E diela e fundit e vitit, 28 dhjetori, vjen me një takim special për futbollin shqiptar, ndeshjen e Superkupës së Shqipërisë. Përballja Egnatia – Dinamo City nuk është thjesht një sfidë futbolli, por një spektakël 90-minutësh që meriton të përjetohet nga afër, në shkallët e stadiumit më modern dhe më të bukur në vend, “Air Albania”.

Një sfidë që shkon përtej një trofeu. Në fushë do të zbresin dy nga skuadrat më të mira të sezonit aktual dhe të atij që lamë pas, të vendosura për të mbyllur vitin me një sukses madhor dhe për të fituar trofeun e fundit të vitit futbollistik.

Për tifozët e futbollit është thjesht një ndeshje, për tifozët e Egnatias dhe Dinamo City është emocioni i radhës, ndërsa për vetë skuadrat është një dhuratë e vërtetë fundviti. Dhe kush nuk do të donte ta përmbyllte vitin me një trofe në duar?

Ndeshja Egnatia – Dinamo City do të luhet të dielën në ora 19:00 në “Air Albania”.

Macaulay Culkin ka folur së fundmi për jetën e tij larg vëmendjes publike, pasi u tërhoq nga aktrimi në moshën 14-vjeçare.

Culkin, i cili nisi karrierën që fëmijë dhe u shndërrua në një yll global me filmat “Home Alone” (1990) dhe “Home Alone 2: Lost in New York” (1992), vazhdoi më pas me role në “The Good Son”, “The Girl” dhe “Richie Rich” (1994), përpara se të merrte një pushim të gjatë nga industria e filmit.

Në emisionin ‘Mythical Kitchen,’ Culkin tregoi se vendimi për t’u larguar nga aktrimi erdhi nga dëshira për të pasur një jetë normale.

“Çfarë doja ishte të isha me njerëz të moshës sime. Duhet ta mbani mend: shumica e gjërave që kam bërë si fëmijë nuk ishin punë në grup. Isha vetëm unë,” u shpreh ai.

Ai shtoi se shpesh njerëzit e pyesin për bashkëpunimin me aktorë të njohur, si Joe Pesci. “Më thonë: ‘Si ishte të punoje me Joe Pesci?’ Dhe unë u përgjigjem: ‘E keni parë filmin?’ Kemi ndoshta dy skena bashkë. Pastaj jam unë, vetëm, në një shtëpi – pothuajse vërtet ‘Home Alone’.”

Duke folur më gjerë për pauzën nga aktrimi, Culkin tha: “Doja të dilja, të takoja vajza, të rrija me njerëz të moshës sime. Doja të shkoja në festa dhe të bëja gjëra normale. Nuk mund t’ju them sa shumë Bar Mitzvah kam humbur.”

Megjithatë, për famën ai theksoi se ajo nuk mund të zhbëhet: “Nuk mund ta ç’bësh atë që ka ndodhur. Nuk mund ta kthesh dhëmbëzën pas.”

Pas një mungese të gjatë, Culkin u rikthye në aktrim në vitin 2003 me filmin biografik “Party Monster”.

Në jetën personale, Culkin u fejua me aktoren Brenda Song në janar të vitit 2022. Çifti ka dy djem, Dakota dhe Carson./abcnews.al

Të dalluar kanë qenë shumë, por ndoshta jo aq sa ata. Mirlind Daku dhe Medon Berisha, të dy shqiptarë me origjinë nga Kosova, kanë shkëlqyer mbi të tjerët gjatë kësaj gjysme sezoni në Europë.

Për shërbimet e tyre për ekipet kanë fituar edhe çmimin e rëndësishëm të lojtarit të ndeshjes, dhe Daku e Berisha ia kanë dalë më shumë sesa të gjithë futbollistët e tjerë të kombëtares.

Sulmuesi që luan me Rubinin e Kazanit është shpallur 4 herë Lojtari i Ndeshjes këtë sezon në Premier Ligën e Rusisë. Kjo ka ndodhur në sfidat ndaj Ahmatit të Groznit, Dinamos së Mahaçkallës, Orenburgut dhe Soçit.

Ylli kuqezi është kandidat për Këpucën e Artë këtë edicion në kampionatin rus, duke shënuar 9 gola në 17 javë, plus një asist, vetëm dy gola larg vendit të parë.

Medon Berisha ka qenë gjithashtu tepër I dalluar, madje në një kampionat shumë më të vështirë, në Serinë A të Italisë.

