Sulmuesi Endrick ka folur hapur për vështirësitë e periudhës së tij të parë te Real Madridi, duke zbuluar se momenti më i vështirë për të ishte konfirmimi se do ta humbiste Kupën e Botës për Klube të FIFA-s, e cila u zhvillua në Shtetet e Bashkuara të Amerikës.
Sulmuesi i ri brazilian pësoi një lëndim në muskujt e pasmë të kofshës drejt fundit të sezonit të kaluar, i cili u përkeqësua gjatë seancave stërvitore para turneut.
Si pasojë, ai mbeti jashtë fushave për disa muaj dhe nuk arriti të marrë pjesë fare në këtë kompeticion. Në një intervistë së fundmi, Endrick u shpreh se ishte momenti më i rëndë i karrierës.
“Konfirmimi se do ta humbja Kupën e Botës për Klube në Shtetet e Bashkuara. Se nuk do të mund të luaja për disa muaj”.
“Është momenti kur e kupton se nuk do të mund të garosh. Humbjet janë të këqija, por janë pjesë e futbollit. Ne fitojmë dhe humbim. Të gjithë e bëjnë këtë. Pak janë ata që fitojnë trofe”.
“Askush nuk fiton gjatë gjithë kohës. Por lëndimet mund të të largojnë krejtësisht nga futbolli”, deklaroi ai.
Ndërkohë, Endrick po synon të gjejë formën sa më të mirë te Lyoni, me shpresën që të merr një ftesë nga Carlo Ancelotti për Kupën e Botës 2026./Telegrafi/
Trajneri i Real Madridit, Xabi Alonso, ka deklaruar se ishte vendimi i Endrick për t’u larguar në formë huazimi te Lyon, teksa u pyet për planet e klubit në afatin e janarit.
Braziliani kishte pasur shumë pak hapësira nën drejtimin e Alonsos, duke zhvilluar vetëm tre paraqitje që nga rikthimi i tij nga dëmtimi në mesin e shtatorit.
Më herët gjatë javës, ishte raportuar se Alonso do të kishte preferuar afrimin e një mesfushori në afatin e janarit, një nevojë për të cilën ‘Los Blancos’ duket se po përgatiten për verën.
Megjithatë, si zakonisht, Real Madridi nuk pritet të jetë aktiv në janar, dhe përgjigjja e Alonsos e përforcoi këtë ide.
“Ne gjithmonë duhet të jemi vigjilentë, por jemi të kënaqur me skuadrën. Do të ndjekim çdo mundësi që mund të paraqitet”, u shpreh ai.
Marrëveshja e vetme e përfunduar nga Reali është largimi i Endrick, i cili do të luajë si i huazuar te Lyon deri në fund të sezonit. Alonso u shpreh i kënaqur me këtë lëvizje.
“Në këtë fazë të karrierës së tij, Endrick ka nevojë të luajë, dhe e kuptoj pse ai e mori këtë vendim dhe pse klubi investoi në zhvillimin dhe përvojën e tij në një ligë si ajo francize”, tha Alonso.
“Real Madridi bën një punë shumë të mirë me lojtarët që largohen për t’u rritur dhe më pas rikthehen”, përfundoi ai./Telegrafi/
Real Madridi ka finalizuar tashmë largimin e Endrick Felipe, që pritet të jetë lëvizja e vetme e klubit gjatë afatit kalimtar dimëror.
Megjithatë, ekzistonte mundësia që edhe Franco Mastantuono të largohej me huazim.
Mastantuono pati një fillim premtues në Real Madrid pas transferimit të tij nga River Plate gjatë verës, por muajt e fundit ka rënë në disfavor.
Lëndimet kanë luajtur një rol, por realiteti është se Xabi Alonso nuk e sheh më si titullar të rregullt, një situatë e vështirë për të përballuar.
Mesfushori 18-vjeçar kërkon kohë të rregullt lojë për të siguruar vend në ekipin kombëtar të Argjentinës për Kupën e Botës 2026.
Ai mund të ketë vështirësi të marrë minuta të shumta në ‘Bernabeu’, prandaj i ishte ofruar mundësia për të kaluar me huazim në Itali.
Sipas gazetës Marca, Napoli pyeti Real Madrid për mundësinë e huazimit të Mastantuonos për gjysmën e dytë të sezonit, por kërkesa u refuzua kategorikisht.
Zyrtarët e Los Blancos e konsiderojnë atë si një lojtar të rëndësishëm, dhe arsyeja e mungesës së tij të fundit në fushë lidhet me dëmtimin që ende nuk është shëruar plotësisht.
