Përfaqësuesit e platformës qytetare “Liria Ka Emër”, Ismail Tasholli dhe Arbnora Zogiani, u kanë bërë thirrje qytetarëve që t’i bashkohen protestës “JO NË EMRIN TIM”, e cila do të mbahet nesër, më 1 tetor, në orën 16:00, në sheshin “Skënderbeu” në Prishtinë.

Në konferencën për media, një ditë para protestës, Tasholli e cilësoi aktgjykimin ndaj ish-krerëve të UÇK-së si të padrejtë dhe të papranueshëm, duke theksuar se ai nuk mund të merret në emër të popullit të Kosovës.

“Kosova nuk e ka nisur luftën. Kosova nuk ka qenë agresori. Shqiptarët e Kosovës kanë qenë viktima të një regjimi që për vite të tëra ua kishte mohuar lirinë, të drejtat dhe dinjitetin”, tha ai.

Sipas Tashollit, drejtësia duhet të vlejë për të gjithë, por nuk mund të jetë selektive dhe as të shkëputet nga e vërteta historike. Ai tha se reagimi qytetar ndaj aktgjykimit ka kaluar kufijtë e Kosovës, duke përmendur protestat dhe mobilizimin e shqiptarëve në Evropë dhe më gjerë.

Duke kujtuar protestën studentore të 1 tetorit 1997, Tasholli tha se nesër, 29 vjet më vonë, qytetarët do të mblidhen sërish në Prishtinë për të kërkuar drejtësi.

Ai kërkoi gjithashtu veprim të menjëhershëm nga Qeveria dhe Kuvendi për shqyrtimin dhe procedimin e Projektligjit për ndryshimin dhe plotësimin e Ligjit për Dhomat e Specializuara.

“Institucionet duhet të përdorin çdo mjet juridik dhe shtetëror që është në dispozicion dhe në përputhje me ligjin, për mbrojtjen e të drejtave të të dënuarve dhe për të vazhduar betejën juridike deri në përfundimin e të gjitha procedurave”, deklaroi Tasholli.

“UÇK-ja na bashkon! Nga studentët e vitit 1997 deri te qytetarët e sotëm, një gjë nuk ka ndryshuar: ne nuk e harrojmë lirinë, nuk e harrojmë sakrificën dhe nuk heqim dorë nga drejtësia”, shtoi ai.

Ndërkaq, Arbnora Zogiani u bëri thirrje qytetarëve që protestës t’i bashkohen me familjarët, miqtë dhe kolegët e tyre. Ajo njoftoi se nga çdo qytet i Kosovës do të ketë transport të organizuar, ndërsa oraret dhe vendet e nisjes tashmë janë publikuar.

Zogjani falënderoi mediat për përcjelljen e aktiviteteve dhe për jehonën që i kanë dhënë zërit qytetar, ndërsa veçoi kontributin e diasporës në mobilizimin kundër aktgjykimit.

“Diaspora jonë edhe një herë po dëshmon se largësia gjeografike nuk do të thotë largësi nga Kosova”, tha ajo, duke vlerësuar protestat, tubimet dhe aktivitetet e organizuara nga bashkatdhetarët në Evropë, Shtetet e Bashkuara dhe vende të tjera të botës.

Në këtë vazhdë, Zogjani njoftoi se më 10 tetor në Bruksel do të mbahet protesta e radhës, e organizuar nga diaspora shqiptare, dhe ftoi bashkatdhetarët të marrin pjesë.

Në fund, platforma qytetare “Liria Ka Emër” u bëri thirrje të gjithë qytetarëve që t’i bashkohen protestës së 1 tetorit, për të shprehur kundërshtimin ndaj aktgjykimit dhe për të kërkuar veprime konkrete institucionale në mbrojtje të çlirimtarëve.

Sinjali – aty ku e vërteta flet para lajmit!

/GazetaSinjali/

The post “Liria Ka Emër” fton qytetarët në protestën e nesërme: Të bashkuar kundër padrejtësisë, institucionet të veprojnë pa vonesë appeared first on Sinjali.

OpenAI ka prezantuar disa mjete të reja për punën në grup gjatë eventit Dev Day, ndërsa një nga risitë kryesore është ChatGPT Spaces – një hapësirë e përbashkët ku kolegët mund të bashkëpunojnë me ChatGPT dhe agjentët e rinj personalë të inteligjencës artificiale, të quajtur Dots.

Sipas OpenAI, ekipet do të mund të organizojnë në një hapësirë të vetme skedarët e ngarkuar nga anëtarët, si dhe materialet e krijuara me ndihmën e ChatGPT. Qëllimi është që dokumentet dhe informacionet e nevojshme për një projekt të jenë më të lehta për t’u gjetur dhe përdorur nga të gjithë anëtarët e ekipit.

ChatGPT Spaces do të jetë fillimisht në dispozicion për përdoruesit e planeve Pro, Business dhe Enterprise, përmes aplikacionit desktop dhe versionit web të ChatGPT, ndërsa më vonë pritet të jetë i disponueshëm edhe në pajisjet mobile.

Një tjetër risi lidhet me takimet. OpenAI ka prezantuar një mjet që mund të marrë shënime gjatë një takimi, të krijojë përmbledhje dhe të identifikojë detyrat që duhet të kryhen më pas. Këto materiale mund të shtohen automatikisht në një Space. Kompania thotë se regjistrimi audio fshihet pasi të jenë krijuar shënimet.

Ky funksion do të jetë fillimisht i disponueshëm në aplikacionin ChatGPT për macOS, për përdoruesit e planeve Pro dhe Business, ndërsa përdoruesit Enterprise do të kenë akses më vonë.

Duke pasur parasysh se Spaces mund të përmbajnë dokumente dhe informacione të ndjeshme të kompanive, OpenAI thekson edhe aspektin e sigurisë. Kompania thotë se sistemi i saj Private Intelligence është krijuar për t’u ofruar bizneseve më shumë siguri në përdorimin e modeleve të avancuara të AI-së, duke mbrojtur të dhënat e tyre.

Në kuadër të mjeteve të reja për punë, ChatGPT do të integrohet gjithashtu me Slack dhe Microsoft Teams për përdoruesit Business dhe Enterprise. Në kanale, biseda private apo diskutime me tema specifike, përdoruesit do të mund të përmendin @ChatGPT për të kryer detyra, si krijimi i prezantimeve bazuar në një bisedë.

Me lejen e administratorëve ose përdoruesve, ChatGPT do të mund të lidhet edhe me mjete dhe shërbime të tjera që ekipet përdorin përmes Slack dhe Teams.

OpenAI prezantoi gjithashtu Pages, një lloj dokumenti interaktiv ku përdoruesit mund të krijojnë tekst, grafikë, imazhe dhe vizualizime, përpara se t’i ndajnë me kolegët për komente dhe bashkëpunim.

Në javët e ardhshme pritet të jetë në dispozicion edhe një funksion për prezantime të përbashkëta, të cilat mund të eksportohen në PowerPoint dhe Google Slides. Kompania po përgatit gjithashtu profile të shpërndashëm, ku përdoruesit mund të prezantojnë aplikacionet web dhe plugin-et e tyre, në mënyrë që kolegët t’i shohin dhe t’i përdorin.

