Kërtushës, referuar të dhënave nga Ministria e Turizmit dhe Mjedisit, vitin e kaluar ishin mbi 1 milion turistë që e vizituan qytetin e Durrësit, ndërsa këtë vit ky numër mund të arrijë deri në 1 milion e 500 mijë vizitorë deri në fund të muajit dhjetor.

“Nëse do t’i referohemi statistikave të fundit vetëm nga Drejtoria Vendore për Kufirin dhe Migracionin, shënohet një rritje e numrit të hyrjeve në Portin e Durrësit, ku vetëm për 9-mujorin e parë të vitit 2025 numërohen 403.554 hyrje në total, rreth 7% më shumë në krahasim me të njëjtën periudhë për vitin e kaluar, ku u regjistruan 377.574 hyrje në total”, theksoi ajo.

“Durrësi është qendra e investimeve strategjike kombëtare, praktikisht një destinacion për investitorët e huaj, sidomos në aspektin e investimeve infrastrukturore, industriale, turistike dhe kulturore. Durrësi tashmë është destinacion i markave ndërkombëtare, ndaj këtë vit ka patur një rritje të numrit të turistëve elitarë. Me miratimin nga ana e Qeverisë shqiptare, këtë vit kanë filluar punimet për ndërtimin e dy unazave të reja të Currilave, që do t’i japin frymëmarrje qarkullimit të mjeteve dhe këmbësorëve dhe pritet të ulin ndjeshëm problemin e trafikut të automjeteve. Një ndër ndërtimet më strategjike përgjatë vijës bregdetare është edhe përfundimi i punimeve për ndërtimin e shëtitores “Ura e Dajlanit – Konvaleshencë”, me gjatësi 3 km. Ky investim është në favor të turizmit, duke përmirësuar infrastrukturën rrugore në një nga zonat turistike që mban fluksin më të madh të turistëve. Një tjetër projekt ambicioz është ai i Akademisë Elitare Manchester City. Kjo akademi elitare do t’i shërbejë fëmijëve të Durrësit, të gjithë vendit dhe më gjerë. Një tjetër lajm i mirë për qytetin ishte krijimi i një tjetër akademie sportive prestigjioze në sportin e tenisit, Akademia e Rafael Nadal, njërit prej tenistëve më të mëdhenj të të gjitha kohërave”, pohoi Kërtusha.

Përgjegjësja e zyrës së turizmit pranë bashkisë Durrës, pohoi se ky vit shënon një rritje të numrit të strukturave akomoduese, ku janë regjistruar rreth 237 subjekte që ushtrojnë veprimtari hotelerie.

Kërtusha cilëson se disa nga eventet që kanë tërhequr më shumë vizitorë gjatë 10 muajve të këtij viti janë ART Explora Festival (prill 2025), Giro d’Italia 2025 (maj 2025), Vala Fest (korrik 2025), Panairi “Taverna e Adriatikut”, koncerti i sopranos Inva Mula (gusht 2025), Festivali Ndërkombëtar Folklorik (korrik-gusht 2025) e tjerë.

“Durrësi i cili është një qytet pothuajse 3000-vjeçar, njihet jo vetëm për turizmin bregdetar ku ju mund të shijoni ditët me diell, plazhet e shumta ranore dhe pjesërisht shkëmbore që lagen nga deti Adriatik, por edhe për turizmin kulturor. Nëse do t’i referohemi të dhënave nga Qendra Muzeore Durrës, vetëm gjatë 9-mujorit të vitit 2025, numri i vizitorëve vetëm në Amfiteatër dhe tek Torra Veneciane është 44.113 vizitorë, nga ku shënohet një rritje prej 36% në krahasim me të njëjtën periudhë për vitin 2024, ku numërohen 32.423 vizitorë”, tha Kërtusha.

Sipas Kërtushës, bashkia Durrës po punon mbi disa strategji për promovimin e ofertës turistike të qytetit bregdetar në tregjet ndërkombëtare të turizmit.

“Bashkia Durrës në kuadër të diversifikimit të ofertës turistike, duke synuar turizmin gjithëvjetor, përfshirë këtu turizmin natyror, sportiv, kulinar, kulturor e historik, përgjatë vitit 2025 ka planifikuar realizimin e aktiviteteve të ndryshme. Drejtoria e Turizmit, ka promovuar të gjithë potencialin turistik të qytetit të Durrësit në Panairin e Punës në Athinë (Greqi), në Rrjetin e Kryeqytetit Evropian të Demokracisë (European Capital of Democracy Network), në Rrjetin e vendeve të Ballkanit: B40 Balkan Cities Network etj., ku Bashkia Durrës është anëtare së bashku me qytete të tjera nga Bashkimi Evropian apo nga Ballkani. Gjithashtu, në kuadër të promovimit të potencialeve turistike të qytetit, janë ndërmarrë dhe po ndërmerren një sërë fushatash apo aktivitetesh promocionale me fokus trashëgiminë kulturore, destinacionet turistike, restorantet, subjektet e agroturizmit, shtigjet natyrore për ecje e tjerë”, përfundoi Kërtusha.

/e.i//r.e/

The post Kërtusha për ATSH-në: Mbi 1,5 milionë turistë gjatë 2025-ës në Durrës appeared first on Agjencia Telegrafike Shqiptare.

