Për të dytën ditë radhazi, komisionet parlamentare janë përfshirë nga debatet pas vendosjes së masës së sigurisë ndaj ish-drejtoreshës së SHISH, Vlora Hyseni. Këtë të premte, debati u zhvendos në Komisionin parlamentar për Kulturën, ku kryetarja e Komisionit, deputetja e Partisë Demokratike Ina Zhupa, akuzoi mazhorancën se në seancën plenare të një dite më parë kishte tentuar të mbronte Hysenin dhe të pengonte debatin parlamentar për çështjen e saj.

Zhupa ngriti gjithashtu akuza për funksionimin e institucioneve shtetërore ndërsa e lidhi situatën edhe me sigurinë kombëtare dhe informacionin sensitiv që Shqipëria shkëmben me partnerët e NATO-s.

“Normalitet këtu nuk ka. Unë respektoj faktin që është një kërkesë e Bashkimit Europian ky ligj, por këtu po digjen themelet e shtetit. Këtu është djegur çdo rregullore, këtu është djegur Kushtetuta. Kur gjithë krerët më të rëndësishëm të institucioneve vihen në shërbim të krimit, çfarë ka këtu gjë tjetër për rendin dhe sigurinë? Të nderuar kolegë, dje asistuam në një seancë të turpshme plenare ku me forcën e kartonit çuat me votën tuaj menjëherë dy projektligje”, tha Zhupa, duke akuzuar mazhorancën se nuk lejoi Parlamentin të diskutonte kërkesën e opozitës për përgjegjësinë dhe dorëheqjen e kryeministrit Edi Rama.

Në kundërpërgjigje, deputeti socialist Erion Malaj tha se qëndrimi i shumicës parlamentare mbetet i pandryshuar dhe se përgjegjësia penale është individuale. Ai deklaroi se drejtësia duhet të vijojë punën e saj dhe se kushdo që provohet i fajshëm duhet të përgjigjet personalisht për veprimet e tij, ndërsa kundërshtoi akuzat se mazhoranca kishte penguar debatin parlamentar.

“Dje, nga ana juaj është kërkuar ndryshimi i rendit të ditës dhe mocion me debat, por mocioni me debat me kryeministrin nuk kalon nga ana e seancës plenare. U mbajtën tre orë dëgjesa për procedurë”, tha Malaj, duke shtuar se rëndësia e çështjeve të ngritura nga opozita nuk justifikon, sipas tij, shkeljen e Rregullores së Kuvendit./MXH

Last Updated on 25/09/2026 by Monika

Federata Shqiptare e Futbollit ka zyrtarizuar kalendarin e plotë të ndeshjeve për javën e gjashtë të Superiores.

Vëmendja kryesore do të jetë te derbi i kryeqytetit Partizani-Tirana, që do të luhet të premten e 9 tetorit në orën 18:30.

Ky duel i shumëpritur midis dy rivalëve do të luhet si zakonisht në stadiumin “Air Albania”. E shtuna e 10 tetorit do të dhurojë dy përballje të tjera interesante që do të luhen paralelisht në orën 18:30.

Vllaznia do të përballet me Dinamon, ndërsa Elbasani do të presë në shtëpi skuadrën e Vorës. Risia e kësaj jave lidhet me sfidën Laçi-Egnatia, e cila do të luhet të dielën më 11 tetor në orën 13:30.

Kjo do të jetë ndeshja e parë për këtë edicion të kampionatit që zhvillohet në këtë fashë orare. Java e gjashtë do të mbyllet mbrëmjen e të dielës me përballjen mes Teutës dhe Skënderbeut në orën 18:30./mxh

Një jackpot prej 223.2 milionë eurosh është kthyer në një betejë ligjore mes një burri nga Lecco dhe ish-bashkëshortes së tij, e cila jeton në Frosinone.

Burri fitoi shumën rekord në SuperEnalotto pasi luajti një kupon me vlerë vetëm 5 euro. Por gëzimi i tij zgjati pak, pasi lajmi për fitimin u përhap te miqtë dhe më pas mbërriti edhe te gruaja.

48-vjeçarja ka vendosur të kërkojë 80 milionë euro, duke argumentuar se martesa e tyre nuk ishte përfunduar ligjërisht. Sipas avokatëve të saj, çifti ishte martuar më 25 prill 2023, në regjimin e bashkësisë ligjore të pasurisë.

Edhe pse burri jeton dhe punon në Lecco, ndërsa gruaja është kthyer te prindërit në Frosinone, ata nuk e kishin përfunduar zyrtarisht procedurën e ndarjes.

“Edhe gjysma është e imja”, ka thënë 48-vjeçarja.

Avokatët e gruas i kanë dërguar fituesit një paralajmërim zyrtar, duke kërkuar që të marrë parasysh të drejtat e saj mbi fitimin. Ajo kërkon ose një pagesë mujore prej 8 mijë eurosh, ose një shumë të vetme prej 80 milionë eurosh.

Avokatët argumentojnë se kërkesa është më e ulët se gjysma e shumës që do të mbetet pas taksave dhe shpenzimeve, shkruan “Corriere Della Sera”.

Në qendër të konfliktit është pikërisht statusi ligjor i çiftit në momentin kur u fituan milionat. Sipas avokatëve të gruas, jurisprudenca italiane parashikon që fitimet nga lotaritë dhe lojërat kombëtare mund të përfshihen në bashkësinë ligjore të pasurisë së bashkëshortëve, edhe kur kuponi është blerë me paratë e vetëm njërit prej tyre.

Ata i referohen edhe praktikës së Gjykatës së Kasacionit italian dhe argumentojnë se ndarja vetëm faktike nuk ka të njëjtin efekt juridik me përfundimin e procedurës ligjore të ndarjes.

Fituesi ka pasur 10 ditë për t’iu përgjigjur kërkesës ligjore, por deri tani nuk ka dhënë një përgjigje, sipas avokatëve të 48-vjeçares.

Ndërkohë, 223.2 milionë eurot ende nuk janë tërhequr. Fituesi ka një afat prej 180 ditësh për të kërkuar shumën, sipas procedurave përkatëse.

Fitimi rekord u regjistrua më 11 shtator, kur kombinimi 8-13-16-52-64-70 solli jackpot-in prej 223.2 milionë eurosh. Kuponi ishte luajtur në një pikë shitjeje në Oggiono, në provincën e Leccos.

Një tjetër rast përfundoi në gjykatë

Kjo nuk është hera e parë që një fitore e madhe në lotari shkakton konflikt mes ish-bashkëshortëve.

Në vitin 2019, një shofer kamioni në Lodi fitoi rreth 220 milionë euro me një kupon prej vetëm 2 eurosh. Ai ndryshoi jetën pas fitores, duke blerë shtëpi dhe makinë të re.

