KRU “Gjakova” njofton konsumatorët se për shkak të ndërprerjeve të shpeshta të energjisë elektrike, disa zona janë përballur me mungesa të furnizimit me ujë.
Sistemi i ujësjellësit në këto zona funksionon me pompa elektrike, të cilat aktualisht nuk mund të operojnë për shkak të tensionit të ulët ose ndërprerjeve të përsëritura të energjisë.
“Sapo energjia elektrike të stabilizohet, furnizimi me ujë do të rikthehet menjëherë. Kërkojmë mirëkuptimin e konsumatorëve të prekur për këtë situatë të jashtëzakonshme”, thuhet në njoftimin e KRU-së.
Aktualisht, janë të prekur Zona 3 – Rahovec, si dhe fshatrat Polluzhë dhe Pastasel. KRU “Gjakova” po monitoron situatën dhe apelon për kujdes në përdorimin e ujit deri në normalizimin e furnizimit.
Ky paralajmërim vjen në një periudhë kur ndërprerjet e energjisë elektrike në Rahovec po ndodhin 3–4 herë në ditë, duke ndikuar drejtpërdrejt në funksionimin e pompave dhe stabilitetin e sistemit të ujësjellësit. /Telegrafi/
Kampionia e Kosovës, Trepça shënoi fitore në udhëtim ndaj Rahoveci 029 me rezultat 57:110 në javën e 13-të të ProCredit Superligës.
Nga fillimi deri në fund kampionët ishin në epërsi në këtë ndeshje, duke shënuar fitore të merituar dhe duke ngritur epërsinë minutë pas minute, derisa shifrat në fund ishin 57:110.
Te vendasit Julian Roche e mbylli ndeshjen me 12 pikë e tetë kërcime, derisa te mysafirët pesë basketbollistë e mbyllën ndeshjen me pikë dyshifrore, kurse Ja'cori Payne kishte 20 pikë e katër kërcime.
Rahoveci 02 pas 13 ndeshjeve ka pesë fitore e tetë humbje, derisa mitrovicasit janë në vendin e parë me dhjetë fitore e tri humbje./Telegrafi/
Rahoveci 029 shënoi fitore shumë të rëndësishme ndaj GO+ Peja me rezultat 83:71 (23:24, 21:17, 26:16, 13:14), në javën e 11-të të ProCredit Superligës.
Sfida në Rahovec ishte mjaft interesante, ku pjesa e parë ishte kryesisht e baraspeshuar. Çereku i parë ishte i barabartë duke përfunduar 23:24, derisa vendasit për një nuancë ishin më të mirë në periudhën e dytë, 21:17, për të shkuar në pushim me rezultat 44:41.
Dallimi i madh dhe vendimtar u bë në periodën e tretë, 26:14, ndërsa ‘Vreshtarët’ në dhjetë minutat e fundit ruajtën epërsinë për të fituar 83:71.
Te vendasit u dalluan Fisnik Rugova me 25 pikë e 11 kërcime dhe Kentrell Pullian me 25 pikë, derisa te mysafirët më i miri ishte Dardan Berisha me 22 pikë.
Rahoveci 029 ka pesë fitore e gjashtë humbje, ndërsa GO+ Peja ka shtatë fitore e katër humbje. /Telegrafi/
Sulmuesi i ri nga Gjakova, Erjon Gashi, po kalon një formë të jashtëzakonshme te Rahoveci në Ligën e Dytë, ku po luan si huazim nga Vëllaznimi.
Në vetëm 7 ndeshje ka shënuar 13 gola, përfshirë tre het-trik spektakolarë, duke u kthyer në një nga futbollistët më të rrezikshëm të kampionatit.
Në një intervistë për Telegrafin, sulmuesi Gashi rrëfeu emocionet e tij për këtë sezon dhe formën që po kalon me klubin e Rahovecit.
