TIRANË, 22 dhjetor/ATSH/ Tirana’s Glass Hub po sfidon konceptet e zakonshme mbi artizanatin dhe po krijon një hapësirë ku ndërthuren arti, inovacioni dhe qëndrueshmëria.

Ministri i Mjedisit, Sofjan Jaupaj vizitoi nga afër këtë qendër inovacioni, ku riciklimi takon artin dhe inovacionin.

“Me filozofinë Zero Waste (zero mbeturina), shishet dhe kavanozët e vjetër kthehen në krijime artizanale me jetë të re. Nën drejtimin e artistes Joana Dhiamandi, qelqi i ricikluar shndërrohet me dorë në bizhuteri, objekte dekorative dhe produkte funksionale që promovojnë ekonominë qarkulluese dhe kujdesin për mjedisin”, tha Jaupaj.

Ministri Jaupaj vlerësoi si mbresëlënës koleksionin e frymëzuar nga Vjosa, që sipas tij “është një xhevahir i vërtetë që tregon se mbrojtja e natyrës frymëzon edhe industrinë”.

“Tirana’s Glass Hub është një model i ekonomisë qarkulluese që materialet e qelqit nuk përfundojnë në landfill apo në pikat  grumbullimit të mbetjeve dhe riciklohen nëpërmjet këtyre produkteve”, nënvizoi Jaupaj.

Ministri Jaupaj u shpreh se “e ardhmja është e gjitha tek riciklimi dhe ripërdorimi i materialeve. Ripërdorimi në mënyrë kaq kreative jam i bindur që biznesi ka për tu rritur dhe do të bëhet edhe një brand”.

Çdo produkt që prodhohet nga Tirana’s Glass Hub nuk ka asnjë mbetje, asnjë thërrime nuk ikën dëm si pasojë e teknikës që përdoret për prodhimin e tyre.

Koleksionet vijnë nga natyra shqiptare si Alta Blu që ka elementin e ujit të detit Jon, koleksioni Vjosa ka lumin Vjosa, dhe koleksionet e tjera kanë disa forma të cilat mund të jenë më universale. Alta Blu, Vjosa dhe Karamele Zana, që sipas Dhimandit janë më të preferuarat dhe më të kërkuarat.

Përveç krijimit të produkteve të bukura, Tirana Glass Hub promovon ndërgjegjësimin për mbrojtjen e mjedisit dhe Shqipërinë në arenën ndërkombëtare.

1 nga 6

/k.s/

The post Jaupaj: Ripërdorimi kreativ i materialeve, mundësi për krijimin e brandit appeared first on Agjencia Telegrafike Shqiptare.

Në Ministrinë e Drejtësisë është zhvilluar sot tryeza e radhës konsultative për hartimin e Kodit të ri Penal në Shqipëri. Krahas ministrit Besfort Lamallari, i pranishëm në takim ishte gjithashtu ministri i Mjedisit, Sofjan Jaupaj, si dhe përfaqësues të institucioneve të tjera të pavarura. Fokusi i tryezës së sotme ishin një grup veprash penale që prekin drejtpërdrejtë interesin publik dhe…

Source

TIRANË, 17 dhjetor /ATSH/ Në Ministrinë e Drejtësisë është zhvilluar sot tryeza e radhës konsultative për hartimin e Kodit të ri Penal në Shqipëri.

Krahas ministrit të Drejtësisë, Besfort Lamallari, i pranishëm në takim ishte gjithashtu ministri i Mjedisit, Sofjan Jaupaj, si dhe përfaqësues të institucioneve të tjera të pavarura.

Fokusi i tryezës së sotme ishin një grup veprash penale që prekin drejtpërdrejtë interesin publik dhe zhvillimin e qëndrueshëm të vendit: veprat penale kundër mjedisit, regjimit të tokës dhe kafshëve; veprat penale kundër ekonomisë dhe pasurisë; si dhe ato kundër artit, kulturës, pronësisë intelektuale dhe industriale.

Në fjalën e tij Lamallari, tha se kjo tryezë dhe procesi në tërësi është të dëgjojmë mendimet, sugjerimet dhe përvojat praktike.

Ai vuri theksin te gjithëpërfshirja, transparenca dhe një diskutim real, jo formal.

“Të identifikojmë boshllëqet dhe nevojat për përmirësim dhe të sigurohemi që dispozitat e draftit të Kodit Penal të jenë të qarta, të zbatueshme dhe efektive. Vetëm përmes një procesi gjithëpërfshirës dhe bashkëpunues mund të ndërtojmë një Kod Penal që i përgjigjet realiteteve të sotme dhe sfidave të së nesërmes. Të mos përsërisim të njëjtat gabime që janë bërë në të shkuarën në Kodin e ri. Kjo me qëllimin e vetëm që t’i ofrojmë shoqërisë shqiptare një Kod cilësor, të qëndrueshëm në kohë dhe që reflekton stadin në të cilin Shqipëria është e synon të bëhet anëtar i Bashkimit Europian”, deklaroi ministri Lamallari.

Ministri i Mjedisit, Sofjan Jaupaj, tha se ndryshimet në Kodin Penal duhen parë përtej teknikës juridike.

“Ne jemi pjesë e natyrës, jo zotër të saj! Ky parim na udhëheq sot ndërsa ndërmarrim këtë reformë kaq të rëndësishme ligjore. Ndryshimet që propozojmë në Kodin e ri Penal, veçanërisht në kapitullin e veprave penale kundër mjedisit, shkojnë përtej teknikës juridike. Ato dëshmojnë përparimin tonë politik dhe angazhimin tonë për t’iu përgjigjur standardeve evropiane. Me këto dispozita, nuk synojmë ndëshkimin “per se”, të shkelësve të ligjit, por të parandalojmë ndotjen, shfrytëzimin e paligjshëm të burimeve natyrore dhe shkeljet që dëmtojnë florën dhe faunën tonë, një pasuri të vyer kombëtare. Çdo masë, çdo ligj e çdo veprim është një hap drejt një Shqipërie që e sheh kujdesin që tregojmë ndaj natyrës, jo si “lajmi i ditës”, por si vizion dhe trashëgimi që lëmë pas”, deklaroi Jaupaj.

Për pasurimin e mëtejshëm të draftit dhe përthithjen e sa më shumë kontributeve cilësore, Ministria e Drejtësisë dhe grupi i punës i ngritur enkas për Kodin Penal, do të vijojnë tryezat konsultative sipas kalendarit të dakordësuar e miratuar më parë.

1 nga 2

/gj.m/a.f/

The post Jaupaj: Kodi i ri Penal fokus te parandalimi i krimeve mjedisore appeared first on Agjencia Telegrafike Shqiptare.

Ministri i Mjedisit, Sofjan Jaupaj mori pjesë sot në Konferencën Kombëtare të Financave të Klimës, ku theksoi se “veç gjatë gjysmës së parë të vitit 2025, në Shqipëri janë duke u zbatuar 81 projekte me financim të huaj, me vlerë të përgjithshme rreth 2.3 miliardë euro, ku mbi 18.2% e kësaj shume lidhet drejtpërdrejt me ndërhyrje klimatike dhe mjedisore, duke dëshmuar se klima është tashmë një nga…

Source

TIRANË, 16 dhjetor/ATSH/ Ministri i Mjedisit, Sofjan Jaupaj mori pjesë sot në Konferencën Kombëtare të Financave të Klimës, ku theksoi se “vetëm gjatë gjysmës së parë të vitit 2025, në Shqipëri janë duke u zbatuar 81 projekte me financim të huaj, me vlerë të përgjithshme rreth 2.3 miliardë euro, ku mbi 18.2% e kësaj shume lidhet drejtpërdrejt me ndërhyrje klimatike dhe mjedisore, duke dëshmuar se klima është tashmë një nga destinacionet kryesore të financimeve zhvillimore në vend”.