Më vonë u martua sërish, por vdiq në vitin 2025 duke ia lënë pasurinë partneres së re. Pas vdekjes së tij, ish-bashkëshortja u shfaq me një kërkesë për 5 mijë euro në muaj si pagesë mirëmbajtjeje.

Në rastin e tanishëm, fati i 223 milionë eurove do të përcaktohet tashmë jo vetëm nga numrat e lotarisë, por edhe nga gjykata./ad

Last Updated on 25/09/2026 by Monika

Kursi i këmbimit të Euros me Lekun e ka mbyllur javën në rritje. Sipas kursit zyrtar të Bankës së Shqipërisë, Euro u këmbye të premten me 91.97 lekë, duke fituar afërsisht 0.5 lekë krahasuar me të enjten. Ky është niveli më i lartë i kursit të këmbimit Euro-Lek në dy javët e fundit.

Sipas agjentëve të tregut, rritja e forta afatshkurtra të Euros në përgjithësi janë të lidhura me operacione të veçanta të blerjes së valutës në shuma të mëdha.

Rritja në mënyrë të papritur e kërkesës në treg zakonisht shoqërohet me një mbiçmim të shpejtë ditor të Euros.

Ky është një fenoment që është vërejtur disa herë në kursin e këmbimit gjatë viteve të fundit. Megjithatë, zakonisht kjo rritje është afatshkurtër dhe amortizohet nga tregu në harkun e pak ditëve, pikërisht sepse është e lidhur me operacione sporadike të blerjes dhe zakonisht nuk reflekton një kërkesë me bazë të gjerë.

Nga ana tjetër, një korrektim i lehtë në rritje i kursit pas përfundimit të sezonit veror mund të jetë i pritshëm. Kjo ka qenë e zakonshme në vitet e mëparshme, por zakonisht tendenca ka nisur më herët, qysh me kalimin e pikut të sezonit. Këtë vit rënia e Euros ka vijuar e pandërprerë edhe gjatë muajit shtator dhe një korrektim i lehtë nga nivelet minimale historike të shtatorit mund të pritet në vazhdim.

Edhe gjatë vitit 2026 Euro ka vijuar tendencën afatgjatë rënëse në kursin e këmbimit me Lekun, madje me ritme edhe më të shpejta krahasuar me vitin e kaluar. Rënia vjetore e kursit këtë muaj ka arritur pranë nivelit maksimal vjetor prej 6%.

Statistikat e Bankës së Shqipërisë treguan një përmirësim të ndjeshëm të Bilancit të Pagesave edhe në gjysmën e parë të këtij viti. Për 6-mujorin 2026, deficiti i llogarisë korrente pësoi rënie, me një vlerë totale prej 361 milionë eurosh ose 40.6% më pak krahasuar me të njëjtën periudhë të vitit të kaluar. Deficiti i llogarisë korrente për 6-mujorin ka shënuar njëkohësisht nivelin më të ulët që prej vitit 2018. Ulja e deficitit ka ardhur kryesisht nga rritja e eksporteve të shërbimeve dhe nga remitancat.

Efekt shtesë në bilancin e përgjithshëm duket të ketë dhënë edhe rritja e fortë e investimeve të huaja direkte. Të dhënat e Bankës së Shqipërisë tregojnë se për tremujorin e dytë 2026 vlera e investimeve të huaja direkte arriti në 741 milionë euro, në rritje me 86% krahasuar me të njëjtën periudhë të një viti më parë.

Kjo rritje u ndikua ndjeshëm nga flukse të lidhura me një projekt të rëndësishëm zhvillimi në sektorin e pasurive të paluajtshme. Për të gjithë 6-mujorin e parë, vlera e përgjithshme e investimeve të huaja direkte arriti në 1.144 miliardë euro, me një rritje prej 50% krahasuar me të njëjtën periudhë të vitit të kaluar.

Gjithashtu, një efekt shtesë duket se ka ushtruar edhe suficiti i bollshëm fiskal, që ka ulur ofertën e Lekut në treg. Për 8-mujorin 2026, buxheti ishte në suficit në vlerën e 61.6 miliardë lekëve, në rritje me 52% krahasuar me të njëjtën periudhë të një viti më parë./mxh

Last Updated on 25/09/2026 by Monika

Klan News ka siguruar fotot ekskluzive të autorëve të vrasjes së 44-vjeçarit Artan Myrtaj pak ditë më parë në Sarandë.

Ky që shihni në këtë pamje është autori, i cili mban dy armë dhe është i veshur me një xhup në ngjyrë jeshile, pantallona të zeza dhe me skafandër në kokë.

Fotoja është shkëputur nga kamerat e sigurisë. Fillimisht, autori ka qëlluar me pistoletën me silenciator dhe, pasi i është bllokuar, ka qëlluar me pistoletën tjetër që e mban në dorën e djathtë.

Në foton tjetër është drejtuesi i motorit me targa greke, i cili ka ndihmuar autorin për t’u larguar.

Pas ekzekutimit, sipas të dhënave të siguruara nga grupi hetimor, autorët kanë shkuar drejt Konispolit, teksa nuk përjashtohet mundësia që të jenë arratisur ilegalisht drejt Greqisë.

Artan Myrtaj u vra paraditen e së dielës, më 20 shtator, në zonën e njohur si ish-Agjencia, në qytetin e Sarandës, ku, krahas tij, u plagos edhe një 73-vjeçar.

Ekzekutimi i tij dyshohet se lidhet me një sërë ngjarjesh të regjistruara në Sarandë, që zanafillën e kanë në një plagosje të regjistruar në korrik të vitit 2025. Myrtaj rezulton të ketë qenë pjesë e atij konflikti, ndaj dhe hetuesit janë përqendruar te kjo pistë hetimi.

Për zbulimin e autorëve, policia ka pyetur mbi 30 persona, por ende nuk ka rënë në gjurmët e tyre.

Pas ngjarjes, drejtori i Përgjithshëm i Policisë së Shtetit, Skënder Hita, ngriti një grup të posaçëm hetimor për të verifikuar situatën kriminale në qytetin e Sarandës.

Me firmën e kryepolicit, u zëvendësua shefi i Komisariatit, Feliks Hodo, i cili u transferua në Dibër. Ndërsa Komisariati i Policisë së Sarandës do të drejtohet në vijim nga Saimir Shkambaj./mxh

Qeveria amerikane ka kërkuar zyrtarisht të ndërhyjë në çështjen ligjore të Elon Musk dhe platformës X kundër Komisionit Evropian, lidhur me një gjobë prej 120 milionë eurosh.

