NEW YORK, 23 qershor /ATSH/ Mijëra tifozë të kombëtares së Norvegjisë pushtuan sheshin e famshëm Times Square në New York, duke krijuar një atmosferë festive me këngë, thirrje dhe ritualin e tyre të veçantë, të njohur si “Viking Row”.  

Të veshur me ngjyrat kuqe, blu dhe të bardhë, si dhe me helmeta vikinge, mbështetësit norvegjezë imituan lëvizjet e vozitjes së një anijeje vikinge, duke e kthyer një nga pikat më ikonike të Manhattan-it në një “det” të kuq, të bardhë dhe blu.  

Manifestimi u zhvillua në prag të ndeshjes së Norvegjisë me Senegalin në Kupën e Botës 2026 dhe është bërë një nga imazhet më virale të turneut, duke reflektuar entuziazmin e tifozëve norvegjezë në rikthimin e ekipit të tyre në Botëror pas 28 vitesh.  

The post Tifozët norvegjezë pushtojnë Times Square me “Viking Row” appeared first on Agjencia Telegrafike Shqiptare.

BRUKSEL, 23 qershor /ATSH-DPA/- Komisioni Evropian priti sot në Bruksel, përfaqësues të talebanëve, për herë të parë që nga rikthimi i grupit në pushtet, në Afganistan, pesë vite më parë, me bisedimet që u fokusuan kryesisht në deportimin e shtetasve afganë nga Bashkimi Evropian.

Takimi, i cilësuar nga Komisioni Evropian si “teknik” dhe kishte për qëllim lehtësimin e kthimit të shtetasve afganë, që kanë kryer vepra të rënda penale, ose që konsiderohen rrezik për sigurinë, thanë zyrtarët.

Ministria e Jashtme e Afganistanit e përshkroi vizitën si një “takim historik” dhe tha se palët kishin zhvilluar “bisedime produktive”.

Sipas saj, në qendër të diskutimeve ishte rifillimi i shërbimeve konsullore për afganët, që jetojnë në Evropë.

Në maj, krahu ekzekutiv i BE-së ftoi përfaqësues afganë në Bruksel, pas kërkesës së 20 vendeve të BE-së dhe zonës Shengen, për koordinim mbi deportimet drejt Afganistanit.

Sipas Komisionit, në bisedime morën pjesë edhe përfaqësues nga 15 shtete anëtare.

Ky takim pasoi një raund të parë diskutimesh mes talebanëve dhe zyrtarëve të BE-së, në Kabul në janar.

Deportimet drejt Afganistanit mbeten shumë të debatueshme, që nga marrja e pushtetit nga talebanët në vitin 2021.

Grupi është i izoluar ndërkombëtarisht, për shkelje të të drejtave të njeriut, përfshirë kufizimet ndaj grave dhe vajzave, arrestimet arbitrare, akuzat për torturë dhe kufizime të rënda të lirisë së shtypit.

Në maj, Komisioneri i Lartë i OKB-së për të Drejtat e Njeriut, Volker Türk, shprehu shqetësim për planet e disa vendeve evropiane për të rritur deportimet, duke paralajmëruar se ato mund të dobësojnë mbrojtjen e të drejtave të njeriut dhe të rrezikojnë jetën e njerëzve.

BE thekson se bisedimet nuk nënkuptojnë njohje politike të talebanëve

Komisioni theksoi se këto bisedime nuk përbëjnë njohje politike të talebanëve, të cilët BE-ja nuk i konsideron qeveri legjitime të Afganistanit, dhe se takimet zhvillohen në nivel teknik, jo politik.

Një takim i tillë në territor evropian konsiderohet shumë i ndjeshëm, ndërsa kritikët paralajmërojnë se talebanët, mund ta paraqesin atë, si një fitore diplomatike.

Ministri i Jashtëm belg, Maxime Prévot, u shpreh kundër ftesës së përfaqësuesve talebanë në Bruksel, megjithatë Belgjika lëshoi pesë viza njëditore si vend pritës i institucioneve të BE-së.

Raportuesi special i OKB-së për të drejtat e njeriut në Afganistan, Richard Bennett, deklaroi se një takim i tillë në Bruksel “do të ishte fyerje për afganët, veçanërisht për gratë”.

Shtetet evropiane nxisin për më shumë kthime

Vendet që kërkuan bisedimet – përfshirë Gjermaninë, Suedinë dhe Italinë – deklaruan vitin e kaluar se vetëm rreth 2% e afganëve në BE, që morën urdhra kthimi në vitin 2024 janë deportuar realisht.

Gjermania po zgjeron kontaktet teknike me talebanët dhe ka konfirmuar këtë javë, se deri në katër diplomatë të tjerë talebanë, do të lejohen në vend, për verifikimin e identitetit dhe lëshimin e dokumenteve të udhëtimit.

Ministri gjerman i Brendshëm, Alexander Dobrindt, përsëriti fundjavën se Berlini synon rritjen e deportimeve drejt Afganistanit, me mundësi deri në tre fluturime çarter në muaj.

Edhe Austria dhe Norvegjia kanë zhvilluar më herët bisedime teknike me talebanët, në këtë drejtim. //a.i/

The post FOKUS – BE-ja pret zyrtarët talebanë në Bruksel, për herë të parë që nga marrja e pushtetit appeared first on Agjencia Telegrafike Shqiptare.

BOSTON, 23 qershor /ATSH-DPA/- Presidenti i Shteteve të Bashkuara të Amerikës, Donald Trump, pritet t’u dorëzojë trofeun e Kupës së Botës fituesve, në finalen e 19 korrikut, njoftoi sot presidenti i FIFA-s, Gianni Infantino.

Infantino dhe Trump kanë krijuar një marrëdhënie të afërt gjatë përgatitjeve për turneun, ndërsa presidenti amerikan ka bërë shumë pak deklarata publike për kompeticionin, që nga nisja e tij më 11 qershor.

Megjithatë, Infantino konfirmoi në një intervistë për “Fox & Friends” se plani është që Trump të ketë një rol të rëndësishëm në ceremoninë e dorëzimit të trofeut, në stadiumin “MetLife” në Nju Xhersi, ashtu siç ndodhi edhe në finalen e Kupës së Botës për Klubet vitin e kaluar në SHBA, të cilën e fitoi “Chelsea”.

“Do të jemi së bashku me presidentin, duke shijuar finalen dhe i dorëzuar trofeun fituesit, natyrisht”, tha Infantino.

I pyetur nëse trofeu do të dorëzohej bashkërisht, ai shtoi: “Sigurisht, jemi bashkë gjatë gjithë kohës.

Në finalen e Kupës së Botës për Klubet, Trump qëndroi në podium edhe pasi i dorëzoi trofeun kapitenit të “Chelsea-t”, Reece James.

“Na thanë se do të dorëzonte trofeun dhe më pas do të largohej nga skena, por ai qëndroi”, tha më vonë James.

Sulmuesi vendimtar i finales, Cole Palmer, u shpreh i habitur nga situata.

“E dija që do të ishte aty, por nuk e prisja të ishte në podium kur ngritëm trofeun. U hutova pak”, tha ai.  //a.i/

The post BOTËRORI 2026 – Infantino: Trump pritet t’i dorëzojë trofeun fituesve të Kupës së Botës appeared first on Agjencia Telegrafike Shqiptare.

ROMË, 23 qershor /ATSH) –  Numri magjik është 300. Fasim për një kategori krejt tjetër: 300 kilometra në orë, pragu psikologjik që për çdo adhurues të motorëve përfaqëson shpejtësinë e vërtetë ekstreme, shkruan corriere.

