Një burrë që fitoi 2.4 milionë funte në lotarinë britanike ndihmoi në ndërtimin e një perandorie droge prej shumë milionë funte që përfshinte prodhimin e tabletave të falsifikuara në shkallë industriale, u tha nw njw seancw gjyqësore.

John Eric Spiby, 80 vjeç, ishte udhëheqësi i një operacioni droge me vlerë deri në 288 milionë funte që përqendrohej në shtëpinë e tij "të qetë dhe rurale" pranë Wigan, iu tha gjykatës në Bolton.

Ai mohoi çdo dijeni për komplotin, por pas një gjyqi në gjykatën e Bolton, ai u dënua nga një juri për komplot për të prodhuar drogë të klasit C dhe komplot për të furnizuar drogë të klasit C.

Ai u shpall gjithashtu fajtor për dy akuza për posedim të armëve të zjarrit, posedim të municioneve dhe prishje të drejtësisë dhe iu dha një dënim me burg prej 16 vjetësh e gjashtë muajsh.

Spiby fitoi paratë në vitin 2010 dhe ishte i përfshirë në përmbytjen e rajonit me miliona tableta të maskuara si diazepam.

Diazepami, i njohur edhe si Valium, qetëson sistemin nervor për të trajtuar ankthin, spazmat muskulore, krizat dhe tërheqjen nga alkooli.

Gjykata tha gjithashtu se ai "ofroi ambientet dhe ndihmoi në përshtatjen e ambienteve dhe blerjen e makinerive" me vlerë mijëra funte për të prodhuar drogën.

Duke dhënë dënimin të martën, gjykatësi Clarke KC i tha Spiby-t: "Pavarësisht fitimit tuaj në lotari, ju vazhduat të jetonit një jetë krimi përtej asaj që normalisht do të kishin qenë vitet tuaja të pensionit".

Spiby ishte një nga katër burrat, përfshirë djalin e tij John Colin Spiby, të cilët policia tha se ishin pjesë e një bande të krimit të organizuar që prodhonte drogë në një "shkallë industriale" dhe furnizonte armë zjarri.

Djali i Spiby-t, 37 vjeç, Lee Drury, 45 vjeç, dhe Callum Dorian, 35 vjeç, janë gjithashtu të burgosur.

Gjykata në Bolton tregoi se si Spiby Sr ishte mburrur se "Elon [Musk] dhe Jeff [Bezos] është më mirë të kujdesen për veten" në një bisedë në grup.

Prokurorja Emma Clarke tha se burrat ishin të përfshirë në prodhimin e pilulave të falsifikuara me një vlerë tregu që mund të kishte arritur deri në 288 milionë funte. /Telegrafi/

Prokurori Publik i Prokurorisë Themelore Publike të Kavadarit lëshoi Urdhër për të zhvilluar procedurë hetimore kundër katër personave për të cilët ekziston dyshim i bazuar se kanë kryer vepër penale - "Përdhunim i një fëmije nën moshën 15 vjeç", e dënueshme sipas nenit 188, paragrafi 3 i Kodit Penal.

"Më 14.02.2025, të dyshuarit ranë dakord dhe morën me automjet një vajzë 13-vjeçare-viktimë nga Negotina, me të cilën njëri prej të dyshuarve njihej më parë. Ata e çuan fëmijën në një vend jashtë fshatit Krivolak në Negotinë dhe të gjithë kishin kryer marrëdhënie seksuale me viktimën, duke e goditur dhe ofenduar, pas së cilës e kthyen në Negotinë".

"Gjatë procedurës së mëparshme, të dyshuarve iu dhanë masa paraprake, dhe me fillimin e hetimit, prokurori publik kërkoi që gjykata t'i zëvendësojë masat me paraburgim efektiv, veçanërisht pasi provat e mbledhura deri në këtë pikë tregojnë dyshime për një krim të rëndë të dënueshëm me dënim me burg prej të paktën 10 vjetësh ose burgim të përjetshëm", thonë nga Prokuroria.

Real Madridi po përballet me një skenar të papritur në lidhje me një nga yjet e tyre më të mëdhenj. Jude Bellingham, i sjellë si një përforcim strategjik dhe lojtar kyç në projekt, ka filluar të ngrejë dyshime sepse nuk përshtatet plotësisht me ekipin.

Klubi mbretëror është i vetëdijshëm se mesfushori anglez nuk po kalon periudhën më të mirë dhe, megjithëse nuk është zyrtarisht në shitje, tregu rreth tij ka filluar të lëvizë seriozisht, raportojnë mediat spanjolle.

Në javët e fundit, klubi ka marrë oferta nga Liga Premier që kalojnë 100 milionë euro, një interes që Real Madridi nuk e priste kaq shpejt.

Klubet kryesore të Ligës Premier besojnë se reprezentuesi i Anglisë është ende një mundësi në treg dhe janë gati të investojnë shumë para për ta rikthyer atë këtë verë nëse lind mundësia më e vogël.

Kjo shumë do t’i lejonte Real Madridit të rikuperonte investimin e tyre dhe të lironte hapësirë për një rindërtim të mesfushës. Për momentin, qëndrimi i bordit është i prerë: Bellingham nuk është në shitje, por situata e përgjithshme nuk po injorohet.

Në klub ka shqetësime se lojtari nuk ndihet plotësisht rehat në rolin e tij aktual. Rendimenti i tij sulmues ka rënë, kërkesat mbrojtëse janë rritur dhe statusi i tij brenda ekipit ka ndryshuar me ardhjen e yjeve të rinj. E gjithë kjo ka shkaktuar pak frustrim tek ai.

Real Madridi po e mbështet atë, por nëse forma e tij nuk përmirësohet deri në fund të sezonit, asnjë opsion nuk do të përjashtohet. Klubi vlerëson talentin, moshën dhe ndikimin e tij komercial, por i jep përparësi ekuilibrit të dhomës së zhveshjes dhe qëndrueshmërisë sportive të projektit.

Pranimi i një shitjeje për më shumë se 100 milionë euro do t’i lejonte Real Madridit të forconte disa pozicione kyçe ose të kërkonte një profil lojtari që përshtatet më mirë në sistemin aktual.

Për momentin, gjithçka është pezull. Anglezi dëshiron të ketë sukses në Santiago Bernabeu, por gjithashtu dëshiron të ndihet i rëndësishëm.

Ndryshe, Belligham ka shënuar gjashtë gola dhe ka bërë katër asistime në 27 ndeshje këtë sezon. /Telegrafi/

Largimi i Kristjan Asllanit nga Italia është drejt finalizimit. Mesfushori shqiptar pritet të mbyllë periudhën e tij të huazimit te Torino dhe të rikthehet zyrtarisht te Interi, klub i cili tashmë ka nisur bisedimet për transferimin e tij te gjiganti turk, Besiktas.

