Ansu Fati mund të rikthehet në Spanjë më herët nga sa ishte parashikuar, për shkak të problemeve të reja fizike që po e shoqërojnë te Monaco.

Sulmuesi 23-vjeçar, i huazuar nga Barcelona, kishte nisur mirë aventurën në Ligue 1 dhe po rigjente formën dhe besimin, por dëmtimet kanë frenuar sërish progresin e tij.

Kjo situatë ka ngritur dyshime serioze te klubi francez mbi vazhdimësinë e huazimit deri në fund të sezonit.

Monaco po e rishqyrton marrëveshjen, pasi ka nevojë për lojtarë të gatshëm dhe të besueshëm në një sezon me objektiva të larta.

Edhe pse Ansu Fati ka dhënë sinjale pozitive kur ka qenë i shëndetshëm, ndërprerjet e shpeshta e bëjnë të vështirë integrimin e plotë në projektin sportiv.

Për këtë arsye, opsioni i kthimit të tij të parakohshëm te Barcelona po fiton gjithnjë e më shumë terren.

Në rast rikthimi, Barcelona do të përballej me një situatë të ndërlikuar, pasi nuk ka ende një plan të qartë për rolin e Ansu Fatit në ekipin e parë.

Hapësirat janë të kufizuara dhe klubi katalanas po shqyrton mundësinë e një huazimi të ri për t’i garantuar minuta dhe vazhdimësi. Prioriteti mbetet gjetja e një ambienti të qëndrueshëm dhe me presion më të ulët për lojtarin.

Në këtë kontekst, Elche është shfaqur si një opsion i mundshëm.

Klubi spanjoll, me një projekt të konsoliduar dhe filozofi loje ofensive, mund t’i ofrojë Ansu Fatit një rol protagonist.

Trajneri Eder Sarabia beson se në kushtet e duhura, sulmuesi mund të rikthejë versionin e tij më të mirë dhe të bëhet një element kyç për ekipin.

Vendimet që do të merren në javët e ardhshme do të jenë vendimtare për karrierën e tij dhe për përpjekjen për t’u rikthyer në nivelin më të lartë. /Telegrafi/

Edhe pse është i huazuar te Aston Villa, e ardhmja e Jadon Sancho mbetet e paqartë dhe Manchester United nuk përjashton shitjen e tij që në afatin kalimtar të janarit.

Sulmuesi anglez po kalon një sezon pa stabilitet të plotë, ndërsa javët në vazhdim pritet të jenë vendimtare për drejtimin e karrierës së tij, si në Ligën Premier ashtu edhe jashtë saj.

Situata është e ndërlikuar dhe lidhet me interesa të ndryshme.

Aston Villa dëshiron ta mbajë Sanchon deri në fund të sezonit, duke besuar se ai ende mund të jetë i dobishëm në fazën vendimtare të garave.

Në të kundërt, Manchester United nuk dëshiron që një lojtar me vlerë të humbasë peshë në treg pa minuta të rregullta dhe pa rol kryesor.

Për këtë arsye, klubi po shqyrton seriozisht mundësinë e një transferimi të përhershëm në janar.

Në Old Trafford vazhdon të shihet si problem i hapur çështja Sancho.

I transferuar si yll dhe i projektuar për të udhëhequr repartin ofensiv, ai kurrë nuk arriti të përshtatej plotësisht.

Pas konflikteve të brendshme dhe largimit në formë huazimi, drejtuesit e klubit kanë një prioritet të qartë: të shmangin devalvimin e lojtarit dhe rrezikun e largimit falas në verë.

Nëse Aston Villa nuk i garanton vazhdimësi dhe protagonizëm, United është i gatshëm të dëgjojë oferta dhe ta mbyllë shitjen që në janar.

Nga ana e Aston Villas, besimi ekziston, por realiteti në fushë nuk ka qenë bindës.

Borussia Dortmund, Monaco dhe Como kanë shfaqur interes për situatën e Sanchos, duke e parë janarin si një mundësi të artë.

Dortmund mbetet opsioni më emocional, pasi aty lojtari përjetoi vitet më të mira të karrierës dhe mund të rilindë larg presionit të Ligës Premier.

Monaco dhe Como, nga ana tjetër, përfaqësojnë projekte ambicioze që synojnë të rriten dhe e shohin Sanchon si investim strategjik dhe mediatik.

