❌

Normal view

Buxheti 2027/ Malaj: Fermerët s’do preken! Ulja në 5 milionë lekë të reja e pragut të TVSH-së vjen si rezultat i kërkesave të FMN-së

18 November 2026 at 13:57

Ministri i Financave, Petrit Malaj, është shprehur se ulja në 6% e TVSH-së për 54 produkte të shportës, është një nismë që i vjen në ndihmë gjithë shqiptarëve me të ardhura të ulëta e të mesme.
Nga Kuvendi, ku po u përgjigjej pyetjeve të deputetëve, Malaj tha se ulja e pragut të TVSH-së nga 10 milionë lekë të reja në 5 milionë lekë të reja, është e bazuar edhe në kërkesën e organizmave ndërkombëtare, konkretisht FMN-së.
Sipas Malajt, Fermerët nuk do të preken nga ndryshimi i pragut të TVSH-së. Ministri shtoi se dividenti do të hyjë në fuqi në 1 janar 2027.

Malaj theksoi gjithashtu se paketa fiskale 2027 është konsultuar me këshillin tatimor, anëtarë të të cilit janë përfaqësues të dhomave të tregtisë dhe grupeve të interesit.
“Në lidhje me pyetjet e Shehajt. Ulja e TVSH-së për 54 produkte të shportës, është një nismë që ju vjen në ndihmë të gjithë qytetarëve me të ardhura të ulëta e të mesme. Ndërkohë në lidhje me pyetjen për pragun e TVSH-së dhe uljes së saj nga 10 milionë në 5 milionë, vjen si rezultat i kërkesave të vazhdueshme nga organizmat ndërkombëtarë dhe konkretisht FMN-së. Pragu ishte ndër më të lartët në Europë. Pragu i TVSH-së nga viti 1996 e deri më sot ka ndryshuar 8 herë. Çështja e pragut të TVSH-së është një çështje e trajtuar prej vitesh.

Në lidhje me pyetjet e Tabakut, përsa i përket çështjes së konsultimit publik të kësaj pakete fiskale, është bërë me këshillin tatimor, anëtarë të të cilit janë përfaqësues të dhomave të tregtisë dhe grupeve të interesit. Lidhur me çështjen e dividentit se kur hyn në fuqi, hyn në 1 janar 2027. Çdo vendim për shpërndarje të fitimeve të pashpërndara pas datës 1 janar 2027 do të trajtohet me normën e dividentit 15%. Ndërsa çdo vendim deri në dhjetor do të trajtohet me 8%. Fermerët nuk do të preken nga ndryshimi i pragut të TVSH-së. Do të përjashtohen nga pjesa e uljes së këtij pragu. Çështja e pragut rregullohet me VKM. Përsa i përket rindërtimit, për vitin 2027 janë planifikuar 2 miliardë lekë. Më pak se vitin e kaluar, pasi kemi 7.4 miliardë lekë fonde të trashëguara nga vitet e kaluara. Rindërtimi është një proces që po ecën përpara, por është një proces që varet nga qeveria vendore dhe jo nga ajo qëndrore”, tha mes të tjerash Malaj.

Projektligji i ri i tregtisë online/ Ja çfarë ndryshon për platformat dhe konsumatorët

18 November 2026 at 13:52

Platformat e tregtimit online do të kenë deri në dy ditë pune për të zbatuar urdhrat e autoriteteve për heqjen ose çaktivizimin e ofertave për produkte të rrezikshme, sipas projektligjit të Ministrisë së Ekonomisë dhe Inovacionit për sigurinë e produkteve joushqimore. Drafti parashikon gjoba nga 500 mijë deri në 2 milionë lekë për personat juridikë dhe nga 100 mijë deri në 600 mijë lekë për personat fizikë, kur shkelin detyrimet e përcaktuara në nenin 45.

Afati nis nga marrja e urdhrit, ndërsa njoftimet për oferta të dyshuara si të rrezikshme duhet të shqyrtohen brenda tri ditëve pune. Platformat duhet të caktojnë pika kontakti dhe të krijojnë procedura të brendshme për sigurinë e produkteve. Vetë ofertat duhet të përmbajnë të dhëna për prodhuesin ose personin përgjegjës, informacion që identifikon produktin dhe paralajmërimet për sigurinë.

Rregullat për shitjen në distancë do të zbatohen kur “oferta i drejtohet konsumatorëve në territorin e Republikës së Shqipërisë”, përcakton neni 5. Ndër kriteret janë mundësia e dërgesës në Shqipëri, komunikimi në shqip, pranimi i pagesave në lekë ose përdorimi i strategjive të marketingut që synojnë tregun shqiptar. Sipas relacionit, ligji në fuqi nuk përcakton detyrime të posaçme për platformat, ndërsa autoritetet hasin vështirësi në trajtimin e ofertave online për produkte të rrezikshme.

Prodhuesit duhet të kryejnë analizën e rrezikut dhe të përgatisin dokumentacionin teknik, ndërsa importuesit duhet të verifikojnë përmbushjen e detyrimeve nga prodhuesi përpara se ta vendosin produktin në treg. Shpërndarësit duhet të sigurohen që transporti ose magazinimi të mos cenojnë sigurinë. Kur natyra e produktit e kërkon, vlerësimi do të përfshijë edhe sigurinë kibernetike dhe funksionet vetënxënëse.

