ZAGREB, 30 janar /ATSH-DPA/ – Kancelari gjerman, Friedrich Merz shprehu skepticizëm mbi realizueshmërinë e propozimeve të gjerë për reformimin e Bashkimit Evropian, të paraqitura nga lideri i Partisë Popullore Evropiane (EPP), Manfred Weber.

Weber ka sugjeruar që dy pozicionet kryesore të BE-së të bashkohen për të rritur efektivitetin e bllokut në çështjet ndërkombëtare.

“Të arrish ndryshime traktatesh në këtë Bashkim Evropian me 27 vende është një detyrë mjaft e vështirë”, tha Merz në fillim të samitit të EPP-së në Zagreb.

Ai shtoi se duhet të përqendrohen kryesisht tek aftësia mbrojtëse dhe konkurrueshmëria ekonomike.

Liderët e EPP-së po diskutojnë në Zagreb për rolin e Evropës në një rend botëror ku fuqitë kryesore luajnë rol dominant.

Weber, i intervistuar nga revista gjermane “Der Spiegel”, propozoi që pas zgjedhjeve evropiane të vitit 2029, posti i presidentit të Komisionit Evropian të bashkohet me atë të presidentit të Këshillit Evropian.

”BE-ja nuk luajti rol udhëheqës në krizën e fundit për Ukrainën dhe Groenlandën”, theksoi ai.

Weber mbështeti gjithashtu krijimin e një ushtrie evropiane dhe vendosjen e forcave të përbashkëta paqeruajtëse në Ukrainë si bazë për këtë.

Merz nënvizoi se BE-ja ka hequr praktikisht dorë nga parimi i unanimitetit në tregun e brendshëm, ku përdoret gati kudo votimi me shumicë të kualifikuar, dhe se kjo qasje duhet të zgjerohen gradualisht edhe në politikën e jashtme dhe sigurinë.

Sot, BE-ja përfaqësohet në samitet ndërkombëtare nga dy figura: presidenti i Këshillit dhe presidenti i Komisionit, gjë që ndonjëherë e bën të paqartë se kujt duhet t’i drejtohen të huajt për çështje të caktuara.

Presidentja e Komisionit, Ursula von der Leyen, përgjigjet kryesisht për propozimet ligjore dhe respektimin e traktateve, ndërsa presidenti i Këshillit, António Costa, kryeson dhe përgatit samitet e BE-së./  /Ad.Ab./ a.jor.

The post FOKUS – Merz skeptik ndaj planeve për rimodelimin e lidershipit të BE-së appeared first on Agjencia Telegrafike Shqiptare.

Kryeministri në detyrë i Republikës së Kosovës, Albin Kurti, ka deklaruar se sektori i teknologjisë së informacionit dhe komunikimit (TIK) është sektori me rritjen më të shpejtë në ekonominë e vendit.

Sipas Kurtit, eksporti i shërbimeve të TIK-ut është rritur për 386% gjatë katër viteve të fundit, duke u rritur pothuajse pesëfish, çka dëshmon potencialin e këtij sektori për t’u shndërruar në motor kyç të rritjes së mëtejshme ekonomike.

Ai theksoi se sektori i TIK-ut, së bashku me shërbimet profesionale dhe mbështetëse, kontribuon me rreth 6% në Bruto Produktin Vendor (BPV) të Kosovës.

Po ashtu, Kurti nënvizoi se punësimi në teknologji ka efekt multiplikues, duke nxitur hapjen e vendeve të reja të punës edhe në sektorë të tjerë të ekonomisë.

"Andaj, mbështetja ndaj këtij sektori mbetet prioritet i qartë i Qeverisë sonë edhe në mandatin e ardhshëm, veçanërisht përmes Fondit të Inovacionit, si dhe Kullës TIK (ICT Tower), ka deklaruar Kurti.

Këto deklarata Kurti i bëri gjatë vizitës së tij në Qendrën e Inovacionit në Kosovë (ICK), ku u prezantua edhe Pasqyra e Ekonomisë Digjitale, e përgatitur nga platforma Data4X./Telegrafi/

Presidenti i Republikës, Bajram Begaj, mbrëmjen e sotme ka pritur në Presidencë përfaqësuesit e Trupit Diplomatik në Shqipëri

Begaj gjatë fjalës së tij përshëndetëse, ka ftuar ambasadorët që ta shohin Shqipërinë si shtëpinë e tyre.

Presidenti theksoi se bashkëpunimi me partnerët strategjikë, nuk janë thjesht për llogari gjeopolitike por zgjedhje identiteti.

“Përkatësia Euroatlantike dhe bashkëpunimi me partnerët strategjikë, nuk janë thjesht për llogari gjeopolitike, por zgjedhje identiteti dhe vlera të patjetërsueshme”, theksoi Presidenti Begaj.

Po ashtu presidenti tha se viti 2026 përfaqëson për Shqipërinë një moment të rëndësishëm konsolidimi institucional dhe afrimi me standardet evropiane.

“Synimi ynë është të thellojmë këtë hapje, të forcojmë besimin dhe të krijojmë kushte që lidhja mes Shqipërisë, diasporës dhe partnerëve tanë të përkthehet në zhvillim të qëndrueshëm dhe integrim të mëtejshëm evropian”, tha Begaj.

The post Begaj pret në Presidencë përfaqësuesit e Trupit Diplomatik: Shiheni Shqipërinë si shtëpinë tuaj appeared first on Albeu.com.

TIRANË, 28 janar /ATSh/ Presidenti Bajram Begaj zhvilloi mbrëmjen e sotme pritjen me përfaqësuesit e Trupit Diplomatik në Shqipëri. Gjatë fjalës përshëndetëse, Begaj i ftoi ambasadorët ta shohin Shqipërinë si shtëpinë e tyre.

Begaj i cilësoi marrëdhëniet strategjike me Shtetet e Bashkuara të Amerikës, anëtarësimin në Bashkimin Evropian dhe përkatësinë në Aleancën e Atlantikut të Veriut si themelet e sigurisë dhe orientimit tonë ndërkombëtar.

