Arsenal nuk ka ndërmend të ndalet, ndërsa tifozët e tij ëndërrojnë në një sezon fantastik, ku skuadra e tyre është në garë për të gjithë trofetë e mundshëm. Pasi kryesojnë Premier League dhe u kualifikuan në fundjavë në Kupën e Federatës, “Topçinjtë” siguruan biletën për në finalen e Kupës së Ligës.

Të besuarit e Mikel Arteta triumfuan 3-2 në derbin londinez në fushën e Chelsea, ndërsa do të dikutojnë trofeun kundër Manchester City. Arsenal dominoi në “Stamford Bridge”, ndërsa mbylli pjesën e parë në epërsi falë golit të shpejtë të Ben Uajt që në minutën e shtatë.

Pas pushimit, sfida u bë më e luftuar dhe me spektakolare me raste të shumta në të dyja portat. Gjithsesi, më të mirën morën sërish “Topçinjtë” që dyfishuan shifrat me Gyokeres në minutën e 49-të.

Garnacho ktheu në lojë Chelsea, duke ngushtuar diferencën në të 57-ën. Por shpresat e Bluve të Londrës morën një tjetër goditje të rëndë, kur Zubimendi shënoi edhe golin e tretë për miqtë.

Vetëm në fund, Garnacho gjeti golin e dytë personal, por që kishte vlerë vetëm për statistika. Festa ishte e gjitha për Arsenal që konfirmon sezonin e shkëlqyer si dominues në futbollin anglez./abcnews.al

E ardhmja e Vinicius Jr te Real Madrid mbetet e paqartë, pasi braziliani ende nuk ka firmosur rinovimin për të cilin flitet prej disa muajsh.

Performanca e tij e pasigurt këtë sezon, me përjashtim të ndeshjes kundër Barcelonës, ka shtyrë klubin të vlerësojë opsione të tjera dhe të kërkojë alternativa në afatin kalimtar.

Midis tyre, sipas “Defensa Central”, është Gabriel Martinelli, sulmuesi i Arsenalit.

Kriza sportive që po kalon Real Madrid duket se nuk ka fund.

Pas largimit të Xabi Alonsos pas humbjes së fundit në Superkupën ndaj Barcelonës, debutimi i Alvaro Arbeloa gjithashtu nuk ka qenë inkurajues.

Dje, skuadra madrilene u eliminua nga Kupa e Mbretit pas humbjes 3-2 ndaj Albacete në stadiumin “Carlos Belmonte”, rezultat që i shtohet dështimeve të fundit të klubit në kompeticionet kombëtare.

Sa i përket Vinicius Jr, paraqitja e tij përsëri lë shumë dyshime.

Edhe pse disa nga shokët e skuadrës nuk shkëlqyen, braziliani, i konsideruar ylli i ekipit, nuk tregoi aftësi për të reaguar ndaj vështirësive dhe pothuajse nuk krijoi raste shënimi.

As aftësia e tij për driblim dhe as kapaciteti për të ndryshuar ritmin e lojës nuk u dukën gjatë ndeshjes, gjë që shton shqetësimin e klubit dhe vendimin për të konsideruar alternativa të tjera.

Oferta për Martinellin

Sipas raportimeve, Real Madrid ka marrë një ofertë për të sjellë Gabriel Martinelli, sulmuesin aktual të Arsenalit.

Tek ekipi i Mikel Arteta, Martinelli nuk është titullar i padiskutueshëm, pasi konkurron për pozicionin me Leandro Trossard.

Megjithatë, braziliani nuk do të hezitonte të pranonte ftesën e Real Madridit nëse konfirmohet largimi i Vinicius.

Megjithatë, nuk bëhet fjalë për një zëvendësues me të njëjtin nivel.

Vinicius Jr, në formën e tij më të mirë, ishte afër fitimit të Topit të Artë dhe ka qenë vendimtar në dy Liga të Kampionëve me Real Madridin.

Martinelli, 24 vjeç, ka pasur një sezon të mirë me Arsenalin, duke luajtur 51 ndeshje sezonin e kaluar, mbi 3,500 minuta, me 10 gola dhe 5 asistime, por ende nuk është konsoliduar si titullar i padiskutueshëm dhe nuk ka fituar tituj të rëndësishëm.

Në rast të ardhjes së tij, klubi do të duhet të konsiderojë edhe transferimin e një sulmuesi tjetër krahu për të plotësuar skuadrën.

E ardhmja e brazilianit dhe ardhja e mundshme e Martinellit do të përcaktojnë vendimet strategjike të Real Madrid në një afat kalimtar që pritet të jetë e nxehtë dhe plot pasiguri. /Telegrafi/

Mbrojtësi i Arsenalit, Ben White, duket se ka vendosur të largohet nga klubi londinez, pasi nuk është i kënaqur me minutat.

Anglezi 28-vjeçar është i pakënaqur me kohën e kufizuar që ka kaluar në fushë dhe kërkon një skuadër ku të sigurojë një rol titullari të rregullt. White u bashkua me Arsenalin në vitin 2021, në një transferim prej 60 milionë eurosh nga Brighton.