Vetëm një numër shumë i kufizuar motoçikletash të homologuara për rrugë arrijnë ta kalojnë këtë kufi, dhe renditja e sotme rezervon më shumë se një surprizë.

Të flasësh për shpejtësinë maksimale në botën e motoçikletave me performancë të lartë do të thotë të lëvizësh në një terren të ndërlikuar.

Nuk ekziston një shifër absolute dhe universalisht e verifikueshme, pasi çdo prodhues deklaron rezultatet e veta në bazë të kushteve të testimit, konfigurimeve elektronike dhe pistave të ndryshme.

Me këtë sqarim, ja renditja e përditësuar e motoçikletave të prodhimit më të shpejta në botë.

Nga Ducati te CFMOTO

Vendin e parë e mban ende Ducati Panigale V4 R, e aftë të arrijë 318 km/h falë motorit V4 me 998 cc, të derivuar drejtpërdrejt nga Kampionati Botëror Superbike.

Bëhet fjalë për një version special homologimi, i prodhuar në seri të kufizuar dhe i projektuar më shumë për pistën sesa për përdorim të përditshëm.

Me paketën jo të homologuar për rrugë Ducati Corse, shpejtësia mund të arrijë deri në 330 km/h.

Menjëherë pas saj renditet risia absolute, CFMOTO V4 SR-RR, me një shpejtësi të deklaruar prej 315 km/h.

Kjo shënon hyrjen e parë të një prodhuesi kinez në elitën e performancës së lartë.

Motori i saj V4 me 214 kuaj fuqi është rezultat i një projekti të zhvilluar së bashku nga inxhinierë kinezë dhe evropianë, ndërsa versioni përfundimtar i prodhimit pritet të dalë në treg rreth vitit 2027.

MV Agusta historike dhe BMW M 1000 RR

Vendin e tretë e zë MV Agusta F4 CC, një motoçikletë e vitit 2006 e prodhuar në vetëm 100 ekzemplarë dhe e aftë të arrijë 314 km/h falë motorit të saj me katër cilindra dhe 190 kuaj fuqi.

Të njëjtën shpejtësi maksimale prej 314 km/h deklaron edhe BMW M 1000 RR, e cila me 218 kuaj fuqi në 14.500 rpm dhe përdorimin e gjerë të fibrës së karbonit mbyll podiumin virtual të motoçikletave më të shpejta.

Renditjen e plotë e përmbyll MV Agusta F4 312 R e vitit 2007, emri i së cilës i referohet drejtpërdrejt shpejtësisë maksimale të deklaruar prej 312 km/h.

Dy të përjashtuarat e mëdha

Një përmendje të veçantë meritojnë Suzuki Hayabusa dhe Kawasaki ZZR 1400.

Të dyja janë të kufizuara elektronikisht në 299 km/h për shkak të të ashtuquajturit “Gentlemen’s Agreement”, një marrëveshje jozyrtare e arritur nga prodhuesit japonezë në fund të viteve 1990.

Sipas testeve të ndryshme të pavarura, pa këtë kufizim ato do të ishin në gjendje të kalonin lehtësisht 320 km/h.

Top 5 motoçikletat më të shpejta të prodhimit

Ducati Panigale V4 R – 318 km/h
CFMOTO V4 SR-RR – 315 km/h
MV Agusta F4 CC – 314 km/h
BMW M 1000 RR – 314 km/h
MV Agusta F4 312 R – 312 km/h.   /os/

The post FOKUS – Motoçikletat më të shpejta në botë: 5 modelet që kalojnë 300 km/h appeared first on Agjencia Telegrafike Shqiptare.

TIRANË, 23 qershor/ATSH/ Kryeministri Edi Rama reagoi sërish sot në lidhje me ish-oficerin e Ushtrisë Çlirimtare të Kosovës, Dritan Goxhaj, i cili ditën e djeshme lexoi 5 kërkesat e protestuesve para Kryeministrisë.

“Dje ‘Komandant’ me pagesë, po sot shërbëtor me çfarë”, shkruan Rama, ndërsa ndau një video, ku ndër të tjera lexohet edhe deklarata e Xheladin Gashit, njëri prej themeluesve të UÇK-së.

Më poshtë deklarata e një shtetasi të Kosovës për përfshirjen e Dritan Goxhaj në UÇK: 

“Mbrëmë aty na doli një djalë i cili sillet si ish-ushtar i UÇK-së. As ai dhe as babai s’kanë qenë ushtarë të UÇK-së. Kanë qenë mercenarë të UÇK-së. Dritan Goxhaj është djali Dilaver Goxhaj. Të dytë kanë qenë të paguar nga Ushtria Çlirimtare e Kosovës.

Xheladin Gashi, njëri nga katër themeluesit të Ushtrisë Çlirimtare të Kosovës, thotë në datën 14 prill 1999 në qendrën stërvitore të UÇK-së në Helshan erdhën si vullnetarë për luftën për çlirimin e Kosovës katër oficera të ushtrisë shqiptare dhe konkretisht Arqil Mandro, Ermir Begaj, Dritan Dyrmishaj dhe Agim Sallniku.

I solli me një kerr Dritan Goxhaj. Ai është djali i Dilaver Goxhaj, aktualisht vullnetar në luftën e Kosovës në Shtabin e Përgjithshëm të UÇK-së. Si pjesëtar i këtij shtabi, oficerët e ardhur nga ushtria shqiptare punojnë për përkushtim të veçantë për përgatitjen e forcave të UÇK-së.

Këta e kanë sjellë për të përgatitur Ushtrinë Çlirimtare të Kosovës. Do të thotë nuk kanë ardhur vullnetarë, kanë ardhur me pagesë.

Tashi t’i tregoj edhe faktet.

Por këtu është edhe një e veçantë tjetër. Kur Dritan Goxhaj u largua për Tiranë, shokët e tij që erdhën vullnetarë i thanë: ‘Po ti nuk do të qëndrosh me ne në luftë për çlirimin e Kosovës”. Dritani i përgjigjet me një mendjemadhësi të tepruar: ‘Nuk më kanë marrë erë mendtë nga koka të vij në luftën e Kosovës’.

Vullnetarët e ardhur nga perëndimi u indinjuan nga përgjigjja që ai dha, por nuk patën mundësi të reagonin sepse Dritani ndezi veturën me shpejtësi dhe u largua menjëherë nga qendra stërvitore në drejtim të Tiranës. Këtë e shkruan komandant Plaku. Është e datës 21 prill 1999.

Ndërsa më vonë Dritan Goxhaj në arkivat UÇK-së del që ka marrë pare edhe për Arqilin, për këtë Afrim Sallnikun, edhe për këtë tjetrin Dritan Dyrmishin dhe për të gjithë, që do të thotë i ka marrë për muajin maj dhe qershor nga 1600 marka edhe për për vete edhe pse është larguar nga UÇK. Këto janë të dyjat pagesat është tabela që ka mbajt korrespondencën.

Ky është mercenar i paguar i UÇK-së nuk ka qenë vullnetar, ka refuzuar të shkojë në luftë. Ky i ka sjellë vetëm këta si vullnetarë se tani nuk e dimë a i kanë marrë këta paret, a s’i kanë marrë paret. A i ka marrë ky për vete? Kjo pagesë që është marrë prej tij është me datën 25 maj 1999, gati një muaj nga dorëzimi i njerëzve. Aty është arrestuar pas luftës.

