Pas reshjeve të pandërprera të shiut gjatë natës, situata në Komunën e Vitisë paraqitet stabile dhe të gjitha rrugët janë të kalueshme, megjithëse autoritetet apelojnë për kujdes të shtuar në disa segmente të rrugëve, veçanërisht në fshatin Ramnishtë dhe në rrugën Skifteraj–Radivojc.
U.d. i Drejtorisë për Shërbime Publike dhe Emergjencë, Naser Haziri, ka bërë të ditur se Njësia e Zjarrfikësve ndodhet vazhdimisht në terren dhe, në bashkëpunim me stafin e drejtorisë, po ndërmerr masa për të parandaluar përkeqësimin e situatës.
“Intervenimi është kryer edhe në rrugën Viti–Letnicë, ku për shkak të reshjeve kishte ndodhur shembja e dheut. Pas ndërhyrjes së shpejtë, rruga është e qarkullueshme dhe situata është nën kontroll”, ka theksuar Haziri.
Autoritetet komunale bëjnë thirrje për kujdes të shtuar gjatë lëvizjes, veçanërisht në zonat ku uji ka depërtuar në rrugë, ndërsa ekipet kompetente mbeten në gatishmëri për çdo situatë eventuale. /Telegrafi/
Kryetari i Komunës së Vushtrrisë, Ferit Idrizi, ka pritur sot në takim përfaqësuesit e Komisionit Qeveritar për Vlerësimin e Dëmeve nga Fatkeqësitë Natyrore dhe Fatkeqësitë Tjera, të kryesuar nga Kastriot Lajçi.
Në këtë takim, të pranishëm ishin edhe anëtarët e Komisionit Komunal për vlerësimin e dëmeve nga fatkeqësitë natyrore dhe fatkeqësitë tjera, me të cilët u diskutua për situatën e krijuar pas vërshimeve të fundit në territorin e komunës.
Kryetari Idrizi bëri të ditur se fokusi i diskutimeve ishte vlerësimi i dëmeve të shkaktuara në ekonomitë familjare, në sektorin e bujqësisë si dhe në infrastrukturë.
Ai theksoi se bashkëpunimi mes nivelit lokal dhe atij qendror është thelbësor për një proces të drejtë dhe të saktë vlerësimi.
“Gjatë takimit u diskutua për dëmet e shkaktuara nga vërshimet në ekonomitë familjare, sektorin e bujqësisë si dhe në infrastrukturë. Bashkë do të punojmë ngushtë për një vlerësim të saktë dhe gjithëpërfshirës të dëmeve”, ka deklaruar Idrizi.
Ai ka siguruar qytetarët se Komuna e Vushtrrisë do të vazhdojë angazhimin për t’u dalë në ndihmë të prekurve nga vërshimet, në koordinim të plotë me institucionet qendrore.
“Komuna e Vushtrrisë mbetet e përkushtuar që në bashkëpunim me institucionet qendrore, të ofrojë mbështetje për qytetarët e prekur dhe të ndërmarrë hapat e nevojshëm për tejkalimin e pasojave të vërshimeve”, është shprehur kryetari i Vushtrrisë. /Telegrafi/
Fillimviti 2026 ka goditur Kosovën me vërshime, ndërkaq komunat më të prekura janë Malisheva, Drenasi, Mitrovica, Gjakova dhe Rahoveci.
Në vazhdën e raportimeve për gjendjen e rëndë që ka goditur këto rajone, Telegrafi ka shkuar në Rahovec, për të shikuar nga afër se si kanë arritur t'ia dalin qytetarët në këtë fatkeqësi natyrore.
Nga dhjetëra fshatra të vërshuara, më mirë nuk ka kaluar as fshati Krushë e Madhe, ku blegtori Bedri Duraku ka treguar për situatën që përballën pothuajse çdo vit.
“Këtu jam me fermë të lopëve. Kohët e fundit, vërshimet që kanë ndodhur, ne nuk i kemi këto prej natyrës, por këto janë prej dorës së njeriut”, tha ai.
“Krejt ujëmbledhësi i asfaltit të fshatit Celinë, po derdhet në parcelën time dhe në bazë të kërkesave të vazhdueshme që kanë shkuar në komunë, deri tash asnjë hap nuk e kanë marrë, niveli komunal është shumë neglizhues”.
Duraku shtoi më tej se ai nuk do të aplikoj për dëme, pasi që sipas tij më mirë është që të rregullohet ujëmbledhësi, se sa të kompensohen nga komuna.
Irfan Berisha, drejtor i Drejtorisë për Mbrojtje dhe Shpëtim në Komunën e Rahovecit ka thënë për Telegrafin se kanë filluar aplikimet për kompensimin e dëmeve si në pronar familjare ashtu edhe në ato afariste.
“Komisionet janë në terren që nga dita kur është formua, ndërsa kemi pranuar deri tani rreth 350 kërkesa për dëmshpërblim”, tha ai.
“Janë trajtuar një pjesë e tyre, derisa komisioni është duke punuar në përmbyllje të këtij procesi, që t’i dërgojmë këto kërkesa në nivel qendror dhe të kompensohen dëmet”.
Berisha u pyet edhe për dëmet e viteve të kaluara, duke thënë se shpresojnë që do t’i kompensojnë edhe ato.
“Shpresojmë që do t’i kompensojmë edhe dëmet për vitet e kaluara dhe është mirë që të ndodhë pasi ka shumë dëme”, përfundoi ai. /Telegrafi/
Komuna e Malishevës ka njoftuar se është shtyrë afati për paraqitjen e kërkesave për vlerësimin e dëmeve të shkaktuara nga vërshimet e javës së kaluar.