Manchester United dëshiron ta mbyllë këtë çështje sa më shpejt dhe të sigurojë të ardhura, në mënyrë që të mos e humbasë lojtarin pa përfitim financiar në verë, kur i përfundon kontrata.

Për Jadon Sanchon, një ndryshim ambienti shihet si domosdoshmëri për të rikthyer besimin, vazhdimësinë dhe formën që dikur e bënë një nga talentet më të mëdhenj të futbollit evropian. /Telegrafi/

Sot (e martë), tifozët e futbollit evropian do të përballen me një nga mbrëmjet më dramatike. Në programin e xhiros së gjashtë të fazës së grupeve të Ligës së Kampionëve, shumë skuadra kryesore luajnë për kualifikim dhe për disa prej tyre edhe për mbijetesë në garë.

Ndeshja kryesore e mbrëmjes së sotme padyshim se do të zhvillohet në “Giuseppe Meazza”, me Interin që është nikoqir i Liverpoolit.

Për skuadra si Barcelona dhe Atletico Madrid, kjo natë është thuajse “jetë a vdekje”: një fitore apo mundësi për të shpëtuar sezonin evropian.

Barça pret Eintracht Frankfurt në “Camp Nou”, me presion maksimal për pikë, ndërsa Atletico luan në udhëtim te PSV Eindhoven.

Ndeshje interesante pritet të jenë edhe ato në mes të Bayern Munich-Sporting Lisbona dhe Atalanta-Chelsea.

Për adhuruesit e skuadrave më të vogla nga Kairat Almaty deri te Union Saint-Gilloise, ky mund të jetë shansi i fundit për të befasuar Evropën dhe siguruar pozita që kurrë më parë nuk dukeshin të mundshme. Të parët presin Olympiacosin, teksa të dytët e presin Marseille.

Në ndeshjet tjera të mbrëmjes, Monaco është nikoqir i Galatasarayt, ndërsa Tottenhami e pret Slavia Pragën. /Telegrafi/

Monaco realizoi një paraqitje të shkëlqyer dhe mposhti 1-0 kampionët në fuqi të Paris Saint-Germain, duke i dhënë fund serisë prej tri humbjesh radhazi në Ligue 1. Edhe pse të dy ekipet vinin nga rezultate të ndryshme në Champions League, Monaco barazim me Pafos, PSG fitore spektakolare 5-3 ndaj Tottenhamit, ishte skuadra vendase ajo që e nisi më mirë ndeshjen. Mohammed Salisu rrezikoi i pari me…

Source

Monaco ka triumfuar në derbin francez kundër Paris Saint-Germain, në kuadër të xhiros së 14-të në Ligue 1.

Përballja franceze ishte e baraspeshuar nga fillimi, me vendasit që në fund i morën pikët e plota falë një fitore me rezultat 1-0.

Monaco e nisi për mrekulli ku vetëm pas disa minutave lojë Mohammed Salisu kishte një rast të mirë shënimi, por nuk e fianlizoi.

PSG-ja u kthye në lojë për të rrezikuar me mesfushorin Vitinha, megjithatë goditja e portugezit për mrekulli u ndalë nga Hradecky (26’).

Monaco pastaj e gjeti rrugën drejtë rrjetës përmes Salisu, mirëpo që goli u anulua për pozitë jashtë loje.

Heroi i vendasve ishte Takumi Minamino që shënoi nga afërsia pas asistimit të Golovin (68’).

Situata për Monacon u përkeqësua kur Thilo Kehrer u ndëshkua me karton të kuq pas një ndërhyrje të ashpër (80’), por arritën ta ruajnë rezultatin.

Monaco me këtë fitore ngjitët në pozitën e gjashtë me 23 pikë derisa PSG-ja mbetet lider me 30 pikë të tubuara./Telegrafi/

Faza e grupeve të Ligës së re të Kampionëve hyn në fazën e saj vendimtare pas një xhiro ndeshjesh që ka tronditur ndjeshëm renditjen.

Me vetëm tre ndeshje të mbetura, ekipet po përsosin strategjitë e tyre, po përshtatin objektivat e tyre dhe po i mbajnë sytë hapur parashikimeve nga superkompjuteri i Opta-s, i cili ka përditësuar renditjen e probabilitetit për të përcaktuar se kush do të zërë tetë vendet e kualifikimit direkt për fazën e 1/8-tës.

Gjetjet e modelit statistikor janë mbresëlënëse. Real Madridi është ngritur, Barcelona ka rënë dhe disa gjigantë evropianë janë gjetur në një pozicion të papritur e të pasigurt.