Kreu i Shtetit bëri të ditur qëndrimin aktiv të Shqipërisë përballë zhvillimeve komplekse botërore, orientimin e palëkundur euroatlantik dhe angazhimin për të qenë pjesë e Bashkimit Evropian.

Gjithashtu, Begaj rikonfirmoi politikat e fqinjësisë së mirë, forcimin e bashkëpunimit me vendet e Ballkanit Perëndimor, mbështetjen e fuqishme ndaj Kosovës, faktorit shqiptar në rajon dhe forcimin e lidhjeve me diasporën.

Duke iu referuar tranzicionit global, Begaj theksoi se Shqipëria e vlerëson atë me një përgjegjësi dhe vëmendje të shtuar.

“Përkatësia euroatlantike dhe bashkëpunimi me partnerët strategjikë”, theksoi Begaj, “nuk janë thjesht për llogari gjeopolitike, por zgjedhje identiteti dhe vlera të patjetërsueshme”.

Dhe këto parime, sipas Kreut të Shtetit, nuk mbeten në nivel deklarativ, por përkthehen në zgjedhje të qarta strategjike dhe aleanca të qëndrueshme.

Duke iu referuar marrëdhënieve me Shtetet e Bashkuara, Begaj u shpreh, ndër të tjera, se ky partneritet, më shumë se një aleancë politike e ushtarake, është një marrëdhënie e veçantë historike, e ndërtuar mbi mirënjohjen, besimin, vlerat e përbashkëta dhe angazhimin për lirinë dhe demokracinë.

Në këtë kuadër, Presidenti i Republikës përmendi ftesën e presidentit Trump për përfshirjen e Shqipërisë në Bordin e Paqes, një nismë e rëndësishme që synon forcimin e paqes dhe stabilitetit ndërkombëtar. Presidenti i Republikës e cilësoi atë si vlerësim të Shteteve të Bashkuara për Shqipërinë si një partner të besueshëm, të qëndrueshëm dhe të përkushtuar.

Duke iu referuar procesit të anëtarësimit të Shqipërisë në BE, Begaj theksoi progresin që është bërë së fundmi me grup-kapitujt e negociatave dhe reformat transformuese, të cilat kanë shënuar kalimin nga aspirata, në një angazhim të strukturuar dhe të bazuar në meritë.

Evropa, theksoi Kreu i Shtetit, mbetet një projekt paqeje dhe vlerash që ndërtohet mbi demokracinë, shtetin e së drejtës dhe respektin për liritë individuale.

Begaj e cilësoi prioritet forcimin e Aleancës Veriatlantike në një epokë ku siguria nuk mund të merret më e mirëqenë, e për këtë theksoi kontributin aktiv të Shqipërisë duke investuar në mbrojtje moderne dhe siguri kibernetike.

Për sa u përket zhvillimeve në rajon, Begaj e cilësoi Shqipërinë si një spirancë të orientimit euroatlantik në Ballkanin Perëndimor, duke theksuar faktin se Shqipëria mbetet promotore e dialogut dhe stabilitetit në Ballkanin Perëndimor, e mbështet fuqishëm Kosovën në arenën ndërkombëtare dhe angazhohet për fqinjësi të mirë, dialog dhe integrim evropian si horizont i përbashkët.

Një mesazh të veçantë Presidenti i Republikës përcolli edhe për diasporën, duke shprehur mirënjohje për angazhimin e saj në hapjen e Shqipërisë për zhvillimin e turizmit, ndërsa theksoi rëndësinë e forcimit të lidhjeve.

Duke iu referuar prioriteteve të këtij viti, Kreu i Shtetit theksoi se viti 2026 përfaqëson për Shqipërinë një moment të rëndësishëm konsolidimi institucional dhe afrimi me standardet evropiane.

“Synimi ynë është të thellojmë këtë hapje, të forcojmë besimin dhe të krijojmë kushte që lidhja mes Shqipërisë, diasporës dhe partnerëve tanë të përkthehet në zhvillim të qëndrueshëm dhe integrim të mëtejshëm evropian”, deklaroi Presidenti i Republikës, në pritjen e përvitshme me përfaqësues të Trupit Diplomatik në Shqipëri.

Presidenti Begaj pret trupin diplimatik në Tiranë

1 nga 6

/m.q/r.e/a.f/

The post Begaj: Viti 2026, moment kyç për konsolidimin institucional dhe afrimin me BE-në appeared first on Agjencia Telegrafike Shqiptare.

Një plan për të ndërtuar një fabrikë “diamantesh sintetike” në Shtetet e Bashkuara është një perspektivë kryesore në paketën e investimeve prej 550 miliardë dollarësh të Japonisë.

Dhe ky hap vjen ndërsa aleatët shtyjnë përpara zgjerimin e prodhimit të një materiali jetik për prodhimin e çipave dhe me precizion të lartë, kanë thënë burime të Reuters, përcjell Telegrafi.

Kjo mund të jetë ndër grupet e para të projekteve, detajet e të cilave Reuters thotë se po i raporton për herë të parë, që do të zbulohen përpara një vizite në SHBA nga kryeministrja japoneze Sanae Takaichi, e planifikuar që në mars, thanë të dy burimet.

"Shtetet e Bashkuara duan të përshpejtojnë prodhimin vendas të diamanteve sintetike", ka thënë një nga burimet.

"Duke përfshirë kompanitë japoneze, Uashingtoni shpreson të ndërtojë një zinxhir furnizimi SHBA-Japoni që nuk mbështetet te Kina".

Lëvizjet e fundit të Kinës për të vendosur kontrolle të eksportit mbi disa “diamante artificiale” kanë nënvizuar rëndësinë strategjike të materialit, shumica e të cilit tani prodhohet në Kinë.

Projekti i diamanteve sintetike përfshin Element Six, pjesë e De Beers Group, kompania kryesore e diamanteve në botë, shtoi burimi.

Lajmi vjen ndërsa Japonia përshpejton përpjekjet për të finalizuar projektet në kuadër të iniciativës së rënë dakord si pjesë e marrëveshjes së Tokios me Uashingtonin për të ulur tarifat mbi eksportet japoneze.

