Fundjava sjell pesë përballje interesante në Albi Mall Superligën e Kosovës, me të gjitha ndeshjet që luhen në orarin e njëjtë dhe me peshë të madhe për nisjen e edicionit pranveror.

Xhiroja e 19-të e Superligës së Kosovës rikthehet këtë fundjavë me duele vendimtare, ku çdo pikë mund të ketë ndikim të drejtpërdrejtë si në garën për titull, ashtu edhe në luftën për mbijetesë.

Të shtunën, më 7 shkurt, Dukagjini pret Prishtinën në stadiumin “18 Qershori” në Klinë, në një takim ku vendasit synojnë të shfrytëzojnë terrenin e tyre, ndërsa kryeqytetasit kërkojnë vazhdimësi dhe rikthim te rezultatet pozitive.

Po në të njëjtën orë, Drenica dhe Llapi përballen në stadiumin “Liman Gegaj” në Malishevë, në një duel direkt mes skuadrave që kërkojnë pikë të mëdha për stabilitet në tabelë dhe largimin nga zona e rrezikut.

Në Ferizaj, skuadra vendase do të matet me Dritën në stadiumin e qytetit, ku mysafirët nga Gjilani hyjnë si favoritë në letër, por Ferizaj pritet të japë maksimumin për të befasuar një nga ekipet më konstante të sezonit.

Të dielën, më 8 shkurt, vëmendja zhvendoset në Gjilan, ku Gjilani pret Ballkanin në stadiumin me bari artificial. Një përballje me aromë derbi, ku kampionët vjeshtor kërkojnë të mbajnë ritmin në krye, ndërsa vendasit synojnë të ndalin furinë e tyre dhe të hynë në garë për pozitat e para.

Xhiroja mbyllet në Malishevë, ku skuadra vendase përballet me Prishtinën e Re në stadiumin “Liman Gegaj”, në një ndeshje që mund të rezultojë vendimtare për objektivat sezonale të të dyja ekipeve.

Me të gjitha ndeshjet që zhvillohen në orën 13:00, Superliga premton një fundjavë të ngjeshur, emocionuese dhe plot tension, ku çdo gabim mund të kushtojë shtrenjtë për vazhdën e edicionit. /Telegrafi/

Portieri Agron Kolaj, do ta vazhdojë pjesën e mbetur të sezonit te SC Gjilani.

Ai është huazuar nga Prishtina, ku këtë sezon kishte mbetur si portier i dytë, pas Altin Gjokajt.

“Sport Club Gjilani dhe FC Prishtina kanë arritur marrëveshje për huazimin e Agron Kolajt. 24 vjeçari vjen nga kryeqyteti si një vlerë e shtuar për ekipin në pjesën e dytë kampionale”.

“Kolaj më parë ka mbrojtur edhe ngjyrat e Besës nga Peja, ekip me të cilën debutoi në elitën e futbollit kosovar dhe pas transferimit te Prishtina arriti në shifrën e 54 paraqitjeve zyrtare në kampionat”.

“SC Gjilani i uron mirëseardhje Agron Kolajt dhe shpreh besimin se kontributi i tij do të jetë i rëndësishëm për skuadrën në vazhdim të sezonit”, thuhet në njoftim.

Gjilani e nis stinorin pranveror nga vendi i gjashtë me 26 pikë. /Telegrafi/

Kryetari i Komunës së Kamenicës, Kadri Rahimaj, ka emëruar ish-deputeten Arta Bajralija në postin e nënkryetares së Komunës.

Me rastin e emërimit, kryetari Rahimaj ka vlerësuar përvojën e saj politike dhe qytetare, duke theksuar se profesionalizmi, energjia dhe ndjenja e lartë e përgjegjësisë që Bajralija ka dëshmuar ndër vite do të jenë një vlerë e shtuar për qeverisjen lokale dhe realizimin e projekteve në shërbim të qytetarëve të Kamenicës.

“Arta Bajralija do të jetë Nënkryetarja e Komunës sonë. Arta vjen në këtë përgjegjësi me një përvojë të pasur politike dhe qytetare. Angazhimi i saj i hershëm si aktiviste e përkushtuar në Lëvizjen VETËVENDOSJE!, si dhe përvoja e fituar si deputete në Kuvendin e Republikës së Kosovës, janë dëshmi e qartë e përkushtimit të saj ndaj interesit publik dhe qeverisjes së ndershme”, ka deklaruar Rahimaj.

Ai ka shtuar se në mandatin e dytë do të vazhdojnë punën e nisur me fokus në projekte konkrete dhe në përmirësimin e shërbimeve për qytetarët, duke theksuar se ky mandat paraqet një mundësi për ta çuar komunën përpara me më shumë energji, bashkëpunim dhe përkushtim.

