Daniel Gjura, zëvendësdrejtori i Kadastrës Dibër është arrestuar mbrëmjen e djeshme nga policia. Arrestimi i tij vjen pak ditë pasi policia e Dibrës goditi një skemë të dyshuar kriminale për tjetërsimin e paligjshëm të pronave në Dibër.
Daniel Gjura ishte shpallur në kërkim nga policia pasi ndaj tij është caktuar masa e sigurisë “Arrest në burg”, për veprat penale “Mashtrimi” dhe “Falsifikimi i dokumenteve”, kryer në bashkëpunim.
Më 17 qershor, pas një hetimi 7-mujor, Policia ka ekzekutuar 14 masa sigurie ndaj punonjësve dhe ish-punonjësve të Agjencisë Shtetërore të Kadastrës, si dhe ndaj disa personave të dyshuar se kanë përfituar nga falsifikimi i dokumenteve.
Nga hetimet dyshohet se shtetasit me detyra aktuale dhe të mëparshme në Agjencinë Shtetërore të Kadastrës, Dibër, dhe noterja, në bashkëpunim me njëri-tjetrin, kanë falsifikuar dokumente dhe kanë kryer veprime të tjera administrative të kundërligjshme, me qëllim tjetërsimin e pronave të paluajtshme, në favor të shtetasit T. D. dhe familjarëve të tij.
Daniel Gjura më herët ka mbajtur edhe postin e drejtorit, si dhe ka qenë kandidat për deputet nën siglën e Partisë Socialiste në zgjedhjet e vitit 2025.
Temperaturat e larta dhe era kanë rritur ndjeshëm rrezikun e zjarreve në qarkun e Lezhës.
Vetëm gjatë ditëve të fundit janë regjistruar disa vatra, kryesisht në zona me shkurre dhe pyje, duke angazhuar për orë të tëra forcat zjarrfikëse.
Në disa raste, flakët iu afruan zonave të banuara dhe bizneseve, por ndërhyrja në kohë bëri të mundur shmangien e pasojave më të rënda.
Sipas drejtorit të Shërbimit Zjarrfikës, shumica e zjarreve dyshohet se janë shkaktuar nga pakujdesia njerëzore. Për këtë arsye, ai u bën thirrje qytetarëve të shmangin çdo veprim që mund të shkaktojë zjarr, sidomos në ditët kur temperaturat arrijnë vlera shumë të larta.
“Është momenti që te gjithë duhet et reflektojmë, si të ruajmë pasurinë, pyjet, malet, si të ruajmë pronat tona”, përfundoi ai.
Një verë me temperatura të larta kërkon më shumë kujdes dhe përgjegjësi nga të gjithë. Ndërsa zjarrfikësit mbeten në gatishmëri 24 orë në 24, autoritetet theksojnë se mënyra më e mirë për të shmangur dëmet është parandalimi./ad
Guvernatori i Banka e Shqipërisë, Gent Sejko, deklaroi se gjatë vitit 2025 institucioni ka vijuar të forcojë stabilitetin monetar e financiar, duke zbatuar rekomandimet e Kuvendit dhe duke avancuar procesin e përafrimit të kuadrit rregullator me standardet e Bashkimi Evropian.
Duke raportuar në Komisionin për Nismat Qytetare, Bashkëpunimin dhe Mbikëqyrjen Institucionale mbi zbatimin e rekomandimeve të Kuvendit dhe veprimtarinë e Bankës së Shqipërisë për vitin 2025, Sejko tha se politika monetare ka mbetur e orientuar drejt ruajtjes së stabilitetit të çmimeve, ndërsa vendimmarrja është mbështetur në analiza më të thelluara dhe të dhëna më të plota.
“Politika monetare gjatë kësaj periudhe është udhëhequr nga të dhënat dhe nga objektivi ynë kryesor: ruajtja e stabilitetit të çmimeve. Ajo ka qenë një politikë e kujdesshme, fleksibël, e bazuar në të dhëna dhe brenda mandatit tonë ligjor”, u shpreh Guvernatori.
Sejko bëri të ditur se inflacioni shënoi një mesatare prej 2,2% gjatë vitit 2025, duke mbetur pranë objektivit prej 3%, ndërsa parashikimet tregojnë se ai do të vijojë të mbetet i qëndrueshëm edhe në periudhën në vijim.
Guvernatori theksoi se Banka e Shqipërisë mbështet regjimin e lirë të kursit të këmbimit, duke vlerësuar se forcimi i lekut ka ardhur si rezultat i rritjes së të ardhurave nga turizmi, remitancat, investimet e huaja dhe përmirësimit të pozicionit të jashtëm të ekonomisë.
“Ndërhyrjet e Bankës së Shqipërisë në tregun valutor nuk kanë synuar mbajtjen e kursit në një nivel të caktuar, por zbutjen e lëvizjeve të shpejta dhe shmangien e rreziqeve për stabilitetin monetar e financiar”, tha ai.
Sipas Sejkos, në fund të vitit 2025 rezerva valutore e vendit arriti në rreth 7,3 miliardë euro, ndërsa sektori bankar ruajti tregues të shëndetshëm, me kreditë me probleme që zbritën në 3,8%, niveli më i ulët që nga viti 2008.
Guvernatori nënvizoi gjithashtu se gjatë vitit 2025 janë shënuar përparime në integrimin financiar evropian, përmes anëtarësimit të Shqipërisë në zonën SEPA dhe modernizimit të sistemeve të pagesave.
“Në çdo rast, qëllimi ynë ka qenë i njëjtë: më shumë stabilitet, më shumë siguri dhe më shumë qartësi për qytetarët, bizneset dhe tregjet. Banka e Shqipërisë do të vijojë të veprojë me pavarësi, përgjegjësi dhe maturi, në shërbim të stabilitetit monetar e financiar dhe rrugës evropiane të Shqipërisë”, përfundoi Sejko./kb
Një vit pas daljes nga burgu, deputeti Ervin Salianji ka rikthyer në vëmendje periudhën që ai e konsideron si “burgosje politike”, duke e shënuar përvjetorin e lirimit me një mesazh reflektues dhe politik. Përmes një postimi në rrjetet sociale, ai thekson se, sipas tij, asnjë pushtet nuk mund të burgosë bindjet, të vërtetën dhe idealet, ndërsa shpreh mirënjohje për mbështetjen që ka marrë gjatë kësaj periudhe.
Në reagimin e publikuar, Salianji shkruan:
“Sot, një vit liri.
Një vit më parë mori fund sprova e burgosjes politike. E sanksionuar si e tillë nga 6 rezoluta ndërkombëtare! Pushteti mund të shtrëngojë, mund të kufizojë përkohësisht lirinë e një njeriu, por nuk mund të burgosë kurrë bindjet, të vërtetën dhe idealet që ai ka.
Përherë kam zgjedhur të mos ndryshoj bindjet për t’iu përshtatur rrethanave. Sepse liria nuk është privilegj që të jepet nga pushteti; është e drejtë që mbrohet çdo ditë.
Shqipëria ka nevojë për institucione që respektojnë ligjin, për politikë që pranon mendimin ndryshe dhe për qytetarë që nuk heqin dorë nga e drejta për të kërkuar më shumë demokraci, më shumë drejtësi dhe më shumë llogaridhënie.
Një vit më vonë, bindja ime është edhe më e fortë: pengesat mund ta vonojnë rrugën, por nuk e ndryshojnë drejtimin.
Një zyrtar i lartë nga Emiratet e Bashkuara Arabe kritikoi sulmet iraniane ndaj fqinjëve të Gjirit, duke thënë se ato tregojnë paaftësinë e Teheranit për të përmbushur angazhimet e tij për uljen e tensioneve.
“Sulmet e Iranit ndaj anijeve cisterna tregtare të Katarit dhe Arabisë Saudite në Ngushticën e Hormuzit dhe agresioni i përsëritur kundër shteteve tona simotra, Bahreinit dhe Kuvajtit, janë një shenjë e qartë se Teherani mbetet i paaftë të angazhohet për uljen e tensioneve dhe për të kthyer faqen e luftës”, tha Anwar Gargash, këshilltari i presidentit të Emirateve të Bashkuara Arabe, në një deklaratë për X.
Irani lëshoi raketa dhe dronë drejt 85 objektivave ushtarake amerikane në Bahrein dhe Kuvajt më herët sot në përgjigje të valës së fundit të sulmeve të SHBA-së ndaj Iranit.
