Një konflikt ka ndodhur mesditën e sotme (22 dhjetor) në vendin e quajtur Rrethrrotullimi i Nartës, mes punonjësve të INUV dhe tre shtetasve, I. D., 58 vjeç, D. D., 27 vjeç dhe F. D., 23 vjeç. Në një reagim zyrtar, policia bën të ditur se në afërsi të vendngjarjes ndodheshin dy punonjës të Qarkullimit Rrugor, […]
Një aksion i përbashkët i Policisë Bashkiake dhe Inspektoratit të Mbrojtjes së Territorit (IMT) për lirimin e hapësirave publike në qytetin e Vlorës është shoqëruar me një incident ditën e sotme. Katër qytetarë, të cilët kundërshtonin ndërhyrjen e autoriteteve në biznese, janë përplasur fizikisht me drejtorin e IMT-së dhe inspektorin përgjegjës. Në vendngjarje kanë ndërhyrë […]
Në prag festave të fundvitit Policia e shtetit ka hartuar një plan masash për rendin dhe sigurinë publike. Përmes një njoftimi zyrtar për mediat uniformat blu informojnë se do të ketë një shtiim të shërbimeve policore me uniformë dhe atyre të Policisë Kriminale në territor, me qëllim garantimin e rendit dhe sigurisë publike, si dhe parandalimin e […]
Policia e Tiranës ka shoqëruar 4 aktivisë të ‘”Shqipëria Bëhet” të Adriatik Lapajt pas protestës para Kryeministrisë. Protestuesit bëjnë me dije se përpos shoqërimit të katër personave, policia gjithashtu u ka marrë edhe gjeneratorin, dy makina me pajisjet teknike, si dhe foninë. Protesta nisi me tensione që në fillim pasi policia u përplas fizikisht me […]
Qytetarë dhe aktivistë të lëvizjes “Shqipëria Bëhet” protestuan të shtunën përpara Kryeministrisë. Në një organizim më të shumtë në numër se 11 ditët e shkuara të protestës së tyre, ata kërkuan edhe njëherë dorëheqjen e Kryeministrit Edi Rama, duke theksuar se për shkak të korrupsionit, “ai ka prekur fundin”.
Protesta u shoqërua me përplasje të përsëritura me policinë. Forcat e rendit u përpoqën të largojnë një gjenerator që shërbente për foninë, duke shkaktuar tension mes palëve.
Adriatik Lapaj, drejtues i lëvizjes, e cilësoi tubimin protestë kombëtare. Ai ftoi qytetarët të bashkoheshin, gati dy javë pas nisjes së protestave të vazhdueshme të një grupi të lëvizjes përpara Kryeministrisë.
Lapaj i bëri thirrje Kryeministrit Rama të dorëhiqet. Ai deklaroi se nuk trembet nga procedimet penale dhe akuzoi qeverinë për represion ndaj protestës.
“Pasi na hoqi çadrat, pasi na vodhi gjeneratorin, pasi na hoqi ku ca të tjerë protestonin, sot [policia] kërkon të na heqë zërin. Zërin nuk e heq dot!” theksoi Lapaj, mes thirrjeve kundër qeverisë.
Avokatja dhe përfaqësuesja e “Shqipëria Bëhet”, Dorina Prethi tentoi disa herë t’i tregonte forcave të rendit, fletë-njoftimin për protestën, që sipas saj, ishte firmosur nga drejtuesit e policisë.
Gjeneratori u sekuestrua gjithsesi në fund të protestës, kur aktivistët me anë të një rimorkioje po e largonin. Policia shoqëroi gjithashtu katër aktivistë.
Citizens ka analizuar edhe më parë ndërhyrjet policore gjatë 12 ditëve të protestës që po mban lëvizja, ndërhyje të cilat sipas ekspertëve ligjorë është konsideruar cenim i së drejtës qytetare të tubimit, që është e garantuar me kushtetutë.
