NJU JORK, 30 dhjetor /ATSH-DPA/- Shtetet e Bashkuara të Amerikës mbrojtën dje Izraelin nga kritikat që lidhen me njohjen e Somalilandit si shtet të pavarur.

Të premten, Izraeli u bë vendi i parë në botë që njohu rajonin e shkëputur të Somalilandit si shtet sovran.

Somalilandi, një rajon mysliman në Somalinë veriore me disa milionë banorë, ka qenë praktikisht i pavarur për më shumë se tre dekada.

Gjatë një seance emergjente të Këshillit të Sigurimit të OKB-së (UNSC) dje në Nju Jork, ambasadorja amerikane, Tammy Bruce tha se Izraeli kishte “të njëjtën të drejtë për të zhvilluar marrëdhënie diplomatike” si çdo shtet tjetër sovran.

“Këtë vit, disa vende, përfshirë anëtarët e këtij Këshilli, morën vendimin e njëanshëm për të njohur shtetin palestinez joekzistent. E megjithatë, nuk u thirr asnjë takim emergjent për të shprehur zemërimin e këtij Këshilli”, tha Bruce.

“Takime të tilla si ky i sotmi shpërqendrojnë vëmendjen nga puna serioze për të adresuar çështjet e paqes dhe sigurisë ndërkombëtare, duke përfshirë si në Lindjen e Mesme ashtu edhe në Bririn e Afrikës”, shtoi ajo.

Bruce tha se nuk kishte asnjë njoftim për të bërë në lidhje me njohjen e Somalilandit nga SHBA-ja.

Vendimi i Izraelit erdhi disa ditë përpara se Somalia të merrte presidencën e rradhës të Këshillit të Sigurimit të OKB-së, në fillim të janarit.

Përfaqësuesi i Somalisë në Këshillin e Sigurimit të Kombeve të Bashkuara, Abu Bakr Dahir Osman, e hodhi poshtë vendimin e Izraelit duke e quajtur atë “të pavlefshëm”.

“Ky akt agresioni synon të inkurajojë fragmentimin e Somalisë”, tha ai, duke u bërë thirrje shteteve anëtare ta dënonin atë “pa mëdyshje”. //a.i/

The post NJU JORK – SHBA mbron Izraelin nga kritikat për njohjen e Somalilandit si shtet të pavarur appeared first on Agjencia Telegrafike Shqiptare.

UASHINGTON, 30 dhjetor /ATSH-DPA/- Kompania amerikane e prodhimit të avionëve “Boeing” ka siguruar një kontratë prej 8,58 miliardë dollarësh për “Programin Izraelit F-15”, njoftoi dje në mbrëmje Pentagoni.

“Kjo kontratë parashikon projektimin, integrimin, instrumentimin, testimin, prodhimin dhe dorëzimin e 25 avionëve të rinj F-15IA për Forcat Ajrore Izraelite – me një opsion që përfshin 25 avionë të tjerë F-15IA”, tha Pentagoni.

Puna do të kryhet në Saint Louis, Mizuri, dhe pritet të përfundojë deri më 31 dhjetor 2035.

“Kontrata përfshin shitje ushtarake të huaja për Shtetin e Izraelit – e cila u dha si një blerje me burim të vetëm”, shtoi Pentagoni.

SHBA-ja është aleati kryesor dhe furnizuesi i armëve i Izraelit.

Ky njoftim erdhi pas një takimi midis presidentit të SHBA-së Donald Trump dhe kryeministrit Izraelit Benjamin Netanyahu dje në Florida. //a.i/

The post SHBA – “Boeing” kontratë prej 8,58 miliardë dollarësh me Izraelin për avionët F-15 appeared first on Agjencia Telegrafike Shqiptare.

TEL AVIV, 29 dhjetor /ATSH-DPA/ – Izraeli po planifikon të zhvillojë më tej sistemin e tij të ri të interceptimit me laser me fuqi të lartë, në mënyrë që të mund të instalohet edhe në avionë, përveç përdorimit në tokë, tha sot një nga punonjësit e kërkimeve.

“Jemi tashmë në gjeneratën tjetër”, tha  për transmetuesin “Kan”,  Daniel Gold, kreu i kërkimeve dhe zhvillimit për mbrojtjen.

Forcat izraelite morën dje sistemin e interceptimit me lazer me fuqi të lartë, të njohur si “Iron Beam”, i cili do të integrohet në sistemet ekzistuese të mbrojtjes kundër raketave me shumë shtresa.

Sistemi i lazerit u zhvillua nga kompanitë izraelite të mbrojtjes “Elbit Systems “dhe “Rafael”, sipas Ministrisë së Mbrojtjes.

“Iron Beam” është dizajnuar për të punuar paralel me sistemet ”Iron Dome”, ”David’s Sling” dhe ”Arrow”.

”Testet kanë treguar se sistemi mund të ndalojë në mënyrë të besueshme raketat, mortajat, avionët dhe dronët”, tha ministria, duke shtuar se funksionimi i tij është dukshëm më i lirë se sistemet konvencionale me raketa./ /Ad.Ab./  a.jor.

The post TEL AVIV – Izraeli planifikon vendosjen e sistemeve me lazer në avionë appeared first on Agjencia Telegrafike Shqiptare.

Kryeministri izraelit Benjamin Netanyahu ndodhet në Mar-a-Lago ku edhe është pritur nga presidenti amerikan Donald Trump.

Gjithashtu kanë mbërritur edhe delegacionet izraelite dhe ato amerikane ku pritet të ketë diskutime mes tyre.

Trump duke iu përgjigjur fillimisht disa pyetjeve të gazetarëve, tha se në fokus do të jetë edhe rindërtimi i Gazës. Gjithashtu Trump paralajmëroi se nëse Irani përpiqet të armatoset, atëherë SHBA nuk mund të qëndrojë e heshtur.