Sipas njoftimit të Sektorit për Emergjenca në kuadër të Drejtorisë për Mbrojtje dhe Shpëtim, personat juridikë dhe fizikë do të kenë mundësi që kërkesat e tyre t’i paraqesin deri më 21 janar 2026 (e mërkurë).
“Vendimi për shtyrjen e afatit është marrë për shkak të numrit të madh të kërkesave të pranuara, si dhe për faktin se një pjesë e qytetarëve, për arsye objektive, nuk kanë mundur ende t’i paraqesin kërkesat e tyre brenda afatit fillestar”, thuhet në njoftimin e Komunës së Malishevës.
Nga Komuna bëhet e ditur se me qëllim të përfshirjes së të gjithë qytetarëve të dëmtuar nga vërshimet, afati fillestar, i cili ishte paraparë deri më 16 janar, është shtyrë edhe për disa ditë.
Po ashtu, autoritetet komunale sqarojnë se kërkesat për vlerësim të dëmeve duhet obligativisht të shoqërohen me dokumentacionin përcjellës, përfshirë kopjen e letërnjoftimit dhe numrin e llogarisë bankare.
Komuna e Malishevës ka apeluar tek të gjithë qytetarët e prekur nga vërshimet që ende nuk i kanë paraqitur kërkesat e tyre, ta bëjnë këtë brenda afatit të ri të përcaktuar, në mënyrë që të mundësohet trajtimi dhe verifikimi i dëmeve nga komisionet përkatëse. /Telegrafi/
Komuna e Obiliqit ka njoftuar qytetarët se afati për evidentimin e dëmeve të shkaktuara nga vërshimet është i hapur deri më 23 janar 2026, në ora 16:00.
Sipas njoftimit zyrtar, të gjithë qytetarët e prekur nga vërshimet ftohen që brenda këtij afati të paraqesin dëmet e shkaktuara, në mënyrë që ato të përfshihen në procesin e verifikimit nga komisioni përgjegjës i Komunës.
Nga Komuna e Obiliqit bëhet e ditur se komisioni i caktuar po vazhdon punën në terren për verifikimin e dëmeve, me qëllim që procesi të zhvillohet në mënyrë të drejtë dhe transparente për të gjithë qytetarët e prekur.
Komuna ka apeluar te qytetarët që ende nuk i kanë paraqitur dëmet, që ta bëjnë këtë brenda afatit të përcaktuar, në mënyrë që të mos mbesin jashtë procesit të vlerësimit dhe verifikimit. /Telegrafi/
Komuna e Suharekës ka njoftuar se po vazhdon pranimi i kërkesave nga qytetarët që kanë pësuar dëme si pasojë e vërshimeve të fundit.
Sipas njoftimit zyrtar, të gjithë qytetarët e prekur ftohen që brenda afatit të përcaktuar të paraqesin kërkesat e tyre pranë Komisionit Komunal për Vlerësimin e Dëmeve, me qëllim të evidentimit dhe vlerësimit të dëmeve të shkaktuara.
Për aplikim, qytetarët duhet të dorëzojnë dokumentacionin e nevojshëm, i cili përfshin: kërkesën që merret dhe plotësohet në administratën komunale, kopjen e letërnjoftimit, konfirmimin bankar me llogari në emër të aplikuesit, fotografi të printuara me ngjyrë që dëshmojnë gjendjen reale të dëmeve, si si dhe çdo dokument shtesë që vërteton pronësinë, nëse ekziston.
Komuna ka bërë të ditur se afati për dorëzimin e kërkesave është deri më 22 janar 2026.
Kërkesat mund të dorëzohen personalisht në Zyrën Nr. 1, në Drejtorinë e Bujqësisë, apo në Drejtorinë e Shërbimeve Publike dhe Emergjente, në objektin e Komunës së Suharekës. /Telegrafi/
Komuna e Gjilanit ka ftuar qytetarët dhe subjektet afariste që kanë pësuar dëme nga reshjet e shiut të datës 10 janar 2026, të paraqesin kërkesë për vlerësimin e dëmeve të shkaktuara.
Sipas njoftimit zyrtar të komunës, afati për aplikim është nga 15 janari deri më 31 janar 2026, ndërsa kërkesat duhet të dorëzohen në Qendrën për Qytetarë të Komunës së Gjilanit, drejtuar Komisionit për vlerësimin e dëmeve të shkaktuara nga fatkeqësitë natyrore.
“Për vlerësimin e dëmeve është e domosdoshme që pronarët e ekonomive familjare dhe subjektet afariste, të cilët kanë pësuar dëme nga reshjet e shiut të datës 10 janar 2026, të paraqesin kërkesë zyrtare brenda afatit të përcaktuar”, thuhet në njoftimin e Komunës së Gjilanit.
Komuna ka bërë të ditur se aplikuesit duhet të dorëzojnë dokumentacionin e nevojshëm, i cili përfshin: kërkesën drejtuar Komisionit, fotografi të objekteve apo gjësendeve të dëmtuara, adresën e saktë të lokacionit ku ndodhet objekti i dëmtuar, numrin e telefonit të aplikuesit, si dhe kopjen e letërnjoftimit. Për subjektet afariste kërkohet edhe certifikata e regjistrimit në ARBK.
“Të gjithë qytetarët e interesuar ftohen që aplikimet t’i dorëzojnë brenda këtij afati, në mënyrë që komisioni të ketë mundësi të bëjë vlerësimin e plotë dhe korrekt të dëmeve”, thekson Komuna e Gjilanit.
