Megjithatë, mos u nxitoni ende të bëni gati valixhet. Lajmet e mësipërme janë të rreme.
Më 21 dhjetor 2025, vetë Ambasada Zvicerane në Shqipëri i përgënjeshtroi lajmet me anë të një postimi në Facebook.
Sipas ambasadës, ndryshe nga ç’pretendohet vetëm një e dhjeta, pra një maksimum prej 8500 punëtorësh dhe specialistësh të kualifikuar nga vendet e treta mund të rekrutohen në Zvicër në 2026.
Ky lajm i rremë rishfaqet shpesh që nga viti 2022.
Radiotelevizioni Zviceran (RTS) gjurmoi origjinën e mundshme të shifrës prej 85 mijë punëtorësh.
Agjencia zvicerane e punësimit Adecco citohet shpesh në artikuj. Shifra shfaqet në një njoftim për shtyp të kompanisë, por në një kontekst krejtësisht të ndryshëm. Në shkurt 2024, Adecco u zotua të rekrutonte 85 mijë refugjatë dhe të trajnonte 17 mijë njerëz në të gjithë botën deri në fund të vitit 2027. Nuk ka lidhje të drejtpërdrejtë me Zvicrën dhe mungesën e saj të madhe të fuqisë punëtore të përmendur në artikuj. Një tjetër origjinë mund të jetë nga një raport i agjencisë së rekrutimit Dynajobs, e cila përmendet në një artikull të 2022 në Blick. Kompania me seli në Aargau pretendon të jetë aktive në ndihmën dhe trajnimin e rekrutimit. Ekspertiza e saj mbetet e vështirë për t’u përcaktuar. Për shembull, asnjë klient nuk është i listuar në faqen e internetit të kompanisë. Në janar 2022, drejtori i Dynajobs publikoi një analizë të tregut të punës pas pandemisë, në të cilën ai vlerësoi se Zvicrës i mungonin afërsisht 85 mijë punëtorë të kualifikuar për të arritur nivelet e rritjes para pandemisë. Është e vështirë të kuptohet saktësisht se si autori e nxori këtë llogaritje. Shifra ekziston, por është nxjerrë plotësisht nga konteksti i saj origjinal.
TIRANË, 22 dhjetor/ATSH/ Vetëpunësimi po konsolidohet gjithnjë e më shumë si një rrugë reale për ndërtimin e karrierës së të rinjve në Shqipëri, ndërsa interesimi për programet mbështetëse ka arritur nivelin më të lartë ndër vite.
Gjatë një aktiviteti të zhvilluar në kuadër të Programit të Vetëpunësimit, ministrja e Ekonomisë dhe Inovacionit, Delina Ibrahimaj, vlerësoi historitë konkrete të të rinjve që kanë zgjedhur të kthejnë një ide të thjeshtë në një aktivitet të qëndrueshëm ekonomik. Ajo theksoi se zgjedhja për të ndërtuar një biznes, kërkon guxim dhe përkushtim, veçanërisht në fazën fillestare, ku ideja duhet të strukturohet dhe të kthehet në punë të përditshme.
Sipas të dhënave të bëra publike, këtë vit Programi i Vetëpunësimit ka regjistruar interesin më të lartë që nga nisja e tij, me 233 aplikantë të shpallur përfitues. Ndërkohë, në total, që nga fillimi i programit, mbështetje kanë përfituar 670 persona. Ministrja theksoi se pas këtyre shifrave qëndrojnë histori personale, përpjekje konkrete dhe angazhim i vazhdueshëm.
Garancia Rinore vijon të luajë një rol kyç, duke mbështetur vetëpunësimin për të dytin vit radhazi. Për tre vitet e ardhshme, mbi 500 të rinj pritet të përfitojnë mbështetje të dedikuar.
Ibrahimaj nënvizoi se politikat publike nuk do të ndalen vetëm në fazën e nisjes së aktivitetit, por do të shtrihen edhe gjatë rritjes dhe zgjerimit të tij, duke u përmirësuar mbi bazën e përvojës reale të vetë të rinjve.
Ministrja u shpreh se ndarja e historive personale të suksesit është një nga mënyrat më të forta për të nxitur të tjerë të ndërmarrin hapin e parë drejt sipërmarrjes.
Programi i Vetëpunësimit zbatohet nga Agjencia Kombëtare e Punësimit dhe Aftësive, si pjesë e politikave aktive për nxitjen e punësimit dhe sipërmarrjes tek të rinjtë. /j.p/
Kryeministri, Edi Rama, ka vijuar me dekaratat e tij tallëse kundrejt të rinjve, të cilët pasi i përzuri nga vendi i tyre, i akuzon edhe për mungesë vullneti për të punuar. Gjatë një takimi me të rinjtë këtë të premte, Rama u shpreh se ata që thonë se në Shqipëri nuk ka punë, sipas tij […]
TIRANË, 12 dhjetor/ATSH-Maela Marini/ Kryeministri Edi Rama deklaroi sot se sipas raportit të Organizatës për Bashkëpunim dhe Zhvillim Ekonomik (OECD) Shqipëria zë vendin e parë në rajon për shërbimet e punësimit.
