Berisha e mbylli këtë 2025, thuajse i vetëm. Me një grusht militantësh në bulevardin e ftohtë të kryeministrisë. Nga familja, e shoqëroi vetëm dhëndri, nga partia, vetëm Belind Këlliçi, dhe pse ky me disa metra distancë.

Salianji i vetëpërjashtuar nuk i vjen më, kurse i përzgjedhuri Tiku sërish nga sheshi i iku.

Por doktori të gjithë i injoroi, mjaftojnë aq sa kanë mbetur.

“Qëndroni dhe do qëndrojmë në këtë shesh, Sheshin e Lirisë, gjersa nga ajo ndërtesë të shporrim binomin që ka vjedhur dhe ka përçmuar më shumë shqiptarët në tërë historinë tonë kombëtare”

Rama Kurtin e uroi, kurse Berisha për Kurtin kishte vetëm një krahasim, mungoi një urim.

“Kryeministri i Kosovës nuk ka sipërmarrje kopsht si Edi Rama, përkundrazi qeveria atje lufton fort për veprimtarinë më transparente, ndaj edhe zhvillon dy palë zgjedhje brenda një viti, zgjidh çdo krizë, çdo problem në mënyrën më demokratike. “

Protesta kësaj radhe zgjati pak, sa një pjesë ndeshje futbolli. Ndoshta militantët s’kishin marrë masat ndaj të ftohtit, por doktori i paralajmëroi, do jetë dimër i gjatë.

“Miq, ne mbyllim sot protestën tonë për të filluar vitin po me protesta. Edhe njëherë u uroj shqiptarëve kudo që janë gëzuar vitin 2026.”

Edhe këtë vit Berisha e mbyll me pak veta në shesh, me një kontrast i madh i një partie më e madhja opozitare. Por numrat nuk kanë më rëndësi, rëndësi ka që doktori mbetet nr.2 në politikë, dhe nr.1 i pamposhtur në Partinë Demokratike.  Në këtë të fundit. për 35 vjet rresht. Sali Berisha renditet kështu i dyti pas Enver Hoxhes, i cili e mbylli llogarite me këtë jetë, pasi qëndroi në krye të partisë së punës për fiks 40 vjet.

Por shëndeti i Sali Berishës premton thyerje rekordi politik në vitin 2030, kur bota do këtë avancuar aq shume sa do ketë çuar raketa në mars, ndërsa Shqipëria me pak fat do ketë kthyer një faqe të rëndësishme të historisë.

/abcnews.al/

Presidentja e Kosovës, Vjosa Osmani ka konfirmuar në një intervistë për Radion Evropa e Lirë, se synon edhe një mandat në krye të shtetit, teksa asaj i skadon mandati si e para e vendit në prill të vitit 2026.

Osmani u shpreh se synon edhe një mandat si presidente. Ndër të tjera ajo ka thënë se nëse nuk rizgjidhet do të angazhohet në politikë

“Tani, unë mendoj që Kosovës i duhet një vazhdimësi e punëve të mira. Rrjedhimisht, kjo çështje tani do të jetë në duart e deputetëve të Republikës së Kosovës”.

Osmani foli një ditë pas zgjedhjeve të parakohshme parlamentare, rezultatet preliminare të të cilave e nxorën fituese Lëvizjen Vetëvendosje me mbi 49 për qind të votave.

Presidentja Osmani tha se pret formimin e institucioneve të reja, dhe se do të ketë bisedime me deputetë të pushtetit dhe të opozitës në lidhje me kandidaturën e saj.

Nëse partitë politike nuk arrijnë ndonjë kompromis për çështjen e presidentit të ri, atëherë vendi do të përballet me një cikël të ri zgjedhor.

Përveç kësaj, Osmani foli edhe lidhur me marrëdhëniet me kryeministrin në detyrë të Kosovës, njëherësh kryetar i Lëvizjes Vetëvendosje, Albin Kurti.

Ndërkaq, në lidhje me politikën e jashtme, presidentja komentoi marrëdhëniet e Kosovës me Shtetet e Bashkuara të Amerikës nën administratën e Donald Trumpit, dhe prapaskenat e takimeve me zyrtarë amerikanë.

“Në dy vizitat që i kam pasur në Departamentin e Shtetit, brenda këtyre pak muajsh, çështja e parë që më është rikonfirmuar tepër qartë ka qenë kjo: ‘Ne e mbështesim sovranitetin dhe integritetin territorial të Republikës së Kosovës'”.

Ajo foli edhe lidhur me dialogun Kosovë-Serbi dhe për çështjen e zbatimit të marrëveshjeve të arritura mes dy vendeve.