Gargash tha se shtetet arabe të Gjirit nuk mund të vazhdojnë të jenë në shënjestër, ndërsa Irani lëkundet midis përshkallëzimit dhe përmbajtjes./kb
Kryetari i Grupit Parlamentar të Partisë Socialiste, Taulant Balla, zhvilloi një takim në Parlamentin Europian në Strasburg me Kathleen Van Brempt, Zëvendëspresidente e Grupit të Socialistëve dhe Demokratëve në Parlamentin Europian.
Balla deklaroi se Shqipëria ndodhet në një fazë intensive të procesit të anëtarësimit në Bashkimin Europian, ndërsa njoftoi se në ditët në vijim pritet të nisë mbyllja e kapitujve të parë të negociatave.
“Jemi në një fazë intensive me rezultate konkrete në procesin e anëtarësimit të Shqipërisë në Bashkimin Europian”, u shpreh Balla, duke theksuar se objektivi i mazhorancës është përmbyllja e negociatave deri në fund të vitit 2027.
Sipas Ballës, Shqipëria synon që flamuri kuq e zi të ngrihet në Bruksel brenda vitit 2030, ndërsa kjo mund të ndodhë edhe më herët, brenda këtij mandati të Parlamentit Europian.
Gjatë takimit, Balla foli edhe për zhvillimin ekonomik të vendit, duke theksuar rritjen e investimeve të huaja dhe zgjerimin e ekonomisë shqiptare. Ai deklaroi se ekonomia ka arritur në 27 miliardë euro dhe se investimet e huaja janë rritur ndjeshëm krahasuar me një dekadë më parë.
Kreu i Grupit Parlamentar të PS-së vlerësoi gjithashtu zhvillimin e sektorit të turizmit, duke deklaruar se Shqipëria pret një tjetër rritje të numrit të vizitorëve këtë vit, me pritshmëri për të kaluar shifrën e 13 milionë turistëve.
Në deklaratën e tij, Balla u ndal edhe te sfida e dezinformimit, duke theksuar se demokracia kërkon qytetarë të informuar dhe se lufta ndaj lajmeve të rreme është mbrojtje e debatit publik dhe e institucioneve demokratike.
Postimi i plotë i Taulant Ballës:
U takova sot në Parlamentin Europian Strasburg me Kathleen Van Brempt, Zëvendëspresidente e Grupit të Socialistëve dhe Demokratëve në Parlamentin Europian. Jemi në një fazë intensive me rezultate konkrete në procesin e anëtarësimit të Shqipërisë në Bashkimin Europian, ndërsa në ditët në vijim fillojmë mbylljen e kapitujve të parë të Marrëveshjes së Anëtarësimit. Jemi të palëkundur në ambicjen tonë për të mbyllur negociatat e anëtarësimit deri në fund të vitit 2027 dhe të ngremë flamurin tonë kuq e zi në Bruksel brenda 2030, pse jo brenda këtij mandati të Parlamentit Europian. Mbështesim fuqimisht investimet e huaja në Shqipëri të cilat janë rritur me disa herë krahasuar me një dekadë më parë, kemi trefishuar ekonominë tonë 27mld Euro, gjithmonë duke garantuar respektimin e standardeve të mira mjedisore. Jemi krenarë për zhvillimin e madh të sektorit të turizmit në Shqipëri. Megjithë përpjekjet e aktorëve jomiqësorë për ta dëmtuar imazhin e Shqipërisë, edhe këtë vit presim një rritje të numrit të turistëve, diku përtej 13 milionë Nuk duhet të harrojmë se demokracia mbështetet mbi qytetarë të informuar. Dezinformimi e zëvendëson debatin me manipulimin, faktet me gënjeshtrat dhe besimin me dyshimin. Lufta kundër dezinformimit është mbrojtje e së vërtetës, e lirisë dhe e vetë demokracisë./ad
Siguria ushqimore, ndotja nga industria e naftës dhe përdorimi i pesticideve do të jenë në fokus të kontrolleve të inspektorateve në qarkun e Fierit.
Kryeinspektori i Përgjithshëm, Dashnor Sula, gjatë një takimi me drejtuesit dhe inspektorët rajonalë, deklaroi se kontrollet do të intensifikohen, veçanërisht gjatë sezonit turistik, për të garantuar standardet e produkteve që konsumohen nga qytetarët dhe turistët.
Sula u ndal te sektori i bulmetit, duke theksuar se Fieri është një nga qarqet kryesore të vendit për prodhimin dhe përpunimin e qumështit. Sipas tij, subjektet që prodhojnë dhe tregtojnë produkte ushqimore do t’i nënshtrohen një monitorimi më të rreptë.
Kryeinspektori ngriti gjithashtu shqetësimin për ndotjen mjedisore nga disa subjekte të industrisë së naftës dhe përdorimin e pesticideve në bujqësi, duke kërkuar kontrolle më të shpeshta dhe të befasishme.
Ai njoftoi edhe riorganizimin e sistemit të inspektimeve, ku disa struktura do të bashkohen për të shmangur mbivendosjen e kontrolleve dhe për të rritur efikasitetin në terren. Sipas Sulës, procesi i ri synon që inspektimet të kryhen nga struktura më të koordinuara dhe me përgjegjësi të qarta.
“Në radhë të parë, shpreh kënaqësinë që jam sot këtu në qytetin e Fierit dhe në gjithë qarkun e Fierit, me rastin për të patur një takim me të gjithë inspektoratet rajonale të qarkut të Fierit. Në qarkun e Fierit, është një qark jashtëzakonisht i rëndësishëm, është qarku i dytë në Republikën e Shqipërisë për nga rëndësia, duke patur parasysh që përfshija pesë bashki shumë të mëdha, duke filluar nga Divjaka, Lushnja, Roskoveci, Mallakastra dhe Fieri.
Sigurisht, aktiviteti i inspektorateve të qarkut të Fierit, është një aktivitet të cilat, sidomos tani që për pak ditë mbushet një muaj nga hapja e sezonit veror, për turizmin, edhe të gjithë problematikat e tjera, duke patur parasysh që fushat e inspektimit janë fusha shumë të gjera, duke filluar, duke patur parasysh që Myzeqeja është hambari i Shqipërisë në qarkun e Fierit, duke patur parasysh që ka patur problematika ndër vite për sa i përket ndotjes, ndotjes në qarkun e Fierit, sidomos të disa subjekteve të mëdha, ato në fushën e shpimit, janë të naftës apo subjekteve të tjera, të cilat ka qenë shqetësuese për qytetarët e Fierit, të gjithë qarkut të Fierit, dhe unë me cilësinë si Inspektor i Përgjithshëm i Republikës së Shqipërisë, kam ardhur të bëj një takim të posaçëm, pra që në mbledhjen që do realizoj me të gjithë inspektoratet dhe për t’i lënë detyra konkrete këtyre trupës inspektuese në qarkun e Fierit për të bërë të mundur që të jenë shumë, shumë rigorozë në kontrollin dhe në procedurat për mbikëqyrjen e të gjithë këtyre subjekteve të cilët shkaktojnë ndotje në të gjithë qarkun e Fierit, të cilët do duhet t’i nënshtrohen rregullave dhe ligjeve në fuqi për mjedisin. Dhe kjo është e patolerueshme dhe do jetë një kërkesë e patolerueshme dhe shumë e fuqishme nga ana ime si Inspektor i Përgjithshëm, dhe me qëllim konkret, dhe me hartimin e një plani konkret, i cili sigurisht nuk mund të realizohet as për një ditë, as për një javë, por të paktën brenda tre muajve, që kjo shqetësim që ka qenë në të gjithë qarkun e Fierit do duhet të mbyllet një herë e përgjithmonë.
