Ushtria amerikane e ka rrëzuar një dron iranian që “në mënyrë agresive” po i afrohej aeroplanmbajtësit USS Abraham Lincoln në Detin Arabik, tha ushtria amerikane përmes një njoftimi më 3 shkurt.

Droni iranian Shahed-139 po fluturonte drejt aeroplanmbajtësit “me qëllim të paqartë” dhe u rrëzua nga një avion luftarak amerikan F-35, u tha në njoftim.

“Një avion luftarak F-35C nga aeroplanmbajtësi Abraham Lincoln e rrëzoi dronin iranian në vetëmbrojtje, me qëllim mbrojtjen e aeroplanmbajtësit dhe personelit në bord”, tha kapiteni i Marinës amerikane, Tim Hawkins, zëdhënës në Komandën Qendrore të ushtrisë amerikane.

Ai shtoi se asnjë pjesëtar i ushtrisë amerikane nuk është lënduar gjatë incidentit dhe asnjë pajisje e ushtrisë nuk ka pësuar dëme.

Incidenti ndodhi në kohën kur diplomatët po përpiqen të organizojnë bisedime bërthamore mes Iranit dhe SHBA-së dhe mes paralajmërimeve të presidentit amerikan, Donald Trump, se luftanijet amerikane janë nisur drejt Iranit dhe se “gjëra të këqija” mund të ndodhin nëse nuk arrihet një marrëveshje.

Ushtria amerikane ka dislokuar në afërsi të brigjeve të Iranit një grup sulmues detar, të udhëhequr nga aeroplanmbajtësi USS Abraham Lincoln.

Presidenti Trump nuk e ka përjashtuar mundësinë e një veprimi ushtarak ndaj Iranit, si kundërpërgjigje ndaj shtypjes brutale të protestave antiqeveritare që shpërthyen në fund të dhjetorit në mbarë Iranin./REL

The post Iu afrua aeroplanmbajtësit amerikan, SHBA-ja rrëzon një dron iranian appeared first on Albeu.com.

Zyrtarë të lartë izraelitë, përfshirë kreun e Forcave të Mbrojtjes së Izraelit (IDF), Eyal Zamir, i cili vizitoi Uashingtonin gjatë fundjavës, kanë shtyrë SHBA-të për të goditur Iranin, por presidenti amerikan, Donald Trump është i rezervuar.

Raporti thotë se Zamir i ka dhënë një informim Kryetarit të Shefave të Shtabit të Përbashkët, gjeneralit Dan Caine, mbi planet sulmuese dhe mbrojtëse të Izraelit në rast të një lufte me Iranin.

“Është e sigurt të thuhet se asgjë nuk doli nga ajo takim që të ndryshojë mendimin e tij ose të presidentit për sulmin ndaj Iranit”, citohet të ketë thënë një zyrtar amerikan, duke iu referuar Caine dhe Trump.

“Janë vërtet izraelitët ata që duan një sulm. Presidenti thjesht nuk është aty”, thotë zyrtari.

Një tjetër zyrtar i lartë amerikan thotë se Trump “nuk dëshiron ta bëjë këtë vërtet”.

Raporti citon tre këshilltarë të lartë të Trumpit që thonë se, ndërsa presidenti fillimisht preferonte sulmet gjatë protestave masive në Iran, tani ndjen se nisja e një veprimi ushtarak nuk do të ishte rruga e duhur. Njëri prej tyre thotë se skepticizmi qëndron për shumë në rrethin e ngushtë të Trump.

Megjithatë, një zyrtar i lartë nga një nga vendet ndërmjetësuese i thotë Axios se qëndrimi i Trump mund të ndryshojë nëse Irani nuk tregon gatishmëri për të plotësuar kërkesat e SHBA-së.

“Nëse Irani nuk vijon në bisedimet të premten me gjëra konkrete, ai mund të gjejë veten shumë shpejt në një situatë shumë të keqe”, thotë zyrtari. /Telegrafi/

TEHERAN, 3 janar /ATSH-AA/ – Irani thirri ambasadorët e shteteve anëtare të Bashkimit Evropian të martën për të protestuar kundër përcaktimit të Trupës së Gardës Revolucionare Islamike (IRGC) si një organizatë “terroriste”.

Në një deklaratë të martën, Ministria e Jashtme tha se ky veprim erdhi në përgjigje të një “rezolute anti-Iran” të miratuar nga Këshilli i Ministrave të Bashkimit Evropian kundër IRGC-së.

Sipas deklaratës, një “protestë e fortë” kundër këtyre “veprimeve provokuese” iu përcoll zyrtarisht ambasadorëve.

“Qëndrimi i Qeverisë së Republikës Islamike të Iranit u përcaktua qartë, duke dënuar fuqimisht vendimet e pajustifikuara dhe të papërgjegjshme të Këshillit të Ministrave të BE-së”, thuhet në deklaratë.

Zhvillimi erdhi një ditë pasi zëdhënësi i Ministrisë së Jashtme të Iranit, Esmaeil Baghaei, tha se do të merret një vendim në lidhje me “kundërmasat” kundër asaj që ai e përshkroi si “veprime të paligjshme, të pajustifikuara dhe të gabuara” të BE-së që synojnë IRGC-në.

Duke folur në një konferencë javore për shtyp në Teheran të hënën, Baghaei tha se një sërë masash janë në agjendën e ministrisë, me opsione të ndryshme të përgatitura dhe të paraqitura organeve vendimmarrëse në përgjigje të përcaktimit të fundit të IRGC-së nga BE.

Tensionet janë përshkallëzuar midis Iranit dhe disa vendeve evropiane pas protestave të fundit antiqeveritare brenda Iranit, me udhëheqësit evropianë që dënojnë atë që ata e përshkruajnë si një shtypje ndaj protestuesve.

Të enjten, BE-ja e caktoi IRGC-në si një organizatë “terroriste”, një veprim që u dënua ashpër nga udhëheqja civile dhe ushtarake e Iranit.   /os/

The post TEHERAN – Irani thërret ambasadorët e BE-së për shkak të përcaktimit si organizatë “terroriste” të IRGC-së appeared first on Agjencia Telegrafike Shqiptare.

Presidenti Masoud Pezeshkian ka thënë se Irani është gati të negociojë me SHBA-në, pas kërkesave nga "qeveritë miqësore në rajon" për t'iu përgjigjur një propozimi për bisedime.

