Policia e Kosovës ka njoftuar për një rast të vrasjes në tentativë në Prishtinë.
Rasti ka ndodhur të premten në ora 20:05, në rrugën “Agim Ramadani”.
“...Janë arrestuar tre të dyshuar meshkuj kosovarë-njëri i mitur, pasi që të njëjtit kishin sulmuar fizikisht me mjet të mprehtë (thikë) viktimën mashkull kosovar- i mitur”, thuhet në njoftim.
Viktima është dërguar për tretman mjekësor në QKUK, ndërsa të dyshuarit pas intervistimit me vendim të prokurorit janë dërguar në mbajtje. /Telegrafi/
Gjykata Themelore në Prishtinë e ka aprovuar kërkesën për hudhjen e aktakuzës ndaj Faton Klinakut dhe ka pushuar procedurën penale ndaj tij për veprën penale “Kanosja” ndaj Kryeministrit Albin Kurti, ndërsa procedura penale do të vazhdojë vetëm ndaj të akuzuarit tjetër, Nuredin Selmani.
Në seancën fillestare, më 3 shtator 2025, Faton Klinaku dhe Nuredin Selmani ishin deklaruar të pafajshëm.
Klinaku kishte shkruar Fb më 29 gusht 2023 se: “më parë e vras Albin Kurtin sesa që ia lëshoj rrugën e iku nga Kosova”.
Aktvendimi i siguruar nga “Betimi për Drejtësi” është nxjerrë më 20 nëntor 2025 nga kryetari i trupit gjykues, gjyqtari Rahman Beqiri, pas shqyrtimit të kundërshtimit të provave dhe kërkesës për hedhjen e aktakuzës, të paraqitur nga mbrojtësi i Klinakut, avokati Ramë Dreshaj.
Ndaj këtij aktvendimi nuk lejohet ankesë në Gjykatën e Apelit.
Sipas aktvendimit, Gjykata ka vendosur që aktakuza e Prokurorisë Speciale të Republikës së Kosovës e datës 1 gusht 2025, të hudhet pjesërisht dhe procedura penale të pushohet vetëm në raport me të akuzuarin Faton Klinaku, i cili akuzohej për veprën penale “Kanosja” nga neni 181 paragrafi 3 lidhur me paragrafin 2 të Kodit Penal të Republikës së Kosovës.
Gjykata ka konstatuar se nuk ka pasur kërkesë pasurore-juridike, ndërsa shpenzimet e procedurës penale që lidhen me këtë pjesë të aktakuzës do të mbulohen nga mjetet buxhetore të Gjykatës.
Në aktvendim theksohet se, pas plotfuqishmërisë së tij, procedura penale do të vazhdojë vetëm ndaj Nuredin Selmanit, i cili vazhdon të përballet me akuzën për veprën penale “Kanosja” sipas të njëjtit nen të Kodit Penal, raporton “Betimi për Drejtësi”.
Prokuroria Speciale e Republikës së Kosovës (PSRK) më 1 gusht 2025 ka ngritur aktakuzë ndaj Faton Klinakut dhe Nuredin Selmanit, të cilët akuzohen për kanosje të kryeministrit në detyrë, Albin Kurti.
Sipas aktakuzës së siguruar nga “Betimi për Drejtësi“, Faton Klinaku akuzohet se më 29 gusht 2023, në Prishtinë, me dashje dhe me qëllim që ta frikësojë dhe detyrojë tani të dëmtuarin, Albin Kurti, në cilësinë e tij si Kryeministër i Qeverisë së Republikës së Kosovës, që të ndërmarrë ose mos ndërmarrë veprime të caktuara në kuadër të ushtrimit të detyrës së tij zyrtare, e kishte kanosur publikisht përmes rrjetit social Facebook, duke postuar shkrime kërcënuese.
“Aq shumë i dëshpëruar votuesi i tij sa që tha: Votën ia dhashë për ndryshim, e ndryshim lëre që nuk ka bërë por po shkojmë edhe më shumë teposhtë si vend dhe s’ka mbetur tjetër gjë pos me ikë jashtë. I thashë: As se kam votu, as ndryshim për të mirë kurrsesi që nuk kam pritur nga ai, e sa i përket daljes jashtë, më parë e vras Albin Kurtin se sa që ia lëshoj rrugën e iku nga Kosova. Kosovën nuk duhet e as që guxojnë ta lëshojnë ata që kanë luftuar për të”, citohet të ketë shkruar Klinaku në Facebook.
