Last Updated on 26/09/2026 by EL

Të paktën 11 persona kanë humbur jetën dhe rreth 30 të tjerë janë plagosur nga një sulm vetëvrasës me bombë në veriperëndim të Pakistanit.

Sulmi ndodhi të shtunën në distriktin Dera Ismail Khan, në provincën Khyber Pakhtunkhwa. Sipas autoriteteve lokale, autori i sulmit shpërtheu një automjet të ngarkuar me eksplozivë pranë një pike kontrolli të policisë në anë të rrugës.

Bilal Faizi, zëdhënës i shërbimit provincial të emergjencave, konfirmoi se shpërthimi shkaktoi viktima dhe dhjetëra të plagosur. Të plagosurit janë transportuar për trajtim në institucionet shëndetësore të zonës.

Përgjegjësinë për sulmin e ka marrë Tehrik- i- Taliban Pakistan(TTP), i njohur edhe si Talibanët pakistanezë.

TTP është një organizatë militante e krijuar në vitin 2007 dhe e lidhur me Talibanët afganë. Grupi ka marrë përgjegjësinë për një numër të madh sulmesh në Pakistan, ndërsa autoritetet pakistaneze e konsiderojnë një nga kërcënimet kryesore militante ndaj vendit.

Sulmet e grupeve militante janë shtuar ndjeshëm në Pakistan gjatë viteve të fundit, veçanërisht në zonat pranë kufirit me Afganistanin. Objektivat kanë qenë kryesisht forcat e sigurisë, por edhe civilë dhe figura politike.

Sipas organizatave që monitorojnë ekstremizmin TTP-të përbëhet nga një rrjet grupesh militante tribale dhe jo-tribale që synojnë të luftojnë kundër shtetit pakistanez.

Autoritetet vijojnë hetimet për sulmin, ndërsa numri i viktimave dhe të plagosurve mund të ndryshojë.

Last Updated on 26/09/2026 by EL

Europa vijon të mbështetet fuqishëm te Kina për përpunimin e litiumit, një prej lëndëve të para më të rëndësishme për bateritë e automjeteve elektrike dhe sistemet e magazinimit të energjisë. Një kompani gjermane e riciklimit po përpiqet të ndryshojë këtë varësi, duke zhvilluar një teknologji që nxjerr litiumin nga bateritë e përdorura pa përdorur kimikate agresive.

Në fabrikën e saj në Krefeld, kompania familjare Accurec Recycling GmbH përpunon bateri të përdorura dhe rikuperon prej tyre litium, duke synuar krijimin e një zinxhiri europian ku lëndët e para të nxjerra nga bateritë e vjetra të rikthehen në prodhimin e baterive të reja.

E themeluar në vitin 1995, Accurec është specializuar prej më shumë se tri dekadash në riciklimin e baterive. Fillimisht kompania u përqendrua te bateritë me nikel-kadmium dhe nikel-metal-hidrid, ndërsa gjatë 15 viteve të fundit ka investuar gjithnjë e më shumë në teknologjinë e baterive litium-jon, të përdorura sot në telefonë, pajisje elektrike dhe automjete.

Në fabrikën e Krefeldit kompania përpunon aktualisht rreth 5 mijë tonë bateri në vit. Impianti i ri, i vënë në funksion në dhjetor 2025, arrin fillimisht të rikuperojë rreth 50% të litiumit që përmbajnë bateritë, duke përmbushur objektivin europian të rikuperimit për vitin 2027.

Por synimi është shumë më i lartë. Accurec po investon 5.5 milionë euro për të dyfishuar hapësirën e fabrikës dhe për të rritur kapacitetin vjetor deri në 20 mijë tonë bateri të përdorura. Kompania synon që në tremujorin e parë të vitit 2027 të arrijë një nivel rikuperimi prej 80% ose më shumë.

Kina përpunon deri në 70% të litiumit për bateritë europiane

Litiumi është një komponent thelbësor i baterive të rikarikueshme dhe për këtë arsye luan një rol kyç në tranzicionin drejt energjisë elektrike. Megjithatë, Europa mbetet shumë e varur nga Kina për përpunimin e këtij materiali.

Sipas drejtuesit të zhvillimit të Accurec, Simon Bremer, rreth 65–70% e kimikateve të litiumit të cilësisë së përshtatshme për bateri që përdoren në Europë vijnë aktualisht nga prodhimi kinez. Kjo varësi shihet si një dobësi strategjike për industrinë europiane, veçanërisht pasi Kina ka kufizuar në të kaluarën furnizimet me materiale të rëndësishme strategjike, përfshirë tokat e rralla dhe germaniumin.

Accurec nuk pretendon se teknologjia e saj mund ta zgjidhë e vetme problemin e Europës me lëndët e para, por e konsideron riciklimin vendas të baterive një mënyrë për të diversifikuar furnizimin dhe për të mbajtur materiale me vlerë brenda kontinentit.

Si funksionon teknologjia?

Në qendër të procesit të kompanisë, të quajtur “CLIMA”, është një trajtim termik që e bën litiumin të tretshëm në ujë. Fillimisht bateritë klasifikohen dhe, në rastin e baterive të mëdha të automjeteve elektrike, çmontohen. Më pas kalojnë në pirolizë, një proces me temperatura të larta që shpërbën komponentët organikë të baterive.

Ky trajtim ndryshon edhe formën kimike të litiumit, duke bërë të mundur nxjerrjen e tij me ujë, pa pasur nevojë për kimikate agresive. Pjesa tjetër e materialeve mbetet e patretshme dhe mund të ndahet nga litiumi.

Procesi synon gjithashtu të reduktojë konsumin e energjisë. Nxehtësia e krijuar gjatë pirolizës rikuperohet dhe përdoret më pas për rikristalizimin e kripës së litiumit. Sipas kompanisë, teknologjia mund të ulë konsumin e energjisë me pothuajse 50% dhe emetimet e CO₂ për ton karbonat litiumi me më shumë se 59%.

Problemi i “black mass”

Një nga dobësitë kryesore të industrisë europiane të riciklimit të baterive është se shumë impiante nuk kanë kapacitetin për t’i përpunuar materialet e rikuperuara deri në fazën e lëndëve të para individuale.

Shumica e impianteve prodhojnë atë që njihet si “black mass”, një material ndërmjetës që përmban litium, nikel, kobalt dhe elementë të tjerë, por që ende nuk janë ndarë.

Meqë në Europë ka pak kapacitete për ndarjen dhe rafinimin e këtyre materialeve, një pjesë e “black mass” eksportohet drejt Azisë, kryesisht drejt Kinës dhe Koresë së Jugut, ku përpunohet më tej. Kjo do të thotë se bateritë mund të riciklohen në Europë, por materialet e vlefshme që dalin prej tyre largohen sërish jashtë kontinentit.