Në fund, kryetari Rahimaj i ka uruar Artës punë të mbarë dhe suksese në ushtrimin e kësaj detyre të rëndësishme në shërbim të Komunës së Kamenicës. /Telegrafi/

Teatri i Qytetit në Gjilan njofton se pak ditë na ndajnë nga premiera e shfaqjes “KABARE 99”, nën regjinë e Zana Hoxhës, një kabare që sjell në skenë kujtesën kolektive të viteve të para pas luftës.

Sipas njoftimit, “KABARE 99” zhvillohet në një qytet që quhet Prishtinë, në një kohë të trazuar, plot shpresa, absurditete, ëndrra dhe zhgënjime. Shfaqja përdor humorin, muzikën dhe dramaturgjinë për të reflektuar mbi një epokë të vështirë, duke krijuar një hapësirë ku e kaluara dialogon me të tashmen.

“KABARE 99” është bashkëprodhim mes Teatrit të Gjilanit dhe organizatës Artpolis, dhe premiera ka shkaktuar interesim të jashtëzakonshëm të publikut: bileta për datën 5 shkurt janë shitur të gjitha, ndërsa për datat 6 dhe 7 shkurt janë ende disa bileta të disponueshme.

Shfaqja kthehet si një rikthim në shpirtin e teatrit, si vend i rrëfimit, i kujtesës dhe i rezistencës artistike, duke ofruar një eksperiencë të veçantë për publikun e Gjilanit dhe më gjerë. /Telegrafi/

Në episodin më të ri të podcastit “Arena e Yjeve”, vjen analiza e gazetarëve të Telegrafit, të cilët diskutuan gjerësisht për zhvillimet aktuale në futbollin vendor dhe ndërkombëtar. Ky episod realizohet me mbështetjen e sponsorëve zyrtarë Golden Eagle dhe Exfis.

Gazetari Romak Zeqiri ka dhënë një parashikim të qartë për garën e titullit në Superligën e Kosovës, duke vlerësuar situatën e skuadrave dhe faktorët që do të përcaktojnë kampionin e sezonit.

Sipas tij, kampioni në fuqi Drita mbetet favorit kryesor, veçanërisht kur diferenca në renditje nuk është shumë e madhe.

“Kampioni në fuqi gjithmonë është favoriti numër një për me fitu titullin, për më shumë kur është aty lart edhe diferenca nuk është shumë e madhe”.

“Unë e shoh Dritën kampion prapë. Normal jo lehtë, jo mu kry më herët siç u kry vitin e kaluar. Mendoj që deri në fund ka me pas garë”.

“I jap Dritës një përparësi se në rrethin e katërt gjithmonë nëse në rrethin e tretë performon mirë. Në rrethin e katërt është skuadër që e pret në Gjilan, Prishtinën, Ballkanin, Llapin, Gjilanin, Ferizajn, këto janë shumë terrene të vështira për të luajtur si mysafir”.

“Nëse performon mirë në rrethin e tretë, në rrethin e katërt krejt këto ekipe i pret. Prapë Dritën po e shoh kampion, me shumë vështirësi, po fundi fundit vetëm kampioni kujtohet, vështirësitë harrohen”.

“Në Europë, Gjilanin e shoh si skuadër që ka me dalë në Europë edhe Ballkanin sigurisht. Në vend të katërt e shoh Prishtinën”, ka thënë Zeqiri.

Episodin e plotë me gazetarët e Telegrafit mund ta ndiqni në kanalin zyrtar të Telegrafit në YouTube./Telegrafi/

- YouTube www.youtube.com

Në episodin më të ri të podcastit “Arena e Yjeve”, vjen analiza e gazetarëve të Telegrafit, të cilët diskutuan gjerësisht për zhvillimet aktuale në futbollin vendor dhe ndërkombëtar. Ky episod realizohet me mbështetjen e sponsorëve zyrtarë Golden Eagle dhe Exfis.

Gazetari Shkumbin Pireva ka dhënë një parashikim të qartë për garën e titullit në Superligën e Kosovës, duke identifikuar skuadrat që pritet të luftojnë deri në fund për trofeun dhe vendet evropiane.

Në një analizë, Pireva e ka vendosur në qendër të vëmendjes katërshen Ballkani, Prishtina, Drita dhe Gjilani, ndërsa ka bërë edhe një vlerësim të drejtëpërdrejtë për gjendjen e ekipeve.

“Ka me qenë mes tri këtyre skuadrave Ballkanit, Prishtinës edhe Dritës, por mundet me hy edhe Gjilani”.

“Domethënë si i katërt në garë për titull. Këto të katërta sigurt kanë me shku në Evropë. Njëra si fituese e titullit, njëra si fituese e Kupës edhe dy vendet e tjera”.

“Po domethënë katërshja e parë do të jetë kjo padyshim. E kush do bëhet kampion, jam mes Ballkanit dhe Prishtinës, por me shumë mundësi titulli ka me u kthy në Prishtinë”.