Në një takim me të rinj të punësuar nga programet e nxitjes së punësimit, Rama u shpreh se “kjo është dëshmi se Shqipëria ofron mundësi për të gjithë të rinjtë që duan vërtetë të punojnë e të ndërtojnë një rrugë profesionale”.
Rama tha se raporti i OECD-së flet qartë për punën që është bërë gjithë këto vite për të ndërtuar një skemë shërbimesh punësimi që ka dhënë rezultate inkurajuese.
“Janë 7 programe që funksionojnë sot për nxitjen e punësimit dhe mbulojnë të gjitha kategoritë dhe shkojnë nga praktika profesionale te praktika në vendin e punës, nga vetëpunësimi tek riintegrimi social”, u shpreh Rama.
Një tjetër e dhënë premtuese, sipas Kryeministrit, është që vetëm në pesë vitet e fundit, 42 mijë të rinj janë punësuar përmes zyrave tona të punës dhe përmes këtyre shërbimeve.
TIRANË, 11 dhjetor/ATSH/ Papunësia në vend ka rënë gjatë tremujorit të tretë të vitit 2025, duke arritur në 8,1%.
Referuar treguesve të publikuar nga Anketa Tremujore e Tregut të Punës për tremujorin e tretë të vitit, tek të rinjtë 15-29 vjeç, shkalla e papunësisë ka rënë ndjeshëm, në 15%, një ulje e dukshme krahasuar me një vit më parë.
Papunësia mbetet më e lartë tek gratë me 9,7% krahasuar me burrat me 6,8%.
Të dhënat tregojnë gjithashtu se gjithnjë e më shumë njerëz po marrin pjesë në tregun e punës.
Në grupmoshën 15-64 vjeç, pjesëmarrja arriti në 76,5%, ndërsa tek të rinjtë 15-29 vjeç është 53,5%.
Numri i personave të punësuar arriti në 1.178.604, me një rritje të lehtë krahasuar me tremujorin e mëparshëm.
Shkalla e punësimit për burrat rezulton më e lartë se për gratë, respektivisht 76,6% dhe 62,7%, ndërsa tek të rinjtë shkalla e punësimit është 45,5%.
Po ashtu, INSTAT nënvizon se 23,5% e popullsisë 15-64 vjeç është ekonomikisht joaktive, duke përfshirë ata që kryejnë detyra shtëpiake, apo kanë paaftësi për punë. Tek të rinjtë, 46,5% nuk janë aktivë në tregun e punës, shumica prej tyre duke ndjekur arsim ose trajnim.
TIRANË, 8 dhjetor /ATSH/ Në kuadër të Ditës Kombëtare të Rinisë, ministrja e Ekonomisë dhe Inovacionit, Delina Ibrahimaj, theksoi se qeveria ka në fokus mbështetjen e rinisë përmes punësimit dhe formimit profesional, përfshirë edhe programin pilot të Garancisë Rinore.
Ibrahimaj solli në vëmendje përmes fakteve dhe statistikave rritjen e punësimit të të rinjve si dhe avancimin në ndjekjen e kurseve profesionale.
“Përmes ndërmjetësimit, programeve të nxitjes së punësimit dhe aftësimit profesional, përgjatë 10 mujorit të fundit është mundësuar punësim i 7,451 të rinjve deri në 29 vjeç, nga të cilët 612 përmes programit pilot të Garancisë Rinore”, thekson ministrja.
Gjithashtu, Ibrahimaj shton se 1,203 të rinj janë përfshirë në Programet e Nxitjes së Punësimit, mbi 4,500 vajza dhe djem u regjistruan në klasën e 10 në Arsimin Profesional (transferimet vijojnë), 6,290 të rinj ndoqën një kurs Formimi Profesional dhe 120 kanë hapur sipërmarrjet e tyre përmes Programit të Vetëpunësimit.
Ministrja e Ekonomisë dhe Inovacionit thekson se qeveria do vijojë mbështetjen për të rinjtë, duke bërë të mundur aftësimin dhe punësimin e sigurt të tyre.
Sipas të dhënave më të fundit të Eurostat, Greqia mban nivelin më të lartë të papunësisë afatgjatë në Bashkimin Europian, me 5.4%. Pas saj renditen Spanja me 3.8% dhe Sllovakia me 3.5%. Nga 13 milionë persona të papunë në BE, rreth 4.2 milionë kanë qenë pa punë për të paktën një vit. Kjo kategori prek […]
TIRANË, 28 tetor/ATSH/ Neurokirurgu Klaudio Disha i është bashkuar prej ditës së sotme ekipit të shërbimit të Neurokirurgjisë, pranë Qendrës Spitalore Universitare “Nënë Tereza”.
Lajmin e ka ndarë Ministria e Shëndetësisë dhe Mirëqenies Sociale, në një njoftim në rrjetet sociale. Në njoftim theksohet se mjeku Disha i është bashkuar ekipit të Neurokirurgjisë në QSUNT për të dhënë kontributin e tij në trajtimin e pacientëve dhe forcimin e kapaciteteve profesionale në këtë fushë të specializuar.