Kur një produkt duhet të kthehet për arsye sigurie, konsumatorët që mund të identifikohen do të njoftohen drejtpërdrejt. Operatori përgjegjës duhet të ofrojë një zgjidhje “efektiv[e], pa pagesë dhe brenda një afati të arsyeshëm”.
Si rregull, konsumatori duhet të ketë të paktën dy mundësi mes riparimit, zëvendësimit dhe rimbursimit. Nëse riparimi ose zëvendësimi nuk kryhet brenda një afati të arsyeshëm dhe pa vështirësi të konsiderueshme për konsumatorin, ai ka të drejtë të marrë mbrapsht shumën e paguar.

Drafti parashikon gjithashtu një sistem kombëtar për shkëmbimin e shpejtë të informacionit për produktet e rrezikshme. Sistemi, që do të administrohet nga ministria nëpërmjet Zyrës së Vetme Ndërlidhëse, do të mbledhë njoftimet, rezultatet e testimeve, të dhënat për aksidentet dhe masat korrigjuese.

Projektligji do të zëvendësonte ligjin e vitit 2011 dhe synon përafrimin me rregulloren europiane për sigurinë e përgjithshme të produkteve.
Sipas relacionit, përpara anëtarësimit në Bashkimin Europian do të zbatohen rregullat kombëtare; pas anëtarësimit, rregullorja europiane do të zbatohet drejtpërdrejt dhe në fuqi do të mbeten vetëm dispozitat kombëtare të nevojshme për zbatimin e saj./Monitor

Miratohet shitja e sistemit raketor HIMARS për Shqipërinë/ Nufi: Forcon mbrojtjen e vendit dhe kontributin tonë në NATO

18 November 2026 at 13:42

Ministri i Mbrojtes Ermal Nufi ka reaguar pas lajmit se Departamenti Amerikan i Shtetit ka miratuar shitjen e sistemit raketor HIMARS për Shqipërinë.

Në një postim në rrjete sociale Nufi shprehet se me këto sisteme, Forcat e Armatosura të Shqipërisë do të fitonin aftësinë për të vepruar me saktësi në distanca të gjata, duke forcuar mbrojtjen e vendit dhe kontributin tonë në NATO.

“Shqipëria ka kërkuar të pajiset me dy sisteme të artilerisë raketore M142 HIMARS. Departamenti Amerikan i Shtetit ka miratuar shitjen e mundshme dhe ka njoftuar Kongresin amerikan.

Paketa e propozuar, me vlerë të përllogaritur prej 210 milionë dollarësh, përfshin edhe municione, trajnim për ushtarakët shqiptarë dhe mbështetje për mirëmbajtjen e sistemeve. Për financimin e saj parashikohet një kredi nga programi amerikan i financimit ushtarak – FMF.

E mirëpresim këtë hap në bashkëpunimin me Shtetet e Bashkuara. Me këto sisteme, Forcat e Armatosura të Shqipërisë do të fitonin aftësinë për të vepruar me saktësi në distanca të gjata, duke forcuar mbrojtjen e vendit dhe kontributin tonë në NATO”, shkroi ministri Nufi.

Pogradec/ Po qarkullonte me automjet me pushkë me vete, arrestohet në flagrancë 22-vjeçari, sekuestrohet arma me 15 fishekë

18 November 2026 at 13:31

 

Mbante pushkë automatike, në automjetin që drejtonte, arrestohet në flagrancë 22-vjeçari.
Vihet në hetim për moskallëzim të krimit, pasagjeri në këtë automjet.
Sekuestrohen arma e zjarrit, 15 fishekë, automjeti dhe 2 celularë.

Si rezultat i administrimit të shpejtë të informacioneve të siguruara gjatë punës operative, se një shtetas lëvizte i armatosur, në mesnatë, në lagjen nr. 3, Cërrik, specialistët e për Hetimin e Krimeve të Komisariatit të Policisë Cërrik, finalizuan operacionin e koduar “Mesnata”, në kuadër të të cilit u arrestua shtetasi F. M., 22 vjeç, dhe u procedua në gjendje të lirë shtetasi R. B., 22 vjeç, të dy banues në Pogradec.

.

Korreshi ngre shqetësimin: Si ka mundësi që në Lushnjë çohen 120 milionë për rritjen e pagave të patronazhistëve, 9 milionë për rrugë?

18 November 2026 at 13:22

Deputeti i Partisë Demokratike, Saimir Korreshi, ka ngritur shqetësimin për investimet në Bashkinë e Lushnjës dhe mungesën e fondeve për infrastrukturën dhe shërbimet shëndetësore.

Korreshi ironizoi mungesën e kryeministrit Edi Rama dhe ministrave në sallë, duke e krahasuar seancën me një mbledhje të Asamblesë së Partisë Socialiste, ku, sipas tij, nuk mungonte askush.

