Real Madridi është futur së fundmi në garë për kapitenin e Manchester United, Bruno Fernandes. Mediat shkruajnë se gjigantët spanjollë po vlerësojnë seriozisht një lëvizje të mundshme për të afruar në Madrid, futbollistin portugez. Jo vetëm kaq, pasi mesfushorin ka interes edhte nga klube të Arabisë Saudite dhe Major League Soccer. Megjithatë, vëmendja tani është […]
Sezoni i Jude Bellingham (22) po shndërrohet në një katrahurë të vërtetë. Pas një operacioni në shpatull gjatë verës, Xabi Alonso vendosi ta rikthente anglezin direkt në formacionin titullar për derbin e qytetit në “Metropolitano”.
Megjithatë, eksperimenti rezultoi i dështuar, pasi Real Madridi pësoi një humbje të rëndë me rezultat 5-2.
Kjo ishte goditja e parë serioze e sezonit dhe paralajmërimi i një krize që do të pasonte. Deri në atë moment, Reali po siguronte rezultate pozitive edhe kur loja nuk ishte bindëse, dhe këtë pa Bellingham, i cili ishte në fazë rikuperimi pas ndërhyrjes kirurgjikale, shkruan As.com.
Shkëlqimi para ardhjes së Mbappe
Para ardhjes së Kylian Mbapp, Bellingham luajti në mënyrë brilante në sistemin e Carlo Ancelottit. Ai u përshtat në mënyrë të përkryer në sezonin e tij të parë, në një Real Madrid që luante pa një sulmues klasik pas largimit të Karim Benzemas, me Vinicius Jr. dhe Rodrygo në fazën ofensive.
Ky ishte sistemi ideal për anglezin, i cili shfrytëzoi maksimalisht aftësinë e tij më të madhe: ardhjen nga thellësia drejt zonës finale. Megjithatë, Reali e kishte transferuar atë si mesfushor dhe ky fakt, sipas analizave, mund të ketë ndikuar në vonesën e përforcimeve në repartin e mesfushës pas largimeve të Toni Kroos dhe Luka Modric.
Ardhja e Mbappe dhe rënia e ndikimit
Pas një sezoni debutues ku u krahasua edhe me Alfredo Di Stéfanon, falë shifrave mbresëlënëse prej 23 golash dhe 13 asistesh, Bellingham këtë edicion ka humbur ritmin. Deri tani, ai ka shënuar vetëm 5 gola në 20 ndeshje, pa pasur ndikimin vendimtar që pritej në lojën e skuadrës.
Profili i tij, mes mesfushës dhe sulmit, e bën Bellingham një lojtar të vështirë për t’u përshtatur taktikisht. Pikërisht kjo u reflektua edhe në vështirësinë e Xabi Alonsos për t’i gjetur pozicionin ideal pas humbjes në “Metropolitano”.
“Unë e shoh atë më shumë si mesfushor”, deklaroi Alonso gjatë Kupës së fundit të Botës për Klube.
Megjithatë, për ndeshjen e kthimit në “Metropolitano”, trajneri ndryshoi skemën në 4-2-3-1, duke e vendosur Bellingham si mesfushor sulmues pas Mbappes, më afër portës kundërshtare.
Ndryshimet taktike dhe problemet mbrojtëse
Kjo ide u aplikua për disa ndeshje, por shpejt u bë e dukshme një mungesë ekuilibri mbrojtës në krahun e majtë, e përkeqësuar edhe nga kontributi i dobët mbrojtës i Vinicius Jr. Për këtë arsye, Alonso u detyrua të ndryshonte sërish planin.
Sistemi aktual 4-4-2 e pozicionon Bellingham në të majtë, duke i dhënë liri të plotë lëvizjeje. Kjo, megjithatë, kërkon një angazhim të madh fizik nga anglezi për t’u rikthyer në mbrojtje, ndërsa Vinicius lirohet nga detyrat defensive dhe luan si sulmues përkrah Mbappé-së.
Edhe ky rregullim nuk ka sjellë rezultatet e dëshiruara. Pavarësisht fitoreve ndaj Athletic Bilbao, Alaves dhe Sevilla, Reali pësoi një tjetër humbje kundër Celtas dhe vazhdon të shfaqë dobësi, si në lojë ashtu edhe në fazën mbrojtëse, ku kundërshtarët krijojnë shumë raste.
Situatë e ngjashme edhe me Anglinë
Problemet nuk mungojnë as në ekipin kombëtar të Anglisë. Pas rikthimit nga lëndimi, Bellingham është përballur me vështirësi në integrim. Në kualifikueset e Kupës së Botës, skuadra e drejtuar nga Thomas Tuchel regjistroi gjashtë fitore në gjashtë ndeshje, me golavarazh 18:0, duke siguruar kualifikimin me dy raunde të mbetura.
Megjithatë, rikthimi i Bellingham ka hapur debat për rolin e tij në sistem. Ai u prit me duartrokitje në Wembley, por edhe me fishkëllima kur hyri si zëvendësues kundër Serbisë. Me Harry Kane si kapiten të padiskutueshëm, Bukayo Saka në krahun e djathtë dhe Elliot Anderson përkrah Declan Rice në mesfushë, Bellingham ende po kërkon vendin e tij, veçanërisht tani që edhe Phil Foden është në formë të shkëlqyer.