Doktor Disha, pas prezantimit me shefin e Neurokirurgjisë në QSUNT, Artur Xhumari, firmosi kontratën e punësimit në prani edhe të drejtoreshës së QSUNT, Anxhela Paparizo.
Në videomesazhin e publikuar në rrjete sociale, mjeku neurokirurg Klaudio Disha u shpreh se ka mbaruar studimet në Universitetin shtetëror në Sofje të Bullgarisë.
“Prej vitit 2021 punoj pranë Spitalit Memorial në Fier ku realizojmë ndërhyrjet e trombektomisë mekanike dhe aspiratave. Prej ditës së sotme kam filluar punë në QSUNT pranë spitalit të Neurologjisë, ku fokusi im është trajtimi endovaskular i trombozave për pacientët e Tiranës dhe më gjerë. Pas studimeve për mjekësi në Sofje jam rikthyer për të dhënë kontributin në vendin tim”, tha Disha.
Fundjava ishte me reshje të rrëmbyeshme në Spaç, atje ku pavarësisht kushteve atmosferike, prej më shumë se dhjetë ditësh, një grup prej rreth 70 minatorësh vijojnë një grevë për paga, kushte dhe siguri në punë.
Në gusht, ata patën krijuar një sindikatë për t’i përfaqësuar më drejt kërkesat. Por sipas tyre, kompania turke që administron minierën e bakrit “Tete Albania”, nuk ua ka njohur dhe as marrë parasysh kërkesat.
Vasil Çuni, i cili punon prej tetë vitesh me makineritë e shpimit në minierë, tregon se kushtet nuk janë të mira. Ai thotë se nëntokë punohet me makineri të rënda që veprojnë me motorë nafte, të cilët shtojnë gazrat e dëmshëm.
“Tymi është i pranishëm me shumicë,” thekson ai duke nënvizuar se kërkesat për përmirësimin e kushteve janë adresuar që prej fillimit, por nuk janë marrë parasysh.
Çuni dhe grupi i minatorëve që janë në grevë mendojnë se një kontratë kolektive do t’u garantonte atyre siguri, pagë më të mirë dhe trajtim dinjitoz për sindikatën.
Vladimir Mërdhoçi, punonjës prej katër vitesh, thotë se do ta vazhdojë grevën pasi nuk është marrë asnjë masë konkrete.
“Kërkojmë kontratë kolektive, s’po them se do t’i zgjidhë 100% gjërat, se dhe te shtëpia jonë, nuk zgjidhen hallet dhe problemet, por 70% të gjërave që kërkojmë të zgjidhen”.
Por tensionet janë shtuar. Albert Bushpreni, një nga organizatorët e grevës, është pushuar nga puna më 7 tetor. Kompania ka përdorur si arsye një “aksident të pa raportuar zyrtarisht në kohë”, por ai dhe grupimi i minatorëve besojnë se shkaku është bërë angazhimi sindikal.
“Është turp i botës të punosh në nëntokë me 3 mijë lekë në ditë. Unë si drejtues turni marr 4,800 lekë, që kam përgjegjësinë e të gjithëve,” thotë Bushpreni.
Sipas tij, rritja e premtuar e pagës ishte një farsë: vetëm 50 lekë në ditë, e cila realisht ishte indeksimi vjetor me inflacionin.
“Imagjinoni të tallesh me djersën e minatorëve me 50 lekë rritje page që as fëmija nuk t’i merr se edhe një akullore bën më shumë se aq,” shton ai.
Deri më sot, 16 punëtorë pjesëmarrës në grevë janë pushuar për “mungesë në punë pa arsye të justifikuar”. Minatorët, të cilët shprehen të gatshëm për t’u ulur në bisedime, i konsiderojnë pushimet shkelje të së drejtës kushtetuese për organizim sindikal dhe kërkojnë ndërhyrjen e autoriteteve.
Përplasja mes kompanisë dhe Konfederatës së Sindikatave
Dëshirën për t’u ulur në bisedime e shprehu për Citizens.al edhe drejtuesi i “Tete Albania”, Cem Koray Yagci.
Megjithatë ai pretendoi se sindikata e re nuk ka dorëzuar dokumentacion të vlefshëm ligjërisht dhe se Konfederata e Sindikatave Shqiptare (KSSH) nuk ka paraqitur listën e anëtarëve apo vendimin e krijimit të saj. Me këtë Yagci argumentoi se, për ta, greva e minatorëve ishte e paligjshme.
“I kemi shpjeguar zotit KolëNikollaj (kreu i KSSH) shumë qartë që edhe pse kjo protestë-grevë është e paligjshme, ju nuk keni të drejtë të bllokoni mjetet e punës dhe të mos lejoni punonjësit e tjerë të shkojnë në vendin e punës,” theksoi Yagci për Citizens.al.