“Kam dëgjuar se Irani po përpiqet të ndërtohet përsëri, dhe nëse po do të na duhet t’i rrëzojmë, do t’i rrëzojmë, do t’i shkatërrojmë plotësisht. Por shpresojmë që kjo të mos ndodhë. Kam dëgjuar që Irani dëshiron të bëjë një marrëveshje. Nëse ata duan të bëjnë një marrëveshje, kjo është shumë më e zgjuar”, tha ai.

Ndërsa Netanyahu ka vlerësuar mbështetjen e Trump, ndërsa është shprehur se “Izraeli kurrë nuk ka pasur një mik si Presidenti Trump.

GAZA/TEL AVIV, 29 dhjetor /ATSH-DPA/ – Grupi ekstremist palestinez Hamas konfirmoi sot  zyrtarisht vdekjen e pesë anëtarëve të lartë të tij gjatë sulmeve izraelite në Rripin e Gazës, përfshirë vëllanë e Yehya al-Sinwarit, i konsideruar gjerësisht si arkitekti i sulmeve të 7 tetorit.

Mes të vrarëve është Mohammed al-Sinwar, si edhe Abu Obeida, ish-zëdhënës i brigadave ”Al-Qassam”, krahu ushtarak i Hamasit, si dhe komandanti i lartë Raed Saad.

Izraeli kishte njoftuar vrasjen e Saadit më 13 dhjetor, ndërsa ushtria izraelite raportoi që në qershor se kishte gjetur eshtrat e al-Sinwarit në një tunel nëntokësor në Gaza.

Raed Saad konsiderohej planifikuesi kryesor i sulmeve të 7 tetorit 2023 në jug të Izraelit, ku u vranë rreth 1 200 persona dhe më shumë se 250 të tjerë u rrëmbyen dhe u dërguan në Rripin e Gazës.

Në kuadër të fushatës ushtarake që pasoi, Izraeli ka vrarë disa drejtues të Hamasit në Gaza, përfshirë Yehya al-Sinwarin dhe komandantin e lartë Mohammed Deif. Shefi politik i grupit, Ismail Haniyeh, u vra vitin e kaluar në një sulm në Teheran.

Ushtria izraelite vazhdon të synojë udhëheqjen e Hamasit në Gaza, pavarësisht armëpushimit që hyri në fuqi më 10 tetor.

Ndërkohë, Khalil al-Haya, zyrtari më i lartë i Hamasit jashtë territorit palestinez, kalon pjesën më të madhe të kohës në Katar. Ai vazhdon të kryesojë delegacionin e Hamasit në negociatat indirekte me Izraelin, pasi i mbijetoi një sulmi izraelit ndaj një grupi zyrtarësh të Hamasit në Doha në dhjetor./   /Ad.Ab./ a.jor.

The post GAZA – Hamasi konfirmon vrasjen e pesë zyrtarëve të lartë nga Izraeli appeared first on Agjencia Telegrafike Shqiptare.

ATHINË, 29 dhjetor /ATSH/ – Greqia, Izraeli dhe Qiproja do të shtojnë manovrat e përbashkëta ajrore dhe detare në Mesdheun lindor gjatë vitit 2026, duke thelluar bashkëpunimin e tyre në fushën e mbrojtjes, bënë të ditur sot zyrtarë ushtarakë grekë, sipas Reuters.

Tre vendet e Mesdheut lindor janë afruar ndjeshëm gjatë dekadës së fundit përmes stërvitjeve të përbashkëta ushtarake, prokurimeve në mbrojtje dhe bashkëpunimit energjetik, zhvillime që ndiqen nga afër nga rivali rajonal, Turqia.

Shtabi i Përgjithshëm i Forcave të Armatosura të Greqisë (GEETHA) njoftoi se javën e kaluar, në Qipro, zyrtarë të lartë ushtarakë nga të tre vendet nënshkruan një plan të përbashkët veprimi për bashkëpunim në mbrojtje, pa dhënë detaje të tjera.

Marrëveshja pason një takim në Jerusalem mes kryeministrit grek Kyriakos Mitsotakis, presidentit qipriot Nikos Christodoulides dhe kryeministrit izraelit Benjamin Netanyahu, ku u nënshkrua një marrëveshje për forcimin e sigurisë detare dhe avancimin e projekteve të ndërlidhjes energjetike.

Një zyrtar i lartë grek, i njohur me çështjen, tha se marrëveshja ushtarake do të përfshijë stërvitje të përbashkëta detare dhe ajrore, si edhe transferim të njohurive nga Izraeli drejt Greqisë dhe Qipros për t’u përballur me kërcënime “asimetrike” dhe “simetrike”.

“Greqia dhe Izraeli do të intensifikojnë stërvitjet e përbashkëta pas armëpushimit në Gaza, me pjesëmarrjen e Qipros”, tha zyrtari, duke shtuar se Athina planifikon të marrë pjesë në stërvitjen detare izraelite “Noble Dina” në muajt në vijim në Mesdheun lindor.

Nga qeveria qipriote nuk pati koment të menjëhershëm, por partia kryesore e opozitës, AKEL (Komuniste), shprehu rezerva.

“Christodoulides po thellon bashkëpunimin ushtarak-politik me Izraelin pa marrë parasysh rreziqet dhe pasojat e kësaj zgjedhjeje”, thuhet në deklaratën e saj.

Greqia dhe Qiproja kanë blerë tashmë sisteme raketore nga Izraeli me vlerë miliarda euro.

Athina po ashtu është në bisedime për të blerë nga Izraeli sisteme kundërajrore dhe kundër-raketore me rreze të mesme dhe të gjatë veprimi për një sistem të planifikuar shumë-shtresor të mbrojtjes ajrore dhe kundër dronëve, të njohur si “Mburoja e Akilit”, me kosto të vlerësuar rreth tre miliardë euro (3,5 miliardë dollarë).

Këtë muaj, parlamenti grek miratoi blerjen e 36 sistemeve të artilerisë raketore PULS nga Izraeli, për të forcuar mbrojtjen përgjatë kufirit verilindor të Greqisë me Turqinë dhe në ishujt grekë të detit Egje./   /Ad.Ab./

The post FOKUS – Greqia, Izraeli dhe Qiproja intensifikojnë manovrat e përbashkëta në Mesdheun Lindor appeared first on Agjencia Telegrafike Shqiptare.