Për nivelin e paraqitur, vlera e kartonit iu rrit nga 1.5 në 6 milionë euro pikërisht në 23 dhjetor nga agjencia e njohur “transfermarkt”.

Mesfushori kuqezi e ka fituar tri herë çmimin e futbollistit të ndeshjes në kampionatin italian.

Kjo ka ndodhur fillimisht në duelin ndaj Fiorentinës, kur shënoi edhe golin e fitores, pastaj kundër Veronës, dhe për të tretën herë u veçua në sfidën përballë Torinos, duke shërbyer dy asistë.

Berisha ka dy gola e tre asistë në 13 ndeshje në Serinë A. /abcnews.al

Nuk është në nivelin maksimal, por do të jetë aty vitin e ardhshëm. Jasir Asani po bën maksimumin që skuadra e tij, Esteglal, të realizojë objektivat e sezonit, dhe një dorë e dha në Championsin e dytë të Azisë.

Futbollisti kuqezi, që vjet ishte ndër më të mirët në Championsin e parë, me 9 gola në 10 ndeshje, realizoi në fitoren 3-0 që iranianët arritën në fushën e rivalit direkt, Al Muharrak.

Dueli në Bahrein nuk pati histori, dhe ky sukses siguroi kualifikimin e Esteglalit për në raundin e dytë, ndërsa ishte një hakmarrje për humbjen 0-1 të pësuar në Teheran në sfidën e grupit më herët.

Shqiptari shënoi sipas mënyrës së tij, dhe tani ka dy gola e një asist në këtë Ligë të Kampionëve në gjashtë ndeshje, ndërsa ka qenë gjithmonë titullar si dhe ka luajtur 90 për qind të minutave të mundshme.

Përtej rrjetave dhe asisteve për shokët, Asani ka dhënë edhe më shumë kontribut sidomos në lojën sulmuese, në ndërtimin e aksioneve, që në fund kanë përfunduar me top në rrjetë.

Edhe sezoni në total ka qenë shumë i mirë për yllin kuqezi. Shqiptari nga Shkupi ka 10 gola gjithsej, nga të cilët gjashtë në kampionatin e Iranit, dy në Champions dhe dy në Kupën e Iranit, ndërsa ka shërbyer dy asiste.

E gjitha kjo në 19 ndeshje, duke qenë shënuesi më i mirë i Ligës Profesioniste bashkë me dy të tjerë, ndonëse Esteglal duhet të rikthehet tek fitoret për të pretenduar titullin, duke qenë 5 pikë prapa kryesuesit Sepahan./abcnews.al

E mbylli vitin në mënyrën më të mirë të mundshme.

Ernest Muçi mund të jetë i lumtur me veten në Superligën turke, ndonëse skuadra e tij, Trabzonspori pësoi humbje.

Në disfatën e parë të të vetëve që nga mesi i shtatorit, me shifrat 4-3 në Ankara ndaj rivalit Gençlerbirligi, ylli i kombëtares shqiptare shënoi gol dhe shërbeu asist.

Mëkat që kontributi I tij nuk u shpërblye të paktën me një pikë.

Vendasit kryesuan 2-0 dhe pjesa e parë u mbyll 2-1 për ta, ndërsa në 50’, Filip Augusto dërgoi topin në rrjetë pas pasimit të shkëlqyer të lojtarit ofensiv kuqezi.

Për fat të keq, mbrojtja e Trabzonsporit futi ujë ndjeshëm dhe erdhën dy gola të tjerë nga kryeqytetasit.

Këtë rrjetë loje nuk e prishi dot as penalltia e kthyer në gol pikërisht nga Muçi në 67’.

Kohë pati, por fati nuk ishte me miqtë.

E përditshmja “Fanatik” shkruan: Shënuesi më I mirë I kampionatit javët e fundit nuk u ndal! Muçi nuk humbet asnjë minutë!

Futbollisti tiranas ka 7 gola e dy asistë në Superligën turke këtë sezon, madje gjithçka ka ardhur në 5 ndeshjet e fundit.

Ai ishte I mrekullueshëm në triumfin me përmbysje 4-3 në fushën e Bashaksehirsporit, me rrjetën e fitores në minutën e 101-të, ndërsa kishte realizuar edhe më parë.

Kjo, në vetëm 27’.

Pastaj, fitoi penallti dhe shënoi një nga golat më të bukur të sezonit në Turqi dhe në Europë në fitoren 3-1 në shtëpi kundër Konjasporit.