Në parim Yagci u shpreh mirëkuptues se “punonjësit kanë të drejtë të protestojnë”, por përsëriti se ata “nuk duhet të pengojnë të tjerët”. Më tej ai tha se KSSH nuk ka kryetar të ligjshëm pasi, sipas tij, mandati i Kol Nikollajt ka përfunduar që prej vitit 2024. Për këtë Yagci u shpreh se punonjësit “po mashtrohen” dhe se ai shpresonte që personeli ta kuptojë këtë dhe “të formojë një sindikatë sipas ligjit e t’i kthehen punës”.
Por duke folur për Citizens.al, Nikollaj e quajti këtë qëndrim si “artificë ligjore”.
“Konfederata ka 2,300 organizata sindikale. Nuk mund të kemi 2,300 persona juridikë. Të gjitha janë pjesë e strukturës organizative sipas statutit të KSSH-së,” tha ai.
Sipas Nikollajt, kompania është informuar me korrektësi.
“Listën e anëtarëve e kemi bërë me noter, të gjitha gati, por kompania nuk ka pranuar të ulet me ne. Të dhënat personale nuk mund t’ia dërgojmë me postë. Kur të ulemi në tavolinë, do t’ia vëmë të gjitha përpara,” shton ai.
Pretendimeve se i ka përfunduar mandati, Nikollaj iu përgjigj se është rimandatuar në nëntor 2024, dhe dokumentet janë depozituar në gjykatë, e cila për shkak të vonesave proceduriale nuk ka dalë me një vendim.
“Gjykata është në proces, por kjo nuk e pezullon mandatin,” thekson ai duke argumentuar se kompanisë i është dërguar historiku i gjykatës dhe dokumentet e Kongresit që e rimandatoi atë në krye.
“Është caktuar gjyqtari, tani gjyqet mund të shkojnë edhe pesë vjet, nuk është në dorën tonë.”
Të martën, palët pritet të takohen në Ministrinë e Ekonomisë, që mbulon çështjet e punës. Synimi është një marrëveshje që rikthen dialogun dhe punën në minierën e Spaçit.
“Kërkojmë që 10 pikat e grevës të realizohen dhe largimet nga puna të bëhen nul,” përfundoi Nikollaj për Citizens.al duke e përshkruar si kushtin për t’u ulur në tavolinë rikthimin e situatës në gjendjen kur filloi greva.
Deri më sot palët janë takuar vetëm më datë 10 tetor në zyrën e Drejtorisë Rajonale të Agjencisë Kombëtare të Punësimit dhe Aftësive në Lezhë. Në procesverbalet e mbajtura nga takimi paraprak ndërmjetësues nga kjo zyrë diskutimet janë cilësuar “pa asnjë frymë bashkëpunimi mes palëve”.
TIRANË, 14 tetor/ATSH/ Tregu i punës në Shqipëri po shfaq kërkesë të shtuar për profesionistë dhe punëtorë, me afro 7 mijë vende të lira të shpallura aktualisht në mbarë vendin.
Nga financierë, te punëtorë krahu, kërkesa për fuqi punëtore është në rritje, ndërsa sfidë kryesore mbetet mungesa e punëtorëve të gatshëm për të pranuar ofertën.
Vetëm në dy javët e para të tetorit, sipas të dhënave të Agjencisë Kombëtare të Punësimit dhe Aftësive (AKPA), janë regjistruar 1143 vende të reja pune.
Sipas statistikave të AKPA, 230 pozicione janë të hapura për profesionistë, ku më të kërkuarit rezultojnë të jenë financierët, ekonomistët, juristët, inxhinierët dhe specialistët teknikë në fusha të ndryshme. Kjo tendencë pasqyron nevojën në rritje të bizneseve për staf të kualifikuar, në funksion të zgjerimit të aktivitetit dhe rritjes së standardeve të ofrimit të shërbimeve.
Paralelisht, në sektorin prodhues, ndërtim dhe logjistikë, mbizotëron kërkesa për punëtorë krahu, ku vetëm në fillim të tetorit janë shpallur 231 pozicione të lira, duke e renditur këtë si një nga kategoritë më të kërkuara në treg.
Ndërkohë, edhe pse sezoni veror ka përfunduar, në zonat bregdetare vijon të ketë kërkesa për staf shërbimi, ku për periudhën në fjalë janë shpallur 18 vende pune për kamerierë, si dhe pozicione të tjera si kuzhinierë, sanitarë dhe personel ndihmës.
TIRANË, 27 shtator/ATSH/ Gjatë periudhës janar-gusht të këtij viti, në zyrat e punësimit në të gjithë vendin janë regjistruar 17,396 punëkërkues, ndërsa një pjesë e konsiderueshme e tyre kanë gjetur mundësi punësimi.
Sipas të dhënave zyrtare nga Agjencia Kombëtare e PUnësimit dhe Aftësive, gjatë kësaj periudhe janë punësuar gjithsej 10,121 gra dhe vajza, duke reflektuar përpjekjet për të nxitur barazinë gjinore dhe për të rritur përfshirjen e grave në tregun e punës.
