Policia ka dhënë detaje lidhur me grabitjen e ndodhur pasditen e së mërkurës në një argjendari në Paskuqan, në bashkinë Kamëz.

Menjëherë pas marrjes së njoftimit, shërbimet e Policisë kanë mbërritur në vendngjarje, kanë ngritur pika kontrolli dhe kanë nisur kontrollet në zonë për identifikimin dhe kapjen e autorëve. Ndërkohë, grupi hetimor po punon për administrimin e provave, me qëllim identifikimin e autorëve, zbardhjen e plotë të rrethanave të ngjarjes dhe dokumentimin e saj.

Kamëz/Informacion paraprak

Më datë 05.08.2026, rreth orës 14:50, në Paskuqan, 2 shtetas ende të paidentifikuar, kanë hyrë në ambientet e argjendarisë në pronësi të shtetasit L. L. dhe duke kanosur punonjëset me send në dukje armë zjarri, kanë marrë një sasi bizhuterish.

Menjëherë pas marrjes së njoftimit, në vendngjarje kanë shkuar shërbimet e Policisë, të cilat kanë ngritur pika kontrolli dhe po kryejnë kontrolle për kapjen e autorëve.

Grupi hetimor po punon për fiksimin e çdo prove që do të çojë në identifikimin e autorëve dhe kapjen e tyre, si dhe dokumentimin e plotë të rastit.

Pas disa ditësh rritjeje, çmimi i naftës në tregun me pakicë në Shqipëri ka pësuar një ulje të fortë mbrëmjen e sotme. Sipas një vëzhgimi të bërë mbrëmjen e sotme, disa nga rrjetet kryesore të tregtimit të karburanteve e kanë ulur çmimin e naftës nga 214 lekë në 199 lekë për litër, duke e rikthyer për herë të parë pas disa javësh nën kufirin e 200 lekëve. Lëvizja vjen në një moment kur tregjet ndërkombëtare kanë nisur të reflektojnë një rënie të çmimit të naftës, pas rritjeve të forta të javëve të fundit, të cilat u transmetuan me shpejtësi edhe në tregun shqiptar.

Zhvillimi rikthen në vëmendje mënyrën se si funksionoi tregu gjatë periudhës mars-qershor të këtij viti, kur për shkak të luhatjeve të forta në bursat ndërkombëtare u aktivizua Bordi i Transparencës. Në atë periudhë, çmimet maksimale të karburanteve përcaktoheshin nga Bordi dhe monitoroheshin në terren për zbatimin e tyre nga operatorët.

Ndryshe nga ajo periudhë, ulja e mbrëmjes së sotme nuk vjen si rezultat i një vendimmarrjeje administrative, por është reflektuar drejtpërdrejt nga operatorët në pikat e shitjes me pakicë, në përputhje me zhvillimet e fundit në tregjet ndërkombëtare. Mbetet për t’u parë në vijim nëse do të ketë një vendimarrje të qeverisë për rikthimin e funksionimit të Bordit.

Një 40-vjeçar të shpallur në kërkim dhe i dënuar për kultivim të lëndëve narkotike është arrestuar nga policia.  Në kuadër të operacionit të koduar “Shtegu” në pranga u vu shtetasi me iniciale A.B, banues në Tiranë.

Policia bën me dije se 40-vjeçari ishte në kërkim, pasi në vitin 2021 ishte dënuar me 4 vite burg për veprën penale “Kultivimi i bimëve narkotike”. Pas arrestimit, materialet procedurale iu referuan Prokurorisë për veprime të mëtejshme.

Njoftimi: 

Krujë/Finalizohet operacioni i koduar “Shtegu”, për kapjen e një shtetasi në kërkim. Lokalizohet dhe ndalohet një 40-vjeçar i dënuar me 4 vjet burgim, për kultivim të bimëve narkotike.

Si rezultat i administrimit të shpejtë të informacioneve të siguruara gjatë punës operative, mbi vendndodhjen e një shtetasi të kërkuar për kultivim të bimëve narkotike, shërbimet e Komisariatit të Policisë Krujë finalizuan operacionin e koduar “Shtegu”.

Gjatë operacionit u lokalizua, u kap dhe u vu në pranga shtetasi A. B., 40 vjeç, banues në Tiranë.

40-vjeçari ishte në kërkim, pasi në vitin 2021, është dënuar me 4 vjet burgim, për veprën penale “Kultivimi i bimëve narkotike”. Materialet procedurale iu referuan Prokurorisë, për veprime të mëtejshme.

Ish-ministri i Mjedisit, Planifikimit Hapësinor dhe Infrastrukturës të Kosovës, Liburn Aliu është marrë në pyetje nga Prokuroria Speciale e Kosovës.

