Trajneri i Brazilit, Carlo Ancelotti zbuloi listën paraprake me 55 futbollistët, që mund të thirren për finalet e Kupës së Botës. Pjesë e saj është edhe Neymar, i cili shpreson të luajë Botërorin e fundit në karrierën e tij.
Gjithsesi, sulmuesi 34 vjeçar nuk e ka të sigurtë ftesën, pasi edhe më parë ai ishte përefshirë në listat e zgjeruara të kombëtares, porn ë fund nuk ishtre grumbulluar. Neymar ka punuar shumë fort gjatë muajve të fundit, por Ancelotti është shprehur se do të marrë me vete në Botëror vetëm lojtarët që janë në formë.
Ndërsa lajmi kryesor ishte thirrja e “O’Ney”, lista e Ancelottit konfirmon se Brazili nuk do të ketë shërbimet e Estevao në Kupën e Botës. Talenti i Chelsea i dëmtuar në Premier League, ndërsa stafi mjekësor i kombëtares braziliane përcaktoi se ai nuk do të rikuperohet në kohë për turneun.
Me Estevaon jashtë fushës, dera është hapur për disa yje të kampionatit vendas. Sulmuesi i Flamengos, Pedro, është padyshim në garë. Konkurrenca është po aq e ashpër në mesfush.
Andrey Santos i Chelseat përballet me një rrugë të pasigurt pas një viti të vështirë në “Stamford Bridge”, me Casemiron, Bruno Guimaraes, Fabinhon, Danilo Santos dhe Lucas Paquetan aktualisht përpara tij në renditjen e lojtarëve. Nëse Andrey lihet jashtë, kjo mund t’i hapë rrugën Rayan, i cili bëri përshtypje gjatë pushimit ndërkombëtar të marsit dhe shihet si një alternativë e natyrshme për të luajtur në krahun e djathtë në mungesë të Estevaos. Brazili do të luajë në grupin C në “Botërorin 2026”, bashkë me Marokun, Skocinë dhe Haitin./abcnews.al
Kënga Dai Dai e Artistes me famë botërore, Shakira do të jetë kënga zyrtare e Kupës së Botërorit 2026 që do të mbahet përgjatë muajve qershor dhe korrik në Shtetet e Bashkuara, Meksike dhe Kanada.
Ishte artistja e cila zbuloi lajmin permes nje postimi ne rrjetet Sociale ndersa kenga e plote pritet te publikohet me 14 maj.
Kjo eshte hera e Trete qe Shakira do te kendoj Kengen Zyrtare te Boterorit pas suksesit Absolut te Waka Waka ne boterorin e Afrikes se Jugut ne vitin 2010 dhe “La La La” ne Boterorine Brazilit ne Vitin 2014.
Në videon e publikuar, e xhiruar në stadiumin Maracana në Rio de Zhaniero Shakira shfaqet e veshur me bluzë të verdhë dhe pantallona të shkurtra blu, e shoqëruar nga disa kërcimtare dhe me topa futbolli pranë, teksa këndon disa pjesë nga “Dai Dai”.
Në postimin e saj, Shakira u shpreh e entuziazmuar që rikthehet sërish në një nga ngjarjet më të mëdha sportive në botë, ndërsa fansat nisën menjëherë të spekulojnë se “Dai Dai” do të ketë ritme energjike dhe atmosferë feste, në linjën e hiteve që e kanë shoqëruar edhe më parë në Botëror.
Publikimi i këngës më 14 maj pritet të shërbejë si nisje e fushatës muzikore të FIFA-s për turneun e verës, që do të zhvillohet në tri shtete pritëse.
Në kohë lufte, nuk mund të jesh i sigurtë për asgjë. Aq më tepër që në një konflikt të ndezur si ai në Lindjen e Mesme, të jesh i sigurtë që kombëtarja e Iranit të luajë në shtëpinë e armikut, siç janë në këtë rast Shtetet e Bashkuara të Amerikës. Por, presidenti i FIFA, Gianni Infantino po i qëndron besnik qëndrimit të tij dhe po këmbëngul.
“Irani do të jetë i pranishëm në Kupën e Botës. Dhe sigurisht, ata do të luajnë në SHBA sipas planit. Arsyeja është shumë e thjeshtë: sepse futbolli duhet të bashkojë”, – tha ai.
Infantino e konfirmoi besimin e tij në Kongresin e 76-të të FIFA-s në Vancouver të Kanadasë. Të 211 federatat botërore, përfshirë edhe atë palestineze ishin të pranishme, me përjashtim të Iranit. Delegacioni iranian u kthye mbrapsht nga Kanadaja. Zyrtarët iranianë anuluan pjesëmarrjen e tyre për shkak të asaj që e përshkruan si sjellje fyese nga policia e imigracionit në aeroportin e Torontos.
Në thelb, presidentit Mehdi Taj dhe sekretarit të përgjithshëm të tij iu mohua hyrja për një arsye shumë të qartë, të konfirmuar nga “Neë York Times”. Refuzimi lidhet me ish-udhëheqjen e tij të Gardës Revolucionare, Pasdaran, të cilën Kanadaja e konsideron një organizatë terroriste.
Autoritetet kanadeze, të cilat fillimisht u përpoqën ta mbulonin situatën duke spekuluar se refuzimi mund të ketë qenë i pavullnetshëm, deklaruan se qeveria e tyre “ka qenë e qartë dhe konsistente: Zyrtarët e Gardës Revolucionare nuk lejohen në Kanada”. Pavarësisht sigurimeve të Infantinos, mungesa e Iranit në Kongres po shkakton trazira. Kjo është edhe arsyeja pse FIFA i kishte ofruar delegacionit iranian një avion privat që do t’i kishte kthyer menjëherë në Kanada. Por atëherë ishte vonë. Gjithsesi, vetëm nëse arrin të kualifikohet, ky qëndrim i Kanadasë, edhe ajo organizatore e “Botërorit 2026” nuk ndikon, pasi Irani i ka në program sfidat e grupit në SHBA.