Banorët e lagjes së vjetër të Kalasë në Durrës e zhvendosën sot protestën kundër projektit të rijetëzimit urban të zonës së tyre nga autoritetet lokale te zyrat e Fondacionit Shqiptaro-Amerikan për Zhvillim (AADF) në Tiranë, e cila është palë zhvilluese e projektit.

Mbi 70 familjeve u është kërkuar të shpronësohen për t’i hapur rrugë modelit të investimeve të integruara transformuese, njohur me akronimin TID. Por ata nuk janë dakord me vlerësimin që u është bërë pronave dhe pretendojnë se projekti e shkatërron zonën historike.

Grupit të banorëve që kanë shtëpi mbi 100-vjeçare u takon të kompensohen me çmime të papërditësuara të referencës. Sipas një vendimi të qeverisë, botuar në Fletoren Zyrtare, çmimi i referencës së pronave të tyre është i vitit 2015.

Projekti “Restaurimi dhe rikualifikimi urban i zonës perspektive TID”, financuar nga qeveria, Bashkia e Durrësit dhe AADF, parashikon shembjen e një pjese të lagjes së vjetër për t’i hapur rrugë “rijetëzimit turistik”.

Banorët kanë paditur në Gjykatën Administrative Ministrinë e Kulturës dhe Bashkinë e Durrësit, duke kërkuar pezullimin e projektit. Paralelisht, ata thanë se kanë dorëzuar një kallëzim në SPAK, që përfshin tre studio projektimi, bashkinë dhe AADF-në.

“E kemi kërkuar përgjegjësinë në çdo institucion, por AADF është bërë pjesë e këtij projekti korruptiv duke e financuar pa kontrolluar çfarë ndodh në terren,” pretendoi Entela Spahivogli, banore e zonës.

Krahas vlerësimeve të ulëta banorët kundërshtojnë edhe shkatërrimin e trashëgimisë kulturore.

“Turistët vijnë për shtëpitë e vjetra, jo për sheshe. Gjelbërimet i pati Durrësi, por i betonizuan. Tani duhet të prishen shtëpi, duhet t’i heqësh njerëzit, t’i nxjerrësh në rrugë,” vijoi Rita Kazazi, një banore tjetër.

Sipas Fatmir Zotajt, tjetër banor, shifrat e projektit janë disproporcionale duke ngritur dyshimin për abuzime me fondet.

“Për kompensimin e 74 familjeve janë parashikuar 3.1 milionë dollarë, ndërsa vetëm për lyerjen e fasadave 6.7 milionë. Kjo është një padrejtësi e hapur,” tha ai për Citizens.al.

Në një koment për Citizens.al fondacioni shpjegoi se kontributi i AADF-së për projektin e Amfiteatrit të Durrësit “përfaqëson një dhurim për qytetin dhe komunitetin lokal”, si pjesë e angazhimit për ruajtjen dhe promovimin e trashëgimisë kulturore.

“AADF nuk ka asnjë rol apo përgjegjësi në lidhje me procedurat e shpronësimeve, përcaktimin e vlerës së kompensimit për pronat, apo çdo proces tjetër që lidhet me çështjen e pronave në zonën e projektit” citohet në përgjigjen për Citizens.al.

AADF përmbylli se këto çështje janë kompetencë ekskluzive e institucioneve qëndrore dhe lokale të shtetit shqiptar.

Ndërkohë, Agjencia Shtetërore për Shpronësimet (ASHSH) sqaroi gjithashtu për Citizens.al se roli i saj është vetëm si zbatuese e procedurave ligjore, ndërsa përgjegjësia për projektin dhe zonën i takon bashkisë dhe qeverisë.

Çfarë dihet deri më tani?

Vendimi për shpronësimet u publikua në Fletoren Zyrtare më 26 gusht 2025, me një fond total prej rreth 315.5 milionë lekësh (3.2 milionë euro) – shumë më e ulët se ajo që kërkonte fillimisht Bashkia (4.8 milionë euro).

Projekti është pjesë e planit TID, miratuar në vitin 2021, i lidhur me nismën pas tërmetit të vitit 2019 për rindërtim dhe zhvillim urban.

AADF dhe Ministria e Kulturës kishin parashikuar shpronësimet që në planin 2021-2028, por procesi është zvarritur dhe po zbatohet pa qartësi publike.

Vlerësimi i pronave mbështetet në VKM-të e viteve 2000 dhe 2015, që nuk pasqyrojnë realitetin aktual të tregut, duke ulur ndjeshëm dëmshpërblimin për banorët e Kalasë.

Në raportime të mëparshme, Citizens.al solli rastet e disa banorëve, shtëpitë e të cilëve nga autoritetet publike vlerësoheshin 60-100 mijë euro ndërkohë që nga vlerësues privatë të pasurive vlera e tyre në treg është së paku dy herë më e lartë.

Lexoni gjithashtu:

• Banorët e Durrësit kundërshtojnë shpronësimet për projektin TID
• Durrës, 32 familje në ish-kabinat e plazhit rrezikojnë të mbeten pa strehë

The post Projekti TID Durrës, banorët protestojnë para zyrave të AADF-së appeared first on Citizens.al.