Pasuan dy gola në suksesin 2-1 në Gëztepe, si dhe nuk mungoi rrjeta ndaj ekipit të klubit që I ka kartonin, Beshiktashit, në barazimin 3-3.

Drita dhe Shkëndija mbyllën me humbje fazën e ligës në Konference League, por asnjë dramë. Madje, dy skuadrat e shqiptarëve mund të festojnë, pasi me pikët e grumbulluara më parë, siguruan kualifikimin në fazën e play off të turneut, një arritje kjo historike.

Në sfidën e gjashtë, Drita u dorëzua pa kushte në transfertën spanjolle kundër Rayo Vallecano. Spanjollët dominuan, ndërsa pjesën e parë e mbyllën me epërsinë minimale pas golit të Lejun në minutën e 33-të.

Pas pushimit të zotët e shtëpisë vulosën fitoren me dy gola të tjerë. Gumbau dhe Pacha shuan shpresat e skuadrës nga Gjilani, që me 8 pikë e mbylli fazën e ligës në vendin e 20 në zonën e play off.

Në raundin tjetër do të luajë edhe Shkëndija që mori vendin e 22-të me shtatë pikë gjithsej. Në ndeshjen e fundit, skuadra nga Tetova u mund 1-0 në fushën e AEK Larnaka.

Kartoni i kuq i Latifit në pjesën e dytë prishi planet e tetovarëve, që shtatë minuta nga fundi i kohës së rregullt u ndëshkuan nga vendasit. Por kjo ishte një humbje e ëmbël, ndërsa si Shkëndija ashtu edhe Drita duhet të përgatiten tani për raundin tjetër të turneut./abcnews.al

Një fitore nga ato që sjell pikë, lavdi dhe shumë para. Shkëndija i merr të gjitha këto në një natë të madhe të futbollit europian. Skuadra nga Tetova mundi 2-0 Slovan Bratislavën në Conference League, duke hedhur një hap të sigurtë drejt kualifikimit për në raundin tjetër të turneut.

Një autogol i Bajriç në minutën e 34 i hapi rrugën suksesit të Shkëndijës, që vulosi fatin e sfidës në shtesën e pjesës së parë.

Sabastian Spahiu shënoi golin e dytë për të zotët e shtëpisë, që pas pushimit arritën të ruajnë fitoren e dytë në 5 ndeshjet e fazës së ligës.

Me këtë sukses, tetovarët ngjiten në kuotën e 7 pikëve dhe ngjiten në vendin e 21-të në zonën e play off. Krejt i ndryshëm është diskutimi për shqiptarët e tjerë që luajnë në Conference League.

Drita e Gjilanit u dorëzua pa kushte në humbjen 3-0 kundër AZ Alkmaar.

Në stadiumin “Fadil Vokrri” të Prishtinës, skuadra e Kosovës e pa veten në dizavantazh që në minutën e 17-të. Holandezët mbyllën pjesën e parë me epërsinë minimale falë golit të Mijnans.

Pas pushimit, miqtë gjetën edhe dy herë të tjera rrugën e rrjetës me Jensen në të 58-ën dhe Sadik në limitet e kohës së rregullt.

Kjo humbje e mban Dritën e Gjilanit në vendin e 19 në klasifikimin e fazës së ligës dhe gjithashtu në zonën e play off me shpresa për të vazhduar aventurën europiane./abcnews.al

Vendi në formacion në ndeshjen e shkuar ishte një surprizë. Por paraqitja e Armando Brojës si titullar për hetë të parë në këtë sezon me Burnley ishte pozitive. Pavarësisht humbjes me Neëcastle, sulmuesi kuqezi ishte një nga më të mirët për skuadrën e tij dhe për këtë mori vlerësime nga mediat angleze dhe mbi të gjitha nga trajneri Scott Parker.

Për të gjitha këto, Armando Broja pritet të marrë një tjerër dhuratë të parakohshme në këtë fundviti. Ai pritet të zbresë sërish nga minuta e parë në ndeshjen që Burnely do të luajë këtë të shtunë në fushën e tij kundër Fulham.

Një tjetër shans në këmbët e sulmuesit të kombëtares së Shqipërisë, për të kthyer sërish karrierën e tij në shinat e duhura. Duke qëndruar në raportimet e mediave angleze, trajneri Parker do të mbështetet sërish te Broja për sfidën e ardhshme, duke preferuar atë në vend të sulmuesit tjetër Ziam Fleming.