Në një deklaratë për X, Pezeshkian tha se i kishte thënë Ministrit të Jashtëm, Abbas Araghchi të ndiqte bisedimet "me kusht që të ekzistonte një mjedis i përshtatshëm - një mjedis i lirë nga kërcënimet dhe pritjet e paarsyeshme".

Fjalët e tij vijnë pasi udhëheqësi suprem i vendit, Ajatollah Ali Khamenei, paralajmëroi se çdo sulm ndaj Iranit do të shkaktonte një "luftë rajonale".

Presidenti i SHBA-së, Donald Trump ka ndërtuar forca në rajon dhe kërcënoi të ndërmarrë veprime ushtarake nëse Irani nuk bie dakord për një marrëveshje mbi programin e tij bërthamor, dhe nuk ndalon vrasjen e protestuesve.

Pezeshkian tha se Irani do të ndiqte "negociata të drejta dhe të barabarta" me SHBA-në, duke shtuar se ato duhet të "kryhen brenda kuadrit të interesave tona kombëtare".

Bisedimet mund të mbahen në Stamboll të premten, me Araghchi që do të takohet me të dërguarin special të SHBA-së Steve Witkoff, sipas raporteve të medias amerikane.

Ministrat e Jashtëm të Egjiptit, Omanit, Pakistanit, Katarit, Arabisë Saudite dhe Emirateve të Bashkuara Arabe janë ftuar gjithashtu të marrin pjesë.

Njoftimi i Pezeshkian erdhi një ditë pasi Araghchi i tha CNN në një intervistë se ishte "i bindur se mund të arrijmë një marrëveshje" për të "siguruar që nuk ka armë bërthamore".

Irani këmbëngul se programi i tij bërthamor është tërësisht paqësor dhe mohon se po kërkon të zhvillojë armë bërthamore.

Kur u pyet për perspektivën e një marrëveshjeje nga gazetarët, Trump tha: "Nëse mund të gjejmë diçka, kjo do të ishte shumë mirë, dhe nëse nuk mundemi, ndoshta do të ndodhin gjëra të këqija".

Ai tha se një "forcë e jashtëzakonshme" po shkonte drejt Iranit, duke përfshirë anijet "më të mëdha dhe më të mira".

Përforcimi ushtarak amerikan në rajon përfshin aeroplanmbajtësen USS Abraham Lincoln, e cila ka një krah ajror prej rreth 70 aeroplanësh, dhe tre shkatërrues të pajisur me raketa Tomahawk.

Në një fjalim të dielën, Khamenei u tha iranianëve: "Ne nuk jemi iniciatorët dhe nuk duam të sulmojmë asnjë vend, por kombi iranian do të japë një goditje të fortë kundër kujtdo që sulmon dhe ngacmon ata".

Qershorin e kaluar, SHBA-të kryen sulme ajrore dhe raketore në tre objekte kryesore bërthamore iraniane gjatë një lufte 12-ditore midis Izraelit dhe Iranit. /Telegrafi/

Shtetet e Bashkuara të amerikanë kanë rrëzuar droning Iranian, I cili iu afrua një aeroplanmbajtëse, thotë një zyrtar amerikan.

Ushtria amerikan rrëzoi dronin që iu afrua aeroplanmbajtëses USS Abraham Lincoln në Detin Arabik, tha një zyrtar amerikan Reuters-it.

Droni iranian, i identifikuar si model Shahed-139, po fluturonte drejt aeroplanmbajtëses kur një aeroplan luftarak amerikan F‑35 e ndërhyri dhe e shkatërroi atë.

Kujtojmë se presidenti amerikan, Donald Trump ka shtuar presionin ndaj Teheranit, duke kombinuar forcë ushtarake me kërcënime të qarta për veprime ushtarake nëse Irani nuk pranon bisedime dhe një marrëveshje për programin bërthamor.

Sipas deklaratave të tij, një “armadë e madhe” e SHBA-së po lëviz drejt zonës së Iranit dhe koha është në limit për të arritur një marrëveshje që ndalon programin bërthamor iranian ose përndryshe do të vijnë veprime ushtarake më të ashpra.

Trump ka bërë të qartë se SHBA nuk përjashton një sulm ushtarak ndaj Iranit nëse ky i fundit refuzon të negociojë një marrëveshje që ndalon zhvillimin e armëve bërthamore — duke thënë se nëse Irani nuk pranon marrëveshjen, “koha po mbaron” dhe se SHBA do të përdorë forcë nëse është e nevojshme.

Në të njëjtën kohë, Trump dhe stafi i tij po shqyrtojnë edhe opsione të tjera që përfshijnë goditje të synuara ndaj forcave të sigurisë ose udhëheqjes iraniane, me qëllim, sipas disa burimeve, që të inkurajohen protestat brenda vendit. /Telegrafi/

Një zjarr masiv shpërtheu në Tregun Jannat në Teheran, duke shkaktuar panik dhe shqetësim të madh në zonë.

Re të dendura tymi të zi u panë duke u ngritur lart mbi treg dhe rrethinat, ndërsa flakët përhapeshin me shpejtësi nëpër tezgat dhe objektet tregtare.

Autoritetet reaguan menjëherë duke dërguar në vendngjarje disa njësi zjarrfikëse, ambulanca dhe forca sigurie për të izoluar zonën dhe për të parandaluar përhapjen e mëtejshme të zjarrit.

Operacioni për shuarjen e flakëve zgjati për disa orë për shkak të intensitetit të zjarrit dhe materialeve të djegshme që ndodheshin në treg.

Sipas informacioneve fillestare, nuk ka raportime zyrtare për viktima në njerëz, megjithatë janë shkaktuar dëme të konsiderueshme materiale.

Shkaku i zjarrit ende nuk është konfirmuar dhe autoritetet përkatëse kanë nisur hetimet për të zbuluar rrethanat që çuan në shpërthimin e tij.

Situata mbetet nën monitorim, ndërsa ekipet e emergjencës vazhdojnë punën për të siguruar zonën dhe për të shmangur rreziqe të tjera të mundshme. /Telegrafi/

Rusët ndërmorën një sulm ndaj qytetit të Kharkivit duke përdorur dronë të tipit Shahed.

