Përhapja e gjerë e inteligjencës artificiale ka të ngjarë të zhvendosë njerëzit nga vendet e punës në një mënyrë ashtu si gjatë Revolucionit Industrial, paralajmëroi guvernatori i Bankës së Anglisë, ndërsa rriten shqetësimet në lidhje me ndikimin e teknologjisë tek të rinjtë që hyjnë në tregun e punës.
Andrew Bailey tha se Mbretëria e Bashkuar duhet të ketë “trajnimin, arsimimin (dhe) aftësitë e nevojshme” për të ndihmuar punëtorët të kalojnë në punë që përdorin inteligjencën artificiale.
Duke folur për BBC Radio 4, Bailey tha se njerëzit që kërkojnë punë do të gjenin punë “shumë më lehtë” nëse do t’i kishin këto aftësi.
Megjithatë, ai paralajmëroi se inteligjenca artificiale mund ta bëjë më të vështirë për profesionistët më të rinj dhe pa përvojë të sigurojnë role të nivelit fillestar.
“Duhet të mendojmë: çfarë po i bën kjo rrjedhës së njerëzve? A po e ndryshon apo jo?” tha ai duke shtuar se “mendoj se nëse janë njerëz që punojnë me inteligjencën artificiale, nuk jam i sigurt nëse do ta ndryshojë rrjedhën e punës, por mendoj se kemi të drejtë ta kemi parasysh këtë pikë”.
AI po integrohet gjithnjë e më shumë në të gjithë ekonominë, duke i mundësuar kompjuterëve të përpunojnë sasi të mëdha të dhënash, të identifikojnë modele dhe të ndjekin udhëzime komplekse.
Ndërsa shumë e shohin potencialin e saj për të rritur produktivitetin, ka frikë në rritje për efektin e saj në vende pune.
Shifrat zyrtare të publikuara këtë javë treguan se shkalla e papunësisë në Mbretërinë e Bashkuar u rrit në 5,1 për qind në tre muajt deri në tetor, me të rinjtë që u goditën më rëndë.
Zyra për Statistikat Kombëtare raportoi se numri i të papunëve të moshës 18-24 vjeç u rrit me 85 000 gjatë kësaj periudhe, rritja më e madhe që nga nëntori i vitit 2022.
Disa kritikë kanë fajësuar rritjet e pagës minimale dhe taksat më të larta për shkak se i kanë bërë firmat më të ngurruara për të punësuar staf të ri.
Një në tre të rritur në Mbretërinë e Bashkuar po përdorin inteligjencën artificiale (IA) për mbështetje emocionale ose për ndërveprim social, sipas një hulumtimi të publikuar nga një organ qeveritar.
Dhe një në 25 persona kthehet te kjo teknologji për mbështetje ose bisedë çdo ditë, tha Instituti i Sigurisë së IA-së (AISI) në raportin e tij të parë.
Raporti bazohet në dy vjet testimesh të aftësive të më shumë se 30 modeleve të avancuara të IA-së, të cilat nuk janë emëruar, duke mbuluar fusha kritike për sigurinë, përfshirë aftësitë kibernetike, kimi dhe biologji, raporton bbc.
Qeveria tha se puna e AISI-së do të mbështesë planet e saj të ardhshme duke ndihmuar kompanitë të rregullojnë problemet “para se sistemet e tyre të IA-së të përdoren gjerësisht”.
Një sondazh i AISI-së me mbi 2000 të rritur britanikë zbuloi se njerëzit përdorin kryesisht “chatbot” si ChatGPT për mbështetje emocionale ose ndërveprim social, ndjekur nga asistentët zanorë si Alexa e Amazon.
Hulumtuesit gjithashtu analizuan se çfarë ndodhi me një komunitet online prej më shumë se dy milionë përdoruesish të Reddit-it, të dedikuar për diskutimin e shokëve të IA-së, kur teknologjia dështoi.
Ata zbuluan se kur “chatbot” ndërpriten, njerëzit raportuan “simptoma të tërheqjes” të përshkruara nga vetja, si ndjenja ankthi ose depresioni, si dhe ndërprerje të gjumit ose neglizhencë të përgjegjësive të tyre. /Telegrafi/
Mbretëria e Bashkuar ka nënshkruar një pakt të ri migracioni me Greqinë që synon forcimin e sigurisë kufitare dhe ndërprerjen e bandave të kontrabandës së qenieve njerëzore që veprojnë në të gjithë Evropën dhe Mesdheun.
Sekretarja e jashtme britanike, Yvette Cooper, nënshkroi marrëveshjen gjatë një vizite në Athinë, ku po takohet me homologun e saj grek, George Cerapetritis.
Partneriteti do të rrisë bashkëpunimin mbi kthimet, zbatimin e ligjit dhe adresimin e nxitësve të migracionit.
Sipas marrëveshjes, Mbretëria e Bashkuar do të ofrojë trajnime për agjencitë greke të zbatimit të ligjit për të ndihmuar në luftimin e krimit të organizuar të imigracionit dhe për të ndërprerë zinxhirët e furnizimit të përdorur për të lehtësuar kalimet me anije të vogla.
Pakti bazohet në operacionet e përbashkëta të kohëve të fundit midis autoriteteve greke dhe Agjencisë Kombëtare të Krimit të Mbretërisë së Bashkuar.
“Kalimet e paligjshme dhe të rrezikshme me anije po dëmtojnë sigurinë kufitare si në Kanal ashtu edhe në Mesdhe. Përballimi dhe parandalimi i migracionit të paligjshëm dhe ndjekja e bandave kriminale të kontrabandistëve me vlerë shumë milionë funtash është një përparësi kryesore si për Mbretërinë e Bashkuar ashtu edhe për Greqinë”, tha Cooper, duke shtuar se krimi i organizuar i imigracionit është një kërcënim global.
Ajo gjithashtu tha se marrëveshja do të ndihmojë në trajtimin e rritjeve të kontrabandës më herët përgjatë rrugëve të migracionit, duke ndihmuar në “adresimin e këtyre problemeve para se të arrijnë në brigjet tona”.
Vizita përfshin edhe një njoftim për financim të ri të Mbretërisë së Bashkuar për projekte në Algjeri, Egjipt dhe Tunizi.
Financimi do të mbështesë krijimin e vendeve të punës dhe do të ndihmojë në devijimin e mijëra migrantëve potencial drejt punësimit më afër shtëpisë, duke reduktuar presionet që çojnë në kalime të rrezikshme të Mesdheut.
Pakti me Greqinë vjen pas një serie marrëveshjesh të fundit të Mbretërisë së Bashkuar mbi migracionin, duke përfshirë një marrëveshje kthimi me Francën dhe partneritete të reja me Gjermaninë, Irakun dhe vendet në Ballkanin Perëndimor.
Në orët e hershme të mëngjesit të Krishtlindjes të vitit 1950, dekani i Abacisë së Uestminsterit në Londër, u zgjua për të zbuluar se shtëpia e tij ishte vizituar gjatë natës. Në vend që t’ia linin një dhuratë të këndshme, të panjohurit misteriozë ishin larguar me një nga objektet më të çmuara të Abacisë. Që nga kurorëzimi i Uilliam Pushtuesit në vitin 1066, Abacia kishte shërbyer si vend për ngjarje mbretërore; pika qendrore e këtyre ceremonive ishte Froni i Kurorëzimit prej druri, i cili kishte një gur të vendosur në bazën e tij. Ky nuk ishte një gur i çmuar që shkëlqente; Guri i Fatit, i njohur gjithashtu si Guri i Skonit, ishte një bllok i kuq ranor prej 150 kilogramësh - por, kishte një peshë më të madhe simbolike. Dhe, tani ishte hequr me forcë.