Aliu, i cili aktualisht është Drejtor i Portit të Durrësit është paraqitur bashkë me avokatin e tij.

Referuar mediave në Kosovë, Liburn Aliu po merret në pyetje në lidhje me një rast të dyshuar për keqpërdorim të detyrës zyrtare gjatë kohës sa ishte ministër në Qeverinë Kurti, pozitë të cilën e mbajti deri në gusht të vitit 2025, kur dha dorëheqje.

Nga Fatos Çoçoli

Ministria e Infrastrukturës dhe Energjisë ka nisur procedurat për zgjidhjen e kontratës koncesionare të Aeroportit Ndërkombëtar të Vlorës, duke shënuar një kthesë të rëndësishme në historinë e një prej projekteve më të mëdha infrastrukturore të dekadës së fundit.

Vendimi vjen pasi koncesionari nuk arriti të përmbushë afatet kontraktore për ndërtimin dhe vënien në funksion të aeroportit, ndërsa vonesat u thelluan muaj pas muaji. Projekti, me një investim prej 103.9 milionë eurosh, ishte konceptuar si porta e dytë ndërkombëtare ajrore e Shqipërisë dhe një motor i ri zhvillimi për turizmin dhe ekonominë e Jugut.

*Çfarë parashikonte kontrata*
Kontrata koncesionare e tipit BOT (Build, Operate and Transfer – Ndërto, Opero dhe Transfero) u nënshkrua më 19 prill 2021 ndërmjet Ministrisë së Infrastrukturës dhe Energjisë dhe konsorciumit të përbërë nga Mabetex Group (50%), YDA Group (48%) dhe 2A Group (2%). Vlera e investimit ishte 103.9 milionë euro.

Punimet nisën zyrtarisht më 20 shkurt 2023. Sipas kontratës, aeroporti duhej të përfundonte brenda 36 muajve, pra deri më 20 shkurt 2026. Ky afat ishte përcaktuar edhe në lejen e ndërtimit.

Kontrata parashikonte gjithashtu një periudhë shtesë prej 90 ditësh. Nëse aeroporti nuk bëhej operacional as brenda këtij afati, shteti fitonte të drejtën të zgjidhte kontratën për shkak të mospërmbushjes së detyrimeve. Edhe ky afat skadoi më 20 maj 2026, ndërsa aeroporti nuk ishte ende funksional.

Punimet mbetën larg objektivit
Raporti i inxhinierit të pavarur i datës 20 maj 2026 evidentonte se rreth 70 për qind e punimeve ishin realizuar, por vetëm 57 për qind e tyre ishin certifikuar.

Njëkohësisht, koncesionari nuk kishte dorëzuar grafikun e përditësuar të punimeve dhe raportimet periodike të kërkuara sipas kontratës.

Në fillim të shkurtit 2026, vetë kompania kërkoi shtyrjen e afatit të përfundimit deri në gusht 2026. Pak muaj më vonë u paraqit një plan tjetër që parashikonte përfundimin e projektit brenda 10 muajve, ndërsa në qershor 2026 mbikëqyrësi teknik propozoi që data e re e përfundimit të ishte 1 mars 2027.

Ndryshimi i vazhdueshëm i afateve ngriti pikëpyetje mbi realizueshmërinë e projektit. Ndërkohë skadoi edhe leja e ndërtimit, ndërsa koncesionari nuk dorëzoi formularin e vlefshëm të sigurimit të kontratës, pavarësisht kërkesave të përsëritura.

Raporti më i fundit i inxhinierit të pavarur arrin në përfundimin se nuk mund të përcaktohet një datë e besueshme për vënien në funksion të aeroportit, pasi ritmi i punimeve është ngadalësuar ndjeshëm për shkak të konfliktit ndërmjet ortakëve të konsorciumit.

*Pse po shkon drejt zgjidhjes kontrata*
Nisja e procedurave për zgjidhjen e kontratës duket se mbështetet pikërisht mbi këto shkelje të detyrimeve kontraktore: mosrespektimin e afateve, mosrealizimin e punimeve sipas planit, mungesën e dokumentacionit të kërkuar dhe pamundësinë për të garantuar një afat realist për përfundimin e projektit.

Nëse procedura përfundon me zgjidhjen e kontratës, projekti hyn në një fazë të re, ku shteti do të duhet të vendosë mbi mënyrën e përfundimit të aeroportit, një investim me rëndësi strategjike për transportin ajror dhe zhvillimin ekonomik të vendit.

*Kostoja e vonesës*
Aeroporti i Vlorës nuk ishte projektuar vetëm si një infrastrukturë transporti. Ai ishte pjesë e strategjisë për zgjerimin e kapaciteteve aeroportuale të Shqipërisë, në një kohë kur trafiku ajror dhe fluksi turistik po rriten me ritme të shpejta.