Parashikimi e vendos Arsenalin në vendin e parë në fund të tetë ndeshjeve të kësaj faze të ligës. Ekipi i Mikel Artetas, i fortë, i drejtpërdrejtë dhe me një skuadër gjithnjë e më të pjekur, është bërë, sipas Opta-s, ekipi më i besueshëm në kontinent.

Pas tyre, Bayern Munich, pavarësisht humbjes së fundit ndaj Arsenalit, ruan një nivel efektiviteti në Evropë që pak ekipe mund ta arrijnë. Podiumin e plotëson Paris Saint-Germain, i cili duket se ka gjetur një ekuilibër konkurrues nën drejtimin e Luis Enriques dhe parashikimet statistikore të së cilës e forcojnë pozicionin e tyre të tretë.

Real Madridi ngjitet në vendin e katërt

Lajmi i madh për futbollin spanjoll është ngritja e Real Madridit në vendin e katërt në parashikime. Fitorja e tyre në ndeshjen e fundit kundër Olympiacos ka forcuar besimin e superkompjuterit te skuadra e Xabi Alonsos, e cila shfrytëzoi pengesat e rivalëve të drejtpërdrejtë për t'u ngjitur në një hap vendimtar në luftën për tetë vendet e para.

Modeli i superkompjuterit e vendos Interin në vendin e pestë, pavarësisht humbjes së tyre kundër Atletico Madridit, dhe Manchester Cityn në të gjashtin.

Dy vendet e fundit kualifikuese automatike, sipas Opta-s, janë të rezervuara për Chelsean dhe Borussia Dortmundin. Klubi londinez ka bërë një hap të rëndësishëm falë fitores së tyre prestigjioze kundër Barcelonës, ndërsa Dortmundi, i cili mundi Villarrealin, është ngjitur në renditje.

Në vendet e fazës ‘play-off’ gjenden edhe klube si Atletico Madridi në vendin e 10-të, Liverpooli i 11-ti, Barcelona e 12-ta, Napoli i 19-ti, Juventusi i 20-t, Marseille në vendin e 23-të dhe Monaco që zë vendin e fundit për një shans kualifikimi në fazën e 1/8-tës nga faza e eliminimit.

Superkompjuteri parashikon eliminimin e klubeve të njohura si Athletic Bilbao, Benfica, Villarreal dhe Ajax pasi gjenden më poshtë se pozita e 24-të. /Telegrafi/

Janë luajtur dy ndeshjet e para të sonte në raundin e pestëë të Ligës së Kampionëve, ku Pafos i Qipros arriti të marrë një pikë të çmuar ndaj Monacos, ndërsa Copenhagen fitoi ndaj Kairat.

Monaco kaloi i pari në epërsi me një gol të Takumi Minamino në minutën e 5-të, ndërsa Pafos barazoi falë David Luiz, i cili shënoi pas një krosi nga Mislav Orsic.

Epërsinë e Monacos e riktheu Folarin Balogun në minutën e 26-të, duke vendosur rezultatin 2-1 që mbeti për një kohë të gjatë.

Kur duket se Monaco do të fitonte, Sunjic gjuajti me kokë në minutën e 88-të pas një krosi nga Orsic, goditi traversën dhe topi u devijua nga Salisu në rrjetë, duke i dhënë Pafos barazimin 2-2.

Në ndeshjen tjetër, Copenhageni në shtëpi mundi Kairatin 3-2, duke marrë tri pikë të para këtë sezon.

Tani, MonaCo dhe Pafos ndajnë nga gjashtë pikë dhe renditen në vendet 22 dhe 23, ndërsa Copenhageni shkon në vendin e 29 me katër pikë, ndërsa Kairat mbetet i parafundit me vetëm një pikë. /Telegrafi/

Sot (e mërkurë) janë në program për t’u zhvilluar nëntë ndeshjet tjera të xhiros së pestë të fazës së ligës në Ligën e Kampionëve.

Mbrëmja e së martës solli disa ndeshje interesante të Ligës së Kampionëve, por sonte pritet të jetë edhe më zjarr, pasi në program ka ndeshje edhe më të forta.

Përballja që priten me padurim nga tifozët e futbollit, padyshim se është ajo e orës 21:00 në mes të Arsenal-Bayern Munich, të cilat janë lider të tabelës pasi kanë nga katër fitore në katër ndeshjet e para.