Rikthimi i Rodrygo Goes e ka vënë Mastantuonon në disavantazh për të rikthyer vendin në formacionin titullar të Real Madrid, por me shumë ndeshje në vijim gjatë muajve të ardhshëm, ai do të ketë mundësi për të treguar vlerat e tij.
Mastantuono shihet si një lojtar i së tashmes, një fakt i rëndësishëm duke pasur parasysh moshën e tij vetëm 18-vjeçare.
Real Madridi e ka në plan të llogarisë tek ai, prandaj kërkesa e Napolit u refuzua. /Telegrafi/
Detaje të reja mbi klauzolat komplekse në kontratën e Endrick me Real Madridin kanë dalë në dritë, sipas Diario AS.
Reali arriti një marrëveshje prej 35 milionë eurosh me Palmeiras-in, me deri në 25 milionë euro të tjera në formë bonusesh të bazuara në performancë, të cilat u aktivizuan pasi sulmuesi mbushi 18 vjeç në vitin 2024.
Duke përfshirë tarifën fikse, komisionet dhe pagën, Real Madridi ka investuar tashmë afro 70 milionë euro te talenti brazilian.
Një pjesë e konsiderueshme e bonuseve lidhen drejtpërdrejt me performancën individuale të lojtarit.
Deri në vitin 2030, klubi madrilen paguan 35 mijë euro për çdo gol, asist ose penallti të fituar nga Endrick, me një kufi maksimal prej 12.5 milionë eurosh.
Çdo paraqitje si titullar prej të paktën 45 minutash i kushton Real Madridit 75 mijë euro, ndërsa ekzistojnë edhe shpërblime shtesë të lidhura me sukseset ekipore.
Nga ana tjetër, Palmeiras përfiton deri në 1 milion euro për fitimin e titullit në La Liga dhe deri në 2 milionë euro për paraqitjet në Ligën e Kampionëve, në varësi të rolit dhe aktivizimit të Endrick.
Me Endrick që këtë sezon ka mbetur shpesh në stol nën drejtimin e Xabi Alonsos dhe ka hasur vështirësi për të gjetur vazhdimësi, Real Madridi ka miratuar një huazim te Lyoni, me synimin për të mbrojtur investimin e bërë te talenti i ri./Telegrafi/
Lyon ka kompletuar huazimin e sulmuesit Endrick nga Real Madrid. 19-vjeçari u transferua te klubi i Ligue 1 për pjesën e mbetur të sezonit, në një marrëveshje që nuk përmban opsion blerjeje.
Sipas marrëveshjes, skuadra franceze do të mbulojë pjesërisht pagën e Endrick, ndërsa Madrid do të marrë kompensim shtesë nëse sulmuesi nuk luan të paktën 25 ndeshje.
Shuma e kompensimit do të ndryshojë në varësi të ndeshjeve që Lyon do të zhvillojë në kupë dhe në Ligën e Evropës. Endrick do të mbajë fanellën me numrin 9 te Lyon.
Rregulloret franceze parashikojnë që një lojtar duhet të presë katër ditë nga regjistrimi i marrëveshjes përpara se të mund të luajë për klubin e ri, që do të thotë se Endrick nuk do të jetë i disponueshëm për ndeshjen e Lyon kundër Monacos më 3 janar, pasi marrëveshja nuk mund të regjistrohet zyrtarisht para 1 janarit.
Endrick është tërhequr nga oferta e Lyon pas vështirësive për të gjetur minutazh të rregullt në Madrid dhe beson se ky transferim mund të rrisë shanset e tij për t’u përfshirë në skuadrën e Brazilit për Kupën e Botës të vitit të ardhshëm.
Real Madrid kishte vonuar vendimin për të ardhmen e Endrick gjatë sezonit, në pritje të ndryshimeve, por u bë e qartë se ai nuk është pjesë e planeve të trajnerit Xabi Alonso.
Endrick ka luajtur vetëm tri herë këtë sezon, një herë si zëvendësues në La Liga, një herë si zëvendësues në Ligën e Kampionëve dhe një herë si titullar në fitore ndaj CF Talavera në rundin e 32-të të Kupës së Mbretit.
Gjatë sezonit 2024/2025, ai luajti më rregullisht nën drejtimin e Carlo Ancelotti, tani përzgjedhës i Brazilit, duke regjistruar 22 paraqitje në La Liga, por vetëm tri prej tyre si titullar.
Endrick iu bashkua Madridit si 17-vjeçar nga Palmeiras në dhjetor 2022 dhe nënshkroi zyrtarisht në korrik 2024.
