Bankat qendrore në mbarë botën janë bashkuar për të deklaruar se qëndrojnë në “solidaritet të plotë” me kryetarin e Rezervës Federale pas nisjes së një hetimi penal ndaj Jerome Powell nga Shtetet e Bashkuara.

Kreu i Bankës së Anglisë, i Bankës Qendrore Evropiane dhe i Bankës së Kanadasë janë ndër 11 bankierët e lartë që kanë nënshkruar një deklaratë, duke theksuar rëndësinë e pavarësisë në vendosjen e normave të interesit.

“Kryetari Powell ka shërbyer me integritet, i fokusuar në mandatet e tij dhe me një përkushtim të palëkundur ndaj interesit publik”, thanë ata.

Hetimin po e kryen Departamenti i Drejtësisë. Presidenti amerikan, Donald Trump ka deklaruar se nuk “di asgjë” për hetimin. Hetimi lidhet me dëshminë që Powell dha para një komiteti të Senatit mbi rinovimet e ndërtesave të Rezervës Federale.

Ky zhvillim vjen pas një viti sulmesh të pandërprera ndaj kryetarit të Fed nga Trump, i cili ka ushtruar presion që Rezerva Federale të ulë më agresivisht kostot e huamarrjes, raporton bbc.

Përveç kritikave për vendimet e Powell mbi normat e interesit, Trump ka bërë edhe komente personale, duke e quajtur kryetarin e Fed një “humbës të madh” dhe një “kokëfortë”.

Duke komentuar mbi kryetarin e Fed, bankierët qendrorë globalë thanë në deklaratën e tyre të përbashkët “për ne, ai është një koleg i respektuar, që mbahet në konsideratë të lartë nga të gjithë ata që kanë punuar me të”.

Deri në fundjavë, Powell kishte qëndruar kryesisht i heshtur përballë sulmeve të Trumpit, por të dielën reagoi publikisht dhe paralajmëroi se pavarësia e bankës qendrore amerikane është në rrezik.

“Kjo ka të bëjë me faktin nëse Fed do të mund të vazhdojë të vendosë normat e interesit bazuar në evidencë dhe kushtet ekonomike, apo nëse politika monetare do të udhëhiqet nga presioni politik ose intimidimi”, tha Powell.

Fed ka ulur normat e interesit tre herë që nga shtatori, duke lënë normën kyçe të huamarrjes rreth 3.6 për qind.

Por, politikanët janë të ndarë mbi hapat e ardhshëm. Disa shqetësohen se ulje të mëtejshme mund të përshkallëzojnë inflacionin, i cili vazhdon të rritet.

Çmimet e konsumit u rritën me 2.7 për qind gjatë 12 muajve deri në dhjetor, sipas të dhënave zyrtare të publikuara të martën. Kjo ishte e njëjta normë si në nëntor dhe mbeti më e lartë se objektivi 2 për qind i Fed.

Në deklaratën e tyre të përbashkët të martën, institucionet financiare ndërkombëtare thanë “pavarësia e bankave qendrore është një gurthemeli i stabilitetit të çmimeve, financiar dhe ekonomik në interes të qytetarëve që ne shërbejmë. Prandaj është thelbësore të ruhet kjo pavarësi, me respekt të plotë për sundimin e ligjit dhe llogaridhënien demokratike”.

Powell, i cili u nominua nga Trump si kryetar i Fed në 2017 gjatë mandatit të tij të parë në Shtëpinë e Bardhë, pritet të largohet në maj.

Trump pritet të emërojë pasardhësin e tij në javët e ardhshme.

Powell është mbështetur gjithashtu nga tre ish-kryetarë të Fed – Janet Yellen, Ben Bernanke dhe Alan Greenspan. Disa zyrtarë të tjerë të shquar kanë deklaruar publikisht mbështetjen e tyre për të dhe për pavarësinë e bankës.

Nënshkruesit në tërësi janë:

Andrew Bailey, guvernator i Bankës së Anglisë

Christine Lagarde, presidente e Bankës Qendrore Evropiane

Erik Thedéen, guvernator i Sveriges Riksbank

Christian Kettel Thomsen, kryetar i Danmarks Nationalbank

Martin Schlegel, kryetar i Swiss National Bank

Michele Bullock, guvernator i Reserve Bank of Australia

Tiff Macklem, guvernator i Bank of Canada

Chang Yong Rhee, guvernator i Bank of Korea

Gabriel Galípolo, guvernator i Banco Central do Brasil

François Villeroy de Galhau, kryetar i Bank for International Settlements

Pablo Hernández de Cos, menaxher i përgjithshëm i Bank for International Settlements. /Telegrafi/

Banka Botërore sugjeron se përmirësimi i skemës publike të pensioneve në afat të shkurtër mund të arrihet edhe pa një ristrukturim të plotë të sistemit, por përmes një sërë masash që adresojnë dobësitë aktuale të skemës kontributive. Të rritet presioni mbi pagesën e kontributeve Theksi kryesor i Bankës në dokumentin e fundit “Rritja e Qëndrueshmërisë […]

The post Banka Botërore: Tre drejtimet për ndërhyrje afatshkurtra në skemën e pensioneve appeared first on BoldNews.al.

Raporti “Lëvizshmëria Ndërkombëtare si Strategji Zhvillimi” nga Banka Botërore, 2024, mbështet ndërtimin e një sistemi gjithëpërfshirës të migracionit, të quajtur “GlobAL”, i cili i sheh emigrantët si një forcë pune shqiptare globale.

Kjo qasje synon forcimin e mbështetjes për emigrantët, shfrytëzimin e aftësive dhe burimeve të tyre, si dhe sigurimin e kontributit të tyre në ekonominë dhe shoqërinë vendase.

Vendimmarrje e informuar

Banka Botërore sugjeron ndërtimin e sistemeve të forta të të dhënave mbi emigrantët. Duhen zbatuar anketa familjare mbi migracionin që ndjekin të gjithë trajektoren migratore dhe jo vetëm momente të veçuara në kohë.

Banka rekomandon krijimin e një sistemi të integruar të të dhënave që lidhin të gjitha shërbimet dhe rezultatet për emigrantët ndërmjet institucioneve, duke mundësuar menaxhim të plotë të rasteve dhe duke shmangur mbledhjen e dyfishtë të të dhënave.

Banka rekomandon zbatimin e monitorimit dhe vlerësimit të bazuar në prova, për të përmirësuar vazhdimisht programet mbi bazën e rezultateve reale dhe për t’i përshtatur ato sipas nevojave.

Bashkëpunim i koordinuar

Banka sugjeron krijimin e një përgjigjeje të bashkërenduar mes të gjithë aktorëve të përfshirë në qeverisjen e migracionit dhe ofrimin e shërbimeve.