Përballja tjetër e fortë pritet të jetë ajo në mes Atletico Madridit dhe Interit, e cila gjithashtu zhvillohet nga ora 21:00 në “Metropolitano”.

Gjatë orës 21:00 fillojnë edhe disa ndeshje tjera interesante sikurse ajo e Liverpoolit me PSV Eindhoven, Real Madridit në udhëtim te Olympiacosi, PSG-Tottenham Hotspur, Eintracht Frankfurt-Atalanta dhe Sporting Lisbona-Club Brugge.

Dy ndeshjet e vetme që luhen nga ora 18:45 janë ato në mes të Copenhagen-Kairat Almany dhe Pafos-Monaco. /Telegrafi/

Ish ylli i Manchester Unitedit, Paul Pogba më në fund regjistroi debutimin e shumëpritur me AS Monaco – por rikthimi i tij në futbollin konkurrues erdhi në një rrethanë aspak ideale, me skuadrën e tij duke humbur 4-0 ndaj Rennes.

Francezi nuk kishte luajtur prej dy vitesh, pas pezullimit katërvjeçar për doping që më pas u reduktua në 18 muaj pas apelimit.

Pas plot 811 ditësh pa futboll zyrtar, Pogba më në fund mund ta quajë veten sërish futbollist aktiv, falë një paraqitjeje të shkurtër prej rreth 10 minutash të shtunën mbrëma.

Gjithsesi, statistikat personale të Pogbas në ato minuta ishin premtuese: ai preku topin 17 herë, kompletoi 14 nga 15 pasimet e tentuara, rikuperoi dy herë topin dhe bëri një ndërprerje.

Pas ndeshjes, Pogba për “RMC Sport” deklaroi se është i zhgënjyer me humbjen, por i lumtur me rikthimin në fushë.

“U zhgënjeva që humbëm këtë ndeshje. Është rikthimi i Paul Pogbas, por unë luaj për Monacon, dhe nuk më pëlqen të humbas”.

“Nga njëra anë isha shumë i lumtur, por nga ana tjetër isha i zhgënjyer me rezultatin dhe atë që bëmë në fushë”.

Pogba u emocionua edhe nga pritja e tifozëve: “Më preku pritja. Të shoh turmën të ngrihet dhe të duartrokasë, nuk e prisja. Një falënderim i madh për tifozët që më mbështetën personalisht”.

“Ndjenja ishte e mirë, doja të sillja energji të mirë, të mos pësonim gol, të kënaqesha – ka kaluar shumë kohë. Jam i lehtësuar që u ktheva të luaj futboll, gjënë që e dua më shumë në botë. Ka ende punë për t’u rikthyer në formë të plotë”, shtoi ai./Telegrafi/

Kapiteni i ekipit kombëtar të futbollit të Francës, Kylian Mbappe, shënoi dy gola të rinj të enjten mbrëma me fanellën e Gjelave, duke e udhëhequr ekipin drejt fitores ndaj Ukrainës në raundin e parafundit të kualifikimeve për Kupën e Botës.

Franca fitoi 4-0 dhe siguroi një vend direkt në Kupën e Botës, dhe me këto dy gola, Mbappe arriti në totalin e 400 golave në karrierën e tij, edhe pse është vetëm 26 vjeç.

Për të qenë të saktë, Mbappe mbushi 26 vjeç e 328 ditë dje, duke tejkaluar Lionel Messin për t'u bërë lojtari i dytë më i ri që shënon 400 gola. Vetëm Pele është përpara tij.

"400 gola nuk i bëjnë përshtypje njerëzve. Nëse dua të jem në atë rreth që bën përshtypje, duhet të shënoj edhe 400 gola të tjerë”.

“Cristiano ka pothuajse 1,000 gola? Është e pabesueshme, por do të përpiqem të arrij të pabesueshmen. Duhet të përpiqem, kam vetëm një karrierë", tha Mbappe pas ndeshjes.

400 golat e tij u shpërndanë gjatë një karriere te Monaco (27 gola), PSG (256 gola), Real Madrid (62 gola) dhe për ekipin kombëtar francez (55 gola). /Telegrafi/

Tifozi i Monacos, Julien Bouron, ka vendosur rekordin botëror për koleksionin më të madh të fanellave origjinale të një klubi të vetëm futbolli, pasi deri më tani ka mbledhur 1,146 fanella.

