Benfica mposhti Farense 2–0 në udhëtim, në ndeshjen e vlefshme për fazën e 1/8-ave të Kupës së Portugalisë.

Kështu, skuadra e drejtuar nga Jose Mourinho e zgjati serinë e saj pa humbje në tetë ndeshje radhazi, gjatë së cilës ka regjistruar gjashtë fitore dhe dy barazime.

Seria ka filluar me barazimin ndaj Casa Pia, për të vazhduar me fitoret ndaj Atletico CP, Ajax, Nacional, barazimin ndaj Sporting Lisbona dhe fitoret ndaj Napolit, Moreirenses dhe ndeshjen e fundit ndaj SC Farenses.

Klubi nga Lisbona do të vazhdojë sezonin më 22 dhjetor, me ndeshjen kundër Famalicaos në kampionatin portugez.

Benfica renditet në vendin e tretë në kampionat me 32 pikë pas 14 ndeshjesh.

Ajo ndodhet tre pikë pas Sportingut dhe tetë pikë larg liderëve të Portos.

Nën drejtimin e Jose Mourinhos, Benfica ka zhvilluar deri tani 19 ndeshje: 12 fitore, katër barazime dhe tri humbje. /Telegrafi/

Sezoni 2025/2026 ka nisur me ritëm të lartë në kampionatet kryesore evropiane dhe sulmuesit më të mirë po tregojnë menjëherë formën e tyre përpara portës.

Disa nga emrat më të njohur të futbollit botëror po kryesojnë listën e golashënuesve.

Harry Kane po shkëlqen me fanellën e Bayern Munich.

Sulmuesi anglez ka shënuar 18 gola në 14 ndeshje, duke qenë aktualisht më i miri në Evropë për nga numri i golave.

Pas tij renditet Erling Haaland, i cili vazhdon të jetë vendimtar për Manchester City, me 17 gola në 16 ndeshje.

Ndërkohë, Kylian Mbappe ka nisur shumë mirë aventurën e tij me Real Madridin, duke u bërë një nga pikat kryesore të sulmit.

Në listën e golashënuesve më të spikatur janë edhe Ayase Ueda, Vangelis Pavlidis, Luis Suarez dhe Ferran Torres, të cilët po japin kontribut të rëndësishëm për skuadrat e tyre.

Sezoni sapo ka filluar, por gara për golashënuesin më të mirë të Evropës pritet të jetë shumë interesante.

Golashënuesit më të mirë në Evropë

1. Harry Kane (32 vjeç / Bayern Munich / Angli) - 18 gola në 14 ndeshje (1,087 minuta)

2. Ayase Ueda (27 vjeç / Feyenoord / Japoni) - 18 gola në 16 ndeshje (1,315 minuta)

3. Erling Haaland (25 vjeç / Manchester City / Norvegji) - 17 gola në 16 ndeshje (1,377 minuta)

4. Kylian Mbappe (26 vjeç / Real Madrid / Francë) - 17 gola në 17 ndeshje (1,488 minuta)

5. Vangelis Pavlidis (27 vjeç / Benfica / Greqi) - 13 gola në 14 ndeshje (1,164 minuta)

6. Ayoub El Kaabi (32 vjeç / Olympiakos / Marok) - 12 gola në 14 ndeshje (1,148 minuta)

7. Luis Suarez (28 vjeç / Sporting Lisbon / Kolumbi) - 11 gola në 14 ndeshje (1,156 minuta)

8. Mason Greenwood (24 vjeç / Olympique de Marseille / Angli) - 11 gola në 15 ndeshje (1,224 minuta)

9. Paul Onuachu (31 vjeç / Trabzonspor / Nigeri) - 11 gola në 15 ndeshje (1,304 minuta)

10. Ferran Torres (25 vjeç / FC Barcelona / Spanjë) - 11 gola në 16 ndeshje (1,023 minuta) /Telegrafi/

Trajneri portugez, Jose Mourinho, ishte sërish në qendër të vëmendjes pas ndeshjes së Ligës së Kampionëve, në të cilën Benfica e tij mundi Napolin me rezultatin 2-0 në ndeshjen e zhvilluar në shtëpi.

Mourinho regjistroi një triumf të ri në garën elitare dhe u shfaq në konferencën për shtyp pas ndeshjes me një çantë shpine.

Gazetarët u interesuan për atë që kishte në çantë shpine dhe e pyetën “Special One” nëse mund të ishte një dhuratë për ta, dhe ai më pas i befasoi me një përgjigje.

Në çantë ishte fanella e futbollistit kundërshtar Scott McTominay, një yll i Napolit i cili ka një lidhje të veçantë me Mourinhon.