Megjithatë, në këtë sezon, ai ka marrë pjesë vetëm në 13 ndeshje, duke dhënë një asist. Edhe pse kontrata e tij skadon në vitin 2028, lojtari raportohet se është i hapur ndaj ofertave nga klube të tjera.

Disa ekipe po e monitorojnë situatën nga afër, përfshirë Everton, që synon të forcojë pozicionin e mbrojtësit të djathtë.

Menaxhmenti i Arsenal pritet të marrë një vendim për të ardhmen e White para mbylljes së afatit kalimtar dimëror. /Telegrafi/

Arsenali ka hedhur një hap shumë të madh drejt finales së EFL Cup, pasi ka triumfuar 3-2 ndaj Chelseat në ndeshjen e parë gjysmëfinale, në një përballje spektakolare dhe të mbushur me emocione deri në minutën e fundit.

“Topçinjtë” e nisën ndeshjen fuqishëm dhe kaluan në epërsi që në minutën e 7-të, kur Declan Rice ekzekutoi saktë një goditje nga këndi dhe Ben White u ngrit më lart se të gjithë për të realizuar me kokë.

Goli u rishikua nga VAR-i, por u konfirmua, duke i dhënë Arsenalit avantazhin e hershëm. Pjesa e parë u karakterizua nga raste nga të dyja anët dhe disa kartonë të verdhë, por rezultati mbeti 0-1.

Në fillimin e pjesës së dytë, Arsenali goditi sërish. Në minutën e 49-të, Viktor Gyökeres ishte më i shpejti në zonë dhe përfitoi nga një top i kthyer për të shënuar golin e dytë, duke i vështirësuar edhe më shumë gjërat për Chelsean.

Megjithatë, vendasit reaguan shpejt dhe në minutën e 57-të, Alejandro Garnacho shfrytëzoi një krosim të saktë nga Pedro Neto për të ngushtuar shifrat në 1-2.

Arsenali riktheu qetësinë në minutën e 71-të, kur Martin Zubimendi finalizoi saktë një aksion të bukur ofensiv për golin e tretë, duke e çuar rezultatin në 1-3.

Por Chelsea nuk u dorëzua dhe vetëm 12 minuta më vonë, Garnacho realizoi golin e tij të dytë personal, duke e bërë rezultatin 2-3 dhe duke rihapur sfidën. Edhe ky gol u kontrollua nga VAR-i, por u pranua.

Minutat e fundit ishin të tensionuara, megjithatë, Arsenali arriti ta menaxhojë avantazhin dhe të dalë fitues nga kjo përballje e parë.

Me këtë triumf 3-2 në transfertë, Arsenali shkon në ndeshjen e kthimit me një avantazh të rëndësishëm dhe është shumë pranë finales së EFL Cup, ndërsa Chelsea do të ketë nevojë për një paraqitje perfekte për të përmbysur gjithçka. /Telegrafi/

Liverpooli mund të “padisë” rivalët e tij, Arsenalin, për incidentin e ndodhur në fund të barazimit 0-0 në 'Emirates Stadium', sipas ish-drejtuesit të PGMOL

“Të Kuqtë” arritën të ndalnin kryesuesit e Ligës Premier me një barazim pa gola të enjten, në një ndeshje ku momenti më i diskutuar ishte dëmtimi i Conor Bradleyt në minutat e fundit.

Mbrojtësi i Irlandës së Veriut pësoi një dëmtim të rëndë teksa tentonte të largonte topin në krahun e djathtë dhe mbeti i shtrirë në fushë, duke shfaqur dhimbje të mëdha.

Gabriel Martinelli, i futur si zëvendësues gjatë ndeshjes, mendoi se Bradley po vononte lojën dhe hodhi topin mbi të, përpara se ta shtynte jashtë vijës anësore.

Ky veprim shkaktoi reagim të ashpër nga lojtarët e Liverpoolit, ndërsa Martinelli u ndëshkua me karton të verdhë për sjelljen e tij.

Më vonë u konfirmua se Bradley kishte pësuar një dëmtim serioz në gju, i cili kërkoi ndërhyrje kirurgjikale dhe e përjashtoi atë nga pjesa e mbetur e sezonit.

Edhe pse Martinelli kërkoi falje publikisht në rrjetet sociale dhe zbuloi se kishte shkëmbyer mesazhe me Bradleyn, incidenti vazhdoi të mbetej temë diskutimi.

Keith Hackett, ish-gjyqtar i Ligës Premier dhe ish-kreu i PGMOL-it, sugjeroi se Liverpooli mund të ndërmarrë hapa të mëtejshëm.

“Kam qenë së fundmi i përfshirë në çështje gjyqësore, ku një lojtar e çon në gjykatë një tjetër, me pretendimin se një dëmtim i ka shkatërruar karrierën”.

“Gjithmonë ekziston ai rrezik dhe një klub mund të përpiqet ta padisë një lojtar, sepse ka humbur shërbimet e futbollistit të tij”.

