Pas katër humbjeve, Bashkimi u rikthye te fitorja, duke mundur Golden Eagle Yllin në Therandë me rezultat 78:77 në javën e 12-të në ProCredit Superligës.

Në një sfidë interesante dhe të luftuar deri në momentet e fundit, ishin prizrenasit më të vëmendshëm në fund, që u ndihmoi të shënojnë fitore, derisa therandasit tentuan deri në fund, por pa sukses.

Kyan Anderson kishte 22 pikë e tetë asistime te prizrenasit, ndërsa Lejson Zeqiri shtoi 15 pikë e shtatë kërcime, ndërsa te therandasit Antëan Scott shënoi 23 pikë.

Bashkimi pas 12 javësh ka tetë fitore e katër humbje, kurse Golden Ealge Ylli tri fitore e nëntë humbje./Telegrafi/

Në një sfidë dramatike, Sigal Prishtina shënoi fitore ndaj Bashkimit me rezultat 72:70 (17:24, 25:15, 16:18, 14:13), në javën e 11-të të ProCredit Superligës.

Ndeshja ishte ndërprerë në çerekun e parë për shkak të incidenteve të tifozëve. Dhjetëra tifozë të Prishtinës, të njohur si “Plisat”, hynë në palestër dhe hodhën mjete tymosëse, duke krijuar një situatë kaotike. Protesta e tyre është për kryesinë e klubit, pas vitesh pa titull kampioni. Ndeshja vazhdoi pas më shumë se një ore.

Në çerekun e parë mysafirët kishin epërsi konstante, duke fituar këtë pjesë 17:24, por kundërpërgjigja e prishtinasve erdhi menjëherë në periudhën e dytë, për të shkuar në pushim me rezultat 42:39.

Perioda e tretë ishte e barabartë dhe e luftuar nga të dy skuadrat, duke e bërë sfidën në kryeqytet edhe më interesante, derisa fituesi u vendos në dhjetëminutëshin e fundit.

Dramë u zhvillua deri në fund, me bardhekaltrit që ishin më të vëmendshëm në momentet vendimtare, derisa në aksionin e fundit për prizrenasit Anderson nuk ishte i saktë për tri pikë.

Kelby Kramer kishte dhjetë pikë e 15 kërcime te vendasit, kurse Kyan Anderson 20 pikë te mysafirët.

Sigal Prishtina ka gjashtë fitore e pesë humbje, ndërsa Bashkimi shtatë fitore e katër humbje. /Telegrafi/

Ndeshja mes Sigal Prishtinës dhe Bashkimit u ndërpre që në çerekun e parë për shkak të incidenteve të tifozëve.

Dhjetëra tifozë të Sigal Prishtinës, të njohur si “Plisat”, hynë në palestër dhe hodhën mjete tymosëse, duke krijuar një situatë kaotike dhe duke detyruar gjyqtarin të ndalojë përkohësisht takimin.

Zhvillohej minuta e shtatë e takimit, kur rezultati ishte 7-9 në të mirë të mysafirëve.

Incidenti vjen pas një periudhe të tensionuar mes tifozëve dhe kryesisë së klubit, ku “Plisat” kanë shprehur shpesh pakënaqësitë e tyre ndaj menaxhimit të Sigal Prishtinës.

Protestat ndaj presidentit Blerand Stavilevci dhe drejtuesit Florian Miftari ka javë që kanë filluar, ku po kërkohet largimi i tyre.

Ende nuk dihet se kur do të vazhdojë takimi, ndërsa klubi dhe organizatorët po shqyrtojnë hapat e mëtejshëm për të garantuar një ambient të sigurt për lojtarët dhe tifozët e mbetur. /Telegrafi/

Pas disfatës 71:64 ndaj Trepçës në palestrën “Sezai Surroi” në Prizren, në kuadër të xhiros së dhjetë të elitës së basketbollit kosovar, Bashkimi ka bërë të ditur gjendjen e vështirë të ekipit për shkak të lëndimeve të shumta.