Radio Evropa e Lirë: Presidente, Kosova dje i pati zgjedhjet e parakohshme parlamentare. Të dytat për këtë vit. Lëvizja Vetëvendosje doli fituese edhe kësaj radhe, me përqindje më të lartë, sipas rezultateve preliminare. Si i keni parë këto rezultate?

Vjosa Osmani: Në radhë të parë, unë dua t’i uroj të gjithë qytetarët e Republikës së Kosovës për shembullin e një demokracie jashtëzakonisht të fortë elektorale që ata e kanë dëshmuar për të satën herë me radhë, dhe siç e thatë edhe ju, përkundër faktit që zgjedhjet janë përsëritur disa herë gjatë këtij viti, sepse kishim edhe zgjedhje lokale, qytetarët treguan se Kosova organizon zgjedhje model. Model do të thosha jo vetëm për rajonin tonë, por edhe përtej, me një demokraci jashtëzakonisht të fuqishme, me zgjedhje të rregullta, të cilat janë sipas standardeve më të larta demokratike që mund të kërkojë dikush.

Jo rastësisht, ky është njëri prej elementëve që e kanë ngritur vazhdimisht Kosovën në indekset ndërkombëtare për fuqizimin e demokracisë sonë, të arritura me të cilat jemi jashtëzakonisht krenarë, dhe jam shumë krenare edhe me mënyrën se si gjithçka ka shkuar dje, me daljen e qytetarëve të Republikës së Kosovës, pjesëmarrjen e tyre masive, dhe siç e kam thënë edhe dje kur votova, sa më e madhe pjesëmarrja, aq më e qartë është rruga përpara. Dhe, siç po e shohim edhe nga rezultatet tashmë, do të kemi shumë shpejtë edhe parlament të konstituuar, edhe qeveri të zgjedhur.

Radio Evropa e Lirë: E thatë vetë, tash gjasat janë të mëdha që institucionet të zgjidhen dhe qeveria të bëhet. Pastaj Kosovën e pret një tjetër zgjedhje. Mandati juaj përfundon në prill. A synoni mandat të dytë?

Vjosa Osmani: Përgjatë këtyre pesë vjetëve kemi bërë maksimumin që të punojmë shumë për interesin e Republikës së Kosovës dhe të qytetarëve të saj. Kemi punuar që Kosova të mos konsiderohet thjesht si një shtet që ndjek zhvillimet, por si një prej faktorëve të rëndësishëm në arenën ndërkombëtare që ka rol në përcaktimin e këtyre zhvillimeve. Përgjatë këtyre pesë vjetëve, Kosova është fuqizuar si shtet, brenda dhe jashtë. Brenda, në radhë të parë, për shkak se e ka shtrirë sovranitetin në çdo milimetër të territorit të vendit, kemi fuqizuar sundimin e rendit dhe ligjit që ka qenë një prej prioriteteve tona të përbashkëta që nga koha kur jam zgjedhur presidente në fillim të vitit 2021, dhe natyrshëm në arenën ndërkombëtare Kosova kurrë nuk ka qenë më e përfaqësuar dhe më e fortë, sado që kemi pasur sfida, por sfidat në radhë të parë kanë ardhur nga Serbia, e cila, siç e dini, ka eskaluar edhe me akt-agresionin ndaj Republikës së Kosovës, dhe me sulme ndaj infrastrukturës tonë kritike, dhe me një sërë aktesh destabilizuese.

Në rrethana të tilla, si institucione të Kosovës, kemi bërë të pamundurën dhe besoj kemi arritur që të mbrohet interesi i Republikës së Kosovës, që të mbrohet sovraniteti dhe integriteti territorial, që në asnjë moment të mos vihet në pikëpyetje sovraniteti ynë, shtetësia jonë, parimi i unitaritetit të shtetit, dhe njëkohësisht e kemi përfaqësuar Republikën e Kosovës denjësisht para syve të botës, duke ndërtuar një imazh të denjë, të tillë siç e meritojnë qytetarët tanë. Tani, unë mendoj që Kosovës i duhet një vazhdimësi e punëve të mira. Rrjedhimisht, kjo çështje tani do të jetë në duart e deputetëve të Republikës së Kosovës. Do ta shohim se kush do të jenë ata që do të zgjidhen.

Radio Evropa e Lirë: Do të thotë e synoni edhe një mandat?