Accurec po përpiqet ta mbyllë këtë cikël. Një nga partnerët potencialë është AMG Lithium në Bitterfeld, Gjermani, e cila rafinon litium për prodhimin e baterive. Dy kompanitë kanë nënshkruar një memorandum mirëkuptimi, por ende duhet të zgjidhen çështje teknike përpara se furnizimet të nisin.

Synimi afatgjatë është që litiumi i rikuperuar nga bateritë e vjetra të përpunohet në Europë dhe të përdoret përsëri në prodhimin e baterive të reja në kontinent, duke krijuar një cikël të mbyllur europian të riciklimit.

Çfarë kërkon industria nga BE-ja?

Accurec e konsideron të rëndësishëm vendimin e BE-së për klasifikimin e “black mass” si mbetje të rrezikshme që nga dhjetori 2025, një masë që synon të forcojë kontrollin mbi eksportet. Por kompania argumenton se rregullat do të jenë efektive vetëm nëse autoritetet doganore dhe ato mbikëqyrëse kanë burimet e nevojshme për t’i zbatuar ato.

Një tjetër masë europiane parashikon që nga viti 2031 bateritë e reja të përmbajnë sasi minimale të materialeve të ricikluara. Megjithatë, këto rregulla nuk kërkojnë që materialet e ricikluara të jenë domosdoshmërisht me origjinë europiane.

Për këtë arsye, Accurec kërkon që krahas objektivave për përmbajtjen e materialeve të ricikluara të vendosen edhe kërkesa për një pjesë të materialeve të ricikluara me burim europian.

Sipas kompanisë, Europa ka nevojë për një strategji të koordinuar për të gjithë zinxhirin e baterive, nga riciklimi dhe përpunimi i lëndëve të para deri te prodhimi i qelizave dhe baterive. Vetëm mbështetja e projekteve të mëdha industriale, pa krijuar një rrjet të plotë furnizuesish dhe klientësh, mund të mos mjaftojë për të ndërtuar një industri europiane të baterive.

Last Updated on 26/09/2026 by EL

Mijëra persona dolën të shtunën në rrugët e Madridit në të ashtuquajturën “Marshimi për Dinjitetin”, duke kërkuar zgjedhje të parakohshme dhe duke shprehur mbështetje për Ceutën, ndërsa kriza e emigrantëve në qytetin autonom spanjoll vijon të mbetet e pazgjidhur.

Protesta, e organizuar nga Sociedad Civil Española me mbështetjen e Partisë Popullore (PP) dhe Vox, nisi pak pas orës 10:00 nga Plaza de Cibeles dhe u drejtua drejt Arco del Triunfo në Moncloa, ku pritej të përfundonte rreth orës 13:30.

Në protestë mori pjesë edhe kreu i Vox, Santiago Abascal, i cili kërkoi kthimin në vendet e origjinës të emigrantëve që kanë mbërritur në Ceuta dhe kritikoi ashpër mënyrën se si qeveria spanjolle po menaxhon situatën. Kriza nisi në fund të korrikut, kur dhjetëra mijëra persona kaluan nga Maroku drejt territorit spanjoll në Afrikën e Veriut.

Një marshim i ngjashëm, i zhvilluar përpara fluksit masiv të emigrantëve në fund të korrikut, mblodhi dhjetëra mijëra persona që kërkonin dorëheqjen e kryeministrit Pedro Sánchez dhe zgjedhje të parakohshme. Sipas Delegacionit të Qeverisë, në atë protestë morën pjesë rreth 40 mijë persona, ndërsa organizatorët pretenduan se numri arriti deri në 120 mijë.

Edhe më 2 shtator, në Ditën zyrtare të Ceutës, mijëra persona protestuan në qytete të ndryshme të Spanjës në një aktivitet të organizuar nga Federata Spanjolle e Bashkive dhe Provincave.

Kriza në Ceuta vijon

Pothuajse dy muaj pas fluksit masiv, situata në Ceuta mbetet ende e pazgjidhur. Rreth 8,300 emigrantë po strehohen në qendra dhe ambiente të ngritura për këtë qëllim, ndërsa më shumë se 4,000 persona vlerësohet se vazhdojnë të jetojnë në rrugë.

Maroku ka akuzuar Spanjën se po pengon kthimin e emigrantëve që kanë mbetur në Ceuta. Ministri i Jashtëm spanjoll José Manuel Albares u takua së fundmi në Nju Jork me homologun e tij maroken, Nasser Bourita, për të diskutuar krizën.

Gjatë takimit, Bourita foli për “pengesa” dhe “polemika” që, sipas tij, po nxiten pjesërisht nga klasa politike spanjolle dhe po vështirësojnë gjetjen e një zgjidhjeje.

Ndërkohë, autoritetet vijojnë kontrollet dhe ofrimin e ndihmës në të gjithë qytetin. Të premten, Policia Kombëtare arrestoi tre shtetas marokenë që jetonin në një kamp të improvizuar në plazhin Trampolín, nën dyshimin se kishin lidhje me mbajtjen e dy të miturve emigrantë. Dy të miturit u dërguan në Spitalin Universitar të Ceutës për trajtim.

Po atë ditë, 63 gra, të vetme ose me fëmijë të vegjël, u zhvendosën në një strukturë të ngritur në zonën e Hípica-s, si pjesë e përpjekjeve për të larguar njerëzit që vazhdojnë të jetojnë në rrugë.

Zjarrfikësit kanë zbuluar gjithashtu ditët e fundit një vendbanim të improvizuar në tunele nëntokësore, ku besohet se kanë qëndruar rreth 30 deri në 50 emigrantë.

Ndërkohë, të premten një i ri maroken humbi jetën në një kamp të ngritur në territorin e një ish-fabrike pranë plazhit Trampolín. Shkaku i vdekjes ende nuk është përcaktuar./et

Last Updated on 26/09/2026 by EL

Eric Wendt ka marrë zyrtarisht detyrën si Ambasador i Shteteve të Bashkuara të Amerikës në Shqipëri, duke rikthyer pas gati tre vitesh një ambasador të konfirmuar në krye të misionit diplomatik amerikan në Tiranë.

Wendt i dorëzoi këtë të shtunë, letrat kredenciale Presidentit Bajram Begaj, duke nisur zyrtarisht mandatin e tij në Shqipëri. Ai pason Yuri Kim, e cila përfundoi detyrën në qershor të vitit 2023.

I propozuar nga Presidenti amerikan Donald Trump dhe i konfirmuar nga Senati më 6 gusht 2026, Wendt vjen në Shqipëri pas një karriere më shumë se 34-vjeçare në ushtrinë amerikane dhe me përvojë në fushën e sigurisë dhe operacioneve speciale.

Por kush kanë qenë diplomatët që kanë drejtuar më parë Ambasadën e SHBA-së në Tiranë?

Sipas të dhënave zyrtare të Departamentit të Shtetit, dhjetë ambasadorët e fundit përpara Eric Wendt janë:

1. Yuri Kim -Ambasadore e SHBA-së në Shqipëri nga janari 2020 deri në vitin 2023. Ajo ishte ambasadorja e fundit përpara Wendt dhe pas largimit të saj posti mbeti për një periudhë të gjatë pa një ambasador të konfirmuar.