Ai u ndal veçanërisht te fondet e parashikuara për Lushnjën, duke pretenduar se për rritjen e pagave në bashki janë planifikuar 10 herë më shumë para sesa për rrugët. Deputeti akuzoi mazhorancën se po rrit pagat e patronazhistëve, ndërsa banorët përballen me probleme të vazhdueshme të infrastrukturës dhe energjisë elektrike. Korreshi ngriti gjithashtu shqetësimin për kushtet në spitalin e Lushnjës, duke thënë se nevojiten investime jo vetëm për godinën, por edhe për pajisjet dhe materialet e tjera të domosdoshme.
“Kryetari ka punët e veta, se puna e buxhetit është ndonjë punë e madhe. Duhet ta trajtojmë buxhetin si Asamblenë tuaj, se të tjerë nuk mungon njeri.

Dua të pyes për trenin ty-ty-ty, rezervuarët ku u hapën? Po nuk është këtu Karakaçi, kemi vetëm këtë të Financave. Si ka mundësi që në Lushnjë çohen 10-fish më shumë para për rroga sesa për rrugë? 120 milionë për rritjen e pagave të patronazhistëve, 9 milionë për rrugë. O njerëz, Lushnja prapë me opinga! Bashkia të mos ketë 400 milionë lekë detyrime, kur dashka këto rroga. Ne nuk kemi infrastrukturë, po na i zë korrenti njerëzit çdo ditë, se këta i mbajnë flokët me xhel. Nuk ka nevojë vetëm për godinë spitali i Lushnjës, ka nevojë edhe për mrokllat e tjera. Çfarë keni me Lushnjën dhe Divjakën ju?”, tha ai.

 

Berisha: Keni vjedhur rreth 50 miliardë euro, me modelin “KAYO” shkatërruar prokurimet!

18 November 2026 at 13:16

Kryetari i Partisë Demokratike, Sali Berisha ka sulmuar ashpër qeverinë gjatë fjalës së tij në Kuvend për projektbuxhetin e vitit 2027, duke e akuzuar për korrupsion, abuzim me fondet publike dhe varfërimin e qytetarëve.

Berisha deklaroi se gjatë 14 viteve të administrimit të buxhetit, qeveria ka menaxhuar rreth 67 miliardë euro, ndërsa pretendoi se rreth 50 miliardë euro janë vjedhur.

Ai akuzoi gjithashtu kryeministrin Edi Rama për shkatërrimin e procesit të prokurimeve përmes modelit KAYO dhe ngriti akuza për përfitime nga koncesionet dhe aferat publike.

Kreu i PD-së u ndal edhe te gjendja ekonomike e qytetarëve, duke pretenduar se pensionet nuk mjaftojnë për të përballuar shpenzimet bazë, ndërsa rritja e çmimeve dhe kostos së jetesës po rëndon familjet shqiptare.

Në fjalën e tij, Berisha kritikoi edhe çmimet e banesave dhe qiratë në Tiranë.
Sipas shifrave që ai referoi nga INSTAT, çmimi mesatar i një metri katror në kryeqytet është rritur nga 700 euro në vitin 2013 në 2,140 euro aktualisht, ndërsa qiraja ka arritur në 700 euro.
Ai akuzoi qeverinë për favorizimin e koncesioneve, duke përmendur veçanërisht sektorin e shëndetësisë, si dhe ngriti pretendime për përfshirjen e zyrtarëve të lartë në afera korruptive.

Pjesë nga fjala e Berishës:

Pra ky është buxheti!
Po çfarë buxheti mor?
Buxheti që vidhet 90% sipas Kontrollit të Shtetit.
Buxheti që në 14 vite të administruar, djersë, mund, kafshatë të shqiptarëve, 67 miliardë euro.
Çfarë keni bërë? Keni vjedhur rreth 50 miliardë. Vidh e vidh!
A i keni ju ministrat tuaja me 300 apartamente, me 12 apartamente, me hipodrome, me të gjitha?
A e kuptoni ju se s’ka pasur kurrë një grup të urryer nga shqiptarët sa ç’urreheni ju? Jo mor jo! Nuk ka pasur.
A mendoni ju për ata që u kanë votuar? Që s’marrin dot ilaçet. Sepse pensionet e tyre nuk mjaftojnë as për qiranë e shtëpisë, për ujë e drita nuk mjaftojnë.
Edhe ata që kanë një banesë të tyre, nuk mjaftojnë për ujë dhe drita që paguajnë.
Për të ardhur nga Vlora në Tiranë sot, duhet paguar gjysmë pensioni. Prandaj ikën ky.
A e kuptoni ju që shkatërrohet tërësisht procesi i prokurimeve? Krijuat sistemi KAYO. Në sistemin KAYO ku Edi Rama vjedh dy të tretat, e solli edhe atë ministre shëndetësie, e solli atë dhe filloi ajo të na përgjërohej, dhe tani çfarë ka bërë? Ka vendosur atë që s’vendosi tjetra, paraardhësja e saj.
Atë që refuzoi dhe pati karakter të japë dha dorëheqjen, ajo Sala, kjo shpejt mori dhe kushërirën e nuses së Edi Ramës për të ndarë paratë me familjen dhe të sëmurët pastaj… Po, po, këto janë të vërtetat!
Dhe pastaj do të thotë: mos u merr me gratë! Me gratë që vjedhin, do merret ligji! Ai që vjedh, ai ka punë me ligjin, shkel çdo standard.
Respektin më të madh se unë nuk e ka kush për gratë. Jo.
Po figurat e tyre nuk mund të përfaqësohen nga Lubia!
Nga ajo tjetra, ku është ajo tjetra? Që edhe e dehur, vjedh. Po, po, po. Ajo e kulturës, gjoja e kulturës. Të vetmin element kulture ka vjedhjen ajo. Na del me të gjithë ato apartamente ajo. Avokatja e Tërmet Peçit t’i themi.
Pra, ku jeni? Atëherë, çfarë buxheti është ky më thoni mua?
Ky buxhet, shqiptarët i varfëron!
Ky buxhet, shqiptarët i mashtron!
Ky buxhet, është i marrë peng, i parapaguar, që në votim këtu. Sa miliarda jepni ju për koncesionet që shkojnë të gjitha në xhepin e Edi Ramës?
Po, ai i kontrollon! Jo, ti nuk i kontrollon koncesionet. Jo, jo, jo, nuk i kontrollon. As të afron ty te koncesionet, konçesionet i ka vetë, i zgjedh ata, si puna e Beqjes, si puna e atij tjetrit, Veliajt e të tjerë. Po koncesionet s’ia jep kujt ai. Aty vetëm për shëndetësinëë 300 milionë. Dhe prit sa të dalin tani me këto që do firmosë kjo tjetra, se kjo do vendosë sistemin KAYO më thonë mua tani. Po, po.
Çfarë mbetet atëherë nga ky buxhet?
Mbetet mjerimi për shqiptarët, mbetet rritja e çmimeve, rritja e madhe e çmimeve.
Fliste këtu për ndërtimin. E patë apo jo? Përfaqësuesi më i shëmtuar i klaneve më të zeza të drogës.
Po çfarë ndërtimi? Merrni shifrat, merrni statistikat! Janë ndërtuar në Shqipëri në 8 vite, 340 mijë familje shqiptare janë bërë me shtëpi të dytë. Jo me kulla! Jo, jo, shtëpi në fshatra, i kishin kasolle, ndërtuan shtëpi.
Asnjë kullë! Po sa ishte çmimi? Merrni statistikat. Sa ishte çmimi? Çmimi mesatar, thotë INSTAT-im ishte 700 euro metri katror në 2013-ën. A e dini ju këtë apo jo? 700 euro metri katror në Tiranë. Jo në rrethe të tjera.
Sot çmimi në Tiranë është 2140 euro. Çmimi mesatar. Po kush e prek dot atë?
Sa është qiraja sot në Tiranë? Na thoni pak? Po s’pyesni ju se s’keni me qira, ju grabisni, ju plaçkitni, i keni dhurata. Qiraja në Tiranë, thotë INSTAT-i, është 700 euro, është një rrogë mesatare.
Keni ju zgjedhës? Ju jo me vezë, po ju me çdo gjë duhet t’u kapin ata, t’u përzënë. A shkoni ju te zgjedhësit tuaj? Sa është qiraja, ai s’merr dot shtëpi. 700 euro! Kush strehohet dot? 700 euro dhe marrin strajcën e nisen rrugëve të botës.
Por, për xhinsin tuaj ju jo i blini, po ju paguani qiratë kudo. Ju blini me kate!
Ju blini me prestanome!
U ka dalë nami, iu ka dalë era në mbarë Europën.

 

 

 

 

Berisha: Denoncimi i Majkos? Nuk është naiv Gjino sa të ngatërrojë skenat erotike!

18 November 2026 at 13:11

Kreu i PD Sali Berisha ka mbajtur sërish fjalën e tij në Kuvend, ku nuk ka kursyer kritikat dhe akuzat ndaj kryeministrit Edi Rama. Berisha bën përgjegjësin kryesor kryeministrin Rama për korrupsionin në vend, trafikun e drogës dhe keqqeverisjes. Drejtuar mazhorancës, Berisha theksoi se duhet të kenë kurajo t’i dalin kundër kryeministrit Rama ose siç tha ai do t’i ‘marrë me vete’.

“Nuk ka pasur kurrë një grup të urryer para shqiptarëve siç jeni ju. Me gratë që vjedhin do të merret ligji. Ai që vjedh ka punë me ligjin shkel çdo standard. Respektin më të madh se ka kush më shumë se unë për gratë. Por figura e tyre nuk të përfaqësohet nga Lubia, nga ajo tjetra që vjedh edhe e dehur vjedh…po po po e kulturës ajo gjoja e Kulturës ajo. Në vend të kulturës ka vjedhjen. Na del me apartamente me gjëra. Avokatja e tërmetit. Po avokatja e Tërmet Pecit t’i themi. Ku jeni? Çfarë buxheti është ky më thoni? Ky buxhet shqiptarët i varfëron  i mashtron.