Sipas saj, duhen forcuar mekanizmat e koordinimit ndërinstitucional, me role, përgjegjësi dhe protokolle të qarta komunikimi ndërmjet ministrive dhe agjencive.

Duhet siguruar përputhshmëria ndërmjet qeverisjes qendrore dhe asaj vendore, për të shmangur mbivendosjet dhe boshllëqet në shërbime dhe për të garantuar ofrim të njëtrajtshëm në të gjithë vendin.

Vlen gjithashtu ndërtimi i partneriteteve shumëpalëshe që përfshijnë sektorin privat, organizatat joqeveritare, organizatat ndërkombëtare dhe diasporën në ekosistemin e shërbimeve.

Banka kërkon zgjerimin e bashkëpunimit ndërkufitar me vendet pritëse, për të ofruar shërbime përgjatë gjithë ciklit të migracionit.

Shërbime globale shumëdimensionale

Ofrimi i mbështetjes gjithëpërfshirëse për emigrantët, duke adresuar të gjitha aspektet e nevojave të tyre të shumëllojshme dhe në ndryshim të vazhdueshëm, të tilla si zgjerimi i shërbimeve për të mbuluar të gjithë ciklin e migracionit, nga përgatitja para nisjes deri tek riintegrimi pas kthimit, si dhe për ata që qëndrojnë jashtë vendit, këshilloi Banka Botërore.

Sipas saj, duhet të bëhet përshtatja e paketave të shërbimeve sipas karakteristikave të emigrantëve, si niveli i aftësive, përbërja familjare, rezultatet në tregun e punës dhe qëllimet për kthim.

Lehtësimi nga barrierat

Eliminimi i barrierave burokratike dhe thjeshtimi i ofrimit të shërbimeve për emigrantët duhet të përfshijë konsolidimin e të gjithë informacionit, shërbimeve dhe procedurave në një portal të vetëm dixhital, si e-Albania, i aksesueshëm para, gjatë dhe pas migrimit.

Nevojitet standardizimi i procedurave në të gjitha institucionet dhe bashkitë, me procese të njëjta aplikimi dhe kërkesa dokumentacioni dhe ndërtimi i një qasjeje “dixhitale së pari”, me autentifikim në distancë, aplikime online dhe udhëzim të mbështetur nga Inteligjenca Artificiale, duke ruajtur njëkohësisht alternativat fizike.

Duhet të thjeshtohen procedurat burokratike, reduktimi i dokumentacionit, kohës së pritjes dhe hapave të panevojshëm përmes koordinimit ndërinstitucional.

Ekspertizë dhe kapacitete më të forta

Banka Botërore kërkon garantimin e niveleve të mjaftueshme të stafit në të gjitha pikat e ofrimit të shërbimeve për emigrantët, nga zyrat vendore deri te rolet strategjike të vendimmarrjes.

Duhen rritur investimet në programe gjithëpërfshirëse trajnimi për të mbajtur stafin të përditësuar mbi shërbimet ekzistuese, praktikat më të mira dhe ndryshimet rregullatore.

Banka sugjeron se investimet në anketa që ndjekin emigrantët në kohë reduktojnë paragjykimet në vlerësimin e ndikimeve të migracionit dhe kontribuojnë në hartimin e politikave më të informuara.

Rezultatet tregojnë gjithashtu se zgjerimi i shërbimeve për emigrantët, përfshirë ato para nisjes, mund të përmirësojë ndjeshëm rezultatet e tyre, duke pasur parasysh lidhjen e fortë me mundësi më të mira punësimi jashtë vendit dhe pas kthimit në Shqipëri.

Po ashtu, përshtatja e paketave të shërbimeve sipas karakteristikave të emigrantëve rezulton thelbësore, për shkak të diversitetit të madh të nevojave dhe përvojave migratore.

Lexo lajmin

Emigrantët kthehen, por Shqipëria nuk i mban

The post Banka Botërore: Si ta bëjmë më të lehtë kthimin dhe qëndrimin appeared first on Revista Monitor.

TIRANË, 13 dhjetor /ATSH/ Ministri i Turizmit, Kulturës dhe Sportit, Blendi Gonxhja, ka zhvilluar një takim me përfaqësues të lartë të Grupit të Bankës Botërore, ku në fokus ishte forcimi i bashkëpunimit afatgjatë dhe projektet strategjike për zhvillimin e vendit.

Në postimin e tij, Gonxhja bëri të ditur se ka mirëpritur Massimiliano Paolucci, menaxherin e ri të Grupit të Bankës Botërore për Shqipërinë, si edhe Xiaoqing Yu, drejtoreshë e Divizionit për Ballkanin Perëndimor, Evropë dhe Azi Qendrore.

Gjatë takimit u diskutua mbi iniciativa konkrete që synojnë nxitjen e investimeve në art, kulturë, trashëgimi kulturore, destinacione turistike dhe zhvillim komunitar.

Ministri theksoi se bashkëpunimi me Bankën Botërore do të vijojë të përqendrohet te transformimi i infrastrukturës kulturore dhe te modelet e reja të financimit, të cilat synojnë të gjenerojnë impakt të qëndrueshëm ekonomik, social dhe kulturor për Shqipërinë.

Sipas Gonxhes, këto projekte strategjike janë pjesë e vizionit për një zhvillim të integruar të turizmit dhe kulturës, duke i shndërruar asetet kulturore dhe turistike në motorë të rëndësishëm të zhvillimit lokal dhe kombëtar.

/gj.m/r.e/

The post Gonxhja me përfaqësuesit e BB, fokusi investimet në kulturë e turizëm appeared first on Agjencia Telegrafike Shqiptare.

TIRANË, 3 dhjetor/ATSH/ Ministri i Turizmit, Kulturës dhe Sportit, Blendi Gonxhja zhvilloi një takim me përfaqësues të Bankës Botërore, me synimin për të thelluar bashkëpunimin strategjik në funksion të zhvillimit të qëndrueshëm dhe konkurrues të turizmit në Shqipëri.

Në një postim në rrjetet sociale, Gonxhja tha se “në takim diskutuam mbi standardizimin e destinacioneve natyrore, përmirësimin e furnizimit me ujë dhe infrastrukturës kritike në zonat turistike, forcimin e strukturave të menaxhimit të destinacioneve (DMO), ngritjen e një sistemi kombëtar të të dhënave të turizmit dhe avancimin e ndërlidhjes rajonale, si komponentë kyç për rritjen e kapaciteteve dhe cilësisë në sektor”.