TIRANË, 7 tetor/ATSH/ Kryetarja e bashkisë së Durrësit, Emirana Sako po merr pjesë në aktivitetin e Nismës Bloomberg LSE, për Lidershipin e Qytetit Evropian që mbahet në Londër.

Sako i është bashkuar 30 homologëve të huaj nga vende të ndryshme të botës që po marrin pjesë në këtë organizim.

Në një postim në rrjetet sociale, Sako u shpreh se “ndërsa politikat kombëtare dhe globale varen gjithnjë e më shumë nga progresi lokal, bashkitë janë në thelb të së ardhmes së Evropës”.

Sako tha se ndihet e nderuar që të jetë midis 30 kryetarëve të bashkive nga vende të ndryshme të botës të përzgjedhur për të marrë pjesë në klasën përuruese të Nismës Bloomberg LSE për Lidershipin e Qytetit Evropian.

Sipas Sakos, kjo është nisma e parë e këtij lloji, e udhëhequr nga Bloomberg Philanthropies dhe The London School of Economics and Political Science (LSE) me Hertie School.

“Ky program do ta pajisë ekipin tonë në bashkinë Durrës me aftësi të përparuara për t’u përballur me sfidat urgjente, për të shfrytëzuar mundësitë dhe për të marrë role udhëheqëse, duke sjellë përparim për banorët në mënyra krejtësisht të reja”, përfundoi Sako.

Iniciativa e Lidershipit të Qyteteve Evropiane e Bloomberg LSE synon që të pajisë kryetarët e bashkive me strategji dhe aftësi, të mbështetura nga studiues dhe udhëheqës politikash botërore që nxisin hartimin e zgjidhjeve me rezultate të prekshme për qytetarët.

/e.i/j.p/

The post Lidershipi i Qytetit Evropian në Londër, Sako mes 30 kryetarëve të bashkive evropiane appeared first on Agjencia Telegrafike Shqiptare.

Sipas një vendimi të Gjykatës së Shkallës së Parë të Durrësit, 32 familje, që banojnë në ish-kabinat e plazhit në rrugën “Albanopoli”, duhet të lirojnë shtëpitë deri më 5 tetor.

“Me mbarimin e afatit vullnetar, në rast mosveprimi […] ekzekutimi do të kryhet në mënyrë të detyrueshme,” citohet në vendimin e gjykatës dhënë më datë 18 shtator 2025.

Nexhmir Belshari, banuese prej rreth 35 vitesh në këto godina tregon për Citizens, se banorët nuk i kanë zaptuar ato, por janë strehuar sipas një vendimi të ish-Komitetit Ekzekutiv të sistemit komunist, i cili më vonë u zëvendësua në funksion nga struktura e bashkisë Durrës.

“Kemi statusin e të pastrehëve. Jemi strehuar nga shteti dhe kërkojmë zgjidhje po nga shteti,” thekson ajo për Citizens.al.                                   

Banorët u mblodhën të hënën, përpara Bashkisë për të dytën herë, pasi më 26 shtator iu kërkua të sillnin dokumentet për statusin, pagesat ndër vite të faturave të shërbimeve drita-ujë, që vërtetojnë banimin e tyre, si dhe vetë deklarimin e sipërfaqes.

Petrit Brodhina tha se pas mbledhjes nuk i ishte ofruar asnjë zgjidhje nga bashkia, por i ishte sugjeruar që ai dhe banorët e tjerë të lënë shtëpitë brenda afatit të përcaktuar.

“Filloni dilni dhe aplikoni si të pastrehë te bashkia! Më e keqja është se na bëri dhe parapritë dhe tha kemi tre mijë veta që janë në radhë dhe s’po i strehojmë dot,” tha Brodhima, duke ju referuar fjalës që i kishte komunikuar kryetarja e Bashkisë Durrës, Emiriana Sako.

Bashkia përgjegjëse morale dhe ligjore e situatës

Avokatja Merita Dakovelli,e cila është njëkohësisht dhe banore në këto godina, shpjegoi se familjet nuk ishin në dijeni se kundër vendimit të Këshillit Bashkiak Durrës, që në vitin 2009 pati caktuar mundësinë e privatizimit të këtyre banesave në favor të banorëve, ishte hapur një proces gjyqësor nga pronari i truallit, Mikel Noçka.

Dakovelli vijon se Këshilli Bashkiak, i përfaqësuar nga Bashkia Durrës nuk ka qenë prezent në seancat gjyqësore. Sipas avokates, pronari i truallit, konkretisht familja Noçka, ka bërë kontratë privatizimi me Ministrinë e Ekonomisë, pra “këto objekte në këto moment kanë një pronësi të ndarë midis pronarit dhe Ministrisë në fjalë”.

“Nuk jemi lajmëruar kur bashkia i ka dorëzuar objektet, sepse ka një akt-dorëzimi sikur objekti është bosh, ndërkohë që ne kemi qenë aty. Bashkia duhet të ndjehet borxhlie me ne dhe nga 2013 duhet të ofronte një alternativë strehimi,” vijon Dakovelli.

Momentalisht banorët janë në disfavor, sepse ata duhet të dalin jashtë derisa çështja të shqyrtohet në Apel. Ajo shton se familjet kanë depozituar një ankim të veçantë kundër vendimit të ekzekutimit të përkohshëm për lirimin e banesave.

