Arbnore Beqiraj është emëruar Kryesuese e Kuvendit Komunal të Kamenicës, duke u bërë gruaja e parë që udhëheq legjislativin komunal.
Ajo ka qenë edhe gruaja më e votuar në zgjedhjet lokale nga të gjitha partitë politike për dy mandate radhazi.
Kryetari i Komunës, Kadri Rahimaj, ka theksuar se përvoja profesionale dhe angazhimi politik e bëjnë Beqirajn një zgjedhje të denjë për këtë rol të rëndësishëm, përcjell Telegrafi.
“Me këtë pozicion të ri, Arbnorja pritet të jetë zë i fuqishëm i qytetarëve dhe garantuese e funksionimit demokratik të Kuvendit Komunal, duke hapur rrugë për një kapitull të ri të përgjegjshmërisë dhe bashkëpunimit institucional në Kamenicë”, ka shkruar Rahimaj në njoftimin e tij.
Emërimi i saj shënon një moment historik për Kamenicën dhe urojmë që përvoja dhe angazhimi i saj të kontribuojnë në realizimin e projekteve të mëdha dhe në avancimin e qeverisjes lokale. /Telegrafi/
Kryetari i Komunës së Kamenicës, Kadri Rahimaj, ka nisur ditën duke vizituar familjet përfitues të radhës të programit BabyBOX, një iniciativë që mbështet familjet me foshnja të reja.
“Edhe sot kemi nisur ditën me buzëqeshje, sepse çdo kuti BabyBOX shkon drejt një familjeje që sapo është rritur me një mrekulli të vogël,” tha kryetari Rahimaj.
Ky edicion i BabyBOX vjen me një surprizë të veçantë: përveç artikujve bazë për foshnjat, kutitë përmbajnë edhe baby monitor, një mjet që ndihmon prindërit të kenë më të lehtë kujdesin për të vegjlit në çdo moment.
“Investimi në familje është investim në të ardhmen,” theksoi Rahimaj, duke nënvizuar rëndësinë e mbështetjes ndaj prindërve dhe fëmijëve në fillimet e tyre.
Programi BabyBOX, i cili ka për qëllim të ofrojë ndihmë praktike dhe të përmirësojë mirëqenien e familjeve, vazhdon të sjellë gëzim dhe mbështetje konkrete për komunitetin e Kamenicës. /Telegrafi/
Komuna e Kamenicës ka njoftuar qytetarët e prekur nga vërshimet e fundit që të paraqiten për evidentimin e dëmeve materiale.
Sipas njoftimit, qytetarët duhet të dorëzojnë kërkesën e tyre në Qendrën për Shërbime me Qytetarë, duke specifikuar qartë dëmet e shkaktuara nga reshjet.
Për këtë proces, është formuar një komision i cili do të shqyrtojë të gjitha kërkesat dhe do të përgatisë një raport përmbledhës për vlerësimin e dëmeve, përcjell Telegrafi.
Raporti më pas i dorëzohet Kryetarit të Komunës për shqyrtim.
Pas fazës komuale, raporti procedohet në Asamblenë Komunale për miratim dhe më pas dërgohet në nivel qendror, ku merret vendimi për ndarjen e mjeteve financiare për sanimin e dëmeve të shkaktuara nga vërshimet. /Telegrafi/
Komuna e Kamenicës ka publikuar listën përfundimtare të studentëve përfitues të bursës komunale për vitin akademik 2025/2026.
Lista, e aprovuar nga komisioni përkatës pas trajtimit të të gjitha aplikimeve dhe ankesave, përfshin studentët që kanë plotësuar kriteret e rregullta të konkursit të hapur më herët.
Sipas dokumentit zyrtar, bursa prej 500 eurosh u ndahet studentëve të renditur si përfitues në bazë të sistemit të pikëzimit, i cili përfshin: notën mesatare, statusin social, kategoritë e dala nga lufta, kushtet familjare, drejtimet deficitarë dhe kritere të tjera të përcaktuara, raporton Telegrafi.
Përzgjedhja është bërë duke respektuar plotësisht rregulloren për bursat komunale, ndërsa komuna ka theksuar se dokumenti i publikuar paraqet listën finale të studentëve që do të mbështeten financiarisht për këtë vit akademik.
