TIRANË, 7 mars/ATSH/ Kryetari i Kuvendit, Niko Peleshi, uroi sot të gjithë mësuesit dhe pedagogët shqiptarë me rastin e 7 Marsit, Ditës së Mësuesit, duke vlerësuar kontributin e tyre të çmuar në arsimimin dhe edukimin e brezave të rinj.

Kryetari Peleshi përcolli një reflektim të pedagoges së Departamentit të Letërsisë në Fakultetin e Historisë dhe Filologjisë, Belfjore Qose, mbi rolin dhe përkushtimin e mësimdhënësve në shoqëri.

Ajo uroi të gjithë arsimtarët me rastin e kësaj dite të veçantë, duke theksuar se ka besuar gjithmonë se arsimi ka fuqinë të ndryshojë jetët e njerëzve përtej klisheve me të cilat shpesh përshkruhet profesioni i mësuesit.

Sipas saj, mësuesia është një profesion dinjitoz që nuk synon vetëm të transmetojë dije, por edhe të ndihmojë nxënësit të zbulojnë potencialin e tyre dhe të gjejnë rrugën e tyre në jetë.

“Kam besuar gjithmonë se arsimi mund të ndryshojë jetët e njerëzve përtej klisheve me të cilat shoqëria shpesh përpiqet ta shndërrojë mësuesinë në një mision. Në të vërtetë, ai është një profesion dinjitoz që nuk synon vetëm t’u mësojë nxënësve si ta shohin jetën, por t’u japë atyre lirinë për të zbuluar potencialet e tyre të vërteta”, u shpreh pedagogia Belfjore Qose.

Duke kujtuar përvojën personale, Qose vlerësoi rolin vendimtar që pati mësuesja e saj e letërsisë në orientimin drejt studimit të kësaj fushe dhe në përcaktimin e së ardhmes së saj profesionale.

Ajo theksoi gjithashtu se mësuesit janë ata që nuk e mbyllin kurrë ditën e tyre me përfundimin e orarit mësimor, pasi përkushtimi ndaj nxënësve dhe arsimit shkon përtej klasës.

Sipas Qoses, edhe pse sot profesionet e lidhura me humanitetin përballen me sfida, ato do të vijojnë të mbeten thelbësore për zhvillimin e shoqërisë.

Dita e Mësuesit është një simbol mirënjohjeje për përkushtimin, profesionalizmin dhe sakrificat e mësuesve, të cilët çdo ditë përcjellin dije, formësojnë vlera dhe frymëzojnë vajzat dhe djemtë e Shqipërisë për të ndërtuar themelet e së ardhmes. /j.p/

The post Peleshi uron Ditën e Mësuesit: Mirënjohje për ata që formësojnë brezat e rinj appeared first on Agjencia Telegrafike Shqiptare.

TIRANË, 26 shkurt /ATSH/ Kryetari i Partisë Demokratike, Sali Berisha, ka reaguar nëpërmjet një videomesazhi pas fjalës së kryeministrit Edi Rama në mbledhjen e grupit parlamentar të PS.

Berisha e akuzoi Ramën për sulm ndaj drejtësisë dhe për përpjekje të hapur për të mbrojtur veten, familjen dhe bashkëpunëtorët e tij.

“Edi Rama, në fjalën e tij, përveçse mbrojti veten në të gjitha mënyrat, duke përdorur administratën, rolin dhe misionin e saj në një shtet, si edhe ndershmërinë dhe dinjitetin e saj, sulmoi në mënyrën më të verbër drejtësinë, institucionin e akuzës dhe gjithçka që vërtitej rreth tij personalisht, i vetëdijshëm se është tashmë në rreth të kuq”, tha Berisha.

Berisha tha se Rama po manipulon opinionin publik duke shfrytëzuar integritetin e drejtueses së AKSHI-t si mburojë, ndërsa teksa ai fliste sot, parlamentarët europianë kërkuan heqjen e imunitetit dhe dhënien para drejtësisë Belinda Ballukun, si dhe kushte të forta për Shqipërinë në procesin e integrimit

“Sot, në të njëjtën kohë kur ai fliste, në Parlamentin Europian, parlamentarë të nderuar kishin një seancë debati për Shqipërinë, në të cilën u deklarua se krimi dhe korrupsioni në Shqipëri kanë kapur nivelet më të larta të pushtetit”, theksoi kreu i PD.

Berisha u shpreh se, në Parlamentin Europian, në të njëjtën kohë, u kërkua në mënyrë të prerë heqja e imunitetit dhe dhënia para drejtësisë e zv/kryeminsitres  Belinda Ballukut.

“U kërkuan kushtëzime të forta për Shqipërinë në procesin e integrimit dhe heqja përfundimisht dorë nga amendamentet dhe ligjet me të cilat Edi Rama do të mbrojë veten, familjen dhe bashkëpunëtorët e tij”, tha Berisha.

Berisha bëri thirrje për mobilizim qytetar të shtunën në orën 18:00, duke e cilësuar këtë moment si vendimtar për të goditur “narkoregjimin” dhe krimin në qeveri.

/gj.m/a.f/

The post Berisha: Rama sulmon drejtësinë, mbron veten dhe rrethin e tij appeared first on Agjencia Telegrafike Shqiptare.

TIRANË, 26 shkurt/ATSH/ Kryeministri Edi Rama njëkohësisht Kryetari i Partisë Socialiste deklaroi sot se përpjekjet e disa shoqatave përfaqësuese të gjyqësorit për të rritur pagat e veta përmes vendimeve gjyqësore përbëjnë ndërhyrje të papërshtatshme në territorin e pushtetit legjislativ dhe krijojnë precedentë shqetësues për funksionimin e shtetit.

“Çfarë është përveçse gjymtuese ndërhyrja në territorin e pushtetit legjislativ përpjekja e një shoqate përfaqësuesish të gjyqësorit për të rritur pagat e veta me gjyq. Kur në historinë e republikave me 3 pushtete, pushteti gjyqësor llogarit pagat dhe përcakton politikat e pagave apo të taksave të një vendi. Çfarë është rasti më i fundit përveçse ndërhyrje gjymtuese në territorin e pushtetit legjislativ, vendimi i Gjykatës Kushtetuese për mënyrën se si Parlamenti ka vendosur të ndajë komisionet parlamentare”, tha Rama në mbledhjen e Grupit Parlamentar të PS-së.