Në fjalën e tij, Jaupaj tha se kjo nuk është thjesht statistikë.

“Kjo është prova e një besimi të fortë ndërkombëtar mbi aftësinë e institucioneve shqiptare për të menaxhuar, planifikuar dhe zbatuar programe komplekse me standarde evropiane”, u shpreh ministri i Mjedisit.

Duke u ndalur tek projektet kryesore të këtij portofoli, Jaupaj tha se programi për menaxhimin e qëndrueshëm të mbetjeve të ngurta, me financim 66.7 milionë euro nga KfW dhe SECO, është një ndërhyrje që transformon shërbimet bashkiake dhe rrit standardet e mjedisit urban.

“Programi “Klima në Shqipëri I”, i mbështetur nga KfW, modernizon dhe digjitalizon rrjetin energjetik, duke sjellë një reduktim real të emetimeve dhe një forcim të qëndrueshmërisë së sistemit energjetik. Në bujqësi, projekti “Qëndrueshmëria ndaj Klimës dhe Zhvillimi i Bujqësisë”, me financim 64.6 milionë euro nga Banka Botërore, ndihmon vendin të përshtatet ndaj rreziqeve klimatike përmes modernizimit të ujitjes dhe kullimit, forcimit të sigurisë ushqimore dhe digjitalizimit të analizës së politikave”, nënvizoi Jaupaj.

Në fushën e menaxhimit të rreziqeve, Jaupaj përmendi programin CLIRES, financuar nga SECO, si dhe programin ALBAdapt, i financuar nga GCF, BMZ, SECO dhe SDC, të cilët theksoi ai “krijojnë sisteme moderne paralajmërimi të hershëm dhe mbështesin 12 bashki bregdetare si edhe institucionet tona qendrore të menaxhimit të fatkeqësive si IGJEUM dhe Agjencia Kombëtare e Mbrojtjes Civile”.

Ministri Jaupaj informoi se në fushën e natyrës, vijoi programi “EU for Nature”, i financuar nga BE dhe SIDA, që po ndihmon integrimin e rrjetit “Natura 2000”, ndërsa në transport, programi gjerman për transportin urban të qëndrueshëm mbështet tranzicionin e qyteteve tona drejt sistemeve moderne, gjithëpërfshirëse dhe klimë–rezistente.

“Nëse analizojmë burimet financiare të këtyre ndërhyrjeve, përveç Bashkimit Evropian, vërejmë se Banka Botërore ka aktualisht në zbatim 1,474 milionë euro projekte, KfW dhe GIZ rreth 1,240 milionë euro, ndërsa Japonia dhe AFD kontribuojnë në mënyrë të qëndrueshme në projektet mjedisore përkatësisht me 717,500 euro dhe 610,000 euro. Zvicra dhe Suedia mbeten gjithashtu partnerë të qëndrueshëm në financime klimatike”, vuri në dukje Jaupaj.

Megjithatë, shtoi ai, Bashkimi Evropian mbetet kontribuesi më i madh dhe partneri strategjik i Shqipërisë në tranzicionin e gjelbër.

“Nën instrumentin IPA III, Dritarja 3 “Marrëveshja e Gjelbër dhe Konektiviteti i Qëndrueshëm” përfaqëson shtyllën kryesore të mbështetjes së BE-së për vendin tonë. Rreth 15% e portofolit IPA për Shqipërinë është dedikuar për ndërhyrje klimatike, përfshirë programet BE për Natyrën, BE për Ekonominë Qarkulluese, BE për Ujin, paketën e rezistencës energjetike nën IPA 2023 me vlerë 80 milionë euro, si dhe programin BE për Pyjet me 13 milionë euro nën IPA 2024. Krahas kësaj, Programet Operacionale 2024–2027, veçanërisht Programi Operacional për Eficiencën Energjetike, me vlerë totale 79 milionë euro – ku 50 milionë euro janë kontribut i BE-së dhe 29 milionë euro bashkëfinancim kombëtar – adresojnë drejtpërdrejt ndërtesat publike, e-mobilitetin, energjinë e rinovueshme dhe elektrifikimin e hekurudhave, duke përputhur politikat tona kombëtare me prioritetet e BE-së për neutralitet klimatik”, tha Jaupaj.

Jaupaj bëri të ditur se “në kuadrin e Facilitetit për Reforma dhe Rritje, fusha e politikës nr.4  që i dedikohet energjisë së pastër parashikon një fond 127.8 milionë euro, i cili pritet të përthithet nga institucionet shqiptare pas kryerjes së reformave të qëndrueshme me fokus klimën dhe energjinë e pastër”.

Më tej Jaupaj tha se “në vitet e fundit, tranzicioni i gjelbër është shndërruar në boshtin themelor të modernizimit të shtetit shqiptar, një bosht që përkufizon qartë ambicien e vendit tonë për të avancuar si një ekonomi evropiane, rezistente, konkurruese dhe të orientuar drejt së ardhmes”.

“Shqipëria në vitin 2025 është një vend në transformim të thellë evropian. Strategjia Kombëtare për Zhvillim dhe Integrim Evropian 2022–2030 e përfshin tranzicionin e gjelbër si pjesë të pandashme të rrugës sonë drejt BE-së, duke e konsideruar energjinë e pastër, efikasitetin energjetik, ekonominë qarkulluese dhe mbrojtjen e mjedisit si fusha që përkufizojnë vetë modelin tonë të zhvillimit”, theksoi Jaupaj.

Ministri Jaupaj u shpreh se “raporti i parë i progresit të kësaj strategjie, finalizuar në vitin 2025, dëshmoi forca të prekshme të Shqipërisë në fushën e klimës dhe energjisë, duke vërtetuar se vendi ynë nuk është më vetëm një aspirues i standardeve evropiane, por një kontribuues aktiv me rezultate konkrete”.

Sot, vijoi Jaupaj, mbi 45.4% e konsumit total të energjisë së vendit mbështetet në burime të rinovueshme, duke e vendosur Shqipërinë ndër vendet me peshën më të lartë të energjisë së pastër në Evropë.

Jaupaj vuri në dukje se “kjo arritje nuk buron vetëm nga tradita hidroenergjetike, por edhe nga investimet e reja strategjike si Parku Diellor i Karavastasë me kapacitet 140 MË, një shembull i modelit të ri të zhvillimit të energjisë në vend”.

“Klima është sot fusha ku bashkërendohet më qartë se kudo tjetër vizioni politik i qeverisë, pritshmëria e qytetarëve dhe standardet e BE-së. Detyra jonë e përbashkët është të garantojmë koherencë, të forcojmë koordinimin dhe të sigurojmë që çdo euro e investuar të materializohet në zhvillim të qëndrueshëm dhe në mirëqenie për qytetarët e vendit.  Platforma Kombëtare e Financave të Klimës do të jetë një tjetër element i rëndësishëm i bashkimit të forcave dhe energjive për të maksimizuar burimet dhe rezultatet. SASPAC mbetet plotësisht e angazhuar ta udhëheqë këtë proces me profesionalizëm, me integritet dhe me një vizion të qartë evropian për Shqipërinë e vitit 2030”, tha Jaupaj.

/k.s/j.p/

The post Jaupaj: BE, kontribuesi më i madh dhe partneri strategjik i Shqipërisë në tranzicionin e gjelbër appeared first on Agjencia Telegrafike Shqiptare.