Nga komuna u bëhet thirrje qytetarëve që të respektojnë afatin e aplikimit dhe të sigurohen që dokumentacioni i dorëzuar të jetë i plotë, për të mundësuar trajtimin sa më efikas të kërkesave. /Telegrafi/
Malisheva ishte njëra nga komunat më të goditura nga vërshimet që ndodhën në fillim të vitit 2026, duke shkaktuar shpalljen e gjendjes së jashtëzakonshme.
Lumi Mirusha doli nga shtrati, duke shkaktuar vërshime në disa fshatra të kësaj komune, ndërsa kryetari, Ekrem Kastrati, shpalli gjendje të jashtëzakonshme.
Si pasojë e kësaj situate, fillimi i gjysmëvjetorit të dytë në shkolla, i planifikuar të niste më 8 janar, u shty fillimisht për më 12 janar. Mirëpo, për shkak të gjendjes së rënduar në rrugët e fshatrave të Malishevës dhe ngricave, fillimi i gjysmëvjetorit të dytë u shty edhe për më 14 janar.
Në një intervistë për Telegrafin, zyrtari për media në Komunën e Malishevës, Artan Paçarizi, foli për gjendjen aktuale pas vërshimeve.
“Aktualisht gjendja është e qetë dhe nuk ka indikacione për vazhdimin e vërshimeve. Si rezultat është hequr gjendja emergjente nga vërshimet si pasojë e shirave të rrëmbyeshëm”, tha ai.
Paçarizi bëri të ditur se fshatrat më të prekura nga vërshimet kanë qenë ato që shtrihen përreth lumit Mirusha, por sipas tij, situata aktuale është nën kontroll.
“Zonat apo fshatrat më të prekura kanë qenë ato që shtrihen përreth lumit Mirusha dhe përrenjve, por gjendja ka qenë nën kontroll, ndërsa gjendja aktuale është e qetë dhe ujërat janë qetësuar. Ka probleme me infrastrukturë në disa vende, pasi kemi dëme të konsiderueshme, duke filluar nga diga e liqenit në Mirushë, pastaj janë dëmtuar disa ura dhe rrugë. Në këto pjesë të dëmtuara ka probleme në qasje, por për fat të mirë, komuna jonë i ka të lidhura të gjitha fshatrat me rrugë dhe qytetarët kanë rrugë alternative”, potencoi ai.
Zyrtari për media shtoi se Komuna ka arritur t’i identifikojë fshatrat më të prekura, ndërsa është formuar edhe një komision profesional për vlerësimin e dëmeve.
“Janë identifikuar shumë dëme dhe jemi në pritje të marrjes së kërkesave nga qytetarët për vlerësimin e dëmeve, e më pas komisioni profesional do të bëjë incizimin e tërësishëm dhe do t’i vlerësojë dëmet”, tha Paçarizi.
Sipas tij, deri më tani janë pranuar 87 kërkesa nga qytetarët, por numri pritet të rritet.
“Deri në këtë moment janë pranuar 87 kërkesa nga qytetarët, por numri është shumë më i madh dhe ata kanë afat deri më 16 janar t’i paraqesin kërkesat për vlerësimin e dëmeve. Pastaj, dëmet tjera në infrastrukturë janë shumë të mëdha”, theksoi ai.
Paçarizi sqaroi se shtyrja e fillimit të gjysmëvjetorit të dytë u bë për shkak të ngricave dhe gjendjes së rënduar të rrugëve, e jo për shkak të dëmtimeve në objektet shkollore.
“Për fat të mirë, objektet shkollore i kemi ndërtuar në pozita të tilla gjeografike që të mos vërshohen edhe kur ka vërshime. Përjashtuar tri ose katër shkolla ku ka mundur të ketë rrjedhje nga çatitë, por jo përmbytje. Shkollat janë të gjitha të gatshme, por problemi ka qenë te rrugët, uji dhe ngricat. Pas analizës së bërë dhe rekomandimeve të marra, nuk kemi dashur të rrezikojmë asnjë nxënës, pasi në disa zona, siç e thashë më herët, ka dëmtime në rrugë, trotuare, ura e të tjera”, deklaroi ai.
Duke folur për parandalimin e situatave të ngjashme në të ardhmen, Paçarizi tha se Komuna ka intervenuar edhe më herët në pikat më kritike, por se vërshimet mbeten të vështira për t’u parandaluar në zona pranë shtratit të lumit Mirusha.
“Vërshimet janë të paparashikueshme dhe është tepër e vështirë të parandalohen, por komuna gjithmonë, kur ndodhin, i identifikon shkaktarët dhe intervenon në ato pika që konsiderohen kritike, si në lum, ashtu edhe në rrugë, përroska dhe lugina. Megjithatë, duhet të kemi parasysh gjithmonë një gjë: rrjedhat e ujërave janë rrjedha të krijuara nga natyra dhe çdo intervenim mund të shkaktojë problem tjetër. Por, gjithsesi, në disa vende është intervenuar në rregullimin e shtratit të lumit, sidomos në qytet”, potencoi ai.
Në fund, Paçarizi u bëri thirrje qytetarëve të dëmtuar nga vërshimet që të paraqesin kërkesat për vlerësim të dëmeve, pasi nuk ka mënyrë tjetër që t'i identifikojnë ato më saktë./Telegrafi/
Komuna e Obiliqit ka miratuar vendimin për emërimin e komisionit për verifikimin e dëmeve të shkaktuara gjatë vërshimeve të fundit, të cilat kanë ndodhur në javën e parë dhe të dytë të muajit janar 2026.
Sipas vendimit, Komisioni do të ketë këtë përbërje: Arif Plana është emëruar kryetar i Komisionit, ndërsa anëtarë janë Naim Qerkezi, Muhamet Ismaili, Zejnullah Krasniqi dhe Naim Graiçevci.