Kush e ka liruar e dimë se e ka liruar. Është arrestuar pikërisht për shkak të ndikimeve që ka pas iraniane dhe gjithashtu ky është sjellë si bandit nëpër Prishtinë në hotel Grand ku ka qenë drejtor babai im. Ky ka ardhur s’di sa herë aty me kallashnikova duke tentuar të kërcënojë edhe qytetarët edhe mysafirët që kanë ardhë pas luftës. Këto kanë ndodhur, ka ardhur vetë i tretë, vetë i katërt, rregullisht.

Dhe sot një bandit që ka ardhur në Prishtinë me scorpion, që ne e dimë edhe e njohim, del edhe na shet mend. Ai s’na ka friguar as atëherë as tash s’na frigon me fol. Dhe ai nuk mundet me fol për shqiptarët e aq më shumë në emër të luftës të cilën ka marrë pare për me ardhë me mësuar me i udhëheq ushtarët UÇK-së”.

/m.m/j.p/

The post Rama publikon dëshminë për Dritan Goxhajn: Dje “Komandant” me pagesë, po sot shërbëtor me çfarë appeared first on Agjencia Telegrafike Shqiptare.

TIRANË, 23 qershor/ATSH/ Në Tiranë u zhvillua pasditen e sotme protesta e 24-t kundër projektit të planifikuar në Zvërnec.

Qytetarët u mblodhën sërish në sheshin “Skënderbej” dhe më pas marshuan drejt godinës së Kryeministrisë.

Pankartat dhe parullat janë ato të tubimeve të mëparshme ku kërkohet largimi i Kryeministrit Edi Rama, kreut të opozitës Sali Berisha, ndryshimin e sistemit, shfuqizimin e ndryshimeve në ligjin e zonave të mbrojtura.

Protestuesit vijuan thirrjet për “Shqipëri të re”, ndërkohë që pas himnit kombëtar, fjalën e morën përfaqësues të grupit organizator, të cilët deklaruan edhe njëherë kërkesat e artikuluara në protestën e djeshme nga Dritan Goxhaj.

Protestuesit kanë paraqitur pesë kërkesa kryesore, përfshirë dorëheqjen e kryeministrit, shfuqizimin e statusit dhe kuadrit ligjor për investitorët strategjikë, shfuqizimin e Paketës së Maleve, anulimin e ndryshimeve në ligjin për zonat e mbrojtura, si dhe anulimin e ndryshimeve në ligjin për trashëgiminë kulturore.

Aktivisti Edison Lika lexoi edhe një herë deklaratën me pikat dhe kërkesat e protestës. Sipas tij, deklarata që u lexua dje nga Dritan Goxhaj, frikësoi kryeministrin Rama që u mor personalisht me të dhe me të tjerë, prandaj do bëhet e udhës që ajo të lexohet në çdo protestë.

Lika renditi si pikë të parë dorëheqjen e panegociueshme të kryeministrit dhe të qeverisë, krijimin e një qeverie teknike tranzitore, jopartiake dhe me mandat 12-mujor, ndryshime kushtetuese, ku të gjithë shtetasit shqiptarë të jenë të barabartë para ligjit, si dhe miratimin e tyre me referendum popullor, duke përfshirë ndër të tjera ndryshimin e Kodit Zgjedhor, ndryshimin e ligjit për financimin e partive politike dhe organizatave të ndryshme, kufizimin e ushtrimit të detyrës së kryeministrit në jo më shumë se dy mandate, të plota ose të pjesshme, gjatë gjithë jetës politike të një individi.

“Paralelisht, ne nuk heqim dorë nga kërkesat fillestare: anulimin e ndryshimeve të bëra në ligjin për zonat e mbrojtura, anulimin e ndryshimeve të bëra në ligjin për trashëgiminë kulturore, shfuqizimin e Paketës së Maleve, si dhe shfuqizimin e statusit dhe të kuadrit ligjor për investimet strategjike”, tha ai.

Një prej protestuesve njoftoi se se më 4 korrik Diaspora do jetë sërish në Tiranë për të protestuar.

Protestuesit u shpërndanë pas disa orësh duke marshuar në bulevardin “Dëshmorët e Kombit” dhe në disa rrugë kryesore.

Protesta e 24-t kundër projektit të planifikuar në Zvërnec, foto: Andrin Hoxha

1 nga 25

The post Protesta e 24-t për Zvërnecin në kryeqytet appeared first on Agjencia Telegrafike Shqiptare.

TIRANË, 23 qershor /ATSH/ Arti dhe kultura në Fier kanë humbur një prej përfaqësuesve të tyre më të dashur. Aktori i njohur Sotir Stefa është ndarë nga jeta në moshën 79-vjeçare.

Për shumë vite, Stefa ishte pjesë e jetës artistike të qytetit të Fierit, duke spikatur në skenën e humorit dhe aktivitete të ndryshme kulturore. Me interpretimet e tij ai arriti të krijojë një lidhje të veçantë me publikun, i cili e vlerësoi për talentin, profesionalizmin dhe natyrën e tij të çiltër.

Kolegët dhe miqtë e kujtojnë si një artist të përkushtuar ndaj skenës dhe një qytetar shembullor, që kontribuoi në pasurimin e jetës kulturore të komunitetit fierak.

Largimi i Sotir Stefës lë pas një trashëgimi të vyer artistike dhe shumë kujtime për breza të tërë spektatorësh që e ndoqën dhe e duartrokitën ndër vite. Kontributi i tij në artin dhe humorin qytetar do të mbetet pjesë e historisë kulturore të Fierit.

/e.xh/j.p/

The post Ndahet nga jeta aktori i njohur fierak Sotir Stefa appeared first on Agjencia Telegrafike Shqiptare.

TIRANË, 23 qershor /ATSH/ Aeroporti Ndërkombëtar i Tiranës po zgjeron më tej hartën e destinacioneve ndërkombëtare, duke shtuar një linjë të re ajrore që lidh Shqipërinë me një nga destinacionet më të njohura turistike të Mesdheut.

Sipas njoftimit të Tirana International Airport, sot u zhvillua fluturimi inaugurues në linjën Tiranë–Palma de Mallorca, në bashkëpunim me kompaninë ajrore Wizz Air.

TIA vlerësoi se linja e re përfaqëson një tjetër urë lidhëse mes Shqipërisë dhe Europës, duke zgjeruar mundësitë e udhëtimit për qytetarët dhe turistët.

“Kjo linjë e re forcon lidhjet mes dy vendeve, mbështet zhvillimin e turizmit dhe krijon mundësi të reja për udhëtarët që zgjedhin të udhëtojnë drejt një prej destinacioneve më të dashura të Mesdheut”, bëri të ditur TIA.

TIA vlerëson se destinacionet e reja kontribuojnë në rritjen e flukseve turistike, forcimin e lidhjeve ekonomike dhe promovimin e Shqipërisë si një nyje e rëndësishme e transportit ajror në rajon.

/e.xh/j.p/

The post Linjë e re fluturimi Tiranë–Palma de Mallorca nga Aeroporti i Rinasit appeared first on Agjencia Telegrafike Shqiptare.

SHKUP, 23 qershor /ATSH/ – Tetë vjet pas hyrjes në fuqi të standardeve për kontrollin e ndotjes së ajrit sipas Traktatit të Komunitetit të Energjisë, emetimet e ndotjes në Kosovë, Bosnje dhe Hercegovinë, Maqedoni të Veriut dhe Serbi janë 6.6 herë më të larta se niveli i lejuar, thuhet në raportin e ri të Bankwatch-it.