Me këto mjete, OpenAI po e zgjeron ChatGPT përtej përdorimit individual, duke e pozicionuar gjithnjë e më shumë si një platformë për bashkëpunim, menaxhim të informacionit dhe automatizim të proceseve të punës.

Sinjali – aty ku e vërteta flet para lajmit!

/GazetaSinjali/

The post Risi në ChatGPT, OpenAI prezanton Spaces për bashkëpunim dhe menaxhim skedarësh appeared first on Sinjali.

Qeveria ka miratuar Projektligjin për rialokimin e 102 milionë eurove në buxhetin e Kosovës, me qëllim të mbulimit të disa shpenzimeve, përfshirë pagën e 13-të për punonjësit e sektorit publik.

Ministri i Financave, Hekuran Murati, ka thënë se 102 milionë euro parashihet të ndahen në kontigjencën e pagave, për të mbuluar koston e pagës së 13-të për punonjësit e sektorit publik, si dhe pagesën retroaktive të diferencës së shtesës prej 0.5 për qind, në përputhje me vendimin e Gjykatës Kushtetuese.

“Që nga ky vit me anë të Ligjit për ndarje buxhetore e kemi mbuluar shtesën prej 0.5 për qind mirëpo hapësira e pambuluar që ka mbetur është prej kur ka hyrë ligji i pagave në fuqi deri në fund të vitit të kaluar, pjesë e cila parashihet të mbulohet me këtë ndarje. Gjithashtu edhe një pjesë tjetër prej 20 milionë eurosh parashihet të dedikohet tek pensionet bazike që të mbulohet kostoja e rritjes së natyrshme të pensionistëve”, ka thënë ai.

Sipas Muratit, përveç pagës së 13-të dhe pagesës retroaktive të shtesës së përvojës së punës, 20 milionë euro të tjera do të ndahen për pensionet bazike, me qëllim të mbulimit të kostos së rritjes së numrit të pensionistëve.

Ndërkohë, debati për pagën e 13-të është shtrirë edhe te sektori privat. Në vitin 2026, paga e 13-të është zbatuar për punonjësit që paguhen nga buxheti i Kosovës.

Sinjali – aty ku e vërteta flet para lajmit!

/GazetaSinjali/

The post Qeveria rialokon 102 milionë euro, një pjesë për pagën e 13-të dhe shtesën 0.5% appeared first on Sinjali.

Kapiteni dhe bashkëpiloti i fluturimit FZ1073 të kompanisë Flydubai, i cili u devijua nga itinerari i tij dhe bëri ulje emergjente në Arabinë Saudite, kanë mbetur të lënduar dhe janë dërguar në spital.

Lajmin e ka bërë të ditur “Cluster2”, operatori kryesor i aviacionit në Arabinë Saudite.

Sipas njoftimit, Aeroporti Ndërkombëtar “Prince Sultan bin Abdulaziz” në Tabuk ka pranuar një thirrje për ndihmë nga avioni i Flydubai, i cili në orën 08:44 me kohën lokale ka kërkuar leje për ulje emergjente.

Pas thirrjes, aeroporti ka shpallur gjendjen e emergjencës dhe ka aktivizuar masat e nevojshme për asistimin e avionit.

Sherr mes pilotëve në fluturimin Dubai-Izrael, avioni devijohet drejt Arabisë Saudite

Avioni është ulur në mënyrë të sigurt në aeroportin e Tabukut në orën 09:45 sipas kohës lokale.

Pas uljes, është konstatuar se si kapiteni, ashtu edhe bashkëpiloti kishin pësuar lëndime dhe janë dërguar menjëherë në spital për trajtim mjekësor.

Ndërkohë, pasagjerëve u është ofruar trajtimi dhe asistenca e nevojshme në terminalin e aeroportit. Flydubai ka konfirmuar se të gjithë pasagjerët janë të sigurt dhe të llogaritur.

Përleshja në kabinë, mediat izraelite: Njëri nga pilotët e “FlyDubai” tentoi të rrëzonte avionin

Sinjali – aty ku e vërteta flet para lajmit!

/GazetaSinjali/

The post Dy pilotët e Flydubai përfundojnë në spital pas incidentit në fluturimin Dubai-Izrael appeared first on Sinjali.

Gjykata Kushtetuese e Republikës së Kosovës, në vendimin e saj të fundit për procedurën e zgjedhjes së Presidentit, ka përcaktuar se Kuvendi duhet ta përfundojë këtë proces deri më 6 tetor 2026.

Në vendim, Gjykata ka sqaruar edhe pasojat në rast se Kuvendi dështon ta zgjedhë Presidentin e ri brenda këtij afati.

Sipas Kushtetueses, në një rast të tillë, Kuvendi shpërndahet automatikisht në bazë të Kushtetutës, ndërsa zgjedhjet e parakohshme për Kuvend duhet të zhvillohen brenda 45 ditësh nga dita e shpërndarjes.

Gjykata thekson se kjo rrjedh nga nënparagrafi 3 i paragrafit 1 të nenit 82 të Kushtetutës, i cili përcakton rastin e shpërndarjes së Kuvendit nëse nuk zgjidhet Presidenti brenda afatit përkatës.

“Në fund, Gjykata rithekson që në rast se pas hyrjes në fuqi të këtij Aktgjykimi, përmes të cilit përcaktohet që Kuvendi deri më 6 tetor 2026 duhet të vazhdojë dhe të përfundojë zgjedhjen e Presidentit, Kuvendi dështon të zgjedhë Presidentin/en e ri/re, Kuvendi, bazuar në nënparagrafin 3 të paragrafit 1 të nenit 82 të Kushtetutës shpërndahet ex constitutione, dhe për pasojë, zgjedhjet e parakohshme për Kuvend duhet të zhvillohen brenda dyzet e pesë (45) ditësh, pas ditës së shpërndarjes së Kuvendit, ashtu siç përcaktohet me paragrafin 2 të nenit 66 [Zgjedhja dhe Mandati] dhe paragrafit 6 të nenit 86 [Zgjedhja e Presidentit] të Kushtetutës”, thuhet në vendim.

Sinjali – aty ku e vërteta flet para lajmit!

/GazetaSinjali/

The post Aktgjykimi i Kushtetueses: Si shkohet në zgjedhje të reja nëse Kosova dështon ta zgjedhë Presidentin deri më 6 tetor appeared first on Sinjali.

Lojtarët mund të fitojnë shuma përtej imagjinatës së familjeve të zakonshme, megjithatë shumë prej tyre që i marrin këto para brenda një karriere relativisht të shkurtër, përballen me presion të madh për të shpenzuar dhe ua lënë vendime të rëndësishme këshilltarëve, të afërmve ose partnerëve të biznesit. Një e ardhur e madhe nuk është e njëjta gjë me pasurinë e qëndrueshme.