Për këtë, besimi i Infantinos nuk është pa baza dhe forcohet më shumë nga deklaratat e fundit të presidenditi Donald Trump.
“Epo, nëse e tha Gianni, jam dakord me këtë. Gianni është fantastik, dhe nëse e tha ai, mendoj se duhet t’i lëmë të luajnë”, tha Trump.
Pavarësisht këtyre deklaratave, asgjë nuk është e sigurtë deri në nisjen e topit të parë të “Botërorit 2026” më 11 qershor në stadiumin mitik “Azteca” në Mexico City./abcnews.al
TIRANË, 15 prill/ATSH/ Ansambli Folklorik i Përmetit po merr pjesë në Festivalin Botëror të Folklorit, që zhvillohet në Itali, Francë dhe Monte Karlo.
Gjatë ditës së sotme artistët përmetarë ishin të pranishëm në Sanremo, Itali, në paradën e parë të Festivalit Botëror të Folklorit”.
Me kostumet tradicionale me vlera të rralla, vallen dhe këngën që identifikon përmetarët dhe jo vetëm, artistët po çojnë një copëz Shqipërie në Sanremo, Kanë dhe Monaco.
Gjatë ditëve të festivali ansambli pritet të prezantojë një program të pasur me valle dhe këngë popullore shqiptare, duke synuar promovimin e trashëgimisë kulturore shqiptare në arenën ndërkombëtare. Artistët përmetarë do të përcjellin me interpretimet e tyre traditën, kulturën dhe muzikën karakteristike përmetare.
Pjesëmarrja në këtë festival është një mundësi e shkëlqyer për të promovuar trashëgiminë kulturore shqiptare në skenën botërore, si dhe për të krijuar ura bashkëpunimi me grupe të tjera folklorike nga vende të ndryshme.
Eliminimi nga faza play-off e Botërorit 2026 la pas shumë lot dhe analizë. Në Varshavë, Shqipëria preku kufijtë e historisë, por u ndal nga detajet. Jasir Asani, njeriu që ka dhuruar rregullisht emocione me të majtën e tij, këtë herë e ndoqi dramën nga tribunat. Sot, mes stërvitjeve te Partizani dhe ankthit për situatën në […]
ROMË, 1 prill /ATSH-ANSA/ – Media ndërkombëtare e përcolli përjashtimin e azzurëve nga Botërori 2026 me habi dhe, ndonjëherë, mezi e fshehu ironinë edhe pse nuk e kurseu.
Vlerësimi më i ashpër erdhi nga tabloidi gjerman ”Bild”.
“Një tjetër turp i Kupës së Botës për Italinë!”, vërejtën gjermanët.
“Ciao Italia” ishte titulli i zgjedhur nga francezja ”L’Equipe”, duke theksuar “zhgënjimin e madh për një brez të tërë futbollistësh italianë”.
“Një rënie e pafundme” ishte titulli i versionit online të mëngjesit.
”Le Figaro” ishte e qartë kur shkruante “Një fiasko e re”.
Në Spanjë, ”Marca” i kushtoi një analizë të gjatë dhe të thellë azzurëve.
“Kriza e pafundme e futbollit italian, e vetmja kombëtare e nivelit të lartë që humbet Kupën e Botës”, shkruan ajo, ndërsa e titullonte shkrimin “E marrtë dreqi, Itali!” dhe theksonte “karmën për lojtarët italianë që festuan para ndeshjes, të bindur se do të ishin të lehtë kundër Bosnjës”.
“Tragjedi” ishte fjala e zgjedhur nga ”A Bola” në Portugali.
Në Holandë, ”De Telegraaf” kishte titullin “Dramë për Italinë jashtë fushe kundër një Bosnje në delir”.
“Një tjetër dështim për Italinë: jashtë Kupës së Botës për herë të tretë radhazi”, përmblodhi gazeta ”Olé” në Argjentinë./ a.jor.
Kosova pësoi disfatë 1-0 në finalen e Play off ndaj Turqisë në “Fadil Vokrri”, duke mos ia dalë dot të kualifikohet në Botëror. Ndeshja u vendos në pjesën e dytë, kur në minutën e 53’ Kerem Akturkoglu përfitoi nga një top i mbetur në zonë dhe me një goditje të saktë në këndin e poshtëm […]
PRISHTINË, 31 mars/ATSH/ Rrugët dhe sheshet e kryeqytetit Prishtinë janë mbushur me tifozë që valëvitin flamuj shtetërorë dhe kombëtarë në natën kur Kosova do të përballet me Turqinë në një ndeshje finale për kualifikim në Kupën e Botës 2026. Në qytet shihet edhe një prani e tifozëve turq. Dardanët e presin Turqinë në stadiumin “Fadil Vokrri” sonte në orën 20:45 dhe fituesi do të shkojë në Botërorin e kësaj vere në SHBA, Kanada dhe Meksikë.
Një kafene në Prishtinë vendosi një njoftim në hyrje, përmes të cilit i fton turqit të pinë kafe falas. Njoftimi në anglisht dhe turqisht, thotë: “Sot rival, por gjithmonë MIQ! Kafe dhe çaj falas për të gjithë tifozët turq. Ju paguat në vitin 1999, sot nuk paguani”.
Flamuj të Kosovës dhe një flamur amerikan janë vendosur në stadiumin “Fadil Vokrri” teksa tifozët fillojnë të shkojnë në stadum për ndeshjen vendimtare të Kosovës kundër Turqisë për kualifikim në Botëror.
13 mijë veta pritet të jenë të pranishëm sonte në ndeshjen Kosovë-Turqi. Turqit janë ankuar për numrin e vogël të biletave që u janë dhënë.
Kryeministri Albin Kurti, një orë para fillimit të ndeshjes Kosovë-Turqi shkroi: Gjithçka e jona është sonte në Stadiumin “Fadil Vokrri”. Drejt Fitores, drejt Botërorit, drejt realizimit të ëndrrës”. Postimin e shoqëroi me një foto të tij bashkë me kombëtaren e futbollit.