“Rikonfirmuam angazhimin e përbashkët për zbatimin e Strategjisë së Turizmit 2024–2030, duke vënë theksin te rezultatet konkrete dhe objektivat afatgjata”, theksoi Gonxhja.

Ministri Gonxhja shprehu vlerësimin për partneritetin e qëndrueshëm me Bankën Botërore, duke e cilësuar atë një aktor kyç në mbështetjen e prioriteteve të zhvillimit.

1 nga 5

/k.s/r.e/a.f/

The post Gonxhja në takim me BB: Standardizim të destinacioneve dhe sistem kombëtar për të dhënat në turizëm appeared first on Agjencia Telegrafike Shqiptare.

Sipas Raportit Financiar të Bankës Botërore për Shqipërinë mbledhja e taksave mbetet nën potencial për shkak të informalitetit, përjashtimeve dhe zbatimit të dobët. Të ardhurat totale janë nën mesataren rajonale, produktiviteti i ulët i tatimit mbi të ardhurat personale dhe tatimi mbi fitimin tregon baza të pashfrytëzuara, efikasiteti i TVSH-së është vetëm 54% dhe shpenzimet […]

The post Banka Botërore: 4.8% e PBB-së së Shqipërisë humbet nga taksat e paarkëtuara, mbi 80% nga TVSH-ja appeared first on BoldNews.al.

Shqipëria ka nevojë urgjente për forcimin e Edukimit dhe Kujdesit në Fëmijërinë e Hershme si një formë e mbështetjes së zhvillimit të kapitalit njerëzor dhe pjesëmarrjes në tregun e punës. Në dokumentin e fundit të rishikimit të financave publike në Shqipëri, i Bankës Botërore nënvizohet se pavarësisht rritjes së shpenzimeve publike për këtë zë, ato […]

The post BB i “tërheq veshin” Ramës: Shqipëria, nevojë urgjente për forcimin e edukimit në fëmijërinë e hershme appeared first on BoldNews.al.

Në valën e një paqeje fiskale që qeveria po diskuton gjerësisht në këtë paketë fiskale duket se institucionet ndërkombëtare financiare vënë theksin në anën tjetër të peshores atë të mbledhjes së taksave dhe forcimit të masave për pajtueshmërinë fiskale. Banka Botërore prezantoi rishikimin e financave publike në Shqipëri, një raport që vë theksin tek forcimi […]

The post Banka Botërore: Rënia dhe plakja e popullsisë në Shqipëri, sfidë për qëndrueshmërinë fiskale appeared first on BoldNews.al.

Rindërtimi i Sirisë pas më shumë se një dekade lufte civile pritet të kushtojë rreth 216 miliardë dollarë (185 miliardë euro), tha Banka Botërore në një vlerësim të publikuar të martën.

Kostoja është pothuajse 10 herë më e madhe se prodhimi i brendshëm bruto i Sirisë për vitin 2024, transmeton Telegrafi.

Konflikti shkatërroi pjesë të mëdha të vendit dhe dëmtoi infrastrukturën kritike, përfshirë rrjetin e saj elektrik.

Banka Botërore thotë se rindërtimi mund të kushtojë midis 140 dhe 345 miliardë dollarëve, por "vlerësimi i tyre më i mirë konservator" është 216 miliardë dollarë.

Banka Botërore vlerëson se rindërtimi i infrastrukturës do të kushtojë 82 miliardë dollarë (70 miliardë euro). Ajo vlerësoi koston e dëmeve për ndërtesat rezidenciale në 75 miliardë dollarë (64 miliardë euro) dhe 59 miliardë dollarë (50 miliardë euro) për strukturat jo-rezidenciale.

Provinca e Alepos dhe fshati i Damaskut, ku u zhvilluan beteja të ashpra, do të kërkojnë investimet më të mëdha, sipas vlerësimit.

"Sfidat që na presin janë të jashtëzakonshme, por Banka Botërore është e gatshme të punojë përkrah popullit sirian dhe bashkësisë ndërkombëtare për të mbështetur rimëkëmbjen dhe rindërtimin", tha në një deklaratë Drejtori i Bankës Botërore për Lindjen e Mesme, Jean-Christophe Carret.

Pavarësisht rivendosjes së marrëdhënieve diplomatike me Perëndimin dhe nënshkrimit të marrëveshjeve të investimeve me vlerë miliarda dollarë me vendet e Gjirit që kur ish-presidenti Bashar al-Assad u largua nga Siria, vendi ende po përballet me vështirësi financiare.

Ndërsa Shtetet e Bashkuara dhe Evropa kanë hequr shumë nga sanksionet e vendosura gjatë sundimit të dinastisë al-Assad, ndikimi në terren deri më tani ka qenë i kufizuar.

Shkurtimet e ndihmës ndërkombëtare kanë përkeqësuar kushtet e jetesës për shumë njerëz. Kombet e Bashkuara vlerësojnë se 90% e popullsisë së Sirisë jeton në varfëri.

Lufta civile e Sirisë filloi në vitin 2011 kur protestat masive kundër qeverisë së presidentit të atëhershëm Bashar al-Assad u përballën me një shtypje brutale dhe u shndërruan në konflikt të armatosur.

Konflikti i ashpër vrau qindra mijëra sirianë dhe zhvendosi po aq të tjerë, me zona të gjera të vendit të shkatërruara.

Më shumë se 6 milionë sirianë u regjistruan si refugjatë ose azilkërkues deri në fund të vitit 2024, kryesisht në Turqi, Liban dhe Jordani.

BE-ja është shtëpia e rreth 1.3 milionë sirianëve, të shpërndarë kryesisht në Gjermani, Suedi dhe Austri.

Al-Assad u rrëzua nga pushteti në një ofensivë të shpejtë të rebelëve në dhjetor, pasi sundoi vendin për më shumë se 20 vjet. /Telegrafi/

Sipas të dhënave të fundit të Bankës Botërore për vitin 2024, Kosova renditet e para në botë për nga shkalla e tkurrjes së popullsisë, me një rënie prej -9.7 për qind, raporton Telegrafi.

Ky rezultat e vendos Kosovën në krye të listës së vendeve me rënien më të madhe demografike në nivel global — një shifër që ekspertët e cilësojnë si alarmante për të ardhmen e zhvillimit social dhe ekonomik të vendit.

Foto: Banka Botërore/Prsc

Ndërkohë që popullsia botërore ka shënuar një rritje mesatare prej 1 për qind, Kosova po përballet me trendin e kundërt, kryesisht për shkak të emigrimit masiv drejt vendeve evropiane, në kërkim të mundësive më të mira jetese dhe punësimi.