Çdo sezon i humbur nënkupton më pak turistë, më pak investime, më pak vende pune dhe më pak të ardhura për ekonominë lokale. Një aeroport funksional nuk gjeneron vetëm fluturime, por krijon aktivitet ekonomik për hotelet, restorantet, operatorët turistikë, shërbimet e transportit, bizneset lokale dhe investitorët.

Për këtë arsye, kostoja e vonesës nuk matet vetëm me ndërtimin e papërfunduar, por edhe me përfitimet ekonomike që nuk janë realizuar.
Sipas Organizatës Ndërkombëtare të Aviacionit Civil (ICAO), një aeroport i ri ndërkombëtar jashtë kryeqytetit mund të rrisë ekonominë e rajonit ku ndërtohet me rreth 7–10 për qind, ndërsa ndikimi në ekonominë kombëtare vlerësohet në rreth 0.2–0.3 për qind.

Procedurat e nisura tashmë nga Ministria e Infrastrukturës dhe Energjisë për zgjidhjen e kontratës koncesionare përbëjnë kulmin e një serie vonesash dhe problematikash që kanë shoqëruar projektin që nga fillimi i zbatimit të tij dhe hapin një kapitull të ri për të ardhmen e Aeroportit Ndërkombëtar të Vlorës.

Tre persona janë arrestuar dhe një tjetër është shpallur në kërkim pas zbulimit të një aktiviteti të dyshuar të paligjshëm në lumin Devoll.

Policia e Cërrikut, pas kontrolleve dhe verifikimeve për raste që cenojnë mjedisin dhe regjimin juridik të tokës, ka goditur një subjekt që dyshohet se kryente gërryerje të shtratit të lumit jashtë kushteve të lejuara.

Në pranga kanë rënë L. X., 35 vjeç, L. B., 42 vjeç, shtetas indian, dhe B. T., 46 vjeç, ndërsa është shpallur në kërkim administratori i subjektit, K. H., 22 vjeç.

Njoftimi

Arrestohen 2 punonjës në subjektin për llogari të të cilit kryhej gërryerja e shtratit të lumit.
Shpallet në kërkim një 22-vjeçar, administrator i subjektit.

Në pranga dhe 1 shtetas (i afërm i 22-vjeçarit) që kishte ndërtuar pa leje në afërsi të vendndodhjes së subjektit.

Sekuestrohen 1 ekskavator dhe 1 kamion teknologjik, që përdoreshin për kryerjen e kësaj veprimtarie të kundërligjshme.

Në vijim të kontrolleve dhe verifikimeve, si dhe administrimit të shqetësimeve të qytetarëve, për subjekte që dyshohet se kryejnë krime kundër mjedisit dhe/ose cenojnë regjimin juridik të tokës, shërbimet e Komisariatit të Policisë Cërrik goditën një rast në këtë fushë, me pasoja në lumin Devoll. Për rastin:

-u arrestuan në flagrancë shtetasit L. X., 35 vjeç, banues në Cërrik, L. B., 42 vjeç (shtetas indian), banues në Cërrik dhe B. T., 46 vjeç, banues në fshatin Shalës;
-u shpall në kërkim shtetasi shtetasi K. H., 22 vjeç.

Nga veprimet hetimore rezultoi se për llogari të subjektit që administronte 22-vjeçari dhe kishte të punësuar shtetasit L. X. dhe L. B., gërryhej me mjete të rënda, shtrati i lumit Devoll, veprimtari nga e cila ishte devijuar rrjedha e lumit dhe rrezikohej përmbytja e tokave bujqësore në fshatin Gostimë.

Gjithashtu, nga këto veprime rezultoi se subjekti e kryente gërryerjen jashtë koordinatave të përcaktuara në lejen që kishte për këtë veprimtari.

Përveç ndëshkimit penal për shtetasit përgjegjës, subjekti u ndëshkua dhe administrativisht nga strukturat kompetente të IKMT, Tiranë, dhe IMT, Cërrik.

Nga verifikimet e mëtejshme, rezultoi se 46-vjeçari kishte ndërtuar pa leje, në afërsi të zonës ku ndodhej subjekti që administronte i afërmi i tij, shtetasi K. H..

Punohet intensivisht për kapjen e 22-vjeçarit.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.

Një alpinist 20-vjeçar nga Kili ka humbur jetën në mënyrë tragjike pasi ra në një përrua në anën greke të kufirit, ndërsa po udhëtonte në këmbë nga Shqipëria drejt Greqisë.

Sipas autoriteteve greke, i riu po ecte së bashku me një mik të tij kur rrëshqiti dhe ra në një përrua pranë zonës së Mavromatit, në veriperëndim të Greqisë. Në vendngjarje ndërhynë forcat zjarrfikëse, të cilat arritën të nxirrnin trupin e pajetë të viktimës.

