Kryeministri i Republikës së Kosovës, Albin Kurti, takoi banorët e Malishevës me të cilët bisedoi për qeverisjen e tij, duke nënvizuar progresin përmes luftimit të krimit e korrupsionit.
Zotimet e Kurtit për Malishevën përfshijnë investimin 3.2 milionë euro për ndërtimin e rrugës Malishevë-Kijevë.
Ndërsa KOSTT ka nënshkruar kontratën për për ndërtimin e nënstacionit energjetik për Malishevën në vlerë prej 6.7 milionë euro.
435 mijë është numri i të punësuarve, i rritur nga 350 mijë sa ka qenë para mandatit të tij, ka thënë Kurti, duke thënë se papunësia ra nga 26% në më pak se 11%.
E të diplomuarit të kenë hapësirën e merituar në tregun e punës.
Duke sjellur në vëmendje slloganin e Lëvizjes Vetëvendosje! "për siguri e begati" , Kryeministri Kurti ka folur për sundimin e ligjit dhe mbylljen e 29 rrugëve ilegale, komunave paralele, përdorimit të dinarit e prodhimit ilegal të kriptovalutave.
Sipas tij, kjo ka bërë që shteti të frymojë ndryshe në këtë katërvjeçar, për të vazhduar të njëjtën frymë edhe pas 28 dhjetorit për më shumë siguri dhe begati për të gjithë qytetarët.
Kryetari i Komunës së Malishevës, Ekrem Kastrati, ka pritur sot në takim Ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për mundësitë e bashkëpunimit në dobi të qytetarëve.
Në një njoftim të publikuar në Facebook, Kastrati e ka cilësuar takimin si të ngrohtë dhe miqësor, duke theksuar marrëdhëniet e mira ndërmjet Malishevës dhe Mbretërisë së Bashkuar.
“Sot pata kënaqësinë të mirëpres në Malishevë Ambasadorin e Mbretërisë së Bashkuar në Kosovë, mikun tim, Jonathan Hargreaves. Ishte një takim i ngrohtë e miqësor, ku biseduam për bashkëpunim në dobi të qytetarëve tanë”, ka shkruar Kastrati.
Ai ka vlerësuar lart rolin dhe mbështetjen e vazhdueshme të Britanisë së Madhe për Kosovën, veçanërisht gjatë periudhave më të vështira për vendin.
“Malisheva, me shpirtin e saj mikpritës, vlerëson lart Britaninë e Madhe për rolin dhe mbështetjen e saj në periudhat më të vështira për vendin tonë”, ka theksuar kryetari i Malishevës.
Kastrati e ka falënderuar ambasadorin Hargreaves për vizitën dhe përkrahjen e vazhdueshme ndaj komunës dhe Kosovës. /Telegrafi/
Kryetari i Lidhjes Demokratike të Kosovës (LDK) dhe kandidati për kryeministër, Lumir Abdixhiku, do të zhvillojë sot tubime elektorale në Gjakovë, Rahovec dhe Malishevë.
Gjatë këtyre takimeve, Abdixhiku do të prezantojë programin politik dhe vizionin e LDK-së për një Kosovë më të zhvilluar, më të drejtë dhe me më shumë shpresë për qytetarët.
Në kuadër të tubimeve, përveç shpalosjes së programit qeverisës, do të prezantohen edhe kandidatët e LDK-së nga këto komuna, të cilët cilësohen si figura të dëshmuara, të përkushtuara dhe të gatshme për t’i shërbyer qytetarëve me ndershmëri dhe përgjegjësi. /Telegrafi/
Humanisti dhe hoxha Halil Kastrati ka ndërmarrë një veprim humanitar të veçantë duke strehuar një të moshuar të vetmuar dhe të braktisur në komunën e Malishevës.
Sipas njoftimit të bërë nga Kastrati në Facebook, i moshuari kishte qenë i rrënuar fizikisht dhe emocionalisht, i ftohtë, i uritur dhe i izoluar, duke shfaqur shenja të qarta lodhjeje dhe dëshpërimi.
Brenda vetëm 24 orëve që pas ndërhyrjes, i moshuari është dërguar në shtëpinë e të moshuarve, ku ka marrë trajtim të plotë: është larë, është veshur, ushqyer dhe ngrohur, ndërkohë që ka marrë mbështetje dhe respekt të plotë.
“Dhe mbi të gjitha, iu kthye shpresa. Sytë që dje ishin të fikur, sot qeshin, trupi që dje mezi qëndronte, sot ecën me dinjitet,” shkruan Kastrati në postim.
Ky rast tregon fuqinë e veprave humanitare të shpejta dhe të përkushtuara, duke ndryshuar jo vetëm pamjen, por edhe jetën e një personi të braktisur.