Vjosa Osmani: Synoj që t’i vazhdoj punët e mira për qytetarët e Republikës së Kosovës, për vendin tonë. Mendoj që të arriturat e shumta dhe punët e mira që po na presin dhe janë te dera duhet të vazhdohen, sepse është interesi më i mirë i Republikës sonë. Megjithatë, unë, po ashtu, jam plotësisht e vetëdijshme që kjo nuk varet vetëm nga ky vlerësim, por varet nga dy të drejtat e deputetëve të Republikës së Kosovës, të cilët duhet të vendosin, do të thosha, në dy pika themelore. E para është nëse duan ta mbrojnë interesin më të mirë të Republikës, dhe e dyta është nëse duan ta dëgjojnë vullnetin qytetar…

Radio Evropa e Lirë: A synoni bisedime me opozitën?

Vjosa Osmani: Natyrisht, siç kam bërë edhe herën e kaluar, do ta bëjmë sërish me të gjithë deputetët. Natyrisht, unë nuk kërkoj përkrahje nga Lista Serbe, sepse sikurse edhe herën e kaluar, nuk kam pasur ndonjë votë nga ata dhe, siç e dini, pas veprimeve të tyre…

Sali Berisha paralajmeroi marshim drejt Surrelit, disa e moren me seriozisht se cduhet. Nje grup te rinjsh, te udhehequr nga djali i Fahriut marshuan me pishtar ndezur drejt shtepise se Rames.

Balliu ishte nisur per lufte me 10 ushtare.

 “Keto jane veprime guerrilse paqesore, ose jep doreheqjen, ose me hir apo pahir do te heqin qytetaret shqiptare.”

Por lufta mbaroi pa filluar, gjuha shkon ku dhemb dhembi, ose te Cereni.

“Sot eshte nje mesazh, nje mesazh, qendrestaret qe ke ne bulevard, do i kesh ne kuzhine.”

Gati per lufte guerrile, Berisha tani ka Visin. Kurse revolucioni shtyhet per njehere tjeter.  / abcnews.al/

Kryeministri Edi Rama në komunikimin e përjavshëm në podcastin ‘Flasim’ deklaroi se drejtoresha e AKSHI-t, Linda Karçanaj, e cila ka udhëhequr për 12 vite vizionin e transformimit digjital, ndodhet nën masë sigurie për një akuzë që, sipas tij, duhet vlerësuar me durim vetëm nga drejtësia.

Rama theksoi se gjykimi nuk duhet të bëhet nga zhurma politike dhe mediatike, por nga procesi ligjor deri në daljen e së vërtetës. Ai vuri në dukje se falë Karçanajt dhe skuadrës së AKSHI-t, Shqipëria ka bërë një kapërcim të rëndësishëm që nga viti 2022.

Sipas Ramës, vendi është renditur në grupin A me maturitet të lartë, duke u ngjitur nga vendi i 68 në vendin e 14 në renditjen ndërkombëtare. Kryeministri shtoi se ky vlerësim bazohet në një raport objektiv të Bankës Botërore, i cili nuk justifikon shkelje ligjore, por dëshmon përparimin e bërë në shërbim të qytetarëve.

“Drejtoresha e AKSHI, Linda Karçanaj gruaja që ka udhëhequr vizionit tonë për transformimin digjital me dije dhe vullnet për 12 vite, gjendet në një masë sigurie me një akuzë të hatashme, për të cilën duhet të pritet me durim nga drejtësia dhe jo nga çorba politike dhe mediatike derisa të dalë e vërteta e saj. Falë saj dhe skuadrës së AKSHI-t, Shqipëria ka bërë një kapërcim të madh që nga 2022.

Këtë herë jo vetëm që renditemi në grupin A me maturitet të lartë, por me një rritje të denjë nga raporti paraprak me 0.72, këtë vit kemi kaluar nga vendi i 68 në vendin e 14 mes gjithë atyre vendeve, duke lënë pas vende të tjera falë punës dhe vullnetit, duke vënë teknologjinë në shërbim.

Ky është një raport objektiv që vlerëson 4 fusha. Nuk justifikon asnjë shkelje të ligjit që pretendohet që kanë ndodhur, gjë të cilën na e thotë vetëm ligji, ndërkohë që zhurma politike dhe mediatike nuk e zhbën dot veprimtarinë e AKSHI-t, që mund ta verifikoni nga linku i raportit në Bankën Botërore.”  / abcnews.al /

Një letër me prova mbi aferat korruptive të familjes Berisha dhe Meta i është dërguar sekretarit amerikan të shtetit Marco Rubio nga avokati Idajet Beqiri.