Komisioni do të angazhohet në verifikimin e dëmeve të evidentuara në terren dhe, pas përfundimit të punës, do të përpilojë një raport me shkrim, përmes të cilit do ta njoftojë Kryetarin e Komunës lidhur me gjetjet dhe vlerësimin e dëmeve.
Ky hap synon krijimin e një pasqyre të saktë të dëmeve të shkaktuara nga vërshimet, në mënyrë që të merren masat e nevojshme institucionale për trajtimin e tyre. /Telegrafi/
Në kuadër të përballjes me situatën e krijuar nga vërshimet e fundit, Komuna e Lipjanit ka intensifikuar bashkëpunimin me institucione dhe kompani të ndryshme me qëllim të tejkalimit të vështirësive dhe ofrimit të ndihmës për qytetarët e prekur.
Në bashkëpunim me shoqatën zvicerane “Barakah” Charity, gjatë ditës së sotme është realizuar shpërndarja e pakove ushqimore dhe e ujit të pijshëm për disa familje që janë prekur nga vërshimet.
Nga Komuna e Lipjanit është shprehur mirënjohje e veçantë për të gjitha kompanitë dhe individët lipjanas që kanë ofruar bashkëpunim dhe mbështetje, duke kontribuar në lehtësimin e situatës për familjet e prekura.
Po ashtu, falënderime janë adresuar për Stacionin Policor në Lipjan, Njësinë e Zjarrfikësve, Kompaninë e Ujësjellësit, KBI Lipjan, Dino Company, Rexha Com, Xhema Company, Beni Construction, 7 Vëllezërit, Jetimat e Ballkanit, Nuno Queirós – UNDP, familjen Tasholli, mediat – në veçanti ato lokale – si dhe qytetarët e shumtë që kanë dalë vullnetarisht në mbështetje të familjeve dhe fshatrave të prekura.
Komuna e Lipjanit ka bërë të ditur se do të vazhdojë të qëndrojë pranë qytetarëve të saj, duke koordinuar ndihmën institucionale dhe humanitare në përputhje me nevojat në terren. /Telegrafi/
Komuna e Gjakovës ka njoftuar se ka hapur procesin e pranimit të kërkesave për vlerësim të dëmeve për familjet që janë prekur nga vërshimet e fundit.
Sipas njoftimit zyrtar, të gjithë qytetarët që kanë pësuar dëme materiale ftohen që të dorëzojnë kërkesat e tyre në arkivin e komunës, duke specifikuar llojin e dëmit të pësuar.
Dokumentet e nevojshme për aplikim përfshijnë kërkesën me shkrim, kopjen e letërnjoftimit, foto-dëshmi të dëmeve të shkaktuara si dhe numrin e telefonit për kontakt.
Komuna ka bërë të ditur se afati i fundit për dorëzimin e kërkesave është data 23 janar 2026. Pas përfundimit të afatit, komisioni përkatës do të bëjë vlerësimin e të gjitha rasteve të paraqitura.
Nga Komuna e Gjakovës u bëhet thirrje qytetarëve të prekur që t’i përmbahen afatit të përcaktuar, në mënyrë që procesi i vlerësimit të zhvillohet në kohë dhe në mënyrë sa më efikase. /Telegrafi/
Komuna e Mitrovicës ka njoftuar se nga sot, më 12 janar 2026, ka filluar procesi i aplikimit për vlerësimin e dëmeve të shkaktuara nga vërshimet e fundit, në ekonomitë familjare dhe në biznese.
Sipas njoftimit zyrtar, të gjithë qytetarët e prekur nga vërshimet ftohen që, brenda afatit të përcaktuar, të paraqesin kërkesën e tyre pranë Zyrës Pritëse – Qendrës për Shërbime të Qytetarëve në Komunën e Mitrovicës.
“Qytetarët e dëmtuar nga vërshimet duhet të dorëzojnë aplikacionin me dokumentacionin përkatës, në mënyrë që të realizohet procesi i vlerësimit të dëmeve në terren”, thuhet në njoftimin e komunës.
Dokumentacioni i nevojshëm për aplikim përfshin formularin e aplikimit, të dhënat personale të aplikuesit, kopjen e letërnjoftimit, numrin e anëtarëve të familjes, adresën e objektit të dëmtuar, fotografi që dëshmojnë gjendjen reale të dëmeve, konfirmimin e llogarisë bankare si dhe çdo dokument shtesë që vërteton pronësinë ose dëmin e pësuar.
Afati i fundit për dorëzimin e kërkesave është 26 janari 2026, ndërsa aplikimet pranohen në Zyrën Pritëse të Komunës së Mitrovicës, në katin e parë. /Telegrafi/
Drejtoria për Mbrojtje dhe Shpëtim në Komunën e Malishevës ka njoftuar qytetarët, si dhe personat fizikë dhe juridikë të kësaj komune, që kanë pësuar dëme si pasojë e reshjeve atmosferike – vërshimeve, se mund të paraqesin kërkesat për vlerësimin e dëmeve.
Sipas njoftimit zyrtar, të gjithë të dëmtuarit duhet t’i lajmërojnë dëmet pranë Komisionit Komunal për Vlerësimin e Dëmeve nga Fatkeqësitë Natyrore dhe fatkeqësitë e tjera.
Plotësimi i formularit përkatës bëhet në zyrën e pritjes në objektin e ri të Komunës së Malishevës.
Afati i fundit për paraqitjen e kërkesave është 16 janar 2026, deri në ora 16:00.
