E ardhmja e Joshua Zirkzee mund të jetë larg “Old Trafford”. Sulmuesi i Manchester United po lidhet gjithnjë e më fort me një kalim në Serie A, teksa Roma ka intensifikuar përpjekjet për ta transferuar atë.

Sipas Fabrizio Romano, klubi verdhekuq ka avancuar në bisedimet me Zirkzee për kushtet personale të kontratës. Holandezi shihet si objektivi kryesor për repartin ofensiv dhe është i gatshëm të shqyrtojë këtë opsion, me synimin për të fituar më shumë minuta loje.

Megjithatë, realizimi i transferimit varet nga qëndrimi i Manchester United.

I pakënaqur me hapësirat, Zirkzee në janar largohet nga Man Utd I pakënaqur me hapësirat, Zirkzee në janar largohet nga Man Utd

Ende nuk ka një marrëveshje mes klubeve dhe vendimi final pritet të merret vetëm pasi Amad Diallo dhe Bryan Mbeumo të rikthehen nga Kupa e Kombeve të Afrikës.

Zirkzee ka regjistruar 10 paraqitje në Ligën Premier këtë sezon, por ka qenë titullar vetëm në tri ndeshje, duke realizuar një gol. /Telegrafi/

Manchester United po përgatitet për një lëvizje të madhe në tregun e transferimeve, me synimin për ta rindërtuar skuadrën për të ardhmen dhe jo vetëm për zgjidhje afatshkurtra.

Trajneri Ruben Amorim dëshiron të formojë një ekip konkurrues për vitet e ardhshme, me theks të veçantë te futbollistët ofensivë që mund të rriten dhe të marrin role udhëheqëse në dekadën e ardhshme.

“Djajtë e Kuq” kanë qenë aktivë këtë verë, duke përforcuar repartin ofensivë me emra si Bryan Mbeumo, Matheus Cunha dhe Benjamin Sesko. Megjithatë, ambiciet e klubit nuk ndalen me kaq.

Tani, Manchester United ka vënë në shënjestër një futbollist që po monitorohet prej kohësh edhe nga Arsenali, i cili e sheh atë si një zgjidhje afatgjatë për sulmin. Sidoqoftë, klubi nga “Old Trafford” është i gatshëm të veprojë me vendosmëri dhe ta lërë pas rivalin e brendshëm me një ofertë që pritet të tronditë Evropën.

Sipas raportimeve nga Fichajes dhe gazetari Ben Jacobs, Manchester United është i gatshëm të ofrojë deri në 100 milionë euro për ta siguruar shërbimin e Kenan Yildiz nga Juventusi.

Sulmuesi 20-vjeçar i “Zonjës së Vjetër” ka qenë një nga lojtarët më të spikatur të Serie A këtë sezon, duke udhëhequr skuadrën si për gola ashtu edhe për asistime. Paraqitjet e tij të shkëlqyera kanë bërë që shumëkush ta krahasojë ngritjen e Yildiz me atë të një legjende të Juventusit dhe futbollit botëror, Cristiano Ronaldos.

Yildiz po tregon vazhdimësi të lartë në Itali, duke shënuar gjashtë gola dhe duke dhuruar gjashtë asistime në 21 paraqitje në të gjitha garat këtë sezon.

Me kontratë të vlefshme deri në vitin 2029, Juventusi nuk ka asnjë detyrim ta shesë talentin turk. Megjithatë, një ofertë prej 100 milionë eurosh mund të hapë debate serioze brenda klubit torinez./Telegrafi

Aston Villa e ka fituar derbin kundër Manchester United, në kuadër të xhiros së 17-të në Ligën Premier.

Villa i arkëtoi pikët e plota me rezultat të ngushtë 2-1, sfidë që ishte tepër e baraspeshuar.

Vendasit e nisën për mrekulli për të rrezikuar me John McGinn dhe Morgan Rogers por që fillimisht dështuan t’i finalizojnë.

Ishte Rogers që pastaj e zhbllokoi epërsinë ku pasi mori një pasim të bukur, me një goditje të fuqishme e la të shtangur portierin (45+1’).

Sidoqoftë, vetëm dy minuta më vonë, Matheus Cunha përfitoi nga një top i humbur për ta barazuar rezultatin (45+3’).

Villa ishte më e mirë edhe në fillimin e pjesës së dytë, ku Rogers me një goditje të fortë e riktheu epërsinë dhe njëkohësisht vulosi fitoren (58’).

Villa tani “blindon” pozitën e tretë me 36 pikë, derisa Man Utd zë pozitën e shtatë me 26 sosh./Telegrafi/

E ardhmja e Bruno Fernandes është sërish në qendër të tregut europian. Mesfushori portugez, kapiten dhe lider absolut i Manchester United, mund të jetë duke jetuar muajt e tij të fundit në ‘Old Trafford’, pas disa sezonesh ku ka mbajtur një peshë të madhe mbi supe në një projekt të shënuar nga paqëndrueshmëria.

Në moshën 31-vjeçare, portugezi ndodhet përballë një momenti kyç në karrierën e tij, me mundësinë për të ndryshuar ambient dhe për t’u bashkuar me një projekt sportiv shumë më të qëndrueshëm dhe ambicioz.

