LONDËR, 13 shkurt /ATSH-DPA/ – Peter Mandelson, ish-ambasador britanik në Shtetet e Bashkuara të Amerikës, është ftuar të dëshmojë para Kongresit amerikan lidhur me marrëdhënien e tij me Jeffrey Epstein.

Një letër e dërguar nga dy anëtarë demokratë të Dhomës së Përfaqësuesve i kërkon Mandelsonit t’u përgjigjet pyetjeve të Komisionit për Mbikëqyrje të Dhomës, në kuadër të hetimit për aktivitetet e Epstein.

Lidhjet e Mandelsonit me Epstein kanë nxitur thirrje që kryeministri britanik, Keir Starmer të tërhiqet nga detyra.

Kritikët kanë vënë në pikëpyetje gjykimin e Starmerit në emërimin e Mandelsonit si ambasador në SHBA, një post që konsiderohet ndër më prestigjiozët në diplomacinë britanike.

Letra drejtuar Mandelsonit, e nënshkruar nga përfaqësuesit Robert Garcia dhe Suhas Subramanyam, thekson se ”megjithëse nuk shërbeni më si ambasador britanik në Shtetet e Bashkuara dhe keni dhënë dorëheqjen nga Dhoma e Lordëve, është e qartë se keni pasur lidhje të gjera shoqërore dhe biznesi me Jeffrey Epstein dhe zotëroni informacion thelbësor për hetimin tonë mbi veprimtarinë e tij”.

”Duke pasur parasysh akuzat tronditëse lidhur me sjelljen e Epstein, ju kërkojmë të viheni në dispozicion për një intervistë të transkriptuar me stafin e Komisionit në lidhje me krimet e Jeffrey Epstein dhe bashkëpunëtorëve të tij”, theksonin ata./ /Ad.Ab./ a.jor.

The post FOKUS – Ligjvënës amerikanë kërkojnë dëshminë e Mandelson për lidhjet me Epstein appeared first on Agjencia Telegrafike Shqiptare.

TIRANË, 13 shkurt /ATSH/ Ministri i Bujqësisë dhe Zhvillimit Rural, Andis Salla, gjatë vizitës në Athinë zhvilloi një takim me përfaqësuesin e Komisionit të Jashtëm të Parlamentit grek, Lakis Vasiliadis.

Në fokus të takimit ishte vijueshmëria e marrëdhënieve të mira shqiptaro-greke, partneriteti në kuadër të NATO dhe perspektiva europiane që dy vendet ndajnë.

Ministri Salla theksoi rolin e rëndësishëm që luan komuniteti shqiptar në Greqi, si edhe pakica greke në Shqipëri, duke i cilësuar ato si një urë të fortë lidhëse mes dy popujve dhe një faktor kyç në forcimin e miqësisë afatgjatë mes vendeve.

Takimi u vlerësua si një hap pozitiv në drejtim të thellimit të dialogut dhe bashkëpunimit dypalësh, në funksion të stabilitetit rajonal dhe integrimit europian.

1 nga 2

e.xh/a.f/

The post Salla në Athinë, takim me përfaqësuesin e Komisionit të Jashtëm të Parlamentit grek appeared first on Agjencia Telegrafike Shqiptare.

MYNIH, 13 shkurt /ATSH-AFP/ – Presidenti francez, Emmanuel Macron paralajmëroi sot se Evropa do të duhet të “përcaktojë rregullat e saj të bashkëjetesës” me Rusinë sapo të arrihet një marrëveshje paqeje për t‘i dhënë fund luftës në Ukrainë, me qëllim “për të kufizuar rrezikun e përshkallëzimit”.

“Evropianët duhet të nisin këtë punë, me reflektimin dhe interesat e tyre të veçanta”, tha presidenti francez gjatë Konferencës për Sigurinë në Mynih.

Ai u propozoi evropianëve që të “nisin një seri konsultimesh mbi këtë çështje të rëndësishme”.

“Nëse Evropa dëshiron të jetë në pozicion force për të diskutuar me Rusinë në të ardhmen, vendet e Kontinentit të Vjetër duhet të zhvillojnë në mënyrë aktive mjetet në fushën e mbrojtjes”, theksoi Macron./  /Ad.Ab./ a.jor.

The post MYNIH – Macron: Në rast paqeje në Ukrainë, Evropa duhet të përcaktojë rregulla bashkëjetese me Rusinë appeared first on Agjencia Telegrafike Shqiptare.

MYNIH, 13 shkurt /ATSH-DPA/ – Sekretari amerikan i Shtetit, Marco Rubio dhe kancelari gjerman, Friedrich Merz diskutuan sot përpjekjet për t’i dhënë fund luftës në Ukrainë në kuadër të Konferencës së Sigurisë në Mynih.

