Arsenali ka ndryshuar qëndrim sa i përket të ardhmes së sulmuesit Gabriel Jesus, duke mos qenë më i gatshëm ta lejojë largimin e tij në afatin kalimtar të janarit, pavarësisht se më herët kishte qenë i hapur për një shitje të mundshme.

Trajneri Mikel Arteta e konsideron rikthimin në formë të brazilianit dhe rolin e tij në skuadër si elemente kyçe për pjesën e mbetur të sezonit.

Sulmuesi 27-vjeçar ka rikonfirmuar rëndësinë e tij për ekipin, pavarësisht problemeve të shpeshta me lëndimet. Pas rikuperimit nga shqetësimet në muskujt e kofshës, Jesus ka nisur të aktivizohet rregullisht, duke sjellë intensitet në presion, lëvizje pa top dhe lojë lidhëse – elemente thelbësore në sistemin e Artetës.

“Gabriel është shumë në formë. Ne kemi rritur gradualisht minutat e tij”.

“Përderisa ishte në rregull fizikisht, të gjithë ishim të kënaqur ta linim në fushë. Kur filluam të shihnim shenja lodhjeje, e zëvendësuam, por jemi shumë të kënaqur me të”.

Në mesin e vitit 2025, Arsenali kishte konsideruar seriozisht një shitje të mundshme të Gabriel Jesus në janar, veçanërisht për shkak të interesimit nga klubet saudite. Megjithatë, paraqitjet e fundit kanë ndryshuar llogaritjet në ‘Emirates’, pasi braziliani nuk shihet më si lojtar i tepërt në skuadër.

Sezonin e kaluar, Gabriel Jesus regjistroi shtatë gola dhe dy asistime në 27 paraqitje për Arsenalin në të gjitha garat, duke treguar se edhe mes lëndimeve, ai mbetet një hallkë e rëndësishme në projektin e Artetës./Telegrafi

Trajneri i Arsenalit, Mikel Arteta, ka ndarë përditësime mbi rikuperimin e lojtarëve kryesorë Kai Havertz dhe Gabriel Magalhaes.

Trajneri spanjoll zbuloi se mesfushori sulmues gjerman është afër rikthimit, ndërsa mbrojtësi brazilian do të kërkojë më shumë kohë për t'u rikthyer

"Kthimi i Kai Havertz është vetëm çështje ditësh, ndoshta javësh. Do ta monitorojmë se si ndihet në fazën tjetër të rikuperimit. Ai është një lojtar që na mungon sepse e ngre ekipin lart. Është shumë afër të luajë përsëri dhe jam i kënaqur që kjo do të ndodhë së shpejti", ka thënë fillimisht Arteta.

“Duhet t'i japim më shumë kohë pasi ai nuk ka rifilluar ende stërvitjen. Shpresojmë që ai të shërohet shpejt duke pasur parasysh situatën tonë aktuale mbrojtëse", përfundoi trajneri i Arsenalit.

Përveç Havertz dhe Magalhaes, Christian Musquera, Max Dowman, Ben White, Gabriel Martinelli dhe Piero Hincapie janë gjithashtu jashtë fushave shkaku i lëndimeve.

Pas 17 xhirove, Arsenali kryeson tabelën në Ligën Premier, dy pikë më shumë se Manchester City. /Telegrafi/

Tabela përfundimtare e Ligës Premier është simuluar dhe tifozët e Arsenalit kanë arsye të mëdha për festë.

Sipas parashikimeve më të fundit, pritja e gjatë për titullin kampion duket se më në fund po merr fund. Skuadra e Mikel Artetës ka qenë shumë pranë suksesit për disa sezone radhazi, por Manchester City dhe Liverpool kanë qenë gjithmonë një hap përpara.

Këtë herë, megjithatë, gjithçka duket ndryshe. Sipas analizës së fundit, Topçinjtë pritet ta ndërpresin “agjërimin” e gjatë dhe ta fitojnë titullin këtë sezon.

Arsenali në krye, City në vendin e dytë

Në krye të tabelës parashikohet një festë e madhe për Arsenalin dhe tifozët e tij besnikë. Superkompjuteri i fundit i përdorur nga CasinoHawks parashikon që liderët aktualë do ta fitojnë titullin me pesë pikë diferencë ndaj skuadrës së Pep Guardiolës.

Sipas këtij simulimi, Arsenali do ta përfundojë sezonin me 87 pikë, ndërsa Manchester City do të duhet të kënaqet me vendin e dytë me 82 pikë.

Lufta për Evropën

Lajme shumë pozitive ka edhe për Aston Villën, e cila parashikohet të përfundojë sezonin në vendin e tretë, duke siguruar një rikthim në Ligën e Kampionëve, kompeticioni më fitimprurës evropian për klube.

Katërshja e parë do të plotësohet nga Chelsea, nën drejtimin e Enzo Marescas, ndërsa kampionët e sezonit të kaluar, Liverpool, dhe Manchester United, parashikohet të renditen në vendin e pestë dhe të gjashtë, përkatësisht.

Kush bie nga liga?

Në fund të tabelës, panorama është dukshëm më e errët. Wolves, të cilët ende nuk kanë regjistruar asnjë fitore këtë sezon, parashikohen të kenë një edicion katastrofik.