Deri më tani, ai ka zhvilluar 40 ndeshje në të gjitha kompeticionet për Madridin, duke shënuar shtatë gola dhe një asistim./Telegrafi/
Real Madridi po përgatit ndryshime të rëndësishme në afatin kalimtar dhe ka konfirmuar se Endrick nuk do të vazhdojë të jetë pjesë e skuadrës në ‘Santiago Bernabeu’.
Sulmuesi brazilian do të nisë një etapë të re në karrierën e tij, duke u huazuar te Olympique Lyon, me shpresën për të rikthyer besimin dhe minutat e lojës që i mungojnë te madrilenët.
Në Valdebebas e konsiderojnë huazimin si një vendim strategjik, duke synuar të ruajnë një investim të rëndësishëm dhe të shmangin uljen e mëtejshme të vlerës së lojtarit.
Operacioni është punuar me kujdes dhe diskrecion, dhe marrëveshja me Lyon është përfundimisht e mbyllur, pavarësisht ndryshimeve të mundshme në stolin e Real Madrid.
Roli i Endrickut te Real Madridi
Endrick nuk ka arritur të gjejë vendin e tij te Real Madrid dhe nuk është pjesë e planeve sportive afatshkurtra.
Me Carlo Ancelottin kishte një rol të kufizuar, i cili u zvogëlua edhe më shumë me ardhjen e Xabi Alonsos.
Gjatë sezonit, braziliani ka grumbulluar vetëm 22 minuta në La Liga dhe Ligën e Kampionëve, një tregues i qartë i mungesës së besimit dhe rolit të përcaktuar.
Minutat e tij të fundit kundër Manchester City u konsideruan thjesht një rastësi, jo një ndryshim real në situatë.
Gjithashtu, një episod i pahijshëm me kartonin e kuq dhe pezullimin dy ndeshjesh në La Liga për protestë nga stoli ka përshpejtuar vendimin për largimin e tij.
E ardhmja e tij me fanellën e Real Madrid pritet të mbyllet përkohësisht në Copa del Rey kundër Talavera.
Real Madridi kishte paguar rreth 60 milionë euro te Palmeiras për Endrick, një investim historik për potencialin e tij.
Megjithatë, performanca e tij nuk ka qenë në nivelin e pritur dhe vlera e tij në treg ka rënë ndjeshëm, duke u ulur nga 60 milionë në rreth 25 milionë euro. /Telegrafi/
Real Madridi mund ta shkarkojë Xabi Alonson që javën e ardhshme, mes shqetësimeve serioze për nisjen e dobët të sezonit 2025/26, por kjo nuk do ta ndryshojë largimin e qendërsulmuesit Endrick.
Tekniku spanjoll ka hasur vështirësi për të nxjerrë maksimumin nga skuadra që prej ardhjes nga Bayer Leverkusen gjatë verës dhe për këtë arsye pozita e tij është vënë në dyshim. Sipas raportimeve, Alonso mund të lirohet nga detyra nëse “Los Blancos” pësojnë humbje në cilëndo nga tri ndeshjet e mbetura para pushimit dimëror.
Një largim i mundshëm i Alonsos mund të shihet si lajm i mirë për disa lojtarë që thuhet se janë të pakënaqur me të, mes tyre edhe Endrick Felipe. Talenti brazilian ka pasur shumë pak minuta që nga rikthimi nga lëndimi, ndërsa Gonzalo Garcia është preferuar si alternativë e parë pas Kylian Mbappe në repartin ofensiv.
Kjo situatë ka çuar në arritjen e një marrëveshjeje për huazimin e Endrick te Lyon, e cila pritet të aktivizohet sapo të hapet afati kalimtar i janarit. Ka pasur spekulime se kjo lëvizje mund të anulohej në rast se Alonso largohej nga posti, por “Diario AS” e ka mohuar këtë mundësi, duke theksuar se përfaqësuesi brazilian do të largohet me siguri nga “Bernabeu” në janar.
Endrick
Në kampin madrilen besohet se huazimi te Lyon do të jetë shumë i dobishëm për Endrick, i cili ka nevojë për minuta të rregullta loje për të siguruar një vend në përfaqësuesen e Brazilit për Kupën e Botës verën e ardhshme.
Vlerësimi brenda klubit është se kjo marrëveshje i shërben të gjitha palëve, prandaj nuk ka asnjë dëshirë për ta prishur atë, edhe nëse Alonso largohet. Trajneri aktual e sheh 19-vjeçarin më shumë si një lojtar dinamik dhe më pak si një sulmues tipik zone.