Tensionet vazhduan edhe në ndeshjen kundër Shqipërisë (fitore 0-2), ku Bellingham ishte titullar dhe u shpall lojtari i ndeshjes. Gjithçka dukej perfekte deri në momentin e zëvendësimit të tij.
Anglezi reagoi me nervozizëm në stol, gjë që nuk i shpëtoi vëmendjes së trajnerit. Tuchel e kritikoi publikisht pas ndeshjes.
“Ai po i tundte krahët lart dhe ishte qartësisht i pakënaqur që u zëvendësua. Nga larg, nuk dukej si dikush që e përqafon kolektivin”, deklaroi gjermani.
Një problem i papritur për Realin dhe Anglinë
Pavarësisht gjithçkaje, Jude Bellingham mbetet pjesë e planeve për Kupën e Botës. Megjithatë, ashtu si te Real Madridi, edhe në kombëtare, përshtatja e tij në sistem është kthyer në një temë serioze debati – një problem i papritur për një lojtar që deri pak muaj më parë shihej si figura qendrore e së tashmes dhe së ardhmes. /Telegrafi/
Detaje të reja mbi klauzolat komplekse në kontratën e Endrick me Real Madridin kanë dalë në dritë, sipas Diario AS.
Reali arriti një marrëveshje prej 35 milionë eurosh me Palmeiras-in, me deri në 25 milionë euro të tjera në formë bonusesh të bazuara në performancë, të cilat u aktivizuan pasi sulmuesi mbushi 18 vjeç në vitin 2024.
Duke përfshirë tarifën fikse, komisionet dhe pagën, Real Madridi ka investuar tashmë afro 70 milionë euro te talenti brazilian.
Një pjesë e konsiderueshme e bonuseve lidhen drejtpërdrejt me performancën individuale të lojtarit.
Deri në vitin 2030, klubi madrilen paguan 35 mijë euro për çdo gol, asist ose penallti të fituar nga Endrick, me një kufi maksimal prej 12.5 milionë eurosh.
Çdo paraqitje si titullar prej të paktën 45 minutash i kushton Real Madridit 75 mijë euro, ndërsa ekzistojnë edhe shpërblime shtesë të lidhura me sukseset ekipore.
Nga ana tjetër, Palmeiras përfiton deri në 1 milion euro për fitimin e titullit në La Liga dhe deri në 2 milionë euro për paraqitjet në Ligën e Kampionëve, në varësi të rolit dhe aktivizimit të Endrick.
Me Endrick që këtë sezon ka mbetur shpesh në stol nën drejtimin e Xabi Alonsos dhe ka hasur vështirësi për të gjetur vazhdimësi, Real Madridi ka miratuar një huazim te Lyoni, me synimin për të mbrojtur investimin e bërë te talenti i ri./Telegrafi/
Vinicius po kalon një nga momentet më delikate që prej ardhjes së tij te Real Madridi. Pavarësisht se ka kontratë deri në vitin 2027, e ardhmja e tij e afërt është e rrethuar nga dyshime dhe lëvizje të heshtura.
Në zyrat e klubit madrilen, një skenar i veçantë shkakton shqetësim mbi të gjitha: mundësia që braziliani të përfundojë kontratën dhe të largohet si lojtar i lirë, duke i lënë klubit asnjë përfitim financiar.
Situata kontraktuale nuk po përparon. Bisedimet janë të ngrira prej muajsh dhe asnjëra palë nuk po hedh hapa vendimtarë, as drejt rinovimit dhe as drejt një largimi të dakordësuar.
Sipas DefensaCentral, në Real Madrid mbizotëron një kujdes ekstrem. Askush nuk konfirmon një prishje të marrëdhënies, por gjithashtu nuk transmetohet as optimizëm i plotë për vazhdimësinë e sulmuesit brazilian.
Klubi pranon se Vinicius mbetet një aset strategjik. Mosha e tij, ndikimi mediatik dhe historia e afërt e bëjnë një lojtar shumë të vështirë për t’u zëvendësuar.
Megjithatë, konteksti sportiv ka ndryshuar. Paraqitjet e lojtarit gjatë vitit 2025 nuk i kanë përmbushur pritshmëritë e krijuara pas fitimit të çmimit ‘The Best’ në vitin 2024.
Kjo rënie forme ka ndryshuar ekuilibrat në negociata. Në Valdebebas mendojnë se aktualisht nuk ka argumente të freskëta sportive që të justifikojnë një rinovim astronomik.
Ndërkohë, rrethi i lojtarit ka nisur të eksplorojë skenarë të ndryshëm. Sipas disa raportimeve, emri i tij u është ofruar tashmë disa gjigantëve evropianë.
PSG, Bayern Munich, Arsenal dhe Manchester United janë përmendur si destinacione të mundshme. Qëllimi është i qartë: të shihet nëse ekziston një klub i aftë të barazojë ose të përmirësojë statusin e tij aktual.