Sipas simulimit, ata mund të thyejnë rekordin famëkeq për numrin më të ulët të pikëve të mbledhura ndonjëherë në Ligën Premier.

Wolves pritet të përfundojnë sezonin me vetëm 10 pikë, duke regjistruar vetëm dy fitore.

Burnley parashikohet gjithashtu të bjerë nga kategoria, duke vazhduar reputacionin e tij si një klub që shpesh ngjitet dhe bie mes ligave. Rënia më befasuese, megjithatë, pritet të jetë ajo e West Ham.

Edhe pse 40 pikë zakonisht konsiderohen të mjaftueshme për mbijetesë, këtë sezon nuk do të jenë të tilla për “Hammers”, të cilët parashikohet t’u bashkohen Wolves dhe Burnley në rënien drejt Championshipit.

Surpriza në mes të tabelës

Një element interesant i këtij simulimi është mbijetesa e parashikuar për dy nga tre ekipet e sapongjitura në elitë. Sunderland pritet të ketë një sezon shumë pozitiv rikthimi, duke përfunduar në një vend të respektueshëm, të 11-in.

Leeds United gjithashtu pritet ta shmangë rënien nga kategoria, por me shumë vështirësi. Ata parashikohen të përfundojnë në vendin e 17-të, vetëm pesë pikë larg zonës së rënies.

Nga ana tjetër, Tottenham pritet të ketë edhe një sezon zhgënjyes. Pavarësisht një përmirësimi të lehtë sezonin e kaluar nën drejtimin e Ange Postecoglou, Spurs parashikohet të mbyllin sezonin në vendin e 15-të, një rezultat veçanërisht i dhimbshëm duke pasur parasysh suksesin e madh të rivalëve të tyre në veri të Londrës. /Telegrafi/

Lojtarët e Arsenalit e pritën Krishtlindjen në vendin e parë në Ligën Premier dhe tifozët e tyre kanë frikë nga një lloj mallkimi që e ndjek klubin londinez.

Konkretisht, që nga fillimi i epokës së Ligës Premier në vitin 1992, 16 herë skuadra që ishte në vendin e parë në Krishtlindje nuk e fitoi kampionatin anglez.

Nga ato 16 raste, Arsenali ka pësuar katër herë më shumë se epërsia që kishte ndaj rivalëve të tyre më 25 dhjetor, ndërsa Liverpooli mban rekordin me pesë raste.

Arsenali është skuadra që humbi një avantazh të tillë dy herët e fundit, në sezonet 2022/23 dhe 2023/24, dhe të dyja herët titulli i shkoi Manchester Cityt, një skuadër që aktualisht është dy pikë pas Arsenalit.

Arsenali humbi gjithashtu epërsinë në sezonet 2002/03 dhe 2007/08 kur Manchester United u bë kampion, dhe kështu Arsenali nuk e ka fituar kurrë titullin kur ishte lider në Krishtlindje.

Ekipet e mbetura që kryesuan tabelën në Krishtlindje dhe në fund nuk u bënë kampionë janë Norwich (1992/1993), Newcastle (1995/96 dhe 2001/02), Liverpool (1996/97, 2008/09, 2013/14, 2018/19 dhe 2020/21), Manchester United (1997/98 dhe 2003/2004), Aston Villa (1998/99) dhe Leeds (1999/2000).

Kanë mbetur edhe 21 xhiro deri në fund të sezonit dhe nuk ka dyshim se City do të bëjë çmos për t’ia hequr trofeun Arsenalit nga duart për herë të pestë në epokën e Ligës Premier.

Sigurisht, lojtarët e Mikel Artetas do të bëjnë çmos që kjo të mos ndodhë dhe sigurisht që presim një vazhdim shumë emocionues të sezonit. /Telegrafi/

Mbrojtësi i Manchester Cityt, Ruben Dias, i ka lëshuar një paralajmërim rivalëve për titullin e Ligës, Arsenalit.

Arsenali është në krye të tabelës së kampionatit anglez pas 17 xhirove me 39 pikë apo vetëm dy më pak se City i dyti.

Kështu, kapiteni i Cityt, Dias ka paralajmëruar rivalët e arsenalit se duhet të jenë gati për të luftuar në pjesën e dytë të edicionit.

Dias tha se skuadra e tij është gjithmonë në formë në gjysmën e dytë të sezonit dhe e ka dëshmuar këtë gjatë viteve.

"Gjatë një sezoni, gjithmonë duhet të ndërtosh ngadalë. Kur të arrish në shkurt e tutje, duhet të jesh gati", ka thënë fillimisht Dias.

"E kemi parë çdo vit që kemi pasur sukses, por mund të mos jemi në krye të ligës, por jemi aty. Na duhet kjo përsëri këtë sezon”, përfundoi portugezi. /Telegrafi/

Nuk është trofeu kryesor I sezonit. Gjithsesi, ky Arsenal dalë nga dalë po kthehet në skuadrën që kërkon të fitojë gjithçka në futbollin anglez, ndonëse më kryesorin, titullin, nuk e zotëron prej më shumë se 20 vitesh.

“Topçinjtë” patën një provë shumë të vështirë në çerekfinalen e Kupës së Ligës, në një derbi të vogël ndaj Kristël Palasit.