”Rubio vlerësoi mbështetjen e fortë të Gjermanisë për Ukrainën”, tha një zëdhënës i Departamentit amerikan të Shtetit, duke shtuar se bisedimet përfshinë edhe koordinimin e përpjekjeve për rindërtimin.

Burime të qeverisë gjermane thanë se diskutimi u përqendrua te situata në Ukrainë, gjendja e negociatave me Rusinë dhe mbështetja e mëtejshme për Kievin, veçanërisht në aspektin ushtarak.

Në takim u trajtua edhe roli i Evropës brenda NATO-s.

Sipas palës amerikane, Rubio mirëpriti gjithashtu hapat e Gjermanisë për forcimin e aleancës.

Dy zyrtarët diskutuan më tej situatën në Lindjen e Mesme, veçanërisht lidhur me Iranin.

Përpara një udhëtimi në Kinë, Merz e përdori takimin edhe për të biseduar me Rubion mbi zhvillimet në Azinë Lindore dhe politikën tregtare, sipas burimeve gjermane.

Fjala e Rubios në konferencë, e planifikuar për mëngjesin e së shtunës, konsiderohet si më e pritura e aktivitetit treditor./ /Ad.Ab./ a.jor.

The post MYNIH – Merz dhe Rubio diskutojnë luftën në Ukrainë appeared first on Agjencia Telegrafike Shqiptare.

TIRANË, 13 shkurt /ATSH/ Qyteti i Shkodrës është shndërruar në një skenë magjike festash me Paradën e Karnavaleve, një spektakël unik që solli ngjyra, dritë dhe fantazi në çdo rrugë të qytetit.

Kryeministri Edi Rama ndau momente nga ky event, i cili veshi qytetin me ngjyra dhe dritë, duke e kthyer Shkodrën në një qendër feste dhe kreativiteti.

Parada e karrocave, dritave dhe personazheve pushtoi rrugët, duke krijuar një atmosferë të hapur dhe spektakolare për qytetarët dhe vizitorët.

Në të njëjtën mbrëmje, muret e Bashkisë Shkodër morën jetë përmes një loje regjisoriale të kuruar në çdo detaj.

Personazhet, format dhe ritmi u shkrinë natyrshëm me paradën në rrugë, në një mapping show që mahniti çdo sy dhe veshi fasadën me dritë, lëvizje dhe fantazi.

Ky spektakël përmbledh energjinë, ngjyrat dhe atmosferën e një karnavali të vërtetë, aty ku rruga dhe arkitektura u bënë një, qyteti foli me imazhe dhe festa u ndje në çdo cep, duke ofruar një eksperiencë të paharrueshme për të gjithë banorët dhe vizitorët.

Festa e karnavaleve në Shkodër ka nisurqë prej datës 9 shkurt dhe do të vijojë deri të dielën, 15 shkurt. Në shesh do të ketë butafori artistike, karro alegorike, parada, personazhe groteske dhe të animuara, koncerte, etj., që përveç se do të përfshijnë qytetarët shkodranë do të tërheqin edhe shumë vizitorë.

Karnavalet e Shkodrës rikthejnë traditën e festave me ngjyra dhe muzikë, duke krijuar një ambient tërheqës për familjet, të rinjtë dhe vizitorët, dhe shërbejnë si një mundësi për promovimin e qytetit si destinacion turistik dhe kulturor.

1 nga 5

/e.xh/r.e/a.f/

The post Parada e Karnavaleve “pushton” rrugët e Shkodrës me ngjyra dhe dritë appeared first on Agjencia Telegrafike Shqiptare.

UASHINGTON, 13 shkurt /ATSH-AFP/ – Presidenti amerikan, Donald Trump i bëri sot thirrje homologut të tij ukrainas, Volodymyr Zelensky, që të fillojë të veprojë për të arritur një marrëveshje me Rusinë përpara një raundi të ri negociatash javën e ardhshme.

“Zelensky do të duhet të veprojë. Rusia dëshiron të bëjë një marrëveshje dhe Zelensky do të duhet të veprojë. Përndryshe, ai do të humbasë një mundësi shumë të mirë”, u tha presidenti amerikan gazetarëve nga Shtëpia e Bardhë në Uashington.

Donald Trump konfirmoi edhe se do të udhëtonte për në Venezuelë, pa specifikuar datën e vizitës.

“Do të shkoj në Venezuelë, por nuk kemi vendosur se kur’’, u tha presidenti amerikan gazetarëve./ /Ad.Ab./ a.jor.