Kastrati falënderon të gjithë bamirësit që e mbështesin këtë punë dhe i bën thirrje shoqërisë për solidaritet ndaj më të pambrojturve. /Telegrafi/
Operatori i Sistemit, Transmisionit dhe Tregut të energjisë (KOSTT) ka nënshkruar sot kontratën për ndërtimin e nënstacionit të ri 220/35/10(20) kV në Malishevë, një projekt kapital me vlerë 6,763,766.04 euro, i financuar plotësisht nga vetë kompania.
Projekti përfshin instalimin e një transformatori 40 MVA dhe linjën e re të kyçjes 220 kV, duke e lidhur për herë të parë komunën e Malishevës me rrjetin e tensionit të lartë 220 kV. Kjo nënkupton kapacitete shumë më të mëdha të furnizimit dhe një stabilitet të shtuar, krahas rrjetit ekzistues 35 kV.
Sipas KOSTT-it, investimi do të sjellë përfitime të drejtpërdrejta për qytetarët dhe bizneset e Malishevës, përfshirë cilësi më të lartë të energjisë elektrike, siguri më të madhe të furnizimit dhe mbështetje të rëndësishme për zhvillimin ekonomik lokal.
Në nivel kombëtar, nënstacioni do të rrisë besueshmërinë e operimit të sistemit, do të ulë varësinë nga linjat e tensionit të mesëm, do të reduktojë humbjet teknike dhe do të forcojë sigurinë operacionale, duke kontribuar gjithashtu në përmbushjen e kriterit rëndësishëm N-1. Projekti krijon edhe hapësirë më të madhe për integrimin e burimeve të energjisë së ripërtëritshme, në përputhje me objektivat afatgjata energjetike të vendit.
KOSTT ka paralajmëruar se afati i planifikuar për përfundimin e punimeve është rreth 13 muaj nga nisja e projektit.
Një rast i dhunës fizike është raportuar në Malishevë, ku një grua u sulmua nga ish-nusja e djalit të saj.
Sipas Policisë së Kosovës, viktima ka pësuar lëndime trupore dhe është dërguar për trajtim të mëtejshëm mjekësor.
"Është raportuar se viktima femër kosovare, është sulmuar fizikisht nga ish-nusja e djalit të saj. Është intervistuar e dyshuara e cila më pas me vendim të prokurorit është liruar", thuhet në njoftimin e policisë, raporton Telegrafi.
Rasti po vazhdon të trajtohet në përputhje me procedurat e rregullta ligjore. Policia dhe prokuroria po punojnë për sqarimin e plotë të rrethanave që kanë çuar deri te ky incident.
Autoritetet theksojnë rëndësinë e parandalimit të dhunës në familje dhe kujdesin ndaj viktimave, duke inkurajuar raportimin e menjëhershëm të çdo rasti të ngjashëm. /Telegrafi/
KRU “Hidroregjioni Jugor” Sh.A në Prizren ka njoftuar se ekipet inspektuese po vazhdojnë aksionin e gjerë të shkyçjeve nga rrjeti i ujësjellësit për të gjithë konsumatorët që nuk kanë shlyer detyrimet financiare, pavarësisht njoftimeve dhe mundësive të ofruara më herët për pagesë.
Vetëm gjatë ditës së sotme, kompania ka realizuar gjithsej 61 shkyçje: – 39 në Prizren, – 14 në njësinë e Suharekës, – 8 në njësinë e Malishevës.
Në njoftim theksohet se nuk do të ketë më falje apo tolerim për konsumatorët që vazhdojnë të mos e përmbushin obligimin e pagesës së ujit, ndërsa paralajmërohet se aksioni do të vazhdojë në të gjitha zonat operuese.
Kompania ka kërkuar nga qytetarët që t’i kryejnë pagesat me kohë për të shmangur masa të mëtejshme shkyçjeje. /Telegrafi/
Drejtoria e Buxhetit dhe Financave në Komunën e Malishevës ka rikujtuar të gjithë tatimpaguesit që ende nuk e kanë realizuar pagesën e tatimit në pronë për vitin 2025, që ta bëjnë këtë obligim brenda afatit ligjor – deri më 31 dhjetor 2025.
Sipas njoftimit zyrtar, qëllimi është shmangia e llogaritjes së gjobave dhe interesit për vitin 2026, të cilat do të aplikohen automatikisht nëse pagesa nuk kryhet në kohë.
Në rast të vonesave, parashihet zbatimi i këtyre masave ndëshkuese:
Gjobë prej 10% mbi shumën e tatimit të papaguar;
Interes mujor prej 0.65% mbi shumën e mbetur të papaguar.
Drejtoria ka ftuar qytetarët që të kryejnë obligimet e tyre dhe ka shprehur gatishmërinë për bashkëpunim.
Njoftimi është lëshuar më 4 dhjetor 2025, nga Zyra e Tatimit në Pronë e Komunës së Malishevës. /Telegrafi/
Dy persona të maskuar dhe nën kërcënimin e armëve i kanë grabitur rreth 800 euro para të gatshme dhe DVR-në e kamerave një personi.