Futbolli ka përmirësuar strukturat e tij mbështetëse, por problemi kryesor mbetet. Loja u mëson lojtarëve se si të performojnë në nivel elitar; nuk i mëson automatikisht si të ndërtojnë një jetë pas kontratës përfundimtare.

Përgjigja më e qëndrueshme nuk është një leksion për kursimin e parave. Është një sistem që e trajton njohuritë financiare si pjesë të zhvillimit të lojtarëve nga niveli i akademisë e tutje.

Ka shumë yje të mëdhenj të futbollit botëror që kanë fituar shumë gjatë karrierës, por kanë hasur në probleme të mëdha në menaxhimin e tyre duke humbur shumë pasuri pas pensionimit.

Roberto Carlos

Roberto Carlos nuk fajësoi një blerje të pamatur apo një investim të keq në restorant. Ai përshkroi një kolaps më shqetësues të mbikëqyrjes. Duke folur në Samitin e Futbollit të Portugalisë, ai tha se një mosmarrëveshje serioze me ish-agjentin e tij dhe një problem i veçantë familjar çuan në mbërritjen e dokumenteve që ai nuk e dinte kurrë se ekzistonin. Ai tha se më pas e kuptoi se pasuria e tij e akumuluar ishte zhdukur në mënyrë efektive.

Është tërheqëse të përgjigjesh se një futbollist i paguar në atë nivel thjesht duhet të kishte kontrolluar çdo llogari. Por kjo është pikërisht dobësia: sportistët elitar janë të trajnuar për t’i kushtuar përqendrimin e tyre performancës, udhëtimit, rikuperimit, garës dhe jetës familjare. Administrimi financiar shpesh u delegohet njerëzve që u besohet pikërisht sepse janë të afërt.

Ish-ylli i Real Madridit dhe Brazilit e ka paraqitur përvojën si një paralajmërim për lojtarët e rinj. Mësimi nuk është se një lojtar duhet t’u mosbesojë të gjithëve përreth tij. Është se besimi duhet të shoqërohet me mbikëqyrje të pavarur, pronësi të qartë të aseteve dhe aftësinë për të kuptuar se ku mbahen paratë.

Shifra e lidhur me të ardhurat e tij nga karriera – më shumë se 160 milionë euro duhet të trajtohet me kujdes, sepse vlerësimet historike të pagave rrallë janë përfundimtare. Megjithatë, pika thelbësore është e qartë: Carlos thotë se pasuria e akumuluar gjatë një karriere të jashtëzakonshme u zhduk kryesisht përmes marrëveshjeve që ai nuk i kuptonte ose nuk i kontrollonte siç duhet.

David James

David James fitoi rreth 20 milionë funte gjatë një karriere të gjatë në elitë me klube si Liverpooli, Aston Villa, Manchester City, Portsmouth dhe Anglinë. Ai gjithashtu kishte një kontratë modelimi, interesa pronësore dhe një profil publik që sugjeronte siguri financiare.

Megjithatë, në maj të vitit 2014, James u shpall i falimentuar. Pasuritë e tij, duke përfshirë suvenire futbolli, automjete, pajisje DJ dhe disqe, u shitën në ankand si pjesë e procesit të falimentimit.

Historia e James shpesh reduktohet në një imazh të makinave luksoze dhe hobive të shtrenjta. Realiteti ishte më i ndërlikuar: një divorc, angazhime pronësore dhe kostoja e mbajtjes së një stili jetese pas futbollit u kombinuan për të krijuar një pozicion financiar që të ardhurat e tij të kaluara nuk mund ta përballonin.

Mësimi kryesor nuk është se një lojtar nuk duhet të zotërojë kurrë gjëra të shtrenjta. Por është se asetet mund të kenë kosto mirëmbajtjeje, borxhet mund të shumëfishohen dhe fluksi i parasë mund të bjerë shpejt kur mbaron një pagë lojtari. Pasuria neto nuk është e njëjtë me likuiditetin.

Trevor Sinclair

Trevor Sinclair luajti për Queens Park Rangers, West Ham, Manchester City dhe Anglinë, duke luajtur 12 ndeshje me ekipin e parë dhe duke marrë pjesë në Kupën e Botës 2002. Në vitin 2023, ai u shpall i falimentuar pasi nuk arriti të shlyente një faturë tatimore që raportohej të ishte rreth 36,000 funte.

Shifra është mbresëlënëse pikërisht sepse ishte modeste krahasuar me pagat e një futbollisti të afirmuar të Ligës Premier dhe ndërkombëtar. Kolapsi financiar nuk shkaktohet gjithmonë nga një mashtrim me shtatë shifra ose një investim ekstravagant. Ndonjëherë fillon sepse detyrimet tatimore injorohen, vonohen ose trajtohen si një problem për një ditë tjetër.

Taksa është një nga pjesët më pak joshëse të financave të futbollit, por është edhe një nga më të rrezikshmet. Lojtarët mund të marrin të ardhura përmes pagave, të drejtave të imazhit, bonuseve, sponsorizimeve, kontratave jashtë shtetit dhe sipërmarrjeve të biznesit. Nëse struktura menaxhohet dobët, një faturë tatimore mund të mbërrijë vite më vonë – me interesa, gjoba dhe kosto ligjore të shtuara.

Rregulli bazë është i thjeshtë: paratë e taksave nuk janë para të tepërta. Pasi të jenë shpenzuar, lojtari mund të duhet të shesë asete ose të marrë hua thjesht për të përmbushur një detyrim që ishte i parashikueshëm që nga fillimi.

Lee Hendrie

Lee Hendrie fitonte më shumë se 30,000 funte në javë në kulmin e karrierës së tij me Aston Villan dhe bëri një paraqitje me kombëtaren e Anglisë. Megjithatë, ai u shpall i falimentuar në janar 2012 pasi borxhet dhe sekuestrimet u rritën ndjeshëm.

Më vonë, Hendrie foli hapur për problemet e rënda të shëndetit mendor gjatë asaj periudhe, përfshirë përpjekjet për vetëvrasje. Përvoja e tij është e rëndësishme sepse vështirësitë financiare rrallë shfaqen si një problem i pastër kontabël. Ato mund të ngatërrohen me depresionin, stresin familjar, turpin dhe izolimin.

Publiku shpesh e imagjinon kolapsin financiar si provë të papërgjegjshmërisë. Në praktikë, shpesh është një cikël: ankthi nxit vendime të këqija, borxhet rrisin presionin dhe frika nga pranimi i vështirësisë vonon ndërhyrjen derisa situata të jetë shumë më e keqe.

Për futbollistët, rreziku zmadhohet nga identiteti. Një lojtar i mësuar të admirohet, të paguhet mirë dhe të ketë kontroll në fushë mund ta ketë veçanërisht të vështirë të thotë se paratë kanë ikur.

Keith Gillespie

Keith Gillespie luajti më shumë se 80 herë për Irlandën e Veriut dhe gëzoi një karrierë të gjatë në futbollin anglez me Manchester United, Newcastle United, Blackburn Rovers dhe Sheffield United. Më vonë ai llogariti se kishte humbur 7,215,875 funte gjatë karrierës së tij profesionale, shumicën e të cilave përmes bixhozit.