NJU JORK, 28 dhjetor /ATSH-DPA/ – Këshilli i Sigurimit i OKB-së do të thërrasë nesër një takim urgjent, pas njohjes së diskutueshme të Somalilandit si shtet i pavarur nga ana e Izraelit.

Përpara seancës, 21 vende me shumicë myslimane lëshuan një deklaratë të përbashkët duke paralajmëruar për pasoja serioze nga vendimi izraelit mbi paqen dhe sigurinë në Bririn e Afrikës dhe në rajonin më të gjerë të Detit të Kuq.

Somalilandi, një rajon me shumicë myslimane në Somalinë veriore me një popullsi prej disa milionësh, ka vepruar ”de facto” në mënyrë të pavarur për më shumë se tre dekada.

Të premten, Izraeli u bë vendi i parë në botë që njohu pavarësinë e territorit të shkëputur, por që u dënua nga qeveria somaleze dhe partnerët rajonalë.

Vendimi erdhi vetëm disa ditë para se Somalia të marrë presidencën e radhës të Këshillit të Sigurimit të OKB-së.

Deklarata e përbashkët, e publikuar nga Katari, përshkroi refuzimin e prerë të 21 vendeve për vendimin izraelit duke paralajmëruar se ai përbën një shkelje të rëndë të parimeve të së drejtës ndërkombëtare.

Ministri i jashtëm i Somalilandit, Abdirahman Dahir Adam, i tha transmetuesit izraelit ”Channel 12” se ky veprim nuk kishte të bënte fare me konfliktin në Gaza.

Sipas zyrës së kryeministrit izraelit Benjamin Netanyahu, njohja u bë “në frymën e Marrëveshjeve të Abrahamit”, të cilat panë disa vende arabe të njihnin zyrtarisht pavarësinë e Izraelit.

Gazeta ”Times of Israel” theksoi se Emiratet e Bashkuara Arabe, Bahreini dhe Maroku – të cilët iu bashkuan të gjithë Marrëveshjeve të Abrahamit – nuk ishin midis nënshkruesve të deklaratës së përbashkët mbi njohjen e Somalilandit./  a.jor.

The post OKB – Takim urgjent i KS pas njohjes së Somalilandit nga Izraeli appeared first on Agjencia Telegrafike Shqiptare.

Presidenti iranian, Masoud Pezeshkian, tha në një intervistë të shtunën se Shtetet e Bashkuara, Izraeli dhe Evropa po zhvillojnë “luftë totale” kundër vendit të tij. Ai e përshkroi fushatën e presionit kundër Teheranit si më komplekse dhe dëmtuese sa lufta Iran-Irak.

“Sipas mendimit tim, ne jemi në një luftë të plotë me Shtetet e Bashkuara, Izraelin dhe Evropën; ata nuk duan që vendi ynë të qëndrojë në këmbët e veta”, tha Pezeshkian.

Ai tha se lufta aktuale është më e keqe se lufta në Irak në vitet 1980.

“Nëse dikush e kupton siç duhet, kjo luftë është shumë më komplekse dhe më e vështirë se ajo luftë. Në luftën me Irakun, situata ishte e qartë; ata qëlluan raketa dhe ishte e qartë se ku do të kundërsulmonim. Por këtu, ata tani po na rrethojnë në çdo aspekt, duke na vënë nën presion dhe në qoshe të ngushta, duke krijuar probleme – ekonomikisht, kulturorisht, politikisht dhe në aspektin e sigurisë.”, shtoi ai.

Kujtojmë që disa muaj më parë, Izraeli dhe Irani shkëmbyen sulme me raketa kundrejt njëri-tjetrit.

Po ashtu edhe SHBA goditi tre objekte bërthamore iraniane në Fordo, Natanz dhe Esfahan për të shkatërruar programin bërthamor të Iranit, pasi diplomacia dështoi ta kthente Teheranin në tavolinën e negociatave.

The post Irani: Jemi në luftë totale me SHBA-në, Izraelin dhe Evropën! Po na rrethojnë në çdo aspekt appeared first on Albeu.com.

TEL AVIV, 26 dhjetor /ATSH/- Izraeli është bërë vendi i parë që njeh zyrtarisht republikën e vetëshpallur të Somalilandit si një shtet të pavarur dhe sovran, sipas “Reuters”.

Ky veprim mund të ndryshojë dinamikën rajonale dhe të vërë në provë Somalinë, e cila prej kohësh ka kundërshtuar shkëputjen.

Kryeministri izraelit, Benjamin Netanyahu tha se Izraeli do të kërkonte bashkëpunim të menjëhershëm me Somalilandin në bujqësi, shëndetësi, teknologji dhe ekonomi.

Në një deklaratë, ai përgëzoi presidentin e Somalilandit, Abdirahman Mohamed Abdullahi dhe vlerësoi udhëheqjen e tij dhe e ftoi atë të vizitonte Izraelin.

Marrëveshjet e vitit 2020 u ndërmjetësuan nga administrata e parë Trump dhe përfshinin formalizimin e marrëdhënieve diplomatike të Izraelit me Emiratet e Bashkuara Arabe dhe Bahreinin, me vende të tjera që u bashkuan më vonë.

Kryeministri izraelit Netanyahu, ministri i Jashtëm Gideon Saar dhe presidenti i Somalilandit nënshkruan sot një deklaratë të përbashkët të njohjes së ndërsjellë.

Abdullahi tha në një deklaratë se Somalilandi do t’i bashkohej Marrëveshjeve të Abrahamit, duke e quajtur atë një hap drejt paqes rajonale dhe globale.

Ai tha se Somalilandi ishte i përkushtuar për ndërtimin e partneriteteve, rritjen e prosperitetit të ndërsjellë dhe promovimin e stabilitetit në të gjithë Lindjen e Mesme dhe Afrikën.