The post SHBA – Trump: Zelensky të fillojë të veprojë për të arritur një marrëveshje me Rusinë appeared first on Agjencia Telegrafike Shqiptare.

TIRANË, 13 shkurt /ATSH/ Ambasada e Shteteve të Bashkuara në Tiranë njofton tifozët shqiptarë që duan të ndjekin Kupën e Botës FIFA 2026, se për të udhëtuar drejt Shteteve të Bashkuara është i nevojshëm dokumentacioni i duhur, duke përfshirë vizën amerikane.

Ambasada thekson se tifozët mund të aplikojnë për vizë edhe para blerjes së biletave për ndeshjet, ndërsa lëshimi i vizave bëhet vetëm për ata që përmbushin kriteret ligjore të Shteteve të Bashkuara.

“Të gjithë tifozët e Kupës së Botës FIFA 2026 kanë nevojë për dokumentacionin e duhur të udhëtimit për të vizituar Shtetet e Bashkuara. Tifozët që kanë nevojë për vizë amerikane, aplikoni sot!”, thuhet në njoftimin e ambasadës.

Për më shumë informacion dhe për të filluar aplikimin për vizë, interesuarit mund të vizitojnë faqen zyrtare të ambasadës: https://al.usembassy.gov/fifa-world-cup-26/.

/e.xh/r.e/a.f/

The post Ambasada amerikane njofton tifozët shqiptarë për vizat e Kupës së Botës 2026 appeared first on Agjencia Telegrafike Shqiptare.

TIRANË,13 shkurt /ATSH/ Sot në Kuvendin e Shqipërisë rifilloi puna në Komisionin e Posaçëm të Reformës Zgjedhore.

Bashkëkryetari i komisionit, deputeti socialist Damian Gjiknuri bëri të ditur se në fokus të mbledhjes ishin emërimi i ekspertëve të komisionit, tre nga mazhoranca dhe tre nga opozita; hartimi i draftit të parë për financimin e partive politike dhe organizimi i një tryeze konsultimi me partitë politike dhe organizatat e shoqërisë civile.

Gjiknuri theksoi se ekspertët e komisionit do të merren me draftimin e të gjithë projektligjeve të nevojshme, të cilat më pas do të depozitohen në Parlament. Financimi i partive politike jashtë fushatës zgjedhore do të jetë prioriteti i parë i punës së tyre, me synim hartimin e një ligji transparent dhe llogaridhënës.

Sipas tij, tryeza konsultuese do të organizohet brenda dy javëve, duke garantuar që zëri i partive dhe organizatave të shoqërisë civile të dëgjohet dhe çdo rekomandim të merret parasysh.

“Zëri i tyre do të dëgjohet dhe çdo propozim apo rekomandim i tyre është i vlefshëm”, tha Gjiknuri, teksa vuri në dukje se, “synimi i komisionit është që deri në korrik 2026 të përgatitet një draft i dakordësuar i Reformës Zgjedhore për miratim në Parlament”.

/e.xh/r.e/a.f/

The post Zgjidhen ekspertët në Komisionin e Reformës Zgjedhore, në fokus financimi i partive politike appeared first on Agjencia Telegrafike Shqiptare.

PARIS, 13 shkurt /ATSH/ – Autoritetet franceze ndaluan nëntë persona si pjesë e një hetimi për një skemë të dyshuar mashtrimi me bileta në Luvër, muzeun më të vizituar në botë, njoftoi prokuroria e Parisit, sipas AP.

Sipas prokurorisë, bëhet fjalë për një skemë që dyshohet se ka funksionuar për rreth një dekadë dhe që i ka shkaktuar muzeut një dëm financiar mbi 10 milionë euro (rreth 11,8 milionë dollarë).

Arrestimet u kryen të martën, në kuadër të një hetimi gjyqësor të hapur pasi vetë muzeu paraqiti kallëzim penal në dhjetor 2024.

Mes të ndaluarve janë dy punonjës të Luvrit, disa guida turistike si dhe një person që dyshohet të jetë organizatori kryesor i skemës.

Muzeu kishte sinjalizuar hetuesit për praninë e shpeshtë të dy guidave kineze, të dyshuara se fusnin grupe turistësh kinezë duke ripërdorur në mënyrë të paligjshme të njëjtat bileta disa herë për vizitorë të ndryshëm.

Më pas, edhe guida të tjera u vunë nën dyshim për praktika të ngjashme.

Sipas prokurorisë, mbikëqyrja dhe përgjimet telefonike konfirmuan ripërdorimin e përsëritur të biletave, si dhe një strategji për ndarjen e grupeve turistike me qëllim shmangien e pagesës së detyrueshme për shpjegime që duhet të paguajnë guidat.