Prej kohësh, Bruno Fernandes është në axhendën e Bayern Munich. Klubi bavarez e ka ndjekur nga afër zhvillimin e tij dhe, pas muajsh analizash të brendshme, duket i vendosur të hedhë hapin përfundimtar.

Në Gjermani flitet për një ofertë rreth 50 milionë euro, një shifër e konsiderueshme duke pasur parasysh moshën e lojtarit, por e justifikuar nga paraqitjet, lidershipi dhe përvoja e tij në nivelin më të lartë.

Interesimi i Bayern Munich për Bruno Fernandes nuk është i ri. Në ‘Allianz Arena’, profili i tij është vlerësuar prej disa sezonesh, duke qenë të vetëdijshëm se ai është një mesfushor i kompletuar, me aftësi shënimi, vizion loje dhe karakter konkurrues.

Largimi i mundshëm i disa lojtarëve kyç nga mesfusha e Bayernit ka përshpejtuar nevojën për të shtuar një lider të dëshmuar.

Në Gjermani besohet se Bruno Fernandes do të përshtatej në mënyrë perfekte me stilin e lojës së tyre.

Aftësia e tij për të luajtur mes linjave, saktësia në pasimin final dhe rrezikshmëria e vazhdueshme nga distanca mesatare do t’i ofronin zgjidhje të menjëhershme një skuadre të mësuar të dominojë ndeshjet.

Për më tepër, përvoja e tij në garat europiane përbën një faktor diferencues për një klub që gjithmonë synon të shkojë larg në Ligën e Kampionëve./Telegrafi/

Mesfushori i Manchester Unitedit, Kobbie Mainoo e ka të qartë se ku do ta vazhdojë karrierën nëse largohet nga Old Trafford gjatë afatit kalimtar dimëror.

Mungesa e paraqitjeve si titullar në Ligën Premier nga Mainoo e ka shtyrë atë të marrë në konsideratë një transferim në janar.

Vëllai i tij kohët e fundit bëri bujë në mediat sociale duke pozuar në Old Trafford me një bluzë "Free Kobbie Mainoo", e cila u bë shpejt virale.

Sipas gazetarit të njohur Ben Jacobs, Chelseat i pëlqen Mainoo, por preferenca e tij numër një është të shkojë te Napoli në formë huazimi.

Manchester United është i hapur për një shitje të përhershme, me një tarifë rreth 40-50 milionë funte në varësi të strukturës.

Megjithatë, mesfushori i ri duket i etur për të siguruar kohë të rregullt loje në Serie A me Napolin, duke i dhënë përparësi zhvillimit mbi një transferim të menjëhershëm të përhershëm.

I diplomuari i akademisë së United është i frustruar nga mundësitë e kufizuara në ekipin e parë këtë sezon, pasi ka bërë 12 paraqitje për gjithsej 302 minuta dhe ka dhënë një asistim. /Telegrafi/

Sir Alex Ferguson ka dhënë një vlerësim të drejtpërdrejtë mbi rrugën e gjatë që e pret Manchester United për t’u rikthyer në majën e futbollit anglez, duke sugjeruar se klubi mund të përballet me edhe një dekadë pa titull kampioni, pavarësisht shenjave të para pozitive nën drejtimin e Ruben Amorim.

Duke folur gjatë një vizite në Bahrein, ish-trajneri legjendar ofroi një parashikim realist për të ardhmen, duke pranuar madhësinë e sfidës dhe duke bërë thirrje për durim në një epokë kërkuese.

Përgjatë 26 viteve në ‘Old Trafford’, Sir Alex ndërtoi një nga dinastitë më të suksesshme në historinë e futbollit, duke fituar 38 trofe madhorë, përfshirë 13 tituj të Ligës Premier dhe dy trofe të Ligës së Kampionëve.

Që nga pensionimi i tij në fund të sezonit 2012/13, United nuk ka arritur të shtojë asnjë nga këto dy trofe në vitrinën e klubit, duke kaluar nëpër trazira menaxheriale dhe pasiguri strategjike.

Ferguson ishte i prirur të mbronte Amorim, i cili mori drejtimin e një dhome zhveshjeje të trazuar në mes të sezonit të kaluar.

Megjithatë, pavarësisht përpjekjeve të tij më të mira, sezoni 2024/25 i United u shpërbë keq, duke përfunduar në vendin e 15-të, renditja më e ulët në epokën e Ligës Premier. Ai trashëgoi një skuadër të përçarë dhe një klub që po lufton me identitetin e vet.

“Ai (Amorim) është një personalitet i mirë, nuk është e lehtë. Më kujtohet kur kthehem pas në kohën time, kur Liverpool ishte në kulmin e lavdisë”.

“Ishin një klub fantastik, fituan Kupën e Europës katër herë dhe gjithçka tjetër, por më pas u deshën 31 vite për ta fituar sërish kampionatin”.

“Tani jemi në të njëjtën situatë. Mund të jenë 10 vite, mund të jenë 11 vite, për shkak të atij cikli”.