Komuna e Kamenicës falënderon të gjithë studentët për aplikimet dhe fton përfituesit të përcjellin njoftimet e radhës për procedurat e marrjes së bursës. /Telegrafi/
Komuna e Kamenicës ka publikuar listën preliminare të studentëve përfitues të bursës komunale për vitin akademik 2025–2026.
Në njoftimin zyrtar thuhet se lista është bërë publike pas shqyrtimit të aplikacioneve nga komisioni përkatës dhe përfshin emrat e studentëve që kanë plotësuar kriteret e përcaktuara në thirrjen për aplikim, përcjell Telegrafi.
Të gjithë kandidatët kanë mundësi të paraqesin ankesat e tyre brenda afatit të përcaktuar nga komuna, përpara se të shpallet lista përfundimtare e përfituesve.
Ky program bursash është pjesë e përpjekjeve të Komunës së Kamenicës për të mbështetur arsimimin e lartë dhe për të lehtësuar barrën financiare të studentëve nga kjo komunë. /Telegrafi/
Komuna e Kamenicës ka shpallur Thirrjen Publike për subvencionimin e prindërve me “Baby Box” – pako ndihmëse që përmban rroba dhe produkte të rëndësishme për foshnje dhe nënat e reja.
Kjo nismë është pjesë e politikave komunale për përmirësimin e mirëqenies familjare, me qëllim mbështetjen e nënave, foshnjave dhe familjeve të reja në ditët dhe javët e para pas lindjes.
Sipas njoftimit zyrtar, programi “Baby Box” synon të ofrojë ndihmë materiale për gratë shtatzëna dhe lehonat, duke kontribuar në krijimin e kushteve më të mira për jetën e foshnjës dhe përmirësimin e kujdesit prindëror.
Qëllimi i subvencionit
Pakoja “Baby Box” përmban artikuj bazë për kujdesin ndaj foshnjës dhe nënës, të cilat ndihmojnë prindërit në ditët e para të jetës së fëmijës. Në përbërjen e saj përfshihen: Rroba për foshnjën e porsalindur; produkte për kujdesin dhe higjienën e foshnjës; produkte për kujdesin e nënës pas lindjes.
Kriteret e aplikimit
Për të përfituar nga ky subvencion, prindërit duhet të jenë: Qytetarë të Republikës së Kosovës; banorë të Komunës së Kamenicës; në rastin e grave shtatzëna, shtatzënia duhet të jetë nga java e 27-të e tutje; në rastin e lehonave, periudha duhet të jetë deri në 40 ditë pas lindjes së foshnjës.
Dokumentacioni i nevojshëm
Aplikuesit duhet të dorëzojnë këto dokumente:Kopje të letërnjoftimit për të dy prindërit; certifikatën e vendbanimit për të dy prindërit; deklaratën e bashkësisë familjare; raportin mjekësor nga mjeku specialist/ gjinekolog (për gratë shtatzëna); ekstraktin e lindjes për foshnjën (për lehonat).
Afati dhe mënyra e aplikimit
Thirrja është e hapur pa afat të caktuar kohor, deri në përfundimin e buxhetit të parashikuar për këtë program.
Aplikimet pranohen në Qendrën për Shërbime me Qytetarët, në objektin e Komunës së Kamenicës, gjatë orarit zyrtar të punës.
Pas shqyrtimit të dokumentacionit nga Komisioni Vlerësues, përfituesit do të njoftohen zyrtarisht për mënyrën e marrjes së pakos “Baby Box”.
Kryetari i Komunës së Kamenicës, Kadri Rahimaj, ka nënshkruar njoftimin, duke theksuar përkushtimin e komunës për mbështetje të vazhdueshme ndaj familjeve të reja dhe përmirësimin e mirëqenies së nënave dhe foshnjave. /Telegrafi/
Një gjest i rrallë human e përplot emocion është realizuar në Komunën e Kamenicës, ku një autoambulancë e re është blerë dhe do të mbajë emrin e drejtoreshës së ndjerë të Shëndetësisë, Greta Kryeziu.
Sipas njoftimit të komunës, mjetet për blerjen e autoambulancës janë siguruar nga fondet që ishin mbledhur për trajtimin mjekësor të Gretës, e cila fatkeqësisht humbi betejën me sëmundjen e saj.