Dy ditë më vonë, dekani i zemëruar, Alan Don, bëri një apel solemn në radion e BBC-së lidhur me këtë "krim të pakuptimtë". Ai tha: “Ka qenë në Abaci për mbi 600 vjet dhe askush deri në këtë javë nuk e kishte guximin të vendoste duart e sakrilegjit mbi të. Ky relikt i çmuar ... është i dashur për miliona njerëz në të gjithë Komonuelthin dhe Perandorinë Britanike dhe jo më pak nga ata që, si unë, shohin në të simbolin e prejardhjes skoceze të mbretit tonë të dashur”. Ai premtoi: “Do të shkoj në skajet e Tokës për ta rikthyer”.
- YouTube
Dy ditë më vonë, buletini i lajmeve të BBC-së [BBC Newsreel] raportoi një të dhënë të mundshme; inicialet JFS "duket se janë gërvishtur rishtazi në fron, dhe mendohet se nënkuptojnë 'Justice for Scotland' [Drejtësi për Skocinë] dhe mbështesin teorinë se zhdukja e gurit është vepër e nacionalistëve ekstremë skocezë".
Grabitja e gurit nga mbreti Eduard I në vitin 1296 ishte ende një pikë e ndjeshme për disa skocezë, të cilët besonin se ai nuk kishte asnjë arsye të mbahej në Angli. Në fund të fundit, guri ishte përdorur në kurorëzimet e mbretërve skocezë për qindra vjet përpara se të merrej dhe të vendosej në fronin e kurorëzimit të gdhendur prej lisi të Eduardit.
Kur mbreti i Skocisë dorëzoi kurorën e tij përpara Eduardit I në vitin 1296, Guri i Fatit u sekuestrua dhe u transportua në UestminsterAlamy
Dëshmitë e grabitjes së mëngjesit të Krishtlindjes ishin të dukshme kur kamerat e BBC-së vizituan vendin. Narratori vuri në dukje “gjurmën e dëmtimit” që tregonte se si guri ishte nxjerrë nga froni dhe tërhequr jashtë. Gjurmët çonin te Këndi i Poetëve, ku janë varrosur ose përkujtuar shkrimtarët nga Geoffrey Chaucer te Charles Dickens. Një derë me dry atje ishte hapur me forcë, dhe besohej se guri ishte tërhequr jashtë në Millbank - një rrugë aty pranë në afërsi të lumit të Temzës. “Aty gjurma humbi”, tha ai.
Policia ngriti postblloqe dhe mbylli kufirin mes Skocisë dhe Anglisë për herë të parë pas 400 vjetësh. Hetuesit në Skotland-Jard - selia e policisë në Londër - punuan mbi teorinë se guri ishte hedhur në ujë. Bazuar në një informacion anonim, liqeni Serpentin në Hajd-Park u kontrollua dy herë. Ndërsa raporti transmetohej, u sollën pajisje shtesë për tërheqje për të nxjerrë një objekt që mendohej se mund të ishte gur. Por, ai tashmë kishte kohë që ishte zhdukur.
Shoqata e Besëlidhjes Skoceze, e themeluar për të kërkuar që Skocia të ketë parlamentin e vet, mohoi menjëherë përfshirjen. Në raportin e buletinit, kryetari i saj John MacCormick shihet duke buzëqeshur dhe duke ngritur një dolli me atë që mendohet të jetë uiski skocez. Ai nuk bën asnjë përpjekje për të fshehur gëzimin, dhe kjo nuk ishte aspak befasi. Më vonë u zbulua se katër prej anëtarëve të rinj të shoqatës kishin kryer grabitjen e guximshme.
Në maj të vitit 1951, studentët e Universitetit të Glasgout - Ian Hamilton, Kay Matheson, Gavin Vernon dhe Alan Stuart - rrëfyen gjithçka në një intervistë në radion e BBC-së për atë që kishte ndodhur atë natë. Gjithçka nisi vonë në mbrëmjen e Krishtlindjes, kur tre djemtë hynë në Abaci ndërsa Mathesoni priste jashtë në njërën prej dy makinave për arratisje.
“Gjëja e parë që bëmë ishte të largonim pengesën që mbante publikun larg gurit”, ka thënë Vernoni. Ata e shkëputën gurin poshtë Fronit të Kurorëzimit dhe e vendosën në dysheme. Palltoja e Ian Hamiltonit u bë dyshek i improvizuar për ta tërhequr. Vernoni shtoi: “Alani dhe unë morëm secili një mëngë të palltos, dhe Iani mori njërin nga zinxhirët e gurit. Dhe, sapo ai e tërhoqi, guri u lirua”.
Froni i Kurorëzimit me Gurin e Fatit poshtë vendit të uljes, fotografuar në Abacinë e Uestminsterit në vitin 1937Alamy
Por, triumfi zgjati për pak kohë. Ndërsa po e tërhiqnin gurin e rëndë, ai u ça në dy pjesë. “Më kujtohet sa i tmerruar isha”, pranoi Hamiltoni. “Kishim kaluar 400 milje dhe aty, sapo e tërhoqëm gurin, ai u nda”. Pa e ditur ata, gati katër dekada më parë një sulm me bombë nga një sufraxhete mund ta ketë dobësuar gurin. Në mes të kaosit, Hamiltoni kapi fragmentin më të vogël - që peshonte ende rreth 41 kilogramë - dhe vrapoi jashtë Abacisë duke e mbajtur si një top të ragbit.
Jashtë, Mathesoni lëvizi makinën përpara për të paralajmëruar se një polic po afrohej. Për pak çaste, ai ishte përballë tyre. Hamiltoni u hodh në ulësen pranë asaj, mbuloi gurin e thyer me një pallto të vjetër dhe trilloi një histori se ishin të dashuruar të rinj që nuk kishin ku të shkonin në natën e Krishtlindjes. Oficeri, larg çdo dyshimi, hoqi helmetën, ndezi një cigare dhe bisedoi miqësisht, pastaj i la të largoheshin.
Mathesoni e lehtësuar, u largua vetëm, por në një semafor rreth dy milje larg nga Abacia, ajo bëri një ndalesë të papritur që bëri që guri të rrokullisej në rrugë. “Fatmirësisht ishte i mbështjellë me leckë, ndaj nuk u dëmtua”, tha ajo. Hamiltoni u mahnit: “Si e ngrite atë gur që peshonte 90 paundë [41 kilogramë] dhe e vure në bagazh të makinës, këtë nuk e di”.
- YouTube
E tronditur, Mathesoni vazhdoi rrugën, duke e lënë segmentin e gurit te një mik anglez në Birmingem. Ndërkohë, me shumë vështirësi, tre djemtë e tjerë futën pjesën më të madhe të gurit në makinën e dytë dhe u larguan nga vendngjarja. Të pasigurt për hapin tjetër, ata e varrosën atë pranë një pylli në Roçester të Kentit dhe u kthyen në shtëpi. Por, filluan të shqetësoheshin se guri, që ishte mbajtur brenda për 654 vjet, nuk do ta përballonte mirë të ftohtin e dimrit.