Edhe pse u luajt në stadiumin e tyre, “Emirejts”, në prani të mbi 61 000 tifozëve, pavarësisht epërsisë së plotë, sërish dueli u kthye në mallkim.

Raste të shumta u humbën, edhe pse Martineli dhe Madueke ishin fluturues nga krahët.

Edhe atëherë kur u duk se ishte fituar, doli një mirazh.

Lakrua shkaktoi autogol, dhjetë minuta para fundit, dhe Arsenali kryesoi, veçse thellë në kohën shtesë, në minutën e pestë të saj, Palas papritur barazoi.

Autori I golit ishte ylli I kombëtares së Anglisë, Mark Geji. Seria e penalltive në “Emirejts” ishte e gjatë, dhe 15 të tilla u ekzekutuan saktë.

Në njëmbëdhjetë metërshin e 16-të doli në skenë portieri spanjoll Kepa Arrizabalaga, I cili I priti penalltinë pikërisht Lakruasë, që pati një mbrëmje për t’u harruar bashkë me autogolin.

Në gjysmëfinale të Kupës së Ligës, Arsenali do të ketë derbin e madh ndaj Çelsit, ndërsa kryeson në Premier Ligë dhe në Champions

Arsenal siguroi kualifikimin në gjysmëfinalen e Carabao Cup pas një ndeshjeje dramatike ndaj Crystal Palace, e cila u vendos vetëm pas gjuajtjeve nga pika e bardhë.

Pjesa e parë u dominua nga skuadra e Mikel Artetës, me Noni Madueke që krijoi disa raste të pastra shënimi.

Portieri i Palace, Ëalter Benítez, ishte vendimtar me pritje të njëpasnjëshme, duke e mbajtur rezultatin të pandryshuar deri në pushim. Edhe Riccardo Calafiori ishte pranë golit, por tentativa e tij përfundoi mbi traversë.

Në pjesën e dytë, presioni i Arsenalit u konkretizua në minutën e 80-të, kur Maxence Lacroix devijoi topin në portën e tij pas një goditjeje këndi, duke i dhënë epërsinë vendasve prej 1-0.

Arsenal ishte pranë golit të dytë menjëherë pas kësaj, por Gabriel Jesus u ndal sërish nga një pritje spektakolare e Benitez.

Kur dukej se ndeshja po mbyllej në favor të Arsenalit, Crystal Palace reagoi në kohën shtesë. Në minutën e 95-të, Marc Guéhi shënoi nga brenda zonës, duke barazuar rezultatin në 1-1 dhe duke e çuar takimin në penallti.

Në minutat e fundit të lojës, Declan Rice ishte shumë pranë golit të fitores për Arsenalin, por Benitez realizoi një tjetër pritje vendimtare, duke e dërguar ndeshjen drejt penalltive.

Nga pika e bardhë, Arsenal u tregua më i saktë dhe më i qetë. Vendimtar ishte portieri Kepa Arrizabalaga, i cili priti penalltinë e Maxence Lacroix, duke i dhënë kualifikimin tutje skuadrës së tij./Telegrafi/

Arsenal po synon të forcojë pozitën e portierit para afatit të ardhshëm të transferimeve.

Portieri 24-vjeçar, Diant Ramaj, është nën vëzhgim të ngushtë nga skuadra londineze.

Megjithëse Ramaj është i kontraktuar te Borussia Dortmund, ai aktualisht ndodhet i huazuar te Heidenheim, ku skautët e Arsenalit e kanë ndjekur disa herë gjatë këtij sezoni.

Interesi i “Topçinjve” thuhet se është rritur pas paraqitjeve të forta të Ramaj në Bundesliga.

Portieri u transferua nga Ajax te Dortmund në shkurt 2025 për mbi 5 milionë euro, por menjëherë u huazua për të fituar përvojë me ekipin e parë.

Klubi londinez po kërkon një alternativë të besueshme për David Raya, dhe Ramaj shihet si një opsion premtues falë moshës së tij dhe potencialit.

Ai ka tërhequr vëmendjen me kontrollin e tij të sigurt të zonës së penalltisë dhe qetësinë nën presion.

Gjatë këtij sezoni, Ramaj ka luajtur 15 ndeshje, ka marrë një karton të verdhë dhe ka një përqindje të pritjeve prej 58%.

Ky profil i bën atë një kandidaturë interesante për Arsenalin, i cili synon të forcojë rolin kyç të portierit për sezonin e ardhshëm./Telegrafi/

Sulmuesi i Arsenalit, Gabriel Jesus, i është ofruar gjigantit italian AC Milani për afatin kalimtar dimëror.

Klubi kuqezi po shqyrton disa opsione për pozitën e sulmuesit qendror, ndërsa Niclas Fullkrug i West Hamit po shihet gjithnjë e më pranë një transferimi te Milani.

Sipas gazetarit italian Gianluigi Longari, Jesus i është afruar gjithashtu “Rossonerëve”. Megjithatë, ai nuk e ka bindur plotësisht drejtuesit e klubit italian, kryesisht për shkak të gjendjes së tij fizike dhe dyshimeve që lidhen me rikthimin në formën optimale.

