UASHINGON, 28 dhjetor /ATSH-DPA/ – Presidenti amerikan Donald Trump tha sot se kishte pasur një bisedë telefonike “shumë produktive” me presidentin rus Vladimir Putin, pak para se të priste presidentin ukrainas Volodymyr Zelensky në Florida.

“Sapo kam pasur një bisedë të mirë dhe shumë produktive me presidentin Putin”, shkroi Trump në platformën e tij Truth Social, pa dhënë detaje të mëtejshme.

Zëdhënësi i Kremlinit, Dmitry Peskov, konfirmoi bisedën telefonike kur u pyet nga agjencitë ruse të lajmeve, por refuzoi të tregojë se çfarë u diskutua.

Ky zhvillim vjen ndërsa presidenti amerikan ka planifikuar të zhvilloj takimin me Zelenskyn në resortin e tij Mar-a-Lago në Palm Beach, si pjesë e përpjekjeve të fundit për të përfunduar luftën që nisi Rusia në shkurt 2022.

Administrata Trump në fund të nëntorit paraqiti një plan paqeje me 28 pika, i cili shqetësoi Kievin dhe aleatët e tij duke reflektuar disa pozicione të Kremlinit.

Që atëherë, Zelensky dhe partnerët e tij kanë punuar mbi një kornizë të rishikuar me 20 pika, përfshirë gjatë takimeve të fundit në Berlin dhe Majemi me zyrtarë të lartë të administratës Trump, ndërsa SHBA-ja ka zhvilluar gjithashtu bisedime të veçanta me Moskën. /Ad.Ab./

The post SHBA – Trump: Bisedë produktive me Putinin para takimit me Zelenskyn appeared first on Agjencia Telegrafike Shqiptare.

TIRANË, 28 dhjetor/ATSH/ Qeveria shqiptare pritet të miratojë një amnisti penale, si një akt ligjor të bazuar te humanizmi, drejtësia sociale dhe standardet evropiane të drejtësisë.

Nismën e ka komunikuar sot ministri i Drejtësisë, Besfort Lamallari përmes një videomesazhi, ku zbulon edhe detaje nga kategoritë dhe numrin e përfituesve nga kjo amnisti.

“Nga zbatimi i kësaj amnistie në vlerësimet paraprake të Drejtorisë së Përgjithshme të Burgjeve, rreth 380 persona do të përfitojnë lirim të menjëhershëm; dhe rreth 900 të tjerë përfitojnë ulje dënimi, ndërsa numri real i përfituesve është edhe më i lartë, duke përfshirë ata që përfitojnë nga pushimi i ndjekjes penale si dhe masat alternative”, tha Lamallari.

Sipas tij në këto kategori përfituesish përfshihen të mitur, gra dhe persona të dënuar për vepra me rrezikshmëri të ulët shoqërore.

Lamallari theksoi se nga kjo amnisti nuk përfitojnë personat e dënuar për krime të rënda, raste korrupsioni apo vepra me rrezikshmëri të lartë shoqërore.

“Sigurisht që nga kjo amnisti nuk mund të përfitojnë ata që kanë kryer krime të rënda, korrupsion apo vepra me rrezikshmëri të lartë shoqërore. Kurrsesi jo subjekte që janë hetuar nga SPAK dhe gjykuar nga GJKKO.  Nuk ka amnisti selektive dhe as favorizime, por kritere ligjore të qarta dhe transparente. Kush e sheh amnistinë si dobësi, ngatërron ndëshkimin me drejtësinë”, u shpreh Lamallari, duke theksuar se kjo amnisti nuk është falje e shkeljes së ligjit, por një shans i dytë, i dhënë me përgjegjësi, për ata që mund dhe duhet të rikthehen në shoqëri dhe pranë familjeve të tyre.

“Ne besojmë në një drejtësi të drejtë, jo për statistikë dhe as në kurriz të të pamundurve, një drejtësi që nuk humbet kurrë humanizmin, dhe që në frymë dhe shpirt udhëhiqet nga standarde të panegociueshme demokratike europiane”, tha ministri Lamallari.

“Ky lajm i mirë për përfituesit direkt dhe për familjet e tyre është me siguri urimi më i mirë i këtij fundviti. Kjo amnisti që ne do të miratojmë nuk është kurrsesi një lëshim politik, por një politikë penale moderne. Një shtet i fortë nuk ka nevojë të mbajë në burg njerëz pa rrezikshmëri reale, por të investojë në rehabilitim dhe siguri afatgjatë. Drejtësia evropiane nuk matet me numrin e të burgosurve, por me parandalim, rehabilitim dhe uljen e përsëritjes së veprave penale”, vijoi ai.

Sipas Ministrit të Drejtësisë, amnistia që do të miratohet në Këshillin e Ministrave nuk është një vendim i rastësishëm. Lamallari tha se “ajo vjen pas një analize të detajuar të situatës në sistemin e drejtësisë penale, në bashkëpunim me organet përgjegjëse, dhe adreson një shqetësim madhor; përdorimin e lartë të masës së paraburgimit dhe nevojën për një qasje më proporcionale dhe më humane”.

“Sot, për fat të keq, në sistemin e burgjeve ndodhen rreth 5 mijë persona, nga të cilët një pjesë e konsiderueshme, konkretisht më shumë se gjysma e tyre janë të paraburgosur. Kjo situatë kërkon ndërhyrje të përgjegjshme dhe të mejëhershme, në përputhje me standardet dhe praktikat më të mira evropiane.

Paraburgimi i tepruar është një shqetësim persistent në sistemin tonë penitenciar, shqetësim i ngritur në mënyrë të përsëritur nga Këshilli i Europës si dhe nga partnerët tanë evropianë. Mbipopullimi në burgje nuk është forcë e shtetit, është dobësi e sistemit. Kjo amnisti e korrigjon në një farë mënyrë atë dobësi teksa ne kemi ende punë përpara për një politikë penale moderne që i përgjigjet stadit në të cilin Shqipëria është sot dhe nesër si vend anëtar i Bashkimit Europian”, tha Lamallari.

