TIRANË, 23 janar /ATSH/ Ministri i Mbrojtjes, Pirro Vengu deklaroi sot në Komisionin për Evropën dhe Punët e Jashtme lidhur me projektligjin “Për importin, eksportin dhe tranzitin e armëve të zjarrit, të komponentëve të tyre kryesorë dhe të municioneve”, se aktualisht janë nënshkruar gjashtë kontrata për krijimin e gjashtë kompanive të përbashkëta shtet–privat, përmes kompanisë shtetërore KAYO dhe gjashtë operatorëve privatë.

Në përgjigje të pyetjes së deputetit të Partisë së Lirisë, Edmond Haxhinasto, mbi zhvillimet në industrinë e prodhimit të armëve, ministri Vengu bëri të ditur se, këto kontrata parashikojnë prodhimin e municioneve, mjeteve dhe pajisjeve personale, uniformave, armatimit të lehtë, dronëve, sistemeve antidron, si edhe mjeteve për emergjencat civile.

Ministri bëri me dije gjithashtu se, janë në fazën përfundimtare negociatat me kompaninë “Fincantieri” për ringritjen e kantierit detar të Pashalimanit, në bashkëpunim me gjigantin italian.

“Ky projekt synon jo vetëm prodhimin dhe mirëmbajtjen e anijeve për Forcat e Armatosura shqiptare, por edhe prodhimin dhe riparimin e mjeteve për nevojat e vendeve aleate”, tha Vengu.

Vengu u shpreh se pritet që produktet e para “Made in Albania” të nisin prodhimin që këtë vit.

“Presim që produktet e para ‘Made in Albania’ për mjetet taktike, mjetet e emergjencave, uniformat dhe municionet, të nisin prodhimin që këtë vit”, u shpreh Vengu.

Ai theksoi se vendi ka hyrë në një fazë ku synohet sigurimi i një zinxhiri furnizimi të qëndrueshëm për të gjitha nënproduktet e prodhimit ushtarak, në mënyrë që Shqipëria të jetë plotësisht në përputhje me standardet e NATO-s dhe politikat kombëtare, duke respektuar preferencat dhe bashkëpunimin me vendet aleate.

/gj.m/r.e/a.f/

The post Vengu: Në 2026 nis prodhimi i municioneve e dronëve “Made in Albania”, gjashtë kontrata të firmosura nga KAYO appeared first on Agjencia Telegrafike Shqiptare.

AMSTERDAM, 19 janar /ATSH-DPA/ – Dy oficerët holandezë të marinës që morën pjesë në misionin evropian të inspektimin në Groenlandë do të kthehen sot në Holandë, njoftoi Ministria e Mbrojtjes në Hagë.

Një numër vendesh evropiane anëtare të NATO-s morën pjesë në mision nën drejtimin e Danimarkës, me qëllim të shqyrtimit të opsioneve për një manovër të përbashkët ushtarake të NATO-s të quajtur ”Arctic Endurance”.

Sipas Ministrisë Holandeze të Mbrojtjes, përgatitjet do të vazhdojnë nga Danimarka dhe Holanda.

Presidenti amerikan Donald Trump njoftoi të shtunën tarifa shtesë prej 10% për vendet që morën pjesë në misionin e zbulimit, duke kritikuar anëtarët e NATO-s që morën pjesë.

”Danimarka, Norvegjia, Suedia, Franca, Gjermania, Britania e Madhe, Holanda dhe Finlanda kanë udhëtuar drejt Groenlandës, për qëllime të panjohura”, shkroi ai në platformën e tij Truth Social, duke e përshkruar situatën si ”shumë të rrezikshme për sigurinë, mbrojtjen dhe mbijetesen e planetit tonë”./   /Ad.Ab./ a.jor.

The post GROENLANDË – Oficerët e marinës holandeze përfundojnë misionin appeared first on Agjencia Telegrafike Shqiptare.

LONDËR, 15 janar /ATSH-DPA/ – Britania e Madhe ka dërguar një oficer ushtarak në Groenlandë, ndërsa Danimarka po rrit praninë e saj ushtarake në Arktik dhe Veriun e Largët, mes thirrjeve të përsëritura nga presidenti i SHBA-së Donald Trump që Shtetet e Bashkuara të marrin kontrollin e territorit.

Ministri danez i Mbrojtjes, Troels Lund Poulsen, tha të mërkurën se operacioni i përbashkët do të përfshijë disa vende aleate, duke paralajmëruar se “askush nuk mund të parashikojë se çfarë do të ndodhë nesër”.

Downing Street konfirmoi se një oficer ushtarak britanik është dërguar me kërkesë të Danimarkës për t’u bashkuar me një grup zbulimi përpara një stërvitjeje të planifikuar ‘’Arctic Endurance’.

“Ne ndajmë shqetësimin e presidentit Trump për sigurinë e Veriut të Largët. Dhe kjo është pjesë e angazhimit të NATO-s për të forcuar sigurinë në Veriun e Largët”, theksoi një zëdhënës.