“Duhet të mendohet me shumë kujdes dhe duhet të sigurohemi që transferimet të jenë më të mira sesa kanë qenë”, ka deklaruar Ferguson./Telegrafi/

Manchester United është një nga katër klubet që kanë hapur zyrtarisht bisedime me Antoine Semenyo për një transferim në afatin dimëror me vlerë 65 milionë eurosh, por për të siguruar shërbimet e sulmuesit të krahut, duhet të mbyllë marrëveshjen me Bournemouth deri më 10 janar.

Sipas The i Paper, edhe pse shifra është përcaktuar në 60 milionë euro plus 5 milionë të tjera në bonuse, do të nevojiten negociata mbi kushtet e pagesës, të cilat nuk janë të përfshira në klauzolë.

Bournemouth mund të kërkojë një pjesë të konsiderueshme të shumës të paguhet paraprakisht për të financuar blerjen e zëvendësuesit të Semenyos dhe gjithçka mund të varet nga cili prej katër favoritëve në garë është i gatshëm të ofrojë marrëveshjen më të favorshme.

Bournemouth kishte shpresuar ta bindte lojtarin të qëndronte, por The i Paper mëson se klubi tashmë është pajtuar me largimin e tij, për shkak të një “tregu të çmendur” që është krijuar rreth 25-vjeçarit.

Nuk është aspak surprizë që bisedimet kanë nisur tashmë, pasi klauzola e përfshirë në kontratën që Semenyo nënshkroi gjatë verës skadon pas vetëm 10 ditësh nga hapja e afatit kalimtar.

Ideja pas kësaj klauzole ishte t’i jepej Bournemouthit mundësia për të siguruar një zëvendësues përpara fundit të muajit.

Manchester United, Manchester City, Tottenhami dhe Liverpooli kanë zhvilluar të gjithë bisedime me Semenyon lidhur me kushtet personale dhe për t’i paraqitur planet e tyre për reprezentuesin e Ganës./Telegrafi/

Ylli i Napolit, Scott McTominay ka deklaruar se është “shumë e lehtë” të fajësohet Manchester United sa herë që lojtarët që largohen nga “Old Trafford” shkëlqejnë diku tjetër, duke theksuar se klubi kishte bërë gjithçka për ta ndihmuar gjatë kohës sa ishte aty.

McTominay është një nga shumë ish-lojtarët e Manchester United që kanë nisur të japin rendimente të qëndrueshme pasi janë larguar nga klubi anglez.

Rasmus Hojlund duket se po ndjek një rrugë të ngjashme në “Stadio Maradona”, ndërsa raste të tjera të ngjashme ka edhe jashtë Serie A, si Anthony Martial apo Marcus Rashford.

“Është thjesht shumë e lehtë si justifikim të thuash se janë larguar nga Manchester United dhe tani po bëjnë mirë”.

McTominay kujtoi edhe sezonin e tij të fundit me klubin anglez, duke theksuar se kishte dhënë kontribut konkret.

“Në vitin tim të fundit, bëra mirë, shënova dhjetë gola dhe fituam një trofe. Sa i përket Marcusit, kishte disa çështje të ndryshme që mund të kenë ndodhur, por nuk do të hyjmë në to”.

“Marcus është një lojtar i jashtëzakonshëm dhe ka qenë gjithmonë i tillë. Ai është një nga legjendat e klubit. Ka shënuar kaq shumë gola për Manchester United dhe ka bërë kaq shumë gjëra të mëdha. Për shkak se vëmendja është gjithmonë drejtpërdrejt mbi ty, gjithçka duket shumë më keq, sipas mendimit tim”.

Mesfushori i Napolit shtoi se faktor kyç është koha e lojës dhe besimi në vete.

“Kur lojtarët largohen dhe luajnë më shumë ndeshje, patjetër që do të kenë rritje të vetëbesimit dhe do të ndihen më mirë me veten, krahasuar me rastet kur luajnë pak minuta te Manchester United, për shembull. Por kur je te Manchester United, duhet t’i fitosh ato minuta, si Bruno Fernandes, i cili ka bërë gjëra të jashtëzakonshme. Prandaj mendoj se është shumë e lehtë të thuhet diçka e tillë”.

McTominay theksoi se përgjegjësia është individuale dhe se klubi nuk duhet të vihet në shënjestër.

“Varet nga individi. Për mua, është shumë e lehtë të fajësosh Manchester United si klub, sepse sa herë që isha aty, ata bënë gjithçka për mua. Më ndihmuan me ushqimin, me stërvitjen, taktikisht, pavarësisht se kush ishte trajner. Gjithçka ishte aty për të pasur sukses. Nuk është se ata nuk të ofrojnë gjëra që klubet e tjera i ofrojnë. I ofrojnë”.

“Kështu që miti i largimit dhe i shndërrimit në lojtarë më të mirë lidhet me vetëbesimin. Nëse largohesh dhe luan çdo ndeshje, shënon një gol, pastaj shënon sërish dhe njerëzit fillojnë të flasin, ndihesh mirë me veten dhe dëshiron të vazhdosh në atë mënyrë”, shtoi skocezi./Telegrafi

Legjenda e Manchester United, Sir Alex Ferguson, ka hedhur dritë mbi marrëdhënien e tij me Cristiano Ronaldon, një nga lojtarët më të shquar që ka drejtuar gjatë karrierës së tij të gjatë dhe të suksesshme.