“Jo, kjo në çantë është e imja. Është fanella e Scott McTominay. E prezantova me botën e futbollit, e vura Paul Pogba në stol te Manchester United për shkak të tij. Më e pakta që mund të kishte bërë ishte të më jepte fanellën e tij", zbuloi ‘Mou’.

Mourinho foli për fillimin e karrierës së McTominay, teksa i dha atij mundësinë të debutonte në futbollin e ekipit të parë, në ndeshjen e xhiros së 35-të të sezonit 2016/17 të Ligës Premier.

Pastaj e futi në lojë për gjashtë minuta dhe më pas, në ndeshjen e fundit të atij sezoni, i dha mundësinë të luante një ndeshje të tërë.

McTominay lulëzoi vërtet vetëm pasi u largua nga United për në Napoli, ku ishte lojtari më i mirë në Serie A sezonin e kaluar dhe e udhëhoqi ekipin drejt titullit të kampionatit italian. /Telegrafi/

Benfica ka fituar ndaj Napolit, ndërsa Bodo/Glmit ka befasuar Borussia Dortmundin me një barazim 2-2. Barazim është mbyllur edhe ndeshja mes Bayer Leverkusen dhe Newcastle.

Benfica shënoi fitore të pastër në “Estádio da Luz”, duke mundur Napoli 2-0. Goli i parë u shënua nga Nicolas Rios në minutën e 20-të, ndërsa Diogo Barreiro vulosi fitoren në minutën e 49-të, duke bërë që Benfica të dalë e motivuar në fazën e ardhshme të grupit.

Amir Rrahmani luajti 90 minuta për Napoli, që nuk arriti të marr pikë në Portugali.

Në një ndeshje dramatike në BayArena, Bayer Leverkusen dhe Newcastle ndanë pikët me rezultat 2-2. Për ekipin gjerman, shënoi autogol Bruno Guimaraes në minutën e 13-të, ndërsa Álex Grimaldo barazoi shifrat në minutën e 88-të, duke i dhënë një fund emocionues takimit.

Nga ana tjetër, për Newcastle shënuan Anthony Gordon nga penalltia në minutën e 51-të dhe Lewis Miley në minutën e 74-të.

Një ndeshje me shumë ngjarje u zhvillua në Signal Iduna Park, ku Borussia Dortmund barazoi 2-2 ndaj Bodo/Glimt. Për Dortmund shënoi Julian Brandt dy herë, në minutat e 18-të dhe 51-të, ndërsa për norvegjezët realizuan Vegard Aleesami në minutën e 42-të dhe Erling Hauge në minutën e 75-të.

Në ndeshjet e luajtura nga ora 18:45, Ajaxi fitoi si mysafir i Qarabag me rezultat 4-2, ndërsa Copenhagen befasoi Villarrealin, duke e mposhtur si mysafir me rezultat 3-2. /Telegrafi/

Në mbrëmjen e sotme (e mërkurë), Liga e Kampionëve rikthehet me duele që premtоjnë ritëm të lartë, emocione të forta dhe lëvizje të rëndësishme në renditje. Ekipet marrin fushën me objektiva të qarta: disa për të siguruar kualifikimin, të tjerat për të mbajtur gjallë shpresat.

Ndeshja kryesore e mbrëmjes së sotme padyshim se pritet të zhvillohet në ‘Santiago Bernabeu’, ku Real Madridi është nikoqir i Manchester Cityt, në një ndeshje ku pikët janë jetike për të dy klubet.

Lideri i vetëm i ligës, Arsenali do të luajë në udhëtim te Club Brugge dhe me një fitore eventuale do ta siguronte vendin në top tetëshen e parë, duke u kualifikuar direkt në fazën e 1/8-tës.

Edhe Paris Saint-Germain do ta bënte një hap të madh drejt kualifikimit në rast fitoreje në udhëtim te Athletic Bilbao, klub i cili gjithashtu synon rezultat pozitiv për t’u ngjitur në pozitat që e dërgojnë në ‘play-off’.

Juventusi i Edon Zhegrovës është nikoqir i Pafos gjatë mbrëmjes së sotme, ndërsa ndeshje interesante pritet të luhet edhe në Gjermani, ku Bayer Leverkusen e pret Neëcastle Unitedin dhe ajo në mes të Benfica dhe Napoli.

Nga ndeshjet tjera, Borussia Dortmund e pret Bodo/Glimt, Ajaxi luan në udhëtim te Qarabagu, Villarreali është nikoqir i Copenhagen. /Telegrafi/

Faza e grupeve të Ligës së re të Kampionëve hyn në fazën e saj vendimtare pas një xhiro ndeshjesh që ka tronditur ndjeshëm renditjen.