Departamenti amerikan i Drejtësisë paraqiti kërkesën në Gjykatën e Përgjithshme të Bashkimit Evropian në Luksemburg. SHBA kërkon të marrë pjesë në dy çështje ku X dhe Musk kundërshtojnë vendimin e Komisionit Evropian të 5 dhjetorit 2025.

Uashingtoni argumenton se Komisioni Evropian ka zgjeruar në mënyrë të papërshtatshme kompetencat e tij rregullatore ndaj kompanive amerikane. Sipas Departamentit të Drejtësisë, vendimi mund të ndikojë edhe te kompani të tjera amerikane të teknologjisë që operojnë në Evropë.

Komisioni Evropian e gjobiti X pasi konstatoi shkelje të tre detyrimeve për transparencë sipas Aktit të Shërbimeve Digjitale të BE-së.

Gjykata e Përgjithshme e BE-së pritet të vendosë nëse do ta pranojë kërkesën e SHBA-së për të ndërhyrë në çështje./MXH

Nga Ylli Manjani 

Ka diçka madhështore në mënyrën si ky vend i zgjedh rreziqet kombëtare. Jo lufta. Jo krimi. Jo kufijtë. Jo ekonomia. Jo të dhënat personale që dalin në pazar. Jo institucionet që rrjedhin si sitë.

Jo.

Siguria e kombit nuk ka qenë kurrë kaq e rrezikuar sa sot, kur dolën disa SMS të Gysit me zonjën Vlorë. Alarm maksimal. Gjendje pothuajse lufte. Mblidhni Këshillin e Sigurisë. Ngrini radarët. Njoftoni aleatët. Kombi është nën sulm… sentimental.

Ndërkohë, ky komb paskësh qenë shumë më i sigurt kur i shisnim naftë ushtrisë së Millosheviçit. Ishte i sigurt kur hynim në sherre minoritetesh. Ishte i sigurt kur zgjedhjet fitoheshin me rezultate që edhe matematika refuzonte t’i njihte. Ishte i sigurt kur opozita rrihej se protestonte.

Ishte i sigurt kur u thyen depot e ushtrisë dhe u armatosëm kundër njëri-tjetrit. Kur digjeshin redaksi gazetash. Kur vriteshim “pa dashje”. Kur u çanë kufijtë dhe fundi i Adriatikut u mbush me trupat e bashkëkombasve tanë që iknin nga Shqipëria.

Ishte i sigurt kur ngriheshin barrikada për të hyrë në qytete. Kur vriteshin deputetë. Kur çdo verë lahej ndonjë hesap me plumba. Kur Kosova u pushtua. Kur ekonominë e shkatërronim me dorën tonë. Kur bizneset mbylleshin me urdhër, e privatësia dilte në mejhane, në WhatsApp, në Excel e në televizor.

Kombi ishte super i sigurtë kur shpërtheu Gërdeci.

Asgjë nga këto nuk e tronditi sigurinë kombëtare.

Po ja ku erdhi katastrofa.

Mesazhet e shpirtit të Gysit.

Këtu shteti u kujtua se ka radarë. Madje radarë shumë të ndjeshëm. Kapin puls, emoji, zemra, mall, nostalgji… gjithçka. Për çudi, po këta radarë kanë vite që nuk kapin drogë, korrupsion, rrjedhje informacioni, krim të organizuar apo miliona që avullojnë.

Janë radarë selektivë. Punojnë vetëm në frekuencën e Gysit.

Prandaj urgjent duhet të mblidhet Këshilli i Sigurisë. Të analizojë kërcënimin strategjik që paraqesin allatet e Gysit. Të caktojë nivelin e alarmit sipas lartësisë së tyre nga toka. Sepse ky është standardi i ri i sigurisë kombëtare, dmth jo sa i mbrojtur është shteti, por sa poshtë varen goglat.

Kur vjen puna te to (goglat
pra), siguria fik radarët për gjithçka tjetër dhe ndez sirenat.

Rroftë kombi që ka mbijetuar luftëra, rebelime, varfëri, emigrim, korrupsion e tragjedi, por që sot dridhet nga një SMS.

A të rrufsha pallën e sigurisë, o komb!

Rreth 2.86 milionë automjete Volkswagen dhe Audi në mbarë botën mund të kenë një problem me sistemin e drejtimit, sipas Autoritetit Federal të Transportit Motorik të Gjermanisë (KBA).

Problemi lidhet me një vidë që siguron mekanizmin e drejtimit. Në kushte të caktuara, korrozioni mund të shkaktojë thyerjen e saj dhe, në rastin më të rëndë, humbjen e kontrollit të drejtimit, duke rritur rrezikun e aksidenteve.

Modelet e prekura përfshijnë Audi Q3, si dhe Volkswagen Golf, Tiguan, Touran dhe Caddy. Audi ka nisur një tërheqje paraprake dhe ka njoftuar se riparimi do të kryhet falas dhe mund të zgjasë deri në një orë.

Sipas të dhënave, potencialisht preken rreth 2.16 milionë automjete Volkswagen dhe më shumë se 696 mijë automjete Audi në mbarë botën. KBA e ka çështjen ende “nën hetim”, ndërsa vlerësimi përfundimtar pritet të përcaktojë masat e mëtejshme.

Pronarët që dyshojnë se automjeti i tyre mund të jetë i prekur mund të kontaktojnë një servis të autorizuar duke përdorur numrin e identifikimit të automjetit (VIN)./MXH

Roberto Carlos ka rrëfyer një nga periudhat më të errëta të jetës së tij, duke zbuluar kalvarin me të cilin u përball jashtë fushës së blertë.

Legjenda e krahut të majtë të Real Madridit dhe kombëtares braziliane shpjegoi se, pavarësisht pasurisë marramendëse të vënë gjatë një karriere të lavdishme, në një moment të caktuar e pa veten në prag të kolapsit total financiar.

Siç zbulon vetë ai, kjo krizë erdhi si pasojë e një përplasjeje me një ish-agjent të tij, e gërshetuar me një problem të rëndë familjar (Shënim: në tekstin origjinal termi ishte përkthyer gabim si “ish-trajner”, por deklarata flet qartë për “ish-agjent”). Brenda pak orësh, braziliani u gjend përballë një mali me dokumente dhe detyrime financiare për të cilat nuk kishte pasur asnjë dijeni. Goditja ishte dramatike: ai humbi brenda një dite të vetme rreth 99% të pasurisë së fituar ndër vite në botën e futbollit, duke treguar kështu anën e errët dhe të panjohur të jetës së një kampioni të mësuar gjithmonë me majat.

Me fanellën e Real Madridit fitoi gjithçka, ashtu siç ishte për vite me radhë një shtyllë e padiskutueshme e “Seleçaos”. Megjithatë, lavdia dhe milionat nuk e shpëtuan nga një situatë që ia përmbysi jetën sa hap e mbyll sytë.