Sulmuesi brazilian vjen pas një viti shumë të vështirë, të cilin e humbi pothuajse tërësisht për shkak të një lëndimi serioz në gju. Ai u rikthye në fushë vetëm në muajin dhjetor, duke regjistruar deri tani vetëm tri paraqitje.

Për momentin, Milani mbetet i rezervuar ndaj kësaj mundësie dhe po vazhdon të analizojë alternativa të tjera për repartin ofensivë, ndërsa e ardhmja e Gabriel Jesus te Arsenali mbetet e paqartë.

Jesus shihet vetëm si alternativë te “Topçinjtë”, ndërsa dëshiron të rizhvillojë sa më shumë minuta për ta fituar një vend në listën e Carlo Ancelottit në Kupën e Botës./Telegrafi

Manchester United po përgatitet për një lëvizje të madhe në tregun e transferimeve, me synimin për ta rindërtuar skuadrën për të ardhmen dhe jo vetëm për zgjidhje afatshkurtra.

Trajneri Ruben Amorim dëshiron të formojë një ekip konkurrues për vitet e ardhshme, me theks të veçantë te futbollistët ofensivë që mund të rriten dhe të marrin role udhëheqëse në dekadën e ardhshme.

“Djajtë e Kuq” kanë qenë aktivë këtë verë, duke përforcuar repartin ofensivë me emra si Bryan Mbeumo, Matheus Cunha dhe Benjamin Sesko. Megjithatë, ambiciet e klubit nuk ndalen me kaq.

Tani, Manchester United ka vënë në shënjestër një futbollist që po monitorohet prej kohësh edhe nga Arsenali, i cili e sheh atë si një zgjidhje afatgjatë për sulmin. Sidoqoftë, klubi nga “Old Trafford” është i gatshëm të veprojë me vendosmëri dhe ta lërë pas rivalin e brendshëm me një ofertë që pritet të tronditë Evropën.

Sipas raportimeve nga Fichajes dhe gazetari Ben Jacobs, Manchester United është i gatshëm të ofrojë deri në 100 milionë euro për ta siguruar shërbimin e Kenan Yildiz nga Juventusi.

Sulmuesi 20-vjeçar i “Zonjës së Vjetër” ka qenë një nga lojtarët më të spikatur të Serie A këtë sezon, duke udhëhequr skuadrën si për gola ashtu edhe për asistime. Paraqitjet e tij të shkëlqyera kanë bërë që shumëkush ta krahasojë ngritjen e Yildiz me atë të një legjende të Juventusit dhe futbollit botëror, Cristiano Ronaldos.

Yildiz po tregon vazhdimësi të lartë në Itali, duke shënuar gjashtë gola dhe duke dhuruar gjashtë asistime në 21 paraqitje në të gjitha garat këtë sezon.

Me kontratë të vlefshme deri në vitin 2029, Juventusi nuk ka asnjë detyrim ta shesë talentin turk. Megjithatë, një ofertë prej 100 milionë eurosh mund të hapë debate serioze brenda klubit torinez./Telegrafi

Trajneri i Arsenalit, Mikel Arteta ka insistuar se skuadra e tij duhet të mësojë ta “vrasë” ndeshjen në momentet kur është në epërsi, pavarësisht se londinezët u rikthyen në krye të Liga Premier pas fitores minimale 1-0 në udhëtim ndaj Evertonit.

Golin e vetëm të takimit e realizoi Viktor Gyokeres nga pika e penalltisë, duke shënuar për herë të parë që nga 1 nëntori, ndërsa Arsenali u shkëput përkohësisht me dy pikë në krye të tabelës ndaj Manchester Cityt.

Megjithatë, ashtu si fundjavën e kaluar kur iu desh një autogol në minutat shtesë për ta mposhtur Wolverhamptonin e fundit në tabelë, edhe këtë herë Arteta u detyrua të vuante deri në minutën e 96-të në “Goodison Park” ndaj një Evertoni të përgjysmuar nga mungesat.

“Diferenca duhej të ishte më e madhe. Ne duhet të mësojmë ta mbyllim ndeshjen kur jemi duke fituar”.

Kjo është hera e tretë në katër vitet e fundit që Arsenali e përfundon Ditën e Krishtlindjes në krye të tabelës së Liga Premier. Megjithatë, në dy rastet e mëparshme, londinezët u kapën dhe u tejkaluan nga një Manchester City dominues.

Skuadra e Pep Guardiolës ka fituar shtatë ndeshje radhazi në të gjitha garat, duke e ngushtuar ndjeshëm diferencën, e cila më herët kishte shkuar deri në shtatë pikë.

Pavarësisht kësaj, Arteta vlerësoi vazhdimësinë dhe paraqitjet e skuadrës së tij, duke theksuar se Arsenali vazhdon të shtyjë fort drejt titullit të parë kampion pas 22 vitesh pritje.

“Kjo më jep besim dhe siguri, për shkak të paraqitjeve dhe vazhdimësisë së skuadrës”.

“Kjo është shumë e vështirë për t’u arritur në këtë ligë dhe fakti që ekipi është vazhdimisht aty tregon shumë për nivelin dhe mentalitetin tonë”, nënvizoi ai./Telegrafi

Lajme tronditëse kanë përfshirë qarqet e futbollit anglez, me Arsenalin që, sipas raportimeve, është i gatshëm të shesë një nga lojtarët e tij kryesorë, Gabriel Martinellin, gjatë afatit kalimtar të janarit.