Ferguson i kishte besuar Ronaldos ende adoleshent, pas vetëm një shikimi të shkurtër gjatë kohës kur ai luante te Sporting Lisbona.

"Ishte fantastike. Në jetën tuaj profesionale takoni lojtarë të jashtëzakonshëm. Që në moshën 17-vjeçare, e dinit që ai kishte diçka të veçantë, jo vetëm aftësitë e tij, por edhe dëshirën për t’u bërë më i miri", ka thënë Ferguson.

Ai theksoi gjithashtu punën e palodhur dhe përkushtimin e Ronaldos që nga fillimi i karrierës.

"Çdo seancë stërvitore, ai praktikonte pas goditjeve të lira. Ishte fenomenal. Ai nuk ishte thjesht i talentuar, por kishte një etje të paparë për të përmirësuar veten çdo ditë".

Ferguson gjithashtu ka folur për ndikimin e Ronaldos brenda dhomës së zhveshjes dhe në fushë.

"Ai ishte një shembull për shokët e skuadrës. Ambicia e tij e madhe dhe përkushtimi për stërvitje e bënë atë një udhëheqës natyral".

Marrëdhënia mes Ferguson dhe Ronaldos është shembull i mënyrës se si një trajner i madh mund të identifikojë dhe zhvillojë talentin e jashtëzakonshëm, duke ndihmuar lojtarët të arrijnë potencialin e tyre maksimal.

Sot, Ronaldo konsiderohet një nga futbollistët më të mëdhenj të të gjitha kohërave, dhe Ferguson nuk ngurron ta pranojë se kishte parashikuar suksesin e tij që në fillim. /Telegrafi/

‘Teatri i Ëndrrave’ po përgatitet për një nga transferimet më ambicioze të dekadës së fundit nën drejtimin e Ruben Amorim. Manchester United i ka vënë syrin sulmuesit anësor të Juventusit, Kenan Yildiz, i cili dëshiron një transferim në Ligën Premier.

Drejtuesit e klubit britanik e kuptojnë se rindërtimi i linjës sulmuese kërkon talent të jashtëzakonshëm për të sjellë freski dhe aftësinë për të krijuar menjëherë mundësi shënimi. Prandaj, United është i përgatitur të shpenzojë shumën astronomike prej 100 milionë eurosh për të siguruar shërbimet e sulmuesit turk.

Klubi anglez synon të përshpejtojë negociatat për të parandaluar gjigantë të tjerë evropianë që të konkurrojnë për nënshkrimin e sulmuesit të talentuar anësor. Ruben Amorim është në kërkim të një lojtari që mund të plotësojë figura si Matheus Cunha dhe Bryan Mbeumo, duke optimizuar rezultatin e golave të ekipit.

20-vjeçari ka mahnitur vëzhguesit e klubit nga Old Trafford falë pjekurisë së tij taktike dhe performancave të shkëlqyera në Serie A. Aktualisht, Kenan Yildiz është bartësi i flamurit të rinovimit të Juventusit, ku ka shifra të lakmueshme me gjashtë gola dhe gjashtë asistime këtë sezon.

Sulmuesi turk ka një kontratë afatgjatë me Juventusin deri në vitin 2029, duke i dhënë klubit italian një avantazh të konsiderueshëm. Megjithatë, oferta treshifrore nga United mund të jetë e mjaftueshme për të bindur bordin e Torinos të ndahet nga lojtarin e tyre.

United e sheh këtë futbollist të ri si zgjidhjen përfundimtare për krahun e majtë të sulmit të tyre, një zonë që ka qenë e paqëndrueshme në muajt e fundit. Shkathtësia e yllit turk i përshtatet në mënyrë të përkryer sistemit dinamik që stafi i trajnerëve portugezë po përpiqet të zbatojë në këtë fazë të re. /Telegrafi/

Mesfushori Ruben Neves po përgatit terrenin për një rikthim në Ligën Premier që në afatin kalimtar të muajit të ardhshëm, duke vënë në lëvizje disa klube angleze, mes tyre Manchester United dhe Newcastle United.

Pportugez, aktualisht pjesë e Al-Hilal në Arabinë Saudite, ka refuzuar ofertat për rinovimin e kontratës, çka e bën atë një nga emrat më të kërkuar sapo të rihapet merkatoja më 1 janar.

Al-Hilal, që pagoi rreth 47 milionë funte për ta transferuar Neves nga Wolverhampton Wanderers në verën e vitit 2023, është i gatshëm ta lejojë largimin e tij që në fillim të janarit, në mënyrë që të shmangë rrezikun e humbjes së lojtarit pa pagesë gjatë verës, raporton “The Times”.

Raportimet e para sugjerojnë se një shumë rreth 18 milionë funtesh mund të jetë e mjaftueshme për të siguruar shërbimet e mesfushorit, megjithëse klubet e interesuara besohet se mund të negociojnë edhe një çmim më të ulët, duke marrë parasysh situatën kontraktuale.