"Sinqerisht, ndihem jashtëzakonisht mirë. Kjo është periudha ku po tregoj veten më së miri. Kam punuar shumë gjatë verës, fizikisht dhe mentalisht, dhe tash po shoh rezultatet. Me 13 gola në 7 ndeshje, përfshi tre het-trik, ndjej që jam në formën më të mirë të deritanishme. Jam i lumtur që po i ndihmoj ekipit dhe po e shpërblej besimin e trajnerit. Ndihem i lirë, kreativ dhe i uritur për gola çdo lojë", tha fillimisht sulmuesi i talentuar.
Sa i përket të ardhmes, Gashi është realist dhe i fokusuar, ndërsa edhe pse te Rahoveci po ndjehet shumë mirë, por mendjen e ka te Vëllaznimi.
"Në futboll gjithmonë them: dera duhet të jetë e hapur, por zemra ime e di kah synon. Rahoveci më ka dhënë mundësinë të rritem dhe unë po jap maksimumin për këtë fanellë. Megjithatë, Vëllaznimi është klubi i qytetit tim, aty e kam filluar rrugën dhe normal që ka një vend të veçantë për mua. Në fund të ditës, dua të marr vendimin që më çon më lart si futbollist. Prioriteti im është të zhvillohem dhe të jem aty ku mund të shpërthej edhe më shumë", deklaroi Gashi.
Synimi i tij për këtë sezon është i qartë, të kthehet në Ligën e Parë, pastaj të bëjë emër në futbollin tonë.
"Të vazhdoj me bujë, të tregoj nivel të lartë çdo ndeshje dhe të jem gati për hapin e madh – të imponoj veten në Ligën e Parë me fanellën e KF Vëllaznimit. Dua të dëshmoj se edhe pse jam 18 vjeç, kam karakterin, punën dhe mentalitetin për të qenë lider në fushë. Dua të mbyll sezonin me sa më shumë gola, të ndihmoj ekipin dhe të bëhem emër që përmendet në futbollin e Kosovës", përfundoi ai.
Forma e shkëlqyer e Gashit po tërheq gjithnjë e më shumë vëmendjen e adhuruesve dhe skautëve, dhe nuk është çudi që së shpejti ekipet nga Liga e Parë dhe Superliga e Kosovës do ta kenë si cak kryesor.
Erjon Gashi po dëshmon se është një nga talentet më premtuese të brezit të tij dhe e ardhmja e tij në futbollin kosovar duket më shumë se premtuese. /Telegrafi/
Rahoveci 029 ka shënuar fitore shumë të rëndësishme dhe të madhe, duke fituar ndaj liderit Bashkimit me rezultat 77:72.
Pjesa e parë ishte kryesisht e baraspeshuar, me vendasit që për një nuancë ishin më të mirë, duke fituar çerekun e parë 19:17 dhe atë të dytë 21:17, për të shkuar në pushim me shifrat 40:34.
Perioda e tretë i takoi tërësisht mysafirëve që ishin më të mirë 11:20, por në periudhën e fundit dhe atë vendimtare, ‘Vreshtarët’ bën përmbysjen për të fituar 26:18.
Më i miri te vendasit ishte Kentrell Pullian me 26 pikë, pesë kërcime e nëntë asistime, derisa te mysafirët më i miri ishte Kyan Anderson me 28 pikë e gjashtë asistime.
‘Vreshtarët’ kanë katër fitore e pesë humbje, ndërsa për Portokallezinjtë ishte humbja e dytë radhazi pas shtatë fitoreve radhazi./Telegrafi/
Fituesja aktuale e Kupës së Kosovës, Trepça, do të ketë një sfidë të fortë në çerekfinale, ku do të përballet me Golden Eagle Yllin.
Shorti për këtë fazë u tërhoq të martën në ambientet e Federatës së Basketbollit të Kosovës.
Një duel mjaft interesant pritet edhe ndërmjet Bashkimit dhe Pejës, ndërsa ndeshje e balancuar shihet ajo mes Rahovecit 029 dhe Borës.
Po ashtu, shumë vëmendje pritet të marrë edhe përballja Vëllaznimi – Sigal Prishtina, që konsiderohet një nga sfidat më të forta të raundit.