Nëse këto thashetheme rezultojnë të vërteta, bëhet fjalë për një nga transferimet më të bujshme të afatit të dimrit.

Sipas mediave angleze, trajneri Mikel Arteta ka marrë vendim për të nxjerrë në shitje anësorin brazilian. Gazetari turk Sercan Hamzaoglu shkon edhe më tej, duke deklaruar se Martinelli tashmë i është ofruar gjigantit turk, Fenerbahce.

“Arsenali vendosi ta shesë Gabriel Martinellin dhe ai iu ofrua Fenerbahces. Është një lojtar i shtrenjtë,” ka pohuar Hamzaoğlu, duke shtuar: “Nuk e di nëse Fenerbahçe do ta pranojë një transferim të tillë, por ai iu ofrua atyre”.

Shkëlqim në Ligën e Kampionëve

Ky lajm vjen si një surprizë e madhe, veçanërisht duke pasur parasysh formën e Martinellit në Ligën e Kampionëve. Edhe pse ai ka qenë titullar vetëm në pesë ndeshje të Ligës Premier këtë sezon, braziliani ka shënuar gol në pesë paraqitje radhazi në garën elitare evropiane, duke u bërë lojtari i parë në historinë e Arsenalit që arrin një statistikë të tillë.

Nëse skenari i shitjes bëhet realitet, pritet që shumë klube të mëdha evropiane – padyshim më të fuqishme financiarisht se Fenerbahçe – të hyjnë në garë për shërbimet e tij.

Bayern Munich, që edhe më herët ka shfaqur interes për sulmuesin brazilian, përmendet tashmë si një nga klubet e interesuara.

Një kthesë e papritur në raportin me Artetën?

Situata duket edhe më e pazakontë duke qenë se Arteta e ka vlerësuar vazhdimisht Martinellin në deklaratat e tij publike, duke e cilësuar si një lojtar shumë të rëndësishëm për skemën e Arsenalit.

Për këtë arsye, lindin pikëpyetje se çfarë mund të ketë ndodhur në marrëdhënien mes trajnerit dhe lojtarit për të çuar drejt një vendimi kaq drastik.

Martinelli ka kontratë me Arsenalin deri në verën e vitit 2027, ndërsa largimi i tij do të përbënte një goditje të madhe për tifozët, sidomos në një sezon ku “Topçinjtë” synojnë titullin në Angli dhe sukses në Evropë, objektiva që kërkojnë maksimumin e cilësisë në skuadër.

Sipas “Transfermarkt”, vlera e kartonit të brazilianit aktualisht vlerësohet në 45 milionë euro. /Telegrafi/

Në futboll, e rëndësishme është fitorja. Pastaj nëse ajo vjen me spektakël dhe shumë gola, akoma më mirë. Këtë duket se e kanë kuptuar më së miri te Arsenal, që pas më shumë se dy dekadash pritje kanë të gjitha shanset për t’u kthyer te titulli kampion në Premier League.

“Topçinjtë” e Londrës fituan 1-0 në transfertën kundër Everton, duke ruajtur kreun e renditjes dhe duke hedhur një tjetër hap të rëndësishëm drejt objektivit më të rëndësishëm të sezonit.

Suksesi i skuadrës së Mikel Arteta u vendos nga një 11 metërsh I kthyer në gol nga Viktor Gyokeres.

Sulmuesi suedez, një nga notat stonuesë të Arsenal në këtë sezon mori përsipër penalltinë në minutën e 27-të, duke ndalur topin në rrjetë.

Kaq për pjesën e parë, ndërsa pas pushimit, “Topçinjtë” nuk arritën të mbyllnin ndeshjen, pavarësisht dominimit në të gjithë komponentët e lojës.

Londinezët mbajtën bindshëm topin në këmbët e tyre, ndërsa provuan në të gjitha mënyrat të dyfishonin shifrat, por pa sukses.

Nga ana tjetër, Everton nuk u ngjit asnjëherë në nilevin e duhurt për të rrezikuar epërsinë minimale të rivalëve.

Në fund, e gjithë festa ishte për Arsenal, që mban vendin e parë në renditjen e përgjithshme të Premier League, me dy pikë më shumë se ndjekësit më të afërt dhe rivalët e mëdhenj të Manchester City.

Arsenali ka shënuar fitore me rezultat 2-1 në udhëtim ndaj Evertonit në kuadër të javës së 17-të në Ligën Premier.

Momenti vendimtar i ndeshjes erdhi në minutën e 26-të. Pas një rasti të dyshimtë në zonë dhe ndërhyrjes së VAR-it, gjyqtari Samuel Barrott akordoi penallti për Arsenalin.

Viktor Gyokeres u tregua i saktë nga pika e bardhë, duke goditur fuqishëm në anën e majtë dhe duke mos i lënë asnjë mundësi portierit Jordan Pickford për reagim për 1-0.

Evertoni kërkoi disa herë penallti, veçanërisht në pjesën e dytë. Thierno Barry u rrëzua në zonë në dy raste, por gjyqtari fillimisht lejoi lojën të vazhdonte dhe më pas, pas një rishikimi me VAR në minutën e 59-të, konfirmoi vendimin për të mos akorduar penallti për vendasit.

