Kërkesa për 45 vite burg ndaj ish-krerëve të UÇK-së ka nxitur reagime të forta, ndërsa analisti Ledion Krisafi e cilëson atë si një masë tepër të lartë dhe me sfond politik.
Sipas Krisafit, dënimi i kërkuar është “shumë i lartë nga sa pritej” dhe, duke marrë parasysh moshën e të akuzuarve, përkthehet praktikisht në burgim të përjetshëm. Ai thekson se situata në Kosovë nuk mund të barazohet me atë të Serbisë, duke argumentuar se Serbia ishte agresori në luftë, ndërsa shqiptarët ishin viktima.
Krisafi nuk përjashton mundësinë që të akuzuarit të shpallen të pafajshëm ose të marrin një dënim më të ulët se 45 vite, por shprehet kritik ndaj qasjes së gjykatës, të cilën e konsideron politike dhe tendencioze. Sipas tij, ka pasur një përpjekje për të shpërndarë përgjegjësinë mes palëve, në mënyrë që faji të mos mbetet vetëm mbi Serbinë, e cila, sipas tij, ka kryer pjesën më të madhe të krimeve gjatë luftës.
Ai shton se paralelizmi mes UÇK-së dhe ushtrisë serbe është bërë më shumë për të prodhuar dënime sesa për të zbardhur të vërtetën, duke nënvizuar se UÇK-ja nuk ishte një ushtri e rregullt në kuptimin klasik të fjalës, por një organizim paramilitar në rrethana lufte.
“Në fakt është shumë e lartë nga sa pritej. Duke marrë parasysh edhe moshën e ish-krerëve të UÇK i bie që të jetë gati burgim të përjetshëm. Nuk jemi në këtë situatë në Kosovë, për më tepër që Serbia ishte agresori dhe shqiptarët ishin viktimat. Nuk përjashtohet mundësia që të akuzuarit të dalin të pafajshëm.
Ka një përpjekje që të dënoheshin të gjithë, për të mos ua lënë gjithë fajin serbëve. Lufta u fillua nga serbët dhe ata bënë pjesën më të madhe të krimeve. Një pjesë e elitave ndërkombëtare mund të jenë penduar për atë që ka ndodhur në Kosovë, dhe mendojnë që fajin ta mbajnë të gjithë. Kërkesa është e rëndë, nuk mund të dënohen shqiptarët që ishin viktima.
E gjithë kjo gjykatë është e gjitha politike, nuk ka qenë qëllimi për të hyrë në detaje. Qëllimi ka qenë që të dënojmë të gjithë, të gjithë ata që kanë bërë krime në ish-Jugosllavi. UÇK nuk ishte një ushtri në kuptimin e plotë të fjalës, ishte më shumë një organizimin paramilitar.
Nuk ishte e ngjashme me ushtrinë serbe. Paralelizmi me UÇK-në dhe me ushtrinë e Serbisë, ka qenë më shumë për të dënuar, se sa për të zbuluar të vërtetën. Në disa kancelari ndërkombëtare, është thënë që Shqipëria nuk mund t’i marrë të gjitha, pavarësinë. Qëllimi ka qenë që të dënohen të gjithë. Ka qenë shumë tendencioze. Nuk mendoj se mund të ketë një dënim maksimal 45 vjet, mendoj që mund të ketë një dënim më të vogël, por edhe pse jo pafajësi”, tha Krisafi.
Kryetari i AAK-së, Ramush Haradinaj ka shkuar te familja e Fadil Fazliut i cili u lirua të martën nga Gjyakta Speciale.
Haradinaj përmes një postimi në rrjetin social në Facebook ka shkruar familja Fazliu ishte në shërbim të atdheut në të gjitha fazat historike të përpjekjeve për liri.
“Vëllai i dy Heronjve, Fadil Fazliu, kaloi edhe një sfidë të padrejtë, që i ndodhi atij sikurse bashkëluftëtarëve që gjenden ende në Hagë: Hashim Thaçi, Rexhep Selimi, Kadri Veseli, Jakup Krasniqi, Salih Mustafa dhe Pjetër Shala”, ka shkruar ai.
Tutje Haradinaj tha se pas kthimit të tij në familje, pati nderin ta vizitoj Fadil Fazliun, për t’i shprehur respektin për qëndrueshmërinë e tij dhe për sakrificën e familjes Fazliu ndër breza.
“I gëzohemi kthimit në atdhe e po ashtu të Gjeneral Haxhi Shalës, Bashkim Smakajt, Nasim Haradinajt, Isni Kilajt dhe Hysni Ngucatit. Presim lirimin e të gjithëve, që t’u bashkohen familjeve të tyre dhe të korrigjohet kjo padrejtësi”, ka shkruar Haradinaj duke bërë thirrje që më “Më 17 shkurt, në ora 14:00, bashkohemi të gjithë në sheshin ‘Skënderbeu’ në Prishtinë, në mbështetje të luftës sonë të drejtë e çlirimtare”. /Telegrafi/
Kryetari i Prishtinës, Përparim Rama ka bërë të ditur se të hënën, më 16 shkurt ora e parë mësimore në shkollat e kryeqytetit do jetë në nderim të Ushtrisë Çlirimtare të Kosovës.
Rama në një postim në Facebook shkruan se kanë obligim institucional dhe moral të kultivojnë te brezat e rinj respekt për historinë, sakrificën dhe idealet e vendit tonë.
“Në Kryeqytet, ora e parë mësimore në nderim të UÇK-së! Reflektim mbi historinë dhe përgjegjësinë tonë shtetërore!
Në prag të 18-vjetorit të Pavarësisë së Republikës së Kosovës, në të gjitha shkollat publike të Kryeqytetit, ora e parë mësimore e datës 16 shkurt do t’i kushtohet historikut, rolit dhe sakrificës së Ushtrisë Çlirimtare të Kosovës (UÇK).
Si Kryeqytet, kemi obligim institucional dhe moral të kultivojmë te brezat e rinj respekt për historinë, sakrificën dhe idealet tona.