Kjo do të ishte ndeshja e dytë si titullar për 24 vjeçarin, që përpara fundjavës së shkuar kishte luajtur si zëvendësues në tetë sfida, në një total prej 110 minutash në Premier League. Vetëm një Kupën e Ligës ishte aktivizuar më shumë, duke dhënë edhe një asist.

Rikthimi në formacionin e Burnley është një lajm i mirë edhe për kombëtaren e Shqipërisë dhe trajnerin Sylvinho, që shpreson të ketë në formë të gjithë futbollistët deri në muajin mars kur do të kthehet të fushë për sfidat e play of të “Botërorit 2026”. /abcnews.al

Do të vinte edhe kjo ditë. Në Turqi, ose të paktën në marrëveshjen për huazimin e Ernest Muçit, nuk ekzistoka një klauzolë e tillë që e pengon të luajë ndaj ekipit që I ka kartonin, ndaj edhe fundjava sjell emocione të forta.

Futbollisti shqiptar do të jetë këtë të diel në orën 18:00 përballë Beshiktashit, i cili e ka dhënë hua për një sezon te Trabzonspori. Do të ketë ky një rast për revansh, për një lloj hakmarrjeje, ndaj drejtuesve dhe trajnerit që nuk besuan tek ai, dhe nuk e mbajtën në skuadër.

Siç shkruan e përditshmja sportive turke, “Fanatik”, Muçi vjen në këtë ndeshje si lojtari më në formë i Trabzonsporit, dhe si shpresa më e madhe për të shënuar gol.

Kjo sepse ai ka 5 rrjeta në tri ndeshje radhazi, duke vendosur rekordet e karrierës në Turqi, dhe nga ana tjetër sepse vendasve do t’u mungojë sulmuesi kryesor, Pol Onuaçu, I cili është I pezulluar.

Onuaçu ka 11 gola në Superligë këtë edicion. Muçi ka qenë tepër i rëndësishëm për skuadrën nga bregu i Detit të Zi, pasi rrjetat e tij kanë siguruar 9 pikë në tri ndeshjet e fundit, duke e lejuar të jetë plotësisht në garë për titullin, me 34 pikë në 15 javë, vetëm dy pikë më pak se kryesuesi dhe kampioni Gallatasaraj. Si për ironi të fatit, Beshiktashi, që do të jetë përballë Trabzonsporit e Muçit këtë të diel, është në vend të pestë me vetëm 25 pikë./abcnews.al

Është padyshim në momentin e tij. Berat Gjimshiti do të jetë sërish titullar në një ndeshje për Atalantën, ndërsa e bëri sefte me gol pak ditë më parë në Serinë A.

Kapiteni i kombëtares shqiptare nuk do të ketë një detyrë të lehtë, po ashtu si edhe skuadra italiane, sepse përballë tyre do të jetë Çelsi, skuadra tepër e fortë angleze, kampione e botës në fuqi.

Mbrojtësi kuqezi do të udhëheqë linjën e prapavijës, ndërsa e ka treguar se ndaj ekipeve nga Anglia di të luajë shumë mirë.

Kush e harron paraqitjen ndaj Liverpulit në prill 2024, kur bergamaskët u kualifikuan me fitoren e madhe 3-0 në “Anfild” dhe humbjen minimale 0-1 në shtëpi?

Vetë UEFA i veçoi aksionet e kapitenit të Shqipërisë.

Pritet të luajë ndeshjen e 34-ët në Ligën e Kampionëve, në të cilën ka shënuar një gol ndaj Shahtarit të Donjeckut.

Të dyja skuadrat do të kërkojnë maksimumin.

Atalanta ka 10 pikë, po aq sa Çelsi, dhe një fitore jo vetëm që do ta ngjiste mbi rivalin, por edhe do ta ndihmonte për të hyrë ose për të qenë shumë pranë 8 vendeve të para që të kualifikojnë si vazo e parë në raundin e dytë në Champions, duke eliminuar plej ofin, e duke pasur avantazh në short.

Skuadra italiane e trajnerit Paladino ka shumë pak mungesa, vetëm Sulemanën dhe Bakerin.

Çelsi nga ana tjetër po kalon një sezon kontradiktor, duke qenë vetëm në vend të pestë në Premier Ligë, ndonëse mbetet tepër I fortë dhe I rrezikshëm.

