TIRANË, 16 janar/ATSH/ Në ambientet e Pallatit të Sportit “Farie Hoti” në Tiranë, u zhvillua ceremonia hapëse e kampionatit universitar në volejboll, organizuar nga Federata Shqiptare e Sportit Universitar (FSHSU).
Në aktivitet u mblodhën qindra studentë nga universitete të ndryshme të vendit.
Ministri i Turizmit, Kulturës dhe Sportit, Blendi Gonxhja tha se në kampionat marrin pjesë 30 universitete nga e gjithë Shqipëria, me rreth 800 studentë pjesëmarrës, të angazhuar në ekipet respektive.
Sipas tij, kjo garë promovon talentin e studentëve, fair-play dhe bashkëpunimin ndëruniversitar.
Ndeshjet hapëse u karakterizuan nga garë e fortë, respekt dhe pasion për sportin.
Ky kampionat synon promovimin e jetesës aktive tek të rinjtë, forcimin e marrëdhënieve ndëruniversitare dhe fuqizimin e sportit si një komponent i rëndësishëm i edukimit universitar.
TIRANË, 15 janar /ATSH/ Kryeministri Edi Rama mori pjesë sot në Konferencën e Rektorëve, ku zhvilloi një bisedë të hapur me 40 rektorë të universiteteve publike dhe private mbi cilësinë e arsimit të lartë dhe kërkimit shkencor në vend.
Në fjalën e tij, Kryeministri u ndal te çështja e akreditimeve, duke theksuar se kjo temë është ngritur në mënyrë të përsëritur në takimet e përbashkëta me strukturat përgjegjëse.
Rama theksoi se ambicia e qeverisë është kalimi i Agjencisë së Akreditimit në një nivel më të lartë funksionimi, përmes integrimit të saj në Rrjetin Europian për Sigurimin e Cilësisë në Arsimin e Lartë (ENQA), si dhe rritjes së kapaciteteve institucionale për përshpejtimin e procesit të akreditimit.
Kryeministri foli gjithashtu për investimet në infrastrukturën universitare, duke vlerësuar se janë bërë ndryshime dhe investime të rëndësishme, të cilat janë përfunduar ose janë në proces.
Megjithatë, ai theksoi se, “jemi akoma larg përmbushjes së kushteve infrastrukturore të nevojshme për të përballuar sfidat dhe nevojat”.
Rama bëri të ditur se përparësi mbetet zhvillimi i kampuseve universitare, përfshirë kampusin e madh të Tiranës, si dhe procesin e hapur për ndërtimin e kampusit të Universitetit “Aleksandër Moisiu” në Durrës.
Sipas tij, interesi i shprehur nga rreth 40 studio ndërkombëtare dëshmon potencialin e madh për krijimin e një infrastrukture moderne, që përfshin edhe rezidenca studentore.
“Unë besoj shumë tek godinat dhe kemi dy kampuse përpara, Kampusin e madh të Tiranës. Ndërkohë kemi hapur procesin për Kampusin e Universitetit ‘Aleksandër Moisiu’. Kemi pasur një interes jo të vogël nga rreth 40 studio ndërkombëtare. Ka një potencial shumë të madh për të krijuar edhe infrastrukturë qëndrimi, rezidence të studentëve”, tha Rama.
Kryeministri theksoi se do të jetë më e lehtë që studentët që studiojnë në Tiranë të akomodohen në kampusin e Durrësit me funksionalizimin e shërbimit hekurudhor.
“Duke pasur parasysh trenin që do të jetë në funksion së shpejti, do të jetë absolutisht shumë e thjeshtë që studentë në Tiranë të kenë mundësi të strehohen në kampusin e Durrësit”, u shpreh Rama.
Ai njoftoi se qeveria synon ndërtimin e një kompleksi rezidencial studentor bashkëkohor, me qëllim lehtësimin e një prej problemeve kryesore të studentëve, kostot e larta të qirave në Tiranë dhe Durrës.
“Për këtë arsye ne do të ndërtojmë një kompleks studentor rezidencial shumë të mirë, në mënyrë që të ndihmojë në zgjidhjen dhe të një problemi të madh që kanë studentët për shkak të çmimeve që kanë qiratë në Tiranë dhe në Durrës”, theksoi Kryeministri.
Në përfundim, Rama u shpreh se arsimi i lartë ndodhet në një moment të ri ndryshimi, i mbështetur tashmë në një bazë dhe eksperiencë të konsoliduar.
Rama u shpreh se, sot ka më shumë qartësi brenda universiteteve dhe strukturave drejtuese për atë që funksionon dhe për atë që duhet përmirësuar, ndërsa bashkëpunimet dhe programet e përbashkëta kanë rritur ndjeshëm njohjen dhe kuptimin e standardeve europiane dhe mënyrës së adresimit të nevojave të sistemit universitar.
TIRANË, 15 janar /ATSH/ Kryeministri Edi Rama mori pjesë sot në Konferencën e Rektorëve, ku zhvilloi një bisedë të hapur me 40 rektorë të universiteteve publike dhe private mbi cilësinë e arsimit të lartë dhe kërkimit shkencor në vend.
Në fjalën e tij, Kryeministri theksoi se sfida e përbashkët dhe themelore e sistemit universitar shqiptar mbetet, nga njëra anë, ndërkombëtarizimi i universiteteve dhe, nga ana tjetër, racionalizimi i burimeve dhe potencialeve.
Ai nënvizoi se në vitet e fundit ka ndodhur një ndryshim i rëndësishëm në qasjen ndaj financimit të arsimit të lartë, duke kaluar nga varësia e plotë ndaj buxhetit të shtetit drejt një modeli më të hapur dhe konkurrues.
Rama solli si shembull Universitetin e Tiranës, i cili, sipas tij, kryeson një grup universitetesh që kanë rritur ndjeshëm kapacitetet financiare jashtë buxhetit shtetëror, përmes projekteve dhe partneriteteve europiane.
Kjo, theksoi Kryeministri, ka mundësuar ndërtimin e skuadrave kërkimore, rritjen e bashkëpunimit ndërkombëtar dhe përfitimin nga fondet e Bashkimit Europian, duke sjellë një situatë të re edhe në rritjen e të ardhurave për pedagogët më aktivë.