Në raportin 24 orësh të Policisë së Kosovës bëhet e ditur se rasti ka ndodhur të mërkurën rreth orës 02:40, në Malishevë.
Tutje bëhet e ditur se personat e maskuar janë larguar në drejtim të panjohur.
“Është raportuar se dy persona të maskuar nën dhe nën kërcënimin e armëve i kanë grabitur rreth 800 € para të gatshme dhe DVR-në e kamerave viktimës mashkull kosovar, dhe janë larguar në drejtim të panjohur. Rasti është duke u hetuar”, thuhet në raport. /Telegrafi/
Nxënësit e klasës së katërt dhe të pestë të shkollës fillore “Kajtaz Ramadani”, paralelja e ndarë në fshatin Stapanicë të Komunës së Malishevës, prej më shumë se dy muajsh po përballen me mungesë të mësimdhënësve, duke mos zhvilluar me rregull procesin mësimor. Kjo situatë ka revoltuar prindërit, të cilët e konsiderojnë si torturë për fëmijët që vijnë në shkollë, por largohen pa mbaruar orarin. Megjithatë, drejtori i Arsimit në Malishevë, Sabit Berisha, thotë se problemi pritet të zgjidhet së shpejti.
Në shkollë vijnë me orar por dalin pa përfunduar i tëri.
Kjo pasi këta nxënës të klasës së 4-të të shkollës fillore “Kajtaz Ramadani”, paralele e ndarë në fshatin Stapanicë të Komunës së Malishevës nuk kanë mbajtur mësim tash e 2 muaj.
Me të njëjtin problem po përballën edhe nxënësit e klasës së pestë si pasojë e mungesës së mësimdhënësve.
“Në shkollë vina për çdo ditë, mësim nuk mbajmë që dy muaj ditë. Veç po vijmë e po kthehemi pas nuk po vijnë mësuesit”, ka theksuar Luan Veselaj, nxënës i klasës së 4-të.
“Mësim nuk mbajmë tash e dy muaj se nuk na vjen mësuesja”, ka thënë Ronela Krasniqi, Nxënëse e klasës së 4–të.
Mosmbajtja e mësimit tash e 60 ditë i ka revoltuar prindërit e të miturve.
“Jemi të shqetësuar për shkak të neglizhencës së mësimit, klasa e 4-të dhe e 5-të shkaku i mësueses që ka qenë më herët ajo është në pushim të lehonisë. DKA e Malishevës e ka hapur konkursin për me pru me dhanë mësim e kanë refuzu e kanë hapë konkursin tjetër. Këtu në realitet nuk është duke u mbajtë mësim tash e dy muaj”, ka theksuar Shaban Musaj, prind.
Madje dikush prej tyre po e konsideron këtë situatë torturuese për fëmijët.
“I sjellim fëmijët këtu i lëmë në lagështi edhe ju thonë shkoni nga shtëpia. Taman shkojmë te shtëpia na thojnë hajdeni merrni djalin pasi nuk ka mësim, ai nuk është veç tash por qe 3 muaj nuk kanë mësim fëmijët”, ka deklaruar Hazir Veselaj, prind.
Por sipas u.d së drejtorit të drejtorisë së Arsimit në Komunën e Malishevës, Sabit Berisha, ky problem do të zgjidhet shpejt.
“Ne e kemi hapë konkursin menjëherë për Stapanicë por procedurat për hapjen e konkursit merr kohë. Jemi në finalizim. Sigurisht që në momentin që do fillojmë punën me mësuesin e ri do konsultohemi për të bërë kompensim të orëve”, ka deklaruar Sabit Berisha, U.d i drejtorit të DKA-së.
Sipas tij kjo situatë pritet të zgjidhet të hënën./Tv Dukagjini
kru Hidroregjioni Jugor ka njoftuar se ekipet e Inspektoratit të kompanisë kanë identifikuar dhe shkyçur gjithsej 15 lidhje ilegale nga rrjeti i ujësjellësit, gjatë aksioneve të zhvilluara javën e kaluar në tri komuna.
Sipas të dhënave të kompanisë, rastet e evidentuara janë regjistruar në: Prizren – 9 lidhje ilegale, Suharekë – 5 lidhje ilegale, Malishevë – 1 lidhje ilegale, përcjell Telegrafi.
Nga kompania thonë se aksionet për identifikimin dhe ndërprerjen e lidhjeve të paligjshme do të vazhdojnë edhe ditëve në vijim, ndërsa ndaj të gjithë shkelësve do të ndërmerren masat përkatëse ligjore.
Hidroregjioni Jugor apelon tek konsumatorët që të respektojnë rregullat dhe të shmangin veprimet e jashtëligjshme, të cilat dëmtojnë furnizimin e drejtë dhe të rregullt me ujë për të gjithë qytetarët.
