Drejtori i Mobilitetit, Donat Lushaku, ka njoftuar se sot po zhvillohet procesi i dezinfektimit të hapësirës në Nënkalimin te Xhamia e Llapit, në lagjen Kodra e Trimave, me përdorimin e mjeteve të parapara higjienike.

Sipas njoftimit, gjatë ditës së nesërme është planifikuar pastrimi gjeneral i nënkalimit me cisternë, me qëllim të përmirësimit të kushteve të higjienës dhe sigurisë për qytetarët.

Lushaku ka apeluar tek banorët që të tregojnë kujdes të shtuar gjatë lëvizjes në këtë hapësirë dhe, nëse është e mundur, të shmangin përdorimin e nënkalimit deri në përfundimin e plotë të punimeve të pastrimit.

Institucionet komunale kanë theksuar se këto veprime po ndërmerren në kuadër të mirëmbajtjes së rregullt të infrastrukturës urbane dhe për garantimin e një ambienti më të sigurt për këmbësorët. /Telegrafi/

Prokuroria Speciale e Republikës së Kosovës ka ngritur aktakuzë ndaj Sh.A., për veprën penale “Mosraportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare”.

Kjo u bë e ditur përmes një postimi në rrjetin social në Facebook nga faqja zyrtare e Sistemit Prokurorial.

Ndër të tjera në njoftim thuhet se i pandehuri akuzohet se, nga viti 2018 e në vazhdimësi deri në vitin 2022, në cilësinë e Kryetarit të Komunës së Prishtinës, me dashje ka paraqitur deklarata të pasakta të pasurisë, përkatësisht duke mos deklaruar deponimet në para të gatshme, të realizuara personalisht gjatë viteve përkatëse.

"Sipas aktakuzës, shuma e përgjithshme e mjeteve të padeklaruara arrin vlerën prej 172,600.00 euro. Rasti i është dërguar për shqyrtim Gjykatës Themelore në Prishtinë, Departamenti Special", thuhet në njoftim. /Telegrafi/

Kryetari i Kryeqytetit ka bërë të ditur se Komuna e Prishtinës po vazhdon bashkëpunimin me Bashkësinë Islame të Prishtinës dhe Shoqatën Bamirëse “Bereqeti”, në kuadër të përkujdesjes sociale për qytetarët, veçanërisht për të moshuarit.

Sipas tij, përmes një donacioni që përfshin mbështetje materiale për personat e moshuar, institucionet dhe organizatat partnere po dëshmojnë rëndësinë e solidaritetit dhe ndihmës reciproke, sidomos gjatë kësaj periudhe.

Kryetari ka falënderuar edhe Shtëpinë e të Moshuarve për bashkëpunimin dhe energjinë pozitive, duke theksuar se angazhimi i përbashkët e bën këtë partneritet edhe më të fuqishëm në shërbim të qytetarëve. /Telegrafi/

Për shkak të punimeve që po zhvillohen për lidhjen e rrugës “Skënder Çeku” me rrugën “Muharrem Fejza”, Komuna e Prishtinës njofton se rruga “Muharrem Fejza” do të mbyllet përkohësisht dhe pjesërisht.

Sipas njoftimit, qarkullimi do të menaxhohet në mënyrë të kontrolluar përmes një shiriti rrugor, me qëllim të sigurimit të rrjedhës sa më të rregullt të trafikut.

Mbyllja e përkohshme do të fillojë më 19 dhjetor 2025, ora 20:00, dhe do të zgjasë deri më 21 dhjetor 2025, ora 20:00.

Komuna falënderon qytetarët për mirëkuptimin dhe bashkëpunimin gjatë kësaj periudhe. /Telegrafi/

Kryeqyteti i Kosovës ka inauguruar “Deep Space 8K”, një hapësirë inovative që sjell për herë të parë në Prishtinë një përvojë të avancuar teknologjike dhe kreative. Lajmi është bërë i ditur nga kryetari i Prishtinës, Përparim Rama, përmes një postimi në rrjetet sociale.

Sipas Ramës, “Deep Space 8K” përfaqëson një dimension të ri për kryeqytetin, jo vetëm si platformë për të parë të ardhmen, por si hapësirë ku ajo përjetohet, krijohet dhe ndërtohet në të tashmen. Ai theksoi se kjo nismë dëshmon ambicien e Prishtinës për të mos ndjekur trendet globale, por për t’i krijuar ato.

Kjo hapësirë synon ta shndërrojë dijen në përvojë konkrete, duke e afruar teknologjinë me njerëzit dhe duke u dhënë formë reale ideve dhe imagjinatës. “Deep Space 8K” pritet të shërbejë si ambient frymëzues për të rinjtë, krijuesit dhe inovatorët, duke nxitur zhvillimin e ideve që e pozicionojnë Prishtinën përtej kufijve tradicionalë.