Në Real Madrid kjo nuk shkakton habi. Ata e konsiderojnë këto lëvizje si pjesë të një negociate komplekse dhe të nivelit të lartë ekonomik./Telegrafi/
Xabi Alonso po has vështirësi për të ruajtur rendin në dhomat e zhveshjes së Real Madridit, pasi aty ka plot lojtarë me emër të madh që besojnë se “e meritojnë” të jenë titullarë në çdo ndeshje, sipas ish-shokut të tij te kombëtarja e Spanjës, Cesc Fabregas.
Trajneri i Comos ka shpjeguar arsyet pse mendon se bashkatdhetari i tij është vënë nën presion në “Bernabeu” këtë sezon.
Sipas Fabregasit, i cili ka luajtur për Barcelonën, Arsenalin dhe Chelsean, vështirësia kryesore e Alonsos lidhet me faktin se ka në dispozicion një dhomë zhveshjeje të mbushur me yje.
Në deklarata të cituara nga e përditshmja spanjolle Marca, 38-vjeçari, që ka luajtur përkrah Alonsos në triumfin e Spanjës në Kupën e Botës 2010 dhe në fitoret e Kampionateve Evropiane në 2008 dhe 2012, u shpreh në një dokumentar të fundit kushtuar karrierës së Alonsos.
“Të gjithë janë shumë të mirë (lojtarët e Realit). Të gjithë e meritojnë të luajnë. Të gjithë mendojnë se duhet të luajnë. Të gjithë duhet të bëjnë diferencën. Të gjithë kushtojnë 50 milionë euro”.
“Të gjithë luajnë për kombëtaret e tyre. Ta menaxhosh këtë, me siguri, është gjëja më e vështirë nga të gjitha”.
Në të njëjtin dokumentar, duke rënë dakord me Fabregasin, ish-portieri i Liverpoolit, Pepe Reina, tha: “Nuk është e lehtë, sidomos në një dhomë zhveshjeje si kjo. Por Xabi nuk e ka problem të të shikojë në sy dhe të t’i thotë gjërat ashtu siç janë”.
Alonso do të shpresojë ta zbusë presionin mbi pozicionin e tij kur Reali të rikthehet në aksion në vitin 2026.
“Los Blancos” presin Real Betisin e drejtuar nga Manuel Pellegrini në La Liga, të dielën më 4 janar, përpara se të përballen me rivalët e qytetit, Atletico Madridin, në gjysmëfinalet e Superkupës së Spanjës katër ditë më vonë./Telegrafi/
Real Madridi po i afrohet fazës vendimtare të sezonit me një plan të qartë dhe me një ide që nuk do të ndryshojë pavarësisht zhurmave të jashtme: nuk do të ketë transferime në afatin kalimtar të janarit.
Megjithatë, kjo nuk do të thotë se Xabi Alonso nuk i ka identifikuar pjesët që dëshiron të shtojë për ta përmirësuar ekipin në afat të mesëm. Trajneri e di se dëshirat e tij nuk do të realizohen tani. Sidoqoftë, lista e tij e dëshirave ekziston dhe është e përcaktuar qartë.
Nga drejtuesit e Real Madridit, vendimi është marrë prej muajsh. Klubi nuk e konsideron të nevojshme përforcimin e skuadrës gjatë dimrit dhe vlerëson se në janar rrallëherë realizohen operacione vërtet të favorshme.
Ibrahima Konate, një mundësi joshëse për Xabi Alonson
Një nga emrat që bind më shumë Xabi Alonson është ai i Ibrahima Konates. Kontrata e mbrojtësit francez skadon më 30 qershor dhe situata e tij kontraktuale hap një dritare interesante.
Angelo Stiller, një opsion pothuajse i përjashtuar
Rasti i Angelo Stillerit është shumë i ndryshëm. Mesfushori gjerman pëlqehet, por ardhja e tij kushtëzohet nga një largim i rëndësishëm në mesfushën e “Los Blancos”.
Largimi i mundshëm i Dani Ceballos ose Eduardo Camavinga do të ishte i vetmi skenar që do t’i hapte rrugë transferimit të tij. Aktualisht, kjo mundësi nuk është në tryezë.
Florian Wirtz, dobësia e madhe e Xabi Alonsos
Aty ku Xabi Alonso nuk e fsheh aspak dobësinë e tij është Florian Wirtz. Trajneri i beson plotësisht talentit të mesfushorit ofensiv gjerman, pavarësisht përshtatjes së vështirë që ai po kalon te Liverpooli.
Xabi e njeh atë në mënyrë perfekte nga koha e tyre te Bayer Leverkusen. Ai e di se çfarë është i aftë të bëjë Wirtz kur ndihet rehat, i sigurt në vetvete dhe kur ka një rol kryesor në ekip./Telegrafi/
Përzgjedhësi i Spanjës, Luis de la Fuente, do të ketë shumë vendime të vështira përpara në muajt e ardhshëm, teksa përzgjedh skuadrën për Kupën e Botës në SHBA, Meksikë dhe Kanada.