Autoritetet komunale u bëjnë thirrje të gjithë qytetarëve të prekur që të respektojnë afatin e caktuar, në mënyrë që të mundësohet trajtimi dhe vlerësimi i dëmeve në kohë.
Njoftimi është bërë nga Drejtoria për Mbrojtje dhe Shpëtim, përkatësisht nga ushtruesi i detyrës së udhëheqësit të Sektorit për Emergjenca, Halit Mazreku. /Telegrafi/
Agjencia e Menaxhimit Emergjent (AME) ka publikuar raportin e përditësuar për situatën nga reshjet atmosferike gjatë orëve 22:00 – 08:00 të datës 11.01.2026, duke bërë të ditur gjendjen e rrugëve, lumenjve dhe ndërhyrjet emergjente në të gjithë territorin e Kosovës.
Sipas raportit, Prishtina ka pasur vërshime në rrugën e Qagllavicës dhe në nënkalimet për Obiliq, kryesisht si pasojë e kanalizimeve të bllokuara.
Në Fushë Kosovë, u raportuan vërshime në fshatrat Lismir, Kuzmin dhe Sllatinë e Madhe. Ndërkohë, rajoni i Mitrovicës kishte situatë kritike në lagjen “2 Korriku”, ku rreziku i daljes së lumit Sitnica nga shtrati ishte i mesëm.
Operacioni parandalues për këtë zonë përfundoi me sukses, duke vendosur rreth 200 metra mur mbrojtës me thasë zalli, me pjesëmarrjen e AME, NJPZSH Mitrovicë Jugore dhe Shoqatës së Kërkim-Shpëtimit të Kosovës.
Në rajonin e Ferizajt, u raportuan pesë raste vërshimesh në fshatrat Prelez, Mohoc, Tërrnë dhe Balaj, ku dy të moshuar u evakuuan nga zona e rrezikut.
Pompat janë aktive për të parandaluar përhapjen e ujit. Në rajonet e tjera, si Lipjan, Podujevë, Shtime, Prizren, Suharekë, Malishevë, Rahovec dhe Dragash, situata mbetet stabile dhe rrugët janë të kalueshme.
Raporti nënvizon gjithashtu se reshjet e borës që kanë filluar në shumicën e komunave kanë zbutur rrezikun nga vërshimet, ndërsa kujdesi për të evakuarit vazhdon.
Autoritetet theksuan se Qendra Operative e AME-së mbetet në gatishmëri të plotë për ndërhyrje emergjente, duke përfshirë aktivizimin e Forcës së Sigurisë së Kosovës për mbështetje parandaluese.
AME apelon tek qytetarët që të respektojnë sinjalizimin dhe të tregojnë kujdes maksimal gjatë qarkullimit, sidomos në zonat e përmbytura dhe pranë lumenjve. /Telegrafi/
Sipas përditësimit të fundit të Agjencisë së Menaxhimit Emergjent (AME) për datën 10 janar 2026, situata e vërshimeve në Kosovë paraqitet e menaxhueshme, por disa rajone po përballen me vështirësi të theksuara si pasojë e reshjeve të shiut dhe borës.
Në rajonin e Prishtinës, vërshime të lokalizuara janë raportuar në Prishtinë, Fushë Kosovë, Lipjan, Obiliq, Drenas, Shtime dhe Graçanicë, kryesisht për shkak të bllokimeve të kanalizimeve, me depërtime uji në oborre, bodrume dhe shtëpi pa nevojë për evakuime.
Rajoni i Prizrenit përfshin rrugë dhe ura të vërshuara, shembje dheu dhe intervenime teknike në Suharekë, Malishevë, Rahovec dhe Dragash. Rrugët kryesore monitorohen, por disa segmente janë të pakalueshme përkohësisht.
Në rajonin e Mitrovicës situata është e qetë, ndërsa në Pejë, disa intervenime për bllokime kanalizimesh janë në vazhdim; rruga Pejë–Rugovë ka ujë në disa segmente dhe qytetarët këshillohen të jenë të kujdesshëm. Situata në Gjakovë është stabile me një bllokim rrugor nga shembja e dheut, ndërsa në Gjilan raportohet për vërshime të lokalizuara dhe depërtime uji në bodrume.
AME ka realizuar kërkesat urgjente të KEK dhe KOSTT për pompa thithëse me kapacitet të madh dhe vazhdon koordinimin 24/7 me të gjitha institucionet lokale dhe infrastruktura kritike. Agjencia fton qytetarët të raportojnë çdo rrezik përmes numrave emergjent 112, 193 dhe 192.
Situata monitorohet vazhdimisht dhe AME mbetet në gatishmëri të plotë për të garantuar sigurinë e qytetarëve./Telegrafi/
Drejtoria për Siguri dhe Emergjenca e Komunës së Prishtinës ka bërë të ditur se për shkak të reshurave kanë reaguar në shtatë raste të ndryshme.
Në një postim në Facebook bëhet apel për kujdes gjatë lëvizjeve dhe të raportojnë për çdo rast emergjent.
Postimi i Drejtorisë:
Kushtet e pafavorshme atmosferike kanë shkaktuar një mori rastesh në Kryeqytet.
Si rrjedhojë, ekipet emergjente të drejtorisë sonë, në bashkëpunim me Brigadën Profesionale të Zjarrfikësve, Drejtorinë e Shërbimeve Publike, Drejtorinë e Investimeve Kapitale, Ndërmarrjen Gjelbër dhe kompanitë kontraktuese të Kryeqytetit, janë në terren që nga orët e hershme të mëngjesit dhe aktualisht po intervenojnë njëkohësisht në 7 raste.