Pikërisht, unë do doja të vazhdoja më tej, duke patur parasysh atë që thashë që Myzeqeja është hambari i Shqipërisë, dhe do doja të vazhdoja edhe për rastin e AKU-së, i cili është një shqetësim jashtëzakonisht i madh për të gjithë qarkun e Fierit. Pra, kemi situata që qarku i Fierit ka disa stabilimente shumë të fuqishme për sa i përket prodhimit të bulmetit. Pra, dihet që Fieri është një qark i cili mban peshë specifike për sa i përket bulmetit, duke patur parasysh mbarështimin që ka të gjedhëve të mëdha, siç janë lopët, dhe prodhimit të qumështit jashtëzakonisht të madh, të sasisë së tij, dhe të përpunimit të këtyre produkteve të qumështit, të cilët ka stabilimente që do duhet që inspektorati i AKU-së do duhet të ketë vigjilencë të shtuar, të shtuar e përsëris, sidomos në këtë periudhë dhe të periudhës së turizmit, duke patur parasysh edhe shtimin katër-pesëfish të numrit të turistëve, qoftë vendas dhe qoftë të huaj, duke patur parasysh përsëri që qarku i Fierit ka tre pika destinacionit turistik shumë të fuqishëm, siç është Apollonia, siç është Bylisi dhe siç është Ardenica. Pra, do të thosha përsëri, do të kemi një qasje të shtuar nga ana e AKU-së për kontrollin e këtyre subjekteve me qëllimin e vetëm që të kemi rritje, rritje të cilësisë së prodhimit të këtyre stabilimenteve, që me qëllimin e vetëm që turistët e huaj dhe turistët vendas këtu, kur të vijnë të vizitojnë qarkun e Fierit, të marrin produkte me cilësi të standardeve që i kërkohet. Kemi hyrë në një fazë, që është kategorizimi i të gjithë subjekteve me origjinë shtazore, të cilët qarku i Fierit ka shumë subjekte të tilla, dhe përsëri po punohet fuqishëm nga AKU-ja pikërisht për certifikimin dhe kategorizimin e këtyre subjekteve. Pra, puna e inspektoratit, inspektoratëve në qarkun e Fierit është një punë e përditshme, por që do të thotë do të ketë një ritëm tjetër. Kjo është problematika.
Kemi problematikë tjetër, sigurisht, për sa i përket qarkut të Fierit, të cilët ne e kemi si shqetësim, dhe këtu do doja që të përmendja dhe ish-deputetin e qarkut të Fierit, Erjon Braçe, i cili ka ngritur shpeshherë shqetësimet për sa i përket problemit të pesticideve. Problemi i pesticideve, i cili është përsëri, hambari i prodhimit të produkteve bujqësore, pra dhe blegtorale, është i qarkut të Fierit. Duke patur parasysh që prodhimi i shalqirit, prodhimi i domateve, prodhimi i të gjithë perimeve që zënë peshën specifike të prodhimit në të gjithë territorin e Republikës së Shqipërisë, pra prodhohen në Fier. Që do të thotë kemi problematika për pesticidet. Që do të thotë do duhet që inspektorati, përsëri, i AKU-së, i cili mbulon bimët dhe Veterinaria, do duhet të jetë shumë e kujdesshme në kontrolle rigoroze dhe kontrolle të befasishme dhe të përditshme, në mënyrë të njëtrajtshme për të bërë të mundur që këto pesticide të jenë në nivelin e duhur që secili tregton nga grosistët e caktuar, që marrin të gjithë fermerët, dhe që të lutem, dhe që do duhet që edhe vetë fermerët do duhet të kontrollohen që këto pesticide mos të jenë në një numër që mbi përqindjen të cilët i takohet.
Kjo që ngrini ju është një pyetje shumë profesionale dhe përgjigja ndoshta mund të ishte shteruese shumë më e gjatë, dhe unë edhe nga ish-profesioni që kam qenë prokuror për 15 vite dhe në politikë gjithashtu, por ligji 99/2024 dhe urdhërat të cilët i kam nxjerrë unë si Inspektor i Përgjithshëm, pikërisht për çështjen e mostrave të cilat merren, të cilat ne kemi vendosur me ligj dhe me një VKM, që do duhet të jenë katër mostra për rastet e caktuara kur merren këto subjekte me qëllimin që një mostër dërgohet tek laboratori, një mostër tjetër që i jepet e drejta që subjektit, kur nuk është dakord, të përsëritet ky proces, pra, në laborator, pastaj përsëri një mostër tjetër që kur shkon çështja në gjykatë përsëri të jetë në dispozicion të organit të gjykimit. Pra, ka një procedurë e cila është e mirë rregulluar me akte nënligjore të cilat janë sot në fuqi. Dhe ajo që ju thatë, të lutem, ajo që ju thatë, nuk po i shmangem pyetjes, ajo që ju thatë ka çështje për më shqetësim, por nuk është shqetësim i pazgjidhur sepse ekzistojnë laboratorë pavarësisht se është vetëm në Tiranë, që të jemi të qartë, por në privatët ekzistojnë dhe jepet mundësia që këto mostra të kalojnë të gjithë procedurën dhe të certifikohen me seriozitetin më të madh sepse edhe laboratorët privatë kanë detyrimin ligjor të lëshojnë një akt ekspertizë, një formular shumë të saktë të cilët mban dhe përgjegjësi përpara ligjit nëse falsifikohen apo nuk është i saktë. Pra, ka dhe atë kontrollin pastaj.
Dëgjo, kjo nuk është e vërtetë, për të qenë i sinqertë. Duhet, do duhet atë dhe unë e kam të sigurt që nuk është ky çmim. Sigurisht çmimet në rajon janë çmime të ndryshme, që të jemi të qartë, dhe nëse do ta krahasosh me rajonin, do ta krahasosh me shtetin e Kosovës, ka këtë lloj diference, por jo me rajonin, sepse duke patur parasysh tani Malin e Zi, duke patur parasysh Maqedoninë, duke patur parasysh Kroacinë, duke patur parasysh, të thashë rajonin, nuk janë ato çmime.
Dëgjo, ka problematikë. Po them, por jo kaq shqetësuese. Nëse do duhet që edhe fermeri, edhe subjektet, të kërkojnë gjithçka nga shteti, kjo nuk është normale. Tani, mundohet që edhe qasja e shtetit është që të jetë me subvencionet, me mënyra të tjera të kompensimit që i bëhet fermerit. E rëndësishme, thelbi është cilësia e mbarështimit që i bëhet, qoftë në fushën e blegtorisë apo të bujqësisë, dhe të daljes së një prodhimi cilësor si në anën si për bujqësinë, dhe për blegtorinë. Dhe kjo është detyra shumë e rëndësishme e inspektorit.
Edhe kjo pyetje, pikërisht pse kanë dalë këto problematika në praktikë, qeveria shqiptare, besoj që edhe ju e dini, jemi në një fazë riorganizimi total të inspektorateve.
Jo. Jo tre vjet. Ligji 99 i vitit 2024 ka hyrë, për sa i përket fushës së inspektimit, ka hyrë me datën 13 maj të vitit 2025 në fuqi. Pra, ka një vit e dy muaj i cili është në fuqi ky ligj dhe ka filluar ky proces, dhe po ju garantoj që fundi i vitit është procesi fundor i të gjithë strukturimit të inspektorateve, dhe pikërisht kjo pyetje, me të drejtë që ju shtruat, ka të bëjë që kemi dy inspektorate të mëdha të cilat riorganizohen. Ka të bëjë me IKMT-në, ku i bashkëngjitet AKM-ja, Agjencia Kombëtare e Mjedisit, ku i bashkëngjitet dhe pyjet, dhe që bën të mundur që pra mos të ndodhë dhe barra ndaj subjektit ku shkohet një inspektorat, një inspektorat tjetër, por do të shkojnë në mënyrë në një trupe të organizuar, po themi, e centralizuar pra, në bazë të inspektimit të cilët do realizohet. Dhe ka shumë rëndësi përsëri dhe AKU-ja, ku i bashkëngjitet, AKU-së i bashkëngjitet edhe Veterinaria, i bashkëngjiten edhe bimët, pikërisht për mos të patur atë mosdakordësi ose “eja ti e ik ti” dhe problematika që i krijon subjektit. Pra, centralizimi që bëhet tek AKU-ja, bimët dhe veterinaria, mbyll procesin e kontrollit të inspektimit të trupës së inspektimit, pra nga fillimi deri në fund, dhe kjo është shumë e rëndësishme.”, u shpreh Sula./ad
Lehtësimi i sanksioneve ishte miratuar pas nënshkrimit të memorandumit të mirëkuptimit mes SHBA-së dhe Iranit muajin e kaluar, me synimin për t’i dhënë fund konfliktit.
Sipas marrëveshjes, shitjet e naftës iraniane lejoheshin deri më 21 gusht.
Megjithatë, dokumentet e publikuara nga Thesari amerikan konfirmojnë se autorizimi është revokuar dhe kufizimet janë rikthyer në fuqi.