“Furia e Kuqe” nuk ka pësuar shumë ndryshime që nga fushata e suksesshme në Euro 2024, por gjithnjë e më shumë po shfaqen emra të rinj që po ushtrojnë presion si për vendet titullare ashtu edhe për një vend në listën përfundimtare.
Forma e Martin Zubimendit dhe Mikel Merinos ka vënë në diskutim pozitat e Rodrit dhe Fabian Ruiz në formacionin bazë, ndërsa kapiteni i Euro 2024, Alvaro Morata, e ka gjithnjë e më të vështirë të sigurojë një vend në skuadër. Një tjetër repart ku mbizotëron pasiguria është mbrojtja qendrore.
Një nga fytyrat e reja që është kthyer në një thirrje të rregullt nga de la Fuente është Dean Huijsen.
I grumbulluar për herë të parë në mars, Huijsen la përshtypje të mira në çerekfinalet e Ligës së Kombeve po atë muaj dhe, që prej atëherë, ka qenë pjesë e skuadrës sa herë ka qenë në formë, shpesh edhe si titullar.
Megjithatë, sipas Marca, vendi i tij nuk është i sigurt. Huijsen, mes dëmtimeve, ka pësuar një rënie forme së fundmi dhe ka bërë disa gabime befasuese këtë sezon nën drejtimin e Xabi Alonsos.
Një nga faktorët vendimtarë do të jetë rikthimi në futbollin spanjoll i Aymeric Laporte.
Tashmë i rikthyer te Athletic Bilbao, Laporte kishte humbur vendin e tij në kombëtare gjatë vitit të fundit, teksa luante për Al-Nassr në Arabinë Saudite./Telegrafi/
Një nga transferimet e verës së kaluar, Franco Mastantuono, ka pasur një sezon me luhatje në Real Madrid, pas largimit të Endrick, tani vëmendja është drejtuar qartë tek i riu sulmues argjentinas.
Muaji i fundit ka qenë veçanërisht i trazuar për ekipin madrilen.
Çdo ndeshje nxjerr në pah diskutime rreth punës së Xabi Alonso, dhe shumë informacione e shohin Superkupën e Spanjës në janar si një moment kritik për klubin.
Në këtë kontekst, çdo vendim merr një dimension strategjik.
Largimi i Endrick te Olympique Lyon, i njoftuar së fundmi, në fakt ishte një operacion i mbyllur që nga fundi i tetorit.
Prandaj, lëvizjet e tjera të klubit do të jenë me një profil më të matur dhe të llogaritur.
Sipas Fabrizio Romano, Franco Mastantuono nuk do të huazohet në afatin kalimtar të janarit.
Sulmuesi 18-vjeçar, që ka shënuar 1 gol në 14 ndeshje dhe ka qenë titullar në muajt e parë të sezonit, vazhdon të jetë i preferuari i trajnerit Xabi Alonso.
"Franco Mastantuono nuk do të huazohet nga Real Madrid në janar. Lojtari po rikuperohet nga një dëmtim inguinal dhe po rikthehet në formën e tij më të mirë. Si klubi, ashtu edhe stafi teknik i besojnë plotësisht", konfirmoi Romano.
Mastantuono do të vazhdojë të jetë pjesë e projektit të Real Madridit, me besimin e stafit teknik dhe mundësinë për të treguar vlerat e tij pas një nisjeje të paqëndrueshme të sezonit. /Telegrafi/
Mediat spanjolle njoftojnë se trajneri i Real Madridit, Xabi Alonso, donte që Luka Modric me përvojë të qëndronte në “Santiago Bernabeu” edhe këtë sezon, por që, për fat të keq për të, drejtuesit e klubit refuzuan.
Sipas El Mundo, Xabi Alonso, i cili menaxhoi ndeshjet e fundit të Modricit me Real Madridin në Kupën e Botës për Klube dhe e përdori kroatin si lojtar me rotacion në fazat e fundit, do të kishte dashur që kroati të kishte qëndruar, por e dinte se nuk ishte vendimi i tij, kështu që u përqendrua te të rinjtë.
Ju kujtojmë se Modric mbushi 40 vjeç në shtator, por duke marrë parasysh ndeshjet, duket se ai po përjeton një rini të re, të parën larg ‘Santiago Bernabeut’ pas 13 sezonesh.
Ai fitoi Topin e Artë ndërsa luante për Real Madridin dhe u bë lojtari me më shumë tituj në historinë e klubit, me 28.
Pavarësisht kësaj, drejtuesit e "klubit mbretëror" vendosën të mos ia zgjasin kontratën. Ai shkoi në Milano dhe, në vend që të mendonte për daljen në pension, u bë lojtari më i përdorur në ekipin e Massimiliano Allegrit. /Telegrafi/
Disa klube nga Arabia Saudite po shfaqin interes konkret për portierin belg Thibaut Courtois, ndërsa Villarreal ka nisur lëvizjet për të afruar Andriy Lunin.
Edhe pse vëmendja mediatike te Real Madridi zakonisht përqendrohet te emra si Kylian Mbappe, Vinicius Junior, Jude Bellingham, Arda Guler apo Rodrygo Goes, realiteti është se Courtois (33 vjeç) mbetet një nga shtyllat e padiskutueshme të ekipit.