Bankwatch është rrjeti më i madh i organizatave mjedisore dhe shoqatave për të drejtat e njeriut në Evropën Qendrore dhe Lindore.

Raporti, i titulluar “Përputhu ose mbyll”, u publikua më 23 qershor dhe trajton moszbatimin e ligjeve për emetimet e dioksidit të squfurit (SO₂) nga termocentralet e vjetruara me qymyr në Ballkanin Perëndimor, të cilat, vitin e kaluar, i kanë tejkaluar kufijtë ligjorë.

Në të njëjtën kohë është rritur edhe ndotja nga pluhuri, duke arritur nivelin më të lartë që nga hyrja në fuqi e rregullave aktuale në vitin 2018.

Termocentralet me qymyr në Bosnje dhe Hercegovinë kanë qenë emetuesit më të mëdhenj të SO₂, me 196.940 tonë, që është 12.7 herë mbi kufirin e lejuar.

Pas saj renditet Serbia me 177.756 tonë, ose 5.1 herë mbi nivelin e lejuar.

Në të gjithë rajonin, emetimet e SO₂ janë ulur vetëm në mënyrë të lehtë që nga viti 2018.

Kufijtë e emetimeve në vitin 2025 janë bërë edhe më të rreptë se në vitet e mëparshme – gjë që ka çuar në shkelje edhe më të mëdha, thuhet në raportin e Bankwatch-it.

Ndotësi më i madh i SO₂ në vlera absolute mbetet termocentrali Uglevik në Bosnje dhe Hercegovinë, edhe pse ai ka pajisje për desulfurizim.

Emetimet në vitin 2025, me 115.079 tonë, kanë qenë më të lartat që nga hyrja në fuqi e rregullave për kontrollin e ndotjes në vitin 2018.

Ndotja nga pluhuri ka qenë 2.9 herë më e lartë se niveli i lejuar në vitin 2025, duke arritur nivelin më të lartë absolut dhe relativ që nga fillimi i zbatimit të rregullave më 2018.

Kjo është nxitur kryesisht nga një rritje e madhe në termocentralin e Manastirit në Maqedoninë e Veriut, i cili ka dyfishuar emetimet krahasuar me vitin 2024.

Vetëm ai ka emetuar më shumë se 7.094 tonë mbi kufirin e lejuar për të gjithë rajonin.

The post METEO – Termocentralet e vjetruara në Ballkanin Perëndimor ndotin 6.6 herë mbi limitin e lejuar appeared first on Agjencia Telegrafike Shqiptare.

TIRANË, 23 qershor/ATSH/ Në mbledhjen e fundit të Komitetit Ekzekutiv, një nga vendimet e miratuara lidhet me propozimin e ardhur nga Departamenti i Garave për ndryshimin e formatit të kampionatit “Kategoria e Parë” për sezonet futbollistike 2027/2028 dhe 2028/2029, me qëllim rritjen e konkurrueshmërisë së kampionateve dhe ruajtjen e interesit sportiv gjatë gjithë sezonit.

Departamenti i Garave ka propozuar që ky edicion mos të ketë asnjë ndryshim dhe kampionati të vazhdojë sipas formatit me 3 faza të rregullta dhe 33 javë kampionat.

Vendi i 1-rë dhe i 2-të i Kategorisë së Parë do të ngjiten automatikisht në kampionatin “Abissnet Superiore”.

Ekipet e renditura në vendet e 3, 4, 5 dhe 6 të Kategorisë së Parë play-off do të zhvillojnë fazën gjysmëfinale sipas skemës 3 vs 6 dhe 4 vs 5. Fituesit e çifteve do të përballen në finale dhe fituesi i kësaj finaleje do të ngjitet në kategorinë “Abissnet Superiore” në sezonin e ardhshëm.

Ekipi finalist do të përballet në një takim vendimtar me vendin e tretë nga fundi të “Abissnet Superiore” play-out për të përcaktuar ekipin që do të marrë pjesë në elitën e futbollit në edicionin e ardhshëm.

Ndërkaq, për edicionet 2027/2028 dhe 2028/2029, është propozuar që skema e kampionatit të jetë e njëjtë si strukturë me skemën e kampionatit “Abissnet Superiore.

Sipas formatit të ri, kampionati do të zhvillohet në dy faza të rregullta, me 12 skuadra që do të luajnë përgjatë 22 javëve. Pas përfundimit të tyre, skuadrat do të ndahen në dy grupe sipas renditjes. Pikët e grumbulluara gjatë fazës së rregullt do të përgjysmohen përpara nisjes së fazave play-off dhe play-out.

Gjashtë skuadrat e para do të garojnë në fazën play-off, ku do të zhvillojnë ndeshje me sistem vajtje-ardhje, në total 10 javë garë. Skuadra e renditur në vendin e parë do të shpallet kampione e edicionit 2027/2028 dhe do të ngjitet automatikisht në “Abissnet Superiore”. Edhe ekipi i renditur në vendin e dytë të play-off do të ngjitet në kampionatin elitë.

Po ashtu, gjashtë skuadrat e renditura në gjysmën e poshtme të tabelës do të zhvillojnë fazën play-out, me sistem vajtje-ardhje dhe 10 javë garë. Dy skuadrat e renditura në dy vendet e fundit  do të bien automatikisht në Kategorinë e Dytë për sezonin pasardhës.

Skuadrat e renditura në vendet 3 dhe 4 të parafundit të fazës play-out në Kategorinë e Parë do të zhvillojnë ndeshje me ekipet e play-off të Kategorisë së Dytë, Grupi A dhe B.

Ekipet e renditura në vendet e 3, 4, 5 dhe 6 të Kategorisë së Parë play-off do të zhvillojnë fazën gjysmëfinale sipas skemës 3 vs 6 dhe 4 vs 5. Fituesit e çifteve do të përballen në finale dhe fituesi i kësaj finaleje do të përballet në një takim vendimtar me vendin e tretë nga fundi të “Abissnet Superiore” play-out për të përcaktuar ekipin që do të marrë pjesë në elitën e futbollit në edicionin e ardhshëm.

The post Ndryshon edhe formati i Kategorisë së Parë duke nisur nga edicioni 2027/2028, KE aprovon vendimin appeared first on Agjencia Telegrafike Shqiptare.

MOSKË, 23 qershor /ATSH-DPA/- Presidenti rus Vladimir Putin deklaroi sot se Perëndimi, me NATO-n në krye, po përgatitet në mënyrë aktive për një luftë kundër Rusisë.

Duke folur para qindra oficerëve të rinj të ushtrisë ruse në Kremlin, Putini tha se vendet e Aleancës deri më tani, janë kufizuar vetëm në mbështetjen e Ukrainës.

“Por, në Perëndim po flitet hapur se po përgatiten për luftë kundër nesh dhe po rrisin buxhetet ushtarake dhe ofensive”, tha ai.

Presidenti rus akuzoi NATO-n dhe vendet e Bashkimit Evropian se po përdorin, siç i cilësoi ai, pretendime të rreme për një kërcënim ushtarak nga Rusia, me qëllim justifikimin e rritjes së shpenzimeve për mbrojtje.

Sipas të dhënave të cituara, gati 40% e shpenzimeve buxhetore të Rusisë aktualisht shkojnë për ushtrinë, armatimin dhe sigurinë.

Megjithatë, Putini theksoi se Moska mbështet një sistem shumëpolar të marrëdhënieve ndërkombëtare, i cili, sipas tij, garanton sigurinë ushtarake të çdo shteti.