Kosova nuk ka qenë kurrë më afër kualifikimit në një garë të madhe në historinë e vet, dhe fitorja kundër Sllovakisë në gjysmëfinale të plajofit, javën e kaluar, e ka bërë vendin të besojë se ëndrra e Botërorit në Shtetet e Bashkuara, Kanada dhe Meksikë, është e arritshme. /REL/
PRISHTINË, 21 mars/ATSH/ Ndeshja mes Kosovës dhe Turqisë po përjetohet si një nga momentet më të mëdha në historinë e futbollit kosovar, një përballje që mund të përcaktojë një epokë të re për “Dardanët”. Për herë të parë, Kosova ndodhet kaq pranë një arritjeje madhore, duke e kthyer këtë duel në një ngjarje që shkon përtej sportit dhe merr dimension kombëtar.
Interesimi për këtë ndeshje ka qenë i jashtëzakonshëm që nga fillimi i këtij cikli, me mijëra tifozë që kanë kërkuar të sigurojnë një vend në stadium. Kërkesa e madhe për bileta dhe diskutimet rreth tyre vetëm sa e kanë rritur edhe më shumë tensionin dhe emocionin për këtë sfidë, duke dëshmuar se sa shumë pritet kjo përballje nga publiku.
Në të njëjtën kohë, mediat ndërkombëtare, si Reuters, BBC, Marca, MundoDeportivo, e shumë të tjera kanë po kushtojnë vëmendje të veçantë Kosovës, duke e cilësuar këtë rrugëtim si një nga historitë më të bukura të kualifikimeve. Nga një ekip i ri në arenën ndërkombëtare, Kosova është shndërruar në një skuadër që sfidon seriozisht për një vend në skenën më të madhe të futbollit botëror.
Përballë saj qëndron Turqia, një kundërshtar me përvojë dhe traditë, që e bën këtë sfidë edhe më të madhe. Megjithatë, besimi në kampin kosovar është në rritje, ndërsa vendosmëria për të shkruar histori mbetet motivi kryesor i skuadrës dhe tifozëve.
Ministri i Sportit i Turqisë, Osman Asskin Bak, ka komentuar ndeshjen e shumëpritur ndërmjet Kosovës dhe Turqisë. Ai për KosovaPress ka thënë se gjithçka do të vendoset në fushën e lojës nga vetë futbollistët, duke theksuar rëndësinë dhe nivelin e lartë të kësaj përballjeje.
Kjo ndeshje nuk është vetëm një finale, është një moment jetik që mund të vendosë të ardhmen e futbollit në Kosovë. Një fitore do të hynte në librat e historisë dhe do ta vendoste vendin në hartën e madhe të futbollit botëror, duke e kthyer këtë mbrëmje në një kujtim të paharrueshëm për të gjithë.
Deri në këtë pikë, Kosova arriti pas shumë përpjekjeve për anëtarësim në FIFA dhe UEFA.
Një fitore eventuale e Kosovës sot, vlen një vend në Kampionatin Botëror të futbollit 2026. /KosovaPress/
Është mbyllur këtë të enjte rrugëtimi historik i Shqipërisë në fazën “play-off” për Botërorin 2026, pas humbjes 2-1 përballë Polonisë në Varshavë. Kuqezinjtë kaluan të parët në avantazh në minutën e 42-të me Arbër Hoxhën, duke ndezur shpresat për një kualifikim të madh. Megjithatë, në pjesën e dytë vendasit reaguan duke përmbysur rezultatin. Robert Lewandowski […]
TIRANË, 26 mars /ATSH/ Shqipëria u mund sot 2-1 nga Polonia në gjysmëfinalen e play-off-it për Kupën e Botës 2026 në stadiumin “PGE Narodowy”, duke mbyllur ëndrrën për një pjesëmarrje historike në finalet e Botërorit në SHBA, Meksikë dhe Kanada.
Ky rezultat i heq kuqezinjve shansin për të marrë një vend historik në finalet e Botërorit.
Golat e ndeshjes erdhën nga Arbër Hoxha në minutën e 42-të për Shqipërinë, Lewandowski në minutën e 63-të për Poloninë, dhe Zielinski në minutën e 74-t, që vulosi fitoren e vendasve.
Trajneri Sylvinho e nisi takimin me Strakoshën në portë, ndërsa mbrojtja përbëhej nga Mitaj, Gjimshiti, Ajeti dhe Hysaj. Në mesfushë aktivizoheshin Asllani, Shehu, Laçi dhe Bajrami, ndërsa në sulm luanin Hoxha dhe Uzuni. Nga ana tjetër, Polonia e drejtuar nga Jan Urban, aktivizoi Grabaran në portë, me Kiwior, Bednarek dhe Kedziora në mbrojtje, Skoras, Zielinski, Szymański dhe Cash në mesfushë, dhe Kaminski, Lewandowski dhe Rogza në sulm. Ndeshja u gjykua nga arbitri anglez Anthony Taylor.
Polonia e nisi sfidën me rrezikshmëri, por Shqipëria mbrojti me kujdes. Në minutën e 2, një aksion nga e djathta u ndal nga ndërhyrja e saktë e Juljan Shehut, ndërsa në minutën e 5, Lewandowski iu afrua golit, por goditja e tij devijohet dhe Polonia fiton këndore. Në minutën e 8, Bednarek provon me kokë, por Hysaj largon mbi vijën fatale, duke ruajtur portën e Strakoshës të paprekur.
Në minutën e 17-të Shqipëria bëri një zëvendësim të detyruar, pasi Ajeti u dëmtua dhe vendin e tij e zuri Ismajli. Në minutën e 27, Laçi rrëmben një top pranë zonës dhe provon me një gjuajtje të fortë, por topi përfundon në duart e portierit polak.
Momenti vendimtar i pjesës së parë erdhi në minutën e 42-të, kur Arbër Hoxha përfitoi nga një gafë në prapavijën polake dhe shënoi, duke dhënë avantazhin 0-1 për Shqipërinë. Pjesa e parë përfundoi me kuqezinjtë në epërsi.