2. Donald Lu -Ambasador nga janari 2015 deri në shtator 2018. Gjatë mandatit të tij, marrëdhëniet SHBA-Shqipëri u përqendruan veçanërisht te reforma në drejtësi dhe lufta kundër korrupsionit.

3. Alexander A. Arvizu -Ambasador nga dhjetori 2010 deri në janar 2015.

4. John L. Withers – Ambasador nga gushti 2007 deri në gusht 2010.

5. Marcie B. Ries -Ambasadoreshë nga tetori 2004 deri në qershor 2007.

6. James F. Jeffrey – Ambasador nga tetori 2002 deri në maj 2004.

7. Joseph A. Limprecht -Ambasador nga shtatori 1999 deri në maj 2002.

8. Marisa R. Lino -Ambasadoreshë nga shtatori 1996 deri në maj 1999.

9. Joseph E. Lake -Ambasador nga tetori 1994 deri në mars 1996.

10. William E. Ryerson – Ambasadori i parë amerikan në Shqipërinë e pas-rivendosjes së marrëdhënieve diplomatike, me mandat nga dhjetori 1991 deri në tetor 1994.

Marrëdhëniet diplomatike mes Shqipërisë dhe Shteteve të Bashkuara u rivendosën më 15 mars 1991, ndërsa Ambasada amerikane në Tiranë u hap më 1 tetor të po atij viti. Përpara emërimit të Ryerson, Christopher Hill shërbeu për një periudhë të shkurtër si chargé d’affaires nga tetori deri në dhjetor 1991, por ai nuk ishte ambasador.

Me Eric Wendt në krye të misionit diplomatik, SHBA-të rikthejnë kështu një ambasador të konfirmuar në Tiranë pas më shumë se tre vitesh. Wendt ka deklaruar gjatë seancës së konfirmimit në Senat se ndër prioritetet e tij në Shqipëri do të jenë sundimi i ligjit, lufta kundër korrupsionit dhe krimit të organizuar, si dhe forcimi i bashkëpunimit në fushën e mbrojtjes dhe sigurisë./et

Bledar Cafi, 50-vjeçari i njohur si “i forti i Shkodrës”, është arrestuar këtë të shtunë gjatë operacionit të koduar “Muri i Lartë”, të zhvilluar nga Policia e Shtetit në bashkëpunim me BKH-në, nën drejtimin e SPAK-ut.

Cafi u arrestua në banesën e tij në Shkodër, pas masës së sigurisë “Arrest me burg”, të caktuar nga Gjykata e Posaçme më 25 shtator 2026.

Ai dyshohet për veprat penale “Trafikim i lëndëve narkotike”, kryer në bashkëpunim në formën e grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Emri i Bledar Cafit rezulton i përfshirë në hetimet e SPAK-ut për një grup të dyshuar kriminal, pjesë e të cilit dyshohet se janë edhe anëtarë të grupit “Rraja”. Në kuadër të kësaj dosjeje është arrestuar më herët edhe Rexhep Rraja, djali i ish-deputetit socialist Rrahman Rraja.

Operacioni për arrestimin e Cafit mobilizoi disa struktura të Policisë së Shtetit, përfshirë Forcat Speciale RENEA, Forcën e Posaçme Operacionale dhe strukturat e hetimit të narkotikëve.

Ndërkohë, autoritetet vijojnë kërkimet për Indrit Doklen, ndaj të cilit është caktuar gjithashtu masa e sigurisë “Arrest me burg”. Ai nuk u gjet gjatë kontrolleve të zhvilluara në kuadër të operacionit./k.m

Një vajzë 10-vjeçare me origjinë shqiptare u plagos gjatë një sulmi me armë ndaj lokalit të babait të saj në lagjen Agios Panteleimonas të Athinës.

E mitura ndodhej brenda kafenesë në momentin kur persona që lëviznin me një makinë hapën zjarr drejt fasadës.

E mitura është vajza e pronarit të lokalit, Denis Luli, 30-vjeç.

Sipas të dhënave paraprake të raportuara nga mediat greke, në automjet ndodheshin katër persona, të cilët qëlluan pa zbritur prej tij dhe më pas u larguan.

Në lokal ndodheshin edhe rreth dhjetë klientë.

Nga hetimet e para dyshohet se urdhri për atentatin është dhënë nga burgu, prej Klodian Lekocaj, një emër shumë i njohur për policinë greke.

Ende nuk dihet se kush ishte shënjestra dhe cilat ishin arsyet e konfliktit.

Por kush është Klodian Lekocaj?

Klod Cara, alias Klodian Lekocaj, 49 vjeç, një personazh kontrovers, është kthyer në qendër të vëmendjes vitet e fundit për shkak të etiketimit nga mediat greke si kreu i së ashtuquajturës “Mafia e Burgjeve”. Se sa realisht ai është i tillë, kjo nuk dihet, pasi vetë ai, në daljet publike në media, e konsideron veten “të varfër”, “të pafajshëm” dhe “të përdorur”.

Ndërkohë, faktet, dëshmitë dhe përgjimet që disponon policia greke, sipas raportimeve, të çojnë drejt dyshimit se Lekocaj ka pasur dhe ka ende një rol të rëndësishëm në botën e nëndheshme të grupeve kriminale shqiptare dhe greke.

Lekocaj, në disa përgjime dhe dëshmi, është përmendur për lidhje me grupe kriminale, duke vënë në dispozicion të tyre ose të vetes persona të dyshuar si vrasës me pagesë. I tillë ishte edhe rasti i 14 shtatorit 2022, kur policia greke arrestoi rastësisht dy shqiptarët Viktor Çala, 39 vjeç, dhe Andi Beqiri, 23 vjeç. Ata u kapën në Athinë, pasi në automjetin e tyre u gjetën të fshehura dy kallashnikovë dhe një thikë, ndërsa në banesë u gjet një pistoletë.

Hetimi i policisë zbuloi se Çala ishte autor i vrasjes së një greku dhe i tentativës për vrasjen e një shqiptari, të dyja ngjarje të ndodhura në muajin korrik 2022.

Për vrasjen e grekut, ai deklaroi se ishte urdhëruar nga Klodian Lekocaj, për shkak të prishjes së pazareve të drogës. Kështu, “Klodit”, i cili në kartelat greke njihet edhe si “Luli” apo “Ilia”, iu shtua atëherë edhe një akuzë tjetër, pas akuzave të mëparshme për urdhërimin e vrasjeve të avokatit grek Mixalis Zafiropoulos, të të burgosurit Arbër Bako dhe të të burgosurit Bardhyl Tusha, përfshirje në tentativën e vrasjes së një pakistanezi, gjobëvënie ndaj ish-ministrit grek Dimitri Tsovola, ndihmë në arratisjen e të burgosurve Leonard dhe Elvis Pepa etj.