“Sot Universiteti i Tiranës është në krye të një vargu universitetesh që e kanë rritur kapacitetin e tyre financues jashtë buxhetit të shtetit, duke faktikisht qenë në gjendje të ndërtojnë skuadra dhe të ndërtojnë projekte apo partneritete europiane dhe duke përfituar nga fondet europiane. Diçka që sigurisht ka rritur të ardhurat e pedagogëve më aktivë dhe patjetër që ka krijuar një situatë të re”, tha Rama.
Ai propozoi që në një takim të ardhshëm të zhvillohet një diskutim i hapur mbi këtë proces, me pjesëmarrjen e të gjithë rektorëve, përfshirë edhe ata të universiteteve private, me qëllim riorganizimin e sistemit universitar në një strukturë më kompetitive, më të besueshme dhe më të përgatitur për sfidat që sjell anëtarësimi i Shqipërisë në Bashkimin Europian.
Kryeministri e cilësoi universitetin si aleatin më të rëndësishëm të institucioneve dhe të vendit në tërësi në këtë proces, duke theksuar se vëllimi i financimit dhe i projekteve të miratuara nga BE për Universitetin e Tiranës rritet nga viti në vit.
Ai nënvizoi se në garën europiane nuk ka trajtim preferencial për vendet joanëtare, por vlerësim të barabartë mbi bazën e meritës.
“Atje nuk të jep njeri bonus se ti vjen nga një vend që akoma nuk është i ambientuar. Atje vlerësohen të gjithë me të njëjtin kandar. Dhe në atë kandar pedagogët e Universitet të Tiranës, ata të cilët kanë hyrë në këtë proces vlerësohen në mënyrë të barabartë me pedagogët e universiteteve më të mëdha të Europës. Na duhet që ta vlerësojmë më shumë këtë kapacitet dhe ta vendosim në kushtet që të jetë më efikas në territor”, tha Rama. /j.p/
Ministrja e Arsimit Mirela Kumbaro mori pjesë në Konferencën e Rektorëve, në mbledhjen e saj të parë për vitin 2026, e cila u përshëndet edhe nga kryeministri Edi Rama. Në fjalën e saj, ministrja Kumbaro njoftoi se janë miratuar grantet për IAL-të publike përmes vendimit të bordit të Agjencisë Kombëtare të Financimit të Arsimit të Lartë, por duke kërkuar edhe një raport më transparent për sa i përket mënyrës se si menaxhohen këto fonde.
“Është një mbështetje prej rreth 11,2 miliardë lekë, ose 115 milionë euro, si grant për mësimdhënien, që ndahet në Fond Institucional dhe Fond për Mbështetjen Studentore duke mbështetur me paga rreth 5,800 personel akademik dhe administrative në 14 universitetet publike dhe mbi 12,000 studentë ekselentë apo me nevoja sociale, përmes skemës së bursave. Por po shfrytëzoj këtë komunikim, për të nisur edhe një marrëdhënie të re në formën si komunikojmë dhe shkëmbejmë informacion, pasi Ministria e Arsimit, duhet të dijë saktësisht se sa fonde trashëgoni, në mënyrë që të kemi një shpërndarje më të drejtë. Nga ana tjetër, përmes Agjencisë Kombëtare të Kërkimit Shkencor, qeveria vë në dispozicion 7 milionë euro për kërkim shkencor dhe për infrastrukturë shkencore”, tha ministrja Kumbaro.
Më tej, gjatë fjalës së saj, u ndal tek problematikat lidhur me kërkimin shkencor.
“Në të dhënat që kam marrë në tre vitet e fundit, mes projekteve të miratuara dhe projekteve të realizuara përmes mbështetjes së AKKSHI ku ju ftoheni të aplikoni, kemi një hendek shumë të madh. Norma e realizimit të projekteve është shumë e ulët. Kjo na shtyn që nga ana jonë të gjejmë mënyra të tjera më efikase, në përputhje edhe me praktikat më të mira që kemi hulumtuar në Bashkimin Europian, të shpërndarjes së buxhetit; gjithashtu duke përfshirë edhe mekanizma si angazhimi shumëvjeçar i fondeve për projekte dhe pajisje duke mos mbetur peng i vitit fiskal – pasi universitetet funksionojnë me vit akademik; mundësi transferimi të fondeve nga një vit në tjetrin dhe auditim të bazuar në risk dhe justifikim shkencor. Pasi shpesh herë na rezulton që edhe vetë nga IAL-të, për shkak të vonesave burokratike, bllokohen proceset duke kryer investime kërkimore të fragmentarizuara. Dhe nga ana tjetër, do të duhet të kemi një ristrukturim të Agjencisë së Kërkimit Shkencor dhe Inovacionit, për t’u përgjigjur trendeve të reja. Shqipëria po përgatitet në mënyrë të qëndrueshme për procesin e integrimit në Bashkimin Europian, duke u fokusuar fort te ndërkombëtarizimi i universiteteve dhe përfshirja e tyre në projekte dhe rrjete akademike europiane. Kapitulli 25 dhe 26 që drejtohen nga Ministria e Arsimit kanë një avancim shumë të kënaqshëm dhe mendojmë se do jenë kapitujt e parë që do të mbyllen! Në këtë kontekst, kërkimi shkencor duhet të ecë me hapin e kohës, të jetë konkurrues, i orientuar drejt inovacionit dhe i lidhur ngushtë me nevojat e tregut dhe sfidat bashkëkohore prandaj këtu e shohim njëri-tjetrin në të njëjtën barkë! Vetëm kështu, institucionet e arsimit të lartë mund të kontribuojnë realisht në zhvillimin ekonomik, social dhe teknologjik të vendit”, vijoi ministrja.
Gjithashtu, gjatë fjalës, ministrja e Arsimit Mirela Kumbaro kërkoi nga universitetet që të jenë një zë aktiv në ligjin e ri për arsimin e lartë, në mënyrë që të reflektojë një realitet të përmirësuar për të gjithë aktorët.
“Kam pritur dhe ende pres opinionet tuaja, duke nisur një proces jo nga lart – poshtë, pra jo nga aparati administrativ i Ministrisë dhe më pas t’ju vijë si produkt i gatshëm, por përkundrazi, të jeni ju që jepni inputin e parë në ndryshimet që ju mendoni se duhen bërë për të përmirësuar jetën dhe përvojën e të gjithë aktorëve”, u shpreh ministrja Kumbaro.