“Ne do të intensifikojmë angazhimin tonë me ushtrime më intensive për të penguar agresionin rus dhe aktivitetet kineze”, shtoi ai.

Gjermania, Suedia, Norvegjia dhe Franca kanë konfirmuar se do të dërgojnë personel në misionin e përbashkët, i cili synon të zhvillojë më tej bashkëpunimin për të forcuar sigurinë rajonale dhe “të forcojë aftësinë tonë për të vepruar në zonë”, tha Ministria daneze e Mbrojtjes në një deklaratë.

Shqetësimet e ripërtërira për sigurinë vijnë mes presionit të ripërtërirë nga Trump, i cili ka këmbëngulur prej kohësh që Shtetet e Bashkuara duhet të marrin kontrollin e Grenlandës për të parandaluar Rusinë ose Kinën nga fitimi i kontrollit të territorit.  /os/

The post LONDËR – BM-Danimarkë, operacione të përbashkëta ushtarake në Greonlandë appeared first on Agjencia Telegrafike Shqiptare.

MOSKË, 8 janar /ATSH-AFP/ – Rusia paralajmëroi sot se do ta konsiderojë çdo prani perëndimore në Ukrainë një objektiv legjitim për forcat e saj të armatosura, pas njoftimit nga evropianët për qëllimin e tyre për të vendosur mijëra trupa në vend pas luftës.

“Të gjitha këto njësi dhe instalime do të konsiderohen objektiva legjitime ushtarake për forcat e armatosura ruse. Këto paralajmërime janë përsëritur disa herë në nivelin më të lartë dhe mbeten të vlefshme”, tha në një deklaratë zëdhënësja e Ministrisë së Jashtme ruse, Maria Zakharova.

Rusia dënoi edhe deklaratat, “militariste” sipas saj, pas marrëveshjes midis Kievit dhe aleatëve të tij evropianë për të vendosur trupa në Ukrainë pas përfundimit të konfliktit.

“Deklaratat e reja militariste nga i ashtuquajturi Koalicion i të Gatishëmve dhe regjimi i Kievit i bëjnë ata një bosht të vërtetë lufte”, tha Zakharova në një deklaratë./ /Ad.Ab./ a.jor.

The post MOSKË – Rusia do ta konsiderojë çdo prani ushtarake perëndimore në Ukrainë një objektiv legjitim appeared first on Agjencia Telegrafike Shqiptare.

Kosova ka pranuar një dërgesë me sisteme raketore kundërtanke OMTAS nga Turqia, thanë autoritetet më 6 janar. Ministri në detyrë i Mbrojtjes, Ejup Maqedonci, tha se kjo dërgesë ishte kontraktuar me prodhuesin shtetëror turk, Roktesan, në dhjetor të vitit 2023. “OMTAS [Orta Menzilli Tanksavar Silah] është një sistem modern raketor antitank me rreze të mesme […]

The post Kosova pranon sisteme anti-tank nga Turqia appeared first on BoldNews.al.

ROMË, 29 dhjetor /ATSH-DPA/ – Italia do të vazhdojë të ofrojë ndihmë ushtarake për Ukrainën edhe vitin e ardhshëm, pasi qeveria e djathtë e kryeministres Giorgia Meloni miratoi sot një dekret që autorizon dorëzimin e vazhdueshëm të armëve dhe pajisjeve ushtarake për Kievin.

Italia konsiderohet një nga partneret më të besueshme të Ukrainës brenda NATO-s.

Megjithatë, vendimi për vazhdimin e ndihmës ushtarake në 2026, që ishte parashikuar të miratohej në fillim të dhjetorit, u shty pas kundërshtimeve nga një nga partnerët e koalicionit.

Partia populiste e djathtë “Lega”, e udhëhequr nga zëvendëskryeministri Matteo Salvini, kërkoi ndryshime në tekst për të theksuar më shumë ndihmën civile dhe që dorëzimi i armëve të shënohej qartë si për qëllime mbrojtjeje.

Më pas qeveria ra dakord për ndryshime të vogla gjuhësore pa ndryshuar në mënyrë të ndjeshme përmbajtjen e dekretit, i cili gjithashtu parashikon zgjatjen e lejeve të qëndrimit për disa ukrainas në Itali.

Salvini është bërë gjithnjë e më kritik ndaj ndihmës ushtarake për Ukrainën.

Në nëntor, ai deklaroi se dërgimi i armëve nuk do ta zgjidhte konfliktin./  /Ad.Ab./ a.jor.

The post ITALI – Roma konfirmon ndihmën ushtarake për Kievin edhe në 2026 appeared first on Agjencia Telegrafike Shqiptare.

Kina po zhvillon stërvitje ushtarake rreth Tajvanit duke simuluar pushtimin dhe bllokadën e zonave kryesore të ishullit, si një paralajmërim kundër "forcave separatiste".