“Jam veçanërisht i lumtur që në këto kategori përfituesish përfshihen të mitur, gra dhe persona të dënuar për vepra me rrezikshmëri të ulët shoqërore. Efekti është konkret dhe i menjëhershëm, popullimi në burgje ulet me gati 7%, përmirësohen kushtet e trajtimit, sigurisë dhe rehabilitimit, si dhe garantojmë më shumë respekt ndaj dinjitetit njerëzor”, pohoi ministri Lamallari.

“Kjo amnisti nuk është falje e shkeljes së ligjit, por një shans i dytë, i dhënë me përgjegjësi, për ata që mund dhe duhet të rikthehen në shoqëri dhe pranë familjeve të tyre. Ne besojmë në një drejtësi të drejtë, jo për statistikë dhe as në kurriz të të pamundurve, një drejtësi që nuk humbet kurrë humanizmin, dhe që në frymë dhe shpirt udhëhiqet nga standarde të panegociueshme demokratike”, përfundoi ministri Lamallari.

/e.i/r.e/

The post Qeveria miraton amnistinë e fundvitit, lirohen 380 të burgosur, ulet dënimi për 900 të tjerë appeared first on Agjencia Telegrafike Shqiptare.

PRISHTINË, 28 dhjetor /ATSH/ Procesi i votimit në komunat veriore deri në këto momente ka kaluar pa incidente, derisa janë ndaluar hyrjet ilegale nga Serbia për të votuar.

Veton Elshani, zëvendësdrejtor i rajonit të veriut i ka thënë KosovaPress-it, se që nga orët e hershme të mëngjesit, kur është bërë hapja e vendvotimeve në veri të vendit, nuk kemi iniciuar asnjë rast për hetim deri në këtë moment.

“Më herët, gjatë zgjedhjeve të kaluara, kemi pasur informacione se njerëzit po vinin përmes rrugëve ilegale, konkretisht nga ura e Bërnjakut, kalonin tek ne dhe më pas vazhdonin në veri të vendit. Këtë e kemi ndaluar edhe atëherë, por e kemi ndaluar edhe tani paraprakisht. Kjo ka qenë arsyeja pse janë marrë këto masa. Po ashtu, kemi pasur koordinim me Policinë Kufitare, pasi aty janë edhe barkat, si dhe me KFOR-in. Nuk kemi pasur raste për të ndaluar dikë, pasi ata persona janë kthyer nga ajo rrugë”, tha ai.

Elshani komentoi edhe votimin e organizuar të Listës Serbe.

“Në orët e mëngjesit kemi pasur edhe një votim të organizuar, të ashtuquajtur, nga sheshi “Car Lazari” e më pas drejt qendrave të votimit. Kjo ka ndodhur edhe në komunat e tjera të veriut të vendit dhe ka qenë një praktikë e përsëritur edhe herëve të kaluara. Për këtë e kemi njoftuar KQZ-në dhe Prokurorinë e Shtetit, por nuk kemi pasur rast për të hapur”, tha ai.

Ai shtoi se ekziston një plan i përgjithshëm në nivel të Kosovës lidhur me zgjedhjet që po mbahen sot dhe se ata janë pjesë e atij plani, por me disa specifika për shkak se janë zonë kufitare me Serbinë.

Ai shtoi se në veri ka shumë rrugë ilegale dhe të gjitha janë të mbuluara nga ana e Policisë Kufitare, ndërsa dje edhe nga njësitë e KFOR-it, në kuadër të bashkëpunimit të përbashkët që kemi.

Sipas tij, deri tani nuk ka ndodhur asnjë incident në veri. /KosovaPress/

The post Zgjedhjet në veri pa incidente, Policia ndalon hyrjet ilegale nga Serbia appeared first on Agjencia Telegrafike Shqiptare.

PRISHTINË, 28 dhjetor /ATSH/ Në platformën e KQZ-së Kosovë u publikuan të dhënat për pjesëmarrjen në zgjedhje deri në orën 17:00. Sipas procesimit të 98.12 për qind të vendvotimeve, dalja është 38.25 për qind.

Kjo nënkupton se deri më tani kanë votuar 764.694 votues.

Kur kanë mbetur më pak se një orë deri në mbylljen e vendvotimeve në 38 komuna të Kosovës, përfaqësues të partive të ndryshme politike po u bëjnë thirrje qytetarët që të shfrytëzojnë këtë kohë për të ushtruar të drejtën e tyre kushtetuese.

Deri më tani, sipas institucioneve, nuk ka pasur ndonjë incident të madh dhe aktualisht nuk ka asnjë të ndaluar për veprat penale që ndërlidhen me zgjedhjet.

Ndërkaq, KQZ-ja ka raportuar se në disa qendra të votimit ka pasur ndërprerje të energjisë elektrike, por që KEDS-i ka ndërhyrë duke e zgjidhur problemin. /REL/

The post KQZ: Mbi 38% pjesëmarrje në votime deri në orën 17:00 appeared first on Agjencia Telegrafike Shqiptare.

LONDËR, 28 dhjetor /ATSH/-  Një rishikim i gjerë shkencor sugjeron se, pavarësisht përdorimit gjithnjë e më të madh, ka prova të pamjaftueshme shkencore që kanabisi mjekësor të jetë efektiv për shumicën e gjendjeve për të cilat promovohet. Megjithatë, disa shkencëtarë kanë vënë në pikëpyetje cilësinë e gjetjeve të studimit, sipas “ScienceAlert”.

Studiues në SHBA analizuan 124 studime, të përzgjedhura nga mbi 2 500 punime të publikuara mes janarit 2010 dhe dhjetorit 2025.

Rishikimi konfirmoi se kanabisi mjekësor duket se është efektiv për disa pak gjendje, për të cilat Administrata Amerikane e Ushqimit dhe Barnave (FDA) e ka miratuar tashmë përdorimin.

Këto përfshijnë uljen e të përzierave dhe të vjellave nga kimioterapia, përmirësimin e oreksit te pacientët me HIV, si dhe trajtimin e disa çrregullimeve të rënda të krizave epileptike te fëmijët.