TIRANË, 13 dhjetor/ATSH/ Pika fundore e trajtimit të mbetjeve në Maliq i shërben të gjitha bashkive të qarkut Korçë dhe është shembull i bashkëpunimit ndërbashkiak, inovacionit dhe edukimit mjedisor.

Ministri i Mjedisit, Sofjan Jaupaj vizitoi nga afër këtë pikë fundore.

“Me administrimin efikas, teknologjinë e duhur dhe programet e ndërgjegjësimit për të rinjtë, puna për trajtimin e mbetjeve në Maliq vijon sipas standardeve më të larta”, theksoi Jaupaj.

Jaupaj bëri të ditur se krijimi i Operatorit Kombëtar të Trajtimit të Mbetjeve, do të mbështesë bashkitë në menaxhimin e pikave fundore, duke u lënë më shumë hapësirë të fokusohen në ndarjen e mbetjeve në burim dhe riciklim.

“Me programin e ri të Ministrisë së Mjedisit dhe Bankës Gjermane për Zhvillim në landfillin e Maliqit do të ketë një paketë investimesh, duke shtuar dy qeliza të reja të trajtimit të mbetjeve për të siguruar kapacitetet për një periudhë 20-vjeçare në zonën e menaxhimit të mbetjeve të Korçës”, tha Jaupaj.

Landfilli i Maliqit është një nga investimet më të rëndësishme për menaxhimin e qëndrueshëm të mbetjeve në qarkun e Korçës. Ai shërben si vendgrumbullimi kryesor për mbetjet e bashkive të qarkut dhe funksionon sipas standardeve bashkëkohore të mbrojtjes së mjedisit.

Në këtë landfill janë ndërmarrë masa të posaçme për izolimin e shtresave të tokës, grumbullimin e ujërave të ndotura dhe trajtimin e gazrave që krijohen nga mbetjet, duke rritur sigurinë mjedisore dhe shëndetësore për komunitetin.

/k.s/r.e/

The post Landfilli i Maliqit siguron menaxhim e mbetjeve për 20 vjet appeared first on Agjencia Telegrafike Shqiptare.

TIRANË, 11 dhjetor /ATSH/ Ministri i Mjedisit, Sofjan Jaupaj prezantoi sot në Kuvend, projektligjin “Për gjuetinë”.

Jaupaj tha se ky projektligj ka një kuadër të ri ligjor që do të rregullojë aktivitetin e gjuetisë në Shqipëri.

“Ky propozim vjen në një moment kyç për vendin tonë pasi përfaqëson rikthimin e një aktiviteti  pas një dekade moratoriumi, të cilin e cilësonim shumë të nevojshëm për rikthimin e qetësisë në habitatet natyrore”, tha ai.

“Për kontekstin kohor, kjo masë drastike është marrë pasi ka qenë e domosdoshme për biodiversitetin dhe zonat e mbrojtura. Por, pas moratoriumit që ka shërbyer edhe si periudhë për të ndërtuar mekanizmat ligjorë që kontrollojnë pasuritë natyrore të Shqipërisë, siç është AKZM ndodhemi sot në një stad të ri”, tha Jaupaj.

Ministri Jaupaj u shpreh se “gjuetia në vendin tonë ka qenë dhe vazhdon të jetë  një traditë që është transmetuar brez pas brezi dhe që ka pasur një vlerë që shkon përtej aspektit të sigurimit të ushqimit. Propozimi për rihapjen e gjuetisë nën kushtet e kontrolluara njeh këtë dimension kulturor dhe kërkon ta transformojë atë”, pohoi Jaupaj.

Sipas Jaupajt, ideja e këtij projektligji qëndron në faktin e krijimit të një kulture të re të gjuetisë që ruan elementet pozitive të traditës ndërsa eliminon praktikat e dëmshme.

“Gjuetari modern që ky projektligj synon të ndërtojë është dikush që njeh dhe mbron natyrën, që kupton rëndësinë e mbrojtjes së biodiversitetit dhe respektin e ligjit, si edhe ushtron aktivitetin me përgjegjësi dhe etikë”, vijoi ai.

“Edukimi mjedisor i brezave të rinj është komponent thelbësor i kësaj strategjie afatgjatë. Fëmijë që rriten me rëndësinë e natyrës do të jenë gjuetarë të përgjegjshëm të së nesërmes. Përpara vendosjes së moratoriumit, gjuetia në vendin tonë kishte marrë përmasa shqetësuese, një situatë që krijoi një territor të hapur për gjuetinë e pakontrolluar dhe goditi faunën e egër”, tha ai.

Jaupaj tha se studimet treguan se shumë specie kishin pësuar rënie drastike të popullatës së tyre.

“Shpendët ujorë dhe migratorë që dikur ishin të bollshëm në zonat bregdetare u zvogëluan në mënyrë shqetësuese. Edhe speciet e vogla që kishin qenë objekt i gjuetisë sportive u bënë gjithmonë e më të rralla”, cilësoi Jaupaj.

Sipas tij, në këtë kontekst qeveria shqiptare vendosi një moratorium të plotë për gjuetinë, vendim të cilin Jaupaj e cilësoi të guximshëm  për kohën, por i domosdoshëm pasi synonte t’i jepte kohë rikuperimit të popullatës së faunës dhe ndërtimin e një sistemi të ri të menaxhimit për burimet natyrore.

Ministri i Mjedisit u shpreh se përmes këtij projektligji synohet të vendosen rregulla të qarta për mënyrën e organizimit dhe ushtrimit të gjuetisë, që të sigurohet ruajta e diversitetit biologjik dhe ekuilibri natyror i habitateve të florës dhe faunës së egër.

Jaupaj tha se eksperienca e vendeve evropiane tregon se gjuetia mund të shndërrohet në burim të ardhurash në zonat rurale me hapjen e vendeve të reja të punës, përmirësimin e infrastrukturës dhe shërbimeve.

“Ndryshimi është kalimi i kompetencës nga strukturat qendrore te bashkitë, ndryshe nga më parë , tani përgjegjësinë për gjuetinë e kanë njësitë e qeverisjes vendore.

Duke synuar një gjueti të qëndrueshme që garanton mbrojtjen e biodiversitetit. Ky propozim i ri përfaqëson një mundësi të rëndësishme për Shqipërinë që krijon një model bashkëkohor për mirëqenien e komuniteteve”, përfundoi Jaupaj.

/e.i/j.p/

The post Jaupaj: Kulturë e re e gjuetisë me elemente të traditës ndërsa eliminon praktikat e dëmshme appeared first on Agjencia Telegrafike Shqiptare.

TIRANË, 10 Dhjetor /ATSH/ Qendra e re e vizitorëve në Parkun Drilon–Tushemisht, e ridimensionuar plotësisht nga pikëpamja estetike, është tashmë gati, duke krijuar një pikëtakim harmonik mes natyrës, përkujdesjes dhe projekteve ekologjike infrastrukturore.

Ministri i Mjedisit, Sofjan Jaupaj, njoftoi sot se projekti Drilon–Tushemisht Waterscape Park”, i realizuar nga Ministria e Mjedisit dhe AADF, është përzgjedhur ndër 8 finalistët më të mirë në botë në Bienalen Ndërkombëtare të Peizazhit të Barcelonës, mes 230 projekteve nga 20 vende dhe 4 kontinente.

Jaupaj bëri të ditur se restaurimi i qendrës së re të vizitorëve në parkun Drilon–Tushemisht, dhe përfundimi i projektit për zbatimin e Biosferës së Prespës janë investime të rëndësishme me ndikim në ekonominë dhe turizmin e zonë.