Ndeshje pas ndeshjeje, portieri belg dëshmon se prania e tij është vendimtare për klubin madrilen.
Për këtë arsye, interesimi në rritje nga Arabia Saudite përbën një burim shqetësimi për “Los Blancos”.
Sipas një raportimi të Defensa Central, disa klube të Lindjes së Mesme janë të gatshme t’i ofrojnë Courtois një kontratë trevjeçare me vlerë 30 milionë euro në sezon.
Megjithatë, në parim, Courtois nuk pritet t’i marrë seriozisht këto oferta.
Përveçse nuk ka shqetësime financiare, ai gëzon një pagë të lartë dhe synon të vazhdojë të luajë në nivelin më të lartë.
Aktualisht, kontrata e tij me Real Madridin skadon në qershor 2027, dhe gjithçka tregon se do të vijojë të mbrojë portën e “Santiago Bernabeu” deri atëherë.
Ndryshe paraqitet situata e Andriy Lunin (26 vjeç).
Portieri ukrainas duket gjithnjë e më i lodhur nga roli i dytë pas Courtois dhe nuk përjashton një largim në fund të sezonit.
Mes ofertave që kanë nisur të mbërrijnë, spikat ajo e Villarrealit.
Sipas OK Diario, klubi spanjoll e sheh Lunin si profilin ideal për t’i dhënë stabilitet portës, një repart ku as Luiz Junior dhe as Arnau Tenas nuk kanë arritur të konsolidohen. /Telegrafi/
Ruben Neves është sërish në qendër të tregut të transferimeve. Mesfushori portugez, aktualisht te Al Hilal, mund të përfshihet në një nga lëvizjet më të mëdha të verës së ardhshme duke iu bashkuar Real Madridit si transferim i lirë.
Neves është veçuar drejtpërdrejt nga Al Jaber, një nga legjendat e mëdha të futbollit arab, i cili nuk ka hezituar të parashikojë rezultatin e së ardhmes së mesfushorit portugez. Fjalët e tij kanë pasur një ndikim të fortë si në Arabinë Saudite ashtu edhe në Evropë.
Deklarata është përfundimtare. Lojtari portugez nuk do ta rinovojë kontratën e tij me klubin e tij aktual dhe destinacioni i tij është vendosur tashmë. Real Madridi duket të jetë opsioni prioritar për ta përfunduar karrierën e tij në nivelin më të lartë të futbollit evropian. Në Valdebebas, ata po e monitorojnë nga afër një mundësi që përputhet në mënyrë të përkryer me politikën e fundit të transferimeve të klubit.
Koha e Ruben Neves te Al Hilal mund të jetë drejt fundit. Pavarësisht rëndësisë së tij për sistemin e ekipit saudit, lojtari thuhet se nuk ka ndërmend të zgjasë kontratën e tij.
🚨LA LEYENDA ÁRABE, AL JABER, ASEGURA QUE RÚBEN NEVES SE MARCHARÁ GRATIS AL REAL MADRID
🧳"Me temo que Neves se mudará del Al Hilal al Real Madrid gratis"
🧐"La Premier League también está detrás. Los contratos que le ofrecen son por tres años, hasta que cumpla 31"
Burime në Arabinë Saudite pohojnë se mesfushori ka marrë tashmë një vendim të prerë. Ai preferon të kthehet në futbollin evropian para se të mbushë 30 vjeç dhe të garojë në nivelin më të lartë.
Al Hilal është në dijeni të këtij qëndrimi dhe pranon se nuk mund ta mbajnë atë përtej kontratës së tij aktuale. Për më tepër, largimi i tij do të ndodhte pa asnjë tarifë transferimi. Ky skenar, ndonëse i dhimbshëm për klubin, konsiderohet i pashmangshëm duke pasur parasysh ambiciet sportive të lojtarit.
Real Madridi e sheh Nevesin si një opsion strategjik të nivelit të lartë. Shtimi i një mesfushori të provuar dhe kryesor me përvojë ndërkombëtare si transferim i lirë është një mundësi që është e vështirë të injorohet.
Los Blancos kanë vlerësuar lojtarë që mund të sjellin ekuilibër, karakter dhe vetëdije taktike në mesfushë. Lojtari portugez i plotëson të gjitha këto kërkesa. Për më tepër, përvoja e tij në ligën e parë angleze dhe pjekuria e tij futbollistike përputhen me idenë e forcimit të skuadrës pa kompromentuar stabilitetin financiar.
Në La Liga, ardhja e tij do të rriste nivelin konkurrues të kampionatit dhe do të përforconte një zonë kyçe të fushës për ekipin e bardhë. /Telegrafi/
Lyon ka kompletuar huazimin e sulmuesit Endrick nga Real Madrid. 19-vjeçari u transferua te klubi i Ligue 1 për pjesën e mbetur të sezonit, në një marrëveshje që nuk përmban opsion blerjeje.
Sipas marrëveshjes, skuadra franceze do të mbulojë pjesërisht pagën e Endrick, ndërsa Madrid do të marrë kompensim shtesë nëse sulmuesi nuk luan të paktën 25 ndeshje.