U shpall zyrtarisht më i miri i derbit. Arbër Hoxha i la prapa të gjithë në sfidën Dinamo Zagreb-Hajduk, ndërsa futbollisti i kombëtares shqiptare pretendon diçka më shumë.

Vetë faqja zyrtare e Ligës së Parë të Kroacisë tregon se ai është pretendet për të fituar çmimin e Lojtarit më të mirë të muajit dhjetor.

Për momentin, është në vend të dytë në këtë renditje pas talentit të Slaven Belupos, Adriano Jagushiç, I cili u shpall numri 1 edhe për muajin nëntor.

Hoxha e ka provuar më parë një sukses të tillë. Pasi shënoi dy gola dhe shërbeu një asist në dy ndeshje, pikërisht në fushën e Hajdukut dhe ish-ekipit të tij, Slaven Belupo, shqiptari nga Kosova u shpall futbollisti më i mirë i shtatorit.

Një padrejtësi duhet thënë se i është bërë pasi nuk ka fituar ende asnjëherë çmimin e golit të muajit, ndërsa ka realizuar disa herë shkëlqyeshëm.

Ylli kuqezi është plotësisht në garë edhe për Këpucën e Artë, pasi ka 6 gola këtë sezon të kampionatit e përpara tij janë vetëm sulmuesi Fruk i Rijekës dhe Shego i Hajdukut me nga 8 rrjeta, pra vetëm dy më shumë. Momenti është vërtet i madh, dhe Dinamo është gjithashtu në garë për të fituar titullin, ashtu si dy vjet më parë kur ia doli edhe me golat në fund të Arbër Hoxhës./abcnews.al

Është një mbrëmje e re. Është një ndeshje tjetër, por është sërish shfaqja e Ernest Muçit. Ylli shqiptar po vazhdon të shkëlqejë tepër fort në Superligën e Turqisë, në një moment kur çdo gjë që prek kthehet në ar.

Shënoi sërish, madje dy gola, duke siguruar fitoren 2-1 që Trabzonspor e arriti në Izmir ndaj Goztepesë vendase, në javën e 15-të të Superligës së Turqisë. Më herët shënoi dy rrjeta në fitoren 4-3 në Bashaksehir, dhe realizoi një tjetër e shërbeu asist në suksesin 3-1 në shtëpi kundër Konjasporit.

Në moshën e re 24-vjeçare më në fund duket se I ka ardhur koha për gjëra të mëdha, e do ta shohim shumë më tepër protagonist në kombëtaren shqiptare. Ishin rrjeta më normale këtë herë, të paktën për standardet e tij.

E para me ndjekje aksioni deri në fund. E dyta me devijim pas një skeme. E përditshmja “Fanatik” pasi e cilëson të shkëlqyer, thekson se ka shënuar 5 gola në 3 ndeshje radhazi, dhe se u bë i pari lojtar I Trabzonsporit që nga Burak Jilmaz në vitin 2010, që shënon të paktën dy gola në dy ndeshje radhazi jashtë fushe.

Me Muçin në formë të tillë, skuadra e shquar turke pretendon titullin, duke qenë vetëm 2 pikë prapa Gallatasarajit që kryeson./abcnews.al

Kombëtarja e Shqipërisë prej vitesh furnizohet me futbollistë të lindur dhe rritur jashtë vendit. Bij të prindërve, që masivisht emigruan masivisht në vitet 90’ kanë zgjedhur origjinën duke veshur ngjyrat kuqezi. Por “zbuluesit” e Federatës Shqiptare të Futbollit duhet të shohin më larg, përtej Atlantikut, ku sipas mediave meksikane po rritet një talent i vërtetë. Mattheo Dimareli, një emër dhe mbiemër aspak shqiptar, por që në të vërtetë me vendin e shqiponjave e lidh babai I tij.

Sipa mediave lokale, futbollisti 16 vjeçar është djali I një babai shqiptar, i një nëne meksikane dhe i lindur në SHBA.

Për momentin ai ka zgjedhur të ndjekë “gjakun” e nënës së tij duke luajtur me kombëtaren e Meksikës U16, duke shënuar edhe një gol në ndeshjen e fundit kundër Kosta Rikës.

Duke qëndruar në raportimet përtej oqeanit, Mattheo Dimareli është pjesë e skuadrës së Houston Dynamo në SHBA, ndërsa ka shumë shpejt ka shfaqur karakteristikat e një talenti të vërtetë.