Bouron së fundmi zbuloi koleksionin e tij të fanellave të Monacos, të cilat janë veshur nga Kylian Mbappe, Thierry Henry, Manuel Amoros, Radamel Falcao dhe Delio Onnis, golashënuesi më i mirë i klubit, ndër të tjerë.

Një nëpunës zyrtar i gjykatës mori pjesë në ekspozitë dhe konfirmoi numrin prej 1,146 fanellash, duke thyer rekordin e mëparshëm botëror të mbajtur nga një tifoz i Liverpulit nga Zvicra.

Bouron tha se pasioni i tij për klubin filloi 25 vjet më parë, kur ai ndoqi për herë të parë një ndeshje midis Monacos dhe Auxerre.

"Ishte viti kur Monaco fitoi titullin e shtatë të ligës franceze. Atë ditë u dashurova, jo me Auxerre, por me Monacon. Dhe që atëherë, nuk kam pushuar së ndjekuri klubin", tha ai për faqen e internetit të klubit.

Ai filloi të krijonte koleksionin kur ish-futbollisti i Monacos, Lucas Bernardi, i dha atij fanellën që ai mbante veshur në sezonin 2006/2007.

Fanella më e vjetër në koleksion është e viteve 1950, e veshur nga mbrojtësi Francois Ludo. /Telegrafi/

E ardhmja e Ansu Fatit pritet të vendoset mes AS Monaco, Barcelonës dhe disa klubeve të Ligës Premier që kanë shprehur interes të fortë për të.

Pas një periudhe të shkëlqyer në Ligue 1 me Monacon, sulmuesi spanjoll ka rikthyer formën e tij më të mirë dhe është bërë një nga emrat më të përfolur të tregut të ardhshëm të transferimeve.

Sipas mediave sportive, Sunderland AFC dhe Aston Villa janë dy skuadrat angleze që kanë shfaqur interes konkret për Fatin.

Të dy klubet e shohin si një mundësi të madhe të afatit kalimtar, veçanërisht nëse Monaco nuk e aktivizon opsionin e blerjes që e lejon ta transferojë për vetëm 11 milionë euro, një shumë e konsiderueshme e ulët duke parë nivelin e lojtarit.

Megjithatë, drejtuesit e klubit francez ende nuk kanë marrë një vendim përfundimtar.

Nga ana tjetër, Barcelona mbetet pjesë e rëndësishme e ekuacionit. Klubi katalanas ka ruajtur një klauzolë riblerjeje prej 28 milionë eurosh, e cila i mundëson ta rikthejë lojtarin në Camp Nou nëse Monaco vendos ta blejë.

Në Barcelonë po ndjekin me vëmendje ecurinë e Fatit dhe nuk përjashtohet mundësia që, nëse ai vazhdon me këtë ritëm, të aktivizojnë këtë klauzolë për ta rishitur më vonë me fitim.

Pas disa sezonesh të vështira të mbushura me dëmtime dhe pak minuta në fushë, Ansu Fati duket se ka gjetur stabilitetin dhe besimin e munguar.

Paraqitjet e tij me Monacon kanë rikthyer kujtimet e talentit të jashtëzakonshëm që spikati në hapat e parë me Barcelonën.

Në rast se Monaco nuk e bën të vetin, kalimi në Ligën Premier shihet si një mundësi shumë reale.

Aston Villa kërkon përforcime cilësore për të luftuar për zonën evropiane, ndërsa Sunderland e sheh Fatin si lojtarin ideal për të udhëhequr një projekt ambicioz në elitën e futbollit anglez.

Pavarësisht se cili do të jetë destinacioni i radhës, një gjë është e qartë: Ansu Fati ka rifituar formën dhe besimin, duke rikthyer emrin e tij në qendër të vëmendjes së futbollit evropian. /Telegrafi/

Kthimi i shumëpritur i mesfushorit Paul Pogba është shtyrë edhe një herë, pasi 32-vjeçari ka pësuar një dëmtim në kyçin e këmbës gjatë stërvitjes së së enjtes, duke e bërë pothuajse të pamundur paraqitjen e tij para pushimit të ndeshjeve ndërkombëtare të nëntorit.

Trajneri i Monacos, Sebastien Pocognoli, kishte ngjallur shpresa të mëdha të mërkurën në mbrëmje, kur konfirmoi se francezi mund të përfshihej në listën e skuadrës për ndeshjen e së shtunës kundër Paris FC, çka do të shënonte fundin e një mungese 26-mujore që nga paraqitja e tij e fundit me Juventusin në shtator 2023.