Pavarësisht përpjekjeve të institucioneve për të frenuar largimin e qytetarëve dhe për të nxitur rritjen e popullsisë përmes subvencioneve dhe politikave stimuluese, të dhënat tregojnë se vendi po përballet me një krizë demografike të thellë.

Foto: Banka Botërore/Prsc

Në raportin e Bankës Botërore theksohet gjithashtu se Shqipëria është mes vendeve me rënie të popullsisë, me një shkallë tkurrjeje prej -1.1 për qind, ndërsa vendet e tjera të rajonit regjistrojnë shifra më të ulëta, që variojnë deri në -5 për qind.

Kjo situatë ngre nevojën për masa urgjente politike dhe ekonomike, që synojnë jo vetëm ndalimin e emigrimit, por edhe krijimin e kushteve që të rinjtë ta shohin të ardhmen e tyre brenda vendit. /Telegrafi/

PRISHTINË, 7 tetor /ATSH/ Banka Botërore parashikon rënie të rritjes ekonomike nga 3.6 për qind në 2024-tën në 3 për qind në 2025-tën për shtetet e Ballkanit Perëndimor.

Sipas raportit të Bankës Botërore, rënien më të madhe është parashikuar ta ketë Kosova, që megjithatë mbetet pak mbi mesataren rajonit.

“Pas rritjes me 4.4 për qind në vitin 2024, ekonomia e Kosovës u ngadalësua në 3.6 për qind në tremujorin e parë të vitit 2025, ndërsa konsumi familjar u lehtësua dhe kërkesa e jashtme u dobësua. Konsumi privat u rrit me 4.3 për qind, duke qenë ende nxitësi kryesor i rritjes, megjithëse me një ritëm më të ngadaltë krahasuar me vitin e kaluar”, thuhet në raportin e Bankës Botërore për Kosovën.

Sipas BB, pagat reale u rritën me 10.3 përqind në vitin 2024, të mbështetura nga një pagë minimale më e lartë, por punësimi formal u rrit vetëm në mënyrë modeste, duke arritur mesatarisht 1.4 për qind në gjysmën e parë të vitit 2025. Investimet gjithashtu u forcuan, me formimin e kapitalit bruto që u rrit me 13.6 përqind, duke nxitur aktivitetin në ndërtim dhe prodhim, ndërsa shërbimet financiare u zgjeruan së bashku me kërkesën në rritje”, bën të ditur Banka Botërore.

“Inflacioni i konsumatorit arriti në 4.3 përqind në korrik 2025, duke e çuar mesataren janar-korrik në 3 përqind. Inflacioni bazë gjithashtu u rrit vazhdimisht gjatë kësaj periudhe, duke arritur mesatarisht 1.5 përqind deri në korrik 2025. Rreziqet e sektorit fiskal dhe financiar mbeten të kufizuara, duke siguruar një sfond të qëndrueshëm për ekonominë pavarësisht ngadalësimit të rritjes. Pozicioni fiskal vazhdon të mbështetet nga rritja e fortë e të ardhurave tatimore”, thuhet në këtë raport.

Megjithatë, sipas Bankës Botërore vonesat e zgjatura në formimin e një qeverie të re mund të ndikojnë negativisht në investime dhe të ngadalësojnë progresin në reformat strukturore.

Kosova mbetet me raportin më të ulët të borxhit PPG ndaj PBB-së, në 17.1 për qind.

“Totali i borxhit publik dhe atij publik të garantuar (PPG) pritet të bjerë lehtë për rajonin në tërësi, në 44.4 për qind të PBB-së deri në fund të vitit 2025, nga 45.0 për qind e PBB-së në vitin 2024. Bosnja dhe Hercegovina përbën pjesën më të madhe të përmirësimit, falë ngushtimit të deficitit fiskal – me një rënie të parashikuar prej 1.5 pikë përqindje të PBB-së. Shqipëria dhe Serbia ndjekin me rënie prej përkatësisht 0.8 dhe 0.7 pikë përqindje të PBB-së, të nxitura nga shlyerja neto e borxhit të jashtëm, ndërsa Maqedonia e Veriut regjistron një rritje prej 0.5 pikë përqindje për shkak të rritjes së borxhit publik të drejtpërdrejtë. Në terma të nivelit, Maqedonia e Veriut dhe Mali i Zi pritet të ruajnë raportet më të larta të borxhit PPG në rajon, përkatësisht në 62.9 dhe 60.6 për qind të PBB-së, të ndjekura nga Shqipëria me 53.4 për qind, Serbia me 46.8 për qind dhe Bosnja dhe Hercegovina me 25.7 për qind, ndërsa Kosova mbetet me raportin më të ulët të borxhit PPG ndaj PBB-së, në 17.1 për qind”, thuhet në raportin e Bankës Botërore.

/Kosovapress/

The post Banka Botërore: Ngadalësohet rritja ekonomike në Kosovë appeared first on Agjencia Telegrafike Shqiptare.

Raporti i Bankës Botërore për rajonin e Ballkanit ka paraqitur të dhëna edhe për ekonominë e Kosovës. Në raport thuhet se në vitin 2025 presionet nga inflacioni janë rikthyer, të nxitura nga çmimet më të larta të energjisë dhe ushqimeve, duke ulur kështu të ardhurat reale të disponueshme.

Në raport thuhet se pas një rritjeje prej 4.4 për qind në vitin 2024, ekonomia e Kosovës u ngadalësua në 3.6 për qind në tremujorin e parë të vitit 2025, për shkak të uljes së konsumit të familjeve dhe dobësimit të kërkesës së jashtme.

Tutje thuhet se vonesat e zgjatura në formimin e një qeverie të re mund të ndikojnë negativisht në investime dhe të ngadalësojnë përparimin në reformat strukturore.

Në raport po ashtu thuhet se pagat reale u rritën me 10.3 për qind në vitin 2024, të mbështetura nga një rritje e pagës minimale, por punësimi formal u rrit vetëm në mënyrë modeste, me një mesatare prej 1.4 për qind në gjysmën e parë të vitit 2025.

Edhe investimet u forcuan, me bruto të kapitalit që u rrit me 13.6 për qind, duke nxitur aktivitete në ndërtimtari dhe industri përpunuese, ndërsa shërbimet financiare u zgjeruan përkrah kërkesës në rritje.

Kërkesa e fortë e brendshme gjithashtu nxiti rritjen e importeve, të cilat u rritën me 14.5 për qind në pesë muajt e parë të vitit, duke tejkaluar një rritje prej 12 për qind të eksporteve.

“Dërgesat nga diaspora dhe investimet e huaja direkte dhanë vetëm mbështetje të kufizuar, duke shënuar rritje përkatësisht prej 3.5 për qind dhe 3.6 për qind deri në maj”, thuhet tutje.