Në Konferencen e Rektorëve ishin pjesëmarrës 40 rektorë të universiteteve publike dhe jopublike, kryesuar nga Rektori i Universitetit të Tiranës Prof. Dr. Artan Hoxha.
Rama: Nuk jemi takuar këtë vit, ndaj ju uroj një vit sa më të mbarë. Dua të prek disa pika që në këndvështrimin tim janë me rëndësi. Duke vlerësuar sinqerisht bashkëpunimin që kemi ndërtuar dhe vijimësinë e komunikimit në një rruga sa institucionale aq edhe të hapur informale, gjë që n aka dhënë mundësinë të jemi në kontakt me njëri tjetrin dhe të kuptojmë më shumë është koha për të rivizituar ligjin e arsimit të lartë. Ka kaluar një periudhë e mjaftueshme për të reflektuar ndryshimet që ka sjell koha. Fatmirësisht kemi një praktikë të mirë, ligji aktual është shkruar në bashkëpunim me ju me kontributin tuaj ndaj ky do të jetë rasti përsëri. Shpresoj dhe besoj ë edhe për shkak të eksperiencën edhe për shkak se këtë herë bëhet fjalë për korrektime do të jetë e mundur ta bëjmë këtë në një kohë të arsyeshme dhe nuk do presim sesionin tjetër të parlamentit për bazën e ndryshimeve. Me rëndësi është të organizohemi me një grup pune për të shkruar ndryshimet.
E dyta, është edhe thelbi i ndërhyrjes time këtu. Nuk duhet të humbasim për asnjë moment nga vëmendja se sfida jonë e përbashkët është nga një anë ndërkombëtarizimi I Universitetit, dhe nga ana tjetër racionalizimi i burimeve dhe potencialeve. Ka ndodhur një ndryshim I rëndësishëm në qasjen e universitetit ndaj financimit që do të thotë deri dje gjithcka ishte e lidhur me buxhetin e shtetit, sot Universiteti i Tiranës ka rritur kapacatetin financues jashtë buxhetit të shtetit duke qenë në gjendje të ndërtojnë skuadra dhe të ndërtojnë projekte europiane dhe duke përfituar nga fondet europiane. Ka rritur të ardhurat e pedagogëve më aktive, ka krijuar një situatë të re. do të doja që në takimine ardhshëm ne të mblidheshim për të diskutuar hapur këtë proces dhe me lejen tuaj do doja të ftonim të gjithë rektorët edhe të universiteteve private
Kryeministri Edi Rama në tryezën me 40 rektorët e universiteteve publike dhe private, tha se do të ngrihet një grup pune për të konstatuar dhe hartuar ndryshimet e nevojshme, me synimin që baza e tyre të përfundojë brenda këtij sesioni parlamentar. Kryeministri njoftoi gjithashtu ngritjen e kampusit të madh të Tiranës dhe hapjen e procesit për kampusin e Universitetit “Aleksandër Moisiu” në…
Vetëm 66.92% e totalit të kuotave të ofruara nga universitetet në Shqipëri janë plotësuar me studentë për vitin akademik 2024–2025. Të dhënat nga Qendra e Shërbimeve Arsimore (QSHA) dhe tregojnë se mbi 10 mijë vende studimi kanë mbetur bosh në rang kombëtar. Sipas raportit, universitetet publike dhe private kanë ofruar gjithsej 32 177 kuota, ndërsa […]
Perceptimi mbi korrupsionin dhe integritetin akademik në arsimin e lartë publik mbetet në nivele alarmante edhe për vitin 2025. Të dhënat e bëra publike të martën nga organizata “Qëndresa Qytetare”, gjatë prezantimit të raportit të monitorimit të bazuar në anketime me 750 studentë nga tetë universitetet kryesore publike në vend, tregojnë se shumica dërrmuese e […]
Shkalla e regjistrimit të studentëve të huaj në universitetet amerikane ka rënë me 17% këtë vjeshtë krahasuar me vitet e mëparshme, sipas një studimi të publikuar të hënën. BBC shkruan se, rënia vjen ndërsa administrata Trump e ka bërë më të vështirë marrjen e vizave studentore, me studimin që sugjeron se problemet me aplikimet për viza, si […]
Nga Jona Cenameri – Më 13 tetor 2025, nënkryetari i Partisë Demokratike, Luçiano Boçi, doli me një deklaratë publike ku denonconte gjendjen e arsimit të lartë në vend.
Sipas tij, “asnjë universitet publik shqiptar nuk figuron në renditjen ndërkombëtare World University Rankings 2026, të Times Higher Education (THE), Universiteti i Tiranës ka status ‘Reporter’; ndërsa universitetet e rajonit janë të renditura, si për shembull Universiteti i Prishtinës, që ndodhet ‘në vendin e 518-të”.
Boçi argumenton se kjo situatë “vjen nga politizimi i institucioneve, emërimet partiake, mungesa e kërkimit shkencor dhe financimeve transparente, si edhe ndërhyrjet e qeverisë që kanë cënuar autonominë universitare”.
Por sa e vërtetë është kjo deklaratë dhe çfarë tregon kjo renditje?
Çfarë është THE dhe si funksionon renditja ?
Times Higher Education (THE) është një organizatë britanike e specializuar në analizën dhe klasifikimin global të universiteteve kërkimore. Çdo vit, ajo publikon World University Rankings (WUR), që për vitin akademik 2026 përfshiu 2,191 universitete nga 115 vende dhe është publikuar më 9 tetor 2025.
Renditja bazohet në 18 tregues të ndarë në pesë fusha: mësimdhënie, mjedis kërkimor, cilësi kërkimi, perspektivë ndërkombëtare dhe lidhje me industrinë.
Kriteret
Për t’u renditur në World University Rankings të Times Higher Education, një universitet duhet të përmbushë 7 kritere bazë:
Të ketë aktivitet të provuar kërkimor, më shumë se 1,000 publikime gjatë 5 viteve të fundit dhe të paktën 100 publikime në secilin vit.
Të japë mësim në nivelin bachelor. Institucionet që ofrojnë vetëm studime pasuniversitare (postgraduate-only) përjashtohen.
Të mos jetë i fokusuar vetëm në një fushë studimore, më pak se 80% e prodhimit kërkimor duhet të vijë nga një subjekt i vetëm.