Sipas njoftimit të FBK-së: Fituesi i çiftit Bashkimi – GO+ Peja do të përballet në gjysmëfinale me fituesin e duelimit Vëllaznimi – Sigal Prishtina.
Ndërsa fituesi i sfidës Trepça – Golden Eagle Ylli do të ndeshet me fituesin e takimit Rahoveci 029 – Bora.
Në këtë fazë, skuadrat do të luajnë nga dy ndeshje, dhe ekipi me rezultat më të mirë total do të avanconi në gjysmëfinale. Edhe gjysmëfinalet zhvillohen me sistem vajtje-ardhje. /Telegrafi/
ProCredit Superliga rikthehet në aksion pas ndeshjes së Kosovës me shumë ndeshje interesante.
Derbi i xhiros së tetë do të zhvillohet të enjten mbrëma mes GO+ Peja dhe Trepçës, që është përballja e fundit e kësaj xhiro. Sfidat ndërmjet këtyre dy skuadrave kanë dhuruar gjithmonë emocione dhe kështu pritet të enjten, me të dy skuadrat që kanë dhuruar shumë spektakël në këtë edicion dhe kanë ambicie të mëdha. Pejanët kanë gjashtë fitore e një humbje, derisa mitrovicasit katër fitore e dy humbje. Në takimin e parë në Mitrovicë fituan verdhezinjtë 80:86.
Sigal Prishtina-Golden Eagle Ylli është një përballje ku dy skuadrat synojnë fitoren, pasi që kohët e fundit nuk kanë pasur shumë rezultate pozitive. Bardhekaltrit kanë katër fitore e tri humbje, ndërsa therandasit një fitore e gjashtë humbje. Takimin e parë në Therandë e fituan kryeqytetasit 76:78, ndërsa edhe takimi i së mërkurës do të zhvillohet në Therandë.
Rahoveci 029-Bora po ashtu është një përballje shumë interesante dhe shumë e rëndësishme. ‘Vreshtarët’ kanë tri fitore e katër humbje, kurse prishtinasit një fitore e pesë humbje. Duelin e parë në kryeqytet e fitoi skuadra nga Rahoveci me rezultat 84:95.
Të enjten do të sfidohen Bashkimi me Vëllaznimin, ndeshje që do të zhvillohet në Gjakovë, pasi takimi i parë ishte zhvilluar në Prizren. Portokallezinjtë janë skuadra e vetme pa asnjë humbje me shtatë fitore në shtatë ndeshje, kurse Kuqezinjtë një fitore e gjashtë humbje. Përballjen e parë e fituan prizrenasit 69:106.
Njësia e Rahovecit në kuadër të KRU “Gjakova” ka njoftuar se sot, të martën më 2 dhjetor 2025, do të realizohen punime në nyjen e gypit DN 300, për çka do të ketë ndërprerje të përkohshme të furnizimit me ujë.
Sipas njoftimit, ndërprerja do të zgjasë nga ora 08:00 deri në ora 15:00, dhe do të prekë zonën e rrugës “Xhelal Hajda” në Rahovec.
Kompania kërkon mirëkuptimin e konsumatorëve dhe falënderon qytetarët për durimin gjatë kohës së punimeve. /Telegrafi/
Zyra Ligjore në kuadër të Zyrës së Kryetarit të Komunës së Rahovecit ka dalë me një sqarim zyrtar lidhur me vendimin e Kryetarit të Komunës, me numër protokolli 02/6693, të datës 6 nëntor 2025, që ka të bëjë me ndërprerjen e kontratës së punës së drejtorit të Shkollës Fillore dhe të Mesme të Ulët “Heronjtë e Kosovës” në Hoçë të Vogël, z. Ramadan Krasniqi.
Në njoftim theksohet se vendimi është marrë pas shqyrtimit të procedurave ligjore dhe administrative, si dhe pas përfundimit të procesit të inspektimit nga Inspektorati i Arsimit, përfshirë vendimet e shkallës së parë dhe të dytë, të cilat janë bashkëngjitur dokumentacionit zyrtar.