Gillespie u shpall i falimentuar në vitin 2010 në moshën 35 vjeçare. Rasti i tij tregon se si bixhozi mund të konsumojë pasuri në një shkallë që buxhetimi i zakonshëm nuk mund ta zgjidhë. Problemi nuk është thjesht shuma e humbur në një bast individual; është detyrimi për të ndjekur humbjet, për të fshehur dëmin dhe për të vazhduar bixhozin me shpresën e një fitoreje korrigjuese.

Lidhja e futbollit me bastet krijon një tension shtesë. Lojtarët jetojnë në një sport të mbushur me reklama të lojërave të fatit, probabilitete, sponsorizime dhe kulturë bastesh rastësore, ndërsa pasojat financiare dhe psikologjike mund të jenë shkatërruese për njerëzit e prekshëm nga varësia.

Pika vendimtare është se fitimet e larta mund ta bëjnë dëmin nga bixhozi më pak të dukshëm fillimisht. Një lojtar mund të jetë në gjendje të përballojë humbjet për vite me radhë përpara se sjellja themelore të bëhet e pamundur për t’u fshehur.

Eric Djemba-Djemba

Nofka e Eric Djemba-Djemba te Manchester United ishte ‘Keane i ri’, por karriera e tij në futboll nuk i plotësoi këto pritshmëri. Më vonë ai kaloi nëpër disa klube, përfshirë Aston Villan dhe Burnleyn, dhe u shpall i falimentuar në vitin 2007, vetëm katër vjet pas transferimit të tij te United.

Rasti i tij është një kujtesë se të ardhurat maksimale të një karriere në Ligën Premier mund të jenë të shkurtra. Një pagë e madhe për dy ose tre vjet mund të duket transformuese, por duhet të mbështesë një jetë të tërë pas daljes në pension.

Futbollistët gjithashtu kanë tendencë të fitojnë herët. Një 22-vjeçar me një pagë në Ligën Premier mund të ketë më shumë të ardhura sesa do të marrë ndonjëherë përsëri, por prapëseprapë mund t’i mungojë përvoja financiare, pjekuria ose mbështetja profesionale që kërkon një përgjegjësi e tillë, shkruan Telegrafi.

Kjo mospërputhje krijon rrezik. Një periudhë e shkurtër pasurie mund të krijojë angazhime të përjetshme – shtëpi, makina, staf, mbështetje për të afërmit, arsim privat dhe investime në biznes – bazuar në të ardhura që nuk kanë qenë kurrë të përhershme.

Sinjali – aty ku e vërteta flet para lajmit!

/GazetaSinjali/

The post A e dini se kush janë gjashtë futbollistët e njohur që humbën pasuritë pas daljes në pension? appeared first on Sinjali.

Prokuroria Themelore në Prizren, Departamenti i Krimeve të Rënda, ka ngritur aktakuzë ndaj një personi dhe një kompanie, nën dyshimin për keqpërdorim dhe mashtrim në prokurim publik.

Sipas njoftimit të Prokurorisë, aktakuzë është ngritur ndaj Xh.K., në cilësinë e personit përgjegjës të kompanisë “E.I.” SH.P.K., si dhe ndaj vetë këtij personi juridik, për shkak të dyshimit të bazuar se kanë kryer veprën penale “Keqpërdorimi dhe mashtrimi në prokurim publik”, nga neni 415 i Kodit Penal të Republikës së Kosovës.

Sipas aktakuzës, më 10 dhjetor 2022, në Prizren, Xh.K., si pronar dhe person përgjegjës i kompanisë, dyshohet se me dashje ka shkelur procedurat dhe rregullat e prokurimit publik, si dhe nuk ka zbatuar detyrimet e përcaktuara me kontratën për “Rregullimin e nxemjes qendrore në sallën e baletit në SHM ‘Lorenc Antoni’”.

Prokuroria pretendon se i pandehuri ka përdorur materiale për sistemin e ngrohjes qendrore në kundërshtim me detyrimet e kontratës.

Sipas aktakuzës, në vend të gypave të bakrit të përcaktuar në kontratë, janë vendosur gypa të galvanizuar dhe të çelikut të zi, si dhe material “inox”, të cilët, sipas Prokurorisë, nuk ishin në përputhje me paramasat dhe parallogaritë për kryerjen e punimeve të ngrohjes qendrore, apo me specifikimet për furnizimin dhe montimin e pjesëve dhe pajisjeve të përcaktuara në kontratë.

Prokuroria pretendon se këto veprime janë kryer me qëllim të përfitimit për vete, duke i shkaktuar dëm material Komunës së Prizrenit.

Po ashtu, sipas aktakuzës, edhe personi juridik “E.I.” SH.P.K. dyshohet se ka shkelur rregullat e prokurimit publik dhe nuk ka zbatuar detyrimet e kontratës, me qëllim të përfitimit të dobisë pasurore.

Me rastin e ngritjes së aktakuzës, prokurori i çështjes i ka propozuar gjykatës që, pas mbajtjes së shqyrtimit gjyqësor dhe administrimit e vlerësimit të provave, të pandehurit të shpallen fajtorë dhe të dënohen sipas ligjit.

Sinjali – aty ku e vërteta flet para lajmit!

/GazetaSinjali/

The post Aktakuzë ndaj një kompanie në Prizren, dyshohet për mashtrim në prokurim publik appeared first on Sinjali.

Platforma qytetare “Liria Ka Emër” ka publikuar oraret dhe pikat e nisjes së autobusëve nga qytete të ndryshme të Kosovës për qytetarët që do t’i bashkohen protestës së 1 tetorit në Prishtinë.

Protesta do të mbahet në Sheshin “Skënderbeu” në Prishtinë, duke filluar nga ora 16:00.

Sipas njoftimit të platformës, janë organizuar nisje me autobusë nga komuna dhe vendbanime të ndryshme të Kosovës, me orare të përcaktuara për secilin qytet.

Nisje të organizuara do të ketë nga Prizreni, Suhareka, Vitia, Ferizaj, Podujeva, Kamenica, Vushtrria, Malisheva, Gjakova, Istogu, Kaçaniku, Drenasi, Skenderaj, Klina, Rahoveci, Lipjani, si dhe nga qytete e fshatra të tjera.

Sinjali – aty ku e vërteta flet para lajmit!

/GazetaSinjali/

The post Protesta e 1 tetorit, publikohen oraret e nisjes së autobusëve appeared first on Sinjali.

Presidenti francez Emmanuel Macron bëri thirrje të mërkurën për mbrojtje më të fortë tregtare evropiane dhe investime më të mëdha, duke paralajmëruar se varësia nga Kina dhe lëndët djegëse fosile kërcënon konkurrueshmërinë e kontinentit.

Duke folur në Spanjë, Macron i kërkoi Evropës të nxisë inovacionin, të thjeshtojë rregulloret, të rrisë financimin dhe të mbrojë prodhuesit industrialë nga konkurrenca e padrejtë.