Shoqëruesi i tij, një 22-vjeçar, u tha zjarrfikësve se të dy kishin vendosur të kalonin kufirin në këmbë nga Shqipëria në Greqi për të kursyer para, pasi dispononin fonde të kufizuara.
Autoritetet greke kanë nisur hetimet për të sqaruar plotësisht rrethanat e ngjarjes tragjike.

Situata paraqitet kritike në zonën e Finiqit, ku zjarri i përmasave të mëdha ka dalë jashtë kontrollit dhe vijon të përhapet me shpejtësi, i favorizuar nga era e fortë.

Flakët kanë përfshirë disa zona të Bashkisë Finiq dhe po afrohen drejt fshatrave, duke krijuar rrezik serioz për banesat në Mesopotam dhe Kostar. Vatra e zjarrit ka avancuar gjithashtu drejt zonave të Delvinës, përfshirë Vllahatin, duke rritur shqetësimin për përhapjen e mëtejshme.

Për të përballuar situatën është angazhuar edhe një helikopter zjarrfikës, i cili ka nisur ndërhyrjen nga ajri për të ndihmuar në izolimin e flakëve dhe për të frenuar avancimin e zjarrit.

Forcat në terren vijojnë betejën me flakët, ndërsa autoritetet po monitorojnë me shqetësim situatën, pasi zjarri po përparon në një zonë me bimësi të dendur dhe rrezikon të prekë zona të banuara.

Shoqëria aksionere publike që menaxhonte hapësirën ajrore të Shqipërisë, ka pushuar së ekzistuari. Dy javë më parë, ministria e Ekonomisë në cilësinë e aksionerit të vetëm, ka miratuar çregjistrimin e Albcontrol sha.

Ministria e Ekonomisë dhe Inovacionit vendosi prishjen pa kaluar në likujdim të shoqërisë Albcontrol sh.a në zbatim të nenit 21 të ligjit Për Ofruesin e Shërbimeve të Lundrimit Ajror” Albcontrol,” thuhet në vendimin e asamblesë së përgjithshme të aksionarit.

Sipas vendimit, të drejtat dhe detyrimet e Albcontrol sh.a tashmë do të kalojnë tek Enti Publik Albcontrol, i cili do të jetë një ent jobuxhetor.

Mbyllja e shoqërisë publike Albcontrol dhe zëvendësimi i saj me një Ent Publik Jobuxhetor u sanksionua me një ligj të posaçëm dy vjet më parë, si një përpjekje për të shpëtuar paratë e gjobës Becchetti.

Por me sa duket kjo ishte një tentativë e dështuar, pasi të gjitha paratë që ka gjeneruar hapësira ajrore e Shqipërisë prej vitit 2020 mbahen të bllokuara në Bruksel dhe një pjesë e tyre madje janë konfiskuar përfundimisht nga biznesmeni italian.

Sipas të dhënave nga bilanci zyrtar i Albcontrol, deri në fund të vitit të kaluar, shuma e bllokuar në llogaritë e Albcontrol tek Eurocontroli në Bruksel arriti në 18.3 miliardë lekë ose mbi 193 milionë euro.

Edhe pse tashmë kjo shumë ka kaluar detyrimin e gjobës Becchetti, sërish paratë mbeten aty dhe shteti shqiptar nuk mund të tërheqë dot asnjë qindarkë.

Bllokimi i miliardave në Bruksel e detyroi qeverinë të ndërhynte me paratë e qytetarëve për të bërë të mundur mbajtjen hapur të hapësirës ajrore dhe fluturimeve në Shqipëri.

Fillimisht qeveria dha disa kredi për Albpetrol përmes ministrisë së Financave dhe kompanive të tjera shtetërore, por në fillim të këtij viti, Këshilli i Ministrave detyroi Ministrinë e Infrastrukturës dhe Energjisë të kalojë 7 miliardë lekë tek Albcontrol, jo si hua, por si injektim kapitali.

Me pak fjalë, përmës këtij operacioni qytetarët shqiptarët paguan drejtëpërdrejtë paratë e gjobës 130 milionë euro të Becchettit, që erdhi pas sherreve personale të kryeministrit Edi Rama dhe oborrit të tij me biznesmenin italian. /Kapitali

Policia e Durrësit ka finalizuar operacionin e koduar “July”, duke zbardhur gjashtë raste vjedhjesh dhe tentativash për vjedhje të kryera gjatë muajit korrik 2026. Në kuadër të operacionit është identifikuar dhe vënë në pranga autori i dyshuar.