Të ketë dorëzuar të dhëna të përgjithshme për vitin e vlerësimit, që përfshijnë: staf, studentë, të ardhura, publikime dhe të dhëna të tjera institucionale.
Të mos mungojnë më shumë se dy nga vlerat thelbësore (si stafi akademik, studentët ndërkombëtarë, të ardhurat kërkimore, etj.). Nëse mungojnë më shumë se dy, institucioni përjashtohet nga renditja.
Të ketë të paktën një fushë akademike të raportuar, nëse nuk është raportuar asnjë, institucioni përjashtohet.
Të mos jetë në listën e përjashtimeve të personalizuara, që përfshin universitetet që kanë refuzuar të marrin pjesë në renditje ose nuk janë të përshtatshme për arsye të tjera institucionale.
Vetëm universitetet që përmbushin të shtatë kriteret përfshihen në renditjen botërore.
Ndërsa ato që kanë plotësuar vetëm kriteret 4, 6 dhe 7, por jo të gjitha kriteret e tjera të mbetura, nuk përfshihen në renditjen me pikë.
Këto institucione renditen me statusin “Reporter”, që do të thotë se kanë marrë pjesë duke dorëzuar të dhëna, por nuk janë vlerësuar me pikë apo pozicion për shkak të mungesës së disa treguesve kryesorë.
Ky status nuk nënkupton performancë të dobët akademike, por sinjalizon që universiteti nuk ka dorëzuar ose nuk ka pasur mjaftueshëm të dhëna për matjen e plotë, sidomos në aspektin e kërkimit shkencor, citimeve dhe të ardhurave kërkimore.
Shpesh, “Reporter” konsiderohet si një fazë tranzitore për institucionet që po hyjnë në sistemin global të vlerësimit dhe përgatiten për përfshirje të plotë në edicionet e ardhshme.
Shqipëria në renditjen e THE 2026
Sipas faqes zyrtare “Study in Albania” në portalin e Times Higher Education, 5 universitete shqiptare janë pjesë e edicionit të vitit 2026, të gjitha me status Reporter:
Universiteti i Tiranës, Universiteti “Aleksandër Moisiu”, European University of Tirana, Polis University dhe Western Balkans University. Asnjë prej tyre nuk ka numër renditjeje ose numër pikësh në tabelën kryesore.
Nga arkivi i renditjeve të mëparshme të THE viti qe vjen 2026 figuron si hyrja e parë e verifikueshme e Universitetit të Tiranës në klasifikim, si Reporter.
Burime zyrtare pranë Rektoratit të Universitetit të Tiranës (pa dashur të citohen me emër) i thanë “Faktoje” se institucioni është ftuar nga Times Higher Education për të marrë pjesë në proces, por ende nuk i ka dorëzuar të gjitha dokumentat e nevojshme për renditjen.
Faktoje i është drejtuar zyrtarisht rektoratit me një kërkesë për informacion mbi këtë çështje, por deri në publikimin e këtij shkrimi nuk ka marrë përgjigje.
Fqinjët ballkanas
Në rajonin e Ballkanit Perëndimor, një pjesë e universiteteve publike janë përfshirë në renditjen e plotë të THE me intervale renditjeje, ndërsa disa të tjera mbajnë statusin Reporter, ashtu si Shqipëria.
Në Serbi, Universiteti i Beogradit renditet në intervalin 1001-1200th, ndërsa Universiteti i Novi Sadit në 1501+. Në Maqedoninë e Veriut, Universiteti i “Shën Kirilit dhe Metodit” në Shkup renditet në 1501+, ndërsa Universiteti i “Shën Klimentit i Ohrit” në Manastir dhe Universiteti i Evropës Juglindore në Tetovë kanë statusin Reporter.
Në Mal të Zi, Universiteti i Podgoricës figuron në renditjen 1501+. Në Bosnjë-Hercegovinë, Universiteti i Sarajevës ka të njëjtën renditje 1501+. Në Kosovë, Universiteti i Prishtinës shfaqet me renditjen 1501+, dhe jo në “vendin e 518-të”, siç u tha në deklaratën e deputetit Boçi.
Në Shqipëri, të gjitha universitetet e listuara në WUR 2026 mbeten në statusin Reporter, pra pjesëmarrëse, por jo të klasifikuara me renditje numerike.
Statusi “Reporter”
Statusi “Reporter” tregon që universitetet shqiptare kanë nisur pjesëmarrjen në sistemin ndërkombëtar të vlerësimit, por ende nuk plotësojnë kriteret e plota.
Arsyet më të zakonshme lidhen me mungesën e prodhimit shkencor të mjaftueshëm (botime dhe citime), pak bashkëpunime ndërkombëtare dhe të dhëna të paplota për kërkimin dhe stafin akademik.
Deklarata
Pretendimi se “asnjë universitet publik shqiptar nuk është i renditur në WUR 2026” është i saktë në thelb: institucionet shqiptare kanë statusin Reporter, pra s’kanë numër renditjeje. Pjesa tjetër e deklaratës, se Universiteti i Tiranës ka status “Reporter”, është po ashtu e saktë dhe verifikohet drejtpërdrejt nga profili zyrtar i UT në portalin e THE.
Megjithatë, pretendimi se Universiteti i Prishtinës ndodhet “në vendin e 518-të” është i pasaktë. THE nuk jep numra fiks për universitete në këtë nivel, por vetëm intervale renditjeje, dhe Universiteti i Prishtinës figuron në renditjen 1501+.
Po kështu, supozimi se statusi “Reporter” nënkupton “universitet të dobët” është i pavërtetë, ky është një klasifikim teknik, jo vlerësim cilësie.
Përfundim
Deklarata e nënkryetarit të PD, Luçiano Boçi, bazohet në fakte, por përfshin edhe pasaktësi numerike dhe interpretime politike.
Është e vërtetë që asnjë universitet publik shqiptar nuk ka renditje në THE 2026 dhe se Universiteti i Tiranës ka status “Reporter”.
Por statusi “Reporter” nuk është tregues i “kolapsit akademik”, por thjesht i mos-përmbushjes së plotë të kritereve metodologjike që lidhen kryesisht me kërkimin shkencor dhe publikimet ndërkombëtare. Ndaj dhe deklaratën e tij do ta kategorizojmë pjesërisht të vërtetë
Në auditorët e universiteteve publike shqiptare, korrupsioni nuk është thashethem, por përvojë direkte. Studentët e dinë kush pedagog kërkon “ndere” dhe “favore” për një notë, apo kush shet libra me detyrim. Por thuajse askush nuk guxon ta adresojë këtë prirje.