Kryetari i Komunës së Kamenicës, Kadri Rahimaj, tha se dashuria dhe respekti i qytetarëve për Gretën janë shndërruar në një vepër të përhershme që do të shërbejë për shpëtimin e jetëve njerëzore.
“Dashuria e njerëzve për Gretën nuk u shua, por u shndërrua në vepër që do të shërbejë për jetën. Kjo autoambulancë do të mbajë përjetësisht emrin Greta Kryeziu – vajzës së mirë, profesionistes së përkushtuar dhe shpirtit të pastër që la gjurmë në zemrat tona”, tha Rahimaj.
Sipas tij, autoambulanca e re do të shërbejë për banorët e Roganës, Hodonocit, Muçivërcit, Shipashnicës, Karaqevës dhe zonave përreth, duke përmirësuar ndjeshëm qasjen në shërbimet emergjente shëndetësore.
Iniciativa u realizua në marrëveshje me familjen e drejtoreshës së ndjerë dhe me ndihmën e mikut të komunës, Vehap Zuka, i cili kishte udhëhequr fushatën humanitare për mbledhjen e fondeve.
Kryetari Rahimaj shprehu mirënjohje të veçantë për të gjithë qytetarët, miqtë dhe donatorët që kontribuan në këtë nismë humane, duke veçuar edhe respektin ndaj familjes Kryeziu për bashkëpunimin dhe bujarinë e treguar.
“Faleminderit nga zemra të gjithë bashkëqytetarëve dhe njerëzve të mirë që e bënë të mundur këtë vepër humane. Mbi të gjitha, faleminderit përzemërsisht familjes së drejtoreshës Greta, që tregoi bujari dhe korrektësi ndaj donatorëve. Z. Basri, keni nderuar familjen dhe qytetin me këtë veprim”, u shpreh Rahimaj. /Telegrafi/
Komuna e Kamenicës ka njoftuar se sezoni i gjuetisë do të hapet më datë 2 nëntor 2025, ndërsa gjuetarët e interesuar mund të pajisen me dokumentacionin e nevojshëm duke filluar nga 29 tetori 2025.
Sipas njoftimit zyrtar, gjuetarët duhet të paraqiten në zyrën e ndërmarrjes përkatëse për të kompletuar procedurat ligjore para fillimit të sezonit.
Komuna ka apeluar tek të gjithë pjesëmarrësit që të respektojnë rregullat dhe ligjet në fuqi, si dhe të kujdesen për ruajtjen e faunës dhe mjedisit natyror gjatë zhvillimit të aktiviteteve të gjuetisë. /Telegrafi/
Drejtoria e Arsimit në Komunën e Kamenicës ka shpallur konkursin për ndarjen e bursave për studentët e komunës për vitin akademik 2025–2026.
Sipas njoftimit zyrtar, përfitues të bursave mund të jenë studentët e rregullt të regjistruar në Universitetin “Kadri Zeka” në Gjilan, si dhe studentët e rregullt të universiteteve publike të Republikës së Kosovës, duke përjashtuar ata që ndjekin studime pasuniversitare (master apo doktoratë), raporton Telegrafi.
Ndër kriteret kryesore për përfitim përfshihen:
Të jenë studentë të vitit të dytë ose më lart;
Të mos jenë përsëritës të vitit akademik;
Të jenë banorë të Komunës së Kamenicës.
Pikë të veçanta do të vlerësohen për notën mesatare, statusin social, kategoritë e veçanta si studentët pa prindër, me nevoja të veçanta, apo pjesëtarë të familjeve të dala nga lufta.
Dokumentet e nevojshme për aplikim duhet të dorëzohen në Qendrën e Shërbimit për Qytetarë në objektin e komunës, brenda 15 ditëve nga data e publikimit të konkursit.
Formularët e aplikimit dhe detajet e plota mbi kriteret janë të publikuara në faqen zyrtare të komunës: http://kk.rks-gov.net/kamenice.
Komuna ka bërë të ditur se përfitimi i bursave do të varet nga buxheti i Drejtorisë së Arsimit dhe numri i aplikimeve të pranueshme. /Telegrafi/
Ministria e Kulturës, Rinisë dhe Sportit njofton se punimet për ndërtimin e Stadiumit të Atletikës në Kamenicë, i vetmi i këtij lloji në Kosovë, vazhdojnë me ritme të shpejta.