Sipas sqarimit, Drejtoria e Arsimit në Komunën e Rahovecit kishte shpallur konkursin për pozitën e drejtorit të kësaj shkolle në korrik të vitit 2022, ndërsa pas zhvillimit të procedurave të konkursit dhe rekomandimit të komisionit përkatës, z. Ramadan Krasniqi ishte emëruar drejtor më 8 nëntor 2022.
Megjithatë, bazuar në gjetjet e Inspektoratit të Arsimit dhe vendimet pasuese, Komuna e Rahovecit është obliguar të ndërmarrë procedurat ligjore për ndërprerjen e kontratës dhe emërimin e një kandidati tjetër në përputhje me legjislacionin në fuqi.
Vendimi i Kryetarit të Komunës për ndërprerjen e kontratës është marrë në pajtim me këto rekomandime dhe është nënshkruar më 6 nëntor 2025. /Telegrafi/
Në një dramë të vërtetë Rahoveci 029 fitoi ndaj Vëllaznimit me rezultat 81:80 (22:21, 17:17, 18:17, 24:25), në xhiron e pestë të ProCredit Superligës.
Skuadra kuqezi e nisi ndeshjen më mirë, duke pasur epërsi deri në shtatë pikë, 10:17, e më pas 12:19, e më pas u rikthyen ‘Vreshtarët’, ku çereku i parë përfundon 22:21. Basketbollistët e Rahoveci 029 kishin epërsi deri në gjashtë pikë, 27:21, por kësaj radhe kuqezinjtë u rikthyen, duke u zhvilluar lojë e baraspeshuar, ku pjesa e parë përfundon 39:38.
Lojë interesante u zhvillua në periodën e tretë, ku ‘Vreshtarët’ kishin epërsinë më të lartë, në 11 pikë, 55:44, por skenari i njëjtë u përsërit, pasi basketbollistët e Vëllaznimit afruan shifrat, që pas 30 minutash ishin 57:55.
Në çerekun e fundit u zhvillua përballje edhe më interesante, ndër më të zjarrtat në këtë edicion, ku asnjëra skuadër nuk arrinte të shkëputej. Por, dy sekonda nga fundi, Eliot Peci me një lëvizje të zgjuar shënoi dy pikët vendimtare për 81:79, derisa ndeshja përfundoi me rezultat 81:80.
Te Rahoveci 029 u dallua Kentrell Pullian me 25 pikë, tetë kërcime e gjashtë asistime, kurse te Vëllaznimi u dalluan Marques Warrick me 19 pikë dhe Leo Colimerio me 18 pikë.
Rahoveci 029 ka dy fitore e tri humbje, ndërsa Vëllaznimi një fitore e katër humbje./Telegrafi
Kompania Rajonale e Ujësjellësit “Gjakova” ka njoftuar se ekipet e saj teknike kanë përfunduar me sukses punimet për rregullimin e defektit në gypin kryesor të çelikt me diametër fi 400 në rrugën “UÇK” në Rahovec.
Pas ndërhyrjes së realizuar me intensitet dhe kujdes teknik, furnizimi me ujë është rilëshuar për konsumatorët e Zonës 1 të qytetit të Rahovecit, duke rikthyer normalitetin në shërbimet e ujësjellësit.
Nga kompania është bërë e ditur se punimet janë kryer brenda afatit të parashikuar, ndërsa janë marrë të gjitha masat për të siguruar cilësinë dhe qëndrueshmërinë e rrjetit pas riparimit, përcjell Telegrafi.
KRU “Gjakova” ka falënderuar qytetarët për mirëkuptimin e treguar gjatë ndërprerjes së përkohshme të furnizimit me ujë dhe ka theksuar se ekipet teknike janë në gatishmëri të vazhdueshme për të reaguar ndaj çdo defekti që mund të paraqitet në rrjetin e ujësjellësit.