Reagimi i Teheranit ishte i menjëhershëm. Kryenegociatori iranian, Mohammad Ghalibaf, e cilësoi vendimin si një “shkelje të rëndë” të memorandumit të mirëkuptimit, ndërsa Ministria e Jashtme e Iranit deklaroi se, pas këtij zhvillimi, marrëveshja është bërë “e paefektshme”.
Vendimi pritet të ndikojë në tregjet ndërkombëtare të energjisë dhe të thellojë përplasjen diplomatike mes Uashingtonit dhe Teheranit./ad
Një mrekulli ka ndodhur në Venezuelën e shkatërruar nga tërmetet e forta që goditën vendin në 24 Qershor. Një nënë dhe tre fëmijët e saj janë nxjerrë të gjallë nga rrënojat pas 11 ditësh.
Operacioni i shpëtimit u zhvillua në Zonën e La Guaria, ndër më të goditurat nga lëkundjet Sizmike të 24 Qershorit. Familja ndodhej nën rrënojat e një ndërtese banimi, ku kishte mbetur e izoluar që nga momenti i shembjes.
Sipas autoriteteve, nëna arriti t’i mbante në jetë tre fëmijët e saj në jetë duke i ushqyer me gji gjatë gjithë kohës që qëndruan të bllokuar. Pas kërkimeve intensive, ekipet e emergjencës arritën t’i lokalizonin dhe t’i nxirrnin të gjallë nga rrënojat.
Ndërkohë, pasojat e tërmeteve vazhdojnë të jenë të rënda. Bilanci zyrtar flet për 3,685 persona që kanë humbur jetën dhe 16,740 të plagosur, ndërsa mijëra të tjerë rezultojnë ende të zhdukur.
Katastrofa ka shkaktuar dëme të mëdha materiale, duke shkatërruar ose dëmtuar rreth 60 mijë ndërtesa dhe duke lënë pa banesë mijëra familje.
Autoritetet dhe ekspertët paralajmërojnë se, përveç pasojave të tërmeteve, ekziston edhe rreziku i përhapjes së sëmundjeve infektive për shkak të mungesës së ujit të pijshëm dhe kushteve të vështira higjieno-sanitare në zonat e prekura./ad
Humbja e Brazilit ndaj Norvegjisë i dha fund në mënyrë të papritur ëndrrës së miliona tifozëve brazilianë për sukses në Kupën e Botës.
Pas eliminimit, shumë prej lojtarëve të “Seleçaos” reaguan me mesazhe emocionale në rrjetet sociale, por më pas secili prej tyre mori rrugë të ndryshme drejt destinacioneve të veta.
Pas përfundimit të grumbullimit të dielën në mbrëmje, shumica e futbollistëve u larguan individualisht drejt vendeve ku do të kalojnë pushimet. I vetmi lojtar i ekipit që u kthye në Rio de Janeiro me avionin zyrtar të delegacionit ishte mbrojtësi Danilo.
Futbollistët që aktivizohen në klubet evropiane kanë nisur pushimet e tyre më herët nga sa e kishin parashikuar, pas përfundimit të aventurës së Brazilit në turne. Ndërkohë, lojtarët që luajnë në kampionatin brazilian do të kenë rreth një javë pushim përpara se të rikthehen te klubet e tyre dhe të përgatiten për rifillimin e sezonit pas Kupës së Botës.
Vëmendje ka marrë edhe fakti që Danilo ishte i vetmi futbollist që udhëtoi me pjesën tjetër të delegacionit të Brazilit, ku përfshiheshin anëtarë të stafit teknik dhe persona të tjerë të angazhuar në organizimin e kampit stërvitor.
Edhe portieri Leo Nannetti ishte pjesë e udhëtimit, megjithëse nuk ishte përfshirë në listën e lojtarëve të grumbulluar për ndeshjet. Ai kishte marrë pjesë në të gjitha seancat stërvitore dhe kishte ndjekur programin e përgatitjes së skuadrës gjatë gjithë periudhës së Botërorit./ad
Një ide e lindur nga nevoja, një teknologji e re apo një mënyrë ndryshe për të prodhuar. Në ekonominë moderne, inovacioni nuk është më luks, por kusht për të qenë konkurrues. Edhe në Shqipëri, gjithnjë e më shumë sipërmarrës po dëshmojnë se me mbështetjen e duhur, një startup mund të kthehet në një biznes të qëndrueshëm, të krijojë vende pune dhe të konkurrojë në tregjet ndërkombëtare.
Pas këtyre historive të suksesit qëndron mbështetja e Bashkimit Evropian, Gjermanisë dhe Suedisë, të cilat përmes programit EU4Innovation dhe skemës Challenge Fund po financojnë dhe shoqërojnë startup-et shqiptare drejt rritjes. Deri më sot janë mbështetur dhjetëra sipërmarrje inovative, ndërsa 11,750,000 Euro janë investuar për zhvillimin e ekosistemit të inovacionit në tërësi.
⸻
Nga një furrë artizanale që prodhon bukë pa gluten dhe pa laktozë, tek një fermë që përdor teknologji moderne për përpunimin e bimëve medicinale apo një model prodhimi tërësisht organik. Këto janë disa nga historitë që tregojnë se inovacioni po gjen gjithnjë e më shumë vend në ekonominë shqiptare.
Gjatë një vizite në terren, Erik Illes, Shef i Zyrës së Bashkëpunimit për Zhvillim në Ambasadën e Suedisë në Shqipëri, dhe Jenni Lundmark, Menaxhere Programi për Zhvillimin e Sektorit Privat dhe Barazinë Gjinore në Delegacionin e Bashkimit Evropian në Shqipëri bashkë me përfaqësues të medias u njohën nga afër me tre startup-e të mbështetura nga Challenge Fund, të cilat po sjellin produkte dhe procese të reja në sektorin e ushqimit dhe bujqësisë së qëndrueshme.
Ndalesa e parë ishte Panja, furra e parë në Shqipëri që ofron produkte 100 për qind pa gluten dhe pa laktozë. Një sipërmarrje që lindi nga një përvojë personale dhe sot po i përgjigjet kërkesës në rritje për ushqim më të shëndetshëm.
Themeluesja e saj, Marsela Gurra, tregon se ideja lindi pasi përfitoi vetë nga një regjim ushqimor pa gluten dhe pa laktozë.
“Panja ka nisur në vitin 2023. Koncepti lindi nga mungesa në tregun shqiptar e produkteve artizanale pa gluten dhe pa laktozë. Ne prodhojmë produkte organike dhe falë mbështetjes së partnerëve europianë kemi investuar në pajisje moderne që kanë ulur kohën e prodhimit dhe na kanë mundësuar të krijojmë produkte me standarde europiane”, tha Gurra.
Mbështetja nuk ka sjellë vetëm pajisje të reja, por ka krijuar mundësi që bizneset të investojnë në cilësi, produktivitet dhe zgjerim të tregut.
Një tjetër histori është Artizani Bakery, furra e parë në vend që kontrollon të gjithë zinxhirin e prodhimit, nga kultivimi organik i grurit deri tek buka e gatshme, duke ofruar një model të qëndrueshëm dhe me ndikim minimal në mjedis.
Sipërmarrësi Nikolin Kola thekson se investimi në inovacion është bërë një domosdoshmëri.
“Pandemia më bëri të kuptoj sa të brishta ishin sistemet ushqimore. Vendosa të investoj në prodhimin e bukës dhe falë pajisjeve me teknologji europiane puna është bërë më efikase, ndërsa produktet tona janë më konkurruese,” tha ai.
Ndërsa startup-i Happy Farmers, në Malësinë e Madhe, ka investuar në një furrë tharjeje për bimët medicinale, duke rritur cilësinë dhe duke ulur kostot për fermerët.
Fermeri Ervin Çeraj thotë se teknologjia ka ndryshuar mënyrën e punës.
“Kemi kaluar testet e cilësisë dhe të sigurisë për sherebelën dhe vajrat esencialë. Kemi kontrata të vazhdueshme dhe partnerët na njohin për cilësinë. Kjo teknologji na ka krijuar mundësi të reja për treg”, u shpreh Çeraj.
Përfaqësuesit e partnerëve ndërkombëtarë e konsiderojnë këtë një dëshmi se mbështetja për startup-et po jep rezultat.