Por, vijoi Rama, shpresa është që kjo fazë të jetë kalimtare dhe kundërshtimet e përsëritura jashtë kontekstit kushtetues e ligjor të përfaqësuesve të pushtetit të shprehin gjykim të qartë, sepse në të kundërt nuk do të kemi dot një gjyqësor jo vetëm të pavarur, por as një shtet funksional, një administratë publike që të japë më të mirën e performancës së shtetit, pa frikë të marrë vendime, deri edhe për blerjen e letrës higjenike.

“Ky është fakt dhe është një nga mijëra faktet që mund të jap, por e zgjodha enkas, sepse është më tragjikomiku i zinxhirit kilometrik të fakteve të prodhuara nga frika. Por as nuk do të kemi dot një sipërmarrje të lirë në punë dhe larg qoftë deri edhe një konsumator të çliruar nga frika se mund të bjerë në sy”, deklaroi ai.

Ai nënvizoi rëndësinë e nxjerrjes së mësimeve nga përvojat ndërkombëtare.

”E përsëris këtë leksion që vendet e tjera e kanë nxjerrë me vonesa të caktuara. Ne nuk kemi luksin, dhe Shqipëria nuk ka luksin të vonohet për t’i nxjerrë këto mësime. Dhe këto rezultate janë serioze, nuk janë imagjinare. Prandaj duhen marrë në konsideratë nga të gjithë, sa nuk kanë prekur palcën e zhvillimit ekonomik dhe social të vendit, siç ka ndodhur gjetkë, ku antikorrupsioni është bërë një kurë më e dëmshme se vetë sëmundja e korrupsionit, dhe ka mijëra, madje miliona studime, libra dhe doktoratura për këtë temë”, tha ai.

Por ndërkohë, Rama tha se ai vetë personalisht qëndronte me shpresë dhe besim dhe përpiqej t’ju ushqente këtë shpresë shumë partizanëve të zhgënjyer të reformës në drejtësi.

“Sepse, për hir të së vërtetës, gjithmonë më shumë janë raste të pajustifikuara të brutalitetit, sa të pajustifikuara aq edhe të panevojshme për prokurorët. Por edhe gjyqtarëve. Këta të fundit kanë arritur madje të habisin edhe mbështetësit më të verbër anglishtfolës të këtij qyteti për reformën në drejtësi. Kur dëgjon një gjykatës t’i thotë prokurorit “rëndoje dorën se e ke të lehtë akuzën” apo një tjetër gjykatë në apel i jep ankuesit një dënim edhe më të rëndë se ai që kishte në shkallën e parë, këta kujtojnë, anglishtfolësit, se këto janë bomba artizanale të propagandës”, deklaroi Rama.

Sipas tij, janë fakte të tmerrshme.

“Por halli më i madh është se nuk ka asnjë reflektim të dukshëm në horizontin e pushtetit gjyqësor, dhe ky perceptim shqetësues më përforcon një fakt shumë domethënës: që kur unë ngre shqetësime të kësaj natyre, këshillat e prokurorisë dhe gjyqësorit, sipas rastit, reagojnë si pulla poste mbi fjalët e mia. Disa deklarata nervoze si ato të njerëzve që në ditë dasme ua prishin drekën me ca thirrje bajate për aktorët politikë që të mos bëjnë presion drejtësisë”, u shpreh Rama.

Sipas tij, kjo pavarësisht faktit që ai nuk ishte aktor politik, por kryeministri.

“Pavarësisht faktit që unë nuk jam aktor politik, por jam kryeministri i dalë nga një votë popullore që i dha PS-së një shumicë të qartë prej 83 mandatesh. Ndërkohë që kjo parti nuk ka një konkurrent në historinë botërore si faktori qeverisës më mbështetës i pavarësisë së drejtësisë dhe faktori më i heshtur politik ndaj gabimeve dhe gafave të drejtësisë së pavarësuar në thelb. Unë ngre probleme serioze që duhen marrë në konsideratë pikërisht nga hartuesit e atyre deklaratave të kota”, tha Rama.

Rama theksoi se fjala “presion” ishte fjalë shumë e madhe e përdorur nga shoqatat e gjyqësorit.

“Para se të shkruajnë më kollajllëkun më të madh fjalën “presion”, pasi fjala “presion” është fjalë shumë e madhe për mbështetësin më të madhe të pavarësisë së tyre, mirë është të kujtojnë se ku ishin fshehur ekzaktësisht kur paraardhësi im i ngrinte si puçistë dhe e quante lavire Prokuroren e Përgjithshme”, tha ai.

Rama i kërkoi drejtësisë të lexonin drejtë mesazhin që ai përcillte.

“Ose nëse ju vjen zor ta kujtojnë se ku mund të ishin fshehur, apo aq më keq, ju vete mendja ta quajnë të panevojshme për kujtesën e tyre këtë detaj se helbete iku ajo kohë, dhe tani po hyjmë në Europë, të mos harrojnë se tani, sot, në këtë kohë, atij që s’u bë dot pasardhësi im pasi ishte paraardhësi im nuk ja artikulojnë dot jo një deklaratë po gjysmë llafi edhe pasi del dhe i lexon “librin e shtëpisë” prokurorit tonë më kurajoz, mu te dera e SPAK-ut. Prandaj ju sugjeroj të merren me mesazhin, jo me mesazherin”, tha Rama.

/a.f/

The post Rama: Përpjekjet e gjyqësorit për rritje pagash, ndërhyrje në pushtetin legjislativ appeared first on Agjencia Telegrafike Shqiptare.

PEKIN, 24 shkurt /ATSH-AA/ – Kina sot kërkoi “përmbajtje” mes forcimit ushtarak të SHBA-së, ndërsa administrata e Trumpit i bën presion Iranit për të arritur marrëveshje mbi programin e tij bërthamor.