Kërkesa e lartë e brendshme, përfshirë rritjen e konsumit të qeverisë, së bashku me çmimet në rritje të ushqimeve, pijeve, energjisë elektrike dhe shërbimeve, nxiti inflacionin në gjysmën e parë të vitit 2025.

“Inflacioni i konsumatorit arriti në 4.3 për qind në korrik 2025, duke e çuar mesataren për periudhën janar–korrik në 3 për qind. Edhe inflacioni bazë u rrit gjatë kësaj periudhe, duke arritur një mesatare prej 1.5 për qind deri në korrik 2025”, thuhet në raportin e BB-së.

Rreziqet fiskale dhe ato në sektorin financiar mbeten të kufizuara, duke ofruar një sfond të qëndrueshëm për ekonominë, pavarësisht ngadalësimit të rritjes.

“Pozicioni fiskal vazhdon të mbështetet nga taksat e forta mbi shpenzimet aktuale, së bashku me ekzekutimin më të lartë të investimeve publike, të cilat pritet të mbajnë deficitin fiskal rreth 1 për qind të PBB-së midis viteve 2026 dhe 2027.

Një pjesë e raportit e Bankës Botërore ka të bëjë edhe me perspektivën dhe pasigurinë.

“Vonesat në formimin e një qeverie të re mund të ngadalësojnë zbatimin e agjendës së reformave strukturore dhe të vonojnë aksesin në financim të jashtëm, përfshirë Planin e ri të Rritjes së BE-së”, thuhet tutje.

Raporti thekson se emigrimi i vazhdueshëm është pengesë për rritjen, ndërsa potenciali i pashfrytëzuar vendas, veçanërisht i grave, mund të zhbllokohet duke rritur pjesëmarrjen e grave në fuqinë punëtore. /Telegrafi/

Rritja reale e BPV-së nga 3,1 për qind në vitin 2025, nga 3 për qind në vitin 2026 dhe nga 3 për qind në vitin 2027 janë vlerësimet e Bankës Botërore për vendin. Sipas raportit të fundit, dallimi në përqindje në pika përqindje nga projeksionet në raportin e pranverës për vitin 2025 është në epërsi dhe arrin 0,4, 0,3 dhe 0,2 për këto tre vite.

Vlerësimet dhe parashikimet i pasqyrojnë të dhënat e kapshme deri më 20 shtator të vitit 2025.

Rritja ekonomike në Ballkanin Perëndimor parashikohet të përshpejtohet me ritme të moderuara në vitin 2026 dhe të rimëkëmbet më fortë në vitin 2027, e mbështetur kryesisht nga rritja e eksporteve dhe investimeve, ndërsa pasiguritë në ekonominë globale zbuten. Për të mbështetur progresin drejt përafrimit me Bashkimin Evropian, rajoni duhet të fokusohet në krijimin e vendeve më cilësore të punës, sipas raportit më të fundit të Bankës Botërore të publikuar sot.

Në vitin 2025, rritja ekonomike në Ballkanin Perëndimor u ngadalësua për shkak se inflacioni zbehu rritjen e konsumit dhe rritja e pasigurisë frenoi tregtinë dhe investimet, pavarësisht rritjes së fortë të pagave dhe kredive. Politika fiskale, ndonëse disi e lehtësuar, mbeti e disiplinuar, ku deficiti ishte nën 3% dhe borxhi publik vijoi trajektoren rënëse.

Raporti i Rregullt Ekonomik për Ballkanin Perëndimor parashikon që rritja ekonomike e kombinuar e Shqipërisë, Bosnjës dhe Hercegovinës, Kosovës, Malit të Zi, Maqedonisë së Veriut dhe Serbisë do të arrijë në 3.0 për qind në vitin 2025, që është 0.2 pikë përqindje më e ulët se parashikimet e mëparshme. Rritja parashikohet të përshpejtohet në 3.1për qind në vitin 2026 dhe 3.6 për qind në vitin 2027.

“Ballkani Perëndimor po përparon në drejtim të ngushtimit të hendekut të zhvillimit me ekonomitë më të përparuara të Bashkimit Evropian, por rritja mbetet e pamjaftueshme për të përmbushur aspiratat e qytetarëve”, thotë Xiaoqing Yu, Drejtoreshë e Bankës Botërore për Ballkanin Perëndimor. “Në mënyrë që rajoni të shndërrohet në një ekonomi moderne, është e rëndësishme të riformulohen strategjitë e punësimit – siç janë nxitja e rritjes së pjesëmarrjes në tregun e punës, përmirësimi i aftësive të popullsisë dhe rritja e bizneseve përmes përdorimit të teknologjive më të reja digjitale.”

Sipas raportit, Ballkani Perëndimor përballet me një paradoks të tregut të punës: mungesa e fuqisë punëtore vijon të jetë e pranishme në disa sektorë, paralelisht me shkallën e lartë të papunësisë – mbi 10 për qind – dhe pjesëmarrjen e ulët në forcën e punës, e cila mbetet nën 55 përqind, veçanërisht për gratë, të rinjtë dhe të moshuarit.

Tendencat demografike po i përkeqësojnë akoma më shumë këto sfida. Popullsia në moshë pune ka rënë ndjeshëm dhe parashikohet të tkurret me gati 20 përqind deri në vitin 2050. Nëse tendencat aktuale të popullsisë, rritjes ekonomike dhe të tregut të punës do të vazhdojnë, rajoni mund të përballet me një mungesë prej më shumë se 190,000 punëtorësh gjatë pesë viteve të ardhshme.

Për t’i hapur rrugë rritjes ekonomike, Ballkani Perëndimor duhet të investojë në infrastrukturën bazë, e cila është thelbësore për krijimin e vendeve të punës. Kjo përfshin forcimin e sistemeve të arsimit dhe shëndetësisë dhe rritjen e pjesëmarrjes në forcën e punës – veçanërisht për gratë. Investimi në infrastrukturën e transportit, mjedisit dhe energjisë do të ndihmonte në një lidhje më të shpejtë dhe më efikase të bizneseve me punonjësit, duke përmirësuar kështu produktivitetin.

Së dyti, forcimi i qeverisjes dhe mbështetja e politikave për krijimin e bizneseve, së bashku me një mjedis rregullator të parashikueshëm, janë thelbësore për funksionimin dhe rritjen e sektorit privat. Nxitja e konkurrencës në sektorë kyç si energjia dhe transporti, reformimi i ndërmarrjeve shtetërore, thjeshtimi i rregullave dhe mbështetja e bizneseve të reja inovative (startup-eve) do t’u japë mundësi bizneseve të zgjerohen dhe të përmirësojnë cilësinë e shërbimeve.