Sipas raportimeve paraprake, një nga këta dronë goditi drejtpërdrejt një ndërtesë banimi shumëkatëshe, çka çoi në shpërthimin e një zjarri të madh.

Flakët përfshinë disa kate të godinës, duke shkaktuar panik te banorët dhe dëme të konsiderueshme materiale.

Ekipet e emergjencës ndërhynë për të shuar zjarrin dhe për të evakuuar banorët, ndërsa autoritetet po vlerësojnë pasojat e sulmit.

Ndërkohë, sulmi vjen në një kohë kur pritet të vazhdojnë bisedimet trepalëshe mes Shteteve të Bashkuara, Ukrainës dhe Rusisë, me synimin për të ulur tensionet dhe për të gjetur një rrugë drejt armëpushimit.

Ndryshe, Rusia gjatë fundjavës së kaluar kishte pranuar një armëpushim disa ditor duke u zotuar se nuk do të sulmojë vetëm infrastrukturën energjetike. /Telegrafi/

I dërguari amerikan Steve Witkoff mbërriti në Izrael të martën për të zhvilluar bisedime me kryeministrin izraelit, Benjamin Netanyahu dhe zyrtarë të tjerë.

Televizioni izraelit Channel 12 raportoi se zyra e Netanyahut ka theksuar për portalin e lajmeve The Times of Israel se kryeministri izraelit do të takohet me Witkoff në orën 16:30 sipas orës lokale.

Bisedimet e të dërguarit amerikan në Izrael pritet të përqendrohen mbi Iranin dhe zbatimin e fazës së dytë të planit të armëpushimit në Gaza. Irani dhe SHBA-ja do të rifillojnë bisedimet mbi programin bërthamor të Teheranit në Stamboll të premten.

Lindja e Mesme nuk ka nevojë për një tjetër përballje midis SHBA-së dhe Iranit, dhe Teherani duhet të arrijë një marrëveshje bërthamore me Uashingtonin.

Kjo ka qenë thirrja e Anwar Gargash, këshilltari diplomatik i presidentit të Emirateve të Bashkuara Arabe, në një panel të Samitit të Qeverive Botërore në Dubai të martën.

"Mendoj se rajoni ka kaluar nëpër disa përballje katastrofike. Nuk mendoj se kemi nevojë për një tjetër, por do të doja të shihja negociata të drejtpërdrejta iraniano-amerikane që çojnë në një mirëkuptim...", tha ai.

Reagimi i tij pasi Irani dhe Shtetet e Bashkuara do të rifillojnë bisedimet bërthamore të premten në Turqi, thanë zyrtarë iranianë dhe amerikanë të hënën.

I dërguari special i SHBA-së, Steve Witkoff, dhe ministri i jashtëm iranian, Abbas Araqchi, thuhet se do të takohen në Stamboll në një përpjekje për të ringjallur diplomacinë mbi një mosmarrëveshje të gjatë rreth programit bërthamor të Iranit dhe për të shpërndarë frikën e një lufte të re rajonale, ndërsa një diplomat rajonal tha se përfaqësues nga vende si Arabia Saudite dhe Egjipti do të merrnin pjesë gjithashtu.

Bisedimet e planifikuara po zhvillohen pasi Trump tha javën e kaluar se një "armadë" masive po shkonte drejt Iranit, ndërsa i kërkoi Teheranit të hynte menjëherë në negociata.

Më vonë ai theksoi se Irani po “bisedonte seriozisht” me SHBA-në.

Presidenti amerikan ka kërcënuar me veprime ushtarake kundër Iranit mes tensioneve në rritje pas protestave antiqeveritare në Iran që filluan në fund të dhjetorit pas rënies së rialit, rritjes së inflacionit dhe përkeqësimit të kushteve të jetesës.

Dhe zyrtarët iranianë kanë paralajmëruar se çdo sulm i SHBA-së do të shkaktonte një përgjigje “të shpejtë dhe gjithëpërfshirëse”. /Telegrafi/

Udhëheqësit e Iranit përballen tani me një rrezik të paprecedentë. Regjimi nuk është më i qëndrueshëm dhe mekanizmat globalë për shmangien e konfliktit nuk funksionojnë më.

Nga: Sanam Vakil / The Guardian (titulli: War, a Trump-imposed deal or internal regime collapse: for Tehran, none of the options are good)
Përkthimi: Telegrafi.com

Dyzet e shtatë vjet pas revolucionit iranian, Irani po përballet me një realitet strategjik që nuk e ka përjetuar më parë - një krizë të njëkohshme e legjitimitetit të brendshëm dhe një kërcënim të besueshëm nga jashtë, aq serioz sa mbijetesa e regjimit nuk mund të merret më si e mirëqenë. Deri tani, Teherani i ka mbijetuar luftërave, sanksioneve, vrasjeve, protestave masive dhe izolimit ndërkombëtar përmes një strategjie që përfshin projektimin e forcës jashtë vendit, shtypjen e disidencës brenda dhe krijimin e një krize të përhershme për të justifikuar udhëheqjen e dobët dhe dështimin politik.

Sot, Donald Trumpi ka mobilizuar “armadën” në Lindjen e Mesme që përfshin grupin e sulmit të aeroplanmbajtëses USS Abraham Lincoln, shkatërruesit me raketa të dirigjuara, një prani e zgjeruar ajrore dhe sisteme të mbrojtjes raketore. Ky demonstrim force sugjeron se ShBA-ja nuk është më e fokusuar në frenimin e Iranit, por në imponimin e një zgjidhjeje përfundimtare të një konflikti të gjatë. Zgjedhja që paraqitet është ose pranimi i një marrëveshjeje të imponuar nga ShBA-ja, ose shkatërrimi i Republikës Islamike siç ekziston sot.

Veprimet e Trumpit gjatë mandatit të tij të parë si president përfshinin braktisjen e marrëveshjes bërthamore të vitit 2015, rivendosjen e sanksioneve gjithëpërfshirëse dhe vrasjen e komandantit të Forcës Quds, Qassem Suleimani, në vitin 2020, duke paralajmëruar një qasje të re ndaj një armiku të kahershëm. Tani që është kthyer në detyrë, ai duket i vendosur ta përfundojë atë projekt duke e detyruar Teheranin të pranojë një marrëveshje sipas kushteve amerikane ose të përballet me sulme ushtarake që synojnë çmontimin e regjimit.