Shefi i Zyrës së Bashkëpunimit për Zhvillim në Ambasadën e Suedisë në Shqipëri, Erik Illes, tha se programi ka prodhuar histori konkrete suksesi.
“Përmes sfidës së inovacionit Challenge Fund janë mbështetur 55 kompani startup. Kjo është pikërisht ajo që duam të shohim dhe është një dëshmi e qartë e suksesit të këtij program.” tha ai.
Jenni Lundmark, Menaxhere e Programit për Zhvillimin e Sektorit Privat dhe Barazinë Gjinore në Delegacionin e Bashkimit Evropian në Shqipëri, theksoi se Bashkimi Evropian mbetet i angazhuar për të mbështetur inovacionin dhe sipërmarrjen në Shqipëri, duke nxitur zhvillimin e ideve të reja, rritjen e konkurrueshmërisë së bizneseve dhe krijimin e mundësive për të rinjtë dhe startup-et.
Shifrat tregojnë se bizneset shqiptare po i drejtohen gjithnjë e më shumë inovacionit. Sipas INSTAT, 44.3% e ndërmarrjeve me 10 ose më shumë të punësuar kanë zhvilluar aktivitete inovacioni gjatë periudhës 2022-2024. Megjithëse kompanitë e mëdha mbeten më aktive, tendenca po përhapet edhe tek startup-et dhe sektorët tradicionalë si bujqësia.
Challenge Fund, një komponent kyç i EU4Innovation, i menaxhuar nga Amabasada Suedeze në Shqipëri në bashkëpunim me Partnerët Shqipëri për Ndryshim dhe Zhvillim, ka organizuar tre thirrje për aplikime gjatë viteve 2023–2025. Janë vlerësuar 637 aplikime në 22 sektorë, nga teknologjia e informacionit dhe turizmi, te ekonomia qarkulluese, tekstilet, shëndetësia dhe bujqësia e qëndrueshme.
Nga ky proces janë mbështetur 55 startup-e nga qytete të ndryshme të vendit me një fond prej afro 1 milion Euro, ndërsa financimi është shoqëruar edhe me mentorim, asistencë teknike dhe mbështetje për zhvillimin e biznesit.
Në një ekonomi ku konkurrenca po rritet dhe integrimi në tregun europian kërkon standarde gjithnjë e më të larta, inovacioni po shndërrohet në një nga motorrët kryesorë të zhvillimit.
Për Bashkimin Evropian, Gjermaninë dhe Suedinë, investimi tek startup-et nuk është vetëm mbështetje për një ide biznesi. Është investim në ekonomi, në vende të reja pune, në rritjen e produktivitetit dhe në krijimin e një ekonomie shqiptare më të orientuar drejt dijes.
Sepse kur një ide inovative kthehet në një produkt me standarde europiane, përfiton jo vetëm sipërmarrësi, por e gjithë ekonomia.
EU4Innovation, 11,750,000 Euro për forcimin e ekosistemit të startup-eve dhe inovacionit në Shqipëri
Bashkimi Evropian, së bashku me Ministrinë Federale Gjermane për Bashkëpunim Ekonomik dhe Zhvillim (BMZ) dhe Agjencinë Suedeze për Bashkëpunim Ndërkombëtar për Zhvillim (Sida), nëpërmjet programit EU4Innovation, kanë mbështetur financiarisht iniciativa për inovacionin në Shqipëri me 11,750,000 Euro, në funksion të forcimit të ekosistemit të startup-eve dhe afrimit të bizneseve me standardet evropiane, synon të nxisë inovacionin dhe zhvillimin ekonomik të qëndrueshëm përmes mbështetjes së sipërmarrjeve të reja dhe ndërmarrjeve mikro, të vogla dhe të mesme.
Ky program është pjesë e qasjes së “Ekipi Evropa”, ku BE, Gjermania dhe Suedia bashkëpunojnë me Qeverinë e Shqipërisë për të zhvilluar një ekonomi të bazuar në inovacion dhe njohuri.
Sipas partnerëve zbatues, ekosistemi i startup-eve konsiderohet një shtytës i rëndësishëm i rritjes ekonomike dhe i krijimit të vendeve të punës me pagesë të lartë, duke ndikuar drejtpërdrejt në rritjen e konkurrueshmërisë së vendit.
Programi EU4Innovation, i zbatuar nga GIZ Shqipëri dhe Ambasada Suedeze në Shqipëri, përmes skemës “Challenge Fund”, ofron grante dhe asistencë teknike për startup-et shqiptare me potencial zhvillimi në tregun vendas dhe atë ndërkombëtar.
Me nje fond total prej prej 1 milion Euro, “Challenge Fund” ka mbështetur startup-e në tre faza zhvillimi: nga faza e idesë dhe validimit, deri te zgjerimi i biznesit, me grante që variojnë nga 10 mijë deri në 30 mijë Euro, në varësi të nivelit të zhvillimit dhe bashkëfinancimit të kërkuar.
Në total, skema ka pranuar dhe vlerësuar 637 aplikime nga 43 qytete të Shqipërisë, në 22 sektorë të ndryshëm, përfshirë teknologjinë, turizmin, bujqësinë e qëndrueshme, shëndetësinë dhe ekonominë qarkulluese.
Sa i përket përfaqësimit gjinor, rreth 47.3% e aplikimeve janë udhëhequr nga gra dhe 52.4% nga burra, duke reflektuar rritjen e pjesëmarrjes së grave në sipërmarrje.
Procesi i vlerësimit ka përfunduar me përzgjedhjen e 55 startup-eve nga qytete të ndryshme të vendit.
Projekti EU4Innovation, i cili zgjat nga janari 2023 deri në dhjetor 2026, synon rritjen e pjekurisë dhe ekspozimit të ekosistemit shqiptar të inovacionit, duke kontribuar në transformimin e ekonomisë drejt modeleve të bazuara në dije dhe inovacion./kb
Elbasani mori një barazim 1 – 1 ndaj BATE Borisov, por pavarësisht se nuk arriti te fitorja, skuadra la përshtypje të mira në fushë. Në takimin e zhvilluar mbrëmë në “Elbasan Arena”, ekipi i drejtuar nga Ivan Gvozdenovic u shfaq dominues dhe këmbëngulës gjatë pjesës së parë, periudhë në të cilën erdhi edhe goli i Ardit Nikaj.
Rrjeta e skuadrës mike u tund pas një bashkëpunimi mes dy afrimeve të fundit të verdhebluve. Rubin Hebaj shërbeu në mënyrë mjaft të mirë për sulmuesin shkodran, i cili e konkretizoi aksionin me gol.
Vetë klubi verdheblu ka publikuar në rrjetet sociale dyshen, që i është bashkuar ekipit vetëm pak ditë më parë, duke qenë kështu transferime të “freskëta”.
Nikaj dhe Hebaj kanë një element të përbashkët, pasi të dy janë shkodranë dhe më herët kanë qenë pjesë e Vllaznisë. Pas rezultatit 1 – 1 mes Elbasanit dhe BATE-s, gjithçka mbetet e hapur për sfidën e kthimit, aty ku do të përcaktohet kualifikimi.
Në Kupën e Botës 2026 po bie në sy një prirje e pazakontë: gjithnjë e më shumë qendërmbrojtës po marrin përsipër gjuajtjen e penalltive. Megjithatë, kjo zgjedhje u ka sjellë zhgënjim trajnerëve në shumë raste.
Rasti i fundit u regjistrua mbrëmjen e kaluar në duelin mes Zvicrës dhe Kolumbisë, që shënoi herën e gjashtë në këtë turne kur një qendërmbrojtës mori përgjegjësinë nga pika e bardhë.
Si rrjedhojë, qendërmbrojtësit tani janë në të njëjtin nivel me sulmuesit për penalltitë e humbura në Kupën e Botës 2026, me nga 6 secili. Nëse trajnerët vazhdojnë t’ua besojnë këtë detyrë mbrojtësve të qendrës, rrezikojnë madje të dalin krejtësisht jashtë turneut.
Cilët janë këta antiheronj të mbrojtjes?
Manuel Akanji – Zvicër
Për Akanjin, seria negative vazhdoi edhe më tej, pasi ai kishte dështuar edhe më parë nga penalltia në Euro 2020, Euro 2024 dhe tashmë edhe në Kupën e Botës 2026.