Ky projekt do të ofrojë kushte moderne dhe bashkëkohore për atletët dhe komunitetin sportiv të vendit, përcjell Telegrafi.
Sipas njoftimit, disa nga objektet kryesore të stadiumit janë përfunduar, ndërsa aktualisht po punohet në fasadim, rregullimin e brendshëm dhe ndërtimin e tribunave.
Ministria thekson se punimet po ecin sipas planit të parashikuar, duke siguruar që stadiumi të jetë gati për të ofruar standarde të larta sportive dhe infrastrukturore.
Ky stadium do të shërbejë si qendër për stërvitje dhe gara të atletikës, duke kontribuar në zhvillimin e sportit në Kosovë dhe mbështetur atletët e rinj në arritjen e rezultateve të larta. /Telegrafi/
Kompania Rajonale e Ujësjellësit “Hidromorava” në Gjilan ka njoftuar për ndërprerje të përkohshme të furnizimit me ujë të pijes në fshatin Koretin të komunës së Kamenicës, përcjell Telegrafi.
Sipas njoftimit, ndërprerja ka ndodhur si pasojë e djegies së njësorit elektrik në Stacionin e Pompimit Koretin, duke pamundësuar funksionimin normal të sistemit të ujësjellësit në këtë zonë.
Ekipet teknike të KEDS-it janë në terren dhe po punojnë për sanimin e defektit në energjinë elektrike, me qëllim që furnizimi me ujë të rikthehet sa më shpejt të jetë e mundur.
KRU “Hidromorava” ka kërkuar mirëkuptimin e konsumatorëve deri në përfundimin e punimeve dhe normalizimin e situatës. /Telegrafi/
Komuna e Kamenicës, përmes Zyrës për Barazi Gjinore dhe në bashkëpunim me Koordinatoren e Njësisë Komunale për të Drejtat e Njeriut, ka organizuar një punëtori ndërgjegjësuese me temën “Format e ndryshme të dhunës me bazë gjinore dhe mbrojtja nga dhuna kibernetike”.
Ky aktivitet u zhvillua në kuadër të Planit Lokal të Veprimit për Barazinë Gjinore, me mbështetjen e projektit “Gender Equality Facility”, të financuar nga Bashkimi Evropian, zbatuar nga UN Women dhe me përkrahjen e Cacttus Education, përcjell Telegrafi.
Punëtoria është udhëhequr nga trajnerja e UN Women, Mirjeta Nagavci, e cila përmes diskutimeve interaktive dhe ushtrimeve praktike ka trajtuar format e ndryshme të dhunës me bazë gjinore, duke vënë theks të veçantë tek dhuna digjitale dhe mbrojtja nga sulmet kibernetike.
Në aktivitet morën pjesë përfaqësues të institucioneve lokale, nxënës, arsimtarë dhe qytetarë, përfshirë edhe pedagogun Afrim Hoda nga shkolla e mesme e lartë në Kamenicë.
Sipas komunës, qëllimi i kësaj punëtorie është rritja e vetëdijes për barazinë gjinore, parandalimi i formave të dhunës, si dhe krijimi i mjediseve të sigurta, gjithëpërfshirëse dhe të barabarta për të gjithë qytetarët e komunës. /Telegrafi/
Drejtoresha e Zhvillimit Ekonomik dhe Diasporës, Burbuqe Leka, ka bërë të ditur se është përfunduar me sukses projekti i tezgave për tregjet mobile në komunën e Kamenicës.
Tezgat tashmë janë dorëzuar dhe do të jenë në shërbim të shitësve ambulantë dhe bujqve lokalë, duke u mundësuar atyre të ofrojnë prodhimet vendore në mënyrë të organizuar dhe dinjitoze, përcjell Telegrafi.
“Ky projekt synon mbështetjen e ekonomisë lokale dhe promovimin e prodhimeve vendore, duke krijuar kushte më të mira për shitjen e produkteve bujqësore”, ka deklaruar Leka.