Pavarësisht tronditjes së thellë, ish-mbrojtësi pranoi se iu desh të merrte vendime drastike për të rimarrë kontrollin. “Pata një problem serioz me një ish-agjentin tim, shoqëruar me një telash shumë të madh familjar. Të enjten shkova në shtrat në mesnatë, ndërsa të premten në mëngjes u zgjova përballë një pirgu me letra, ekzistencën e të cilave nuk e dija. Aty humba çdo kontroll mbi historinë time, mbi gjithçka që kisha ndërtuar në futboll. Brenda një dite humba 99% të gjithçkaje që kisha fituar. Më pas, fatmirësisht, ia dola të ristrukturoja situatën time financiare dhe atë familjare,” – theksoi braziliani, duke dëshmuar se si arriti të ringrihej pas atij kolapsi shkatërrues./ad

Jemeni i ka kërkuar komunitetit ndërkombëtar më shumë mbështetje për t’u përballur me milicinë Houthi, e cila kontrollon pjesë të vendit.

Zëvendëspresidenti i Këshillit Presidencial të Jemenit, Abdullah Abdulkader Al Alimi-Bawzer tha në Asamblenë e Përgjithshme të OKB-së, se kanë kaluar 12 vjet nga ajo që ai e quajti, grusht shteti i kryer nga milicia terroriste Houthi.

Sipas tij, rebelët Houthi kanë rritur tensionet në rajon dhe kanë kthyer një nga rrugët detare më të rëndësishme të botës, në një mjet presioni në përplasjen mes Iranit dhe komunitetit ndërkombëtar.

Ai tha se mbrojtja e kësaj rruge detare është përgjegjësi e përbashkët e vendeve të rajonit dhe komunitetit ndërkombëtar, pasi Jemeni nuk mund ta përballojë i vetëm këtë detyrë.

Al Alimi-Bawzer kërkoi që vendet e tjera të mos merren vetëm me menaxhimin e krizave, por të krijojnë një bashkëpunim afatgjatë, që të ndihmojë në rritjen e sigurisë, stabilitetit dhe zhvillimit të Jemenit dhe rajonit.

80 vende dënojnë rebelët Houthi

Më herët gjatë ditës, në OKB, 80 shtete dënuan vendimin e milicisë Houthi, e mbështetur nga Irani, për të rifilluar konfliktin në Jemen, si dhe sulmet e saj të vazhdueshme ndaj Arabisë Saudite dhe në Detin e Kuq.

Sipas lajmit, rebelët Houthi kanë marrë së fundmi, kontrollin e bregdetit perëndimor të Jemenit përmes një ofensive të shpejtë.

Kjo u ka dhënë atyre qasje pranë Ngushticës së Bab al-Mandabit, një pikë shumë e rëndësishme në hyrje të Detit të Kuq.

Ndërsa konflikti është përshkallëzuar, Arabia Saudite është sulmuar sërish nga Jemeni, vendi fqinj në jug.

Rëndësia e Bab al-Mandabit është rritur edhe më shumë për shkak të krizës në Ngushticën e Hormuzit, një tjetër rrugë detare shumë e rëndësishme për transportin e naftës dhe mallrave.

Kalimi përmes Ngushticës së Hormuzit është kufizuar ndjeshëm, që nga fillimi i luftës së SHBA-së kundër Iranit, ndërsa Teherani po përpiqet të kontrollojë lëvizjen e anijeve përmes kësaj ngushtice./MXH

Sistemi imunitar zakonisht vepron për të luftuar tumoret, por në rrethana të caktuara mund të kontribuojë edhe në rritjen e tyre.

Një studim i ri ka zbuluar se ekspozimi i zgjatur ndaj interferonit të tipit II mund të ndryshojë funksionimin e qelizave, duke ndihmuar tumoret të shmangin sulmin e sistemit imunitar.

Zbulimi është bërë nga studiues të Institutit Salk, në bashkëpunim me Universitetin e Kalifornisë, San Diego. Gjetjet, të publikuara në revistën “Science”, mund të hapin rrugën për strategji të reja për trajtimin e rezistencës së tumoreve ndaj imunoterapisë.

Kur shfaqet një qelizë tumorale, sistemi imunitar aktivizohet dhe përdor ndër të tjera interferonet, proteina sinjalizuese që nxisin një përgjigje inflamatore dhe rekrutojnë qeliza imune, përfshirë limfocitet T dhe B, për të luftuar tumorin.

Për të kuptuar se si interferonet ndikojnë në funksionimin e qelizave tumorale, studiuesit ekspozuan qelizat e melanomës ndaj interferonit të tipit I dhe tipit II për periudha të shkurtra dhe të gjata.

Eksperimenti tregoi se ekspozimi afatshkurtër nuk shkaktoi ndryshime të rëndësishme në mitokondri, strukturat që prodhojnë energjinë e qelizës. Ndërsa ekspozimi kronik solli ndryshime të matshme në funksionimin e tyre energjetik.

Kur këto qeliza u transferuan te minjtë, ato nxitën rritjen e tumorit.

Sipas studiuesve, mekanizmi lidhet me interferonin e tipit II, i cili shkakton rrjedhjen e materialit gjenetik nga mitokondritë. Qeliza e interpreton këtë material si një element të huaj dhe reagon duke prodhuar interferon të tipit I.

Interferonet e tipit I dhe II veprojnë më pas së bashku për të rritur prodhimin e prostaglandinës E2, një lipid biologjikisht aktiv që ndikon në proceset inflamatore dhe në sjelljen e qelizave.

Studiuesit arritën të bllokonin prodhimin e prostaglandinës E2 në qelizat e melanomës te minjtë. Kjo bëri të mundur rikthimin e aftësisë së sistemit imunitar për të identifikuar dhe luftuar qelizat tumorale.

Eksperimenti tregoi gjithashtu se bllokimi i prostaglandinës E2 mund të kapërcejë rezistencën ndaj imunoterapisë. Në modelin e përdorur nga studiuesit, tumori u eliminua në nëntë nga dhjetë minj.

Sipas autorëve, këto rezultate ofrojnë një shpjegim të mundshëm për mënyrën se si një përgjigje imunitare e zgjatur mund të ndryshojë mjedisin tumoral dhe, në vend që ta frenojë tumorin, të favorizojë mbijetesën dhe rritjen e tij./ad

Nga Lorenc Vangjeli

Ish-shefja e SHISH, Vlora Hyseni, u duk sikur u tradhtua nga nervat kur përmendi dy togfjalësh fatalë: “Agjentë serbë e dhomë hoteli”. Pra, jo vetëm tradhti kombëtare si shërbesë, por edhe seks i ndaluar si shpërblesë. U duk gjithashtu edhe si një mënyrë gazmore e mendjelehtë për të relativizuar raportin e saj të mundshëm me të pandehurin e famshëm të dosjes që e ka mbërthyer brenda saj.