Sipas raportimeve, marrëveshja mes palëve është shumë pranë përfundimit dhe parashikon një huazim me opsion blerjeje, me një vlerë që shkon nga 12 deri në 13 milionë euro.

Eksperti i njohur i merkatos, Fabrizio Romano, ka dhënë detaje të reja rreth marrëveshjes së arritur mes dy klubeve.

“Kristjan Asllani te Besiktas, ja ku jemi. Marrëveshje e rënë dakord verbalisht me Interin për huazim me klauzolë opsioni blerjeje”, ka shkruar Fabrizio Romano.

Gazetari italian shton se Besiktas do të mbulojë plotësisht pagën e mesfushorit deri në qershor, ndërsa opsioni i blerjes nuk do të jetë i detyrueshëm.

Nëse gjithçka shkon sipas planit, Asllani pritet të fluturojë drejt Stambollit më vonë gjatë ditës së sotme për të kryer procedurat e fundit dhe për të nisur aventurën e re në Superligën turke. /Telegrafi/

Avokati i familjes së Liridona Ademaj, Leutrim Syla, ka komentuar deklaratat e dhëna sot nga Naim Murseli gjatë seancës gjyqësore, duke thënë se ato janë të vështira për t’u dëgjuar për familjen e viktimës dhe, sipas tij, nuk përkojnë me faktet e paraqitura deri më tani në proces.

Syla, në emisionin “Mesditë” në Tëvë1, ka deklaruar se Murseli në asnjë moment nuk e ka pranuar apo përmendur tradhtinë ndaj bashkëshortes së tij, Liridona Ademaj, ndonëse sipas avokatit, kjo është e dokumentuar dhe e dëshmuar.

“Për familjen është jashtëzakonisht e vështirë me i dëgju këto deklarata nga Naim Murseli, për shkak se ai asnjë moment nuk e ka deklaruar faktin se e ka tradhtuar Liridonën me grua të afërmit të tij. Me këto deklarime që po i bën sot, ai po mundohet me i dhënë vetes një lloj titulli, ndoshta edhe pompoz për media, por jo për të thënë të vërtetën”, ka thënë Syla.

Sipas tij, jo vetëm deklaratat e Murselit, por edhe dëshmitë e personave të tjerë, përfshirë edhe babain e vetë Naim Murselit, e konfirmojnë ekzistencën e kësaj tradhtie.

“Edhe nga deklarata e babait të Naim Murselit, por edhe nga dëshmitarë të tjerë, është plotësisht e qartë që ai e ka tradhtuar Liridonën. Mirëpo, këtë pjesë ai nuk e përmend fare, sikur të mos ekzistonte. Për këtë tradhti ka prova materiale, ka komunikime, ka mesazhe të shkëmbyera që janë pjesë e shkresave të lëndës”, ka shtuar avokati i familjes Ademaj.

Syla ka theksuar se këto fakte janë të rëndësishme për zbardhjen e plotë të rrethanave që kanë paraprirë vdekjen e Liridona Ademaj dhe se familja pret që drejtësia të trajtojë rastin mbi bazën e provave dhe jo narrativave publike. /Telegrafi/

Si pasojë e vërshimeve të fundit, në disa zona të Komunës së Gjakovës ende janë evidentuar mbetje të mbeturinave të shpërndara në hapësira publike.

Kompania Rajonale e Mbeturinave “Çabrati” ka bërë të ditur se ekipet e saj janë çdo ditë në terren, duke punuar intensivisht për largimin e mbeturinave dhe rikthimin e pastërtisë në zonat e prekura.

Nga KRM “Çabrati” thuhet se angazhimi po vazhdon me kapacitete të plota, me qëllim që hapësirat publike të bëhen sa më shpejt të pastra dhe të sigurta për qytetarët.

Njëkohësisht, kompania ka kërkuar mirëkuptim dhe bashkëpunim nga qytetarët, derisa po zhvillohen këto intervenime pastruese në terren.

KRM “Çabrati” ka theksuar se mbetet e përkushtuar për ofrimin e shërbimeve cilësore dhe ruajtjen e mjedisit në Komunën e Gjakovës. /Telegrafi/

Nicolas Jackson po konsiderohet gjithnjë e më shumë si një nga dështimet më të mëdha të sezonit 2025/26 te Bayern Munich.

Sulmuesi senegalez u afrua në formë huazimi nga Chelsea gjatë verës, me synimin për të ofruar alternativa dhe për të lehtësuar ngarkesën e Harry Kane.

Megjithatë, pritshmëritë nuk janë përmbushur dhe bilanci i tij sportiv ka qenë zhgënjyes.

Që nga mbërritja në Mynih, Jackson nuk ka arritur të përshtatet me stilin e lojës së Bayernit dhe kërkesat e larta të klubit.

Trajneri Vincent Kompany nuk i ka besuar një rol të rëndësishëm në skuadër, ndërsa paraqitjet e tij kanë qenë të dobëta edhe në momentet kur i është dhënë mundësia për të luajtur.

Mungesa e bashkëpunimit me ekipin dhe efektiviteti i ulët para portës e kanë penalizuar ndjeshëm.

Performancat pa ndikim, gabimet elementare dhe mungesa e vetëbesimit kanë bërë që Jackson të shihet si një hallkë e dobët e skuadrës.

Në mediat gjermane flitet hapur për një huazim të dështuar, që nuk i ka sjellë asnjë përfitim sportiv Bayern Munichut në momente kyçe të sezonit.

Bayern pagoi rreth 13 milionë euro për huazimin e Jackson, një shumë e konsiderueshme për një operacion pa asnjë kthim.

Në klub pranohet se vendimi ka qenë i gabuar dhe se lojtari nuk do të qëndrojë përtej këtij sezoni, duke u kthyer te Chelsea në fund të kampionatit.

Një klub i mësuar me lëvizje të sakta në treg, këtë herë ka gabuar, dhe rasti i Nicolas Jackson pritet të mbetet si shembull i një investimi të pasuksesshëm. /Telegrafi/

Eksportet nga Zvicra gjatë vitit të kaluar kanë shënuar rritje dhe kapur shifrën prej 287 miliardë franga.

Kontributin kryesor në shtimin e eksporteve e kanë dhënë industria kimike dhe ajo farmaceutike, njoftoi të enjten gazeta “Neue Zürcher Zeitung” duke iu referuar të dhënave zyrtare.

Kësisoj Zvicra më 2025 ka eksportuar më shumë mallra se kurrë më parë, transmeton Telegrafi.

Përkundër tensioneve për shkak të politikave tregtare të qeverisë aktuale në Washington, Zvicra ka eksportuar dukshëm më shumë në SHBA në vitin 2025, me një rritje prej 3,9 për qind krahasuar me vitin paraprak.

Pati rritje edhe në eksportin e automjeteve dhe bizhuterive, ndërsa eksportet e orëve në botë shënuan rënie, ashtu si edhe ato në sektorët e makinerive, elektronikës dhe aparaturave.