Së fundi, mobilizimi i kapitalit privat duhet të mbështesë bizneset me financim, investime, garanci dhe sigurime, duke inkurajuar gjithashtu përdorimin e teknologjive më të reja digjitale dhe të gjelbra.

Banka Botërore ka vlerësuar si të kënaqshme ecurinë e projektit për rritjen e sigurisë së urave, duke parashikuar që shumica e aktiviteteve të përfundojnë brenda këtij viti.

Punimet për Urën e Viroit pritet të përfundojnë në fund të tetorit.

“Projekti ‘Ndërtimi i Urave Rezistente në Shqipëri’ është në vitin e dytë të zbatimit, pasi u shpall efektiv më 1 dhjetor 2023.

Zbatimi po ecën në mënyrë të kënaqshme, me pritshmëri që shumica e aktiviteteve kryesore të përfundojnë në mënyrë substanciale deri në fund të dhjetorit 2025. Punimet civile në Urën Viroi pritet të mbyllen në fund të tetorit,” thuhet në raportin e Bankës Botërore.

Projekti, i miratuar më 16 mars 2023, ka për qëllim të forcojë rezistencën e urave kritike ndaj ndryshimeve klimatike dhe rreziqeve natyrore, si dhe të përmirësojë menaxhimin e rrugëve dhe të aseteve të urave në vend.

Ai përfshin tre komponentë kryesorë: infrastrukturë urash (44 milion USD), ndërtim të kapaciteteve institucionale (7 milion USD) dhe menaxhim të projektit (4 milion USD), duke e çuar vlerën totale në 55 milion USD.

Me herët është nënvizuar se projekti rrit sigurinë e qytetarëve dhe lehtësinë e qasjes në rrugët kombëtare, duke përfituar drejtpërdrejt rreth 300,000 banorë.

Ai synon të nxisë zhvillimin ekonomik dhe turizmin, duke krijuar vende të reja pune dhe duke përmirësuar tregtinë lokale. Gjithashtu, përmirësimi i urave të dëmtuara parandalon izolimin e fshatrave dhe rrit kapacitetet teknike të bizneseve dhe punonjësve lokalë.

The post Projekti 55 mln USD i urave, BB: Në tetor përfundojnë punimet për Viroin appeared first on Revista Monitor.

Maqedonia e Veriut, Kosova dhe Moldavia janë ndër vendet që përjetojnë rënien më të madhe të popullsisë në botë, sipas një raporti të ri të Bankës Botërore, njofton "H1".

Arsyeja kryesore për këtë trend është emigrimi masiv, veçanërisht nga vendet e Evropës Lindore ku hendeku i pagave me vendet e Evropës Perëndimore dhe mundësitë e hapura nga integrimi në Bashkimin Evropian inkurajojnë emigrimin e fuqisë punëtore.

Shqipëria renditet e nënta në listën e 42 vendeve dhe territoreve me rënien më të madhe të popullsisë.

Sipas Bankës Botërore, rajoni i Evropës Lindore ka qenë një nga më të prekurit nga ky trend demografik në dekadat e fundit./Telegrafi/

Vonesat në formimin e një qeverie të re mund të ndikojnë negativisht në investime dhe zbatimin e agjendës së reformës strukturore, thuhet në një raport të Bankës Botërore për Kosovën, ku projeksionet e kësaj banke tregojnë se në Kosovë pritet të ketë një normë të rritjes ekonomike vetëm 3.8 për qind për vitin aktual dhe 2026-ën.

Në anën tjetër, Banka Qendrore e Kosovës (BQK), parasheh që kjo normë të arrijë në 4.1 për qind në vitin 2025. Ndërsa, sipas BQK-së, 4.2 për qind pritet të rritet kjo normë në vitin 2026, raporton KosovaPress.

Këto vlera të Bruto Prodhimit Vendor (BPV), sipas ekspertëve të ekonomisë nuk janë të mjaftueshme për zhvillimin ekonomik të vendit dhe reduktimin e papunësisë në Kosovë. Madje, ata shprehen skeptik se do të arrihet rritja ekonomike prej 4.1 për qind këtë vit.

Siç thonë ata, masat sanksionuese të Bashkimit Evropian, pezullimi i dialogut strategjik m Shtetet e Bashkuara të Amerikës dhe mungesa e qeverisjes efektive ndikojnë që kjo normë të mbetet e tillë, duke mos qenë e mjaftueshme për përmirësimin e jetës së qytetarëve në vendin tonë.

Profesori i ekonomisë, Muhamet Sadiku në një prononcim për KosovaPress potencon se vlerësimet e BQK-së nuk janë optimiste, pasi norma aktuale e rritjes ekonomike konsiderohet e pamjaftueshme përballë sfidave që ka Kosova.

Ai përmend nivelin e ulët të eksporteve, mungesën e investimeve, sidomos atyre të huaja, si dhe projeksionet për inflacionin, të cilat, sipas tij, tregojnë shenja të një mbijetese ekonomike.

"Vlerësimet e BQK-së dhe Fondit Monetar Ndërkombëtar për fat të keq janë jo optimiste, sepse kjo normë e rritjes ekonomike në raport me problemet me të cilat përballet Kosova është e pamjaftuar. Duke pasur parasysh nivelin e ulët të eksportit, nivelin e ulët të mobilizimit të investimeve sidomos mungesën e investimeve të jashtme, e tërë kjo reflektohet në atë që Kosova me këtë normë, dhe duke pas parasysh projeksionet për inflacionin në vitin e ardhshëm, tregon shenjat e një mbijetese...Rritja ekonomike e Kosovës duhet të shndërrohet në zhvillim ekonomik...Këtë rritje ekonomike duhet ballafaquar me problemet që vijnë nga vendosja e sanksioneve të Bashkimit Evropian ndaj Kosovës dhe sidomos ngjarjet e fundit që kanë të bëjnë me ndërprerjen e dialogut strategjik me SHBA-në, dhe të dy këto gjërat të shoqëruar me mungesën e qeverisjes efektive, këtë normë e bëjnë të pamjaftuar në ambiciet e Kosovës për tu bërë pjesë e BE-së dhe për të përmirësuar jetën e vet", thotë Sadiku.

Po ashtu, edhe eksperti i ekonomisë, Lekë Musa thekson se shkalla aktuale e rritjes prej mbi 4 për qind nuk është e mjaftueshme për të zbutur papunësinë dhe për të përmirësuar mirëqenien në Kosovë.

Sipas tij, për të arritur nivelet e vendeve të rajonit dhe Bashkimit Evropian, Kosova duhet të ketë një rritje ekonomike prej së paku 8 për qind, për të ulur sado pak përqindje e papunësisë.