“Kina po ndjek nga afër situatën përkatëse. Ne i nxisim të gjitha palët të qëndrojnë të përmbajtura. Përshkallëzimi i situatës nuk i shërben interesave të askujt”, u tha zëdhënësja e Ministrisë së Jashtme, Mao Ning gazetarëve në Pekin.

Ajo po i përgjigjej një pyetjeje lidhur me vërejtjet e presidentit amerikan Donald Trump se ai po shqyrtonte sulm të kufizuar kundër Iranit nëse Teherani nuk arrin marrëveshje me Washingtonin.

Delegacionet nga Irani dhe SHBA-ja do të mblidhen përsëri të enjten në Gjenevë të Zvicrës për të rifilluar diskutimet për një marrëveshje të mundshme bërthamore mes tensioneve në rritje rajonale dhe spekulimeve për një luftë të afërt.

Raundi i ri i bisedimeve vjen mes një forcimi të paprecedentë ushtarak të SHBA-së në Gjirin Persik dhe një serie stërvitjesh ushtarake nga Trupat e Gardës Revolucionare Islamike (IRGC) të Iranit në ditët e fundit.

Presidenti i SHBA-së, Donald Trump ka paralajmëruar për veprime ushtarake kundër Iranit nëse një marrëveshje nuk arrihet brenda 10 deri në 15 ditësh.

Deklarata e Pekinit vjen ndërsa Sekretari i Mbrojtjes i SHBA-së, Pete Hegseth tha të hënën se Washingtoni po “i mban të gjitha opsionet hapur” në qasjen e tij ndaj Iranit ndërsa i kërkon vendit të negociojë një marrëveshje.   /os/

The post PEKIN – Kina mesazh SHBA-së dhe Iranit: Përshkallëzimi i situatës nuk i shërben interesave të askujt appeared first on Agjencia Telegrafike Shqiptare.

TIRANË, 22 shkurt /ATSh/ Kryetari i Partisë Demokratike, Sali Berisha, përmes një videomesazhi, deklaroi se gjatë vizitës në Uashington, Edi Ramës iu refuzuan të gjitha takimet zyrtare, përveç një takimi me një OJQ me dyer të mbyllura.

Sipas Berishës, Rama nuk ka ndërmarrë asnjë hap diplomatik për të mbështetur ish-drejtuesit e UÇK që përballen me procese në Hagë, të cilat ai i lidhi me ndikimin e Aleksandër Vuçiç.

“Dua të garantoj çdo shqiptar, se diplomacia e megafonit nuk i shërben zgjidhjes së problemeve, aq më tepër kur atë e përdor një vend si Shqipëria. Diplomacia e megafonit, për dramën e madhe që po luhet në Hagë kundër ish-udhëheqësve politikë të Luftës Çlirimtare dhe të Kosovës, është në vlerësimin tim, aspak e dobishme”, u shpreh Berisha.

Sipas tij, Kryeministri Rama nuk ka ndërmarrë me diplomacinë konvencionale asnjë edhe një hap të vetëm në ndihmë të luftëtarëve të UÇK-së, drejtuesve të luftës, që ndodhen sot me akuza të fabrikuara nga alfa tek omega.

Berisha akuzoi gjithashtu Ramën për përdorimin e UNESCO-s si pretekst për projekte në Durrës që dëmtojnë pronarët legjitimë.

“Asgjë nuk ka të bëjë me UNESCO-n ajo. Ka të bëjë me baronët e drogës që duan të investojnë kullat e tyre aty ku do rrënohen shtëpitë”, u shpreh Berisha.

/e.i/j.p/

The post Berisha: Asnjë hap diplomatik për të mbështetur ish-drejtuesit e UÇK në Uashington appeared first on Agjencia Telegrafike Shqiptare.

TIRANË, 21 shkurt/ATSH/ Në Ditën Ndërkombëtare të Gjuhës Amtare, Presidenti i Republikës Bajram Begaj, i përcolli shqiptarëve mesazhin për rëndësinë e ruajtjes, përcjelljes së gjuhës shqipe.

Presidenti Begaj publikoi në rrjetet sociale video-mesazhin me poezinë “Gjuha shqype”, të interpretuar nga nxënës të shkollës 9-vjeçare “Selim Alliu” në Peshkopi, shkollë e cila është fituesja aktuale e konkursit kombëtar të gjuhës shqipe.

“Krenar për gjuhën tonë amtare shqipe. Ta duam, ta ruajmë, ta përcjellim brez pas brezi dhe ta flasim bukur gjuhën tonë amtare”, shprehet Presidenti i Republikës.

Këto vargje të Fishtës, si në kohën kur u shkruan, edhe sot, kanë të njëjtin kumbim për bukurinë e gjuhës shqipe, përcjelljen e saj nga brezi në brez, ruajtjen e gjuhës në vise e fe të ndryshme, si edhe fuqinë e saj si elementi identitar i kombit tonë.

Pikërisht këtë mesazh ka ndarë sot Presidenti i Republikës, me synim ndërgjegjësimin e çdo shqiptari për ruajtjen, përcjelljen dhe pasurimin e gjuhës shqipe.

The post Begaj: Ta duam dhe ta flasim bukur gjuhën tonë amtare appeared first on Agjencia Telegrafike Shqiptare.

TIRANË, 12 shkurt /ATSH/ Presidenti Bajram Begaj uroi qeverinë e Republikës së Kosovës dhe kryeministrin Albin Kurti për nisjen e mandatit të ri qeverisës.

Në mesazhin e tij, kreu i shtetit i uroi suksese në drejtimin e qeverisë drejt progresit, zhvillimit dhe begatisë së popullit të Kosovës.

Presidenti Begaj shprehu bindjen se përkushtimi dhe bashkëpunimi në dobi të shtetit dhe qytetarëve do të udhëheqin klasën politike të Kosovës në përballimin e sfidave që e presin vendin.

Ai gjithashtu siguroi për vijimin e mbështetjes vëllazërore për Qeverinë e Kosovës dhe qytetarët e saj.