Hamiltoni i tha BBC-së në programin Witness History, në vitin 2018, se kur ata u kthyen për ta rimarrë atë në natën e Vitit të Ri, ose Hogmanaj, gjetën një kamp të vendosur nga udhëtarët [traveller - nomadë romë të Britanisë] “pikërisht aty ku ishte guri”. Ata i bindën të ndihmonin për ta mbajtur gurin deri te makina e tyre, dhe udhëtarët nuk i treguan kurrë policisë për ta.
Guri kaloi kufirin drejt Skocisë, për herë të parë që nga viti 1296, dhe iu dorëzua John Rollos - një biznesmen nga Haj-Bonibrixhi pranë Follkërkut. Ai pranoi me një kusht: “Askush përveç meje nuk do ta dijë ndonjëherë ku ndodhet, sepse një sekret është sekret vetëm kur është me një person të vetëm”. Policia nuk e zbuloi kurrë historinë e tij të vërtetë. Kur u intervistua nga BBC në vitin 1971, ai këmbënguli që regjistrimet të mbaheshin të fshehta deri në vdekjen e tij. Besnikë ndaj fjalës së dhënë, intervista nuk u transmetua deri në vitin 1986. Si nënkryetar i Shoqatës së Besëlidhjes Skoceze, hetuesit dyshuan se mund të ishte i përfshirë dhe e vizituan fabrikën e tij disa herë. Nuk e dinin që ai po fshihte pjesën më të vogël të gurit të thyer në zyrën e tij, nën tryezën e punës.
Të dy pjesët duhej të ribashkoheshin dhe restaurimi u mbikëqyr nga Bertie Gray, një politikan nacionalist që për fat ishte gjithashtu murator guri. U zbulua në nëntor të këtij viti se Gray u kishte dhuruar fragmente të mbetura bashkëpunëtorëve të tij personalë dhe politikë.
Ndërsa riparimi vazhdonte, shpërthyen debatet për se çfarë duhej të bëhej pasi rregullimit. MacCormick arsyetoi se fushata e Besëlidhjes tashmë kishte marrë publicitet të paçmueshëm, por kishte frikë nga largimi i mbështetësve që respektonin mbretin George VI dhe nga ekspozimi i shoqatës nëse ndiqeshin penalisht. Një vend simbolik u zgjodh për rikthimin më 11 prill 1951. Guri u la në abacinë e rrënuar Arbroth, vendi i një deklarate të vitit 1320 që bënte thirrje për të drejtën e skocezëve për të qeverisur veten. Kujdestari i abacisë, z. Wishart, i tha buletinit se tre burra mbërritën me një makinë dhe e sollën atë brenda në një mbajtëse druri. Policia e transportoi atë përsëri në jug të kufirit, ndërsa juristët e lartë vendosën se çfarë do të bënin me autorët.
Në atë kohë, edhe dekani i zemëruar i Uestminsterit ishte qetësuar. Ai i tha gazetës London Daily News: “Më vjen keq për mënyrën se si u hoq nga Froni i Kurorëzimit, por nuk kam asnjë mërzi ndaj njerëzve që e morën. Jam i kënaqur që u kthye në këtë mënyrë vullnetare”.
Kay Matheson mori pjesë në një ceremoni në Kështjellën e Edinburgut që shënoi kthimin zyrtar të Gurit të Fatit në Skoci në vitin 1996Kredi: Alamy
Tre ditë më vonë, më shumë se 30 mijë tifozë skocezë të futbollit zbarkuan në Londër për të parë ekipin e tyre - duke mundur Anglinë 3-2 në Kampionatin Kombëtar. Pas ndeshjes, buletini i BBC-së ndoqi shumë prej tyre teksa shkonin në Abacinë e Uestminsterit me shpresën për të parë gurin e famshëm. Autoritetet nuk rrezikuan dhe e mbajtën atë të mbyllur jashtë pamjes, nën roje shtesë policore.
Më 19 prill, prokurori i përgjithshëm, Hartley Shawcross, i tha Parlamentit se kishte vendosur se nuk ishte në interesin publik të krijoheshin martirët apo heronjtë duke ndjekur penalisht ata që qëndronin prapa këtyre “akteve vulgare të vandalizmit”. Mes të qeshurave nga disa kolegë, deputeti i South-Ershërit, Emrys Hughes, sugjeroi që, më shumë se vandalizëm, “shumë njerëz në Skoci e konsiderojnë si përpjekje për të rikthyer një pronë të vjedhur”.
Guri u vendos përsëri në Abacinë e Uestminsterit dhe në qershor të vitit 1953, froni i mbretit Eduard - me Gurin e Fatit poshtë tij - u shfaq në televizion në të gjithë botën gjatë kurorëzimit të mbretëreshës Elizabeth II. Por, ky nuk ishte fundi i historisë. Në vitin 1996, kryeministri i Mbretërisë së Bashkuar, John Major, bëri atë që katër studentët kishin synuar më shumë se katër dekada më parë; vendosi të kthente gurin në Skoci, por vetëm me kushtin që ai të rikthehej për çdo kurorëzim të ardhshëm.
Në një ceremoni në Kështjellën e Edinburgut, në Ditën e Shna Ndreut, guri u zbulua zyrtarisht. Ian Hamilton nuk mori pjesë, por bashkëpunëtorët e tij ishin aty. Alan Stuart uroi organizatorët për “një punë shumë më të mirë se ne në vitin 1950”. Gavin Vernon i tha BBC-së se ishte ende mirënjohës që “Skotland-Jardi nuk ishte aq efikas sa do të duhej të kishte qenë, sepse ata është dashur të na kapnin brenda disa ditësh”.
Sa për Kay Mathesonin, asaj nuk i prishte punë vendndodhja e shtëpisë së re të gurit: “Qoftë në Stornouej apo në Invernes apo në Edinburg, për sa kohë që është në Skoci, unë jam e lumtur”. /Telegrafi/
Pesë burra që ishin pjesë e një bande që përdhunonte dhe sulmonte seksualisht vajzat që takonin në një park janë burgosur me dënime që variojnë nga 18 muaj deri në 14 vjet.
Gjykata e Kurorës në Newcastle, Mbretëri e Bashkuar, dëgjoi se si katër burrat rumunë dhe një shqiptar shënjestruan vajza të cenueshme në Saltwell Park, Gateshead, midis viteve 2015 dhe 2019.
Një nga gjashtë viktimat ishte një vajzë 14-vjeçare e cila u bë e varur nga kokaina që i ishte dhënë nga burrat.
E quajtur Vajza B, për të mbrojtur identitetin e saj, ajo tha: "Nuk e di nëse do të jetoj ndonjëherë një jetë normale. Jam gjithë kohës në ankth, veçanërisht nëse jam vetëm".
Ajo shtoi se ndihej e mbingarkuar dhe qante shpesh.
Banda e burrave ishte shpallur fajtore për veprat penale në një gjyq në tetor, shkruan BBC.
Codrin Dura, 27 vjeç, u dënua me 13 vjet burg për dy akuza për përdhunim, tre akuza për aktivitet seksual me një fëmijë, tentativë përdhunimi, shantazh dhe sulm seksual, të gjitha në lidhje me një vajzë të njohur si Vajza A për të mbrojtur identitetin e saj.
Dura u shpall gjithashtu fajtor për dy akuza për përdhunimin e një vajze të dytë, Vajzës B, dhe u dënua për organizimin e kryerjes së një krimi seksual me fëmijë dhe furnizimin me drogë të Klasit A.