“Ne jemi të gatshëm të reagojmë në mënyrë të shpejtë dhe të përshtatshme ndaj çdo kërcënimi të jashtëm dhe të brendshëm”, paralajmëroi ai.

Deklaratat vijnë ndërsa lufta në Ukrainë, e nisur me urdhër të Putinit në shkurt 2022, vijon ende pa një fund të qartë, duke nxitur vendet e NATO-s dhe BE-së, të forcojnë kapacitetet e tyre ushtarake, përballë rreziqeve të mundshme të zgjerimit të konfliktit.

Akuza të reja ndaj Ukrainës dhe tensione në rritje

Në një takim të veçantë me zyrtarë qeveritarë, Putini akuzoi Ukrainën, se po godet objektiva civile brenda territorit rus, duke pretenduar se kjo lidhet me përkeqësimin e situatës në frontin e luftës.

Sipas Kremlinit, ai urdhëroi marrjen e masave për të minimizuar ndikimin e sulmeve ukrainase.

Nga ana e saj, Ukraina ka intensifikuar sulmet ndaj industrisë së naftës dhe infrastrukturës ushtarake ruse, me synim ndërprerjen e furnizimeve për forcat ruse dhe uljen e të ardhurave energjetike që financojnë luftën e Moskës.

Situata mbetet veçanërisht e tensionuar në Krime, gadishullin e Detit të Zi, të aneksuar nga Rusia në vitin 2014 dhe të përdorur si një bazë kyçe ushtarake.

Sipas autoriteteve ukrainase, synimi i Kievit është izolimi i Krimesë përmes sulmeve me dronë.

Ndërkohë, në Krime është kufizuar furnizimi me karburant për qytetarët, ndërsa autoritetet kanë vendosur edhe orare për ndërprerje të energjisë elektrike.

Në qytetin Voronezh, në Rusinë perëndimore, një sulm me raketë ukrainase ka dëmtuar dje një fabrikë armësh, në një tjetër zhvillim që tregon përshkallëzimin e konfliktit. / /a.i/

The post MOSKË – Putin: NATO po përgatitet për luftë ndaj Rusisë appeared first on Agjencia Telegrafike Shqiptare.

Sekretari amerikan i Shtetit, Marco Rubio, tha se Washingtoni do të negociojë dhe do të merret drejtpërdrejt me Bejrutin, duke shtuar se negociatat Liban-Izrael janë të ndara nga marrëveshja, transmeton Anadolu.

“Ky proces është i ndarë. Është i ndarë sepse Libani është shtet sovran. Ka një qeveri, dhe kur bëhet fjalë për Libanin… ne do të negociojmë dhe do të merremi drejtpërdrejt me qeverinë libaneze”, u tha Rubio gazetarëve pas mbërritjes në Abu Dhabi.

Rubio është në një vizitë në Emiratet e Bashkuara Arabe, Kuvajt dhe Bahrein nga 23 deri më 25 qershor për të diskutuar sigurinë rajonale, pas një memorandumi mirëkuptimi të arritur mes SHBA-së dhe Iranit.

“Fola me Presidentin (Joseph) Aoun, së bashku me nënpresidentin, pak çaste më parë, fola me të edhe të premten. Njerëzit e tyre janë atje tani në terren”, tha Rubio.

Ai tha se “çështja iraniane lidhur me Libanin” është “mbështetja dhe sponsorizimi i Hezbollahut”, e cila do të diskutohet “si pjesë e bisedimeve tona me iranianët”.

“Por sa i përket të ardhmes së Libanit, e ardhmja e Libanit i përket popullit libanez përmes qeverisë së tij sovrane të zgjedhur, dhe me atë do të punojmë”, shtoi ai.

Rubio gjithashtu tha se Irani nuk do të lejohet të vendosë tarifa në Ngushticën e Hormuzit si pjesë e ndonjë marrëveshjeje përfundimtare me SHBA-në, duke theksuar se një gjë e tillë bie ndesh me të drejtën ndërkombëtare.

“Është një rrugë ujore ndërkombëtare. Asnjë vend nuk lejohet të vendosë tarifa ose taksa në një rrugë ujore ndërkombëtare. Kjo është e drejta ekzistuese ndërkombëtare”, tha ai.

Ai shtoi se “një përfundim i plotë i armiqësive në gjithë rajonin” nuk do të jetë i mundur nëse “proksit iranianë vazhdojnë të lëshojnë raketa dhe dronë”, dhe se kjo çështje do të përfshihet në negociata.   /os/

The post UASHINGTON – Rubio: SHBA do të merret drejtpërdrejt me Libanin appeared first on Agjencia Telegrafike Shqiptare.

TIRANË, 23 qershor /ATSH/ Në kuadër të përgatitjeve për sezonin turistik 2026, Autoriteti Kombëtar i Ushqimit ka ndërmarrë masa të shtuara për garantimin e sigurisë ushqimore, forcimin e kontrolleve në terren dhe rritjen e standardeve higjieno-sanitare në subjektet e biznesit ushqimor, me fokus mbrojtjen e shëndetit të konsumatorëve dhe rritjen e besimit të turistëve.

Në Lezhë u zhvillua tryeza e diskutimit “Siguria Ushqimore, Sezoni Turistik 2026”, me pjesëmarrjen e Drejtoreshës së Përgjithshme të Autoriteti Kombëtar i Ushqimit, Blerina Gjylameti, Kryetarit të Bashkisë Lezhë, Bashkia Lezhë, Pjerin Ndreu, si dhe deputetit të qarkut Lezhë, Admir Kadeli.

Gjatë takimit u theksua rëndësia e bashkëpunimit ndërinstitucional dhe i operatorëve të biznesit për zbatimin e standardeve të sigurisë ushqimore, si një element kyç për suksesin e sezonit turistik dhe promovimin e imazhit të Shqipërisë si destinacion i sigurt turistik.

1 nga 4

/e.xh/j.p/

The post Lezhë, masa të shtuara për sigurinë ushqimore në sezonin turistik appeared first on Agjencia Telegrafike Shqiptare.

LONDËR, 23 qershor /ATSH/ – Citate “fake” në rrjete sociale. Intervista pas ndeshjes që shpërndahen si zjarr. Thashetheme që dalin jashtë kontrollit. Cristiano Ronaldo, në Botërorin e tij të gjashtë – që për shumëkënd është edhe i fundit – ka qenë i destinuar të pushtojë titujt e medieve, por ndoshta jo kaq herët dhe jo për arsyet që po shohim në këtë turne, shkruan BBC.

Gjithçka nisi me paraqitjen, jo në nivelin e zakonshëm të 41-vjeçarit, në barazimin 1–1 të Portugalisë ndaj DR Kongos në ndeshjen e parë të Botërorit.

Më pas, një intervistë rutinë e Joao Neves, pas ndeshjes u interpretua krejt ndryshe në rrjet, duke ndezur një valë reagimesh dhe duke futur kampin portugez në një lloj kaosi mediatik.

Neves nuk është i panjohur me situata të tilla të vështira para medieve. Në mars 2024, Benfica humbi 5–0 ndaj Porto. Dhe megjithëse ai kishte humbur nënën vetëm pak ditë më parë, 19-vjeçari atëherë u detyrua të dilte dhe të shpjegonte humbjen.

Në krahasim me atë natë të rëndë në “Dragão”, barazimi me DR Kongon dukej i vogël, por reagimet e tij pas ndeshjes u kthyen në qendër të debateve.