Për Iranin, ky është një moment i paprecedentë. Që nga viti 1979, regjimi nuk është përballur me kërcënime serioze në të njëjtën kohë - si ndaj legjitimitetit të tij të brendshëm, ashtu edhe ndaj aftësisë për të trembur armiqtë jashtë vendit. Brenda vendit, sistemi është i rraskapitur. Vite të tëra me rënie ekonomike, korrupsion, kolaps i valutës dhe emigrimi masiv e kanë dobësuar kontratën shoqërore. Protestat që nga viti 2017, përfshirë kryengritjen “Grua, Jetë, Liri” të vitit 2022 dhe demonstratat masive të muajit të fundit, tregojnë një shoqëri që nuk ia ka më frikën shtetit. Protestuesit janë bërë më të guximshëm dhe më të zemëruar, edhe pse kostoja e mospajtimit është rritur ndjeshëm. Në fakt, goditja e janarit ishte më e dhunshmja në historinë e regjimit, me mbi 6 000 persona të konfirmuar të vrarë dhe edhe 17 000 vdekje të tjera të regjistruara ende nën hetim.

Jashtë vendit, Irani e ka humbur kontrollin, dhe projekti i tij rajonal i fuqisë është shkërmoqur. Që nga 7 tetori, fushata sistematike e Izraelit kundër të ashtuquajturit bosht të rezistencës iraniane ka gërryer ndjesinë e sigurisë së Teheranit. Përmes sulmeve të hapura ajrore në të gjithë rajonin dhe në vetë Iran, vrasjeve që kishin cak njerëz të nivelit të lartë dhe operacioneve kibernetike që kulmuan me luftën 12-ditore të verës së kaluar, Izraeli e ka zhvendosur luftën e fshehtë në një konflikt të hapur dhe, në këtë mënyrë, e ka shtyrë aktivisht Iranin drejt një ballafaqimi të drejtpërdrejtë me ShBA-në.

Në të njëjtën kohë, Irani i ka krijuar vetë kushtet e dobësisë së tij. Përpjekjet e tij për të ndërtuar ndikimin përmes milicive në Irak, Siri, Liban dhe Jemen kishin për qëllim të shmangnin sulmet duke rritur koston e luftës. Në vend të kësaj, ato kanë krijuar pika të shumta ekspozimi. Loja me pragun bërthamor, dikur një mjet për presion, tani është bërë justifikimi kryesor për presion ndërkombëtar. Ideologjia e tij revolucionare, dikur një mjet për mobilizim, tani e lë gjithnjë e më të izoluar në një rajon që është lodhur nga konfliktet ideologjike.

Pyetja kryesore për ditët në vijim nuk është nëse do të ndodhë përballja, por në çfarë forme do të ndodhë ajo.

Skenari i parë është kompromisi i detyruar. Nën presion të madh, Irani pranon një marrëveshje që kufizon programin e tij bërthamor, lejon inspektime të bezdisshme, vendos kufizime për aftësitë raketore dhe e redukton rolin e tij rajonal në këmbim të lehtësimit të sanksioneve dhe ndoshta investimeve të ardhshme amerikane në vend. Kjo mund të parandalojë luftën e menjëhershme, por do të ketë një kosto të madhe politike. Marrëveshja e tillë do të shihej brenda Iranit si pazar për hir të mbijetesës së regjimit.

Skenari i dytë është lufta e kontrolluar. ShBA-ja do të koordinonte sulmet ndaj udhëheqjes iraniane, forcave raketore, mbrojtjes ajrore dhe infrastrukturës bërthamore që mbetet, duke synuar të gjymtojë regjimin. Kjo ndoshta do të shkaktonte një përshkallëzim rajonal iranian që varion nga sulmet mbi bazat amerikane, rrugët detare dhe qytetet izraelite, ndoshta edhe me mobilizim të ndërmjetësve [proxy] përreth Gjirit. Qëllimi në këtë skenar do të ishte transformimi i regjimit, por rezultati me siguri do të sillte paqëndrueshmëri të zgjatur, fragmentim të elitës dhe një luftë të dhunshme për drejtimin e ardhshëm.

Skenari i tretë është kolapsi i pakontrolluar. Nën presion të kombinuar nga jashtë dhe nga trazirat e brendshme, regjimi thyhet, duke prodhuar jo një tranzicion liberal, por një vakum pushteti. Faksionet konkurruese të sigurisë, kolapsi ekonomik dhe ndërhyrjet rajonale mund ta kthejnë Iranin në një burim afatgjatë të paqëndrueshmërisë - duke sjellë ndër mend imazhet e Libisë dhe Sirisë - që do të prodhonte një rezultat më të rrezikshëm sesa regjimi që zëvendëson.

Në të tre skenarët, rezultati është i rrezikshëm për popullin iranian. Qoftë përmes kompromisit të detyruar, luftës së kufizuar apo kolapsit të regjimit, asnjë nga rrugët e mundshme nuk çon drejt stabilitetit të menjëhershëm apo tranzicionit demokratik. Për më tepër, të gjitha palët - Izraeli, ShBA-ja dhe Irani - janë të bllokuara në një logjikë përshkallëzimi dhe jo përmbajtjeje.

Kjo është ajo që e bën momentin aktual të jetë kaq i rrezikshëm. Nuk ka më frena të vërtetë diplomatike. Sistemet dhe mekanizmat që më parë mbanin konfliktin të përmbajtur, nuk funksionojnë më. Evropa nuk ka më asnjë rol për të ndërmjetësuar me Iranin. Rusia është e përqendruar në luftën e saj në Ukrainë dhe nuk është e gatshme të investojë në zgjidhje. Kina është e kujdesshme dhe nuk dëshiron të udhëheqë. Shtetet rajonale po përpiqen të ndërhyjnë dhe të menaxhojnë diplomacinë e çastit të fundit, por njëkohësisht po përgatiten për atë që vjen.

Për Iranin dhe për Lindjen e Mesme në përgjithësi, pyetja nuk është më nëse kriza mund të zbutet, por sa shumë dëm do të shkaktojë përpara se të përfundojë. /Telegrafi/

Presidenti Donald Trump paralajmëroi të hënën se "gjëra të këqija" do të ndodhin nëse Irani nuk arrin të arrijë një marrëveshje me Shtetet e Bashkuara.