Goditja e tij kujtoi stilin e Gabriel Magalhaes në finalen e Ligës së Kampionëve të këtij viti: një tentativë e mbështetur te forca e pastër, me topin që përfundoi shumë lart.
Davinson Sanchez – Kolumbi
Edhe Sanchez provoi një ekzekutim të ngjashëm me shumë fuqi, por pa sukses, duke gabuar krejtësisht.
Nëse penalltia e humbur e Akanjit nuk ia mohoi Zvicrës kalimin më tej, për Davinson Sanchez ndodhi e kundërta. Ai u kthye në një prej figurave kryesore negative të serisë së penalltive kundër Zvicrës, duke bërë që në fund skuadra e tij të nisej për në shtëpi dhe ta ndiqte pjesën tjetër të Kupës së Botës në televizor.
Jonathan Tah – Gjermani
Tah iu bashkua listës së atyre që, në vend të rrjetës, gjetën në një farë mënyre tribunat e sipërme të stadiumit amerikan.
Në përballjen ndaj Paraguait, mbrojtësi kishte mundësinë të bëhej heroi i Gjermanisë, por goli i tij me kokë në kohën shtesë u anulua për faull.
Më pas, kur erdhi çasti për të shpëtuar gjermanët në gjuajtjet e penalltive, ai zgjodhi sërish forcën maksimale dhe gaboi, duke e dërguar topin shumë larg portës.
Fabian Balbuena – Paraguai
Nga ana tjetër, mbrojtësi paraguajan dhe shoku i tij në këtë fatkeqësi arriti të kualifikohej në raundin tjetër, ndonëse vetë kishte shumë pak meritë në atë sukses.
Balbuena u bë një tjetër futbollist në këtë Kupë Bote që dështoi nga penalltia. Edhe pse mënyra e goditjes së tij ishte ndryshe nga rastet e tjera, ai gjithsesi nuk arriti ta kthente në gol.
Harry Souttar – Australi
Australia kishte çdo mundësi për ta nxjerrë Egjiptin jashtë në fazën e 1/16-tës. Madje ndeshja u çua deri te penalltitë, por pikërisht aty ekzekutimi i tyre u shemb në momentin vendimtar.
Harry Souttar vendosi të marrë rolin e liderit dhe të japë shembullin e parë nga pika e bardhë. Megjithatë, për australianët do të kishte qenë më mirë sikur ai të mos i afrohej fare topit.
Si gjuajtësi i parë i Australisë, dështimi i tij hapi rrugën për një zinxhir katastrofik te shokët e skuadrës.
Lucas Herrington – Australi
I ndikuar nga tentativa e kapitenit të tij, Lucas Herrington ndoqi të njëjtin drejtim dhe u bë një tjetër figurë e pafat në radhët e Australisë.
Egjiptianët vështirë se mund ta kishin menduar se mbrojtësit australianë do të bënin gjithçka që kishin në dorë për të ndihmuar Faraonët të kalonin në fazën tjetër.
MPB e Maqedonisë ka bërë të ditur se është zbardhur ngjarja e ndodhur disa ditë më parë, më 30 qershor, kur një e mitur u dhunua fizikisht në një park në Komunën e Aerodromit, ndërsa persona të tjerë regjistronin skenën.
Sipas njoftimit, SPB Shkup ka sqaruar rastin e datës 30.06.2026, në të cilin një vajzë 12-vjeçare u sulmua fizikisht nga disa të mitur në një park të komunës së Aerodromit, ndërkohë që të mitur të tjerë që ndodheshin aty po filmonin me telefona celularë.
MPB thotë se DPB Aerodrom dhe Draçevë, në koordinim me DPB Kisella Voda, kanë paraqitur kallëzim penal në Prokurorinë Publike të Shkupit ndaj dy të miturve për veprën penale “dhunë”, të parashikuar dhe të dënueshme sipas nenit 386 të Kodit Penal. Po ashtu, kallëzim penal është ngritur edhe ndaj një të mituri për veprat penale “nxitje” dhe “regjistrim i paautorizuar”, të parashikuara dhe të dënueshme sipas nenit 152 në lidhje me nenin 386 paragrafi 1 të Kodit Penal, si edhe ndaj një të mituri tjetër për veprën penale “regjistrimit të paautorizuar”, të parashikuar dhe të dënueshme sipas nenit 152 në lidhje me nenin 386 paragrafi 1 të Kodit Penal.
Nga i njëjti rast, kallëzim penal është ngritur edhe ndaj prindërve I.V., M.V., M.P., I.A. dhe I.A. për veprën penale të kryer “neglizhencë dhe abuzim të fëmijës”, të parashikuar dhe të dënueshme sipas nenit 201 të Kodit Penal, thuhet nga MPB.
Qeveria spanjolle ka reaguar ndaj deklaratave të presidentit amerikan Donald Trump, i cili kritikoi Madridin për pozicionin e tij lidhur me synimin e NATO-s për rritjen e shpenzimeve të mbrojtjes.
Sipas burimeve nga ekzekutivi spanjoll, të cituara nga gazeta El País dhe transmetuesi publik TVE, komentet e bëra nga Trump gjatë samitit të NATO-s në Ankara janë pritur nga Madridi “me qetësi dhe normalisht”.
Të njëjtat burime nga qeveria spanjolle kanë bërë të ditur se “Spanja mban një marrëdhënie të shkëlqyer sociale, kulturore dhe ekonomike me Shtetet e Bashkuara dhe qëllimi ynë është që kjo të mos ndryshojë”.
Trump e ka përshkruar sërish Spanjën si një “partner të tmerrshëm” në Aleancën Atlantike, duke e lidhur këtë vlerësim me refuzimin e saj për të çuar shpenzimet ushtarake në 5% të Prodhimit të Brendshëm Bruto deri në vitin 2035.
Presidenti amerikan ka këmbëngulur vazhdimisht që shtetet anëtare të NATO-s të japin më shumë kontribut financiar për mbrojtjen e përbashkët, ndërsa kritikat e tij janë drejtuar veçanërisht ndaj vendeve që nuk arrijnë objektivat e reja të aleancës.
Në krahun tjetër, Spanja ka mbajtur një qasje më të kujdesshme ndaj këtij objektivi, duke theksuar se rritja e shpenzimeve duhet të ecë në përputhje me prioritetet ekonomike dhe sociale të vendit.
Qeveria ka zyrtarizuar nisjen e indeksimit të pensioneve prej 2.7% nga muaji korrik, një vendim i përshpejtuar për shkak të rritjes së inflacionit, ndërkohë që paralajmërohet një rishikim rrënjësor i skemës në muajin shtator në bashkëpunim me Bankën Botërore.
Por, ndërsa ministria flet për procese miratimi dhe konsultime, eksperti i ekonomisë Kujtim Hoxha jep një alarm për atë që po ndodh realisht me xhepat e pensionistëve. Sipas ekspertit, ky indeksim prej 2.7% është “për të tallur”, pasi në fund të muajit pensionistët përfitojnë vetëm 60 lekë të reja rritje, një shifër që nuk mbulon as rritjen e çmimeve të mallrave që ata kanë konsumuar gjatë kësaj kohe.
Hoxha kritikon ashpër mungesën e transparencës për 230 milionë eurot që ishin premtuar si bonus pranvere dhe që sipas tij mund të sillnin një përfitim prej 130 mijë lekësh të vjetra për çdo pensionist, nëse do të shpërndaheshin drejt.
Ndërsa qeveria pret shtatorin për të prezantuar ndryshimet, eksperti sqaron se skema aktuale po shihet me shqetësim edhe nga Banka Botërore si një sistem që ka nevojë për ndryshim rrënjësor, duke e konsideruar bonusin aktual thjesht një “karamele” për të qetësuar revoltën qytetare në një kohë kur pensionistët jetojnë në kushte mizerabël.
Ja çfarë thotë eksperti Hoxha
Indeksimi me 2.7% është tallje edhe për të ardhur keq që kjo shifër është 60 lekë. 60 lekë në muaj përfitojnë këta qytetarët. Faktikisht janë 755,000 pensionistë dhe për këta ky pension i rritur në këtë masë është shumë problem sepse nuk u plotëson nevojat e veta. Megjithatë duhet të themi që kjo duhet të ndodhte që në muajin shkurt. Kriza botërore ka pasur ndikimin e vet. Gjithë qeveritë e vendeve të tjera e kanë bërë këtë ndryshim.