“Më akuzojnë mua, por dhe ju jeni njëlloj!”. E parë kështu, shpjegimi është shumë sipërfaqësor, padyshim naiv dhe shumë banal për t’u gjykuar si shkarje e gojës që shket meqë nuk puth dot më.

Në të kundërt, ajo ishte një fjali krejtësisht e mirëllogaritur. Shantazhi i konsumuar publikisht nuk kishte në shënjestër gazetaren e njohur të kronikës. Reporterja ishte vetëm mikrofoni të cilën zonja Hyseni e përdori për të paralajmëruar luftë, hakmarrje dhe për të kërcënuar “listën e gjatë të armiqve që i kishin bërë gjëmën “çiftit”.

Ishte njëkohësisht edhe një ofertë e dëshpëruar për të shpëtuar çfarë mundet nga gërmadha penale e morale që i është shembur mbi kokë: Më mbani mbi gropë, ndryshe humnera ju pret edhe juve!

Rrënimi i frikshëm i zonjës Hyseni në vetëm 48 orë dramatike dhe ekspozimi i mesazheve personale të saj me zotin Agasi, është vetëm një episod kulmor dhe i pabesueshëm në një botë të çmendur shqiptare ku të gjithë kanë sekretet e tyre: jo vetëm komunikim me kontakte minimalisht të papërshtatshëm, por edhe mëkate penale, pisllëqe njerëzore apo edhe dobësi porno-erotike. Zonja e sekreteve paralajmëroi si paradhënie pikërisht këto thembra Akili, ku shumëkush në Tiranë çalon rëndë. Paralajmëroi dalje në dritë të këtyre “sekreteve” publike, që i dinë të gjithë.

Një drejtues disavjeçar shërbimi padyshim që ka pushtetin e informacionit. Është gjithashtu edhe dëshmitar i dobësive të njerëzve të pushtetshëm në Tiranë. Kur edhe një amator në këtë punë si Agasi, ka tmerruar dynjanë me serinë e regjistrimeve të fshehta që u kishte bërë “mysafirëve” në zyrën e tij e gjetkë, është e lehtë të imagjinohet se çfarë mund të ketë pasur në kasafortë zonja Hyseni që kishte një ushtri shtetërore informatorësh në dispozicion.

Në zyrën e zotit Agasi në ish-Bllok, në vilën në një resort në periferi të Tiranës apo dhe në një zonë rezidenciale në plazhin e Durrësit, ka parakaluar një armatë e palavdishme shqiptarësh të pushtetshëm. Mes tyre edhe ministra, deputetë të shumtë të majtë e ca më pak edhe të djathtë, gjyqtarë e prokurorë, drejtues të lartë të policisë, njerëz të rëndësishëm të medias, biznesmenë shumë të njohur që mund të kenë pasur nevojë për forcën e armëve e të tjerë që nëpërmjet armëve si zanat, ishin shndërruar në biznesmenë.

Kontaktet me Agasin në atë kohë ishin një aset, një mundësi për karrierë në pushtet e biznes, një shans për të zgjidhur probleme, për të qenë pjesë aleancash fluide e për të ndryshuar raporte forcash. Madje edhe brenda partisë që qeveris vendin e kryesisht brenda saj. “Çifti” që shkëmbente pasion, përkushtim e interesa okulte, padyshim që ka shkëmbyer edhe informacione të tilla.

Sikur edhe kaq të kishte në dispozicion zonja Hyseni, subjektet e këtyre përgjimeve kanë të drejtën e Zotit t’u prishet gjumi për shumë kohë. Dhe meqë ish-shefja e shërbimit përmendi dhomat në hotele, pa gjumë do të mbeten edhe ata që kanë gdhirë net të bardha, po shumë të bardha, në periferi të Tiranës, në vila luksi të harbuar e në shoqërinë e një listë mbresëlënëse me eskorta shëtitëse VIP. Të cilat prej kohësh, një pjesë të mikpritësve të tyre, i kanë shndërruar në barcoleta pa shumë kripë me dashnorët e rinj.

Fatmirësisht dy prokurorët e dosjes, Altin Dumani dhe Bledar Maksuti, dhe së paku një numër mbresëlënës agjentësh të BKH-së, nuk janë në këtë listë. Dhe së paku deri më tani, si përfaqësues të akuzës publike, i kanë të dyshuarit e tyre me hakmarrjen e shtetit në gjykatë.

Ndaj fjalia arrogante dhe brutale që zonja Hyseni derdhi mbi gazetaren Lala, në fakt është një breshëri mitralozi e shkrehur në ajër pikërisht mbi kokat e kësaj turme laramane individësh. Të cilët i bashkon pushteti, paraja, vaniteti, krimi dhe përshtatja me rregullat e liga të stabilizuara për të pasur sukses. Tani e më tej, ata i bën njësh edhe frika nga e nesërmja e panjohur.

Ish-shefja e SHISH nuk hapi kutinë e Pandorës. Ajo dëshmoi se ka password-in e saj. Paralajmëroi se së paku mund të prishë gazin e atyre që kanë nisur festën për rrënimin e saj. Madje edhe shumë më shumë se kaq, zonja Hyseni duket se paralajmëron edhe hakmarrjen e të mbyturit që mbyt. Njëlloj siç premtonte në mesazhet e saj plot përkushtim: “Na kanë bërë shumë gjëra, o shpirt! Dua që ata të paguajnë!”./k.m

Ndërhyrja e menjëhershme e Policisë ka parandaluar një konflikt mes dhjetëra të miturve në zonën e Yzberishtit në Tiranë.

Ngjarja pritej të ndodhte në rrugën “Besim Alla”, ku shërbimet e Komisariatit të Policisë Nr. 6 ndërhynë menjëherë pas marrjes së informacionit për një përplasje të mundshme mes të rinjve.

Gjatë ndërhyrjes, efektivët kanë konstatuar disa të mitur që kishin me vete shkopinj bejsbolli, të cilët dyshohet se do të përdoreshin gjatë konfliktit. Në vijim, policia ka identifikuar dhe shoqëruar edhe të miturit e tjerë që pritej të përfshiheshin në përplasje.

Në përfundim të veprimeve hetimore, materialet janë referuar në Prokurori, ku ka nisur procedimi penal në gjendje të lirë për 23 të mitur, të moshave 13 deri në 17 vjeç.

Gjatë operacionit janë sekuestruar edhe dy shkopinj bejsbolli.