Në pranga ka rënë shtetasi I. D., 44 vjeç, banues në Durrës.
Sipas hetimeve të specialistëve për Hetimin e Krimeve në Komisariatin e Policisë Durrës, 44-vjeçari dyshohet se gjatë periudhës 14–24 korrik 2026 ka kryer një sërë vjedhjesh, konkretisht ka vjedhur një motoçikletë, një çantë me sende personale dhe një portofol, si dhe para dhe materiale në dy subjekte. Gjithashtu, ai dyshohet se ka tentuar të kryejë një vjedhje në një banesë.

Policia bën me dije se hetimet vijojnë për të zbardhur raste të tjera vjedhjesh që mund të jenë kryer nga i arrestuari.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

Njoftimi i Policisë:

Durrës/Finalizohet operacioni i koduar “July”, zbardhen 6 vjedhje/tentativa për vjedhje, gjatë muajit korrik 2026.

Identifikohet dhe vihet në pranga autori i dyshuar.

Si rezultat i veprimeve intensive hetimore të kryera nga specialistët për Hetimin e Krimeve të Komisariatit të Policisë Durrës, për zbardhjen e vjedhjeve, u bë e mundur zbardhja e 6 rasteve të vjedhjes/tentativës për vjedhje, të kryera gjatë muajit korrik 2026, si dhe u arrestua autori i dyshuar, shtetasi:

-I. D., 44 vjeç, banues në Durrës.

Nga hetimet dyshohet se ky shtetas, gjatë periudhës 14.07.2026 – 24.07.2026, ka vjedhur një motoçikletë, një çantë me sende personale dhe një protofol, ka vjedhur para dhe materiale në dy subjekte, si dhe ka tentuar të vjedhë në një banesë.

Punohet për zbardhjen e vjedhjeve të tjera që mund të ketë kryer ky shtetas.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

Policia e Bulqizës ka arrestuar drejtuesin teknik të subjektit minerar “Eternal Security”, pas aksidentit tragjik në punë që i mori jetën një 40-vjeçari. Në pranga është vënë shtetasi Përparim Koçi, 63 vjeç, banues në fshatin Vajkal, Bulqizë, i cili ushtronte detyrën e drejtuesit teknik në subjektin minerar ku ndodhi ngjarja.

Sipas Policisë, arrestimi u krye pas veprimeve hetimore të zhvilluara në lidhje me aksidentin e ndodhur më 1 gusht 2026, ku humbi jetën shtetasi Ilir Kolaveri, 40 vjeç.

Nga hetimet paraprake dyshohet se 63-vjeçari nuk ka zbatuar rregullat e mbrojtjes në punë, çka dyshohet se solli aksidentin fatal.

Bulqizë

Arrestimi i tij u bë pasi, nga veprimet hetimore të kryera në lidhje me ngjarjen e ndodhur më datë 01.08.2026, dyshohet se në cilësinë e drejtuesit teknik të subjektit minerar nuk ka zbatuar rregullat e mbrojtjes në punë, për pasojë është aksidentuar me vdekje shtetasi I. K., 40 vjeç.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprën penale “Shkelja e rregullave të mbrojtjes në punë”.

Një aksident i rëndë rrugor është regjistruar në aksin Fier–Lushnjë, pranë fshatit Vajkan, ku dy automjete janë përplasur me njëra-tjetrën dhe më pas kanë përfunduar në kanalin anësor të autostradës. Përplasja e fortë ka lënë të plagosur katër persona, të cilët janë transportuar me urgjencë në Spitalin Rajonal të Fierit. Sipas të dhënave paraprake, fatmirësisht të plagosurit ndodhen jashtë rrezikut për jetën.

Si pasojë e aksidentit, njëra prej korsive të autostradës është bllokuar, duke krijuar radhë të gjata automjetesh në një nga akset me qarkullimin më të ngarkuar gjatë sezonit veror.

Forcat e Policisë ndodhen në vendngjarje dhe po punojnë për zbardhjen e plotë të shkaqeve dhe rrethanave të aksidentit, ndërsa njëkohësisht po merren masa për normalizimin e qarkullimit në zonë.

Shqipëria dhe Gjermania kanë nënshkruar tre marrëveshje bashkëpunimi në sektorin e energjisë dhe eficiencës energjetike, me një vlerë totale rreth 90 milionë euro hua dhe 24 milionë euro grant.

Ministri i Infrastrukturës dhe Energjisë, Enea Karakaçi, së bashku me ambasadorin gjerman në Tiranë, Karl Bergner, pas nënshkrimit të marrëveshjeve, bëri të ditur se projektet e mbështetura nga qeveria gjermane dhe Banka Gjermane për Zhvillim (KfW) kanë rëndësi strategjike për modernizimin e sistemit energjetik dhe për përmirësimin e shërbimeve për qytetarët.