Ky intervenim, sipas kompanisë, është pjesë e angazhimeve të përditshme për përmirësimin e shërbimeve dhe garantimin e furnizimit të qëndrueshëm me ujë të pijshëm për qytetarët e komunës së Rahovecit. /Telegrafi/
KRU “Gjakova” njofton qytetarët e Rahovecit se, për shkak të punimeve të planifikuara në gypin Ø400 mm në rrugën “UÇK”, furnizimi me ujë për Zonën e Parë të qytetit do të ndërpritet përkohësisht nga ora 07:30 e mëngjesit, dhe do të vazhdojë deri në përfundimin e punimeve.
Kompania thekson se ky ndërprerje është e domosdoshme për realizimin e punimeve të mirëmbajtjes dhe përmirësimit të infrastrukturës së ujësjellësit, që do të kontribuojë në rritjen e cilësisë së furnizimit me ujë të pijshëm për të gjithë konsumatorët e zonës.
KRU “Gjakova” kërkon mirëkuptimin e qytetarëve për shqetësimin e shkaktuar nga ndërprerja e përkohshme dhe siguron se stafi i kompanisë po punon me përkushtim maksimal që punimet të përfundojnë sa më shpejt dhe furnizimi të rifillojë normalisht. /Telegrafi/
GO+ Peja ka shënuar fitoren e katërt radhazi në Superligën e Kosovës në basketboll, duke mposhtur Rahovecin.
Pejanët zhvilluan një tjetër paraqitje fantastike për të fituar me rezultat 87-79 (20:16, 28:21, 18:19, 21:23).
Peja e nisi fuqishëm qysh në çerekun e parë për ta mbyllur me katër pikë epërsi 20:16, ndërsa këtë avantazh veçse e shtoi në çerekun e dytë me shtatë pikë të tjera 28:21.
Rahoveci filloi të këndellet në çerekun e tretë për ta ngushtuar epërsinë, por që Peja u rikthye shpejtë në lojë, kësisoj diferenca ishte vetëm një pikë 18:19.
Në çerekun vendimtar, Peja veçse e ruajti këtë epërsi të madhe për ta shënuar fitoren e radhës 21:23, apo rezultati përfundimtar 87:79.
Tajh Green ishte më i dalluari te Peja me 15 pikë, tetë topa të kthyer e një asistim, kurse te Rahoveci shkëlqeu Kentrell Pullian me plot 23 pikë, katër topa të kthyer e një asistim.
Kësisoj, Peja ngjitët në pozitën e dytë në tabelë duke e barazuar Bashkimin si skuadrat e pamposhtura këtë edicion, derisa Rahoveci shijon humbjen e tretë./Telegrafi/
Sigal Prishtina ka regjistruar fitoren e tretë në ProCredit Superligë. Bardhekaltrit fituan ndaj Rahoveci 029 me shifrat 68:77.
Çerekun e parë më nisën mysafirët, duke pasur epërsi të lehtë, por vendasit u kundërpërgjigjën dhe kjo pjesë përfundoi 22:21.
Prishtinasit ishin më të mirë në periudhën e dytë, që e dominuan këtë pjesë, 11:20 për të shkuar në pushim me shifrat 33:41.
Perioda e tretë ishte më e barabartë, 17:16 dhe dhanë maksimumin në dhjetë minutat e fundit, megjithatë nuk ia arritën qëllimit, ku kryeqytetasit shfrytëzuan përvojën dhe fituan 68:77.
Isiah Umipig kishte 26 pikë e katër asistime për vendasit, kurse Deondre Burns kishte 20 pikë, pesë kërcime e katër asistime për mysafirët.
Rahoveci 029 ka një fitore e dy humbje, ndërsa Sigal Prishtina tri fitore në tri ndeshje./Telegrafi/
KRU Gjakova bën të ditur se ekipet teknike nga Njësia Rahovec kanë ndërmarrë sot një intervenim për rregullimin e defektit në gypin fi 63mm në fshatin Fortesë.