Ndërkohë, Egjipti tha se ministri i Jashtëm, Badr Abdelatty kishte zhvilluar sot biseda telefonike me homologët e tij nga Somalia, Turqia dhe Xhibuti për të diskutuar zhvillimet e rrezikshme në Bririn e Afrikës pas njoftimit të Izraelit.

“Ministrat dënojnë njohjen e Somalilandit nga Izraeli, rikonfirmojnë mbështetjen e tyre të plotë për unitetin dhe integritetin territorial të Somalisë dhe paralajmërojnë se njohja e rajoneve separatiste përbën një kërcënim për paqen dhe sigurinë ndërkombëtare”, tha Ministria e Jashtme e Egjiptit.

Somalilandi ka gëzuar autonomi, si dhe paqe dhe stabilitet relativ, që nga viti 1991, kur Somalia u zhyt në luftë civile, por rajoni i shkëputur nuk ka arritur të sigurojë asnjë njohje.

Gjatë viteve, Somalia ka punuar me aktorë ndërkombëtarë kundër njohjes së Somalilandit.

Ish-protektorati britanik shpreson që njohja e pavaresisë së Somalilandit nga Izraeli do të nxisë shtetet e tjera të ndjekin shembullin, duke rritur ndikimin e tij diplomatik dhe aksesin në tregjet ndërkombëtare. //a.i/

The post FOKUS – Izraeli bëhet vendi i parë që njeh zyrtarisht Somalilandin si shtet të pavarur appeared first on Agjencia Telegrafike Shqiptare.

TEL AVIV, 26 dhjetor /ATSH-DPA/- Dy persona janë vrarë dhe disa të tjerë janë plagosur në një sulm terrorist në Izraelin verior, raportoi sot media izraelite, duke cituar burime policore.

“Një sulmues palestinez e përplasi makinën e tij me një grup këmbësorësh pranë Beit She’an, duke vrarë një burrë 68-vjeçar dhe duke plagosur të paktën dy persona të tjerë, përfshirë një djalë 16-vjeçar”, thanë zyrtarët.

Sulmuesi më pas vrau një grua 18-vjeçare me thikë në hyrje të Ein Harod pranë qytetit Afula. Një roje sigurie që ndodhej rastësisht i pranishëm qëlloi dhe plagosi sulmuesin.

Policia më vonë shkoi në një spital për të arrestuar të dyshuarin 37-vjeçar, i cili tha se ishte një palestinez nga Bregu Perëndimor.

Sipas ushtrisë, i dyshuari kishte qenë ilegalisht në Izrael për disa ditë.

Pavarësisht një rritjeje të përgjithshme të dhunës që nga fillimi i luftës në Gaza në tetor 2023, incidente të tilla fatale janë më pak të zakonshme në Izraelin verior sesa në Bregun Perëndimor, ku rreth 700 000 kolonë izraelitë jetojnë midis 3 milionë palestinezëve në vendbanime të konsideruara të paligjshme sipas ligjit ndërkombëtar. //a.i/

The post IZRAEL – Dy të vrarë dhe disa të plagosur pas një sulmi terrorist  appeared first on Agjencia Telegrafike Shqiptare.

BERLIN, 24 dhjetor /ATSH-DPA/- Më shumë se një duzinë vendesh, kryesisht nga Evropa, kritikuan ashpër miratimin e kabinetit izraelit për ndërtimin e 19 vendbanimeve të reja në Bregun Perëndimor – duke i bërë thirrje Izraelit të anulonte vendimin.

Grupi i vendeve përfshin Gjermaninë, Belgjikën, Kanadanë, Danimarkën, Francën, Italinë, Islandën, Irlandën, Japoninë, Maltën, Holandën, Norvegjinë, Spanjën dhe Britaninë e Madhe.

“Ata dënuan veprimet e Izraelit, duke thënë se ato jo vetëm që shkelnin të drejtën ndërkombëtare, por edhe rrezikonin të nxisnin paqëndrueshmëri”, thuhet në një deklaratë të përbashkët të postuar në faqen e internetit të Ministrisë së Jashtme Gjermane.

“Miratimi i vendbanimeve të reja rrezikon gjithashtu të minojë planin e paqes në Gaza dhe dëmton perspektivat për paqe dhe siguri afatgjatë në të gjithë rajonin”, sipas deklaratës.

Bregu Perëndimor i pushtuar nga Izraeli në vitin 1967

Izraeli miratoi këtë javë, krijimin e 19 vendbanimeve të reja në Bregun Perëndimor të pushtuar.

Në vitin 1967, Izraeli mori kontrollin e Bregut Perëndimor dhe Jerusalemit Lindor, ku sot jetojnë më shumë se 700 000 kolonë midis rreth 3 milionë palestinezëve. //a.i/

 

The post FOKUS – Vendet evropiane thirrje Izraelit të anulojë planet për vendbanime të reja në Bregun Perëndimor appeared first on Agjencia Telegrafike Shqiptare.

Pretendimi: Izraeli, Greqia dhe Qipro formojnë ushtrinë e përbashkët kundër Turqisë

Verdikti: Mungon konteksti

—————————————————————

Në rrjete sociale, përfshi ato shqipfolëse, po qarkullon lajmi se Izraeli, Greqia dhe Qipro formuan një ushtri të përbashkët kundër rrezikut turk.

Megjithatë, ky pretendim nuk shoqërohet me ndonjë provë, burim apo referencë që e mbështet atë.

Në fakt, ky lajm nuk është i saktë, megjithëse duket se është frymëzuar nga zhvillime të vërteta.

Specifikisht, një samit trepalësh u mbajt mes krerëve të Izraelit, Greqisë dhe Qipros në Jeruzalem më 22 dhjetor 2025.

Tre udhëheqësit nënshkruan një deklaratë të përbashkët pas samitit, në të cilën ranë dakord të “forcojnë bashkëpunimin e vazhdueshëm trepalësh mbi çështjet e sigurisë, mbrojtjes dhe ushtrisë.”

Në fjalën e tij, kryeministri izraelit Netanyahu iu referua Turqisë, pa e përmendur në mënyrë direkte, duke thënë se “ata që fantazojnë se mund të rivendosin perandoritë dhe sundimin e tyre mbi tokat tona” duhet ta “harrojnë atë.”