Por e veçanta e 16 vjeçarit lidhet me një tjetër fakt. Ai është një futbollist i “botës”, pasi në të ardhmen mund të zgjedhë të luajë me katër shtete të ndryshme, Meksikën, SHBA, Shqipërinë ose Greqinë, pasi babai I tij ka edhe nënshtetësi helene.

Nëse parashikimet për një talent të vërtetë rezultojnë të sakta, gara për të marrë shërbimet e tij do të jetë e fortë.

Po flasim për rivalitetin më të madh në vend. Një Esteglal-Persepolis është derbi i kryeqytetit të Iranit, një i tillë si Tirana-Partizani apo Boka-River, dhe Jasir Asani duket se është përfshirë plotësisht në këtë atmosferë të jashtëzakonshme.

Futbollisti i Kombëtares shqiptare ndezi shumë polemika në Teheran me mesazhin që botoi në rrjetet sociale. Në pamjen e parë duket diçka e pafajshme, ndonëse ata që e njohin historinë e derbit e dinë se në vetvete përmban një simbolikë.

Një Asani që shkel tullumbacin e kuq është sfida që ylli I skuadrës blu, Esteglal, I lëshon ekipit të kuq, Persepolis. Derbi për këtë sezon nuk është luajtur ende, dhe është në program në 5 dhjetor në fushën e Perspolisit.

Mediat iraniane I bënë jehonë postimit të yllit kuqezi, duke e cilësuar si një provokim për rivalët, ndonëse këto janë gjëra normale për lojtarët që do të luajnë ndeshje derbi.

Asani e ka ndihmuar Esteglalin që të dalë në krye të renditjes së Ligës Profesioste të Iranit, me 16 pikë në 9 javë, një më shumë sesa Sepahani, pas një fillimi të vështirë, ndërsa rivalët e Persepolisit janë në vendin e 9-të me 4 pikë më pak.

Gjithsesi, Asani e di nga derbit Partizani-Tirana që ka luajtur në Shqipëri, se rezultati nuk varet nga renditja, ndërsa ironikisht ka ndërruar ngjyrat. Nga i kuq partizanas dikur, tani është bërë blu.

Nuk ishte ky momenti për t’u dëmtuar.

Arbër Hoxha mori shumë përsipër në sfidën e fillimit të javës në Ligën e Parë të Kroacisë në fushën e Goricës, por gjithçka përfundoi keq dhe ai rrezikon të mos luajë në sfidën kryesore të kampionatit.

Futbollisti I kombëtares shqiptare doli nga fusha me barrelë pasi u përpoq shumë në pjesën e parë, dhe është në dyshim për derbin ndaj Hajdukut.

Lëndimi I ndodhi në minutat e fundit, ndërsa nuk dihet nëse do të ketë mundësi të rikuperohet deri të shtunën kur zhvillohet dueli I madh në stadiumin “Maksimir” të Zagrebit.

Kujtojmë se në ndeshjen e kaluar në kampionat mes dy ekipeve, Hoxha shënoi një gol të shkëlqyer, dhe ishte rrjeta e tij e parë e sezonit, që ndryshoi fatin e tij me fanelën e të kaltërve.

Me aksionin e shkëlqyer në derbi dhe përpara syve të tifozëve, ai jo vetëm u bë heroi I ultrasve “Bed Blu Bojs”, por edhe bindi trajnerin Mario Kovacevic që ta aktivizonte gjithmonë titullar.

Forma ka qenë mjaft e mirë me 5 gola e dy asistë në 14 ndeshje që ka luajtur në Ligën e Parë të Kroacisë, ndërsa besohet se dëmtimi në fushën e Goricës nuk ka qenë edhe aq serioz.

Heroi numër një ishte dikush tjetër. Luka Joviç, sulmuesi i Serbisë, mori topin e ndeshjes pasi shënoi tri herë në derbin mes Panathinaikosit dhe AEK-ut.

Sfida e zjarrtë e kryeqytetit të Greqisë u mbyll me fitoren e miqve 3-2, dhe në portën e tyre ishte heroi tjetër, gardiani kuqezi, Tomas Strakosha.

Portieri I kombëtares gjithashtu bëri shumë, madje realizoi gjënë më të vështirë, pasi priti penalltinë.

Sulmuesi I Polonisë, Karol Sviderski, që I ka shënuar Shqipërisë në eliminatoret e mëparshme, këtë herë nuk e kaloi dot Strakoshën, që mund të konsiderohet specialist për pritjen e 11-metërshave.