“Është një pikë e vlefshme për t’u ngritur, sepse në futboll, në përgjithësi, lojtarët kanë një detyrim kujdesi ndaj kundërshtarëve”.

“A mund të kishte ndërhyrë gjyqtari më herët? Ajo që është befasuese është se disa njerëz nuk e kuptuan sa serioz ishte dëmtimi, pasi nuk pati një reagim të tepruar”, ka deklaruar Hackett./Telegrafi/

Legjenda e Arsenalit, Robert Pires, ka lëvduar mesfushorin Declan Rice, duke theksuar se ai është në “të njëjtën ligë” me ikonat e klubit, Thierry Henry dhe Patrick Vieira.

Me Topçinjtë që aktualisht kryesojnë Ligën Premier me gjashtë pikë epërsi dhe synim për të fituar titullin e parë në mbi dy dekada, Pires beson se Rice është një element kyç për suksesin e skuadrës, raporton Goal.com.

Krahasimi me legjendat e epokës Highbury-t

Pires, pjesë e skuadrës historike të Arsenalit “Të Pamposhtur” në sezonin 2003/04, beson se Rice do të qëndronte në këmbë përballë ish-yjeve të Highburyt.

Ndërsa skuadra e Mikel Artetas synon të përfundojë një sezon historik dhe t’i japë fund pritjes 22-vjeçare për titull, miratimi i legjendës franceze nënvizon ndikimin transformues të Rice që nga mbërritja e tij në Londrën veriore.

“Ju nevojiten Patrick Vieira, Thierry Henry, Tony Adams… dhe Declan Rice është në të njëjtin rreth, po”, tha Pires për Sky Sports.

Talisman në mesfushë

Që nga transferimi prej 115 milionë eurosh nga West Ham verën e vitit 2023, Rice është bërë një lojtar i domosdoshëm për skuadrën e Artetas.

Ai u shpall lojtari i sezonit të Arsenalit për sezonin 2024/25 dhe vazhdon të jetë figurë kyçe këtë sezon. Sipas Pires, ndikimi i tij në mesfushë është i qartë: ashtu si Vieira u ofroi forcë dhe lidership “Të Pamposhturve”, Rice ofron bazën për suksesin e gjeneratës aktuale të Arsenalit.

Lëvdata edhe nga Roy Keane

Rice nuk është vetëm i vlerësuar nga legjenda e Arsenalit. Ish-kapiteni i Manchester United, Roy Keane, gjithashtu ka lavdëruar performancën e mesfushorit anglez. Para barazimit 0-0 të Arsenalit me Liverpoolin, Keane theksoi se Rice ka ngritur lojën e tij në nivel botëror.

“Ai duket si një djalë i përulur, por ka edhe vetëbesim – pak ego ju duhet për të luajtur për një klub të madh. Shikoni karrierën e tij: ka bërë një punë të shkëlqyer te West Ham dhe tani te Arsenali është i rrethuar nga lojtarë më të mirë”, tha Keane për Sky Sports. /Telegrafi/

Interi ka konfirmuar se Hakan Calhanoglu ka pësuar një tërheqje muskulore në pulpën e majtë dhe, sipas raportimeve në Itali, lojtari turk do të qëndrojë jashtë fushave për rreth 20 ditë.

Sipas mediave italiane, përfshirë Sky Sport Italia, Interi do të detyrohet të përballojë ndeshjet pa Calhanoglun për të paktën 20 ditë,

Reprezentuesi turk u detyrua të zëvendësohej në pjesën e dytë të barazimit 2-2 të së dielës kundër Napolit në Stadio Meazza.

Interi konfirmoi dëmtimin e mesfushorit të tyre me një deklaratë gjatë ditës së sotme (e martë) martën në mëngjes.

“Hakan Calhanoglu iu nënshtrua një skanimi MRI këtë mëngjes në Institutin Klinik Humanitas në Rozzano. Testet zbuluan një tendosje muskulore në pulpën e majtë dhe gjendja e tij do të vlerësohet gjatë ditëve në vijim”, thuhet në njoftim.

Calhanoglu, 31 vjeç, ka shënuar tetë gola dhe ka dhënë katër asistime në 22 paraqitje në të gjitha garat këtë sezon.

Interi është lideri i tabelës në Serie A dhe do të presë Leccen në San Siro të mërkurën në një ndeshje të shtyrë të javës së 16-të të Serie A, të cilën Nerazzurrët nuk e luajtën në dhjetor për shkak të përfshirjes së tyre në Superkupën e Italisë.

Calhanoglu pritet gjithashtu të humbasë ndeshjet kundër Udineses, Pisas dhe Cremoneses në Serie A, Arsenalit dhe Borussia Dortmund në Ligën e Kampionëve, por mund të kthehet për një ndeshje në ligë kundër Sassuolos më 8 shkurt. /Telegrafi/

Liverpool pritet të jetë pa Conor Bradley për pjesën e mbetur të sezonit, pasi është konfirmuar se mbrojtësi ka pësuar një lëndim “të rëndë” në gju.

Bradley u rrëzua në minutat e fundit të përballjes së së enjtes kundër Arsenalit, duke ngritur menjëherë shqetësime serioze për gjendjen e tij fizike.