Një tjetër kategori e rëndësishme janë të rinjtë deri në moshën 29 vjeç, ku 6,797 të rinj janë futur në punë.
Në kuadër të mbështetjes sociale, referuar të dhënave, 1,311 persona përfitues të pagesës së papunësisë janë rikthyer në skemën e punësimit, ashtu sikundër 1,320 anëtarë të skemës së ndihmës ekonomike janë përfshirë në statistikat e punësimit, çka tregon përpjekjet për integrimin në tregun e punës edhe të atyre që varen nga ndihmat sociale.
Përfshirja ka prekur edhe grupet vulnerabël. Gjatë kësaj periudhe janë ndihmuar për të gjetur një punë 797 persona nga komunitetet rome dhe egjiptiane, si dhe 291 persona me aftësi të kufizuara, duke synuar krijimin e mundësive të barabarta për punësim. /j.p/
LONDËR, 26 shtator /ATSH/ – Kryeministri britanik Keir Starmer njoftoi se qeveria do të fusë një skemë të re të ID-së (karta e identitetit) digjitale, e cila do të bëhet e detyrueshme për të gjithë ata që duan të punojnë ligjërisht në Britaninë e Madhe sipas BBC.
Starmer deklaroi se skema e re do të bëjë më të vështirë punësimin e paligjshëm dhe do të sjellë “përfitime të panumërta” për qytetarët.
Qeveria tha se po shqyrton mënyra për të siguruar që shërbimi të jetë i aksesueshëm edhe për ata që nuk kanë mundësi të përdorin një smartphone dhe do të hapë një konsultim për mënyrën e implementimit më vonë gjatë vitit.
“Kjo do të përbëjë një mundësi të madhe për vendin dhe do të vështirësojë punësimin e paligjshëm”, tha Starmer.
ID-ja digjitale do të ruhet në telefonat e qytetarëve, në mënyrë të ngjashme me aplikacionin e NHS apo kartat e pagesave pa kontakt.
Ajo do të përfshijë emrin, datën e lindjes, një fotografi, kombësinë dhe statusin e banimit. Ata që nuk përdorin smartphone mund të marrin një kartë fizike.
Qytetarët nuk do të jenë të detyruar ta mbajnë me vete ose t’ua tregojnë të tjerëve, por do të duhet për të provuar të drejtën për të punuar.
Plani ka shkaktuar reagime të forta nga opozita dhe qeveritë rajonale.
“Reform UK” e quajti skemën një “lojë cinike” për të mashtruar votuesit, ndërsa liderja konservatore Kemi Badenoch tha se nuk do të ndalojë anijet që sjellin migrantë.
Liberaldemokratët kundërshtojnë detyrimin e qytetarëve për të dhënë të dhënat e tyre private. Qeveritë e Skocisë dhe Irlandës së Veriut e kanë quajtur planin të papranueshëm. /Ad.Ab./
Një raport i ri i vitit 2025 ka nxjerrë në pah një paradoks të pazakontë në tregun e punës: të rinjtë po përdorin inteligjencën artificiale për të përgatitur aplikimet e tyre, ndërsa departamentet e Burimeve Njerëzore po mbështeten gjithnjë e më shumë tek e njëjta teknologji për t’i lexuar dhe filtruar ato.
Sipas Raportit Job Seeker Nation 2025, 69% e aplikantëve përdorin AI për të gjetur vende pune, dhe mbi gjysma e tyre e shfrytëzojnë për të shkruar CV-të dhe letrat e motivimit. Por kjo praktikë po krijon një “loop” digjital ku algoritmet lexojnë punën e algoritmeve. Rekrutuesit thonë se shumë letra motivimi duken identike dhe shpesh nuk arrijnë tek një sy njerëzor, pasi sistemet e filtrimit automatizohen gjithnjë e më shumë.
Ky zhvillim ka pasoja konkrete për të rinjtë që kërkojnë punë. Të dhënat e Stanford University tregojnë një rënie me 13% të punësimit fillestar në industritë e ekspozuara ndaj AI – rënia më e madhe e viteve të fundit. Sipas ekspertëve, ndërsa kompanitë fitojnë efikasitet përmes teknologjisë, kandidatët e rinj po humbasin mundësinë për të dalë në pah me aftësitë e tyre reale.
Raporti e përshkruan situatën si një paradoks: produktiviteti dhe shpejtësia e proceseve rriten, por mundësitë për punësim zvogëlohen. Për shumë të rinj, kërkimi i punës ndjehet më pak njerëzor se kurrë më parë, teksa njerëzit presin ndërkohë që algoritmet “flasin” me njëri-tjetrin.
Një raport i ri i vitit 2025 ka nxjerrë në pah një paradoks të pazakontë në tregun e punës: të rinjtë po përdorin inteligjencën artificiale për të përgatitur aplikimet e tyre, ndërsa departamentet e Burimeve Njerëzore po mbështeten gjithnjë e më shumë tek e njëjta teknologji për t’i lexuar dhe filtruar ato.