Realizimi i këtij projekti është bërë i mundur përmes bashkëpunimit me Programin e Kombeve të Bashkuara për Zhvillim (UNDP) dhe organizatën ndërkombëtare Ars Electronica.

Kryetari Rama theksoi se ky partneritet është dëshmi e përkushtimit për ta zhvilluar kryeqytetin përmes dijes, teknologjisë dhe krijimtarisë. /Telegrafi/

Kryetari i Prishtinës, Përparim Rama, ka bërë të ditur se Kryeqyteti po fiton gjithnjë e më shumë vëmendje në forume ndërkombëtare ku diskutohen politikat urbane dhe vizioni për qytetet e së ardhmes.

Përmes një postimi në Facebook, Rama njoftoi se javën e kaluar i është drejtuar asamblesë së Shoqatës së Politikës së Jashtme dhe Shoqatës së Kombeve të Bashkuara të Austrisë, në një takim të nivelit të lartë kushtuar përgjegjësisë dhe zhvillimit urban. Diskutimi, sipas tij, është moderuar nga ish-kancelari i Austrisë, Wolfgang Schüssel.

Ai theksoi se para një audience të përbërë nga diplomatë dhe vendimmarrës të lartë ndërkombëtarë, përfshirë edhe ish-zëvendëssekretaren e përgjithshme të Kombeve të Bashkuara, Angela Kane, ka prezantuar rrugëtimin e transformimit urban të Prishtinës, duke e cilësuar Kryeqytetin si shembull të një qyteti që po ndryshon me vizion, guxim dhe përgjegjësi publike.

Sipas Ramës, pjesëmarrja e Prishtinës në këto forume nuk është simbolike, por dëshmi se Kryeqyteti është shndërruar në një pjesë aktive të dialogut evropian mbi zhvillimin, përfshirjen dhe qëndrueshmërinë urbane, ndërsa përvoja e tij po trajtohet si model diskutimi për qytetet që synojnë avancimin.

Në fund, kryetari i Prishtinës shprehu mirënjohje për organizatorët e ngjarjes, në veçanti për Sekretarin e Përgjithshëm të UNA-Austria, Bernd Hermann, për ftesën dhe mundësinë e krijimit të një dialogu të nivelit të lartë që, sipas tij, e vendos Kryeqytetin në qendër të diskutimeve për të ardhmen e qyteteve. /Telegrafi/

Kryetari i Prishtinës, Perparim Rama, ka pritur sot në takim Anu Prattipati, Zëvendës-Shefe e Misionit në Ambasadën e Shteteve të Bashkuara të Amerikës në Kosovë.

Gjatë vizitës, Prattipati përcolli urimet për mandatin e ri të kryetarit dhe riafirmoi mbështetjen e vazhdueshme të SHBA-së për zhvillimin e kryeqytetit.

Në postimin e tij në Facebook, Rama theksoi se bashkëpunimi me SHBA-në mbetet një nga shtyllat më të rëndësishme të zhvillimit, stabilitetit dhe vizionit afatgjatë të Prishtinës.

“Ky partneritet përfaqëson shumë më tepër sesa bashkëpunim institucional, ai është një aleancë vlerash, e ndërtuar mbi demokracinë, besimin reciprok dhe vizionin e përbashkët për të ardhmen”, shkroi Rama.

Takimi u zhvillua në Odën e Kryeqytetit dhe u fokusua në forcimin e marrëdhënieve ndërinstitucionale dhe bashkëpunimin për projekte të zhvillimit të gjithanshëm të Prishtinës. /Telegrafi/

Kryetari i Prishtinës, Përparim Rama, ka njoftuar se në lagjen Bregu i Diellit është instaluar një ashensor i ri, si pjesë e projekteve të infrastrukturës urbane të kryeqytetit.

Në postimin e tij në Facebook, Rama theksoi se ky është vetëm një nga instalimet që po realizohen, ndërsa projektet do të vazhdojnë edhe në lagje të tjera.

“Në Breg të Diellit instaluam ashensorin e ri. Sipas planit do të vazhdojmë edhe me lagjet tjera të kryeqytetit”, ka shkruar kryetari Rama.

Komuna paralajmëron se investimet në infrastrukturë do të vijojnë me qëllim të rritjes së qasjes dhe lehtësimit të lëvizjes për qytetarët. /Telegrafi/

Fehmi Kupina është rizgjedhur sot Kryesues i Kuvendit Komunal të Prishtinës. Ai mbante të njëjtin post edhe gjatë mandatit të kaluar.