Gjithashtu, në grupin e parë të projekteve, ka të ngjarë të përfshihet një projekt i gjenerimit të energjisë në shkallë të gjerë, që përfshin konglomeratin industrial japonez Hitachi Ltd, thanë burimet.

Ministria e tregtisë e Japonisë refuzoi të komentojë mbi projektet në diskutim, duke thënë se ishte në bisedime me Shtetet e Bashkuara për të hartuar shpejt linjat e projektit, por asgjë nuk ishte vendosur.

Diamantet artificiale kanë gjithashtu aplikime ushtarake me përdorim të dyfishtë, në prodhimin e municioneve dhe komponentëve të radarit. /Telegrafi/

Fëmijët në Kosovë kalojnë mesatarisht mbi tri orë në ditë në media digjitale, kryesisht për argëtim, ndërsa përdorimi i teknologjisë për mësim dhe zhvillim mbetet i kufizuar.

Kështu ka deklaruar Blerta Aliu Ahmeti nga Iniciativa për Fuqizimin e Arsimit.

Sipas saj, fëmijët shpesh ekspozohen ndaj përmbajtjeve të papërshtatshme për moshën e tyre, ndërkohë që rastet e dhunës online, bullizmit digjital dhe sfidave të rrezikshme në internet janë në rritje.

“Shumë pak raste kemi kur fëmijët e përdorin teknologjinë për mësim apo zhvillim, ndërsa dhuna online dhe përmbajtjet e pakontrolluara po bëhen gjithnjë e më shqetësuese”, tha Aliu Ahmeti.

Ajo theksoi se, ndonëse edukimi medial është pjesë e kurrikulës në Kosovë që nga viti 2016, zbatimi praktik në shkolla ka qenë minimal, kryesisht për shkak të mungesës së trajnimeve dhe kapaciteteve te mësimdhënësit.

- YouTube www.youtube.com

“Edukimi medial duhet të nisë herët, jo për t’i ndaluar fëmijët nga teknologjia, por për t’i mësuar se si ta përdorin atë në mënyrë kritike dhe të sigurt”, u shpreh ajo.

Aliu Ahmeti foli edhe për projektin “Edukimi Mediatik – Ekspertiza Nordike në Kosovë”, përmes të cilit përvojat e vendeve nordike po përshtaten në kontekstin lokal, në bashkëpunim me disa komuna, me synim forcimin e edukimit medial në shkollat fillore dhe të mesme./Telegrafi/.

Edukimi medial duhet të jetë pjesë funksionale e sistemit arsimor në Kosovë, për t’u mundësuar fëmijëve dhe të rinjve zhvillimin e mendimit kritik dhe dallimin e informacionit të saktë nga dezinformimi.

Kjo u theksua në episodin e ri të “Përballje Podcast”, ku u diskutua për rolin e shkollave, institucioneve dhe shoqërisë në epokën digjitale.

Blerta Aliu- Ahmeti nga Iniciativa për Fuqizimin e Arsimit bëri të ditur se fëmijët në Kosovë kalojnë mesatarisht rreth tri orë në ditë në media digjitale, kryesisht për argëtim.

- YouTube www.youtube.com

“Shumë pak raste kemi kur teknologjia përdoret për mësim apo zhvillim, ndërsa ekspozimi ndaj përmbajtjeve të papërshtatshme dhe dhunës online po rritet”, tha ajo shkruan Telegrafi.

Aliu- Ahmeti theksoi se, ndonëse edukimi medial është pjesë e kurrikulës që nga viti 2016, “zbatimi praktik në shkolla ka qenë minimal”, kryesisht për shkak të mungesës së trajnimeve për mësimdhënësit.

Blerta Aliu Ahmeti nga EEIFoto: Ridvan Slivova

Ajo shtoi se EEI ka nisur projekt- pilot në bashkëpunim me disa komuna, për të trajnuar mësimdhënësit me mbështetje të ekspertëve nga vendet nordike.

Nga ana tjetër, Samir Shahini, drejtor i Drejtorisë së Arsimit në Komuna e Prishtinës, vlerësoi se shoqëria kosovare shpesh e pranon rëndësinë e edukimit medial vetëm në teori.

“Çdo ndryshim përballet me rezistencë, por kjo nuk duhet të na ndalë. Nxënësit sot kanë qasje të pakontrolluar në internet dhe kjo kërkon veprim urgjent”, tha Shahini transmeton Telegrafi.

Sipas tij, teknologjia ka ndikuar edhe në rritjen e konflikteve, bullizmit dhe dhunës mes të rinjve, por “mund të jetë mjet pozitiv vetëm nëse shoqërohet me edukim të duhur”.

Samir Shahini nga Komuna e PrishtinësFoto: Ridvan Slivova

Ai theksoi se Prishtina ka nisur iniciativa konkrete, duke pilotuar mësimin gjithë- ditor dhe përfshirjen e temave si inteligjenca artificiale dhe edukimi medial, pa pritur vendime nga niveli qendror.

Të dy panelistët u pajtuan se edukimi medial është edhe investim për demokracinë, pasi në kohën e dezinformimit dhe përmbajtjeve të manipuluara, ndërtimi i mendimit kritik që nga mosha e hershme është thelbësor për shoqërinë kosovare.

Ky ishte episodi e gjashtë i serisë “Përballje Podcast” (Integriteti Medial dhe Demokracia në Kosovë), ku diskutohen tema kundër dezinformimit, inteligjencën artificiale, edukimin medial, sigurinë kibernetike etj. /Telegrafi/

Kina shënjestroi telefonat celularë të zyrtarëve të lartë në Britanisë së Madhe për vite me radhë, u raportua të hënën në mbrëmje.

Në një fushatë të sofistikuar globale spiunazhi, kuptohet se spiunët kinezë kanë shënjestruar telefonat e ndihmësve të ngushtë të Boris Johnson, Liz Truss dhe Rishi Sunak midis viteve 2021 dhe 2024.

U sugjerua që operacioni i spiunazhit mund të ketë kompromentuar anëtarë të lartë të qeverisë, duke ekspozuar komunikimet e tyre private me Pekinin.

Kjo vjen ndërsa Keir Starmer niset për në Kinë këtë javë, vizita e parë e një kryeministri britanik që nga viti 2018, transmeton Telegrafi.