Në minutën e 49-të, Zielinski provon një gjuajtje të rrezikshme, por topi kalon ngjitur me shtyllën, duke shkaktuar drithërima në portën shqiptare. Në minutën e 53-të, Hoxha shpërdoron një mundësi të artë pas një kundërsulmi të shpejtë, ndërsa një minutë më pas, Bajrami humb një rast të pastër shënimi, pasi gjuan mbi portë, pas pasimit të marrë nga Hysaj.
Polonia reagoi me Lewandowskin, dhe në minutën e 63-të barazon shifrat 1-1 pas një goditjeje këndi, ku sulmuesi e dërgon topin me kokë në rrjetë.
Shqipëria bën dy zëvendësime në minutën e 67-të, largohen Hoxha dhe Nedim Bajrami, ndërsa në fushë futen Broja dhe Stavro Pilo. Në minutën e 72-të, një tjetër mundësi e artë për kuqezinjtë shpërdorohet, pasi Broja asiston për Pilo, por tentativa e tij ndalet nga portieri polak.
Në minutën e 74-t, Polonia kalon në avantazh me një supergol të Zielinskit, duke tronditur Kombëtaren shqiptare dhe duke vulosur fitoren 2-1 të vendasve.
Shqipëria përkundër rasteve të shumta të krijuara dhe mbështetjes së zjarrtë të mbi 3 mijë tifozëve në stadium, nuk arriti të ruajë avantazhin dhe humbi shansin për të marrë pjesë në Kupën e Botës 2026.
Kjo humbje lë një shije të hidhur për lojtarët dhe tifozët shqiptarë, por mbetet një kapitull historik për Kombëtaren kuqezi, e cila për herë të parë arriti në gjysmëfinale të play-off-it të Botërorit.
TIRANË, 26 mars /ATSH/ Kombëtarja shqiptare e futbollit do të zbresë sot në fushë për një nga ndeshjet më të rëndësishme të saj, teksa përballet me Poloninë në fazën “play-off” të Kupës së Botës 2026.
Takimi do të luhet në orën 20:45 në stadiumin “PGE Narodowy” në Varshavë, ku kuqezinjtë synojnë një rezultat pozitiv për të mbajtur gjallë ëndrrën e kualifikimit. Ndeshja do të drejtohet nga arbitri anglez, Anthony Taylor.
Në total, Shqipëria dhe Polonia janë përballur 15 herë mes tyre, me bilancin që favorizon polakët: 10 fitore për Poloninë, 3 barazime dhe 2 fitore për Shqipërinë.
Ky historik dëshmon vështirësinë e sfidës, por nuk përjashton surpriza në përballjet e ardhshme.
Ndeshja e parë mes dy skuadrave daton në vitin 1949, ku Polonia fitoi 2-1 në një takim miqësor.
Shqipëria regjistroi fitoren e saj të parë në vitin 1953, duke triumfuar 2-0 në shtëpi me gola të Loro Boriçit dhe Refik Resmjes.
Në dekadat në vijim, Polonia ka dominuar kryesisht përballjet, sidomos në ndeshjet kualifikuese për kompeticionet madhore. Megjithatë, kujtimi më i fundit është pozitiv për kuqezinjtë. Shqipëria fitoi 2-0 ndaj Polonisë më 10 shtator 2023 në Tiranë, në kuadër të kualifikueseve të EURO 2024, me gola të Jasir Asanit dhe Mirlind Dakut.
Ky sukses ka rritur ndjeshëm besimin në skuadër dhe ka ndryshuar perceptimin për diferencat mes dy ekipeve, duke shtuar optimizmin në prag të sfidës së sotme.
Polonia konsiderohet favorite për shkak të faktorit fushë, por Shqipëria synon të përsërisë paraqitjen pozitive të viteve të fundit dhe të përmbysë historikun mes dy skuadrave.
Ndërkohë, Federata Shqiptare e Futbollit njofton se të gjitha biletat e vëna në dispozicion për tifozët shqiptarë për këtë ndeshje janë shitur. FSHF falënderon tifozët për mbështetjen dhe i fton të respektojnë udhëzimet e përcaktuara nga organizatorët.
Ndeshja e sotme konsiderohet një test kyç për ambiciet e Shqipërisë në rrugën drejt Botërorit 2026, ndërsa kuqezinjtë do të kërkojnë një tjetër rezultat pozitiv për të vijuar ëndrrën e madhe të kualifikimit.
TIRANË, 25 mars /ATSH/ Kombëtarja kuqezi do të përballet me Poloninë në Varshavë të enjten në mbrëmje, në sfidën e parë “play off” për Kupën e Botës 2026.
Në total, dy përfaqësueset janë përballur 15 herë, me Shqipërinë që ka regjistruar dy fitore, tre barazime dhe dhjetë humbje.
Ky bilanc tregon qartë vështirësinë e sfidave ndër vite, por njëkohësisht lë të hapur mundësinë për një kthesë në përballjet e ardhshme.
Historia e ndeshjeve nis në vitin 1949, ku Polonia fitoi 2-1 në miqësore. Shqipëria arriti suksesin e parë në vitin 1953, duke triumfuar 2-0 në shtëpi me gola të Loro Boriçit dhe Refik Resmjes.
Në dekadat që pasuan, polakët dominuan kryesisht përballjet, sidomos në ndeshjet kualifikuese për kompeticionet madhore ndërkombëtare.
Megjithatë, kujtimi më i freskët është pozitiv për Shqipërinë. Fitorja 2-0 në Tiranë më 10 shtator 2023, në kuadër të kualifikueseve të EURO 2024, me gola të Jasir Asanit dhe Mirlind Dakut përbën një nga rezultatet më të rëndësishme të viteve të fundit. Ajo ndeshje rriti ndjeshëm besimin në skuadër dhe dëshmoi se kuqezinjtë mund të rivalizojnë me kundërshtarë të fortë.
Polonia vjen në këtë sfidë me një epërsi të lehtë pasi luan në fushën e vet, por suksesi i vitit 2023 ka ndryshuar perceptimin dhe ka shtuar optimizmin në prag të sfidës së radhës.