Lekocaj, në fakt, përveç urdhrave, ka precedentë edhe si autor i drejtpërdrejtë. Fillimisht është arrestuar në vitin 1997 për vjedhje. Në vitin 2003 ishte arratisur nga burgu i Volosit, ndërsa në vitin 2005, në Agios Panteleimonas, plagosi me armë zjarri në bark një shqiptar. Më pas, në të njëjtin vend, në vitin 2006, bashkë me dy shqiptarë, plagosi me thikë një bashkëkombas të tij./k.m

Brukseli zyrtar e shikon pozitivisht punën që Shqipëria po bën sa i përket negociatave për Bashkimin Europian. Për Vizion Plus, zv.ministrja e Jashtme Megi Fino, shprehet se mbyllja e tre grupkapitujve të parë ishte vetëm fillimi, ndërsa Tirana zyrtare pret sinjalin e radhës.

“Padyshim që mbyllja e tre kapitujve në korrik të këtij viti nuk ishte një rast i vetëm. Sigurisht që ne presim që do të ketë edhe raste të tjera që padyshim me këtë ritëm dhe në kuadër të këtij plani pune që kemi dakordësuar me Komisionin Europian”, u shpreh Fino.

Ajo thekson se mbajtja e këtij ritmi aktual mund të bëjë të mundur arritjen e objektivit për të mbyllur të gjithë grupkapitujt brenda vitit 2027, synim ky i dakordësuar edhe me Komisionin Europian.

“Kemi parë që në më pak se dy vjet, janë hapur të gjithë grupkapitujt, janë mbyllur tre kapituj, tanimë kemi bërë progres edhe me piketat e ndërmjetme. Puna vazhdon, është e përditshme, jo vetëm për ministrinë për Europën dhe Punët e Jashtme, është një punë që i përket të gjithë qeverisë shqiptare dhe administratës. Pikë së pari padyshim për ne është mbajtja e këtij momentumi apo këtij ritmi dhe këtij angazhimi që ne e kemi maksimal. Vullneti i qeverisë është maksimal”, thotë Fino.

Por cilët sektorë janë më sfiduesit për vendin tonë? Zv.ministrja Fino rendit disa prej tyre nga “Themeloret” e deri tek “Siguria Ushqimore”.

 “Mund të përmendja grupkapitullin e themeloreve. Padyshim kapitujt 23 dhe 24 i cili vendos dhe ritmin pak a shumë të të gjithë kornizës negociuese sepse është grupkapitulli që hapet i pari dhe mbyllet i fundit. Padyshim që për sa i përket kapitujve të bujqësisë dhe zhvillimit rural apo sigurisë ushqimore apo mjedisi. Janë tema dhe janë sektorë të rëndësishëm të cilat prekin dhe kërkojnë kapacitete të shumta në nivel qendror por edhe vendor”, thotë ajo.

Në korrik, vendi ynë zhvilloi konferencën ndërqeveritare BE-Shqipëri, ku u mbyllën 3 kapitujt e parë, “Shkenca dhe Kërkimi”, “Arsimi dhe Kultura” si dhe “Marrëdhëniet me Jashtë”./k.m

Liverpooli ka emëruar Julian Ward si drejtorin e ri sportiv të klubit. Ward, zëvendëson Richard Hughes, i cili e mbajti këtë rol për pak më shumë se dy vjet para se të largohej në shtator.

Kjo do të jetë hera e dytë e Ward si drejtor sportiv në Anfield, pasi e kreu këtë punë për herë të parë gjatë sezonit 2022-2023. Ward iu bashkua Liverpoolit në vitin 2012 si menaxher i vëzhgimit evropian për Spanjën dhe Portugalinë dhe u promovua në ndihmës drejtor sportiv në vitin 2020.

Ai zëvendësoi Michael EdWards dy vjet më vonë, por deri në nëntor 2022, ishte konfirmuar se Ward do të largohej në fund të atij sezoni.

Ward u rikthye në vitin 2024 si drejtor teknik i Fenway Sports Group kur pronarët e Liverpoolit e bënë EdWards drejtor ekzekutiv të futbollit – dhe ka qenë përgjegjës për mbikëqyrjen e rrugëve të zhvillimit të lojtarëve dhe akademisë për dy vitet e fundit.

Emërimi i Julian Ward i jep hierarkisë së Liverpoolit një stabilitet të domosdoshëm pas një vere tranzicioni. Liverpooli foli me kandidatë të jashtëm, por Ward u pa si zgjedhja më e mirë.

Një burim e përshkroi atë si: “I qetë, që flet mirë dhe me një mendim dhe vizion të qartë”.

Periudha e mëparshme e Ward si drejtor sportiv ishte nën drejtimin e Jurgen Klopp, ku ai mbikëqyri nënshkrimet e Luis Diaz, Cody Gakpo, Alexis Mac Allister dhe Darëin Nunez – ai ka një rrjet global kontaktesh dhe shumë përvojë kur bëhet fjalë për negociata.

Ai pati gjithashtu ndikim kur Mohamed Salah ia rinovoi kontratën në vitin 2022 – duke fluturuar për ta parë Salahun me pushime për të nënshkruar marrëveshjen – dhe marrëdhënia e tij me agjentin Jorge Mendes ndihmoi Liverpoolin në ndjekjen e Diogo Jota.

Do të ketë shumë punë për Ward-in, përfshirë sigurimin e një marrëveshjeje afatgjatë me Rio Ngumoha-n tani që është 18 vjeç dhe përcaktimin nëse do t’u ofrohen kontrata të reja Alisson-it dhe Virgil van Dijk-ut para se marrëveshjet e tyre aktuale të skadojnë këtë verë./k.m

Kreu i PD, Sali Berisha shprehet se ka prova direkte për Edi Ramën, por SPAK nuk guxon ta thërrasë. Gjatë bashkëbisedimit me qytetarët në rrjetet sociale, Berisha tha se Rama ka dërguar në Aruba përfaqësuesit e tij në takimin trepalësh. Sipas kreut të PD, takimi që është zhvilluar në Aruba midis bosëve të drogës, ndërtuesve dhe përfaqësuesve të Edi Ramës është bërë totalisht me urdhër të Edi Ramës.

“Tani, do më falësh po unë prova direkte të mëdha kam për Edi Ramën. Kam direkt për Edi Ramën! Edi Rama ka dërguar në Aruba përfaqësuesit e tij në takimin trepalësh. Pra, takimi që është zhvilluar në Aruba midis bosëve të drogës, ndërtuesve dhe përfaqësuesve të Edi Ramës është bërë totalisht me urdhër të Edi Ramës. Edi Rama ka pritur bosin e Sinaloas meksikane Luftar Hysin dhe kjo është e faktuar. Vëllai i Edi Ramës, Olsi Rama, është protagonist kryesor i klanit të Xibrakës dhe fabrikës së miellit që u ndërtua në Xibrakë në vitin 2013-2014. Këto janë të faktuara të gjitha zotëri, por SPAK-u nuk vepron. Edi Rama është autori i kanabizimit të plotë të Shqipërisë. Është njeriu që përpunoi doktrinën e drogës si doktrinë e pasurimit të tij dhe të bosëve të tjerë”, u shpreh Berisha.