Kjo humbje shënoi disfatën e tretë rresht për skuadrën.

Klubi përballoi nënkampionen pa dy lojtarët amerikanë të lënduar, ndërsa gjatë ndeshjes u dëmtua edhe Valon Bunjaku.

“Jemi duke kaluar një periudhë të vështirë pas lëndimit të katër lojtarëve tanë, Valon Bunjaku, Isaiah Cousins, Jeremiah Bailey dhe Besim Bytyqi, një situatë që padyshim ka ndikuar në rezultatet e ekipit tonë në tri ndeshjet e fundit. Megjithatë, sfida të tilla na focojnë edhe më shumë”, ka deklaruar Bashkimi.

Klubi ka njoftuar gjithashtu se në ditët e ardhshme do të bëhen zyrtare disa transferime të reja, për të mbushur boshllëkun e krijuar nga lojtarët e lënduar.

Pas dhjetë ndeshjeve, Prizrenasit kanë arritur shtatë fitore dhe kanë pësuar tri humbje. /Telegrafi/

Trepça ka triumfuar në Prizren ndaj Bashkimit, në derbin e javës së dhjetë të ProCredit Superligës.

Mitrovicasit fituan 64:71 (22:10, 14:18, 14:20, 14:23), ku edhe pse ishin duke mundur me 15 pikë dallim, arritën të shënojnë fitore me shtatë pikë dallim.

Sfida ishte interesante, me prizrenasit që e nisën fuqishëm 18:3, derisa çereku i parë përfundoi 22:10.

Por, më pas filluan të rikthehen mysafirët, që në tre periodat e radhës shënuan nga 14 pikë, por në fund fituan kampionët 64:71.

Më i miri te Portokallezinjtë ishte Dequon Lake me 20 pikë e 13 kërcime, ndërsa te ‘Xehetarët’ më i miri ishte Mikaile Tmusic me 20 pikë, shtatë kërcime e tri asistime.

Bashkimi pësoi humbjen e tretë radhazi pas shtatë fitoreve radhazi, ndërsa Trepça ka gjashtë fitore e tri humbje./Telegrafi/

Rahoveci 029 ka shënuar fitore shumë të rëndësishme dhe të madhe, duke fituar ndaj liderit Bashkimit me rezultat 77:72.

Pjesa e parë ishte kryesisht e baraspeshuar, me vendasit që për një nuancë ishin më të mirë, duke fituar çerekun e parë 19:17 dhe atë të dytë 21:17, për të shkuar në pushim me shifrat 40:34.

Perioda e tretë i takoi tërësisht mysafirëve që ishin më të mirë 11:20, por në periudhën e fundit dhe atë vendimtare, ‘Vreshtarët’ bën përmbysjen për të fituar 26:18.

Më i miri te vendasit ishte Kentrell Pullian me 26 pikë, pesë kërcime e nëntë asistime, derisa te mysafirët më i miri ishte Kyan Anderson me 28 pikë e gjashtë asistime.

‘Vreshtarët’ kanë katër fitore e pesë humbje, ndërsa për Portokallezinjtë ishte humbja e dytë radhazi pas shtatë fitoreve radhazi./Telegrafi/

Fituesja aktuale e Kupës së Kosovës, Trepça, do të ketë një sfidë të fortë në çerekfinale, ku do të përballet me Golden Eagle Yllin.

Shorti për këtë fazë u tërhoq të martën në ambientet e Federatës së Basketbollit të Kosovës.

Një duel mjaft interesant pritet edhe ndërmjet Bashkimit dhe Pejës, ndërsa ndeshje e balancuar shihet ajo mes Rahovecit 029 dhe Borës.

Po ashtu, shumë vëmendje pritet të marrë edhe përballja Vëllaznimi – Sigal Prishtina, që konsiderohet një nga sfidat më të forta të raundit.

Sipas njoftimit të FBK-së: Fituesi i çiftit Bashkimi – GO+ Peja do të përballet në gjysmëfinale me fituesin e duelimit Vëllaznimi – Sigal Prishtina.