Ushtria, marina, forcat ajrore dhe forca raketore janë dërguar për stërvitjet që përfshijnë ushtrime me armë zjarri, tha ushtria kineze, shkruan BBC, përcjell Telegrafi.

Me emrin e koduar "Misioni i Drejtësisë 2025", stërvitjet po zhvillohen disa ditë pasi SHBA-të njoftuan shitjen e një prej paketave të saj më të mëdha të armëve në Tajvan me vlerë 11 miliardë dollarë (rreth 9.4 miliardë euro).

Ky veprim shkaktoi protesta të ashpra nga Pekini, i cili nga ana tjetër sanksionoi firmat amerikane të mbrojtjes.

Përpjekjet e Tajvanit për të rritur mbrojtjen e tij këtë vit kanë zemëruar gjithashtu Pekinin, i cili pretendon ishullin e vetëqeverisur si territorin e tij.

Zyra presidenciale e Tajvanit ka kritikuar stërvitjet e ardhshme kineze, duke i quajtur ato një sfidë ndaj normave ndërkombëtare.

Ministria e mbrojtjes e Tajvanit theksoi se ata zbuluan aeroplanë dhe anije kineze rreth Tajvanit të hënën në mëngjes dhe kanë vendosur forcat dhe sistemet e tyre raketore për të monitoruar situatën.

Forcat e saj janë në "gatishmëri të lartë" për të mbrojtur Tajvanin dhe për të "mbrojtur popullin tonë", tha ministria.

Në një postim në Weibo, Komanda e Teatrit Lindor të ushtrisë kineze - përgjegjëse për Ngushticën e Tajvanit - e përshkroi stërvitjen e ardhshme ushtarake si një "mburojë drejtësie".

"Të gjithë ata që komplotojnë pavarësinë do të shkatërrohen sapo të hasin mburojën!", thuhej në postim.

Ndërsa disa stërvitje fillestare kanë filluar, ushtria tha se do të zhvillojë një stërvitje të madhe nga ora 08:00 deri në 18:00 sipas orës lokale të martën.

Ndërsa Kina ka bërë thirrje prej kohësh për "ribashkimin paqësor" me Tajvanin, ajo gjithashtu ka një ligj që thotë se do të përdorë "mjete jo-paqësore" për të parandaluar "shkëputjen" e ishullit. /Telegrafi/

Pretendimi: Izraeli, Greqia dhe Qipro formojnë ushtrinë e përbashkët kundër Turqisë

Verdikti: Mungon konteksti

—————————————————————

Në rrjete sociale, përfshi ato shqipfolëse, po qarkullon lajmi se Izraeli, Greqia dhe Qipro formuan një ushtri të përbashkët kundër rrezikut turk.

Megjithatë, ky pretendim nuk shoqërohet me ndonjë provë, burim apo referencë që e mbështet atë.

Në fakt, ky lajm nuk është i saktë, megjithëse duket se është frymëzuar nga zhvillime të vërteta.

Specifikisht, një samit trepalësh u mbajt mes krerëve të Izraelit, Greqisë dhe Qipros në Jeruzalem më 22 dhjetor 2025.

Tre udhëheqësit nënshkruan një deklaratë të përbashkët pas samitit, në të cilën ranë dakord të “forcojnë bashkëpunimin e vazhdueshëm trepalësh mbi çështjet e sigurisë, mbrojtjes dhe ushtrisë.”

Në fjalën e tij, kryeministri izraelit Netanyahu iu referua Turqisë, pa e përmendur në mënyrë direkte, duke thënë se “ata që fantazojnë se mund të rivendosin perandoritë dhe sundimin e tyre mbi tokat tona” duhet ta “harrojnë atë.”

Një ditë më vonë, krerë ushtarakë grekë, qipriotë dhe izraelitë nënshkruan një plan të përbashkët veprimi dhe një program bashkëpunimi ushtarak Greqi-Izrael-Qipro në Nicosia.

Plani, bazuar në marrëveshjet e arritura nga udhëheqësit e tre vendeve, përfshin trajnim të përbashkët të njësive të operacioneve speciale dhe shkëmbim ekspertize mbi kërcënimet moderne, duke përfshirë sistemet pa pilot (UAV) dhe luftën elektronike.

Në raportimet e mediave vendase nuk përmendet formimi i një ushtrie të përbashkët mes tre vendeve.

Sipas të përditshmes greke Ta Nea, zyrtarë të lartë ushtarakë dhe analistë janë duke diskutuar mundësinë e një brigade reagimi të shpejtë prej rreth 2,500 trupash, me 1,000 ushtarë nga Izraeli dhe Greqia dhe 500 nga Qipro. Megjithatë, deri më tani nuk ka asnjë konfirmim nga burime zyrtare.

The post Bashkëpunim, por jo një ushtri e përbashkët Izrael-Greqi-Qipro appeared first on Faktoje.al.

TIRANË, 24 dhjetor /ATSH/ Shqipëria është pajisur zyrtarisht me sistemin raketor kundërtank “Javelin”, një nga sistemet më të avancuara të mbrojtjes që përdoret nga vendet anëtare të NATO-s.