Me vetëm tre ndeshje të mbetura, ekipet po përsosin strategjitë e tyre, po përshtatin objektivat e tyre dhe po i mbajnë sytë hapur parashikimeve nga superkompjuteri i Opta-s, i cili ka përditësuar renditjen e probabilitetit për të përcaktuar se kush do të zërë tetë vendet e kualifikimit direkt për fazën e 1/8-tës.

Gjetjet e modelit statistikor janë mbresëlënëse. Real Madridi është ngritur, Barcelona ka rënë dhe disa gjigantë evropianë janë gjetur në një pozicion të papritur e të pasigurt.

Parashikimi e vendos Arsenalin në vendin e parë në fund të tetë ndeshjeve të kësaj faze të ligës. Ekipi i Mikel Artetas, i fortë, i drejtpërdrejtë dhe me një skuadër gjithnjë e më të pjekur, është bërë, sipas Opta-s, ekipi më i besueshëm në kontinent.

Pas tyre, Bayern Munich, pavarësisht humbjes së fundit ndaj Arsenalit, ruan një nivel efektiviteti në Evropë që pak ekipe mund ta arrijnë. Podiumin e plotëson Paris Saint-Germain, i cili duket se ka gjetur një ekuilibër konkurrues nën drejtimin e Luis Enriques dhe parashikimet statistikore të së cilës e forcojnë pozicionin e tyre të tretë.

Real Madridi ngjitet në vendin e katërt

Lajmi i madh për futbollin spanjoll është ngritja e Real Madridit në vendin e katërt në parashikime. Fitorja e tyre në ndeshjen e fundit kundër Olympiacos ka forcuar besimin e superkompjuterit te skuadra e Xabi Alonsos, e cila shfrytëzoi pengesat e rivalëve të drejtpërdrejtë për t'u ngjitur në një hap vendimtar në luftën për tetë vendet e para.

Modeli i superkompjuterit e vendos Interin në vendin e pestë, pavarësisht humbjes së tyre kundër Atletico Madridit, dhe Manchester Cityn në të gjashtin.

Dy vendet e fundit kualifikuese automatike, sipas Opta-s, janë të rezervuara për Chelsean dhe Borussia Dortmundin. Klubi londinez ka bërë një hap të rëndësishëm falë fitores së tyre prestigjioze kundër Barcelonës, ndërsa Dortmundi, i cili mundi Villarrealin, është ngjitur në renditje.

Në vendet e fazës ‘play-off’ gjenden edhe klube si Atletico Madridi në vendin e 10-të, Liverpooli i 11-ti, Barcelona e 12-ta, Napoli i 19-ti, Juventusi i 20-t, Marseille në vendin e 23-të dhe Monaco që zë vendin e fundit për një shans kualifikimi në fazën e 1/8-tës nga faza e eliminimit.

Superkompjuteri parashikon eliminimin e klubeve të njohura si Athletic Bilbao, Benfica, Villarreal dhe Ajax pasi gjenden më poshtë se pozita e 24-të. /Telegrafi/

Në orën 18:45 u zhvilluan dy ndeshje të fazës së grupeve të Ligës së Kampionëve, ku u regjistruan dy fitore të ekipeve mysafire.

Në Amsterdam u pa përballja mes ish-kampionëve të Ecropës, Ajaxit dhe Benficës. Në fund, portugezët triumfuan me rezultatin 2-0, duke thyer serinë e keqe prej katër humbjesh radhazi në Ligën e Kampionëve këtë sezon dhe duke shënuar fitoren e parë.

Vetëm gjashtë minuta pas fillimit të ndeshjes, mysafirët kaluan në avantazh. Dahl shfrytëzoi një devijim të topit dhe shënoi në rrjetën e majtë të portierit Jaros.

Golin përfundimtar për 2-0 e shënoi Barreiro në minutën e 90-të, duke vulosur fitoren e madhe të Benficas dhe duke i dhënë ekipit portugez triumfin e parë këtë sezon.

Në ndeshjen tjetër të zhvilluar në të njëjtën orë, Royale Union arriti një fitore befasuese 1-0 ndaj Galatasarayt në Stamboll.

Skuadra turke konsiderohej favorite e madhe përpara këtij takimi, sidomos pasi kishte regjistruar tre fitore më parë në Ligën e Kampionëve këtë sezon. Goli i vetëm u shënua në minutën e 57-të nga David pas asistit të Zorgane.

Galatasaray është në vendin e 9-të me po aq pikë, ndërsa Royale Union ndodhet në vendin e 18-të me gjashtë pikë. Benfica ndodhet në vendin e 29-të, ndërsa Ajaxi mbetet i fundit pa pikë. /Telegrafi/

Sot (e martë) janë në program për t’u zhvilluar nëntë ndeshje në kuadër të xhiros së pestë të fazës së ligës në Ligën e Kampionëve.