Nuk është e qartë nëse ka pasur ndonjë përpjekje për të sulmuar telefonat celularë të vetë kryeministrave, por burimet pohuan se Kina kishte ndërmend të depërtonte në zemër të Downing Street.

Të hënën në mbrëmje, burime të inteligjencës amerikane thanë se operacioni, i koduar me emrin Salt Typhoon, ishte duke vazhduar - duke ngritur shqetësime se Sir Keir dhe stafi i tij mund të jenë ekspozuar.

Në tetor, shefi i MI5, Ken McCallum paralajmëroi për 'përshkallëzim' të kërcënimeve shtetërore kundër Parlamentit, disa javë para një alarmi spiunazhi në lidhje me përpjekjet e Pekinit për të rekrutuar zyrtarë.

Muaj më parë, Qendra Kombëtare e Sigurisë Kibernetike tha se Kina kishte synuar sektorë kritikë, përfshirë qeverinë, që nga viti 2021, duke paralajmëruar se "të dhënat e vjedhura përmes këtij aktiviteti në fund të fundit mund t'u ofrojnë shërbimeve të inteligjencës kineze aftësinë për të identifikuar dhe ndjekur komunikimet dhe lëvizjet e objektivave në të gjithë botën".

Kur çështja e spiunazhit të Kinës dështoi vitin e kaluar, doli në pah se Pekini kishte urdhëruar posaçërisht raportime rreth Boris Johnson, Rishi Sunak dhe Liz Truss.

Prokurorët besonin se informacioni i ndjeshëm mbi deputetët ishte përcjellë nga studiuesi parlamentar Chris Cash, 30 vjeç, te miku i tij mësues Chris Berry, 33 vjeç. Të dy i mohuan akuzat.

Por çështja kundër tyre dështoi kur këshilltarët e qeverisë refuzuan ta quanin Pekinin një kërcënim për sigurinë kombëtare.

Alicia Kearns, ministre në hije për Sigurinë Kombëtare, tha: "Sa më shumë prova i duhen kësaj qeverie përpara se t'i japë fund simulimit të saj ndaj Xi-së".

Në vitin 2024, SHBA-të zbuluan se grupet e hakerimit të lidhura me Pekinin kishin fituar qasje në kompanitë e telekomunikacionit në të gjithë botën, duke i dhënë Kinës qasje në të dhënat telefonike të miliona njerëzve.

Anne Neuberger, e cila në atë kohë ishte zëvendëskëshilltare e sigurisë kombëtare e SHBA-së, tha se hakerat kishin aftësinë të "regjistronin thirrje telefonike sipas dëshirës".

The Telegraph pretendoi se kishte "shumë" sulme hakerimi në telefonat e stafit të Downing Street dhe në të gjithë qeverinë, veçanërisht gjatë mandatit të Sunak, i cili ishte kryeministër nga viti 2022 deri në vitin 2024.

Por mbetet e paqartë nëse hakerat arritën të merrnin ndonjë informacion të ndjeshëm.

Një zëdhënës i ambasadës kineze tha: "Ne kundërshtojmë fuqimisht praktikën e politizimit të çështjeve të sigurisë kibernetike ose akuzimin e vendeve të tjera pa prova". /Telegrafi/

Drejtuesja pranë Sektorit për Hetimin e Krimeve Kompjuterike, Suela Bonjaku, dha alarmin një javë më parë për një rritje të formave dhe intensitetit të krimeve kibernetike ndaj të miturve në Shqipëri. “Spektri i formave të abuzimeve kibernetike shkon nga bullizmi deri te format më të rënda të abuzimit”, tha Bonjaku gjatë fjalës së saj në […]

The post Krimet kibernetike ndaj të miturve sjellin pasoja afatgjata appeared first on BoldNews.al.

PARIS, 21 janar /ATSH-AA/ – Franca ka bërë thirrje për një stërvitje ushtarake të NATO-s në Grenlandë dhe tha se është “e gatshme të kontribuojë”, njoftoi Pallati Elysee, ndërsa tensionet rriten mes deklaratave të përsëritura të presidentit të SHBA-së, Donald Trump për marrjen e kontrollit të ishullit Arktik.

Grenlanda, një territor vetëqeverisës i Mbretërisë së Danimarkës, ka tërhequr interesin e Trumpit për shkak të vendndodhjes strategjike dhe burimeve të mëdha minerale, si dhe shqetësimeve të supozuara në lidhje me rritjen e aktivitetit rus dhe kinez.

Ndërsa Trump refuzoi të përjashtonte përdorimin e forcës për të marrë ishullin dhe postoi imazhe si meme për të mbështetur pretendimin e tij, Danimarka dhe Grenlanda kanë hedhur poshtë propozimet për ta shitur atë, duke riafirmuar sovranitetin danez mbi territorin.

Franca, Danimarka, Suedia dhe Gjermania po rrisin praninë e tyre ushtarake në Grenlandë përmes ushtrimeve dhe misioneve të zbulimit, ndërsa Trump ka këmbëngulur që territori duhet të jetë “në duart e SHBA-së” për t’iu kundërvënë Rusisë dhe Kinës.

Të shtunën, Trump tha se Washingtoni do të vendoste tarifa prej 10 për qind për mallrat nga Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda duke filluar nga 1 shkurti dhe duke u rritur në 25 për qind në qershor derisa të arrihet një marrëveshje për “blerjen e plotë dhe totale të Grenlandës”.

Në përgjigje, udhëheqësit evropianë hodhën poshtë kërcënimet e Trumpit për tarifa kundër tetë vendeve evropiane dhe përsëritën solidaritetin me Danimarkën.   /os/

The post PARIS – Franca bën thirrje për stërvitje të NATO-s në Groenlandë, ndërsa Trump dyfishon përpjekjet për ishullin appeared first on Agjencia Telegrafike Shqiptare.

KOPENHAGË, 20 janar /ATSH-AA/ – Ministri danez i Mbrojtjes, Troels Lund Poulsen tha se Danimarka, së bashku me Grenlandën, i propozuan Sekretarit të Përgjithshëm të NATO-s, Mark Rutte një mision të Aleancës në Arktik mes kërcënimeve të SHBA-së për të marrë territorin autonom danez.