Kujtesa historike është themel i identitetit dhe respektit për shtetësinë!”, shkruan Rama. /Telegrafi/
Avokati Luka Mishetiq tha se për klientin e tij, Hashim Thaçin, nuk ka pasur prova që e lidhin atë me komunikatat apo deklaratat publike të UÇK-së.
Megjithatë, ai tha se janë dy prova që e bëjnë një gjë të tillë e që njëra është një deklaratë e Rexhep Selimit për Prokurorinë lidhur me komunikatën 59, raporton “Betimi për Drejtësi”.
“ZPS-ja arrin të citojë vetëm dy prova për të mbështetur pretendimin e tyre se Hashim Thaçi ka pasur rol në përgatitjen e komunikatave. E para; është një intervistë që ka dhënë Rexhep Selimi për ZPS-në ku ai pretendon se Hashim Thaçi ka pasur njëfarë lidhje me komunikatën 59. Pretendimet e Selimit nuk mund të merren parasysh për shumë arsye”, tha Mishetiq.
Madje, Mishetiq tha se për Prokurorinë, Selimi ka thënë që nuk ka pasur dijeni se kush i hartonte komunikatat e UÇK-së.
“Thjesht ka hamendësuar. Dhe mbi të gjitha pretendimet e tij për komunikatën 59 janë të pakonfirmuara dhe Thaçi nuk ka pasur asnjë mundësi që të kontestojë dëshminë e zotit Selimi kur janë bërë kundërpyetjet në lidhje me këtë”, tha ai.
Rrjedhimisht, Mishetiq tha se sipas rregullave, trupi gjykues nuk duhet ta përdorë këtë provë kundër Thaçit.
Në dosjen e tij përfundimtare, Selimi sipas Mishetiqit, ka pranuar se nuk ka pasur dijeni se kush i ka hartuar komunikatat dhe thjesht ka spekuluar në intervistën për ZPS-në.
Ndërsa, prova e dytë, sipas Mishetiq, që lidhet me këtë pjesë është një pjesë e librit të shkruar nga Nuhi Bytyqi.
Mishetiq: Thaçi s’i kontrollonte deklaratat publike të UÇK-së
(Përditësuar, ora 12:20)- Luka Mishetiq, avokati i cili përfaqëson Hashim Thaçin tha se gjatë periudhës së luftës, i mbrojturi i tij nuk i kontrollonte deklaratat publike të Ushtrisë Çlirimtare të Kosovës (UÇK).
“Thaçi nuk kontrollonte deklaratat publike të UÇK-së”, tha ai, duke përmendur një dëshmi të një dëshmitari i cili kishte thënë se ndonëse Thaçi i kishte thënë të mos fliste me medie, ai e kishte bërë një gjë të tillë.
“Kjo tregon se Thaçi nuk mund ta kontrollonte se çfarë bënin ushtarët e UÇK-së në terren”, tha tutje avokati, raporton “Betimi për Drejtësi“.
Ai shtoi se s’ka asnjë informacion që Thaçi të ketë mbikëqyrur shpërndarjen e informacioneve publike.
“Në veçanti ZPS nuk ka vërtetuar më tej përtej dyshimit të arsyeshëm se Hashim Thaçi ka pasur ndonjë përfshirje në përgatitjen e komunikatave, deklaratave publike. Asnjë dëshmitarë nuk ka dhënë dëshmi në lidhje me këtë. Asnjë prej librave të shumtë, dorëshkrimeve, shënimeve artikujve në gazeta apo dokumente të tjera nuk përmbajnë qoftë prova dytësore lidhur me faktin që Hashim Thaçi të ketë hartuar komunikatat ose deklaratat politike”, tha Luka Mishetiq gjatë deklaratës së tij përmbyllëse në këtë rast gjyqësor.
Megjithatë, ai shtoi se janë vetëm dy prova që e implikojnë Thaçin në këtë çështje.
Përpara kësaj, Mishetiq tha se Prokuroria nuk ka vërtetuar se Thaçi ka qenë drejtues i Drejtorisë Politike përpara nëntorit të 1998-ës.
“ZPS-ja nuk ka vërtetuar se përtej dyshimit të arsyeshëm se Thaçi ka qenë drejtues i Drejtorisë Politike apo të informimit përpara nëntorit 1998 kur u bë edhe kreu i Drejtorisë Politike. Ka prova që Thaçi ka qenë i përfshirë në marrëdhënie me publikun dhe media përpara nëntorit të ’98-ës por Prokuroria nuk e jep asnjë provë të besueshme që ai ka qenë drejtuesi apo kreu i ndonjë drejtorie të caktuar në UÇK qoftë politike apo e informimit, dhe nuk ka asnjë provë që Thaçi të ketë kontrolluar apo të ketë mbikëqyrur se çfarë thonin apo publikonin të tjerët në UÇK”, tha Mishetiq.
Ndonëse Prokuroria e kishte qujatur Qeverinë e Përkohshme të Kosovës si mekanizëm për ta zgjeruar ndikimin në Kosovë. Mishetiq argumentoi se ky institucion është krijuar gjatë bisedimeve dhe dakordimeve mes delegacionit shqiptar, ndërkohë sa Thaçi ishin në Rambuje. Ndërsa, në atë, ka qenë e paraparë edhe pjesëmarrja e Lidhjes Demokratike të Kosovës (LDK) e udhëhequr nga Ibrahim Rugova, të cilët u tërhoqën nga pjesëmarrja. /Betimi për Drejtësi/
Luka Mishetiq i cili përfaqëson Hashim Thaçin ka kundërshtuar pretendimet e Prokurorisë lidhur me komunikatat e UÇK-së dhe me atë se ato kanë pasur mesazhe që kanë nxitur krimin.
Mishetiq ka thënë se kjo nuk qëndron sepse nëse do të ishte e kundërta, atëherë ndërkombëtarët do ta dinin dhe do e thonin atë që dinin kur kanë ardhur që të dëshmojnë në këtë rast gjyqësor, raporton “Betimi për Drejtësi“.