“Ne i kemi kërkuar bashkisë në një kërkesë, që të mos jepet leje ndërtimi në këtë periudhë dhe e dyta, nëse nuk ka alternativa të tjera, që ne të jemi qiramarrës te pronari, të paguajmë një qira sociale, deri në përfundim shqyrtimi të situatës,” përmbylli avokatja.

Kjo është situata e dytë brenda pak ditësh ku banorë të qytetit Durrësit po protestojnë përpara Bashkisë, për çështje pronësie.

Fillimisht protestat nisën nga banorët e zonës arkeologjike A, konkretisht pas Bulevardit Tregtar, të cilët nuk bien dakord me vlerën e shpronësimit, që është përcaktuar sipas qeverisë në sajë të projektit “Restaurimi dhe rikualifikimi urban i zonës perspektive TID”.

Banorët e ish-kabinave të plazhit konfirmuan për Citizens se mund të bashkohen me banorët që po kundërshtojnë projektin e rijetëzimit të zonës së kalasë për një rezistencë më të fortë, edhe pse vinë nga kontekste të ndryshme urbanistike.

Lexoni gjithashtu:

• Banorët e Durrësit kundërshtojnë shpronësimet për projektin TID

The post Durrës, 32 familje në ish-kabinat e plazhit rrezikojnë të mbeten pa strehë appeared first on Citizens.al.

Shtatëdhjetekatër familje në Durrës pritet të humbasin pronat e tyre për shkak të një projekti urbanistik që synon t’i japë pamje tjetër Parkut Arkeologjik.

Projekti “Restaurimi dhe rikualifikimi urban i zonës perspektive TID” po financohet nga qeveria dhe bashkia e Durrësit në bashkëpunim me Fondacionin Shqiptaro-Amerikan për Zhvillim (AADF). Ai po has kontestime për vlerën e ulët të shpronësimeve dhe mungesën e konsultimeve publike.

Vendimi për shpronësimet u publikua në Fletoren Zyrtare më 26 gusht 2025. Ai parashikon kompensim për pronat në zonën e Amfiteatrit dhe Bulevardit Qendror për një vlerë totale rreth 315.5 milionë lekë (3.2 milionë euro), shumë më pak se 467 milionët (4.8 milionë euro) që kishte kërkuar fillimisht Bashkia Durrës.

Procedurat e likuidimit pritet të kryhen nga Agjencia Shtetërore për Shpronësimet, ndërsa përpara pagesës, pronarëve u duhet të paraqesin dokumentet e pronësisë të rifreskuara nga Kadastra.

Shpronësimi ka hyrë në fuqi menjëherë dhe duhet të përfundojë brenda muajit nëntor 2025. Por shuma e caktuar, është vlerësuar në çmime referencash që nuk janë përditësuar prej së paku 10 vite.

Shpronësimi me “vlera qesharake”

Banorët e zonës që preket nga projekti thonë se nuk janë konsultuar dhe se u njohën me projektin vetëm përmes medias. Citizens.al ishte në zonë dhe vizitoi disa prej shtëpive që preken nga shpronësimi.

“Vetëm nga celularët e kemi marrë vesh që do të prishen shtëpitë,” tha Shpresa Braholli, banore e rrugës “Ibrahim Tartari” krah “Bulevardit Tregtar”.

Ajo zotëron një banesë 149 m² dhe thotë se kompensimi i ofruar është 8.3 milionë lekë (85 mijë euro). Me këtë shumë, ajo thotë se nuk mund të përballojë blerjen e një shtëpie tjetër, as në periferinë e Durrësit.

“Jo këtu, po të matanë Spitallës që ta gjesh shtëpinë si kjo qe e kam,” vijon Shpresa.

Në shtëpinë e Altin Xhogut banojnë dy kurora familjare. Ai tregon se prona është vlerësuar me vetëm 6 milion lekë (62 mijë euro).

“Dy familje, nga 3 milionë, ç’mund të bësh me 3 milionë? Tek VKM-ja thotë që ky projekt zbatohet me pëlqimin e banorëve, por unë s’kam dhënë ndonjë pëlqim për të ma marrë pronën,” thotë Xhogu.

Projekti parashikon ndërhyrje për të zgjeruar hapësirat publik, përmendim këtu krijimin edhe të lulishteve. Banorët e intervistuar nga Citizens.al thanë se në disa raste shpronësimi i shtëpive të tyre u ishte kërkuar pikërisht për këtë qëllim.

Ata shprehen të zhgënjyer për faktin se zona ku ata banojnë është tjetërsuar gjatë viteve dhe hapësirat e dikurshme u dhanë për ndërtime shumëkatëshe.

“Te shkolla e muzikës, ka qenë lulishte, do të bëhet pallat. Këtu ne kemi pronën, kemi shtëpinë, prishe thotë (qeveria), do bëjmë lulishte. Nuk e di! Kjo nuk ka sens!” vijon Xhogu.

Banorët janë organizuar për të nisur një proces ligjor me padi kolektive kundër vendimit për shpronësimet duke synuar një vlerësim më të drejtë të pronave.

Shpronësimi me vlerën e viteve 2000

Plani për zonën TID është miratuar që në shkurt 2021. Ai lidhet me nismën e qeverisë, pas tërmetit të vitit 2019, me planet e detyruara vendore për rindërtimin dhe zhvillimin urban.