”Shpreh bindjen se përkushtimi dhe bashkëpunimi në dobi të shtetit dhe qytetarëve do të udhëheqin të gjithë klasën politike të Kosovës në përballimin e sfidave që janë përpara. Ju sigurojmë për vijimin e mbështetjes vëllazërore për qeverinë tuaj dhe bashkëkombasit tanë”, thuhet në mesazhin e Presidentit.

Kuvendi i Kosovës miratoi dje me 66 vota për, 49 kundër dhe asnjë abstenim qeverinë Kurti III. /j.p/

The post Begaj uron kryeministrin Kurti: Ju sigurojmë për vijimin e mbështetjes vëllazërore appeared first on Agjencia Telegrafike Shqiptare.

Mesditën e sotme, një surprizë nga ajri ka mbërritur në shtëpinë e “Big Brother VIP Albania”, duke sjellë një mesazh që ka trazuar jo pak qetësinë e banorëve aktualë.

Teksa konkurrentët ndodheshin në oborr, ka qenë Rogerti ai që ka diktuar i pari dronin mbi shtëpi dhe ka njoftuar menjëherë Luizin.

Banderola mbante një shkrim që rikonfirmonte statusin e këngëtarit në sytë e mbështetësve të tij: “Mirë se erdhe i zoti i shtëpisë”.

Sapo e ka lexuar mesazhin, Luiz Ejlli, nuk e ka humbur rastin për të thumbuar sërish banorët me humorin e tij karakteristik, duke u kujtuar pozicionin e tyre në atë shtëpi.

“Ju kam thënë që jeni qiraxhinj kët”, u shpreh ai me të qeshur.

The post Dron mbi “Big Brother”/ Mesazh për Luizin: Mirë se erdhe i zoti i shtëpisë, këngëtari thumbon banorët appeared first on Albeu.com.

VATIKAN, 6 shkurt /ATSH-ANSA/ – Papa Leone XIV bëri thirrje për një armëpushim olimpik gjatë Lojërave Dimërore në Milano dhe Cortina duke e përshkruar atë si simbol shprese dhe pajtimi ndërkombëtar.

”Nxis fuqishëm të gjitha kombet, në rastin e Lojërave Olimpike dhe Paralimpike Dimërore, të rikthejnë dhe respektojnë këtë mjet shprese që është Armëpushimi Olimpik, simbol dhe profeci e një bote të pajtuar”, shkruan papa Leone XIV në një letër të publikuar sot me rastin e Lojërave Olimpike Dimërore, që zhvillohen në Milano dhe Cortin nga sot deri më 22 shkurt, dhe Lojërave Paralimpike, që do të zhvillohen gjithashtu nga 6 deri më 15 mars.

”Gjatë Lojërave Olimpike të kaluara, paraardhësit e mi theksuan se sporti mund të luajë një rol të rëndësishëm për të mirën e njerëzimit, veçanërisht për promovimin e paqes”, kujton ai.

”Në këtë kuadër qëndron Armëpushimi Olimpik, i cili në Greqinë e Lashtë ishte një marrëveshje për të pezulluar armiqësitë para, gjatë dhe pas Lojërave Olimpike, në mënyrë që sportistët dhe spektatorët të mund të lëviznin lirshëm dhe garat të zhvilloheshin pa ndërprerje”, shton papa.

Në letrën e tij, papa Leone XIV thekson se ”praktika sportive mund të ketë një natyrë profesionale, me specializim shumë të lartë: në këtë formë ajo korrespondon me një thirrje të pakicës, duke ngjallur admirim dhe entuziazëm në zemrat e shumë të tjerëve, që ndihen të emocionuar nga fitoret ose humbjet e atletëve. Por, ushtrimi i sportit është një aktivitet i përbashkët, i hapur për të gjithë dhe i dobishëm për trupin dhe shpirtin, saqë përbën një shprehje universale të të qenit njeri”.

Duke nisur nga ”interesi i kishës për sportin dhe mënyra se si një i krishterë i qaset atij”, papa vë në dukje se ”njeriu duhet të mbetet gjithmonë në qendër të sportit”./  /Ad.Ab./

The post MILANO 2026 – Papa Leone XIV thirrje për armëpushim olimpik appeared first on Agjencia Telegrafike Shqiptare.

TIRANË, 6 shkurt /ATSH/ Prokuroria e Posaçme Kundër Korrupsionit dhe Krimit të Organizuar ka shpërndarë sot një mesazh në rrjetet sociale duke vënë theksin tek pavarësia institucionale dhe tek ligji.

SPAK bën të ditur se vepron në mënyrë të pavarur, dhe se heton çështje bazuar në prova.

“SPAK vepron në mënyrë të pavarur dhe heton çështje bazuar në prova”, shkruhet në postimin e Prokurorisë së Posaçme.

/gj.m/a.f/r.e/

The post SPAK: Veprojmë në mënyrë të pavarur dhe hetojmë çështje bazuar në prova appeared first on Agjencia Telegrafike Shqiptare.

Prokuroria e Posaçme Kundër Korrupsionit dhe Krimit të Organizuar, ka publikuar këtë të premte një mesazh në rrjetet sociale.

SPAK thekson se prokurorët e kësaj prokurorie veprojnë në mënyrë të pavarur dhe hetimet e tyre bazohen gjithmonë në prova.

“SPAK vepron në mënyrë të pavarur dhe heton çështje bazuar në prova”, thuhet në mesazhin e tyre.

Kujtojmë se Prokuroria e Posaçme është vënë shpesh herë në qendër të sulmeve nga aktorë të ndryshëm politikë, të krimit dhe jo vetëm, të marrë nën hetim nga prokurorët e posaçëm, duke i cilësuar akuzat ndaj tyre si të pabaza.

The post SPAK mesazh në rrjete sociale: Veprojmë në mënyrë të pavarur dhe hetojmë bazuar në prova appeared first on Albeu.com.

TIRANË, 26 janar /ATSH/ Kryetari i Partisë Demokratike, Sali Berisha, ndodhet sot në selinë e Asamblesë Parlamentare të Këshillit të Europës, në Strasburg të Francës, së bashku me deputeten Albana Vokshi.

Në një videomesazh për qytetarët, Berisha deklaroi se opozita po vijon betejën e saj kundër keqqeverisjes.