Gjithashtu, kryedemokrati akuzoi se në zyrën e biznesmenit të arrestuar, Ergys Agasi kanë kaluar me dhjetëra ministra./k.m

Policia ka zbardhur plagosjen me armë zjarri të ndodhur një ditë më parë pranë “Zogut të Zi” në Tiranë, ku mbeti i plagosur në këmbë 33-vjeçari nga Kosova, Gjenk Karabeg. Ky i fundit njihet ndryshe edhe si “Leumasi” dhe rezulton të ketë publikuar disa këngë në YouTube.

Për ngjarjen ka rënë në pranga 20-vjeçari Samuel Tahiraj, ndërsa si autor i dyshuar i plagosjes është identifikuar dhe shpallur në kërkim 54-vjeçari Sajmir Pasmaciu. Dy persona të tjerë janë proceduar në gjendje të lirë. Në pranga ka përfunduar edhe vetë i plagosuri Gjenk Karabeg, pasi nga verifikimet rezultoi se ishte në kërkim nga autoritetet e Kosovës.

Sipas Policisë, gjithçka nisi nga një konflikt në një lokal në rrugën “Hysni Gërbolli”. Gjatë përplasjes, 54-vjeçari Pasmaciu dyshohet se ka qëlluar me armë zjarri Karabegun, duke e plagosur në këmbë, dhe më pas është larguar nga vendngjarja.

Në konflikt dyshohet se është përfshirë edhe Samuel Tahiraj, i cili është përleshur me disa persona me sende të forta. Nga përplasja mbeti i dëmtuar edhe një 18-vjeçar. Tahiraj u arrestua për “Plagosje të lehtë me dashje”, “Moskallëzim të krimit” dhe “Prishje të qetësisë dhe rendit publik”.

Dy persona të tjerë, 49 dhe 18 vjeç, u proceduan në gjendje të lirë, pasi dyshohet se kanë goditur me sende të forta Tahirajn. Gjatë kontrolleve, Policia sekuestroi një armë gjahu, një thikë, municion luftarak dhe disa fishekë.

Ndërkohë, verifikimet për Gjenk Karabegun zbuluan se ai ishte person në kërkim nga autoritetet kosovare. 33-vjeçari u arrestua me qëllim ekstradimi, pasi është dënuar nga Gjykata Themelore në Gjakovë me 50 ditë burg për posedim të narkotikëve, substancave psikotrope ose analoge./k.m

Pas incidentit ai është transportuar me autoambulancë drejt spitalit dhe ndodhet nën kujdesin e mjekëve, ndërsa ende nuk dihet gjendja e tij shëndetësore.

Pranë vendit të ngjarjes pritet të kryhen edhe verifikimet për zbardhjen e rrethanave të incidentit./k.m

Ekipet e emergjencës kanë përfunduar operacionin e kërkim-shpëtimit dhe kanë nxjerrë të gjithë trupat nga rrënojat e ndërtesës së shembur.

Mes viktimave janë edhe tre shtetas shqiptarë, Florin Hoxha, motra e tij, Florida Hoxha dhe bashkëshortja e tij, Eris Cani. Në total janë konfirmuar gjashtë viktima, ndërsa ekipet e emergjencës kanë nxjerrë të gjithë trupat nga rrënojat. Mes viktimave është edhe bashkëshorti i Florida Hoxhës, Ian Alexander Kirpatrick, shtetas amerikan, si dhe Edmond Hings e Athina Papapresku, pronarët e ndërtesës.

Kujtojmë se shpërthimi ndodhi pak para orës 08:00 ditën e djeshme, në një ndërtesë të vjetër dykatëshe në rrugën Lysikratous, përballë Shtyllave të Zeusit Olimpik. Si pasojë e shpërthimit, ndërtesa u shemb, ndërsa një kalimtar u plagos lehtë nga copëzat e shpërndara.

Forcat zjarrfikëse ndërhynë edhe në një ndërtesë pranë vendit të ngjarjes, nga ku nxorën dy gra, njëra prej tyre e moshuar. Të dyja u transportuan në spitalin “Georgios Gennimatas”, ku morën ndihmën e parë.

Pas orëve të kërkimeve nën rrënoja, ekipet e emergjencës kanë nxjerrë të gjashtë trupat, duke konfirmuar bilancin tragjik të ngjarjes./k.m

Last Updated on 26/09/2026 by Klara

Ambasadori i SHBA-së, Eric Wendt nisi misionin në Tiranë, ndërsa më 2 tetor do të zhvillojë pritjen zyrtare ku të ftuar do të jenë politikanët e të gjithë krahëve. Ardhjen e tij e komentoi edhe kreu i PD, Sali Berisha, i cili vetë konfirmoi se deri më tani nuk ka dijeni për ceremoninë dhe nuk ka një ftesë në dorë.

Pyetje: Sot ambasadori i ri i SHBA-së Eric Wendt, i dorëzoi letrat kredenciale Presidentit Begaj, duke nisur zyrtarisht misionin e tij në Shqipëri. Ndërkohë, më datë 2 Tetor, Ambasada e SHBA-së do të organizojë ceremoninë e prezantimit të ambasadorit të ri. A jeni i ftuar në këtë event?

Berisha: I uroj mirëseardhjen ambasadorit, nuk kam asnjë dijeni e për ceremoninë.

Në pritjen e fundit të organizuara nga e Narkuara me Punë e SHBA, Nancy Van Haron për 250-vjetorin e Pavarësisë së SHBA-së, Sali Berisha, i shpallur non grata nga SHBA nuk shkoi dot./k.m

Last Updated on 26/09/2026 by Klara

Nga Fatos Çoçoli 

Më 19 shtator 2026, agjencia ndërkombëtare prestigjoze “Moody’s”, e vlerësimit të aftësive borxh-shlyese të mbarë ekonomive të planetit, përmes vlerësimit për ecurinë e tyre, e rriti vlerësimin për ekonominë tonë nga “e qëndrueshme” në “pozitive”.

Ky është një sinjal i rëndësishëm për mënyrën se si agjencitë ndërkombëtare të vlerësimit të kreditit(dy të tjerat janë “Standard& Poor’s” dhe “Fitch Ratings”) e shohin ecurinë dhe qëndrueshmërinë e ekonomisë së Shqipërisë.

Pse “Moody’s” e vlerëson pozitivisht uljen e borxhit publik të Shqipërisë

Agjencia ndërkombëtare ka pritshmëri që borxhi ynë publik të vijojë të ulet, në raport me prodhimin kombëtar, që e quajmë ndryshe GDP ose Prodhimi i Brendshëm Bruto i vendit, duke kaluar nga rreth 52.9 përqind tëGDPB-së në fund të vitit 2025, në rreth 50.2% në vitin 2027.