Ndërsa fituesi i sfidës Trepça – Golden Eagle Ylli do të ndeshet me fituesin e takimit Rahoveci 029 – Bora.

Në këtë fazë, skuadrat do të luajnë nga dy ndeshje, dhe ekipi me rezultat më të mirë total do të avanconi në gjysmëfinale. Edhe gjysmëfinalet zhvillohen me sistem vajtje-ardhje. /Telegrafi/

ProCredit Superliga rikthehet në aksion pas ndeshjes së Kosovës me shumë ndeshje interesante.

Derbi i xhiros së tetë do të zhvillohet të enjten mbrëma mes GO+ Peja dhe Trepçës, që është përballja e fundit e kësaj xhiro. Sfidat ndërmjet këtyre dy skuadrave kanë dhuruar gjithmonë emocione dhe kështu pritet të enjten, me të dy skuadrat që kanë dhuruar shumë spektakël në këtë edicion dhe kanë ambicie të mëdha. Pejanët kanë gjashtë fitore e një humbje, derisa mitrovicasit katër fitore e dy humbje. Në takimin e parë në Mitrovicë fituan verdhezinjtë 80:86.

Sigal Prishtina-Golden Eagle Ylli është një përballje ku dy skuadrat synojnë fitoren, pasi që kohët e fundit nuk kanë pasur shumë rezultate pozitive. Bardhekaltrit kanë katër fitore e tri humbje, ndërsa therandasit një fitore e gjashtë humbje. Takimin e parë në Therandë e fituan kryeqytetasit 76:78, ndërsa edhe takimi i së mërkurës do të zhvillohet në Therandë.

Rahoveci 029-Bora po ashtu është një përballje shumë interesante dhe shumë e rëndësishme. ‘Vreshtarët’ kanë tri fitore e katër humbje, kurse prishtinasit një fitore e pesë humbje. Duelin e parë në kryeqytet e fitoi skuadra nga Rahoveci me rezultat 84:95.

Të enjten do të sfidohen Bashkimi me Vëllaznimin, ndeshje që do të zhvillohet në Gjakovë, pasi takimi i parë ishte zhvilluar në Prizren. Portokallezinjtë janë skuadra e vetme pa asnjë humbje me shtatë fitore në shtatë ndeshje, kurse Kuqezinjtë një fitore e gjashtë humbje. Përballjen e parë e fituan prizrenasit 69:106.

ProCredit Superliga-Java 8

E mërkurë

18:45 Sigal Prishtina-Golden Eagle Ylli

18:45 Rahoveci 029-Bora

E enjte

18:45 Bashkimi-Vëllaznimi

20:00 GO+ Peja-Trepça

Bashkimi arriti një fitore të madhe në arenën evropiane, duke triumfuar me rezultat të ngushtë 77:76 ndaj skuadrës italiane Pallacanestro Reggiana, në kuadër të xhiros së pestë të Grupit J në FIBA Europe Cup.

Sfida, e zhvilluar të mërkurën mbrëma në palestrën “Sezai Surroi”, përfundoi me një skenë spektakolare – një bllokadë vendimtare nga qendra amerikane De’Quon Lake, që ndali tentimin e fundit të Jaime Echenique dhe vulosi fitoren për skuadrën portokalli.

Ndeshja ishte një betejë e vërtetë nervash, me ritëm të lartë dhe ndryshime të shpeshta në rezultat.

Gjatë gjithë takimit, asnjë ekip nuk arriti të shkëputej ndjeshëm, ndërsa fundi ishte i denjë për film sportiv.

Një minutë e 19 sekonda para fundit, TJ Bickerstaff shënoi të dyja gjuajtjet e lira për ta kaluar Bashkimin në epërsi 76:75.

Italianët tentuan të riktheheshin, por humbën disa aksione të rëndësishme, ndërsa Jeremiah Bailey realizoi për 77:76, vetëm 11 sekonda para fundit.