"Tani për tani po flasim me ta, po flasim me Iranin dhe nëse mund të gjejmë një zgjidhje, kjo do të ishte shumë mirë. Dhe nëse nuk mundemi, ndoshta do të ndodhin gjëra të këqija", u tha Trump gazetarëve në Shtëpinë e Bardhë, shkruajnë mediat e huaja, përcjell Telegrafi.

Me tensionet në rritje, Trump refuzoi të diskutonte ndonjë veprim të mundshëm ushtarak kundër Iranit, por përsëriti se "forca e jashtëzakonshme", përfshirë një aeroplanmbajtëse që ai ka dërguar në Lindjen e Mesme, do të mbërrijë së shpejti në rajon.

Trump ka mbajtur qëndrimin se shpreson që Uashingtoni do të "gjejë një zgjidhje" me Iranin, por gjithashtu paralajmëroi të hënën se "gjëra të këqija do të ndodhin" nëse nuk arrihet një marrëveshje.

Trump kishte paralajmëruar se "koha po mbaron" që Irani të arrijë një marrëveshje mbi programin e tij bërthamor, të cilin Perëndimi beson se synon të bëjë një bombë atomike, një pretendim që Teherani e ka mohuar vazhdimisht.

Në një intervistë me CNN të dielën, Abbas Araghchi, ministër i Punëve të Jashtme të Iranit tha: “Presidenti Trump tha jo armë bërthamore dhe ne pajtohemi plotësisht. Ne pajtohemi plotësisht me këtë. Kjo mund të jetë një marrëveshje shumë e mirë”, duke shtuar se, “në këmbim, ne presim heqjen e sanksioneve”.

Zëdhënësi i ministrisë së jashtme iraniane, Esmaeil Baqaei, theksoi më herët të hënën se Teherani po punonte për një metodë dhe kornizë për negociata që do të ishin gati në ditët në vijim, me mesazhe midis dy palëve të transmetuara përmes aktorëve rajonalë.

Turqia ka udhëhequr një përpjekje diplomatike për të ulur tensionet, me Araghchi që vizitoi Stambollin javën e kaluar dhe foli me homologë të tjerë rajonalë, përfshirë Egjiptin, Arabinë Saudite dhe Jordaninë.

E diplomati më i lartë i Jordanisë, Ayman Safadi, e siguroi Araghchi të hënën se mbretëria “nuk do të jetë një fushë beteje në asnjë konflikt rajonal ose një platformë nisjeje për ndonjë veprim ushtarak kundër Iranit”.

Në anën tjetër, autoritetet iraniane, përfshirë udhëheqësin suprem Ali Khamenei, kanë paralajmëruar se çdo sulm i SHBA-së do të shkaktonte një “luftë rajonale”. /Telegrafi/

Teksa forcat amerikane po grumbullohen pranë kufijve të Iranit dhe në kohën kur Teherani po paralajmëron për pasoja nëse shpërthen lufta, po zhvillohet një përpjekje diplomatike për të shmangur një përshkallëzim rajonal, pasi Uashingtoni ka kërcënuar me veprim ushtarak për shkak të shtypjes vdekjeprurëse të protestave antiqeveritare në Iran.

Më 1 shkurt, ministri i Jashtëm iranian, Abbas Araqchi, sinjalizoi një hapje të mundshme, duke deklaruar se një “marrëveshje e drejtë dhe e barabartë” që do të siguronte Republika Islamike të mos posedojë armë bërthamore mund të arrihet, duke i bërë jehonë me qëllim formulimit të përdorur nga presidenti amerikan, Donald Trump.

Vetë Trump e konfirmoi këtë ndryshim, duke u thënë gazetarëve se Irani po “bisedon seriozisht” me Shtetet e Bashkuara.

Këto zhvillime vijnë pas një jave intensive të diplomacisë fluturuese: shefi i sigurisë i Iranit, Ali Larijani, u takua me presidentin rus, Vladimir Putin, në Moskë më 30 janar, ndërkaq Araqchi udhëtoi drejt Turqisë për t’u konsultuar me presidentin, Recep Tayyip Erdogan, dhe ministrin e Jashtëm, Hakan Fidan.

Vrulli vazhdoi edhe në ditën pasuese në Teheran, ku të dy zyrtarët u takuan me kryeministrin e Katarit, Sheik Muhammad bin Abdulrahman al-Thani, për të cilin gjerësisht u spekulua se po përçonte një mesazh nga Uashingtoni.

Pas këtyre takimeve, Larijani shkroi në X se kishte pasur “përparim në formimin e një kornize” për bisedime. Raportimet e mediave iraniane tani sugjerojnë se një takim kokë më kokë në Ankara mes të dërguarit të posaçëm të Shtëpisë së Bardhë, Steve Witkoff, dhe diplomatëve të lartë iranianë mund të ndodhë “në ditët në vijim”.

Irani po përballet me trazira që nga 28 dhjetorit, kur protestuesit paqësorë nisën të dalin nëpër rrugët e Teheranit duke kërkuar nga autoritetet që të veprojnë për të ndalur inflacionin në rritje dhe zhvlerësimin e valutës kombëtare.

Për shkak të kufizimeve në qasjen në shërbimet e internetit në Iran, është e vështirë që të vlerësohet sesa protestues janë vrarë gjatë demonstratave masive, që duket se janë fashitur në ditët e fundit.

Organizata për të drejtat e njeriut me seli në SHBA, HRANA, shifrat e të cilave Radio Evropa e Lirë i ka cituar vazhdimisht që nga nisja e shtypjes së dhunshme në Iran më herët gjatë muajit, thotë se numri i vdekjeve të konfirmuara, përfshirë edhe të forcave të sigurisë, tani është 6.563, ndërkaq numri i vdekjeve që ende po hetohen është 17.091. Më shumë se 49.000 persona janë arrestuar.

Disa media, duke cituar zyrtarë të paidentifikuar, kanë raportuar se numri i viktimave është shumë më i lartë.

Në fund të muajit të kaluar, Trump njoftoi se një “flotë masive” po lëvizte drejt Iranit, duke paralajmëruar se mund të veprojë “me shpejtësi” nëse është e nevojshme. Ai po ashtu tha se shpreson që një “marrëveshje e drejtë” do të linte Iranin pa armë bërthamore.

Ushtria amerikane ka dislokuar në afërsi të brigjeve të Iranit një grup sulmues detar, të udhëhequr nga aeroplanmbajtësi USS Abraham Lincoln.