Qytetarët kanë konsumuar mallra dhe shërbime gjatë kësaj kohe me çmime të rritura dhe sot marrin një 5,000 lekë të vjetra për çdo muaj e cila nuk plotëson nevojat e qytetarit. Për ta sqaruar me një fjali, që pensionistët përfitojnë 5,000 lekë të vjetra rritje edhe bonusi 50,000 lekë vetëm këtë muaj? Për të dhënë shpjegimin e bonusit për 50,000 lekëshin duhet të mbajmë disa pyetje që kërkojnë edhe përgjigje.
Në fund të vitit 2025 në Kuvendin e Shqipërisë u miratua buxheti i vitit 2026 ku u përcaktua dhe mënyra dhe rregulli që do të shërbejë si mekanizëm për të shpërblyer qytetarët në pension dhe u tha që të gjitha fondet e papërdorura deri në fund të vitit 2025 do të jenë për bonusin e pranverës. U grumbulluan 230 milionë euro për të cilat dua të japin shpjegim pse s’u përdor ky bonus, aq më tepër që në një kohë krize siç është në Shqipëri.
Zlatko Dalic ka vendosur që ta mbyllë eksperiencën e tij në krye të Përfaqësueses së Kroacisë në fund të Kupës së Botës 2026.
Vendimi i trajnerit kroat i është komunikuar Federatës Kroate të Futbollit gjatë një takimi me presidentin Marijan Kustic, duke i dhënë fund një prej kapitujve më të suksesshëm të futbollit kroat.
Në vitin 2017, Dalic mori drejtimin e Kroacisë dhe gjatë kësaj periudhe e udhëhoqi skuadrën drejt epokës më të lavdishme në historinë e saj, me tri medalje të fituara në turne madhorë.
Me të në stol, Kroacia shkoi deri në finalen e Kupës së Botës 2018 në Rusi, ku mori medaljen e argjendtë. Më pas, në Kupën e Botës 2022 në Katar, siguroi medaljen e bronztë, ndërsa në vitin 2023 fitoi medaljen e argjendtë në Ligën e Kombeve.
Po ashtu, ai e çoi Kroacinë në Kampionatin Evropian 2020 dhe 2024, si edhe në Kupën e Botës 2026.
“Nuk ka nder më të madh sesa ta drejtosh kombëtaren tënde dhe nuk mund të kisha një punë më të rëndësishme, më të përgjegjshme dhe më të bukur”.
“Kur mora drejtimin e ekipit, besoja te cilësia e lojtarëve dhe te vetja, por nuk mund ta imagjinoja se do të arrinim gjithçka që kemi arritur gjatë këtyre pothuajse nëntë viteve”.
Dalic tha se ndihet krenar për fitoret, kualifikimet dhe medaljet, por nënvizoi se ndër arritjet më të mëdha mbetet edhe lidhja që u krijua mes kombëtares dhe tifozëve kroatë.
Ai vlerësoi gjithashtu futbollistët që kanë përfaqësuar vendin gjatë kohës së tij në krye të ekipit, duke përmendur kapitenin Luka Modric, brezin që shkoi në finalen e Botërorit 2018, si dhe lojtarët e rinj që morën përgjegjësi në vitet e fundit.
“Isha jashtëzakonisht i privilegjuar që pata mundësinë të drejtoja futbollistë kaq të mëdhenj dhe njerëz kaq cilësorë. Ata gjithmonë e vendosën Kroacinë në radhë të parë dhe treguan me sjelljen, përkushtimin dhe qasjen e tyre se çfarë përfaqëson Kombëtarja e Kroacisë”.
“Mbështetja që mora ditët e fundit më bëri ta rishqyrtoj vendimin tim, por… ka ardhur koha.”
“Edhe pse ende kam ambicie dhe dëshirë për të arritur suksese të reja me Kroacinë, besoj se ky është momenti i duhur për t’i dhënë fund kësaj epoke të jashtëzakonshme”.
Dalic largohet si trajneri më i suksesshëm në historinë e Kombëtares së Kroacisë, pasi e ktheu ekipin në një nga skuadrat më konkurruese dhe më të vlerësuara në futbollin ndërkombëtar.
Apple ka vënë në dispozicion një përditësim të ri sigurie për iPhone, i cili adreson 29 dobësi të identifikuara në sistemin operativ.
Përdoruesve të iPhone u rekomandohet të hyjnë sa më shpejt te cilësimet, të instalojnë versionin më të fundit të softuerit dhe, pasi të përfundojë procesi, të rindizin pajisjen.
Për telefonat e saj, kompania amerikane ka shpërndarë versionin iOS 26.5.2. Ndryshe nga disa përditësime të tjera që sjellin veçori të reja, ky publikim ka në qendër kryesisht korrigjimet që lidhen me sigurinë.
Në shënimet zyrtare të Apple thuhet: “Ky përditësim ofron rregullime sigurie për iPhone-in tuaj”.
Ndonëse mund të mos duket si një përditësim tërheqës, iOS 26.5.2 nuk duhet anashkaluar, sepse zgjidh në total 29 dobësi brenda sistemit operativ të Apple.
Pjesa më e madhe e këtyre çështjeve lidhet me WebKit, motorin open-source të shfletuesit që shërben për paraqitjen e faqeve në internet. WebKit përdoret nga Safari dhe një numër i madh aplikacionesh të tjera, duke trajtuar HTML, CSS, JavaScript dhe mënyrën se si shfaqen faqet në pajisjet Apple.
Këto dobësi vlerësohen si të rëndësishme, pasi mund të ndikojnë te miliona përdorues përmes faqeve të rreme ose me përmbajtje të dëmshme në internet.
Deri tani nuk është bërë e ditur nëse ndonjë përdorues është prekur nga këto mangësi, por Apple zakonisht ndërhyn me shpejtësi kur zbulohen probleme të tilla.
Kompania ka sqaruar: “Për mbrojtjen e klientëve tanë, Apple nuk i zbulon, diskuton apo konfirmon çështjet e sigurisë derisa të kryhet hetimi dhe të jenë të disponueshme përditësimet ose rregullimet”.
Për ta instaluar përditësimin në iPhone, duhet të shkoni te Settings > General > Software Update. Aty duhet të shfaqet iOS 26.5.2. Pas përfundimit të instalimit, pajisja do të jetë më e mbrojtur nga këto dobësi.
Këshilla për përditësim nuk vlen vetëm për përdoruesit e iPhone. Edhe ata që kanë iPad dhe MacBook udhëzohen të përditësojnë pajisjet e tyre, pasi edhe këto mund të jenë të ekspozuara ndaj të njëjtave probleme sigurie.
Njoftimi për daljen e iOS 26.5.2 vjen vetëm pak javë pasi Apple prezantoi iOS 27, versionin e ri madhor të sistemit operativ, i cili pritet të publikohet më vonë gjatë këtij viti.
Sapo të vihet në dispozicion, iOS 27 pritet të sjellë përmirësime për Siri, ta thjeshtojë redaktimin e fotografive dhe t’u japë përdoruesve më shumë opsione për personalizimin e pamjes së ndërfaqes “Liquid Glass”.
Apple ka premtuar gjithashtu rritje të performancës së përgjithshme për pajisjet që do ta përdorin këtë softuer, si edhe kontrolle prindërore më të avancuara.
Edhe përdoruesit e AirPods pritet të kenë më shumë mundësi për të kontrolluar përvojën e dëgjimit. Veçoria e re “AirPods Custom EQ” do t’u mundësojë atyre të rregullojnë bass-in, frekuencat e mesme dhe tonet e larta sipas preferencave personale.
Kjo pritet të krijojë një profil zëri më të personalizuar për muzikë, podkaste dhe filma.
Publikimi i iOS 27 pritet të ndodhë në muajin shtator. /GazetaExpress/
Samsung ka bërë të ditur datën kur do të zhvillojë eventin e ardhshëm “Unpacked”, ku më vonë gjatë këtij muaji pritet të prezantojë pajisje të reja.
Përdoruesit dhe adhuruesit e telefonave Galaxy mund të rezervojnë në kalendar të mërkurën, 22 korrik, pasi në atë ditë kompania koreanojugore do të heqë velin nga gjenerata e re e produkteve, të cilat pritet të jenë në qendër të vëmendjes.
Ndonëse Samsung ende nuk ka sqaruar zyrtarisht se cilat produkte do të prezantohen, pothuajse konsiderohet e sigurt që në aktivitetin që do të mbahet në Londër do të shfaqen modelet më të reja të telefonave të palosshëm.