Hetimi zbuloi gjithashtu bashkëpunëtorë të dyshuar brenda muzeut, ku guidat dyshohet se u paguanin para në dorë për të shmangur kontrollet e biletave.

Një hetim formal gjyqësor u hap në qershor të vitit të kaluar për akuza që përfshijnë mashtrim të organizuar, pastrim parash, korrupsion, ndihmë për hyrje të paligjshme në vend në kuadër të një grupi të organizuar, si dhe përdorim dokumentesh administrative të falsifikuara.

Hetuesit besojnë se rrjeti mund të ketë futur deri në 20 grupe turistike në ditë gjatë dekadës së fundit.

Dyshohet se një pjesë e fitimeve është investuar në pasuri të paluajtshme në Francë dhe në Dubai.

Autoritetet kanë sekuestruar mbi 957 mijë euro para në dorë, përfshirë 67 mijë euro në valutë të huaj, si dhe 486 mijë euro në llogari bankare.

Prokuroria përmendi se një skemë e ngjashme mashtrimi me bileta dyshohet se ka ndodhur edhe në Palace of Versailles, pa dhënë detaje të mëtejshme./  /Ad.Ab./ a.jor.

The post FRANCË – Nëntë të ndaluar me dyshimin për mashtrim 10 milionë eurosh me biletat e Luvrit appeared first on Agjencia Telegrafike Shqiptare.

TIRANË, 13 shkurt/ATSH/ Për herë të parë, individët që kanë paguar më shumë tatim sesa duhet gjatë vitit 2025, duke përfshirë edhe ata pa fëmijë, mund të aplikojnë për rimbursim pas plotësimit të Deklaratës Individuale të të Ardhurave (DIVA).

Në kuadër të ndryshimit të parimit të llogaritjes së tatimit, tani tatimi mbi të ardhurat nga punësimi rillogaritet mbi bazë vjetore, dhe jo mujore si më parë.

Kjo ka bërë që disa individë, përfshirë ata pa fëmijë, të rezultojnë me tatim të mbipaguar dhe të kenë të drejtë të kërkojnë rimbursim.

“Përveç individëve që kanë fëmijë dhe përfitojnë zbritje për shpenzimet arsimore, edhe ata pa fëmijë që kanë paguar më shumë tatim gjatë vitit 2025 mund të aplikojnë për rimbursimin e mbipaguar”, bën të ditur në një prononcim në media, drejtorja e Procesimit të Biznesit në Drejtorinë e Përgjithshme të Tatimeve, Rozana Çelmeta.

Afati për dorëzimin e DIVA është deri më 31 mars 2026, ndërsa shpërndarja e kompensimeve do të nisë në muajin prill. /j.p/r.e/

The post Tatimi i mbipaguar, individët pa fëmijë gjithashtu mund të kërkojnë rimbursim appeared first on Agjencia Telegrafike Shqiptare.

TIRANË, 13 shkurt /ATSH/ Kryetari i Grupit Parlamentar të Partisë Socialiste, Taulant Balla, zhvilloi një takim me presidenten e Bullgarisë, Iliana Iotova, në kuadër të Konferencës së Sigurisë në Mynih.

Përmes një postimi, Balla bëri të ditur se ky nuk është takimi i parë mes tyre, duke kujtuar bashkëpunimin edhe në detyra të mëparshme.

Ai theksoi se marrëdhëniet dypalëshe mes Shqipërisë dhe Bullgarisë janë të shkëlqyera në të gjitha fushat.

Sipas Ballës, Shqipëria vlerëson veçanërisht mbështetjen e Sofjes si vend anëtar i Bashkimit Europian në rrugëtimin drejt anëtarësimit.

Takimi në Mynih vjen në një kohë kur diplomacia shqiptare po forcon kontaktet me partnerët europianë për të çuar përpara procesin e integrimit

/e.xh/a.f/

The post Balla takon presidenten bullgare në Mynih: Bullgaria mbështet integrimin e Shqipërisë në BE appeared first on Agjencia Telegrafike Shqiptare.

ABU DHABI  13 shkurt /ATSH-Gjergji Mima/ Legjenda e futbollit bullgar, Hristo Stoichkov, ka vlerësuar Kombëtaren shqiptare si një ekip me cilësi, por ka theksuar se forca mendore dhe karakteri do të jenë elementë vendimtarë në ndeshjet “play-off” për kualifikimin në Kupën e Botës.

Deklaratat Stoichkov i bëri në një intervistë për Agjencinë Telegrafike Shqiptar, në kuadër të “Open Masters Games Abu Dhabi 2026”.