“Marrëveshja e parë lidhet me eficiencën e energjisë në sistemin e transmetimit. Përmes saj do të bëhet digjitalizimi i të gjithë sistemit të transmetimit, duke mundësuar automatizimin e proceseve që lidhen me ndërlidhjen e nënstacioneve dhe operimin energjetik”, u shpreh Karakaçi.

Një tjetër marrëveshje parashikon rehabilitimin e hidrocentralit të Vaut të Dejës, një prej veprave më të rëndësishme publike energjetike në vend. Sipas ministrit, ky projekt vijon bashkëpunimin e suksesshëm me qeverinë gjermane dhe KfW-në për modernizimin e hidrocentralit.

Marrëveshja e tretë lidhet me rehabilitimin, në kuadër të eficiencës së energjisë, të godinave të konvikteve në “Qytetin Studenti”. Projekti do të financohet me një grant prej 24 milionë eurosh nga qeveria gjermane përmes KfW-së dhe synon përmirësimin e kushteve të jetesës për studentët, si dhe uljen e konsumit energjetik.

“Janë projekte që shkojnë në të mirën publike, për studentët, për një jetë më të mirë dhe një proces më të mirë të të nxënit, por edhe për kursimin energjetik, pasi të gjitha ambientet do të jenë me eficiencë energjie”, deklaroi Karakaçi.

Ministri falënderoi qeverinë gjermane dhe KfW-në për bashkëpunimin e vazhdueshëm dhe mbështetjen për projekte me interes publik në Shqipëri.

Nga ana e tij, ambasadori gjerman Karl Bergner shprehu mbështetjen e qeverisë gjermane për zhvillimin e investimeve me ndikim në ekonominë e vendit. Ai falënderoi qeverinë shqiptare për bashkëpunimin dhe vlerësoi rëndësinë e investimeve të përbashkëta që kontribuojnë në zhvillimin dhe modernizimin e Shqipërisë.

Deputetja e Partisë Demokratike, Elda Hoti, ka ndarë me ndjekësit lajmin e hidhur për ndarjen nga jeta të bashkëshortit të saj, Ladi Ndoja.

Përmes një postimi prekës në rrjetet sociale, ajo i ka dhënë lamtumirën partnerit të jetës me fjalë që pasqyrojnë dhimbjen e madhe të humbjes.humbjes.

“U prehsh në paqe, i miri i zemrës time! Ladi im, shpirti im. Do na mungosh gjithë jetën”, shkruan Hoti, duke e shoqëruar mesazhin me fotografi familjare.
Familjarët e tjerë kanë bërë me dije se shkak i ndarjes nga jeta të Ndojës ishtë një atak kardiak. Lajmi për ndarjen e parakohshme nga jeta të Ladi Ndojës ka ngjallur reagime të shumta ngushëllimi nga kolegë, miq dhe qytetarë, të cilët kanë shprehur solidaritetin dhe mbështetjen për deputeten dhe familjen e saj në këtë moment të vështirë.

Policia ka ndaluar jahtin nga i cili dyshohet se janë qëlluar të shtëna me armë zjarri në ajër mbrëmjen e së dielës, në det përballë Palasës. Sipas informacioneve paraprake, në bord ndodhej edhe pronari i agjencisë “Globus Travel”, i cili është shoqëruar nga policia për t’u marrë në pyetje, ndërsa autoritetet vijojnë hetimet për të zbardhur rolin e secilit prej personave të pranishëm në mjetin lundrues.

Burime bëjnë me dije se jahti u ndoq fillimisht nga Policia Kufitare në det. Gjatë tentativës për t’u larguar, mjeti lundrues dyshohet se ka fikur dritat e kabinës me synimin për të humbur gjurmët dhe për t’iu shmangur ndjekjes.

Në operacion u angazhuan edhe efektivët e forcës speciale “Delta”, të cilët bënë të mundur ndalimin e jahtit pranë plazhit të Livadhit. Më pas, mjeti u shoqërua drejt molit të Porto Palermos, ku po kryhen të gjitha veprimet procedurale.

Personat që ndodheshin në bord pritet të merren në pyetje nga grupi hetimor. Deri në këtë fazë, autoritetet po verifikojnë rrethanat e ngjarjes dhe dyshimet për përdorimin e armës së zjarrit, ndërsa nuk është bërë ende e ditur nëse do të ngrihen akuza ndaj ndonjë prej të shoqëruarve.

Një ngjarje e pazakontë ka alarmuar forcat e rendit mbrëmjen e sotme në jug të vendit. Rreth orës 21:00, shërbimet e policisë janë njoftuar se nga një jaht në det, përballë zonës së Palasës, dyshohet se është qëlluar me armë zjarri në ajër.

Menjëherë pas marrjes së sinjalizimit, shërbimet e Policisë Kufitare dhe të Njësisë Policore Detare janë ngritur me urgjencë në këmbë dhe i janë vënë në ndjekje mjetit lundrues në hapësirën detare.