 

Ky buxhet është i marrë peng. Raporti i Komisionit Evropian, lexojeni aty është Lubia është Rama, aty ku është Rama është Lubia. Ju nuk keni kurajë t’i thoni koha jote ka marrë fund… Ju patriotizmin jua kanë ngrënë interesat tuaja… Jeni transformuar si personazhe të Franc Kafkës. Nuk harrohet, llozha juaj në Lalz, aty do të mbeteni të stamposur ia keni tejkaluar çdolloj filmi tjetër, dhe netflix. Po denoncimi Majko, nga i ikni ju atij… Ta garantoj unë… Kaq naiv Gjino nuk është që ngatërroi skenat erotike me skena të tjera… Do të dalin, ndaj më mirë largohuni. Çfarë ishin 1 mln euro Vlora Hyseni, ai vetë e kishte emëruar, këshilltare e kishte pasur. Por nuk mjaftonin… shumë shpejt do të shihni skenën. Ju jeni të kapur prej tij ndaj qëndroni gojëkyçur”, tha Berisha.

 

Shehaj shperthen kundër Ramës: Nuk mund të flasësh për familjet pasi keni vjedhur shqiptarët, jep dorëheqjen

18 November 2026 at 13:07

Kryetari i Partisë Mundësia, Agron Shehaj ka reaguar ndaj kryeministrit Edi Rama në Kuvend teksa ai mbante fjalën për buxhetin e shtetit për vitin 2027.

Shehaj thekson se Rama nuk është në kushtet për të folur për buxhetin e familjeve, në një kohë që SPAK ka zbuluar se numri dy i qeverisë, Belinda Balluku ka abuzuar me të paktën 1 miliard euro të qytetarëve.

Shehaj kërkon që kryeministri të japë dorëheqjen dhe të japë llogari për paratë që qeveria e tij u ka vjedhur shqiptarëve.

“Çfarë hipokrizie! Rama flet për koston e jetesës, ndërkohë që Balluku akuzohet për 1 miliard euro abuzime me paratë e shqiptarëve, ndërsa Veliaj e kërcënon nga burgu. Përpara se t’u flasë shqiptarëve për hallet e tyre, Rama duhet të japë llogari për vjedhjen që i ka bërë atyre! Duhet të japë dorëheqjen!”, shprehet Shehaj.

Buxheti 2027/ Paketa fiskale, nga ulja e TVSH për ushqimet te zhvendosja e taksës së qarkullimit, shpenzim prej 976 mld lekë

18 November 2026 at 12:53

Për të paguar pagat, sigurimet, shlyer të plota pensionet, për të kryer investime në infrastrukturë, shëndetësi, mbrojtje apo arsim, në 2027-ën pritet të shpenzohen 976 miliardë lekë.

Brenda këtij fondi, janë 202 miliardë lekë që do të shkojnë për investimet publike, me fokus avancimin e një sërë projektesh rrugore, hekurudhore por edhe portuale.

Ministria e Shëndetësisë dhe Mbrojtjes Sociale mbetet institucioni me buxhetin më të madh, me 89.7 miliardë lekë, ndjekur nga Ministria e Mbrojtjes me 76.6 miliardë lekë me fokus tek armatimet dhe investimet në kuadër të NATO-s, e më tej Ministria e Infrastrukturës dhe Energjisë, me 75.45 miliardë lekë, apo ajo e arsimit me afro 68 miliardë lekë.

Gjithashtu janë ndarë 20 miliardë lekë për të dyfishuar bonusin e pensionistëve, si dhe afrohet indeksimi i pensioneve në prill të 2027-ës, me vlerë apo 4 miliardë lekë. Edhe pse shifra e indeksimit edhe nuk është përllogaritur, pritet të jetë rreth 2.9%.

Skema e re e bonusit të bebeve gjen gjithashtu mbështetje në buxhet. Prej korrikut të 2027-ës, nis pagesa mujore për fëmijët deri në moshën 5 vjeçare. Do të jepen 5 mijë lekë në muaj për fëmijën e parë, 7 mijë lekë për të dytin dhe 10 mijë lekë për të tretin e në vijim.

Sa i takon borxhit publik projektohet të zbresë në përqindje në 52.4% të PBB-së, por në vlerë do të rritet për shkak se vendi do të dalë në tregjet e huaja për të marrë një eurobond në vlerën 650 milionë euro.

Në anën tjetër prej taksave e tatimeve, një pjesë e të cilave rriten apo ulen, do të mblidhen 907 miliardë lekë. Ky skenar i ligjit më të rëndësishëm ekonomik është ndërtuar mbi projeksionin e një rritje ekonomike prej 4%, e mbështetur kryesisht nga turizmi.

Projektbuxheti shoqërohet edhe me 5 projektligje të “Paketës Fiskale”, ku për herë të parë pas 3 dekadash në fuqi, qeveria vendos të ulë tatimin mbi vlerën e shtuar për 54 produkte ushqimore nga 20% në 6%. Me këtë lëvizje duhet të ulen deri 12% edhe çmimet e shportës bazë ushqimore.

Por në anën tjetër prej vitit të ardhshëm TVSH-ja standarde do të jetë 21% nga 20% aktualisht, pra për çdo produkt tjetër jashtë shportës barra do të shtohet. Gjithashtu rritet nga 6% në 10% edhe TVSH-ja për strukturat akomoduese me përjashtim të agroturizmit.