Njëkohësisht u rritën edhe importet, duke arritur në 232,7 miliardë franga. /Telegrafi/

Agjencia prestigjioze Reuters ka publikuar listën “Trailblazing Women 2025”, ku përzgjedhin gratë që po udhëheqin ndryshime të rëndësishme në sektorët e tyre përmes ndikimit, inovacionit dhe lidershipit.

Në këtë listë është përfshirë edhe shqiptarja Shqipe Neziri Vela, e renditur ndër 10 gratë më të spikatura në nivel botëror në sektorin e energjisë.

Sipas Reuters, përzgjedhja u bazua mbi arritjet profesionale, ndikimin publik, kontributin social dhe aftësitë udhëheqëse, duke vlerësuar gratë që kanë luajtur rol kyç në politikën dhe praktikat e qëndrueshme të industrive strategjike.

Shqipe Vela është vlerësuar për udhëheqjen dhe ndikimin e saj në qeverisjen e burimeve natyrore, promovimin e transparencës dhe avancimin e praktikave të qëndrueshme në industrinë e energjisë dhe minierave. /Telegrafi/

Drejtori ekzekutiv i Spitalit të Përgjithshëm në Prizren, Osman Hajdari, së bashku me menaxhmentin e spitalit, ka pritur në takim drejtorin e Drejtorisë Komunale të Shëndetësisë së Komunës së Prizrenit, Sylejman Baxhaku, me bashkëpunëtorët e tij.

Në takim morën pjesë edhe drejtori mjekësor Dr. Shefki Xharra, drejtoresha e Infermierisë Burbuqe Gashi, drejtori i Administratës dhe Shërbimeve të Përbashkëta Lumrim Murtezaj, si dhe përfaqësues të Drejtorisë Komunale të Shëndetësisë, përfshirë udhëheqësin e Sektorit të Shëndetësisë Komunale Shpëtim Rahmanaj, zyrtaren e lartë për cilësi Dormira Brahimaj-Musaj dhe zyrtaren ligjore Qëndresa Racaj.

Gjatë takimit u diskutua për forcimin e bashkëpunimit institucional ndërmjet Spitalit të Përgjithshëm “Prim. Dr. Daut Mustafa” dhe Drejtorisë Komunale të Shëndetësisë, me qëllim të përmirësimit të vazhdueshëm të shërbimeve shëndetësore dhe ofrimit të shërbimeve më cilësore, më efikase dhe më të shpejta për qytetarët.

Në fokus të diskutimeve ishin shkëmbimi i përvojave profesionale dhe edukimi i vazhdueshëm i stafit shëndetësor, koordinimi dhe avancimi i shërbimeve emergjente, procesi i referimit dhe transportimit të pacientëve, si dhe inicimi i ngritjes së një qendre të veçantë për transportimin e pacientëve nga vendi i ngjarjes, QKMF-të, spitali dhe QKUK-ja. Po ashtu, u trajtua shfrytëzimi optimal i burimeve njerëzore dhe financiare, pajisjeve mjekësore, shërbimeve teknike, si dhe koordinimi i shërbimeve diagnostike dhe laboratorike.

Palët diskutuan gjithashtu ngritjen e mekanizmave të përbashkët institucionalë dhe iniciativave që vendosin pacientin në qendër të kujdesit shëndetësor.

Në përfundim të takimit, drejtuesit e të dy institucioneve u dakorduan që bashkëpunimi të vazhdojë përmes takimeve të rregullta dhe ndërmarrjes së hapave konkretë për zbatimin e çështjeve të diskutuara, përfshirë inicimin e marrëveshjeve të bashkëpunimit ndërinstitucional, në përputhje me kornizën ligjore në fuqi.

Ky ishte takimi i parë ndërmjet dy drejtuesve që nga marrja e detyrës së drejtorit ekzekutiv të Spitalit nga Osman Hajdari në shtator 2025 dhe marrja e detyrës së drejtorit të Shëndetësisë Komunale nga Dr. Sylejman Baxhaku në janar 2026. /Telegrafi/

I akuzuari Naim Murseli duke dhënë mbrojtjen para Gjykatës Themelore në Prishtinë, deklaroi se nuk e ka paguar as porositur vrasjen e bashkëshortes së tij, Liridona Ademajt. Tha se nuk e ka ndihmuar të akuzuarin Granit Plava ta kryejë këtë vrasje.

Duke vazhduar deklarimin rreth natës kritike të 29 nëntorit 2023 kur u vra Liridona Ademaj, i akuzuari Naim Murseli tha se rrugës nga restoranti për në shtëpi, ishte ndalë në pompë të derivateve. Tha se ishin me veturën e tani të ndjerës, raporton “Betimi për Drejtësi“.

Sipas tij, më pastaj, gjatë rrugës, tani e ndjera i kishte thënë të ndalen për të blerë vezë, e të cilat ishte ndalë dhe i kishte blerë në një dyqan, duke shtuar se pronari i dha çokollata për fëmijët. Më pastaj, rrugës kur ishin në Bërrnicë, para se të mbërrinin në shtëpi, ai thotë se papritmas nga ana e majt u doli një person i maskuar në mes të rrugës, duke ua drejtuar armën.

Naim Murseli para gjykatës: Liridona ka qenë një grua e mrekullueshme, një nënë e përkushtuar dhe bashkëshorte e devotshme

“Unë isha vozitës, Liridona parasgjere, fëmijët mbrapa. Edhe Liridona thotë “o kuku hajni”, dhe unë e ngadalësoj, i çoj duart, krejt kohën personi i maskuar afrohej te dritarja ku ishte Liridona. Liridona e hap dritarën në gjysmë a s’e di sa, edhe unë i kisha paratë në xhep se kuletë s’kam mbajt kurrë. Paratë që i kisha dhe telefonin ia dha. Ai e zgjatë dorën edhe i merr. Telefonin jo unë, Liridona ia jep të vetin, edhe paratë sa i kishte- disa qindra euro, jo më shumë”, deklaroi Murseli.

Sipas tij, ai mendoi që grabitja po bëhej për veturë, andaj për këtë arsye edhe ka dalë prej veturës. Ai deklaroi se kur doli nga vetura, ai person ia kërkoi telefonin, të cilin edhe ia dha.

“Kam hapë derën e fëmijëve. Fëmijët kanë nga, edhe unë pas tyre. Kam mendu se kur largohem unë, ai ia liron rrugën Liridonës, e merr kerrin. Pas disa sekondash kam dëgju krismën. Mu m’u ka duk si dy krisma. Në atë moment kam mendu po shtie në drejtim tonë dhe s’kam guxu me u kthy mbrapa. Kam vazhdu me nga me fëmijë. Pas disa sekondash e kthej kokën, e shoh që Liridona nuk është askund. Vjen vetura e zezë, ajo në pamje dhe në atë moment, ajo veturë vjen në drejtim tonin shumë afër me na goditë. Vetëm i kam kap fëmijët dhe ka vazhdu drejt me shpejtësi të madhe. I njëjti ka qenë me maskë”, tha Murseli.