Por, sipas studimit, këto raste janë përjashtim, jo rregull.

“Provat nga provat klinike të randomizuara nuk e mbështesin përdorimin e kanabisit apo kanabinoidëve për shumicën e gjendjeve, për të cilat promovohet, si dhimbja akute dhe pagjumësia, shkruajnë autorët.

Rishikimi thekson gjithashtu rreziqe të mundshme shëndetësore nga përdorimi i shpeshtë i kanabisit të thithur ose me potencë të lartë, përfshirë rritjen e rrezikut për simptoma psikotike, çrregullim të përgjithësuar ankthi dhe sëmundje kardiovaskulare.

“Ndërsa shumë njerëz i drejtohen kanabisit duke kërkuar lehtësim, rishikimi ynë nxjerr në pah hendekë të mëdhenj mes perceptimit publik dhe provave shkencore për efektivitetin e tij në shumicën e gjendjeve mjekësore”, tha autori kryesor Michael Hsu, studiues klinik në Universitetin e Kalifornisë, Los Anxhelos (UCLA).

“Nevojiten kërkime të mëtejshme për të kuptuar më mirë përfitimet dhe rreziqet e kanabisit mjekësor”, theksoi  Hsu.

“Duke mbështetur studime më rigoroze, mund të ofrojmë udhëzime më të qarta dhe të përmirësojmë kujdesin klinik për pacientët”, përfundoi ai. /Ad.Ab./

The post MJEKËSI -Studim: Kanabisi mjekësor nuk funksionon për shumicën e sëmundjeve appeared first on Agjencia Telegrafike Shqiptare.

BERLIN, 28 dhjetor /ATSH/ – Gjermania dhe Britania e Madhe kanë intensifikuar bashkëpunimin ushtarak përmes një kontrate të përbashkët prokurimi me vlerë rreth 72 milionë dollarë (afërsisht 61 milionë euro) për blerjen e sistemeve moderne të artilerisë, raportuan sot mediat, sipas “Euronews”.

Marrëveshja parashikon blerjen e sistemeve të artilerisë “RCH 155”, të montuara mbi mjete të blinduara, të afta të qëllojnë edhe gjatë lëvizjes dhe të godasin objektiva në një distancë mbi 70 kilometra.

Sipas Ministrisë britanike të Mbrojtjes, kontrata do t’i sigurojë fillimisht Ushtrisë Britanike një njësi demonstrimi të sistemit “RCH 155”. Ndërkohë, dy njësi të tjera janë planifikuar për Gjermaninë, ku do të përdoren për testime.

Sistemi “RCH 155” do të prodhohet nga kompania franko-gjermane e mbrojtjes “KNDS”, në bashkëpunim me “Rheinmetall”. Ministria britanike thekson se ky sistem mund të qëllojë deri në tetë predha në minutë dhe operohet nga vetëm dy ushtarë.

Gjithashtu, artileria e re ka një autonomi të konsiderueshme, duke qenë në gjendje të përshkojë deri në 700 kilometra pa nevojë për furnizim me karburant.

Berlini dhe Londra kishin rënë dakord që në muajin maj për një projekt të përbashkët armatimi, duke vendosur të avancojnë zhvillimin e një arme precize me rreze të gjatë veprimi. Ky projekt shihet si një bazë strategjike për bashkëpunimin e mëtejshëm në fushën e armëve moderne.

Qëllimi kryesor është zhvillimi i kapaciteteve për të ashtuquajturat goditje precize në thellësi, të cilat mund të përdoren për të goditur objektiva thellë në territorin e kundërshtarit.

Përveç projektit të armëve me rreze të gjatë, të dy vendet kanë rënë dakord edhe për bashkëpunim më të ngushtë në fushën e luftës kundër nëndetëseve, bazuar në marrëveshjen dypalëshe të njohur si “Trinity House Agreement”.

Ministri gjerman i Mbrojtjes, Boris Pistorius, e përshkroi këtë projekt si një përgjigje ndaj situatës së ndryshuar të sigurisë, gjatë një takimi në Berlin me homologun e tij britanik, John Healey.

Nga ana e tij, Healey theksoi se partneriteti i sigurisë mes dy vendeve është më i ngushtë se kurrë, duke shtuar se bashkëpunimi jo vetëm forcon mbrojtjen, por mund të sjellë edhe nxitje ekonomike, investime dhe vende të reja pune në të dy vendet. /Ad.Ab./

The post GJERMANI – Berlini dhe Londra forcojnë bashkëpunimin ushtarak appeared first on Agjencia Telegrafike Shqiptare.

ROMË, 28 dhjetor/ATSH-AFP/ -Policia italiane njoftoi sot se kishte arrestuar nëntë persona të dyshuar për mbledhjen e miliona eurove për grupin militant palestinez Hamas.

Sipas autoriteteve, nëntë persona në total akuzohen se kanë financuar rreth 7 milionë euro (8 milionë dollarë) për “shoqata me qendër në Gaza, territoret palestineze ose Izrael, të zotëruara, të kontrolluara ose të lidhura me Hamasin”.
Policia ka lëshuar gjithashtu urdhra arresti ndërkombëtar për dy persona të tjerë që ndodhen jashtë Italisë.
Hetimi ka zbuluar se tre shoqata, të cilat zyrtarisht deklaronin se mbështesnin civilët palestinezë, dyshohet se kanë shërbyer si fasadë për financimin e Hamasit, thuhet në deklaratën e policisë.
Edhe pse objektivi zyrtar i këtyre shoqatave ishte mbledhja e donacioneve “për qëllime humanitare për popullin palestinez”, më shumë se 71% e fondeve përfundonin në financim të drejtpërdrejtë të Hamasit ose të entiteteve të lidhura me lëvizjen islamiste, sipas autoriteteve italiane.
Një pjesë e parave, sipas policisë, është përdorur për të mbështetur familjarë të personave të përfshirë në sulme terroriste.
Mes të arrestuarve ndodhet edhe Mohammad Hannoun, president i Shoqatës Palestineze në Itali, raportojnë mediat lokale. /Ad.Ab./

The post ITALI: Nëntë të arrestuar për financim të Hamasit appeared first on Agjencia Telegrafike Shqiptare.