Shuma e kompensimit do të ndryshojë në varësi të ndeshjeve që Lyon do të zhvillojë në kupë dhe në Ligën e Evropës. Endrick do të mbajë fanellën me numrin 9 te Lyon.
Rregulloret franceze parashikojnë që një lojtar duhet të presë katër ditë nga regjistrimi i marrëveshjes përpara se të mund të luajë për klubin e ri, që do të thotë se Endrick nuk do të jetë i disponueshëm për ndeshjen e Lyon kundër Monacos më 3 janar, pasi marrëveshja nuk mund të regjistrohet zyrtarisht para 1 janarit.
Endrick është tërhequr nga oferta e Lyon pas vështirësive për të gjetur minutazh të rregullt në Madrid dhe beson se ky transferim mund të rrisë shanset e tij për t’u përfshirë në skuadrën e Brazilit për Kupën e Botës të vitit të ardhshëm.
Real Madrid kishte vonuar vendimin për të ardhmen e Endrick gjatë sezonit, në pritje të ndryshimeve, por u bë e qartë se ai nuk është pjesë e planeve të trajnerit Xabi Alonso.
Endrick ka luajtur vetëm tri herë këtë sezon, një herë si zëvendësues në La Liga, një herë si zëvendësues në Ligën e Kampionëve dhe një herë si titullar në fitore ndaj CF Talavera në rundin e 32-të të Kupës së Mbretit.
Gjatë sezonit 2024/2025, ai luajti më rregullisht nën drejtimin e Carlo Ancelotti, tani përzgjedhës i Brazilit, duke regjistruar 22 paraqitje në La Liga, por vetëm tri prej tyre si titullar.
Endrick iu bashkua Madridit si 17-vjeçar nga Palmeiras në dhjetor 2022 dhe nënshkroi zyrtarisht në korrik 2024.
Deri më tani, ai ka zhvilluar 40 ndeshje në të gjitha kompeticionet për Madridin, duke shënuar shtatë gola dhe një asistim./Telegrafi/
Kapiteni i Real Madridit, Dani Carvajal, po përgatit një largim të mundshëm nga klubi i zemrës së tij gjatë verës.
Mbrojtësi veteran, i cili këtë verë mori shiritin e kapitenit nga Luka Modric, mund të jetë duke luajtur sezonin e tij të fundit me “Los Blancos”.
Këtë javë, teksa Real Madridi ishte në pushimin dimëror, Carvajal shfrytëzoi rastin për të vizituar kunatin dhe ish-bashkëlojtarin e tij, Joselu Mato, në Katar.
Joselu, 35 vjeç, u largua nga klubi 18 muaj më parë për t’iu bashkuar Al-Gharafas dhe dyshja vazhdojnë të ruajnë një marrëdhënie të ngushtë.
Carvajal u pa duke pozuar me një fanellë të Al-Gharafas me emrin “Carvajal”, gjë që mund të shihet si një paralajmërim për një lëvizje të mundshme.
Sipas Jorge Picon, vizita e Carvajal te Joselu ishte më shumë një udhëtim eksplorues për të ardhmen e tij sesa thjesht një vizitë familjare.
Ai shpjegon se Carvajal beson se po i afrohet fundit të aventurës së tij te Real Madridi dhe se është më pranë largimit në përfundim të kontratës këtë verë sesa rinovimit të saj.
Prioriteti i tij aktual është rikuperimi nga dëmtimi dhe rikthimi në formën optimale për Kupën e Botës 2026, pas së cilës ai dëshiron të vazhdojë të luajë futboll në një ambient më pak kërkues.
Aktualisht, Carvajal e sheh Al-Gharafan si destinacionin më realist në momentin kur të largohet nga Real Madridi.
Ky transferim do t’i përmbushte kërkesat e tij, do t’i mundësonte të luante sërish përkrah Joselut dhe njëkohësisht t’i kushtonte më shumë kohë familjes së tij./Telegrafi/
Presidenti i La Ligës, Javier Tebas, e ka kritikuar sërish Real Madridin, duke folur për konkurrencën në ligë, polemikat e arbitrimit dhe tensionet që përfshijnë klubin dhe Florentino Perezin.
Tebas beson se tensioni kundër gjyqtarëve vjen nga Real Madridi, jo nga klubet e tjera.
“Sipas mendimit tim, nuk është Barcelona ajo që po shkakton tensionin në këtë rast. Është Real Madridi kundër gjithçkaje, domethënë kundër Barcelonës, kundër gjyqtarëve… Kundër gjithçkaje”, ka thënë fillimisht Tebas.
Trajneri i La Ligës kritikoi gjithashtu narrativën që lidh gabimet aktuale të arbitrimit me polemikat e së kaluarës.
“Narrativa është se ajo që po ndodh sot me disa gabime të arbitrimit është faji i asaj që ndodhi në vitin 2019 ose 2017. Qëllimi është të krijohet një narrativë që gjyqtarët tani janë të anshëm. Kjo është shumë e rrezikshme sepse nuk është e vërtetë”.
Lidhur me çështjen e Negreirës dhe reagimin e Real Madridit, ai shtoi se tensionet nga Los Blancos po vijnë pasi janë të hutuar.