“Kina e ka përmbytur plotësisht tregun evropian. Për dekada të tëra, i thoshim vetes: Shumë mirë, Kina është një treg i madh për ne evropianët. Kemi nevojë për Kinën. Kjo është e vërtetë. Ne transferuam shumë teknologji, shitëm shumë dhe ende e bëjmë deri diku”, tha ai.

Ai akuzoi Kinën për subvencione të mëdha të kompanive dhe për angazhim në damping për të eliminuar konkurrentët.

“Sot, ndërsa flasim, ne evropianët kemi një deficit tregtar me Kinën prej 1 miliard eurosh çdo ditë”, shtoi më tej.

Macron bëri thirrje për hetime më të shpejta të Komisionit Evropian, instrumente më të forta të mbrojtjes tregtare dhe kërkesa që sigurojnë që importet të përmbushin të njëjtat standarde të vendosura ndaj prodhuesve evropianë.

Lidhur me energjinë, ai paralajmëroi se dekarbonizimi nuk i kishte eliminuar dobësitë e Evropës.

“Sot, ne mbetemi shumë të varur nga lëndët djegëse fosile. Mund ta shohim qartë këtë me atë që po ndodh në Ngushticën e Hormuzit, e cila përbën një problem për modelet tona ekonomike. Edhe vendet që kanë bërë përparim të konsiderueshëm në dekarbonizim, si Spanja dhe Franca, secila duke ndjekur rrugën e vet, ende kanë këto varësi”, theksoi Macron.

Ai bëri thirrje për ndërlidhje më të forta të energjisë elektrike dhe investime më të mëdha në inteligjencën artificiale, teknologjinë kuantike dhe mbrojtjen.

“Ne evropianët kemi më shumë kursime sesa amerikanët. Këto kursime shkojnë në bankat dhe kompanitë tona të sigurimeve. Meqenëse vendosëm rregulla jashtëzakonisht kufizuese pas një krize financiare që filloi me pjesëmarrësit amerikanë të tregut, ne i mbirregulluam bankat dhe siguruesit tanë”, vijoi më tej presidenti i Francës, shkruan euronews.al.

Macron kërkoi lehtësimin e rregullave financiare për të kanalizuar kursimet në investime, së bashku me një buxhet më të fortë të BE-së dhe integrim më të thellë të tregut të vetëm.

Sinjali – aty ku e vërteta flet para lajmit!

/GazetaSinjali/

The post Macron i kërkon Evropës të mbrojë industrinë, paralajmëron për varësi në rritje nga Kina appeared first on Sinjali.

Një aksident trafiku ka ndodhur sot rreth orës 13:10 në Ferizaj, ku një veturë ka goditur një 12-vjeçar që ishte duke lëvizur me trotinet.

Si pasojë e aksidentit, fëmija ka pësuar lëndime trupore dhe është dërguar me autoambulancë në Qendrën Emergjente në Ferizaj për trajtim mjekësor.

Lajmin për Sinjalin e ka konfirmuar zëdhënësi i Policisë për Rajonin e Ferizajt, Kanun Veseli.

Njësia e Trafikut ka dalë në vendin e ngjarjes, ndërsa për detaje të tjera pritet të ketë njoftime në vijim.

Sinjali – aty ku e vërteta flet para lajmit!

/GazetaSinjali/

The post Vetura godet 12-vjeçarin me trotinet në Ferizaj, dërgohet në Emergjencë appeared first on Sinjali.

Kryeministri i Kosovës, Albin Kurti, ka deklaruar se Serbia dhe Rusia do të përpiqen ta përdorin kundër Kosovës aktgjykimin e Dhomave të Specializuara ndaj katër ish-krerëve të Ushtrisë Çlirimtare të Kosovës, por sipas tij, një gjë e tillë nuk do të jetë e lehtë.

Kurti këto deklarata i bëri në konferencën për media pas mbledhjes së Qeverisë, ku foli edhe për mënyrën se si, sipas tij, duhet të reagojë Kosova përmes diplomacisë publike.

Ai tha se duhet të ndërmerret një fushatë e përbashkët në këtë drejtim, duke pretenduar se vetë aktgjykimi i Dhomave të Specializuara ka hedhur poshtë pretendimet për të ashtuquajturën “Shtëpia e Verdhë” dhe trafikimin e organeve, si dhe akuzat për krime kundër njerëzimit.

“Duhet ta ndërmarrim një fushatë të përbashkët sa i përket diplomacisë publike sepse natyrisht që do të ketë përpjekje nga Serbia dhe Rusia që aktgjykimi i Dhomave të Specializuara të përdoret kundër Republikës së Kosovës. Ndonëse është e qartë se nuk e kanë kollaj siç kanë menduar për shkak se e para; e ashtuquajtura ‘Shtëpi e Verdhë’ dhe i ashtuaquajturi trafikim i organeve nuk ia arriti as të aktakuza se lëre më te aktgjykimi. Kjo është edhe si rezultat i raportit të Williamsonit ku natyrisht thuhet që s’ka ‘Shtëpi të Verdhë’ e as trafikim të organeve. Çka ka ndodhë në atë aktgjykim në kontrast me raportin Clint Williamsonit është edhe fakti që aktgjykimi ka thënë se nuk ka pasur krime kundër njerëzimit e as dhunë, përndjekje sistematike e të gjerë ndaj popullsisë civile. Pra UÇK-ja ska bërë diçka të tillë”, ka thënë Kurti.

Sinjali – aty ku e vërteta flet para lajmit!

/GazetaSinjali/

The post Kurti: Serbia e Rusia nuk do ta kenë kollaj ta përdorin aktgjykimin e Speciales kundër Kosovës appeared first on Sinjali.

Zgjedhjet parlamentare të 7 qershorit 2026 u zhvilluan në kushte të pabarabarta të garës, ndërsa Qeveria në detyrë, e drejtuar nga Albin Kurti, mori vendime financiare dhe subvencionoi linjat ajrore për diasporën në prag të zgjedhjeve.

Këto janë disa nga shqetësimet e evidentuara nga delegacioni i Asamblesë Parlamentare të Këshillit të Evropës (PACE), në raportin për vëzhgimin e zgjedhjeve të 7 qershorit.

“Një shqetësim kryesor i identifikuar nga delegacioni i PACE-s dhe vëzhguesit vendas ishte mungesa e kushteve të barabarta të garës. Qeveria në detyrë, në prag të zgjedhjeve, mori vendime për të ofruar pagesa financiare njëherëshe për kategori të ndryshme të qytetarëve dhe për të subvencionuar linjat ajrore për diasporën”, thuhet në raport.

Sipas raportit, koha e ndërmarrjes së këtyre masave u perceptua gjerësisht si e synuar për t’i sjellë përfitim partisë në pushtet.

“Koha e ndërmarrjes së këtyre masave u perceptua gjerësisht si e synuar për t’i sjellë përfitim partisë në pushtet. Delegacioni i PACE-s dëgjoi nga disa bashkëbisedues se këto vendime përbënin keqpërdorim të burimeve administrative dhe mjegullonin vijën ndarëse mes politikave publike dhe interesave zgjedhore”.