Kompania falënderon qytetarët për mirëkuptimin dhe bashkëpunimin. /Telegrafi/
Të dyshuarit për vrasjen e dyfishtë në Malishevë, Astrit Isufi i është caktuar masa e paraburgimit prej një muaji. E kaluara kriminale e tij, tregon se Isufi ishte dënuar më herët për dhunë në familje, dënim i cili më pas i ishte ulur. Për recidivistët, avokatët theksojnë nevojën e ashpërsimit të dënimeve, gjersa Instituti i Kosovës për Drejtësi thekson se bazuar në monitorimin e tyre, gjykatat karakterizohen me shqiptim të dënimeve të buta.
Një muaj paraburgim i ka caktuar Gjykata Themelore e Gjakovës Astrit Isufit, i dyshuar për vrasjen e dy vëllezërve të gruas së tij në Golluboc të Malishevës.
Seanca u mbajt në Qendrën Klinike Universitare të Kosovës para gjyqtarit të procedurës paraprake, ku i dyshuari ka qenë duke u trajtuar deri sot pasdite.
Siç thuhet në kërkesën e Prokurorisë për caktimin e masës së paraburgimit, shkak i këtij incidenti ishte bërë një fjalosje mes palëve, kur Isufaj kishte shkuar ta merrte bashkëshorten pas ceremonisë së varrimit të babait të saj.
Vëllezërit e saj, tani të ndjerë, kishin nisur një fjalosje marrë parasysh dhunën e ushtruar ndaj motrës së tyre nga Isufaj, fjalosje kjo që dyshohet se çoi deri tek të shtënat.
Por i dyshuari Isufaj, përballjen me organet e drejtësisë nuk e ka për herë të parë.
Në prill të këtij viti, ai ishte arrestuar për dhunë në familje ndaj gruas së tij për çka, ishte dënuar me 5 muaj burgim burgim dhe 800 euro gjobë. Por, dënimi i ishte ulur nga Gjykata e Apelit në prill të këtij viti, në 3 muaj burgim e që ndërkohë, i ishte ngritur aktakuzë tjetër për dhunë në familje.
Për recedivistët, avokatë vlerësojnë se ka nevojë që dënimet të ashpërsohen, e jo të ulen.
”Fakti që po përsërisin veprat, duhet rishikuar politika ndëshimore por edhe politika e ekekzutikimit të sanksioneve penale. E dhe me rastin e përcaktimit të shkallës, lartësisë së dënimit, recedivizmi apo përsëritja e veprës është një prej rrethanave rënduese që gjykata duhet ta marrë parasysh në lartësinë e dënimit. Duhet rishikuar dhe ashpërsuar sanksionet penale për veprat penale me theks të veçantë ato që kanë të bëjnë me “dhunën në familje” për faktin se një fenomen i tillë është mjaft i shpeshtë në shoqërinë tona. Ndërsa në rastin konkret kur kemi të bëjmë me elementet e vrasjes së rëndë, shkalla e ndëshkueshmërisë është jo më pak se 10 vite burgimi mirëpo mund të shkojë edhe me burgim të përjetshëm”, ka thënë Ardian Bajraktari-Avokat.
Gjatë monitorimit të proceseve gjyqësore, Instituti i Kosovës për Drejtësi ka theksuar se në rastet e politikave ndëshkimore të rasteve penale, gjyqtarët karakterizohen me ndëshkime të buta.
“Gjetjet kryesore të IKD-së për veprat e armëmbajtjes pa leje në periudhën 2022-2024 shumica e dënimeve ishin me gjobë, ndërsa dënimet me burgim janë jashtëzakonisht të rralla. Konkretisht: nga 147 raste të analizuara, 128 dënime ishin me gjobë, 18 me burgim me kusht, dhe vetëm 1 rast me burgim efektiv. Gjyqtarët duhet të ndalojnë praktikën ku kanë më shumë mëshirë për kryesin e veprës penale se sa për viktimën e krimit”, ka thënë Ehat Miftaraj – Drejtor ekzekutiv i Institutit të Kosovës për Drejtësi.
Mes të tjerash, IKD thotë se gjetjet e saj tregojnë se gjykatat aplikojnë më shpesh rrethanat lehtësuese.
Ndërkaq, aplikimi i rrethanave rënduese, sipas Institutit, është shumë i rrallë ose, jo i argumentuar mjaftueshëm./TV Dukagjini
Rrahje me kabllo, kërcënime se do t’i vrasë familjen, paralajmërime se mbante armë në të kaluarën, KALLXO.com ka arritur që të zbuloj detaje për ngjarjen që ishte regjistruar në mars të këtij viti e ku viktimë ishte gruaja e tashmë të dyshuarit kryesor për vrasjen e vëllezërve Morina në Malishevë.