Endrick nuk do të luajë më në La Liga këtë sezon, pasi është i suspenduar për ndeshjet ndaj Alaves dhe Sevillas. Megjithatë, ai mund të aktivizohet në Kupën e Mbretit në mesjavë, që pritet të jetë paraqitja e tij e fundit me fanellën e Real Madridit, përpara se t’i bashkohet Lyonit në fillim të janarit./Telegrafi
Sipas Sky Germany dhe gazetarit Florian Plettenberg, klubi i Bundesligës VfB Stuttgart është realisht i interesuar për transferimin e Gonzalo Garcia nga Real Madridi.
“Garcia është kandidati i ëndrrave për Stuttgart në afatet kalimtare të ardhshme”, ka raportuar Plettenberg, duke shtuar se lojtari i ri spanjoll plotëson pothuajse të gjitha kriteret e klubit.
Madje, palët kanë zhvilluar edhe bisedimet e para, megjithatë transferimi shihet si shumë i vështirë për t’u realizuar, ndaj Stuttgart po shqyrton edhe alternativa të tjera.
21-vjeçari i Real Madridit, nën kontratë deri në vitin 2030, ka tërhequr vëmendjen me katër gola në Kupën e Botës për Klube, ndërsa dje ishte në formacionin titullar kundër Manchester Cityt.
Situata ndërlikohet edhe më tej, pasi Garcia aktualisht është para Endrick në hierarkinë e klubit.
Kjo do të thotë se, nëse Garcia largohet, Endrick nuk do të dërgohet në huazim siç ishte planifikuar fillimisht, duke e bërë transferimin edhe më të vështirë. /Telegrafi/
Endrick dhe Alvaro Carreras rrezikojnë të paktën dy ndeshje pezullim, pasi gjyqtari Quintero Gonzalez paraqiti një raport të rënduar pas ndeshjes, ku përshkruhen disa incidente të ndodhura gjatë fitores së nxehtë të Real Madridit ndaj Celta Vigos.
Sipas raportit, Carreras u përjashtua pasi i tha gjyqtarit “Je i tmerrshëm”, një shkelje që bie nën Nenin 124 të Kodit Disiplinor – i njëjti nen që solli edhe pezullimin dy-ndeshjesh të Pere Millas më herët këtë sezon.
Duke u nisur nga ky precedent, mbrojtësi pritet të mungojë të paktën dy ndeshje, me mundësinë e një të trete, në varësi të vlerësimit të komitetit.
Ndërkohë, Endrick u akuzua për britma proteste dhe më pas u desh të mbahej fizikisht nga stoli i skuadrës. Sjellja e tij klasifikohet në të njëjtën kategori të “mungesës së respektit”, çka nënkupton një pezullim minimal prej dy ndeshjesh.
Duke konsideruar se ai pritet të largohet në huazim te Lyon gjatë afatit kalimtar të dimrit dhe se deri atëherë në LaLiga mbeten vetëm dy ndeshje – pezullimi praktikisht i mbyll sezonin me Real Madridin.
Raporti i gjyqtarit përfshiu gjithashtu edhe komentet pas ndeshjes të Dani Carvajal, i cili e sfidoi Quintero Gonzalez në tunel duke i thënë: “Ky është niveli që tregon, dhe pastaj qan në konferencën për shtyp".”
Meqenëse Carvajal nuk ishte pjesë e skuadrës për shkak të një lëndimi, çdo ndëshkim ndaj tij pritet të kufizohet vetëm në një gjobë financiare. /Telegrafi/
Real Madridi po i afrohet një afati kalimtar vendimtar, në të cilën drejtuesit sportivë, së bashku me Xabi Alonson, kanë nisur të vlerësojnë se cilët lojtarë mund të largohen nga skuadra.
Qëllimi është të lehtësohet grupi, të largohen lojtarët me pak minuta dhe të hapet hapësirë për afrime të reja ose për të rinj që kërkojnë më shumë protagonizëm.
Në këtë kontekst, emra si Ferland Mendy, Dani Ceballos, Endrick, Brahim Diaz dhe Raul Asencio shfaqen si kandidatët kryesorë për t’u larguar në javët e ardhshme.
Situata e Ferland Mendy po shkakton sërish debat të brendshëm. Edhe pse francezi ka dhënë paraqitje solide në faza të ndryshme të sezonit, mungesa e vazhdimësisë fizike dhe shfaqja e alternativave të reja mbrojtëse kanë ndikuar në stabilitetin e tij.
Një skenar i ngjashëm po ndodh me Dani Ceballos, për të cilin mungesa e minutave është bërë një shenjë e qartë se ai nuk përshtatet plotësisht me planet e trajnerit.
Ndër emrat që mund të largohen, Endrick është paradoksalisht ai me të ardhmen më të qartë.
Sulmuesi i ri brazilian pritet të huazohet te Lyoni deri në fund të sezonit.