Ministri i Mbrojtjes, Pirro Vengu bëri të ditur se ardhja e këtij sistemi është rezultat i bashkëpunimit të ngushtë me aleatin strategjik, Shtetet e Bashkuara të Amerikës.

Gjatë një vizite në një nga bazat e Forcave të Armatosura, ku u bë pritja e dërgesës së parë të këtyre sistemeve, ministri Vengu, u shpreh se ardhja e sistemeve antitank “Javelin”, përbën një hap të rëndësishëm në forcimin e aftësive mbrojtëse të Forcave të Armatosura Shqiptare, duke rritur parandalimin, ndërveprueshmërinë me NATO-n dhe sigurinë kombëtare.

Sipas Vengut, pajisja e Forcave të Armatosura Shqiptare me sistemin “Javelin” vjen edhe në përmbushjen të objektivave për modernizimin e ushtrisë.

“Ardhja e sistemeve “Javelin”, rrit parandalimin, ndërveprueshmërinë me NATO-n dhe sigurinë kombëtare”,  u shpreh ministri i Mbrojtjes.

Ministri bëri të ditur se kjo dërgesë është pjesë e një procesi të planifikuar, ndërsa faza e dytë e furnizimit pritet gjatë vitit 2026.

Vengu theksoi se kjo ndihmë dhe ky bashkëpunim bilateral me SHBA-në përfshin jo vetëm Shqipërinë, por edhe Kosovën, duke nënvizuar rëndësinë strategjike të këtij programi për sigurinë rajonale.

Ai kujtoi se bëhet fjalë për realizimin e një kërkese të hershme, e cila tashmë po konkretizohet me pajisje moderne antitank të standardeve më të larta.

Ministri vuri theksin edhe te roli kyç i bashkëpunimit me Shtetet e Bashkuara, i cili mbetet themelor në ndërtimin dhe rritjen e kapaciteteve mbrojtëse të vendit.

Një aspekt tjetër i rëndësishëm, sipas tij, lidhet me aftësimin dhe trajnimin e personelit luftarak për përdorimin e pajisjeve dhe teknologjive të përditësuara.

Gjithashtu, Vengu falënderoi për masat e marra në drejtim të infrastrukturës pritëse, duke theksuar se një pjesë e konsiderueshme e punës ka qenë e fokusuar te përmirësimi i kushteve të punës dhe krijimi i standardeve të nevojshme për vendosjen dhe operimin e këtyre sistemeve.

“Nëpërmjet dërgesës së parë të sistemeve Javelin dhe asaj të dytë që pritet në vitin 2026, synojmë certifikimin e plotë të një grup-batalioni, duke rritur ndjeshëm gatishmërinë dhe efektivitetin operacional të Forcave tona të Armatosura”, u shpreh ministri i Mbrojtjes.

Sistemi “Javelin” konsiderohet një element kyç për mbrojtjen tokësore, duke rritur ndjeshëm aftësinë e Forcës Tokësore për të përballuar kërcënime të avancuara dhe për të vepruar në përputhje me standardet e Aleancës.

“Javelin” është një sistem raketor kundërtank i gjeneratës së fundit, i prodhuar nga SHBA. Sistemi është shumë efektiv kundër mjeteve të blinduara dhe përdoret gjerësisht nga ushtritë e NATO si dhe në operacione reale luftarake.

Shqipëria e ka porositur sistemin “Javelin” në kuadër të programeve të bashkëpunimit ushtarak me Shtetet e Bashkuara, përmes mekanizmave të shitjeve ushtarake të huaja (Foreign Military Sales – FMS). Ky investim është pjesë e strategjisë afatgjatë të modernizimit të Forcave të Armatosura, rritjes së parandalimit dhe përafrimit të plotë me kapacitetet dhe doktrinën e NATO-s.

1 nga 7

/gj.m/a.f/

The post Shqipëria merr nga SHBA sisteme raketore Javelin, dërgesa e dytë në 2026 appeared first on Agjencia Telegrafike Shqiptare.

Pilotët, teknikët dhe ekipet mbështetëse provojnë llojet e operacioneve që Franca mund të thirret të kryejë në një peizazh të sigurisë ndërkombëtare që po përkeqësohet me shpejtësi.

Kështu shkruan Euronews, i cili medium thotë se ka fituar qasje të rrallë në ushtrinë franceze në bordin e një helikopteri Fennec ndërsa u ngrit mbi Bazën Ajrore Orléans-Bricy, duke ofruar një pamje të brendshme të fluturakes që tani është në qendër të operacioneve në zgjerim të vendit kundër dronëve.

Stërvitja vjetore, e njohur si “Tactical Airlift Rehearsal under Advanced Non-permissive and Intensive Scenarios (TARANIS)”, filloi më 10 nëntor dhe i vendos ekuipazhet në skenarë me intensitet të lartë të hartuar për të pasqyruar realitetet e luftës moderne.