Disa në Iran kanë sugjeruar po ashtu për një marrëveshje të mundshme e cila do të parashihte që rezervat e Iranit me uranium të pasuruar në nivel të lartë – që raportohet se janë të fshehura nëntokë pas sulmeve ajrore amerikane qershorin e vitit të kaluar – të transferohen në një shtet tjetër.r

Pavarësisht optimizmit publik, analistët kanë paralajmëruar se rruga drejt një marrëveshjeje është e mbushur me rreziqe të brendshme për Teheranin.

Analisti me seli në Spanjë, Ata Mohamed-Tabriz, i tha Radios Farda të Radios Evropa e Lirë se përderisa Ministria e Jashtme po jep sinjale të fleksibilitetit, elementët e linjës së ashpër brenda Gardës Revolucionare Islamike i shohin këto bisedime si një “lojë mashtruese” dhe si një “helm vdekjeprurës”.

Pyetja kryesore është: si duket në realitet një marrëveshje “e drejtë”? Përderisa Trump pohon se sulmet amerikane të kryera në qershor “shkatërruan” programin bërthamor të Iranit, kërkesat e tij kanë shkuar përtej çështjes së pasurimit të uraniumit.

Aktivisti me seli në Gjermani, Mehdi Fatapour, argumentoi se për çdo marrëveshje që vërtetë do të plotësonte kërkesat e administratës Trump dhe do të shmangte luftën, do të kërkonte me shumë gjasa atë që mund të cilësohet si “dorëzim strategjik”.

Duke folur për Radion Farda, Fatapour tha se Uashingtoni mund të kërkojë një ndryshim total në identitetin rajonal të Iranit, duke përfshirë përfundimin e armiqësive me Izraelin dhe heqjen dorë nga bashkëpunëtorët e tij rajonalë.

Për Republikën Islamike këto nuk janë thjesht pika politike, ato janë shtylla ideologjike të shtetit dhe autoritetet iraniane e kanë përjashtuar mundësinë e negociatave për çfarëdo çështje që shkon përtej programit bërthamor.

Edhe nëse një kornizë arrihet në Ankara, ajo mund të shërbejë vetëm si një lehtësim i përkohshëm. Mohamed-Tabriz sugjeroi se një “marrëveshje minimale” mund të blejë kohë, por nuk zgjidh “grumbullimin masiv të kërkesave shoqërore” dhe pakënaqësinë e brendshme që aktualisht mbretëron brenda Iranit.

Analistët argumentojnë se kërcënimi për një “luftë rajonale” mbetet karta kryesore e Teheranit për negocim. Duke e paraqitur konfliktin si një katastrofë ekzistenciale që do të përfshijë tërë Lindjen e Mesme, Teherani ka arritur të ushtrojë presion ndaj ndërmjetësve rajonalë si Katari dhe Turqia për të ndërhyrë.

Megjithatë, sipas Fatapour, nëse Republika Islamike zgjedh rrugën e reformave të ngadalta dhe të koncesioneve të vogla diplomatike, ajo ende mund të përballet me një reagim të ashpër nga publiku, i cili gjithnjë e më shumë është i lodhur nga sanksionet dhe kërcënimi i një lufte./REL

The post Vrull diplomatik mes tensioneve në rritje SHBA-Iran appeared first on Albeu.com.

Gjeneralët më të lartë amerikanë dhe izraelitë zhvilluan bisedime në Pentagon të premten mes tensioneve në rritje me Iranin.

Kjo është bërë e ditur nga dy zyrtarë amerikanë për Reuters të dielën, duke folur në kushte anonimiteti, përcjell Telegrafi.

Zyrtarët nuk ofruan detaje rreth diskutimeve me dyer të mbyllura midis gjeneralit amerikan Dan Caine, kryetarit të Shtabit të Përbashkët, dhe Eyal Zamir, shefit të shtabit të forcave të armatosura izraelite.

Takimi nuk është raportuar më parë.

Shtetet e Bashkuara kanë rritur praninë e tyre detare dhe kanë rritur mbrojtjen e tyre ajrore në Lindjen e Mesme pasi presidenti Donald Trump kërcënoi vazhdimisht Iranin, duke u përpjekur ta ulë atë në tryezën e negociatave.

Udhëheqja e Iranit paralajmëroi të dielën për një konflikt rajonal nëse SHBA-të do ta sulmonin atë.

E ministri izraelit i Mbrojtjes, Israel Katz, u takua të dielën me Zamir pas bisedimeve të tij në Uashington, tha zyra e Katz, për të shqyrtuar situatën në rajon dhe "gatishmërinë operacionale të ushtrisë izraelite për çdo skenar të mundshëm". /Telegrafi/

Presidenti Donald Trump sugjeroi të dielën se nëse Irani nuk arrin një marrëveshje bërthamore me Shtetet e Bashkuara, bota së shpejti do të shohë nëse Udhëheqësi Suprem i Iranit, Ajatollah Ali Khamenei, kishte të drejtë në paralajmërimin se një sulm i SHBA-së do të shkaktonte një luftë rajonale.

"Pse nuk do ta thoshte këtë? Sigurisht, mund ta thotë këtë", u tha Trump gazetarëve kur u pyet për reagimin e tij ndaj komenteve sfiduese të udhëheqësit iranian në lidhje me pasojat e mundshme të një sulmi të SHBA-së.

"Por ne kemi anijet më të mëdha dhe më të fuqishme në botë, atje, shumë afër", shtoi Trump. "Dhe shpresojmë se do të bëjmë një marrëveshje".

"Nëse nuk bëjmë një marrëveshje, atëherë do të zbulojmë nëse ai kishte të drejtë", ka shtuar Trump, përcjell Telegrafi.

Trump tha të shtunën se Irani po "flet seriozisht" me Shtetet e Bashkuara, ndërsa refuzoi të thoshte nëse ka vendosur për një sulm të mundshëm ushtarak kundër regjimit.

Ndryshe, udhëheqësi i Iranit, Ajatollah Ali Khamenei, i tha një turme në Teheran të dielën se Irani nuk "ka ndërmend të sulmojë asnjë vend, por kombi iranian do t'i japë një goditje të fortë kujtdo që e sulmon dhe e ngacmon atë", sipas medias shtetërore.