Në një komunikim të drejtpërdrejtë në edicionin ‘Ora e Fundit’ avokati deklaroi se krimet e pandëshkuara, pasuritë e grabitura dhe korrupsioni kanë kthyer vendin peng të krimit të organizuar. Ai theksoi se për familjet Berisha dhe Meta ekzistojnë prova të shumta për dhjetëra afera korruptive me vlera miliardëshe. Sipas Beqirit, këto çështje janë të regjistruara, por nuk po hetohen nga SPAK. Avokati akuzoi SPAK-un se po vepron politikisht, duke u përqendruar te çështje të vogla për të krijuar një ekuilibër të rremë hetimesh.

“Nga gjithë këto krime që kanë ndodhur dhe e mbajnë peng këtë vend, prej pasurive të grabitura dhe korrupsionit, tani komandohen vrasjet dhe krimi. Vendi është peng i krimit sepse këto nuk janë dënuar.

Për familjen Berisha dhe Meta, kanë dërguar prova plot dhe të tjerë. Të gjitha këto, doja se korrupsionin i kam numëruar aty sepse janë afera të rënda të familjes Berisha, 156 afera korruptive që shuma e tyre e kalon disa miliardë euro. Janë 89 afera korruptive të Ilir Metës. Bëhet fjalë për familjen Berisha dhe për familjen Meta, dhe janë të provuara, janë një numër i konsiderueshëm qytetarësh të përfshirë. Erisa Xhixho vazhdon ‘të shijë’ me lekët e vjedhura të qytetarëve.

SPAK i ka të regjistruara por nuk i heton. SPAK është i kapur nga politika dhe nga bandat kriminale. SPAK po vepron politikisht sepse gjërat e vogla, ndërhyrjet në tendera, shkeljet në barazinë në tendera dhe duke përqendruar vëmendjen në disa funksionarë të PS duke i arrestuar apo duke bërë gjëmën për gjëra të vogla janë për të vënë ekuilibrin që ja po hetojmë dhe këta.”

/ abcnews.al/

Ish kandidati për kryetar të Partisë Demokratike, Ibsen Elezi thotë se PD është bërë shërbyese e familjes së Sali Berishës.

Në një intervistë për “Tirana Live” në ABC News, Elezi u shpreh se PD e kanë braktisur mbi 200 mijë votues.

“Partia është kthyer në një ngrehinë të shkatërruar. Në vetvete ka një barrë të madhe. Fakti që këtu janë thyer të gjitha rregullat, mënyra se si funksionon. Nëse akuzojmë Ramën për autokraci, e njëjta është në PD. Thelbi i gjësë pse PD ka rënë, erdhi gradualisht shkatërrimi. Nuk e di si kanë kurajo t’i flasin për demokraci, anëtarëve të PD. I vjen shumë njerëzve keq. Të jesh i sigurt që pjesa më e madhe e demokratëve, janë në një situatë ku nuk e dijnë se si është zgjidhja. Nuk është çështje organizimi. Duhet të ketë frymë, dëshirë që njerëzit të mblidhen. Nuk ka frymë. PD e kanë braktisur mbi 200 mijë votues. PD është në rënie të vazhdueshme, nuk ka progres. Sali Berisha po e përdor për interesa të familjes së vet.”, theksoi ai./abcnews.al

Kush i organizon foltoret me demokratët? Salianji akuzohet se ia bën fshehurazi Suel Çela, kurse doktori rrugës për Gjir të Lalzit, u ndal për një foltore në Manëz, haptazi me Arian Ndojën.

Arian Ndoja është vija e kuqe e Salianjit për doktorin, ish-prokurori u bë deputet i PD pas atentatit në makinë me Rrumin e Shijakut në Shkozet dhe shkarkimit nga Vetingu, së fundmi edhe me probleme me drejtësinë, pasi Gjykata ka urdhëruar SPAK ta hetojë.

Por për Berishën, Salianji me Ndojën kanë një ndryshim. Kush afrohet me Ramën favorizohet, kush afrohet me doktorin persekutohet.

 “Askush nga ne ndonjë favor nuk e ka marrë, përkundrazi, ka marrë ndëshkime nga qeveria për shkak të afrimit me ne, bashkëpunimit me ne, shoqërim me deputetët e nderuar, takime mbledhje, të gjitha këto kanë qenë persekutim, persekutim”

Edhe Salianji për doktorin ishte i persekutuar politik, bëri dhe burg, por kjo vlente sa ishte brenda. Tani që është jashtë, doktori i dha një këshillë, të mos përfundojë si Lulzim Basha.

“Beteja të padrejta nuk mund të bësh. Ish-kryetari në vend që të merrej me grabitjen e votës, u mor me mua, me partinë. Sepse ishte në marrëveshje me të. Harroi çfarë bëri qeveria.”

Doktori paralajmëroi se është vetëm fillimi, PD do krastitet edhe nga tradhëtarë të tjerë.