Poulsen mbajti një konferencë të përbashkët për media me ministren e Jashtme të Grenlandës, Vivian Motzfeldt pasi u takuan me kreun e NATO-s dhe shefen e politikës së jashtme të BE-së, Kaja Kallas në Bruksel.

“Danimarka dhe Grenlanda i kanë propozuar Ruttes një mision të NATO-s në Arktik. Ne e kemi diskutuar atë dhe gjithashtu e kemi propozuar”, tha Poulsen.

Megjithatë, ai nuk tha se si iu përgjigj Rutte propozimit.

Poulsen riafirmoi se ata do të vazhdojnë dialogun me zyrtarët amerikanë, duke shtuar se nuk do të jetë Danimarka ajo që “do të heqë dorë nga këmbëngulja për dialog”.

“Nëse SHBA-ja do të tërhiqej nga NATO nesër, ne do të përballeshim me një sfidë të madhe në menaxhimin tonë vetë”, tha ai duke nënvizuar se disa nga deklaratat që vijnë nga Trumpi “vërtet lëndojnë”.

Motzfeldt përsëriti se “të gjitha dyert mbeten të hapura” përmes bashkëpunimit dhe zhvillimit “me fokus në mbrojtjen e ndërsjellë” midis aleatëve dhe se mbrojtja e tyre është “e ndërthurur me mbrojtjen e SHBA-së”.

“Për ne, banorët e Grenlandës, aspekti më i rëndësishëm i pjesëmarrjes sonë është të jemi në gjendje të flasim në emër të popullit të Grenlandës, duke kontribuar në gjetjen e zgjidhjeve të mira në interes të tyre. Ne e kemi kryer këtë punë në një mënyrë të mirë”, shtoi ajo.

Grenlanda, një territor vetëqeverisës brenda Mbretërisë së Danimarkës ka tërhequr interesin e SHBA-së për shkak të vendndodhjes së saj strategjike dhe burimeve të mëdha minerale si dhe shqetësimeve të supozuara në lidhje me rritjen e aktivitetit rus dhe kinez.

Trumpi ka thënë vazhdimisht se SHBA-ja duhet ta blejë Grenlandën për sigurinë kombëtare dhe për të parandaluar Rusinë ose Kinën të fitojnë kontrollin e territorit. Ai ka kërcënuar me tarifa aleatët që kundërshtojnë ofertën.

Si Danimarka ashtu edhe Grenlanda kanë hedhur poshtë çdo propozim për shitjen e territorit, duke riafirmuar sovranitetin danez mbi ishullin.   /os/

The post FOKUS – Danimarka dhe Grenlanda propozojnë mision të NATO-s në Arktik appeared first on Agjencia Telegrafike Shqiptare.

Aeroporti ishte i mbushur me udhëtarë dhe automjete, ndërsa midis turmës fshihej një pilot.

Bëhet fjalë për një imazh që po qarkullon në rrjetet sociale, me një sfidë në vete.

Aty mund të shihen, shumë bagazhe, autobusa, taksi dhe udhëtarë.

Por pyetja që shtrohet është: A mund ta gjeni pilotin e fshehur?

Në ishullin grek Evia, arkeologët kanë zbuluar një tempull 2 000-vjeçar pranë Tempullit të Amarysisë Artemis, që përmbante ar, bizhuteri dhe thesare të tjera të çmuara, sipas “The Independent”.

Tempulli, i ndërtuar mbi themele guri në tokë të lagur, daton nga shekulli VII para Krishtit  dhe është zbuluar nga një ekip prej 50 studiuesish.

Brenda tij, janë gjetur struktura të shumta që mund të kenë shërbyer si altare, përfshirë një altar të veçantë në formë patkoi, dhe shtresa të dendura hiri me kocka të djegura.

Artefaktet përfshijnë vazo korinthiane dhe atike, bizhuteri prej ari, argjendi dhe korali, si dhe figurina bronzi nga periudha gjeometrike që paraqesin dem dhe dhi.

Ministria greke e Kulturës njoftoi gjithashtu se janë gjetur mure të mëdha të Epokës së Bakrit, të cilat i përkasin sistemit të fortifikimit të një vendbanimi parahistorik.

Zbulimi tregon se ky kult kishte rrënjë që shtriheshin menjëherë pas përfundimit të periudhës mikenase.

TIRANË, 17 janar /ATSH/ Ambasadori i Bashkimit Europian në Tiranë, Silvio Gonzato, ka dhënë sot një mesazh kundër bullizmit kibernetik, duke e cilësuar atë si një kërcënim në rritje për fëmijët në Shqipëri dhe në të gjithë Europën.

Në deklaratën e tij, Gonzato theksoi se bullizmi kibernetik ndikon drejtpërdrejt në shëndetin mendor të fëmijëve dhe në ndjenjën e tyre të sigurisë, duke krijuar pasoja serioze në zhvillimin dhe mirëqenien e tyre.

Sipas ambasadorit të BE-së, mbrojtja e të drejtave të fëmijëve në hapësirën digjitale nuk mund të mbështetet vetëm te ligjet, por kërkon angazhim të përbashkët të të gjithë aktorëve të shoqërisë.

“Prindërit, shkollat, institucionet dhe shoqëria në tërësi duhet të veprojnë së bashku për të garantuar sigurinë e fëmijëve online”, u shpreh Gonzato.

Ai nënvizoi se politikat më të forta dhe dialogu i hapur janë elementë kyç për parandalimin e bullizmit online dhe për krijimin e një mjedisi digjital më të sigurt për fëmijët, duke theksuar rëndësinë e ndërgjegjësimit dhe bashkëpunimit në nivel kombëtar dhe europian.

/gj.m/a.f/

The post Gonzato: Bullizmi kibernetik kërcënim në rritje për fëmijët appeared first on Agjencia Telegrafike Shqiptare.

MOSKË, 15 janar /ATSH-DPA/ – Duke marrë parasysh pretendimet e presidentit amerikan Donald Trump për Groenlandën, Rusia ka paralajmëruar se interesat e saj në Arktik nuk duhet të injorohen.