“Ka me u kthy në Prishtinë, për faktin se Afrim Tovërlani e ka një moment ku duhet me tregu edhe njëherë veten, pas disa aventurave jo të mira që i ka pasur në disa klube të Superligës”.

“Edhe të gjitha kushtet po besoj që janë plotësu. Prishtinën e kemi parë që ka qenë financiarisht shumë mirë, mos them më së miri, po ka qenë klubi që nuk ka pasur asnjëherë vonesa në gjysmësezonin e parë”, ka thënë Pireva.

Episodin e plotë me gazetarët e Telegrafit mund ta ndiqni në kanalin zyrtar të Telegrafit në YouTube./Telegrafi/

Ndërmarrja Publike Dardana ka filluar furnizimin me ushqim për kafshët e egra në zonat e Vendgjuetisë Kamenicë, në pikat që ato frekuentojnë më së shumti.

Sipas njoftimit, ky aktivitet po realizohet me qëllim të sigurimit të ushqimit të mjaftueshëm për kafshët e egra gjatë kushteve të vështira klimatike, veçanërisht në periudhën e dimrit.

Nga NPL Dardana theksohet se kjo ndërmarrje mbetet e përkushtuar në ruajtjen, menaxhimin dhe mbrojtjen e qëndrueshme të mjedisit dhe faunës së egër, duke kontribuar në mënyrë të vazhdueshme në mirëqenien e biodiversitetit në territorin e Komunës së Kamenicës. /Telegrafi/

Agjencia e Menaxhimit të Emergjencave ka njoftuar se gjatë vërshimeve të fundit kanë intervenuar në 196 raste, nga të cilat janë evakuuar 42 persona. Kjo agjenci ka theksuar se çdo lum është i degraduar dhe duhet të mirëmbahet, derisa ka dhënë edhe rekomandime të detajuara.

Drejtori ekzekutiv i Agjencisë së Menaxhimit të Emergjencave, Shefki Abdullahu gjatë konferencës për media lidhur me situatën e krijuar nga vërshimet e fundit të muajit janar, si dhe për veprimet dhe angazhimet e agjencisë.

“Vërshimet kanë përfshirë disa komuna, i kemi potencuar më së shumti ato komuna të cilat kanë qenë vërshimet më të theksuara dhe këtu janë Malishevë, Gjakovë, Klinë, Junik, Drenas, Skenderaj, Mitrovicë, Suharekë, Gjilan dhe Prishtinë. Ekipet e specializuara të AME-së, njësitë profesionale të zjarrfikësve dhe shpëtimit, Forca e Sigurisë së Kosovës, Policia e Kosovës dhe Shoqata e Kosovës për Kërkim-Shpëtim, kanë realizuar intervenime të shumta duke përfshirë thithje të ujit me pompa të kapacitetit të lartë te objektet me rëndësi të veçantë si KEK-ut, të cilat i posedon AME-ja, kurse njëkohësisht edhe njësitë profesionale të zjarrfikësve dhe shpëtimit, të cilat kanë pompat edhe njësitë e tyre... kemi pasur numri i rasteve të koordinuara kanë qenë 1070 raste. Numri i intervenimeve në vërshime ka qenë 196, thithja e ujit me pompa të kapacitetit të lartë 24, intervenime teknike 63, persona të evakuuar kanë qenë 42”, tha ai.

Ai shtoi se kanë vendosur barriera kundër vërshimeve dhe thasëve në Mitrovicë, në veçanti në lagjen te Ura e Ibrit.

Abdullahu theksoi se mungesa e mirëmbajtjes së lumenjve, deformimi i shtretërve pas luftës dhe hedhja e mbeturinave, kanë rritur ndjeshëm rrezikun e vërshimeve në shumë komuna të Kosovës.

"Hartat e lumenjve të cilët rrezikojnë do t’i kemi në raport, do t’i dërgojmë dhe do t’i keni të gjitha detajet, sepse të gjithë lumenjtë në Kosovë vërshojnë komunat të cilat shpeshherë edhe po përsëriten, domethënë janë plotësisht këta lumenj të cilët nuk janë përmbajtur, nuk janë mirëmbajtur apo shtrati i tyre është deformuar në mënyrë të egër pas luftës, do të thotë rëra që kanë nxjerrë të gjitha ato kompani, por edhe hedhja e mbeturinave në lumenj të lirë, kështu që kanë shkaktuar… çdo lum është i degraduar dhe duhet të mirëmbahet, të pastrohet, është primare që të sigurohet jeta e qytetarëve, ambienti, prona, ku njëkohësisht edhe për gjallesat, për secilin, duhet t’i kemi ato lumenj, që ne si i kemi pikërisht për këto arsye të ndotjes dhe të degradimit të lumenjve", theksoi Abdullahu.