Mes tyre pritet të jetë një Galaxy Z Flip i përditësuar, si edhe një version i ri i Galaxy Z Fold. Të dy pajisjet besohet se do të sjellin fuqi më të madhe në performancë, kamera të përmirësuara, rezistencë më të lartë dhe veçori më të avancuara të inteligjencës artificiale.
Megjithatë, pavarësisht përmirësimeve që pritet të ofrojnë këto dy modele, ato mund të mos jenë atraksioni kryesor i eventit.
Kompania ka sinjalizuar se mund të jetë rrugës një produkt tërësisht i ri, i cili mund të ndryshojë mënyrën se si shihen telefonat e palosshëm.
“Një formë e re po shpaloset”, thuhet në një email që Samsung i ka dërguar “Express.co.uk”.
Kjo deklaratë vjen pas disa publikimeve në rrjetet sociale, ku kompania ka paraqitur imazhe të produkteve të zakonshme që duken më të shkurtra dhe më të gjera se zakonisht.
Të gjitha këto shenja nxisin idenë se Samsung mund të prezantojë një pajisje të re të palosshme me një format më të afërt me një pasaportë. Avantazhi kryesor i këtij dizajni është se, pas hapjes, do të ofrojë një eksperiencë shumë më pranë një tableti sesa ekrani aktual më katror i Galaxy Z Fold.
Kjo do ta bënte pajisjen më të përshtatshme për shikimin e filmave, lojërat dhe kryerjen e disa detyrave në të njëjtën kohë.
Prej kohësh qarkullojnë aludime se Apple po bëhet gati të prezantojë telefonin e saj të parë të palosshëm, ndërsa shumica e raportimeve sugjerojnë se edhe iPhone i palosshëm mund të ketë një formë të ngjashme me pasaportën.
Duket se Samsung synon të jetë përpara në këtë garë dhe ta sjellë këtë dizajn në treg shumë përpara se Apple të dalë në skenë në Cupertino këtë shtator.
“Unpacked” tashmë është vetëm dy javë larg dhe njoftimet pritet të transmetohen drejtpërdrejt sapo të zyrtarizohen.
Prezantimi do të fillojë në orën 15:00 sipas kohës sonë. /GazetaExpress/
Të shtunën në Miami, Anglia dhe Norvegjia do të ndeshen në çerekfinalet e Kupës së Botës, në një sfidë që nuk mbart vetëm peshën sportive të dy përfaqësueseve, por edhe kujtimin e një episodi të paharruar të futbollit.
Marrëdhënia sportive mes këtyre dy kombëtareve është bërë më e famshme për një koment historik sesa për vetë ndeshjet e luajtura në fushë.
45 vite më parë, komentatori norvegjez Bjorge Lillelien hyri përgjithmonë në historinë e sportit me një reagim që vazhdon të kujtohet edhe në ditët e sotme.
Në shtator të vitit 1981, Norvegjia, ende shumë larg nivelit që ka sot me emra si Erling Haaland, arriti të mposhtë Anglinë me rezultatin 2-1 në një ndeshje kualifikuese për Kupën e Botës.
Përballë norvegjezëve ishte një ekip anglez me futbollistë të njohur si Bryan Robson, Glenn Hoddle, Kevin Keegan dhe Trevor Francis.
Suksesi i arritur në stadiumin “Ullevaal” të Oslos u pa si një nga surprizat më të mëdha të futbollit norvegjez dhe një goditje e fortë për Anglinë.
Lillelien, që ishte komentatori kryesor i transmetuesit norvegjez NRK, e shfrytëzoi atë çast për një festë të pazakontë e të paharrueshme.
Para fundit të takimit, ai ironizoi arbitrin polak Jerzy Kacprzak, duke thënë se ishte “pranë marrjes së shtetësisë angleze”, si një thumbim për kohën shtesë që, sipas tij, favorizonte kundërshtarët.
Në momentin kur arbitri vërshëlleu fundin e ndeshjes, komentatori norvegjez shpërtheu në mikrofon me një nga deklaratat më të famshme që ka njohur futbolli.
“Lord Nelson. Lord Beaverbrook. Sir Winston Churchill. Sir Anthony Eden. Clement Atlee. Henry Cooper. Lady Diana. Ne i kemi mposhtur të gjithë”, tha ai, përpara se t’i drejtohej drejtpërdrejt kryeministres britanike të asaj kohe, Margaret Thatcher.
“Maggie Thatcher, a mund të më dëgjosh? Kemi një mesazh për ty. I kemi nxjerrë djemtë e tu jashtë Kupës së Botës. Siç thonë në gjuhën tuaj, në baret e boksit rreth Madison Square Garden në Nju Jork, djemtë tuaj morën një goditje të jashtëzakonshme”.
Më pas ai e përsëriti sërish për ta bërë edhe më të fortë jehonën e atij momenti:
“Djemtë tuaj morën një goditje të jashtëzakonshme”.
Megjithëse Anglia, ndryshe nga ajo që u tha në koment, ia doli të sigurojë kualifikimin për Kupën e Botës 1982 në Spanjë, fjalët e Lillelien mbetën të gdhendura në kujtesën e tifozëve.
Sikur ai episod të kishte ndodhur në kohën e rrjeteve sociale, ndikimi i tij do të kishte qenë edhe më i madh.
Megjithatë, edhe pa ndihmën e platformave moderne, ai komentim u bë një fenomen ndërkombëtar dhe vazhdon të përhapet falë regjistrimeve video të ruajtura ndër vite.
Në Norvegji, Lillelien ishte një figurë shumë e dashur për publikun. Ai u nda nga jeta në vitin 1987, në moshën 60-vjeçare.
Vetë ai këmbëngulte gjithmonë se ajo që tha nuk kishte qenë e menduar më parë, por kishte dalë krejt natyrshëm nga emocionet e çastit.
Djali i tij, Marius Lillelien, i cili më pas u bë një drejtues i lartë në transmetuesin NRK, e ka përshkruar atë çast si shfaqje të një ane tjetër të karakterit të të atit.
“Njeriu që dëgjojmë në ato momente të mëdha radiofonike është dikush që ndërton veten si një artist përpara një koncerti. Jashtë transmetimit ishte një person krejt tjetër”, tregoi ai.
Edhe ish-sulmuesi norvegjez Egil Ostenstad, që ka luajtur në Ligën Premier me Southampton dhe Blackburn, e ka cilësuar Lillelien si një personazh të rrallë.
“Ai ishte një norvegjez i pazakontë. Ne zakonisht nuk shfaqim shumë emocione, por ai dinte ta bënte këtë. Ky komentim tregon shumë për personalitetin e tij”.
Me kalimin e kohës, lidhjet mes Anglisë dhe Norvegjisë janë forcuar edhe më shumë përmes futbollit.
Që nga krijimi i Ligës Premier, gati 100 futbollistë norvegjezë kanë qenë pjesë e elitës angleze, nga Jan Age Fjortoft, Morten Gamst Pedersen dhe John Carew, te Ole Gunnar Solskjaer, Martin Odegaard dhe Erling Haaland.
Në katër ndeshjet zyrtare të zhvilluara mes tyre, Anglia regjistron një fitore, një barazim dhe dy humbje.
Kombëtaret e meshkujve të Anglisë dhe Norvegjisë nuk janë ndeshur asnjëherë më parë në një turne madhor, ndërsa përballja në Miami do të jetë e para mes tyre pas 12 vitesh.
Ky rivalitet u rikujtua edhe në vitin 2015, kur Anglia dhe Norvegjia u takuan në fazën e 1/8-tave të Kupës së Botës për femra.
Në prag të asaj sfide, gazeta norvegjeze “VG Sporten” shtroi pyetjen nëse Anglia ishte “gati për një goditje të madhe”, duke iu referuar fjalëve të Lillelien.
Këtë herë, megjithatë, ishte Anglia ajo që fitoi 2-1.
Tashmë, ndërsa të dyja kombëtaret bëhen gati për një tjetër duel me ngarkesë historike, mbetet për t’u parë nëse ndonjë komentator do të mund të krijojë një kujtim aq të fuqishëm sa ai i Bjorge Lillelien.
Për 90 minuta, miqësia mes tyre do të lihet mënjanë dhe vendimi do të merret vetëm në fushën e lojës.
Login