Përveç Mendy, Ceballos dhe Endrick, edhe Brahim Diaz dhe Raul Asencio ndodhen në një situatë delikate.
Mungesa e vazhdimësisë, e kombinuar me ardhjen e profileve të reja ofensive, po u zvogëlon mundësitë për të marrë pjesë në këtë fazë të sezonit./Telegrafi/
Endrick ka vendosur të kërkojë më shumë minuta loje jashtë Real Madridit gjatë afatit kalimtar së dimrit, por huazimi i mundshëm te Olympique Lyon duket se është pezulluar në orët e fundit, duke rritur pasigurinë mbi të ardhmen e tij.
Ekipi i Real Madridit po kalon një periudhë dyshimesh nën drejtimin e Xabi Alonso. Pas një nisjeje premtuese me fitore radhazi, performanca ka rënë dukshëm, veçanërisht pas humbjes në derbi kundër Atletico Madrid.
Edhe në javën e pestë të Ligës së Kampionëve, Real Madridi tregoi mungesë konsistence ndaj Olympiakos, duke pësuar një gol të hershëm, duke rimarrë më pas avantazhin, dhe duke e komplikuar sërish ndeshjen në minutat e fundit.
Në sulm, megjithatë, Kylian Mbappe dhe Vinicius Jr vazhdojnë të spikasin. Në të njëjtën ndeshje kundër grekëve, Mbappe shënoi katër gola dhe Vinicius pati një paraqitje të shkëlqyer, duke lënë pak hapësirë për të rinj si Endrick.
Sulmuesi brazilian, 19 vjeç, kishte vendosur të kërkonte minuta loje përmes një huazimi dimëror për të rritur shanset e tij për t’u grumbulluar nga Ancelotti për Kampionatin Botëror në SHBA.
Sezonin e kaluar, Endrick luajti 37 ndeshje me Real Madridin, duke grumbulluar mbi 800 minuta dhe shtatë gola në të gjitha kompeticionet.
Sipas gazetarit Marcos Benito në ‘El Chiringuito’, operacioni me Lyon ende nuk është finalizuar, dhe drejtuesit e klubit preferojnë të presin deri në minutën e fundit të afatit kalimtar, duke konsideruar mundësinë e një ndryshimi trajneri që mund t’i ofronte më shumë hapësirë sulmuesit të ri. /Telegrafi/
Ekipi i Real Madridit si duket është ndarë në dysh sa i përket raportit të tyre me trajnerin Xabi Alonso, pasi “grupi” i Vinicius Junior thuhet se tani përfshin edhe pesë lojtarë tjerë të pakënaqur.
Një raport i ri nga mediumi COPE nxjerr në pah më tej ndarjen në dhomat e zhveshjes te Real Madridi në lidhje me marrëdhënien me trajnerin Xabi Alonso.
Një pjesë e lojtarëve, përfshirë Kylian Mbappe, Arda Guler, Alvaro Carreras, Thibaut Courtois dhe Dean Huisjen, thuhet se kanë respekt të thellë për Alonson dhe e besojnë filozofinë e tij si trajner.
Megjithatë, Vinicius Junior, Rodrygo Goes, Federico Valverde, Brahim Diaz, Endrick dhe Ferland Mendy janë në anën tjetër të situatës, gjë që sinjalizon se tensioni në dhomat e zhveshjes ka arritur nivele të reja në Madrid.
⚖️ ¿Qué jugadores del Real Madrid están contentos y descontentos con Xabi Alonso?
Përveç marrëdhënies së tendosur me disa lojtarë, Alonso është vënë nën vëzhgim pasi nuk arriti të regjistrojë asnjë fitore në tre ndeshjet e fundit.
Marrëdhënia midis Vinicius dhe Alonsos duket se është në një spirale në rënie, me raportet e fundit që pretendojnë se braziliani nuk është i gatshëm të zgjasë kontratën e tij për shkak të pranisë së spanjollit. /Telegrafi/
Sulmuesi i ri brazilian Endrick është shumë pranë largimit nga Real Madridi, me Lyonin që pritet të jetë destinacioni i tij i ardhshëm në pjesën e dytë të sezonit.
Sipas gazetarit Matteo Moretto marrëveshja është në fazën përfundimtare. Moretto ka theksuar se “akordi mes Endrick dhe Lyonit është mbyllur 100 për qind, ndërsa marrëveshja midis Real Madridit dhe Lyonit është 99.9 për qind e finalizuar, duke mbetur vetëm detajet e fundit dhe firmat.