Ai shtoi se në aktakuzë ngarkohet se e kishte mbajtë me dorë tani të ndjerën në momentin e fundit të jetës.

“Ju betohem në dy fëmijët që i kam se Naim Murseli as në makinë s’ka qenë kur është vra Liridona. Kjo është ideja e rikonstruimit të vendit të ngjarjes. Unë vrapoj te dyert e shtëpive, trokas, por nuk e hap askush në ato tri shtëpi. Doli një grua në dritare në shtëpinë e fundit dhe i them lajmëro policinë. Më tha nuk di- ishte e moshuar. Për këtë arsye kam vazhdu te marketi”, vazhdoi deklarimin Murseli.

Ai më pastaj thotë se vazhdoi te dyqani ku edhe e priti policinë, e bashkë me ta shkoi në vendin e ngjarjes. Tha se nuk e kishin lejuar policët të dilte nga vetura.

Atë natë, ai thotë se e kishte marrë Valon Lluka dhe kanë shkuar në hotel, duke shtuar se ishte i shokuar. Murseli thotë se pasi doli nga stacioni i policisë, fëmijët e i kishin marrë familja e Liridonës.

Naim Murseli thotë se arsyeja pse shkoi atë natë në hotel ishte se policia i kanë thënë të mos largohej nga Prishtina sepse do e thërrasin të nesërmen prapë. Po ashtu, i akuzuari thotë se bashkë me të qëndroi edhe Kushtrim Kokalla.

Ai thotë se shtëpinë në Bërnicë e kanë blerë me kredi bashkë me tani të ndjerën, kredi e cila ka qenë me hipotekë, ku janë dhënë 60 mijë euro- apo 20% e shumës totale, pjesa tjetër me kredi.

I akuzuari thotë se ditën e varrimit ka qenë në Prokurori, ku është marrë në pyetje përsëri edhe ai edhe fëmijët. Tha se ua morën pasaportat atij dhe fëmijëve, e pasi përfundoi intervistimin, pasaportat ua kthyen dhe prokurorja i tha se është i lirë të shkojë në varrim.

“Nuk kam pagu, nuk kam porositë dhe nuk kam ndihmu Granit Plavën me vra gruan time, dhe siç thash, betohem në dy fëmijët e mi se Naim Murseli nuk ka qenë në veturë në momentin e vrasjes. Kam qenë së paku 20-30 metra larg dhe shyqyr Zotit as fëmijët nuk e kanë pa ngjarjen. Çdo gjë tjetër është shpifje”, tha i akuzuari.

Tani, ai thotë se fëmijët janë strehuar tek një familje dhe se nga paraburgimi ka vetëm dy orë në muaj për të komunikuar me ta.

“E kemi ditën e martë në kohën kur flasim, atë kohë ata janë në shkollë dhe s’kam si flasë. Po kam fol disa herë. Kam qenë i përkushtuar ndaj fëmijëve, si unë si Liridona. E di edhe Leonardi”, tha Murseli.

Lidhur me raportin me të akuzuarin Kokalla, ai tha se ishte i vetmi me të cilin kalonte kohë kur ishin në Kosovë dhe se kishte raporte të mira me të gjithë. Ai përmendi se ishte operuar për një problem shëndetësor.

Më pas, gjykatësja Fatime Dermaku tha se meqenëse seanca ka qenë e planifikuar vetëm për sesionin e paradites dhe se prokurores i duhen dy orë për ta marrë në pyetje të akuzuarin, kjo seancë ndërpriet dhe vazhdon më 11 shkurt 2026.

Murseli: Granitin s’e kam parë në restorant, s’kisha qëllim ta blija armën nga e cila do vritej gruaja ime- kurrë s’e kam menduar vrasjen e saj

(Përditësuar, ora 11:06)- Gjatë dhënies së mbrojtjes së tij, Naim Murseli ka dhënë versionin e tij për ditën kritike kur u vra bashkëshortja e tij Liridona Ademaj. Ai tha se në restorantit kur kanë shkaur për të darkuar nuk e ka parë Granit Plavën në asnjë moment, ndërsa lidhur me armën- tha se asnjëherë nuk e kishte qëllim të blente armën me të cilën do të vritej gruaja e tij dhe se vrasjen nuk e ka menduar asnjëherë.

I pyetur lidhur me revolen e blerë nga Tom Dodaj, i akuzuari Naim Murseli tha se ajo revole është blerë në mënyrë spontane, duke thënë se e dinte që Granit Plava e kishte gjendjen e rëndë ekonomike dhe kur Dodaj ua ofroi për shitje armën, Plava ishte i interesuar, e që e bleu, raporton “Betimi për Drejtësi“.

Sipas Murselit, të akuzuarin Dodaj nuk e njihte, duke shtuar se armët nuk i ka dashur kurrë. Tha se edhe vëllai i tani të ndjerës Liridona Ademaj, Leonardi, e di që nuk i ka dashur armët.

Lidhur me video-incizimet ku shihet edhe i akuzuari Plava me veturë, Murseli tha se kur kishte shkuar në restorant me Liridonën dhe fëmijët, nuk e ka parë Plavën. Tha se edhe një javë më parë kishte qenë aty për darkë me Liridonën dhe prindërit e saj, dhe fëmijët.

“Por, më 29 nëntor, unë nuk e kam pa Granitin as në restorant, as jashtë, as makinën, në asnjë moment. Ju betohem. Ajo video s’ka asgjë lidhje me ndonjë shenjë apo diçka komplet absurde”, tha ai.

Në atë darkë, i akuzuari Murseli tha se qëndruan rreth 30-45 minuta dhe nga aty ai i kishte thënë Liridonës të shkojnë në Prishtina Mall, por që ajo i ka thënë se është lodhur dhe janë nisë për në shtëpi.

“Liridona tri ditë ishte te familja e saj në Rracaj dhe kur unë isha në Gjakovë, Liridona më thirri papritë dhe më thotë kam ardhë në Prishtinë. Edhe menjëherë kur më tha unë jam kthy, i kam thanë Granitit, edhe ai më tha se edhe ai ka me shku në Prishtinë. Para blerjes së armës, harrova me thanë, ajo ka ndodh spontanisht, aryseja pse shkuam aty ishte sepse goma e veturës ishte shpërthyer dhe rastësisht e kemi gjet atë servis, ashtu ndodhi blerja- krejt spontnaisht”, tha Murseli.

Sipas tij, ai nuk kishte qëllim ta blente armën.