"Duke pasur parasysh që Kosova ngec me vendet e rajonit dhe gjithashtu e ka një shkallë të papunësisë të lartë mbi 10 për qind, atëherë shtrohet pyetja se ky 4 për qindësh a mjafton për të zbutur pa punësinë dhe për të ngritur mirëqenien apo së paku kosovarët të jetojnë barabartë me vendet e rajonit. Eventualisht që të mbërrijmë edhe normanë e mirëqenies në vendet e Bashkimit Evropian meqenëse ai është synimi ynë. Po të krahasohet niveli i të ardhurave për kokë banori në Kosovë me vendet e Ballkanit, ky trend i rritjes ekonomike në Kosovë duhet të jetë së paku 8 për qind. Rritja duhet të jetë së paku dyfish më e lartë sesa 4 për qind, me kushtin që vendet në rajon të mbesin ku janë për momentin...Kosovës i duhet së paku ta dyfishojë rritjen ekonomike dhe për të zvogëluar këtë papunësi, e cila mund të jetë e kënaqshme për Kosovën 5-6 për qind. Atëherë, gjithashtu rritja ekonomike duhet të jetë së paku 10 për qind në vit për të arritur që të zvogëlojmë diku papunësinë për 2 për qind në vit në vend", thotë Musa.

Siç thekson Musa në një prononcim për KosovaPress, për të arritur një normë më të lartë të rritjes ekonomike në Kosovë, qeveritë e ardhshme duhet të vendosin zhvillimin ekonomik si synimin kryesor.

Në Raportin e Rregullt Ekonomik për Ballkanin Perëndimor të Bankës Botërore thuhet se rritja ekonomike në Kosovë pritet të arrijë në 3,8 për qind në vitet 2025 dhe 2026.

“Rritja ekonomike do të mbështetet nga konsumi dhe aktiviteti investues. Megjithatë, pasiguria ekonomike, veçanërisht në lidhje me politikën e tregtisë globale, është rritur muajt e fundit. Vonesat në formimin e një qeverie të re mund të ndikojnë negativisht në investime dhe zbatimin e agjendës së reformës strukturore”, shkruan në këtë raport të Bankës Botërore.

Kosova ka mbajtur zgjedhjet parlamentare më 9 shkurt, por ende nuk është bërë formimi i institucioneve të reja. Gjykata Kushtetuese, ka vendosur masë të përkohshme për konstituimin e Kuvendit deri më 30 shtator.

Ndërkaq, në një përgjigje me shkrim, Banka Qendrore e Kosovës thotë se për vitin 2025 parashikohet rritje reale e Bruto Produktit Vendor (BPV) prej 4.1%, e cila mbështetet kryesisht nga kërkesa e brendshme dhe eksporti i shërbimeve.

“Banka Qendrore e Republikës së Kosovës (BQK) për vitin 2025 parashikon rritje reale të Bruto Produktit Vendor (BPV) prej 4.1%, e cila mbështetet kryesisht nga kërkesa e brendshme dhe eksporti i shërbimeve. Për vitin 2026, pritet që rritja të arrijë në 4.2%. Megjithatë, në muajin shtator pritet të publikohen nga Agjencia e Statistikave të Kosovës (ASK) të dhënat për tremujorin e dytë të vitit 2025, si dhe të dhënat vjetore për vitin 2024, të cilat do të ofrojnë një pasqyrë më të qartë mbi zhvillimet në ekonominë e Kosovës dhe do të mundësojnë një rishikim e këtyre projeksioneve”, thuhet në përgjigjen me shkrim te BQK-së për KosovaPress.

Kryetari i Odës Ekonomike të Kosovës (OEK), Lulzim Rafuna, shprehet skeptik lidhur me parashikimin e Bankës Qendrore të Kosovës për rritje ekonomike prej 4.1 për qind. Sipas tij, nëse vazhdon trendi aktual, kjo normë nuk do të arrihet, duke pasur parasysh se gjashtëmujori i parë është mbyllur me 3.6 për qind rritje.

Rafuna thekson se Kosova ka nevojë për një rritje prej të paktën 6–7 për qind, ndërsa ideale sipas tij do të ishte një rritje dyshifrore.

"Ky është një parashikim i Bankës Qendrore të Kosovës, një parashikim që nëse vazhdon ky trend siç e kemi sot, nuk besoj që do ta arrijmë 4.1 përqindëshin. Për arsye se gjashtëmujorin e parë e kemi mbyllur me 3.6. Një rritje ekonomike që nuk len asnjë gjurmë në asnjë pore të Kosovës për tu vërejtur një ndryshim i madh, ne duhet ta kemi një rritje 6-7 për qind minimumi. Por, më mirë do të ishte po të kishim pasur një rritje ekonomike dyshifrore...Veprimet e fundit me çështjen e energjisë elektrike por edhe pezullimi i dialogut strategjik nga ana e SHBA-së, të qenit nën masa sanksionuese, mos ekzekutimi komplet i shumës së para në ligjin e buxhetit për investime kapitale, mos ndihma në reforma fiskale, të arsimit, shëndetësisë, sundimit të ligjit për ta ndryshuar një ambient për ta bërë më të mirë për investime, ka shtyrë që edhe investitorët e brendshëm që i kemi kosovarë, nuk i kanë zgjeruar investimet e tyre në Kosovë por i kanë nxjerrë jashtë Kosovës", potencon Rafuna.

Sipas Bankës Botërore, rritja ekonomike në Kosovë në vitin 2023 ka qenë 4.1 për qind, në vitin 2024 kjo normë ishte 4.4, derisa parashikimi për vitin 2025 është 3.8 për qind.

Përndryshe, sipas raportit të Bankës Botërore, rritja ekonomike në Ballkanin Perendimorëparashikohet të ngadalësohet në 3.2 për qind në vitin 2025, përpara se të rikuperohet në 3.5 për qind në vitin 2026, mes pasigurive të shtuara./kp/

TIRANË, 8 shtator /ATSH/ Në kuadër të misionit teknik të Bankës Botërore për projektin “Lehtësimi i Tregtisë dhe Transportit në Ballkanin Perëndimor (TTFP 2.0)”, në ambientet e Agjencisë Shtetërore e Programimit Strategjik dhe Koordinimit të Ndihmës u zhvillua një takim pune.

Qëllimi i takimit ishte të vlerësohej progresi i fazës së parë të projektit dhe të planifikoheshin hapat për fazën e dytë.