Një ditë më vonë, krerë ushtarakë grekë, qipriotë dhe izraelitë nënshkruan një plan të përbashkët veprimi dhe një program bashkëpunimi ushtarak Greqi-Izrael-Qipro në Nicosia.

Plani, bazuar në marrëveshjet e arritura nga udhëheqësit e tre vendeve, përfshin trajnim të përbashkët të njësive të operacioneve speciale dhe shkëmbim ekspertize mbi kërcënimet moderne, duke përfshirë sistemet pa pilot (UAV) dhe luftën elektronike.

Në raportimet e mediave vendase nuk përmendet formimi i një ushtrie të përbashkët mes tre vendeve.

Sipas të përditshmes greke Ta Nea, zyrtarë të lartë ushtarakë dhe analistë janë duke diskutuar mundësinë e një brigade reagimi të shpejtë prej rreth 2,500 trupash, me 1,000 ushtarë nga Izraeli dhe Greqia dhe 500 nga Qipro. Megjithatë, deri më tani nuk ka asnjë konfirmim nga burime zyrtare.

The post Bashkëpunim, por jo një ushtri e përbashkët Izrael-Greqi-Qipro appeared first on Faktoje.al.

TEL AVIV, 23 dhjetor /ATSH-ANSA/ – Parlamenti izraelit njoftoi sot se ka miratuar një amendament që u lejon autoriteteve të zgjasin deri në fund të vitit 2027 ndalimin e transmetimit të mediave të huaja të akuzuara për cenimin e sigurisë shtetërore.

I miratuar në prill 2024 gjatë luftës në Gaza midis Izraelit dhe Hamasit, ligji synonte kryesisht kanalin katarian al Jazeera, të cilin autoritetet e akuzuan se shërbente si një mjet propagande për terroristët palestinezë, raporton The Times of Israel.

Fillimisht, ligji ishte i kufizuar në gjendjen e jashtëzakonshme të shpallur në fillim të luftës, e shkaktuar nga sulmi i Hamasit në Izraelin jugor më 7 tetor 2023.

Sipas ligjit, i cili lejon masa të tilla edhe në mungesë të një gjendjeje të jashtëzakonshme, nëse kryeministri përcakton se një media e huaj përbën një kërcënim për sigurinë shtetërore, ministri i komunikimit mund të urdhërojë ndërprerjen e transmetimeve të saj, me kusht miratimin e kabinetit ose një komiteti ministror.

Sipas tekstit të projektligjit, ministri është gjithashtu i autorizuar të mbyllë zyrat e transmetuesit, të sekuestrojë pajisjet e tij të transmetimit dhe të bllokojë faqen e tij të internetit.   /os/

The post FOKUS – Izraeli zgjat ndalimin e Al Jazeera: minon sigurinë shtetërore appeared first on Agjencia Telegrafike Shqiptare.

TEL AVIV, 23 dhjetor /ATSH/ – Ndërsa kryeministri izraelit, Benjamin Netanyahu, po përgatitet të takohet me presidentin amerikan, Donald Trump, në Florida më 29 dhjetor, fokusi është vënë te Irani, por me një ndryshim.

Izraeli është i fokusuar në mënyrë intensive te programi i raketave balistike të Iranit, të cilin e sheh si kërcënimin ekzistencial më urgjent pasi sulmet ajrore amerikano-izraelite dëmtuan rëndë infrastrukturën bërthamore të Iranit gjatë një fushate ajrore 12-ditore në qershor.

Ky ndryshim thekson një divergjencë në rritje mes SHBA-së dhe Izraelit. Trump e ka përshkruar vazhdimisht kërcënimin bërthamor të Iranit si “të shkatërruar”, duke ia atribuar këtë bombardimeve të objekteve në Isfahan, Fordo dhe Natanz. Izraeli pajtohet se programi është kthyer mbrapa për një ose dy vjet.

Megjithatë, ai paralajmëron se raketat, në të cilat Irani po punon, së shpejti mund të mbingarkojnë sistemet mbrojtëse, siç u demonstrua kur 36 nga 550 raketa goditën territorin izraelit në qershor, duke shkaktuar dëme të gjera.

Raketat si prioritet “i menjëhershëm”

Zyrtarë izraelitë, duke folur për NBC News dhe Axios, e përshkruajnë përshpejtimin e programit raketor të Iranit si “më urgjent” sesa programin e tij bërthamor.

Izraeli thotë se Trupat e Gardës Revolucionare Islamike (IRGC) kanë kryer stërvitje dhe e kanë paralajmëruar Uashingtonin se Teherani mund t’i përdorë këto ushtrime si mbulesë për sulme të befasishme.

Kjo vjen mes raportimeve kontradiktore në Iran lidhur me faktin nëse testet e raketave po zhvillohen vërtet.

Mediat iraniane, përfshirë agjencinë e lajmeve Fars të lidhur me IRGC-në, raportuan më 22 dhjetor se forcat e armatosura po kryenin stërvitje, ndërsa përdoruesit në rrjete sociale shpërndanë video dhe pamje të gjurmëve të avujve në qiell mbi Iranin qendror dhe perëndimor.

Megjithatë, transmetuesi shtetëror i mohoi shpejt raportimet, duke cituar një “burim të informuar” të paemëruar, i cili këmbënguli se gjurmët vinin nga “avionë në lartësi të mëdha” dhe pretendoi se asnjë stërvitje nuk po zhvillohej.

Shefi i Shtabit të Forcave të Mbrojtjes së Izraelit (IDF), Eyal Zamir, la të kuptohej për gatishmëri për goditje të reja kundër Iranit “kudo që të kërkohet”, duke i dhënë përparësi linjave të prodhimit që Izraeli druhet se mund të nxjerrin 3.000 raketa në vit.

Netanyahu planifikon t’i paraqesë Trumpit opsione për sulme — të udhëhequra nga Izraeli, të përbashkëta ose të mbështetura nga SHBA-ja — duke argumentuar se raketat mundësojnë luftëra përmes forcave si Hezbollahu dhe Huthit, ndërsa mbrojnë ringjalljen bërthamore të Iranit.