Pas një pauze prej tri javësh, Liga e Kampionëve rikthen emocionet mes tifozëve me disa ndeshje shumë interesante që pritet të zhvillohen mbrëmjen e sotme.

Ndeshja kryesore e mbrëmjes padyshim se do të zhvillohet në Londër, ku Chelsea e pret Barcelonën në “Stamford Bridge” me fillim nga ora 21:00.

Takime tjera interesante pritet të jenë edhe ato në mes të Manchester City-Bayer Leverkusen, Marseille-Newcastle dhe Borussia Dortmund-Villarreal.

Nga ora 21:00 do të luhen edhe ndeshjes mes të Bodo/Glimt-Juventus, Napoli-Qarabag dhe Slavia Praga-Athletic Bilbao.

Dy ndeshjet e vetme janë ato në mes të Galatasaray-Royale Union SG dhe Ajax-Benfica. /Telegrafi/

Jose Mourinho akuzoi disa nga lojtarët e tij për “tradhti”, teksa lëshoi një shpërthim të jashtëzakonshëm pas fitores së Benficas në kupë.

Benfica mundi Atletico CP 2-0 të premten për të siguruar vendin në raundin tjetër të Kupës së Portugalisë.

Por skuadra e Mourinhos vuajti për fitoren, duke shënuar dy gola të vonshëm ndaj ekipit të kategorisë së tretë për të kaluar më tej në kompeticion.

Richard Rios hapi rezultatin në minutën e 73-të, përpara se Vangelis Pavlidis të dyfishonte avantazhin nga pika e bardhë katër minuta më vonë.

Performanca e pjesës së dytë e Benficas erdhi pas faktit që 62-vjeçari bëri ndryshime të mëdha në pushim.

Mourinho zëvendësoi pa mëshirë Joao Rego, Tomas Araujo, Franjo Ivanovic dhe Enzo Barrenechea në pjesën e parë, ndërsa kërkonte të freskonte skuadrën e tij.

Jose Mourinho

Vendimi i tij për të bërë katër zëvendësime përpara pjesës së dytë rezultoi në fund i suksesshëm, pasi Benfica shmangu një surprizë të madhe duke mposhtur Atletico CP dhe siguruar një vend në raundin tjetër.

Ai gjithashtu shprehu zhgënjimin e tij ndaj disa lojtarëve, duke deklaruar se nuk i pëlqejnë lojtarët që “e tradhtojnë”.

“Pjesa jonë e parë ishte e dobët. Dhe ishte e dobët në atë kuptim që më dhemb më shumë, që është kur je i dobët në qëndrim”.

“Kishte shumë lojtarë që nuk ishin seriozë, që nuk e qasën ndeshjen siç duhet. Në pushim bëra katër zëvendësime, por do të kisha dashur të bëja nëntë”.

“Nuk bëra pesë zëvendësime sepse nuk mund të luaja 45 minuta pa asnjë lojtar në stol. Por bëra katër dhe mendoj se ato e ndryshuan ndeshjen falë intensitetit dhe seriozitetit”.

“Po i kushtoj shumë vëmendje, edhe pse kam pak kohë këtu, lojtarëve të rinj. Nuk më pëlqejnë lojtarët që më tradhtojnë”, ka deklaruar portugezi./Telegrafi/

Gjykata e Qytetit të Kopenhagenit ka dënuar sulmuesin e Benficës dhe të kombëtares së Norvegjisë, Andreas Schjelderup, me 14 ditë burgim me kusht dhe një vit lirim me kusht, pasi ai pranoi se kishte shpërndarë në Snapchat një video 27-sekondëshe me përmbajtje seksuale që përfshinte një të mitur në vitin 2022.

Ngjarja ka ndodhur kohë më parë, në një periudhë kur 21-vjeçari luante në Danimarkë. Sipas mbrojtjes, Schjelderup e kishte marrë videon pa e kërkuar dhe e shpërndau te disa miq “si një shaka e keqe”, para se ta fshinte menjëherë. Gjykatësi theksoi se lojtari nuk e kishte kërkuar materialin, kishte treguar pendim të sinqertë dhe e përshkroi dënimin si “një karton të verdhë”, ndërsa urdhëroi gjithashtu që ai të paguajë shpenzimet gjyqësore.

Prokuroria kishte kërkuar një dënim më të ashpër, 20 ditë burg pa kusht dhe një paralajmërim për dëbim nga Danimarka, duke argumentuar se rasti përputhej me vendime të mëparshme. Megjithatë, gjykata vendosi për një masë më të lehtësuar.