”Çdo përpjekje për të shpërfillur interesat e Rusisë në rajonin polar, mbi të gjitha në fushën e sigurisë, nuk do të mbetet pa përgjigje dhe do të ketë pasoja shumë të gjera”, tha në Moskë zëdhënësja e Ministrisë së Jashtme ruse, Maria Zakharova.

Trump shpesh përmend aktivitetet ruse dhe kineze pranë ishullit arktik si justifikim për kërkesën e tij për kontroll mbi Grenlandën, duke argumentuar se prania e tyre e bën këtë masë tokësore thelbësore për nevojat e sigurisë së SHBA-së.

Zakharova kritikoi misionin e zbulimit ushtarak të disa shteteve evropiane të NATO-s për të mbrojtur më mirë ishullin autonom që i përket Danimarkës, duke e quajtur atë provokimin e radhës nga vendet perëndimore, të cilat, sipas saj, synojnë të imponojnë rendin e tyre edhe në këtë rajon të botës.

Ajo tha se shtetet evropiane duhet të jenë të vetëdijshme se veprime të tilla rrezikojnë sigurinë e Rusisë si një shtet arktik bregdetar i barabartë.

Rusia, e cila ka një vijë bregdetare shumë të gjatë në oqeanin Arktik, e konsideron Arktikun si sferë të interesit të saj.

Ajo po rrit përdorimin e rrugëve detare në këtë rajon dhe po zgjeron praninë e saj ushtarake./  /Ad.Ab./ a.jor.

The post FOKUS – Rusia tregon interes për Arktikun, ndërsa SHBA synon Groenlandën appeared first on Agjencia Telegrafike Shqiptare.

NUUK, 15 janar /ATSH/ – Një kontingjent ushtarak francez me 15 trupa ka mbërritur në kryeqytetin e Groenlandës, Nuuk, ndërsa edhe disa shtete evropiane kanë dërguar ushtarë atje si pjesë e një misioni, shkruan BBC.

Vendosja, e cila do të përfshijë gjithashtu personel nga Gjermania, Suedia, Norvegjia, Holanda dhe Mbretëria e Bashkuar, vjen ndërsa presidenti i SHBA-së, Donald Trump, vazhdon të ushtrojë presion mbi pretendimin e tij për ishullin Arktik, i cili është një pjesë e Danimarkës.

Presidenti francez, Emmanuel Macron, tha se kontingjenti fillestar do të përforcohej së shpejti me “asete tokësore, ajrore dhe detare”.

Diplomati i lartë Olivier Poivre d’Arvor e pa misionin si dërgimin e një sinjali të fortë politik: “Ky është një ushtrim i parë… ne do t’u tregojmë SHBA-ve se NATO është e pranishme atje”.

Lëvizja e personelit ushtarak vjen pasi ministrat e jashtëm të Danimarkës dhe Groenlandës udhëtuan për në Uashington për një takim me zëvendëspresidentin e SHBA-së, JD Vance ditën e djeshme.

Pas takimit, Ministri i Jashtëm danez, Lars Lokke Rasmussen, tha se ndërsa bisedimet ishin konstruktive, mbeti një “mosmarrëveshje themelore midis dy palëve dhe kritikoi përpjekjen e Trump për të blerë Groenlandën’’.

Ndërkohë, Trump e dyfishoi përpjekjen e tij për ta vënë Groenlandën nën kontrollin e SHBA-së, duke u thënë gazetarëve në Zyrën Ovale: “Ne kemi nevojë për Groenlandën për sigurinë kombëtare”.

Edhe pse nuk e përjashtoi përdorimin e forcës, ai tha se ‘’mendonte se diçka mund të zgjidhet me Danimarkën’’.

“Problemi është se nuk ka asgjë që Danimarka mund të bëjë në lidhje me këtë nëse Rusia ose Kina duan të pushtojnë Groenlandën, por ka gjithçka që mund të bëjmë. Ju e zbuluat këtë javën e kaluar me Venezuelën”, theksoi ai.

Kryeministri polak Donald Tusk tha se Polonia nuk po planifikonte t’i bashkohej vendosjes ushtarake evropiane në Groenlandë, por paralajmëroi se çdo ndërhyrje ushtarake amerikane atje “do të ishte një katastrofë politike”.

“Një konflikt ose përpjekje për aneksim të territorit të një anëtari të NATO-s nga një anëtar tjetër i NATO-s do të ishte fundi i botës siç e njohim ne – dhe që për shumë vite garantonte sigurinë tonë”, tha ai në një konferencë për shtyp.

Ndërkohë, ambasada e Rusisë në Belgjikë shprehu “shqetësim serioz” për atë që po zhvillohej në Arktik, duke akuzuar NATO-n për ndërtimin e një pranie ushtarake atje “nën pretekstin e rremë të një kërcënimi në rritje nga Moska dhe Pekini”.

Gjermania dërgoi sot një aeroplan transporti A400M në Nuuk me një kontingjent prej 13 ushtarësh, megjithëse zyrtarët thanë se ata do të qëndronin në Grenlandë vetëm deri të shtunën.   /os/

The post NUUK – Një kontigjent ushtarak evropian mbërrin në Groenlandë mes polemikave mbi të ardhmen e Artikut appeared first on Agjencia Telegrafike Shqiptare.

SPAK njoftoi të enjten më 15 janar përfundimin e hetimeve për sulmin kibernetik të kryer ndaj kësaj prokurorie në mars të vitit të kaluar, kur të dhëna të disa çështjeve ndaj zyrtarëve të nivelit të lartë që ishin nën hetim, u kopjuan përmes hakerimit dhe u shpërndanë dhjetra personave, duke dëmtuar ecurinë e hetimeve. SPAK […]

The post SPAK dërgon në gjyq tre të akuzuarit për sulmin kibernetik appeared first on Reporter.al.