Sipas Raportit Job Seeker Nation 2025, 69% e aplikantëve përdorin AI për të gjetur vende pune, dhe mbi gjysma e tyre e shfrytëzojnë për të shkruar CV-të dhe letrat e motivimit. Por kjo praktikë po krijon një “loop” digjital ku algoritmet lexojnë punën e algoritmeve. Rekrutuesit thonë se shumë letra motivimi duken identike dhe shpesh nuk arrijnë tek një sy njerëzor, pasi sistemet e filtrimit automatizohen gjithnjë e më shumë.
Ky zhvillim ka pasoja konkrete për të rinjtë që kërkojnë punë. Të dhënat e Stanford University tregojnë një rënie me 13% të punësimit fillestar në industritë e ekspozuara ndaj AI – rënia më e madhe e viteve të fundit. Sipas ekspertëve, ndërsa kompanitë fitojnë efikasitet përmes teknologjisë, kandidatët e rinj po humbasin mundësinë për të dalë në pah me aftësitë e tyre reale.
Raporti e përshkruan situatën si një paradoks: produktiviteti dhe shpejtësia e proceseve rriten, por mundësitë për punësim zvogëlohen. Për shumë të rinj, kërkimi i punës ndjehet më pak njerëzor se kurrë më parë, teksa njerëzit presin ndërkohë që algoritmet “flasin” me njëri-tjetrin.
TIRANË, 11 shtator/ATSH/ Tregu i punës në Shqipëri po shfaq shenja përmirësimi, i nxitur kryesisht nga rritja në sektorin e shërbimeve, ndërsa sektorët tradicionalë si bujqësia dhe industria vijojnë të pësojnë rënie.
Sipas Anketës së Forcave të Punës për tremujorin e dytë të vitit 2025, publikuar nga INSTAT, shkalla zyrtare e punësimit për popullsinë 15-64 vjeç arriti në 69,1%, duke shënuar një rritje të lehtë krahasuar me të njëjtën periudhë të një viti më parë.
Ndërkohë, shkalla e papunësisë është 8,5%, duke shënuar një ulje të lehtë prej 0,1 pikë përqindje krahasuar me tremujorin paraprak. Shkalla zyrtare e papunësisë është 7,5% për burrat dhe 9,8% për gratë.
Analiza sektoriale tregon se punësimi në bujqësi ka rënë me 7,5%, ndërsa në industri me 3,8%. Në të kundërt, sektori i shërbimeve ka shënuar një rritje prej 6,2%, duke u konfirmuar si motori kryesor i përmirësimit të tregut të punës.
Gjatë tremujorit të dytë papunësinë tek të rinjtë është 15,1%. Ky tregues është ulur me 3,3 pikë përqindje krahasuar me të njëjtin tremujor të vitit 2024 dhe me 2,8 pikë përqindje në krahasim me tremujorin e parë të vitit 2025.
TIRANË, 10 shtator/ATSH/ Në tremujorin e dytë të vitit 2025, numri i të punësuarve u rrit me 0,5% krahasuar me të njëjtin tremujor të një viti më parë, ndërsa në raport me tremujorin e parë 2025, është ulur me 0,4%.
Sipas raportit të publikuar nga Instituti i Statistikave (INSTAT), shkalla zyrtare e punësimit për popullsinë 15-64 vjeç është 69,1%.
Në raportin e INSTAT theksohet se numri i të papunëve është ulur me 0,1% nga tremujori i mëparshëm, ndërsa në raport me të njëjtin tremujor të një viti më parë ka mbetur i pandryshuar, duke e çuar në 8,5 % shkallën zyrtare të papunësisë në Shqipëri, për popullsinë 15 vjeç e lart.
Të dhënat e INSTAT-it tregojnë se shkalla e pjesëmarrjes në forcat e punës për popullsinë 15–64 vjeç është 76,2% në tremujorin e dytë. Ky tregues është rritur me 0,6% krahasuar me tremujorin e dytë të vitit 2024, ndërsa për tremujorin e parë 2025 është ulur me 0,5%.
Për gratë, shkalla e pjesëmarrjes në forcat e punës është 70,1%, ndërsa për burrat ky tregues është 82,6%. Për burrat, shkalla e pjesëmarrjes në forcat e punës është 12,5 pikë përqindje më e lartë sesa për gratë.
Krahasuar me të njëjtin tremujor të vitit 2024, shkalla e pjesëmarrjes në forcat e punës për gratë është rritur me 0,9 pikë% dhe për burrat me 0,3%.
Gjatë tremujorit të dytë të vitit 2025, shkalla e pjesëmarrjes në forcat e punës për të rinjtë e moshës 15-29 vjeç është 51,5%.
Ky tregues është ulur me 3,0% si në tremujorin e dytë të vitit 2024, ashtu edhe me tremujorin e mëparshëm. Për popullsinë 30-64 vjeç, në tremujorin e dytë 2025, shkalla e pjesëmarrjes në forcat e punës është 85,4%.