“Kjo betejë po e çon kauzën e saj në arenën ndërkombëtare dhe në vëmendjen e institucioneve europiane”, u shpreh Berisha.

/gj.m/j.p/

The post Berisha: Kauza e opozitës, në Asamblenë e Përgjithshme të KiE appeared first on Agjencia Telegrafike Shqiptare.

TIRANË, 19 janar/ATSH/ Presidenti Bajram Begaj theksoi sot rëndësinë e bashkëpunimit mes palëve në Kuvend për realizimin e reformës zgjedhore dhe asaj territoriale, ndërsa u shpreh se “nëse bashkëpunimi ngec, debati humbet fokusin nga interesi ynë kombëtar: integrimi në Bashkimin Evropian”.

Në një mesazh drejtuar Kuvendit në nisje të sesionit të ri parlamentar, Presidenti Begaj theksoi se ky gjashtëmujor mbart sfida të rëndësishme për vendin dhe kërkon vullnet politik e vetëdije të lartë shtetformuese, në mënyrë që çdo nismë ligjore t’i shërbejë drejtpërdrejt forcimit të shtetit të së drejtës, mirëqenies së qytetarëve tanë dhe anëtarësimit në Bashkimin Evropian.

Përafrimi i legjislacionit dhe plotësimi me prioritet i agjendës së Bashkimit Evropian, sipas Kreut të Shtetit, “nuk mund të ketë konkurrencë”.

Begaj theksoi se kjo kërkon përgjegjësi dhe përkushtim të vërtetë, reforma të thella dhe punë intensive.

“Procesi parlamentar në këtë drejtim nuk e garanton dot suksesin nëse vëmendja shpërqendrohet, nëse ligjërimi parlamentar humbet rrugën, nëse bashkëpunimi ngec, nëse debati humbet fokusin nga interesi ynë kombëtar dhe nëse rezultatet vonojnë. Në rrugën drejt familjes evropiane ne nuk kemi kohë për të humbur dhe as energji për të shpërdoruar”, shtoi Begaj.

Duke iu drejtuar deputetëve, Begaj u shpreh se qytetarët presin më pak konflikt dhe më shumë zgjidhje. “Ata presin ligje cilësore, mbikëqyrje mbi qeverisjen dhe një debat politik të ndershëm. Në këtë ekuilibër rolesh, secili ka përgjegjësinë e vet. Demokracia nuk mund të funksionojë pa ekuilibër dhe pa respekt reciprok”, tha Begaj.

Ky sesion, sipas Kreut të Shtetit, përballet me nevojën që politika të konfirmojë mbështetjen për drejtësinë. “Politika duhet të ndihet krenare kur drejtësia vepron kundër korrupsionit, krimit të organizuar, kur drejtësia tregon pavarësi, integritet, profesionalizëm dhe kur qytetarët marrin drejtësi sipas standardeve evropiane”, shtoi ai.

Po ashtu, Begaj theksoi se në këtë sesion, reforma zgjedhore duhet të arrijë pikën kulmore.

“Angazhimet në funksion të kësaj reforme kërkojnë përkushtimin tuaj maksimal. Rekomandimet e misionit të OSBE-ODIHR-it kanë identifikuar çështje thelbësore për standardin e zgjedhjeve në Shqipëri, të cilat nuk mund të ngelen pa u adresuar. Kuadri ligjor zgjedhor duhet t’i nënshtrohet një reformimi tërësor, në një proces konsultimi gjithëpërfshirës dhe në përputhje me praktikat e mira dhe standardet ndërkombëtare brenda këtij sesioni parlamentar. Ndryshimet e vonuara të legjislacionit zgjedhor përbëjnë rrezik për standardin e zgjedhjeve”, u shpreh Presidenti.

Një tjetër gur kilometrik, sipas Kreut të Shtetit, përbën reforma administrativo-territoriale, e cila suksesin e ka të lidhur ngushtë me aftësinë e palëve për dialog konstruktiv dhe kompromis.

“Kjo reformë  duhet të udhëhiqet nga interesi më i lartë i qytetarëve, lëvizjet demografike, nga nevoja për shërbime dhe infrastrukturë publike dinjitoze dhe të barabartë në çdo njësi për ta bërë vetëqeverisjen vendore të vërtetë dhe të qëndrueshme”, shtoi Begaj.

Begaj tha se “qytetarët kanë nevojë ta shohin Kuvendin në veprim dhe qeverinë të japë llogari, por, mbi të gjitha, ata kanë nevojë që kjo procedurë parlamentare të jetë serioze dhe e përgjegjshme”.

Në këtë drejtim, ai theksoi se kontrolli parlamentar ka kuptim kur ai prodhon rezultat, kur institucionet vihen në lëvizje, kur merren masa, ndryshohen procedura, përmirësohen ligje.

“Një parlament me qytetarët dhe për qytetarët duhet të reflektojë problemet dhe kërkesat e tyre prioritare. Përmes një komunikimi politik, etik, konstruktiv dhe bashkëpunues, sfidat e demografisë, të sigurisë sociale, sigurisë kibernetike, sigurisë nga fatkeqësitë natyrore dhe të sigurisë kombëtare meritojnë vëmendje më të madhe ligjore dhe institucionale”, tha Presidenti.

/m.m/a.f/r.e/

The post Begaj thirrje deputetëve: Dialog konstruktiv për realizimin e reformave integruese appeared first on Agjencia Telegrafike Shqiptare.

TIRANË, 17 janar /ATSH/ Ambasadori i Bashkimit Europian në Tiranë, Silvio Gonzato, ka dhënë sot një mesazh kundër bullizmit kibernetik, duke e cilësuar atë si një kërcënim në rritje për fëmijët në Shqipëri dhe në të gjithë Europën.

Në deklaratën e tij, Gonzato theksoi se bullizmi kibernetik ndikon drejtpërdrejt në shëndetin mendor të fëmijëve dhe në ndjenjën e tyre të sigurisë, duke krijuar pasoja serioze në zhvillimin dhe mirëqenien e tyre.