Në këtë sezon, Neves ka zhvilluar 15 ndeshje me fanellën e Al-Hilal, duke realizuar 5 gola dhe duke kontribuar me 1 asistim, shifra që dëshmojnë se ai mbetet një profil shumë i vlefshëm për tregun evropian./Telegrafi

Kapiteni i Manchester United, Bruno Fernandes, ka reaguar ndaj kritikave që lidhen me mungesën e trofeve gjatë periudhës së tij në Old Trafford, duke përdorur si shembull ikonën e Romës, Francesco Totti, për të argumentuar se madhështia e një lojtari nuk duhet matur vetëm me numrin e titujve të fituar.

Duke folur në podkastin Rio Ferdinand Presents, Fernandes ka reflektuar mbi kohën e tij te Manchester United, duke theksuar besnikërinë dhe ndjenjën e përgjegjësisë gjatë një prej periudhave më të vështira në historinë e klubit.

Fernandes zbuloi se ka pasur mundësi për t’u larguar nga klubi, por ka zgjedhur të qëndrojë.

“Kur erdha këtu, përtej dashurisë për klubin, mendoj se besnikëria ime ishte e ngjashme me atë që ndjeva gjatë periudhave më të vështira. Mund të isha larguar në dy raste. Refuzova dhe edhe klubi tha jo, sepse më thanë se kishin nevojë për mua”.

Bruno Fernandes pranoi se ndjen zhgënjim për mungesën e trofeve, por vuri në dyshim mënyrën moderne të vlerësimit të futbollistëve vetëm përmes titujve.

“Natyrisht që koha ime këtu nuk ka qenë ashtu siç e kam dëshiruar, sepse doja të fitoja trofe dhe nuk kam fituar aq sa duhet ose sa mund të kisha fituar. Por sot njerëzit flasin për lojtarët si më të mirë ose më të dobët, varësisht nga trofetë që fitojnë”.

Më pas, kapiteni i United solli në vëmendje trashëgiminë e Francesco Totti-t te Roma, duke bërë një krahasim të drejtpërdrejtë.

“Nëse kthehemi pas, Totti njihet si një nga lojtarët më të mirë në Itali dhe fatkeqësisht për të, nuk fitoi shumë trofe. Por të gjithë ende thonë se ai është një nga më të mirët që ka luajtur ndonjëherë për Italinë. Roma nuk ka fituar shumë as pas kohës së tij, megjithatë ai vazhdon të jetë ‘Zoti i Romës’”.

Duke iu drejtuar drejtpërdrejt kritikëve, Fernandes pranoi se një rrugë tjetër në karrierë mund t’i kishte sjellë më shumë suksese.

“Mund të kisha zgjedhur një rrugë tjetër dhe ndoshta do të kisha fituar më shumë trofe. Ndoshta njerëzit do të flisnin ndryshe për mua për shkak të kësaj”.

Në fund, ai theksoi se kontributi i tij për klubin mbetet i rëndësishëm.

“Besoj se ajo që kam bërë për klubin ka qenë e rëndësishme, pa ia hequr meritën asnjë lojtari tjetër që ka qenë këtu”./Telegrafi

Kontrata e mesfushorit të Manchester United, Bruno Fernandes, raportohet se përfshin një klauzolë lirimi që mundëson transferimin e tij jashtë Ligës Premier, duke hapur një tjetër kapitull spekulimesh rreth së ardhmes së kapitenit portugez në “Old Trafford”.

Fernandes kishte tërhequr vëmendje serioze nga Arabia Saudite gjatë verës, duke zhvilluar bisedime konkrete me Al Hilal për një transferim shumë milionësh. Megjithatë, ai vendosi të vazhdojë me Manchester United, duke theksuar se do të largohej vetëm nëse klubi nuk do ta dëshironte më në projektin e tij.

Lidhjet me Lindjen e Mesme kanë vazhduar në heshtje që prej asaj kohe, por situata u ndez sërish pas një interviste tronditëse të Fernandes këtë javë, ku ai deklaroi se United në fakt kishte qenë i gatshëm ta shiste te Al Hilal, por nuk kishte guximin t’ia thoshte këtë drejtpërdrejt.

“Klubi donte të më shiste, por nuk ma thanë kurrë në sy”, deklaroi Fernandes, duke shtuar dyshimet rreth marrëdhënies së tij me drejtuesit e klubit.

Pas kësaj interviste, mesfushori portugez ka lënë të kuptohet gjithashtu për mundësi transferimi si në La Liga të Spanjës, ashtu edhe në Serie A të Italisë. E ardhmja e tij në “Old Trafford” tashmë duket më e paqartë se kurrë, ndërsa raportimi i fundit i Daily Mail mbi një klauzolë lirimi vetëm sa i shton spekulimet.

Sipas këtij raporti, kontrata e Fernandes përmban një klauzolë daljeje prej 56.6 milionë funtesh, e vlefshme vetëm për klubet jashtë Ligës Premier.

Pavarësisht deklaratave befasuese, Fernandes ka theksuar vazhdimisht dëshirën e tij për të qëndruar te Manchester United për aq kohë sa klubi e konsideron të rëndësishëm.