Ndeshja për “play off”-in e Botërorit konsiderohet një test kyç për ambiciet e Shqipërisë, ndërsa historiku mbetet një sfidë që kuqezinjtë synojnë ta përmbysin me një tjetër paraqitje pozitive.
Kombëtarja shqiptare do të luajë ndeshjen e parë të play-off-it të Botërorit 2026 ndaj Polonisë më 26 mars në Varshavë, në orën 20:45. Trajneri Silvinjo ka bërë publike listën me 26 lojtarët e ftuar për këtë përballje, si edhe për ndeshjen e mundshme ndaj Ukrainë/Suedisë më 31 mars. Për herë të parë me Kombëtaren shqiptare […]
Bologna ka njoftuar se portieri Lukasz Skorupski, do të mungojë përsëri për shkak të një dëmtimi. Sipas komunikatës zyrtare të klubit, ekzaminimet kanë treguar një dëmtim të gradës mesatare të lartë në bicepsin e këmbës së majtë.
Skorupski ka nisur tashmë trajtimin dhe parashikohet të mungojë për 6 deri në 8 javë, duke lënë praktikisht të mbyllur sezonin e tij.
Në mungesë të portierit polak, në ndeshjet e ardhshme, do të jetë Federico Ravaglia ai që do të mbrojë portën e ekipit emilian.
Në këtë mënyrë, Skorupski do të humbasë ndeshjen ndaj Shqipërisë, që është e vlefshme për fazën Play Off të Kupës së Botës.
U kuptua që në fillim se ishte një ndeshje e mallkuar. Kristiano Ronaldo humbi penallti, diçka që i ndodh rrallë në karrierë, dhe më pas gjithçka shkoi keq për të, me përjashtim të rezultatit të ndeshjes.
Superylli portugez pësoi dëmtim dhe sipas mediave në Arabinë Saudite ekziston shqetësim i madh nëse ai do të mundet të jetë gati për në Kupën e Botës në qershor.
Raportohet se në Portugali ka alarm të vërtetë për fatin e Kristianos. Klubi i tij, Al Nasr, nuk ka nxjerrë në dritë ndonjë raport të detajuar mjekësor, por burime brenda tij njoftojnë se CR7 ka një problem muskulor që kërkon trajtim tepër të kujdesshëm.
Ai u detyrua të dilte vullnetarisht nga fusha në 81’, pasi ndjeu shqetësime, e duket se mosha 41-vjeçare ka nisur të peshojë mbi legjendën e futbollit. Stafi mjekësor tek Al Nasr dhe vetë Ronaldo kanë vendosur të mos rrezikojnë, aq më tepër që portugezi mendon për Kupën e Botës.
Pra, nuk dihet qartë se kur do të kthehet në fushë. Dëmtimi i ndodhi në ndeshjen që ekipi i tij e fitoi 3-1 me përmbysje në fushën e rivalit Al Fajha. Al Nasr mban kreun e renditjes në Ligën Profesioniste Saudite me 61 pikë ndaj 59 të Al Ahlisë dhe 58 të Al Hilalit.
Ronaldo ka 21 gola në 24 javë, dhe mbetet në garë për Këpucën e Artë, të cilën sipas të gjitha mundësive nuk do ta fitojë dot. Gjithsesi, objektivat e tij të mëdhenj janë të fitojë titullin saudit dhe të jetë në Kupën e Botës me synimin për të ngritur trofeun./abcnews.al
Presidenti i federatës së futbollit të Iranit tha se nuk e di nëse ekipi kombëtar mund të luajë ndeshjet e Kupës së Botës në Shtetet e Bashkuara pas bombardimeve të papritura të vendit të tij nga SHBA-të dhe Izraeli.
“Ajo që është e sigurt është se pas këtij sulmi, nuk mund të pritet që ne ta presim me shpresë Kupën e Botës”, tha Mehdi Taj për portalin sportiv Varzesh3, ndërsa Irani shkëmbeu sulme me Izraelin si pjesë e një lufte në zgjerim të shkaktuar nga bombardimet.
Sulmet SHBA-Izrael ndaj Iranit vazhduan për të dytën ditë radhazi të dielën, pasi vrasja e Udhëheqësit Suprem iranian, Ajatollah Ali Khamenei, e hodhi të ardhmen e Republikës Islamike në pasiguri dhe rriti rrezikun e paqëndrueshmërisë rajonale.
Irani është përfshirë në Grupin G në Kupën e Botës dhe është planifikuar të luajë në Los Angeles ku përballet me Zelandën e Re dhe Belgjikën më 15 dhe 21 qershor, përkatësisht përpara se të luajë kundër Egjiptit në Seattle më 26 qershor.
Shtetet e Bashkuara do të presin turneun së bashku me Kanadanë dhe Meksikën nga 11 qershori deri më 19 korrik.
Tifozëve nga Irani u është ndaluar hyrja në SHBA ndërkohë. FIFA nuk iu përgjigj menjëherë një emaili nga Associated Press mbi situatën aktuale në lidhje me pjesëmarrjen e Iranit në Kupën e Botës, por tha të shtunën se po monitoron zhvillimet në rajon.
Kreu i Forumit Ekonomik Botëror (WEF) ka dhënë dorëheqje pasi organizata hapi një hetim të brendshëm mbi kontaktet e tij me të dënuarin për abuzim seksual, të ndjerin Jeffrey Epstein.
Borge Brende, presidenti dhe drejtori ekzekutiv i WEF, njoftoi se po jepte dorëheqje pas më shumë se tetë vitesh në këtë rol, duke thënë se vendimi erdhi pas “shqyrtimit të kujdesshëm”.
“Jam mirënjohës për bashkëpunimin e jashtëzakonshëm me kolegët dhe besoj se tani është momenti i duhur që Forumi të vazhdojë punën e tij të rëndësishme pa shpërqendrime”, tha Brende në një deklaratë.