Gjatë tri javëve, pilotët, teknikët dhe ekipet mbështetëse provojnë llojet e operacioneve që Franca mund të thirret të kryejë në një peizazh të sigurisë ndërkombëtare që po përkeqësohet me shpejtësi.

Dhe nën hijen e Fennec, “gjëmimi i thellë i A400M mbushi qiellin”.

Orléans-Bricy pret pothuajse të gjithë flotën franceze të këtyre aeroplanëve të rëndë ushtarakë transporti, gjithsej 24, të aftë për transport trupash, ulje ndihmash humanitare dhe evakuime emergjente.

Për të mbajtur ekuipazhet plotësisht të gatshme për mision, TARANIS i shtyn ato në kushte sfiduese.

Një nga testet kryesore të këtij viti është ulja në një sipërfaqe të improvizuar: një pistë zhavorri e ndërtuar rishtas e ngjashme me pistat e improvizuara të përdorura në operacionet e jashtme.

Pavarësisht shiut të vazhdueshëm, ulja e parë e A400M mori duartrokitje nga të ftuarit dhe gazetarët pas një ceremonie prerjeje shiriti dhe një serie demonstrimesh fluturimi.

Në linjën e fluturimit, pilotët shfaqën dy versione të helikopterit Fennec.

Një model është i konfiguruar për misione anti-dronë, i njëjti sistem i vendosur së fundmi në Danimarkë, ndërsa i dyti mban një armë më të rëndë të montuar në një krah, duke u mundësuar ekuipazheve të angazhojnë dronë më të mëdhenj që shihen gjithnjë e më shumë në Evropën Lindore.

Në fund të shtatorit, Franca, si dhe Gjermania dhe Suedia, dërguan trupa dhe sisteme anti-dronë në Danimarkë për të rritur sigurinë ajrore pas disa inkursioneve me dronë në hapësirën ajrore daneze.

Komandanti Grégoire, një nga pilotët e helikopterëve që morën pjesë në TARANIS, tha se puna e tij pasqyron misionin e dyfishtë të brigadës sulmuese të Francës.

"Ajo që na motivon është motoja jonë: të luftojmë dhe të shpëtojmë", shpjegoi ai. "Luftimi do të thotë futja ose nxjerrja e komandove dhe mbrojtja e hapësirës sonë ajrore. Shpëtimi do të thotë ngritja e njerëzve në siguri dhe rikuperimi i atyre që janë në rrezik. Kjo është ajo që po demonstrojmë këtu".

Stërvitja TARANIS do të përfundojë më 27 nëntor, që përkon me 80-vjetorin e komandës së transportit ajror ushtarak të Francës, një kujtesë si për trashëgiminë e gjatë të forcës ashtu edhe për kërcënimet në zhvillim që formësojnë stërvitjen e saj sot. /Telegrafi/

Njësitë policore, gjatë patrullimit rutinë në fshatin Jarinjë e Poshtme, kanë hasur në një shtëpi të pabanuar me derë të thyer dhe të dëmtuar.

Pas hyrjes brenda objektit, policët kanë vërejtur uniforma ushtarake dhe një predhë anti-tank.

Sipas njoftimit të policisë, njësitë relevante kanë dalë menjëherë në vendngjarje dhe kanë konfiskuar një predhë anti-tank të kalibrit 37 mm, modeli M38, si dhe disa uniforma ushtarake me emblema të ushtrisë serbe, përfshirë: një këmishë me mëngë të shkurta, dy xhaketa dimërore, një jakne ushtarake dhe një palë pantallona.

Në lokacion nuk është hasur asnjë person i dyshuar apo dëshmitar.

Prokurori është informuar për rastin, ka bërë cilësimin e tij dhe hetimet po vazhdojnë. /Telegrafi/

Forcat ushtarake gjermane filluan pesë ditë stërvitjeje për luftë urbane në Berlin, duke praktikuar skenarë vendosjeje emergjente në të gjithë kryeqytetin, ndërsa peizazhi i sigurisë në Evropë ndryshon pas pushtimit të Ukrainës nga Rusia.

Batalioni i rojeve të Bundeswehr-it nisi stërvitjen "Bollwerk Bärlin III" të dielën në vende të shumta, duke përfshirë stacionin nëntokësor Jungfernheide, poligonin e stërvitjes policore Ruhleben dhe një ish-vend të uzinës kimike në Rüdersdorf, shkruajnë mediat e huaja, përcjell Telegrafi.

Ushtria gjermane përmendi luftën e përgjithshme të Rusisë kundër Ukrainës si kërkesë për përgatitje të shtuar mbrojtëse.

Stërvitja e luftës urbane ishte e nevojshme pasi rrugët e ngushta, ndërtesat e larta dhe tunelet e metrosë së Berlinit kërkojnë trajnim të specializuar për vendosje të shpejtë, sipas zyrtarëve ushtarakë.