Një tjetër ndryshim është ulja e pragut të TVSH-së për bizneset. Cdo subjekt me qarkullim mbi 5 milionë lekë do të futet në regjimin e TVSH-së, nga mbi 10 milionë lekë që është prej vitit 2021.

Me ndryshimet e ligjit për tatimin mbi të ardhurat rritet në 15% tatimi mbi dividendin nga 8% aktualisht. Ndërkohë rishikohet edhe tatimi i pagave, për herë të parë do të ketë një normë 30% për rrogat më të larta se 700 mijë lekë të reja në muaj.

Ndërkohë pagat nga mbi 60 mijë lekë deri në 300 mijë lekë do të tatohen me 13%, deri më tani pagat nga 60-200 mijë lekë ishin pjesë e kësaj fashe tatimore.

Ndërsa tatimin 23% tashmë do ta paguajnë ata që kanë pagat nga mbi 300 mijë lekë deri në 700 mijë lekë. Pandryshuar, e përjashtuar nga tatimi mbetet paga minimale.

Ndryshimi tjetër është tek taksat kombëtare. Taksa e qarkullimit 32.4 lekë me TVSH, nuk do të paguhet më në çdo litër naftë apo benzinë, por do të shlyhet një herë në vit tek taksat vjetore të mjetit që do të dyfishohen.

Njëkohësisht nga 1 janari 2027, një paketë cigare do të kushtojë 8.5 lekë më shumë. Rritja e akcizës për duhanin do të ketë edhe kontribut pozitiv në rritjen e të ardhurave për vitin që vjen prej afro 50 milionë euro shtesë.

Projektligjit tjetër ai për procedurat tatimore parashikon mbledhja me forcë e parapagimeve që duhet të bëjë biznesi, siç mund të jenë këstet e tatimit mbi fitimin. Ky ashpërsim vjen pas çlirimit të mijëra bizneseve nga detyrimet e papaguara ndër vite, në kuadër të Paqes Fiskale.

Berisha rikthehet në Kuvend pas largimit të Ramës: Padrino ia mbathi, me bisht ndër shalë, sepse e di që kjo është e fundit herë që ai paraqet buxhet në këtë sallë!

18 November 2026 at 12:31

Opozita u kthye në Kuvend sapo kryeministri Edi Rama përfundoi fjalën dhe më pas u largua nga salla. Fjalën në emër të grupit të PD, e mori Sali Berisha, pasi Gazment Bardhi është i përjashtuar. Berisha tha se Rama u largua me bishtin ndër shalë dhe se është hera e fundit që ai prezanton buxhet në buxhet në këtë sallë.

“Ia mbathi. Siç e patë vetë, padrino ia mbathi, me bisht ndër shalë, ia mbathi sepse e di që kjo është e fundit herë që ai paraqet buxhet në këtë sallë. Ia mbathi si hajduti më i madh i kombit shqiptar në histori. Ia mbathi s një kufomë e pakallur e cila është e pushtuar nga frika deri në palcë, ia mbathi se e kanë mbërthyer për fyti krimet që ka kryer. Ia mbathi, nuk rri dot. Para jush u paraqit njeriu që do mbyllë qeverisjen e tij me aktet më madhore të turpit, me krimet më të rënda ndaj shqiptarëve. Edi Rama ndërtoi në këtë vend të bekuar, narkoshtetin e parë dhe të vetëm në Europë. Ndërtoi republikën e narkoeurove dhe narkobetonit”, tha Berisha.

Programi i ri i strehimit, Rama në Kuvend: S’e pranojmë dot që një çift i ri të mos ndërtojë dot një çati mbi kokë, plani për strehimin do u vijë në ndihmë 10 mijë familjeve

18 November 2026 at 11:51

Kryeministri Edi Rama duke folur për banesat dhe rindërtimin e tyre të prekura nga tërmeti tha se bashkia e Tiranës ka dy vite pa kokë.

“Një ligj, që ne do të kemi transformim rrënjësor ndaj qasjes së strehimit. Flasim për strehimin e përballueshëm. Nuk mund ta pranojmë si normalitet, që një çift i ri, ku të dy punojnë, kontribuojnë me taksa, përpiqen ta shohin të ardhmen në Shqipëri, ta kenë gjithmonë e më vështirë të kenë një çati. Një qytet mund të bëhet më i shtrenjtë nga zhvillimi, por nuk mund të bëhet i paarritshëm për njerëzit që jetojnë aty. Prandaj duhet PS, prandaj duhemi ne në këtë mes. Në total 10 mijë familje do të përfitojnë nga kjo qasje e re për strehimin. Nëse ka një proces rindërtimi për të qenë krenar, është ai i rindërtimit në Shqipëri. Kemi problem me rindërtimin në Bashkisë së Tiranës, sepse ka dy vjet pa kokë. Një shumë e madhe nuk është vënë në lëvizje. Nga ana tjetër, ne do të përfshijmë në këtë politikë, edhe zgjerimin e stokut të banesave që ndërtohet nga fondi i strehimit. Për të rritur taksën për apartamentet bosh, duke pasur parasysh ata që janë blerës të huaj”, tha Rama