Schjelderup u largua nga salla e gjyqit pa dhënë deklaratë, ndërsa avokati i tij, Anders Nemeth, u tha gazetarëve se klienti i tij “nuk po ikën nga përgjegjësia” dhe se nuk kishte asgjë më shumë për të shtuar përveç faljes së dhënë në gjykatë. Lojtari ka 14 ditë kohë për të vendosur nëse do të apelojë vendimin.

Komentatori i NRK-së, Jan Petter Saltvedt, e përshkroi vendimin si një lloj lehtësimi për Schjelderup, i cili së fundmi ishte titullar me Benficën dhe u aktivizua në ndeshjet kualifikuese të Norvegjisë për Kupën e Botës. Ai shtoi se rasti, për shkak të profilit të lartë, mund të shërbejë si një paralajmërim serioz për sportistët e rinj në epokën dixhitale. /Telegrafi/

Sot (e mërkurë) janë në orar për t’u zhvilluar nëntë ndeshje në kuadër të xhiros së katërt të fazës së ligës në Ligën e Kampionëve.

Pas etheve dhe ndeshjeve interesante të së martës mbrëma, tani radhën e ka nata e sotme me disa takime tjera që pritet të sjellin emocione të mëdha.

Megjithatë, për dallim nga mbrëmja e së martës ku pati dy derbi shumë të fortë evropian, mbrëmja e sotme nuk ka ndonjë derbi shumë të madh.

Ndeshja më interesante e mbrëmjes pritet të jetë ajo në mes të Manchester Cityt dhe Borussia Dortmundin, e planifikuar të luhet në ‘Etihad’ nga ora 21:00.

Përballje interesante pritet të jenë edhe ato në mes të Neëcastle-Athletic Bilbao, Ajax-Galatasaray, Benfica-Bayer Leverkusen dhe Marseille-Atalanta.

Nga ora 21:00 luajnë edhe dy klubet tjera të mëdha evropiane, Interi dhe Barcelona, me Nerazzurët që presin Kairat Almanyt dhe katalunasit që udhëtojnë te Club Brugge.

Dy ndeshjet e vetme që luhen nga ora 18:45 janë ato në mes të Qarabag-Chelsea dhe Pafos-Villarreal. /Telegrafi/

Një tjetër natë spektakolare në Ligën e Kampionëve është pas nesh, gjatë së cilës u luajtën nëntë ndeshje dhe u shënuan plot 43 gola gjatë të martës mbrëma.

Nëse përjashtojmë ndeshjen pa gola midis Kairat dhe Pafos, numri mesatar i golave për ndeshje ishte jashtëzakonisht i lartë, dhe tifozët e futbollit në të gjithë Evropën patën mundësinë të shijonin duele emocionuese.

Një spektakël i vërtetë ndodhi në Angli, jo për shkak të numrit të golave, por për shkak të një lëvizjeje të pabesueshme që shihet rrallë, madje edhe në një garë elitare si Liga e Kampionëve.

Në stadiumin St James' Park në Newcastle, skuadra vendase mposhti Benficën me rezultatin 3-0. Shënuesit për Newcastle ishin Harvey Barnes, i cili shënoi dy gola, dhe Anthony Gordon, ndërsa Jacob Murphy dhe, besoni ose jo, portieri Nick Pope u regjistruan gjithashtu në kolonën e asistimeve.

Po, Nick Pope bëri diçka vërtet të jashtëzakonshme, një asistim që mediat evropiane tashmë po e quajnë "pasimi më i mirë nga një portier në historinë e Ligës së Kampionëve".

Kjo ndodhi në minutën e 70-të të ndeshjes. Newcastle udhëhiqte 1-0 dhe donte të konfirmonte fitoren. Pas një harkimi të Benficës, Pope e kapi topin dhe më pas e ‘flaku’ me dorë gati 60 metra drejt Barnes.

Mbrojtësi i ekipit portugez, Antonio Silva, reagoi keq, Barnes shfrytëzoi hapësirën në një vrapim dhe shënoi një gol për 2-0, duke mos ia ‘çuar’ dëm asistimin portierit. /Telegrafi/

Një mbrëmje plot gola, emocione dhe spektakël në arenën më të madhe të futbollit evropian. Tre ndeshje, tri histori të ndryshme, me Newcastle që dominon në shtëpi, Borussia Dortmund që fiton në transfertë, dhe PSV që mahnit publikun me një festival golash ndaj Napolit.

Newcastle United 3-0 Benfica

Në “St. James’ Park”, Newcastle vazhdoi ecurinë mbresëlënëse evropiane me një fitore bindëse ndaj Benficës. Ekipi i Eddie Hoëe dominoi që nga minuta e parë, duke mos i lënë asnjë hapësirë portugezëve.