Në të njëjtin vit, AADF dhe Ministria e Kulturës publikuan “Planin e Menaxhimit të Integruar të Zonave Arkeologjike A & B” për periudhën 2021-2028, ku shpronësimet ishin parashikuar të ndodhnin në vitet 2021–2022. Procesi duket se po e zbaton me vonesë planin dhe pa transparencë të plotë.

Ndërkohë, qeveria e ka miratuar vlerën e shpronësimit për pronat që do të preken nga projekti në bazë të vlerës së tregut, sipas një vendimi të vitit 2000 – VKM nr. 138/2000, e cila është përditësuar me rregulloret e vitit 2015. Pra me çmimet e tregut të së paku 10 viteve më parë. Ngjashëm dhe kompensimi për trojet – VKM nr. 89/2016 dhe ndryshimeve të saj të mëvonshme.

Kështu, banorët e zonës historike të Durrësit po përballen me zhvlerësimin e pronës në mungesë të një procesi publik të ndershëm.

Çështja ngre pikëpyetje mbi etikën e zhvillimit urban dhe sjell ndërmend rastin e zonës së “5 Majit” në Tiranë ku plani i detyruar vendor xhentrifikoi zonën.

Lexoni gjithashtu:

• Monumentet e kulturës në Durrës, mes kyçjes dhe projekteve për rijetësim
• Trashëgimia kulturore në pritje të “rimëkëmbjes” pas tërmetit
• Kisha, biznes me monumentet e kulturës në Kepin e Rodonit

The post Banorët e Durrësit kundërshtojnë shpronësimet për projektin TID appeared first on Citizens.al.

Bulevardi “Epidamn”, që lidh Bashkinë e Durrësit me hyrjen e portit, u ndërtua rreth një shekull më parë, pas tërmetit të rëndë të vitit 1926. Rruga ndërroi disa herë emër, por është ngulitur në memorien e banorëve të Durrësit si “Rruga Tregtare” për shkak të dyqaneve në të dy anët e saj. Si pjesë e […]

The post Transformimi i qendrës historike në Durrës vjen me kosto të lartë për pronarët appeared first on Reporter.al.

TIRANË, 7 shtator /ATSH/ Qyteti bregdetar i Durrës, tashmë nuk është vetëm një destinacion i preferuar për pushuesit vendas dhe ata të huaj, por edhe një atraksion për sportistët e pasionuar pas aktiviteteve ujore.

Kryebashkiakja e Durrësit, Emirana Sako tha sot se në Sektor Rinia u zhvillua një event emocionues në kitesurf, një sport spektakolar që po fiton gjithnjë e më shumë terren në brigjet tona.

Sako tha se do të vazhdojë mbështetja për nisma dhe evente që promovojnë turizmin sportiv dhe potencialin e pakufizuar që ofron qyteti i Durrësit.

Kitsurfi është një sport që konsiston në një platformë ku mbështeten këmbët e sportistit dhe me një litar që fiksohet në belin e tij lidhet një balonë e cila e tërheq atë. Ky sport kërkon një shpejtësi ere afërsisht 20 km/orë.

/e.i//a.f/

The post Kitsurf në Durrës, Sako: Po fiton terren në brigjet tona appeared first on Agjencia Telegrafike Shqiptare.

TIRANË, 5 gusht /ATSH/ Sopranoja shqiptare me famë botërore, Inva Mula dhe instrumentistët e njohur Ekland Hasa në piano dhe Redi Hasa në violonçel, si edhe kori i fëmijëve “Okarina”, sollën sot një atmosferë magjike në skenën antike të Amfiteatrit të Durrësit përmes koncertit “Meloditë e Mesdheut”.

Kryetarja e bashkisë së Durrësit, Emiriana Sako e cilësoi këtë aktivitet, si një koncert mbresëlënës dhe një udhëtim me meloditë më të bukura të Mesdheut, që përcolli emocione të forta dhe përjetime të rralla për qytetarët dhe turistët e shumtë.

“Një event i veçantë ku u takuan muzika, arti dhe historia e që do të mbetet gjatë në kujtesën e publikut”, tha Sako.

Koncerti kishte në program këngët e meloditë më të bukura të pellgut të Mesdheut.

Sopranoja Inva Mula erdhi me këtë koncert pas MIK Fest në Korçë, ku u zhvillua edicioni i tij i tetë.

/e.i//r.e/

The post “Meloditë e Mesdheut”, mbrëmje muzikore në Amfiteatrin e Durrësit appeared first on Agjencia Telegrafike Shqiptare.

TIRANË, 28 korrik/ATSH/ Në lagjen nr. 1 të qytetit të Durrës është rehabilituar një sipërfaqe prej 12 500 m2 e fasadave të pallateve ekzistuese.

Lajmin e ka ndarë kryetarja e bashkisë së qytetit bregdetar, Emirana Sako, e cila tha se ka përfunduar rikonstruksioni i disa pallateve në një prej zonave më të frekuentuara të qytetit, siç është shëtitorja “Taulantia”.

Sako tha se “ky investim synon jo vetëm përmirësimin e imazhit të zonës, por edhe rritjen e qëndrueshmërisë të godinave përballë kushteve atmosferike”.