“Nga analiza dhe mësimet e nxjerra, kemi nxjerrë rekomandime. Pastrimi dhe mirëmbajtja e rregullt e shtretërve të lumenjve, monitorimi i vazhdueshëm i zonave me rrezik të lartë, hartimi dhe zbatimi i planeve lokale për menaxhimin e rrezikut nga fatkeqësitë natyrore, ndarja e qartë e përgjegjësive ndërmjet nivelit lokal dhe atij qendror, ndalimi i ndërtimeve në zonat e rrezikuara nga vërshimet dhe forcimi i inspektimeve ndërtimore, rritja e kapaciteteve të reagimit në emergjencë përmes trajnimeve të rregullta dhe pajisjeve adekuate të strukturave lokale, vetëdijesimi i qytetarëve për rreziqet dhe fatkeqësitë natyrore dhe forcimi i sistemit për paralajmërim të hershëm”, tha ai. /KP/

Komuna e Kamenicës, përmes Drejtorisë për Bujqësi, Pylltari dhe Zhvillim Rural, ka njoftuar se sezoni i gjuetisë në territorin e kësaj komune do të mbyllet më 31 janar 2026.

Sipas njoftimit, vendimi është marrë në bazë të Ligjit për Gjueti Nr. 02/L-53 dhe ka për qëllim mbrojtjen e faunës së egër, si dhe ruajtjen e ekuilibrit natyror.

Me mbylljen e sezonit, pas datës 31 janar 2026 ndalohet rreptësisht çdo aktivitet i gjuetisë në territorin e Komunës së Kamenicës.

Ky njoftim është i obligueshëm për të gjithë gjuetarët, shoqatat e gjuetarëve dhe shfrytëzuesit e vendgjuetive në këtë komunë.

Nga Drejtoria për Bujqësi, Pylltari dhe Zhvillim Rural u bëhet thirrje të gjitha palëve që të respektojnë këtë vendim, në funksion të mbrojtjes së biodiversitetit dhe zbatimit të legjislacionit në fuqi. /Telegrafi/

Në Gjilan është përmbyllur edicioni i 35-të i Festivalit të Dramës Shqipe “Talia e Flakës 2026”, me shfaqjen e natës së pestë “Gërdia”, prodhim i Teatrit Kombëtar të Kosovës.

Shfaqja “Gërdia”, një dramë psikologjike intime, trajton krizën e brendshme të një burri, fajin, heshtjen dhe frikën nga ekspozimi emocional, duke hapur tema mbi burrërinë, ndjenjat e shtypura dhe rutinën e jetës pa kuptim. Konflikti dramatik lidhet me një ngjarje traumatike të fëmijërisë së kryepersonazhit, e cila shpaloset gradualisht deri në qartësimin final të veprës.

Produksioni, i cili më herët është vlerësuar si tekst fitues në Konkursin e Dramës Kombëtare “Katarina Josipi”, u prezantua në konkurrencën zyrtare të festivalit dhe u prit pozitivisht nga publiku gjilanas. Jehona e festivalit, i konsideruar unik për nga struktura organizative dhe përmbajtësore në dramaturgjinë kombëtare, si dhe fakti që shfaqja mban vulën e Teatrit Kombëtar të Kosovës, sollën në sallë artdashës nga qytete të ndryshme shqiptare.

Interesimi i publikut ishte i kënaqshëm edhe në natën përmbyllëse, duke pasur parasysh se “Gërdia”, me autorësi të dyfishtë të Asdrit Kabashit, është një realizim i ri dhe në Gjilan u prezantua në fazën e hershme të rrugëtimit të saj artistik. Në sallë ishin të pranishëm artdashës nga Prishtina, Gjilani, Podujeva, Ferizaji, Lipjani, Dibra dhe qytete të tjera.

Vlerësimet kritike për shfaqjen ishin të balancuara, ndërsa loja e aktorëve u veçua si një nga pikat më të forta të realizimit, me theks të veçantë në interpretimin e aktorit Bujar Ahmeti. Dramaturgu Agron Gërguri e cilësoi veprën si “një ndërtim mbi fotografinë e depresionit kolektiv, të personifikuar përmes një personazhi”, duke theksuar fuqinë e ansamblit aktorial. Ndërkohë, kritiku Shemsi Doda vlerësoi se shfaqja ndërtohet mbi një narracion të paqëndrueshëm, ku kufiri mes reales, ëndrrës dhe makthit shpesh mbetet i paqartë.

Me shfaqjen “Gërdia” është ulur perdja e edicionit të 35-të të Festivalit të Dramës “Talia e Flakës”. Vlerësimi i shfaqjeve pjesëmarrëse i mbetet jurisë profesionale në përbërje: Ali Demi, Tringa Hasani dhe Ilir Bokshi, të cilët do të ndajnë çmimet në gjashtë kategori, përfshirë shfaqjen më të mirë, regjinë, tekstin dhe interpretimet aktoriale.