TIRANË, 28 dhjetor/ATSH/ Festat e fundvitit e kanë kthyer Shkodrën në një nga destinacionet më të preferuara në vend për këtë dhjetor.

Mes koncerteve, muzikës, dekorit shumëngjyrësh, atmosfera festive ndihet në çdo shesh dhe rrugë të qytetit duke përfshirë të gjitha grup-moshat.

Kryeministri Edi Rama ndau në rrjetet sociale, foto nga Shkodra sot, ku qytetarë të shumtë, por edhe turistë të huaj kanë mbushur rrugët e qytetit.

Fëmijët shijojnë eksperiencën në pistën e patinazhit të akullit të ndërtuar në sheshin qendror të Shkodrës, ndërsa shtëpizat e drurit, ofrojnë produkte artizanale dhe krijime të tjera, të cilat menaxhohet nga të rinjtë e “Act4Shkodra”. Këto hapësira nuk janë vetëm festive, por edhe solidarizuese, pasi të ardhurat e mbledhura shkojnë për bamirësi për shtresat në nevojë.

/e.i/r.e/

The post Shkodra sot, të dielën e fundit të vitit appeared first on Agjencia Telegrafike Shqiptare.

TIRANË, 28 dhjetor/ATSH/ Në Durrës është mbajtur “Nata e Falënderimeve”, koncerti festiv 2025 që mblodhi qindra qytetarë në një atmosferë mes humorit, muzikës dhe festës.

Aktiviteti u organizua mbrëmjen e djeshme në pallatin e sportit “Ramazan Njala”, ndërsa u ngjitën në skenë artistë të njohur, të cilët me humorin dhe këngët e zgjedhura, i dhuruan publikut durrsak një fundvit të paharrueshëm.

Kryebashkiakja e Durrësit, Emiriana Sako e konsideroi këtë koncert të madh, si një mbrëmje të veçantë artistike, që solli vlera, emocione dhe traditë.

“Nata e Falënderimeve” u prezantua si një moment reflektimi dhe falënderimi për vitin që po mbyllet, por edhe si një mikritje simbolike drejt vitit të ri, me mesazhe shprese, solidariteti dhe bashkëpunimi.

Mbrëmja u mbyll me duartrokitje dhe nota festive, duke e kthyer “Natën e Falënderimeve” në një tjetër ngjarje të rëndësishme në kalendarin kulturor të Durrësit.

/e.i/r.e/

The post “Nata e Falënderimeve”, mbahet koncerti i fundvitit në Durrës appeared first on Agjencia Telegrafike Shqiptare.

MOSKË, 28 dhjetor /ATSH-DPA/ –  Ukraina ka paralizuar përkohësisht trafikun ajror në kryeqytetin rus përmes sulmeve me dronë ndaj Moskës, duke shkaktuar ndërprerjen e qindra fluturimeve vetëm pak orë përpara nisjes së festave kombëtare, njoftuan autoritetet ruse.

Në aeroportet “Sheremetyevo” dhe “Vnukovo”, për disa orë nuk u lejuan as ngritje dhe as ulje avionësh, bëri të ditur një zëdhënës i autoritetit të aviacionit. Agjencia shtetërore ruse e lajmeve “Ria Novosti” raportoi se gjatë natës më shumë se 300 fluturime u anuluan ose u vonuan, ndërsa rreth 70 avionë u devijuan drejt aeroporteve alternative.

Dy aeroportet e tjera të Moskës, “Domodedovo” dhe “Zhukovsky”, nuk u prekën nga kufizimet.

Kryebashkiaku i Moskës, Sergei Sobyanin, raportoi më herët për neutralizimin e një numri jashtëzakonisht të madh dronësh ukraina, rreth 30 gjithsej. Ministria ruse e Mbrojtjes njoftoi se në mbarë vendin u rrëzuan 273 dronë. Si zakonisht, Ministria nuk dha detaje për dëmet e mundshme.

Kompanitë ajrore njoftuan gjithashtu pasagjerët për ndryshime në oraret e fluturimeve në Shën Petersburg dhe qytete të tjera. Linja ajrore shtetërore “Aeroflot” deklaroi sot në mëngjes se avionët e devijuar drejt aeroporteve alternative pritej të uleshin në Moskë gjatë ditës, duke shtuar se pasagjerët dhe ekuipazhet po trajtoheshin sipas procedurave.

Sipas autoriteteve, oraret e fluturimeve pritej të riktheheshin në normalitet sot me vonë.

Mijëra pasagjerë mbeten shpesh të bllokuar në aeroporte për shkak të kërcënimit nga dronët, veçanërisht gjatë festave ruse, të cilat nisin më 31 dhjetor dhe zgjasin deri më 11 janar./Ad.Ab./

The post RUSI – Dronët ukrainas bllokojnë aeroportet e Moskës appeared first on Agjencia Telegrafike Shqiptare.

PRISHTINË, 28 dhjetor/ATSH/- Mbi 363 mijë qytetarë kanë shfrytëzuar të drejtën e votës deri në orën 13:30 sipas të dhënave elektronike të Komisionit Qendror Zgjedhor.

Ndër qytetet ku pjesëmarrja është më e madhe e votueseve është Prishtina.

Procesi i votimit në zgjedhjet e sotme të parakohshme ka vijuar normalisht, tha sot kryetari i KQZ-së, Kresnik Radoniqi.

Megjithatë, ai tha se në gjashtë komuna, Istog, Ferizaj, Viti, Rahovec, Graçanicë dhe Gjilan, janë evidentuar probleme me energji elektrike, por që më pas janë zgjidhur. Për këtë problem, Radoniqi tha se janë në komunikim me KEDS-in, mirëpo nuk e përjashtoi mundësinë që sërish të ketë probleme me energji elektrike.

/KosovaPress/

The post Mbi 363 mijë qytetarë kanë votuar deri në 13:30, probleme me energjinë në gjashtë komuna appeared first on Agjencia Telegrafike Shqiptare.