“Durrësi po ndryshon çdo ditë, më i bukur, më funksional dhe më i denjë për qytetarët e tij”, u shpreh Sako.

Kryetarja e bashkisë së Durrësit, Emiriana Sako është shprehur më herët “se po punohet edhe për zgjerimin e brezit të rërës duke krijuar më shumë hapësirë në dispozicion të pushuesve. Në këtë fazë përfshihet edhe rehabilitimi i fasadave të 41 godinave që ndodhen përgjatë shëtitores, me elementë termoizolues për të rritur eficiencën e energjisë si edhe qëndrueshmërinë e objekteve për një periudhë afatgjatë, duke përmirësuar edhe imazhin e të gjithë kësaj zone bregdetare”.

Ky investim përfshin realizimin e një shëtitoreje prej tre kilometrash përgjatë gjithë shtrirjes së plazhit, me gjelbërim të shtuar, parqe dhe hapësira sportive për të siguruar një lidhje shumë të nevojshme nga Ura e Dajlanit drejt Konvaleshencës.

Midis shëtitores dhe zonës së plazhit do të ngrihen stacione me pajisje sportive për aktivitete fizike në natyrë, si dhe krijimi i zonave për ushtrimin e sporteve ujore.

Projekti investues parashikon që përgjatë shëtitores do të ketë dhe zona të dedikuara për fëmijë, hapësira për pjesën e plazhit, stacionet e plazhit, hapësira shërbimi, si dhe rikonstruksionin e fasadave të godinave.

Nga fasadat e pallateve ekzistuese të rikonstruktuara në lajen nr.1 Durrës

1 nga 3

/e.i/r.e/

The post Sako: Rehabilitohen 12 500 m2 sipërfaqe e fasadave të pallateve në lagjen nr. 1 Durrës appeared first on Agjencia Telegrafike Shqiptare.

TIRANË, 21 korrik /ATSH/ Kryetarja e bashkisë së Durrësit, Emiriana Sako përcolli sot thirrjen për profesionistë nga të gjitha fushat, që duan të japin kontributin e tyre në zhvillimin e mëtejshëm të qytetit duke u bërë pjesë e administratës publike.

Në thirrjen e bërë publike në rrjetet sociale, Sako tha se “të gjithë ata arkitektë, urbanistë, inxhinierë, ekonomistë, IT, juristë, profesionistë të shkencave sociale, pedagogë, profesionistë të sektorit të bujqësisë dhe mjedisit, etj të cilët dëshirojnë të japin kontributin e tyre në shërbim të qytetit dhe qytetarëve të Durrësit janë të ftuar të shprehin interesin e tyre”.

Të interesuarit mund të dërgojnë në email jetëshkrimin e tyre dhe një letër për shprehje interesi.

Adresa elektronike është profesioniste@durres.gov.al.

“Kjo dritare komunikimi do të shërbejë për të dërguar kërkesa, në çdo periudhë të vitit”, tha Sako, ndërkohë që u shpreh se janë hapur thirrjet për disa vende vakante në bashkinë e Durrësit.

/e.i/j.p/

The post Bashkia Durrës fton profesionistët të aplikojnë për vakancat në administratën publike appeared first on Agjencia Telegrafike Shqiptare.

TIRANË, 12 korrik /ATSH/ Amfiteatri i Durrësit u shndërrua mbrëmjen e djeshme në një ambient ku qindra artdashës dhe turistë të huaj, u bashkuan në atmosferën artistike të festivalit “Nga errësira në dritë”.

Performanca nga lëvizja artistike “Tamom”, të gërshetuara me dansin bashkëkohor, krijuan një atmosferë magjike në Amfiteatrin e Durrësit për të gjithë qytetarët dhe artdashësit që morën pjesë.

Kryebashkiakja e Durrësit, Emirana Sako tha se kjo “shfaqje, përgatitur nga lëvizja më e re artistike, “Tamom”, në bashkëpunim artistik me Teatrin Kombëtar të Operës dhe Baletit, shënon edicionin e parë të asaj, që synohet të bëhet një festival tradicional multidisiplinar i artit performativ në Durrës”.

Lëvizjet Tamom dhe dansi bashkëkohor, erdhën si një performancë e kuruar dhe prodhuar nga Klod Dedja.

Kjo nismë shënon edicionin e parë të asaj që synohet të bëhet një festival vjetor multidisiplinar i artit performativ në Durrës një hapësirë ku lëvizja, prezenca dhe bashkëpunimi artistik bashkohen pa kufij.

Shfaqja solli një udhëtim në lëvizje me tri vepra koreografike nga emra të njohur ndërkombëtarë si Russell Maliphant (Britani e Madhe), Mauro Bigonzetti (Itali) dhe Erion Kruja (Shqipëri).

/e.i//r.e/

The post Mbahet në Durrës, edicioni i parë i festivalit të artit performativ appeared first on Agjencia Telegrafike Shqiptare.

Drejtorët e Bashkisë së Durrësit kanë dhënë dorëheqjen pas kërkesës së kryeministrit Edi Rama dy ditë më parë, në takimin që pati me ta. Përveç tyre, dorëheqje kanë dhënë edhe drejtuesit e ndërmarrjeve në varësi të bashkisë, si dhe kryetarët e njësive administrative në territorin e Durrësit. Raportohet se është ngritur një komision i përbërë […]

The post Pas urdhrit të Ramës, japin dorëheqjen dhe drejtorët e Bashkisë së Durrësit/ EMRAT appeared first on BoldNews.al.