Por, lëndimi i fundit e ka rrëzuar sërish atë skenar.

Paul Pogba

Pogba, i cili firmosi me Monacon në qershor për dy vite, po ndiqte një program tre-mujor rikuperimi fizik, ndërsa një dëmtim i mëparshëm e kishte penguar debutimin e planifikuar kundër Angers.

“Po presim konfirmimin për shkallën e dëmtimit, por shpresojmë që mungesa të mos zgjasë më shumë se dy javë,” deklaroi Pocognoli, duke theksuar se synimi është që kampioni i botës të jetë gati për sfidën ndaj Rennes më 22 nëntor.

“Jemi të gjithë të zhgënjyer,” pranoi trajneri, ndërsa kapitulli i Pogbas te Monaco mbetet ende në pritje për t’u shkruar.

Pogba përndryshe ka deklaruar në të kaluarën se është i etur për t’u kthyer sa më parë në fushë dhe t’iu dëshmojë të gjithëve se ende është lojtar i klasit botëror./Telegrafi/

Sot (e mërkurë) janë në program për t’u zhvilluar gjithsej nëntë ndeshje në kuadër të xhiros së tretë të fazës së ligës në Ligën e Kampionëve.

Pas emocioneve dhe ndeshjeve të zjarrta gjatë të martës mbrëma, tani radhën e ka dita e sotme me pritshmëri të njëjta.

Vëmendja më e madhe padyshim se është te kryendeshja e kësaj xhiros mes Real Madridit dhe Juventusit, e cila pritet të zhvillohet në “Santiago Bernabeu” nga ora 21:00.

Në të njëjtin orar, Liverpooli luan në udhëtim te Eintracht Frankfurt, Bayern Munichu e pret Club Brugge, ndërsa Chelsea është nikoqir i Ajaxit.

Nga ora 21:00 luajnë edhe ndeshjet mes Atalanta-Slavia Praga, Monaco-Tottenham dhe Sporting Lisbona-Marseille.

Dy ndeshjet e vetme të parapara nga ora 18:45 janë ato mes Athletic Bilbao-Qarabag dhe Galatasaray-Bodo/Glimt. /Telegrafi/

Ish-trajneri i Borussia Dortmund, Edin Terzic, nuk ka ndërmend të rikthehet me ngut në stolin e ndonjë skuadre, duke marrë kohën e nevojshme për të zgjedhur me kujdes hapin e radhës në karrierën e tij.

Sipas raportimeve nga SkySports, Terzic ka refuzuar tre oferta konkrete nga klube të huaja gjatë muajve të fundit.

Bëhet fjalë për interes serioz nga AS Monaco, Everton dhe Real Sociedad, por Terzic i ka refuzuar të gjitha, pasi, ai nuk është bindur nga projektet sportive që i janë paraqitur.

Që nga largimi nga Dortmund në verën e vitit 2024, Terzic është pa ekip, por qëndron aktiv në vlerësimin e mundësive të reja.

Ai vijon të jetë në listën e ngushtë të Juventusit, në rast se klubi italian vendos të shkarkojë trajnerin aktual, Igor Tudor.

Emri i Terzic përmendet së bashku me atë të Marco Rose si kandidatë potencialë për stolin bardhezi.

Një rikthim në Bundesliga nuk përjashtohet gjithashtu, thuhet se Bayer Leverkusen e kishte konsideruar Terzic si pasues të mundshëm të Erik ten Hag më herët këtë sezon, përpara se të vendoste të emëronte Kasper Hjulmand në krye të skuadrës.

Për momentin, Terzic po qëndron në pritje të një projekti që përputhet me ambiciet e tij, ndërsa mbetet një nga emrat më të vlerësuar në tregun e trajnerëve evropianë. /Telegrafi/

Monaco dhe Manchester City kanë barazuar me rezultat 2-2 në xhiron e dytë të fazës së grupeve në Ligën e Kampionëve.

Që nga fillimi, anglezët treguan forcën e tyre. Në minutën e 15-të, Erling Haaland u gjend në vendin e duhur pas një harkimi perfekt nga Josko Gvardiol.

Sulmuesi norvegjez e ndali topin me një prekje të shkëlqyer dhe më pas goditi fuqishëm nën shtyllë, duke e çuar rezultatin në 1-0.