Shqipëria do të përballet fillimisht me Poloninë, ndërsa në rast fitoreje do të luajë ndaj fitueses së çiftit Ukraine – Suedi.

Sipas Stoichkov, shorti është mjaft i vështirë dhe nuk lë vend për gabime.

“Është një short shumë i fortë. Polonia është një kundërshtar i fuqishëm, po ashtu edhe Ukraina apo Suedia. Në këtë fazë asgjë nuk është e lehtë”, u shpreh ai.

Duke krahasuar Kombëtaren shqiptare të sotme me atë të viteve më parë, Stoichkov vuri në dukje progresin e bërë ndër vite.

“Në kohën kur unë luaja kundër Shqipërisë, situata ishte ndryshe. Sot Shqipëria ka një brez të mirë lojtarësh me cilësi,” tha ai.

Megjithatë, ish-fituesi i “Topit të Artë” theksoi se mentaliteti mbetet faktori kyç.

“Kanë lojtarë të mirë, por ndonjëherë u mungon karakteri në momentet vendimtare. Megjithatë, shoh përmirësim. Ata po fillojnë të besojnë më shumë te vetja dhe kjo është shumë e rëndësishme”, shtoi Stoichkov.

Ai vlerësoi gjithashtu stafin drejtues të Kombëtares shqiptare, duke e cilësuar trajnerin si një element të rëndësishëm dhe duke i uruar ekipit sukses në përballjet vendimtare.

“Keni një trajner të shkëlqyer dhe ju uroj sinqerisht shumë fat”, tha Stoichkov për ATSH.

Duke folur për talentet e rinj shqiptarë, Stoichkov kujtoi periudhën kur ishte trajner i Litex Lovech, ku kishte punuar me një futbollist shqiptar shumë premtues.

“Një nga lojtarët më të mirë të rinj që kam stërvitur ishte vetëm 17 vjeç – Armando Vajushi, që luante për Litex. Ishte shumë i talentuar dhe me potencial të madh,” tha ai.

Në vijim të intervistës për ATSH, Stoichkov foli edhe për favoritët e tij për Kupën e Botës, duke veçuar ekipet e Amerikës së Jugut dhe ato europiane.

“Në Amerikën e Jugut favoritët e mi janë Brazili dhe Argjentina. Në Europë shoh Spanjën, Francën dhe Anglinë. Edhe Holanda ka një ekip shumë të mirë. Gjithçka varet nga kush arrin në çerekfinale dhe gjysmëfinale,” përfundoi Stoichkov.

Legjenda e futbollit bullgar, Hristo Stoichkov zhvilloi një tur në ishullin Al Hudayriat në Abu Dhabi, ku ndoqi disa nga garat dhe u njoh me aktivitetet e Community Hub.

Më pas, Stoichkov u takua me sportistë dhe tifozë gjatë një sesioni “meet and greet”, duke krijuar momente të veçanta për pjesëmarrësit dhe vizitorët.

Legjenda e futbollit bullgar, Hristo Stoichkov në ishullin Al Hudayriat në Abu Dhabi Foto: And...

1 nga 19

/gj.m/a.f/

The post Stoichkov për ATSH: Shqipëria ka cilësi, por karakteri do të jetë vendimtar në play-off-et e Botërorit appeared first on Agjencia Telegrafike Shqiptare.

PRISHTINË, 13 shkurt /ATSh/ Seanca në të cilën ishte parashikuar që të shqyrtohet buxheti për vitin 2026 është shtyrë për të hënën në orën 10:00.

Kjo pasi partitë opozitare nuk u dakortësuan që projektbuxheti të votohet pa debat. Ata kërkuan dy e tri ditë shqyrtim të projektbuxhetit. Në fund, kryetarja e Kuvendit thirri për konsultim shefat e grupeve parlamentare, ku pastaj njoftojë se janë dakortësuar që kjo seancë të shtyhet për të hënën

/KosovaPress/

The post Kuvendi e shtyn shqyrtimin e buxhetit 2026 për të hënën appeared first on Agjencia Telegrafike Shqiptare.

TIRANË, 13 shkurt /ATSH/ Sistemi i drejtësisë në Shqipëri po i nënshtrohet një tjetër filtri të thellë pastrimi, këtë herë duke synuar bllokimin e çdo shtegu ligjor për personat me probleme integriteti që tentojnë të hyjnë në organet e larta vendimmarrëse apo akademike.