“Komunikatat e UÇK-së nuk kanë qenë nxitëse të krimit sepse në të kundërtën dëshmitarët ndërkombëtarë që kanë dhënë dëshmi në këtë çështje do ta kishin ditur këtë dhe do e kishin bërë me dije për ju”, tha ai.
Ai tha se ZPS-ja ka dështuar që të jep prova që komunikatat kanë quar në avancimin e politikës së ndërmarrjes së përbashkët kriminale.
Mbrojtja thotë se Prokuroria duhet të japë argumente të shkakut dhe pasojës se pse komunikatat pretendon që çuan në kryerjen e krimeve në aktakuzë.
Përveç kësaj, Mishetiq thotë se Prokuroria mbështetet në deklaratat e Rrustem Mustafës- Remit.
“ZPS-ja së pari mbështetet në provat e dhëna nga komandant Remi për të mbështetur pretendimet që komunikatat ishin shumë të rëndësishme për krimet e ngritura në aktakuzë. Siç thuhet nga ZPS-ja, Remi ka kontribuar në mënyrë të drejtpërdrejtë me Shtabin e Përgjithshëm”, tha ai duke shtuar se pse duhej të orientohej Remi përmes komunikatave.
Këto pretendime sipas mbrojtjes, Prokuroria i bën pasi s’ka prova të drejtpërdrejta që dëshmojnë komunikimet e Shtabit me komandantët e zonave lidhur me mesazhe të tilla.
Mbrojtja: Si është e mundur që Zyrapi dhe ndërkombëtarët s’kishin informata për qëllimin kriminal, ndërsa nivelet më të ulëta merrnin mesazhe të tilla?
(Përditësuar, ora 11:07)- Avokati i Hashim Thaçit, Luka Mishetiq ka folur lidhur me pretendimet e Prokurorisë për qëllimin e përbashkët kriminal të të akuzuarve në këtë rast gjyqësor.
Ai tha në dëshminë e tij, shefi i Shtabit të Përgjithshëm të UÇK-së, Bislim Zyrapi ka deklaruar që nuk ka qenë në dijeni të qëllimit kriminal siç pretendohet në aktakuzë. Ngjashëm, si Zyrapi, mbrojtja thotë se kanë dkelarauar edhe ndërkombëtarët që kanë dëshmuar në këtë çështje gjyqësore, raporton “Betimi për Drejtësi“.
Por, Mishetiq ngrit pikëpyetje se si është e mundur që Zyrapi dhe ndërkombëtarët të mos kenë qenë në dijeni për këto gjëra, ndërkohë që pretendohet se personeli më i ulët i UÇK-së kanë marrë mesazhe kriminale sidomos përmes komunikatave.
“Nuk ka pikë vlere dhe nuk ka fare kuptim e aq më pak të përbëjë provë përtej dyshimit të arsyeshëm. Si është e mundur që ZPS-ja argumenton se si ndërkombëtarët dhe shefi i Shtabit të Përgjithshëm nuk kishin informacion për qëllimin e përbashkët kriminal por në nivel më të ulët personeli i UÇK-së kishte mundësi që të merrte mesazhe kriminale”, tha ai.
Ai deklaroi se duhet të bëhet pyetje se si është e mundur që të fshihet diçka nga ndërkombëtarët, duke shtuar se nuk iu janë dashur 20 vite atyre që të zbulojnë propagandën nxitëse në Ruandë, Bosnje e po ashtu edhe atë të Millosheviqit në Serbi.
Përpara kësaj, Mishetiq ka thënë se ka prova të mjaftueshme që Thaçi të shpallet i pafajshëm për të gjitha pikat e aktakuzës.
“Argumentet e ZPS-së nuk e përbëjnë arsyetimin e vetëm të arsyeshëm të provave që është standardi që duhet arritur me qëllim që të rishkruani historinë e Kosovës në këtë rast dhe ta gjeni fajtor Thaçin. Ka prova të bazuara të mjaftueshëm që atë ta shpallni jofajtor për të gjitha pikat e aktakuzës”, tha ai.
Mbrojtja: Presidenti serb i një shteti të organizuar s’u gjet fajtor, ZPS-ja pretendon që Thaçi është përgjegjës penalisht si pjesë e grupit të armatosur joshtetëror
(Përditësuar, ora 10:41)- Mbrojtja e Hashim Thaçit, e përfaqësuar nga avokati Luka Mishetiq, para trupit gjykues, të mërkurën po parashtron argumentet e veta se pse Thaçi është i pafajshëm në këtë çështje penale.
Në prezantimin e tij edhe digjital, Mishetiq ritheksoi se deri më tani, jurisprudenca e gjykatave dhe tribunaleve ndërkombëtare ka përcaktuar se: NATO ndërhyri ushtarakisht në Kosovë në vitin 1999 si përgjigje ndaj një Ndërmarrjeje të Përbashkët Kriminale Serbe që kishte filluar jo më vonë se tetori 1998, raporton “Betimi për Drejtësi“.
Sipas mbrojtjes, Prokuroria kërkon që vetëm mbi bazën e inferencës, të konstatojnë se ishte UÇK-ja ajo që kishte planifikuar një Ndërmarrje të Përbashkët Kriminale disa muaj më herët, në mars 1998.
Në prezantimin e saj, mbrojtja deklaroi se udhëheqësi politik serb, presidenti Milan Milutinoviq, nuk ishte penalisht përgjegjës për ngjarjet në Kosovë në vitet 1998 dhe 1999, sepse ai ishte një figurë politike që nuk kishte kontroll efektiv mbi forcat e RFJ-së, dhe për rrjedhojë nuk dha një kontribut të rëndësishëm në një Ndërmarrje të Përbashkët Kriminale.