TIRANË, 28 dhjetor/ATSH/ Agjencia Shtetërore e Kadastrës njoftoi sot se ka dhënë mbi 260 mijë certifikata pronësie gjatë vitit 2025.

Sipas njoftimit të ASHK-së, kjo shifër është 53% më shumë se viti 2024.

Të gjithë këto tituj pronësie, përfshijnë apartamente, dyqane, garazhe e ambiente të tjera, të cilat më në fund do të jenë pjesë e qarkullimit civil dhe pronarët e tyre mund t’i shesin, dhurojnë, trashëgojnë apo t’i përdorin si garanci për kredi hipotekore pranë bankave të nivelit të dytë.

Sipas Kadastrës, ky proces synon të formalizojë pronësinë mbi ndërtimet e vjetra dhe të përmirësojë sigurinë juridike të qytetarëve mbi banesat e tyre.

/e.i/r.e/

The post ASHK: 53% më shumë certifikata pronësie se në 2024-ën appeared first on Agjencia Telegrafike Shqiptare.

ATHINË, 28 dhjetor /ATSH-DPA /- Rreth 830 refugjatë dhe migrantë janë shpëtuar në një seri operacionesh kërkim-shpëtimi në jug të ishullit grek të Kretës ditët e fundit, njoftuan autoritetet.

Vetëm dje, afro 400 persona u shpëtuan nnë det, raportuan mediat greke, në operacione ku u angazhuan anije peshkimi dhe mjete patrullimi të rojës bregdetare greke, si edhe të agjencisë evropiane për mbrojtjen e kufijve, Frontex.

Sipas rojës bregdetare, në varkat e përdorura kishte dhjetëra persona, në disa raste mbi 100, përfshirë edhe të mitur.

Autoritetet thanë se migrantët ishin nisur nga Tobruku në Libi dhe kishin paguar shuma të mëdha parash për udhëtimin e rrezikshëm prej rreth 300 kilometrash në det të hapur. Disa persona janë arrestuar nën dyshimin për përfshirje në trafikimin e qenieve njerëzore.

Kreta ka regjistruar tashmë më shumë se 18 mijë mbërritje refugjatësh gjatë këtij viti, sipas rojës bregdetare, krahasuar me rreth 5 mijë mbërritje në të njëjtën periudhë të vitit të kaluar. /Ad.Ab./

The post GREQI – Valë migrantësh në Kretë: 830 të shpëtuar në ditët e fundit appeared first on Agjencia Telegrafike Shqiptare.

TIRANË, 28 dhjetor/ATSH/ Pikat e kalimit kufitar kanë shtuar masat dhe personelin për të siguruar lëvizje të shpejtë e pa probleme të qytetarëve dhe mjeteve gjatë festave të fundvitit.

Drejtorët e departamenteve për Kufirin dhe Migracionin dhe për Sigurinë Publike, Saimir Muçaj dhe Dhimitraq Ziu, zhvilluan sot një inspektim në Kakavijë për të verifikuar zbatimin e masave për garantimin e rendit dhe sigurisë publike, si dhe krijimin e lehtësirave në pikat e kalimit kufitar gjatë periudhës së fundvitit dhe ditëve  të para të Vitit të Ri 2026.

Sipas drejtorit të Departamentit për Sigurinë Publike në Policinë e Shtetit, Drejtues i Lartë Dhimitraq Ziu, janë intensifikuar masat për monitorimin e qarkullimit rrugor, duke përdorur mjetet inteligjente dhe patrullat e lëvizshme, dhe në këtë kuadër dua t’u bëj një apel gjithë drejtuesve të mjeteve që të zbatojnë me rigorozitet rregullat e qarkullimit: stop shpejtësisë, alkoolit në timon, parakalimeve të gabuara. Ai kishte edhe një apel për prindërit: mos u jepni automjetet fëmijëve që s’kanë mbushur moshën dhe s’janë pajisur me leje drejtimi.

“Patrullat e Përgjithshme dhe Shqiponjat vijojnë patrullimet në çdo lagje, shesh e rrugë, dhe natën festive do të koordinojmë veprimet edhe me Policitë Bashkiake përkatëse, në sheshet ku do të kryhen ceremoni festive gjatë ndërrimit të viteve”, tha Ziu, ndërsa në gadishmëri janë edhe Forca Kombëtare e Sigurisë dhe RENEA.

Ziu theksoi se po ushtrohen kontrolle për parandalimin e tregtimit të kapsollave dhe fishekzjarreve dhe u bëri thirrje prindërve që të mos i lejojnë fëmijët të përdorin lëndë piroteknike, por as ata vetë, pasi përdorimi pa kriter i tyre është i ndaluar.

Drejtori i Departamentit për Kufirin dhe Migracionin, Saimir Muçaj u shpreh në një prononcim për mediet se ky inspektim zhvillohet në kuadër të një turi inspektimi të masave të marra nga Policia e Shtetit për përballimin e flukseve të shtuara të qarkullimit ndërkufitar në Pikat e Kalimit Kufitar dhe për garantimin e sigurisë publike gjatë festave të fundvitit.

“Departamenti për Kufirin dhe Migracionin, që në fillim të muajit, ka miratuar dhe po zbaton një plan masash me detyra konkrete, në zbatim të planit të Drejtorisë së Përgjithshme të Policisë së Shtetit, ndërkohë që të gjitha shërbimet janë në shërbim të përforcuar”, tha Muçaj.

Muçaj cilësoi se janë shtuar sportelet dhe numri i punonjësve të Policisë, veçanërisht në Pikat e Kalimit Kufitar me Greqinë dhe në pikat e tjera me fluks të lartë, ku prej dy javësh punohet me kapacitet të plotë logjistik dhe njerëzor.

“Po ashtu, është intensifikuar bashkëpunimi dhe shkëmbimi i informacionit me vendet fqinje, në mënyrë të veçantë me Policinë Kufitare greke, si dhe është aplikuar procedura e lehtësuar e kalimit kufitar aty ku ka qenë e nevojshme.