Çmimi i naftës në pompë me 32 lekë për litër, Rama: Këtë reformë ne e ndërmarrim për të ecur më shpejt makineria e ekonomisë

18 November 2026 at 11:47

Kryeministri Edi Rama në seancën plenare foli edhe për taksën e qarkullimit
“Duam ta ulim çmimin e çmimin e naftës në pompë me 32 lekë për litër. Taksën do ta vendosim te makina dhe do ta mbledhim përmes drejtorisë, duke e lidhur me karakteristikat e automjetit. Këtë reformë ne e ndërmarrim, për zhvillimin ekonomik, për të ecur më shpejt makineria e ekonomisë”, tha Rama

Buxheti 2027/ Rama: 150 mln euro në vit shtesë në xhepat e shqiptarëve, pas vendimit për uljen në 6% të TVSH-së për produktet ushqimore

18 November 2026 at 11:43

Kryeministri Edi Rama, duke prezantuar pr.buxhetin e vitit 2027 në Kuvend, tha se PS është një parti që mendon më shumë për ata që fitojnë më pak.

Duke përmendur uljen me 6% të TVSH-së për 54 produkte të shportës ushqimore, pjesë e paketës fiskale, Rama tha se ky vendim u vjen në ndihmë familjeve shqiptare, duke kursyer në ‘arkën’ e përbashkët të tyre 150 milionë euro në vit.

“Vijmë këtu për të miratuar uljen e TVSH-së në 6% për 54 produkte të shportës ushqimore. Kjo është një masë që ne na jep kënaqësinë e veçantë, që mund të na i japë vetëm politika, kur bëhet forcë e përbashkët për të sjellë rezultate për të ndryshuar jetën e njerëzve. Ky është një lehtësim që lë 150 milionë euro çdo vit në arkën e familjeve. Ne s’po e ulim TVSH-në që diferencën ta fusin në xhep tregtarët. Prandaj kjo masë do të shoqërohet me fuqizimin e pasqyrës së çmimeve dhe mekanizmave të transparencës dhe kontrollit të tregut. Ne mbetemi besnik të asaj që jemi, përsa jemi pjesë e kësaj partie. Ne jemi partia që mendon më shumë për ata që fitojnë më pak. Ne s’duam më pak njerëz të pasur në Shqipëri. Duam njerëz të suksesshëm, që krijojnë vende pune për të tjerët. Problemi ynë nuk janë të pasurit, por hendeku mes atyre që kanë shumë dhe atyre që kanë më pak. Ne jemi me sipërmarrjen. S’ka asgjë të padrejtë që ata fitojnë më shumë të mos-kontribuajnë më shumë. E drejta e do që ata që fitojnë më pak të kenë mundësi të përfitojnë më shumë nga një shoqëri, falë atyre që fitojnë më shumë”, tha mes të tjerash kryeministri Rama.

Rama: Historia do kujtojë opozitën si hapësit e gropave dhe ne si ndërtues të Shqipërisë europiane!

18 November 2026 at 11:14

Kryeministri Edi Rama ka mbajtur fjalën e tij në Kuvend, ku foli për projektbuxhetin 2027, duke e vlerësuar buxhetin e vitit 2027 si historik. Rama nuk i kurseu kritikat ndaj opozitës, duke thënë se do të futen në histori si hapësit e gropave.

“Këto nuk janë çështje dëshirash. Dëshirën për të ulur taksat në ushqime e kemi pasur qysh në krye të herës… Arsyeja përse barra e karburantit ka qenë më e lartë është se në strukturën e çmimit ne kemi ende sot, por nuk do të kemi më duke nisur nga 1 janari, taksën e qarkullimit. Dëshirën për të mbështetur fort familjet e reja e kemi pasur qysh në krye të herës. Por nuk janë dëshirat që mbushin arkat e shtetit apo që e bëjnë një qeveri më të mirë. Por është ekonomia që përcakton shpejtësinë e rrugës e bën edhe qeverinë më të mirë kur ajo ka mundësi të shpërndajë më shumë.

Pa bërë llogaritë nuk bën asnjë tjetër, vetëm ju hapni gropën që vjen pas. Dhe këta që janë këtu bashkë me ca që kanë mbetur do të mbeten në historinë e këtij vendi si hapësit e gropave të qeverisjes së parë dhe të dytë, ndërsa historia do të flasë për ne si ndërtues të Shqipërisë europiane. Ne kemi zgjedhur rrugën më të vështirë, rrugën e rritjes së të ardhurave pa rënduar me taksa ata që fitojnë më pak. Ne besojmë te zhvillimi, sipërmarrja dhe drejtësia e vendimeve tona.

 

Sot kemi ekonomi të trefishuar, ishte më pak se 10 mld euro kur morëm detyrën dhe ka kapërcyer tavanin e 30 mld euro. Sot është një vend që rritet me një ritëm dhe në raportin e progresit të BE-së është vlerësimi për ekonominë. Sot kemi papunësi që ka rënë nën 10% dhe pagë mesatare që është rritur në 967 euro. Dhe investimet e huaja kanë prekur nivele historike. Rritja e investimeve të huaja është një gjë që nuk ju pëlqen të gjithëve. Kemi një borxh publik më të ulët që kur ne morëm detyrën. Pra, Shqipëria ka fituar një shifër të re.