Ndërkohë, vijoi ai, restaurimi i Parkut të Drilonit është zgjedhur si një nga 8 projektet më të mira në botë për restaurimin e natyrës.

“Investimi është një vlerë e shtuar për këtë pikë turistike që është ndër më të frekuentuarat nga vizitorët gjatë sezonit dimëror”, shtoi ministri i Mjedisit.

Projekti njihet si një model i restaurimit ekologjik, ringritjes së habitateve dhe zhvillimit të turizmit të përgjegjshëm, duke kontribuar në rritjen e vizibilitetit të Shqipërisë në nivel ndërkombëtar dhe promovimin e natyrës si atraksion turistik. e.xh/j.p/

The post “Drilon–Tushemisht Waterscape Park”, ndër 8 finalistët në Bienalen e Peizazhit në Barcelonë appeared first on Agjencia Telegrafike Shqiptare.

TIRANË, 5 dhjetor/ATSH/ Ministri i Mjedisit, Sofjan Jaupaj deklaroi sot se “Ministria e Mjedisit dhe Agjencia Kombëtare e Zonave të Mbrojtura ka dorëzuar dosjen e aplikimit për përfshirjen në UNESCO të liqenit të Shkodrës”.

Në aktivitetin ”Për Ty Natyrë”, ku u diskutua mbi prioritetet e mjedisit dhe pyjeve, të cilat do të hyjnë në një fazë të re në rrugën drejt anëtarësimit në Bashkimin Europian Jaupaj tha se “Liqeni i Shkodrës është një tjetër pasuri natyrore e Shqipërisë që do t’i bashkohet pasurive botërore të UNESO-s”.

Ai shprehu mirënjohjen ndaj Unionit Ndërkombëtar të Mbrojtjes së Natyrës dhe bashkëpunimin e vazhdueshëm me UNESCO-s për rezultatet që kanë arritur gjatë këtyre viteve.

Jaupaj u shpreh se “këto rezultate na motivojnë të bëjmë më shumë në radhë të parë për qytetarët dhe integrimin europian”.

“Deri në 2030 synojmë që 100% të zonave të mbrojtura të kenë planet e tyre të menaxhimit, të finalizojmë rrjetin Natyra 2000 si një kriter i qartë i nënkapitullit të natyrës me BE-në dhe zonat e mbrojtura të shndërrohen në qendra të zhvillimit lokal dhe turizmit dhe inovacionit natyror”, nënvizoi Jaupaj.

Ministri Jaupaj bëri të ditur edhe nisjen e një strategjie për pyjet, që sipas tij “vjen si harmonizim i shkencës, restaurimit ekologjik, digjitalizmit dhe pyllëzimit inovatv”.

“Në buxhetin e Ministrisë së Mjedisit për 2026 kemi një zë të veçantë për programin e pyllëzimeve me dron, të cilat do të zhvillohen si fillim në Parkun Kombëtar të Dajtit, në bredhin e Hotovës në Përmet, Parkun Kombëtar Lurë, Mali i Dejës, duke garantuar rigjenerim të saktë dhe më të shpejtë”, informoi Jaupaj.

Jaupaj tha se “zonat e mbrojtura, pyjet, ujërat, biodiversiteti përkufizojnë atë që quhet identiteti ekologjik i Shqipërisë dhe janë aseti ynë kombëtar”.

Për këtë arsye pas 10 vitesh pas krijimit të AKZM, moratoriumit të pyjeve që dha rezultate duke kthyer qetësinë me mbi 1 milionë ha pyje, sipas tij, ka ardhur momenti për të krijuar një model të ri që i përgjigjet sfidave, por edhe ambicieve të kohës.

Jaupaj tha se “e mendojmë të udhës që standardet e mbrojtjes dhe ruajtjes së natyrës të unifikohen në një zinxhir të qartë përgjegjësish me struktura të qarta, por edhe me vizionin inovativ për të zhvilluar një ekonomi të qëndrueshme”.

Jaupaj tha se përmes kësaj qasjeje që fillon në janar të 2026 “mund të sigurojmë një menaxhim unik të pyjeve dhe zonave të mbrojtura, një vendimmarrje të bazuar në të dhëna shkencore, një monitorim të biodiversitetit dhe kontroll të qartë të territorit”.

“Me punë gjatë këtyre viteve kemi treguar që zonat e mbrojtura mund të jenë katalizator të zhvillimit lokal dhe përfitues janë komunitetet që jetojnë në këto zona. Parku Kombëtar i Vjosës është një shembull i jashtëzakonshëm, pasi është pjesë e pasurisë botërore të UNESCO-s”, tha Jaupaj.

/k.s/j.p/

The post Jaupaj: Të gjitha zonat e mbrojtura me plan menaxhimi deri në 2030-ën appeared first on Agjencia Telegrafike Shqiptare.

TIRANË, 4 dhjetor /ATSH/ Në Kuvend u prezantua sot nga ministri i Mjedisit, Sofjan Jaupaj, projektligji “Për përgjegjësitë e zgjeruara të subjekteve prodhuese të produkteve që gjenerojnë mbetje”.

Jaupaj tha se ky projektligj vjen në një moment të rëndësishëm për procesin e integrimit evropian pas hapjes së negociatave të grup-kapitullit 4, pjesë e të cilit është edhe Kapitulli 27 “Mjedisi dhe ndryshimet klimatike”.

“Miratimi dhe zbatimi i këtij ligji do të thotë se Shqipëria nuk po përmbush vetëm formalisht kërkesat e BE-së, por po ndërton një model të qëndrueshëm që sjell përfitime konkrete për shëndetin publik, mjedisin dhe ekonominë”, tha ai.

Ministri i Mjedisit, u shpreh se Qeveria shqiptare ka marrë përsipër angazhime të qarta lidhur me ekonominë qarkulluese dhe plani kombëtar për menaxhimin e mbetjeve e identifikon përgjegjësinë e zgjeruar të prodhuesit si një shtyllë kryesore për arritjen e objektivave kombëtare.

“Pa zbatimin e këtij sistemi, objektivat për ripërdorim dhe riciklim të mbetjeve mbeten thjesht në letër. Shqipëria ka nënshkruar Marrëveshjen e Parisit dhe ka marrë angazhime në forume ndërkombëtare për zvogëlimin e emetimeve të gazeve serrë. Menaxhimi i integruar i mbetjeve kontribuon drejtpërdrejtë duke ulur emetimet e gazeve nga landfillet duke promovuar riciklimin”, tha Jaupaj.

Sipas Jaupajt, ligji është në përputhje me Agjendën 2030 për Zhvillim të Qëndrueshëm.

“Përgjegjësia e zgjeruar e prodhuesit është një qasje mjedisore e cila parashikon se prodhuesi dhe importuesi duhet të mbajnë përgjegjësi financuare dhe organizative për menaxhimin e mbetjeve që gjenerohen nga produktet e tyre nga mbledhja, riciklimi dhe trajtimi fundor i tyre. Subjektet prodhuese që vendosin produkte në tregun shqiptar do të jenë financiarisht përgjegjëse për trajtimin e mbetjeve që krijohen nga këto produkte”, pohoi ai.

Jaupaj theksoi se projektligji do të zbatohet për të paktën pesë rryma të mbetjeve, si ambalazhet, bateritë, automjetet në fund të jetës, mbetjet e pajisjeve elektrike dhe elektronike dhe vajrat e përdorur.