Edhe pse Liverpool nuk ka vendosur një afat të saktë për rikthimin e mbrojtësit të krahut, raportimet fillestare sugjerojnë se ai nuk do të paraqitet më në asnjë ndeshje deri në fund të këtij sezoni.

Mungesa e Bradleyt do të shtojë presionin në repartin defensiv të Liverpoolit, por do të ketë pasoja edhe për Kombëtaren e Irlandës së Veriut.

Ata përballen me Italinë në një ndeshje “play-off” në muajin mars, në përpjekje për t’u kualifikuar në Kampionatin Botëror, dhe mungesa e një lojtari kyç si Bradley shihet si një goditje e madhe për shanset e tyre.

Klubi i Liverpoolit konfirmoi të dielën se Bradley do t’i nënshtrohet një ndërhyrjeje kirurgjikale në ditët në vijim, çka e përforcon më tej idenë se sezoni i tij ka përfunduar para kohe.

Gjatë këtij sezoni, Bradley ka zhvilluar 21 ndeshje me fanellën e Liverpoolit në të gjitha garat, duke qenë titullar në 13 prej tyre dhe duke u shndërruar në një opsion të rëndësishëm për trajnerin.

Ndërkohë, lojtari i Arsenalit, Gabriel Martinelli, ka marrë kritika të shumta pasi tentoi ta shtynte Bradleyn jashtë fushës në momentin kur i riu ishte i shtrirë në tokë pas lëndimit. Sulmuesi brazilian më pas kërkoi falje për veprimin e tij, duke pranuar se reagimi i tij nuk ishte i duhuri./Telegrafi

Arsenali ka shënuar fitore bindëse në udhëtim te Portsmouth, për të avancuar në rrethin tjetër të FA Cup.

“Topçinjtë” triumfuan me rezultat 1-4, sfidë që e dominuan në të gjitha aspektet pavarësisht që pranuan një gol të hershëm.

Ishte Bishop që shtangu të gjithë kur pas një aksioni të shpejtë, kaloi Portsmouthin në epërsi pas tre minutave lojë.

Sidoqoftë, pesë minuta më vonë – Dozzell në përpjekje për ta larguar topin e vendosi në portën e tij, për ta barazuar rezultatin (8’).

Kurse, ishte Gabriel Martinelli që me një gol të bukur pas asistimit të Madueke e përmbysi epërsinë (25’).

Madueke pastaj kishte rastin e artë për të shënuar golin e tretë, sidoqoftë dështoi nga pika e bardhë.

Martinelli u përkujdes edhe për golin e tretë në skuadër, këtë herë pas asistimit të Gabriel Jesusit (51’).

Kurse, i njëjti e vulosi fitoren pak më vonë pas bashkëpunimit me Madueken dhe njëkohësisht e kompletoi het-trikun (72’)./Telegrafi/

Pas negociatave të gjata, Arsenali është shumë pranë finalizimit të një zgjatjeje të rëndësishme kontrate. Talenti londinez Bukayo Saka ka rënë dakord për një angazhim afatgjatë me “Topçinjtë”, marrëveshje që pritet t’i sjellë edhe një rritje të ndjeshme të pagës.

Saka është një nga produktet më të spikatura të akademisë së Arsenalit dhe prej vitesh është titullar i padiskutueshëm nën drejtimin e trajnerit Mikel Arteta. Edhe pse statistikat e tij sulmuese këtë sezon, nëntë gola në 19 ndeshje në Ligën Premier janë pak më modeste krahasuar me sezonet e kaluara, anësori anglez mbetet thelbësor për lojën sulmuese të klubit londinez.

Kontrata aktuale e Sakës është e vlefshme deri në vitin 2027, ndërsa bisedimet për rinovim kanë qenë në zhvillim prej disa muajsh. Tani është shënuar një hap vendimtar: sipas The Athletic, mesfushori sulmues ka pranuar ofertën e fundit dhe pritet të nënshkruajë një kontratë të re pesëvjeçare.

Detajet përfundimtare janë ende duke u diskutuar, por paga e re pritet të rritet ndjeshëm. Disa media angleze raportojnë se kjo marrëveshje mund ta bëjë Sakan lojtarin më të paguar në historinë e Arsenalit.

“Kontrata e re pasqyron statusin e tij si një nga lojtarët kryesorë në Ligën Premier dhe në futbollin evropian, ndërsa ai pritet të ketë rol kyç edhe me Kombëtaren e Anglisë në Kupën e Botës 2026”, thuhet në raportimet e mediave të specializuara.

Sipas informacioneve të mëparshme, Saka pritej të hynte në kategorinë e pagave të Kai Havertz, me rreth 15 milionë euro në vit.

Megjithatë, sipas TeamTalk, ai do ta tejkalojë ndjeshëm ndërkombëtarin gjerman dhe do të bëhet lojtari i parë i Arsenalit me pagë mbi 18 milionë euro në sezon. Kjo do të thotë se deri në fund të sezonit 2030/31, Saka mund të arkëtojë afro 100 milionë euro.