Leanoard Paun, 24 vjeç, u dënua me pesë vjet e një muaj burg për aktivitet seksual me një fëmijë dhe një akuzë për përdhunim në lidhje me Vajzën B, dy akuza për organizim të kryerjes së një vepre penale seksuale me fëmijë, shpërndarje të një imazhi të pahijshëm të një fëmije dhe furnizim me drogë të Klasit A.
Bogdan Gugiuman, 44 vjeç, u dënua me 14 vjet burg për tre akuza për përdhunim që lidheshin me Vajzën B dhe u dënua për furnizim me drogë të Klasit A.
Gjykatësi tha se ai nuk tregoi "asnjë shprehje pendimi" për atë që i bëri vajzës, e cila ishte 14 vjeç në atë kohë.
Shtetasi shqiptar Klaudio Aleksiu, 28 vjeç, u dënua me gjashtë vjet burg për një akuzë për përdhunimin e vajzës B dhe furnizimin me drogë të Klasit A. Ai ishte 21 dhe 22 vjeç në kohën e kryerjes së veprave penale.
Stefan Ciuraru, 23 vjeç, u dënua me 18 muaj burg për katër akuza për sulm seksual ndaj vajzave B, C dhe D, aktivitet seksual me një fëmijë, vajzën E, dhe nxitje të një fëmije, vajzës F, për t'u angazhuar në aktivitet seksual.
Gjykatësi tha se kombësitë e të pandehurve ishin “të parëndësishme për procesin e dënimit” dhe mosha e shumicës së tyre në kohën e kryerjes së veprave penale vendoste “një kufizim të konsiderueshëm në dënimet që mund t’i shqiptoheshin. /Telegrafi/
Mbretëria e Bashkuar po “zhvillon me shpejtësi” plane për të përgatitur të gjithë vendin për një shpërthim të mundshëm lufte, ka njoftuar ministri i forcave të armatosura.
Duke nënvizuar rolin që civilët do të duhet të luajnë në një konflikt të madh, Al Carns tha se ushtritë, marinat dhe forcat ajrore i përgjigjen krizave, por "shoqëritë, industritë dhe ekonomitë fitojnë luftëra".
“Hija e luftës po troket përsëri në derën e Evropës. Ky është realiteti. Duhet të jemi të përgatitur ta pengojmë atë.”
Komentet e tij vijnë pasi Mark Rutte, kreu i NATO-s , u tha aleatëve se Evropa duhet të përgatitet për një përballje me Rusinë në atë shkallë që "duruan gjyshërit dhe stërgjyshërit tanë" - një referencë për Luftërat e Parë dhe të Dytë Botërore, shkruan skynews.
Në një tregues të kërcënimit, Britania zbuloi se niveli i aktivitetit armiqësor të inteligjencës - siç janë spiunazhet, hakerat dhe kërcënimet fizike - kundër forcave të saj të armatosura dhe Ministrisë së Mbrojtjes është rritur me më shumë se 50% gjatë vitit të kaluar.
Rusia , Kina , Irani dhe Koreja e Veriut dyshohet se janë fajtorët kryesorë.
Qeveria tani po lanson një njësi të re kundërzbulimi mbrojtëse për të forcuar aftësinë e saj për të zbuluar dhe ndërprerë operacionet e inteligjencës nga shtetet armiqësore.
Gjithashtu, ajo ka ndërmarrë hapa për të rritur aftësitë e spiunazhit të Ministrisë së Mbrojtjes duke kombinuar degët e ndryshme të inteligjencës ushtarake në të gjithë ushtrinë, marinën dhe forcën ajrore, si dhe Inteligjencën e Mbrojtjes, në një organizatë të re të quajtur Shërbimet e Inteligjencës Ushtarake. /Telegrafi/
Këshilli i Lartë i Prokurorisë, KLP zgjedh të enjten më 11 dhjetor drejtuesin e ri të Prokurorisë së Posaçme për Korrupsionin dhe Krimin e Organizuar, SPAK, i cili do të drejtojë këtë strukturë për tre vitet e ardhshme. Kandidatët në garë për këtë pozicion janë, prokurorët e SPAK, Adnan Xholi, Doloreza Musabelliu, Elvin Gokaj dhe […]
TIRANË, 9 dhjetor /ATSH/ Ministri i Mbrojtjes, Pirro Vengu mirëpriti sot në auditorin e Akademisë së Forcave të Armatosura pjesëmarrësit e kursit të avancuar të ACSC (Advanced Command and Staff Course) të Mbretërisë së Bashkuar, një prej programeve më prestigjioze të edukimit strategjik ushtarak në nivel global.
Programi mbledh mbi 250 kursantë nga 45 vende të botës, duke e bërë atë një platformë të rëndësishme për shkëmbimin e eksperiencave dhe praktikave më të mira.
Gjatë fjalës së tij, ministri Vengu theksoi se Shqipëria ka fituar një rol të rëndësishëm si faktor stabiliteti në rajonin e Ballkanit dhe ka forcuar në mënyrë të vazhdueshme kontributin e saj në misionet e NATO-s dhe aleatëve ndërkombëtarë.
“Edhe pse një aleat modest për nga përmasat, Shqipëria kontribuon me profesionalizëm, seriozitet dhe vullnet të palëkundur për sigurinë kolektive”, u shpreh Vengu, duke nënvizuar se besimi i partnerëve ndërkombëtarë në Forcat e Armatosura shqiptare është rezultat i punës dhe përkushtimit të vazhdueshëm.
Një startup në Mbretërinë e Bashkuar i quajtur KARRI po zhvillon një radio dore “të zgjuar” për fëmijë si një alternativë pa ekran ndaj telefonave inteligjentë.
Kompania me seli në Londër është e përqendruar në lidhjen e sigurt të prindërve dhe fëmijëve përmes një pajisjeje të aktivizuar nga të dhënat, të integruar me një aplikacion telefoni inteligjent për prindërit.
Audienca e synuar: I projektuar për fëmijë të moshës katër deri në dhjetë vjeç.
Pa ekran: Pajisja nuk ka ekran, duke inkurajuar lojërat në botën reale dhe duke shmangur rreziqet dhe shpërqendrimet e mundshme të internetit.
Komunikim i Sigurt: Fëmijët mund të dërgojnë mesazhe duke shtypur një buton dhe duke folur. Prindërit i menaxhojnë komunikimet nëpërmjet një aplikacioni të sigurt për telefonat inteligjentë.
Gjurmimi me GPS: Prindërit mund të gjurmojnë vendndodhjen e fëmijës së tyre nëpërmjet GPS-it dhe të krijojnë "zona të sigurta", duke marrë njoftime automatike nëse fëmija largohet nga zona.
Kanalet: Pajisja u lejon fëmijëve të komunikojnë me njëri-tjetrin dhe me anëtarët e miratuar të familjes në kanale të menagjuara.
Qëndrueshmëria: Përshkruhet si një pajisje e fortë dhe e papërshkueshme nga uji.
KARRI ka siguruar mbi 2 milionë paund në financim paraprak për të kaluar produktin nga prototipi në prodhim masiv dhe shpërndarje në Mbretërinë e Bashkuar. /Telegrafi/
Një analizë alarmante, bazuar në të dhëna satelitore prej dy dekadash, zbulon se sipërfaqe të mëdha të Evropës po mbeten pa ujë.
Rezervat e ujit të ëmbël po pakësohen në të gjithë Evropën jugore dhe qendrore, nga Spanja dhe Italia në Poloni dhe pjesë të Mbretërisë së Bashkuar, raporton The Guardian .