Anthony Gordon zhbllokoi rezultatin në minutën e 32-të pas një aksioni të bukur nga e djathta, ndërsa Harvey Barnes vulosi fitoren me dy gola në pjesën e dytë (71’ dhe 83’), duke konfirmuar momentin e tij të shkëlqyer formë.

Benfica tentoi me Di Maria dhe Rafa Silva, por mbrojtja e “Laraskave” ishte e pakalueshme. Me këtë fitore, Neëcastle ngjitet në vendet e para të grupit dhe dërgon sinjale të qarta për ambiciet e saj.

Copenhagen 2-4 Borussia Dortmund

Borussia Dortmund regjistroi një fitore të rëndësishme jashtë fushe ndaj Kopenhagës në një ndeshje plot ritëm dhe gola. Lukas Nmecha ishte heroi i verdhezinjve me dopietën e tij, duke hapur rezultatin në minutën e 20-të dhe duke e mbyllur me një gol të dytë në minutën e 77-të.

Një autogol i Kevin Diks në minutën e 34-t e thelloi avantazhin e Dortmundit, ndërsa Ramy Bensebaini realizoi saktë nga pika e bardhë në minutën e 61-të.

Andre Silva shtoi golin e katërt në minutën e 87-të, përpara se Orri Oskarsson të shënonte golin e nderit për danezët në shtesë.

Fitorja e mban Dortmundin në garë të fortë për kreun e grupit, me një paraqitje që kombinoi përvojën me efikasitetin.

PSV Eindhoven 6-2 Napoli

Spektakël i pastër në Eindhoven. PSV mposhti Napolin me rezultat të pabesueshëm 6-2, në një mbrëmje ku çdo sulm dukej se përfundonte me gol.

Napoli kaloi i pari në epërsi me Scott McTominay (31’), por PSV reagoi fuqishëm. Një autogol i Alessandro Buongiorno (35’) dhe një gol i Ismael Saibari (39’) përmbysën gjithçka para pushimit.

Në pjesën e dytë, Dennis Man shpërtheu me dy gola (54’, 80’), ndërsa Ricardo Pepi (87’) dhe Couhaib Driouech (89’) e kompletuan “tenisin” e golave.

McTominay realizoi edhe golin e dytë për Napolin në minutën e 86-të, por ishte tepër vonë për të ndalur furinë e PSV-së.

Një fitore madhështore për holandezët, që konfirmojnë forcën e tyre në “Philips Stadion”./Telegrafi/

Liga e Kampionëve kthehet sonte (e martë) pas një pushimi 20-ditor, me nëntë ndeshje të planifikuara, ku më interesantja prej të cilave do të luhen në Londër midis Arsenalit dhe Atletico Madridit.

Do të jetë një duel midis skuadrave që kanë luajtur shkëlqyeshëm kohët e fundit. “Topçinjtë” kanë fituar pesë ndeshje radhazi në të gjitha garat, ndërsa Atletico ka fituar katër nga pesë ndeshjet e tyre të fundit.

Është një garanci për ndeshje të mira dhe të hapura ku mysafirët do të kenë një motiv më të madh sepse, ndryshe nga Arsenali, i cili fitoi të dyja ndeshjet në Ligën e Kampionëve, lojtarët e Atleticos kanë një fitore dhe një humbje.

Në ndeshjet tjera, Bayer Leverkuseni e pret Paris Saint-Germain, Barcelona është nikoqire e Olympiacosit, Manchester City luan në udhëtim te Villarreali, teksa Interi është mysafir i Royale Union SG.

Përballje interesante pritet të jenë edhe ato mes PSV Eindhoven-Napoli, Neëcastle-Benfica dhe Copenhagen-Dortmund, teksa fokusi do të jetë edhe te dy ekipet që luajnë për herë të parë këtë sezon: Kairat Almaty dhe Pafos.

Kjo ndeshje dhe ajo mes Barcelonës dhe Olympiacosit luhen nga ora 18:45, ndërsa të gjitha përballjet tjera fillojnë nga ora 21:00. /Telegrafi/

Barcelona ka nisur kontaktet me agjentin e adoleshentit të Benficës, Gonçalo Oliveira, për një transferim të mundshëm në të ardhmen.

Përfaqësuesit e lojtarit janë takuar me drejtorin sportiv të Barcelonës, Deco, dhe megjithëse bisedimet kanë qenë të shkurtëra, drejtuesit katalanas po e shqyrtojnë mundësinë e një oferte për mbrojtësin 19-vjeçar, i cili ende nuk ka debutuar me ekipin e parë të gjigantëve portugezë.