Për një ekonomi si e vendit tonë, ulja graduale e borxhit ka rëndësi të veçantë, sepse krijon më shumë hapësirë për përballimin e goditjeve të jashtme dhe përmirëson perceptimin e investitorëve të huaj mbi qëndrueshmërinë e financave tona publike.

Fakti që Moody’s pret një reduktim të borxhit nga 52.9% në 50.2% të PBB-së tregon një prirje pozitive të financave publike. Rëndësi ka jo vetëm niveli absolut i borxhit, por edhe raporti i tij me madhësinë e ekonomisë. Kur ekonomia rritet dhe borxhi mbahet nën kontroll, raporti borxh/PBB mund të ulet, edhe pa një reduktim shumë të shpejtë të borxhit.

Përmirësimi i pozicionit të jashtëm të vendit

Në përcaktimin e 19 shtatorit 2026, agjencia “Moody’s” vlerëson gjithashtu forcimin e pozicionit të jashtëm të Shqipërisë. Ky është një element i rëndësishëm për një ekonomi të vogël dhe të hapur, e cila është e ekspozuar ndaj ndryshimeve në çmimet ndërkombëtare, kursit të këmbimit, kostove të energjisë dhe kushteve financiare globale.

Një pozicion më i fortë i jashtëm e ndihmon vendin të përballojë më mirë goditjet që vijnë nga ekonomia ndërkombëtare.

Një tjetër faktor pozitiv është rritja e investimeve të huaja. Investimet e huaja direkte kanë rëndësi për ne, jo vetëm sepse sjellin kapital. Ato sjellin teknologji, njohuri menaxheriale, tregje të reja dhe vende pune, duke zgjeruar kapacitetin prodhues të ekonomisë sonë.

Nga këndvështrimi i një agjencie vlerësimi, një ekonomi që tërheq investime të huaja dhe ruan një pozicion të qëndrueshëm të jashtëm, ka më shumë kapacitet për të përballuar nevojat e saj financiare dhe goditjet e jashtme.

Rezervat valutore, një mburojë ndaj goditjeve

Një prej elementeve më të rëndësishme të përmendura nga raporti i Moody’s është niveli i rezervave valutore. Rezervat valutore të Shqipërisë kanë arritur në rreth 7.9 miliardë euro në qershor 2026, duke mbuluar dukshëm më shumë se shtatë muaj importe.

Kjo përbën një rezervë të rëndësishme sigurie për ekonominë tonë. Në rast të një goditjeje të jashtme, rezervat valutore ndihmojnë ekonominë të përballojë nevojat për valutë dhe reduktojnë rrezikun që një tronditje e menjëhershme e flukseve të jashtme të krijojë probleme të mëdha financiare. Në këtë kuptim, rezervat valutore funksionojnë si një amortizator financiar.

Pse vlerësimi i Moody’s ka rëndësi për investitorët e huaj?

Investitorët ndërkombëtarë shohin një grup treguesish dhe jo vetëm një element të ekonomisë.

Një kombinim i borxhit publik në rënie, i rritjes ekonomike(të cilën Moody’s e parashikon 3.6 përqind për këtë vit), i financave publike më të qëndrueshme, i investimeve të huaja dhe i rezervave të konsiderueshme valutore krijon një perceptim më pozitiv për qëndrueshmërinë e ekonomisë.

Kjo është veçanërisht e rëndësishme për Shqipërinë, sepse perceptimi i rrezikut të vendit ndikon në kushtet me të cilat shteti dhe kompanitë shqiptare sigurojnë financim në tregjet ndërkombëtare. Vlerësimi i Moody’s nuk lidhet vetëm me përqindjen e borxhit publik. Ai lidhet me aftësinë e përgjithshme të ekonomisë shqiptare për të ruajtur qendrueshmërinë përballë goditjeve.

Parashikimi që borxhi publik të zbresë në rreth 50.2% të GDP-së në vitin 2027 është i rëndësishëm edhe për perspektivën afatmesme të vendit. Nëse kjo tendencë vazhdon dhe kjo duket pothueajse e sigurt, Shqipëria do të ketë mundësi të konsolidojë më tej financat publike dhe të krijojë një bazë më të qëndrueshme për investimet publike, investimet e huaja dhe zhvillimin e saj ekonomik./k.m

Last Updated on 26/09/2026 by Klara

Shtetet e Bashkuara dhe Shqipëria rivendosën marrëdhëniet diplomatike më 15 mars 1991, pas një ndërprerjeje prej më shumë se 50 vitesh. Ambasada amerikane në Tiranë u rihap më 1 tetor të atij viti, me Christopher Hill si të Ngarkuar me Punë ad interim, ndërsa nga William E. Ryerson në vitin 1991 deri te Yuri Kim, e cila e përfundoi mandatin në vitin 2023, në Tiranë kanë shërbyer 10 ambasadorë amerikanë. Pas gati tre vitesh pa ambasador, këtë të shtunë misionin në Shqipëri e nisi Eric Wendt.

Melania Trump ka folur rrallëherë për jetën e saj familjare, ndërsa këtë herë ka ndarë disa detaje për marrëdhënien me djalin e saj, Barron Trump, duke pranuar se koha që familja kalon së bashku është bërë gjithnjë e më e kufizuar.

Në një intervistë për “The Big Money Show” të Fox Business, Zonja e Parë e SHBA-së u pyet se si arrin të gjejë kohë për familjen, mes angazhimeve të saj publike dhe atyre të bashkëshortit, Presidentit Donald Trump.

Melania, 56 vjeç, tha se koha familjare duhet planifikuar paraprakisht, pasi të dy kanë axhenda të ngarkuara.

“Koha që kalojmë së bashku si familje është gjithnjë e më e kufizuar”, tha ajo, duke shtuar se Donald Trump mund të qëndrojë deri vonë në Zyrën Ovale.

Duke folur për Barron, 20 vjeç, i cili studion në Universitetin e Nju Jorkut (NYU), Melania tha se djali i saj tashmë është në një tjetër etapë të jetës.

“Barron tashmë është një i ri, kështu që ndonjëherë ndoshta është edhe i lumtur që unë thjesht të merrem me punët e mia. Dhe kjo është në rregull”, u shpreh ajo.

Deklaratat e saj vijnë në një kohë kur jeta private e Barron është bërë më shumë objekt i vëmendjes së mediave amerikane. Ai ka zgjedhur një jetë larg ekspozimit publik dhe, sipas raportimeve, lëvizjet e tij shoqërohen me masa të larta sigurie për shkak të kërcënimeve ndaj familjes Trump.

Zyra e Melania Trump ka kërkuar më herët që detajet mbi jetën private të Barron të mos publikohen, duke iu referuar kërcënimeve të fundit ndaj tij.