Gjatë tubimit, protestuesit sollën në vëmendje probleme të ndryshme sociale dhe ekonomike.
Flamur Balaj, një qytetar më aftësi të kufizuar, tregoi se si, sipas tij, qeveria nuk ka kryer asnjë rritje pensioni apo përkrahjeje për këtë kategori.
Të njëjtën eksperiencë ndau edhe Greta Ambeli, e cila tha se vëllai i saj, me aftësi të kufizuar merrte vetëm 8 mijë lekë dhe prindërit e saj ndër vite kërkonin ndërhyrjen e ndonjë ministri, duke qenë se spitalet nuk mundësonin zgjidhje.
“Ne jemi këtu për të gjithë ata të rinj, të cilët nuk ia dalin të krijojnë një familje në këtë vend, sepse lekët e krimit kanë rritur çmimet e apartamenteve,” nënvizoi gjatë fjalës së tij Elton Laska nga Lëvizja “Shqipëria Bëhet”.
Ndërsa vetë kreu i lëvizjes, Adriatik Lapaj, e mbajti theksin te dorëheqja e Kryeministrit, si një domosdoshmëri për të cilën nuk ka më kohë.
“Ju keni marrë mjerimin e rrogave të parritura, varfërinë e spitaleve dhe ilaçeve, rrugët e shkatërruara që marrin mbi 350 vjet. Kjo është republika e ‘Ed Banditit’ që do të na mbyllë gojën!” u shpreh Lapaj.
Protestuesit përgëzuan punën e drejtësisë, duke shprehur mbështetjen ndaj Prokurorisë dhe Gjykatës së Posaçme.
Në mbyllje të protestës, ata ironizuan me koret: “Edi Rama nuk e kap dot SPAK-un”.
Qëndresa para Kryeministrisë nga lëvizja “Shqipëria Bëhetë” do të vijojë. Ajo është pjesë e një sërë organizimesh nga grupet opozitare, të cilat kanë shtuar zërat kundër qeverisë ditëve të fundit.
Zhvillimet kanë ndodhur kryesisht pasi Prokuroria e Posaçme ka kërkuar zyrtarisht heqjen e imunitetit të zëvendëskryeministres Belinda Balluku, me synimin për ta arrestuar nën dyshimin se po pengon dhe dëmton hetimet për korrupsion.
TIRANË, 19 dhjetor/ATSH-Maela Marini/ Kryeministri Edi Rama foli sot për rëndësinë e projektit “Smart City Albania”, jo vetëm për monitorimin e elementëve kriminalë, por edhe në drejtim të monitorimit të vetë punonjësve të Policisë së Shtetit.
Rama tha se falë këtij projekti punonjësit e Policisë shohin në kohë reale elementet e kriimalitetit të rrugës që janë të skeduar.
Në këtë mënyrë këta elementë, sipas Kryeministrit, e kanë të pamundur të shkojnë ku të duan dhe të bëjnë keq sepse janë në sytë e policisë gjatë gjithë kohës.
Nga ana tjetër, Rama tha se kjo është një sfidë menaxhimi.
“E kam kuptuara edhe mesazhin e një pjese të atyre që duhet ta kishin çuar para këtë projekt. Është normale që një pjesë në Policinë e Shtetit të mos e dojë këtë projekt që do të bëjë të mundur që shumë nga ato gjëra që janë shqetësim për drejtuesit e policisë, për ne dhe për qytetarët të bëhen të pamundura”, tha Rama.
Sipas tij, “bëhet e pamundur që një makinë policie të përdoret për punë personale”.
“Do të jetë e pamundur që një makinë policie të shkojë të parkohet te shtëpia apo para restorantit dhe punonjësit me uniformë të ulen të hanë. Dhe këtu po flas për gjërat më të thjeshta. E kuptoj shumë mirë që ata që bënë çmos ta shtyjnë dhe sabotojnë këtë projekt i kuptojnë këto shumë më mirë se sa unë, sepse dinë shumë më mirë se sa unë se sa hile dhe poshtërsi mund të bëhen duke njollosur Policinë e Shtetit”, tha Rama.