“S’kam pas qëllim m’u ble ajo armë nga e cila armë do të vritej gruaja ime. Asnjëherë, kurrë vrasjen e gruas time nuk e kam mendu. Familja Ademaj më njeh shumë mirë, se edhe tezja ime është e martuar aty, edhe e dijnë mirë se s’kam qenë problematik, kriminel, drogirash. Unë as cigare nuk pi dhe nëse kjo nuk është e vërtetë, le të fol Leonardi. Unë as shoqërinë nuk e kam pas të tillë, asnjëherë”, tha Murseli.

“Larg qoftë”- u përgjigj Naim Murseli kur u pyet se a ka pasur marrëveshje me dy të akuzuarit Plava dhe Kokalla për vrasjen e gruas së tij.

“Larg qoftë me ushtru dhunë apo diçka e tillë”, Naim Murseli flet për raportin që kishte me tani të ndjerën Liridona Ademaj

(Përditësuar, ora 10:39)- I akuzuari Naim Murseli në fillim të mbrojtjes së tij para trupit gjykues, foli për raportet që kishte me tani të ndjerën Liridona Ademaj, ku tha se raportet e tyre ishin të mira dhe se nuk ka ushtruar asnjëherë dhunë ndaj saj.

Fillimisht, Museli tha se qëndron pranë deklarimeve të dhëna në Prokurori. Ndërkaq, më pas tregoi për raportet që, sipas tij, i kishte me bashkëshorten e tij- tani të ndjerën Liridona Ademaj, raporton “Betimi për Drejtësi“.

“Unë me Liridonën jam fejuar në vitin 2010, më 21 prill dhe jemi martuar më 11 dhjetor 2011. Që i bie, i kam pas 12 vite martesë me Liridonën dhe si rezultat kemi dy fëmijë. Marrëdhënia jonë ka qenë e mirë, e lumtur, Liridona ka qenë një grua e mrekullueshme, një nënë shumë e përkushtuar dhe një bashkëshorte e devotshme”, tha Murseli.

Ai tha se kanë jetuar në Suedi, derisa tani e ndjera pas tri vitesh qëndrimi atje, është bërë shtetase suedeze. Tha se asnjëherë s’kanë pasur ndonjë ndarje dhe se gjithçka ishte në rregull mes tyre.

Murseli tha se edhe vëllai i tani të ndjerës, Leonard Ademaj, ka treguar se Liridona nuk është ankuar asnjëherë për ndonjë gjë në lidhjen mes tyre.

“Asnjëherë në jetën time, larg qoftë me ushtru dhunë apo diçka e tillë. Ato gjëra nuk kanë ekzistu në lidhjen tonë”, tha Murseli.

I akuzuari tha se të ardhura financiare kishin mjaftueshëm, ngase kishin një restaurant dhe një kompani pastrimi bashkë me bashkëshorten. Sipas tij, të hyrat vjetore të tij ishin diku 45 mijë euro, ndërkaq të Liridonës afër 20 mijë.

Murseli tha se është marrë edhe me investime online, shërbime të marketingut online për biznese.

I pyetur lidhur me polisën e sigurimit, ai tha se secili shtetas i Suedisë e ka sigurimin shtëpiak dhe jetësor, e në këtë rast e kishin edhe ai e Liridona, në të njëjtën shumë.

“Ajo shumë 3 milionë kruna, 260 mijë euro, nuk është shuma maksimale e polisës. Ajo mund të rritet deri në 600 mijë euro, nëse pala ka interes”, tha Murseli.

Ai theksoi se nuk mund të hapë polisë për dikë tjetër, pa qenë personi prezent, ngase është individuale.

Lidhur me raportin me tani të ndjerën, ai tha se sikurse secili çift, kanë pasur ndonjëherë grindje por jo deri në ftohje maksimale të marrëdhënies.

Murseli tha se krahas bizneseve në Suedi, ka pasur biznes edhe në Kosovë, ku është aksionar në një të tillë. Tha se bashkë me tani të ndjerën kanë blerë shtëpi më 2023 në Kosovë.

Atëkohë, sipas Murselit, kishte ardhë në Kosovë deri nga qershori deri në nëntor është marrë vazhdimisht me atë shtëpi, që të pëgatitet për banim.

Lidhur me të akuzuarin Granit Plava, Murseli tha se ka qenë hera e parë që është takuar me të pa Kushtrim Kokallën (djalin e dajës), ndërkaq dy herë të tjera e ka takuar me të. Ai shtoi se nuk kishte miqësi me Plavën, por vetëm e njeh përmes Kokallës, duke shtuar se bisedat kanë qenë vetëm për shëtitje.

Refuzohen propozimet e mbrojtjes, Naim Murseli nis dhënien e mbrojtjes

Prishtinë- Në Gjykatën Themelore në Prishtinë, në gjykimin ndaj Naim Murselit, Kushtrim Kokallës dhe Granit Plavës, të enjten, trupi gjykues ka refuzuar propozimet e mbrojtjes për plotësimin e procedurës së provave. Ndërkaq, i akuzuari Murseli nisi dhënien e mbrojtjes.

Naim Murseli, Granit Plava, Kushtrim Kokalla dhe Tom Dodaj, ngarkohen për rastin e vrasjes së Liridona Ademajt më 29 nëntor 2023, raporton “Betimi për Drejtësi”.

Fillimisht, kryetarja e trupit gjykues, Fatime Dermaku, njoftoi se mbrojtësi i Kushtrim Kokallës, avokati Ndrecë Dodaj më 30 dhjetor 2025 ka parashtruar kërkesë për dëgjimin e dëshmitarit Tafil Kokalla.

Ndërsa, më 22 janar 2026, sipas gjyqtares, mbrojtësi i Granit Plavës, avokati Skender Gojani, ka kërkuar nxjerrjen e një ekspertize shtesë për gjendjen psikike të Plavës në kohën e kryerjes së veprës penale.

Gjyqtarja Dermaku tha se mbrojtësit e të akuzuarit Naim Murseli, avokatët Shemsedin Piraj dhe Teuta Zhinipotoku, kanë kërkuar rikonstruimin e vendit të ngjarjes.

Lidhur me propozimin e avokatëve Dodaj dhe Gojani, prokurorja Javorka Perlinçeviq përmes parashtresës ka deklaruar se këto propozime ia lë gjykatës të vendosë.

Kurse, për propozimet e mbrojtjes së Murselit, prokurorja theksoi se ka parë se kanë propozimet për prova shtesë më 27 janar 2026. Tha se më 22 dhjetor 2025, Gjykata të gjitha palëve ua ka dhënë mundësinë që propozimet për nxjerrjen e provave të reja t’i dorëzojnë deri më 9 janar 2026.

Prokurorja tha se konsideron që ky propozim është dorëzuar jashtë afatit ligjor dhe se nuk është respektuar udhëzimi i gjykatës, andaj duhet refuzuar.

Në anën tjetër, përfaqësuesi i palës së dëmtuar- Leonard Ademaj, avokati Leotrim Syla kundërshtoi rikonstruimin e vendit të ngjarjes, me arsyetimin se është zvarritje e procedurës.