Qendrat e Bashkëpunimit Policor janë në shërbim të pandërprerë për shkëmbimin e informacionit në kohë reale, ndërsa personel shtesë është angazhuar për monitorimin e situatës dhe mbështetjen e strukturave vendore”, vijoi ai.

Gjatë kësaj periudhe është shënuar një rritje e qarkullimit ndërkufitar rreth 10,5% krahasuar me vitin e kaluar, jo vetëm të shtetasve shqiptarë, por edhe të vizitorëve të huaj.

Shërbimet e Policisë Kufitare dhe Migracionit janë të përkushtuara për të garantuar një kalim sa më të lehtë dhe të sigurt për bashkëkombasit tanë dhe vizitorët e huaj, si dhe për parandalimin dhe goditjen e kriminalitetit ndërkufitar gjatë kësaj periudhe festive.

/e.i/r.e/

The post Pikat e kalimit kufitar, masa të shtuara për të përballuar lëvizjet gjatë festave appeared first on Agjencia Telegrafike Shqiptare.

BERLIN, 28 dhjetor /ATSH-DPA/ – Përpara takimit të tij me presidentin amerikan Donald Trump, presidenti i Ukrainës Volodymyr Zelensky ka marrë garanci mbështetjeje nga liderët perëndimorë.

Zelensky zhvilloi mbrëmë një video-konferencë me disa liderë të  vendeve evropiane dhe Kanadaja, si edhe me përfaqësues të lartë të Komisionit Evropian dhe NATO-s.

Një zëdhënës i qeverisë gjermane tha se liderët i dhanë Zelenskyt “mbështetjen e tyre të plotë dhe theksuan angazhimin për të bashkëpunuar ngushtë me SHBA-në për të arritur një paqe të qëndrueshme dhe të drejtë në Ukrainë”.

Sipas zëdhënësit, kancelari gjerman Friedrich Merz e thirri konferencën me kërkesë të Zelenskyt.

Sipas burimeve nga “Pallati Elize”, presidenti francez Emmanuel Macron deklaroi se evropianët duhet të jenë plotësisht të përfshirë në diskutimet për paqe, Macron pritet të organizojë një tjetër takim të “Koalicionit të të Gatshmëve”, një grup vendesh që kanë premtuar mbështetje të fortë për Kievin, në Paris në janar.

Presidentja e Komisionit Evropian, Ursula von der Leyen, e cila gjithashtu mori pjesë në videokonferencë, shkroi në platformën X se të gjitha përpjekjet synojnë “objektivin tonë të përbashkët, një paqe të drejtë dhe të qëndrueshme që ruan sovranitetin dhe integritetin territorial të Ukrainës”.

Evropa po e ndjek me vëmendje zhvillimin, ndërsa Zelensky, i cili u takua  me kryeministrin kanadez Mark Carney në Halifax, po udhëton drejt Floridës për bisedimet me Trump në Palm Beach të dielën.

Shtëpia e Bardhë njoftoi se takimi dypalësh në Mar-a-Lago do të zhvillohet në orën  (19:00 (sipas orës tone) dy orë më herët nga sa ishte planifikuar fillimisht. Arsyeja e ndryshimit të orarit nuk u bë e ditur.  /Ad.Ab./

The post BERLIN – Aleatët e Zelensky mbështetje përpara bisedimeve me Trump në Florida appeared first on Agjencia Telegrafike Shqiptare.

XINJIANG, 28 dhjetor /ATSH-ANSA/ – Tuneli-autostradë ”Tianshan Shengli”, në provincën Xinjiang, është hapur për trafik dhe me 22,13 kilometrat e tij, është quajtur më i gjati në botë.

Tuneli kalon nëpër malet Tianshan, në rajonin autonom ujgur të Xinjiangut, duke e zvogëluar një udhëtim të rrezikshëm disaorësh malor në rreth 20 minuta.

Tuneli është një pjesë kyçe e Autostradës G0711 Urumqi-Yuli, e cila gjithashtu filloi të operojë të premten dhe që lidh qendrat urbane në Xinjiangun verior dhe jugor.

Me një shtrirje prej 2 500 kilometrash, malet Tianshan presin Xinjiang qendror, duke ndarë kryeqytetin provincial Urumqi, qytetin më të madh në veri, nga Korla, qyteti më i madh në jug.

Me hapjen e autostradës, koha e udhëtimit midis Urumqit dhe Korlës është reduktuar nga rreth shtatë orë në tri.

Autostrada, e ndërtuar gjatë pesë viteve, është 324,7 kilometra e gjatë dhe kërkoi një investim total prej 6,63 miliardë dollarësh.

Ndërtimi i tunelit u përball me sfida ekstreme, pasi, përveç gjatësisë së tij prej 22,13 kilometrash, ai arrin një thellësi maksimale prej 1 112 metrash, kalon 16 zona të çara gjeologjike dhe përballet me pesë sfida kryesore: stres të lartë në tokë, intensitet të lartë sizmik, kërkesa të rrepta mjedisore, të ftohtë ekstrem dhe lartësi të madhe.

Për t’iu përgjigjur këtyre sfidave, ndërtuesit kinezë kanë zbatuar zgjidhje inovative: ndërtimin e rrugëve hyrëse miqësore me mjedisin për të minimizuar ndikimin mjedisor dhe për të përmirësuar efikasitetin e transportit të materialeve; miratimin e një metode ndërtimi që reduktoi kohën e ndërtimit të tunelit kryesor me më shumë se një të katërtën dhe përdorimin e makinës së parë të Kinës për shpimin e tunelit me shkëmbinj të fortë nën presion./  a.jor.

The post KINË – Përurohet tuneli-autostradë më i gjatë në botë appeared first on Agjencia Telegrafike Shqiptare.

TIRANË, 28 dhjetor/ATSH/ “Piter Pan” titullohet premiera e re e Cirkut Kombëtar, që po shfaqet në skenën e ArTurbina në kryeqytet, një udhëtim magjik mes fantazisë, guximit dhe ëndrrave që nuk shuhen kurrë.