Arsenali ishte shumë pranë golit të dytë në disa raste. Leandro Trossard goditi shtyllën në minutën e 64-të pas një aksioni të bukur nga afërsia, ndërsa vetëm pak minuta më vonë, Martin Zubimendi pati një tjetër rast të artë, por edhe goditja e tij u ndal nga shtylla e djathtë e portës.

Bukayo Saka gjithashtu rrezikoi seriozisht në fillim të pjesës së dytë, por mbrojtja e Evertonit reagoi në momentin e fundit për të larguar topin nga vija fatale.

Me këtë fitore Arsenali rikthehet sërish si lider në tabelë me 39 pikë të grumbulluara, dy më shumë se Man City në vendin e dytë që ka 37 sosh./Telegrafi/

Gabriel Jesus po kërkon një eksperiencë të re pas rënies së rolit të tij te Arsenali, ndaj rrethi i tij ia ka ofruar shërbimet Milanit, i cili po e shqyrton këtë ide.

Gjatë këtij muaji ishte sugjeruar tashmë se braziliani ndodhej në radarët e kuqezinjve, mes disa skuadrave të tjera të Serie A që janë në kërkim të një sulmuesi.

Historia e tij me dëmtimet ka dekurajuar shumë prej tyre, por përfaqësuesit e lojtarit besojnë se futbolli italian mund të jetë hapi i radhës dhe po e shtyjnë veçanërisht drejt Milanit.

Ndërkohë, Niclas Fullkrug është tashmë në rrugë drejt ‘San Siros’ nga West Ham United, ndaj stafi i Max Allegrit duhet ta vlerësojë situatën dhe pritet ta diskutojë sërish pas pushimit të Krishtlindjeve.

Milani kishte nevojë urgjente për një qendërsulmues pas humbjes së Santiago Gimenez për disa muaj për shkak të një operacioni në kyçin e këmbës dhe Fullkrug i përshtatet këtij profili.

Kjo, megjithatë, nuk do të thotë se kuqezinjtë nuk do të kërkojnë alternativa të tjera, veçanërisht duke pasur parasysh se ish-sulmuesi i Chelseat, Christopher Nkunku, ka zhgënjyer deri tani këtë sezon.

Ajo që tashmë është konfirmuar nga gazetari Gianluigi Longari është se agjentët e sulmuesit brazilian kanë ofruar shërbimet e tij te ‘Rossonerët’./Telegrafi/

Legjenda e Arsenalit, Thierry Henry, i ka dërguar një mesazh të drejtpërdrejtë, të fortë por të drejtë trajnerit Mikel Arteta dhe lojtarëve të skuadrës, duke theksuar se rruga drejt titullit nuk pranon justifikime.

Në mes të debateve për mungesat në skuadër dhe kalendarin e ngjeshur të ndeshjeve, ish-sulmuesi francez ka nënvizuar se këto janë situata me të cilat përballet çdo ekip dhe se skuadrat kampione dallohen pikërisht nga mënyra se si reagojnë në momente të vështira.

Henry, pjesë e Arsenalit të famshëm të “Invincibles”, ka bërë të qartë se ankesat vetëm largojnë vëmendjen nga rezultati dhe zgjidhjet reale.

“Le të mos flasim për këto gjëra. Të gjithë kanë probleme. Çdo skuadër kalon nëpër lëndime, lodhje dhe vendime të gabuara. Fitues janë ata që gjejnë zgjidhje, jo ata që kërkojnë shpjegime”.

Sipas legjendës së klubit londinez, një skuadër që synon titullin e kampionit tregon forcën e saj të vërtetë pikërisht atëherë kur mungojnë lojtarët kryesorë.

Henry ka theksuar se Arteta duhet ta shfrytëzojë maksimalisht thellësinë e skuadrës, duke mbajtur ritmin me rivalët kryesorë si Manchester City dhe Chelsea, por mbi të gjitha duke ndërtuar një mentalitet fitues që nuk fokusohet te aspektet negative.

Arsenali aktualisht kryeson tabelën e Liga Premier me 36 pikë pas 16 ndeshjeve të zhvilluara, duke pasur një epërsi prej dy pikësh ndaj Manchester Cityt, çka e bën edhe më vendimtare menaxhimin e kësaj periudhe të sezonit./Telegrafi

Arsenali e ka identifikuar talentin e ri të Real Madridit, Victor Valdepenas, si një objektiv serioz afatgjatë, me plane që thuhet se po marrin formë për një lëvizje në vitin 2026, e cila mund të vërë në provë vendosmërinë e gjigantëve spanjollë.

Mikel Arteta dhe drejtori sportiv Andrea Berta e shohin mbrojtësin 19-vjeçar si një profil ideal për skuadrën e tyre në zhvillim, me klubin e Londrës Veriore të gatshëm të luajë “lojën e gjatë” në përpjekjet për ta transferuar.

Valdepenas bëri debutimin e tij me ekipin e parë të Real Madridit vetëm pak ditë më parë kundër Alaves, me trajnerin Xabi Alonso që i dha besimin, një vendim i diktuar po aq nga nevoja sa edhe nga bindja.