Një anketë e zhvilluar nga organizata “Tek Bunkeri” në shtatë universitete publike të vendit zbulon një panoramë shqetësuese: një në çdo katër studentë pranon se ka qenë dëshmitar apo viktimë e aferave korruptive.
Megjithatë, mbi 300 prej tyre thonë se nuk kanë besim te institucionet që duhet t’i mbrojnë, ndërsa të tjerë pranojnë se heshtin nga frika e hakmarrjes akademike.
Heshtja në universitete duket se është bërë pjesë e sistemit, një formë e pranuar konformizmi përballë një kulture korrupsioni që fillon te provimet dhe përfundon te tenderët e institucioneve të arsimit.
Frika dhe mosbesimi
Gjatë periudhës janarit-korrikut 2025, organizata “Tek Bunkeri” zhvilloi një sondazh në Universitetin e Tiranës, Arteve, Mjekësisë, Politeknikut, Bujqësorit, si dhe në universitetet e Shkodrës dhe Elbasanit.
Në total, 1055 studentë iu përgjigjën pyetësorëve në mënyrë anonime. Mbi 700 prej tyre e vlerësuan korrupsionin në universitetet e tyre si “shumë të lartë”, “të lartë” ose “mesatar”.
Rreth 25% e studentëve pranuan se kanë qenë dëshmitarë apo viktima të rasteve korruptive me pedagogë por që nuk i kishin denoncuar rastet në Rektorat apo institucionet e drejtësisë pasi kishin frikë ose ishin mosbesues.
Kjo kuptohet nga fakti se 330 studentë deklaruan se nuk kishin besim te autoritetet; 327 thanë se u mungonin provat dhe 220 pranuan se kishin frikë nga hakmarrja e stafit akademik.
Citizens Channel i kërkoi universiteteve informacion mbi numrin e ankesave dhe politikat për parandalimin e korrupsionit. Vetëm Universiteti i Tiranës dhe ai Politeknik kthyen përgjigje, duke mohuar çdo sinjalizim nga studentët.
Kolindo Vjedha dhe Ndriçim Mehmeti/Facebook.
“Korrupsioni po shkatërron universitetet publike”
Sipas Kolindo Vjerdhës, përfaqësues i “Qëndresës Qytetare”, korrupsioni në universitete shfaqet në forma të ndryshme: detyrimi për kurse, blerja e librave, pagesat për nota apo edhe favore seksuale.
“Korrupsioni është fenomeni që po shkatërron nga brenda universitetet publike. Shpresa e vetme për ndryshimin e situatës mbetet drejtësia dhe ndëshkimi serioz i rasteve,” u shpreh Vjerdha për Citizens.
Ligji shqiptar parashikon burgim nga 6 muaj deri në 3 vite për çdo përfitim të parregullt nga persona me funksion publik. Por fenomeni, sipas ekspertëve, është i dyanshëm.
Eksperti i arsimit Ndriçim Mehmeti thekson se një pjesë e studentëve janë bërë bashkëfajtorë në korrupsion, duke e parë ryshfetin si “zgjidhje të lehtë” për një notë kaluese.
“Duhet të pranojmë se një pjesë prej tyre e shohin si më të lehtë rrugën e dhënies së lekëve edhe për faktin se përgatitja e tyre vjetore, boshllëqet nga arsimi i mesëm dhe faktorë të tjerë, siç mund të jetë punësimi për të mbajtur veten, i bëjnë të pasigurt, në mundësitë që kanë për t’ia dalë mbanë në provime,” analizon Mehmeti.
Sipas tij, një arsye përse studentët përfshihen në rastet e korrupsionit me pedagogët ka të bëjë me mungesën e guximit të studentëve për të ngritur zërin si dhe me mosfunksionimin e organizimit studentor.
Mehmeti shton se mungesa e mekanizmave të ankimimit ndikon gjithashtu në këtë prirje.
Një student i Universitetit Politeknik, që kërkoi të mbetej anonim, pohoi se “kush është i pasur, kalon më lehtë”, ndërsa pjesa tjetër “përpiqet të mbijetojë në sistem”. Sipas tij pedagogët e korruptuar dallohen qartë.
“Si e kuptojmë? Shpesh prej studentëve, të cilët nuk përgjigjen në seminare, nuk vijnë në auditorë, por dalin me mesatare më të lartë se pjesë tjetër,” thotë ai.
Megjithatë, korrupsioni në universitete nuk kufizohet te marrëdhënia pedagog-student. Në vitin 2022, Struktura e Posaçme Anti-Korrupsion (SPAK) hetoi zyrtarë të Universitetit Bujqësor për manipulimin e 9 tenderëve me vlerë totale 90 milionë lekë.
Në këtë hetim u përfshinë 24 persona, mes tyre administratorë, sipërmarrës dhe zyrtarë të lartë të universitetit.
Në shkurt 2025, Gjykata Kundër Korrupsionit dhe Krimit të Organizuar (GJKKO) dha masa arresti dhe detyrimi për paraqitje për disa prej tyre, duke konfirmuar në njëfarë mënyre se sistemi universitar është prekur nga korrupsioni në çdo nivel.
Rreth 20 mijë studentë nisën sot vitin e parë akademik, treçereku i të cilëve në universitetet publike. Ndërkohë, procesi i regjistrimit mbetet i hapur deri më 24 tetor.
Krahas entuziazmit të fillimit, të dhënat flasin për një prirje rënëse të regjistrimeve dhe sfida të vazhdueshme në sistemin e arsimit të lartë, ku universitetet publike mbeten zgjedhje e parë, por përballë tyre privatët po fitojnë terren.
Rënia e regjistrimeve: 30 mijë studentë më pak që nga viti 2016
Në vitin 2016, universitetet publike numëronin rreth 117 mijë studentë. Të dhënat e vitit 2024, tregojnë se vetëm 86,900 studentë janë të regjistruar në këto institucione.
Kjo rënie me afërsisht 30 mijë studentë përkon me rritjen e emigracionit, mungesën e perspektivës dhe krizën në tregun e punës.