Ky projekt, sipas tij, “ndihmon të gjithë drejtuesit e ndershëm dhe punonjësit e ndershëm të Policisë së Shtetit duke ua larguar të gjitha hijet tunduese të së keqes”.
“Kush do të dojë t’i shmanget syrit të Policisë së Shtetit për të bërë keq do të duhet të mbulohet me ferexhe, përndryshe nuk ikën dot asgjëkundi. Nuk mund të ketë më makina që ikin në drejtime të paditura”, shtoi Rama. /j.p/
Policia ka proceduar penalisht 15 administratorë lavazhesh, për shkak të shkarkimit të ujërave të toksikuar me solucione për pastrim mjetesh në rrugë dhe hapësira publike, duke ndotur mjedisin dhe duke rrezikuar shëndetin e qytetarëve. Sipas policisë ata akuzohen për ndotje të ajrit, ujërave dhe tokës. Policia ka bllokuar aktivitetet e 15 lavazheve deri në marrjen […]
PROVIDENCE, 14 dhjetor /ATSH/ – Një kërkim policor është duke u zhvilluar, pasi dy studentë u vranë dhe nëntë persona të tjerë u plagosën, pas të shtënave në universitetin Brown në Providence, Rhode Island, sipas BBC.
Personi i armatosur hapi zjarr në një klasë rreth orës 16:00 sipas orës lokale (21:00 GMT), të shtunën, në një ndërtesë ku po zhvilloheshin provimet.
Universiteti, një nga më të vjetrit dhe më prestigjiozët në SHBA, u vu në izolim ndërsa policia po kërkon personin e armatosur, i cili mbetet i lirë.
Studentëve në disa pjesë të kampusit po u thuhet vazhdimisht të strehohen në vend derisa policia t’i shoqërojë ata jashtë zonës.
Zyrtarët nga spitali i Rhode Island thanë se shumica e të plagosurve janë në një gjendje “kritike, por të qëndrueshme”.
Identitetet e të vrarëve ose të plagosurve nuk janë publikuar ende nga zyrtarët.
“Kjo është një ditë që shpresonim të mos vinte kurrë në komunitetin tonë. Është thellësisht shkatërruese për të gjithë ne”, tha presidentja e universitetit Brown, Christina Paxson, në një deklaratë.
Policia ka publikuar informacione të kufizuara rreth të dyshuarit mashkull, duke përfshirë identitetin ose motivin.
Nuk dihet nëse ai ka lidhje me universitetin.
Pamjet e kamerave të sigurisë treguan të dyshuarin duke dalë nga ndërtesa pas sulmit, por fytyra e tij nuk mund të shihet.
Zëvendësshefi i policisë së Providence, Tim O’Hara, tha se i dyshuari ishte veshur i gjithi me të zeza dhe mund të ketë mbajtur maskë.
Nuk dihet se çfarë lloj arme zjarri ka përdorur dhe ajo nuk është gjetur ende.
“Po përdorim çdo burim të mundshëm për të gjetur këtë të dyshuar”, shtoi ai, me burime shtesë të armatosura policore të thirrura për të kontrolluar zonën.
Zyrtarët boshatisën ndërtesën të shtunën pasdite, por nuk gjetën as të dyshuarin dhe as ndonjë armë./ a.jor.
Protesta që po mbahet këtë pasdite para Kryeministrisë, e organizuar nga Adriatik Lapaj, ka nisur me përplasje me Policinë e Shtetit. Protestuesit janë përleshur me efektivët të cilët, siç raportohet, nuk lejojnë vendosjen e një gjeneratori aty. Policët janë përplasur me njerëzit e pranishëm në protestë dhe me vetë Lapajn, siç shihet nga video e […]
Kërcënimet ndaj gazetarëve po shndërrohen në praktikë shqetësuese në Shqipëri, veçanërisht kur ndodhin pas raportimeve që prekin institucionet publike dhe mungesën e llogaridhënies.