Pas përmbylljes së festivalit të dramës, Manifestimi “Flaka e Janarit 2026” vazhdon me aktivitete në fushën e arteve muzikore dhe letrare, deri më 31 janar, kur pritet të mbyllet zyrtarisht me ndarjen e çmimeve në katër shtyllat kryesore artistike. /Telegrafi/

Festivali i Dramës Origjinale Shqipe “Talia e Flakës 2026” ka vijuar në Gjilan me natën e katërt të programit, ku u shfaq drama “God Bless America” me tekst dhe regji të Fatos Berishës, e prezantuar jashtë konkurrencës.

Edhe pse shfaqja kishte pasur repriza të mëhershme, salla ishte e mbushur, duke dëshmuar interesimin e madh të publikut për këtë realizim skenik. Vepra rrëfen historinë e katër shokëve të cilët, pas një trajnimi nga një menaxher biznesi dhe udhëzimeve nga kisha, nisen nëpër shtete të Amerikës për të shitur Bibla dhe materiale religjioze. Rrugëtimi i tyre shoqërohet me situata komike dhe dramatike, ku dështimet e njëpasnjëshme, të kushtëzuara nga bindjet fetare, qëndrimet e bashkëshortes apo rrethanat shoqërore, ndërtojnë kulmin dramaturgjik të shfaqjes.

Në epilog, një akt spontan solidarizimi gjatë një udhëtimi personal shpalos ironinë e fatit dhe përcjell mesazhin se kuptimi njerëzor shpesh shfaqet përtej interesit material dhe kalkulimeve pragmatike.

Ekipi i aktorëve, falë përvojës së tyre profesionale, ka ruajtur një komunikim të vazhdueshëm me publikun, duke e ngritur nivelin interpretativ të shfaqjes. Në këtë realizim skenik interpretuan Avni Shkodra, Kushtrim Qerimi, Gani Rrahmani, Ali Demi, Aurita Agushi, Alban Shahiqi, Artan Selimi, Bashkim Nexhipi, Safete Mustafa-Baftiu, Mejreme Berisha, Tringa Hasani dhe Florent Salihu.

Edhe në këtë natë nuk mungoi prania e zyrtarëve institucionalë, përfshirë kryesuesen e Kuvendit Komunal të Gjilanit, Krenare Latifi – Kqiku. Gjatë ditëve të kaluara, festivalin e kanë vizituar edhe përfaqësues të tjerë institucionalë, në mesin e tyre ministri i Kulturës, Rinisë dhe Sportit, Hajrullah Çeku, duke konfirmuar mbështetjen institucionale për këtë manifestim kulturor.

Nata përmbyllëse e “Talia e Flakës 2026” mbahet më 28 janar, kur publiku do të ndjekë shfaqjen “Gërrdia” nga Trupa e Teatrit Kombëtar të Kosovës, me autorësi dhe regji të Astrit Kabashit. Në skenë do të interpretojnë Bujar Ahmeti, Maylinda Kosumovic dhe Rebeka Qena, me skenografi nga Arben Shala, kostumografi nga Yllka Brada dhe muzikë nga Memli Kelmendi.

Programi i manifestimit “Flaka e janarit 2026” vijon më 29 janar me “Yjet e Flakës”, festivalin e këngëve për fëmijë dhe koncertin kushtuar këngëve të Jusuf Gërvallës, ndërsa më 30 janar mbahet “Fest Flaka”, festivali i këngës shqipe. Aktivitetet letrare dhe enigmatike janë paraparë për 31 janar, ndërsa manifestimi përmbyllet me Gala Mbrëmjen, ku do të shpallen fituesit në të gjitha kategoritë artistike dhe krijuese. /Telegrafi/

Komuna e Kamenicës njofton se Qendra për Aftësim Profesional – QAP Gjilan, në kuadër të Agjencisë së Punësimit të Republikës së Kosovës / MFPT, ofron kurse profesionale intensive, të certifikuara dhe falas, të përshtatura sipas kërkesave të tregut të punës.

Pjesëmarrësve u mundësohet:

• Pjesëmarrje pa pagesë
• Pjesëmarrje për persona të papunë
• Mundësi reale për integrim në tregun e punës

Regjistrimi mund të bëhet përmes Zyrave të Punësimit në Gjilan, Kamenicë dhe Viti.

Për më shumë informacion, qytetarët mund të kontaktojnë Zyrën e Punësimit përkatëse. /Telegrafi/

Pas reshjeve të pandërprera të shiut gjatë natës, situata në Komunën e Vitisë paraqitet stabile dhe të gjitha rrugët janë të kalueshme, megjithëse autoritetet apelojnë për kujdes të shtuar në disa segmente të rrugëve, veçanërisht në fshatin Ramnishtë dhe në rrugën Skifteraj–Radivojc.