Monaco reagoi shpejt dhe në minutën e 18-të, pas një kombinimi të bukur me Krepin Diatta, mbrojtësi Jordan Teze lëshoi një goditje të fuqishme nga distanca, duke e dërguar topin në cepin e epërm të majtë dhe duke barazuar shifrat në 1-1.

Në pjesën e parë, Man City vazhdoi të kërkonte avantazhin. Phil Foden goditi traversën në minutën e 33-të, ndërsa disa minuta më vonë Nico O’Reilly dhe Tijjani Reijnders u ndalën nga pritjet e shkëlqyera të portierit Philipp Kohn.

Megjithatë, në minutën e 44-të, përsëri ishte Erling Haaland që u ngjit mbi mbrojtjen e Monacos për të shënuar golin e dytë personal dhe të Man Cityt. Një goditje me kokë pas një harkimi të bukur, që pasi u përplas në tokë u fut në rrjetë, i dha epërsinë 2-1 skuadrës së Pep Guardiolës.

Në pjesën e dytë, "Qytetarët" pati mundësinë të thellonte rezultatin. Në minutën e 73-të, Reijnders shpërdoroi një rast ideal, duke goditur traversën me portën e boshatisur. .

Monaco në fund fitoi penallti. Eric Dier mori përgjegjësinë, duke mashtruan portierin italian dhe realizoi saktë në krahun e djathtë, duke e çuar rezultatin në 2-2.

Tani Man City kanë 4 pikë, ndërsa Monaco ka 1 pikë. /Telegrafi/

Kylian Mbappe ka shkruar një tjetër faqe të artë në historinë e Ligës së Kampionëve, me sulmuesin e Real Madridit që është bërë futbollisti i tretë më i shpejtë që arrin kuotën e 60 golave në garën më prestigjioz evropian.

Francezit iu deshën vetëm 89 ndeshje për ta realizuar këtë arritje, duke lënë pas legjenda si Cristiano Ronaldo, Karim Benzema dhe Raul Gonzalez, të cilët kishin nevojë për më shumë paraqitje për të shkuar në këtë shifër.

Real Madridi shënoi një fitore bindëse si mysafir kundër Kairat në Kazakistan, me rezultat 5-0, ku Mbappe shkëlqeu me një het-trik.

Kylian Mbappe, sulmues i Real Madridit

Në këtë statistikë të veçantë, përpara tij qëndrojnë vetëm Robert Lewandowski dhe Lionel Messi, që arritën 60 golat në më pak ndeshje.

Aktualisht, Mbappe renditet i gjashti në listën e golashënuesve më të mirë në historinë e Ligës së Kampionëve.

Golat e tij janë të shpërndarë kështu:

• 6 gola me Monacon
• 42 gola me Paris Saint-Germain
• 12 gola në vetëm 16 ndeshje me Real Madridin

Me këtë ritëm, ylli francez duket i destinuar të ngjitet edhe më lart në listën e sulmuesve më të mëdhenj të Ligës së Kampionëve. /Telegrafi/

Është zbuluar arsyeja pse mesfushori Paul Pogba nuk ka luajtur ende pavarësisht rikthimit të tij në futboll tre muaj më parë.

32-vjeçari fillimisht u pezullua për katër vjet pasi rezultoi pozitiv për DHEA - një përbërës që nxit prodhimin e hormoneve në trup, përfshirë testosteronin.

Megjithatë, mesfushori francez pa pezullimin e tij të reduktohej në 18 muaj pas një apelimi të suksesshëm.

Pasi ndalimi i tij mbaroi, Pogba nënshkroi për klubin e Ligue 1, Monaco, në muajin qershor.

Megjithatë, ish-ylli i Manchester United dhe Juventus ende nuk ka dalë në fushë për klubin e tij të ri, pavarësisht se sezoni 25/26 ka filluar tash e sa kohë.

"Ne presim një proces tremujor. Sporti i nivelit të lartë ka shumë të bëjë me shkencën dhe nuk është i lehtë. Monaco është një nga ekipet më intensive në Ligue 1 dhe luan me një stil që kërkon që ai të jetë në formë të mirë", ka thënë në korrik, Drejtori i Përgjithshëm i Monacos, Thiago Scuro.

Tani, trajneri i Monacos, Adi Hutter, ka deklaruar se Pogba po i afrohet gjithnjë e më shumë formës së plotë fizike dhe po ia del mirë me planet stërvitore që i janë dhënë nga klubi.

Gjithashtu është përmendur se Pogba nuk do të rikthehet me nxitim në fushë pavarësisht një krize të vazhdueshme lëndimesh.