Ministri Jaupaj pohoi se ky projektligj fuqizon parimin “ndotësi paguan”, si një element kyç në menaxhimin e mbetjeve dhe përfaqëson një reformë, e cila transferon barrën e transferimit të mbetjeve nga tatimpaguesi te prodhuesit dhe ndotësit.

Sipas Jaupajt, projektligji plotëson një kërkesë të BE-së, ndërsa krijon mekanizma financiarë për ekonominë qarkulluese, si edhe rrit përgjegjësinë e biznesit ndaj mjedisit dhe shoqërisë.

“Për dekada të tëra, ekonomia ka ndjekur modelin linear prodho-konsumo-hidh. Ky model tejkalon kapacitetin tonë për t’i menaxhuar mbetjet, ndërsa mjedisi po dëmtohet. Ky ligj përfaqëson hyrjen e Shqipërisë në epokën e ekonomisë qarkulluese ku burimet ruhen, produktet ripërdoren dhe mbetjet transferohen në mundësi”, tha ai.

“Me miratimin e këtij ligji, ne po vendosim themelet e një transformimi të domosdoshëm. Ky ligj është një provë konkrete se Shqipëria po ecën me vendosmëri drejt standardeve evropiane, nga bindja se ky është modeli i zhvillimit që meriton vendi ynë, një ekonomi moderne që e pozicionon Shqipërinë si një vend që mbron interesin publik, orienton bizneset drejt përgjegjësisë dhe inovacionit dhe që zgjedh të ndërtojë një ekonomi të gjelbër për brezat e sotëm dhe të ardhshëm”, përfundoi Jaupaj.

/e.i/a.f/r.e/

The post Jaupaj: Shqipëria drejt epokës së ekonomisë qarkulluese, ndotësi paguan appeared first on Agjencia Telegrafike Shqiptare.

TIRANË, 1 dhjetor/ATSH/ Në Impiantin e Përpunimit të Mbetjeve në Tiranë puna vijon pa asnjë ndalesë, ku kryhen të gjitha hallkat e menaxhimit modern të mbetjeve.

Falë investimeve tashmë po rikualifikohet edhe i gjithë peizazhi përreth, ndërsa synimi mbetet rritja e sasisë së mbetjeve të rikuperuara dhe të ricikluara, për të ulur volumin që përfundon në landfill.

Ministri i Mjedisit, Sofjan Jaupaj, inspektoi sot punën në terren, ku theksoi se diferencimi në burim do të jetë edhe sfida tjetër për menaxhimin e mbetjeve.

“Nuk mjaftojnë vetëm investimet që kryhen në pikat fundore të mbetjeve. Ministria e Mjedisit është e angazhuar përmes programeve të mëdha për të plotësuar të gjitha nevojat me infrastruktura fundore në të gjithë Republikën”, u shpreh ai.

Por diferencimi në burim, sipas Jaupajt, është një sfidë që Ministria e Mjedisit do e ndjekë me njësitë e qeverisjes vendore që janë përgjegjëse për ta prezantuar në qytete.

Ministri vlerësoi se programi i edukimit mjedisor me nxënës dhe studentë po sjell një energji të re në arritjen e këtij objektivi.

“Iniciativa që keni marrë bashkë me orët mjedisore dhe edukimin me nxënësit krijon një premisë të mirë për ta prezantuar këtë në mënyrë të suksesshme. Qëllimi është që ne të kemi një diferencim më të madh të mbetjeve në mënyrë që ato mbetje që shërbejnë si ekonomi qarkulluese të mund të shiten për të rritur vlerën financiare”, tha Jaupaj.

Ministri theksoi se sasia e mbetjeve që do të depozitohet në landfill duhet të jetë sa më e vogël, minimale, që të rrisë jetëgjatësinë e landfilleve.

“Shqipëria nuk e ka luksin të ketë shumë landfille sepse është një vend shumë i vogël, megjithatë me procesin e diferencimit dhe kapsulimit po bëhet një punë shumë e mirë”, shtoi ai.

/m.m/j.p/

The post Jaupaj: Diferencimi në burim, sfida tjetër për menaxhimin e mbetjeve appeared first on Agjencia Telegrafike Shqiptare.

TIRANË, 22 nëntor/ATSH/ Ministri i Mjedisit, Sofjan Jaupaj, njofton se 12 Administratat Rajonale të Zonave të Mbrojtura janë në terren dhe në gatishmëri të plotë për shkak të reshjeve të dendura.

Strukturat janë angazhuar për të monitoruar situatën dhe për t’u përgjigjur menjëherë ndaj çdo problematike që mund të lindë në terren.

Ministri apelon tek qytetarët që të tregojnë kujdes gjatë lëvizjeve në shtigje, akse rrugore, kanione, ujëvara dhe përgjatë lumenjve, pasi prurjet e larta dhe rrëshqitjet e mundshme mund të shkaktojnë situata të papritura.

“Jemi të gjithë së bashku për të kaluar këtë situatë me përgjegjësi dhe kujdes”, thekson Jaupaj.

1 nga 6

/a.f/

The post Jaupaj: Reshjet, 12 Administratat Rajonale të Zonave të Mbrojtura në gatishmëri të plotë appeared first on Agjencia Telegrafike Shqiptare.

TIRANË, 20 nëntor /ATSH/ Ministri i Mjedisit, Sofjan Jaupaj deklaroi sot se Programi Kombëtar i Parandalimit të Mbetjeve është një nga elementët përmbyllës më të rëndësishëm të Kapitullit 27 të negociatave me BE, që lidhet me mjedisin dhe ndryshimet klimatike, si edhe një shtyllë qendrore e reformës kombëtare për menaxhimin e integruar të mbetjeve.

Gjatë takimit të zhvilluar në Tiranë mbi menaxhimin modern të mbetjeve, ku ishin të pranishëm përfaqësues të institucioneve vendore, partnerëve ndërkombëtarë dhe organizatave mjedisore, Jaupaj theksoi se ky program vjen si rezultat i bashkëpunimit të ngushtë me Bashkimin Europian dhe GIZ Albania, duke i ofruar vendit një qasje tërësisht moderne dhe të harmonizuar me acquis të BE-së dhe me parimet e ekonomisë qarkulluese.

Sipas ministrit, programi i ri fokusohet në gjashtë drejtime strategjike: Forcimin e kuadrit ligjor dhe rritjen e përgjegjësisë së prodhuesit; Nxitjen e prodhimit dhe konsumit të qëndrueshëm; Zgjerimin e ripërdorimit, riparimit dhe reduktimit të mbetjeve; Parandalimin e mbetjeve organike; Reduktimin e mbetjeve plastike dhe paketimit; Masa konkrete për menaxhimin e mbetjeve të ndërtimit.

Jaupaj vuri theksin te roli i pushtetit vendor, duke theksuar se bashkitë janë hallka kyçe e reformës, pasi aty nis ndarja në burim, riciklimi dhe edukimi qytetar. Ai solli në vëmendje shembuj pozitivë si qendrat e riciklimit në Berat dhe Përmet, të cilat konsiderohen modele të suksesshme, si edhe nismat e reja që po transformojnë mënyrën e menaxhimit të mbetjeve në disa bashki të vendit.

Ministri nënvizoi se përmes këtij programi Shqipëria hedh një hap të rëndësishëm drejt standardeve europiane të mbrojtjes së mjedisit, duke reduktuar volumin e mbetjeve dhe duke çuar përpara objektivat e ekonomisë qarkulluese.

Sipas tij, zbatimi i programit do të shoqërohet me investime, trajnime dhe modele të reja operacionale në terren, duke garantuar një qasje të qëndrueshme dhe afatgjatë për menaxhimin e mbetjeve në të gjithë vendin.