Megjithatë, sipas mbrojtjes, Prokuroria po kërkon që, vetëm mbi bazën e inferencës, të konstatohet se udhëheqësi politik kosovar shqiptar i UÇK-së, një grup i armatosur joshtetëror që kishte ekzistuar vetëm prej disa muajsh, kishte kontroll efektiv dhe ishte penalisht përgjegjës.
“ZPS-ja po u kërkon juve që pavarësisht se presidenti serb i një shteti të organizuar nuk ka pasur përgjegjësi penale për krimet masive të luftës dhe krimet kundër njerëzimit për shkak se nuk ka pasur kontroll efektiv, duke u bazuar në këtë deduksion iu duhet të konkludoni që udhëheqësi politik i shqiptarëve të Kosovës dhe UÇK-së, një grup i armatosur joshtetëror që kishte ekzistuar vetëm prej disa muajsh, kishte kontroll efektiv dhe ishte penalisht përgjegjës. Ky rezultat do të jetë një padrejtësi ligjore dhe historike”, tha Mishetiq.
Luka Mishetiq: Hashim Thaçi është i pafajshëm, Prokuroria s’arriti të provojë të kundërtën
Në Dhomat e Specializuara të Kosovës (DHSK) në Hagë, edhe të mërkurën po vazhdon dhënia e fjalës përfundimtare në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit. Deklaratat përmbyllëse sot i nisi mbrojtja e Thaçit, avokati Luka Mishetiq.
Gjatë deklaratës së tij, avokati Luka Mishetiq tha se trupi gjykues gjatë diskutimeve konfidenciale do të arrijnë pashmangshëm në konstatimet se Prokuroria s’ka arritur që të plotësojë kriterin e barrës së provës ndaj klientit të tij, raporton “Betimi për Drejtësi“.
“Ne parashtrojmë se në kuvendimet tuaja do të arrini pashmangshëm së ZPS-ja nuk arriti të plotësojë kriteret e standardit të barrës së provës që i përket. Tërësia e provave vërteton një konsensus të dëshmitarëve ndërkombëtarë, atyre brenda UÇK-së dhe prova shkresore që vërtetojnë dyshimet e arsyeshme lidhur me pretendimet e ZPS-së”, tha ai.
Mishetiq theksoi se ndërkombëtarët kanë dëshmuar se gjërat që po ndodhnin nuk ishin të lidhura me Thaçin dhe këtë duke bazuar në informacionet e tyre, e veç asaj edhe në shërbimet e inteligjencës.
Përpara kësaj, avokati tha se të akuzuarit janë persona për të cilët ligji thotë se duhet të prezumohen të pafajshëm derisa të vërtetohet e kundërta.
“Përpara jush janë katër burra për të cilët ligji duhet të thotë se duhet të prezumohen të pafajshëm. Ky proces është sjellë këtu se ZPS ka ngritur pretendime se ata kanë prova që vërtetojnë përtej dyshimit të arsyeshëm se ata janë fajtorë dhe për rrjedhojë për më shumë se 5 vite jemi të përfshirë në këtë proces ku duhet të bëhet verifikimi i pretendimeve të ZPS-së dhe për të parë nëse ata mund të vërtetojnë këto pretendime. Ky gjykim nuk është verifikim i jetës së Thaçit. Ky është verifikim i pretendimeve të Prokurorisë së Thaçi nuk duhet të gëzojë prezumimin e pafajësisë”, tha ai.
Tutje, Mishetiq tha se diskutimet do të fillojnë me qëndrimin se Thaçi është i pafajshëm, pastaj do vlerësohen provat e paraqitura nga Prokuroria.
“Kur të filloni kuvendimet tuaja, ju do të filloni nga qëndrimi se Thaçi është i pafajshëm dhe pastaj do të vlerësoni se provat e paraqitura nga ZPS ju kanë bindur juve se jashtë dyshimit të arsyeshëm se Thaçi është fajtor. Nëse Prokuroria s’ju ka bindur ju, ju duhet të arrini të paktën një shpjegim të arsyeshëm të provave ndryshe. Pra, që Thaçi nuk është fajtor për akuzat që janë në aktakuzë”, tha ai.
Fjala përmbyllëse e Prokurorisë filloi të hënën e 9 shkurtit 2026, dhe përfundoi një ditë më pas, më 10 shkurt, ku kryeprokurorja e specializuar, Kimberly West, kërkoi dënim unik me nga 45 vjet burgim për secilin nga katër të akuzuarit. Po më 10 shkurt u dha fjala përfundimtare edhe nga mbrojtësi i viktimave, Simon Laws.
Dita e sotme është rezervuar për deklaratat përmbyllëse të mbrojtjes së Thaçit dhe asaj të Veselit, e që kjo e fundit do të vazhdojë edhe të enjten për tu pasuar më pas me Krasniqin.
Mbrojtja e Krasniqit do të përfundojë deklaratën e saj përmbyllëse të premten dhe pastaj do të vazhdojë ajo e Selimit.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi/
Sot nis dita e tretë e deklaratave përmbyllëse në gjyqin kundër ish-presidentit të Kosovës, Hashim Thaçi, ish-kryeparlamentarëve, Kadri Veseli dhe Jakup Krasniqi, dhe ish-deputetit, Rexhep Selimi në Gjykatën Speciale, me seli në Hagë. Luka Misetic, avokat i Hashim Thaçit, tha në fillim të deklaratës së tij përmbyllëse në gjykimin ndaj ish-krerëve të UÇK-së në Gjykatën […]
Qytetarë nga diaspora kanë filluar të shkojnë pranë Dhomave të Specializuara, për të marrë pjesë në seancën e sotme ku do të fillojë deklaratën përmbyllëse ekipi mbrojtës i ish-presidentit Hashim Thaçi.
Ndërkaq rreth një orë më parë, aty ka mbërritur edhe avokati i Thaviq, Lluka Mishetiq.
Në ditën e tretë të fazës përfundimtare te procesit më të madh gjyqësor në Hagë, siç edhe ka njoftuar Mishetiq, ai do të fillojë shpalosjen e deklaratës përmbyllëse nga ora 9 e mëngjesit.