Sipas Sport, agjentët portugezë Antonio Casanova dhe Carlo Gonçalves janë takuar me Deco në ditën kur Barcelona luajti ndaj Paris Saint-Germain në Ligën e Kampionëve, dhe diskutuan për një talent të ri të Benficës, pikërisht Oliveira.

Së fundmi, paraqitjet e qendërmbrojtësit kanë tërhequr vëmendjen e klubeve të tjera portugeze, ndërsa trajnerët brenda akademisë së Benficës e konsiderojnë atë si një nga talentet më premtues.

Takimi ishte informal dhe bisedimet rreth mbrojtësit me këmbë të majtë kanë qenë vetëm verbale, negociatat zyrtare ende nuk kanë nisur.

Gonçalo Oliveira

Kuptohet se Barcelona nuk ka urgjencë për të afruar një tjetër qendërmbrojtës në këtë moment, dhe Deco beson se një lëvizje e mundshme do të shqyrtohet vetëm pas analizës nga departamenti i skautimit, i cili mund të sugjerojë nevojën për përforcime në mbrojtje.

Për më tepër, çdo lëvizje për lojtarin nuk do të miratohet pa pëlqimin e Decos.

Oliveira ka kontratë me Benficën deri në vitin 2029 dhe pritet të debutojë së shpejti me ekipin e parë nën drejtimin e Jose Mourinhos./Telegrafi/

Në një ndeshje të tensionuar në fazën e ligës të Ligës së Kampionëve, Chelsea arriti të marrë një fitore të ngushtë 1-0 ndaj Benficës.

Goli vendimtar erdhi herët, në minutën e 18-të, por në një mënyrë të papritur. Një autogol nga Richard Rios i Benficës, i cili tentoi të pastronte një harkim brenda zonës së gjashtë metrave, por topi përfundoi në rrjetën e portës së tij, duke i dhënë avantazh Chelseat.

Festa e Chelseat

Gjatë pjesës së parë, Benfica pati disa raste të rrezikshme. Dodi Lukebakio provoi një gjuajtje të shpejtë brenda zonës në minutën e 8-të, por portieri Robert Sánchez bëri një pritje të shkëlqyer dhe topi u përplas me shtyllën.

Edhe Richard Rios pati një tentativë tjetër, por Sánchez ishte në vendin e duhur.

Chelsea tregoi fuqinë e tyre në fazën ofensive dhe mbrojtëse. Estêvão, Joao Pedro dhe Enzo Fernandez provuan disa herë, por mbrojtja e Benficës ishte e vendosur, ndërsa portieri Anatoliy Trubin shpëtoi disa rasti të rrezikshëm, veçanërisht një gjuajtje me kokë nga Estevao në minutën e 79-të.

Jose Mourinho u kthye në "Samford Bridge" si trajneri Benficas dhe u largua me një humbje të ngushtë.

Pas këtij rezultati, Chelsea merr tri pikët e para, ndërsa Benfica mbetet pa fitore pas dy xhirove të para dhe do të kërkojë rikuperim në ndeshjet e ardhshme. /Telegrafi/

Jose Mourinho do të përballet sot (e martë) me ish-skuadrën e tij, Chelsean, në Ligën e Kampionëve, teksa paga e tij e re te Benfica u zbulua nga presidenti i klubit, Rui Costa.

Të ardhurat e reja të Mourinhos te Benfica janë zbuluar, me trajnerin legjendar portugez që merr pagën e tij më të ulët në dy dekada.

“Special One” u shkarkua nga Fenerbahce muajin e kaluar , pasi kishte përfunduar 11 pikë prapa kampionëve të Superligës Turke, Galatasaray, sepse klubi donte të luante futboll më të mirë.

Ndërsa ishte me pushime në Barcelonë, ai mori një telefonatë nga gjigantët portugezë Benfica me ofertën për të pasuar Bruno Lage të shkarkuar së fundmi.

Mourinho, të cilit iu paraqit një mundësi e papërmbajtshme, pranoi të merrte përsipër punën e tij të 12-të si trajner, 25 vjet pas periudhës së tij të parë me ekipin e Lisbonës.

62-vjeçari ka fituar dy ndeshje dhe ka barazuar një në tre ndeshjet e tij si trajner deri më tani dhe ndeshja e tij më e madhe deri më tani do të jetë sot në mbrëmje kur të kthehet në Stamford Bridge për t'u përballur me Chelsean, ku ai shijoi dy periudha legjendare.

Presidenti i Benficas, Rui Costa, këmbëngul se Mourinho është ende një nga "trajnerët më të mëdhenj" në këtë fushë. Por, me sa duket, trajneri ka rënë dakord të pranojë një ulje page për t'u rikthyer në klubin e tij të parë.