Rasti i fundit ndaj gazetarit Osman Stafa, pas raportimeve nga Onkologjiku, rikthen në qendër të vëmendjes cenueshmërinë e gazetarëve në terren dhe mangësitë në garantimin e sigurisë së tyre.
Rasti i gazetarit Osman Stafa
Një kërcënim me jetë iu dërgua gazetarit Osman Stafa në “Instagram”, pas raportimeve të tij për kushtet në Spitalin Onkologjik. Mesazhi i kërkonte të mos shfaqej më në spital, me paralajmërimin se nëse do të bënte të kundërtën do të kishte pasoja.
Stafa e cilësoi kërcënimin përpjekje për ta trembur dhe tërhequr nga raportimet, të cilat kanë qenë të vazhdueshme duke ekspozuar vështirësitë që përballin pacientët e sëmurë në trajtimin e kancerit. Ai tha për Citizens.al se do ta vijojë punën në spital pa asnjë ndryshim.
“Nëse unë do të përballem me ata që janë pas kësaj gjësë [mesazhit], ose do të më rrihnin, ose do të më vrisnin,” tregoi Stafa për përmbajtjen e mesazhit duke shtuar se për të ka pasur “zero ndikim”.
Sipas tij, profili që i dërgoi mesazhin është hapur vetëm dy muajt e fundit. Rasti është denoncuar në polici, e cila ka nisur procedurat për identifikimin e autorëve.
“Kjo është sfida që po u bëj këtyre personave, që çfarëdo që të bëni, mua nuk më intimidoni me kërcënime të tilla,” theksoi Stafa.
Gazetari u shpreh se procedurat për identifikimin e personave që kërcënojnë ngjashëm në rrjetet sociale zgjasin 3-4 muaj, por që sidoqoftë autorët mundet të identifikohen.
“Në momentin që bëj kallëzim për kërcënim jete për shkak të detyrës, policia ia referon prokurorisë, prokuroria e çon në gjykatë dhe me vendim gjykate i shkohet kompanisë Meta, e cila sjell më pas të dhënat në çfarë e-maili është adresa dhe me çfarë numër telefoni”, përfundoi Stafa.
Organizatat e medias solidaritet dhe apel për hetim të menjëhershëm
Rrjeti i Gazetarëve të Sigurt (SafeJournalists) përshëndeti denoncimin e menjëhershëm dhe vlerësoi raportimet e Stafës për Onkologjikun, që sipas tyre kanë rritur ndërgjegjësimin publik dhe kërkesën për llogaridhënie.
Ajo i bëri thirrje policisë dhe prokurorisë që ta trajtojnë rastin me prioritet, të identifikojnë autorin dhe të garantojnë që gazetarët të raportojnë lirisht pa frikë në punën e tyre.
“[…] gazetarët të kenë mundësi të raportojnë lirisht për çështje me interes publik, përfshirë funksionimin e institucioneve shëndetësore, pa pasur frikë nga hakmarrja”, u tha në deklaratë.
Unioni i Gazetarëve Shqiptarë kërkoi hetim të posaçëm, duke theksuar se kërcënimi lidhet me një cikël të gjatë investigimesh në institucionin kryesor spitalor të vendit.
Asociacioni i Gazetarëve të Shqipërisë e quajti rastin sulm të drejtpërdrejtë ndaj lirisë së shprehjes dhe theksoi se intimidimet anonime synojnë heshtjen e zbulimit të abuzimeve që dëmtojnë pacientët më vulnerabël.
Organizatat kërkuan garantimin e sigurisë për çdo gazetar që ushtron detyrën në interes publik.