Bukayo Saka është pjesë e Arsenalit që nga viti 2008 dhe sot konsiderohet një nga figurat ikonike dhe më të dashura për tifozët. 24-vjeçari ka regjistruar 290 paraqitje me fanellën e “Topçinjve”, duke kontribuar me 77 gola dhe asistime. /Telegrafi/

Michael Owen ka dhënë vlerësimin e tij për vështirësitë që po has Viktor Gyokeres te Arsenali, duke shprehur dyshime nëse sulmuesi posedon cilësinë e nevojshme për të performuar vazhdimisht kundër skuadrave më të forta të Ligës Premier.

Ish-sulmuesi anglez beson se problemet e Gyokeres tregojnë hendekun e madh mes të shkëlqyerit në Portugali dhe paraqitjeve në nivelin më të lartë në Angli.

Gyokeres ndërtoi një reputacion të jashtëzakonshëm gjatë dy sezoneve të tij në Portugali, ku u konsiderua gjerësisht si një nga sulmuesit më të frikshëm në Evropë.

Ai iu bashkua Arsenalit pasi kishte humbur një pjesë të madhe të fazës përgatitore, por pritshmëritë mbetën të larta që të përshtatej shpejt dhe të udhëhiqte repartin ofensiv.

Megjithatë, përshtatja e tij ka rezultuar e vështirë, duke përforcuar idenë se suksesi në Portugali jo gjithmonë përkthehet lehtësisht në Ligën Premier.

Edhe pse i pranon cilësitë e Gyokeres, Owen ka vënë në pikëpyetje aftësinë e tij për të ndikuar në ndeshjet kundër kundërshtarëve elitarë.

“Dhe e dini çfarë? Kundër Burnleyt, Nottingham Forestit, Evertonit, kushdo qoftë, ai ndoshta do të shënojë shumë gola, ai di të finalizojë dhe do të jetë në zonë”.

“Por për t’i fituar këto ndeshje kundër Liverpoolit, të duhet pak më shumë klas, thjesht pak më shumë klas dhe pikërisht aty është vendi ku ai mungon”, ka thënë Owen./Telegrafi/

Legjenda e Arsenalit, Sol Campbell, ka dhënë një paralajmërim për Eberechi Eze pas paraqitjes së tij të parë në ligë për një muaj, gjatë mesjavës.

Eze hyri nga stoli në pjesën e fundit të barazimit 0-0 të ‘Topçinjve’ ndaj Liverpoolit të enjten mbrëma, duke zëvendësuar kapitenin Martin Odegaard për minutat e fundit të përballjes me kampionët në fuqi të Ligës Premier.

Ky barazim 0-0 me ‘Të Kuqtë’ i dha Arsenalit një avantazh prej gjashtë pikësh në krye të tabelës së Ligës Premier, ndërsa ‘Topçinjtë’ synojnë të sigurojnë titullin e parë të ligës së parë pas më shumë se 20 vjetësh.

Ndërkohë që skuadra e veriut të Londrës nuk arriti të përfitonte nga barazimi 1-1 i Manchester City ndaj Brightonit të mërkurën mbrëma, tre barazimet radhazi të Cityt për të hapur 2026-n i japin ekipit të Mikel Arteta një avantazh të shëndetshëm në krye të tabelës.

Kjo ndeshje shënoi paraqitjen e parë të Eze në Ligën Premier që nga momenti kur u zëvendësua në orën e 60-të gjatë fitores 2-1 të Arsenal ndaj Wolves muajin e kaluar, megjithatë ish-lojtari i Crystal Palace kishte filluar në triumfin me penallti në Carabao Cup ndaj ‘Shqiponjave’.

“Eberechi Eze është në klubin e duhur. Duhet të presësh mundësinë tënde dhe kjo është diçka e mirë, sepse kur futesh në skuadër, e vlerëson dhe nuk e merr vendin tënd si të mirëqenë”.

“Eze do të marrë mundësinë e tij. Ka qenë i jashtëzakonshëm në disa raste, ka shënuar gola të mrekullueshëm dhe ka realizuar një het-trik fantastik ndaj Tottenhamit. Por ka shumë djem që po shënojnë gola, po bëjnë paraqitje të mahnitshme, duke bërë pritje të shkëlqyera dhe gjëra të tjera”.

“Nuk je më në Crystal Palace, je në Arsenal dhe duhet pak më shumë për të konsoliduar pozicionin tënd. Nuk mjafton të realizosh një het-trik dhe të startosh çdo javë”.

“Duhet të gjejë pozicionin e tij në ekipin e Arsenalit, një skuadër që ka qenë së bashku për dy, tre vjet e më shumë dhe duhet të gjejë rrugën e tij”, ka deklaruar Campbell./Telegrafi/

Arsenal synon një transferim prej rreth 74 milionë eurosh për Tino Livramento, por përballet me konkurrencë nga Manchester City.

Sipas një raporti të ri, Arsenal po planifikon një marrëveshje të mundshme prej rreth 74 milionë eurosh për të nënshkruar me Tino Livramento nga Newcastle, por përballet me konkurrencë të fortë nga Manchester City.