1 nga 7

/e.xh/r.e/

The post Jaupaj: Programi Kombëtar i Parandalimit të Mbetjeve, qasje moderne dhe e harmonizuar me acquis të BE-së appeared first on Agjencia Telegrafike Shqiptare.

Ministri i Mjedisit, Sofjan Jaupaj thotë se Programi Kombëtar i Parandalimit të Mbetjeve është një nga elementët përmbyllës më të rëndësishëm të Kapitullit 27 të negociatave me BE, që lidhet me mjedisin dhe ndryshimet klimatike, si edhe një shtyllë qendrore e reformës kombëtare për menaxhimin e integruar të mbetjeve. Gjatë takimit të zhvilluar në Tiranë mbi menaxhimin modern të mbetjeve…

Source

Ministri i Mjedisit, Sofjan Jaupaj thotë se buxheti i vitit 2026 shënon një hap të rëndësishëm në modernizimin e politikave mjedisore, në forcimin e institucioneve dhe në mbrojtjen e pasurive natyrore që vendi ynë ka fatin t’i ketë të veçanta në Europë. Sipas ministrit, buxheti i vitit të ardhshëm rritet me 9,2% krahasuar me 2025, duke arritur në 3,2 miliardë lekë, ndërsa fondet e shtuara shkojnë…

Source

TIRANË, 19 nëntor/ATSH/ Ministri i Mjedisit, Sofjan Jaupaj, deklaroi sot buxheti i vitit 2026 shënon një hap të rëndësishëm në modernizimin e politikave mjedisore, në forcimin e institucioneve dhe në mbrojtjen e pasurive natyrore që vendi ynë ka fatin t’i ketë të veçanta në Europë.

Në fjalën e tij në Kuvend, ku po diskutohet projektbuxheti i vitit 2026, ministri tha se ky buxhet përfaqëson një kontratë kombëtare për një Shqipëri më të pastër, më të gjelbër dhe më të shëndetshme.

Sipas ministrit, buxheti i vitit të ardhshëm rritet me 9,2% krahasuar me 2025, duke arritur në 3,2 miliardë lekë, ndërsa fondet e shtuara shkojnë për investime konkrete që prekin ajrin, ujin, mbetjet dhe biodiversitetin.

Sipas tij, në vitin 2026 do të investohet në blerjen e stacioneve të reja të monitorimit të ajrit, ndërsa për sa i takon ujërave, parashikohen investime për zgjerimin e monitorimit të lumenjve dhe ujërave nëntokësore, për laboratorë dhe pajisje të specializuara, si dhe për harmonizimin me metodologjinë europiane të analizës.

Po ashtu, buxheti mbështet përmirësimin e sistemit kombëtar të mbledhjes së të dhënave për basenet Mat, Ishëm dhe Erzen, investime që, sipas ministrit, janë të lidhura drejtpërdrejt me Kapitullin 27 të negociatave dhe përbëjnë parakusht për integrimin europian.

Duke u ndalur te mbrojtja e natyrës, ministri u shpreh se projektet kombëtare për zonat e mbrojtura, si Ulëza në veri dhe Vjosa në jug, po përparojnë me ritme të qëndrueshme.
Buxheti i 2026-s financon 460 milionë lekë për investimet në ekoparkun e Ulzës, një projekt që ai e cilësoi i rëndësishëm “për turizmin e qëndrueshëm, edukimin dhe ekonominë lokale”.

Në këtë kuadër, ai nënvizoi edhe qendrën multifunksionale të Vjosës, një investim prej 690 milionë lekësh.

“Programi për muzealizimin e kësaj qendre nis në 2026-ën, pasi Vjosa në të vërtetë nuk është vetëm një lumë, është një identitet kombëtar dhe një markë ndërkombëtare”, deklaroi ministri.

Sa i takon sektorit të pyjeve, ministri theksoi se investimet do të fokusohen te njerëzit po aq sa tek infrastruktura. Sipas tij, me rritjen prej 75 milionë lekësh për kapacitetet humane të Agjencisë Kombëtare të Pyjeve dhe stafit të Agjencisë Kombëtare të Ekonomisë së Mbetjeve, synohet forcimi i kontrollit, menaxhimit dhe mbrojtjes së territorit.

“Me këtë buxhet garantohet mbrojtja më efektive e pyjeve, kontrolli rigoroz i prerjeve të paligjshme dhe menaxhimi më profesional i zonave të mbrojtura”, tha ai.

Në lidhje me menaxhimin e mbetjeve, që sipas tij mbetet sfida më e madhe territoriale, parashikohet një shtim fondi prej 1 miliard lekësh për 42 bashki, për të adresuar kërkesat e njësive të qeverisjes vendore dhe për të forcuar kapacitetet planifikuese.

Ministri theksoi se ky është hapi i parë drejt ndërtimit të një sistemi të qëndrueshëm për menaxhimin e mbetjeve, në përputhje me ligjin e ri dhe praktikat europiane.

Shqipëria, sipas ministrit, tashmë është pjesë e programeve më të rëndësishme europiane për menaxhimin e mbetjeve.

Investimet e huaja përbëjnë një shtyllë kyçe të reformës në këtë sektor, si financimi me KfW prej 50 milionë eurosh për infrastrukturën e zonave të mbetjeve në Dibër, Durrës, Korçë, Berat dhe Vlorë, si dhe grantet për mbylljen e venddepozitimeve jo të kontrolluara dhe ngritjen e qendrave të riciklimit.

Po ashtu, shtoi ai, janë siguruar 40 milionë euro nga BE, ku 20 milionë euro janë grante për infrastrukturën në zonat e Kukësit dhe Gjirokastrës dhe 15 milionë euro vijnë në bashkëpunim me qeverinë gjermane për modernizimin dhe menaxhimin e mbetjeve.

Sipas ministrit, impakti i këtyre investimeve është i drejtpërdrejtë. “Harmonizim me standardet e BE-së, rritje e kapaciteteve të bashkive, reduktim i ndotjes, kalim drejt ekonomisë qarkulluese dhe mbyllje e venddepozitimeve të pakontrolluara”, deklaroi ministri.

Sipas tij, ky është një buxhet i një Shqipërie që nuk fshihet pas problemeve, por i zgjidh ato.

/r.e/

The post Jaupaj: Buxheti 2026, hap vendimtar për modernizimin mjedisor dhe standardet europiane appeared first on Agjencia Telegrafike Shqiptare.

TIRANË, 12 nëntor /ATSH/ Në Komisionin për Burimet Natyrore, Infrastrukturën dhe Zhvillimin e Qëndrueshëm, u shqyrtua sot në parim projektligji “Për buxhetin 2026” për Ministrinë e Mjedisit.

Ministri i Mjedisit, Sofjan Jaupaj u shpreh se hartimi i buxhetit 2026-2028, vjen si një moment i rëndësishëm në mbështetje të objektivave të programit të Qeverisë në zhvillimin e mjedisit.

Sipas Jaupajt, Ministria e Mjedisit ka hartuar buxhetin duke ruajtur kufijtë e parashikuar në katër programe buxhetore, si planifikim, menaxhim, administrim, në mbrojtjen e mjedisit, në administrimin e pyjeve dhe menaxhimin e mbetjeve urbane.

Jaupaj bëri një ndarje të programit buxhetor afatmesëm, sipas zërave, ku sipas ministrit të Mjedisit, për paga dhe shpenzime në Ministrinë e Mjedisit është parashikuar një vlerë prej 1 miliard e 147 milionë e 850 mijë lekë, duke pasur një rritje prej 9% në krahasim me vitin 2025.