Sipas Fabrizio Romano, drejtuesit e Manchester United janë të bindur se Fernandes ka ende një rol kyç në skuadër. Në reagim ndaj intervistës së tij, “Djajtë e Kuq” e kanë bërë të qartë se nuk kanë asnjë plan për ta shitur 31-vjeçarin.

Klubet saudite pritet të rikthejnë interesimin, ndërsa deklaratat e hapura të Fernandes për dëshirën për të luajtur në La Liga apo Serie A mund të nxisin interes edhe nga këto kampionate. Nuk përjashtohet as një rikthim sentimental në Lisbonë, te Sporting, para se ai t’i japë fund karrierës./Telegrafi

I vendosur për të ndërtuar një skuadër të përshtatur plotësisht me filozofinë dhe idetë e tij taktike, trajneri portugez Ruben Amorim ka vendosur të nxjerrë në treg pesë lojtarë të Manchester United që nuk bëjnë pjesë në planet e tij afatgjata.

Pas 16 javësh kampionat, Man Utd renditet vetëm në vendin e gjashtë në Ligën Premier, një pozicion larg pritshmërive dhe ambicieve të klubit.

“Djajtë e Kuq” ndodhen plot 10 pikë pas Arsenalit kryesues, çka ka shtyrë stafin teknik të ndërmarrë masa konkrete për ristrukturimin e skuadrës.

Sipas raportimeve të Caught Offside, Amorim i ka kërkuar drejtuesve të klubit që të dëgjojnë oferta për këta pesë futbollistë:

Altay Bayindir (27 vjeç), portier – Turqi

Tyrell Malacia (26), mbrojtës i majtë – Holandë

Manuel Ugarte (24), mesfushor mbrojtës – Uruguai

Mason Mount (26), mesfushor ofensiv – Angli

Joshua Zirkzee (24), sulmues – Holandë

Bëhet fjalë për lojtarë që nuk janë kërkuar drejtpërdrejt nga Amorim dhe që, sipas vlerësimeve të stafit teknik, po hasin vështirësi për t’u përshtatur me skemat taktike dhe intensitetin e kërkuar nga trajneri portugez. /Telegrafi/

Manchester United beson se është “ndëshkuar padrejtësisht” përpara përballjes së tyre në Ligën Premier kundër Bournemouth dhe, sipas raportimeve, e ka përshkallëzuar çështjen deri te FIFA.

United dhe Bournemouth dhuruan një ndeshje spektakolare që përfundoi 4-4 në ‘Old Trafford’ të hënën në mbrëmje, ku dobësitë defanzive të të dyja skuadrave u vunë në pah gjatë gjithë takimit.

Ruben Amorim ishte pa tre mbrojtës për këtë ndeshje, përfshirë Harry Maguire dhe Matthijs De Ligt, ndërsa Noussair Mazraoui mungoi pasi kërkesa e klubit për ta pasur në dispozicion u refuzua.

FIFA kishte njoftuar më herët gjatë këtij muaji se afati për lirimin e lojtarëve drejt përfaqësueseve të tyre për Kupën e Kombeve të Afrikës do të shtyhej deri më 15 dhjetor, e njëjta datë kur United u përball me Bournemouth.

Pas bisedimeve konstruktive me Kamerunin dhe Bregun e Fildishtë, United arriti marrëveshje që lejuan Bryan Mbeumo dhe Amad të aktivizoheshin të hënën.

Megjithatë, vendi organizator i AFCON-it, Maroku, refuzoi të njëjtën kërkesë për Mazraouin përpara ndeshjes hapëse të turneut kundër Komoreve të dielën, pavarësisht se mbrojtësi ishte stërvitur me skuadrën e United në ditët paraprake.

Maroku kërkoi që Mazraoui t’i bashkohej përfaqësueses që në fillim të javës. Nga ana tjetër, United është i zhgënjyer nga ky zhvillim dhe e ka referuar çështjen te FIFA, duke kërkuar “mbështetje dhe udhëzim” nga organi drejtues, sipas The Independent.

Sipas BBC, klubi mendon se Maroku i dha përparësi një seance stërvitore të kombëtares ndaj një ndeshjeje të rëndësishme të kampionatit.

Për më tepër, raportohet se United është gjithashtu i pakënaqur sepse përballja me Bournemouth u zhvendos për të hënën, ndërkohë që klubet që luajtën gjatë fundjavës i kishin lojtarët afrikanë në dispozicion për përzgjedhje./Telegrafi/

Manchester United po konsideron mundësinë e shitjes së sulmuesit Joshua Zirkzee, i cili ka tërhequr interesin e Romës, për të siguruar fonde për një transferim të mundshëm të sulmuesit të Bournemouth, Antoine Semenyo, sipas raportimeve të Daily Mail.

Semenyo ka një klauzolë lirimi prej 60.5 milionë euro në janar, e cila pritet të ulet në rreth 50 milionë euro gjatë verës, dhe Man Utd është një nga klubet që po monitoron situatën.

Megjithatë, sigurimi i shërbimeve të sulmuesit nuk pritet të jetë i lehtë, pasi klubet si Manchester City, Liverpool dhe Tottenham janë gjithashtu në garë, ndërsa prioritet tjetër i United mbetet blerja e një mesfushori mbrojtës gjatë muajit tjetër.