“Të gjithë e dinë tashmë mendimin tim… Por të kalojmë nga kjo në të thënën se sot, kur një lojtari të Real Madridit nuk i jepet një penallti në një ndeshje, kjo është pasojë e kësaj. Kjo po krijon tension gjatë gjithë fundjavës në kanalin televiziv të Real Madridit… Mendoj se janë shumë të çorientuar”.
I pyetur nëse e konsideronte ndërmjetësimin, Tebas ishte i qartë: “Jo, sepse edhe unë jam cak i sulmeve, kështu që nuk mendoj se jam ndërmjetësi më i përshtatshëm në këtë çështje”. /Telegrafi/
Pavarësisht lidhjeve të shumta ndër vite mes Erling Haaland dhe Real Madridit, sulmuesi norvegjez aktualisht nuk është në planet e klubit madrilen.
Sipas informacioneve të gazetarit Ekrem Konur, drejtuesit e “Los Blancos” besojnë se nevojat sulmuese të skuadrës janë të mbuluara plotësisht nga Kylian Mbappe.
Prej disa sezonesh, media pranë Real Madridit e kanë përmendur vazhdimisht emrin e Haalandit si një objektiv të mundshëm për “Santiago Bernabeu”.
Megjithatë, situata aktuale tregon se klubi nuk ka interes konkret për të ndërmarrë hapa drejt sulmuesit të Manchester Cityt.
Nga ana sportive, Mbappe po kalon një sezon mbresëlënës.
Sulmuesi francez ka realizuar 29 gola dhe ka dhënë 5 asistime në 24 ndeshje zyrtare.
Ndërkohë, Haaland ka shënuar 25 gola dhe ka regjistruar 4 asistime në 23 paraqitje me Manchester Cityn, statistika që konfirmojnë formën e lartë të të dy lojtarëve.
Përtej aspektit sportiv, transferimi i Haalandit do të ishte jashtëzakonisht i vështirë.
Norvegjezi ka kontratë me Man Cityn deri në qershor të vitit 2034 dhe klubi anglez nuk ka ndërmend të lehtësojë largimin e tij.
Edhe pse është përfolur për ekzistencën e një klauzole lirimi, as lojtari dhe as klubi nuk e kanë konfirmuar zyrtarisht një mekanizëm të tillë.
Në këto rrethana, një kalim i Haalandit te Real Madridi duket shumë larg realitetit, të paktën në të ardhmen e afërt. /Telegrafi/
I fishkëllyer nga një pjesë e tifozëve në “Santiago Bernabeu” në ndeshjen e fundit të vitit, braziliani Vinicius Junior po kalon një nga momentet më delikate që prej ardhjes së tij te Real Madridi.
Vazhdimësia e tij në klub nuk mund të konsiderohet më e sigurt.
“Sigurisht që tifozët janë sovranë dhe të lirë të shprehin opinionin e tyre”.
Kështu u shpreh trajneri i Real Madridit, Xabi Alonso, në konferencën për shtyp pas fitores 2-0 ndaj Sevillas, duke komentuar fishkëllimat që një pjesë e madhe e tribunave ia dedikuan Viniciusit në momentin e zëvendësimit.
Megjithatë, tekniku bask shmangu çdo mbrojtje publike të lojtarit, duke zgjedhur ta mbyllë sa më shpejt temën, një detaj që nxjerr në pah distancimin mes trajnerit dhe sulmuesit brazilian.
Edhe pse pas gjesteve të pakënaqësisë në “El Clasico”, Vinicius ka tentuar të shfaqë një raport më të afërt me trajnerin, realiteti është se marrëdhënia mes tyre ka përmirësime minimale.
Problem i dukshëm për drejtuesit
Ky tension i hapur është kthyer në një shqetësim serioz për drejtuesit e Real Madridit, të cilët prej kohësh po përpiqen të mbyllin rinovimin e kontratës së anësorit.
“Mendoj se drejtuesit do të kishin preferuar që Vinicius të mos zëvendësohej. Duke parë situatën e rinovimit, ata duan ta zgjasin kontratën, por nuk e kanë situatën nën kontroll”, deklaroi gazetari Anton Meana për Cadena SER.
Nga ana tjetër, Javier Herraez shtoi: “Vinicius largohet nga fusha i sfiduar dhe i zemëruar. Gjithçka varet nga ai. Nëse luan si dy vite më parë, tifozët do ta duartrokasin”.
“Nuk mund të kushtëzohet e gjithë sezoni. Ndoshta vetë Vinicius po i zvarrit negociatat sepse dëshiron të largohet dhe të mos rinovojë”.
Pas ndeshjes, Vinicius përfitoi nga pushimi i Krishtlindjeve për të udhëtuar në Dubai.
Me rikthimin e garave, ai do të duhet të përballet sërish me gjykimin e tifozëve dhe me një ambient që tashmë nuk e fsheh mundësinë e largimit të tij. /Telegrafi/
Nico Paz ka folur së fundmi për spekulimet gjithnjë e më të shumta lidhur me një rikthim të mundshëm te Real Madridi gjatë verës së ardhshme.