Në aksionin e fundit të ndeshjes, Reggiana kërkoi fitore me një goditje të shpejtë, por Lake ndërhyri në mënyrë perfekte, duke bllokuar topin dhe shpëtuar Bashkimin.

Me këtë fitore, ekipi prizrenas arrin suksesin e dytë në grup, duke u barazuar me vetë Reggianan, të dyja me bilanc 2-3.

Ndërkohë, Dijoni dhe Cibona kryesojnë me nga tri fitore dhe dy humbje, por Bashkimi mbetet fuqishëm në garë për kalimin në fazën tjetër./Telegrafi/

Bashkimi shënoi fitoren e pestë në pesë ndeshje në ProCredit Superligë. Portokallezinjtë fituan ndaj Golden Eagle Yllit me rezultat 64:74 (12:16, 15:17, 14:20, 23:21), në takimin e zhvilluar në Prizren.

Prizrenasit në pjesën e parë ishin për një nuancë më të mirë, duke fituar çerekun e parë 12:16 dhe atë të dytë 15:17, për të shkuar në pushim me shifrat 27:33.

Portokallezinjtë e nisën mirë edhe pjesën e dytë, përkatësisht periodën e tretë ku ishin shumë më të mirë 14:20, derisa lojë më e barabartë u zhvillua në periudhën e fundit, por pa pasur shumë dallim, me prizrenasit që triumfuan në fund me dhjetë pikë dallim.

Te therandasit u dallua Trevon Allen me 15 pikë, kurse te prizrenasit Dequon Lake kishte 12 pikë e 13 kërcime, Kyan Anderson 16 pikë, katër kërcime e shtatë asistime dhe Jan Palokaj 16 pikë.

Golden Eagle Ylli ka një fitore e katër humbje, ndërsa Bashkimi pesë fitore në pesë ndeshje./Telegrafi

KB Bashkimi ka arritur njërën prej fitoreve më të mëdha në historinë e klubit, duke mundur bindshëm Cibonënme rezultat 89:69 në kuadër të stinorit të rregullt të FIBA Europe Cup në “Sezai Surroi”.

Kjo ishte fitorja e parë e Bashkimit në garat evropiane, duke shënuar debutimin e tyre të suksesshëm në kompeticion. Ndërkohë, Cibona pësuan humbjen e parë pas tri fitoreve rresht në Grupin J.

Prizrenasit dhanë shenja të qarta që nga çereku i parë se ishin në mbrëmjen e tyre, duke përfunduar 10 minutat e para me rezultat 19:7.

Edhe pas çerekut të dytë, epërsia prej 12 pikëve u mbajt, pasi rezultati i pjesës së parë përfundoi 18:18.

Çereku i tretë i ndeshjes ishte vendimtar, me Bashkimin që fitoi 28:19 dhe ngriti diferencën në 21 pikë pas 30 minutave lojë.

Epërsia e madhe u ruajt deri në fund, dhe ndeshja përfundoi me një dallim të qartë prej 20 pikësh.

Kjo fitore historike jo vetëm që shënon një hap të rëndësishëm për Bashkimin në debutimin e tyre evropian, por gjithashtu dërgon një mesazh të fortë për skuadrat e tjera në Grupin J të FIBA Europe Cup.

Bashkimi tani pret me padurim sfidat e ardhshme, duke synuar të konsolidojë pozicionin e tij në garën evropiane dhe të shkruajë faqe të reja të historisë së klubit./Telegrafi/

Bashkimi shënoi fitoren e katërt në ProCredit Superligë, duke ia shkaktuar humbjen e parë Sigal Prishtinës me rezultat 106:88 në derbin e kësaj xhiro.

Çereku i parë i ndeshjes ishte kryesisht i baraspeshuar, ku asnjëra skuadër nuk arrinte të shkëputej në rezultat, duke përfunduar 22:19.

Por, prizrenasit ishin më të mirë në periudhën e dytë, duke u shkëputur minutë pas minute për të shkuar në pushim me shifrat 51:36.