TIRANË, 12 dhjetor/ATSH/ Këshilli i Ministrave miratoi kriteret dhe procedurat e reja të trajtimit me ushqim gjatë qëndrimit në punë për punonjësit e Policisë së Shtetit, duke përcaktuar kategoritë përfituese dhe normat ditore të ushqimit.
Sipas vendimit, punonjësit e policisë përfitojnë një vakt dreke kur shërbimi zgjat 8 orë dhe tri vakte kur janë të angazhuar në gatishmëri, situata emergjente, zgjedhje apo shërbime që kalojnë orarin normal të punës.
Me tre vakte trajtohen gjithashtu punonjësit e Qendrës së Edukimit Fizik dhe Sporteve Elitare, studentët dhe kursantët gjatë trajnimeve shumëditore, ndërsa për shtetasit e huaj që hyjnë ilegalisht në vend, shtetasit shqiptarë të rikthyer dhe personat e ndaluar apo të arrestuar trajtimi ofrohet pa pagesë gjatë procedurave verifikuese.
Ushqimi do të sigurohet në mensa ose përmes shërbimit të gatimit dhe shpërndarjes, ndërsa në rastet kur kjo nuk është e mundur, punonjësit kompensohen financiarisht me 500 lekë për një vakt dreke ose 900 lekë për tri vakte, vlera që do të indeksohen çdo vit sipas inflacionit të INSTAT-it.
Efektet financiare do të mbulohen nga buxheti i Ministrisë së Brendshme, ndërsa vendimi i vitit 2017 për trajtimin me ushqim shfuqizohet.
Vendimi hyn në fuqi pas botimit në Fletoren Zyrtare dhe efektet financiare zbatohen nga 1 janari 2026. /j.p/
TIRANË, 10 dhjetor/ATSH/ Policia e Tiranës njoftoi sot se ka kallëzuar në prokurori për zaptim të hapësirës publike, Adriatik Lapajn, kreun e Partisë Shqipëria Bëhet.
Sipas njoftimit zyrtar, specialistët për Hetimin e Krimeve të Komisariatit të Policisë Nr. 1 referuan materialet në Prokurori për shtetasin A. L., pasi dyshohet se ka bërë grumbullime dhe ka zaptuar hapësirën publike përpara godinës së Kryeministrisë, duke penguar qarkullimin e lirë të lëvizjes.
Materialet procedurale iu referuan Prokurorisë së Tiranës, për veprime të mëtejshme.
Kreu i Lëvizjes “Shqipëria Bëhet” Adriatik Lapaj qëndroi 12 orë para ambienteve të Kryeministrisë në formë proteste.
TIRANË, 10 dhjetor/ATSH/ Drejtoria Vendore e Policisë Durrës, në bashkëpunim me Policinë Kufitare të Portit Durrës dhe autoritetet doganore finalizuan operacionin policor të koduar “Full scan”, duke sekuestruar drogë, armë zjarri, bizhuteri dhe vlera monetare.
Në kuadër të operacionit, u ushtrua kontroll i imtësishëm në hyrje, në vijën e dytë, në Portin e Durrësit, në autobusin që drejtohej nga shtetasi D. F.
Gjatë kontrollit fizik të shtetasit D. F., u konstatua një sasi lënde narkotike e dyshuar kokainë, me peshë 92 gramë, dhe disa bizhuteri të dyshuara flori.
Gjatë kontrollit në brendësi të autobusit u gjetën një sasi vlere monetare, në total 29 000 euro, një armë zjarri, tip pistoletë, me pesë krehra, të cilat u sekuestruan në cilësinë e provës materiale.
Në vijim të veprimeve, nga specialistët e Seksionit për Hetimin e Narkotikëve në DVP Durrës u bë arrestimi në flagrancë i shtetasit D. F., 42 vjeç, banues në Vlorë.
Në bashkëpunim me Prokurorinë vijon puna për dokumentimin e plotë ligjor të këtij rasti, identifikimin dhe kapjen e personave të tjerë të implikuar në këtë veprimtari kriminale.