Siç bëjnë të ditur mediat, ushtarët praktikuan skenarë luftimesh urbane, “duke siguruar infrastrukturën kritike, duke iu kundërvënë sabotatorëve dhe duke evakuuar personelin e plagosur”.

Forcat gjermane gjithashtu praktikuan luftime në tunele në stacionin Jungfernheide në orët para agimit të së martës.

Ekipet e sigurisë, përfshirë snajperët, zunë pozicione gjatë stërvitjeve, megjithëse municionet bosh zëvendësuan plumbat luftarakë për të siguruar sigurinë publike.

"Batalioni i rojeve përmbush misionin e tij kryesor në Berlin në rast mbrojtjeje", ka thënë Bundeswehr. "Të gjitha aktivitetet po kryhen nën masa të rrepta sigurie dhe në koordinim me autoritetet e Berlinit". /Telegrafi/

Ministri i Mbrojtjes Pirro Vengu zbuloi nga Roma detaje rreth marrëveshjeve që u firmosën sa i përket fushës së mbrojtjes, në mbledhjen e parë të përbashkët të qeverisë shqiptare dhe asaj italiane. Vengu zbuloi se kompania shtetërore “KAYO”, e cila është përgjegjëse për prodhimin, demilitarizimin dhe tregtimin e armëve, municioneve, pajisjeve dhe teknologjive ushtarake sipas […]

The post Vengu: Do të prodhojmë anije ushtarake në Pashaliman me Italinë appeared first on BoldNews.al.

RIO DE ZHANEIRO, 12 nëntor /ATSH-DPA/ – Venezuela ka mobilizuar gati 200 000 trupa për manovra ushtarake dyditore, me qëllim përmirësimin e gatishmërisë së forcave të armatosura në përgjigje të kërcënimit imperialist, sipas saj, nga prania ushtarake e SHBA-së në Karaibe, tha ministri venezuelian i Mbrojtjes, Vladimir Padrino.

“Manovrat përfshijnë trupa nga të gjitha degët e ushtrisë, si dhe anëtarë të  forcave të milicisë”, tha dje në mbrëmje Padrino.

Ai përshkroi praninë e SHBA-së në Karaibe si një sulm vulgar ndaj sovranitetit dhe paqes jo vetëm të Venezuelës, por të gjithë rajonit.

“Manovrat do të kenë gjithashtu si objektiv trafikimin e drogës dhe grupet terroriste”, shtoi ai

Manovrat janë pjesë e ashtuquajturit ”Plan Independencia 200”, një iniciativë kombëtare e mbrojtjes e nisur nga presidenti autoritar Nicolas Maduro në shtator, ndërsa Shtetet e Bashkuara filluan të rritnin praninë e forcave në ujërat pranë Amerikës Latine.

Anija më e madhe me aeroplanë në botë, ”USS Gerald  R Ford”, ka mbërritur në rajon, njoftoi dje Marina e SHBA-së.

Vendi i saktë nuk u bë i ditur.

Uashingtoni thotë se prania e tij ushtarake synon të luftojë organizatat kriminale transnacionale dhe të mbrojë SHBA-në nga droga./  /Ad.Ab./

The post VENEZUELË – Manovra ushtarake me 200 000 trupa, si përgjigje ndaj pranisë së SHBA-së në rajon appeared first on Agjencia Telegrafike Shqiptare.

Vendi strategjik i Porto Palermos, buzë detit Jon në Himarë, ku ka qenë baza ushtarake dhe tunelet nënujorë për anijet, do t’i jepet privatit për të ndërtuar resort. Projekti është nisur nga Korporata e Investimeve Shqiptare para 3 vitesh, por asnjëherë nuk është bërë publik. Një vendimmarrje tepër e guximshme e drejtuesve të kësaj Korporate, […]

The post Shqipëria në shitje! Porto Palermo do t’i jepet privatit, baza ushtarake do të bëhet resort appeared first on BoldNews.al.

Në terrenet malore të Babaj i Bokës në Gjakovë, Forca e Sigurisë së Kosovës (FSK) ka zhvilluar stërvitjen fushore ushtarake “Ujku Shigjetë”, me qëllim testimin e gatishmërisë operacionale dhe validimin e kapaciteteve të njësive të këmbësorisë, raporton Telegrafi.

Gjatë ushtrimit, pjesëtarët e FSK-së realizuan skenarë të avancuar luftarake që simulonin përballjen me armikun në një luftim fushor, duke demonstruar mënyrat e identifikimit dhe neutralizimit të objektivit armik, përmes koordinimit të veprimeve tokësore dhe këmbësore.

Ushtrimi përfshiu manovrime taktike, pozicionime strategjike, përdorim të mbështetjes zjarrtare dhe lëvizje të sinkronizuara në terrene malore. Pamjet nga vendi tregojnë përfshirjen e mjeteve të blinduara dhe përdorimin e tymit maskues për avancim dhe mbrojtje, ndërsa njësitë këmbësore vepronin në koordinim të plotë për sigurimin e zonës.