Kupina, i cili më parë ishte pjesë e LDK-së, kishte dhënë dorëheqje për të themeluar partinë e re “Lidhja për Prishtinën”.

Kjo parti arriti të sigurojë katër vende në Kuvendin Komunal, ndërsa Kupina u nominua për të vazhduar drejtimin e Kuvendit.

Në votimin e sotëm, Kupina mori 31 vota pro, katër kundër dhe dy abstenime, duke konfirmuar kështu rizgjedhjen e tij në këtë post, raporton Telegrafi.

Ai falënderoi anëtarët për besimin e dhënë dhe premtoi angazhim të plotë për funksionim të drejtë dhe efikas të Kuvendit.

“Është nder i madh të marr këtë detyrë, të cilën e marr me përgjegjësi. Garantoj për funksionim të drejtë, efikas dhe të hapur për të gjithë”, tha Kupina pas rizgjedhjes. /Telegrafi/

Gjatë seancës solemne të Kuvendit Komunal të Prishtinës, një asamblist i Lëvizjes Vetëvendosje i dorëzoi kryetarit të Prishtinës, Përparim Rama, një shënim ku e uronte për “koalicionin mes LDK-së, PDK-së, AAK-së, Nismës dhe PSD-së”.

Ngjarja zgjoi vëmendjen në sallë, ndërsa mbishkrimi më pas u hoq nga një asamblist i LDK-së.

Përparim Rama betohet për mandatin e dytë si kryetar i Prishtinës

Me largimin e mbishkrimit, reagoi asamblisti i VV-së, Egzon Azemi, që tha: "Ne duke iu uruar kryetarit Rama detyrën e sapo marrë, vendosëm një urim ku shkruante 'urime koalicioni mes LDK-së, PDK-së, AAK-së, Nismës dhe PSD-së', se ka edhe shumë, por nuk e di pse po iu pengon ky urim, pasi e larguat letrën”.

Ky incident i vogël ka ngjallur reagime të ndryshme në Kuvend, duke vënë në pah tensionet dhe humorin në ditën e inaugurimit të mandatit të ri të kryetarit Rama. /Telegrafi/

Kryetari i ri i Prishtinës, Përparim Rama, u betua të martën para asamblistëve të rinj gjatë mbledhjes inauguruese të Kuvendit Komunal.

Në ceremoninë solemne, Rama premtoi se do të ushtrojë detyrat e tij në krye të kryeqytetit me ndershmëri, besnikëri, në mënyrë të paanshme dhe në përputhje me ligjin.

“Bazuar në nenin 57 të Ligjit për Qeverisje Lokale, me rastin e zgjedhjes si kryetar i komunës, bëj betimin para anëtarëve të Kuvendit të Komunës si më poshtë: Unë, Përparim Rama, betohem se do t’i kryej detyrat dhe do t’i ushtroj kompetencat si Kryetar i Komunës së Prishtinës me nder dhe besnikëri, në përputhje me ligjin, për një jetë të qetë dhe të dinjitetshme për të gjithë”, deklaroi Rama, raporton Telegrafi.

Ky është mandati i tij i dytë si kryetar i Prishtinës.

Kuvendi Komunal i Prishtinës përbëhet nga 51 asamblistë. Sipas rezultateve të raundit të parë të zgjedhjeve lokale më 12 tetor, LDK-ja ka 15 përfaqësues, PDK-ja dhe LVV-ja nga 12, AAK-ja 5, “Lidhja për Prishtinën” 4, ndërsa Lista GUXO, PSD-ja dhe Nisma kanë nga një asamblist. /Telegrafi/

Ekipet e Kompanisë Rajonale “Pastrimi” kanë ndërhyrë sot në një lokacion të mbingarkuar me mbeturina të hedhura jashtë kontejnerëve, duke rikthyer hapësirën në gjendje të rregullt pas një aksioni pastrimi.

Sipas kompanisë, para intervenimit zona paraqiste rrezik për mjedisin dhe shëndetin publik, për shkak të sasive të mëdha të mbeturinave të depozituara në mënyrë të pakontrolluar.

Pas aksionit, hapësira është pastruar plotësisht dhe është rivendosur rendi higjienik.

KRM “Pastrimi” ka apeluar qytetarët që të mos hedhin mbeturina jashtë kontejnerëve dhe të kontribuojnë për një ambient më të pastër.