Për vitin e ri akademik, rreth 20 mijë studentë kanë nisur studimet për herë të parë, por regjistrimet janë ende të hapura, duke lënë të mundur për një total disi më optimist deri më 24 tetor.
Rreth 11 mijë studentë janë regjistruar në Universitetin e Tiranës, duke përfaqësuar 60% të regjistrimeve në ciklin e parë. Por edhe ky institucion i arsimit të lartë ka pësuar rënie. Në krahasim me vitin 2016, ka 6 mijë studentë më pak.
Në nivel kombëtar, 75% e studentëve zgjedhin universitetet publike, ndërsa 25% sektorin privat – një raport që ka ndryshuar gradualisht. Nga 24 mijë studentë të regjistruar në universitete private në vitin 2016, ky numër ka arritur në 37 mijë në vitin 2024 – një rritje me rreth 54%.
“Kampuse të amortizuara dhe Karta e Studentit pa efekt”
Sipas Qëndresës Qytetare, cilësia e jetës studentore mbetet problematike. Ata e përshkruajnë situatën si një realitet të “3D”, më shumë si dëshirë përballë dëshpërimit dhe distancës nga cilësia.
“Kampuset universitare janë ende ‘3D’, ndërsa realiteti është shumë më i zymtë, me një pjesë të godinave që vazhdojnë të jenë të amortizuara, me mungesë hapësirash dhe infrastrukture bazike për jetën studentore,” u tha në një reagim të tyre, ku u theksua mungesa e infrastrukturës bazike, si mensat apo karta e studentit, e cila aktualisht, sipas Qëndresës Qytetare “shërben vetëm për abone transporti”.
Organizata thekson se në një dekadë ka pasur rënie me 34% të numrit të të diplomuarve, duke reflektuar krizën e cilësisë, motivimit dhe mungesën e politikave mbështetëse për studentët
Regjistrimet në rrethe dhe mesazhet e institucioneve
Në Universitetin e Vlorës janë regjistruar deri më tani 850 studentë të rinj, me totalin që ka arritur në 4,500 studentë, një rritje prej 15% krahasuar me vitin e kaluar.
Ndërkohë, në Universitetin e Durrësit, ku i pranishëm në hapje ishte edhe Presidenti i Republikës Bajram Begaj, janë regjistruar 1,900 maturantë, me një rritje prej 5% krahasuar me vitin e kaluar.
“Dija nuk është thjesht informacion, por mjet që bën diferencën. Studioni për të ardhmen tuaj dhe kontribuoni për zhvillimin e Shqipërisë,” u shpreh Presidenti.
Degët si mjekësia, stomatologjia, farmacia, arkitektura dhe IT-ja janë plotësuar në Universitetin Politeknik të Tiranës dhe në Akademitë e Ministrive të Mbrojtjes dhe Rendit.
Procesi i regjistrimeve vijon me raundin e dytë që mbyllet më 8 tetor dhe raundin e tretë nga 13 deri më 24 tetori.
Kohët e fundit, një gjykatë në SHBA e ndaloi bllokimin e fondeve për universitetin elitar të Harvardit. Tani Presidenti amerikan Donald Trump po josh disa nga universitetet më të mira të vendit me grante të mëdha për t’i sjellë ato në linjën e qeverisë. Disa media amerikane raportuan se Shtëpia e Bardhë u ka dërguar letra nëntë institucioneve kryesore të arsimit […]
TIRANË, 1 tetor/ATSH-Maela Marini/ Kryeministri Edi Rama theksoi sot domosdoshmërinë e planifikimit të mbështetjes buxhetore për përfshirjen e Inteligjencës Artificiale në universitete.
Gjatë firmosjes sot të marrëveshjes së bashkëpunimit mes Ministrisë së Infrastrukturës dhe Energjisë dhe Universitetit Politeknik të Tiranës për praktikat e paguara të punës për studentët, Rama u bëri thirrje pedagogëve e studentëve që të angazhohen sa më shumë për të punuar së bashku në funksion të rritjes së komponentit të Inteligjencës Artificiale në të gjithë hapësirat e universiteteve.
“Është domosdoshmëri që në çdo universitet ne të krijojmë sa më parë hapësirat për t’i dhënë mundësi pedagogëve dhe studentëve që të aktivizojnë talentet dhe dijet për Inteligjencën Artificiale. Është absolutisht e domosdoshme dhe e mundur dhe mbi të gjitha ajo që e bën ekzaltues IA është se ka pak rëndësi se në cilën pikë të globit ndodhesh dhe në cilin rresht të klasifikimit të vendeve ndodhet vendi ku ti jeton”, shtoi Rama.
Kryeministri theksoi faktin se përmes IA mund të bëhen kapërcime epokale, të cilat përndryshe do të ishin krejtësisht të pamundura, pavarësisht talenteve, ambicieve dhe vullnetit.
Ndaj, Rama theksoi se “duhet të përgatitemi që edhe në buxhetin e vitit të ardhshëm dhe buxhetet e viteve të ardhshme të kemi një komponent për të mbështetur të gjitha sprovat që do t’ia vlejnë të mbështeten në këtë drejtim”.
Duke folur për infrastrukturën e universiteteve, Rama siguroi se qeveria do të mbështesë UPT për t’u fuqizuar me laboratorët dhe teknologjinë e nevojshme.
“Më vjen shumë mirë që ‘Pakti për Universitetin’ funksionon edhe në drejtim të përmirësimit të infrastrukturës. Faktikisht ky universitet po fuqizohet me dy struktura të reja moderne, që do të garantojnë hapësirë dhe kushte optimale për studentët nga inxhinieria, deri te gjeologjia”, tha Rama.
Kryeministri siguroi se “nuk do të mjaftohemi me kaq”.
“Përtej kësaj infrastrukture të re dhe të domosdoshme është po kaq e domosdoshme që ne ta mbështesim universitetin për t’u fuqizuar me laboratorët dhe teknologjinë e nevojshme, në mënyrë që ndryshimi epokal që po ndodh kudo në botë ta përfshijë fuqimisht edhe universitetin”, tha ai.
Sot ka nisur faza e fundit e regjistrimeve për maturantët fitues në universitetet publike.