WEF nisi hetimin në fillim të këtij muaji pasi Departamenti Amerikan i Drejtësisë publikoi një pjesë të madhe të dosjeve të lidhura me Epstein, të cilat tërhoqën vëmendje të re në qarqet globale të biznesit dhe politikës.
Gjatë viteve, figura të shumta të profilit të lartë — duke përfshirë figura të shquara biznesi, politikanë dhe anëtarë të familjes mbretërore — janë shfaqur në shkëmbimet e emaileve, librat e kontakteve, regjistrat e fluturimeve ose të dhëna të tjera të Epstein.
Në shumë raste, ata që janë përmendur kanë mohuar publikisht shkeljet, shkruan euronews.
Në një deklaratë të përbashkët, bashkëkryetarët e WEF, Andre Hoffmann dhe Larry Fink, e falënderuan Brenden për mandatin e tij.
“Dëshirojmë të shprehim vlerësimin tonë të sinqertë për kontributet e rëndësishme të Borge Brende në Forumin Ekonomik Botëror. Përkushtimi dhe lidershipi i tij kanë qenë të rëndësishëm gjatë një periudhe vendimtare reformash për organizatën, duke çuar në një takim të suksesshëm vjetor në Davos. Ne e respektojmë vendimin e tij për të dhënë dorëheqjen”, thanë ata.
WEF ka njoftuar se Alois Zwinggi do të shërbejë si president i përkohshëm dhe drejtor ekzekutiv, ndërsa bordi menaxhon tranzicionin e lidershipit.
Kuptohet që hetimi ka komplikuar planifikimin e trashëgimisë në forumin me seli në Gjenevë.
Presidentja e Bankës Qendrore Evropiane, Christine Lagarde, është parë gjerësisht si një kryetare e mundshme në të ardhmen, pas largimit të themeluesit të WEF, Klaus Schwab, vitin e kaluar.
Ndryshe, Brende, ish-ministri i jashtëm i Norvegjisë, ka udhëhequr Forumin Botëror të Ekonomisë (WEF) që nga viti 2017, duke mbikëqyrur organizatën gjatë periudhës së pandemisë dhe një sërë reformash të qeverisjes së brendshme.
Forumi nuk ka treguar se kur do të vazhdojë shqyrtimi i lidhjeve të Brendes me Epsteinin pas dorëheqjes së tij.
Të qenit i emëruar në dosjet që lidhen me Epsteinin nuk nënkupton në vetvete shkelje. /Telegrafi/
Komisioneri për Sportin pranë Bashkimit Europian, Glenn Micallef, i ka kërkuar presidentit të FIFA-s, Gianni Infantino, garanci për tifozët europainë, të cilët do të udhëtojnë drejt Shteteve të Bashkuara të Amerikës për të ndjekur nga afër Botërorin 2026.
Në një prononcim për “Euractiv”, Glenn Micallef ka pranuar se i ka biseduar me numrin një të FIFA-s për këtë argument delikat. Sipas tij bashkëbisedimi i mbajtur në Bruksel një javë më parë ishte konstruktiv.
“I kërkova që të ketë në vëmendje sigurinë e tifozëve, të cilët do të udhëtojnë drejt Shteteve të Bashkuara të Amerikës. Për ne ky aspekt është mjaft i rëndësishëm dhe të njëjtën rëndësi duhet të ketë edhe organizatorët.
Duke iu përgjigjur shqetësimeve, një zëdhënës i Departamentit të Shtetit të SHBA-së tha në lidhje me këtë çështje se “siguria e ndeshjeve të Kupës së Botës, atletëve, tifozëve dhe vendeve ku zhvillohen ndeshjet, si dhe siguria e vazhdueshme e Shteteve të Bashkuara janë përparësi kryesore të organizimit të ndeshjeve”.
Forumi Ekonomik Botëror i këtij viti në Davos është dominuar kryesisht nga presidenti i SHBA-së, Donald Trump, i cili prezantoi iniciativën e tij të Bordit të Paqes të enjten, pas një fjalimi të veçantë për Grenlandën një ditë më parë.
Bisedat në qytetin turistik të Alpeve Zvicerane u përqendruan në përshkallëzimin e tensioneve për shkak të kërcënimeve të SHBA-së për të vendosur tarifa ndaj aleatëve evropianë për shkak të Grenlandës, me udhëheqësit që paralajmëruan për thyerje të aleancave dhe prishje të rendit ndërkombëtar të bazuar në rregulla.
Së fundmi u bë publike edhe një letër e Trumpit drejtuar kryeministrit norvegjez Jonas Gahr Store, në të cilën presidenti amerikan lidhte kërkesat e tij për Grenlandën me faktin se nuk kishte arritur të fitonte Çmimin Nobel për Paqen.
Trump, i cili mbërriti në mesjavë me delegacionin më të madh ndonjëherë, pavarësisht problemeve me Air Force One gjatë rrugës, përjashtoi mundësinë e një marrjeje armiqësore të ishullit Arktik, i cili është pjesë e Mbretërisë së Danimarkës, megjithëse këmbënguli ende për një blerje.
Këto janë deklaratat më të përfolura nga mbledhja vjetore e elitave më të larta politike dhe të biznesit në botë deri më tani:
Grenlanda dhe Evropa
Trump mbajti fjalimin e tij të shumëpritur të mërkurën, duke deklaruar se SHBA-të po kërkojnë negociata të menjëhershme për Grenlandën, ndërsa përjashtoi përdorimin e forcës ushtarake për të përvetësuar territorin danez.
"Ndoshta nuk do të arrijmë asgjë nëse nuk vendos të përdor forcë dhe forcë të tepërt aty ku do të ishim, sinqerisht, të pandalshëm. Por nuk do ta bëj këtë", tha Trump.
"Nuk dua të përdor forcë. Nuk do të përdor forcë", shtoi ai.
Por, ai i paralajmëroi anëtarët e NATO-s se përballeshin me një zgjedhje për Grenlandën: “Mund të thoni po dhe ne do t’ju jemi shumë mirënjohës. Ose mund të thoni jo dhe ne do ta kujtojmë.”