Lyon pritet ta marrë lojtarin që në afatin e janarit, duke ofruar një rol më të madh dhe minuta të garantuara – diçka që Real Madridi aktualisht nuk mund t’ia ofrojë.
Për Endrick, sezoni aktual ka qenë zhgënjyes: ai ka luajtur vetëm një ndeshje nga 15 të Real Madridit, një situatë që ka frenuar zhvillimin e tij dhe ka rrezikuar objektivin e madh personal, pjesëmarrjen në Kupën e Botës verën e ardhshme.
Edhe pse ende mban fanellën me numrin 9 te Real Madridi dhe ka ambicie të qarta për të lënë gjurmë në “Santiago Bernabeu”, realiteti i minutazhit të pakët e ka detyruar të marrë një vendim të rëndësishëm për karrierën.
Endrick
Endrick është i bindur se për të qenë pjesë e Brazilit në Botëror duhet të luajë rregullisht dhe kjo e ka shtyrë të pranojë opsionin e huazimit në Ligue 1.
Konkurrenca e madhe në sulmin e Xabi Alonsos, e kombinuar me ritmin e lartë të ekipit dhe objektivat e mëdha, ka bërë që trajneri të mos gjejë më shumë hapësirë për 17-vjeçarin, i cili shihet më shumë si investim afatgjatë. Për këtë arsye, Madrid po e sheh huazimin si rrugën më të mirë për zhvillimin e tij pa e humbur nga duart.
Lyon, në anën tjetër, e sheh Endrickun si një shtysë të fuqishme për gjysmën e dytë të sezonit, duke i garantuar jo vetëm minutash të rregullt, por edhe rol të rëndësishëm në sulm. Franca është parë shpesh si terren ideal për fazën e rritjes së talenteve të mëdha dhe ky profil i jep besim edhe vetë lojtarit, por edhe Real Madridit./Telegrafi/
Manchester United raportohet se kanë shfaqur interes për sulmuesin e Real Madridit, Endrick, i cili po përballet me vështirësi për të gjetur hapësira nën drejtimin e Xabi Alonsos.
Ylli brazilian, i cili u transferua nga Palmeiras te Reali në vitin 2024, po konsideron një huazim gjatë afatit kalimtar të janarit për të siguruar minuta të rregullta në prag të Kupës së Botës.
Sezonin e kaluar, Endrick luajti në 37 ndeshje, por arriti vetëm 847 minuta në fushë.
Ndërkohë, këtë sezon ka marrë pjesë vetëm në një ndeshje për shkak të dëmtimeve dhe mundësive të kufizuara.
Trajneri Alonso ka pranuar se Endrick është i gatshëm për të luajtur, duke shtuar se momenti i duhur për ta aktivizuar atë “duhet të vijë”. /Telegrafi/
Në një zhvillim të madh, mediumi brazilian Ge Globo ka raportuar se Real Madrid dhe Olympique Lyon kanë arritur marrëveshje për huazimin e Endrick në janar.
Gjigantët e kryeqytetit spanjoll janë dakorduar të lejojnë që sulmuesi qendror 19-vjeçar të bashkohet me klubin e Ligue 1 me huazim për gjysmën e dytë të sezonit 2025/26.
Takimet e zhvilluara gjatë kësaj jave kanë përparuar marrëveshjen e huazimit, dhe dokumentet po shkëmbehen aktualisht midis dy klubeve, me pritshmërinë që marrëveshja të nënshkruhet në dhjetor.
Negociatat nisën në gjysmën e dytë të nëntorit, dhe që nga fillimi, 19-vjeçari e ka parë pozitivisht kalimin në Francë.
Edhe interesimi i fundit i Manchester United, pas dëmtimit të sulmuesit slloven Benjamin Sesko, nuk e ka ndryshuar mendimin e tij.
🚨🔴🔵 Olympique Lyon and Endrick, exclusive story from October set to become reality soon.
The agreement between clubs, also very advanced on straight loan with no buy option clause included.
Prioriteti i Endrick është të fitojë minuta të rregullta loje dhe një rol më të dukshëm, me qëllimin e arritjes së një vendi në skuadrën e Brazilit për Kupën e Botës.
Vetë Carlo Ancelotti ka lënë derën hapur për rikthimin e Endrick në kombëtare, duke njohur gjithashtu se sulmuesi duhet të zgjidhë mungesën e minutave te Real Madrid për t’u konsideruar sërish për përzgjedhje.