Ju lutemi të keni kujdes gjatë lëvizjeve dhe të raportoni çdo rast emergjent në numrat: 0800 122 33 ose 0800 122 44. /Telegrafi/
Një nënkalim i ndërtuar me miliona euro në Malishevë dhe i përuruar me koncert dhe fjalime, u përmbyt vetëm disa muaj më pas si pasojë e reshjeve të shiut. Komuna e pranon se projekti nuk e ka përfunduar ende pranimin teknik, kurse kompania ndërtuese nuk dha shpjegime.
Me një koncert të madh, fjalime e parakalime, në gusht të vitit 2025, komuna e Malishevës e përuroi një nënkalim për vetura në qytet.
Nënkalimi ishte vetëm një pjesë e një projekti infrastrukturor me vlerë afër 9 milionë euro, që kryetari i kësaj komune, Ekrem Kastrati e ka quajtur “ndër projektet më të mëdha në historinë e Malishevës”, shkruan Evropa e Lirë.
Projekti “Malisheva Urbane”, përfshin edhe shesh e parkingje nëntokësore, ndërtimi i së cilave u krye kryesisht nga kompania “B Famis” nga Suhareka.
Por, vetëm disa muaj pas përurimit - më 6 janar 2026 - nënkalimi u mbush me ujë pas reshjeve intensive.
Komuna e Malishevës tha për Radion Evropa e Lirë (REL) se përmbytja ishte pasojë e shiut të rrëmbyeshëm dhe “rritjes së nivelit të ujit në lumin Mirusha dhe një dege të lumit, që si pasojë ka qenë i pamundur shkarkimi i ujit”.
Të nesërmen, nënkalimi u lëshua për qarkullim, pas pastrimit të ujit që, sipas komunës, u bë nga kompania komunale e pastrimit.
Komuna nuk i ka vënë faj punimeve të nënkalimit për këtë përmbytje, ndonëse ka thënë se pranimi teknik për këtë projekt nuk ka përfunduar në tërësi.
“Përurimi është bërë për rrugët, [që është] një pjesë e projektit, ndërsa projekti si tërësi nuk është i përfunduar”, thotë zyra për informim e komunës, duke mos specifikuar se a është bërë pranimi teknik i nënkalimit.
Pranimi teknik është procedurë përfundimtare për secilin projekt ndërtimor kur bëhet vërtetimi se punët janë kryer siç janë paraparë në projekt, apo kontratë.
“Në gjuhën inxhinierike quhet ‘leja e shfrytëzueshmërisë’. Shërben më së shumti te objektet banesore. Nënkalimet janë objekte më të vogla, por gjithsesi kërkohet pranimi teknik, sepse është rregull”, thotë Naser Kabashi, profesor i Fakultetit të Ndërtimtarisë në Universitetin e Prishtinës.
Megjithatë, sipas profesorit, në rastet e vërshimeve të strukturave ndërtimore si te nënkalimet, më shumë ka të bëjë me mosplanifikim të përballimit të reshjeve me intensitet të lartë dhe kohë të shkurtër, gjatë projektimit.
“Pamundësia e gëlltitjes së ujit në këto kapacitete ka rezultuar në këtë [mbushjen me ujë], sipas rasteve të përgjithshme, pa u ndalur në raste specifike që mund të kenë ndonjë element të veçantë”, thekson ai për REL-in.
Në anën tjetër, as nga kompania “B Famis” nuk ka pasur ndonjë reagim lidhur me këtë çështje, edhe pas pyetjeve të dërguara nga REL-i.
Një punëtor i kësaj kompanie, që foli me REL-in nga numri zyrtar i kompanisë, tha se kompania “gjendet në pushim deri më 15 janar”.
Në kontratën për ndërtimin e këtij projekti, që REL-i e ka siguruar, në punëkryerje parashihet edhe drenazhimi, sistemet e shkarkimit të ujit, ndonëse nuk ka detaje të tjera specifike që kanë të bëjnë me situata si ajo e vërshimeve.
Në rrjetet e saj sociale, kompania ka reklamuar në vazhdimësi projektin dhe punën e tyre në të.
Si u fitua kontrata për realizimin e këtij projekti?
Në fund të vitit 2022, komuna e Malishevës hapi tenderin për ndërtimin e këtij projekti që e kishte paraparë të kushtonte rreth 8.9 milionë euro.
Tenderi ishte i hapur dhe kriter kryesor për fitimin e tij ishte çmimi më i ulët në ofertë.
Në këtë thirrje pati dy ofertues.
Njëra ishte kompania “B Famis” nga Suhareka në konsorcium me dy kompani tjera “Eskavatori” dhe “Best Company”. Oferta e tyre ishte rreth 8.2 milionë euro.
Pronar i kompanisë “B Famis” është Bekim Bytyçi.
Ndërsa, ofertuesi i dytë ishte kompania “Famis Co”, po ashtu nga Suhareka së bashku me një kompani tjetër “Bamirs”, me ofertë rreth 7.7 milionë euro.
Pronarë të kompanisë “Famis Co” janë Avdullah Bytyçi, Fadil Bytyçi dhe Hamdi Bytyçi.
Tenderin e fitoi “B Famis”, ndonëse pati ofertën më të lartë, pasi që komuna e shpalli ofertuesin e dytë “të papërgjegjshëm”, me arsyen se i mungonin disa nga dokumentacionet dhe kriteret që kërkoheshin në tender.
Ndër to, sipas komunës, ishin disa dokumentacione për përvojat e punës së inxhinierëve në projekt, pastaj dëshmitë e përvojave paraprake e deri te mungesa e disa pajisjeve të caktuara.