Më pas, kryetarja e trupit gjykues, Fatime Dermaku, refuzoi propozimin e mbrojtjes për plotësim të provave. Pra, u refuzua propozimi i avokatit Dodaj, me arsyetimin se dëshmia e dëshmitarit të propozuar nuk është relevante dhe nuk kontribuon në ndriçimin e çështjes. Gjithashtu, u refuzua propozimi i avokatit Gojani, me arsyetimin se është propozim i pabazuar dhe i pambështetur në prova konkrete.

Ndërkaq, propozimin e mbrojtjes së Murselit e refuzoi për arsye se vlerësoi se janë elaboruar provat mjaftueshëm, andaj bazuar në parimin e efikasitetit, këto propozime u refuzuan për të vazhduar me dëgjimin e Murselit.

Ndryshe, raporti i Institutit të Psikiatrisë Forenzike të Kosovës ka konstatuar se Naim Murseli, i akuzuar për vrasjen e Liridona Ademajt, nuk ka pasur çrregullime apo sëmundje mendore në kohën e kryerjes së veprës penale. Edhe në seancën e 22 shtatorit 2025, ekspertët Shpend Haxhibeqiri dhe Bujar Obërtinca, konstatuan se të akuzuarit Murseli dhe Plava nuk kanë çrregullime mendore.

Në seancën fillestare të mbajtur më 31 janar 2025, Naim Murseli u deklarua i pafajshëm për vrasjen e bashkëshortes së tij Liridona Ademajt, Granit Plava nuk u deklarua rreth fajësisë, kurse Kushtrim Kokalla tha se nuk deklarohet pa u konsultuar me mbrojtjen. Ndërsa, fajtor u deklarua i akuzuari Tom Dodaj. Ky i fundit, pasi pranoi fajësinë u dënua nga Themelorja me 5 vjet burgim dhe 5 mijë euro gjobë.

Por, Gjykata e Apelit me vendimin e 10 dhjetorit 2025, ndryshoi vendimin e Themelores, duke e dënuar Dodajn me 3 vjet burgim dhe 3 mijë euro gjobë për shitjen e armës.

Ndryshe, Prokuroria Themelore në Prishtinë më 15 janar 2025 ka ngritur aktakuzë ndaj Naim Murselit, Granit Plavës, Kushtrim Kokallës dhe Tom Dodajt.

Sipas aktakuzës së siguruar nga “Betimi për Drejtësi”, Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro. I gjithë plani për vrasjen e Liridonës, thuhet se u bë nga bashkëshorti i saj, tani i akuzuari Naim Murseli, si pasojë e çrregullimit të raporteve familjare e martesore, ku edhe lindi dëshira e tij për hakmarrje.

Në aktakuzë thuhet se fillimisht plani i ishte shpalosur Kokallës nga Murseli, por ai kishte refuzuar të gjente një mundësi për vrasjen e Liridonës, e më pas Kokalla kishte gjetur Plavën, me të cilin e kishte njoftuar Naimin. E vetë Naim Murseli, thuhet se siguroi armën me 20 fishekë, nga i akuzuari Tom Dodaj, nga i cili e bleu për 280 euro. Me këtë armë, u krye vrasja e tani të ndjerës. Detajet nga aktakuza i gjeni: KËTU. /BetimipërDrejtësi/

Çmimet e naftës janë rritur pasi presidenti i SHBA-së, Donald Trump, paralajmëroi Iranin se "koha po mbaron" dhe tha se një "armatë masive" po shkonte drejt rajonit nëse Teherani nuk arrinte të binte dakord për një marrëveshje për mospërhapjen e armëve bërthamore.

Trump tha se një flotë më e madhe se ajo e dërguar në Venezuelë ishte gati të “përmbushte me shpejtësi misionin e saj, me shpejtësi dhe dhunë, nëse është e nevojshme” nëse Irani refuzonte të negocionte një marrëveshje që garantonte “pa armë bërthamore”.

Çmimi i naftës së papërpunuar amerikane (WTI) u rrit me rreth 2.02%, duke u tregtuar në rreth 68.73 dollarë për fuçi, ndërsa nafta e papërpunuar amerikane (WTI) mbeti rreth 2.15% më e lartë, në 64.57 dollarë për fuçi, shkruan euronews.

Trump më parë kërcënoi se do të sulmonte Iranin nëse ai do të vriste protestues gjatë lëvizjes së vazhdueshme protestuese në të gjithë vendin.

Vlerësimet e të vrarëve variojnë nga rreth 6,000 deri në 30,000, sipas raporteve të ndryshme.

Nëse SHBA do të përshkallëzonte situatën ushtarakisht, kjo mund të prishte rrjedhën e naftës drejt vendeve që ende tregtojnë me Iranin.

Bëhet e ditur se ekonomia e Iranit është tashmë nën presion të madh nga sanksionet dytësore financiare të SHBA-së mbi sektorët e saj bankarë dhe të energjisë, të përkeqësuar nga rivendosja e sanksioneve të marrëveshjes bërthamore (JCPOA).

Këto masa e kanë kufizuar rëndë aksesin e Iranit në sistemin financiar perëndimor dhe aftësinë e tij për të tregtuar hapur. /Telegrafi/

Nata e fundit e fazës së ligës në Ligën e Kampionëve solli një nga momentet më dramatike të viteve të fundit, ndërsa Benfica siguroi kualifikimin në sekondat e fundit falë një goli të pabesueshëm nga portieri i saj.

Benfica po fitonte 3:2 ndaj Real Madridit deri në minutën e 98-të, por kjo nuk mjaftonte për të kaluar në fazën eliminatore. Për të siguruar vendin e fundit në play-off për raundin e 16-tave, portugezëve u duhej edhe një gol për të përmirësuar diferencën e golave.

Në momentin kur dukej se gjithçka kishte marrë fund, u shfaq portieri Anatoliy Trubin, i cili në sekondën e fundit shënoi golin vendimtar për rezultatin 4:2, duke e çuar Benfikën në fazën tjetër të garës.

Ky gol nuk u prit mirë nga të gjithë, pasi la jashtë garës Olympique de Marseille, që deri në atë çast po shpresonte të kualifikohej.

Gjigantët francezë ishin mposhtur 3-0 nga Club Brugge, por ende prisnin përfundimin e ndeshjes Benfica–Real Madrid, me shpresën se rezultati do t’i favorizonte.

Madje festa shkoi aq larg sa Club Brugge e përgëzoi Marsejën për kualifikimin në ekranin e madh të stadiumit, duke shkruar:

"Urime për kualifikimin, Olympique de Marseille", shkruhej në ekranin gjigant nga Club Brugge.