Shkencëtarët nga University College London (UCL), në bashkëpunim me The Watershed Investigations dhe Guardian, analizuan të dhënat e mbledhura nga viti 2002 deri në vitin 2024 duke përdorur satelitë që monitorojnë ndryshimet në fushën gravitacionale të Tokës.
Meqenëse uji ka masë, ndryshimet në nivelet e ujërave nëntokësore, lumenjve, liqeneve, lagështisë së tokës dhe akullnajave janë të dukshme në sinjalin e gravitetit, duke u lejuar satelitëve të "peshojnë" në mënyrë efektive se sa ujë ruhet në një zonë.
Rezultatet e analizës zbulojnë një ndarje të mprehtë: veriu dhe veriperëndimi i Evropës - veçanërisht Skandinavia, pjesë të Mbretërisë së Bashkuar dhe Portugalisë - po bëhen më të lagështa.
Në të njëjtën kohë, pjesë të mëdha të jugut dhe juglindjes, duke përfshirë Spanjën, Italinë, Francën, Zvicrën, Gjermaninë, Rumaninë, Ukrainën dhe gjithashtu pjesë të Mbretërisë së Bashkuar, po thahen me shpejtësi.
Shkencëtarët thonë se ndarja e klimës është e dukshme në të dhëna.
Kjo duhet të jetë një "thirrje zgjimi" për politikanët që janë ende skeptikë në lidhje me uljen e emetimeve, sipas Mohammad Shamsudduha, profesor i specializuar në krizat e ujit.
Sipas analizës së shkencëtarëve, edhe rezervat e fshehura të ujërave të ëmbla të Evropës po shterohen në mënyrë të rrezikshme.
Por kjo krizë duket të jetë globale.
Problemi nuk kufizohet vetëm në Evropë. Globalisht, me thatësi po përballen edhe vende në Lindjen e Mesme, Azi, Amerikën e Jugut, përgjatë bregdetit perëndimor të SHBA-së dhe në të gjithë Kanadanë, dhe tendenca dramatike janë të dukshme edhe në Grenlandë, Islandë dhe Svalbard.
Një shembull ekstrem vjen nga Irani, ku kryeqyteti Teheran po i afrohet "ditës zero" - momentit kur uji nuk do të rrjedhë më.
Autoritetet po planifikojnë racionimin dhe presidenti i vendit, Masoud Pezeshkian, ka thënë se nëse kjo dështon, Teherani mund të duhet të evakuohet. /Telegrafi/
Princi William i Uellsit ka vizituar fëmijët e Gazës që po trajtohen në Mbretërinë e Bashkuar.
Ai u “prek nga guximi” që ata treguan pasi përjetuan gjëra “me të cilat asnjë fëmijë nuk duhet të përballet kurrë”.
Në maj, dy fëmijë nga Gaza u bënë të parët që udhëtuan për në Mbretërinë e Bashkuar për kujdes të specializuar mjekësor.
Puna për të filluar evakuime të mëtejshme për trajtim të specializuar nga NHS filloi në vjeshtë, shkruan skynews.
Raportohet se 50 fëmijë dhe familjet e tyre të ngushta janë dërguar në Mbretërinë e Bashkuar që nga 21 nëntori, sipas Departamentit të Shëndetësisë dhe Kujdesit Social (DHSC).
"Kohët e fundit, Lartësia e Tij Mbretërore, Princi i Uellsit, takoi një numër të vogël fëmijësh nga Gaza të cilët aktualisht po marrin kujdes të specializuar në Mbretërinë e Bashkuar", tha një zëdhënës i Pallatit Kensington.
"Princi dëshiroi t'u ofronte një moment ngushëllimi këtyre të rinjve që kanë përjetuar përvoja që asnjë fëmijë nuk duhet t'i përjetojë kurrë."
William gjithashtu donte të ofronte "mirënjohjen e tij të përzemërt për ekipet e NHS që ofrojnë kujdes të jashtëzakonshëm gjatë një kohe kaq të vështirë", shtoi deklarata.
“Lartësia e Tij Mbretërore u prek nga guximi i treguar nga fëmijët dhe familjet e tyre dhe nga përkushtimi i ekipit që po i mbështet ata me kaq profesionalizëm dhe humanizëm."
Ndryshe, në vitin 2018, princi vizitoi një kamp refugjatësh palestinezë në Bregun Perëndimor, duke u bërë anëtari i parë i Familjes Mbretërore që bëri një udhëtim zyrtar në zonë. /Telegrafi/
Mijëra fluturime nga Airbus janë pezulluar pasi u zbulua se rrezatimi intensiv diellor mund të ndërhynte në kompjuterët e kontrollit të fluturimit në bord, duke çuar në vonesa në të gjithë botën.
Rreth 6,000 aeroplanë A320 mendohet se janë prekur, gjysma e flotës globale të kompanisë evropiane, por kuptohet që shumica do të jenë në gjendje të fluturojnë përsëri pasi t'i nënshtrohen një përditësimi të shpejtë të softuerit.
Rregullatori i aviacionit në Mbretërinë e Bashkuar tha se do të ketë "disa ndërprerje dhe anulime të fluturimeve", megjithëse ndikimi në aeroporte duket të jetë i kufizuar.
Airbus tha se e zbuloi problemin pas një hetimi mbi një incident në të cilin një aeroplan që fluturonte midis SHBA-së dhe Meksikës humbi papritur lartësinë në tetor.
Aeroplani i JetBlue Airways bëri një ulje emergjente në Florida pasi të paktën 15 persona u lënduan.
Përveç A320, aeroplanit më të shitur të kompanisë, kjo dobësi ndikon edhe në modelet A318, A319 dhe A321.
Kuptohet që në rreth 5,100 aeroplanë Airbus, problemi mund të adresohet duke përdorur një përditësim relativisht të thjeshtë të softuerit që zakonisht do të zgjaste rreth tre orë.
Megjithatë, 900 aeroplanët e mbetur, të cilët janë versione më të vjetra, do të duhet të zëvendësojnë fizikisht kompjuterët në bord dhe nuk do të lejohen të transportojnë përsëri pasagjerë derisa puna të jetë përfunduar.
Kohëzgjatja që do të duhet do të varet nga disponueshmëria e kompjuterëve zëvendësues.
Airbus tha se pranoi se kjo do të çojë në "ndërprerje operacionale për pasagjerët dhe klientët" dhe ka kërkuar falje. /
Analistja e aviacionit Sally Gethin tha se situata ishte "shumë e pazakontë", duke vënë në dukje se ndërprerjet do të vareshin nga "qasjet e ndryshme" që linjat ajrore do të ndërmarrin ndaj përditësimit të softuerit. /Telegrafi/
Gjermania dhe Franca kohët e fundit lansuan strategji të reja hapësinore. Po vendet e tjera?
Në të gjithë Evropën, agjencitë hapësinore po zgjerojnë strategjitë e tyre për të kombinuar shkencën me sigurinë.
Vende të tilla si Gjermania, Franca, Italia dhe Mbretëria e Bashkuar po investojnë në satelitë hapësinorë, mbrojtje dhe aftësi lëshimi për të mbrojtur asetet, për të rritur konkurrencën dhe për t'iu përgjigjur kërcënimeve të reja në orbitë.