Massimiliano Paolucci, shefi i Zyrës së Bankës Botërore për Shqipërinë, vlerësoi ecurinë pozitive të TTFP 2.0. Ai theksoi nevojën për forcimin e bashkëpunimit ndërinstitucional, që projekti të ecë me sukses dhe të shmangen vështirësitë e fazës së parë.

Drejtoresha e Përgjithshme e Agjencisë Shtetërore e Programimit Strategjik dhe Koordinimit të Ndihmës, Eridana Çano, falënderoi Bankën Botërore për bashkëpunimin deri tani dhe nënvizoi rëndësinë e ndërhyrjes në Pikën e Kalimit Kufitar Kakavijë.

Ajo përmendi edhe përgjigjen dërguar Komisionit Evropian në kuadër të nismës “Green Lanes”, që lidhet me Programin për Transport të Sigurt dhe të Qëndrueshëm (SSTP), financuar nga Kuadri i Investimeve për Ballkanin Perëndimor (ËBIF) dhe menaxhuar nga Banka Botërore.

1 nga 10

/gj.m/j.p/

The post Lehtësimi i tregtisë dhe transportit në Ballkanin Perëndimor, Çano takim me përfaqësues të BB appeared first on Agjencia Telegrafike Shqiptare.

“Pallati i Kongreseve”, një monument kulture në pronësi të Bashkisë Tiranë, që prej 25 korrikut, me vendim të mazhorancës së anëtarëve socialistë të Këshillit Bashkiak, i ka kaluar në pronësi Korporatës Shqiptare të Investimeve (AIC), një shoqërie aksionare shtetërore që ka synim ‘zhvillimin’ e pronave publike. E ndërtuar në vitet e fundit të diktaturës komuniste […]

The post Korporata e Investimeve: Akti final i ‘faljes’ së pronës publike në Shqipëri appeared first on Reporter.al.

Turizmi ka përmirësuar gjendjen ekonomike të komuniteteve të ndryshme në Shqipëri por edhe ka krijuar një sërë vendesh pune.

Në një raport të fundit Banka Botëror thekson se Mundësia e krijuar nga zhvillimi i turizmit të trashëgimisë sidomos në Shqipërinë Jugore dhe investimet e sektorit privat kanë përmbysur gjithashtu rënien e popullsisë së rajonit, duke vepruar si një magnet për tërheqjen e të rinjve apo të  kthyerve nga emigrimi.

Sipas Bankës Botërore Turizmi në Shqipëri  po lulëzon, ndërsa referuar të dhënave Shqipëria pati një rritje prej 82% të mbërritjeve turistike në vitin 2024 krahasuar me vitin 2019. Në jug të Shqipërisë, shifrat janë edhe më mbresëlënëse, me Beratin që ka parë gati katër herë më shumë turistë në të njëjtën periudhë kohore dhe gjashtë herë më shumë që vizitojnë Gjirokastrën.

Ky fluks, i inkurajuar nga përpjekjet e udhëhequra nga sektori publik, po tërheq investime më të mëdha në sektorin privat. Sipërmarrja lokale po lulëzon, me familjet që i shndërrojnë shtëpitë historike në hotele me mëngjes, duke lançuar përvoja kulinare dhe kulturore, dhe madje duke investuar në infrastrukturë të re si shtigje për ecje dhe biçikleta, autobusë elektrikë, varka dhe së shpejti zipline-e funksionale, të cilat po nxisin rritjen në fusha si turizmi aventuresk dhe rekreacioni në natyrë.

Banka Botërore në një analizë të bërë për  investimet e kryera në Shqipëri për këtë sektor  thekson se në partneritet me Qeverinë, ka ndihmuar në restaurimin e vendeve historike, përmirësimin e infrastrukturës dhe zgjerimin e shërbimeve turistike – duke sjellë mundësi të reja ekonomike dhe vende pune për komunitetet përreth qyteteve të Beratit, Gjirokastrës, Përmetit dhe Sarandës.

/abcnews.al/

Guvernatori i Bankës Qendrore të Republikës së Kosovës (BQK), Ahmet Ismaili, së bashku me zëvendësguvernatoren Shileku-Shala dhe bashkëpunëtorët e tij, ka zhvilluar një takim njoftues me drejtoreshën e re të Bankës Botërore (BB) për Kosovë, Carole Megevand me bashkëpunëtorë.

Gjatë takimit, Guvernatori Ismaili e uroi Megevand për detyrën e re dhe i dëshiroi suksese në avancimin e projekteve dhe reformave të Bankës Botërore në funksion të mbështetjes së ekonomisë së Kosovës.

Guvernatori Ismaili e informoi Megevand për zhvillimet më të fundit të sektorit financiar, si dhe për progresin e reformave të ndërmarra nga BQK-ja për të nxitur rritjen e qëndrueshme ekonomike dhe forcimin e sistemit financiar.

Diskutimet u fokusuan në zhvillimet aktuale në sektorin financiar, bashkëpunimin e vazhdueshëm ndërmjet BQK-së dhe Bankës Botërore, si dhe programet e reja të BB-së për fuqizimin e sektorit financiar, duke përfshirë asistencat teknike përkatëse të dedikuara për BQK-në.

Guvernatori Ismaili shprehu mirënjohje për mbështetjen e vazhdueshme të Bankës Botërore, duke theksuar rëndësinë e këtij bashkëpunimi për arritjen e objektivave strategjike të BQK-së, veçanërisht në fushat e reformave ligjore dhe rregullative, digjitalizimit, kapitalizimit të sektorit financiar, rritjes së qëndrueshmërisë financiare, anëtarësimit në SEPA dhe zbatimit të agjendës së gjelbër.

Në këtë kuadër, Megevand vuri në dukje progresin e bërë drejt harmonizimit të kornizës ligjore e rregullative me standardet e Bashkimit Evropian nga ana e Kosovës, derisa Guvernatori e informoi për përgatitjet si dhe sfidat aktuale për procesin e aplikimit për anëtarësim në Zonën Unike të Pagesave në Euro (SEPA).

Guvernatori Ismaili theksoi rolin e rëndësishëm të projektit rajonal të Bankës Botërore për modernizimin e sistemit të pagesave, përkatësisht zhvillimin e pagesave të shpejta (Instant Payments) përmes Bankës Qendrore të Italisë dhe lidhjen e tyre me sistemet e pagesave të Bashkimit Evropian dhe Bankës Qendrore Evropiane pas anëtarësimit në SEPA.

Të dyja palët riafirmuan angazhimin për të vazhduar bashkëpunimin e ngushtë, duke vlerësuar rezultatet e deritanishme të projekteve të përbashkëta.

The post Banka Botërore dhe BQK riafirmojnë angazhimin për projekte të përbashkëta strategjike appeared first on Telegrafi.