KALLXO.com raportoi më 06.11.2025, se ndaj Isufit kishte pasur një aktakuzë në prill të këtij viti për dhunë në familje e kanosje.
Për këtë ngjarje KALLXO.com zbuloi se ekzistonte edhe një vendim i Gjykatës Themelore të Prishtinës për çka e dënonte Isufin për rrahjen dhe kërcënimin e bashkëshortes së tij.
E madje ngjarja shkon edhe më larg kur vendoset që dënimi i Gjykatës së Prishtinës të ndryshohet nga Gjykata e Apelit, dënimi ulet duke vlerësuar se ka arritur efektin e përgjegjësisë së të dënuarit.
Isufi ishte dënuar nga Gjykata Themelore e Prishtinës më 07.04.2025.
Në vendimin që ka siguruar KALLXO.com jepen detaje të ngjarjes së dhunës në familje dhe kanosjes ndaj bashkëshortes së tij. Dosja përshkruan se Astrit Isufi më 30 mars 2025, rreth orës 15:00 por edhe në të kaluarën kishte rrahur gruan e tij e kishte kërcënuar që nëse ndahet nga ai do t’ia vrasë familjen.
Ky paralajmërim është theksuar edhe në dosjen e gjykatës për vendimin që i ishte dhënë me burgim.
E rrahu gruan në ditën e festës së Bajramit
Më 30 mars 2025, Astrit Isufi sipas dosjes së gjykatës rreth orës 06:00 të mëngjesit përderisa gruaja e tij e kishte përgatitur drekën e festës së Brajramit, i pandehuri ishte zgjuar nga gjumi e kishte thirrë gruan e tij dhe e kishte goditur me peshqir në trup duke i kërkuar të njëjtës që t’i zgjoj fëmijët nga gjumi.
Gruaja kishte shkuar të fëmijët por ata nuk ishin zgjuar e ishte kthyer sërish te Astrit Isufi për t’i treguar.
Dosja që ka siguruar KALLXO.com tregon se Astrit Isufi ishte nervozuar e më pas kishte nisur ta sulmoj gruan e tij me shuplakë e grushte në fytyrë e trup.
Disa orë më vonë, kur Astrit Isufi ishte kthyer në shtëpi pasi kishte shkuar të përshëndes familjarët për festën e Bajramit, kishte kërkuar ushqim nga gruaja e tij dhe kjo e fundit i kishte thënë se mungonte një produkt ushqimor e kjo më pas sërish kishte qenë një sherr i cili shkaktoi dhunën fizike të dytë brenda ditës nga Astrit Isufi te bashkëshortja e tij.
Dosja shpjegon se kur kishte marrë vesh Astriti se mungon një produkt, i kishte marrë pjatat e ushqimit dhe i kishte gjuajtur në tokë e më pas e kishte kap gruan e tij për dore e kishte tërhequr zvarrë e kishte futur brenda dhomës dhe kishte nisur ta qëlloj me një kabllo të rrymës në pjesë të ndryshme të trupit.
Në ato momente vajza e tyre kishte hyrë brenda dhomës dhe i kishte kërkuar babait të saj të ndaloj sepse ‘po e mbyste nënën’.
Ani pse kishte kërkesë nga vajza, dosja shpjegon se Astrit Isufi nuk kishte ndaluar deri sa i është dukur mjaftueshëm se e ka rrahur të dëmtuarën në këtë rast gruaja e tij dhe më pas e kishte larguar nga shtëpia.
Në po të njëjtën ditë, Astrit Isufi sipas dosjes që ka siguruar KALLXO.com e kishte kërcënuar gruan e tij dhe e kishte paralajmëruar se nëse ndahet nga ai do t’ia vrasë gjithë familjen.
“Ti nuk guxon me u nda me mua, se ka me ta vra familjen, ka me t`i faru krejt”, përshkruhet kërcënimi që i kishte bërë Astrit Isufi, gruas së tij më 30 mars 2025.
Kjo situatë të njëjtës i kishte shkaktuar ankth, frikë dhe pasiguri për jetë.
Më krejt këto veprime që Astrit Isufi kishte kryer ndaj gruas së tij, Gjykata në Prishtinë- Dega në Drenas, kishte dënuar të njëjtin me burg në kohëzgjatje me 154 ditë dhe 300 euro gjobë për dhunë në familje ndërsa për kanosje ishte gjobitur me 500 euro.
Xhelozia shkak i dhunës në familje
Pa telefon, duke përjetuar dhunë të vazhdueshme fizike, gruaja e Astrit Isufit në deklarimin e saj në seancën për caktimin e paraburgimit kishte thënë se burri i saj nuk i kishte lejuar telefon, nuk ka mundur më herët të raportoj dhunën në familje sepse nuk kishte mundësi, burri i saj ishte xheloz dhe i njëjti nuk ia kishte dashur familjen gruas së tij dhe i kishte thënë shumë herë që ‘nuk kanë çka lypin këtu’.