Zyra e Prokurorit të Specializuar ka përmbyllur dje fjalën përfundimtare, duke vijuar më pas mbrojtësi i viktimave.
ZPS ka thënë se ka pranuar, siç pretendon, mbi pesë mijë prova materiale dhe ka intervistuar mbi 130 dëshmitarë.
Kryeprokurorja e Specializuar, Kimberly West ka kërkuar dënimin me burg nga 45 vjet për katërshen e UÇK-së, që në total i bie 180 vjet burgim.
Po ashtu, gjatë ditës së djeshme, prokuroria ka pretenduar se ish-presidenti Hashim Thaçi "i ka gënjyer disa herë ndërkombëtarët", duke përmendur kështu dëshmitë e James Rubin e Wesley Clark.
Për kërkesën e Zyrës së Prokurorit të Specializuar për dënim me nga 45 vjet burgim kanë reaguar liderët e vendit por edhe të rajonit, duke thënë se kjo nuk mbështetet në asnjë standard ndërkombëtar e po ashtu se Ushtria Çlirimtare e Kosovës bëri luftë të drejtë. /Kp/Telegrafi/
Sot në Dhomat e Specializuara të Kosovës në Hagë nis paraqitja e fjalës përmbyllëse të mbrojtjes së ish-presidentit Hashim Thaçi, në kuadër të fazës përfundimtare të procesit gjyqësor ndaj ish-krerëve të UÇK-së.
Siç ka njoftuar avokati i Thaçit, Lluka Mishetiq, ai do ta fillojë deklaratën përmbyllëse nga ora 09:00. Kjo vjen në ditën e tretë të paraqitjeve përfundimtare në një prej proceseve më të mëdha që po zhvillohet në Hagë.
Një ditë më parë, Zyra e Prokurorit të Specializuar ka përmbyllur fjalën e saj përfundimtare, ndërsa më pas para trupit gjykues është paraqitur edhe mbrojtësi i viktimave. Prokuroria ka deklaruar se gjatë hetimeve ka administruar mbi pesë mijë prova materiale dhe ka intervistuar më shumë se 130 dëshmitarë.
Kryeprokurorja e Specializuar, Kimberly West, ka kërkuar dënim me nga 45 vjet burgim për secilin prej të akuzuarve – Hashim Thaçi, Kadri Veseli, Jakup Krasniqi dhe Rexhep Selimi që në total nënkupton 180 vjet burgim.
Gjatë paraqitjes së saj, prokuroria ka pretenduar se Thaçi “i ka gënjyer disa herë ndërkombëtarët”, duke iu referuar sipas saj, dëshmive të James Rubin dhe Wesley Clark.
Kërkesa për dënime ka nxitur reagime nga liderë në Kosovë dhe rajon, të cilët kanë vlerësuar se një masë e tillë nuk mbështetet në standarde ndërkombëtare dhe kanë theksuar se Ushtria Çlirimtare e Kosovës ka zhvilluar një luftë të drejtë.
Faza e deklaratave përmbyllëse përbën etapën e fundit të këtij procesi gjyqësor. Prokuroria, mbrojtësi i viktimave, ekipet e mbrojtjes dhe të akuzuarit do të kenë mundësinë që gjatë kësaj dhe javës së ardhshme t’i paraqesin për herë të fundit argumentet e tyre para trupit gjykues.
Thaçi, Veseli, Krasniqi dhe Selimi përballen me akuza të ngritura nga Zyra e Prokurorit të Specializuar, të cilat i kanë hedhur poshtë si të pabazuara. Mbrojtja ka argumentuar se UÇK-ja nuk kishte një strukturë të organizuar komanduese dhe se përgjegjësia individuale nuk është provuar.
Gjykimi ndaj tyre ka nisur më 3 prill 2023, gati tre vjet pas konfirmimit të aktakuzës, ndërsa ish-krerët e UÇK-së vazhdojnë të mbahen në paraburgim në Hagë që nga ajo kohë. /Telegrafi/
TIRANË, 10 shkurt /ATSH/ Kryesia e Akademisë së Shkencave dhe të Arteve të Kosovës (ASHAK) doli sot me një deklaratë publike lidhur me propozimin e zyrës së Prokurorit Special për dënimet e udhëheqësve të UÇK-së.
Në deklaratë thuhet se kryesia e Akademisë së Shkencave dhe të Arteve të Kosovës (ASHAK) shpreh shqetësimin e thellë mbi propozimin e Zyrës së Prokurorit Special, për dënimin e katër figurave udhëheqëse të Ushtrisë Çlirimtare të Kosovës (UÇK): Hashim Thaçi, ish-president i Republikës së Kosovës; Kadri Veseli, ish-kryetar i Kuvendit; Jakup Krasniqi, ish-kryetar i Kuvendit; dhe Rexhep Selimi, ish-deputet i Kuvendit të Kosovës.
Kryesia e ASHAK-ut vlerëson se ky proces duhet të zhvillohet në përputhje të plotë me standardet ndërkombëtare të drejtësisë dhe të garantojë të drejtat e njeriut, siç janë të përcaktuara në Kushtetutën e Republikës së Kosovës dhe Konventën Evropiane për të Drejtat e Njeriut.
“Çdo shmangie nga këto standarde paraqet influencë politike që lëndon legjitimitetin dhe paanshmërinë e procesit gjyqësor”, thuhet në deklaratë.
Kryesia e ASHAK-ut thekson rëndësinë historike dhe morale të luftës çlirimtare të UÇK-së, e cila u zhvillua për mbrojtjen e popullatës civile dhe çlirimin e Kosovës. Kontributi i tyre ka qenë vendimtar në këtë proces historik dhe nuk mund të relativizohet apo të stigmatizohet në kuadër të një procesi që mund të ketë motive politike.