Ndërsa, pas reagimeve të opinionit publik lidhur me këtë kërcënim, në aktakuzë thuhet se i pandehuri Klinaku më 30 gusht 2023 ka përsëritur një shkrim po ashtu me përmbajtje të njëjtë kërcënuese ndaj tani të dëmtuarit Kurti.
“Prapë po e përsëris, nëse ju duket skandaloz postimi i mëhershëm: Më parë e vras Albin Kurtin sesa ia lëshoj rrugën e iku nga Kosova”, citohet në aktakuzë të ketë shkruar Klinaku.
Me këto veprime, Klinaku akuzohet se publikisht dhe seriozisht e ka kanosur me vrasje të dëmtuarin Albin Kurti, për shkak të punës së tij zyrtare, si Kryeministër i Qeverisë së Republikës së Kosovës.
Andaj, me këto veprime, Klinkau ngarkohet se ka kryer veprën penale “Kanosja” nga neni 181, paragrafi 3 lidhur me paragrafin 2 të Kodit Penal.
Ndërkaq, në pikën dy të aktakuzës, Nuredin Selmani akuzohet se më 30 gusht 2023, në Drenas, me dashje dhe me qëllim që ta frikësojë dhe detyrojë tani të dëmtuarin, Albin Kurti, në cilësinë e tij si Kryeministër i Qeverisë së Republikës së Kosovës, që të ndërmarrë ose mos ndërmarrë veprime të caktuara në kuadër të ushtrimit të detyrës zyrtare, e ka kanosur publikisht në rrjetin social Facebook, duke iu referuar postimit kërcënues të bërë nga i pandehuri Faton Klinaku.
Selmani ngarkohet se kishte postuar një fotografi në të cilën ishte montuar fotoja e të dëmtuarit Kurti, krahas asaj të Klinakut, duke e shoqëruar me një shkrim kërcënues të adresuar ndaj të dëmtuarit.
“E mbështes Faton Klinakun”, “Veç ni telefon ma ban Faton, aty mki për çka të ka nevojë, mezi s’po pres me ja nisë”, citohet në aktakuzë postimi i Selmanit.
Po atë ditë, në mbrëmje, thuhet se i njëjti u inkuadrua drejtpërdrejt në emisionin “Debat Plus” në TV Dukagjini, ku po trajtohej debati me temë “OVL-UÇK vs Kurti”. Aty thuhet se përmes video-linkut, pas pyetjeve të moderatorit të emisionit, i pandehuri, sipas aktakuzës, kishte deklaruar “Unë konsideroj që çdo njëri i cili bon të këqija siç bon Albin Kurti, edhe po të isha unë në vendin e tij, duhet të vritet patjetër, sepse ajo është tradhti ndaj atdheut”.
Andaj, me këto veprime, Selmani ngarkohet se ka kanosur publikisht dhe seriozisht për vrasje të dëmtuarin Albin Kurti, për shkak të punës së tij zyrtare, e të cilat kërcënime, thuhet se i kishte shprehur edhe me disa bashkëbisedues tjerë, gjatë komunikimeve telefonike që i janë gjetur pas ekzaminimit të telefonit të tij, duke përfshirë edhe disa fotografi, ku i pandehuri shihet në posedim edhe të disa armëve të gjata luftarake.
Me këto veprime, i pandehuri Nuredin Selmani ngarkohet se ka kryer veprën penale “Kanosja” nga neni 181, paragrafi 3 lidhur me paragrafin 2 të Kodit Penal.
Policia e Kosovës, përkatësisht Drejtoria për Hetimin e Krimeve Ekonomike dhe Korrupsionit (DHKEK), pas hetimeve të zhvilluara me autorizim të Prokurorisë Speciale të Republikës së Kosovës (PSRK), ka arrestuar shtatë persona të dyshuar për përfshirje në vepra të rënda penale që ndërlidhen me korrupsionin.
Sipas njoftimit zyrtar, rreth orës 17:40, policia ka kapur në flagrancë tre nga të dyshuarit teksa po shkëmbenin shumën prej 9,900 eurosh, e cila dyshohet të ketë qenë pjesë e një marrëveshjeje për ndarjen e ryshfetit, përcjell Telegrafi.