Faza e 7-të do të zgjasë po 48 orë dhe do të mbyllet pasditen e 11 shtatorit. Sipas të dhënave nga Rrjeti Akademik Shqiptar, deri më tani janë regjistruar 75% e maturantëve. Pas përfundimit të fazave, do të ketë edhe një periudhë prej 48-orëshe, 12-13 shtator, për çregjistrim për ata që dëshirojnë të ndryshojnë degën dhe të rikthehen në garë për raundin e dytë.
Raundi i dytë i regjistrimeve do të nisë me 9 shtator edhe do të zgjasë deri më 8 tetor.
Degët e preferuara edhe për këtë vit janë Teknologjia dhe Inxhinieria, ndjekur më pas nga mjekësia. Ndërkohë, programet e mësuesisë vijojnë të mbeten më pak të preferuarat, me një përqindje që nuk kalon 7.5, duke ruajtur të njëjtat ritme si vitet e mëparshme.
Degët fituese do të jenë të shënuara me ngjyrë jeshile, ndërsa me ngjyrë të verdhë do të jenë të shënuara degët ku shpallen fituesit e fazës së ardhshme.
Për t’u regjistruar në degën fituese, duhet që studenti të paraqitet në Sekretarinë e Fakultetit me këto dokumente të nevojshme:
-Dokumenti i identifikimit (kartë identiteti ose pasaportë). Në dosje mbahet vetëm fotokopja;
-Diploma e Maturës Shtetërore së bashku me certifikatën e notave;
-Deklarata (jepet nga sekretaria) e cila plotësohet nga aplikanti në prani të punonjësit të sekretarisë mësimore të institucionit të arsimit të lartë përkatës dhe që nënshkruhet nga aplikanti dhe nga punonjësi i sekretarisë;
-Fotografi për dokument.
Sot ka nisur faza e fundit e regjistrimeve për maturantët fitues në universitetet publike. Faza e 7-të do të zgjasë po 48 orë dhe do të mbyllet pasditen e 11 shtatorit. Sipas të dhënave nga Rrjeti Akademik Shqiptar, deri më tani janë regjistruar 75% e maturantëve. Pas përfundimit të fazave, do të ketë edhe një periudhë prej 48-orëshe, 12-13 shtator, për çregjistrim për ata që dëshirojnë të…
Këtë të premte, në të gjitha Universitetet e vendit, ka nisur regjistrimi i studentëve që do të ulen për herë të parë në auditorë.
Ministrja e Arsimit dhe Sportit, Ogerta Manastirliu, ndau në rrjetet sociale hapat që duhet të ndjekin studentët për t’u regjistruar në degën që kanë fituar.
Regjistrimet do të zhvillohen nga sot, 29 gusht deri më 11 shtator.
Hapat që duhet të ndjekin studentët:
Identifikohu- Përdorni ID e maturës për t’u identifikuar te Këndi i Maturantit.
Kontrolloni këndin- Kontrolloni në kohë reale statusin tuaj, me ngjyrë jeshile tregohen degët ku jeni fitues, me ngjyrë të verdhë janë degët ku shpalleni fitues në fazën e ardhshme.
Afati është 48 orë- Në rastet kur jeni shpallur fitues keni 48 orë kohë për t’u regjistruar në atë degë.
Kujdes kaloni afatin prej 48 orësh humbni të drejtën për t’u regjistruar, por ndiqni me vëmendje degët me ngjyrë të verdhë.
Regjistrohu- Për t`u regjistruar në degën ku jeni fitues paraqituni në Sekretarinë e Fakultetit me kartën e identitetit dhe dokumentet e nevojshme.
TIRANË, 22 korrik/ATSH/ Universiteti Bujqësor i Tiranës, tanimë gati me programet e Universitetit BOKU të Vjenës dhe me synimin që UBT2030 të bëhet antena rajonale e BOKU-t, një universitet lider me një traditë të hershme në fushën e shkencave të jetës në Europë.
Në ceremoninë e mbajtur në Universitetin Bujqësor të Tiranës me rastin e nisjes së 9 programeve të reja të UBT që duke nisur nga ky vit janë sipas modelit BOKU, Kryeministri Edi Rama u ndal edhe tek mundësia që ato përfaqësojnë për të rinjtë ndërsa u bëri thirrje universiteteve të tjera në vend të ndjekin këtë model.
“Universitetet e Shqipërisë duhet ta kenë të qartë që nëse duan mbështetje ekstra duhet të bëjnë si UBT, të gjejnë shoqe, shokë europianë, të dorëzojnë letrat e fejesës që të bëjmë martesën. Qeveria do të ndryshojë komplet qasjen financiarë”, u shpreh Rama.
Sipas tij, fondet ekstra do vendosen tek UBT.
“Do ta fusim në listën e universiteteve dinjitoze të Europë. Të tjerët janë tërësisht të respektuar, inkurajuar, do marrin pjesën e buxhetit që u takon, por më shumë nga ato ekstra, s’ka për të marrë askush që s’bën këto. Reformë reale! Ka një problem serioz këtu. Universitetet s’mund të vazhdohen si shkolla të mesme, duhet të jenë qendra kërkimore. Kërkimi shkencor që është pika kyçe dhe e dobët e UBT dhe ne do e mbështesim me çfarë kemi mundësi”, theksoi Rama.
Në mbyllje, Rama theksoi se së shpejti do të fillojë të rishkruhen disa pjesë të ligjit për arsimin e lartë.
“Do të marrim në konsideratë këto ndryshime thelbësore që janë bërë në UBT sa i përket kurrikulave. Përfshirje reale e studentëve që ka të bëjë më pjesën universiteteve. Do shqyrtojmë dhe problemin me shumë koka brenda universitetit. Universiteti ka një kohë, një drejtim, s’mund të ketë 17 koka që duan të mbajnë kioskën e tyre”, vijoi Rama.
“Juristë ka plot Shqipëria por profesionistë nuk ka mjaftueshëm. Së bashku me ta çdonjëri nga vajzat dhe djemtë që do trokasin në këtë derë universiteti do bëhen pjesë e kategorive që kërkohen më shumë dhe do i kenë dyert të hapura. Juristë harroje, në rastin më të mirë do përfundosh sekser nëpër gjykata”, përfundoi Rama.
TIRANË, 21 korrik/ATSH-Maela Marini/ Kryeministri Edi Rama u ndal sot te problematikat e evidentuara në raportin e Bordit Ndërkombëtar të Akreditimit të Institucioneve të Arsimit të Lartë, ndërsa kërkoi adresimin e tyre.