Ministri në detyrë i Mbrojtjes, Ejup Maqedonci, vlerësoi lart profesionalizmin dhe përkushtimin e pjesëtarëve të FSK-së gjatë zhvillimit të ushtrimit.

“Pas një cikli të gjatë trajnimesh dhe përgatitjesh, sot Regjimenti i Tretë i Këmbësorisë demonstroi shkathtësitë dhe aftësitë në të cilat është trajnuar gjatë ushtrimit fushor ‘Ujku Shigjetë’. Ky ushtrim, me shumë rëndësi për ushtrinë tonë, ka synim validimin e kapaciteteve të këmbësorisë së Regjimentit të Tretë, duke përmbushur një ndër objektivat kryesore të FSK-së: atë të validimit të të gjitha kapaciteteve të këmbësorisë, duke i mundësuar kështu ushtrisë sonë të kalojë në fazën e radhës për zhvillimin e saj”, deklaroi Maqedonci.

Ai falënderoi Komandantin e FSK-së, gjenerallejtënant Bashkim Jashari, dhe të gjithë ushtarakët për angazhimin e pashembullt në përmbushjen e këtij objektivi të rëndësishëm, si dhe ekipet ushtarake të SHBA-së për mbështetjen e vazhdueshme në ndërtimin e kapaciteteve luftarake të Forcës.

“Qeveria e Republikës së Kosovës, në vazhdimësi gjatë këtyre viteve, ka shënuar rritje të jashtëzakonshme në investimet në armatime, modernizim, personel, trajnim dhe infrastrukturë, me qëllim të ndërtimit dhe zhvillimit të kapaciteteve tona ushtarake. Sot, edhe një herë, njësitet e ushtrisë sonë treguan profesionalizëm, disiplinë e përkushtim në realizimin e detyrave dhe dëshmuan gatishmërinë e vendosmërinë për të përmbushur misionin fisnik të ushtrisë sonë: mbrojtjen e territorit dhe jetës së qytetarëve tanë”, theksoi Maqedonci.

Sipas FSK-së, stërvitja “Ujku Shigjetë” është pjesë e procesit të validimit të njësive të këmbësorisë, që synon përgatitjen e plotë të Forcës për kalimin në fazën e ardhshme të zhvillimit të saj si ushtri moderne, profesionale dhe e gatshme për mbrojtjen e vendit dhe bashkëpunimin ndërkombëtar. /Telegrafi/

PRISHTINË, 14 tetor/ATSH/ Ministri në detyrë i Mbrojtjes, Ejup Maqedonci në margjina të panairit “AUSA 2025”, u takua me drejtorin e Agjencisë për Bashkëpunim në Mbrojtje dhe Siguri në kuadër të Departamentit të Luftës të SHBA-së, Michael F. Miller.

Sipas njoftimit të MM-së, në takim ishin të pranishëm edhe zëvendëskomandanti i FSK-së, gjeneralmajor Enver Cikaqi, atasheu i mbrojtjes i Republikës së Kosovës në SHBA, Sylejman Cakaj, si dhe drejtori i Departamentit për Bashkëpunim Ndërkombëtar dhe Integrime Euroatlantike, kolonel Ahmet Ajeti.

“Gjatë takimit u diskutua për bashkëpunimin e deritanishëm në fushën e mbrojtjes, me theks të veçantë në prokurimin e pajisjeve dhe sistemeve të armatimit, i cili për Forcën e Sigurisë së Kosovës është realizuar kryesisht përmes mekanizmit FMS (Foreign Military Sales), duke mundësuar blerje shtet më shtet me SHBA-në, me kosto më të ulët dhe cilësi më të lartë të produkteve të prokuruara”, thuhet në njoftim.

Ministria e Mbrojtjes thekson se gjithashtu u diskutua për prokurimet e radhës, si dhe për ndihmën që Kosova i ka ofruar Ukrainës.

The post Kosova dhe SHBA diskutojnë për prokurime të reja të pajisjeve ushtarake për FSK-në appeared first on Agjencia Telegrafike Shqiptare.

NATO ka nisur manovrat vjetore për të praktikuar mbrojtjen e territorit të aleancës me armë bërthamore. Rreth 2.000 pjesëtarë të personelit do të përfshihen në stërvitjet e quajtura “Steadfast Noon” që do të zhvillohen gjatë dy javëve, njoftoi aleanca më 13 tetor në nisje të manovrave.

Rreth 70 avionë do të përdoren gjatë stërvitjeve, tha NATO, përfshirë avionë luftarakë gjermanë që janë të aftë të transportojnë bombat bërthamore amerikane që janë të stacionuara në Evropë.

Manovrat e këtij viti pritet të zhvillohen kryesisht në hapësirën ajrore mbi Detin e Veriut. Baza ajrore holandeze në Volkel dhe bazat ushtarake në Kleine Brogel në Belgjikë, Lakenheath në Angli dhe Skrydstrup në Danimarkë pritet gjithashtu të kenë role të rëndësishme.