Sipas deklaratës, kryesia e ASHAK-ut kundërshton çdo përpjekje për relativizimin e gjenocidit serb mbi popullatën civile në Kosovë. Lufta e UÇK-së dhe sakrificat e shqiptarëve për lirinë e Kosovës janë pjesë e historisë së dokumentuar dhe nuk mund të mohohen ose të keqinterpretohen për çfarëdo qëllimesh të tjera. Çdo përpjekje për të stigmatizuar luftën çlirimtare përmes interpretimeve të njëanshme, paraqet një kërcënim ndaj kujtesës historike dhe drejtësisë kolektive të popullit të Kosovës.
Në deklaratë theksohet se kryesia e ASHAK-ut propozon që institucionet e Kosovës të ndërtojnë mekanizma të pavarur për monitorimin e shkeljeve të të drejtave të njeriut nga Gjykata Speciale, duke siguruar transparencë, llogaridhënie dhe respektimin e standardeve ndërkombëtare të drejtësisë. Kjo do të kontribuonte për mbrojtjen e të drejtave të individëve të përfshirë në proces, por edhe për ruajtjen e vlerave historike të luftës së popullit të Kosovës.
“Kryesia e ASHAK-ut vlerëson se kjo qasje është jetike për funksionimin e institucioneve demokratike të Kosovës, për ruajtjen e kujtesës historike dhe për forcimin e sundimit të ligjit. Akademia mbetet e gatshme të ofrojë ekspertizën e saj për të ndërtuar mekanizma monitorimi dhe analiza shkencore, të cilat do të sigurojnë që çdo proces gjyqësor të zhvillohet me drejtësi, paanshmëri dhe respekt për vlerat historike dhe qytetarinë e vendit”, përfundon deklarata.
Sot ishte dita e dytë e përmbylljes së deklaratave në gjykimin ndaj ish-presidentit të Kosovës Hashim Thaçi, ish-kryeparlamentarëve Kadri Veseli dhe Jakup Krasniqi, dhe ish-deputetit Rexhep Selimi.
Prokuroria ka kërkuar dënim prej 45 vjetësh burg për secilin nga të akuzuarit, të cilët akuzohen për krime lufte dhe krime kundër njerëzimit gjatë periudhës mars 1998 – shtator 1999, në disa zona të Kosovës dhe veriun e Shqipërisë.
Rina Mujku, gazetare e Klan Kosova e cila po ndjek nga afër procesin ndaj ish krerëvë të UÇK në Hagë, informoi në një lidhje për Balkan Update në ABC News, mbi zhvillimet e këtij procesi.
Ajo bëri një përmbledhje të deklaratave të prokurorit të Hagës në proces, ndërsa tha se në këtë proces kanë dëshmuar në favor të ish Presidentit Thaçi, dëshmitarë që ndoshta nuk do të shkelin më një sallë gjyqi.
Ndër të tjera, Mujku përcolli edhe qëndrimin e ish Presidentit Hashim Thaçi, ndërsa prokurori i Speciales, hidhte akuza të rënda në adresë të tij dhe të UÇK.
“Gjatë ditës së sotme Presidenti Hashim Thaçi ka ironizuar ka qeshur me ironi gjatë fjalës së prokurorit amerikan Matt Halling, sidomos në pjesën ku ai mundohet të diskretitojë dëshmitarët ndërkombëtarë,” tha ajo.
Kryesia e Akademisë së Shkencave dhe të Arteve të Kosovës (ASHAK) ka shprehur shqetësim të thellë lidhur me propozimin e Zyrës së Prokurorit Special për dënimin e katër figurave udhëheqëse të Ushtrisë Çlirimtare të Kosovës, përfshirë Hashim Thaçin, Kadri Veselin, Jakup Krasniqin dhe Rexhep Selimin.
Në komunikatën e saj, ASHAK thekson se procesi gjyqësor duhet të zhvillohet në përputhje të plotë me standardet ndërkombëtare të drejtësisë dhe të garantojë respektimin e të drejtave të njeriut, ashtu siç përcaktohet në Kushtetutën e Republikës së Kosovës dhe Konventën Evropiane për të Drejtat e Njeriut.
“Çdo shmangie nga këto standarde paraqet influencë politike që lëndon legjitimitetin dhe paanshmërinë e procesit gjyqësor”, thuhet në reagimin e Kryesisë së ASHAK-ut.
ASHAK gjithashtu ka theksuar rëndësinë historike dhe morale të luftës çlirimtare të UÇK-së, duke nënvizuar se kontributi i saj ka qenë vendimtar në çlirimin e Kosovës dhe nuk mund të relativizohet apo të stigmatizohet.
“Kontributi i tyre ka qenë vendimtar në këtë proces historik dhe nuk mund të relativizohet apo të stigmatizohet në kuadër të një procesi që mund të ketë motive politike”, vlerëson Kryesia e ASHAK-ut.
Në komunikatë kundërshtohet çdo përpjekje për relativizimin e gjenocidit serb mbi popullatën civile në Kosovë, duke theksuar se lufta e UÇK-së dhe sakrificat e shqiptarëve për liri janë pjesë e historisë së dokumentuar dhe nuk mund të mohohen apo keqinterpretohen.
“Çdo përpjekje për të stigmatizuar luftën çlirimtare përmes interpretimeve të njëanshme, paraqet një kërcënim ndaj kujtesës historike dhe drejtësisë kolektive të popullit të Kosovës”, thuhet në reagim.
Kryesia e ASHAK-ut ka propozuar që institucionet e Kosovës të ndërtojnë mekanizma të pavarur për monitorimin e shkeljeve të të drejtave të njeriut nga Gjykata Speciale, me qëllim të garantimit të transparencës, llogaridhënies dhe respektimit të standardeve ndërkombëtare të drejtësisë.