Në koordinim me Prokurorinë Speciale, njësitet policore kanë realizuar kontrolle në pesë lokacione të ndryshme. Gjatë këtyre kontrolleve janë sekuestruar para të gatshme, tri vetura, gjashtë telefona mobil, një laptop dhe dëshmi të tjera relevante për rastin. Po ashtu, në njërin nga lokacionet janë gjetur armë dhe municion.
Lidhur me këtë rast janë arrestuar gjithsej shtatë persona, gjashtë meshkuj dhe një femër, të gjithë shtetas të Republikës së Kosovës. Pas intervistimit, me vendim të prokurorit, të dyshuarit janë dërguar në mbajtje.
Hetimet po vazhdojnë nën dyshimet për keqpërdorim të pozitës apo autoritetit zyrtar, marrje dhe dhënie ryshfeti, ushtrim të ndikimit, deklarim të rremë dhe mashtrim. /Telegrafi/
Policia e Kosovës ka bërë të ditur se një person është gjetur pa shenja jete në Prishtinë.
Rasti ka ndodhur rreth orës 10:30 në rrugën “Ymer Prizreni”, ndërkaq lajmin për Telegrafin e konfirmoi zëdhënësi Enis Pllana nga Policia e Kosovës për rajonin e Prishtinës.
“Sot rreth orës 10:30 policia ka pranuar informatën se në rrugën Ymer Prizreni në Prishtinë, gjendet një person pa shenja jete. Me të marrë informatën policia ka dalë në vendin e ngjarjes, ku kanë hasur viktimën mashkull, i cili ishte pa shenja jete”, njoftoi Pllana.
Vdekjen e viktimës e ka konstatuar ekipi mjekësor në vendin e ngjarjes. /Telegrafi/
Një incident është raportuar të mërkurën pasdite në Prishtinë, ku një person i dyshuar kosovar, gjatë marrjes së trajtimit mjekësor, ka tentuar të arratiset dhe ka sulmuar fizikisht një zyrtar të Shërbimit Korrektues të Kosovës.
Sipas raportit të Policisë së Kosovës, rasti ka ndodhur rreth orës 15:50, kur i dyshuari, i cili ndodhej nën përcjellje për trajtim mjekësor, ka ushtruar dhunë fizike ndaj viktimës mashkull kosovar, zyrtar korrektues.
I dyshuari është neutralizuar dhe ndaluar nga zyrtarë të tjerë korrektues që ishin të angazhuar në sigurimin e tij.
Pas përfundimit të trajtimit mjekësor dhe inicimit të procedurave përkatëse, i dyshuari është kthyer për të vazhduar vuajtjen e dënimit. /Telegrafi/
Policia e Kosovës ka dhënë detaje shtesë lidhur me aksionin e ndërmarrë dje në Prishtinë, ndaj disa bizneseve që dyshohen për ushtrim të kundërligjshëm të veprimtarisë mjekësore-farmaceutike.
Sipas raportit 24-orësh të Policisë, njësitë e Drejtorisë për Hetimin e Krimeve Ekonomike dhe Korrupsionit kanë zhvilluar veprime hetimore ndaj personave të dyshuar për ofrim të shërbimeve estetike pa autorizim ligjor.
Në kuadër të këtij operacioni janë zbatuar urdhëresa për kontroll në disa lokacione në Prishtinë, ku gjatë bastisjeve janë sekuestruar sasi të konsiderueshme të produkteve medicinale, regjistra të klientëve dhe shërbimeve të ofruara, si dhe pajisje elektronike përfshirë laptopë, njësi kompjuterike dhe DVR të kamerave të sigurisë.
Policia bën të ditur se në cilësi të të dyshuarve janë intervistuar 11 persona në prani të avokatëve mbrojtës, ndërsa katër 4 persona të tjerë janë pajisur me ftesë për t’u paraqitur në organet e hetuesisë.
Me vendim të prokurorit kompetent, të gjithë të dyshuarit janë liruar në procedurë të rregullt, ndërsa hetimet lidhur me rastin do të vazhdojnë.
Ky aksion lidhet me kontrollet e zhvilluara në rreth 15 biznese në Prishtinë, të cilat dyshohet se kanë ofruar shërbime estetike ilegale, përfshirë aplikimin e botoksit dhe ndërhyrje të tjera, pa licencë dhe pa staf të kualifikuar mjekësor. /Telegrafi/
Një rast i rëndë dyshohet të ketë ndodhur ditë më parë në qytetin e Ferizajt, ku një i mitur nga Fushë Kosova, po dyshohet se është dhunuar nga një person të cilin e kishte njohur në rrjetet sociale.