Mbrojtësi 23-vjeçar do të ketë vetëm dy vite të mbetura në kontratën e tij gjatë verës, dhe të dy gjigantët e Ligës Premier janë të interesuar për të siguruar shërbimet e tij.

Sipas The Sun, Arsenal po planifikon një transferim të mundshëm veror për Livramento. Mbrojtësi i djathtë i Newcastle ka marrë një rol kyç në skuadrën e Eddie Howe në St James' Park, duke luajtur 18 ndeshje në të gjitha kompeticionet.

Kontrata e tij skadon në vitin 2028 dhe 'Laraskat' do të kenë shumë pak fuqi negociuese këtë verë, duke pasur parasysh se më herët kishin kërkuar rreth 70 milionë euro për Livramenton në verë.

Performancat e 23-vjeçarit në veriun e Anglisë e kanë bërë atë një pjesë të përfaqësueses së Anglisë, ku ka fituar tre paraqitje, dhe ai shpreson të përfshihet në skuadrën e Thomas Tuchel për Botërorin 2026.

Arsenal përballet me konkurrencë serioze nga Manchester City, të cilët kanë pasur një interes afatgjatë për ish-lojtarin e Southampton.

Livramento iu bashkua Newcastle në vitin 2023 nga Southampton në një marrëveshje prej 34.8 milionë eurosh dhe ‘Laraskat’ pritet të përfitojnë një fitim të madh nga ky transferim.

Ai ka treguar në nëntor, pas rikthimit nga një mungesë e gjatë, se ende nuk ka pasur negociata për një kontratë të re.

“Kjo nuk është diçka që unë e kontrolloj. E lë te babai im dhe agjenti im. Për mua, kam qenë jashtë për shtatë javë. Kam punuar shumë për t’u rikthyer dhe natyrisht për të ndihmuar skuadrën”.

Jam shumë i lumtur me mënyrën se si kam luajtur (kundër Man City). Kjo është fokusi im tani. Të qëndroj ku jam dhe të ndihmoj sa më shumë skuadrën”, kishte deklaruar ai./Telegrafi/

Arsenali është shfaqur si një pretendent serioz për kapitenin e Crystal Palace, Marc Guehi, duke e komplikuar edhe më shumë përpjekjen e Manchester Cityt për ta transferuar qendërmbrojtësin e shumëkërkuar gjatë afatit kalimtar të janarit.

Man City pritet të jetë sërish aktiv këtë muaj. Skuadra e Pep Guardiolës vazhdon të jetë në garë në të katër kompeticionet, por synon përforcime shkaku se ka humbur disa yje si pasojë e lëndimeve.

Josko Gvardiol është detyruar të qëndrojë jashtë për një periudhë të pacaktuar pasi pësoi një lëndim në kockën e këmbës, e cila kërkoi ndërhyrje kirurgjikale.

Edhe Ruben Dias u lëndua në të njëjtën ndeshje ndaj Chelseat dhe pritet të mungojë nga katër deri në gjashtë javë për shkak të një problemi muskulor.

Këto zhvillime të pafavorshme e kanë shtyrë Cityn të rrisë interesimin për një transferim të Guehit në janar, sidomos duke pasur parasysh se kontrata e tij me Crystal Palace skadon pas vetëm gjashtë muajsh. Kjo situatë ka bërë që edhe klubet e tjera të interesuara të rishfaqen fuqishëm në garë.

Interesimi afatgjatë i Arsenalit për ndërkombëtarin anglez raportohet se mbetet shumë aktiv. Liderët aktualë të Liga Premier e shohin Guehin si një opsion për repartin defensiv për verën e ardhshme, ndonëse ende nuk ka qartësi për afatin kohor të një lëvizjeje të mundshme.

Trajneri i Crystal Palace, Oliver Glasner, ka pranuar se klubi do të detyrohet të pranojë një ofertë të përshtatshme për kapitenin e tij këtë muaj.

Në garë mbetet edhe Liverpooli, i cili ishte shumë pranë transferimit të Guehit verën e kaluar. Megjithatë, “The Reds” duket se do të presin deri në korrik për t’iu afruar lojtarit si lojtar i lirë.

Ndërkohë, edhe Atletico Madridi, Bayern Munich dhe Barcelona po monitorojnë situatën për një lëvizje në fund të sezonit./Telegrafi

Një përforcim i ri u pa prezent në ‘Emirates Stadium’ gjatë barazimit 0-0 të Arsenalit ndaj Liverpoolit, një ndeshje që bëri që “Topçinjtë” të shkëputeshin me gjashtë pikë nga Manchester City në krye të renditjes së Ligës Premier.

Skuadra e Mikel Artetës humbi mundësinë për t’u shkëputur me tetë pikë nga City i Pep Guardiolës, të cilët kanë barazuar tri ndeshjet e fundit – kundër Sunderlandit, Chelseat dhe Brightonit, duke i lejuar Arsenalit të avancojë më tej në garën për titullin e parë në Ligën Premier që nga sezoni 2003/04.