Vijojnë lëvizjet në drejtorinë e policisë së juglindjes. Shefi i komisariatit të Kolonjës, komisar Alket Pashaj largohet nga detyra ndërsa në vend të tij, vendoset shefi i seksionit të trafiqeve komisar Robert Haskaj. Lëvizja është miratuar ditën e sotme nga drejtori i përgjithshëm i policisë së shtetit. Alket Pashaj pritet të vendoset në një tjetër pozicion në polici që do të zbardhet në vijim.
Policia e Shtetit ka zyrtarizuar ndryshimet në strukturën drejtuese të Komisariatit të Kolonjës, ku Robert Haskaj është emëruar shefi i ri i komisariatit. Haskaj, deri më sot, ka ushtruar detyrën e shefit të Seksionit të Trafiqeve në Drejtorinë Vendore të Policisë Korçë, ndërsa më herët ka mbajtur edhe postin e drejtorit rajonal të Agjencisë së […]
TIRANË, 8 dhjetor/ATSH/ Policia Kufitare e Kakavijës njoftoi sërish sot mbyllje të përkohshme të qarkullimit nga pala greke, për shkak të protestës së fermerëve në Greqi.
Nëpërmjet qendrës së përbashkët të shkëmbimit të informacionit Kakavijë Policia Kufitare Greke ka njoftuar se ditën e sotme, nga ora 18:00 deri në orën 21:00 (me orën greke), aksi rrugor Kakavijë–Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët.
Sipas njoftimit për shtyp, do të lejohen të qarkullojnë vetëm automjetet që do të kenë emergjenca shëndetësore.
Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës.
TIRANË, 6 dhjetor/ATSH/ Drejtoria Vendore e Policisë së Korçës finalizoi operacionin policor të koduar “Qarku”, duke zbuluar 5 lokale në qytetin e Korçës dhe Pogradecit, të vëna në dispozicion të organizimit të kundërligjshëm të lojërave të fatit.
Në kuadër të këtij operacioni u vunë në pranga 2 administratorë lokalesh në qytetin e Korçës dhe Pogradecit, si dhe u proceduan penalisht 6 shtetas, administratorë dhe punonjës në lokalet e evidentuara gjatë operacionit.
Si rezultat i kontrollit të kryer, në bazë të informacioneve të siguruara në rrugë operative, shërbimet e Komisariatit të Policisë kanë zbuluar disa lokale në qytetin e Korçës dhe Pogradecit, ku organizoheshin lojëra fati.
Në vijim të veprimeve procedurale për këtë rast, u arrestuan në flagrancë shtetasi J. L., 29 vjeç, banues në Korçë, administratori i lokalit si dhe shtetasi E. M., 26 vjeç, banues në Pogradec, administratori i lokalit. Dy të arrestuarit akuzohen për veprat penale “Organizimi ose ushtrimi i veprimtarive të lojërave të fatit në kundërshtim me ligjin”, “Vënia në dispozicion e lokaleve për lojëra fati” dhe “Fshehja e të ardhurave”.
Gjatë kontrollit në lokalet që këta shtetas administronin, janë konstatuar monitorë dhe aparate celularë me faqe që shërbenin për vendosjen e basteve sportive, si dhe janë konstatuar punonjës të paregjistruar në organet kompetente.
Gjithashtu, u referuan materialet në Prokurori ku nisi procedimi penal për shtetasit M. V., 48 vjeç, banues në Korçë, dhe S. B., 34 vjeç, banues në Pogradec, për veprën penale “Punësim i paligjshëm”, pasi gjatë kontrollit në lokalet që këta shtetas administronin u konstatuan 2 kamarierë të paregjistruar në organet kompetente.
Policia nisi procedimin penal edhe për shtetasit V. T., 19 vjeç, dhe Ç. P., 42 vjeç, banues në Korçë, për veprën penale “Organizimi ose ushtrimi i veprimtarive të lojërave të fatit në kundërshtim me ligjin”.