U.d. i Drejtorisë për Shërbime Publike dhe Emergjencë, Naser Haziri, ka bërë të ditur se Njësia e Zjarrfikësve ndodhet vazhdimisht në terren dhe, në bashkëpunim me stafin e drejtorisë, po ndërmerr masa për të parandaluar përkeqësimin e situatës.

“Intervenimi është kryer edhe në rrugën Viti–Letnicë, ku për shkak të reshjeve kishte ndodhur shembja e dheut. Pas ndërhyrjes së shpejtë, rruga është e qarkullueshme dhe situata është nën kontroll”, ka theksuar Haziri.

Autoritetet komunale bëjnë thirrje për kujdes të shtuar gjatë lëvizjes, veçanërisht në zonat ku uji ka depërtuar në rrugë, ndërsa ekipet kompetente mbeten në gatishmëri për çdo situatë eventuale. /Telegrafi/

Në mbrëmjen e tretë të Festivalit të Dramës Origjinale Shqipe “Talia e Flakës së Janarit 2026”, publiku gjilanas pati rastin të ndjekë shfaqjen “Fluturimi mbi Teatrin e Kosovës”, prodhim i Teatrit të Ferizajt “Adriana”, me tekst të dramaturgut Jeton Neziraj dhe regji të Agon Myftarit.

Shfaqja ngjalli interesim të madh të artdashësve dhe u mirëprit në këtë ngjarje të rëndësishme kulturore, e cila po organizohet nga Komuna e Gjilanit, Drejtoria për Kulturë dhe OJQ “Varg e Vi”. Në sallë ishte e pranishme edhe kryesuesja e Kuvendit Komunal të Gjilanit, Krenare Latifi – Kqiku.

“Fluturimi mbi Teatrin e Kosovës” është një vepër që ka një jetë të gjatë skenike, pasi është interpretuar edhe nga teatro të tjera dhe ka lënë gjurmë jo vetëm në Kosovë, por edhe jashtë saj. Shfaqja trajton një prej momenteve më të rëndësishme të historisë së re të Kosovës, periudhën para shpalljes së pavarësisë, kur një trupë teatrore përballet me presion të madh politik dhe institucional për të realizuar një shfaqje solemne, ndonëse gjithçka rreth datës, simbolikës dhe përmbajtjes ishte ende e paqartë.

Përmes situatave absurde dhe komike, shfaqja pasqyron përpjekjet e trupës për të zbuluar sekretin e datës së shpalljes së pavarësisë dhe për të siguruar tekstin e fjalimit të kryeministrit, ndërkohë që realiteti i teatrit mbetet i rëndë dhe i mbushur me vështirësi. Një linjë tjetër narrative lidhet me personazhin e punëtorit teknik, i cili përpiqet të realizojë ëndrrën e tij për të fluturuar dhe për të lobuar për njohjen e Kosovës, por që përfundon në mënyrë simbolike mbi Teatrin e Kosovës.

Kjo shfaqje-komedi politike dhe satirike, përmes ironisë dhe humorit, vendos në qendër të kritikës politikën e kohës, raportin e saj me artin, shoqërinë e pasluftës, korrupsionin dhe rolin e misioneve ndërkombëtare në Kosovë, duke krijuar një dialog të drejtpërdrejtë mes artit dhe realitetit shoqëror.

Në role u paraqitën aktorët e Teatrit “Adriana” nga Ferizaj, Blin Mani, Nexhat Xhokli, Dardane Mehmeti, Sherif Bega dhe Elton Tahiri. Skenografia u realizua nga Mentor U. Berisha, kostumet nga Eleonora Gagica, muzika nga Lindita Isufi, ndërsa ndriçimi nga Hajrullah Elezi. Në realizimin e shfaqjes kontribuuan edhe Avni Ajvazi si mjeshtër skene, Naim Berisha në zërim dhe ton, Krenare Hajdari në grim, Florim Hashani në rekuizitë dhe teknikë skene bashkë me Valmir Hashanin, dizajni grafik nga Ngadhënjim Ismani dhe drejtori i Teatrit, Fatmir Hyseni.

Festivali “Talia e Flakës së Janarit 2026” do të vazhdojë në mbrëmjen e katërt me shfaqjen “God Bless America” nga Teatri i Gjilanit, me autor dhe regjisor Fatos Berisha. /Telegrafi/

Spitali i Përgjithshëm i Gjilanit ka realizuar gjithsej 150 mijë e 68 shërbime specialistike gjatë periudhës janar–dhjetor 2025, bëhet e ditur në njoftimin zyrtar të këtij institucioni shëndetësor.

Sipas të dhënave, në ambulancat specialistike të spitalit gjatë vitit 2025 kanë marrë shërbime shëndetësore 150 mijë e 68 pacientë, duke dëshmuar fluks të lartë dhe angazhim të vazhdueshëm të stafit mjekësor.