KALLXO.com zbuloi se gruaja kishte informuar organet e rendit muaj më parë se burri i saj kishte një armë të cilën e posedonte kohë më parë.
Ajo pas ngjarjes kishte qëndruar te familja e saj ndërsa fëmijët te babai për shkak që të mos ndërpritej shkollimi i tyre.
Për vendimin e Themelores, Astrit Isufi ishte ankuar në Apel
Astrit Isufi ishte dënuar me rreth 5 muaj nga Gjykata Themelore e Prishtinës ndërsa Gjykata e Apelit kishte bërë ndryshim të vendimit të shkallës së parë duke i ndryshuar edhe kohëzgjatjen e dënimit nga 5 në 3 muaj për rrahjen brutale të gruas së tij si dhe kërcënimet ndaj të njëjtës.
KALLXO.com zbulon se Gjykata e Apelit më 26.06.2025 kishte marrë vendim që të aprovoj ankesën e mbrojtësit të Astrit Isufit.
Gjykata e Apelit kishte vendosur që në total t’i jap Astrit Isufit dënim me burg 3 muaj dhe gjobë prej 300 euro për dhunë në familje ndërsa nuk kishte ndryshuar dënimin me gjobë për veprën penale të kanosjes.
Për vendimin e Gjykatës Themelore të Prishtinës, kishte bërë ankesë avokati i Astrit Isufit, Muhamet Binaku.
Në përgjigjen në ankesë ishte paraqitur edhe përfaqësuesi i gruas së Astritit, Faik Morina duke treguar se gruaja ishte kthyer në shtëpinë e përbashkët me Astritin në Komoran te fëmijët e saj më 22.04.2025 me marrëveshjen e dy palëve të familjes.
Gjykata e Apelit kishte mbajtur edhe seancën e kolegjit dhe kishte shqyrtuar ankesën e cila nuk ishte për shkelje esenciale të vendimit por për ndryshimin e saj.
Mbrojtësit e dy palëve në këtë rast Astrit Isufit dhe gruas së tij kishin mbështetur kërkesën që të shqiptohej një dënim alternativ siç është ai me kusht.
Gjykata e Apelit kishte shqyrtuar të gjithë situatën dhe kishte ardhur në përfundim që t’i ulte dënimin me burgim të dënuarit Astrit Isufit nga 5 muaj në tre muaj burgim duke shtuar se ky dënim është më i butë është në harmoni me intensitetin e rrezikshmërisë shoqërore të kryerjes së veprës penale me shkallën e përgjegjësisë së të akuzuarit dhe kjo do të shërbej si preventivë gjenerale.
Kush është Astrit Isufi?
Astrit Isufi deri më tani dyshohet se është i dyshuari kryesor për vrajsen e dy vëllezërve të gruas së tij në fshatin Gollubovc të Malishevës.
Deri më tani ende nuk janë të qarta rrethanat që çuan deri te vrasja por që nga Policia është konfirmuar se i njëjti është i plagosur po ashtu.
Në vendin e ngjarjes ishin gjetur dy armë ndërsa për më shumë se 15 orë, Isufi ishte në arrati ndërsa u arrestua më 07.11.2025 në fshatin Plloçicë.
Ai aktualisht ndodhet në Qendrën Klinike Universitare të Kosovës duke marrë tretman mjekësor ndërsa gjendja e tij është stabile. /Telegrafi/
Një vrasje e dyfishtë ka ndodhur ditën e enjte në fshatin Golluboc të Malishevës, ku të vrarë mbetën dy vëllezër. I dyshuari për këtë ngjarje është dhëndri i viktimave. Autori i vrasjes, Astrit Isufi fillimisht kishte ikur nga vendi i ngjarjes, ndërsa sot policia ka arritur ta arrestojë atë. Lajmin e ka konfirmuar për Telegrafin, […]
Një vrasje e dyfishtë ka ndodhur ditën e enjte në fshatin Golluboc të Malishevës, ku të vrarë mbetën dy vëllezër. I dyshuari për këtë ngjarje është dhëndri i viktimave.
Autori i dyshuar për vrasje fillimisht kishte ikur nga vendi i ngjarjes, ndërsa sot policia ka arritur ta arrestojë atë.
Lajmin e ka konfirmuar për Telegrafin, drejtori i Policisë rajonale në Gjakovë, Lumni Graishta.
"Po sot rreth orës 06:30 është arrestuar i dyshuari, ai ka qenë i plagosur, pas ndihmës së parë që i është dhënë, ai është dërguar për trajtim në QKUK", tha Graishta.
Arrestimin e të dyshuarit e ka konfirmuar edhe Prokuroria Themelore në Gjakovë.