“Shpenzime operative 338 milionë e 490 mijë lekë, një rritje 1,5% me vitin 2025. Transferta të brendshme rreth 5 milionë lekë, ndërsa për investime është parashikuar një vlerë prej 1 miliardë e 136 milionë e 347 mijë lekë, një rritje me 17,9% krahasuar me 2025, si dhe investime të huaja në vlerën 590 milionë lekësh”, tha Jaupaj.

Ministri i Mjedisit, nënvizoi se në total, buxheti i vitit 2026 për këtë ministri është në vlerën e 3 miliardë e 239 milionë e 407 mijë lekë, me një rritje totale me 9,18% më shumë krahasuar me vitin 2025.

Sipas ministrit Jaupaj, buxheti i Ministrisë së Mjedisit zë 0,12% të Prodhimit të Përgjithshëm Bruto, ose 0,67% në buxhetin e shtetit për vitin 2026.

“Për vitin 2026, për anëtarësimet në organizatat ndërkombëtare është parashikuar një vlerë prej 20 milionë lekësh në bazë të marrëveshjeve që ka Ministria e Mjedisit në organizatat ku Shqipëria aderon”, tha ai.

“Investimet rriten me 17,89%, ku fokus ka ngritja e infrastrukturës në Echo Park Ulza me vlerë totale rreth 460 milionë lekë; ndërtimi i qendrës multifunksionale në lumin Vjosa me një vlerë totale 690 milionë lekë; kemi blerjen e stacioneve të monitorimit të ajrit me një vlerë prej 100 milionë lekë; një fond prej 60 milionë lekësh për prezantimin e projektit Pyllëzimi Smart me dron në zonat e mbrojtura, që kanë pasur problematikë me shpyllëzimin gjatë viteve të shkuara”, tha Jaupaj.

Gjithashtu, ministri Jaupaj u shpreh se në buxhet është parashikuar edhe mbulimi i TVSH-së dhe kostove lokale për investimet e huaja, të cilat janë të konsiderueshme sa i takon Ministrisë së Mjedisit me grante nga KfW, Komisioni Evropian etj.

Ndërkohë, deputeti i opozitës, Blendi Himçi tha në fjalën e tij se Qeveria shqiptare gjatë këtyre 12 viteve, ka shpenzuar për inceneratorin e Elbasanit dhe Fierit rreth 47,5 milionë euro.

“Janë hedhur edhe 113 milionë euro më pas, por projekti i incenerimit dështoi. Ju thatë se do të ngrini 10 landfille për menaxhimin e integruar të mbetjeve në gjithë Shqipërinë. Por, a është parashikuar studim fizibiliteti, ndonjë fond për vënien në punë të procesit të incenerimit? Sepse mbetjet shtohen çdo ditë nga familjet shqiptare. Mali me plehra në Elbasan është në kushtet e një emergjence mjedisore buzë lumit Shkumbin”, tha Himçi.

Në përgjigjen e tij, ministri Jaupaj u shpreh se do të ecet përpara me të gjitha investimet, për të krijuar një menaxhim më të mirë të mbetjeve dhe për t’i dhënë njësive të qeverisjes vendore mundësinë për një ndarje në burim dhe reduktim të sasisë së mbetjeve në impiante dhe landfille.

Komisioni për Burimet Natyrore, Infrastrukturën dhe Zhvillimin e Qëndrueshëm- Foto: Florian Aba...

1 nga 3

/e.i/r.e/a.f/

The post Jaupaj: Mbi 3 miliardë lekë projektbuxheti për Mjedisin, rritje me 9,18% appeared first on Agjencia Telegrafike Shqiptare.

TIRANË, 5 nëntor/ATSH/ “Albania Glass Recycling” në Bubq të Krujës është kompania e parë e riciklimit të qelqit në Shqipëri, e cila përfaqëson një hap të ri drejt ekonomisë qarkulluese.

Kjo kompani kthen mbetjet e qelqit në produkte me vlerë të shtuar, si pllaka terrazzo dhe materiale filtruese për pishina.

Në prezantimin e kësaj nisme të parë të këtij lloji në Shqipëri ishte i pranishëm edhe ministri i Mjedisit, Sofjan Jaupaj i cili e cilësoi këtë kompani një shembull të qartë të bashkëpunimit midis qeverisë, sektorit privat dhe partnerëve ndërkombëtarë.

“Kjo kompani do të sjellë rezultate konkrete për një ekonomi më të gjelbër dhe duke ulur volumin e mbetjeve. Gjatë këtij muaji kemi pasur një sërë përurimesh edhe në qytete të tjera sa i takon stacioneve të grumbullimit dhe riciklimit të mbetjeve, ku një pjesë e mirë e mbetjeve riciklohet dhe rikthehet në treg duke ulur edhe numrin e sasisë së mbetjeve në territorin e vendit, por edhe të mbetjeve që përfundojnë në landfille”, theksoi Jaupaj.

Ministri Jaupaj u shpreh se bashkë me GIZ ka pasur disa angazhime në bashki rurale që bujqësinë e kanë një funksion kryesor të ekonomisë së tyre.

“Në fund të gushtit kryeministri Rama prezantoi reformën e re të menaxhimit të mbetjeve në Shqipëri. Por kemi një qasje komplet inovatore sa i takon grumbullimit dhe trajtimit të mbetjeve duke sjellë në këtë fazë edhe zgjerimin e ekonomisë qarkulluese”, tha Jaupaj.

Ai theksoi se ky investim i shtohet përpjekjeve të Shqipërisë për të prezantuar këtë lloj politike.

“Para dy javësh ne miratuam në Parlament ligjin “Për menaxhimin e mbetjeve” cka sjell një qasje të re inovatore, por edhe konform legjislacionit të BE-së, ku grumbullimi dhe riciklimi janë në qendër të tij”, tha Jaupaj.

Ministri Jaupaj theksoi se akoma sot normat e riciklimit janë në 18%.

Sipas tij, kjo tregon që tregu shqiptar me 870 mijë tonë mbetje që prodhon në vit është një treg i rëndësishëm edhe për ricikluesit. “Me incentivën që do të jepet nëpërmjet ligjit për përgjegjësitë e zgjeruara të prodhuesit, kjo do të sjellë edhe një rritje ekonomike të këtyre kompanive”, tha ministri i Mjedisit.

Me mbështetjen e Ministrisë së Mjedisit, projekti zbatohet nga GIZ Albania dhe Partners Albania, me bashkëfinancim nga Bashkimi Europian dhe qeveria gjermane.

/k.s/j.p/

The post Kompania e parë e riciklimit të qelqit në Bubq, Jaupaj: Qasje inovatore për trajtimin e mbetjeve appeared first on Agjencia Telegrafike Shqiptare.

TIRANË, 3 nëntor/ATSH/ Ministri i Mjedisit, Sofjan Jaupaj pas prezantimit të projektligjit të ri “Për gjuetinë” në Komisionin për Kulturën, Turizmin dhe Diasporën u ndal tek disa nga masat e parashikuara në këtë projektligj për mbrojtjen e biodiversitetit.

Jaupaj tha se arsyeja pse po bëhet kalimi i kompetencave nga njësitë qendrore tek njësitë e qeverisjes vendore lidhet ngushtësisht me reformën territoriale të vitit 2016.