Theksi në mbrojtje vjen në mes të kërcënimeve të bllokimit të GPS, raketave të reja kinetike dhe varësisë nga sistemet e huaja që kërcënojnë të kufizojnë aksesin në hapësirë të Evropës.
Gjermania
Gjermania zbuloi strategjinë e saj të parë kombëtare për të ardhmen e hapësirës, me fokus në siguri.
Plani i ri , i zbuluar në nëntor, mbulon projektet e fluturimeve hapësinore, zgjerimin e rrjeteve satelitore dhe bashkëpunimet ndërkombëtare në mënyrë që vendi të bëhet “më i aftë për veprim” në hapësirë, thuhet në një deklaratë qeveritare.
“Sistemet hapësinore janë bërë një pjesë integrale e jetës sonë… dështimi ose ndërprerja e tyre do të kishte pasoja serioze për sigurinë dhe jetën tonë të përditshme”, tha ministri i mbrojtjes Boris Pistorius në një deklaratë.
Gjithashtu, ai cakton 35 miliardë euro investime të reja për sektorin hapësinor “në vitet e ardhshme”, për të mbrojtur gjermanët nga incidente të tilla si ndërprerjet e sinjalit GPS nga Rusia në rajonin e Detit Baltik.
Franca
Presidenti Emmanuel Macron njoftoi në nëntor se strategjia e re hapësinore e Francës do të bashkojë kërkimin shkencor dhe sigurinë.
Plani francez ka pesë qëllime kryesore: ruajtjen e aksesit konkurrues në hapësirë, ndërtimin e një ekonomie hapësinore, ruajtjen e një arkitekture ushtarake hapësinore, investimin në kërkim dhe nxitjen e bashkëpunimit ndërkombëtar.
Ndër qëllimet e listuara në plan është modernizimi i qendrës hapësinore në Guianën Franceze, ku Ariane 6 përfundimisht do të kryejë fluturime komerciale.
Plani përfshin një investim shtesë prej 4.2 miliardë eurosh në mbrojtjen hapësinore, duke e çuar investimin total në mbi 10 miliardë euro deri në vitin 2030.
Macron tha se plani përputhet me konkurrencën në hapësirë, siç janë armët energjetike dhe laserët.
Një nga armët në të cilat Franca mund të investojë janë satelitët me mision patrullimi të quajtur Orbit Guard dhe Toutatis, të cilët do të jenë në gjendje të mbrojnë asetet e vendit në orbitë.
Plani do të forcojë gjithashtu aftësitë ushtarake në inteligjencë, sisteme paralajmërimi të hershëm dhe komunikime.
Franca do të kontribuojë më shumë në kërkimet në shkencat e Tokës për të ndihmuar përpjekjet për qëndrueshmëri ndaj klimës.
Bëhet e ditur se plani i fundit bazohet në Aktin e Programimit Ushtarak të Francës , i cili premtoi të ndërtonte sisteme që mund të zbulonin akte të dyshimta ose agresive në hapësirë.
Vendi ka lansuar gjithashtu Paktin Hapësinor, një grup për të lehtësuar bisedat midis ushtrisë dhe aktorëve të industrisë hapësinore.
Italia
Në tetor, buxheti i Italisë caktoi 109 milionë euro për nisjen e një plani të mbrojtjes hapësinore.
Ndërsa aktualisht është duke u zhvilluar, qeveria tha se do të jetë një plan që do ta ndihmojë Italinë të përgjigjet ndaj kërcënimeve të mundshme që mund të ndodhin në dy dekadat e ardhshme.
Plani përfundimisht do të identifikojë “aftësitë afatshkurtra dhe do të mbushë boshllëqet operacionale”, në mbrojtje të tij.
Qeveria ndau 131 milionë euro shtesë për mbikëqyrjen e hapësirës ose “monitorimin e objekteve hapësinore”, për të mbrojtur asetet kombëtare hapësinore, për të mbajtur nën vëzhgim mbeturinat hapësinore dhe për të ruajtur një “qasje të sigurt” në hapësirë.
U ndanë gjithashtu 186 milionë euro për satelitin Sicral 3 me frekuencë të lartë që do të përmirësojë komunikimet e sigurta midis qeverisë italiane dhe ushtrisë.
Sistemi u zhvillua për herë të parë në vitin 2001 nga Telespazio dhe Thales Alenia Space.
Thales mori një kontratë prej 100 milionë eurosh nga Agjencia Italiane e Hapësirës për të ndërtuar një rrjet fabrikash satelitësh në të gjithë Italinë që duhet të jetë plotësisht funksionale deri në vitin 2026, sipas raportimeve lokale.
Italia po investon gjithashtu në një konstelacion satelitësh për vëzhgimin e Tokës që do të monitorojnë ndryshimet mjedisore dhe do të mbështesin shërbimet kritike në vend.
Lëshimi i parë për konstelacionin e ardhshëm Iride ndodhi në janar 2025.
Vendi po punon me Gjermaninë dhe Francën për zhvillimin e disa lëshuesve evropianë, përfshirë Ariane 6 dhe Vega-C.
Mbretëria e Bashkuar
Plani i Agjencisë Hapësinore të Mbretërisë së Bashkuar, i publikuar në shtator, do të përdorë hapësirën për të forcuar ekonominë e vendit, për të rritur sigurinë dhe për të vazhduar të zhbllokojë "zbulime globale që frymëzojnë miliona njerëz".
Vendi do të investojë në aftësi të vogla lëshimi, të tilla si automjete lëshimi, porte hapësinore miqësore me mjedisin dhe në zhvillimin e fushave të komunikimit satelitor.
Ekziston gjithashtu një shtytje nga Mbretëria e Bashkuar për të ndërtuar kapacitetet e duhura për të riparuar, përmirësuar ose montuar satelitët ndërsa janë në orbitë.
Agjencia Hapësinore e Mbretërisë së Bashkuar thotë se do t'i arrijë planet e saj duke ndërtuar vende pune gjithëpërfshirëse, duke bërë më shumë investime në fushat e shkencës dhe inovacionit dhe përmes partneriteteve ndërkombëtare.
Suedia
Vendi nordik nisi strategjinë e tij të parë hapësinore të mbrojtjes dhe sigurisë në vitin 2024.
Strategjia bazohet në katër shtylla: autonomia në hapësirë, zhvillimi i një “portofoli të fuqishëm” të aseteve hapësinore për të mbështetur mbrojtjen kombëtare, sigurinë kolektive dhe zhvillimin e njohurive përkatëse për projektet e mbrojtjes.
Për ta bërë këtë, strategjia thoshte se shteti do të zgjerojë bashkëpunimin midis agjencive qeveritare, kompanive private në sektorin e hapësirës dhe potencialisht do të përshtatë legjislacionin hapësinor.
Qeveria ka ndarë gjithashtu 1 miliard korona (914 milionë euro) për Forcat e Armatosura Suedeze për zbulim dhe mbikëqyrje.
Politika e mbrojtjes thotë se vendndodhja e Suedisë pranë Polit të Veriut e bën atë një vend ideal për të operuar, monitoruar dhe lëshuar satelitë polarë në veçanti.
Strategjia e Suedisë thoshte se po ndërton kapacitete lëshimi për portin hapësinor Esrange, një vend lëshimi në veri.
Firefly Aerospace do të lëshojë satelitë nga stacioni vitin e ardhshëm, sipas Korporatës Hapësinore Suedeze.
Holanda
Hapësira është një nga fushat kryesore të identifikuara nga Holanda në Strategjinë e saj të Mbrojtjes Holandeze për fundin e dekadës.