“Një qasje e tillë është jetike për funksionimin e institucioneve demokratike të Kosovës, për ruajtjen e kujtesës historike dhe për forcimin e sundimit të ligjit”, thekson ASHAK, duke shtuar se Akademia mbetet e gatshme të ofrojë ekspertizë dhe analiza shkencore për këtë qëllim. /Telegrafi/
TIRANË, 10 shkurt/ATSH/- Ministri i Mbrojtjes, Pirro Vengu, ka reaguar lidhur me kërkesën e Prokurorisë në Hagë për dënimin me nga 45 vite burg për ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Vengu thekson në një reagim në rrjetet sociale se revolta ndaj kërkesës për dënime maksimale buron nga kërkesa që drejtësia të jetë e ndershme dhe historikisht e përgjegjshme.
“Paraburgimi mbi pesë vjet dhe natyra e akuzave janë kthyer në instrument për të përmbysur dallimin mes agresorit dhe viktimës, ndërsa krimet e dokumentuara të aparatit shtypës serb ndaj shqiptarëve të Kosovës mbeten të pandëshkuara. Është evidente se përpjekja për të barazuar çlirimtarët tanë me gjenocidarët e Srebrenicës mbështetet në akuza të fabrikuara me ndikimin rus mbi Këshillin e Europës”, nënvizon Vengu.
Sipas tij, kjo padrejtësi e institucionalizuar rihap plagë historike dhe minon besimin e popujve në institucionet e paqes. “Në këtë formë, gjykatat ndërkombëtare po delegjitimojnë të drejtën ndërkombëtare dhe parimin e vetëvendosjes së popujve”, vijon ai.
Ministri Vengu shton se e ardhmja e Kosovës, e Serbisë dhe stabiliteti i rajonit ndërtohen vetëm mbi drejtësi të besueshme, të paanshme dhe historikisht të përgjegjshme – jo mbi barazimin e çlirimtarëve me gjenocidarët.
TIRANË, 10 shkurt /ATSH/ Kryeministri Edi Rama reagoi sërish sot lidhur me procesin gjyqësor ndaj katër udhëheqësve të Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi dhe Rexhep Selimi, në Gjykatën Speciale me seli në Hagë.
Rama iu referua deklaratave të prokurorit të Prokurorisë së Specializuar në Hagë se Thaçi ka gënjyer ndërkombëtarët duke maskuar atë që po ndodhte në realitet.
“Çfarë idioti ndërkombëtar,” u shpreh ai.
Nga ana e saj, Prokuroria e Specializuar në Hagë pretendon se Thaçi ka gënjyer disa herë ndërkombëtarët, duke sugjeruar që deklaratat e tyre duhen marrë me rezervë lidhur me UÇK-në, komandën e organizatës dhe rolin e ish-eprorëve.
Prokurori theksoi se figura të njohura ndërkombëtare, si James Rubin dhe Wesley Clark, nuk kishin kuptuar plotësisht realitetin e situatës në terren dhe aftësinë e Thaçit për të maskuar veprimet e tij, çka sipas tij ndikoi në perceptimin e tyre për funksionimin e UÇK-së.
“Ata nuk e dinin se ai (Thaçi) mund të bënte emërime ushtarake…Ajo që nuk kuptojnë James Rubin, Wesley Clark dhe ndërkombëtarë të tjerë është që Thaçi ishte i aftë të maskonte atë që po ndodhte në realitet dhe kjo ndikoi në botëkuptimin e tyre për të kuptuar vërtet se si funksiononte UÇK-ja. Veçanërisht Rubin dhe Clark treguan se nuk kishin asnjë interes për të kuptuar çfarë ndodhte në realitet dhe besonin se puna e tyre ishte në anën e duhur të historisë dhe nuk u përballën me atë çka po dëgjon tashmë ky trup gjykues dhe për të cilën do të marrë vendimet përkatëse. Vendimet e tyre nuk ishin në përputhje me standardet ligjore ndërkomnëtare sa i takon kontrollit efektiv. Kryekomandanti i identifikuar i UÇK mund të mos ketë në gjendje të ushtrojë komandën sikurse ushtritë e SHBA dhe NATO-s, po as nuk kishte nevojë ta bënte këtë gjë. Paragrafi 613 i dosjes sonë flet për shumëllojshmërinë e hierarkive, të cilat janë të mjaftueshme për të konstatuar përgjegjësinë eprore sipas të drejtës ndërkombëtare humanitare”, u shpreh Prokurori.
Sot është dita e dytë e përmbylljes së deklaratave në gjykimin ndaj ish-presidentit të Kosovës Hashim Thaçi, ish-kryeparlamentarëve Kadri Veseli dhe Jakup Krasniqi, dhe ish-deputetit Rexhep Selimi.
Prokuroria ka kërkuar dënim prej 45 vjetësh burg për secilin nga të akuzuarit, të cilët akuzohen për krime lufte dhe krime kundër njerëzimit gjatë periudhës mars 1998 – shtator 1999, në disa zona të Kosovës dhe veriun e Shqipërisë. Të katërtit janë deklaruar të pafajshëm.
Pas përmbylljes së deklaratave përmbyllëse, çështja do t’i kalojë trupit gjykues, i cili ka afat tre muaj për të marrë vendim, me mundësinë e zgjatjes së këtij afati. /j.p/
Njëri ndër ish-komandantët e UÇK-së, Haxhi Shala, është liruar nga Gjykata Speciale ku po mbahej në paraburgim. Haxhi Shala u lirua sot më 10 shkurt 2026 dhe u kthye në Kosovë, pas vendimit të Kryetares së Dhomave të Specializuara të Kosovës (DHSK), gjykatëse Ekaterina Trendafilova, për modifikimin e dënimit të tij më 2 shkurt 2026. […]
Zyra e Prokurorit të Specializuar (ZPS) ka përmbyllur sot deklaratën e saj përfundimtare në procesin gjyqësor ndaj Hashim Thaçit dhe tre të akuzuarve të tjerë para Dhomave të Specializuara të Kosovës në Hagë.
Në paraqitjen e saj përmbyllëse, ZPS-ja i kërkoi Trupit Gjykues që t’i shpallë fajtorë të katër të akuzuarit për të gjitha pikat e Aktakuzës, duke argumentuar se provat e administruara gjatë procesit gjyqësor vërtetojnë përgjegjësinë e tyre penale për krimet e pretenduara.