“Para 2016 masivet pyjorë menaxhoheshin në nivel qendror nga Ministria e Mjedisit, Pyjeve dhe Ujërave ku kishim edhe drejtoritë e shërbimeve pyjore, të cilët ishin menaxherët e funksionit të gjuetisë. Në 2016 me reformën territoriale pyjet u vendosën në kompetenca të Njësive Qendrore Vendore (NJQV), të cilat kanë të organizuar drejtoritë përkatëse të pyjeve ku kanë sipas kompetencave të ligjit, NJQV kanë kompetencat për planet e mbarështimit dhe popullimit të masiveve pyjore duke qenë se shumica e aktivitetit të gjuetisë kryhet në zonat pyjore dhe sa i takon zonave fushore kryesisht janë zonat e ligatinave për shkak të shpendëve shtegtues”, u shpreh ministri Jaupaj.

Sipas Jaupajt, është përcaktuar që këto kompetenca t’i kalojnë njësive të qeverisjes vendore, të cilat i kanë tashmë drejtoritë dhe njësitë përkatëse sa i takon menaxhimit të pyjeve dhe zonave pyjore.

Jaupaj theksoi disa nga masat në lidhje me mbrojtjen e biodiversitetit.

“E para konsiderohet ajo që quhet lista e kuqe që miratohet çdo vit nga Ministria e Mjedisit, sa i takon tipologjisë së faunës, që nuk mund të jetë objekt gjuetie, e cila varion edhe në bazë të censuseve të caktuar. Nëse një vit kemi rënie të popullatës së një specie të caktuar ajo futet në listë të kuqe në mënyrë që të mos jetë objekt gjuetie. E dyta ka të bëjë me sipërfaqet e zonave të gjuetisë ku do të jetë patjetër i përfshirë ç’ka nuk ka qenë më përpara e kombinuar me zonat e mbarështimit të faunës dhe kjo është në fakt një nga detyrimet”, nënvizoi Jaupaj.

Ministri Japupaj vuri në dukje se vendosja e mjeteve të kontrollit për gjuetarët do të jetë e kontrolluar nga menaxheri.

“Nga ana tjetër sot që flasim në disa zona kryesisht në zonat e mbrojtura në lidhje me censusin e gjitarëve ne përdorim ato që quhen kamera kurth apo kamera të vëzhgimit të faunës ç’ka do të jetë e detyrueshme për të gjitha zonat e gjuetisë”, tha Jaupaj.

Duke u ndalur tek masat për sezonin e gjuetisë, Jaupaj theksoi se “sezoni i gjuetisë është kryesisht një sezon i shkurtër më shumë kohë merr përgatitja e gjahut se sa sezoni i gjuetisë dhe do të ketë rregulla strikte sa i takon sezonalitetit, ashtu siç ndodh me sezonin turistik në lidhje me  kontratat për beach bar do të aplikohet e  njëjta tipologji në lidhje me sezonin e gjuetisë. Për periudhën tjetër nuk do të lejohet ushtrimi i gjuetisë sidomos në rastet kur kemi specie që janë në fazën e mbarështimit, gjë nuk funksiononte para vendosjes së moratoriumit”.

Jaupaj u shpreh se sot ka shoqëri civile shumë të zhvilluar sa i takon çështjeve mjedisore të cilët në bashkëpunim me Ministrinë e Mjedisit do të vazhdojnë dhe të kryejnë raportet e monitorimet e tyre vjetore sa i takon censuseve të caktuara që të konsiderohen transparente edhe raportet e bëra sa i takon faunës së egër në Shqipëri.

/k.s/j.p/

The post Jaupaj: Sezon i shkurtër gjuetie, ndalim për speciet e rralla appeared first on Agjencia Telegrafike Shqiptare.

TIRANË, 29 tetor/ATSH/ Ministri i Mjedisit, Sofjan Jaupaj prezantoi sot në Komisionin për Çështjet Ligjore dhe Administratën Publike projektligjin “Për përgjegjësitë e zgjeruara të subjekteve prodhuese të produkteve që gjenerojnë mbetje”, duke e cilësuar atë një kthesë historike në politikat mjedisore të Shqipërisë.

Gjatë diskutimit të projektligjit, Jaupaj tha se “ky pr.ligj nuk është thjesht një akt normativ për të plotësuar kërkesat formale të BE-së, por një transformim i thellë në mënyrën se si ne si shoqëri e kuptojmë dhe ushtrojmë përgjegjësinë ndaj mjedisit që na rrethon dhe ndaj gjeneratave që do të vijnë pas nesh”.

Gjithashtu, vijoi Jaupaj, ky projektligj është një qasje mjedisore, e cila parashikon se prodhuesi edhe importuesi duhet të mbajnë përgjegjësi financiare dhe organizative për menaxhimin e mbetjeve që gjenerojnë nga produktet e tyre gjatë gjithë ciklit jetësor duke përfshirë fazat e mbledhjes, riciklimit dhe trajtimit fundor të tyre.

“Prezantimi këtij projektligji plotësues me ligjin e menaxhimit të mbetjeve, që miratuam dy javë më parë në parlament, sjell një transpozim të direktivës kuadër të mbetjeve. Në ligjin e ri subjektet prodhuese që vendosin produkte në tregun shqiptar duhet të jenë përgjegjëse në trajtimin e mbetjeve që krijohen nga këto produkte. Për qytetarët kjo do të thotë një ulje indirekte e barrës financiare, për bizneset e përgjegjshme që investojnë në praktika miqësore me mjedisin kemi një avantazh konkurrues duke nxitur inovacionin”, theksoi Jaupaj.

Ai tha se “projektligji sjell disa parime, si parimi në lidhje me drejtësinë, ku qytetarët nuk do të paguajnë për mbetjet e subjekteve prodhuese, kemi modernizim të mënyrës së përdorimit dhe përdorimi i ciklit të plotë të jetës së produkteve. Kemi një afrim sa i takon riciklimit që krijon vende pune dhe kursen burimet natyrore, që mund të përdoren për gjenerata”.

Jaupaj vuri në dukje se për dekada të tëra ekonomia ka ndjekur modelin linear, i cili ka dominuar zhvillimin industrial, sot po tregon kufijtë e tij.

Më tej Jupaj u shpreh se “burimet natyrore po shfrytëzohen me ritme që po tejkalojnë aftësinë e planetit por edhe te vendit tonë për t’i rigjeneruar. Mbetjet grumbullohen në sasi që tejkalojnë kapacitetin për t’u menaxhuar. Mjedisi që duhet t’u lëmë brazave të rinj dëmtohet në mënyrë që rrezikon edhe vetë bazat e mirëqenies së këtij brezi”.

“Ligji “Për përgjegjësitë e zgjeruara të subjekteve prodhuese të produkteve që gjenerojnë mbetje” përfaqëson hyrjen e Shqipërisë në epokën e ekonomisë qarkulluese ku produktet ruhen, mbetjet ripërdoren, mbetjet transformohen. Parimi “ndotësi paguan” nuk është vetëm një mekanizëm mjedisor, por është një imperativ i drejtësisë ai që përfiton nga vënia në treg e një produkti duhet të mbajë përgjegjësi atë që mbetjet pas konsumit të tij krijojnë. Kjo është një dretësi ekonomike dhe sociale”, tha Jaupaj.

Jaupaj bëri të ditur se “ligji synon të hyjë në fuqi në 1 qershor 2026 duke krijuar një përudhë tranzitore që u krijon bizneseve që janë subjekt i këtij ligji të përshtaten me kërkesat e reja”.

Komisioni për Çështjet Ligjore dhe Administratën Publike, Foto: Andrin Hoxha

1 nga 8

/k.s/r.e/

The post Pr.ligji për mbetjet, Jaupaj: Përgjegjësi financiare e organizative për ndotësit appeared first on Agjencia Telegrafike Shqiptare.