Sipas ambasadorit të BE-së, mbrojtja e të drejtave të fëmijëve në hapësirën digjitale nuk mund të mbështetet vetëm te ligjet, por kërkon angazhim të përbashkët të të gjithë aktorëve të shoqërisë.

“Prindërit, shkollat, institucionet dhe shoqëria në tërësi duhet të veprojnë së bashku për të garantuar sigurinë e fëmijëve online”, u shpreh Gonzato.

Ai nënvizoi se politikat më të forta dhe dialogu i hapur janë elementë kyç për parandalimin e bullizmit online dhe për krijimin e një mjedisi digjital më të sigurt për fëmijët, duke theksuar rëndësinë e ndërgjegjësimit dhe bashkëpunimit në nivel kombëtar dhe europian.

/gj.m/a.f/

The post Gonzato: Bullizmi kibernetik kërcënim në rritje për fëmijët appeared first on Agjencia Telegrafike Shqiptare.

TIRANË, 1 janar/ATSH/ Presidenti i Republikës, Bajram Begaj përshëndeti sot në një lidhje direkte online efektivët e Forcave të Armatosura shqiptare të angazhuar në misione dhe operacione jashtë vendit.

Në fjalën e tij përshëndetëse, Presidenti Begaj uroi ushtarët, nënoficerët dhe oficerët shqiptarë të angazhuar në misione jashtë vendit për festat, duke shprehur mirënjohjen dhe vlerësimin e tij për shërbimin e tyre larg familjeve, në funksion të paqes, sigurisë dhe lirisë në botë.

Kreu i Shtetit theksoi se angazhimi i Forcave të Armatosura në misione në Kosovë, Bosnjë dhe Hercegovinë, Bullgari, Letoni, Detin Egje, Irak, Sinai, Sudanin e Jugut, si dhe në strukturat mbështetëse për Ukrainën, është dëshmi e qartë e përkushtimit të Shqipërisë ndaj paqes dhe sigurisë ndërkombëtare.

“Atmosfera festive ju ka gjetur larg familjeve tuaja, por me një mision të rëndësishëm: të jeni në krye të detyrës dhe në shërbim të atdheut, në shërbim të paqes, të sigurisë dhe lirisë në mbarë globin. Ju mbani lart flamurin e Shqipërisë dhe ne ndihemi krenarë për shërbimin tuaj”, u shpreh Presidenti Begaj.

Kreu i Shtetit theksoi se paqja dhe siguria nuk kanë çmim dhe garantimi tyre duhet të jetë i domosdoshëm.

“Sfidat gjeopolitike dhe të sigurisë janë komplekse dhe kërkojnë që ne t’u përgjigjemi atyre sipas kërkesave jo vetëm duke rritur kontributin, por, mbi të gjitha, me një Forcë të Armatosur të aftë, me kapacitete mbrojtëse, moderne, profesionale dhe të ndërveprueshme”, u shpreh Begaj.

Presidenti siguroi se Shqipëria do të vijojë të shtojë kontributet në misione dhe operacione jashtë vendit dhe do të jetë pjesëmarrëse kudo ku Aleanca të kërkojë.

“Marrja e komandës së batalionit shumëkombësh të Rezervës Operacionale të KFOR-it për vitin 2026 është dëshmi e qartë e përkushtimit tonë ndaj mbrojtjes kolektive, ndaj paqes, ndaj dhe sigurisë. Shpreh bindjen se drejtimi i kësaj strukture të rëndësishme do të jetë një tjetër arritje e Forcave tona të Armatosura”, u shpreh Presidenti Begaj.

1 nga 3

/m.m/a.f/

The post Begaj: Krenar për shërbimin e FA në misionet ndërkombëtare appeared first on Agjencia Telegrafike Shqiptare.

TIRANË, 31 dhjetor/ATSH/ Ministrja për Evropën dhe Punët e Jashtme, Elisa Spiropalli, përcolli sot një mesazh urimi në prag të ndërrimit të viteve, duke vlerësuar 2025-ën si një vit sfidash, por edhe arritjesh të rëndësishme për Shqipërinë, veçanërisht në rrugën e integrimit evropian.

Në mesazhin e saj, Spiropalli theksoi se arritja më domethënëse e vitit që po mbyllet ishte hapja e të gjithë grupkapitujve të negociatave me Bashkimin Evropian brenda vetëm 13 muajsh, një ritëm i paprecedent për një vend kandidat.

Sipas saj, Shqipëria është sot vendi që ecën më shpejt drejt familjes së saj natyrale evropiane dhe se procesi i integrimit nuk matet më me “nëse”, por me “kur”.

Ministrja vuri në dukje se sfida më e madhe nis tani, pasi shpejtësia e hapjes së grupkapitujve duhet të shoqërohet me të njëjtin intensitet reformash shtetndërtuese dhe me përmbushjen e të gjitha kushteve të kërkuara.

Ajo nënvizoi se në vitin 2026 qeveria do të vijojë ta udhëheqë këtë proces me vizion dhe vendosmëri, duke forcuar bashkëpunimin e ngushtë me partnerët evropianë.

Duke u ndalur te diaspora, Spiropalli tha se viti 2025 do të mbahet mend si viti kur u bë realitet premtimi për votën e diasporës, ndërsa theksoi se të drejtat e shqiptarëve nuk fillojnë dhe nuk mbarojnë te kutia e votimit. Sipas saj, ligji i ri për diasporën krijon për herë të parë një mekanizëm të unifikuar që mbron dhe promovon të drejtat e shqiptarëve kudo, nga Tirana deri në Kaliforni.

Në fushën e politikës së jashtme, ministrja theksoi se vizitat diplomatike në vende të ndryshme dhe pritja në Tiranë e partnerëve ndërkombëtarë dëshmojnë se diplomacia shqiptare është më aktive, më e besueshme dhe më e respektuar se kurrë më parë.

“Viti i ri na gjen në një stad të ri, me përgjegjësi dhe ambicie më të larta”, u shpreh Spiropalli, duke shtuar se 2026 do të nisë me pensione dhe paga më të larta, rritje rekord të investimeve dhe një trend të përshpejtuar të rritjes ekonomike.