“Ka patur nga ata me poste që kanë bashkëpunuar me krahun tjetër, ose që skanë punuar, ata sdo i kenë më ato poste, sepse i kishin për demokratët”

Por një demokrat i kujtoi se dembelët në radhë të parë i ka në krah, Gaz Bardhin që vetëm flet, dhe Oerd Bylykbashin që sbën asgjë.

“Dega e Durrësit është në gjumë, tani do e bëjmë analizën ne pas 8 muajsh. Drejtuesi politik nuk duket. Shohim kryetarin e grupit parlamentar, ka vetëm një fjali, ia kemi mësuar përmendësh. Opozita ka vetëm fjalën, dhe atë na e mohojnë”

Demokratët në foltore u mblodhën jo vetëm për PD, por edhe për të rrëzuar qeverinë. Berisha u kujtoi se doktori i ri ishte i dhunshëm, por doktori i vjetër është për revolucion paqësor. Ndaj dhe për momentin gëzuar festat.

“Doktor, zjarr në janar!”

“Gëzuar, në 2026 hyjmë me mision, janar nisim betejën tonë deri në fitore!”

Analisti pranë ABC News, Artur Nura, ka komentuar zhvillimet në Partinë Demokratike gjatë emisionit “Tirana Live”, duke e krahasuar qasjen politike të Sali Berishës me një “serial turk” me motive të përsëritura dhe pa risi.

Sipas Nurës, Berisha nuk po arrin të sjellë figura të reja apo të motivojë elektoratin, ndërsa protestat e organizuara prej tij i cilëson modeste dhe pa ndikim.

Ai theksoi se interesat personale dhe përplasjet e brendshme po ndikojnë në strategjinë e opozitës, duke shtuar se raporti i Berishës me PD-në dhe qëndrimi i tij ndaj drejtësisë lidhen më shumë me ruajtjen e kontrollit mbi partinë sesa me synimin për të marrë pushtetin.

“Berishën e shikoj gjatë gjithë kohës me një film serial turk, në një kohë të caktuar me të njëjtat gjëra. Serial turk, me motive të vjetra dhe që nuk sjell asgjë. Me një protestë modeste të organizuar. Berisha nuk sjell më personazhe të rinj, nuk motivon më. Është vetëm një kafshë politike e PD. Berisha nuk ka mungesë koherence, por fërkim interesash, i intereson që të jetë në krye të PD.

Në mënyrë racionale flet për korrupsionin, organizon protesta. Ka një mungesë morali. PD-në e ka si një pronë të tij, sepse duke shkuar në proceset penale si lider i opozitës, kjo intereson atij, duke mbajtur një qëndrim të ashpër ndaj drejtësisë, kjo i intereson Berishës jo që të marrë pushtetin. Salianji është pasqyra që i tregon Berishës ku ka qenë, kjo e shqetëson Berishën sepse i prish strategjinë e mbajtjes së opozitës, të PD-së. Salianji di të përballet me militantët dhe të mbledhë njerëz njësoj si Berisha”, tha Nura.

Prag Krishtlindje, por doktori për pak ua ngeci në fyt festën demokratëve.

“Prova u bë, revolta u dëshmua. Por kjo duhet të jetë e qëndrueshme. Bulevardi duhet të jetë i qytetarëve. Sheshi duhet të jetë i qytetarëve. Jo një ditë, dy apo tre, por aq kohë sa duhet për ta larguar.”

Ishte alarm festiv, se kur fillon revolucioni, datë nuk dha, ndaj dhe 2025 mbyllet me urime online.

“Ndaj dhe ne do punojmë fort, opozita do punojë fort për të bindur qytetarë të gatshëm për sakrifica në një revoltë paqësore”

Rama gjithsesi ikën këto festa, por vetëm për pushime, Berisha i garantoi të mos kenë merak, se kthehet shpejt.

“Edhe prapa diellit të jetë do e kthejmë”

Urimi për Krishtlindje, meqë qeveria kësaj radhe nuk ra, kësmet Krishtlindjet e tjera.

“Uroj besimtarët dhe mbarë shqiptarët që Krishtlindjet e tjera t’i festojmë pa këtë kolerë të zezë që ka pllakosur vendin “

Policia e Tiranë ka reaguar me një njoftim zyrtar lidhur me protestën e zhvilluar mbrëmë para Kryeministrisë. Gjatë tubimit të zhvilluar dje janë identifikuar 11 shtetas, ndërsa 4 prej tyre janë arrestuar dhe 7 të tjerë janë proceduar. Në protestë u hodhën molotovë, gjithashtu protestuesit kundërshtuan punonjësit e policisë.