Për të vendosur nën kontroll të gjithë perimetrin e sigurisë, janë njoftuar menjëherë edhe shërbimet e Komisariatit të Policisë Himarë si dhe ato të Stacionit të Policisë Dhërmi, të cilat kanë nisur kontrolle me patrulla nga toka përgjatë të gjithë vijës bregdetare.

Nga mbyllja e garës për prokuror të përgjithshëm gjatë ditës së kaluar, Këshilli i Lartë i Prokurorisë ka 45 ditë që të verifikojë kandidaturat e pretendentëve që kanë shprehur interes, duke dorëzuar dokumentet dhe jetëshkrimin pranë qeverisë së akuzës.

Data 1 gusht deri në mesnatë ishte afati i fundit për konkurrentët që synojnë të marrin drejtimin e Prokurorisë së Përgjithshme për shtatë vitet në vijim dhe nga kjo e diel nis numërimi i afatit për KLP dhe komisionin përgjegjës të emërimeve që të shqyrtojë dokumentacionin.

Teksa në rrugë elektronike, por edhe fizikisht, deri në datën 1 gusht dorëzuan jetëshkrimin dhe shprehën interes katër prokurorë, mes tyre prokurori i SPAK, Adnan Xholi, prokurorja e kryeqytetit Rovena Zoto dhe prokurorët Ylli Pjetërnikaj dhe Fatjona Memçaj, pritet që të konfirmohet nëse kandidatë të tjerë e kanë përcjellë apo jo dosjen personale me postë në momentet e fundit.

Mes emrave të përfolur ka qenë edhe ai i ish-prokurores së përgjithshme të përkohshme, zonjës Arta Marku, por edhe emri i ish-prokurores së Krimeve të Rënda, zonjës Pranvera Pustina, për të cilat do të vërtetohet të hënën nëse kanë shfrytëzuar postën gjatë orëve të fundit.

Teksa njerëzit e drejtësisë kanë nisur pushimet, komisioni i karrierës duhet t’u përcjellë brenda gushtit institucioneve si ILDKPI kërkesa për verifikim pasurie, si edhe organeve të administratës tatimore dhe doganore, Byrosë Kombëtare të Hetimit, shërbimeve shtetërore informative, Autoritetit për Informimin mbi Dokumentet e ish-Sigurimit të Shtetit, si dhe çdo organi disiplinor që ka mbikëqyrur disiplinën në marrëdhëniet e punës së kandidatit.

Vetëm pasi të përfundojë ky vetting ndaj kandidatëve, vendoset që pretendentët që plotësojnë kushtet të thirren në seancë dëgjimore.

Gara për prokuror të përgjithshëm u hap nga KLP, pasi në muajin dhjetor i përfundon mandati prokurorit të përgjithshëm, z. Olsian Çela.

Një grup qytetarësh protestuan këtë të diel në qendër të Shkodrës, duke shprehur pakënaqësitë e tyre ndaj qeverisë, por edhe kundërshtimin për krijimin e një konsullate serbe në qytet.

Protestuesit marshuan në rrugët e Shkodrës me pankarta dhe flamuj kombëtarë, ndërsa gjatë fjalimeve deklaruan se hapja e një konsullate serbe në Shkodër është e papranueshme.

Sipas tyre, qyteti nuk ka asnjë lidhje historike, ekonomike apo diplomatike që të justifikojë praninë e një konsullate serbe. Ata argumentuan gjithashtu se kjo është e papranueshme edhe për shkak të krimeve të kryera nga forcat serbe gjatë luftës në Kosovë, duke theksuar se mijëra shqiptarë u vranë dhe u masakruan gjatë konfliktit.

“Duan të hapin një konsullatë serbe në Shkodër. Turp, turp. Serbia nuk është as shtet i BE-së, as ndonjë shtet lider në Evropë. Ne i kemi të freskëta plagët dhe varret masive. Kemi vuajtur shumë, shtegtimin, dëbimin e një populli të tër“, u shpreh një nga protestuesit.

Protestuesit kërkuan që autoritetet të rishqyrtojnë këtë vendim dhe të mos lejojnë hapjen e konsullatës në Shkodër.

Gjatë protestës u hodhën gjithashtu thirrje kundër qeverisë, ndërsa manifestimi u zhvillua pa incidente.

Një ngjarje e rëndë ka ndodhur gjatë operacioneve për shuarjen e zjarrit masiv në zonën e Psathës, në Atikë, ku dy helikopterë zjarrfikës janë përplasur me njëri-tjetrin në ajër. Për pasojë, dy persona kanë humbur jetën dhe dy të tjerë kanë mbetur të plagosur.