"Prokuroria Themelore në Gjakovë, njofton opinionin publik, se lidhur me rastin e vrasjes së dyfishtë të ndodhur në fshatin Golluboc, Komuna e Malishevës, është arrestuar personi i dyshuar A.I., i cili më parë kishte qenë në arrati. Lidhur me rastin, Policia e Kosovës, në koordinim të plotë me Prokurorin e Shtetit, është duke ndërmarrë të gjitha veprimet e nevojshme", thuhet në njoftim.
Tutje, Prokuroria thotë se brenda afatit të paraparë ligjor, ndaj të dyshuarit A.I., do të paraqitet kërkesa për caktimin e masës së paraburgimit në Gjykatën kompetente.
Ndryshe, personi i dyshuar, me inicialet A.I, dyshohet se ka vrarë dy vëllezërit në oborrin e shtëpisë së tyre.
Mësohet se i dyshuari, ka pasur edhe më parë probleme me ligjin, ndaj të cilit Prokuroria në Prishtinë kishte ngritur aktakuzë ndaj tij për veprat penale "Dhunë në familje", dhe "Kanosje".
"Lidhur me pyetjen tuaj ju njoftojmë se prokurori i shtetit ndaj personit te dyshuar A.I., më datë 06.04.2025, është paraqitur kërkesa për caktimin e masës se paraburgimit, e cila po të njëjtit iu është caktuar nga gjykata kompetente. Po ashtu me datë 07.04.2025, Prokuroria Themelore ne Prishtine, ka ngritur aktakuzë ndaj të pandehurit A.I., për veprat penale “Dhunë ne familje” sipas nenit 248 të Kodit Penal të Republikës së Kosovës, dhe “Kanosje” në bazë të nenit 181 të KPRK-së", ka konfirmuar për Telegrafin, Kaltrina Shala, zëdhënëse e Prokurorisë Themelore në Prishtinë.
Ndryshe, policia më herët ka konfirmuar se vrasja e dyfishtë ka ndodhur rreth orës 11:00./Telegrafi/
Dy vëllezër të moshës madhore janë vrarë me armë zjarri të enjten në fshatin Golluboc të Malishevës.
Autoritetet konfirmojnë se i dyshuari Astrit Isufi, nga fshati Stankoc i Drenasit i cili është në arrati, kishte të kaluar kriminale.
Sipas Policisë së Kosovës, incidenti ka ndodhur të enjten para mesditës.
Zëdhënësi i policisë për rajonin e Gjakovës, Sheremet Elezi, ka thënë se viktimat janë dërguar në Qendrën e Mjekësisë Familjare në Kijevë, ku mjekët kanë konstatuar vdekjen e tyre.
Personeli mjekësor në QMF ka konstatuar vdekjen e viktimave.
Njësitë e nevojshme policore i janë përgjigjur menjëherë rastit dhe kanë dalë në vendin e ngjarjes, tha Elezi.
Hetimet dhe e kaluara e të dyshuarit
Nga Prokuroria Themelore në Prishtinë është konfirmuar se i dyshuari A.I. kishte qenë më parë nën hetime dhe kishte të kaluar kriminale.
Zëdhënësja e prokurorisë, Kaltrina Shala, ka deklaruar se ndaj tij ishte ngritur aktakuzë për dhunë në familje dhe kanosje më 7 prill të këtij viti, ndërsa paraprakisht, më 6 prill, ishte kërkuar caktimi i paraburgimit ndaj tij.
Prokurori i Shtetit ndaj personit të dyshuar A.I., më 06.04.2025 është paraqitur me kërkesë për caktimin e paraburgimit, e cila i është aprovuar nga gjykata kompetente.
Po ashtu, më 07.04.2025 është ngritur aktakuzë ndaj tij për veprat penale ‘dhunë në familje’ dhe ‘kanosje’, tha Shala.
Prokuroria e Gjakovës: Motiv i paqartë, dorasi në arrati
Kryeprokurori i Prokurorisë Themelore në Gjakovë, Enis Gashi, tha se ende nuk dihet motivi i saktë i ngjarjes, ndërsa theksoi se policia është në kërkim të autorit.
Kemi të bëjmë me një vrasje të rëndë, të dyfishtë. Kryerësi është ende në arrati dhe policia, në bashkëpunim me prokurorinë, po ndërmerr të gjitha masat që sa më shpejt të identifikohet dhe të sigurohet prezenca e tij, tha Gashi.
Ai konfirmoi se viktimat dhe i dyshuari kishin raporte familjare, ndërsa drejtori i policisë për rajonin e Gjakovës, Lumni Graishta, deklaroi për mediat lokale se i dyshuari është dhëndri i viktimave.
"Tani për tani s’mund të japim informacione shtesë, sepse duhet të bëjmë verifikimet. Ajo që mund të them është se viktimat dhe i dyshuari kanë raporte familjare, por motivin ende nuk e dimë saktësisht, theksoi Gashi.