Sipas njoftimit, punimet kanë për qëllim stabilizimin e furnizimit me ujë dhe zgjidhjen e defektit sa më shpejt të jetë e mundur, në mënyrë që banorët të mos përballen me ndërprerje të gjatë të shërbimit.
KRU Gjakova falënderon qytetarët për mirëkuptim dhe bashkëpunim gjatë kryerjes së punimeve. /Telegrafi/
Rahoveci 029 në javën e parë të ProCredit Superligës, shënoi fitore ndaj Borës në kryeqytet me rezultat 84:95 (20:28, 15:26, 22:20, 27:21).
Pesë minutat e para të ndeshjes ishin të baraspeshuar, por më pas ‘Vreshtarët’ kishin deri në dhjetë pikë epërsi 18:28, derisa çereku i parë përfundoi 20:28.
Mysafirët ishin më të mirë edhe në periudhën e dytë, madje, më bindës, 15:26, për të shkuar në pushim me rezultat të lartë 35:54.
Pjesë e dytë ishte më e barabartë, sidoqoftë, mysafirët ruajtën epërsinë dhe fituan 84:95.
Adem Mekiq kishte 13 pikë e 17 kërcime për Borën, kurse te Rahoveci 029 u dalluan Kentrell Pullian me 24 pikë, gjashtë kërcime e gjashtë asistime, ndërsa Philhert Weeks dhe Isiah Umipig shtuan nga 23 pikë. /Telegrafi/
Në mes të Gjakovës dhe Rahovecit, aty ku Drini i Bardhë shtrihet madhështor dhe shkëmbinjtë mbajnë historinë e shekujve, ka lindur një ëndërr. Një ëndërr e thurur me dashuri për vendin, për tokën dhe për njerëzit.
Këtu, një njeri me përkushtim e guxim vendosi të ndërtojë jo thjesht një kamp për turistë, por një shtëpi të hapur për botën. Një strehë ku udhëtarët nga larg do të gjejnë paqen, mikpritjen dhe bukurinë e Kosovës.
Ky kamp nuk është vetëm vend pushimi. Është tregim i përkushtimit, i punës së ndershme dhe i besimit se edhe fshati më i vogël mund të bëhet dritare e madhe për botën.
Mes gjelbërimit, tingujve të natyrës dhe buzëqeshjes së mikpritësit, Fshajt na kujton se bukuritë më të mëdha lindin nga zemrat më të thjeshta.
Ky është mesazhi që ky vend i vogël i dërgon botës së madhe: se dashuria për tokën dhe për njeriun është gjithmonë rruga më e bukur drejt së ardhmes.
Telegrafi ka qëndruar një ditë në këtë kamping, aty ku jemi pritur ngrohtësisht nga çifti drejtues, Bedri dhe Fatushe Cahani, të cilët na treguan se si i mirëpresin turistët nga mbarë bota, duke i njohur ata me bukuritë e Kosovës dhe mikpritjen tonë të shquar.
“Ideja na ka lindur kur burri po dilte në pension dhe më tha që do të dalim këtu. Kur erdha për herë të parë, u zhgënjeva, pasi që ne gjithmonë e kemi dashur natyrën dhe ngado që kemi shkuar, kemi pastruar fillimisht mbeturinat, pastaj jemi vendosur. Kur erdhëm këtu, ishte një skëterrë, kishte mbeturina të jashtëzakonshme, gropa të mëdha, diçka e paimagjinuar. Por, duke biseduar me familjen, thamë që do t’ia dalim, do ta rregullojmë dhe ia filluam punës. Vitin e parë e kemi pas vetëm një pjesë, ndërsa kemi shkuar duke u zgjeruar në vitin e dytë”, thotë zonja Cahani për Telegrafin.
Një turist anglez e ka përshkruar më së miri mikpritjen që ka gjetur në kamp, por edhe përjetimin e tij në Kosovë.