Po ashtu, gjatë kësaj periudhe janë trajtuar në repartet spitalore gjithsej 14 mijë e 72 pacientë të shtrirë, në të gjitha shërbimet e spitalit.

Nga Spitali i Përgjithshëm i Gjilanit theksohet se angazhimi për ofrimin e shërbimeve shëndetësore cilësore dhe të sigurta mbetet i pandërprerë, ndërsa shëndeti i pacientëve vazhdon të jetë prioritet kryesor.

Institucioni njofton se do të shfrytëzojë të gjitha kapacitetet në dispozicion për t’u dalë në ndihmë pacientëve që kanë nevojë për trajtim mjekësor, duke ofruar shërbime shëndetësore pa ndërprerje, 24 orë në ditë, shtatë ditë në javë. /Telegrafi/

Komuna e Kamenicës ka njoftuar qytetarët se, sipas parashikimeve të Institutit Hidrometeorologjik të Kosovës, duke filluar nga e marta, 27 janar 2026, nga ora 12:00, priten reshje intensive shiu që mund të shkaktojnë rritje të nivelit të ujit dhe vërshime lokale.

Sipas këtij njoftimi, zonat më të rrezikuara janë ato pranë lumit Kriva Reka, i njohur edhe si Lumi i Shtrembër, në pellgun e Moravës së Binçës. Instituti Hidrometeorologjik ka vlerësuar nivelin e rrezikut si nivel 2, që nënkupton rrezik të moderuar.

Me këtë rast, Komuna e Kamenicës u ka bërë thirrje qytetarëve që të tregojnë kujdes të shtuar, veçanërisht banorëve që jetojnë pranë rrjedhave ujore dhe zonave të ulëta.

Po ashtu, është bërë e ditur se shërbimet komunale janë në gjendje gatishmërie dhe do të reagojnë në kohë për çdo situatë eventuale që mund të paraqitet si pasojë e kushteve të pafavorshme atmosferike. /Telegrafi/

Me shfaqjen Dramë për të qesh nga Teatri i Tetovës, në Gjilan është hapur edicioni i 35-të i festivalit të dramës shqipe Talia e Flakës 2026, nën patronatin e kryetarit të Komunës së Gjilanit, Alban Hyseni, dhe me përkujdesjen e Drejtorisë për Kulturë, Rini dhe Sport, në kuadër të manifestimit tradicional mbarëkombëtar Flaka e Janarit.

Festivali, si një nga shtyllat kryesore të Flakës së Janarit, ka ngjallur interesim të madh të artistëve dhe artdashësve nga hapësira shqiptare. Në hapje morën pjesë zyrtarë institucionalë, drejtues të Fakultetit të Arteve, si dhe artistë nga Maqedonia e Veriut dhe Lugina e Preshevës.

Programi i festivalit u prezantua nga aktoret gjilanase Mejreme Berisha, Emine Toska, Aurita Agushi dhe Safete Mustafa, me ftesë të organizatorit Migjen Fazliu nga Varg e Vi. Gjatë periudhës 24–28 janar, dhjetëra artistë do të prezantojnë shfaqje sipas këtij programi:

• 24 janar: Dramë për të qesh – Teatri i Tetovës
• 25 janar: Sytë e ujkut – Doruntina Basha, regji Kushtrim Koliqi, prodhim i Integra
• 26 janar: Fluturimi mbi Teatrin e Kosovës – Teatri Adriana Ferizaj, tekst Jeton Neziraj, regji Agon Myftari
• 27 janar: God Bless America – Teatri i Gjilanit, autor dhe regjisor Fatos Berisha
• 28 janar: Gërdia – Teatri Kombëtar i Kosovës, tekst dhe regji Astrit Kabashi, fituese e Konkursit të Dramës Shqipe Katarina Josipi 2025

Çmimet e sivjetme përfshijnë gjashtë kategori teknike, koreografi, skenografi, kostumografi, dizajn ndriçimi dhe kompozim muzikor, si dhe pesë çmime kryesore: aktori më i mirë, aktorja më e mirë, regjia më e mirë, teksti më i mirë dhe çmimi kryesor për shfaqjen më të mirë. Juria e festivalit përbëhet nga Ali Demi, Tringa Hasani dhe Ilir Bokshi.

Hapja u zhvillua pa ceremoni të ekzagjeruara, duke i lënë hapësirë prezantimit skenik të trupës së Tetovës, me aktorët Arsim Kaleci, She Ilazi, Petrit Neziri, Ermal Çanga, Arta Zejneli, Elmir Sejfullai, Sami Mustafa, Abdulla Osmani, Bekim Jahiu, Linda Shabani dhe Hasim Memishi Sopi.