Costa zbulon se kontrata e tij dyvjeçare vlen rreth 3 milionë euro neto në sezonin e tij të parë, duke u rritur në 4 milionë euro sezonin e ardhshëm.

Kontrata përfshin një klauzolë ndërprerjeje që do t'i mundësojë secilës palë ta ndërpresë marrëveshjen 10 ditë pas ndeshjes së fundit të sezonit nëse dëshiron. /Telegrafi/

Trajneri i Benficas, Jose Mourinho ka ndarë mendimin e tij për formatin e ri të Ligës së Kampionëve, duke e cilësuar atë si një risi që sjell debate.

“Special One” javën tjetër debuton me gjigantin portugez në Ligën e Kampionëve, si mysafir i Chelseas.

“Jam ende në një periudhë studimi, që nuk më lejon të them nëse preferoj formatin e mëparshëm apo këtë të ri. Është ndryshe. Vitin e kaluar luajta në këtë format në Ligën e Evropës dhe preferoj të them se është inovativ", u shpreh portugezi.

Mourinho pranoi se sistemi me vetëm një ndeshje mund të sjellë frustrime: “Nëse luan si mysafir– do të kishe dashur të luaje në shtëpi; nëse luan në shtëpi – do të kishe dashur të luaje jashtë”.

“Në renditjen mes kaq shumë skuadrash, unë gjendem në një pozicion të caktuar, por nuk kam luajtur kundër ekipit që është mbi mua”.

Megjithatë, tekniku 61-vjeçar nuk i mohoi anët pozitive: “Është interesante që ke mundësinë të përballesh me tetë kundërshtarë të ndryshëm që në fillim të turneut”.

Kujtojmë, në ndeshjen hapëse të Ligës së Kampionëve, Benfica e drejtuar nga Bruno Lage u mposht nga Qarabag me rezultatin 2-3./Telegrafi/

Trajneri i Benficas, Jose Mourinho, mund ta bindë sulmuesin e Al-Ittihad, Karim Benzem, të transferohet në Portugali që në afatin kalimtar të janarit.

Thashethemet kanë qenë të shumta rreth ribashkimit të mundshëm të Mourinhos me sulmuesin francez, kontrata e të cilit me klubin saudit skadon në qershor 2027.

Megjithatë, sipas gazetës Marca, ish-trajneri i Real Madridit e do me çdo kusht Benzeman te Benfica dhe atë në afatin kalimtar dimëror.

Edhe pse ish-sulmuesi i Real Madridit synon ta kalojë fundin e karrierës së tij me Al-Ittihad, prania e Mourinhos e ka shtyrë atë të rishqyrtojë planet e tij.

37-vjeçari e ka nisur sezonin e ri në Superligën e Arabisë Saudite me një notë të lartë, duke shënuar një tregolësh kundër Al-Okhdood.

Ai ka shënuar 41 gola dhe ka dhënë 17 asistime në 65 ndeshje për Al-Ittihad, duke luajtur një rol vendimtar në titullin e ligës saudite dhe fitoren e Kupës së Mbretit sezonin e kaluar. /Telegrafi/

Pas vetëm një jave nga largimi i tij nga Fenerbahçe, Jose Mourinho befasoi të gjithë duke pranuar të marrë drejtimin e Benficas, klub i cili pak javë më parë e kishte eliminuar ekipin turk nga play-off-i i Ligës së Kampionëve.

Në një konferencë për shtyp, trajneri portugez shpjegoi arsyet e tij për këtë lëvizje të papritur, duke deklaruar se ka humbur para që ka marr drejtimin e klubit portugez.

“Unë nuk jam këtu falas dhe nuk mund të them se po punoj për zero euro. Nëse do të qëndroja në shtëpi deri në fund të sezonit, do të fitoja më shumë sesa duke punuar te Benfica".

Jose Mourinho dhe Rui Costa

"Por pyetni pse jam këtu? Sepse më pëlqen shumë të punoj. Më ka munguar të jem në një klub si Benfica, për të luftuar për titullin, për të qenë pjesë e atyre sfidave që të mbajnë të gjallë pasionin”, deklaroi Mourinho.

Page e Jose Mourinhos flitet se te Fenerbahce ishte dy herë më e madhe se sa te klubi portugez.

Mourinho te Fenerbahce telegrafi.com

Ky hap vjen pas një periudhe të vështirë për Mourinhon në Turqi, por ai duket i motivuar te Benfica në rrugën e suksesit dhe të përballet me sfidat e kampionatit portugez dhe garave evropiane. /Telegrafi/