Barron është shfaqur rrallë në publik gjatë muajve të fundit. Paraqitjet e tij të fundit të njohura përfshijnë finalen e Kupës së Botës 2026 në Nju Xhersi dhe një event UFC të zhvilluar në Shtëpinë e Bardhë.

Pavarësisht vëmendjes ndaj jetës së tij private, Melania Trump nuk e përshkroi marrëdhënien me të birin si konfliktuale. Ajo u përqendrua te ndryshimi i natyrshëm i jetës familjare, ndërsa Barron është rritur dhe ka nisur jetën e tij si i rritur, ndërkohë që angazhimet e prindërve në Shtëpinë e Bardhë e bëjnë më të vështirë që familja të kalojë kohë së bashku./k.m

Bashkimi Evropian po përballet me një krizë të çmimeve të energjisë si rezultat i ndikimit të luftës në Iran në tregjet e naftës dhe gazit, tha Komisioneri i Energjisë në një letër në të cilën ai u bëri thirrje shteteve anëtare të marrin në konsideratë marrjen e masave për të kufizuar kërkesën.

“Po përballemi me një krizë çmimesh të lidhur me një krizë furnizimi”, tha Komisioneri i Energjisë i BE-së, Dan Jorgensen, në një letër drejtuar ministrave të energjisë të shteteve anëtare të Bashkimit Evropian.

“Edhe pse BE tani është më e përgatitur sesa ishte në dimrin e vitit 2021, kur Rusia uli ndjeshëm furnizimet me gaz në Evropë, qeveritë evropiane duhet të përshpejtojnë përgatitjet e tyre për këtë dimër”, tha ai.

“Ju bëj thirrje të merrni në konsideratë marrjen ose vazhdimin e marrjes së masave që do të sigurojnë rezerva të mjaftueshme dhe/ose do të ulin kërkesën për gaz dhe energji elektrike për aq kohë sa të jetë e nevojshme”, theksoi Dan Jorgensen./k.m

Polonia po ofron që të paguajë 15.000 dollarë në vit për çdo ushtar amerikan të stacionuar në territorin e saj dhe po ofron mbulimin e kostove të infrastrukturës, teksa Varshava dhe Uashingtoni po afrohen drejt një marrëveshjeje për krijimin e një baze të përhershme ushtarake amerikane, tha për Radion Evropa e Lirë (REL) një zyrtar i lartë polak i mbrojtjes.

Zëvendësministri polak i Mbrojtjes, Pawel Zalewski, tha në një intervistë për Radion Evropa e Lirë më 25 shtator tha se negociatat me Pentagonin tani janë përqendruar në mënyrën e zbatimit të planit, përfshirë trupat, kapacitetet dhe lokacionet e mundshme.

“Po diskutojmë me Pentagonin variante të ndryshme të zbatimit të vendimit”, tha Zalewski.

Teksa refuzoi të thoshte se cilat njësite amerikane mund të vendoseshin apo ku, Zalewski zbuloi detaje të reja të ofertës së Polonisë për Uashingtonin.

“Ne po ofrojmë kushte shumë speciale për trupat amerikane”, tha ai.

“Ne do t’i mbulojmë kostot e infrastrukturës. Gjithashtu, po mbulojmë koston e secilit ushtar amerikan të stacionuar në Poloni me 15.000 dollarë në vit”.

I pyetur se kush do të paguante, Zalewski u përgjigj: “Paguhet nga taksapaguesit polakë”.

Oferta vë në pah vendosmërinë e Varshavës për të siguruar një prani të përhershme ushtarake amerikane, teksa Pentagoni po shqyrton dislokimin e forcave amerikane në të gjithë Evropën.

Presidenti amerikan, Donald Trump, tha më 17 shtator se po bëhej përparim drejt krijimit të një baze të ushtrisë amerikane në Poloni dhe se për vendndodhjen e saj mund të njoftohej së shpejti.

Shtetet e Bashkuara tashmë kanë mijëra trupa në Poloni, kryesisht ata dislokohen me rotacion, dhe vendi është shndërruar në një qendër të rëndësishme për operacionet e NATO-s përgjatë krahut lindor të aleancës.

Zalewski tha se detajet e çdo dislokim të përhershëm janë duke u negociuar dhe po diskutohen në kuadër të shqyrtimit më të gjerë të Uashingtonit për qëndrimin e tij ushtarak në Evropë.

“Po diskutojmë variante të ndryshme, lloje të ndryshme të trupave, kapaciteteve dhe lokacioneve”, tha ai, duke shtuar se Varshava pret më shumë qartësi pasi të përfundojë procesi i shqyrtimit.

Pentagoni nuk iu përgjigj menjëherë kërkesave për koment.

Për Varshavën, rëndësia e një baze të përhershme shkon përtej numrit të trupave të stacionuara atje.

“Bazat e përhershme krijojnë angazhim të përhershëm”, tha Zalewski, duke shtuar se një dislokim i tillë do të ishte më pak i varur nga ndryshimet në mjedisin politik apo ushtarak, teksa njëkohësisht do t’i dërgonte një sinjal të drejtpërdrejtë Moskës.

Një sulm ndaj Polonisë, tha ai, do të rrezikonte t’i fuste forcat ruse në konflikt të drejtpërdrejtë me trupat amerikane.

“Ky është një mesazh shumë i rëndësishëm dhe urgjent për presidentin [rus, Vladimir] Putin se SHBA-ja ka interesa strategjike në Poloni dhe se sulmi ndaj Polonisë do të ishte sulm ndaj forcave të armatosura amerikane në Poloni”, tha Zalewski.

Ai argumentoi po ashtu se prania e përhershme amerikane nuk duhet të shihet thjesht si një favor që Uashingtoni po i bën Varshavës.

“Kjo bazë e përhershme nuk është rezultat i një lloj altruizmi”, tha ai, por sipas tij, pasqyron “interesa amerikane”.

Polonia ka zgjeruar me shpejtësi ushtrinë e saj dhe ka investuar shumë në sistemet amerikane të armatimit. Dy vendet kanë thelluar edhe lidhjet energjetike, përfshirë bashkëpunimin me kompanitë amerikane për termocentralin e parë bërthamor të Polonisë.

Ekspertët e sigurisë thanë se një bazë e përhershme do ta forconte angazhimin e Uashingtonit ndaj krahut lindor të NATO-s, por paralajmëruan se rëndësia e saj do të varej pjesërisht nga ajo që do të ndodhë me forcat amerikane në vendet e tjera në Evropë.

“Një bazë e përhershme amerikane në Poloni do të ishte një sinjal i rëndësishëm i angazhimit amerikan ndaj krahut lindor të NATO-s, veçanërisht teksa Uashingtoni po shqyrton qëndrimin e tij më të gjerë ushtarak në Evropë”, tha për Radion Evropa e Lirë David Cattler, ish-ndihmëssekretar i përgjithshëm i NATO-s për inteligjencën dhe sigurinë.