TIRANË, 4 korrik /ATSH/ Lirimi i hapësirave publike nga zaptimet do të jetë fokusi i pushtetit vendor dhe drejtuesve të bashkive në të gjithë vendin këtë muaj.

Kryetarja e bashkisë së Durrësit, Emiriana Sako ndau sot në rrjetet sociale pamje nga aksioni për lirimin e plazheve publike në zonën e Currilave.

Sako tha se vazhdon aksionin për lirimin e plazheve publike nga çadrat dhe shezlongët e vendosur në mënyrë abuzive nga persona të ndryshëm, duke i zaptuar këto hapësira që janë të dedikuara për të gjithë qytetarët.

Kryebashkiakja e Durrësit u shpreh se aksioni do të vijojë përgjatë gjithë bregdetit të Durrësit.

“I bëjmë thirrje subjekteve apo dhe individëve të mos zaptojnë këto hapësira, sepse ato i përkasin të gjithë pushuesve”, tha Sako.

/e.i//a.f//r.e/

The post Sako thirrje subjekteve dhe individëve: Mos zaptoni hapësirat publike appeared first on Agjencia Telegrafike Shqiptare.

TIRANË, 2 korrik /ATSH/ Artisti i njohur italian, Enzo Paolo Turchi, balerin, koreograf, aktor dhe personazh mjaft i famshëm televiziv ka vizituar qytetin e Durrësit.

Kryebashkiakja e Durrësit, Emirana Sako ka ndarë në një postim në rrjetet sociale, mesazhin e artistit italian, që thotë se ka mbetur i befasuar nga vizita në qytetin bregdetar.

Sako thotë se artisti Turchi ka pasur bashkëpunime shumë të suksesshme me personalitete të artit si Raffaella Carra por edhe shumë të tjerë, pjesëmarrës në spektakle e emisione televizive duke u bërë mjaft i njohur në shtetin fqinj.

“Enzo Paolo Turchi ka vizituar Durrësin dhe ka mbetur i mahnitur nga qyteti ynë ku ka gjetur gjithçka, klimën, detin, sigurinë, trashëgiminë e pasur kulturore, mikpritjen dhe njerëzit e mrekullueshëm. Ashtu si të gjithë turistët e tjerë ai premton se do të rikthehet sërish në qytetin tonë fantastik”, thotë Sako.

Gjithashtu, artisti italian Turchi thotë se në Durrës u takua me njerëz të mrekullueshëm, ndërsa zbuloi atraksione dhe vende shumë të bukura.

“Kemi vizituar amfiteatrin, muret e kalasë, vilën e ish-mbretit. Kam mbetur i befasuar! E dija që ishte një qytet i bukur, por nuk e prisja kaq të bukur”, tha ai.

“Doja të bëja komplimentet e mia, mbi të gjitha për bashkinë, e cila mban këtë strukturë në mënyrë të bukur dhe shumë të mirë. Patjetër që do të sjellë këtu edhe bashkëshorten dhe vajzën time”, përfundoi Truchi.

/e.i/j.p/

The post Artisti italian Enzo Paolo Turchi në Durrës: I mahnitur, nuk prisja qytet kaq të bukur appeared first on Agjencia Telegrafike Shqiptare.

TIRANË, 27 qershor /ATSH/ Festivali Ndërkombëtar i Muzikës së Dhomës çel sot edicionin e tij jubilar të 20-të pranë katedrales “Shën Luçia”.

Ky festival, tashmë i njohur për nivelin e lartë profesional dhe artistik të koncerteve do të prezantojë përgjatë një muaji zhanre të ndryshme të muzikës së dhomës.

Kryetarja e bashkisë Durrës, Emiriana Sako tha se festivali do të vijojë deri në 21 korrik dhe do të sjellë në zemër të qytetit bregdetar, në katedralen “Shën Luçia”, një udhëtim të pasur përmes muzikës së dhomës.

“Artistë nga mbi 10 vende, formacione të njohura, projekte të reja artistike dhe bashkëpunime ndërkombëtare, në një festival që bashkon traditën dhe risinë, tingujt klasikë dhe emocionin e drejtpërdrejtë”, tha Sako.

Sipas programit, festivali nis sot me koncertin e trios “Amadeus”, grupi i njohur që vjen nga Austria, ndërsa performanca e fundit e parashikuar në datën 21 korrik do të jetë një koncert piano kuartet me artistë nga Shqipëria, Amerika dhe Italia.

Festivali zhvillohet nga shoqata Arti dhe Kultura Italo-Shqiptare, që u krijua me iniciativën e disa artistëve durrsakë, të cilët kanë studiuar e kaluar një pjesë të veprimtarisë së tyre në Itali. Qëllimi i kësaj shoqate ka qenë dhe është bashkëpunimi i artistëve shqiptarë me të huaj, këmbimi i eksperiencave të kulturave të vendeve të ndryshme.

Gjatë aktivitetit të këtyre viteve kjo shoqatë ka organizuar mjaft koncerte në Durrës, Tiranë dhe Itali të cilat kanë përcjellë në publik një nivel të lartë interpretimi artistik.