Prokuroria kërkoi që secili prej të akuzuarve të dënohet me nga 45 vjet burgim.
Pas përfundimit të deklaratës së Prokurorisë, fjala i kaloi Mbrojtësit të Viktimave, i cili ka nisur paraqitjen e deklaratës së tij përmbyllëse, duke përfaqësuar interesat dhe kërkesat e viktimave të përfshira në këtë proces.
Procesi gjyqësor pritet të vazhdojë me deklaratat përfundimtare të palëve mbrojtëse në ditët në vijim, përpara se Trupi Gjykues të tërhiqet për vendimmarrje. /Telegrafi/
Në fjalët përfundimtare në gjyqin e madh ndaj sish-krerëve të UÇK-së, deklaratat përmbyllëse është duke i dhënë edhe mbrojtës i viktimave, Sajmon Loz.
Ai tha se lufta e Ushtrisë Çlirimtare të Kosovës pashmangshëm do të çonte në humbje jetësh, transmeton Klankosova.tv.
Ndërsa ai, po ashtu shtroi një sërë pyetjesh, që sipas tij, duhet të iu bëhen viktimave.
“Ka njerëz që zgjohen sot me dhimbje në trupin e tyre, dhe në mungesë të njerëzve. Nuk është ekzagjerim kur thuhet se këto krime kanë lënë plagë të pashërueshme. Lufta e UÇK-së do të çonte në humbje jetësh. Shumë prej viktimave kanë mbështetur UÇK-në. Ishte e pashmangshme që do humbnin jetë njerëzisht, por a ishte e pashmangshme që kjo luftë që të çonte në mizori?
A ishte e pashmangshme që një luftë çlirimtare të çonte në humbjen e lirisë për një numër kaq të madh njerëzish? Këto ngjarje a e kanë pasur burimin në trurin që donin ta merrnin pushtetin, apo thjesht spontante? “, ishin pyetjet dhe deklarimi i Loz.
TIRANË, 9 shkurt/ATSH/ Kryetari i Partisë Demokratike, Sali Berisha, reagoi sot lidhur me paraqitjen e aktakuzës nga Prokuroria në Hagë ndaj ish-udhëheqësve politikë të Kosovës.
Berisha u shpreh se Prokuroria Speciale e Gjykatës së Kosovës në Hagë paraqiti akuza të rënda dhe kërkoi dënime me vite të gjata burgimi për drejtuesit kryesorë të Ushtrisë Çlirimtare të Kosovës.
Ai theksoi se, ndonëse është i bindur se drejtësia duhet të japë verdiktin e saj për çdo krim dhe për këdo që e ka kryer atë, pas ndjekjes së procesit shumëvjeçar të gjykimit, para opinionit publik nuk është paraqitur asnjë provë, fakt apo dokument që të provojë krime konkrete të kryera nga të akuzuarit.
Berisha e cilësoi aktakuzën si një ripërsëritje të shpifjeve të propagandës së ultranacionalistëve serbë dhe trillimeve të ish-prokurorit serb Vladimir Vukçeviç, duke iu referuar akuzave për trafik organesh, përfshirë edhe pretendime për veprime të tilla në territorin e Shqipërisë.
Në këtë kontekst, kreu i PD i bëri thirrje Gjykatës që vendimet e saj të mos ndikohen nga akuza që ai i cilësoi si propagandistike dhe të pashembullta në historinë e drejtësisë ndërkombëtare, duke kërkuar që, në emër të ligjit, të konfirmohet pafajësia e ish-udhëheqësve politikë dhe ushtarakë të Kosovës.
Kryetari i Partisë Demokratike, Sali Berisha, ka reaguar pas paraqitjes së pretencës nga prokurorët ndërkombëtarë në Hagë ndaj ish-udhëheqësve të Ushtrisë Çlirimtare të Kosovës (UÇK), për të cilët janë kërkuar dënime me dhjetëra vite burg. Në një reagim në rrjetet sociale, Berisha u shpreh se akuzat e paraqitura përbëjnë, sipas tij, një ripërsëritje të pretendimeve […]
Kryeministri në detyrë, Albin Kurti, ka reaguar ndaj kërkesës së Prokurorisë në Hagë për dënimin e katërshes së UÇK-së me nga 45 vjet burgim, 180 në total. Kurti tha se një gjë e tillë nuk mbështetet në standarde ndërkombëtare, por edhe e injoron kontekstin e luftës në Kosovë. “Ne nuk kemi pasur kurrë plan shfarosje […]
PRISHTINË, 9 shkurt/ATSH/ Teksa në Hagë mbahet sot seanca e deklaratave përmbyllëse në procesin ndaj ish-krerëve të UÇK-së, presidentja e Kosovës Vjosa Osmani tha se çdo përpjekje që tenton ta barazojë luftën e Ushtrisë Çlirimtare të Kosovës “me krimet e agresorit gjenocidal serb e minon besimin në drejtësi dhe e dëmton rëndë paqen afatgjatë”.
Osmani u shpreh në rrjetet sociale se qytetarët e Kosovës duan drejtësi, por theksoi se lufta e UÇK-së “ishte e drejtë dhe e pastër”.
“Kjo e vërtetë nuk ndryshohet me tentime për ta rishkruar historinë dhe për ta njollosur dhe zhvleftësuar betejën e popullit të Kosovës për liri”, theksoi Osmani.
Në Gjykatën Speciale në Hagë nisën sot deklaratat përmbyllëse për rastin gjyqësor kundër ish-presidentit të Kosovës, Hashim Thaçi, ish-kryeparlamentarëve, Kadri Veseli dhe Jakup Krasniqi, dhe ish-deputetit, Rexhep Selimi.
Ata akuzohen për krime lufte dhe krime kundër njerëzimit, për të cilat të katërt janë deklaruar të pafajshëm. /j.p/r.e/
Login