Farzin Nadimi, studiues i lartë në Institutin e Uashingtonit, i tha Shërbimit Iranian të Radios Evropa e Lirë se Izraeli po u bën presion Shteteve të Bashkuara që t’i riklasifikojnë raketat si armë të shkatërrimit në masë.

“Izraeli po përpiqet ta ndryshojë këtë këndvështrim, duke përdorur përvojën e luftës së fundit për të bindur Shtetet e Bashkuara se aftësitë raketore të Iranit janë po aq kërcënuese në mënyrë ekzistenciale sa edhe ato bërthamore”, tha Nadimi.

Ai vuri në dukje hezitimin amerikan, që i sheh armët bërthamore si rrezikun kryesor, tashmë të dobësuar, por shtoi: “Nga këndvështrimi i Izraelit, këto duhet të konsiderohen armë të shkatërrimit në masë për popullin e tij”.

Nadimi paralajmëroi se shkatërrimi total i raketave mund të detyrojë një ndryshim doktrinar në Teheran.

“Nëse Izraeli shkatërron plotësisht aftësitë ofensive raketore të Iranit… ai ose do të duhej të dorëzohej ose të bënte një ndryshim themelor doktrinar”, tha ai, duke shtuar se rruga teknike e Iranit drejt mbushjeve bërthamore mbetet e realizueshme në një laborator të sigurt duke përdorur rezerva uraniumi të pasuruar në 90 për qind.

Vija e kuqe raketore e Iranit

Irani ka pohuar prej kohësh se programi i tij raketor është i panegociueshëm, duke këmbëngulur se është thjesht për mbrojtje. Zëdhënësi i Ministrisë së Jashtme, Esmail Baqaei, e ritheksoi këtë më 22 dhjetor.

“Aftësitë mbrojtëse të Republikës Islamike të Iranit janë projektuar me qëllimin e frenimit të agresorëve nga çdo mendim për të sulmuar Iranin. Në asnjë rrethanë ato nuk janë çështje që mund të diskutohen apo negociohen”, tha ai.

Hamidreza Azizi, studiues në Institutin Gjerman për Çështje Ndërkombëtare dhe të Sigurisë, vuri në dukje se, ndonëse Shtetet e Bashkuara dhe Izraeli mund të duan gjëra të ndryshme nga Irani, ata përputhen në një pikë: “Irani është i dobësuar tani, kështu që është koha për të nxjerrë më shumë lëshime”.

Irani e ka kufizuar rrezen e raketave të tij në 2.000 kilometra, megjithëse muajt e fundit ka lënë të kuptohet se mund ta rrisë këtë kufi nëse e sheh të nevojshme. Azizi tha se Shtetet e Bashkuara dhe Izraeli duan që Irani ta reduktojë rrezen e raketave — një gjë e papranueshme për Teheranin.

Edhe në skenarin e pamundur të një marrëveshjeje për programin raketor të Iranit, ai vuri në dukje se Uashingtoni është i vetëdijshëm se zbatimi do të ishte i vështirë, duke pasur parasysh mungesën e një organi ndërkombëtar monitorues apo të një regjimi garancish për programet raketore.

Në këtë kontekst, Azizi argumentoi se raketat shërbejnë si mjet presioni:

“Së pari, për ta bërë Iranin të heqë dorë plotësisht nga pasurimi [i uraniumit] në territorin e tij; së dyti, për të siguruar lëshime mbi transferimet e armëve te grupe si Hezbollahu ose Houthit”, shtoi ai.

Mediat iraniane, të gëzuara por të shqetësuara

Retorika izraelite rreth programit raketor të Iranit është pritur me një përzierje kënaqësie dhe alarmi në mediat iraniane.

Duke theksuar ritmin e Iranit në rindërtimin e arsenalit të tij raketor pas qershorit, gazeta Javan e lidhur me IRGC-në tha se Izraeli ishte “i tmerruar” nga aftësia e Iranit për të lëshuar qindra raketa në një konflikt të mundshëm. I njëjti qëndrim u pasqyrua edhe nga media të tjera të linjës së ashpër, si agjencia e lajmeve Mehr, shkruan REL.   /os/

The post FOKUS – Raketat e Iranit, prioritet i Izraelit përpara takimit Trump–Netanyahu appeared first on Agjencia Telegrafike Shqiptare.

TEL AVIV, 21 dhjetor /ATSH-DPA/- Izraeli ka miratuar ndërtimin e 19 vendbanimeve të reja hebraike në Bregun Perëndimor të pushtuar, tha sot ministri i Financave, Bezalel Smotrich në X.

Smotrich, një ministër i krahut të djathtë, tha në X se Kabineti Izraelit kishte miratuar propozimin për të shpallur dhe organizuar 19 vendbanimet e reja.

Këtë javë, media izraelite raportoi se Kabineti Izraelit i Sigurisë kishte vendosur të ngrinte 19 vendbanime të reja, por nuk kishte pasur konfirmim zyrtar nga qeveria.

Më shumë se 700 000 kolonë hebrenj vlerësohet se jetojnë midis rreth 3 milionë palestinezëve në Bregun Perëndimor, i cili u pushtua nga forcat izraelite në Luftën Gjashtëditore të vitit 1967.

Kombet e Bashkuara i shohin vendbanimet si një pengesë të madhe për një marrëveshje paqeje, pasi njohja e tyre do të pengonte në mënyrë efektive territorin e vazhdueshëm palestinez në Bregun Perëndimor – në rast se arrihet një zgjidhje me dy shtete.

“Organizata Paqe Tani” e Izraelit, e cila mbështet një zgjidhje me dy shtete, tha se Kabineti i Sigurisë e kishte marrë vendimin më 11 dhjetor.

“Disa nga vendbanimet janë planifikuar në zona ku Izraeli nuk ka pasur më parë prani, ndërsa të tjerat do të ndërtohen në zona palestineze me popullsi të dendur”, tha arganizata në një njoftim.