Vrasjet e fundit në Kosovë
Ky rast i rëndë vjen vetëm pak muaj pas një vale vrasjesh që tronditi vendin – pesë persona u vranë vetëm gjatë muajit gusht të 2024-ës në pjesë të ndryshme të Kosovës.
Sipas të dhënave nga Policia e Kosovës, vitin e kaluar në Kosovë u regjistruan 17 vrasje, ndërkaq më 2023 u regjistruan 29 të tilla.
Ekspertët e fushës së sigurisë thonë se numri i vrasjeve tregon se çështja e armëmbajtjes është bërë alarmante, duke kërkuar që të kenë një qasje më gjithëpërfshirëse, përfshirë këtu edhe ndërgjegjësimin e të rinjve për pasojat e armëve.
Në Kosovë ka ligj për pajisjen me leje për armë, që përcakton se kush dhe nën çfarë kushtesh mund të pajiset me armë zjarri.
Ligjet po ashtu parashohin dënime me gjoba dhe me burgim për poseduesit e armëve pa leje.
Në vend llogaritet se janë mbi 230.000 armë pa leje në duart e qytetarëve.
Policia tha se në baza vjetore konfiskon mesatarisht rreth 1.500 armë pa leje.
Një burrë ka humbur jetën mëngjesin e së hënës në fshatin Llapçevë të Malishevës.
Zëdhënësi i Policisë për rajonin e Gjakovës, Sheremet Elezaj, konfirmoi se viktima ishte gjetur fillimisht në gjendje të rëndë shëndetësore dhe më pas ishte dërguar në Qendrën e Mjekësisë Familjare në Malishevë, ku mjekët kanë konstatuar vdekjen e tij.
“Sot rreth orës 07:20, në fshatin Llapçevë-Malishevë, është gjetur në rrugë një person mashkull i moshës madhore në gjendje të rënduar shëndetësore. Në vendngjarje kanë dalë njësitet policore dhe ekipi mjekësor. Viktima është dërguar në QKMF Malishevë, ku edhe ka ndërruar jetë. Në konsultim me Prokurorin e Shtetit, është iniciuar rasti ‘Hetim i vdekjes’, ndërsa policia po punon për sqarimin e rrethanave të ngjarjes”, tha Elezaj.
Drejtoria për Bujqësi, Pylltari dhe Zhvillim Rural e Komunës së Malishevës ka njoftuar se vendimi për hapjen e sezonit të gjuetisë për vitin 2025/2026 nuk do të zbatohet në territorin e kësaj komune.
Sipas njoftimit zyrtar, ky vendim bazohet në Ligjin për Gjueti Nr. 02/L-53 dhe në procesverbalet e inspektimit të Inspektoratit të Pylltarisë dhe Gjuetisë. Drejtoria ka theksuar se masa do të mbetet në fuqi deri në një njoftim të ri, raporton Telegrafi.
Në kuadër të këtij vendimi:
Agjencioni i Pyjeve të Kosovës – Njësia në Malishevë obligohet të marrë masa për parandalimin e aktiviteteve të paligjshme të gjuetisë;
Policia e Kosovës është e njoftuar për zbatimin e këtij vendimi në tërë territorin e komunës;
Shoqata e Gjuetarëve udhëzohet të ndërpresë të gjitha aktivitetet e gjuetisë.
Drejtoria për Bujqësi, Pylltari dhe Zhvillim Rural ka apeluar që të gjithë qytetarët dhe grupet e interesuara të respektojnë këtë vendim, duke theksuar se ai është ndërmarrë për mbrojtjen e faunës dhe ruajtjen e ekuilibrit natyror në komunë. /Telegrafi/
Sot u mbushën 21 vjet nga tragjedia e Fushë Arrëzit, ku humbën jetën 15 maturantë nga Malisheva, teksa ktheheshin nga një ekskursion në Shqipëri.
Në nderim të tyre, kryetari i Komunës së Malishevës, Ekrem Kastrati, së bashku me përfaqësues të familjarëve, personelit arsimor, disa nga bashkëmoshatarët e asaj gjenerate dhe kryetarin e Bashkisë së Fushë Arrëzit, Hil Curri, zhvilluan homazhe në vendin e ngjarjes, përcjell Telegrafi.
Kastrati tha se çdo vit kjo ditë sjell të njëjtën ndjesi dhimbjeje e malli, duke kujtuar se më 14 tetor 2004 Malisheva humbi 15 të rinj plot ëndrra e shpresa.
“Kujtimi për 15 maturantët tanë mbetet i gjallë, i dhimbshëm dhe i shenjtë në zemrat tona. Qofshin të paharruar”, tha Kastrati.
Tragjedia e vitit 2004 mbetet një nga ngjarjet më të rënda që ka goditur komunën e Malishevës, ndërsa kujtimi për të rinjtë e humbur vazhdon të nderohet çdo vit në Fushë Arrëz. /Telegrafi/
Login