Ndër tjera, Trump kritikoi Evropën duke deklaruar se pjesë të kontinentit “nuk njihen më” dhe duke pohuar se “nuk po shkonte në drejtimin e duhur”.
Trump gjithashtu u tall me syzet e diellit që presidenti francez Emmanuel Macron mbante gjatë fjalimit të tij të së martës.
"E pashë Emmanuel Macron dje me ato syze dielli të bukura", tha Trump, duke shkaktuar të qeshura nga publiku.
Disa e përshëndetën mesazhin e Trumpit për Grenlandën me një ndjenjë lehtësimi pasi ai tha shprehimisht se çdo përdorim force ishte jashtë diskutimit.
“Ne dëgjuam nga afër gjithçka. Ky ishte një mesazh i mirë”, tha kryeministri kroat Andrej Plenkoviq.
Sipas Plenkoviqit, zgjidhja për këtë ngërç është “të flasin me njëri-tjetrin”.
"Nuk ka rrugë tjetër," tha ai.
"Mendoj se partneriteti transatlantik është i rëndësishëm, ka qenë historikisht i rëndësishëm dhe ne duhet të bëjmë gjithçka që mundemi për të siguruar që ai të mbetet i rëndësishëm", përfundoi kroati.
Ish-zëvendëspresidenti i SHBA-së, Al Gore, e quajti fjalimin një "performancë klasike të Trumpit".
“Është domethënëse që ai duket se u tërhoq nga kërcënimi i tij për të përdorur forcë ushtarake në Grenlandë”, tha Gore, shkruan euronews.
Në një tjetër fjalim të shumëpritur special, presidenti ukrainas Volodymyr Zelensky dha një kritikë të ashpër ndaj mosveprimit evropian të enjten, duke deklaruar se kontinenti "duket i humbur" dhe mbetet i bllokuar në përsëritjen e pafundme të dështimit për të mbrojtur veten ose për të mbështetur vendosmërisht Ukrainën.
"Të gjithë e kujtojnë filmin e madh amerikan Groundhog Day, por askush nuk do të donte të jetonte kështu", tha Zelensky.
"Duke përsëritur të njëjtën gjë për javë të tëra, muaj dhe sigurisht, vite. E megjithatë, kjo është pikërisht mënyra se si jetojmë tani", shtoi ai.
Gjithashtu, Zelensky shprehu zhgënjim me reagimin e Evropës ndaj krizës së Genlandës, duke vënë në pikëpyetje vendosjen e një grushti trupash në ishullin Arktik.
"Nëse dërgoni 14 ose 40 ushtarë në Grenlandë, për çfarë shërben kjo? Çfarë mesazhi dërgon? Cili është mesazhi për Putinin, për Kinën? Dhe akoma më e rëndësishmja, çfarë mesazhi i dërgon Danimarkës, aleatit tuaj të ngushtë? 40 ushtarë nuk do të mbrojnë asgjë", sipas liderit ukrainas.
Zelensky vazhdoi qortimin e tij të ashpër ndaj kontinentit, duke thënë se "ende ndihet më shumë si gjeografi, histori, traditë, jo si një fuqi e madhe politike".
“Evropa duket e humbur teksa përpiqet të bindë presidentin e SHBA-së të ndryshojë. Por ai nuk do të ndryshojë”, tha Zelensky.
“Presidenti Trump e do veten. Dhe thotë se e do Evropën, por nuk do ta dëgjojë këtë Evropë.”
Ai vuri në pikëpyetje pse Trump mund të konfiskonte anije cisternash dhe naftë në hije, ndërsa Evropa nuk mundej, pasi shitjet e naftës nga Rusia vazhdojnë të financojnë luftën e Moskës kundër Ukrainës.
"Nëse Putini nuk ka para, nuk ka luftë për Evropën", tha Zelensky.
Rendi global në ndryshim
Macron dha paralajmërim në lidhje me largimin nga multilateralizmi në fjalimin e tij një ditë më parë.
“Është një zhvendosje drejt një bote pa rregulla, ku e drejta ndërkombëtare shkelet dhe ku i vetmi ligj që duket se ka rëndësi është ai i më të fortit”, tha Macron, duke përmbledhur shqetësimet evropiane rreth rritjes së unilateralizmit.
Udhëheqësi francez, i cili ka qenë në ballë të thirrjeve që Evropa të aktivizojë mekanizmat e mbrojtjes tregtare, e paraqiti zgjedhjen me të cilën përballen demokracitë në terma të ashpër.
“Ne preferojmë respektin ndaj ngacmuesve… dhe preferojmë sundimin e ligjit ndaj brutalitetit”, tha Macron.
Në një fjalim të shumëpërmendur të martën pasdite, kryeministri kanadez Mark Carney foli gjithashtu për ndryshime të pakthyeshme.
“Bota është në mes të një përçarjeje, jo të një tranzicioni dhe rendi i vjetër botëror nuk do të kthehet", tha Carney.
“Në një botë rivaliteti midis fuqive të mëdha, vendet midis tyre kanë një zgjedhje: të konkurrojnë me njëra-tjetrën për favore ose të bashkohen për të krijuar një rrugë të tretë me ndikim”, shtoi ai.
"Ne argumentojmë se fuqitë e mesme duhet të veprojnë së bashku, sepse nëse nuk jemi në tryezë, jemi në menu”, përfundoi kanadezi.
Presidenti argjentinas Javier Milei mbajti fjalimin e tij të tretë radhazi në Davos të mërkurën, duke lavdëruar transformimin ekonomik të qeverisë së tij dhe duke deklaruar se Perëndimi duhet të kthehet te vlerat e tij themelore.
“Që nga marrja e detyrës në vitin 2023, ne kemi kryer 13,500 reforma strukturore”, tha Milei, duke e përshkruar procesin si “Ta bëjmë Argjentinën përsëri të madhe”.
"Amerika do të jetë fener drite që do të ringjallë të gjithë Perëndimin", shtoi ai.