I pyetur për rolin e Ronaldos në skuadër, Neves u shpreh: “E dimë çfarë ka bërë Ronaldo për kombëtaren, por në këtë moment ai është njëri prej nesh. Një lojtar si gjithë të tjerët, që po përpiqet të ndihmojë skuadrën”.

Kaq mjaftoi që situata të shpërthente. Tifozët e Ronaldos mbushën rrjetet sociale me komente të ashpra ndaj Neves, Bruno Fernandes dhe të tjerëve, duke i akuzuar për mungesë respekti ndaj kapitenit.

Edhe sipas standardeve të një superylli global si Ronaldo, reagimi u konsiderua i pazakontë.

Analisti Vítor Pinto nga “Record” e përshkroi situatën si një shenjë të një ndarje të rrezikshme brenda kampit portugez.

Situata u përkeqësua edhe më shumë kur persona të afërt me Ronaldon u përfshinë në debat.

Partnerja e tij Georgina Rodríguez reagoi ndaj një citimi të rremë, të atribuuar në rrjete sociale, ndërsa motrat e tij shpërndanë postime që sugjeronin se ylli portugez po anashkalohej qëllimisht.

Edhe në media televizive portugeze, figura pranë Ronaldos cituan deklarata të pavërteta për ta mbrojtur.

Kjo situatë nuk mbeti në rrjet. Pati një përfshirje edhe të kampit të Portugalisë në Palm Beach, duke e bërë atmosferën edhe më të tensionuar.

Në konferenca për shtyp u ngrit shpesh pyetja: a është Portugalia e ndarë mes atyre që janë “pro Ronaldos” dhe atyre që nuk janë?

“Ky nuk duhet të ishte fare një debat”, u përgjigj Rúben Dias me një ton të prerë.

Ndërsa Diogo Dalot shtoi se nëse do të hynin në këtë lojë akuzash, skuadra nuk do të dilte kurrë prej saj.

Portugalia tani e di se vetëm një fitore bindëse ndaj Uzbekistanit mund të ulë tensionin – dhe idealisht, me Ronaldon që gjen rrugën drejt golit.

“Si një skuadër që sillet rreth një lojtari”

Ronaldo nuk ka shënuar në 10 ndeshje radhazi në turne të mëdha, një seri që vazhdon nga penalltia ndaj Ganës në Botërorin 2022.

Në ndeshjen ndaj DR Kongos, ai pati tre goditje drejt portës, më shumë se çdo lojtar tjetër, por pa sukses në kuadrat.

Analisti Luís Aguilar theksoi se debati rreth tij shpesh e zhvendos fokusin nga skuadra.

“Është sikur Portugalia po luan në ‘vendin e Ronaldos’, jo në një kompeticion normal. Sikur gjithçka duhet të funksionojë për të, edhe kur nuk është më lojtari më i mirë në fushë”, tha ai.

Edhe kritikat për rolin e tij në formacion po shtohen. Nën drejtimin e Roberto Martínez, Ronaldo është zëvendësuar vetëm një herë, para minutës së 60-të në 30 ndeshje si titullar, një tregues se ai vazhdon të trajtohet si figurë e paprekshme.

Disa analistë shkojnë më larg, duke thënë se problemi nuk është vetëm mungesa e golave, por edhe ndikimi në mënyrën si luan skuadra.

Sipas tyre, lojtarët shpesh kërkojnë t’ia pasojnë topin atij edhe kur ka opsione më të mira, duke ngadalësuar lojën e Portugalisë.

Megjithatë, brenda federatës dhe kampit portugez, askush nuk dëshiron ta kthejë këtë në një konflikt të hapur.

Portugalia, në fund të fundit, kërkon vetëm një gjë: qetësi – dhe gola që e rikthejnë Ronaldon në qendër të skenës për arsyet e duhura. //a.i/

The post BOTËRORI 2026 – Si të zgjidhësh një “problem” si Ronaldo? appeared first on Agjencia Telegrafike Shqiptare.

TIRANË, 23 qershor/ATSH/ Kryetari i grupit parlamentar të Partisë Socialiste, njëherësh bashkëkryetar i Këshillit Kombëtar të Integrimit Europian, Taulant Balla zhvilloi sot një bashkëbisedim me të rinj e të reja shqiptarë të Maqedonisë së Veriut.

Në fjalën e tij, Balla deklaroi se shqiptarët në këtë shtet fqinj janë kombësi shtetformuese dhe nuk janë minoritet etnik dhe se e drejta për shkollim dhe përdorim të gjuhës shqipe kudo është detyrim dhe nuk mund të negociohet.

“Po jetojmë në një kohë që segmente të caktuara edhe brenda nesh, shqiptarëve, të shtyra apo sponsorizuara nga aktorë jomiqësorë, po kultivojnë ndasi mes veti apo frymë antiamerikane dhe antisemite në hapësirën shqiptare. Marrëdhënia e shqiptarëve me SHBA është dhe duhet të mbetet e fortë”, shtoi ai.

Sipas Ballës, respektimi i Marrëveshjes së Ohrit, është element thelbësor ekzistencial për Maqedoninë e Veriut dhe për rrugën e anëtarësimit në Bashkimin Europian.

“Çdo hap që cenon përdorimin e gjuhës shqipe në institucione, në provime, në shkolla apo universitete, është një hap kundër së ardhmes europiane të vendit”, tha Balla.

Në bashkëbisedim, Balla komentoi edhe reagimet që lidhen me projektin në Zvërnec, lidhur mbi ndikimin mjedisor dhe rikthimin e flamingove në zonë pas moratoriumit të gjuetisë.

“U harruan flamingot. Deri në vitin 2013 flamingot nuk vinin aty sepse i vrisnin gjahtarët. Pasi ne morëm qeverisjen, vendosëm moratorium kundër gjuetisë dhe flamingot u rikthyen. Tani aty sheh ambientalistë, por pamë edhe njerëz që mbajnë qëndrime në mbështetje të regjimit të Iranit”, tha Balla.

Balla nënvizoi gjithashtu rëndësinë e marrëdhënieve të Shqipërisë me Shtetet e Bashkuara të Amerikës, duke i cilësuar ato si të pazëvendësueshme për historinë dhe të ardhmen e vendit.

1 nga 4

/m.m/j.p/

The post Balla me të rinj shqiptarë të Maqedonisë së Veriut: Gjuha shqipe nuk negociohet appeared first on Agjencia Telegrafike Shqiptare.

TIRANË, 23 qershor/ATSH/ Liceu Francez në Korçë, një projekt i përbashkët mes qeverisë shqiptare dhe asaj franceze, do të jetë një qendër ekselence në fushën e teknologjisë dhe inovacionit në rajon, duke ofruar diploma të dyfishta për nxënësit.

Gjatë vizitës së Kryeministrit Edi Rama një ditë më parë në Paris ku u prit nga Presidenti francez, Emmanuel Macron, u hodh një tjetër hap i rëndësishëm për të çuar përpara punën e përbashkët drejt finalizimit të këtij projekti.

“Sot edhe Rilindja e Liceut Francez të Korçës është në tryezën e Presidentit të Francës, si një ndër projektet nën kujdesin e tij, pas vizitës historike në Tiranë”, u shpreh sot kryeministri Rama, ndërsa ndau një foto të përbashkët me Macron.

Rama theksoi se një dekadë më parë Franca që kujdeset për Shqipërinë dhe Shqipëria që konsiderohet partner strategjik i Francës në Ballkan, do të ishte e paimagjinueshme.