Liverpooli, i cili tashmë është i pamposhtur në 10 ndeshje radhazi, e kufizoi Arsenalin në vetëm 34 për qind posedim të topit në pjesën e dytë dhe mund të kishte marrë më shumë se një pikë nga kjo përballje nëse do t’i kishte në fushë sulmuesit e zakonshëm, Alexander Isak dhe Hugo Ekitike.

Mungesa e rrezikshmërisë në sulm ishte e dukshme edhe nga statistikat, me Liverpoolin që nuk arriti të regjistronte asnjë goditje në portë nga shtatë tentativa.

Ndërkohë, disa tifozë të vëmendshëm të Arsenalit vunë re se një lojtar që pritet t’i bashkohet klubit në të ardhmen ishte ulur pranë stolit të Arsenalit.

16-vjeçari Victor Ozhianvuna publikoi një fotografi të fushës në Instagram, e cila ngjalli reagime nga tifozët në rrjetet sociale.

Sulmuesi irlandez aktualisht luan për skuadrën e Shamrock Rovers, por pritet t’i bashkohet Arsenalit kur të mbushë 18 vjeç, në janar të vitit 2027.

Adoleshenti arriti një marrëveshje për t’u transferuar te Arsenali në tetor të vitit 2025 dhe tashmë ka hyrë në histori në karrierën e tij të hershme, duke u bërë lojtari i dytë më i ri ndonjëherë që ka luajtur në Ligën e Konferencës kur u aktivizua në ndeshjen e kthimit të Rovers kundër Molde.

Ozhianvuna ka përfaqësuar gjithashtu Republikën e Irlandës në grupmoshat nga U15 deri në U18.

Sipas rregullave pas Brexit, klubet angleze nuk lejohen të nënshkruajnë me lojtarë nga vendet e Bashkimit Evropian (BE) deri sa ata të kenë mbushur moshën 18 vjeç./Telegrafi/

Sipas gazetarit të “The Athletic”, David Ornstein, Bukayo Saka ka arritur marrëveshje për një kontratë të re dhe të përmirësuar pesëvjeçare me Arsenalin, e cila do ta mbajë atë në “Emirates Stadium” deri në vitin 2031.

Kontrata aktuale e anësorit anglez do të skadonte pas 18 muajsh dhe drejtuesit e klubit londinez ishin të vendosur të mos rrezikonin humbjen e njërit prej lojtarëve më të rëndësishëm të skuadrës.

Marrëveshja e re reflekton qartë statusin e Sakës si një nga lojtarët kryesorë të Arsenalit dhe të kombëtares angleze, si në arenën vendase ashtu edhe në atë ndërkombëtare. Ai është kthyer në një figurë kyçe të projektit të klubit dhe një nga emrat më të spikatur në Liga Premier.

Në sezonin aktual, 24-vjeçari ka qenë vendimtar për “Topçinjtë”, duke shënuar shtatë gola dhe duke dhuruar katër asistime në 27 paraqitje në të gjitha garat, statistika që dëshmojnë rëndësinë e tij në skuadrën e Mikel Artetës.

Kësisoj, pas Salibas – Arsenali kompleton edhe një marrëveshje ndërsa është i fokusuar edhe në rinovimin e kontratave të disa lojtarëve të tjerë që janë pjesë e padiskutueshme e formacionit bazë të Mikel Artetas.

Arsenali përndryshe shihet si favoriti kryesor për ta fituar Ligën Premier, me 49 pikë, gjashtë mbi Man Cityn./Telegrafi

Në një kampionat të gjatë dhe garë të fortë për titullin kampion, një barazim mund të qëndrojë. Aq më tepër ndaj një rivali të madh. Por Arsenal vazhdon të jetë pretendent kryesor në këtë sezon të Premier League.

Konfirmimi për këtë erdhi në sfidën e fundit kundër kampionëve në fuqi të Liverpool, të sigluar në shifrat 0-0. Pavarësisht rezultatit, “Topçinjtë” treguan edhe një herë forcën e tyre.

Mbi të gjitha në pjesën e parë, ku dominuan në të gjithë komponentët e lojës, nga kontrrolli i topit, te rastet për shënim dhe goditjet në portën e rivalëve.

Frkasioni i dytë ishte ndryshe, ndërsa frika për të mos humbur bëri që të besuarit e Mikel Arteta të tërhiqeshin duke i lënë më shumë hapësirë Liverpool. Por edhe të kuqtë nuk arritën të shfrytëzojnë rastet e tyre, duke ndarë pikët me Arsenal.

Një frenim që nuk ka efekte negative për “Topçinjtë”, që nuk arrijnë të arratisen, por që ruajnë gjithsesi vendin e parë me një distancë sigurie prej 6 pikësh ndaj ndjekësve më të afërt të Manchester City./abcnews.al

Gabriel Martinelli ka kërkuar falje publike pasi u përpoq ta shtynte mbrojtësin e djathtë të dëmtuar të Liverpoolit, Conor Bradley, jashtë fushës gjatë barazimit të tensionuar 0-0 të Arsenalit me kampionët të enjten mbrëma.