Ajo shtoi se disa nga vendbanimet do të ndërtoheshin në Bregun Perëndimor verior, në vendet e vendbanimeve që u evakuuan sipas planit të shkëputjes së vitit 2005 dhe se disa nga vendbanimet e reja do të ngriheshin në vendet nga të cilat ishin dëbuar komunitetet palestineze. //a.i/

The post IZRAEL – Miratohen 19 vendbanime të reja në Bregun Perëndimor appeared first on Agjencia Telegrafike Shqiptare.

FLORIDA, 21 dhjetor /ATSH/- Përfaqësues nga Shtetet e Bashkuara të Amerikës, Egjipti, Katari dhe Turqia u takuan në Miami të Floridës për të diskutuar hapat e ardhshëm në planin e paqes për Rripin e Gazës, sipas një deklarate të përbashkët të lëshuar nga i dërguari i SHBA-së, Steve Witkoff, sipas “TRT World”.

Takimi u fokusua në vlerësimin e zbatimit të fazës së parë të marrëveshjes, e cila parashikonte kthimin e pengjeve të gjalla dhe dorëzimin e trupave, në këmbim të lirimit të të burgosurve palestinezë nga Izraeli, si dhe në përgatitjet për nisjen e fazës së dytë të planit

Në një postim në X, Witkoff tha se të gjitha palët kishin rikonfirmuar angazhimin e tyre për të zbatuar planin e paqes prej 20-pikash të presidentit të SHBA-së, Donald Trump.

“Ne vazhduam diskutimet mbi hapat e ardhshëm për zbatimin gradual të Planit Gjithëpërfshirës të Paqes për Gazën. Konsultimet e mëtejshme do të vazhdojnë në javët e ardhshme për të avancuar në fazën e dytë”, thuhet në deklaratë.

Katër ndërmjetësuesit dhe garantuesit i bënë thirrje Izraelit dhe Hamasit të respektonin angazhimet e tyre dhe të tregonin vetëpërmbajtje.

Faza e dytë e planit kërkon çarmatimin e Hamasit, tërheqjen graduale të ushtrisë izraelite nga territori, krijimin e një autoriteti qeverisës të përkohshëm dhe dislokimin e një force ndërkombëtare.

Ndërkohë, armëpushimi në Gaza mbetet i brishtë, pasi Izraeli dhe Hamasi akuzojnë njëri-tjetrin për shkelje.

“Gjashtë persona u vranë të premten në një sulm izraelit ndaj një shkolle të shndërruar në një strehë për personat e zhvendosur”, sipas Mbrojtjes Civile të Gazës.

Ministria e Shëndetësisë e kontrolluar nga Hamasi raportoi se të paktën 401 palestinezë ishin vrarë nga sumet izraelite – që kur armëpushimi kishte hyrë në fuqi.

Tre ushtarë izraelitë janë vrarë gjithashtu gjatë së njëjtës periudhë. //a.i/

The post SHBA – Witkoff takon ndërmjetësuesit për fazën e dytë të planit paqes në Gaza appeared first on Agjencia Telegrafike Shqiptare.

Pretendimi: Izraeli i ka të ndaluara testet e ADN

Verdikti: E pavërtetë

————————————————–

Në rrjete sociale, përfshi ato shqipfolëse, po qarkullon pretendimi se në Izrael ndalohen testet e ADN.

Pretendohet se kjo ndodh sepse testet do të zbulonin se shumë izraelitë nuk ishin etnikisht hebrenj ose nuk kishin paraardhës nga Lindja e Mesme.

Megjithëse Izraeli vendos kufizime domethënëse rregullatore mbi testet e ADN, veçanërisht ato që lidhen me lidhjet familjare, pretendimi se testet e ADN janë tërësisht të paligjshme në Izrael është i rremë.

Ligji i Informacionit Gjenetik i Izraelit (2000) rregullon testimin gjenetik për të mbrojtur privatësinë dhe për të parandaluar keqpërdorimin e të dhënave gjenetike. Ligji nuk i ndalon drejtpërdrejt testet e ADN, por vendos rregulla të rrepta, veçanërisht për testet që përcaktojnë marrëdhëniet familjare. Për shembull, testet e atësisë në Izrael mund të kryhen vetëm me urdhër gjykate. “Një test gjenetik për lidhjet familjare […] nuk do të kryhet përveçse me urdhër të një gjykate familjare”, thotë ligji. Kjo është pjesë e një kuadri më të gjerë të hartuar për të mbrojtur individët nga përdorimi i informacionit të tyre gjenetik pa mbikëqyrje të duhur.

Konfirmim i mëtejshëm se testimi gjenetik nuk është plotësisht i paligjshëm në Izrael, por i rregulluar për qëllime specifike mjekësore dhe parandaluese, mund të gjendet në faqen e internetit të Ministrisë së Shëndetësisë të Izraelit. Një seksion i titulluar “Rekomandime për Testimin Gjenetik” përshkruan udhëzimet për testet që synojnë identifikimin e çifteve në rrezik për t’u kaluar fëmijëve të tyre gjendje të rënda gjenetike.

Ministria e Shëndetësisë e Izraelit tha për Snopes se “sipas dispozitave të Ligjit për Informacionin Gjenetik, testet gjenetike mund të kryhen në Izrael vetëm në laboratorët mjekësorë-gjenetikë të miratuar nga Ministria e Shëndetësisë sipas kushteve të specifikuara në ligj. Qëllimi i ligjit është të ruajë cilësinë e testeve, privatësinë dhe konfidencialitetin mjekësor të subjekteve, si dhe mbrojtjen e të drejtave të të miturve dhe popullatave të tjera të veçanta në kontekstin e gjenetikës.”

The post Izraeli rregullon, por nuk ndalon testet e ADN appeared first on Faktoje.al.

Kryeministri izraelit Benjamin Netanyahu ka njoftuar të mërkurën, 17 dhjetor, se Izraeli ka miratuar marrëveshjen më të madhe të gazit në historinë e vendit, me vlerë rreth 35 miliardë dollarë.