Por ne jemi të vetëdijshëm se një ekonomi që rritet, jo çdo familje e ndjen njësoj rritjen. Transformimi i madh sjell edhe një paradoks që ne e kemi të qartë falë mobilizimit të qytetarëve në javët e para të qershorit… Një nënë që shkon në treg për të mbushur shportën nuk e bën llogarinë me rritjen e investimeve të huaja. Shqipëria në BE në 2030 është pazgjidhshmërisht e lidhur me Shqipërinë ku shqiptarët ndihen familjarisht më të fortë këtu në Shqipëri. Falë punës dhe përpjekjeve të mëdha të bëjmë lehtësime që nuk i bënim dot deri dje… Jo se nuk donim, por se nuk mundnim”, tha Rama.

 

‘10 miliardë vjedhje’, Berisha sulmon qeverinë për buxhetin: Keni humbur legjitimitetin, me paketën fiskale do t’i përzini prapë shqiptarët

18 November 2026 at 10:49

Kreu i PD-së, Sali Berisha, tha në Kuvend se mazhoranca ka humbur legjitimitetin për të diskutuar pwr buxhetin. Ai akuzoi qeverinë se ka mbrojtur korrupsionin dhe tha se paketa fiskale do të rrisë taksat e çmimet dhe do të nxisë largimin e shqiptarëve.

“A e kuptoni ju që s’keni asnjë të drejtë morale e ligjore të merreni me buxhetin? Nuk keni asnjë të drejtë të merreni me çështje buxheti. Ju keni humbur çdo lloj legjitimiteti. Ju keni mbrojtur korrupsionin. Çfarë buxheti do të miratoni ju? 10 miliardë vjedhje, me paketën fiskale të ndëshkimit të shqiptarëve. A jetoni në Shqipëri? Eurostat deklaroi dje se për shqiptarët të ardhurat janë rritur, varfëria është shtuar. Padrino, me kartelet e drogës, ka zhytur Shqipërinë në narkoeuro. Tani do t’u rrisni edhe taksat, çmimet. Me këtë paketë do t’i përzini prapë. Të parët që duhen përzënë nga Shqipëria jeni ju, por s’do t’ju përzëmë. Do të shkoni atje ku e keni vendin”, tha Berisha.

PD kërkon heqjen e projektligjit për strehimin nga rendi i ditës, Tabaku: E futët në seancë pa respektuar rregulloren

18 November 2026 at 10:34

Deputetja e PD-së, Jorida Tabaku, kërkoi që projektligji për strehimin të hiqet nga rendi i ditës. Ajo tha se projektligji nuk kishte qenë në programin e punës dhe se ishte futur në seancë pa respektuar rregulloren e Kuvendit.“Nuk ka qenë në programin e punës, e keni përfshirë në seancë pa respektuar rregulloren.

Keni bërë tenderë, nuk keni shpërndarë banesa. Sa herë ka tërmet këtu në Shqipëri, ndodh ky fenomen. Prezantohet në buxhet në vitin e parë dhe më pas s’ka buxhet pasardhës që mbulon fondet”, tha Tabaku

Grupi i PS-së mblidhet para seancës plenare, mungon Elisa Spiropali

18 November 2026 at 10:21

Grupi parlamentar i PS-së është mbledhur para nisjes së seancës plenare të Kuvendit. Mësohet se në mbledhje nuk ka marrë pjesë Elisa Spiropali, e cila gjatë Asamblesë së PS-së u përjashtua nga çdo funksion drejtues në parti.

Mësohet se diskutimet në mbledhje janë përqendruar vetëm te buxheti. Kryesocialisti Edi Rama, edhe pse mbërriti në Kuvend, nuk iu bashkua mbledhjes së grupit

Irani sulmon me dronë bazën amerikane në Kuvajt, Bahreini dhe Arabia Saudite raportojnë interceptime

18 November 2026 at 10:08

Ushtria iraniane ka sulmuar me dronë bazën ajrore Ali al-Salem në Kuvajt, duke shënjestruar, sipas pretendimeve të saj, instalimet amerikane të dronëve dhe raketave në këtë objekt.
Lajmi u raportua nga agjencia shtetërore iraniane IRNA, e cila bëri me dije se ushtria kishte marrë përgjegjësinë për sulmin.

Më herët, ushtria kuvajtiane njoftoi se sistemet e mbrojtjes ajrore ishin aktivizuar për të zmbrapsur sulmet me dronë armiqësorë. Ndërkohë, edhe Bahreini raportoi sulme nga Irani. Ushtria e vendit deklaroi se sistemet e mbrojtjes ajrore kishin interceptuar disa sulme ajrore që synonin mbretërinë.

Situata është tensionuar gjithashtu në Arabinë Saudite, ku autoritetet njoftuan neutralizimin e një rakete të lëshuar nga rebelët Huthi në drejtim të kryeqytetit, Riad.

 

❌