Incidenti ndodhi në kohën shtesë kur Bradley u ul keq duke ndjekur një top pranë vijës anësore dhe menjëherë e kapi gjurin.

Martinelli e lëshoi topin mbi të përpara se ta shtynte në shpinë, duke shkaktuar një përleshje që bëri që Martinelli dhe lojtari i Liverpoolit, Ibrahima Konate, të ndëshkoheshin me karton të verdhë.

Bradley u nxor me barelë dhe më vonë doli nga stadiumi Emirates me paterica dhe një mbështetëse në gju.

Kjo ka bërë që Martinelli të reagojë më vonë duke kërkuar falje publike me një postim në rrjetin social Instagram.

“Nuk e kuptova që ai u lëndua rëndë në atë moment të nxehtë. Dua të them se më vjen shumë keq që reagova. I shpreh përsëri Conorit gjithë të mirat për shërim të shpejtë", ka shkruar Martinelli.

Sulmuesi brazilian ka konfirmuar gjithashtu se dyshja kishte folur dhe se kishte kërkuar falje privatisht. /Telegrafi/

Arsenali vazhdon të mbajë interes prej kohësh për një lojtar që ndodhet gjithashtu në radarët e Liverpoolit, teksa një transferim befasues për yllin në fjalë është diskutuar seriozisht.

“Topçinjtë” investuan fuqishëm gjatë verës, duke afruar emra të mëdhenj si Viktor Gyokeres, Eberechi Eze dhe Martin Zubimendi, ndër të tjerë. Në total, Arsenali shpenzoi rreth 250 milionë euro, përfshirë 55 milionët e paguara për Gyokeres.

Edhe pse afati kalimtar dimëror është i hapur, klubi nga Londra Veriore tashmë ka nisur planifikimet për afatin kalimtar të verës.

Këtë e ka bërë të ditur gazetari i njohur David Ornstein, i cili publikoi informacione të reja rreth transferimeve.

Sipas Ornstein, Arsenali ruan interes të kahmotshëm për Marc Guehi dhe e sheh atë si një opsion serioz për repartin defensiv në afatin kalimtar të verës.

Edhe pse skuadra e Mikel Artetës ka tashmë në përbërje qendërmbrojtës të nivelit të lartë si William Saliba dhe Gabriel, si dhe afrimin e verës Piero Hincapie, drejtuesit janë të vendosur ta forcojnë edhe më tej mbrojtjen.

Në garë për Guehin është edhe Liverpooli, i cili, ashtu si Arsenali, po synon një transferim gjatë verës, duke marrë parasysh faktin se kontrata e mbrojtësit me Crystal Palace përfundon më 30 qershor.

25-vjeçari ishte shumë pranë kalimit te Liverpooli në ditën e fundit të afatit kalimtar të verës, por marrëveshja u anulua në momentet e fundit nga Palace.

Sipas raportimeve, kushtet personale ishin dakorduar dhe Guehi kishte kryer një pjesë të testeve mjekësore përpara një transferimi prej 35 milionë eurosh.

Liverpooli mund të humbasë Ibrahima Konaten në fund të sezonit, andaj transferimi i Guehit shihet si një zëvendësim i gatshëm, veçanërisht për faktin se ai e njeh shumë mirë Ligën Premier.

Guehi ka zhvilluar 152 ndeshje kampionale me Crystal Palace që nga transferimi i tij prej 18 milionë eurosh nga Chelsea në verën e vitit 2021./Telegrafi/

Arsenal dhe Liverpool janë ndarë në barazim pa gola në përballjen e javës së 21-të të Ligës Premier, në një ndeshje të fortë dhe me ritëm të lartë, por ku mungoi finalizimi.

Skuadra e Mikel Artetës ishte më kërkuese gjatë pjesës së parë dhe dominoi posedimin e topit, duke krijuar disa raste të pastra shënimi.

Bukayo Saka dhe Declan Rice testuan disa herë portierin Alisson, i cili u tregua vendimtar me pritje të shkëlqyera, veçanërisht në minutën e 44-të, kur ndali një goditje të fortë nga Rice nga distanca. Arsenali kërcënoi edhe nga krahët me Timber dhe Trossard, por mbrojtja e Liverpoolit rezistoi.

Në anën tjetër, Liverpooli u bë më i rrezikshëm me kalimin e minutave. Rasti më i mirë për “The Reds” erdhi në minutën e 27-të, kur Conor Bradley goditi shtyllën pas një topi të kthyer në zonë.

Dominik Szoboszlai provoi disa herë nga distanca dhe nga goditjet e dënimit, por pa arritur ta gjejë rrugën e rrjetës.

Pjesa e dytë u karakterizua nga luftë e fortë në mesfushë, ritëm i lartë dhe ndërprerje të shpeshta, por pa raste të pastra goli.

Në fund, të dy skuadrat u pajtuan me nga një pikë. Pas këtij rezultati, Arsenali mbetet në krye të tabelës me 49 pikë, ndërsa Liverpooli renditet në vendin e katërt me 35 pikë. /Telegrafi/