Shitja e Zirkzee mund të ofrojë fleksibilitetin financiar të nevojshëm për këtë marrëveshje.

Roma raportohet se është e interesuar ta marrë holandezin me huazim, me mundësinë e përfshirjes së një klauzole detyruese për blerje, të ngjashme me klauzolën prej 38 milionë eurosh që përfshiu transferimi i Rasmus Hojlund te Napoli. /Telegrafi/

Afati kalimtar i transferimeve të dimrit po afron dhe futbolli anglez tashmë ka një emër që dominon titujt kryesorë: Daniel Munoz, i cili është në shënjestër të Manchester Cityt, Manchester Unitedit, Chelseat dhe Liverpoolit.

Mbrojtësi i djathtë kolumbian i Crystal Palace është bërë lojtari më i kërkuar për të forcuar mbrojtjen e klubeve elitare këtë janar. Prania e tij fizike nën drejtimin e Oliver Glasner e ka transformuar atë në një lojtar jetësor, dhe mungesa e tij për shkak të lëndimit ka nxjerrë në pah mangësitë e sistemit aktual.

Ndikimi i Munoz në klubin londinez ka qenë aq i menjëhershëm saqë projektet më ambicioze sportive të vendit kanë filluar të bëjnë lëvizje për ta joshur atë të largohet nga ‘Selhurst Park’.

Nga zyrat e Crystal Palace, qëndrimi është absolutisht i prerë: nuk ka asnjë qëllim për t'u ndarë me mbrojtësin e tyre të fortë në mes të sezonit. Megjithatë, Chelsea po e monitoron nga afër progresin e tij, veçanërisht pas vendimit të Enzo Maresca për të përdorur Reece James në pozicionet qendrore të mesfushës.

Ky ripozicionim taktik në ‘Stamford Bridge’ krijon një boshllëk në krahun e djathtë që Daniel Munoz mund ta mbushë me besueshmërinë e tij karakteristike dhe përvojën e provuar.

Nga ana tjetër, Manchester City po kërkon alternativa të besueshme duke pasur parasysh vështirësitë në nënshkrimin e lojtarëve të tjerë, duke e parë kolumbianin si një mundësi me ndikim të menjëhershëm.

Pep Guardiola vlerëson aftësinë e kolumbianit për të kuptuar lojën me pasime, diçka thelbësore për të ruajtur një avantazh konkurrues në luftën për titullin e ligës.

Gara nuk ndalet këtu, pasi Liverpooli ka treguar interes të vërtetë edhe për shkak të problemeve fizike që kanë prekur lojtarët e fundit të verës. Profili sulmues i Munoz përshtatet me stilin e lojës së drejtpërdrejtë të Reds, ku ata po kërkojnë një lojtar me përvojë që mund të kontribuojë si në mbrojtje ashtu edhe në sulm.

Manchester United po vlerëson gjithashtu situatën e tij nën strukturën e re të Ruben Amorim, i cili i vlerëson shumë mbrojtësit e krahut me qëndrueshmëri të madhe dhe mentalitet fitues. Edhe pse një transferim në Old Trafford duket më i komplikuar në planin afatshkurtër, cilësia e lojtarit kolumbian e mban atë një mundësi të vërtetë për Djajtë e Kuq.

Në moshën 29-vjeçare, futbollisti po shijon momentin më të mirë të karrierës së tij profesionale, duke demonstruar pjekurinë e nevojshme për t'u përballur me sfida në klube nën presion të madh.

Pavarësisht se ka një kontratë deri në vitin 2028 dhe një çmim tregu prej 27 milionë euro, presioni financiar i një oferte stratosferike mund ta detyrojë drejtuesit e klubit londinez të rishqyrtojnë qëndrimin e tyre për të mos e shitur atë. /Telegrafi/

Destinacioni i preferuar i Kobbie Mainoos nëse ai largohet nga Manchester United gjatë afatit kalimtar të janarit tashmë është bërë i qartë, mes më shumë se 12 klubeve të interesuara për shërbimet e tij.

Mainoo ka pasur vështirësi për të siguruar minuta të rregullta te United që prej marrjes së drejtimit të ekipit nga Ruben Amorim vitin e kaluar.

Këtë sezon, Amorim ka preferuar shpesh një dyshe mesfushore të përbërë nga Casemiro dhe kapiteni Bruno Fernandes, ndërsa Mainoo është kufizuar kryesisht në paraqitje nga stoli i rezervave.

Mainoo vlerësohet shumë nga tifozët e klubit, pasi ka dalë nga akademia e famshme e klubit drejt ekipit të parë.

Megjithatë, raportimet sugjerojnë fuqishëm se Mainoo po kërkon një largim në janar në formë huazimi, përpara Kupës së Botës që do të zhvillohet verën e ardhshme.

Mesfushori kishte kërkuar edhe gjatë verës një huazim larg United, me të cilin ka kontratë deri në verën e vitit 2027, ndërsa klubi nga ‘Old Trafford’ ka opsionin për ta zgjatur marrëveshjen edhe për 12 muaj të tjerë.