Mesfushori sulmues argjentinas nuk u aktivizua këtë fundjavë, pasi ndeshja e Serie A mes Comos dhe AC Milanit u shty për shkak të angazhimeve të kuqezinjve në Superkupën e Italisë.
Paz, i cili monitorohet nga afër nga Real Madridi sipas kushteve të marrëveshjes me Comon, shfrytëzoi kohën e lirë për të ndjekur një ndeshje të një kategorie më të ulët në Qendrën Sportive “La Castellina”.
Në një prononcim për Sportitalia, 20-vjeçari minimizoi zërat për të ardhmen e tij:
"Nuk po mendoj për këtë, jam i fokusuar vetëm te të luajturit", deklaroi Paz.
"Po përpiqem të jap maksimumin tim", tha ylli i ri argjentinas.
Paz po kalon një formë shumë të mirë me Comon dhe, sipas mediave, ndodhet gjithashtu në radarin e Interit, Tottenham Hotspur dhe Manchester United.
Ai mund të bëjë hapin drejt një klubi tjetër të madh, në rast se Real Madridi vendos të mos e rikthejë në “Santiago Bernabeu”. /Telegrafi/
Trajneri Diego Simeone ka paralajmëruar se Atletico Madrid duhet të japë shumë më tepër se maksimumi nëse dëshiron ta sfidojë realisht Barcelonën dhe Real Madridin për titullin në La Liga, pavarësisht fitores bindëse 3-0 ndaj Gironës.
Atletico e dominoi plotësisht përballjen e së dielës, duke marrë tri pikë të mëdha që e ngjitën në vendin e tretë në tabelë. Megjithatë, trajneri argjentinas mbetet realist dhe i vetëdijshëm për hendekun që ende ekziston mes skuadrës së tij dhe dy gjigantëve spanjollë.
“Sezonin e kaluar konkurruam shumë mirë në Ligën e Kampionëve, por në La Liga na mungoi ai shtytje shtesë, vendosmëria dhe bindja. Për të arritur aty ku duam, 100 për qind nuk mjafton”.
Simeone theksoi se sa herë përballet ose mendon për Real Madridin dhe Barcelonën, kupton qartë se kërkesat janë shumë më të larta.
“Sa herë që shohim Real Madridin dhe Barcelonën, mendoj për këtë, për shkak të situatave të ndryshme; ne duhet të japim 110 apo 120 për qind”.
“Nuk arritëm ta kapim atë nivel dhe për këtë arsye kemi mbetur të bllokuar në pozicionin ku kemi qenë kohët e fundit”.
Simeone foli edhe për ecurinë e këtij sezoni, duke kujtuar fillimin e vështirë dhe kritikat që skuadra mori.
“Deri në gjysmën e sezonit, ekipi doli nga një situatë e vështirë në fillim, ku nuk po shihnim atë që donim të shihnim. Ju na kritikonit, ne donim të përmirësoheshim dhe lojtarët donin të evoluonin".
“Fatmirësisht, puna e palodhur, besimi, bindja, vetëbesimi dhe të diturit saktësisht se çfarë duam na dhanë qetësinë për të vazhduar në rrugën drejt asaj që synojmë. Dhe ajo rrugë na mëson se 100 për qind nuk mjafton”.
Atletico përndryshe zë pozitën e tretë me 37 pikë, nëntë më pak se lideri Barcelona./Telegrafi
Cristiano Ronaldo nuk nguroi ta lavdërojë Kylian Mbappe pas paraqitjes së jashtëzakonshme të francezit, i cili barazoi rekordin e tij historik për numrin më të madh të golave të shënuar në një vit kalendarik me fanellën e Real Madridit.
Mbappe hyri në përballjen e së shtunës ndaj Sevillas duke pasur nevojë vetëm për një gol për të arritur kuotën e 59 golave për Madridin gjatë vitit 2025, shifër kjo që përkon me rekordin absolut të Ronaldos dhe njëkohësisht numrin më të lartë të golave të shënuar nga një lojtar i vetëm në një vit në historinë e klubit.
Sulmuesi francez u detyrua të priste deri në minutën e 86-të për të realizuar golin vendimtar nga pika e bardhë e penalltisë. Menjëherë pas golit, Mbappe e shfaqi hapur emocionin e tij, duke festuar me celebrimin e famshëm “siu” të Cristiano Ronaldos, gjest që u prit me entuziazëm nga tifozët në “Santiago Bernabeu”.
Pas ndeshjes, Mbappe ia dedikoi golin idhullit të tij, duke e theksuar edhe në rrjetet sociale, ku publikoi fotografi nga festa e golit së bashku me një imazh nga fëmijëria, kur kishte takuar Ronaldon për herë të parë.
“Besoni në ëndrrat tuaja. Respekt i madh për Cristianon”.
Nën këtë postim, vetë Cristiano Ronaldo reagoi duke e përgëzuar Mbappen, duke përdorur simbole që shprehnin duartrokitje dhe zjarr, si shenjë vlerësimi për arritjen e sulmuesit francez, i cili tashmë ka hyrë në histori të klubit madrilen./Telegrafi/
Login