Si Real Madrid ashtu edhe Lyon po mbajnë të fshehura termat e marrëveshjes. Diçka e ditur është se klubi spanjoll nuk ka ndërmend të shesë Endrick përgjithmonë dhe marrëveshja e huazimit nuk do të përfshijë opsion blerjeje./Telegrafi/
Sulmuesi brazilian Endrick, 19 vjeç, ka shprehur dëshirën për të lënë Real Madridin për shkak të mungesës së minutave nën drejtimin e Xabi Alonsos. Megjithatë, klubi madrilen ka bërë të qartë se nuk është i gatshëm të lirojë talentin e ri në çdo çmim.
Me afatin kalimtar dimëror në horizont, Real Madrid ka vendosur tre kushte të pakapërcyeshme për një huazim: që klubi interesuar të paguajë një tarifë huazimi, të mbulojë tërësisht pagën e lojtarit dhe të paraqesë një plan të qartë zhvillimi sportiv brenda skuadrës.
Tre kushte kyçe për çdo huazim
Kushti i parë është që çdo klub i interesuar të paguajë një tarifë huazimi, duke përjashtuar marrëveshjet pa kompensim ekonomik.
Së dyti, klubi pranues duhet të mbulojë tërësisht pagën e lojtarit gjatë periudhës së huazimit.
Së fundi, kushti i tretë kërkon që skuadra të paraqesë një plan të detajuar: si do ta përdorë Endrick, në çfarë role dhe me sa minuta, duke siguruar integrimin dhe zhvillimin e tij brenda skuadrës.
Real Madrid synon të shmangë situatat ku Endrick nuk merr minuta ose performanca e tij dëmtohet. Klubi thekson se dalja e tij do të realizohet vetëm nëse lojtari do të ketë një rol kryesor dhe progresi i tij do të monitorohet.
Interesi i klubeve angleze, por me sfida
Endrick ka tërhequr interes nga Anglia, me ekipe si Tottenham, Everton dhe West Ham që tregojnë dëshirë për ta huazuar.
Megjithatë, përmbushja e tre kushteve të Real Madridit do të jetë vendimtare për realizimin e marrëveshjes.
Tottenham sheh tek Endrick një opsion fleksibil për sulmin, por duhet t’i garantojë minuta lojë.
Everton dhe West Ham mund të ofrojnë më shumë kohë në fushë, por duhet ta bindin sulmuesin se huazimi nuk është një hap prapa në karrierën e tij.
Sfida qëndron në krijimin e një ambienti ku Endrick e percepton huazimin si një mundësi reale për zhvillim dhe jo si një hap prapa.
Balancë mes kontrollit dhe zhvillimit
Huazimi, i monitoruar sipas këtyre kritereve, përfaqëson një alternativë më të sigurt sesa një shitje e parakohshme ose një huazim i paplanifikuar.
Për klubet e interesuara, sfida është trefish: të përballojnë kostot ekonomike, të bindin lojtarin për soliditetin e projektit dhe t’i garantojnë një rol të rëndësishëm në fushë.
Vetëm ata që arrijnë të përputhin këto tre elemente do të kenë shanse reale për ta realizuar huazimin.
Në përfundim, Real Madrid vendos standarde të larta për çdo largim të Endrick.
Vetëm përmbushja e tre kushteve të vendosura mund të lejojë një huazim që respekton interesat e klubit, të ekipit pranues dhe mbi të gjitha të lojtarit. /Telegrafi/
Lyoni ka hapur bisedimet me Real Madrid për të nënshkruar me sulmuesin brazilian, Endrick në formë huazimi, sipas Fabrizio Romano.
19-vjeçari po përballet me mungesë minutash në kryeqytetin spanjoll. Këtë sezon, ai ende nuk ka regjistruar asnjë paraqitje në La Liga për skuadrën e Xabi Alonsos, për shkak të formës së shkëlqyer të Kylian Mbappe.
Raportohet se Endrick është i hapur të largohet përkohësisht nga Real Madrid në formë huazimi, në mënyrë që të ketë më shumë mundësi për t’u përfshirë në skuadrën e Brazilit të drejtuar nga Carlo Ancelotti për Kupën e Botës 2026.
Olympique Marseille kanë shprehur interes për shërbimet e sulmuesit brazilian, por duket se rivalët e tyre të përjetshëm në Ligue 1 kanë ndërmarrë hapin konkret.
Endrick
Bisedimet janë duke u zhvilluar mes Real Madrid dhe Lyon. Ekipi i Paulo Fonsecas është në kërkim të një sulmuesi qendror, pasi këtë verë nënshkroi vetëm me Martin Satriano në formë huazimi, ndërkohë që u ndanë me Alexandre Lacazette dhe George Mikautadze.
Lëndimi i rëndë në kyçin e këmbës i Malick Fofana ka reduktuar edhe më tej opsionet e Fonsecas në sulm.