Ajo përcakton një sërë objektivash hapësinore për katër vitet e ardhshme.
Deri në vitin 2027, ushtria do të ketë një rrjet satelitësh që do t'i ofrojnë asaj informacion të besueshëm.
Deri në vitin 2030, holandezët duan të përdorin algoritme të përparuara të Al për të ndjekur objektet në hapësirë, për të regjistruar vëzhgimet e Tokës dhe për të koordinuar komunikimin satelitor.
Në të njëjtën kohë, ushtria synon të ketë akses në një sistem evropian të paralajmërimit të hershëm për të ndihmuar në mbrojtjen ajrore dhe raketore. /Telegrafi/
Nga: Robert Fox / Independent Përkthimi: Telegrafi.com
Të enjten, sekretari i Mbrojtjes, John Healey, paralajmëroi Vladimir Putinin dhe ushtrinë e tij pas raporteve për veprime agresive nga anija ruse e vëzhgimit Yantar, kundrejt një aeroplani të RAF-it [Forcat Ajrore Mbretërore] të dërguar për ta ndjekur atë në Veri të Skocisë.
Healey tha se ekuipazhi i Yantar-it kishte drejtuar rreze lazeri ndaj pilotëve të një aeroplani patrullues detar, RAF P-8. “Ajo që bëri Rusia është jashtëzakonisht e rrezikshme”, paralajmëroi ai. “Ju shohim. E dimë çfarë po bëni. Dhe, nëse Yantar-i kalon më në Jug këtë javë, jemi gati”.
Të përgatitur për çfarë, mund të pyesni? Aktivitetet e Yantar-it rreth ishujve britanikë janë vërejtur prej pothuajse tri vjetësh. Verën parafundit, roja bregdetare irlandeze e vërejti anijen duke qëndruar për gati një muaj pranë Limerikut, afër një prej nyjave kryesore të kabllove transatlantike të komunikimit. Kjo anije i përket agjencisë GUGI të Rusisë, një komandë e veçantë detare tashmë përgjegjëse për mbikëqyrjen oqeanike dhe sabotimin. Në inventarin e GUGI-t përfshihet edhe nëndetësja Belgorod që mund të lëshojë dronë sulmues nënujorë, të aftë për të prerë kabllot nënujore dhe tubacionet e naftës dhe gazit.
Vetëm disa orë para se Healey t’i drejtohej Putinit me paralajmërimin, Komiteti i Mbrojtjes në Parlament përfundoi, pas një hetimi të gjatë, se Mbretëria e Bashkuar nuk është në gjendje të mbrojë veten, territoret e saj apo aleatët - veçanërisht territorin e saj të brendshëm. Raporti, i titulluar “Pyetje mbi aftësinë themelore të Britanisë për t’u mbrojtur”, e thotë troç: “Përfundim: E vëmë në dyshim aftësinë e Ministrisë së Mbrojtjes për të mbrojtur Britaninë dhe territoret përtej detit në rast krize ose konflikti”.
Britania nuk po përmbush detyrimin e saj kryesor sipas nenit 3 të Kartës themeluese të NATO-s, që e detyron një shtet të jetë në gjendje të mbrojë veten, në mënyrë që të mund të ndihmojë aleatët. Në mënyrë gati unike, Britania ende nuk ka një plan kombëtar të mbrojtjes të përshtatur me standardet e NATO-s, edhe pse është anëtare themeluese e aleancës.
Ndër dobësitë më të mëdha të theksuara në raport janë mbrojtja e pamjaftueshme nga raketat dhe dronët, veçanërisht për objektet kyçe si Aeroporti Hithrou, Qendra Financiare e Londrës dhe portet e kontejnerëve në bregun lindor.
Imagjinoni këtë skenar: një mëngjes me mjegull, në nëntor, radarët holandezë të mbrojtjes ajrore paralajmërojnë se një tufë dronësh ushtarakë ose raketash lundruese subsonike po i afrohen grykëderdhjes së Temzës dhe Londrës qendrore. “Kemi vetëm një grusht baterish të raketave ajrore Sabre, të shpërndara mes Ishujve Fokland, Polonisë dhe fushës Solisbëri për stërvitje”, thotë analisti kryesor dhe ish-oficeri i Mbrojtjes Territoriale, Francis Tusa. “Do të duheshin disa minuta për të ngritur në ajër fluturimin e shpejtë reagues Typhoon nga Koningsbaji. Deri atëherë, dronët e armatosur mund jenë mbi stacionin Uoterlu në orarin me trafikun më të dendur”.
Armët e reja të luftës në Ukrainë - raketat Iskander e Kinshal, dronët sulmues me dizajn kinez - paraqesin rreziqe të reja. Mbrojtja ajrore e Anglisë është pak më e mirë sesa ajo e përdorur gjatë Lojërave Olimpike të vitit 2012 në Londër - dhe, edhe atëherë ishte mjaft e dobët. Një goditje e vetme mund të rrëzojë infrastrukturën e qarqeve lindore: rrjetin elektrik, portet e kontejnerëve në Tilbëri ose Filiksstou, bankat e Qytetit të Londrës, stacionet kryesore të hekurudhave si Uoterlu ose Pedington, dhe Aeroportin Hithrou.
Në qershor, qeveria publikoi Rishikimin Strategjik të Mbrojtjes dhe Strategjinë e Sigurisë Kombëtare. U premtua rritje e shpenzimeve për mbrojtje - deri në 2.5 përqind të PBB-së deri në vitin 2027, dhe ndoshta 3.5 përqind deri në 2030 - kohë kur do të ketë një qeveri të re përballë një grupi të ri problemesh.
Shërbimet ushtarake janë të nënfinancuara dhe të papërgatitura për krizën për përkeqësim të sigurisë në të gjithë Evropën. Ushtria nuk ka municione, pajisje dhe staf të mjaftueshëm. Ka vetëm 14 artileri të mesme 155 milimetërshe, “dhe më shumë topa ceremonialë sesa armë funksionale për operacione”, thotë një gjenerali aktiv. Dy aeroplanmbajtëset e mëdha nuk funksionojnë ende siç duhet. Ushtria e ka vënë gjithë interesin te tanku zbulues Ajax, që do të kushtojë gati shtatë miliardë paundë për 590 njësi, të cilat sapo kanë filluar të hyjnë në përdorim - dhjetë vjet me vonesë.
Këtë javë, brigadieri Ben Barry, analist veteran i Institutit Ndërkombëtar për Studime Strategjike, dha një vlerësim të zymtë në librin e tij Rritja dhe rënia e Ushtrisë britanike, 1970-2025: “Ushtria Britanike mezi mund të nxjerrë një brigadë të blinduar për nevojë të NATO-së në Evropën Lindore. Polonia po përgatit gjashtë divizione të blinduara dhe Gjermania forca të ngjashme”.
Gjenerali Rupert Smith, ish-komandant i lartë i NATO-s nga Britania dhe zëvendëskomandant i aleatëve gjatë krizës së Kosovës më 1999, e sheh luftën në Ukrainë në një pikë veçanërisht të rrezikshme për aleancën e NATO-s, përfshirë Mbretërinë e Bashkuar. “Rusia po ndjek një formë të luftës më të ‘të paqartë’ në të gjithë rajonin dhe përtej Ukrainës”, thekson ai.