Me botimin në Fletoren Zyrtare dhe dekretimin nga Presidenti i Republikës, Ligji nr. 10/2026 hyn në fuqi më 28 shkurt 2026, duke vendosur ndalime të përhershme për ish-gjyqtarët dhe prokurorët e shkarkuar ose tërhequr nga detyra për t’iu shmangur vetingut.

Sipas ligjit, këtyre individëve u ndalohet shprehimisht kandidimi në Këshillin e Lartë Gjyqësor (KLGJ) dhe Këshillin e Lartë të Prokurorisë (KLP), si dhe punësimi si pedagogë, trajnerë apo ekspertë në Shkollën e Magjistraturës.

Për kandidatët e rinj nga radhët e avokatisë, pedagogët dhe shoqëria civile, ligji vendos një proces rigoroz “miniveting”, që përfshin verifikimin e pasurisë, lidhjet me krimin e organizuar dhe një kontroll të thelluar nga Avokati i Popullit dhe autoritetet kompetente si SPAK, Byroja Kombëtare e Hetimit, Tatimet dhe Doganat.

Ndryshimet ligjore përfshijnë edhe saktësime mbi përkufizimin e krimit të organizuar dhe pasurisë, si dhe fuqizimin e Inspektorit të Lartë të Drejtësisë dhe standardeve për këshilltarët dhe ndihmësit ligjorë në gjykata dhe prokurori.

Ky ligj synon të garantojë integritetin e sistemit të drejtësisë dhe të parandalojë rikthimin e individëve me probleme integriteti në institucionet kyçe të shtetit.

/r.e/a.f/

The post Ligji i ri në drejtësi, ish-magjistratët e shkarkuar përjashtohen përfundimisht appeared first on Agjencia Telegrafike Shqiptare.

PARIS, 13 shkurt /ATSH-DPA/ – Katër persona kanë humbur jetën si pasojë e stuhisë së fuqishme që ka përfshirë jugperëndimin e Francës dhe Spanjën, njoftuan autoritetet të premten.

Zëdhënësja e qeverisë franceze, Maud Bregeon, deklaroi për televizionin “TF1″ se një burrë humbi jetën teksa po ngjitej në një shkallë në kopshtin e tij në rajonin Tarn-et-Garonne.

Vdekja e tij pason atë të një shoferi kamioni, i cili gjithashtu humbi jetën në Francë gjatë stuhisë.

”Ndërkohë, një tjetër drejtues mjeti humbi jetën pasi makina e tij doli nga rruga në fshatin Crossac, pranë bregdetit Atlantik, dhe u përmbyt në terren të mbuluar nga uji”, raportoi transmetuesi” France 3″.

Sipas zyrtarëve franceze, 26 persona të tjerë janë plagosur në incidente të lidhura me motin e keq.

Shërbimi meteorologjik” Météo France” bëri të ditur se 25 rajone mbeten nën alarm portokalli ose të kuq për mot të rrezikshëm. Janë raportuar përmbytje dhe ndërprerje të qarkullimit, ndërsa autoritetet kanë paralajmëruar për rrezik të lartë ortekësh në zonat malore.

”Rreth 450 mijë persona vazhdojnë të jenë pa energji elektrike. Brigada e zjarrfikësve ka ndërhyrë në rreth 4 500 raste emergjente”, shtoi Bregeon.

Në Spanjë, një grua 46-vjeçare ndërroi jetë në spital pasi pësoi lëndime të rënda nga shembja e një çatie në Barcelona të enjten, raportoi gazeta ”La Vanguardia”, duke cituar autoritetet.

Sistemi i ri i presionit të ulët ka sjellë erëra të forta në Spanjë, veçanërisht në jug të vendit, si dhe reshje të dendura shiu dhe dëbore./  /Ad.Ab./ a.jor.

The post METEO – Katër viktima nga moti i keq në Francë dhe Spanjë appeared first on Agjencia Telegrafike Shqiptare.

TIRANË, 13 shkurt /ATSH/ Me botimin në Fletoren Zyrtare dhe dekretimin nga Presidenti i Republikës, ndryshimet e reja në Kodin Penal hyjnë në fuqi më 28 shkurt 2026, duke përforcuar ndjeshëm masat ligjore ndaj krimeve të rënda dhe duke futur dispozita të reja që ndikojnë drejtpërdrejt në jetën e përditshme të qytetarëve.

Ndryshimet sjellin masa të ashpra për abuzuesit e të miturve, duke parashikuar dënime deri në 20 vjet burg për akte seksuale ndaj fëmijëve nën 14 vjeç, përfshirë prodhimin dhe aksesimin e materialeve pornografike, si dhe ndëshkimin e organizatorëve të “turizmit seksual”.