Dëmtimet dhe pezullimet në repartin mbrojtës të Madridit e kanë detyruar Alonson të mbështetet te lojtarët e rinj, dhe Valdepenas u hodh në skenë në një moment kur presioni mbi trajnerin ishte tashmë i madh.

Ai mbërriti në ‘Estadio de Mendizorroza’ nën vëzhgim të rreptë, pasi Real Madridi kishte fituar vetëm dy nga tetë ndeshjet e fundit.

Ky bilanc kishte ushqyer spekulimet mbi të ardhmen e Alonsos, me raportime që sugjeronin se humbja në cilëndo nga tre ndeshjet e ardhshme mund ta vinte në rrezik postin e tij.

Sipas ESPN Deportes, Berta tashmë po shqyrton mundësinë e asaj që përshkruhet si një “ofertë bindëse” për mbrojtësin në vitet e ardhshme, me Topçinjtë që e shohin vitin 2026 si një afat realist për të vepruar.

Megjithatë, Valdepenas ka kontratë me Real Madridin deri në verën e vitit 2029, çka i vendos ata në një pozicion të fortë negociues./Telegrafi/

Komiteti Disiplinor i Shoqatës Evropiane të Futbollit (UEFA) e ka gjobitur Bayern Munichun me 116,000 euro dhe e ka mbyllur pjesërisht stadiumin e tyre për ndeshjen e tyre të radhës në shtëpi në Ligën e Kampionëve.

Klubi bavarez u gjobit për bllokimin e kalimeve publike në stadium, fishekzjarrët e tifozëve në ndeshjen kundër Sportingut.

Përveç tyre ata u dënuan edhe për çrregullime dhe hedhjen e objekteve dhe mesazheve nga tifozët që nuk janë të përshtatshme për një ngjarje sportive gjatë ndeshjes jashtë fushe në Londër kundër Arsenalit.

UEFA gjithashtu i dha Bayernit një dënim me kusht prej dy vitesh. Nëse tifozët bëjnë trazira përsëri, Bayern do të luajë para një tribune jugore të zbrazët për dy vjet.

Përveç Bayernit, UEFA gjobiti edhe Eintracht Frankfurt me 38 mijë euro, Sportingun e Lisbonës me 40 mijë euro, Lille me 10 mijë euro dhe Maccabi Tel-Aviv me 20 mijë euro. /Telegrafi/

Barcelona mund të bëhet skuadra më e mirë në botë me vetëm katër nënshkrime nëse ndodh blerja e përfolur nga shteti i Arabisë Saudite.

Me lojtarë si Robert Lewandowski, Pedri dhe Lamine Yamal, në formacionin titullar, Barcelona është tashmë një nga ekipet më të forta në futboll.

Sigurisht, kjo nuk i ka ndaluar ata të shtojnë disa lojtarë të nivelit të lartë në skuadrën e tyre gjatë verës, me portierin e ri Joan Garcia që u bashkua nga Espanyol dhe Marcus Rashford që mbërriti në huazim nga Manchester United.

Prandaj, nuk është çudi që raportet kanë sugjeruar që Princi i Kurorës Saudite po përgatitet të bëjë një ofertë me vlerë marramendëse prej 10 miliardë eurosh për të blerë gjigantët e La Ligës në të ardhmen e afërt.

“Bomba” e merkatos, Princi i Arabisë Saudite gati 10 miliardë euro për ta blerë Barcelonën

Dhe nëse marrëveshja miratohet, janë identifikuar katër lojtarë që mund ta transformojnë Barcelonën në një nga ekipet më të mira të të gjitha kohërave.

Nuk është sekret që vitet e fundit Barcelona ka pasur vështirësi në nënshkrimin dhe regjistrimin e lojtarëve të rinj për shkak të rregullave financiare të La Ligës dhe borxheve të grumbulluara nga klubi.

Megjithatë, blerja e mundshme nga Arabia Saudite do të fshinte borxhin e klubit dhe do ta bënte atë një nga klubet më të pasura në afatin e ardhshëm të transferimeve, duke i lejuar ata të siguronin disa nënshkrime të mëdha.

Erling Haaland

Haaland aktualisht është nën kontratë me Manchester Cityn deri në vitin 2034, që do të thotë se do të duhej një ofertë gjigante për ta larguar atë nga Etihad. Megjithatë, nëse Barcelona do të kalojë nën pronësi të re, një propozim i tillë nuk do të përjashtohej.

Duke pasur parasysh faktin se raportet kanë sugjeruar që Barcelona po kërkon të nënshkruajë një sulmues të ri në muajt e ardhshëm për të zëvendësuar Lewandowskin i cili do të largohet në fund të sezonit, Haaland mund të jetë zgjedhja perfekte.

Dhe për tifozët, kush nuk do ta donte ta shihte Haalandin duke luajtur për Barcelonën, ndërsa rivali i tij Kylian Mbappe kryeson vijën e sulmit për Real Madridin?

Nico Williams

Për disa vite, superylli spanjoll Williams ka qenë në krye të listës ideale të transferimeve të Barcelonës, me 23-vjeçarin që shihet si një opsion sulmues afatgjatë për klubin.

Gjatë verës, u raportua se Barcelona bëri një ofertë për të paguar klauzolën e lirimit në kontratën e mëparshme të Williams, por ai e refuzoi atë pasi gjigantët spanjollë kishin refuzuar të pranonin një klauzolë largimi në rast se nuk do të ishin në gjendje ta regjistronin atë.