Gjithashtu, u referuan materialet në Prokurori ku nisi procedimi penal për shtetasin Ervin Minarolli, me detyrë sekretar organizativ i subjektit politik Partia Demokratike, pasi në cilësinë e përfaqësuesit organizativ të këtij subjekti, nuk ka zbatuar detyrimet për identifikimin e personave përgjegjës për mbarëvajtjen e tubimit, në bazë të ligjit Nr. 8773, “Për tubimet”, neni 10.

3 punonjësit e Policisë që mbetën të dëmtuar gjatë tubimit morën mjekim në spital dhe janë jashtë rrezikut për jetën.

Grupi hetimor vijon punën për identifikimin e shtetasve të tjerë që mund te kanë kryer veprime të kundërligjshme gjatë tubimit të zhvilluar dje.

Materialet procedurale iu referuan Prokurorisë së Tiranës, për veprime të mëtejshme.

Për herë të parë, ABC News sjell një sondazh për gjithë figurat më të rëndësishme politike të Shqipërisë në 100 vite.

Cilin preferojnë shqiptarët nga drejtuesit e shtetit ndër vite?

Elektorati i majtë sot, ka vlerësim më pozitiv për kryeministrin aktual të Shqipërisë, Edi Rama 33.8%, 17.9% për ish-kryeministrin Fatos Nano, kurse simpatizantët e regjimit komunist kanë 7% për Enver Hoxhën dhe 1.3% për Ramiz Alinë.

Ana tjetër, elektorati i djathtë, ndahet mes Sali Berishës 24% dhe mbretit Ahmet Zogu 16.1%.

Më të vjetrit, janë simpatizantë të Enver Hoxhës, mbi 59 vjeç, kurse më të rinjtë të Edi Ramës 46.4 vjeç.

Mes të djathtëve, pavarësisht se Zogu herën e fundit si mbret daton 90 vite më parë, 5 vite para se të lindte Sali Berisha, Simpatizantët e Zogut, 47.1 vjeç kanë moshë më të re se ata të Berishës, 49.8 vjeç.

Rezulton se më të shkolluarit në Shqipëri, ata me 13.2 vite mesatare shkolle mbështesin Ramën, ata me 13 vite Zogun, 12.8 vite Nano ose Ramiz Alinë, kurse me 11.9 vite shkollë Sali Berishën.

Mbështetësit me më pak vite shkollimi se ata të Berishës, mbështesin Enver Hoxhën.

Tek ndarja zonale. Në zona urbane, Rama është më i pëlqyer me 35.4%, ndërsa mbështetja i bie në zona rurale me 30.3%. E njëjta gjë ndodh me Mbretin Zog, nga 16.5% në 15.5%, dhe Fatos Nanon, 21.1% dhe 15.1%.

Të vetmit që kanë një rritje në zonat rurale janë Sali Berisha dhe Enver Hoxha. Kryetari i PD pëlqehet vetëm 21.1% në qytete, por mbështetjen më të madhe e ka në fshatra, 29.8%. Ashtu si Enver Hoxha, nga 4.3% në 8.4%. përderisa ende dominojnë skenën politike aktualisht, Rama është më i dëshiruari nga të majtët, kurse Berisha nga të djathtët.

Por si votuan simpatizantët e Enver Hoxhës, Ramiz Alizë apo Fatos Nanos në 11 maj?

40.3% votuan për PS, 21% parti të tjera kurse 38.8% nuk votuan fare.

Sa i përket simpatizantëve të Ahmet Zogut? Vetëm 22% zgjodhën koalicionin e djathtë të Sali Berishës, po kaq, afër 20.8% zgjodhën parti të tjera, ndërsa 57.4% nuk votuan fare.

Një sinjal ky, se Sali Berisha për pëlqyeshmëri mund të mbetet nr.2, por nuk shihet domosdoshmërisht si lideri i të djathtës në Shqipëri./abcnews.al

E planifikuar si një protestë kombëtare, jo vetëm që nuk rezultoi e tillë, por protesta e PD u mbyll me tensione dhe terror.

Siç shihet edhe nga pamjet e siguruara nga ABC News, një protestues merr flakë pas hedhjes së molotovit para derës së Kryeministrisë.

Avokati Idajet Beqiri ka deklaruar se thirrjet e Sali Berishës për protesta kanë dështuar, duke theksuar se pjesëmarrja ka qenë e ulët edhe krahasuar me protestat e mëparshme. Sipas tij, Berisha e ka cilësuar protestën si fitore vetëm sepse numri i militantëve u barazua me atë të policëve.