Veprimet procedurale ndaj të miturve janë kryer në prani të prindërve dhe psikologut.

Policia e Tiranës apelon për bashkëpunimin e prindërve, mësuesve dhe familjarëve për të evidentuar në kohë konfliktet mes të rinjve, përfshirë edhe sinjalet që shfaqen në rrjetet sociale dhe hapësirën dixhitale.

Sipas Policisë së Shtetit, parandalimi i konflikteve mes të miturve dhe të rinjve mbetet një prej prioriteteve, pasi përplasjet që nisin për motive të dobëta mund të përshkallëzohen në ngjarje më të rënda./k.m

Drejtori ekzekutiv i YouTube, Neil Mohan, ka hedhur poshtë mundësinë që platforma t’i bashkohet marrëveshjes shumë-miliardëshe të Meta-s për sigurinë e fëmijëve në internet, duke argumentuar se kompania ka tashmë mekanizma të dedikuar për mbrojtjen e përdoruesve të rinj.

Në një intervistë për CNN, Mohan tha se YouTube ka investuar prej kohësh në masat për sigurinë e të rinjve dhe se kompania do të vijojë të fokusohet në këtë fushë.

“Ne kemi investuar në sigurimin që të rinjtë të jenë të sigurt në platformën tonë për një kohë shumë të gjatë”, tha Mohan. “Ajo që duhet të prisni nga YouTube është që ne do të vazhdojmë të përqendrohemi në këto çështje.”

Meta ka rënë dakord për një marrëveshje prej 18 miliardë dollarësh për të zgjidhur pretendimet e ngritura nga disa shtete amerikane, sipas të cilave platformat e saj ishin projektuar në mënyrë të tillë që krijonin varësi dhe kontribuan në një krizë të shëndetit mendor tek të rinjtë.

Kompania ka kërkuar që edhe platformat rivale, përfshirë YouTube dhe TikTok, të miratojnë masa të ngjashme për sigurinë e fëmijëve. Ndër masat e parashikuara janë kufizimet e kohës së përdorimit, heqja e funksionit “pëlqej” për përdoruesit adoleshentë dhe mbikëqyrja nga palë të treta e praktikave të sigurisë.

Mohan i bëri komentet gjatë konferencës vjetore të YouTube, “Made on YouTube”, ku kompania prezantoi edhe veçori të reja për krijuesit dhe shikuesit, përfshirë mjete të inteligjencës artificiale dhe funksione të reja të mesazheve.

Sipas marrëveshjes së Meta-s, kompania do të paguante vetëm 70% të shumës së përcaktuar nëse TikTok dhe YouTube nuk do të pranonin të paguanin rreth 6 miliardë dollarë secila dhe të zbatonin ndryshime të ngjashme. Prokurori i Përgjithshëm i Kalifornisë, Rob Bonta, ka deklaruar se shtetet ishin të gatshme të ndërmerrnin veprime ligjore ndaj TikTok dhe YouTube nëse kjo do të ishte e nevojshme për të arritur marrëveshjen.

Megjithatë, drejtuesi i YouTube mbrojti masat që kompania ka ndërmarrë tashmë. Ai përmendi mundësinë që prindërit të kufizojnë kohën që adoleshentët kalojnë duke parë videot Shorts, si dhe bashkëpunimin me ekspertë të pavarur që japin këshilla mbi praktikat e sigurisë së fëmijëve.

“Ne jemi gjithashtu një platformë shumë e ndryshme nga Meta”, tha Mohan, duke theksuar se YouTube është gjithnjë e më shumë i orientuar drejt shikimit të përmbajtjeve në televizorët në shtëpi.

TikTok, ndërkohë, nuk ka komentuar ende mbi thirrjet për t’iu bashkuar marrëveshjes së Meta-s. Edhe zyra e prokurorit të përgjithshëm të Kalifornisë nuk ka reaguar menjëherë ndaj deklaratave të Mohan.

YouTube dhe Meta përballen gjithashtu me një tjetër çështje gjyqësore. Në mars, të dyja kompanitë u shpallën përgjegjëse në një proces që përfshinte një grua të re, e cila pretendonte se platformat ishin projektuar në mënyrë të tillë që shkaktonin varësi dhe dëmtonin shëndetin mendor. Të dyja kompanitë kanë deklaruar se do ta apelojnë vendimin.

YouTube ka arritur gjithashtu një marrëveshje me një tjetër adoleshent që ngriti një padi të ngjashme në fillim të këtij viti, ndërsa marrëveshje të tilla kanë arritur edhe TikTok dhe Snap.

Megjithatë, të katër kompanitë vazhdojnë të përballen me qindra padi nga individë, familje dhe distrikte shkollore, të cilët pretendojnë se platformat e tyre kanë shkaktuar dëme tek përdoruesit e rinj./ad

Ligjvënës amerikanë dhe ekspertë të sigurisë kombëtare po i bëjnë presion presidentit Donald Trump që të ndërmarrë masa ndaj kompanive dhe entiteteve kineze të akuzuara se po mbështesin Iranin me imazhe satelitore, komponentë për armë dhe të ardhura nga nafta.

Thirrjet u intensifikuan teksa udhëheqësi kinez, Xi Jinping, vizitoi Shtëpinë e Bardhë më 24 shtator për një takim shumë të rëndësishëm me Trumpin, që u pasua nga një darkë shtetërore madhështore që nënvizoi balancimin e kujdesshëm mes dy ekonomive më të mëdha në botë.

Senatori republikan Roger Wicker tha se raportimet për furnizimin e Iranit me inteligjencë satelitore nga Kina, e cila dyshohet se është përdorur në sulme ndaj forcave amerikane, duhet të trajtohen nga presidenti.

Ndërkohë, senatorja demokrate Jeanne Shaheen dhe 18 senatorë të tjerë kërkuan masa ndaj tri fushave të mbështetjes së pretenduar kineze: inteligjencës satelitore, komponentëve për raketa dhe dronë iranianë, si dhe blerjes së naftës iraniane që është nën sanksione.

Kina është blerësi kryesor i naftës iraniane dhe ka lidhje të rëndësishme ekonomike me Teheranin. Ekspertët amerikanë argumentojnë se Uashingtoni duhet të vendosë përgjegjësi ndaj kompanive, bankave dhe individëve kinezë nëse vërtetohet se kanë ndihmuar Iranin.

Sipas agjencisë kineze Xinhua, gjatë takimit Xi bëri thirrje që Irani dhe SHBA-ja t’i zgjidhin mosmarrëveshjet përmes dialogut./ad

Pas njoftimit për mbledhjen e Këshillit të Sigurisë Kombëtare të hënën nxitur nga situata e krijuar pas arrestimit të ish shefes së SHISH, Vlora Hyseni, kreu i grupit parlamentar të Partisë Demokratike Gazment Bardhi ka intensifikuar akuzat ndaj presidentit Bajram Begaj duke i kërkuar atij të ‘lërë spektaklin institucional’ dhe të japë përgjigje për skandalin që ka cënuar sigurinë kombëtare.