Liceu Francez i Korçës, një projekt-simbol i marrëdhënieve të shkëlqyera mes Shqipërisë dhe Francës, shumë shpejt do të kthehet në një mundësi të re për qindra nxënës shqiptarë, por edhe për të rinj nga vendet e rajonit.

Të rinjtë mund të studiojnë në Korçë në një mjedis ndërkombëtar, duke përfituar diploma të dyfishta të Maturës Shtetërore dhe Baccalauréat Français, të njohura si në Shqipëri ashtu edhe në Francë.

/m.m/j.p/

The post Rama: Rilindja e Liceut Francez të Korçës në tryezën e Macron appeared first on Agjencia Telegrafike Shqiptare.

LONDËR, 23 qershor /ATSH/- Franca dhe Iraku u detyruan ta ndërpresin ndeshjen e tyre për rreth dy orë për shkak të stuhisë, një sfidë më shumë për mendjen sesa për këmbët, shkruan BBC.

“Kemi kaluar një mbrëmje vërtet të vështirë”, tha spikeri i stadiumit gjatë ndërprerjes që zgjati më shumë se dy orë në sfidën mes Francës dhe Irakut.

Ishte një natë e pazakontë jo vetëm për futbollistët dhe trajnerët, por edhe për 68 344 tifozët e pranishëm në stadiumin e Filadelfias.

Ndeshja, e cila nisi në orën 17:00 sipas kohës lokale, përfundoi në 20:47, pasi kushtet atmosferike detyruan organizatorët të ndërprisnin lojën, për arsye sigurie.

Kur gjyqtari kanadez Drew Fischer sinjalizoi fundin e pjesës së parë në minutën e 45-të, me Francën në avantazh 1-0, mbi stadium nisën të grumbulloheshin re të dendura. Më pas erdhën reshjet e rrëmbyeshme dhe rreziku i stuhive me shkarkesa elektrike.

Në orën 20:00 u dha drita jeshile për rifillimin e takimit.

Franca, e vendosur të mos humbiste më kohë, shënoi edhe dy herë të tjera dhe fitoi 3-0.

Kapiteni Kylian Mbappé realizoi dopietë në ndeshjen e tij të 100-të me kombëtaren, duke udhëhequr “Gjelat” drejt fazës së 1/16-ave.

“Ishte rraskapitëse mendërisht”

“Ishte një mbrëmje shumë e gjatë”, tha Mbappé pas ndeshjes.

“Kaluan orë të tëra në pritje. Ishte rraskapitëse emocionalisht dhe mendërisht, sepse duhej të qëndronim të përqendruar gjatë gjithë kohës në dhomat e zhveshjes”, shtoi ai.

“Të qëndrosh aty për gati dy orë dhe të ruash fokusin nuk është aspak e lehtë. Kërkon shumë energji mendore. Futbollistët dhe stafi bënë një përpjekje të madhe”, tha Mbappé.

Po çfarë bënë ekipet gjatë kësaj kohe?

“Luajtëm letra”, bëri shaka trajneri i Francës, Didier Deschamps.

“Më saktë, prisnim. Na jepnin vazhdimisht orare të reja për rifillimin e ndeshjes”, tha ai.

“Në fakt kalova mirë me lojtarët e mi. Këto janë situata të jashtëzakonshme. Kundër shiut dhe vetëtimave nuk mund të luftosh. Më e rëndësishmja ishte të mos rrezikonim”, shtoi ai.

Ndeshja e parë e ndërprerë nga moti

Kjo ishte ndeshja e 42-të e Kupës së Botës dhe e para që ndërpritej për shkak të motit.

Sipas rregullave në Shtetet e Bashkuara të Amerikës, nëse regjistrohet një vetëtimë brenda një rrezeje prej tetë miljesh nga stadiumi, ndeshja duhet të ndalet menjëherë.

Pas pushimit mes pjesëve, qielli mbi Filadelfia u hap plotësisht dhe tifozët u udhëzuan të strehoheshin në korridoret e stadiumit.

Megjithatë, sapo u njoftua se rreziku kishte kaluar, stadiumi shpërtheu në festë. Tribunat u mbushën sërish dhe tifozët, të mbuluar me mushama, kënduan dhe vallëzuan në pritje të rifillimit.

Një gabim që ndryshoi ndeshjen

Futbollistët u rikthyen në fushë për nxehjen rreth një orë e 40 minuta më vonë. Edhe atëherë pati një vonesë shtesë, pasi punonjësit e stadiumit, duhej të largonin ujin e grumbulluar në tapetin e lojës.

Kur topi nisi të rrotullohej sërish, Iraku bëri një gabim të rëndë në rivënien e lojës nga porta, duke i dhuruar Francës golin e dytë dhe praktikisht duke vulosur fatin e sfidës.

Trajneri australian i Irakut, Graham Arnold, beson se ndërprerja e gjatë ndikoi drejtpërdrejt në atë episod.

“Para se të dilnim sërish në fushë u thashë lojtarëve se gjithçka do të varej nga ai ekip që do të ishte më i përqendruar mendërisht. Fatkeqësisht, gabimi na kushtoi shumë”, tha ai.

“Ndërprerja dyorëshe e bëri gjithçka më të vështirë. Është hera e parë që përjetoj diçka të tillë si trajner apo si futbollist”, shtoi ai.

“Ideja ishte të relaksoheshin, të rikuperonin energjitë dhe të përgatiteshin për të hyrë sërish në lojë. Ishte një përvojë krejtësisht e veçantë për të gjithë”, tha ai.

Biçikletë, ushtrime dhe biseda

Mbrojtësi francez Jules Koundé tregoi se skuadra u përpoq të qëndronte aktive gjatë ndërprerjes.

“Bëmë disa minuta stërvitje në biçikleta për të mbajtur trupin në lëvizje. Më pas biseduam dhe pritëm momentin kur do të dilnim sërish për nxehje”, tha ai.

“Ishte si të niste një ndeshje krejtësisht e re. Të gjithë donim ta përfundonim sfidën dhe të siguroheshim që fusha ishte në gjendje të mirë për lojë”, shtoi ai.

Sipas ish-futbollistit skocez Pat Nevin, pushimi i gjatë duket se i shkoi më shumë për shtat Francës.

“Një ndërprerje e tillë ndryshon të gjithë rutinën e rikuperimit, hidratimit dhe ushqyerjes së lojtarëve. Megjithatë, francezët u rikthyen në fushë me shumë energji dhe më pas e kontrolluan plotësisht ndeshjen deri në fund”, tha ai.

Ekspertët e futbollit shpjegojnë se në raste të tilla, lojtarët zakonisht kalojnë kohën me ushtrime, biçikleta stërvitore, seanca të shkurtra analize, muzikë dhe aktivitete relaksuese për të mbajtur mendjen larg motit dhe për të ruajtur përqendrimin.

Në Filadelfia, sfida kundër stuhisë u fitua po aq sa në aspektin psikologjik sa edhe në fushën e lojës.

Franca doli fituese 3-0, por ndeshja do të mbahet mend për dy orët e gjata të pritjes, që testuan durimin, përqendrimin dhe rezistencën mendore të të gjithëve. //a.i/

The post BOTËRORI 2026 – Nga pritja rraskapitëse te triumfi francez, nata “e çmendur” në Filadelfia appeared first on Agjencia Telegrafike Shqiptare.

The post KLIMË – Nga viti 1970 deri sot, stresi nga nxehtësia ka prekur 22% të botës appeared first on Agjencia Telegrafike Shqiptare.