Pjesa e dytë ishte shumë interesante në Prizren. Perioda e tretë u karakterizua me luftë për çdo top nga të dy skuadrat, duke përfunduar 27:30, kurse Portokallezinjtë e vulosën fitoren në dhjetë minutat e fundit, për të fituar 106:88.

Më i miri te Bashkimi ishte Kyan Anderson me 31 pikë e tetë asistime, kurse te Sigal Prishtina, Arian Azemi kishte 22 pikë e pesë asistime.

Kjo ishte fitorja e katërt për Bashkimin pas katër ndeshjeve, derisa humbja e parë për Sigal Prishtinën pas tri fitoreve./Telegrafi/

KB Bashkimi ka pësuar humbje me rezultat 83:74 pas vazhdimeve në shtëpi nga Dijoni në kuadër të FIBA Europe Cup.

Bashkimi ia doli të fitojë çerekun e parë me rezultat 18-12, ndërsa çereku i dytë përfundoi baras 18-18.

Mysafirët bën dallimin e madh në çerekun e tretë të takimit të cilin ia dolën ta fitojnë thellë me rezultat 23:9.

Prizrenasit u këndellën disi në çerekun e tretë duke fituar me rezultat 23:13, me ç’rast ndeshja shkoi në vazhdime.

Aty më të mirë u treguan mysafirët të cilët fituan me rezultat 15:6 dhe me atë të përgjithshmin 83:74.

Te Bashkimi tre lojtarë patën pikë dyshifrore, por që në fund nuk mjaftoi për fitore.

T.J Bickerstaff pati 18 pikë, 11 kërcime dhe tri asistime, ndërkohë Lejson Zeqiri pati 14 pikë, gjashtë kërcime dhe një asistim.

Isiah Cousins shtoi gjithashtu 13 pikë, tri kërcime dhe pati katër asistime.

Në ndeshjen e ardhshme në FIBA Europe Cup, Bashkimi do të jetë nikoqire e gjigantit kroat Cibonës./Telegrafi/

Bashkimi fitoi derbin e xhiros së tretë të ProCredit Superligës, duke mundur Trepçën në udhëtim me shifrat 79:93 (18:19, 18:33, 19:18, 24:23).

Çerekun e parë edhe pse mysafirët e nisën më mirë dhe kishin epërsi të lehtë, kjo pjesë përfundoi 18:19. Por, dallimi i madh dhe vendimtar u bë në periudhën e dytë, ku portokallezinjtë ishin shumë më të mirë, 18:33, për të shkuar në pushim me epërsi të thellë 36:52.

Në pjesën e dytë, vendasit u përpoqën disa herë të rikthehen, por arritën vetëm të ngushtojnë epërsinë e jo të bëjnë rikthimin e madh. Kështu Bashkimi fitoi me rezultat bindës 79:93.

Chad Brown kishte 19 pikë e 13 kërcime te vendasit, derisa Mikaile Tmusiq shtoi 18, derisa te mysafirët më i miri ishte Tj Bickerstaff me 15 pikë, 15 kërcime e pesë asistime.

Trepça ka një fitore e dy humbje, kurse Bashkimi tri fitore në tri ndeshje. /Telegrafi/

Klubi prizrenas i basketbollit, Bashkimi ka reaguar me anë të faqes zyrtare pas ndalimit të tifozëve të tyre nga policia e Malit të Zi.

Gjatë mbrëmjes së enjte, tifozët e Bashkimit të njohur si Arpagjik’t janë ndaluar nga policia malazeze shkaku i një grafiti ku shkruante UÇK.

Pas disa orë mbajtje, ata janë liruar, por vetëm njëri nga ta ka mbetur, ai i cili ka marrë përsipër veprën është burgosur dhe i është dhënë një dënim prej 10 ditësh.

Disa orë më vonë, klubi prizrenas ka reaguar me anë të faqes zyrtare, ku kërkon reagim nga organet përgjegjëse si Ministria e punëve të jashtme të Kosovës dhe veçanërisht Ambasadës së Republikës së Kosovës në Mal të Zi.

Postimi pa ndërhyrje i Bashkimit

Reagim!!