Drejtoria ka bërë të ditur se do të kujdeset që tezgat t’u jepen bujqve në nevojë dhe se procedurat për shpërndarjen e tyre do të njoftohen në mënyrë transparente në ditët në vijim. /Telegrafi/
Kompania Rajonale e Ujësjellësit “Hidromorava” Sh.A – Njësia Operative Kamenicë, ka publikuar planin e reduktimeve të furnizimit me ujë për qytetin e Kamenicës për periudhën 16–31 tetor 2025.
Sipas njoftimit, ndërprerja e furnizimit do të ndodhë në Lagjen Malesia (pjesa që furnizohet nga Stacioni i Pompimit Nr.3, pranë varrezave të Dëshmorëve), përcjell Telegrafi.
Kjo masë është e domosdoshme për mbushjen e rezervuarit dhe për sigurimin e furnizimit të barabartë për të gjithë zonën e shërbimit.
Orari i ndërprerjeve mund të ndryshojë në varësi të sasive të ujit të prodhuara.
Bashkëngjitur njoftimit gjendet edhe Plani i Reduktimeve të Ujit për qytetin e Kamenicës, që do të jetë në fuqi gjatë periudhës së specifikuar.
Departamenti Teknik i KRU “Hidromorava” Sh.A fton banorët të jenë të kujdesshëm dhe të përdorin ujin me kursim gjatë periudhës së reduktimeve. /Telegrafi/
Komuna e Kamenicës po vijon me realizimin e projekteve infrastrukturore në fshatin Krilevë, me qëllim përmirësimin e kushteve të jetesës për banorët lokalë, përcjell Telegrafi.
Me një investim prej mbi 750,000 euro, po asfaltohen disa rrugë lokale, përfshirë Rrugën "Ahmeti", Zonën e "Livagjeve" dhe 16 degëzime të tjera brenda lagjeve të Krilevës.
Kryetari i komunës, Kadri Rahimaj, ka deklaruar se krahas asfaltimit të rrugëve, po ndërtohet edhe një urë e vogël, e cila pritet të përmirësojë qarkullimin dhe të lehtësojë lëvizjen e përditshme të banorëve. /Telegrafi/
Kuvendi Komunal i Kamenicës ka miratuar Buxhetin Komunal për vitin 2026, si dhe parashikimet buxhetore për vitet 2027 dhe 2028.
Vendimi u mor gjatë vazhdimit të mbledhjes së nëntë të rregullt të Kuvendit, të kryesuar nga Liridon Kastrati.
Në seancë ishin të pranishëm kryetari i Komunës, Kadri Rahimaj, delegatë të Kuvendit si dhe përfaqësues të tjerë. Pas shqyrtimit të rendit të ditës, të gjitha pikat u miratuan me shumicë votash, përcjell Telegrafi.
Krahas miratimit të buxhetit, u aprovua edhe vendimi për buxhetimin e bashkëfinancimit dhe krijimin e një kodi të ri për projektin “Ndërtimi i varrezave në fshatin Karaçevë e Epërme”, i cili do të realizohet në bashkëpunim me Shoqatën “Firishta” nga ky fshat.
Pikat tjera të rendit të ditës përfshinin shqyrtimin e procesverbalit nga mbledhja e mëparshme, pyetje të legjislativit për ekzekutivin dhe diskutime të ndryshme.
Me miratimin e buxhetit për vitin 2026, Komuna e Kamenicës ka hedhur bazat për planifikimet zhvillimore dhe financiare për tri vitet e ardhshme. /Telegrafi/
Komuna e Kamenicës, përmes Drejtorisë për Bujqësi, Pylltari dhe Zhvillim Rural, ka shpallur listën e fermerëve përfitues të subvencioneve për prodhuesit e qumështit për gjashtëmujorin e parë të vitit 2025 (janar – qershor), përcjell Telegrafi.
Kjo masë synon mbështetjen e blegtorëve lokalë dhe stimulimin e prodhimit vendor të qumështit, si një sektor i rëndësishëm i bujqësisë në komunë.
Lista përfshin fermerët që kanë plotësuar kriteret dhe dokumentacionin e nevojshëm, në përputhje me udhëzimet administrative përkatëse.
Autoritetet komunale theksojnë se publikimi i listës rrit transparencën dhe ofron mundësi për çdo palë të interesuar që të ketë qasje në informacionin e subvencioneve.