I mituri raportohet se ka treguar se përmes rrjetit social TikTok ishte njohur me një person që nuk e njihte më herët.
Lidhur me rastin Telegrafi ka kontaktuar me Prokurorinë Themelore në Prishtinë, të cilët kanë njoftuar se janë në fazën e mbledhjes së provave.
“Prokurori i Shtetit ka pranuar një informacion të tillë në lidhje me këtë çështje. Aktualisht çështja në fjalë është në fazën preliminare të grumbullimit të informacioneve dhe provave tjera të cilat do të shërbejnë për vijimin e procedurës së mëtejshme hetimore”, ka thënë zëdhënësja e kësaj prokurorie, Kaltrina Shala.
Ajo tutje ka shtuar se kjo çështje penale i takon procedurës për të mitur andaj kufizimi i informacioneve është konfidencial.
Ndryshe Policia e Kosovës ka njoftuar se më datë 15.12.2025, rreth orës 11:00, policia e stacionit policor në Fushë Kosovë, ka pranuar informacionin lidhur me një rast të dyshuar të abuzimit ndaj një të mituri.
“Dyshimet e ngritura sugjerojnë se i mituri është kontaktuar përmes rrjeteve sociale dhe se ngjarja dyshohet të ketë ndodhur diku në territorin e Ferizajt. Specialist të policisë për hetimin e rasteve të tilla, në bashkëpunim me institucionet relevante, janë duke ndërmarrë të gjitha veprimet e nevojshme për zbardhjen e plotë të rastit”, thuhet në njoftimin e policisë.
Policia ka shtuar se me autorizim të Prokurorit të Shtetit, gjithnjë duke garantuar konfidencialitetin dhe mbrojtjen e viktimës, është iniciuar një hetim në drejtim të veprës penale “Dhunimi”, përderisa po punohet intensivisht në identifikimin e të dyshuarit dhe përcaktimin e vendndodhjes së tij. /Telegrafi/
Dy persona të panjohur kanë hyrë në oborrin e një personi tjetër dhe kanë shtënë me armë zjarri në drejtim të shtëpisë ku disa predha kanë depërtuar brenda dhe kishin dëmtuar disa mobilie shtëpiake.
Sipas raportit 24 orësh të Policisë së Kosovës bëhet e ditur se rasti ka ndodhur të hënën rreth orës 19:21, në Prishtinë.
Tutje bëhet e ditur se në vendin e ngjarjes janë gjetur dhe sekuestruar 27 gëzhoja.
“Është raportuar se dy persona të panjohur kanë hyrë në oborrin e ankuesit mashkull kosovar dhe kanë shtënë me armë zjarri në drejtim të shtëpisë, ku disa predha kishin depërtuar brenda dhe kishin dëmtuar disa mobile shtëpiake. Në vendin e ngjarjes janë gjetur dhe sekuestruar 27 gëzhoja”, thuhet në raport. /Telegrafi/
Një zyrtar policor dyshohet se ka vdekur sot rreth orës 06:30 në rrugën "Zagrebi", saktësisht para shkollës "Qamil Batalli", në Prishtinë.
Lajmin për Telegrafin e ka konfirmuar zëdhënësi i Policisë së Kosovës për rajonin e Prishtinës, Enis Pllana.
Sipas tij, me rastin është duke u marrë Njësia Rajonale e Trafikut.
"Sot rreth orës 06:30 në rrugën Zagrebi në Prishtinë, ka ndodhur një aksident trafiku, ku ka qenë e përfshirë një veturë. Njësitet policore dhe emergjenca kanë dalë menjëherë në vendin e ngjarjes, ku nga këta të fundit është konstatuar vdekja e viktimës (zyrtar policor), që dyshohet të ketë ndodhë para aksidentit. Me rastin është duke u marrë Njësia Rajonale e Trafikut, ndërsa hetimet janë në zhvillim për të sqaruar shkaqet e sakta të aksidentit", ka thënë Pllana. /Telegrafi/
Një person është larguar nga shtëpia dhe nuk është kthyer më.
Sipas raportit 24 orësh të Policisë së Kosovës bëhet e ditur se ngjarja ka ndodhur të 12.12.2025 rreth orës 20:15, në Prishtinë.
Tutje thuhet se rasti është duke u hetuar.