“Mendimi im për Kosovën është jashtëzakonisht pozitiv. U mahnita nga mikpritja dhe ngrohtësia. Që nga momenti kur kalova kufirin, mbeta i impresionuar se sa miqësorë dhe mikpritës ishin të gjithë. Kam kaluar një kohë fantastike. Patjetër do të kthehem përsëri. Kam shumë vende për të vizituar. Do të shkoj nga jugu, por padyshim që do të kthehem sërish”, tha turisti anglez.
Ndërsa një turist italian mbeti i mahnitur nga bukuria e kampingut te Ura e Fshajt, duke e përshkruar si një vend të mrekullueshëm ku mund të bëhen shumë gjëra.
“Është një vend i mrekullueshëm. Mund të bësh një pushim të mrekullueshëm. Natyrë fantastike, e pastër, madje mund të shkoni edhe te ura. Pronari ishte shumë mikpritës. E rekomandoj fuqishëm këtë kamping”, shtoi italiani.
Në anën tjetër, një vizitor gjerman potencoi se ky kamping e impresionon më së shumti sepse është natyral dhe natyra ka mbetur ashtu siç është.
“Ky është një kamping i mrekullueshëm në Kosovë. Është për të ardhur keq që ka pak kampingje të tilla në Kosovë. Gjakova është një destinacion ku njerëzit nuk duhet të vijnë vetëm për shkak të pazarit, pasi këtu gjejnë një vendpushim shumë të mirë buzë lumit”, deklaroi turisti gjerman.
Zotëri Cahani ka treguar në detaje se si i mirëpresin turistët nga e mbarë bota, duke potencuar se që në hyrje ata i bëjnë të ndihen si në shtëpinë e tyre.
“Që në hyrje, ne i mirëpresim dhe maksimumin tonë e bëjmë që të gjithë turistët, pa dallim, të ndihen si në shtëpinë e tyre dhe u them që ta zgjedhin që në start vendin ku dëshirojnë të qëndrojnë”, ka thënë zotëri Cahani.
Andaj, ekipi i Telegrafit mbeti i mahnitur nga bukuritë e këtij kampingu, i cili ka filluar ta pasqyrojë Kosovën si një vend ku mikpritja është primare, dhe ju fton që ta vizitoni. /Telegrafi/
Është mbyllur xhiroja e parë e Superligës së Kosovës në hendboll (meshkuj), ku skuadrat favorite nuk hasën telashe për të marrë fitore.
Besa Famgas tregoi forcën e saj që në hapje të sezonit, duke dominuar plotësisht ndaj Trepçës. Pejanët e mbyllën ndeshjen me rezultat të thellë 38:21. Më efikasit për Besën ishin Deniz Terziqi, Ahmed Zayan Amr Ali dhe Hamed Ahmed Khamis me nga 8 gola secili. Te mitrovicasit u dallua Amar Mujka me 7 gola.
Rivalitet më i madh u pa në Gjakovë, ku Vëllaznimi e priti me fitore kthimin në Superligë, duke mposhtur Llapin me rezultat 40:32. Hero i vendasve ishte Arbër Neziri me plot 14 gola, ndërsa Florian Rexha shtoi 6. Për llapjanët më efikasi ishte Enis Rexhepi me 7 gola.
Kampioni në fuqi, Rahoveci, e nisi mbrojtjen e titullit me një fitore shkatërruese ndaj Vushtrrisë, 58:24. Te “vreshtarët” u dalluan Ardit Tafilaj me 12 gola dhe Granit Kadiri me 10, ndërsa për mysafirët shënoi Egzon Ademi me 7.
Një tjetër fitore e thellë u regjistrua në Ferizaj, ku Kastrioti mposhti Prishtinën me rezultat 48:32. Festim Mustafa me 8 gola ishte më efikasi, ndërsa Elion Goçi dhe Adonit Isufi kontribuan me nga 7. Për kryeqytetasit, Albi Gjuka shënoi plot 16 gola./Telegrafi/
Në një atmosferë të zjarrtë në palestrën “Bill Clinton” në Ferizaj, Rahoveci dhe Istogu shkruan historinë e fundjavës, duke ngritur lart trofeun e Superkupës së Kosovës në hendboll.