Gjurmët e theksuara nga çorapet mund të jenë më shumë sesa problem estetik - në disa raste, ato tregojnë gjendje shëndetësore që kërkojnë vëmendje

Në fund të ditës, kur ndërroni rrobat e përditshme me pizhame, ndoshta vini re se çorapet ju kanë lënë shenja të thella në pulpë ose rreth kyçeve. Vijat duken të “gdhendura” në lëkurë dhe zhduken ngadalë. Shpesh mendohet se shkaku është thjesht masa e gabuar e çorapeve, por në disa raste, trupi po dërgon një sinjal të rëndësishëm shëndetësor.

Çorapet nuk janë vetëm aksesor praktik apo estetik. Ato mbrojnë këmbët, parandalojnë flluskat, ndihmojnë ecjen dhe ngrohin trupin. Megjithatë, momenti i heqjes së tyre shpesh shoqërohet me ndjeshmëri të lëkurës dhe shenja të dukshme shtrëngimi.

Në shumicën e rasteve, këto gjurmë janë të padëmshme dhe kalimtare. Por kur shfaqen shpesh, janë të theksuara ose zgjasin për orë të tëra, nuk duhet të injorohen.

Edema periferike – shkaku më i shpeshtë

Një nga arsyet më të zakonshme është edema periferike, gjendje në të cilën ndodh mbajtje e lëngjeve në pjesët e poshtme të trupit. Përveç shenjave nga çorapet, mund të vëreni:

• ënjtje të këmbëve dhe kyçeve
• lëkurë të shtrënguar dhe me shkëlqim
• ndjesi rëndese ose dhimbje
• lëvizshmëri të kufizuar

Kjo gjendje shpesh lidhet me qëndrimin e gjatë në këmbë, uljen e zgjatur, shtatzëninë ose ndryshimet hormonale, por mund të ketë edhe shkaqe më serioze, transmeton Telegrafi.

Problemet me venat

Nëse shenjat zgjasin më shumë dhe shoqërohen me vena të zgjeruara, ngërçe të shpeshta, kruarje ose ndryshim të ngjyrës së lëkurës, mund të bëhet fjalë për insuficiencë venoze. Ky problem është mjaft i përhapur dhe kërkon vlerësim mjekësor, sidomos nëse simptomat përkeqësohen me kalimin e kohës.

Çrregullime të sistemit limfatik

Sistemi limfatik luan rol kyç në imunitet dhe largimin e toksinave. Kur funksionimi i tij dëmtohet, lëngjet grumbullohen në inde. Nëse ënjtja dhe shenjat nga çorapet shfaqen çdo ditë, shoqërohen me ndjesi të vazhdueshme rëndese dhe nuk tërhiqen as pas pushimit, mund të bëhet fjalë për limfedemë, një gjendje që kërkon vlerësim dhe trajtim profesional.

Ndikimi i medikamenteve

Disa barna, veçanërisht ato për rregullimin e tensionit të gjakut, mund të shkaktojnë ënjtje të këmbëve. Si pasojë, çorapet lënë shenja më të thella edhe nëse përdorni të njëjtin model si më parë.

Kur duhet treguar kujdes i veçantë

Këshillohet konsultë mjekësore nëse:

• shenjat nuk zhduken as pas një ore
• lëkura bëhet e ngrohtë, e dhimbshme ose ndryshon ngjyrë
• ënjtja është më e theksuar vetëm në njërën këmbë
• shfaqen vështirësi në frymëmarrje ose dhimbje gjoksi
• keni histori sëmundjesh të zemrës, veshkave ose mëlçisë
• keni pasur së fundmi udhëtime të gjata ose fluturime

Në këto raste, kontrolli mjekësor është i domosdoshëm.

Si të shmangni shenjat e pakëndshme nga çorapet

Nëse çorapet ju lënë shpesh gjurmë të thella:

• shmangni modelet me llastik të fortë
• zgjidhni çorape pa qepje, prej materialesh të buta dhe ajrosëse (si pambuku)
• merrni një numër më të madh, sidomos nëse jeni mes dy masave
• lëvizni rregullisht dhe ngrini këmbët gjatë pushimit

Mbani mend: Shenjat nga çorapet shpesh janë të padëmshme, por kur trupi i përsërit ato çdo ditë, ia vlen të dëgjohet. Lëkura është një nga pasqyrat më të sinqerta të shëndetit. /Telegrafi/

TIRANË, 12 janar /ATSH/ Kryeministri Edi Rama mori pjesë sot në eventin prezantues të parkut eolik të Tropojës të mbajtur në Tiranë, një projekt strategjik me kapacitet të pritshëm prej 600 MW, që po zhvillohet nga kompania amerikane CWP.

Ky investim, sipas Kryeministrit, përbën një dëshmi të qartë se Shqipëria po ecën drejt një të ardhmeje energjetike të fortë, të qëndrueshme dhe të orientuar nga burimet e rinovueshme.

Në fjalën e tij, Rama theksoi se paralelisht me zhvillimin e projekteve të mëdha energjetike, vendi ka ndërtuar një proces të lartë besueshmërie në këtë sektor.

Sipas tij, sektori energjetik është një fushë e garave të hapura ndërkombëtare, ku sot ka një prani të gjerë të kompanive me reputacion të padiskutueshëm në pjesëmarrjen në tenderë dhe investime.

“Më vjen jashtëzakonisht mirë ta nënvizoj, meqë jemi në një fazë të historisë sonë, kur fjala “korrupsion” është si ato këpucët e modës që po nuk e nxori njeriu nga goja duket sikur nuk është në modë, që pikërisht në këtë sektor, kjo fjalë ka marrë një përgjigje të vazhdueshme sistematike dhe nuk ka një kompani të vetme, serioze që ka marrë pjesë në këto gara që të ketë shprehur një rezervë sado të vogël lidhur me integritetin e garave dhe me proceset e stabilizuara dhe të konsoliduara në këtë sektor”, tha Rama.

Rama theksoi se këtë dëshmi mund ta japin edhe përfaqësuesit e kompanive amerikane dhe të tjera ndërkombëtare të pranishme në Shqipëri, të cilat, sipas tij, jo vetëm që nuk kanë hasur pengesa të kësaj natyre, por përkundrazi kanë pasur mbështetjen e qeverisë në çdo hap, përfshirë edhe kapërcimin e pengesave burokratike në nivel vendor.