Është e papranueshme që Arpagjik’t të ndalohen në Mal të Zi vetëm për një grafit të shkruar UÇK. Ata nuk kanë kryer asnjë krim, e megjithatë po mbahen padrejtësisht.

Solidariteti me ta është i pakushtëzuar!

I bëjmë thirrje organeve përgjegjëse Ministrisë së punëve të jashtme të Kosovës dhe veçanërisht Ambasadës së Republikës së Kosovës në Mal të Zi për reagim dhe mbrojtje të tifo grupit Arpagjik’t si qytetarë të Kosovës dhe të kujdesen që djemtë tanë të lirohen, të mos mbahen padrejtësisht, dhe të vazhdojnë rrugën për Kosovë!

Kryesia e KB Bashkimi

23.10.2025, Prizren

/Telegrafi/

Një pjesëtar i tifogrupit “Arpagjikët” është dënuar me 10 ditë burgim dhe dëbim për një vit nga Mali i Zi, pasi ka pranuar fajësinë për mbishkrimet UÇK në disa shtëpi në qytetin malazez, Igalo.

Radio Televizioni i Malit të Zi ka bërë të ditur se shtetasit të Kosovës, E.S. (22) i është shqiptuar dënim me 10 ditë burgim për shkrimin e grafitit UÇK.

Përveç dënimit me burg, tifozi në fjalë është dënuar edhe me një vit ndalim hyrje në Mal të Zi.

Ai do ta fillojë vuajtjen e dënimit në burgun në UIKS, pasi ka bërë grafitin me mbishkrimin UÇK në një mur.

Tutje televizioni malazez ka raportuar gjithashtu se autobusi i tifozëve është duke u mbrojtur nga policia, pasi qytetarët e Herceg Novit kanë mbetur tejet të revoltuar me ngjarjen dhe kanë tentuar të kundërpërgjigjen.

Vlen të theksohet se ka pasur reagim zyrtar nga ana e klubit të Bashkimit, të cilët kanë kërkuar lirimin e menjëhershëm të tifozëve, duke kërkuar reagim edhe nga Ambasada e Kosovës në Mal të Zi./Telegrafi/

Nënkampioni i Kosovës në basketboll, Bashkimi, ka reaguar ndaj ndalimit të tifozëve të tyre, “Arpagjikëve”, në Mal të Zi, për shkak të një grafiti me mbishkrimin “UÇK”.

Përmes një reagimi zyrtar në rrjetet sociale, Bashkimi ka kërkuar sa më parë lirimin e tyre.

“Është e papranueshme që Arpagjikët të ndalohen në Mal të Zi vetëm për një grafit të shkruar UÇK. Ata nuk kanë kryer asnjë krim, e megjithatë po mbahen padrejtësisht. Solidariteti me ta është i pakushtëzuar! I bëjmë thirrje organeve përgjegjëse dhe veçanërisht ambasadës së Republikës së Kosovës në Mal të Zi për reagim dhe mbrojtje të tifo grupit Arpagjikët si qytetarë të Kosovës dhe të kujdesen që djemtë tanë të lirohen, të mos mbahen padrejtësisht, dhe të vazhdojnë rrugën për Kosovë!”, thuhet në reagimin e Bashkimit.

Sipas mediumit malazez Vijesti, incidenti ndodhi të enjten në mbrëmje, kur autobusi me tifozët e klubit prizrenas u ndalua nga policia në Meljine, pasi në një mur ishte shkruar grafiti “UÇK”.

Ndërkohë, portali RTHN raportoi se dy shtetas të Kosovës janë shoqëruar në stacionin policor të Herceg Novit. Në pamjet e publikuara nga mediat malazeze shihet prania e forcave policore pranë autobusit të tifozëve.

Në faqen zyrtare të “Arpagjikëve” në rrjete sociale, postimi i fundit është bërë nga Italia të mërkurën, një ditë përpara incidentit.