Ndryshimet garantojnë gjithashtu mbrojtje për gazetarët, duke dekriminalizuar shpifjen në rastet kur informacioni është përhapur me mirëbesim për çështje me interes publik dhe duke dënuar me deri në 5 vjet burg çdo akt dhune ose kanosjeje ndaj tyre.

Për mbrojtjen e territorit dhe mjedisit, zjarrvënia e qëllimshme në pyje trajtohet me ashpërsi, me dënime që mund të arrijnë deri në 10 vjet burg, sidomos në kushte të rrezikshme moti ose pranë zonave të mbrojtura. Ndërsa personat që parkojnë në mënyrë të parregullt duke bllokuar rrugët për emergjencat, mund të përballen me gjobë ose deri në 1 vit burg.

Kodi i ri përforcon edhe sigurinë kombëtare dhe parandalimin e financimit të terrorizmit, si dhe rrit dënimet për korrupsionin dhe mashtrimet me fondet e Bashkimit Evropian, me dënime deri në 10 vjet burg për shuma të mëdha.

Kjo paketë ndryshimesh ligjore synon t’i japë organeve të drejtësisë instrumente më të forta dhe të përputhura me standardet e Bashkimit Evropian për garantimin e rendit, sigurisë dhe drejtësisë në Shqipëri.

/e.xh/a.f/r.e/

The post Ndryshimet në Kodin Penal në fuqi nga 28 shkurti: Mbrojtje për të miturit, gazetarët, mjedisin e sigurinë publike appeared first on Agjencia Telegrafike Shqiptare.

TIRANË, 13 shkurt /ATSH/ Ministri i Shtetit për Pushtetin Vendor, Ervin Demo deklaroi se qeveria shqiptare, në bashkëpunim me përfaqësues të lartë të Bankës Botërore, po eksplorojnë mundësitë për krijimin e një programi të ri kombëtar, që synon mbështetjen e zhvillimit ekonomik të qëndrueshëm në nivel lokal, me fokus të veçantë tek sektori i turizmit.

Gjatë një prononcimi për mediet nga Berati, ministri Demo së bashku me Ming Zhang, Global Director për Urban, Subnational Finance, Tourism dhe Disaster Management në World Bank Group, theksuan rëndësinë e investimeve që lidhin turizmin me zhvillimin e territorit dhe ekonominë lokale.

“Investimet e reja në këtë sektor sjellin përfitime direkte për qytetarët dhe fuqizojnë potencialin ekonomik të komuniteteve”, tha Demo.

Nga ana e tij, Zhang, u shpreh i kënaqur për bashkëpunimin me qeverinë dhe bashkitë shqiptare, duke theksuar se investimet e menaxhuara në mënyrë të drejtë krijojnë mundësi të reja punësimi, zhvillim të turizmit dhe rritje të ekonomisë lokale.

Si pjesë e këtij angazhimi, u nënvizua se programi kombëtar synon të krijojë mundësi të qëndrueshme për qytetarët dhe bizneset vendore, duke rritur bashkëpunimin ndërinstitucional dhe forcimin e zhvillimit ekonomik në komunitetet lokale.

/e.xh/r.e/a.f/

The post Qeveria dhe Banka Botërore program kombëtar për zhvillimin ekonomik lokal dhe turizmin appeared first on Agjencia Telegrafike Shqiptare.

MYNIH, 13 shkurt /ATSH-DPA/ – Wolfgang Ischinger, një diplomat veteran gjerman dhe kryetar i Konferencës së Sigurisë së Mynihut, ofroi një moment të rrallë të qeshurash në fillim të forumit, që zakonisht ruan nivele të larta serioziteti.

Kryetari i konferencës vendosi të argëtohej pak gjatë fjalës së tij hapëse duke përshëndetur syzet e diellit, tashmë legjendare, të presidentit francez Emmanuel Macron, të cilat ky i fundit i mbajti në Forumin Ekonomik Botëror, muajin e kaluar në Davos të Zvicrës, për shkak të një infeksioni në sy.

“Mendoj se ajo që ndodhi në Davos disa javë më parë nuk ka nevojë domosdoshmërisht të qëndrojë në Davos. Kështu që do vë edhe unë një palë syze”, tha Ischinger.

Pas kësaj, ish-ambasadori 79-vjeçar, vuri një palë syze dielli aviatori, duke shkaktuar të qeshura dhe duartrokitje midis udhëheqësve botërorë dhe oficerëve të lartë ushtarakë në audiencë.

Në Davos, Macron mbajti një fjalim 18-minutësh, ndërsa mbante syze blu reflektuese aviatorësh.