Por, Cattler, tani bashkëpunëtor i lartë në Qendrën për Politika dhe Analiza Evropiane, tha se aleatët do të vëzhgojnë rezultatin më të gjerë të shqyrtimit amerikan.

“Aleatët do ta gjykojnë të gjithë tablonë: cilat forca dhe kapacitete do të mbeten, sa shpejt mund të përforcojnë Poloninë dhe shtetet baltike dhe nëse mund të operojnë së bashku në mënyrë efektive”, tha ai.

“Një bazë do ta forconte parandalimin nëse i shton krahut lindor kapacitete reale. Ajo do të bënte shumë më pak për t’i siguruar aleatët nëse shoqërohet me reduktime të konsiderueshme të pranisë amerikane diku tjetër në Evropë”.

Matthew Boyse, bashkëpunëtor i lartë në Institutin Hudson dhe ish-zëvendësndihmëssekretar amerikan i Shtetit për çështjet evropiane dhe euroaziatike, tha se negociatat pasqyrojnë rolin në rritje të Polonisë në NATO.

“Këto bisedime për bazën tregojnë vlerën e vazhdueshme të Polonisë si një aleate e madhe e NATO-s”, tha Boyse për Radion Evropa e Lirë.

Polonia ka rritur ndjeshëm shpenzimet për mbrojtjen vitet e fundit dhe është shndërruar në një nga vendet e NATO-s që shpenzojnë më shumë për ushtrinë në raport me madhësinë e ekonomisë së tyre.

“Në vend se të ankohet për ‘besueshmërinë’, Polonia po bën gjithçka që mundet”, tha Boyse. “Administrata e sheh dhe e vlerëson këtë”.

Charles Kupchan, bashkëpunëtor i lartë në Këshillin për Marrëdhënie me Jashtë, tha se mundësia e një baze të përhershme do të mirëpritej në vendet më të afërta me Rusinë, por paralajmëroi se mbetet pasiguri për qasjen më të gjerë të Uashingtonit ndaj Evropës.

“Mundësia e një baze të përhershme amerikane në Poloni është lajm i mirë për polakët dhe të tjerët përgjatë krahut lindor të NATO-s, veçanërisht mes shqetësimeve në rritje për kërcënimin që paraqet Rusia”, tha Kupchan për Radion Evropa e Lirë.

“Megjithatë, kjo është ende një periudhë pasigurie për NATO-n”, tha ai duke iu referuar marrëdhënies që ndonjëherë është e tensionuar mes Trumpit dhe aleatëve dhe shqyrtimit të Pentagonit, i cili mund të reduktojë praninë amerikane në vende të tjera të Evropës.

Përpjekjet e Varshavës për një prani të përhershme amerikane vijnë në kohën kur Rusia duket gjithnjë e më e gatshme të marrë rreziqe ndaj anëtarëve të NATO-s.

“Gatishmëria e Rusisë për të pranuar rrezik më të madh është e dukshme dhe Rusia është e gatshme të përshkallëzojë situatën”, tha Zalewski.

Ai iu referua incidenteve të fundit që Polonia i ka lidhur me Rusinë, përfshirë shkeljet e hapësirës ajrore dhe aktet e dyshuara të sabotimit, duke thënë se ato ilustrojnë presionin me të cilin përballen vendet në krahun lindor të NATO-s.

Polonia, tha ai, po përgjigjet si përmes aleancës së saj me SHBA-në, ashtu edhe përmes NATO-s.

Për Varshavën, një bazë e përhershme amerikane do t’i shtonte një shtresë tjetër këtij parandalimi, duke e bërë të qartë se çdo përballje ushtarake që përfshin Poloninë mund të përfshijë menjëherë edhe forcat amerikane.

“Bazat e përhershme krijojnë angazhim të përhershëm”, tha Zalewski./k.m

Në preferencat e tyre ishte edhe stomatologjia, por për të qenë bashkë vendosën që të trija të studiojnë për farmaci.

“Ishte në dëshirën tonë që të vazhdonim farmaci”, shprehet njëra nga motrat.

Të trija e kanë mbaruar me rezultate të shkëlqyera maturën në gjimnazin e Kukësit dhe duket se dhe prirjet i kanë të njëjta në shkenca ekzakte.

Jo vetëm rezultatet e shkëlqyera, por edhe lidhja e veçantë që kanë me njëra-tjetrën i bashkon që prej lindjes e mesa duket nuk do të ndahen as në bankë.

Edhe pse trinjakë në karakter janë të ndryshme, Ajsel duket se paraprin gjithmonë kur bëhet fjalë për t’u shprehur.

“Unë jam pak më e shkathët, ndërsa unë dua vetëm atë shoqërinë e ngushtë. Qëndron pak brenda komfortit të saj”, shprehet Ajsel.

Trinjaket u bashkuan me studentët e tjerë në Ditën Botërore të Farmacistëve, ku tema e këtij viti ishte “Fuqizimi i farmacistit për një të ardhme të shëndetshme”.

Urdhri i Farmacistëve zhvilloi disa aktivitete për të promovuar rolin dhe rëndësinë e farmacistit. U shpërndanë fletëpalosje me këshilla për përdorimin e barnave tek fëmijët.

Ndërkohë që u dërguan një sasi me produkte farmaceutike dhe materiale higjieno-sanitare në Shtëpinë e Fëmijës “Zyber Hallulli”./k.m

Pesë emigrantë humbën jetën tragjikisht të premten në kufirin midis Kroacisë dhe Sllovenisë. Mësohet se ata humbën jetën pasi u mbytën ndërsa përpiqeshin të kalonin një lumë. Fatmirësisht pesë të tjerë u shpëtuan.

Autoritetet u njoftuan pasi se një grup njerëzish, të dyshuar si emigrantë, u panë në lumin Kupa, rreth 90 kilometra në jugperëndim të Zagrebit.

Policia dhe banorët shpëtuan pesë të huaj, por pesë të tjerë u mbytën, tha policia kroate në një njoftim për shtyp, pa specifikuar kombësitë e tyre.

“Grupi përbëhej nga pothuajse njëzet persona, 14 prej të cilëve arritën të kalonin lumin dhe ndodhen në territorin slloven”, shpjegoi policia kroate.

Kroacia është pjesë e një rruge të ndjekur nga emigrantët e parregullt që përpiqen të arrijnë Evropën Perëndimore përmes Ballkanit.

Mbi 12,500 njerëz morën “rrugën ballkanike” në vitin 2025, sipas të dhënave nga Agjencia Evropiane e Rojës Kufitare dhe Bregdetare (FRONTEX), një numër i ulur me 42% krahasuar me vitin 2024.

Që nga viti 2014, më shumë se 400 njerëz kanë humbur jetën ose janë zhdukur gjatë udhëtimit përgjatë kësaj rruge, sipas të dhënave nga Organizata Ndërkombëtare për Migracionin (IOM), e cila i përket sistemit të OKB-së./k.m