Sipas organizatorëve ky festival u krijua pikërisht me qëllimin për të siguruar një vazhdueshmëri jo vetëm në njohjen e kulturave të ndryshme nëpërmjet artistëve të ardhur nga Italia, Austria, Franca, Greqia, Zvicra, Kosova, etj., por edhe me dëshirën e madhe për t’u ballafaquar me këto kultura dhe kjo nëpërmjet shfaqjeve të përbashkëta me instrumentistë shqiptarë.

Një tjetër synim i këtij aktiviteti është pjesëmarrja e artistëve shqiptarë, që jetojnë e punojnë jashtë Shqipërisë.

/e.i/j.p/

The post Nis sot edicioni i 20-të i Festivalit Ndërkombëtar të Muzikës së Dhomës në Durrës appeared first on Agjencia Telegrafike Shqiptare.

TIRANË, 24 qershor /ATSH/ 132 familje të qytetit të Durrësit që humbën shtëpitë nga tërmeti, nga sot do të nisin një kapitull të ri në jetën e tyre duke hyrë në banesa të reja, me standarde bashkëkohore.

Kryetarja e bashkisë së Durrësit, Emiriana Sako u shpreh se sot u shpërndanë çelësat e apartamenteve të reja për banorët e pallatit Kastrati, në njësinë administrative nr. 5.

Sako theksoi se me këtë hap, mbyllet me sukses procesi i rindërtimit për këto familje.

“Ky është një hap i madh përpara që kemi hedhur së bashku. Ndihemi krenarë për punën e madhe që kemi bërë dhe i falënderoj qytetarët për besimin dhe për durimin e tyre. T’i gëzoni e të keni shëndet e plot gëzime në shtëpitë tuaja të reja”, tha Sako.

Kryebashkiakja e Durrësit tha se më në fund u finalizua një punë e gjatë dhe e vështirë, që mori pesë vite e shtatë muaj që nga tërmeti i 2019.

“Për ne është emocion i veçantë që ju merrni banesën, por ne kemi mbajtur barrën e madhe të punës dhe peshën e procesit për të cilin është bërë një ligj i veçantë që kur ra tërmeti. Falënderoj donatorët që bënë të mundur që ky financim të jepej, Qeverinë shqiptare dhe Kryeministrin. Ka qenë periudhë e vështirë edhe për ne si bashki, ndërsa Kastrati Group dha një donacion prej 3000 metra katrorë”, tha Sako.

Sipas Sakos, në këtë proces mund të ketë pasur edhe familje që kanë mbetur të pakënaqura dhe mungesë dakordësie për zgjedhjen e katit, por në fund përmes shortit u finalizua procesi për dorëzimin e çelësave të apartamenteve të reja.

“Pas çelësave, do vijojmë punën me pjesën teknike. Ndërtuesit e kanë dorëzuar komplet projektin e përfunduar në bashki, edhe me kolaudimin. Sot, kur të shkoni në shtëpitë tuaja, dritat janë të vendosura, uji është i lidhur, do bëni rinovimin e kontratës me OSHEE-në etj. Ne do të marrim kohën e nevojshme për të arreduar shtëpitë për secilin prej jush”, përfundoi Sako.

/e.i//r.e/j.p/

The post Rindërtimi, Sako: Shpërndamë çelësat e apartamenteve për 132 familje appeared first on Agjencia Telegrafike Shqiptare.

TIRANË, 20 qershor /ATSH/ 132 familje në Durrës, të prekura nga tërmeti i 26 nëntorit 2019, janë bërë me shtëpi të reja.

Kryetarja e bashkisë së Durrësit, Emiriana Sako bëri të ditur se është zhvilluar sot shorteu publik ku janë shpërndarë apartamentet të cilat i përkasin pallatit në rrugën “Ramadan Veliu”.

Sako tha se “brenda javës që vjen banorëve do t’u dorëzohen çelësat e shtëpive, për të nisur një fillim të ri me banesat e tyre të reja të dhuruara falas, më të mira e më të sigurta seç i kishin më parë”.

Ndërsa, qytetarët përmes mesazheve të tyre falënderojnë bashkinë e Durrësit dhe të gjithë personat e angazhuar në këtë proces.

“Jemi shumë të kënaqur për shortin, më së fundi do hyjmë brenda në shtëpitë tona. Ky është shorteu më i shkëlqyeshëm që kam parë”, shprehen disa prej tyre.

“Sot përfunduam me sukses edhe shorteun e radhës për shpërndarjen e apartamenteve në pallatin “Kastrati”, njësia administrative numër 5. Janë 16 familje, të cilat përfunduan me sukses shorteun sot, që ishte vijimi i shorteut të djeshëm ku 116 familje u pajisën me shtëpi të reja. Pra, ne kemi finalizuar me sukses procesin e strehimit për 132 familje, të cilat do të marrin çelësat e apartamenteve të reja dhe bashkëkohore nga e marta e javës tjetër”, shprehet një nga anëtarët e jurisë së shorteut për apartamentet e programit të Rindërtimit.

/e.i//r.e/a.f/

The post Rindërtimi, Sako: Brenda javës dorëzohen çelësat e shtëpive të reja për 132 familje appeared first on Agjencia Telegrafike Shqiptare.