“Besoj që të njëjtën dëshmi mund ta japin fare mirë amerikanët që kemi këtu nga ana e sektorit privat, bashkë me të tjerët sepse, jo vetëm që nuk kanë ndeshur në Tiranë asnjë pengesë të kësaj natyre, por përkundrazi e kanë pasur qeverinë në krah në çdo hap edhe për të kapërcyer edhe pengesa burokratike absurde në nivelin vendor”, tha Rama.

Kryeministri shtoi se në raste të caktuara, këto vështirësi burokratike kanë qenë të kuptueshme, sidomos për bashki të vogla, të cilat nuk kanë pasur më parë përvojë me projekte të përmasave kaq të mëdha sa ai i CWP.

Megjithatë, sipas Kryeministrit, këto pengesa tashmë janë kapërcyer dhe kompania ka pasur garancinë e plotë nga qeveria se procesi do të çohet deri në fund, pa humbur kohë, duke përgatitur paralelisht të gjitha projektet e zbatimit.

Kryeministri vlerësoi veçanërisht ndjeshmërinë e kompanisë ndaj mjedisit dhe përgjegjësinë sociale që ajo ka treguar në zonë.

“Kompania na ka bërë një përshtypje të veçantë për kujdesin ndaj ekuilibrave mjedisorë dhe për sensin e lartë të përgjegjësisë sociale. Ajo ka treguar vëmendje për mbështetjen e komunitetit lokal dhe zhvillimin e zonës, përfshirë investime në infrastrukturën rrugore rurale dhe projekte të tjera në funksion të komunitetit”, tha Rama.

Në përfundim, Kryeministri theksoi se kompania CWP ka fituar një vend të merituar në respektin e institucioneve shqiptare, duke shprehur falënderimet e tij për bashkëpunimin dhe angazhimin në zhvillimin e një projekti që konsiderohet kyç për të ardhmen energjetike të vendit.

/gj.m/j.p/

The post Rama: Prani e gjerë e kompanive me reputacion të padiskutueshëm në investimet në energjetikë appeared first on Agjencia Telegrafike Shqiptare.

Sekretari i Përgjithshëm i NATO-s, Mark Rutte tha sot se vendet aleate po diskutojnë “hapat e ardhshëm” për të siguruar sigurinë në Arktik, duke përmendur rrezikun që Rusia dhe Kina të jenë “më aktive” në rajonin strategjikisht të rëndësishëm.

“Të gjithë aleatët bien dakord për rëndësinë dhe sigurinë e Arktikut, sepse e dimë se me hapjen e rrugëve detare, ekziston rreziku që rusët dhe kinezët të jenë më aktivë. Dhe siç e dini, ka tetë vende arktike”, u tha Rutte gazetarëve në Zagreb gjatë një konference të përbashkët për mediat me kryeministrin kroat Andrej Plenkoviç.

Ai tha se shtatë nga tetë vendet arktike janë anëtare të NATO-s: SHBA-ja, Kanadaja, Danimarka, Islanda, Norvegjia, Finlanda dhe Suedia ndërsa Rusia mbetet i vetmi vend arktik jashtë aleancës. Kina shtoi ai, është bërë një lojtare gjithnjë e më aktive në rajon pavarësisht mungesës së pranisë gjeografike.

“Deri tani, Kina është bërë pothuajse një lloj vendi arktik dhe jo gjeografikisht, por të paktën për shkak të sasisë së madhe të aktiviteteve dhe interesit të saj në rajon”, tha Rutte.

Ai vuri në dukje se NATO përfundoi diskutimet e brendshme vitin e kaluar mbi mënyrën e forcimit të bashkëpunimit midis anëtarëve të saj në Arktik dhe tani po punon për masa “praktike pasuese”.

“Aktualisht, po diskutojmë hapin tjetër drejt kësaj, si të sigurohemi që të japim ndjekje praktike të këtyre diskutimeve për t’u siguruar që si aleancë të bëjmë gjithçka, kolektivisht dhe përmes aleatëve tanë individualë, për t’u siguruar që Arktiku të mbetet i sigurt, pasi të gjithë pajtohemi se kjo duhet të jetë një përparësi”, tha ai.

Rutte tha se NATO është angazhuar më shumë në sigurinë e Arktikut që nga viti 2025 me kërkesë të shtatë aleatëve të saj të Veriut të Lartë, duke e quajtur rajonin “një pjesë jetësore të territorit të NATO-s”.

Komentet e tij erdhën mes raporteve se një grup vendesh evropiane, të udhëhequra nga Mbretëria e Bashkuar dhe Gjermania, po planifikojnë të zgjerojnë praninë e tyre ushtarake në Groenlandë.

“Keni parë disa njoftime nga britanikët dhe gjermanët”, tha Rutte. “Sot po punojmë tani së bashku për të parë se si mundemi në thelb së bashku si aleancë të ndërtojmë atë hap tjetër”, tha ai.

“Trumpi po bën gjënë e duhur për NATO-n”

Lidhur me marrëdhëniet me SHBA-në, Rutte hodhi poshtë shqetësimet për një krizë të brendshme brenda NATO-s, duke lavdëruar shtytjen e presidentit të SHBA-së, Donald Trump për shpenzime më të larta për mbrojtjen midis aleatëve.

“Unë besoj se Donald Trump po bën gjërat e duhura për NATO-n duke na inkurajuar të gjithëve të shpenzojmë më shumë për të barazuar atë që po shpenzon SHBA-ja”, tha ai. “Kur lavdëroj dikë, kjo bazohet në fakte dhe besoj se faktet janë aty”, shtoi ai.

Kryeministri kroat Plenkoviç tha se dialogu mbetet çelësi për zgjidhjen e tensioneve rreth statusit të Groenlandës.

“Jam i bindur se me diskutim, mund të gjejmë zgjidhje që do të ofrojë sigurinë për SHBA-në dhe do të sigurojë që Groenlanda të jetë pjesë e Danimarkës. Kjo është arsyeja pse dialogu me cilësi të lartë është i nevojshëm dhe padyshim që mund ta zgjidhë situatën në dobi të sigurisë globale”, tha Plenkoviç.