“Së bashku e mbajmë Prishtinën të pastër”, thuhet në njoftimin e kompanisë. /Telegrafi/

Kryetari i Prishtinës, Përparim Rama, ka zhvilluar sot një takim të rëndësishëm me Jeremy Long, zëvendësdrejtor në Zyrën për Çështjet e Evropës Qendrore në Departamentin Amerikan të Shtetit.

Rama bëri të ditur se në takim ka prezantuar vizionin e Prishtinës për katër vitet e ardhshme, duke vënë theksin te sfidat aktuale që, sipas tij, po shkakton Qeveria e Kosovës përmes bllokimit të vazhdueshëm të buxhetit të kryeqytetit.

Ai tha se bisedimet u fokusuan edhe te mundësitë për tërheqjen e investimeve amerikane, veçanërisht në kuadër të përgatitjeve për Lojërat Mesdhetare 2030.

Sipas Ramës, energjetika alternative dhe projektet e mëdha zhvillimore përbëjnë fusha ku bashkëpunimi me investitorët amerikanë mund të sjellë përfitime konkrete.

Rama njoftoi gjithashtu se së shpejti komuna do të organizojë një konferencë të posaçme për të prezantuar mundësitë e reja të investimeve në Prishtinë, me synimin për të krijuar partneritete të reja ndërkombëtare.

Ekipet operacionale të KRM “Pastrimi” kanë ndërhyrë sot në lagjen Emshir, përgjatë Rrugës “Nebih Gashi”, duke larguar mbeturinat inerte dhe ato vëllimore të hedhura jashtë hapësirave të parapara për deponim.

Punëtorët e kompanisë, me kamionët dhe ngarkuesit funksionalë, kanë kryer pastrimin e plotë të zonës, si pjesë e mirëmbajtjes së rregullt në lagjet që mbulohen me shërbim.

Me këtë intervenim është rikthyer pastërtia dhe rendi në hapësirën publike, e cila ishte e ngarkuar me mbetje të hedhura në mënyrë të pakontrolluar.

Kompania ka falënderuar ekipet në terren për punën e tyre të përditshme dhe njëkohësisht ka apeluar te qytetarët që të mos hedhin mbeturina inerte nëpër lagje.

Sipas KRM “Pastrimi”, këto mbetje duhet të dorëzohen vetëm në pikat dhe përmes procedurave të parapara nga kompania.

“Pastërtia e qytetit është përgjegjësi e përbashkët”, theksohet në njoftim. /Telegrafi/

Komuna e Prishtinës njofton qytetarët se Forca e Sigurisë së Kosovës (FSK) do të zhvillojë stërvitje ushtarake në fshatin Koliq dhe zonën e Badovcit më 12 dhe 13 dhjetor 2025, sipas planit të rregullt stërvitor.

Gjatë këtyre ditëve, qytetarët do të vërejnë lëvizje të këmbësorisë dhe automjeteve ushtarake në terren, por autoritetet theksojnë se nuk ka arsye për shqetësim, pasi aktiviteti zhvillohet në kuadër të planit të stërvitjeve rutinore.

Komuna falënderon qytetarët për mirëkuptim dhe u kërkon të jenë të vëmendshëm, duke mos u shqetësuar për aktivitetin ushtarak të planifikuar. /Telegrafi/

Drejtoria e Arsimit në Prishtinë ka nënshkruar dy marrëveshje të rëndësishme bashkëpunimi që synojnë rritjen e cilësisë së arsimit dhe krijimin e mundësive të reja për nxënësit e kryeqytetit.

Marrëveshjet janë formalizuar nën udhëheqjen e drejtorit të DKA-së, Samir Shahini, me Institutin për Teknologji dhe Shoqëri si dhe me Kosova Global Talent Center.

Sipas DKA-së, këto partneritete do të fokusohen në tre fusha kryesore: forcimin e privatësisë dixhitale, përmirësimin e mirëqenies mendore të nxënësve, dhe zhvillimin e talenteve përmes programeve bashkëkohore, përcjell Telegrafi.

Përmes këtyre bashkëpunimeve, nxënësve do t’u ofrohen mundësi të reja për trajnim, mentorim dhe pjesëmarrje në gara vendore e ndërkombëtare.

Po ashtu, mbështetje e njëjtë do t’u sigurohet edhe mësimdhënësve, me qëllim që puna e tyre e përditshme të jetë sa më efektive në përgatitjen e nxënësve për të ardhmen.

DKA e Prishtinës ka theksuar se këto marrëveshje hapin rrugën për projekte të reja dhe përmirësime të qëndrueshme në sistemin arsimor të kryeqytetit. /Telegrafi/

Trafiku Urban ka njoftuar se të gjitha ditët e humbura të shfrytëzimit të biletave mujore, për shkak të ndërprerjes së shërbimit gjatë protestës, do të kompensohen, përcjell Telegrafi.