Po ashtu u procedua shtetasit E. Ç., 41 vjeç, banues në Pogradec, pasi u konstatua që biznesi që administronte ishte i paregjistruar në organet kompetente, si dhe D. K., 43 vjeç, banues në Korçë, për veprën penale “Deklarim i rremë para oficerëve të Policisë Gjyqësore”.
Gjatë kontrolleve u kap edhe shtetasi N. D., 35 vjeç, banues në Korçë, i shpallur në kërkim 2 ditë më parë, pasi kishte kanosur nëpërmjet telefonit një 18-vjeçar, për një shumë lekësh që i kishte borxh, për vendosjen e basteve sportive që i kishte bërë 35-vjeçari.
PRISHTINË, 2 dhjetor/ATSH/ Drejtoria e Policisë së Kosovës ka shpërndarë sot 41 vetura të reja për njësitë patrulluese, në kuadër të përpjekjeve të vazhdueshme për rritjen e kapaciteteve operative në rritjen e sigurisë për qytetarët.
Drejtori i Përgjithshëm i Policisë, kolonel Gazmend Hoxha, ka dorëzuar automjetet e reja, të cilat përfshijnë 35 limuzina, mes tyre edhe modele hibride, si dhe 6 xhipa të dedikuar për mbulimin e zonave të vështira patrulluese në të gjitha drejtoritë rajonale të vendit.
Sipas një postimi në Facebook, ky investim konsiderohet një hap i rëndësishëm në përmbushjen e objektivave të Planit Zhvillimor Strategjik, duke fuqizuar qasjen proaktive të policisë dhe rritur efikasitetin në reagimin ndaj kërkesave të qytetarëve.
Policia e Kosovës thekson se pajisja me automjete të reja do të ndikojë drejtpërdrejt në përmirësimin e bashkëpunimit me komunitetin, rritjen e transparencës institucionale dhe forcimin e besimit të qytetarëve në organet e rendit.
Një 55-vjeçar është ekstraduar nga Kroacia në Shqipëri pasi ishte pjesëtar i një organizate kriminale. Emin Shabani, 55-vjeç, lindur në Maqedoninë e Veriut, është ekstraduar pasi ishte pjesë e një grupi kriminal që i ka shkaktuar shtetit, dëm të konsiderueshëm ekonomik, nëpërmjet kontrabandës së mallrave për të cilat paguhet akcizë. Shabani ishte shpallur në kërkim […]
TIRANË, 30 nëntor/ATSH/ Drejtoria Vendore e Policisë Elbasan bëri të ditur sot se, pas verifikimeve të kryera mbi katër video të publikuara në rrjetet sociale, në të cilat shfaqeshin tre automjete dhe një motomjet duke kryer manovra të rrezikshme, u morën masa administrative ndaj drejtuesve të mjeteve të identifikuar.
Sipas Policisë, specialistët e Sektorit të Policisë Rrugore vendosën gjobë në masën 40 mijë lekë ndaj drejtuesit të automjetit që u filmua duke kryer “drift” dhe duke lëvizur me shpejtësi të papërshtatshme në një zonë të banuar e të frekuentuar nga qytetarë.
Po ashtu vendosën gjobë 57 mijë lekë ndaj drejtuesit të motomjetit që qarkullonte pa vendosur kaskën mbrojtëse dhe kryente manovra të rrezikshme, duke vënë në rrezik veten dhe përdoruesit e tjerë të rrugës.
Ndaj 2 drejtuesve mjetesh u vendosën gjoba nga 10 mijë lekë për parakalim të gabuar në akset “Përrenjas–Librazhd” dhe “Librazhd–Qafë Thanë”.
Policia e Elbasanit u bën thirrje qytetarëve të denoncojnë çdo shkelje të rregullave të qarkullimit rrugor në numrin pa pagesë 112, duke garantuar reagim të menjëhershëm dhe mbështetje ligjore. j.p/
Login