NATO thotë se Forcat e Armatosura gjermane kanë ofruar tre avionë Tornado, që janë të aftë të gjuajnë bomba bërthamore amerikane dhe katër Eurofighter për stërvitje.

Sipas aleancës, këto janë stërvitje rutinore dhe nuk janë përgjigje ndaj shkeljeve të fundit të hapësirave ajrore dhe provokimeve të tjera të bëra nga Rusia. Megjithatë, manovrat po ashtu synojnë të përçojnë një sinjal të qartë në Moskë se NATO-ja është e përgatitur që të mbrojë veten edhe me armë bërthamore, nëse është e nevojshme.

Kjo stërvitje është e nevojshme për të siguruar që parandalimi bërthamor të mbetet sa më i besueshëm dhe efektiv, tha javën e kaluar sekretari i Përgjithshëm i NATO-s, Mark Rutte.

Arsyeja pse Gjermania, një vend që nuk ka armë bërthamore, po merr pjesë në stërvitje, lidhet me parimin e NATO-s për ndarjen bërthamore.

Ky parim parasheh që, në një rast emergjent, armët bërthamore amerikane të tipit B61 të stacionuara në Evropë mund të hidhen edhe nga avionët e vendeve partnere dhe më pas të përdoren për të shkatërruar, për shembull, forcat armike.

Armët bërthamore amerikane nuk dihet se ku janë të vendosura në Evropë. Megjithatë, ka pasur raportime se armë të tilla ka në veri të Italisë, Belgjikë, Holandë dhe Gjermani. NATO-ja nuk ka dhënë detaje se cili skenar konkret do të ushtrohet gjatë manovrave.

Ekspertët ushtarakë thonë se manovrat, të cilat zhvillohen rregullisht në tetor, përfshijnë stërvitjen e mënyrës së transportit të sigurt të armëve nga magazinat nën tokë tek avionët dhe montimin e tyre nën avionët luftarakë. Megjithatë, në këtë dhe stërvitjet sulmuese përdoren vetëm bomba për stërvitje, pa kokat reale bërthamore./REL

The post NATO nis stërvitjet bërthamore, rreth dy mijë pjesëtarë të personelit do të marrin pjesë appeared first on Albeu.com.

Komuna e Prishtinës ka bërë të ditur se Forca e Sigurisë së Kosovës (FSK) do të zhvillojë stërvitje ushtarake gjatë periudhës 20 – 27 tetor 2025 në zonën e fshatrave Mramor dhe Badovc, përcjell Telegrafi.

Gjatë këtyre ditëve, qytetarët mund të vërejnë lëvizje të këmbësorisë dhe automjeteve ushtarake në zonat e përmendura.

Komuna thekson se ky aktivitet është pjesë e stërvitjeve të planifikuara të FSK-së dhe nuk ka arsye për shqetësim.

Autoritetet falënderuan qytetarët për mirëkuptimin dhe bashkëpunimin gjatë zhvillimit të këtyre aktiviteteve. /Telegrafi/

UASHINGTON, 7 tetor /ATSH/ – Shtetet e Bashkuara të Amerikës, nën administratat e presidentëve Biden dhe Trump, kanë dhënë të paktën 21,7 miliardë dollarë ndihma ushtarake për Izraelin që nga fillimi i luftës në Gaza dy vjet më parë, bëri të ditur një studim akademik të publikuar sot në përvjetorin e dytë të sulmeve të Hamasit më 7 tetor 2023, sipas AP.

Një tjetër studim, gjithashtu i publikuar nga projekti “Costs of War” në Watson School of International and Public Affairs të Universitetit Brown, thotë se SHBA-ja ka shpenzuar rreth 10 miliardë dollarë shtesë për ndihma dhe operacione sigurie në Lindjen e Mesme gjatë dy viteve të fundit.

Raportet bazohen kryesisht në materiale të hapura dhe ofrojnë një pasqyrë të hollësishme të ndihmës ushtarake amerikane për Izraelin dhe të kostove të përfshirjes direkte ushtarake amerikane në Lindjen e Mesme.

Departamenti i Shtetit nuk ka komentuar menjëherë mbi shumën e ndihmës ushtarake të dhënë Izraelit që nga tetori 2023, ndërsa Shtëpia e Bardhë i ka referuar pyetjet te Pentagoni, i cili mbikëqyr vetëm një pjesë të ndihmës.

Raportet u publikuan ndërkohë që ish-presidenti Donald Trump kërkon dhënien  fund të luftës në Gaza.

Zyrtarët izraelitë dhe ata të Hamasit filluan këtë javë bisedime indirekte në Egjipt, pasi Hamas pranoi disa elementë të planit amerikan që edhe Izraeli tha se e mbështeste. /Ad.Ab./

The post UASHINGTON – SHBA, 21,7 miliardë dollarë për Izraelin që nga fillimi i luftës në Gaza appeared first on Agjencia Telegrafike Shqiptare.