Në argumentat e tij, Bardhi thotë se mbledhja e së hënës nuk mund të përdoret si zëvendësim për llogaridhënie dhe se si presidenti Begaj ashtu edhe kryeministri Rama  duhet të përgjigjen për emërimin e Hysenit në krye të SHISH.

Postimi i plotë i Gazment Bardhit

“NUK KA NEVOJË PËR SPEKTAKËL INSTITUCIONAL. SHQIPËRIA KA NEVOJË PËR PËRGJIGJE.

Pas zhvillimeve të rënda në Shërbimin Informativ të Shtetit dhe situatës së krijuar pas vendosjes së drejtores së këtij institucioni nën masën e arrestit, Presidenti i Republikës, Bajram Begaj, pritet të mbledhë Këshillin e Sigurimit Kombëtar javën e ardhshme. Por shqiptarët nuk kanë nevojë për një mbledhje formale dhe as për një shfaqje institucionale. Ata nuk kanë nevojë që të mblidhet Këshilli i Sigurimit të Gysit. Qytetarët kanë nevojë për përgjigje konkrete.

Pyetja e parë dhe më e rëndësishme që i drejtohet Bajram Begajt është e thjeshtë:

MBI ÇFARË VERIFIKIMESH U MBËSHTET VENDIMI PËR DEKRETIMIN E VLORA HYSENIT NË KRYE TË SHISH?

Bajram Begaj duhet t’u shpjegojë shqiptarëve, në mënyrë të plotë dhe transparente, se çfarë informacioni, verifikimesh dhe procedurash janë ndjekur përpara emërimit të saj në krye të një prej institucioneve më të rëndësishme të sigurisë kombëtare. Opozita kishte ngritur publikisht pikëpyetje dhe shqetësime lidhur me këtë emërim. Sot, pas zhvillimeve të fundit, këto pikëpyetje kërkojnë përgjigje të menjëhershme institucionale.

ÇFARË VERIFIKOI PRESIDENTI DHE ÇFARË NUK VERIFIKOI INSTITUCIONI I PRESIDENTIT PËRPARA DEKRETIMIT?

Kjo është një pyetje që nuk mund të anashkalohet. Po aq serioze janë pyetjet që lidhen me sigurinë e informacionit të klasifikuar, burimeve njerëzore dhe informacionit sensitiv që administron SHISH. Nëse ekziston apo ka ekzistuar një rrezik që informacionet e këtij institucioni, identitetet e burimeve apo të informatorëve të jenë ekspozuar ndaj strukturave kriminale ose shërbimeve të vendeve jo mike, atëherë kemi përpara një çështje me pasoja potencialisht shumë të rënda për sigurinë kombëtare.

Por përgjegjësia e Presidentit nuk fillon sot.

Gjatë këtyre dy viteve janë ngritur publikisht pretendime dhe shqetësime serioze për mënyrën se si ka funksionuar SHISH dhe për marrëdhënie të pretenduara ndërmjet individëve të caktuar dhe strukturave të krimit të organizuar. Bajram Begaj duhet të sqarojë nëse këto shqetësime janë verifikuar ndonjëherë nga institucionet përgjegjëse dhe, nëse po, cilat kanë qenë përfundimet e këtyre verifikimeve.

Nuk i kërkojmë Presidentit të ndërhyjë në hetimet e SPAK-ut apo në vendimmarrjen e gjykatave. I kërkojmë të japë llogari për përgjegjësitë e veta institucionale.

EDHE ÇËSHTJA E BLLOKIMIT TË BETIMIT TË ANËTARIT TË GJYKATËS KUSHTETUESE PËR LLOGARI TË ERGYS AGASIT KËRKON TRANSPARENCË.

Bajram Begaj duhet të shpjegojë publikisht arsyet dhe bazën institucionale të vonesës së betimit për më shumë se 47 ditë të z. Asim Vokshi dhe të sqarojë nëse kjo vonesë ka qenë pjesë e një procedure normale institucionale apo nëse ka pasur rrethana të tjera që duhet t’u bëhen të ditura qytetarëve.

Pretendimet për ndërhyrje të grupeve kriminale apo ndikim të paligjshëm në përbërjen e Gjykatës Kushtetuese janë tepër serioze për t’u lënë në nivelin e deklaratave politike. Ato kërkojnë transparencë dhe verifikim nga organet kompetente.

Prandaj, Këshilli i Sigurimit Kombëtar nuk mund të përdoret si zëvendësim për llogaridhënien. Presidenti, njëlloj si Kryeministri, duhet të përgjigjet për vendimmarrjen e tij. Duhet të shpjegojë çfarë verifikoi, çfarë dinte, çfarë nuk dinte dhe çfarë masash janë marrë për mbrojtjen e sigurisë kombëtare.

Shqiptarët nuk kanë nevojë për një President që shfaqet vetëm pasi kriza ka shpërthyer. Shqiptarët kanë nevojë për një President që merr përgjegjësi, jep llogari dhe garanton se institucionet e sigurisë së Republikës nuk përdoren për interesa politike apo kriminale. Prandaj, përpara çdo mbledhjeje formale të Këshillit të Sigurimit Kombëtar, Bajram Begaj duhet t’u japë shqiptarëve transparencën që meritojnë.

Jo propagandë. Jo formalitet. Jo heshtje. Përgjegjësi dhe transparencë” /k.m

Platforma e udhëtimeve Lonely Planet ka publikuar listën e saj “Best in Travel” për vitin 2027 dhe në të janë përfshirë dhjetë vende dhe përvoja në Europë.

Lista, e publikuar çdo vit përpara sezonit të rezervimeve për pushime, ndahet në dy pjesë: 25 vendet më të mira për t’u vizituar dhe 25 përvojat më të mira për t’u rezervuar.

Zelandë e Re

Destinacionet e përzgjedhura këtë vit shkojnë nga Dunedini dhe Waitaki, një prej zonave më interesante dhe të pazakonta të Zelandës së Re, te Fulidhoo në Maldive, një alternativë me kosto më të përballueshme ndaj ishujve të njohur me resorte luksi.

Sa u përket përvojave, Lonely Planet rekomandon të shijoni verën dhe gastronominë në Valle de Guadalupe të Meksikës, përpara se zona të bëhet gjerësisht e njohur, si dhe të udhëtoni me hekurudhën Darjeeling Himalayan Railway në Indi.