Gjatë tremujorit të dytë të vitit 2025, shkalla e punësimit për popullsinë 15 vjeç e lart është 58,4%. Numri i të punësuarve për popullsinë 15 vjeç e lart, nga tremujori i dytë i vitit 2024 në tremujorin e dytë 2025, është ulur me 0,9%. Në terma vjetorë, punësimi është ulur me 7,5% në sektorin e bujqësisë dhe me 3,8% në sektorin e industrisë, ndërsa është rritur me 6,2% në sektorin e shërbimeve.
Krahasuar me tremujorin e mëparshëm, në tremujorin e dytë 2025, punësimi për popullsinë 15 vjeç e lart është rritur me 0,2%. Punësimi ulet me 1,1% në sektorin e bujqësisë dhe me 1,2% në sektorin e industrisë, ndërsa është rritur me 1,8% në sektorin e shërbimeve.
Në tremujorin e dytë të vitit 2025, shkalla zyrtare e papunësisë është 7,5% për burrat dhe 9,8% për gratë.
Krahasuar me të njëjtin tremujor të vitit 2024, shkalla e papunësisë është rritur me 0,7% për gratë, ndërsa është ulur me 0,5% për burrat.
Shkalla e papunësisë për të rinjtë 15–29 vjeç është 15,1%. Krahasuar me tremujorin e dytë të vitit 2024, ky tregues është ulur me 3,3 pikë përqindje, dhe në krahasim me tremujorin e parë të vitit 2025 është ulur me 2,8 pikë përqindje.
Në tremujorin e dytë të vitit 2025, 17,4% e popullsisë ekonomikisht joaktive në moshë pune (15–64 vjeç) është e angazhuar për të përmbushur detyrat shtëpiake, 10,8% është në pension ose pension të parakohshëm, ndërsa 15,1% është në paaftësi të përhershme për punë.
Gjithashtu, 2,3% e popullsisë ekonomikisht joaktive në këtë grup-moshë deklaron se nuk po kërkon punë pasi beson se nuk ka punë të disponueshme, dhe për këtë arsye klasifikohet si të papunë të dekurajuar.
Të rinjtë e moshës 15-29 vjeç që deklaruan se janë nxënës/studentë ose në trajnim përbëjnë 72,8% të të rinjve ekonomikisht joaktivë. Ndër të rinjtë e moshës 15-29 vjeç ekonomikisht joaktivë, 0,9% klasifikohen si të papunë të dekurajuar.
Në popullsinë e moshës 30-64 vjeç, ky grup përbën 14,6% të popullsisë ekonomikisht joaktive të kësaj grup-moshe.
Numri i të punësuarve në Shqipëri arriti në 1.177.245 persona në vitin 2024, me një rritje prej afro 22 mijë vetësh përkundrejt vitit 2023, bëhet e ditur nga të dhënat e publikuara nga Instituti i Statistikave në botimin e përvitshëm mbi tregun e punës. Por rreth 24% e të gjithë të punësuarve i përkasin një […]
TIRANË, 25 gusht /ATSH/ Numri i të huajve me leje qëndrimi në Shqipëri ka arritur në 21.940 në fund të vitit 2024, duke shënuar një rritje prej 2,2% krahasuar me vitin 2023. Të dhënat e publikuara nga Instituti i Statistikave (INSTAT) pasqyrojnë një tendencë në rritje të interesit të të huajve për të jetuar dhe punuar në Shqipëri.
Sipas statistikave, meshkujt përbëjnë shumicën e të huajve me leje qëndrimi me 61,9%, ndërsa femrat zënë 38,1%. Grup-mosha më e përfaqësuar është ajo nga 30 deri në 39 vjeç, që përbën 24,6% të të huajve gjithsej.
Po sipas shifrave të INSTAT, numri i aplikimeve për leje qëndrimi në Shqipëri, në vitin 2024 shënoi rritje prej 6,0%, krahasuar me vitin 2023. Shtetasit nga Italia dhe India përbëjnë 28,8% të aplikimeve.
Të huajt me origjinë nga Kosova, Italia dhe Turqia përbëjnë numrin më madh të të huajve me leje qëndrimi në Shqipëri.
Shumica e të huajve kanë ardhur për qëllime punësimi, duke përbërë 54,3% të lejeve të qëndrimit, ndjekur nga bashkimi familjar me 24,5%, arsye të tjera me 16,3%, studimet me 4%, dhe qëllimet humanitare me 0,9%.
Në 2024 u identifikuan 1540 të huaj të parregullt në territorin e Shqipërisë, duke shënuar një rënie të konsiderueshme, krahasuar me 6630 në vitin 2023.
Të huajt në Shqipëri sipas vendit të origjinës
Në vitin 2024, të huajt me origjinë nga Kosova janë 4592 banorë, duke shënuar një rritje me 23,7%, krahasuar me 2023, ndërsa të huajt me leje qëndrimi në Shqipëri me origjinë nga Italia janë 3763 banorë, duke shënuar një rritje me 11,5%, krahasuar me 2023.