Beqiri tha se në protestë nuk kanë marrë pjesë mbështetës të vërtetë të Partisë Demokratike, por individë që, sipas tij, nuk përfaqësojnë interesat e Shqipërisë. Ai e cilësoi protestën si të organizuar me pagesa, duke pretenduar se janë shpenzuar rreth 1 milion euro.

“Berisha ka tentuar të bëjë thirrje shqiptarëve që të dalin në protestë dhe e kemi parë edhe në foltore sesa i janë bashkangjitur. Ai sot e konsideroi një fitore të madhe, sepse krahasuar me të gjitha protestat ishte fitore, pasi u barazua numri i militantëve me policët.

Me të vërtetë, atij i janë bashkangjitur ata që nuk janë Partia Demokratike e Shqipërisë, por ata që i bashkangjiten, që nuk janë shqiptarë, ata që bëjnë politikën e serbëve.

Këta njerëz tani po mundohen të mbajnë bandën e tyre kundër Shqipërisë dhe edhe kjo protestë është një protestë ku shumica e tyre janë mercenarë. Nuk mund të vish në pushtet duke paguar militantët; 1 milion euro u hodhën në protestën e sotme dhe ata që u hapet barku për popullin duhet të investonin aty ku ka nevojë. Ishte protesta e seksionit të PD-së në SPAK, ku u dha një material SPAK-ut dhe, për ta mbajtur gjallë, iu dha materiali.”  / abcnews.al /

Protesta kombëtare e Partisë Demokratike e mbajtur në bukevardin përpara Kryeministisë, u mbyll me molotov. Analisti Frrok Çupi komentoi këtë protestë për ABC Neës ku tha se Berisha u mbyll në zyrë para fillimit të protestës, sepse priste ‘grupin e zjarrit’.

Çupi e cilësoi Berishës si një dirigjent pa orkestër. Ai shtoi se fakti që protesta kishte pak njerëz, nënkuptonte se të gjithë ata ishin të kontrolluar nga Berisha.

“Vonesat gjatë kohës së protestës, gjatë kohës kur ai ishte në zyrë, lexohen si vonesa pa ardhur ‘grupi i zjarrit’. Berisha është njësoj si një dirigjent pa orkestër. Fakti që atje kishte pak njerëz do të thotë që janë tërësish të kontrolluar dhe të stimuluar nga Berisha.

Ajo që bie në sy është se në fakt ai është gjithmonë i njëjti grupi, që nga ’96. Shikojmë që shërbimi sekret shqiptar, nuk kanë zbuluar akoma se ku strehohen këta njerëz, ku i marrin paratë, ku përgatiten. Shqiptarët janë të terrorizuar vetëm nga fakti që këta kanë dalë këta në shesh, sepse e kanë parë gjithë historinë e tyre që kanë djegur vendin dhe kanë vrarë njerëz”, tha Çupi./abcnews.al

Policia ka shoqëruar një person pas hedhjes së molotovit në drejtim të kryeministrisë.

Partia Demokratike ka përfunduar protestën kombëtare që u zhvillua në bulevardin përpara Kryeministrisë. Me përfundimin e fjalës së kreut të opozitës, Sali Berisha protestuesit hodhën molotove përpara derës së Kryeministrisë dhe forcave të policisë.

Megjithëse ishte paralajmëruar një protestë madhështore, nuk rezultoi të ishte një e tillë. Pjesëmarrja në nisje dhe përgjatë protestës ishte e ulët.

Në këtë protestë janë vënë në gatishmëri mbi 1300 forca policore Forcat Shqiponja, dhjetëra agjentë civilë si edhe 5 autobotë.

/ abcnews.al /

Partia Demokratike ka përfunduar protestën kombëtare që u zhvillua në bulevardin përpara Kryeministrisë. Me përfundimin e fjalës së kreut të opozitës, Sali Berisha protestuesit hodhën molotove përpara derës së Kryeministrisë dhe forcave të policisë.

Megjithëse ishte paralajmëruar një protestë madhështore, nuk rezultoi të ishte një e tillë. Pjesëmarrja në nisje dhe përgjatë protestës ishte e ulët./abcnews.al

Pas foltoreve, selia blu paralajmëroi këtë të hënë një protestë madhështore në bulevardin përpara Kryeministrisë. Por, a është kjo protestë madhështore siç Berisha pretendonte?!

Siç shihet edhe nga pamjet me dron të siguruara nga ABC News, shihet që edhe gjatë kohës ku kreu i opozitës po mban fjalën e tij, pjesëmarrja është shumë e ulët, po më pak edhe fryma e protestës së qytetarëve.