Ajo theksoi se objektivi kryesor mbetet përmbyllja e reformave shtetndërtuese, avancimi i negociatave dhe garantimi i respektit dhe dinjitetit për Shqipërinë dhe shqiptarët kudo në botë, ndërsa diplomacia shqiptare do të vijojë të mbështesë këtë realitet të ri dhe të bëjë që zëri i arsyes dhe i Evropës të dëgjohet për Shqipërinë dhe qytetarët e saj. /j.p/

The post Spiropali: Hapa historikë drejt BE-së në 2025-ën, vijojmë procesin me vendosmëri appeared first on Agjencia Telegrafike Shqiptare.

TIRANË, 30 dhjetor/ATSH/ Drejtori i Përgjithshëm i Doganës Shqiptare, Genti Gazheli, bëri sot një bilanc të vitit 2025, duke theksuar se administrata doganore ka shënuar përparim të rëndësishëm në procesin e integrimit europian, modernizimin e sistemeve dhe forcimin e bashkëpunimit me biznesin dhe partnerët ndërkombëtarë.

Sipas Gazhelit, viti 2025 u karakterizua nga hapa konkretë në rrugëtimin drejt Bashkimit Europian, ku një moment kyç ishte hapja e negociatave për Kapitullin 29 – Bashkimi Doganor. Ky zhvillim, tha ai, konfirmoi përparimin e Shqipërisë në përafrimin me acquis të Bashkimi Europian dhe rolin qendror të doganave në këtë proces.

Në këtë kuadër, gjatë vitit u zhvillua në Tiranë Konferenca e Nivelit të Lartë mes doganave të Ballkanit Perëndimor dhe vendeve të BE-së, ku u diskutua për lehtësimin e tregtisë, digjitalizimin dhe standardet e reja doganore, duke forcuar bashkëpunimin rajonal dhe ndërkufitar.

Një tjetër hap i rëndësishëm ishte dorëzimi i dokumentacionit të plotë të “closing benchmarks” për Kapitullin 29, që përfshin kalendarin legjislativ, strategjitë sektoriale, planet shumëvjeçare të teknologjisë së informacionit dhe raportet e integritetit. Ky proces synon mbylljen e negociatave për Unionin Doganor deri në prill 2027.

Gjatë vitit 2025 u miratua gjithashtu Strategjia 2025-2030 për modernizimin dhe harmonizimin e sistemeve të informacionit doganor me standardet europiane. Sipas Gazhelit, kjo strategji krijon bazën për ndërtimin e sistemeve të reja doganore, duke garantuar ndërveprueshmëri të plotë me sistemet e BE-së deri në vitin 2030.

Në nivel rajonal, Dogana Shqiptare mbajti drejtimin e Nënkomitetit të CEFTA për Doganat dhe Rregullat e Origjinës, duke promovuar standardet e operatorëve ekonomikë të autorizuar dhe modernizimin e procedurave doganore në rajon.

Viti 2025 shënoi edhe forcimin e dialogut me komunitetin e biznesit, përmes forumeve të përbashkëta me Dhomën Amerikane të Tregtisë dhe Dhomën e Tregtisë dhe Industrisë Tiranë, ku u adresuan çështje që lidhen me lehtësimin e procedurave, transparencën dhe përmirësimin e shërbimeve doganore. Vlerësime pozitive për reformat u dhanë edhe nga institucionet financiare ndërkombëtare.

Në aspektin financiar, Dogana Shqiptare regjistroi një rekord historik të ardhurash, duke arkëtuar rreth 12 milionë euro në një ditë të vetme, çka, sipas Gazhelit, pasqyron forcimin e administratës dhe eficiencën e reformave të zbatuara.

Duke folur për vitin 2026, Gazheli theksoi se fokusi do të jetë në thellimin e modernizimit, investimet në teknologji të avancuar, rritjen e sigurisë dhe efikasitetit, si dhe në procedura më të thjeshta për biznesin, në funksion të përmbylljes së Kapitullit 29 dhe avancimit të procesit të integrimit europian. /j.p/

The post Gazheli: Procedura të thjeshtuara doganore dhe modernizim të sistemeve në 2026-ën appeared first on Agjencia Telegrafike Shqiptare.

TIRANË, 29 dhjetor/ATSH/ Ministria e Shëndetësisë dhe Mirëqenies Sociale ka publikuar videokartolinën e urimit për festat e fundvitit, të përcjellë nga profesionistë dhe kujdestarë që punojnë çdo ditë me përkushtim për fëmijët me aftësi ndryshe dhe ata pa kujdes prindëror, pjesë e Shërbimit Social.

Në videomesazh, Edlira Tagani, terapiste arti pranë Qendrës së Zhvillimit “Pëllumbat”, shprehet se prej 33 vitesh është pjesë e jetës së fëmijëve me aftësi ndryshe. Ajo thekson rolin e terapisë së artit në shprehjen e emocioneve dhe ndjenjave të fëmijëve përmes ngjyrave dhe figurave në telajo.

“Përmes terapisë së artit mundohem të nxis emocionet dhe ndjenjat e tyre. Këtyre fëmijëve duhet t’u dhurojmë sa më shumë dashuri dhe përkrahje. Gëzuar dhe sa më shumë dashuri për njëri-tjetrin,” u shpreh Tagani.

Një tjetër mesazh vjen nga Zhuljeta Grabocka, e njohur si “gjyshja” e fëmijëve të Shtëpisë së Fëmijës “Zyber Hallulli”. Ajo tha se është gjyshja e 40 fëmijëve dhe se çdo ditë e kalon pranë tyre, duke u mbushur me dashurinë, paqen dhe mirësinë e shpirtit të tyre.

“Nuk është e lehtë, por çdo sakrificë ia vlen për ta. Jeta është e shtrenjtë dhe e bukur. Rruga drejt lumturisë arrihet vetëm me përpjekje,” tha Grabocka, duke uruar fëmijët për Vitin e Ri 2026. “Për ju është e ardhmja, për ju çdo sakrificë dhe çdo përpjekje.”

Videokartolina përcjell mesazhe solidariteti, dashurie dhe përkushtimi, duke vënë në qendër rëndësinë e kujdesit për fëmijët më në nevojë gjatë festave të fundvitit.