Drama e madhe e meshkujve
Në praninë e mbi 2 mijë shikuesve, Rahoveci dhe Kastrioti zhvilluan një ndeshje të fortë e dramatike deri në sekondat e fundit. Rahovecasit dolën fitues me rezultat minimal 31:30, duke e siguruar për herë të dytë radhazi trofeun e Superkupës.
Pjesa e parë u mbyll 17:16 në të mirë të Rahovecit, ndërsa epilogu u vendos nga efikasiteti dhe qetësia në momentet vendimtare. Arbios Mushkolaj ishte protagonist me 7 gola, ndërsa Ardit Tafilaj shtoi 5. Me pritjet vendimtare u dallua edhe portieri Arbër Curri.
Te Kastrioti, më i miri ishte Festim Mustafa me 8 gola, por edhe kësaj here skuadra nga Ferizaj mbeti pa trofe të Superkupës, ndonëse sezonin e kaluar kishte fituar Kupën e Kosovës.
Dominimi i Istogut te femrat Te hendbollistet, Istogu tregoi fuqinë e tij duke mposhtur Ferizajn me rezultat bindës 39:31. Skuadra kampione dominoi nga fillimi në fund, duke siguruar trofeun e tretë të Superkupës në histori.
Dijana Ujkiq dhe Joneide Balo Olikaka u dalluan me nga 9 gola secila, ndërsa Tainara Luna Goncalves kontribuoi me 7, e Suzana Ujkiq dhe Nihed Limem nga 5 gola. Ky sukses vjen pas një sezoni perfekt ku Istogaset fituan titullin e katërt rresht në Superligë dhe Kupën e Kosovës.
KH Istogu
Synimet evropiane Rahoveci tashmë kthen vëmendjen nga Superkupa te nisja e Superligës, ku mbrojtjen e titullit e fillon ndaj Vushtrrisë më 20 shtator. Përveç kampionatit, rahovecasit do të përfaqësojnë Kosovën edhe në Kupën Evropiane, ku do të përballen me Dudelangen e Luksemburgut.
Në raundin e dytë të kësaj gare është edhe Besa Famgas, duke e bërë garën ndërkombëtare një tjetër sfidë prestigjioze për hendbollin kosovar. /Telegrafi/
Kryeministri në detyrë i Republikës së Kosovës, Albin Kurti, së bashku me ministrin në detyrë të Bujqësisë, Pylltarisë dhe Zhvillimit Rural, Faton Peci, ka vizituar mbrëmë festivalin tradicional “Hardh Fest” në Komunën e Rahovecit.
Gjatë vizitës, ata u shoqëruan edhe nga deputetë të Kuvendit të Kosovës dhe bashkëpunëtorë të tjerë institucionalë ku vizituan stadet e prodhuesve vendorë të verës dhe produkteve të tjera të rrushit, ku kryeministri i falënderoi për angazhimin dhe cilësinë e lartë të produkteve të tyre.
Kurti përgëzoi organizatorët për suksesin e festivalit, duke e cilësuar “Hardh Fest”-in si një ngjarje të rëndësishme që promovon trashëgiminë bujqësore, turizmin dhe kulturën vendore.
Edicioni i sivjetmë i festivalit mbahet nën moton “Për Kokërr t’Qefit”, dhe përveç promovimit të produkteve të rrushit, përfshin një agjendë të pasur me aktivitete sociale, kulturore dhe artistike.
Pjesë e programit janë edhe koncertet muzikore me artistë të njohur nga vendi dhe rajoni.
Festivali “Hardh Fest” tashmë është shndërruar në një traditë të përvitshme që mbledh mijëra vizitorë nga e gjithë Kosova dhe më gjerë, duke kontribuar në zhvillimin e ekonomisë lokale dhe në afirmimin e prodhimeve vendore. /Telegrafi/
Login