Më pas, ai pati një moment fatkeq kur Panathinaikos shkurtoi diferencën në 1-2, pasi rrëshqiti. Ndoshta, pa kujdesi e tij, apo ndoshta fusha nuk ishte e mirë në atë vend.

Gjithsesi, fitorja e derbit ishte e përbashkët, ndonëse meritën kryesore e pati Joviç. Sulmuesi I Serbisë, që nuk arriti të tregonte veten tek Reali e Milani, realizoi një herë nga loja dhe dy herë me penallti.

E kemi thënë se jo më kot e kanë bërë edhe kapiten.

Një shqiptar 22-vjeçar si Medon Berisha po bëhet gjithnjë e më i shkëlqyer në Serinë A italiane, pra në njërën prej pesë ligave më të forta të Europës dhe të botës.

Në ndeshjen e kësaj të diele, mesfushori i ri kuqezi meritoi sërish çmimin e Lojtarit të Ndeshjes për kontributin në fitoren 2-1 të Leçes kundër Torinos.

Dy asiste, të ndryshëm dhe të bukur, ndihmuan që puljezët të merrnin epërsinë 2-0, dhe pastaj të rezistonin rikthimin e skuadrës “granata”, me gol, por për fatin e Berishës dhe të Ylber Ramadanit, me penalltinë e humbur nga ylli tjetër I Shqipërisë, Kristian Asllani.

Ky ishte çmimi i tretë i lojtarit të ndeshjes për Medonin këtë sezon të Serisë A.

Më parë i ndodhi dy sfida radhazi, në 2 dhe në 8 nëntor, në përballjet Fiorentina-Leçe ku shënoi golin e fitores, dhe në sfidën Leçe-Verona që përfundoi 0-0.

Shqiptari i ri është në po atë nivel si portieri I Milanit, Menja apo ylli i Juventusit, Jildiz.

Vetëm dy futbollistë të Serisë A e kanë fituar më shumë çmimin e lojtarit të ndeshjes se ai, argjentinasi Paz Martinez I Komos dhe Angisa I Napolit, nga pesë herë.

Me dy gola dhe tre asistë, por sidomos me personalitetin dhe praninë në fushë, Berisha ka qenë padyshim më I miri I skuadrës në elitën italiane deri tani.

Po ashtu, falë klasit që e ka me shumicë, e që më siguri do ta ngjisë në nivele të tjera në të ardhmen, pra ai mund të veshë fanelën e ndonjë skuadre gjigande në Serinë A, apo në ligat e tjera të mëdha europiane si La Liga e Spanjës, Premier Liga e Anglisë, apo Bundesliga gjermane.

Është Oklahoma, dhe pastaj pjesa tjetër e NBA-së! Ky është komenti i të përditshmes së shquar italiane, “La Gazeta delo Sport”, ndërsa skuadra me emrin Rrufeja, Thandër, po dominon një ligë ku nuk mungojnë as yjet, dhe as rivaliteti.

Nëse Europa shkëlqen me të tillë si Jokic, Doncic, Uembaniama e Adetokumbo, Amerika përgjigjet me Shej Gilgës-Aleksandrin dhe “bandën” e tij.

Fitorja e fundit ishte ndaj Minesotës, 113-105, jo edhe aq mbresëlënëse për standardet e vendosura nga Oklahoma, që mesatarisht shënon në çdo ndeshje 16.9 pikë më shumë sesa kundërshtari.

Gilgës Aleksandër shënoi 40 pikë, edhe pse përpara ndeshjes ishte në dyshim për të luajtur, sepse ishte i sëmurë.

Shtoi 6 topa në tabela, 6 asistë dhe 3 vjedhje topi. Krah tij, Hartenstein me 15 pikë e 7 topa në tabela, si dhe Çet Holmgren me 12 pikë e 9 topa në tabela.

Ishte kjo fitorja e 10-të radhazi për Oklahomën që mban vendin e parë në Konferencën Perëndimore, si dhe është skuadra më e mirë e NBA-së me bilancin 17 fitore e 1 humbje.

Vetëm katër skuadra të tjera kanë pasur një nisje të tillë në të gjithë historinë e kësaj lige. Edhe pse Entoni Eduards shënoi 31 pikë për vizitorët, kjo ishte pak.