/e.i/j.p/

The post Terapia e artit nxit emocionet tek fëmijët appeared first on Agjencia Telegrafike Shqiptare.

PRISHTINË, 25 dhjetor/ATSH/ Ipeshkvi i Dioqezës Prizren-Prishtinë Dodë Gjergji, ka përçuar mesazhin e paqes dhe harmonisë, me rastin e Krishtlindjes, një nga kremtimet më të rëndësishme në kalendarin festave të krishtera.

Mesha solemne e Krishtlindjes në Katedralen “Shën Nënë Tereza” është udhëhequr nga ipeshkvi Dodë Gjergji.

Ai ndër tjera tha se Kosova ka nevojë për stabilitet më të madh politik dhe të përshpejtojë rrugën drejt hyrjes në familjen evropiane dhe të ruajë vlerat e shoqërisë.

“Bota sot po përballet me frikën e shkatërrimit, pasi ka mbetur pa dashuri, po flet me gjuhën e urrejtjes, sepse e ka humbur fuqinë e arsyes dhe po merren vendim sipas interesave të fortëve dhe jo sipas drejtësisë. Mjerisht, kjo mënyrë e të menduarit, kjo formë e veprimit dhe kjo qasje ndaj njerëzit tjetrit po merr jetë njerëzish gjithandej botës ku ka luftë, padrejtësi e varfëri. Kjo ka plagosur rëndë ndërgjegjen politike të botës. Mbi të gjitha po shkatërron shpresat e brezave të ri dhe po i bën të paaftë ata që të jetojnë në paqe dhe dashuri. Nuk është e mirë as gjendja mes nesh e për këtë nuk mund ta fajësojmë askënd, por të ndihemi bashkëfajtorë për çdo situatë që nuk e kemi në nivelin e duhur… E ndjej të nevojshme t’ju ftoj të jemi më të përgjegjshëm për të restauruar gjendjen në të cilin kemi jetuar në vitin që po lëmë pas, duke kryer obligimin qytetar, pasi do të kontribuojnë të gjithë që vendi të ketë stabilitet të qëndrueshëm politik, të përshpejtojë hapat drejt familjes evropiane dhe të arrijë të ruajë vlerat bazike të shoqërisë sonë”, tha Dodë Gjergji.

Krishtlindja pas Pashkëve është festa më e rëndësishme për të krishterët. Rëndësia e ditës së Krishtlindjes nisi të rritet pas kurorëzimit të Karlit të Madh në vitin 800, ditën e Krishtlindjes.

Sot dita e Krishtlindjes kremtohet me shfaqjen e skenës së lindjes së Krishtit, pemën e Krishtlindjes, shkëmbimin e dhuratave dhe Kartolinave, familjen e bashkuar, dhe ardhjen e Shën Nikollës apo Plakut të Vitit të Ri në prag të Krishtlindjes apo mëngjesin e Krishtlindjes.

Në historinë e krishterë, lindja e Krishtit sjell mrekullinë e mishërimit – Zoti e bën veten plotësisht njerëzor duke marrë pamjen e një fëmije të pafuqishëm, por diçka e mrekullueshme ndodh në të vërtetë në çdo lindje.

Në Ditën e Krishtlindjes, të enjten, nga ora 11:00 mbahet mesha në Katedralen “Shën Nënë Tereza”, ndërsa nga ora 18:00 mesha në Kishën e “Shën Ndout” në “Ulpianë”, Prishtinë. /Kosovapress/

The post Ipeshkvi Dodë Gjergji përçon mesazhin e paqes dhe harmonisë për Krishtlindje appeared first on Agjencia Telegrafike Shqiptare.

TIRANË, 14 dhjetor/ATSH/ Ministrja e Shëndetësisë dhe Mirëqenies Sociale, Evis Sala, nga sallat e reja të kimioterapisë, u shpreh sot se përmirësimi i kushteve në Spitalin Onkologjik, përmes shtimit të sallave dhe shërbimeve, është vetëm hapi i parë drejt një trajtimi të sigurt dhe dinjitoz për pacientët.

Ajo theksoi se vijon puna për garantimin e barnave onkologjike.

Investimi në sallat e reja të kimioterapisë është rezultat i bashkëpunimit mes Ministrisë së Shëndetësisë dhe partnerëve, duke përbërë një hap të rëndësishëm për ofrimin e një trajtimi më të sigurt, më komod dhe më dinjitoz për pacientët.

Ministrja Sala, në një videomesazh në rrjetet sociale nga sallat e reja të kemioterapisë, tha se që në ditën e parë të detyrës saj, angazhimi ka qenë që shërbimi onkologjik të jetë një përparësi. “Shërbimi që ofrohet këtu prek jetën e shumë familjeve dhe kërkon mbështetje të vazhdueshme”, u shpreh Sala.

“Çdo pacient që kalon këto korridore vjen me sfida, me shpresë. Dhe është detyrë e jona të krijojmë kushte sa më të mira përgjatë këtij rrugëtimi të vështirë”, tha ajo.

“Ky është vetëm hapi i parë. Puna po vijon paralelisht për garantimin e barnave onkologjike. Në buxhetin 2026 për herë të parë është planifikuar rimbursimi i të gjitha barnave antitumorale për pacientët që trajtohen në këtë spital, duke rritur fondin me 1.5 miliardë lekë dhe duke krijuar një mbështetje më të plotë për trajtimin”, vijoi Sala.

Sala shprehu njëherësh, mirënjohje dhe respekt për mjekët, infermierët, farmacistët dhe gjithë stafin shëndetësor, të cilët çdo ditë janë forca që sipas ministres mban në këmbë këtë shërbim jetik.

Paralelisht, Spitali Onkologjik ka nisur zbatimin e shërbimeve të reja digjitale, si receta elektronike dhe dosja elektronike e pacientit (e-file), duke përmirësuar ndjekjen dhe menaxhimin e trajtimit për çdo  pacient.

/e.i/a.f/

The post Salla të reja kimioterapie për pacientët në Spitalin Onkologjik appeared first on Agjencia Telegrafike Shqiptare.