“Është raportuar se viktima mashkull kosovar është larguar nga shtëpia dhe nuk është kthyer më. Rasti është duke u hetuar”, thuhet në raport. /Telegrafi/
Policia e Kosovës ka arrestuar një shtetas të huaj në Prishtinë, pasi që i njëjti dyshohet për veprën penale “vjedhje e rëndë”, të cilën dyshohet ta ketë kryer gjatë intervalit kohor 20:00–07:14.
Sipas njoftimit zyrtar, i dyshuari ka vjedhur në një lokal një telefon mobil, një laptop, 18 palë këpucë, 5 çanta si dhe 15 shishe me pije alkoolike.
Pas arrestimit, me vendim të prokurorit kompetent, i dyshuari është dërguar në mbajtje.
Rasti është duke u hetuar nga organet kompetente. /Telegrafi/
Policia e Kosovës ka njoftuar se një grua është gjetur e shtrirë në tokë pa shenja jete.
Rasti ka ndodhur të premten në rrugën “Ismet Jashari” në Prishtinë, në ora 15:00
“Raportohet se është gjetur e shtrirë në tokë pa shenja jete viktima femër kosovare, vdekjen e të cilës e ka konstatuar ekipi mjekësor në vendin e ngjarjes”, thuhet në raport.
Me urdhër të prokurorit trupi i pajetë i viktimës është dërguar në IML për obduksion. /Telegrafi/
PRISHTINË, 10 dhjetor /ATSH/ Ka ndërruar jetë në moshën 74-vjeçare një nga emrat më të shquar të sportit kosovar, Nazif Gashi, figurë qendrore e boksit dhe pjesë e gjeneratës së artë të klubit të Prishtinës. Lajmin e hidhur e kanë bërë të ditur familjarët e tij, duke lënë komunitetin sportiv të tronditur dhe të pikëlluar.
Gashi ishte ndër sportistët që formësuan identitetin e boksit kosovar në vitet ’70 dhe ’80, periudhë në të cilën Prishtina dominonte arenën jugosllave dhe ngrinte lart emrin e Kosovës me paraqitje brilante. Ai konsiderohej një prej shtyllave të atij ekipi, duke u bërë shembull disipline, force dhe përkushtimi.
Trashëgimia e tij në sport mbetet e pashlyeshme. Për shumë adhurues dhe ish-boksierë, Gashi ishte jo vetëm kampion në ring, por edhe figurë frymëzuese që i hapi rrugën gjeneratave të reja. Largimi i tij lë një boshllëk të madh, por kujtimi dhe ndikimi i tij do të mbeten gjatë në historinë e sportit kosovar.
Policia e Kosovës ka njoftuar për një rast të lëndimit në Prishtinë, ku një person është arrestuar që dyshohet se pas një mosmarrëveshje në komunikacion dyshohet ta ketë goditë me mjet të mprehtë – thikë viktimën.
Rasti ka ndodhur të hënën, në ora 12:30.
“Është arrestuar i dyshuari mashkull kosovar për shkak se pas një mosmarrëveshje në komunikacion dyshohet ta ketë goditë me mjet të mprehtë – thikë viktimën mashkull kosovar, i cili si pasojë e kësaj ka marr tretman mjekësor”, thuhet në raport.
Policia njofton se është konfiskuar thika e cila dyshohet të jetë përdorë në rast, kurse i dyshuari pas intervistimit me vendim të prokurorit është dërguar në mbajtje. /Telegrafi/
Policia e Kosovës ka bërë të ditur për një rast të vjedhjes së rëndë në Prishtinë.
Rasti ka ndodhur të hënën, në ora 21:56 në rrugën “Fatime Sokoli” në Prishtinë.
“Viktima mashkull kosovar, ka raportuar se kishte vërejtur një person brenda shtëpisë së tij. Njësitë policore në vendin e ngjarjes kanë arrestuar të dyshuarin, mashkull kosovar i cili është intervistuar në prani të avokatit mbrojtës dhe ka pranuar se kishte hyrë brenda në shtëpi dhe kishte vjedhur mjete pune”, thuhet në raport.
Pas intervistimit me vendim të prokurorit i dyshuari është dërguar në mbajtje. /Telegrafi/
Është raportuar se një mashkull kosovar ka dalë nga shtëpia dhe nuk dihet vendndodhja e tij.
Rasti ka ndodhur në Prishtinë, dhe i njëjti është larguar nga shtëpia më 6 dhjetor.