Kujtojmë se Bashkimi të mërkurën mbrëma zhvilloi ndeshjen e dytë të Grupit J në “FIBA Europe Cup”, në udhëtim ndaj skuadrës italiane Pallacanestro Reggiana./Telegrafi/

Bashkimi debutoi në grupet e FIBA Europe Cup. Nënkampioni i Kosovës pësoi nga Cibona në Kroaci me rezultat 93:79 (18:22, 29:19, 27:15, 19:23).

Skuadra prizrenase e nisi ndeshjen shumë mirë, duke arritur të fitojë çerekun e parë 18:22, derisa lojë e baraspeshuar u zhvillua në çerekun e dytë, deri në minutën e fundit, pranë rezultatit 39:39, por më pas vendasit u shkëputën, duke shkuar në pushim me rezultat 47:41.

Kroatët ishin më të mirë në periodën e tretë, 27:15, ku shifrat pas 30 minutash ishin 74:56, derisa dhjetë minutat e fundit ishin më të baraspeshuar, por që nuk kishte dallim të madh në rezultatin përfundimtar, që ishte 93:79.

Te Bashkimi u dalluan Kyan Anderson me 22 pikë, Jan Palokaj me 16 dhe Isaiah Cousins me 15.

Ndeshjen e ardhshme Bashkimi e zhvillon si mysafir i Pallacanestro Reggiana më 22 tetor. /Telegrafi/

Bashkimi shënoi fitore ndaj Vëllaznimit 69:106 (23:26, 12:21, 22:29, 12:30).

Në takimin që u zhvillua në Prizren në javën e parë të ProCredit Superligës, sfida kaloi nën dominimin e prizrenasve, pasi kuqezinjtë luajtën pothuajse vetëm me lojtarë vendorë.

Fillimi i çerekut të parë ishte i baraspeshuar, megjithatë, prizrenasit arritën të shkëputeshin në 15:22, por kuqezinjtë nuk lejuan shkëputjen e madhe dhe kjo pjesë përfundoi 23:26.

Megjithatë, në periudhën e dytë, prizrenasit ishin dukshëm më të mirë 12:21, për të shkuar në pushim me rezultat 35:47.

Në pjesën e dytë nuk kishte dallim të madh me prizrenasit që dominuan dhe fituan 69:106.

Te Vëllaznimi, Ziggy Ried kishte 26 pikë e shtatë kërcime, ndërsa Atik Koshi kontribuoi me 22 pikë e shtatë kërcime, ndërkohë te Portokallezinjtë më i miri ishte Tj Brickerstaff me 24 pikë e gjashtë kërcime.

Pavarësisht humbjes së fundit, Bashkimi ka arritur një sukses historik për basketbollin prizrenas dhe atë kosovar, duke siguruar për herë të parë kualifikimin në fazën e grupeve të FIBA Europe Cup.

Ky rezultat u mundësua falë një rregulli të veçantë të kompeticionit. Sipas rregullores së FIBA-s, tre ekipet me diferencën më të vogël të humbjes në raundin eliminator përzgjidhen si “lucky losers” dhe vazhdojnë garën.

Bashkimi ishte një nga këto skuadra, duke bërë kështu histori për klubin dhe basketbollin kosovar.

“Rrugëtimi ynë në Evropë do të vazhdojë! Zyrtarisht jemi pjesë e grupeve të FIBA Europe Cup, për herë të parë në historinë e klubit”, ka shkruar klubi.

Lista prej 40 ekipesh për sezonin e rregullt të FIBA Europe Cup 2025-26 është tashmë e plotë, pas përfundimit të kualifikueseve të mërkurën.

Trepça dihej se do të luante në fazën e grupeve, por tani edhe Bashkimi i ka mësuar kundërshtarët. Prizrenasit janë në Grupin J, ku do të përballen me klube si JDA Dijon Basket (Francë); Pallacanestro Reggiana (Itali) dhe KK Cibona (Kroaci).

Sezoni i rregullt i Kupës së Evropës FIBA do të fillojë të martën, më 14 tetor, me orarin e plotë përfundimtar që do të konfirmohet më vonë. /Telegrafi/