Një sjellje e tillë, aty theksohet se “u jep përparësi subjekteve në pushtet dhe cenon perceptimin për një konkurrencë të drejtë, edhe kur vendimet mund të kenë një justifikim të argumentueshëm në interesin publik”.

Në raport përmendet si mangësi edhe mungesa e debateve të drejtpërdrejta mes kandidatëve për Kryeministër.

“Kjo e kufizoi mundësinë e votuesve për t’i krahasuar alternativat politike përmes një përballjeje të drejtpërdrejtë dhe e privoi fushatën nga përmbajtja thelbësore demokratike”.

PACE vlerëson gjithashtu se transparenca e financimit të fushatave “mbetet një fushë që kërkon përmirësim të konsiderueshëm”.

“DiA monitoroi shpenzimet e partive politike për reklamat në rrjetet sociale dhe identifikoi shpenzime që tejkalonin 100 mijë euro në platformat e Meta-s vetëm gjatë javës së fundit të fushatës”.

Raporti evidenton edhe një sërë sfidash të tjera që, sipas delegacionit, u shfaqën gjatë procesit zgjedhor.

Në përmbledhjen e tij, PACE thekson: “kushte të pabarabarta në garën zgjedhore, si pasojë e keqpërdorimit të resurseve shtetërore nga Qeveria në detyrë; lodhjen e votuesve dhe rënien e pjesëmarrjes në zgjedhje; një fushatë që nuk pati debat përmbajtjesor mbi politikat dhe përballje të drejtpërdrejta mes kandidatëve kryesorë; kërcënimet në rritje nga dezinformimi i gjeneruar nga inteligjenca artificiale, gjuha e urrejtjes dhe dhuna digjitale; mbrojtjen e pamjaftueshme të kandidateve gra në mjedisin online; si dhe mangësitë e vazhdueshme në qasjen në zgjedhje, masat mbrojtëse për votimin jashtë vendit dhe përfaqësimin etnik në administrimin e zgjedhjeve”.

Sinjali – aty ku e vërteta flet para lajmit!

/GazetaSinjali/

The post Këshilli i Evropës: U keqpërdorën resurset shtetërore në zgjedhjet e 7 qershorit, u shpërndanë para e u subvencionuan fluturimet për diasporën appeared first on Sinjali.

Ish-kryeministri i Kosovës, Ramush Haradinaj, ka ftuar qytetarët që të marrin pjesë nesër në marshin protestues në mbështetje të ish-krerëve të UÇK-së.

Përmes një videoje të publikuar në profilin e tij në Facebook, Haradinaj ka deklaruar se vendimi dënues ndaj udhëheqësve të UÇK-së është i papranueshëm dhe i padrejtë.

Ai u ka bërë thirrje qytetarëve që t’i bashkohen marshit, i cili do të mbahet nesër në orën 16:00 në sheshin e kryeqytetit.

“Ju ftoj që të bashkoheni nesër në ora 16 në sheshin e kryeqytetit, Prishtinë, në mbrojtje të luftës së drejt të UÇK-së. Vendimi dënues për udhëheqësit e UÇK-së është i papranueshëm, është i padrejtë. Jo në emrin tim, jo në emrin e popullit të Kosovës. Duke e mbrojt luftën e drejt çlirimtare, mbrojmë atdheun”, ka thënë Haradinaj.

Sinjali – aty ku e vërteta flet para lajmit!

/GazetaSinjali/

The post Marshi i 1 tetorit, Haradinaj fton qytetarët t’i bashkohen: Duke e mbrojt luftën e drejt çlirimtare, mbrojmë atdheun appeared first on Sinjali.

Pas shumë përpjekjesh, negociatash dhe një pritjeje të gjatë, më në fund është konkretizuar përballja mes boksierit shqiptar Nelson Hysa dhe kampionit të botës në peshat e rënda, Agit Kabayel.

Kabayel do të përballet me Hysën më 28 nëntor, në Düsseldorf të Gjermanisë, në një duel ku pritet të mbrojë titullin e tij WBC në kategorinë e peshave të rënda.

Përballja merr një simbolikë të veçantë për shqiptarët pasi zhvillohet më 28 Nëntor, në Ditën e Flamurit.

Hysa, i cili ka një rekord prej 25 fitoreve në po aq ndeshje, me 23 prej tyre të përfunduara me nokaut, do të kërkojë të ruajë rekordin e tij të pamposhtur dhe të bëjë hapin më të madh të karrierës në arenën ndërkombëtare.

Në anën tjetër, Kabayel hyn në këtë duel me një bilanc prej 27 fitoresh pa asnjë humbje, përfshirë 19 fitore me nokaut. Ai është kampioni i WBC-së në peshat e rënda dhe kjo pritet të jetë mbrojtja e tij e radhës e titullit.

Hysa e kishte sfiduar publikisht Kabayelin pas fitores së tij ndaj Thomas Narmos, ndërsa dy boksierët kanë shkëmbyer deklarata edhe para konfirmimit të përballjes.

Sinjali – aty ku e vërteta flet para lajmit!

/GazetaSinjali/

The post Sfida e madhe më 28 nëntor, Nelson Hysa synon titullin ndaj Agit Kabayel appeared first on Sinjali.

Detaje të reja po dalin nga incidenti në avionin e kompanisë “Flydubai”, i cili të mërkurën në mëngjes devijoi nga rruga Dubai-Tel Aviv dhe u ul në mënyrë emergjente në Arabinë Saudite.

Sipas mediave lokale izraelite, njëri nga pilotët ishte shtetas i Omanit, ndërsa tjetri i Emirateve të Bashkuara Arabe. Raportimet thonë se bashkëpiloti nga Omani dyshohet se ka tentuar të marrë kontrollin e avionit, ndërsa pas uljes në aeroportin e Tabukut ai është marrë në pyetje nga autoritetet.

Megjithatë, këto pretendime ende nuk janë konfirmuar zyrtarisht. Reuters, duke cituar një zyrtar izraelit, raportoi se pilotët ishin përfshirë në një përleshje fizike gjatë fluturimit, ndërsa incidenti nuk besohej të ishte rrëmbim i avionit.

Avioni “Flydubai” kishte aktivizuar sinjale emergjence gjatë fluturimit dhe më pas ndryshoi drejtimin, duke u ulur në Tabuk të Arabisë Saudite. Kompania ajrore konfirmoi se avioni kishte përjetuar një “incident” gjatë rrugës për në Tel Aviv dhe se të gjithë pasagjerët ishin të sigurt.

Autoritetet po zhvillojnë hetime për të përcaktuar saktësisht se çfarë ndodhi në bord dhe çfarë e shkaktoi incidentin.

Sipas raportimeve nga Tel Avivi, po shqyrtohet edhe pista nëse ngjarja mund të ketë pasur motiv terrorist. Këto dyshime vijnë pas alarmit të shkaktuar nga sinjalet e emergjencës dhe devijimit të papritur të avionit.