Autoritetet po vazhdojnë kërkimet për të lokalizuar personin e zhdukur dhe kërkojnë ndihmën e qytetarëve për çdo informacion që mund të ndihmojë në gjetjen e tij. /Telegrafi/
Një avion pasagjerësh i kompanisë AJet, i cili operonte fluturimin Prishtinë–Stamboll, ka dalë nga pista menjëherë pas uljes në Aeroportin Ndërkombëtar Sabiha Gökçen në Stamboll.
Avioni i tipit Boeing 737-800, që u ul në pistën e re 06R/24L, ka devijuar nga aksi i taksimit dhe ka përfunduar në një terren të butë pak çaste pas prekjes së tokës.
Si pasojë e incidentit, kompania menaxhuese e aeroportit ka lëshuar një NOTAM, duke njoftuar se pista 06R/24L mbetet e mbyllur për trafik deri në njoftimin e radhës, raporton portali airporthaber2.com.
Mbyllja e njërës prej pistave kryesore gjatë orëve të ngarkuara të operimit ka shkaktuar vonesa të konsiderueshme, ndërsa disa avionë janë detyruar të kryejnë pasim ose të përsërisin procedurat e uljes.
Ekipet emergjente dhe ato teknike të aeroportit janë dërguar menjëherë në vendngjarje.
Aktualisht po zhvillohen punimet për nxjerrjen e sigurt të avionit nga terreni ku ka mbetur i bllokuar.
Sipas informacionit të deritanishëm, nuk raportohet për persona të lënduar.
Autoritetet turke kanë njoftuar se pista do të qëndrojë e mbyllur deri në përfundimin e operacionit të shpëtimit dhe untilizimit të avionit.
Paralelisht, SHGM (Drejtoria e Aviacionit Civil e Turqisë) dhe administrata e aeroportit kanë nisur hetimet për të përcaktuar shkaqet e incidentit./Telegrafi/
Dy prej monumenteve më të dashura të Kosovës kanë marrë sot një hapësirë të re për t’u treguar botës historinë e tyre: në formën e pullave postare.
Posta e Kosovës ka lansuar emisionin e ri filatelik “Sahat Kullat”, duke përfshirë në të Sahat Kullën e Prishtinës dhe Sahat Kullën e Gjakovës, dy prej simboleve që prej shekujsh i kanë dhënë ritmin jetës urbane.
Me këtë edicion, sektori i Filatelisë synon jo vetëm të pasurojë koleksionet e filatelistëve, por edhe të rikthejë vëmendjen te vlerat e trashëgimisë sonë arkitektonike – te ato monumente që shpesh i shohim çdo ditë, por rrallë ndalemi t’i vlerësojmë.
Sahat Kulla e Prishtinës, e ngritur pranë Xhamisë së Mbretit, mbetet një nga pikat më të njohura historike të kryeqytetit. Dikur ishte matësi i kohës së qytetit; sot është dëshmia e një Prishtine që ka kaluar epoka të ndryshme, por ka ruajtur zemrën e saj të vjetër.
Në anën tjetër, Sahat Kulla e Gjakovës, e vendosur në zemër të Çarshisë së Madhe, është pjesë e pandashme e identitetit kulturor të qytetit. Ajo ka sfiduar kohën dhe ngjarjet historike, duke mbetur një prej monumenteve më të dashura për gjakovarët dhe vizitorët.
Vendosja e këtyre dy kullave në pulla postare u jep atyre një jetë të re – një mënyrë për të udhëtuar jashtë kufijve, për të treguar historinë dhe artin e Kosovës në çdo dërgesë që niset nga vendi ynë.
Posta e Kosovës fton qytetarët, koleksionistët dhe bizneset t’i përdorin këto pulla të reja si një mënyrë të thjeshtë, por domethënëse, për të mbështetur dhe promovuar trashëgiminë kulturore të vendit. /Telegrafi/
Një grua ka dalë nga shtëpia dhe deri më tani nuk është kthyer më.
Sipas raportit 24 orësh të Policisë së Kosovës bëhet e ditur se rasti ka ndodhur të enjten rreth orës 12:20, në Prishtinë.
Tutje bëhet e ditur se me urdhër të prokurorit është iniciuar rasti dhe po hetohet.
“Prishtinë / 04.12.2025 – 12:20. Është raportuar se më datë 03.12.2025 nga shtëpia ka dal viktima femër kosovare dhe deri me tani nuk është kthyer në shtëpi. Me urdhër të prokurorit është inicuar rasti dhe është duke u hetuar”, thuhet në njoftim. /Telegrafi/
Login