Kampionët në fuqi të Amerikës ndoshta mendojnë të hedhin themelet për një dinasti të re, diçka që në NBA ndodh kur fiton tre tituj, siç bënin dikur Bostoni, Lejkërsat, Bullsat, San Antonio apo Golden Stejti.

Historinë e shkruajtën në të njëjtën mënyrë, ndërsa tani do ta ndajnë në të njëjtën fushë. Në orën 21:00 në stadiumin “Fadil Vokrri”, dy skuadrat shqiptare që luajnë në Conferencë League, Drita e Gjilanit dhe Shkëndija e Tetovës do të përballen mes tyre në javën e katërt të fazës së ligës në këtë turne.

Kjo është hera e parë që dy ekipe shqiptarë sfidohen në këtë fazë të largët në Kupat e Europës, ndërsa vigjilja e saj ngjan më shumë si një “vëllazërore”. Të tillë e paraqet edhe ky postim i klubit të Shkëndijës pas ditë më parë në llogaritë e tij në rrjetete sociale. Foto e heronjve kombëtarë shqiptarë shoqërohet me komentin: Përtej kufijve, jemi një. Një komb, dy skuadra një ndjenjë.

Një arsye më shumë kjo, që parashikon një interesim të madhe të tifozëve, që pritet të mbushin stadiumin në Prishtinë. Por përtej ndjenjave, kjo ndeshje është e rëndësishme për rrugëtimin e të dyja skuadrave në Konferencë League.

Në tre ndeshjet e para të fazës së ligës në këtë turne, Drita ka një paraqitje më të mirë. Me dy barazime dhe një fitore, skuadra nga Gjilani renditet në vendin e 13 të zonës së play off me 5 pikë.

Me 4 pikë, pas një humbjeje, një fitoreje dhe një barazimi, Shkëndija e Tetovës mban vendin e 21-të dhe pozicionohet në po ashtu në zonën e play off./abcnews.al

Duhej ky “gjel” që Madridi të fitonte në Athinë pas 54 vitesh! Një pafundësi, sidomos për skuadrën më të madhe të Europës, por kjo është e vërteta.

Kryevepra me autor Kilian Mbapenë bëri që Reali të triumfonte në kryeqytetin e Greqisë, në tokën e Sokratit, Platonit dhe Aristotelit, për herë të parë në më shumë se gjysmë shekulli, dhe pas 10 ndeshjesh.

Kapiteni i Francës dhe ylli i madh “merenges” ishte shkëlqimi i mbrëmjes në Champions, duke shënuar  të 4 golat në suksesin 4-3 ndaj Olimpiakosit.

Grekët kaluan të parët në epërsi, por sulmuesi u përgjigj duke dërguar tri herë topin në rrjetë në vetëm 6’42”.

Njëzetenëntë sekonda e ndanë nga rekordi në Champions që mbahet nga Mohamed Salah. Olimpiakos provoi deri në 2-3, pastaj Mbape goditi sërish, ndonëse El Kabi i dha shpresë vendasve në 81’.

Ky sezon I “gjelit” francez është i shkëlqyer. Nëntë gola në 5 ndeshje në Champions. Trembëdhjetë rrjeta në 13 ndeshje në La Ligën e Spanjës.

Pesë realizime në 4 sfida për kombëtaren e Francës. Në total, janë 27 gola në vetëm 22 ndeshje, që nga shtatori, e ndonëse nuk mund të krahasohet me rekordin e Lionel Mesit me 91 rrjeta në një vit kalendarik, sërish është shumë.

Me paraqitjen madhështore në kryeqytetin grek, ylli i Francës ka tani më shumë tregolësha në Ligën e Kampionëve se Karim Benzema, 5 ndaj 4, si dhe ka më shumë gola sesa Kristiano Ronaldo pas 5 ndeshjeve të para të një sezoni, 9 ndaj 8!

E përditshmja “Marka” shkruan katër herë emrin e tij, Mbape, në kopertinë, shoqëruar me foton e madhe sa gjithë faqja. Gazeta tjetër e kryeqytetit, “AS” e ndan meritën e fitores mes Mbapesë dhe brazilianite Vinisius duke titulluar: Dy rrufe!

Kapiteni I Francës mund të thuhet shprehimisht se e shpëtoi Realin në stadiumin e Olimpiakosit, pasi grekët bënë më shumë, me 19 gjuajtje ndaj 13, dhe me goditjet në portë 8-5!

Tashmë, madrilenët janë në pesëshen e parë në Champions, vetëm tri pikë larg Arsenalit kryesues.