Në këtë protestë janë vënë në gatishmëri mbi 1300 forca policore Forcat Shqiponja, dhjetëra agjentë civilë si edhe 5 autobotë./abcnews.al

Analisti Frrok Çupi ka deklaruar se në Partinë Demokratike linçohesh nëse shfaq ide apo iniciativa ndryshe nga ajo e kryetarit. Sipas tij, figura që kanë menduar ndryshe në këtë parti, si Azem Hajdari dhe Gramoz Pashko, janë sulmuar dhe përjashtuar nga forumet vendimmarrëse.

Çupi e ka cilësuar deklaratën e Salianjit në protestën e PD si retorikë komuniste dhe formulë bolshevike, e cila është jashtë kohe dhe konteksti politik aktual.

“Mund të kesh një ide ose iniciativë, por aty linçohesh po të jesh ndryshe nga doktori. Si kundër kishte marrë vajzën dhe dhëndrin, duke u treguar njerëzve të tjerë: ja ku është e ardhmja e PD-së. Ai tenton të bëjë argument dhe tenton t’u thotë demokratëve që jam me ju.

Është linçuar Hajdari, Gramoz Pashko, secili në PD që ka pasur ndryshe atë parti. Është retorikë komuniste, unë rri në këtë parti se është partia ime. Është një formulë bolshevike, është e shëmtuar sepse është jashtë kohës dhe kontekstit. Atë realisht e kanë përjashtuar sepse nuk bën pjesë në forume. Prej tyre nuk ke kurrë aksion apo ndryshim. Diçka bëri dhe nervin e Berishës e ngriti në qiell dhe e detyroi SPAK-un të jetë në krahët e të bijës.”  / abcnews.al /

Edhe pse ka dalë kundër doktorit me foltoret e tij, Ervin Salianji mori pjesën në protestën e thirrur nga kreu i PD, Sali Berisha përpara godinës së Kryeministrisë.

I pyetur nga mediat nëse i druhej një përjashtimi, Salianji deklaroi se nga PD nuk e përjashton dot njeri.

Salianji shtoi se do të vijojë foltoret.

“Si protestues. Nuk është me dëshirë kjo punë. Jam këtu si demokrat. Nuk diskutohet që do vazhdoj dëgjimoret. Nuk më përjashton askush. Do të jem në PD dhe do vijoj të kontribuoj për PD. Ka ndryshuar nga kjo lëvizje dhe ka për të ndryshuar edhe më shumë. Do ta shoh dhe do ta them”, theksoi ai./abcnews.al

Këtë të hënë, kreu i PD Sali Berisha ka thirrur qytetarët për një protestë ndërkombëtarë në sheshin para Kryeministrisë. Megjithatë pjesëmarrja vazhdon që të jetë e ulët. Analisti Arben Meçe i ftuar në “Tirana Live” në ABC News, tha se qytetarët kanë arsye për të protestuar, por Berisha nuk ngjall më frymëzim për protesta.

Sipas Meçes e vetmja gjë e mirë që mund t’i bëjë Berisha Shqipërisë dhe shqiptarëve është që të largohet nga Partia Demokratike.

“Ka 20 minuta që ka filluar protesta dhe duhet që të kishte njerëz. Është një nga situatat më të rënda të qeverisë Rama. Dy denoncimet që ka bërë SPAK është një nga më seriozet. Dy çështjet më serioze që ka Shqipëria arrijnë të mblidhen në shesh shumë pak veta. Përballë këtij problem që është serioz. Sot shqiptarët nuk e morën seriozisht thirrjen e Sali Berishës dhe të Gazmend Bardhit. Gjëja më serioze që ka Shqipëri, është Sali-Ramë-Berisha.

Kjo tregon mungesë totale të qytetarëve. Kjo protestë ka vetëm një emër Berishë largohu urgjentisht nga PD dhe opozita shqiptare. E vetmja gjë që mund të bëjë Berisha është që të deklarojë humbjen e tij. SPAK është kthyer në një instrument politik të PD. SPAK bashkë me PD në këtë protestë ndaj Ballukut të inskenuar ishte një dështim. Ka vetëm një zgjidhje. Berisha të largohet dhe t’i japë rrugën PD-së. Të vetmin nder që mund t’i bëjë Sali Berisha popullit shqiptar është që të largohej dhe të tregonte arsyen pse shqiptarët nuk e kanë më frymën e protestës.

Fillimi i fundit të Sali Berishës është ky sot. Berisha duhet që të përshpejtojnë fundin e tij. Nuk ka më vazhdim të kësaj proteste. Kam bindjen e plotë që populli shqiptar ka të drejtë që të protestojë, për gjithë atë perceptim që ka prodhuar SPAK së bashku me PD. SPAK dhe PD prodhuan një inskenim”, tha Berisha.