Kjo shfaqje bazohet në fabulën e Piter Panit dhe sjell plot surpriza për fëmijët e vegjël, që nga skenografia e kostumografia, deri te numrat e lartësive.

Kryeministri Edi Rama ndau në rrjetet sociale pamje nga kjo shfaqje, me fluturime akrobatike, numra sfidues dhe çaste magjike.

Shfaqja me drejtuese artistike, regji, libret dhe koreografi nga Olta Ahmetaj, u realizua me 
pjesëmarrjen speciale të Trupës Profesioniste të Cirkut Kombëtar: Silvana Dumi, Fitnete Duro, Brunilda Demollari, Xhejms Kodra, Alketa Haxhiu, Eris Hoxha dhe Mario Elezi.

Ideja, grafikat dhe realizimi janë nga Andi Kotri, muzika nga Sajmir Çili dhe Alfons Zgjana, kostumografia në shfaqje është përgatitur nga Burbuqe Çoçka, skenografia nga Lirim Lila dhe efektet speciale nga Ilir Karaj.

“Piter Pan dhe aventurat në ishullin e Kurrkundit” vjen si një shfaqje e ndërtuar me përkushtim artistik, kushtuar fëmijëve, prindërve dhe gjithë familjes. Një rrëfim skenik, që ndërthur teatrin, muzikën, koreografinë dhe elementët e artit të cirkut, duke krijuar një përvojë kulturore të plotë, edukative dhe frymëzuese për publikun e të gjitha moshave.

“Piter Pan” u shfaq premierë më 26 dhjetor, ndërkohë që do të vijojë deri më 30 dhjetor në ArtTurbina.

/k.s/r.e/

The post Fluturime akrobatike dhe çaste magjike në shfaqjen “Piter Pan” të Cirkut Kombëtar appeared first on Agjencia Telegrafike Shqiptare.

PARIS, 28 dhjetor /ATSH-AFP/ –  Në vitin 1973, Brigitte Bardot, e cila vdiq sot, i ktheu shpinën kinemasë dhe statusit të saj si një ikonë globale për t’iu përkushtuar tërësisht kauzës së jetës së saj: të drejtave të kafshëve.

“Pjesa e parë e jetës sime ishte si një skicë e përafërt e ekzistencës sime dhe pjesa e dytë solli përgjigjet e pyetjeve që i kisha bërë vetes deri atëherë”, deklaroi ish-aktorja, atëherë 83 vjeçe, në librin e saj të fundit, “Lotët e Luftës”, të botuar në vitin 2017.

“Gjithçka filloi me një bindje që kisha: njerëzimi nuk është në qendër të botës, kafshët nuk janë skllevër të njerëzve dhe skllavërimi dhe keqtrajtimi i tyre na bën çnjerëzorë”, shpjegoi ylli i kinemasë, i quajtur ndryshe BB.

Beteja e saj e parë daton që nga viti 1962.

Në kulmin e famës së saj, ajo u bë e vetëdijshme për kushtet në të cilat therreshin bagëtitë, së pari nëpërmjet bashkëshortit të saj Roger Vadim, dhe më pas nëpërmjet Jean-Paul Steiger, themeluesit të klubit “Miqtë e Rinj të Kafshëve”.

Në fillim të viteve 1960, Steiger kishte hyrë me forcë në një thertore për të bërë fotografi.

“Këto fotografi më tmerruan. Duhej të bëja diçka”, rrëfen Brigitte Bardot.

Ajo denoncoi masakrën e kafshëve të vetëdijshme në televizion, duke e quajtur atë “trajtim të denjë për Mesjetën”, dhe u takua me ministrin e Brendshëm, Roger Frey, por asgjë nuk ndryshoi.

Në vitin 1977, me mbërritjen e saj spektakolare në akullnajën për të shpëtuar foka të vogla dhe foton e saj me një këlysh fokash të porsalindur në kopertinën e ”Paris Match”, ajo prezantoi imazhin e saj të ri.

“Mësova gjithçka kur u bëra avokate e kafshëve”, rrëfen ajo.

Që nga ajo kohë, të gjitha llojet e kafshëve, qen, mace, elefantë, balena, pëllumba, arinj, gomerë, kuaj apo ujqër gjetën zëdhënësin e tyre.

Ishte gjithashtu gjatë kësaj kohe që ajo filloi të ndante jetën e saj me një avokat tjetër të kafshëve: gazetarin Allain Bougrain-Dubourg, i njohur për programet e tij për kafshët në vitet 1980.

Nga viti 1989 deri në vitin 1992, ajo prezantoi programin e saj “SOS Animals” në TF1, i cili mori vlerësime të jashtëzakonshme pavarësisht orës së vonë.

“Ky shpirt pionier më kushtoi shtrenjtë. U tallja dhe u përçmova për këtë”, shkroi ajo në librin e saj.

Duke shfrytëzuar imazhin dhe popullaritetin e saj, ajo krijoi fondacionin e saj në vitin 1986, të cilit i dha gjithçka “emrin, kohën dhe të ardhurat e saj”.

Fondacioni ”Brigitte Bardot” filloi në “një dhomë të vogël mysafirësh në La Madrague”, pronën e saj në Saint-Tropez, me burime të kufizuara, përpara se të transferohej në Paris.

Një avokate e ashpër mbrojtëse e të drejtave të kafshëve, Brigitte Bardot ishte gjithashtu një stratege e zgjuar.

Shfaqje televizive, njoftime për shtyp, demonstrata, pjesëmarrje në konferenca ndërkombëtare, thirrje drejtuar politikanëve, letra drejtuar krerëve të shteteve, sharje, fyerje… Çdo gjë ishte e lejuar në luftën e saj.

Në prill të vitit 2023, ajo sulmoi ashpër në Twitter Emmanuel Macronin, “presidentin e gjuetarëve”, i cili e kishte pritur në Pallatin Élysée në vitin 2018.

Para kësaj, aktivistja i kishte kërkuar ish-presidentit François Mitterrand të krijonte një “Sekretariat Shtetëror për Mirëqenien e Kafshëve”.