Lyon raportohet se i ka paraqitur planin e tyre Endrickut, i cili është i hapur për vazhdimin e bisedimeve me klubin francez.
Pjesëmarrja e Lyon në Ligën e Evropës mund të jetë një faktor tërheqës për sulmuesin brazilian që kërkon minuta loje.
Romano shton se Endrick ka hapur derën për një transferim të përkohshëm në Lyon gjatë muajit janar, të cilin e konsideron “një zgjidhje ideale” për të./Telegrafi/
Gjërat nuk po ecin siç pritej për Endrick te Real Madridi. Sulmuesi brazilian po kalon një periudhë të vështirë në “Santiago Bernabeu”, ndërsa minuta lojë ende nuk ka parë nën drejtimin e trajnerit Xabi Alonso.
Me afrimin e afatit kalimtar dimërorë, gjithnjë e më shumë po flitet për një huazim të tij, por një marrëveshje e tillë nuk do të jetë aspak e lirë për klubet e interesuara.
Sipas mediumit spanjoll AS, çdo klub që dëshiron të sigurojë shërbimet e 19-vjeçarit për gjashtë muajt e ardhshëm do të duhet të paguajë rreth 4.5 milionë euro. Kjo përfshin pjesën e shlyerjes së kontratës që Real Madrid ka paguar për të, si dhe pagën e lojtarit.
Madrilenët investuan 35 milionë euro për transferimin e Endrick nga Palmeiras, me një kontratë gjashtëvjeçare që amortizohet me rreth 6 milionë euro në vit. Kështu, për një periudhë gjashtëmujore, klubi pritës do të duhet të mbulojë rreth 3 milionë euro, ndërsa pagës së lojtarit do t’i shtohen edhe 1.5 milionë euro bruto.
Një shifër e lartë për një huazim afatshkurtër, por e konsiderueshme për klubet që duan të përfitojnë nga talenti i madh i brazilianit.
Endrick kërkon një aventurë jashtë Spanjës
Endrick, i cili ka regjistruar 14 paraqitje me Kombëtaren e Brazilit, mbetet shumë i kërkuar në tregun evropian. Ai ka treguar potencial të jashtëzakonshëm me golat e shënuar sezonin e kaluar si për Real Madridin, ashtu edhe për Seleção-n.
Në Spanjë, emri i tij është përmendur në lidhje me Valencia CF dhe Real Sociedad, por sipas raportit të AS, lojtari preferon të transferohet në një ligë tjetër.
Gjasat për një kalim në Bundesligë janë në rritje, me Eintracht Frankfurt dhe RB Leipzig që kanë pasur kontakte me të gjatë verës. Ndërkohë, interesim po shfaqin edhe West Ham United nga Premier League dhe Olympique Marseille nga Ligue 1.
Nëse një prej këtyre skuadrave arrin të përballojë kërkesat financiare të Real Madridit, dimri mund të shënojë fillimin e një kapitulli të ri në karrierën e talentit brazilian. /Telegrafi/
AC Milani po përgatitet për një merkato të nxehtë janari dhe duket se drejtuesit kuqezinj kanë kthyer sytë nga “Santiago Bernabeu”.
Sipas raportimeve të “Planeta Milan”, skuadra italiane po shqyrton mundësinë e bashkëpunimit me Real Madridin për disa huazime të mundshme, teksa synojnë të forcojnë skuadrën për garën e titullit në Serie A.
Trajneri Massimiliano Allegri ka identifikuar tri pika të dobëta në skuadër: mbrojtjen qendrore, krahun e djathtë dhe sulmin. Milani aktualisht mbështetet te Tomori, Gabbia dhe Pavloviç në prapavijë, por kërkon një lider me eksperiencë që të udhëheqë repartin.
Në fazën ofensive, drejtuesit janë duke vëzhguar opsione për krahun e djathtë — ndër emrat e përmendur janë Arnau Martinez (Girona) dhe Juanlu Sanchez (Sevilla).
Por surpriza më e madhe mund të vijë nga Madridi, “Rossonerët” mund të sigurojnë një huazim nga 15 herë kampioni i Evropës. Në lojë janë dy emra – spanjolli Gonzalo Garcia dhe talenti brazilian Endrick.
I pari ka shkëlqyer në Botërorin e Klubeve, por nuk po merr minuta nën drejtimin e Xabi Alonsos. Ndërsa Endrick kërkon më shumë hapësirë pas fillimit modest me “Los Blancos”.
Ndërkohë, Milani nuk e përjashton as afrimin e një sulmuesi të ri. Mauro Icardi i Galatasarayt mbetet alternativë konkrete, në varësi të zhvillimeve në muajt e ardhshëm./Telegrafi/
Login