Sipas ndërmarrjes, vlefshmëria e biletës do të zgjatet automatikisht për nëntë ditë, menjëherë pas procesit të vulosjes.

Në njoftimin e publikuar në faqen zyrtare, qytetarët janë udhëzuar për procedurën që duhet ndjekur për të përfituar nga kompensimi:

• Qytetarët duhet të paraqiten në cilindo prej kiosqeve të Trafikut Urban.
• Të prezantojnë biletën mujore aktuale.
• Punëtori i kioskës do të vendosë vulën zyrtare të zgjatjes, pa të cilën kompensimi nuk realizohet.
• Pas vulosjes, zgjatja e vlefshmërisë aplikohet automatikisht.

Trafiku Urban ka bërë të ditur edhe vendndodhjet dhe oraret e kiosqeve ku ofrohet ky shërbim:

1. Kioska prapa objektit të Komunës (tek “Plepat”)

• E hënë – E shtunë: 07:00 – 21:00
• E diel: 08:00 – 16:00

2. Kioska në lagjen “Kodra e Diellit” (tek “Banesat e Bardha”)

• E hënë – E premte: 07:00 – 21:00
• E shtunë: 07:00 – 14:00

3. Kioska në Bulevardin “Bill Clinton” (afër nënkalimit)

• E hënë – E shtunë: 07:00 – 21:00
• E diel: 08:00 – 16:00

Në fund të njoftimit theksohet se kompensimi bëhet vetëm pas vulosjes së biletës. /Telegrafi/

KRU Prishtina ka njoftuar se sot ekipet e mirëmbajtjes do të kryejnë punime në disa lokacione të kryeqytetit.

Intervenimet do të zhvillohen në këto rrugë:

• Rr. “Gani Demolli”
• Rr. “Dëshmorët e Marevcit”
• Rr. “Gjon Sereqi”
• Rr. “Bekim Fehmiu”
• Rr. “Ernest Zariqi”
• Rr. “Nexhmi Llumnica”
• Rr. “Ismajl Qemajli”
• Rr. “Faik Ukë Hoxha”

Nga kompania theksojnë se gjatë kohës së punimeve në këto zona mund të ketë ndërprerje të përkohshme të furnizimit me ujë të pijshëm.

KRU Prishtina kërkon mirëkuptimin e konsumatorëve deri në përfundimin e këtyre intervenimeve. /Telegrafi/

Kryetari i Prishtinës, Përparim Rama, ka pritur në Odën e Kryeqytetit karateistin kosovar Islam Selmani, i cili u shpall nënkampion bote në Kampionatin Botëror të Karatesë që po mbahet në Kajro.

Rama u shpreh “super krenar” për arritjen historike të sportistit, duke e përgëzuar për suksesin dhe përfaqësimin dinjitoz të Kosovës në arenën ndërkombëtare.

Islam Selmani arriti medaljen e argjendtë në kategorinë deri në 60 kilogramë, pasi në finalen e madhe u përball me turkun Eray Samdan, një prej karateistëve më të suksesshëm në botë.

Pas një dueli të fortë, Selmani u rendit i dyti, duke shënuar një rezultat që hyn në historinë e sportit kosovar.

Ditë më parë, ai kishte siguruar kualifikimin në finale pas një fitoreje bindëse 9:1 ndaj sportistit uzbek, Mekhriddin Turakhonov.

Me këtë arritje, Selmani bëhet karateisti i parë nga Kosova që fiton medalje të argjendtë në një Kampionat Botëror, duke e ngritur lart emrin e vendit dhe duke dëshmuar potencialin e jashtëzakonshëm të sportistëve të rinj.

Kryetari Rama theksoi se të rinj të tillë po e bëjnë Kosovën krenare çdo ditë. /Telegrafi/

Kompania Rajonale e Mbeturinave “Pastrimi” ka njoftuar se ekipet e saj po vazhdojnë punën me intensitet të shtuar, duke operuar ditë e natë për të garantuar pastërtinë e kryeqytetit.

Sipas kompanisë, punëtorët janë angazhuar në mirëmbajtjen e hapësirave publike gjatë aktiviteteve festive, ndërsa kanë reaguar me kohë edhe në rastet e raportuara për dëmtimin e kontejnerëve në terren.

KRM “Pastrimi” thekson se mbajtja e qytetit të pastër është përgjegjësi e përbashkët dhe se ekipet e saj mbeten vazhdimisht në detyrë për t’u siguruar që mjedisi publik të jetë i rregulluar dhe i pastër për të gjithë qytetarët. /Telegrafi/