Shërbimi Zjarrfikës i Greqisë konfirmoi përmes një njoftimi zyrtar se dy helikopterët e tipit Bell, të marrë me qira për operacionet në zonën Atikë–Beoti, u përplasën gjatë ndërhyrjes për shuarjen e flakëve. Mjetet ajrore ishin ngritur pak më parë nga aeroporti i Elefsinës.

Në bordin e dy mjetëve ndodheshin gjithsej katër persona (dy shtetas grekë dhe dy të huaj). Burime nga kompania që kishte dhënë me qira helikopterët bëjnë me dije se dyshimet e para për shkakun e përplasjes tragjike lidhen me një gabim njerëzor.

Menjëherë pas aksidentit u aktivizua me urgjencë operacioni i kërkim-shpëtimit. Ekipet e emergjencës arritën të lokalizonin katër anëtarët e ekuipazheve, ku dy prej tyre u dërguan në spital me plagë, ndërsa dy të tjerët u nxorën pa shenja jete. Autoritetet greke kanë nisur hetimet e plota për zbardhjen e rrethanave të kësaj tragjedie.

Kryeministri Edi Rama ka reaguar ndaj debateve dhe kundërshtimeve të ngritura pas publikimit të propozimit për reformën e re administrativo-territoriale, duke hedhur poshtë pretendimet se brenda PS ka protesta kundër nismës.

Në një reagim në platformën X, Rama e quan të turpshme aktin e djegies së teserave të PS, ndërsa thekson se ka deputetë brenda të majtës që siç thotë ai “kanë bërë “tribunin e vegjëlisë” pa ditur tamam çfarë thonë”.

“Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, që tanimë po protestohet edhe “brenda PS” dhe kjo qenka një shenjë tmerrësisht e keqe për “regjimin”. Në fakt jo, përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë apo ndonjë rast kur deputetë tanët kanë bërë “tribunin e vegjëlisë” pa ditur tamam çfarë thonë, gjithçka tjetër është jo vetëm normale po edhe e mirëseardhur”, shkruan Rama.

Kreu i qeverisë theksoi se drafti i reformës administrativo-territoriale ndodhet në fazën 60-ditore të konsultimit publik, duke i dhënë mundësi qytetarëve, institucioneve dhe pushtetit vendor të shprehin qëndrimet e tyre.

“Të gjithë do të informohen shumë më tepër përgjatë këtyre 60 ditëve lidhur me arsyet logjike të propozimeve – ku nuk ka pasur si të merren parasysh reputacioni i zonës bashkiake që nga koha e antikitetit, numri i të rënëve në luftrat e 2000 vjetëve të fundit apo të tjera të dhëna e gojëdhana të kësaj natyre, të cilat s’kanë qenë dhe s’mund të jenë farë argumenta në këtë debat”, shkruan kryeministri.

Reagimi i Edi Ramës

Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, që tanimë po protestohet edhe “brenda PS” dhe kjo qenka një shenjë tmerrësisht e keqe për “regjimin”.

Në fakt jo, përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë apo ndonjë rast kur deputetë tanët kanë bërë “tribunin e vegjëlisë” pa ditur tamam çfarë thonë, gjithçka tjetër është jo vetëm normale po edhe e mirëseardhur.

Një, sepse dokumenti i reformës së propozuar është pikërisht në fazën e vet të konsultimit publik ligjor prej 60 ditësh dhe kjo fazë do të thotë pikërisht, bujrum gjithkush të shprehet lirisht për propozimin.

Dy, sepse sipas ligjit kryetarët e bashkive e këshillat bashkiakë duhet të shprehen me shkrim për qëndrimet e tyre dhe është krejt e kuptueshme që ata që janë kundër të shprehen edhe me forma të tjera paqësore – për sa kohë nuk bllokojnë rrugë e nuk pengojnë të tjerët të bëjnë jetën e tyre, duke u futur vetë në konflikt me ligjin dhe me PS bashkë.

Tre, sepse as në Shqipëri nuk ka regjim, as në PS nuk ka dhe nuk do të ketë asnjë vendim për të shkurajuar askënd që të shprehë opinionin e vet për këtë reformë, për të cilën sigurisht do të vendosë parlamenti, por deri atëherë të gjithë do të dëgjohen, përfshirë edhe bashkitë që mund të duan të integrojnë tek vetja bashki më të vogla që në propozimin aktual mbeten siç janë.

Nga ana tjetër të gjithë do të informohen shumë më tepër përgjatë këtyre 60 ditëve lidhur me arsyet logjike të propozimeve – ku nuk ka pasur si të merren parasysh reputacioni i zonës bashkiake që nga koha e antikitetit, numri i të rënëve në luftrat e 2000 vjetëve të fundit apo të tjera të dhëna e gojëdhana të kësaj natyre, të cilat s’kanë qenë dhe s’mund të jenë farë argumenta në këtë debat.