Shfaqja Dramë për të qesh sjell një vizion postmodern të dramaturgut Sulejman Rushiti, ku personazhe të dramaturgjisë së Shekspirit rimodelohen në karaktere bashkëkohore, duke krijuar një paralelizëm mes teatrit klasik dhe absurditetit të përditshëm shoqëror e politik. Figura nga Hamleti, Makbethi, Othello, Mbreti Lir, Jul Cesari, Romeo dhe Zhulieta dhe Ëndrra e një nate vere ndërthuren me tipologji aktuale, duke reflektuar marrëdhëniet mes artit dhe pushtetit.

Manifestimi Flaka e Janarit 2026 do të vazhdojë deri më 31 janar me aktivitete të shumta kulturore në artet letrare dhe muzikore. Gala mbrëmja festive dhe ndarja e çmimeve do të mbahet më 31 janar në resortin Vali Ranch, ku do të shpallen fituesit në katër shtyllat kryesore: Arte Letrare, Arte Skenike, Arte Pamore dhe Arte Muzikore, përfshirë poezinë dhe tregimet fituese në Orën e Madhe Letrare dhe festivalin e këngës Fest Flaka 2026. /Telegrafi/

Komuna e Kamenicës njofton konsumatorët në zonat e Stacionit të Pompimit Bahqja dhe SP Berivojcë se uji nga rrjeti i ujësjellësit aktualisht nuk është i përshtatshëm për pije.

Si pasojë e rritjes së vlerës së nitrateve, parametrat kimikë të ujit në këto zona janë ndryshuar, duke bërë që uji të mos i plotësojë standardet për ujë të pijshëm.

Në këtë kontekst, qytetarët nuk duhet ta përdorin ujin për konsum deri në një njoftim të ri, pas normalizimit të gjendjes dhe konfirmimit të cilësisë së ujit. Uji mund të përdoret vetëm për nevoja teknike, si larje dhe sanitare.

Komuna falënderon qytetarët për mirëkuptimin dhe bashkëpunimin. /Telegrafi/

Komuna e Gjilanit ka njoftuar se është shtyrë afati për dorëzimin e aplikacioneve për legalizimin e ndërtimeve pa leje.

Sipas njoftimit nga Drejtoria për Urbanizëm, Planifikim dhe Mbrojtje të Mjedisit, Ministria e Mjedisit, Planifikimit Hapësinor dhe Infrastrukturës, më 16 janar 2026, ka marrë vendim me numër 214/2026 për vazhdimin e afatit të aplikimit për legalizim, për një periudhë prej 12 muajsh nga data e nënshkrimit të vendimit nga ministri në detyrë i MMPHI.

Ushtruesi i detyrës së drejtorit për Urbanizëm, Planifikim dhe Mbrojtje të Mjedisit në Komunën e Gjilanit, Ali Arifi, ka bërë të ditur se ky vendim u jep mundësi shtesë pronarëve të objekteve të ndërtuara pa leje që të kompletojnë dhe dorëzojnë aplikacionet e tyre brenda afatit të ri të përcaktuar.

Me këtë rast, Komuna e Gjilanit u bën thirrje të gjithë pronarëve të objekteve pa leje që ta shfrytëzojnë këtë mundësi dhe të aplikojnë për legalizim brenda afatit të lejuar ligjor.

Informata shtesë lidhur me procedurat e aplikimit mund të gjenden në faqen zyrtare të Komunës së Gjilanit. /Telegrafi/

Komuna e Gjilanit ka njoftuar se edhe gjatë këtij viti do të vazhdojë subvencionimin e qirasë për familjet që nuk kanë banesë apo shtëpi në pronësi dhe gjenden në gjendje të rëndë ekonomike.

Drejtoria e Shëndetësisë dhe e Mirëqenies Sociale ka hapur thirrjen për aplikim, e cila do të jetë e hapur deri më 30 janar 2026. Të drejtë aplikimi kanë vetëm familjet rezidente në Komunën e Gjilanit që plotësojnë kriteret e nevojës ekonomike.

Kryetari i Komunës, Alban Hyseni, tha se subvencionimi i qirasë është njëra prej politikave që vazhdohet edhe në mandatin e dytë.

“Njëra prej politikave të cilat i kemi ndjekur gjatë mandatit të parë, po e vazhdojmë edhe në mandatin e dytë. 163 mijë euro i kemi financuar në mandatin e parë dhe këtë mbështetje po e vazhdojmë edhe gjatë këtij mandati”, deklaroi Hyseni.

Ai shtoi se tash është mundësia për të gjithë ata që kanë nevojë për mbështetje për banim të aplikojnë dhe bëri thirrje që të mos vonohen, duke vënë në dukje se afati i aplikimit po afrohet.

Për më shumë detaje rreth procedurës së aplikimit dhe kriteret e pranueshmërisë, qytetarët mund të vizitojnë faqen zyrtare të Komunës së Gjilanit. /Telegrafi/