Sipas të dhënave, Evropa zë pjesën më të madhe me 65,5% (14.367 persona me leje qëndrimi), duke shënuar një rënie prej 5,6%, krahasuar me 2023; Azia ka shënuar rritje të ndjeshme me 20,1% (4545 persona); Amerika, Afrika dhe Oqeania rritje me 23,4% (3028 persona).
Të dhëna mbi të huajt me leje qëndrimi në Shqipëri si dhe të huajt e parregullt sigurohen nga Departamenti për Kufirin dhe Migracionin.
TIRANË, 18 gusht/ATSH/ Përmes portalit “Infermierë për Shqipërinë” u përzgjodhën edhe 30 infermierë, të cilët tashmë janë në shërbim të qytetarëve në qendrat shëndetësore dhe spitalet e vendit.
Ministrja e Shëndetësisë dhe Mbrojtjes Sociale, Albana Koçiu tha sot në një postim në rrjetet sociale se “përmes këtij portali garantojmë transparencë dhe punësim mbi bazën e meritës, duke i shtuar sistemit shëndetësor profesionistë të rinj dhe të përkushtuar”.
“Në thirrjen e 10-të u përzgjodhën 30 infermierë, mes tyre Emanuela, Jurgeni, Liridona dhe Fatjoni. Urojmë suksese të gjithë të rinjve që i janë bashkuar bluzave të bardha, për të dhënë kontributin e tyre me përkushtim, humanizëm dhe dinjitet”, tha Koçiu.
Në videon e publikuar nga Koçiu infermierja Emanuela Maçi tha se konkurrova në portal dhe fitova vendin si infiermiere në qendrën shëndetësore numër 3″.
“Konkurrova në portal procesi ishte i saktë dhe transparent fitova vendin definitiv në QSUT”, tha Jurgen Loka.
Liridona Daja, u shpreh se “konkurrova në portal prita deri sa të bëheshin thirrjet pranova vendin në Dajt për infermiere definitive”.
Ndërsa Fation Bajraktari tha se “deri dje isha infermier provizor pranë Qendrës Spitalore Universitare “Nënë Tereza”, sot nëpërmjet portalit u emërova defenitiv. Procesi ishte shumë i thjeshtë dhe transparent”.
Portali “Infermierë për Shqipërinë”, për punësimin e profesionistëve të shëndetësisë, është një prej mekanizmave që garanton transparencë në punësimet në shëndetësi.
Ky portal ofron mundësi reale punësimi për të gjithë infermierët që kanë përfunduar studimet e larta apo janë kualifikuar më tej në këtë fushë, për të kontribuar në shëndetin e komunitetit.
Procesi i testimit të kandidatëve në platformën “Infermierë për Shqipërinë” është transparent në të gjitha fazat e tij, që nga regjistrimi, testimi, procesi i ankimimit, deri në shpalljen e listës përfundimtare të fituesve dhe përzgjedhjes së vendeve të reja të punës me bazë merite, në bazë të pikëve të marra nga secili kandidat nga të gjitha fazat e konkurrimit.
TIRANË, 16 gusht/ATSH/ Tregu i punës në Shqipëri po reflekton shenja të qarta të rritjes ekonomike dhe përmirësimit të formalizimit, sipas të dhënave të bëra publike sot nga Ministri i Financave, Petrit Malaj.
Ai deklaroi se në muajin qershor të vitit 2025 janë regjistruar 14770 punonjës më shumë të deklaruar, krahasuar me të njëjtën periudhë të vitit 2024, një rritje domethënëse që vjen si rezultat i një kombinimi të politikave aktive për nxitjen e punësimit dhe përforcimit të kontrolleve për informalitetin.
Ministri Malaj vlerësoi këtë progres si një tregues të qartë të rritjes së qëndrueshme ekonomike dhe përpjekjeve të vazhdueshme për të ndërtuar një treg pune më të drejtë dhe më të rregulluar.
“Falënderojmë bizneset që po kontribuojnë me përgjegjësi në këtë proces, duke respektuar ligjin dhe duke siguruar të drejtat e punonjësve të tyre”, u shpreh ministri.
Trendi në rritje i deklarimit të punonjësve ka ndikim të drejtpërdrejtë jo vetëm në sigurimin e të ardhurave të buxhetit të shtetit, por edhe në garantimin e të drejtave sociale për qindra mijëra qytetarë, përmes kontributeve të sigurimeve shoqërore dhe shëndetësore. /a.gj/ /a.g/
TIRANË, 7 gusht/ATSH/ Gjatë gjashtëmujorit të parë të vitit, numri i të punësuarve të rinj ka shënuar një ecuri pozitive, duke reflektuar përmirësimin e tregut të punës dhe zhvillimet e qëndrueshme ekonomike.
Ministri i Financave, Petrit Malaj bëri të ditur sot se, sipas të dhënave të raportuara nga Administrata Tatimore, rezultojnë 10 523 punonjës të rinj më shumë në krahasim me të njëjtën periudhë të vitit të kaluar.
“Rritja e punësimit është rezultat i politikave të qëndrueshme fiskale dhe mbështetjes së bizneseve për të krijuar vende të reja pune”, u shpreh ministri Malaj.
Login