Ajo i ishte drejtuar gjithashtu ish-presidentëve Nicolas Sarkozy dhe François Hollande./ a.jor.

The post FOKUS – Brigitte Bardot mbrojtësja e pakompromis e të drejtave të kafshëve appeared first on Agjencia Telegrafike Shqiptare.

PRISHTINË, 28 dhjetor /ATSH/ Presidentja e Kosovës, Vjosa Osmani ka hedhur sot votën e saj për zgjedhjet e parakohshme parlamentare, duke uruar që procesi të zhvillohet në mënyrë të qetë, të rregullt dhe demokratike.

Osmani po ashtu ka ftuar qytetarët të marrin pjesë masivisht në procesin zgjedhor.

“Uroj që sot Republika jonë të ketë zgjedhje të qeta, të rregullta, demokratike, uroj po ashtu që të kemi zgjedhje me pjesëmarrje sa më masive të qytetarëve të Republikës sonë me të drejtë vote. Si gjithnjë zgjedhjet janë një proces i rëndësishëm demokratik, ku vendimmarrja kthehet tek qytetarët tanë. Shpresoj natyrisht që rezultatet e këtyre zgjedhjeve të rezultojnë me krijim sa më shpejtë të Parlamentit dhe zgjedhje të Qeverisë së Kosovës të cilat janë të domosdoshme për procese të rëndësishme të brendshme dhe ndërkombëtare për Republikën tonë. Dua t’i falënderoj të gjitha institucionet që janë angazhuar dhe angazhohen edhe gjatë ditës se sotme që ky proces zgjedhor të jetë sa më i rregullt. Nga KQZ, tek institucionet tona të sigurisë dhe ato të drejtësisë. Falënderim edhe për juve mediet që sot gjatë tërë ditës do të raportoni për këtë proces. I uroj gjithë qytetarët e Kosovës dhe shpresoj që çdo gjë të shkojë në rregull dhe qetë”, tha Osmani.

Presidentja Osmani theksoi se pas përfundimit të zgjedhjeve, partitë politike do të gjejnë rrugën për të krijuar institucione funksionale dhe të qëndrueshme.

“Ky ka qenë mesazhi im gjatë tërë kohës, dhe menjëherë pasi të përfundojë ky proces zgjedhor, jam e bindur që të gjitha partitë politike do të gjejnë një rrugë përpara, në mënyrë që të kemi institucione funksionale, stabile dhe me legjitimet të plotë të cilat do të marrin vendime në të mirë të qytetarëve tanë dhe të Republikës sonë”, ka theksuar Osmani.

Komisioni Qendror i Zgjedhjeve ka bërë të ditur se deri në orën 11:00 kanë dalë në zgjedhje 165 mijë e 404 votues apo 8,27 për qind. Në të njëjtën periudhë, në zgjedhjet e kaluara të 9 shkurtit kishin votuar 169 mijë votues apo 8,58 për qind. /KosovaPress/

The post Osmani thirrje për pjesëmarrje masive në votime appeared first on Agjencia Telegrafike Shqiptare.

TIRANË, 28 dhjetor/ATSH/ Mjekët e Spitalit Universitar të Traumës gjatë këtyre ditëve festive apelojnë për kujdes të shtuar.

Në një video të publikuar nga Ministria e Shëndetësisë dhe Mirëqenies Sociale mjekët e këtij spitali u bëjnë apel qytetarëve të respektojnë rregullat e qarkullimit, të bëjnë kujdes në konsumimin e pijeve alkoolike dhe të tregojnë kujdes në përdorimin e mjeteve piroteknike.

Dr. Ervin Sulaj, shef i shërbimit të Anestezi-Reanimacionit pranë këtij spitali, tha se “është rritur cilësia e shërbimit në Spitalin Universitar të Traumës me investimet që janë bërë së fundmi qoftë në reanimacion, qoftë në ambientet e sallave, aparaturat e reja që kanë ardhur. Jemi në gatishmëri, të përballojmë në mënyrë cilësore të gjitha urgjencat që paraqiten këtu”.

Sulaj u bën apel qytetarëve që në këtë periudhë festash të jenë më të kujdesshëm gjatë lëvizjes me automjete.

Dr. Agustin Suma, shef shërbimi i Urgjencës, u shpreh se “ne trajtojmë çdo ditë trauma, politrauma dhe dëmtime nga më të ndryshmet, kjo nuk na dekurajon por na motivon që 24 orë të jemi në shërbim të të gjithë qytetarëve që paraqiten pranë nesh”.

Ndërsa mjekja okuliste Leodita Gjana theksoi se “në kuadrin e festave të fundvitit meqenëse me përdorimin e shtuar të alkoolit, të fishekzjarreve, të kapsollave rastet me trauma perforative okulare shtohen, doja të tërhiqja vëmendjen për një kufizim dhe përkujdesje ndaj këtyre efekteve”.

Dr. Admir Mustafa, mjek imazherist, tha se “patologjia e Urgjencës në spitalin e Traumës është një nga sektorët kryesorë që kërkon një shpejtësi diagnostikuese me përdorimin e grafive, ekove dhe skanerit. Ne kemi aparatura të një gjenerate të re që na mundëson kryerjen e këtyre ekzaminimeve duke respektuar mbi të gjitha protokollet dhe standardet bashkëkohore”.

Spitalet dhe Urgjenca Mjekësore do të jenë në gatishmëri 24 orë në ditët festive. Urdhri, i firmosur nga ministrja e Shëndetësisë dhe Mirëqenies Sociale, Evis Sala përcakton sigurimin e gatishmërisë të shërbimeve shëndetësore gjatë sezonit të festave, me qëllim garantimin e kujdesit shëndetësor dhe sigurisë për qytetarët, pa asnjë ndërprerje, veçanërisht në datat 31 dhjetor 2025 dhe 1-2 janar 2026.

/k.s/r.e/

The post Mjekët e Spitalit të Traumës apel qytetarëve për kujdes të shtuar gjatë festave appeared first on Agjencia Telegrafike Shqiptare.