Marrëveshja, e nënshkruar fillimisht në gusht me kompaninë amerikane Chevron dhe partnerët e saj izraelitë NewMed dhe Ratio, parashikon furnizimin e Egjiptit me gaz natyror nga fusha Leviathan.

Izraeli do të eksportojë rreth 130 miliardë metra kub gaz deri në vitin 2040.

Netanyahu tha se marrëveshja do të ndihmojë stabilitetin rajonal dhe do të lehtësojë krizën energjetike në Egjipt, i cili është detyruar të importojë gaz të lëngshëm për shkak të rënies së prodhimit vendas që nga viti 2022.

Chevron e përshëndeti miratimin, i cili hap rrugën për zgjerimin e fushës së gazit

The post Izraeli do të furnizojë Egjiptin me 35 miliardë dollarë gaz appeared first on Albeu.com.

Pretendimi: Një nga autorët e sulmit terrorist të 14 dhjetorit 2025 në Australi, ishte një hebre i quajtur David Cohen

Verdikti: E pavërtetë

——————————————————————-

Më 14 dhjetor 2025, të paktën 16 persona humbën jetën dhe 38 të tjerë u plagosën pasi dy persona të armatosur qëlluan me armë në një aktivitet që shënonte ditën e parë të festës hebraike Hanukkah në Bondi Beach, Australi.

Megjithëse kanë kaluar fare pak ditë nga sulmi terrorist, në rrjete sociale tragjedia ka nisur të frymëzojë keqinformim të shumëllojshëm.

Ndër të tjera, në rrjetet sociale, përfshi ato shqipfolëse, po qarkullon pretendimi se njëri nga autorët është një hebre i quajtur David Cohen. Si provë për këtë sillet pamja e një profili në Facebook me emrin David Cohen. 

Ky pretendim përdoret për të insinuuar se pas sulmit terrorist qëndron Izraeli apo hebrenjtë. 

Megjithatë, pamja e profilit të David Cohen qartazi është gjeneruar me anë të programeve kompjuterike të inteligjencës artificiale (AI). Kjo vërrehet në defektet logjike karakteristike të përmbajtjeve të prodhuara nga AI. 

Ikona e mesazhit shkruan “Emsage” në vend të “Message.” Shkrimi hebraik në pjesën e sipërme djathtas nuk ka asnjë kuptim dhe nuk përkthehet në asgjë. Një nga seksionet e profilit shkruan “Eeopis” (ndoshta në vend të “Friends”), një fjalë pa kuptim që nuk përkthehet. Programet AI shpesh hasin vështirësi në gjenerimin e tekstit brenda imazheve.

Profili “David Cohen” nuk përputhet me paraqitjen ose formatimin e llogarive të vërteta në Facebook. Nën seksionin “About”, shkruan “Shto një mik të ri”, një opsion që nuk gjendet në llogaritë e vërteta të Facebook.

Më tej, disa nga miqtë e supozuar të listuar në profil kanë emra absurdë, të tillë si “Jewish (Hebre) Bronnen” dhe “Jewish (Hebre) Maridlend”.

Policia ka deklaruar se një nga sulmuesit ishte 50-vjeçari Sajid Akram, shtetas indian, që kishte jetuar në Australi për dekada. Ai u vra në një shkëmbim zjarri me oficerët. Personi tjetër ishte djali i tij 24-vjeçar, Naveed Akram, i cili ka pasaportë australiane. Ai u qëllua gjithashtu dhe mbahet në spital nën mbikëqyrjen e policisë.

Naveed u akuzua për 15 vrasje pasi u zgjua nga koma më 17 dhjetor, si dhe për kryerjen e një “akti terrorist” dhe vendosjen e një bombe me qëllim dëmtimin.

Autoritetet australiane kanë thënë se Naveed Akram është një shtetas i lindur në Australi. Nuk ka asnjë provë se ai është izraelit apo hebre.

The post I rremë profili hebre i atentatorit të plazhit Bondi në Australi appeared first on Faktoje.al.

TEL AVIV, 17 dhjetor /ATSH-AFP/- Kryeministri izraelit, Benjamin Netanyahu, njoftoi sonte se ka hapur dritën jeshile për një megamarrëveshje shitjeje gazi me Egjiptin, me vlerë 30 miliardë euro.

“Sot kam miratuar marrëveshjen më të madhe të gazit në historinë e Izraelit. Vlera totale e marrëveshjes arrin 112 miliardë shekel, rreth 30 miliardë euro. Nga kjo shumë, 58 miliardë shekel (rreth 15,3 miliardë euro) do të hyjnë në arkën e shtetit”, tha  Netanyahu në një deklaratë në television.

“Marrëveshja është nënshkruar me kompaninë amerikane ‘Chevron’ dhe partnerët izraelitë që do të furnizojnë gazin për Egjiptin”, shtoi kryeministri.

“Kjo është marrëveshja më e madhe e eksporteve në historinë e shtetit”, vuri në dukje ministri i Energjisë, Eli Cohen, i cili ishte pranë tij.

Kompania izraelite e gazit ”NewMed Energy” njoftoi sot në mbrëmje në një deklaratë se kishte “marrë autorizimin për të eksportuar gaz në Egjipt duke e bërë të mundur marrëveshjen prej 35 miliardë dollarësh”.

“Kjo është një ditë historike për tregun e gazit natyror duke garantuar investime të vazhdueshme në Izrael dhe duke krijuar stabilitet për vitet që vijnë”, tha drejtori ekzekutiv i ”NewMed Energy”, Yossi Abou.

Një projekt tubacioni gazi tokësor prej 65 kilometrash (20 milje) që lidh Izraelin dhe Egjiptin u miratua nga qeveria izraelite në maj 2023, por është vonuar ndjeshëm.

Ndërtimi i tij, që synon të rrisë furnizimet me gaz në Egjipt, pritet të përfundojë në vitin 2029./ /Ad.Ab./ a.jor.

The post TEL AVIV – Izraeli nënshkruan marrëveshjen më të madhe të gazit me Egjiptin appeared first on Agjencia Telegrafike Shqiptare.