Përfundimisht më 12 janar, 2023, “B Famis” nënshkroi kontratën për këtë projekt.
Si janë të lidhura këto dy kompani mes vete?
“B Famis” dhe “Famis Co” në të kaluarën kanë qenë një kompani e vetme e themeluar dhe e udhëhequr kryesisht nga anëtarë të familjes Bytyçi.
Historia e tyre shkon prapa deri në vitet e ‘70-ta dhe ndër vite kompania ndryshoi emrin disa herë.
Ky është informacion publik që të dy kompanitë e kanë të shkruar në historikun e përmbledhur në uebfaqet e kompanive.
Tek në vitin 2022, kompania, që quhej “Famis Co”, ndahet dhe krijohet kompania “B Famis”, e cila u regjistrua zyrtarisht më 19 maj 2022, disa muaj para se të fitonte tenderin për projektin në Malishevë.
Përveç tenderit kryesor për ndërtimin e nënkalimit dhe infrastrukturës përcjellëse, komuna e Malishevës, më 2025 hapi edhe një tender tjetër për punë shtesë në këtë projekt.
Kësaj radhe, tenderi nuk u hap për ofertues, por iu dha me negocim kompanisë “B Famis”.
Vlera e këtij tenderi ishte rreth 823.000 euro.
Ligji për Prokurimin Publik e lejon që institucionet të japin tender me negocim vetëm me arsyetim specifik se pse ka qenë e nevojshme.
REL-i ka pyetur komunën e Malishevës se pse ka qenë e nevojshme për këto punë shtesë dhe pse ky tender nuk ishte i hapur për ofertues të tjerë, por nuk ka marrë përgjigje.
“Formë klasike e manipulimit të ofertave”
Albulena Ndrecaj, drejtoreshë e organizatës INPO, e cila kryen hulumtime dhe raporte mbi prokurimin në Kosovë, e përshkruan situatën kur dy kompani të njëjta, ose me lidhje mes vete, garojnë në të njëjtin tender si “praktikë e kamotshme në Kosovë”.
“Kjo është forma më klasike e manipulimit të ofertave në prokurim publik, ku shpeshherë një përfitues i vetëm ka dy apo tri kompani dhe bën oferta me matematika të ndryshme në mënyrë që të fitojë oferta më e shtrenjtë”, thotë ajo.
Sipas Ndrecajt, përgjegjësia për ruajtjen e parasë publike bie mbi autoritetin kontraktues, në këtë rast komuna.
“Autoritetet kontraktuese në përgjithësi i njohin të gjithë operatorët ekonomikë. Operatori ekonomik e ka një qëllim të vetëm, përfitimin e kontratës. I takon Autoritetit kontraktues që të detektojë në rast që kompanitë bëjnë devijime ligjore”, thotë Ndrecaj.
Sa i përket faktit që në tenderin me dy ofertues, njëri është shpallur i papërgjegjshëm, Ndrecaj thotë se ndonjëherë kjo bëhet qëllimshëm.
“...sepse një operator ekonomik që, ta zëmë, ka kontrata milionëshe me shtetin apo autoritete të tjera kontraktuese, është nonsens [nuk ka kuptim], që në një procedurë tjetër të tenderit të shpallet i papërgjegjshëm për shkak të mungesës së ndonjë dokumentacioni apo mosplotësimit të kriterit”, nënvizon ajo.
Në uebfaqen e kompanisë “Famis Co”, si projekte të tyre janë paraqitur edhe të tilla si, unaza e jashtme në komunën e Prishtinës dhe një mbikalim në fshatin Komoran të Drenasit.
REL-i ka dërguar pyetje lidhur me këtë çështje te kompania “Famis Co”, por deri në momentin e publikimit të këtij artikulli, nuk ka pranuar përgjigje.
REL-i i ka shkruar edhe Komisionit Rregullativ të Prokurimit Publik për të kërkuar interpretim lidhur me atë se a përbën shkelje kjo situatë, por ende nuk ka marrë përgjigje.
Agjencia e Menaxhimit Emergjent ka dhënë raportin e fundit lidhur me situatën pas vërshimeve në vend.
AME thekson situata është e menaxhueshme dhe nuk ka indikacione për përshkallëzim.
Periudha e raportimit është nga ora 22:00 e së premtes deri në orët e mëngjesit të së shtunës.
Lexoni të plotë njoftimin:
Sipas informatave të pranuara nga Qendrat Operative Emergjente 112, NJPZSH-të, DSHPE-të dhe raportimeve të qytetarëve, situata e vërshimeve në nivel vendi gjatë intervalit kohor të raportimit paraqitet kryesisht stabile dhe e menaxhueshme.
Pas rënies së intensitetit me të reshura të shiut dhe fillimit të reshjeve të borës, në shumicën e rajoneve është vërejtur përmirësim i dukshëm i gjendjes, me rënie graduale të nivelit të ujit në lumenj dhe përrenj.
Nuk raportohet për humbje jete.
GJENDJA SIPAS RAJONEVE
Rajoni i Prishtinës
- Prishtinë: vërshime në rrugën “Rifat Berisha” (Kodra e Diellit) dhe në fshatin Hajvali – rruga “Brigada 153”.
- Lipjan: vërshime në fshatin Smallush – rruga “11 Qershori”.
- Shtime: vërshime në rrugën Shtime–Reçak.
- Graçanicë: vërshime në Motel “Villa Hilton” dhe rrugën te Prishtina Mall.
- Fushë Kosovë, Obiliq, Drenas, - Podujevë: situata e qetë, pa raste për ndërhyrje.
Të gjitha intervenimet janë realizuar nga NJPZSH, DSHPE dhe kompani të kontraktuara nga Komunat.