Këtë sezon, Mainoo ka zhvilluar 11 ndeshje në të gjitha kompeticionet për United, me startin e tij të vetëm që erdhi në humbjen surprizë në raundin e dytë të Kupës së Ligës ndaj Grimsby Toën.

Sipas Caught Offside, më shumë se një duzinë klubesh janë në garë për të nënshkruar me Mainoo, ndërsa Chelsea dhe Bayern Munich thuhet se po “kryesojnë garën” për shërbimet e tij.

Megjithatë, e njëjta media raporton se kampionët e Italisë, Napoli, janë skuadra ku Mainoo do të preferonte të transferohej nëse vendos të largohet përkohësisht nga United.

Nëse ai përfundon te klubi i Serie A, do të ribashkohej me ish-shokun e skuadrës te United, Scott McTominay, i cili u shndërrua në një figurë kyçe në fitimin e Scudettos sezonin e kaluar nga Napoli dhe madje u nominua edhe për Topin e Artë./Telegrafi/

Real Madridi ka plane të bëjë të paktën disa transferime verën e ardhshme, me fokus në përforcimin e repartit të mbrojtjes dhe mesfushës.

Ekziston gjithashtu mundësia që të afrojë një mbrojtës të ri të djathtë, në varësi të faktit nëse Dani Carvajal do të marrë ose jo një kontratë të re përpara se marrëveshja e tij aktuale të skadojë në fund të sezonit.

Carvajal ka qenë një shërbëtor i jashtëzakonshëm për Real Madridin, por dëmtimet kanë nisur ta ndikojnë gjithnjë e më shumë.

Sezonin e kaluar ai këputi ligamentin ACL, ndërsa aktualisht është jashtë fushave për tre muaj për shkak të një problemi në të njëjtin gju, gjë që mund të ndikojë në aftësinë e tij për të kontribuar në vitet në vijim.

Real Madridi mund të mendojë se vera e ardhshme është momenti i duhur për t’u ndarë me të dhe, nëse kjo ndodh, zëvendësuesi i tij mund të vijë nga Liga Premier.

Sipas TEAMtalk, Real Madridi po shfaq interes për Diogo Dalot.

Mbrojtësi i djathtë i Manchester United ka qenë edhe më parë në radarët e klubit madrilen dhe mund të transferohet në vitin 2026 për të konkurruar me Trent Alexander-Arnold në krahun e djathtë të mbrojtjes.

Thuhet se drejtori sportiv i Manchester United, Jason Wilcox, është “i hapur për të shqyrtuar oferta” për reprezentuesin portugez, pavarësisht se ai ka qenë titullar i rregullt këtë sezon.

Megjithatë, Dalot ka kontratë deri të paktën në vitin 2028, ndaj është e pamundur që Real Madridi të arrijë një marrëveshje me çmim të ulët për 26-vjeçarin./Telegrafi/

Manchester United raportohet se ka vendosur çmimin për Bruno Fernandes, me një largim të mundshëm në janar që synon të financojë dy përforcime kyçe.

31-vjeçari mbetet një nga lojtarët më të rëndësishëm të United, duke regjistruar katër gola dhe gjashtë asistime në 15 ndeshje të Ligës Premier këtë sezon, përfshirë dy gola në fitoren 4-1 ndaj Wolves më 8 dhjetor.

Megjithëse është pjesë thelbësore e planeve të Ruben Amorim, reprezentuesi portugez mund të jetë në prag të largimit nga klubi muajin e ardhshëm, me fondet e përfituara që pritet të përdoren për të afruar dy mesfushorë nga Liga Premier.

Një raport i BBC Sport në tetor pretendonte se lojtari “nuk ka asnjë interes të transferohet në Arabinë Saudite në fund të sezonit”.

Megjithatë, një raport i kundërt nga Caught Offside sugjeron se priten oferta të tjera nga Al-Hilal dhe Al-Ittihad, me United që e vlerëson Fernandes rreth 70 milionë euro.

Një shitje me këtë çmim do të thoshte që United të rikuperonte tërësisht 55 milionë eurot e paguara për Fernandes kur ai u transferua nga Sporting Lisbona në vitin 2020.

Raportohet se këto fonde mund të përdoren për të nënshkruar me mesfushorët e Nottingham Forest dhe Brighton, Elliot Anderson dhe Carlos Baleba, që në afatin kalimtar të janarit.

Sipas The Telegraph, Forest kërkon të paktën 100 milionë euro për reprezentuesin anglez Anderson dhe nuk ka gjasa ta shesë atë në mes të sezonit.

Edhe Baleba i Brighton pritet të kushtojë një shifër të ngjashme.

Një raport i fundit nga ESPN sugjeron gjithashtu se klubi është i gatshëm të dëgjojë oferta për lojtarët jashtë planeve Kobbie Mainoo, Manuel Ugarte, Tyrell Malacia dhe Joshua Zirkzee, ndërsa United është i interesuar të afrojë dy mesfushorë qendrorë.

Megjithatë, nga objektivat e United, vetëm Angelo Stiller i Stuttgartit pritet të jetë si i përballueshëm financiarisht ashtu edhe i disponueshëm muajin e ardhshëm./Telegrafi/