“Unë besoj se nuk është faji i pasqyrës kur pasqyra na thotë ca të vërteta. Rekomandimet janë të gjitha të vërteta dhe mbeten piketa për mënyrën se si ne duhet ta shikojmë të nesërmen dhe ku duhet të ecim”, tha Rama pas prezantimit të raportit.
Duke folur për numrin e pedagogëve part time në sistem, Rama tha se “të pasurit 50% e stafit akademik part time është problem”.
Po ashtu ai theksoi se duhet të shtohen kapacitetet e diasporës në botën tonë akademike.
“Shtimi i universiteteve tona me ta në radhët e akademikëve tanë është domosdoshmëri. Nuk është e paarsyeshme të vendoset target edhe në këtë pikë dhe të vendosim dhe kushte që t’i vëmë universitetet në pozitën që ta kërkojnë këtë gjë për të përmbushur kushtin. Kjo duhet kthyer në një gjë uniforme”, shtoi Rama.
Një tjetër problem, sipas kryeministrit mbetet edhe numri i madh i universiteteve.
“Ne kemi një numër universitetesh për metër katror më të madh se sa Sllovenia, Anglia dhe plot vende të tjera. Kemi pasur edhe më shumë, kemi shkurtuar por kemi shumë. Ky është fakti. Është kaq e vërtetë kjo sa në mendësinë e shumëkujt është bërë e udhës që sa herë ka fushatë zgjedhjesh të thonë ‘premtoji një universitet se e duan afër te shtëpia’. Ndërkohë që Shqipëria është krejt e vogël, distancat janë krejt të shkurtra dhe burimet njerëzore të Shqipërisë nuk janë sa të Kinës”, tha Rama.
Kryeministri theksoi se Shqipëria ka 41 universitete që në një masë të madhe kanë programe gjeneraliste, ndërkohë që Sllovenia ka 17 universitete.
Kryeministri theksoi se është folur edhe më parë për racionalizimin e universiteteve por nuk është bërë asnjëherë.
“Këtu nuk bëhet fjalë për të mbyllur, por për të ndryshuar strukturë dhe qasje. Jo për të mbyllur vatra që i shërbejnë dijes, por për të ndryshuar. Pastaj kemi programet që bëhen për të pasur studentë dhe jo për të prodhuar ekonomi dhe dije dhe ky është fakt”, tha Rama.
Nga ana tjetër, Rama tha se është folur për ndërkombëtarizimin e universiteteve por jemi ende larg.
“Nuk do ecim dot më shpejt përpara nëse nuk pranohet problemin. Që ky është atdheu u plagjiaturës këtë e dimë shumë mirë. U bë gjithë ajo lëvizje e madhe ‘Pakti për universitetin’ dhe i vetmi element që mbeti i paadresuar fare është plagjiatura”, tha Rama, ndërsa shtoi se “problematika e plagjiaturës nuk është e adresuar si duhet”.
Rama kërkoi që puna të fokusohet për të bërë një transformim të mëtejshëm dhe shumë domethënës në këtë periudhë që përkon me periudhën e anëtarësimit të Shqipërisë në BE.
“Ne duhet të vendosim stekën shumë më lartë. Progresi i deritanishëm na jep të gjitha arsyet që të besojmë se është e mundur të shkojmë shumë më larg”, shtoi Rama. /j.p/
TIRANË, 17 qershor /ATSH/ Komisioni i përhershëm i Ekonomisë, çështjeve Sociale dhe Juridike në Akademinë e Shkencave zhvilloi sot, mbledhjen e radhës për gjendjen dhe sfidat e përdorimit të inteligjencës artificiale në edukim.
Veprimtarinë e çeli Anastas Angjeli. Ai foli për domosdoshmërinë e rritjes së performancës së sistemit universitar dhe kërkimit shkencor, si rrjedhojë e ndikimit që ka zhvillimi i teknologjisë dhe inteligjencës artificiale, me synimin për të shkuar drejt formatimit të universitetit 4.0.
Akademik Adrian Civici mbajti një referat me temën: “Drejt universiteteve 4.0. – Si po e revolucionarizon teknologjia dhe inteligjenca artificiale edukimin”.
Civici bëri një analizë për rolin dhe vendin e universiteteve në shoqërinë tonë në shek. XXI, për misionin e universiteteve në funksion të përhapjes së dijes, cilësisë së studentëve të diplomuar, kërkimit shkencor, inovacionit dhe revolucionit 4.0, si dhe për ndikimin e globalizimit dhe revolucionit teknologjik në “formatimin” e universiteteve të së ardhmes. Ky formatim mbështetet në katër forcat e mëdha të ndryshimit të botës moderne: stimulimin e teknologjive të reja; përballimin dhe përfitimin nga efektet e globalizimit; formimin e kapitalit social cilësor; përmirësimin e mirëqeverisjes.
Civici paraqiti modelet më të mira të organizimit, si dhe elementet e ndikimit të IA-së në transformimin e universiteteve nëpërmjet një historiku të shkurtër të revolucioneve të universiteteve (1.0; 2.0; 3,0). Ai u ndal në rëndësinë e revolucionit të katërt dhe “Universitetet e së ardhmes 2050”, duke e përcaktuar si një epokë në të cilën do të sfidohen hierarkitë tradicionale të statusit të universiteteve. Universiteti 4.0 synon të zbatojë paradigmën e industrisë 4.0 dhe “spiralen e katërfishtë” në universitete për të nxitur automatizimin, përshtatjen dhe personalizimin e proceseve të të nxënit.
Në fund, Civici dha disa konkluzione të rëndësishme, që dëshmojnë nevojën e vendit tonë për përmirësimin e universiteteve apo kolegjeve profesionale, të cilat janë ende shumë larg modelit të universiteteve 4.0. Në shumicën dërrmuese të rasteve mbizotërojnë format dhe modelet klasike të organizimit dhe funksionimit të universiteteve me elemente të modeleve 2.0 dhe 3.0. Në këtë drejtim mungojnë njohuritë e duhura dhe përvojat e përparuara, si dhe politikat specifike për transformimin e universiteteve shqiptare sipas modelit 4.0. Kjo situatë po ndikon dhe në performancën dhe përfitimet nga bashkëpunimi ndërkombëtar e procesi i ndërkombëtarizimit të universiteteve shqiptare.
Login