Sherr mes pilotëve në fluturimin Dubai-Izrael, avioni devijohet drejt Arabisë Saudite

Sinjali – aty ku e vërteta flet para lajmit!

/GazetaSinjali/

The post Përleshja në kabinë, mediat izraelite: Njëri nga pilotët e “FlyDubai” tentoi të rrëzonte avionin appeared first on Sinjali.

Kryeministri i Kosovës, Albin Kurti ka treguar arsyen pse ende nuk është shqyrtuar në Qeveri projektligji për ndryshimin dhe plotësimin e Ligjit për Dhomat e Specializuara.

Kurti ka bërë të ditur se Qeveria është në pritje të mendimit ligjor nga Ministria e Drejtësisë, ndërsa nuk ka treguar nëse Lëvizja Vetëvendosje do ta mbështesë iniciativën ligjore të Partisë Demokratike të Kosovës.

Në një konferencë për media pas mbledhjes së Qeverisë, Kurti ka thënë se iniciativa e PDK-së i është drejtuar Zyrës Ligjore në Kryeministri, e cila më pas ka kërkuar mendim ligjor nga Ministria e Drejtësisë.

“Është një vendim për t’u përshëndetur ai i së hënës, me 99 vota Deklarata për Aktgjykimit ndaj Thaçit e të tjerëve. Aty kemi shprehur shqetësimin tonë të thellë me Aktgjykimin e padrejtë në shkalë të parë. Në Apel duhet të dalim triumfues. Duhet energjitë dhe kokat e fushës së caktuar, sepse kjo është çështje ekspertize, sepse në Apel duhet të kemi korrigjimet e nevojshme. Iniciativa e PDK-së, është çështje e Kuvendit, dhe i është drejtuar zyrës ligjore në KM. Tash zyra ligjore ka kërkuar mendim ligjor në ministrisë së drejtësisë. Kjo është procedura e rregullt. Prej informimeve që i kam deri më tani nga ministrisë përkatëse, brenda kësaj jave do ta kemi përgjigjen e zyrës ligjore të Ministrisë së Drejtësisë edhe vlerësimin financiar të MF-së, dhe mandej menjëherë i japim përgjigje Kuvendit dhe aty vazhdon më tutje procedura”, ka thënë ai.

Tutje, kryeministri u shpreh se asnjëherë nuk ka ndërruar qëndrim për Gjykatën Speciale prandaj edhe thotë se s’ka pritur drejtësi.

“Asnjëherë s’kam pritur drejtësi. Asnjëherë s’e kam ndryshuar këtë qëndrim për gjykatën. Akuza e ndërmarrjes së përbashkët kriminale duhet medoemos të korrigjohet në apel. Ka munguar transparenca, përveç se gjykatë mono-etnike. Dhe e treta janë ato pasaktësitë faktike dhe historike që dëgjuam më 16 shtator. Le të mos harrojmë se atë ditë janë lexuar dhjetëra faqe. Por vendimi i plotë është mijëra faqe”, ka deklaruar Kurti. 

Sinjali – aty ku e vërteta flet para lajmit!

/GazetaSinjali/

The post Kurti për Specialen: Asnjëherë s’kam pritur drejtësi, po presim mendimin ligjor të Ministrisë së Drejtësisë appeared first on Sinjali.

Grupi Parlamentar i Partisë Demokratike të Kosovës (PDK) ka lëshuar mbledhjen e Komisionit për Legjislacion, në shenjë kundërshtimi ndaj mosprocedimit të projektligjit për ndryshimin dhe plotësimin e Ligjit për Dhomat e Specializuara.

Deputetja e PDK-së, Blerta Deliu-Kodra, pas largimit nga mbledhja ka mbajtur një konferencë për media, ku ka deklaruar se partia e saj nuk do të bëhet pengesë për funksionalitetin e institucioneve, por nuk do të marrë pjesë në mbledhjet e komisioneve parlamentare pa u proceduar projektligji për Dhomat e Specializuara.

“Sot si Grup Parlamentar i Partisë Demokratike të Kosovës morëm pjesë në komisionet parlamentare dhe dëshmuam edhe një herë atë që nuk mund të ketë prioritet më të rëndësishëm sot sesa sjellja e ligjit për Dhomat e Specializuara. Pra, si PDK, konsiderojmë se e kemi dëshmuar me veprime se nuk bëhemi pengesë për funksionalitetin e institucioneve të Republikës së Kosovës. Mirëpo, ajo çka është krejtësisht e padrejtë është që të simulojmë normalitet për mbarëvajtje çështjesh të cilat kërkojnë veprim urgjent nga shteti”, ka thënë ajo.

Deliu-Kodra ka theksuar se për PDK-në, projektligji për ndryshimin dhe plotësimin e Ligjit për Dhomat e Specializuara duhet të jetë prioritet jo vetëm i kësaj partie, por edhe i subjekteve të tjera politike.

“Për Partinë Demokratike të Kosovës, projektligji për ndryshimin dhe plotësimin e ligjit për Dhomat e Specializuara, në funksion të mbrojtjes së Ushtrisë Çlirimtare të Kosovës, duhet të jetë prioritet mbi prioritetet. Konsiderojmë që ky duhet të jetë prioritet edhe për të gjitha partitë politike”, ka deklaruar Deliu-Kodra.

Ajo ka kritikuar Qeverinë për mospërfshirjen e këtij projektligji në rendin e ditës, duke theksuar se, pavarësisht vonesave për këtë çështje, në Kuvend janë proceduar një numër i madh projektligjesh me procedura të përshpejtuara.

“Sot në Kuvend, të nderuar përfaqësues të mediave, janë sjellë një numër i madh i projektligjeve me procedura të përshpejtuara, ndërkohë që qeveria i ka diskutuar 45 pika të rendit të ditës. Në Komisionin për Legjislacion, të cilin sapo e lëshuam, duke e thënë qartësisht që nuk do të jemi në komisione pa u sjellë ligji për Dhomat e Specializuara, sot janë sjellë gjashtë projektligje me procedura të përshpejtuara. Dje deputetët i kanë marrë materialet për këto projektligje, ndërkohë pa mbërritur që të diskutohen, të trajtohen, gjashtë projektligje sillen në rend dite në ditën kur nevojë imediate do të duhej të ishte sjellja e ligjit për Dhomat e Specializuara. Pra, projektligji për Dhomat e Specializuara fatkeqësisht vazhdon ende të mbetet në sirtarët e qeverisë”, është shprehur ajo.

Sinjali – aty ku e vërteta flet para lajmit!

/GazetaSinjali/

The post PDK vendos kusht: Nuk marrim pjesë në komisione pa u proceduar ndryshimet në Ligjin për Specialen appeared first on Sinjali.

Pushimet e shkurtra dhe të shpërndara gjatë vitit mund të ndihmojnë në rikuperimin nga stresi i punës dhe në ruajtjen e mirëqenies, sipas një editoriali të publikuar në revistën shkencore “Cureus”.