Guvernatori i Kalifornisë, Gavin Newsom, mbajti disa nga retorikat më luftarake të forumit të martën, duke u bërë thirrje udhëheqësve evropianë të “ndalojnë së qeni bashkëfajtor”.
"Nuk mund ta duroj këtë bashkëfajësi. Njerëzit që rrëzohen", tha Newsom.
Newsom shihet gjerësisht si një person që po e pozicionon veten si një zë alternativ demokrat ndaj administratës Trump përpara një kandidimi të mundshëm presidencial të vitit 2028.
Siguria transatlantike dhe rreziqet tregtare
Presidentja e Komisionit Evropian, Ursula von der Leyen, u bëri thirrje të dyja palëve të shmangin përshkallëzimin, ndërsa paralajmëroi për rreziqet për kohezionin perëndimor.
“Kjo do t’i ndihmonte vetëm kundërshtarët”, tha von der Leyen, duke përsëritur shqetësimet se nga konflikti tregtar SHBA-Evropë përfitojnë vende si Rusia.
Sekretari i Përgjithshëm i NATO-s, Mark Rutte, tha se trazirat aktuale e kanë larguar vëmendjen e botës nga lufta e vazhdueshme e Rusisë në Ukrainë.
"Çështja kryesore nuk është Grenlanda tani, çështja kryesore është Ukraina", tha Rutte, duke shtuar se ishte "pak i shqetësuar se mund të humbasin topin duke u përqendruar kaq shumë në këto çështje të tjera".
"Ata kanë nevojë për mbështetjen tonë tani, nesër dhe pasnesër", shtoi ai.
"Kam nevojë që aleatët evropianë të përqendrohen në këtë çështje", përfundoi Rutte.
Presidenti i WEF, Borge Brende, artikuloi “ankthin ekonomik” që mbizotëronte në forum.
"Ne jemi më të shqetësuar për përshkallëzimet e mëdha të luftërave. Kjo mund të shkatërrojë rritjen globale", tha Brende.
Përfaqësuesi i Tregtisë i SHBA-së, Jamieson Greer, mbrojti qasjen e administratës Trump në një konferencë për shtyp të martën, duke i cilësuar tarifat si një instrument legjitim gjeopolitik.
“Pikëpamja e presidentit ka qenë gjithmonë se ai do të preferonte shumë më tepër t’i zgjidhte gjërat me njerëzit, dhe për këtë arsye një tarifë është një masë më pak e rëndësishme”, tha Greer, duke i pozicionuar taksat tregtare së bashku me sanksionet dhe kontrollet e eksportit në mjetet e sigurisë kombëtare.
Greer i paralajmëroi aleatët evropianë kundër hakmarrjes, duke deklaruar se kjo do të ishte "e pamatur".
"Kur vendet e huaja ndjekin këshillën time, ato kanë tendencë të sillen mirë", tha ai.
Ai sinjalizoi gjithashtu një ndryshim themelor në politikën e SHBA-së mbi aksesin në treg.
"Tregu i SHBA-së nuk do të jetë kurrë përgjithmonë i disponueshëm për të gjithë, gjatë gjithë kohës, siç ka qenë për 25 vitet e fundit. Ne zbuluam se ky ishte një gabim", deklaroi Greer.
Inteligjenca Artificiale, kërcënimet ndaj fuqisë punëtore dhe të ardhmes së saj
Drejtori ekzekutiv i BlackRock, Larry Fink, i cili mori detyrën e bashkëkryetarit të Forumit Ekonomik Botëror, e hapi takimin me një ton autokritik.
“Për shumë njerëz, ky takim duket i paaftë për momentin: elitat në një epokë populizmi, një institucion i konsoliduar në një epokë mosbesimi të thellë institucional”, tha Fink.
“Dhe ka të vërtetë në këtë kritikë”, shtoi ai.
Drejtori ekzekutiv i Palantir, Alex Karp, duke folur me Fink, dha një parashikim të zymtë në lidhje me ndikimin e Al në punësim.
"Do të shkatërrojë vendet e punës në shkencat humane", tha Karp.
"Ke shkuar në një shkollë elitare dhe ke studiuar filozofi - do ta marr veten si shembull - shpresojmë që të kesh ndonjë aftësi tjetër, të cilën do të jetë e vështirë ta tregtosh", shtoi ai.
Sipas tij, “do të ketë vende pune më se të mjaftueshme për qytetarët e kombit tuaj, veçanërisht ata me trajnim profesional”, ndërsa paralajmëroi se Evropa po mbetet prapa SHBA-së dhe Kinës në përvetësimin e Al.
Vlen të përmendet se njeriu më i pasur në botë, Elon Musk, bëri paraqitjen e tij të parë në Forumin Ekonomik Botëror të enjten, duke parashikuar se robotët përfundimisht do t’i tejkalojnë njerëzit në numër dhe se Al do ta tejkalojë inteligjencën kolektive njerëzore brenda pesë vjetësh.
"Parashikimi im është se do të ketë më shumë robotë sesa njerëz", tha Musk në bisedë me Fink, duke shtuar se robotët humanoidë mund të ndihmojnë në ofrimin e kujdesit për të moshuarit në një botë ku nuk ka mjaftueshëm të rinj për t'u kujdesur për qytetarët e moshuar.
Musk tha se Al do të bëhet "më e zgjuar se çdo njeri individual" deri në fund të vitit 2026 dhe ka të ngjarë të tejkalojë "të gjithë njerëzimin së bashku" brenda 5 viteve.
Ai njoftoi se Tesla do të fillojë shitjen e robotëve humanoidë për publikun deri në vitin 2027.
"Deri në fund të këtij viti, mendoj se ata do të kryejnë detyra më komplekse dhe ndoshta deri në fund të vitit të ardhshëm, mendoj se do t'i shesim publikut robotë humanoidë", tha Musk.
"Atëherë jemi të sigurt se do të ketë besueshmëri shumë të lartë - në thelb mund t'i kërkoni të bëjë çfarë të dëshironi", përfundoi miliarderi. /Telegrafi/
Login