Meksikë

Për ata që kërkojnë diçka më pranë, më poshtë do të gjeni të gjitha vendet dhe përvojat europiane të përzgjedhura për vitin 2027.

Vendet më të mira në Europë sipas Lonely Planet për vitin 2027

Kur flitet për rajonin Veneto të Italisë, Venecia mbizotëron në bisedë, ndërsa vizitorët dynden në qytetin e përshkuar nga kanalet për udhëtime romantike.

Lista Best in Travel e Lonely Planet i nxit turistët të eksplorojnë edhe pjesën tjetër të rajonit, nga Dolomitet dhe Liqeni i Gardës te qytete të tjera si Verona dhe Padova.

Verona

Një tjetër mundësi në Europën Jugore është Šibeniku në Kroaci, një nga qytetet më të vjetra të vendit. Sipas Lonely Planet, ai ka arkitekturë mbresëlënëse, pasuri gastronomike dhe një kalendar plot ngjyra festivalesh gjatë gjithë vitit.

Ashtu si Venecia, Spanja është përmendur shpesh në lajme këtë vit për shkak të turizmit masiv.

Megjithatë, kjo nuk do të thotë se nuk mund ta vizitoni vendin në mënyrë të përgjegjshme. Mjafton të zgjidhni një destinacion që dëshiron të presë më shumë turistë.

I tillë është Leóni në veri të Spanjës, një qytet mesjetar në rrugën franceze të pelegrinazhit Camino de Santiago. Ai tërheq vizitorë që duan të shohin arkitekturën e tij të bukur gotike dhe Casa Botines të Antoni Gaudí.

Është folur shumë për popullaritetin në rritje të pushimeve në vende me klimë më të freskët. Për vitin 2027, zgjedhja më e freskët është Skanör-Falsterbo, dy qytete fqinje në provincën Skåne të Suedisë.

Suedi

Zona njihet si Riviera Suedeze. Vizitorët mund të shijojnë peizazhin bregdetar dhe të eksplorojnë rezervatet natyrore.

Së fundi, Lonely Planet ka vënë në qendër të vëmendjes edhe Dessau-n në Gjermani, një qytet «i lidhur ngushtë me lëvizjen Bauhaus», i cili, pavarësisht përmasave të vogla, ofron shumë nga ana kulturore.

Përvojat më të mira në Europë për t’u rezervuar vitin e ardhshëm

Për ata që pëlqejnë ecjen, St Cuthbert’s Way, nga kufijtë skocezë deri në Northumberland, është një itinerar historik pelegrinazhi prej 100 kilometrash që ia vlen të përshkohet vitin e ardhshëm.

Nëse preferoni udhëtimet me makinë në vend të ecjeve të gjata, një tjetër përvojë e rekomanduar për vitin 2027 është përshkimi i Route Napoléon në Francë.

Vitin e ardhshëm, rruga, e cila kalon nëpër vende si Grasse, Castellane dhe Sisteron, do të festojë 95-vjetorin e saj.

Nëse parapëlqeni detin, Lonely Planet sugjeron lundrimin mes Ishujve Eolianë të Italisë, ku ju presin brigje shkëmbore, ujëra të kristalta dhe mënyra autentike italiane e jetesës.

Një tjetër mundësi është zhytja në Detin Egje të Greqisë për të zbuluar histori detare shumëshekullore.

Irlandë

Rruga bregdetare Wild Atlantic Way e Irlandës shtrihet në 2.600 kilometra. Por, për një udhëtim më të shkurtër drejt një vendi që, sipas Lonely Planet, është një pretendent i fortë për vendin më mahnitës në Irlandë, duhet të shkoni në fjordin Killary, në kontenë Galway. / Euronews-ad

Deputeti i PD Saimir Korreshi ka denoncuar situatën problematike në Krutje. Korreshi ka ndarë video nga Facebook ku shihen pamje të mbetjeve të cilave u është vënë flaka.

Një situatë ulëritëse, një katastrofë mjedisore e ka cilësuar deputeti Korreshi, ndërsa i revoltuar është shprehur kritik edhe ndaj Bashkisë, ndërsa dëgjohet duke thënë “po digjen helme o kafshë”.

“Çfarë është kjo? Fusha e Plehrave në Krutje. Ditë e premte, ora 11:00 ; se do të bjerë shi dhe oburra ti vëmë zjarrin. Bashkia hajde me mua, shiko këtu. Mirë që po bie shi se u mbyt. Çfarë është kjo kafshëri. Është mbytur zona po helmohen njerëzit”, ka thënë ai./k.m

Austria ia doli në shtesë të fitonte me rezultatin 3-1 kundër Izraelit në Ligën e Kombeve, në të njëjtin grup ku është edhe Kosova, por rezultati mund të kishte qenë ndryshe nëse sjellja e sulmuesit Sayed Abu Farkhi nuk do të ishte konsideruar e parregullt nga gjyqtari.

Në minutën e 55-të, talenti izraelit shënoi, duke barazuar përkohësisht shifrat në 1-1, ndërsa gjatë festimit ai mori flamurin e goditjes së këndit, duke imituar shkrepjen e një arme. Mirëpo në kushtet ku ndodhet Izraeli ky gjest u vlerësua me të verdhë nga arbitri.

Për shkak se edhe një të verdhë e kishte më herët Sayed Abu Farkhi u largua me të kuq nga fusha, duke lënë Izraelin me 10 lojtarë në fushë. Me tej Austria realizoi dy herë dhe fitoi me rezultatin 3-1./k.m

Kombëtarja vijon me përgatitjet për ndeshjen e nesërme, teksa dëmtimet dhe problemet fizike kanë shqetësuar vazhdimisht trajnerin Maran.

Pas disa largimeve dhe ardhjes së lojtarëve nga lista e pritjes, Asllani dhe Cake kanë shfaqur probleme dhe po mbajnë pezull planet e stafit teknik.

Burime pranë Kombëtares bëjnë me dije për Top Channel se Asllani nuk ka problem serioz dhe ka pasur vetëm nevojë për pushim.

Pas testeve ka rezultuar se mesfushori i Al Jazira ka vetëm një lodhje muskulare dhe gjatë grumbullimit është marrë me palestër dhe fizioterapi. Në dilemë mbetet aktivizimi në ndeshjen e nesërme me Bjellorusinë.

Sakaq, Cake e ka humbur mundësinë për tu aktivizuar në këto ndeshje të Ligës së Kombeve, por Maran ka zgjedhur të mos marrë lojtarë zëvendësues.

Sot në orën 15:00 trajneri Maran do të mbajë konferencën për shtyp përpara ndeshjes me Bjellorusinë, teksa një orë më pas në stadiumin “Air Albania” do të mbahet stërvitja e fundit./ad