Artikulli, me titull “Maximizing Recovery: The Superiority of Frequent Vacations for Well-Being and Performance”, është shkruar nga Selvaraj Giridharan dhe Bhuvana Pandiyan, studiues të lidhur me Tawam Hospital në Al Ain të Emirateve të Bashkuara Arabe dhe Herefordshire and Worcestershire Health and Care NHS Trust në Britani.

Autorët argumentojnë se pushimet e shpeshta mund të krijojnë mundësi më të rregullta për rikuperim, në vend që ditët e pushimit të grumbullohen vetëm në një periudhë të gjatë gjatë vitit.

Sipas tyre, një strategji e mundshme për menaxhimin e stresit është planifikimi i pushimeve të shkurtra rreth çdo dy muaj. Po ashtu, theksohet rëndësia e shkëputjes së plotë nga komunikimet dhe detyrat e punës gjatë kohës së pushimit.

Në mbështetje të kësaj qasjeje, autorët referohen edhe te një studim i publikuar në “Journal of Happiness Studies”, i cili ka ndjekur 54 punonjës gjatë dhe pas pushimeve të tyre.

Pushimet në këtë studim zgjatën mesatarisht 23 ditë. Pjesëmarrësit raportuan për gjendjen e tyre para pushimeve, disa herë gjatë tyre dhe në pesë momente pas rikthimit në punë.

Rezultatet treguan se mirëqenia dhe gjendja shëndetësore u përmirësuan shpejt gjatë pushimeve dhe arritën nivelin më të lartë rreth ditës së tetë. Megjithatë, pas rikthimit në punë, efektet pozitive u zbehën shpejt dhe gjendja u kthye në nivelin fillestar brenda javës së parë.

Studimi tregoi gjithashtu se mënyra se si shfrytëzohet koha e pushimit mund të ndikojë në përfitimet e tij. Relaksimi, kënaqësia nga aktivitetet, ndjenja e kontrollit mbi kohën dhe gjumi u shoqëruan me përmirësime më të mëdha në mirëqenie.

Duke u bazuar në këto të dhëna dhe në kërkime të tjera të përfshira në analizën e tyre, autorët e editorialit argumentojnë se rikuperimi i rregullt mund të jetë i rëndësishëm për mirëqenien e punonjësve.

Për këtë arsye, ata sugjerojnë që pushimet të shpërndahen gjatë vitit dhe jo të përqendrohen vetëm në një periudhë të vetme, duke krijuar mundësi më të shpeshta për shkëputje dhe rikuperim nga stresi i punës.

Sinjali – aty ku e vërteta flet para lajmit!

/GazetaSinjali/

The post Studimi: Pushimet e shkurtra çdo dy muaj ndihmojnë në rikuperimin nga stresi i punës appeared first on Sinjali.

Vjeshta 2026 ka mbërritur dhe bashkë me të vijnë edhe tendencat e reja për arredimin e shtëpisë. Në botën e dizajnit të interiereve, disa ngjyra do të jenë veçanërisht të pranishme këtë sezon, duke sjellë më shumë ngrohtësi, dritë dhe intimitet në ambientet e shtëpisë.

Kafe çokollatë, karamel, blu e thellë dhe jeshile pylli janë vetëm disa nga nuancat që do të dominojnë arredimin këtë vjeshtë.

Si t’i sillni ngjyrat e reja të vjeshtës në shtëpi

Për t’iu përshtatur tendencave të vjeshtës 2026, nuk është e nevojshme të ndryshoni tërësisht arredimin. Mjafton të shtoni disa elemente ose aksesorë në ngjyrat e sezonit.

Jastëkë, perde, qilima apo dekorime me motive vjeshtore mund të mjaftojnë për t’i dhënë shtëpisë një pamje krejtësisht të re dhe për ta kthyer atë në një strehë të ngrohtë dhe relaksuese.

Ata që dëshirojnë një ndryshim më të madh mund të zgjedhin letër-muri, kolltuqe apo mobilie në nuancat e sezonit. Në këtë rast, është e rëndësishme që ngjyrat e reja të harmonizohen me elementet më të qëndrueshme të shtëpisë, si dyshemeja, kuzhina dhe dyert, duke shmangur kontrastet e tepruara.

Ngjyrat në trend për vjeshtën 2026

Për një shtëpi moderne këtë vjeshtë, mund të zgjidhni aksesorë dhe mobilie në ngjyrat karakteristike të sezonit. Paleta klasike e vjeshtës, e frymëzuar nga natyra dhe toka, mbetet një zgjedhje e sigurt.

Në fokus janë nuancat e ngrohta dhe mbështjellëse si terrakota, kafe çokollatë, ndryshku, mustarda, bronzi, portokallia e kungullit dhe karameli.

Për ata që preferojnë tone më të çelëta dhe neutrale, mund të zgjidhen kremi natyral, e bardha e shkumës ose druri.

Në trend janë gjithashtu ngjyrat më të thella dhe magnetike, si blu petrol, jeshile ulliri, blu nate dhe jeshile pylli. Këto nuanca janë ideale për t’i dhënë shtëpisë një atmosferë të qetë, por njëkohësisht me karakter.

Kombinimet që ia vlen të provoni

Ajo që bën vërtet diferencën në arredimin e vjeshtës janë kombinimet mes ngjyrave. Pas vitesh ku minimalizmi nordik dhe e bardha e pastër dominuan ambientet, tendencat e reja sjellin më shumë ngrohtësi dhe personalitet.

Kafeja çokollatë kombinohet shumë mirë me nuancat e arta, ndërsa terrakota mund të shkojë me jeshilen e ndezur. Okra përshtatet bukur me jeshilen ulliri ose kremin.

Nga ana tjetër, bluja e pluhurosur dhe bluja e errët mund të kombinohen me tone neutrale, por të ngrohta, si ngjyra pana. Ndërsa jeshilet më intensive harmonizohen në mënyrë natyrale me drurin dhe gurin.

Në këtë mënyrë, edhe pa ndryshime të mëdha, shtëpia mund të marrë menjëherë një pamje më të ngrohtë, elegante dhe tipike për atmosferën e vjeshtës.

Sinjali – aty ku e vërteta flet para lajmit!

/GazetaSinjali/

The post Ngjyrat e vjeshtës pushtojnë shtëpitë, ja cilat janë më trend appeared first on Sinjali.

Raphinha ka lënë grumbullimin e kombëtares së Brazilit dhe është rikthyer menjëherë në Barcelonë pas një shqetësimi të lehtë muskulor.

Sulmuesi i Barcelonës e pësoi problemin gjatë ndeshjes ndaj Australisë të martën. Dëmtimi nuk konsiderohet serioz dhe nuk pritet të jetë afatgjatë.

Megjithatë, për të shmangur çdo rrezik të panevojshëm, Raphinha do të vazhdojë rikuperimin në Barcelonë, ku do t’i nënshtrohet vlerësimeve të mëtejshme.

Sinjali – aty ku e vërteta flet para lajmit!

/GazetaSinjali/

The post Raphinha dëmtohet me Brazilin, largohet nga grumbullimi dhe kthehet në Barcelonë appeared first on Sinjali.