Ai theksoi se nëse SHBA-të sulmojnë Iranin, kjo do të shndërrohet në një konflikt rajonal.

"Amerikanët duhet ta dinë se nëse fillojnë një luftë, këtë herë do të jetë një luftë rajonale", citohet të ketë thënë Khamenei.

Komentet e 86-vjeçarit Khamenei janë kërcënimi më i drejtpërdrejtë që ai ka bërë deri më tani.

Teherani ka paralajmëruar se nëse presidenti i SHBA-së, Donald Trump urdhëron sulme ndaj Iranit, kjo do të synojë Izraelin dhe asetet ushtarake amerikane në Lindjen e Mesme.

Kujtojmë se CNN raportoi javën e kaluar se Trump po shqyrtonte një sulm të ri të madh ndaj Iranit, pasi diskutimet paraprake midis Uashingtonit dhe Teheranit mbi kufizimin e programit bërthamor të vendit dhe prodhimit të raketave balistike dështuan të bënin përparim.

Grupi i sulmit të transportuesit USS Abraham Lincoln hyri në Oqeanin Indian javën e kaluar, duke e afruar atë për të ndihmuar në çdo operacion të mundshëm të SHBA-së që synon Iranin. /Telegrafi/

Lideri Suprem i Iranit, Ali Ajtollah Kamenei paralajmëroi këtë të diel Shtetet e Bashkuara të Amerikës se çdo sulm ndaj vendit të tij do të sillte një luftë të gjerë rajonale në një kokë kur Trump ka zhvendosur një prej aeroplanmbajtëseve më të madhe drejt lindjes se mesme si dhe disa luftë-anije të tjera.

Ata duhet ta dine mire se nëse do të nisin një luftë këtë here, ajo do të jetë një luftë rajonale deklaroi Khamenei .

Udhëheqësi 86-vjeçar i Iranit i bëri këto deklarata në përvjetorin e kthimit nga mërgimi të Ajatollah Ruhollah Khomeinit në vitin 1979, një moment kyç që çoi në Revolucionin Islamik dhe në rrëzimin e monarkisë së Mohammad Reza Shah Pahlavit.

Komentet e Khameneit vijnë ndërsa aeroplanmbajtësja amerikane USS Abraham Lincoln, avionë luftarakë dhe shkatërrues detarë janë afruar në rajon, pas protestave të gjera antiqeveritare e në Iran, ku në janar u raportua se u vranë mijëra persona.

Protestat nisën në fund të dhjetorit për shkak të rënies së monedhës iraniane, rialit, dhe më pas u shndërruan në një sfidë të drejtpërdrejtë ndaj pushtetit të Khameneit. Autoritetet iraniane pretendojnë se protestuesit janë nxitur dhe drejtuar nga agjentë të huaj.

“Ngjarjet e fundit ishin të ngjashme me një grusht shteti. Sigurisht, grushti i shtetit u shtyp”, tha Khamenei gjatë ceremonisë përkujtimore. Ai shtoi se qëllimi i protestuesve ishte shkatërrimi i institucioneve shtetërore dhe se janë sulmuar policia, ndërtesat qeveritare, objektet e Gardës Revolucionare, bankat dhe xhamitë, si dhe janë djegur kopje të Kuranit.

Fillimisht, presidenti amerikan Donald Trump kishte kushtëzuar një sulm të mundshëm ndaj Teheranit me sjelljen e Iranit ndaj protestuesve, por më pas ndryshoi qëndrim, duke deklaruar se dëshironte që Irani të pranonte një marrëveshje për programin bërthamor.

Në qershor, zyrtarë iranianë dhe amerikanë zhvilluan bisedime indirekte në Oman, përpara se Izraeli të niste një luftë 12-ditore kundër Iranit. SHBA iu bashkua Izraelit dhe goditi objektet bërthamore iraniane.

Megjithatë, Khamenei mbajti një ton sfidues, duke akuzuar SHBA-në se synon të përvetësojë burimet natyrore të Iranit, përfshirë naftën dhe gazin natyror. “Kjo është arsyeja kryesore e armiqësisë së tyre, ndërsa pjesa tjetër e fjalëve, si të drejtat e njeriut, janë boshe”, tha ai.

Pavarësisht retorikës së ashpër, si Irani ashtu edhe SHBA kanë konfirmuar se kanë hapur kanale komunikimi për të shmangur një përballje ushtarake.

Të shtunën, Trump deklaroi se Teherani po zhvillon “bisedime serioze” me Uashingtonin, disa orë pasi kreu i Këshillit Suprem të Sigurisë Kombëtare të Iranit, Ali Larijani, tha se vendi i tij është i gatshëm për dialog me SHBA-në.

Duke folur në bordin e avionit presidencial Air Force One, Trump u shpreh se beson se Irani duhet të pranojë një marrëveshje “pa armë bërthamore”, por shtoi se nuk është i sigurt nëse Teherani do ta nënshkruajë një marrëveshje të tillë.

Kreu i Shtëpisë së Bardhë pranoi se Teherani është përfshirë në negociata serioze me Shtetet e Bashkuara.

Udhëheqësi i Iranit, Ajatollah Ali Khamenei, tha se nëse SHBA-të sulmojnë Iranin, kjo do të shndërrohet në një konflikt rajonal, raporton agjencia e lajmeve Tasnim.

"Amerikanët duhet ta dinë se nëse fillojnë një luftë, këtë herë do të jetë një luftë rajonale", citohet të ketë thënë Khamenei.

Komentet e 86-vjeçarit Khamenei janë kërcënimi më i drejtpërdrejtë që ai ka bërë deri më tani, transmeton Telegrafi.

Teherani ka paralajmëruar se nëse presidenti i SHBA-së, Donald Trump urdhëron sulme ndaj Iranit, kjo do të synojë Izraelin dhe asetet ushtarake amerikane në Lindjen e Mesme.

Trump tha dje se Irani po "bisedon seriozisht" me Uashingtonin. /Telegrafi/

Irani dhe Shtetet e Bashkuara kanë sinjalizuar bisedime për të arritur një marrëveshje dhe për të shmangur veprimet ushtarake, ndërsa tensionet rriten në Gjirin Persik dhe fuqitë rajonale shtojnë diplomacinë për të parandaluar konfliktin.