Pamja u bë një sensacion viral në median sociale, me shumë njerëz që bënin shaka se Macron po imitonte Tom Cruise, i cili mbante një palë syze të ngjashme në filmin “Top Gun”.

Edhe presidenti i SHBA-së, Donald Trump iu referua këtij momenti.

“E pashë dje me ato syze dielli të bukura. Çfarë dreqin ndodhi?” pyeti Trump në fjalimin e tij në Davos.

Në bisedimet e fokusuara në mbrojtje në Mynih, Ischinger mori një moment për të shijuar argëtimin e turmës përpara se të vinte përsëri syzet e tij optike dhe të thoshte se “kjo konferencë zhvillohet në një kohë shqetësimesh në rritje për sigurinë globale”.

Syzet e diellit nuk u shfaqën më./ a.jor.

The post SOFT NEWS – Konferenca e Sigurisë e Mynihut hapet ”ala Macron”! appeared first on Agjencia Telegrafike Shqiptare.

TIRANË, 13 shkurt /ATSh/ Ministrja për Evropën dhe Punët e Jashtme, Elisa Spiropali, mori pjesë në Konferencën e Sigurisë në Mynih, ku liderë politikë dhe ushtarakë nga e mbarë bota u mblodhën për të diskutuar sfidat aktuale globale të sigurisë.

Gjatë takimeve me partnerë ndërkombëtarë, Spiropali theksoi se Shqipëria është e pranishme si një aleate e besueshme në kuadër të NATO dhe si një zë i qëndrueshëm stabiliteti në Ballkanin Perëndimor, në një kohë kur mjedisi i sigurisë në Evropë dhe më gjerë po përballet me dinamika të reja dhe sfida të shumta.

Diskutimet e këtij viti në Mynih u përqendruan në forcimin e aleancës transatlantike, zhvillimet lidhur me luftën në Ukrainë, tensionet në Lindjen e Mesme si dhe pasiguritë që po ndikojnë në marrëdhëniet ndërkombëtare.

Ministrja Spiropali rikonfirmoi orientimin e qartë euroatlantik të Shqipërisë dhe përkushtimin ndaj partneriteteve strategjike që garantojnë sigurinë dhe zhvillimin e vendit. Ajo theksoi se në një botë gjithnjë e më të paqëndrueshme, vlerat e lirisë, solidaritetit dhe bashkëpunimit mbeten themelore.

Shqipëria, nënvizoi ajo, do të vijojë të kontribuojë për sigurinë e rajonit dhe forcimin e partneritetit transatlantik, ndërsa përparon në procesin e integrimit drejt Bashkimit Evropian.

1 nga 6

/e.xh/r.e/a.f/

The post Spiropali në Mynih: Shqipëria, aleate e besueshme në NATO dhe faktor stabiliteti në rajon appeared first on Agjencia Telegrafike Shqiptare.

TIRANË, 13 shkurt /ATSH/ Takimi i radhës trepalësh midis Shqipërisë, Kroacisë dhe Kosovës u zhvillua në Mynih, duke konfirmuar vijimësinë e dialogut strategjik dhe koordinimit në fushën e sigurisë.

Ministri i Mbrojtjes, Pirro Vengu, i pranishëm në këtë konferencë, u takua me homologun kroat Ivan Anušić dhe me ministrin e Mbrojtjes të Kosovës Ejup Maqedonci, në një moment kur mjedisi i sigurisë në Evropë dhe rajon karakterizohet nga dinamika të shtuara dhe nevoja për përgjigje të koordinuara.

Diskutimet u fokusuan në thellimin e bashkëpunimit në mbrojtjen e përbashkët, rritjen e ndërveprueshmërisë së forcave të armatosura, zhvillimin e industrisë ushtarake dhe ndërtimin e kapaciteteve të qëndrueshme mbrojtëse.

Takimi rikonfirmoi vullnetin politik të tre vendeve për të vepruar si faktorë stabiliteti në rajon, për të forcuar sigurinë kolektive dhe për të kontribuar në arkitekturën euroatlantike të sigurisë përmes partneriteteve konkrete dhe rezultateve të matshme.

Në një reagim në rrjetet sociale pas takimit, ministri i Mbrojtjes Pirro Vengu u shpreh se , Konferenca e Sigurisë e Mynihut shërbeu si një mundësi e vlefshme për të vijuar dhe thelluar diskutimet trepalëshe mes Shqipërisë, Kroacisë dhe Kosovës.

1 nga 3

/e.xh/r.e/a.f/

The post Shqipëria, Kroacia dhe Kosova thellojnë koordinimin strategjik në mbrojtje appeared first on Agjencia Telegrafike Shqiptare.