Rajoni i Prizrenit
- Prizren, Suharekë, Rahovec, Mamushë: pa thirrje dhe pa intervenime; rrugët të kalueshme.
- Malishevë: dy intervenime për rrugë të bllokuara nga uji.
- Dragash: një intervenim teknik në fshatin Rapçë (pusetë e bllokuar).
Rajoni i Mitrovicës
- Mitrovicë: në kompleksin “Amina” është evakuuar një familje nga NJPZSH;
-aktualisht gjendja është më e qetë dhe pa rrezik të menjëhershëm për vërshime të reja.
- Skenderaj & Vushtrri: pa raste që kërkojnë ndërhyrje.
- KEK – Termocentrali Kosova A: në orën 07:05 është kërkuar intervenim urgjent për pompë thithëse me kapacitet të madh; kërkesa është adresuar dhe NJPZSH ka intervenuar.
Rajoni i Pejës
- Pejë, Deçan, Klinë, Istog, Junik: situata stabile, pa kërkesa për intervenim.
Trafiku:
Pejë–Rugovë: segmente me ujë në rrugë – kërkohet kujdes i shtuar.
Pejë–Kullë: e kalueshme, me kujdes.
Rajoni i Gjakovës
Situata e qetë dhe stabile.
Niveli i ujit në lumenj ka filluar të bie.
Raportohet një bllokim rruge nga shembja e dheut.
Rajoni i Gjilanit
- Gjilan: vërshim në rrugën e Kufcës.
- Komunat tjera (Ferizaj, Kamenicë, Viti, Kaçanik, Hani i Elezit, Shtërpcë, Artanë/Novobërdë, Kllokot, Partesh, Ranillug): pa vërshime, situata e qetë.
KËRKESA DHE NDËRHYRJE SPECIFIKE
Kërkesë urgjente nga KEK për pompë thithëse me kapacitet të madh në Kosovën A – e adresuar dhe e realizuar nga kapaciteti i Agjencise Menaxhimit Emergjent.
Nuk janë pranuar kërkesa shtesë për ndihmë apo koordinim nga komunat gjatë intervalit 22:00–08:00.
VLERËSIMI I SITUATËS
Situata paraqitet stabile dhe e menaxhueshme.
Rreziku kryesor aktual lidhet me: reshjet e borës, ngricat në rrugë, vështirësitë në qarkullim.
Nuk ka indikacione për përshkallëzim të situatës.
GATISHMËRIA INSTITUCIONALE
Qendra Operative e AME-së dhe strukturat përgjegjëse për Mbrojtje Shpëtim dhe Ndihmë mbesin në gatishmëri të plotë 24/7, për monitorim dhe reagim të menjëhershëm sipas nevojës.
Policia e Kosovës ka bërë të ditur se për shkak të sasisë së madhe të ujit në rrugën nacionale Ferizaj–Prishtinë, konkretisht në segmentin që kalon nëpër fshatin Llapnasellë, segmenti nga rrethi i “Prishtina Mall” në drejtim të Prishtinës dhe segmenti nga rrethi i “Marigona” në drejtim të Ferizajt është bllokuar plotësisht qarkullimi i automjeteve në këtë segment rrugor për një kohë të caktuar.
Policia njofton se qarkullimi i automjeteve do të devijohet dhe orientohet përmes autostradës.
Më poshtë mund t’i shiheni pamjet nga droni të rrugës nacionale Ferizaj-Prishtinë.
Ministri në detyrë i Transportit, Hysen Durmishi, ka bërë sot të ditur lidhur me gjendjen në rrugë pas reshjeve të shiut dhe vërshimeve.
Durmishi në një postim në Facebook shkruan se në rrugën Prishtinë - Ferizaj ka grumbullim të ujit si pasojë e kyçjeve ilegale në kanalet atmosferike, për çka është bllokuar qarkullimi, ndërsa tregon edhe për gjendjen në rrugë tjera të vendit.
Lexoni të plotë postimin:
Ditëve të fundit, si pasojë e reshjeve të mëdha të shiut dhe borës, janë shkaktuar disa vërshime të cilat kanë prodhuar probleme në disa rrugë të Kosovës.
Në rrugën Prishtinë - Ferizaj, ka grumbullim të ujit si pasojë e kyçjeve ilegale në kanalet atmosferike, për çka është bllokuar qarkullimi.
Ekipet tona janë në terren duke punuar në shkarkimin e ujit dhe rruga pritet të hapet për qarkullim brenda ditës.
Te nënkalimi në Mazgit, në drejtim të autostradës, ka grumbullim të ujit si pasojë e bllokimit të kanalit atmosferik. Po punohet intensivisht në zhbllokimin e rrugës.
Po ashtu, në autostradën “Ibrahim Rugova” ka rrëshqitje të dheut. Në këto momente po punohet për sanim sa më të shpejtë, në mënyrë që qarkullimi të zhvillohet normalisht.
Në Sllatinë, në rrugën Fushë Kosovë - Gjurgjicë, gjithashtu ka grumbullim të ujit në rrugë. Ekipet tona janë duke ndërhyrë në sanimin emergjent dhe shumë shpejt pritet rikthimi i qarkullimit normal.
Në rrugën Zhur–Dragash kemi lëvizje të trupit të rrugës. Është vendosur sinjalizimi përkatës dhe aktualisht qarkullimi zhvillohet në një shirit.
Kërkojmë mirëkuptimin e qytetarëve deri në sanimin e plotë të këtyre problemeve dhe, nëse është e mundur, të evitohet qarkullimi i panevojshëm në këto pika. /Telegrafi/
Login