Kompania Rajonale e Ujësjellësit “Hidromorava” ka bërë thirrje për ndërprerjen e menjëhershme të keqpërdorimit të ujit të pijshëm, duke paralajmëruar masa të ashpra ndaj të gjithë shkelësve, përcjell Telegrafi.
Në njoftimin e kompanisë thuhet se gjatë inspektimeve të fundit në Viti, Kamenicë dhe rrethinë, ekipet e saj kanë hasur raste të përdorimit të ujit për qëllime të paautorizuara, si larja e rrugëve, automjeteve dhe ujitja e sipërfaqeve, në një kohë kur kërkesat për furnizim janë shumë të larta.
“Hidromorava” rikujton se çdo përdorim i ujit jashtë nevojave bazike, si dhe çdo lidhje ilegale, përbën shkelje të rregulloreve në fuqi dhe dëmton drejtpërdrejt furnizimin për qytetarët tjerë.
Kompania ka paralajmëruar rritjen e kontrolleve në terren dhe ka bërë të ditur se ndaj keqpërdoruesve do të ndërmerren masa të menjëhershme, përfshirë edhe shkyçjen pa paralajmërim.
Nga “Hidromorava” u bëhet thirrje qytetarëve për bashkëpunim, me qëllim të garantimit të një furnizimi të qëndrueshëm me ujë për të gjithë konsumatorët. /Telegrafi/
Kandidati i Lëvizjes Popullore Serbe për kryetar të Ranillugut, Ivan Petroviq, dhe kandidati për asamblist nga partia "Për liri, drejtësi dhe mbijetesë", Ivan Ristiq, kanë filluar grevë urie pasi, sipas tyre, janë pushuar nga puna në institucionet paralele serbe në Komunën e Kamenicës vetëm sepse janë kandiduar në lista opozitare dhe kanë refuzuar të mbështesin Listën Serbe.
Petroviq ka deklaruar për radion Kim se javët e fundit shumë serbë të punësuar në institucionet paralele të Republikës së Serbisë janë pushuar nga puna ose u është zvogëluar paga, sepse kanë refuzuar të mbështesin Listën Serbe për zgjedhjet lokale të ardhshme në Kosovë.
"Unë dhe edhe dy kolegë të tjerë, por edhe shumë njerëz të tjerë që janë të punësuar në sektorin publik të Anamoravës së Kosovës, gjatë javëve të fundit kemi marrë vendime për largim nga puna ose na është zvogëluar paga në mënyrë drastike, vetëm sepse kemi një mendim ndryshe, vetëm sepse jemi kandiduar në lista të partive opozitare ose thjesht nuk duam të votojmë për Listën Serbe. Ne këtu nuk kemi absolutisht asgjë kundër shtetit të Serbisë apo kundër interesave të tij. Mbrojtja e interesave serbe, a duhet të bazohet në atë që të pushoni nga puna njerëzit që jetojnë me fëmijët e tyre në Kosovë, ndërsa në listat e pagave mbani njerëz që nuk jetojnë në Kosovë, por që jetojnë nga Kosova?", tha ai.
Petoviq, baba i katër fëmijëve, theksoi se pas 17 viteve pune, më 15 shtator ka marrë vendimin për pushim nga puna, raporton N1.
Në atë dokument si arsye zyrtare përmendet – zvogëlimi i vëllimit të punës.
"Arsyeja formale e pushimit nga puna është zvogëlimi i vëllimit të punës. Sa qesharake dhe pa kuptim është kjo, tregon fakti që në muajt e fundit, punëdhënësi ynë, Administrata Komunale e Kamenicës së Kosovës, ka pranuar në punë rreth njëqind punonjës të rinj, përfshirë edhe në pozitat në të cilat kemi punuar ne. Arsyeja e vërtetë është, fatkeqësisht, liria – dëshira për të na mohuar lirinë e mendimit, lirinë e fjalës dhe përpjekja që të na detyrojnë në çdo mënyrë të heqim dorë nga kandidaturat tona", shtoi ai.
Po atë ditë, një vendim identik iu dorëzua edhe Ivan Ristiqit, kandidatit për asamblist nga partia "Për liri, drejtësi dhe mbijetesë", baba i tre fëmijëve, i cili kishte punuar në Komunën paralele serbe të Kamenicës për 19 vjet. /Telegrafi/
Login