Megjithatë, belgët nuk e dinin se Benfica kishte ende kohë për të shënuar, dhe ky gjest xhentëlmenësh përfundoi duke u kthyer në një moment edhe më të dhimbshëm për tifozët dhe lojtarët francezë. /Telegrafi/

Komuna e Kamenicës, përmes Drejtorisë për Bujqësi, Pylltari dhe Zhvillim Rural, ka njoftuar se sezoni i gjuetisë në territorin e kësaj komune do të mbyllet më 31 janar 2026.

Sipas njoftimit, vendimi është marrë në bazë të Ligjit për Gjueti Nr. 02/L-53 dhe ka për qëllim mbrojtjen e faunës së egër, si dhe ruajtjen e ekuilibrit natyror.

Me mbylljen e sezonit, pas datës 31 janar 2026 ndalohet rreptësisht çdo aktivitet i gjuetisë në territorin e Komunës së Kamenicës.

Ky njoftim është i obligueshëm për të gjithë gjuetarët, shoqatat e gjuetarëve dhe shfrytëzuesit e vendgjuetive në këtë komunë.

Nga Drejtoria për Bujqësi, Pylltari dhe Zhvillim Rural u bëhet thirrje të gjitha palëve që të respektojnë këtë vendim, në funksion të mbrojtjes së biodiversitetit dhe zbatimit të legjislacionit në fuqi. /Telegrafi/

Justin Bieber po bën zyrtarisht rikthimin e tij të shumëpritur në skenën e Grammy Awards.

Ylli i muzikës pop, 31-vjeçari, është konfirmuar si interpretues në Grammy 2026, që do të transmetohet të dielën, duke shënuar paraqitjen e tij të parë në ngjarjen më të madhe të muzikës pas katër vjetësh.

Bieber performoi për herë të fundit në këtë ceremoni në vitin 2022, kur dhuroi një interpretim shumë të pëlqyer të këngës Peaches së bashku me Giveon dhe Daniel Caesar.

Performanca e tij e ardhshme shënon një moment simbolik, teksa ai rikthehet në qendër të vëmendjes pas një viti përcaktues për karrierën e tij.

Këngëtari i bashkohet një liste yjesh që do të performojnë, ku përfshihen gjithashtu Sabrina Carpenter, Clipse me Pharrell Williams, si edhe të nominuarit për çmimin Best New Artist: Marías, Addison Rae, Alex Warren, KATSEYE, Leon Thomas, Sombr, Lola Young dhe Olivia Dean.

Kryeministri i Maqedonisë së Veriut, Hristijan Mickoski sot në Kuvend tha se nëse nuk plotësohen dy kushtet e parashtruara nuk do të ketë ndryshime kushtetuese në vend, përcjell Telegrafi Maqedoni.

"Ndryshime kushtetuese nuk do të ketë derisa jam unë jam Kryeministër, nëse nuk përmbushen minimum dy kushte. Kushti i parë është që komuniteti maqedonas të fitojë të drejtat e tyre në Bullgari të garantuara sipas rezolutave të të drejtave njeriut dhe konventave ndërkombëtare. Nuk kërkoj të ndryshohet kushtetuta.

E dyta nuk marrim garanci për identitetin tonë maqedonas, për të cilën pres mbështetje edhe nga ju si bashkëqytetar të mi, të gjuhës maqedonase dhe se nuk do të ketë më veto bilaterale", tha Mickoski gjatë seancës për pyetje të deputetëve.

Mickoski shtoi se vendi ynë ka treguar dhe vërtetuar shumë herë se dëshiron të jetë pjesë e familjes evropiane, ka bërë një sakrificë si asnjë vend tjetër, dhe ky popull dhe këta qytetarë, si asnjë qytetar tjetër i Evropës nuk kanë bërë një sakrificë./Telegrafi/

Bashkimi Demokratik për Integrim (BDI) në një kumtesë për media thotë se e dënon ashpër vendimin e qeverisë për marrjen e kredisë prej 40 milionë euro për ndërtimin dhe renovimin e shkollave dhe konvikteve, e cila sipas BDI-së, në mënyrë të qëllimshme dhe të papranueshme është orientuar pothuajse tërësisht në qytetet maqedone.

"Investimet në arsim janë të mirëseardhura dhe të domosdoshme, por ato duhet të jenë të drejta, gjithëpërfshirëse dhe të balancuara, duke reflektuar realitetin multietnik të shtetit dhe nevojat reale të të gjithë qytetarëve. Përjashtimi i shkollave dhe konvikteve me nxënës shqiptarë nga projektet kapitale në arsim përbën diskriminim institucional dhe shkelje të parimit të barazisë".

"Ky vendim nuk është as rastësi dhe as gabim teknik – është politikë e pastër diskriminuese, e cila synon të përjashtojë komunat shqiptare nga investimet kapitale dhe të rikthejë praktikat e vjetra të ndarjes etnike të buxhetit shtetëror".

"Qeveria po merr kredi në emër të të gjithë qytetarëve, përfshirë shqiptarët, por investimet po i orienton vetëm për një komunitet. Kjo është padrejtësi dhe shkelje e drejtpërdrejtë e parimeve kushtetuese të barazisë dhe bashkëjetesës", thonë nga BDI.

BDI kërkon publikimin e menjëhershëm të listës së projekteve përfituese; sqarimin e kritereve të ndarjes së mjeteve; nëse kjo padrejtësi vazhdon, qeveria mban përgjegjësi të plotë politike dhe morale për thellimin e ndarjeve në vend.

Reparti i Oftalmologjisë në Spitalin e Përgjithshëm “Dr. Sami Haxhibeqiri” në Mitrovicë ka realizuar 602 operacione të syrit gjatë vitit 2025, për patologji dhe sëmundje të ndryshme oftalmologjike, si dhe për ndërhyrje urgjente në raste të lëndimeve traumatike.

Nga spitali bëhet e ditur se ky repart ofron kujdes mjekësor 24-orësh për pacientët që kanë nevojë për trajtim dhe mbrojtje të shëndetit të syve.

Shërbimet ofrohen nga një ekip profesional i përbërë nga pesë mjekë specialistë, gjashtë infermierë dhe katër instrumentare.

Përveç ndërhyrjeve kirurgjikale, gjatë vitit të kaluar janë realizuar gjithsej 14 mijë e 514 vizita ambulantore, për pacientë me ankesa dhe shqetësime të ndryshme oftalmologjike.

Drejtuesit e repartit theksojnë se ofrimi i shërbimeve të vazhdueshme dhe të specializuara mbetet prioritet, duke pasur parasysh ndjeshmërinë dhe rëndësinë e shëndetit të syve për cilësinë e jetës së pacientëve. /Telegrafi/

Një skenë marramendëse, por shqetësuese, u zhvillua në fshatin Mindhal të Himachal Pradesh të Indisë, ku reshjet e dendura të borës krijuan një "lumë bore" poshtë një shpati mali.