Në vend të kësaj, ai zgjodhi të zgjasë kontratën e tij me Athletic Bilbao, duke nënshkruar një marrëveshje të re që e mban atë atje deri në vitin 2035.

Sigurisht, nëse marrja e kompanisë ndodh, nuk do të ketë më shqetësime financiare dhe Barcelona më në fund mund të sigurojë nënshkrimin e ëndrrave të saj, Williams.

Moises Caicedo

Nëse Barcelona vendos të luajë fuqishëm në sulm dhe potencialisht ta shtyjë Raphinhan në mesfushë, atëherë ata me siguri do të duan të shtojnë një tjetër mesfushor mbrojtës të fortë në formacion për t’iu bashkuar talentit të mrekullueshëm, Pedri, në qendër të fushës.

Bruno Guimaraes i Newcastle United mund të jetë një opsion i mirë duke pasur parasysh lidhjet e tij me Barcelonën në të kaluarën, por Caicedo i Chelseat mund të jetë ndoshta një zgjedhje edhe më e mirë për të siguruar stabilitet në mesfushë.

Chelsea pagoi atë që atëherë ishte një tarifë rekord e Ligës Premier prej 125 milionë eurosh kur nënshkroi me lojtarin ekuadorian në verën e vitit 2023.

Dhe me gjashtë vjet të mbetura në kontratën e tij, pronarët e rinj të Barcelonës do të duhet të paguajnë një shumë të madhe parash për të nënshkruar me Caicedon, diçka që nuk do të përbënte problem.

William Saliba

Së fundmi, në pjesën e pasme të fushës, Barcelona mund ta shohë superyllin e Arsenalit, Saliba, si partnerin ideal për talentin premtues dhe të diplomuarin e akademisë, Pau Cubarsi.

Qendërmbrojtësi është lidhur fort me një transferim te Real Madridi, por një blerje nga Barcelona së bashku me një ofertë të madhe kontrate pa dyshim mund ta tundojë francezin.

Megjithatë, nëse Saliba do të transferohej te Barcelona, kjo mund të nënkuptojë se ai do të duhet të mësohet të luajë në anën e majtë të mbrojtjes, pasi që si ai ashtu edhe Cubarsi aktualisht luajnë në të djathtë.

Formacioni i mundshëm

Me blerjen e këtyre katër yjeve, formacioni titullarë i Hansi Flick do të transferohej pasi të gjithë do të ishin pjesë e 11-shes startuese, duke lënë vetëm shtatë nga lojtarët aktualë.

Në portë do të jetë Joan Garcia, Jules Kounde dhe Alejandro Balde nga krahët e mbrojtjes, teksa qendra e mbrojtës do të formohej nga Saliba dhe Cubarsi.

Në mesfushë, Caicedo dhe Pedri në qendër me Raphinën të avancuar, ndërsa në sulm Yamal dhe Williams nga krahët dhe Haaland në qendër. /Telegrafi/

Është kërkuar hapja e një hetimi policor për incidentin që çoi në vdekjen e futbollistit 21-vjeçar Billy Vigar, i cili u plagos për vdekje gjatë një ndeshjeje në muajin shtator.

Vigar humbi jetën tragjikisht më 25 shtator, gjatë një ndeshjeje për Chichester City në transfertë ndaj Wingate & Finchley, në një kategori të ulët të futbollit anglez. Gjatë një dueli për topin, ai pësoi një rënie të rëndë, goditi kokën në murin e betonit pranë fushës dhe ndërroi jetë në vend.

Ish-lojtari i akademisë së Arsenalit po vraponte për të kapur topin përpara se të dilte jashtë vijës anësore, kur përfundoi duke u përplasur me murin pranë fushës, duke pësuar dëmtime fatale.

Tashmë është kërkuar një hetim i plotë për të zbardhur rrethanat e incidentit. Patologu ka kërkuar ndërhyrjen e policisë, në mënyrë që të shqyrtohet kontakti i mundshëm me një lojtar kundërshtar gjatë duelit për topin, para se Vigar të godiste murin.

Vdekja e ish-lojtarit të Arsenalit ka tronditur opinionin sportiv në Angli dhe ka nxitur kontrolle shtesë të sigurisë në stadiume. Hetimi do të verifikojë nëse një lojtar kundërshtar e ka shtyrë qëllimisht Vigar drejt murit, duke shkaktuar incidentin fatal.

Patologu i lartë Andrew Walker, i cili po merret me çështjen, ka kërkuar që hetimi të zgjerohet në Gjykatën e Kurorës në Barnet, duke theksuar se Vigar kishte qenë në kontakt me një lojtar kundërshtar para vdekjes së tij.

“Çështja që dua të mbulojë hetimi është natyra e kontaktit mes dy lojtarëve të përfshirë”, deklaroi Walker.

Nga ana tjetër, rreshteri Colin Chandler informoi gjykatën se hetimi i Policisë Metropolitane për vdekjen e Vigarit është ende në vazhdim dhe se ekzistojnë pista të tjera për t’u hetuar, përfshirë veprimet e lojtarit kundërshtar dhe kontaktin që ndodhi gjatë ndeshjes. /Telegrafi/