“Nuk mund ta krahasojmë situatën e Paul Pogbas [me atë të Ansu Fatit]. Fati është shumë më i ri se Paul. Ansu ka qenë duke u stërvitur për një kohë të gjatë. Sot, Paul po përdoret gjithnjë e më shumë”, ka thënë fillimisht Hutter.

"Jemi në procesin tonë. I kemi dhënë vetes tre muaj. Ai po i afrohet grupit. Është mirë fizikisht dhe mendërisht. Është një konsideratë. Me të lënduarit, e shqyrtojmë këtë, por nuk ka kuptim të sjellim dikë vetëm për të thënë se e kemi dikë”, përfundoi trajneri i Monacos.

Më parë është pohuar se Pogba mund të bëjë rikthimin e tij të shumëpritur në fushë pas pushimit ndërkombëtar të tetorit. /Telegrafi/

Ansu Fati ka lënë gjurmën e tij të parë te Monaco – dhe e bëri këtë me shumë stil në përballjen ndaj Metz.

I huazuar nga Barcelona, sulmuesi spanjoll hyri nga stoli në pjesën e dytë dhe brenda pak minutash shënoi dy herë, duke vulosur fitoren 5-2 të skuadrës franceze.

Nuk ishin vetëm golat që tërhoqën vëmendjen, por edhe reagimet pas ndeshjes. Paul Pogba, i entuziazmuar nga ndikimi i menjëhershëm i Fatit, u shpreh plot humor se e dinte që do të shënonte dy herë.

“Vëlla, e thashë. E dija që do të vije në pjesën e dytë dhe do të shënoje dy gola. Pyete atë çfarë thashë. E dija vëlla!”, tha mes të qeshurash mesfushori francez.

Dygolëshi i Fatit ishte një vulë e fortë pas periudhës së gjatë të vështirësive me lëndime dhe mungesës së minutave. Ai tregoi sërish instinktin e tij të mprehtë sulmues dhe aftësinë klinike përpara portës.

Tifozët e Monacos, të impresionuar që nga debutimi i tij, tashmë kanë arsye edhe më të mëdha për entuziazëm. Me dy golat e parë dhe mbështetjen e një lojtari si Pogba, Fati duket se po nis një kapitull të ri dhe premtues në Ligue 1. /Telegrafi/

Ansu Fati nuk humbi kohë për të lënë gjurmë te AS Monaco, duke filluar të kthehet në lojtar të rëndësishëm te klubi francez.

Vetëm disa ditë pas debutimit të tij me gol në Ligën e Kampionëve kundër Club Brugge, lojtari i huazuar nga Barcelona gjeti rrjetën 34 sekonda pasi hyri në pjesën e dytë të ndeshjes ndaj Metz, duke barazuar rezultatin në 2-1.

Goli ishte tipik për Fatin: lëvizje të shpejta dhe vendim të mençur. I asistuar nga Lamine Camara, Fati goditi menjëherë, duke treguar për tifozët e Monacos potencialin sulmues që mund të sjellë. Koha e shënimit të golit — më e shpejta pas hyrjes në fushë — e bëri golin edhe më emocionues, dhe ishte vetëm goli i tij i dytë për klubin, pasi në debutimin e tij evropian kishte thyer një mungesë golash prej 679 ditësh.

Goli i dytë erdhi nga një harkim i Krepin Diatta, të cilin Fati e shënoi me kokë për 3-2, duke e dërguar ekipin e tij drejt fitores që në fund erdhi me rezultat 5-2.

Goli i tij në Ligën e Kampionëve kishte një rëndësi personale, duke ardhur në kohën shtesë të humbjes 4-1 ndaj Club Brugge. Fati kishte luftuar me lëndime dhe me formë të paqëndrueshme gjatë sezoneve të fundit, dhe debutimi i tij me gol ofroi një aluzion se ai mund të rifitojë shkëlqimin e hershëm të karrierës që e bëri një yll te Barcelona.

Tani, në Ligue 1, Fati po e përforcon këtë premtim. Goli pothuajse menjëherë pasi hyri në fushë tregon se ai është i mprehtë, i sigurt dhe gati të jetë një opsion kyç sulmues për Monacon këtë sezon.

Tifozët mund të shpresojnë se ky është vetëm fillimi i një serie suksesesh, ndërsa Fati synon të lërë gjurmë në garat vendase dhe evropiane. /Telegrafi/