Fenomeni natyror, i shkaktuar nga bora e grumbulluar që po lirohet, i ka lënë vendasit të habitur dhe autoritetet në gatishmëri të lartë mes kushteve të ashpra të dimrit, transmeton Telegrafi.

Videot e spektaklit janë bërë virale, duke treguar shtresa të trasha bore që rrëshqasin me shpejtësi poshtë si një rrjedhë e lëngshme për shkak të ndryshimeve të papritura gjatë reshjeve të dendura.

"Më në fund një sasi e mirë bore në Himalaje. Pas reshjeve të djeshme të borës, pothuajse të gjitha zonat janë të mbuluara me borë tani. Keni parë ujë që rrjedh; sot shikoni borën që rrjedh nëpër përrua", u përshkrua video nga një përdorues në X.

Fshatarët në zonë përdorën bilbila tradicional, të cilët janë sinjal paralajmërues të zakonshëm për rreziqet natyrore në rajon, për të njoftuar të tjerët aty pranë për borën që lëviz dhe për t'i nxitur ata të lëvizin në vende më të sigurta. /Telegrafi/

Presidentja e Republikës së Kosovës, Vjosa Osmani, ka deklaruar se përzgjedhja e Kosovës si shtet bashkëthemelues në “Bordin e Paqes”, një organizatë kjo e rëndësishme ndërkombëtare e udhëhequr nga Shtetet e Bashkuara të Amerikës, është vlerësuar jashtëzakonisht pozitivisht nga liderë të shumtë botërorë dhe ka dhënë një mesazh të fuqishëm për shtetësinë dhe sovranitetin e Kosovës.

Në “Përballje Podcast” me kryeredaktorin Muhamet Hajrullau, Osmani tha se jo vetëm liderët që ishin të pranishëm në ceremoni, por edhe shumë të tjerë nga vende të ndryshme të botës, e kanë kontaktuar më vonë për ta vlerësuar këtë zhvillim.

“Në radhë të parë kjo është vlerësuar nga të gjithë liderët që atë ditë ishin aty, por edhe shumë liderë të tjerë që nuk ishin aty që kanë kontaktuar me mua më vonë, liderë të shteteve nga Evropa e deri në Azia e Amerika Latine është krijuar përshtypja që Republika e Kosovës është vërtet partnere e fuqishme e Shteteve të Bashkuara të Amerikës, Republika e Kosovës është zgjedhur nga Presidenti Trump si një nga shtetet që i beson për të qenë anëtare themeluese e një organizate që ka aq shumë rëndësi për të dhe do të thoja këtu dhe për gjithë botën dhe për paqen në botë”, u shpreh Osmani.

Ajo theksoi se gjatë diskutimeve me presidentë të ndryshëm, përfshirë edhe nga shtete që nuk e kanë njohur ende Kosovën, ky veprim i SHBA-ve është parë si sinjal i rëndësishëm për vendimet e ardhshme.

“Unë kam pasur diskutime me shumë nga presidentët që ishin prezentë atë ditë, sepse neve na ra të qëndrojmë bashkë para se të fillojë ceremonia, dhe në shumë prej këtyre diskutimeve edhe ata disa nga shtetet jonjohëse e kanë potencuar që për ta ky veprim i Amerikës ka domethënie të jashtëzakonshme edhe për vendimet e tyre që do të merren në të ardhmen në raport me Kosovën, pra ma kanë thënë këtë dhe kjo ka shumë-shumë rëndësi për ne”, tha tutje Osmani.

- YouTube www.youtube.com

Sipas Osmanit, fakti që Kosova është anëtare bashkëthemeluese e kësaj organizate ka peshë më të madhe se anëtarësimi në shumë organizata të tjera ndërkombëtare.

“Fakti që jemi anëtare bashkëthemelues me këto shtete, fuqizon subjektivitetin ndërkombëtar të Republikës së Kosovë, prandaj, edhe ne e kemi vlerësuar që anëtarësimi në këtë organizatë është edhe më e fuqishme jo vetëm për nga simbolika dhe rreshtimi politik, por edhe nga aspekti i fuqizimit të subjektivitetit ndërkombëtar që na ka mundësuar Shtetet e Bashkuara të Amerikës, e them pa asnjë ekuivokë që kjo është më e rëndësishme se shumë nga organizatat e tjera”, u shpreh presidentja Osmani.

Ekskluzive, Osmani: Rreshtimi me Amerikën në Bordin e Paqes forcon subjektivitetin dhe zërin ndërkombëtar të Kosovës

Presidentja mohoi se ky rreshtim ka shkaktuar ndonjë problem në raport me Bashkimin Evropian, duke theksuar se ka pasur mirëkuptim të plotë nga partnerët evropianë.

“Nuk ka pasur asnjë vërejtje të vetme që është shprehur në raport me Kosovën, përkundrazi, mirëkuptim të plotë është shprehur mirëkuptimi i plotë për anëtarësimin e Kosovës në këtë organizatë. Është parë dhe është vlerësuar nga shumë nga partnerët tanë evropianë si një mundësi që Kosovës t'i fuqizohet subjektiviteti ndërkombëtar dhe relacionet edhe me shtete jonjohëse, po ashtu ka pasur vlerësime për faktin që Kosova është përzgjedhur që të jetë shtet themelues i kësaj organizate dhe jo vetëm një shtet që do anëtarësohet më vonë që ka rëndësi jashtëzakonisht të madhe”, tha Osmani.

Presidentja e Kosovës, Vjosa Osmani në Përballje Podcast Foto: Ridvan Slivova

Osmani theksoi gjithashtu rëndësinë simbolike dhe politike të përzgjedhjes së Kosovës si një nga 20 shtetet themeluese, krahas vendeve me popullsi dhe ekonomi shumë të mëdha.

“Ju i keni parë shumë nga shtetet që ishin aty janë shtete jashtëzakonisht të mëdha, shtete me treqind milionë banorë, shtete me dyqind milionë banorë, shtete me ekonomi të jashtëzakonshme disa prej tyre dhe Kosova të përzgjedhjet ndër njëzet shtete themeluese, kjo tregon vlerësim të jashtëzakonshëm nga ana e Shteteve të Bashkuara të Amerikës”, deklaroi presidentja në “Përballje Podcast”.

Në fund, Presidentja Osmani tha se ky zhvillim ka dërguar një mesazh të fuqishëm në mbarë botën për shtetësinë e Kosovës dhe se rreshtimi me SHBA-të mbetet rruga e duhur dhe se kjo nuk ka rezultuar asnjëherë keq për Kosovën.

“Republika e Kosovës, si shtet sovran i pavarur në mesin e kombeve të lira është storie e përfunduar, nuk ka kthim mbrapa. Dhe i siguroi të gjithë qytetarët e Republikës së Kosovës edhe një herë që rreshtimi ynë me Shtetet e Bashkuara të Amerikës vetëm të mira do i sjell Republikës sonë”, u shpreh Osmani. /Telegrafi/