UASHINGTON, 23 qershor /ATSH/ – Libani dhe Izraeli nisën sot një raund të ri bisedimesh në Uashington, ndërsa Bejruti këmbëngul të vazhdojë negociatat e drejtpërdrejta me shtetin hebre, pavarësisht se ato duket se po lihen nën hije, nga vendimi i Iranit për ta përfshirë çështjen e Libanit në dialogun e tij me Shtetet e Bashkuara të Amerikës, raportoi “Reuters”.

Zyrtarët libanezë kanë deklaruar se negociatat ballë për ballë me Izraelin, mbeten e vetmja rrugë për t’i dhënë fund luftës që vazhdon që nga 2 marsi, kur grupi i armatosur, Hezbollah hapi zjarr ndaj Izraelit në mbështetje të Iranit, duke nxitur sulme ajrore dhe tokësore izraelite, që kanë shkaktuar mbi 4 000 viktima në Liban.

Megjithatë, katër raundet e bisedimeve mes Libanit dhe Izraelit, që prej muajit prill, nuk kanë arritur të sigurojnë një armëpushim të qëndrueshëm.

Pauza më e gjatë e luftimeve u arrit vetëm këtë javë, pas memorandumit të mirëkuptimit të dakordësuar mes Iranit dhe SHBA-së, i cili parashikonte ndërprerjen e luftimeve në të gjitha frontet, përfshirë Libanin.

Marrëveshja i dha një shtysë Hezbollahut të mbështetur nga Irani, por njëkohësisht dobësoi pozitat e shtetit libanez, drejtuesit e të cilit, përfshirë presidentin Joseph Aoun, kanë paralajmëruar vazhdimisht, se Teherani nuk mund të negociojë në emër të Libanit.

“Sot dhe në ditët në vijim nisim një raund të ri bisedimesh, të cilat shpresojmë të jenë vendimtare, për arritjen e asaj që dëshirojmë për të mirën e vendit dhe popullit tonë”, shkroi Aoun në rrjetin X.

Një zyrtar i Departamentit Amerikan të Shtetit (DASH) tha se negociatat do të përfshijnë delegacione ushtarake dhe politike, nga të dy vendet dhe synojnë të avancojnë një marrëveshje gjithëpërfshirëse, për paqen dhe sigurinë.

“Qëllimi ynë i përbashkët është t’i japim fund përgjithmonë ciklit të dhunës. Po u mundësojmë Izraelit dhe Libanit të negociojnë si dy shtete sovrane dhe të gjejnë një rrugë drejt paqes dhe sigurisë”, deklaroi ai.

Libani kërkon afat për tërheqjen e trupave izraelite

Megjithatë, një zyrtar libanez dhe dy diplomatë të përfshirë në çështjen e Libanit, thanë për “Reuters” se marrëveshja SHBA-Iran ka minuar pozitat e shtetit libanez, duke e lënë atë në pikën më të dobët deri tani dhe duke vënë në dyshim efektivitetin e bisedimeve me Izraelin.

Sipas zyrtarit libanez, nuk ka shumë besim se negociatat treditore do të prodhojnë rezultate konkrete.

“Vazhdon të ekzistojë një problem themelor mosbesimi mes nesh dhe izraelitëve. Ne nuk mund të përmbushim kërkesat e tyre, ndërsa ata refuzojnë të gjitha kërkesat tona”, tha ai.

Një nga objektivat kryesore të Libanit është sigurimi i tërheqjes së forcave izraelite nga territori i tij, por zyrtarë të lartë izraelitë kanë deklaruar se trupat do të qëndrojnë në jug të Libanit, për një periudhë të pacaktuar.

Presidenti Aoun deklaroi sot se Libani “nuk do të pranojë asgjë më pak se përfundimin e plotë të pushtimit izraelit në jug të Libanit dhe fundin e çdo forme tutelje të huaj”, në një referencë të dukshme ndaj Iranit.

Qeveria libaneze ka vepruar me kujdes që prej vitit 2025, për të kufizuar arsenalin e Hezbollahut pa hyrë në përplasje të drejtpërdrejtë me grupin, nga frika se një veprim i tillë mund të shkaktojë konflikt civil.

Hezbollahu ka refuzuar çarmatimin e plotë dhe i ka kërkuar qeverisë të tërhiqet nga negociatat direkte me Izraelin.

Hezbollahu mbështetet te Irani

Presidenti Aoun propozoi, për herë të parë, bisedimet e drejtpërdrejta në mars, por ato nisën vetëm në mesin e prillit, pasi SHBA-ja shpalli armëpushimin, për të hapur rrugën e një procesi diplomatik që, sipas Uashingtonit, do të çonte në një marrëveshje paqeje.

Megjithatë, luftimet në jug të Libanit vazhduan me intensitet, ndërsa trupat izraelite avancuan më thellë në fshatrat libaneze.

Një tjetër nismë armëpushimi, e shpallur nga SHBA-ja në fillim të qershorit, në kuadër të bisedimeve Liban-Izrael, u kushtëzua me ndërprerjen e sulmeve nga Hezbollahu, por u refuzua nga grupi.

Sipas Hezbollahut, Irani pritet të kërkojë tërheqjen e Izraelit nga Libani, në kuadër të negociatave të tij me SHBA-në, për një marrëveshje përfundimtare.

Për këtë arsye, grupi beson se qeveria libaneze, duhet të mbështetet te ky kanal diplomatik dhe jo te negociatat e drejtpërdrejta me Izraelin. //a.i/

The post KOMENT – Nisin bisedimet e reja Liban-Izrael, “nën hijen” e marrëveshjes SHBA-Iran appeared first on Agjencia Telegrafike Shqiptare.

TIRANË, 23 qershor/ATSH-Maela Marini/ Konkursi Ndërkombëtar për kampusin e ri universitar “Aleksandër Moisiu” të Durrësit u finalizua sot me shpalljen e projektit fitues 51N4E me JESHILE Landscape Design.

Projekti fitues u vlerësua nga juria pasi dëshmon se si peizazhi i infrastrukturës dhe zhvillimi urban mund të mblidhen bashkë në një kuadër koherent të aftë të orientojë rritjen me kalimin e kohës.

Juria vlerësoi karakterin vizionar të propozimit dhe kapacitetin për t’u rritur me kalimin e kohës përmes një strategjie të qartë e koherente afatgjatë.

Projekti ofron një variacion të pasur kushtesh hapësinore duke krijuar një kampus me identitete të shumëfishta. Propozimi dëshmon një kuptim të thellë të vetë zonës dhe paraqet një kuadër realist për zhvillimin e ardhshëm.

Juria sidomos ka vlerësuar përdorimin e peizazhit si një pikë fillim i qasjes urbanistike. E po kështu edhe menaxhimin dhe kullimin e ujit dhe transformimin e kësaj sfide në një themel të vizionit të vetë.

Juria vlerësoi të gjithë ekipet pjesëmarrëse për cilësinë, ambicien dhe larminë e propozimeve të prezantuara.

Secili projekt i qaset sfidës nga një këndvështrim i veçantë duke ofruar ide të vlefshme për zhvillimin e ardhshëm të universitetit dhe raportin e tij me qytetin e Durrësit dhe me territorin më gjerë.

Ky konkurs shihet si një hap i madh drejt kampusit të së ardhmes, jo vetëm si projekt ndërtimi, por si një investim në cilësinë e arsimit të lartë, jetën studentore dhe zhvillimin urban të Durrësit. /j.p/

The post Shpallet projekti fitues për kampusin e ri universitar “Aleksandër Moisiu” në Durrës appeared first on Agjencia Telegrafike Shqiptare.