Presidenti i SHBA-së, Donald Trump, tha se Irani po “bisedonte seriozisht” me Uashingtonin, disa orë pasi zyrtari më i lartë i sigurisë kombëtare i Iranit tha se marrëveshjet për negociata po përparonin.

Trump, duke folur në bordin e Air Force One, deklaroi se besonte që Irani duhet të binte dakord për një marrëveshje “pa armë bërthamore”, por se nuk e dinte nëse Teherani do ta nënshkruante një marrëveshje të tillë.

“Por ata po na flasin”, tha ai.

Ai iu referua gjithashtu “armatës” amerikane që po shkon drejt Iranit, të udhëhequr nga aeroplanmbajtësja USS Abraham Lincoln, duke thënë “ne kemi anije shumë të mëdha dhe të fuqishme që shkojnë në atë drejtim”.

"Shpresoj që ata të negociojnë diçka të pranueshme", shtoi Trump.

Orë më parë, kreu i Këshillit Suprem të Sigurisë Kombëtare të Iranit, Ali Larijani, tha se Teherani po përgatitej për bisedime me SHBA-në.

“Në kundërshtim me narrativën e luftës mediatike të prodhuar artificialisht, formimi i një kuadri për negociata po përparon”, deklaroi Larijani pa dhënë detaje të mëtejshme.

Zhvillimet vijnë mes javësh tensionesh në rritje, me Trumpin që kërcënon vazhdimisht të sulmojë Iranin për shkak të shtypjes së protestave të fundit antiqeveritare dhe përpjekjes së tij për të kufizuar programin bërthamor të Iranit.

Më herët këtë javë, Trump tha se anijet amerikane që po dërgohen në Iran ishin të gatshme të përdornin “dhunë, nëse është e nevojshme”, nëse Irani refuzonte të ulej për bisedime mbi programin e tij bërthamor. /Telegrafi/

Një shpërthim që tronditi një ndërtesë banimi në qytetin portual iranian Bandar Abbas ka të ngjarë të jetë shkaktuar nga një rrjedhje gazi, sipas kreut lokal të zjarrfikësve.

Shefi i zjarrfikësve të Bandar Abbas tha se banorët u evakuuan nga ndërtesa në zonën e Bulevardit Moallem të qytetit.

“Shkaku fillestar i aksidentit në ndërtesën në Bandar Abbas ishte një rrjedhje gazi dhe grumbullim, që çoi në një shpërthim. Kjo është teoria fillestare”, tha shefi i zjarrfikësve Mohammad Amin Lyaghat.

Numri i saktë i viktimave gjithashtu nuk ishte i qartë menjëherë.

Shpërthimi ndodhi mes tensioneve në rritje midis Iranit dhe Shteteve të Bashkuara dhe frikës së një konfrontimi ushtarak midis dy vendeve.

Presidenti i SHBA-së, Donald Trump, ka kërcënuar vazhdimisht se do të sulmojë Iranin për shkak të shtypjes së fundit të protestave antiqeveritare dhe përpjekjeve të Uashingtonit për të kufizuar programin bërthamor iranian.

Pasi qarkulluan thashetheme në internet rreth shpërthimit në Bandar Abbas, Trupat e Gardës Revolucionare Islamike (IRGC) mohuan se ndonjë nga ndërtesat që i përkisnin forcave të saj detare në provincë ishte shënjestruar, sipas një deklarate të transmetuar nga agjencia e lajmeve Fars. /Telegrafi/

“Një kornizë për negociata me Shtetet e Bashkuara po formohet”, tha zyrtari i lartë i sigurisë iraniane, Ali Larijani, në një postim në X, ndërsa retë e luftës mblidhen përsëri në Gjirin Persik.

“Në kundërshtim me atmosferën e krijuar nga lufta artificiale mediatike, formimi i një strukture për negociata është duke u zhvilluar”, shkroi Larijani, pa dhënë detaje të mëtejshme.

Vlen të përmendet se të premten, ndërsa armata e madhe amerikane po mbërrinte në Lindjen e Mesme, Presidenti i SHBA-së, Donald Trump, vlerësoi se Irani dëshiron të “bëjë një marrëveshje” me SHBA-në.

“Mund t’ju them se ata duan të bëjnë një marrëveshje”, u tha presidenti i SHBA-së gazetarëve në Zyrën Ovale. Kur u pyet nëse u kishte dhënë iranianëve një afat, Trump u përgjigj “po” pa sqarime të mëtejshme.

Pasi paralajmëroi se “koha po mbaron” para një sulmi ndaj Teheranit, Trump tha gjithashtu se “shpreson” se nuk do të duhet të godasë Iranin, i cili është gjithashtu nën presion për të përfunduar një marrëveshje bërthamore.

Sipas faqes amerikane të lajmeve Axios, duke cituar zyrtarë amerikanë, çdo marrëveshje me Teheranin do të duhet të përfshijë tërheqjen e të gjithë uraniumit të pasuruar nga vendi, kufizimin e rezervave të raketave me rreze të gjatë veprimi dhe ndryshimin e politikës ndaj grupeve të caktuara të armatosura në rajon.

The post Tensionet mes SHBA-së dhe Iranit, zyrtari i lartë i Sigurisë iraniane: Po hidhen hapa drejt negociatave me Uashingtonin appeared first on Albeu.com.

Të paktën katër persona u vranë dhe disa të tjerë u plagosën në dy shpërthime të ndara që ndodhën në jug dhe jugperëndim të Iranit, raportuan mediat lokale.

Raportohet se shpërthimi vdekjeprurës në Ahvaz u shkaktua nga një rrjedhje gazi, ndërsa shkaku i shpërthimit të dytë nuk dihet ende.

Agjencia e lajmeve Mehr, duke cituar shërbimet e zjarrfikësve dhe sigurisë të komunës Ahvaz, raportoi se shpërthimi ndodhi në një kompleks apartamentesh në lagjen Kianshahr.

Më shumë se një duzinë automjetesh të parkuara pranë ndërtesës u dëmtuan gjithashtu.

Ndryshe, tani kanë filluar të përhapen pamje të shpërthimit në rrjete sociale.

Kujtojmë se presidenti i SHBA-së, Donald Trump, tha javën e kaluar se një "armadë" po lëvizte drejt Iranit dhe disa burime relevante raportuan se Trump po shqyrton mundësitë për një sulm të mundshëm. /Telegrafi/