Me një armëpushim të ngatërruar e të përkohshëm që mund të ndodhë muajt e ardhshëm në Ukrainë, perspektivat bëhen të rrezikshme dhe të paqarta. “Kemi një komb gjigand të armatosur në Ukrainë, me mendje të vete. Rusia ka gjasa ta shfrytëzojë pushimin për t’u riorganizuar dhe armatosur sërish”. Vija e përplasjes do të jetë “më e gjatë dhe më e paqëndrueshme sesa në çdo kohë gjatë Luftës së Ftohtë mes NATO-s dhe Traktatit të Varshavës”.
Mbajtja e paqes, zbatimi i armëpushimit, mbikëqyrja e çarmatimit - do të jenë një makth. Ukraina sot është më e armatosur në sasi dhe cilësi sesa shumica e forcave të NATO-s, përfshirë Britaninë. Rusia aktualisht ka potencialisht dy milionë ushtarë aktivë dhe rezervistë, si dhe shumë të tjerë në milici lokale, xhandarmëri dhe polici sigurie. Ekonomia, edhe pse e dobët, tashmë është përshtatur për luftë - dhe duket se Putini nuk ka ndërmend ta ndryshojë këtë kurs.
Disa nga autorët e Rishikimit të Mbrojtjes në Britani besojnë se Evropa tani është nën kërcënim të shtuar nga Rusia. “Nuk jemi më në paqe”, deklaroi kancelari gjerman, Friedrich, Merz, javën e kaluar. Megjithatë, në rrethin e brendshëm të Kryeministri dhe në Zyrën e Kabinetit, ka ende njerëz që nuk e pranojnë realitetin. “Ne nuk jemi në luftë me Rusinë”, tha kohët e fundit një zyrtar i lartë - si të ishte duke lexuar nga ndonjë libër optimist të tipit Poliana.
Kjo ka alarmuar komitetin e mbrojtjes në Parlament, si dhe kryetarin e tij nga radhët e laburistëve, deputetin Tan Dhesi. Ai beson se qeveria po ofron shumë pak dhe shumë vonë, dhe nuk po u tregon të vërtetën qytetarëve. “Nevojitet një përpjekje e koordinuar për t’ia komunikuar publikut nivelin e kërcënimit me të cilin përballemi dhe çfarë të presin në rast konflikti”. /Telegrafi/
Shkollat u detyruan të mbyllen dhe fluturimet u anuluan pas reshjeve të dendura të dëborës që përfshiu Mbretërinë e Bashkuar
Qindra shkolla janë detyruar të mbyllen, shtëpitë kanë mbetur pa energji elektrike dhe disa rrugë kanë mbyllur qarkullimin dhe fluturimet janë ndërprerë pasi bora ra në pjesë të mëdha të Mbretërisë së Bashkuar.
Sipas mediave britanike, përcjell Telegrafi, rreth 100 shkolla në Skocinë veriore, 57 në Uells dhe 41 në Yorkshire nuk kanë pasur zgjidhje tjetër veçse të mbyllin dyert e tyre sot.
Shoferët në Yorkshire të Veriut u detyruan të braktisin makinat e tyre dhe të ecin në këmbë pas reshjeve të dendura të borës, me mot më të acartë dimëror që pritet të vijë sot.
Ata janë paralajmëruar gjithashtu të bëjnë vetëm udhëtime që janë të nevojshme pasi bora e dendur gjatë natës goditi rrugët dhe pengoi mbledhjen e mbeturinave.
Ndërkohë, disa pjesë të Anglisë verilindore, ku ka hyrë në fuqi një paralajmërim i verdhë për borë, mund të përballen me kushte stuhie dëbore, tha Zyra Meteorologjike.
Reshjet e dëborës dhe të shiut vazhduan të godisnin brigjet e Mbretërisë së Bashkuar gjatë natës deri të enjten, me zonat më të prekura që pritet të përballen me ndërprerje të udhëtimit dhe ndërprerje të mundshme të energjisë elektrike, sipas parashikuesit të motit.
Shërbimi kombëtar i motit tha se komunitetet rurale mund të izolohen në zonën e paralajmërimit të qelibartë ndërsa godasin erërat e forta, duke krijuar “kushte të rastit të stuhisë”, me mundësinë e rrufeve si një rrezik të mëtejshëm.
Autoritetet kanë paralajmëruar gjithashtu se kur godasin bora dhe akulli, rrugët mund të bëhen shpejt të rrezikshme.
Andaj, “distancat e ndalimit mund të rriten dhjetëfish në sipërfaqet e akullta, kështu që ngadalësimi dhe lënia e hapësirës së mjaftueshme është absolutisht jetike”.
Hekurudha Kombëtare u ka kërkuar udhëtarëve të trenave të kontrollojnë udhëtimet e tyre para se të udhëtojnë gjatë motit me borë dhe akull. /Telegrafi/
Nga Armand Shkullaku Rreth 700 familje shqiptare, përfshirë edhe fëmijët, të cilave u është refuzuar azili në Mbretërinë e Bashkuar, do të përfshihen në një proces të dëbimit nga ky vend. Vendimin e bëri të njohur pak ditë më parë në parlamentin britanik, ministrja e Brendshme, Shabana Mahmood, që për ironi të fatit i përket […]
Portali rus pro-Kremlinit “Vzglyad” ka publikuar një listë të “qeverive armiqësore” të Rusisë, me shtetet që raporton se e kundërshtojnë haptazi Rusinë dhe që i qëndrojnë kundër për shkak të rrethanave politike.
Mbretëria e Bashkuar u rendit e para me një rezultat prej 75 pikësh falë sanksioneve, mbështetjes për transferimin e aseteve të ngrira ruse në Ukrainë dhe ndihmës ushtarake për Kievin.
Gjermania dhe Franca u renditën të dytat me 70 pikë, ndërsa Holanda dhe Estonia të tretat me 65 pikë.
SHBA u rendit e katërta me 55 pikë, gjë që Vzglyad ia atribuon pezullimit të përkohshëm të ndihmës ushtarake amerikane për Ukrainën.
Në vendin e pestë ishte një grup prej shtatë vendesh – Danimarka, Italia, Kanadaja, Lituania, Polonia, Finlanda dhe Suedia – të gjitha me nga 50 pikë.
Më pas vijnë Norvegjia dhe Belgjika, dhe në vendin e shtatë janë Kroacia, Spanja dhe Greqia, me nga 40 pikë secila.
Më poshtë janë Portugalia dhe Sllovenia, dhe më pas Hungaria dhe Luksemburgu.
Gazeta citon gjithashtu deklaratën e Sergei Lavrov se Rusia po e përdor termin "vende armike" gjithnjë e më pak dhe "qeveri armike" gjithnjë e më shumë.
Vendet që konsideroheshin më pak “miqësore” ndaj Rusisë ishin Shqipëria, Bahamas, Lihtenshtajni, Mikronezia, Monako, Koreja e Jugut dhe San Marino – të cilat morën vetëm pesë pikë.
Kosova nuk është përfshirë në këtë listë. /Telegrafi/
Stuhia Claudia shkaktoi mot të keq në Portugali, me Distriktin Faro që u përball me shira të rrëmbyeshëm dhe erëra të forta.
Mijëra shtëpi mbetën pa energji elektrike për shkak të përmbytjeve të përhapura gjerësisht.
Stuhia Claudia përfshiu Portugalinë, duke shkaktuar përmbytje dhe rrëzime pemësh në të gjithë Algarve dhe duke e lënë veçanërisht të prekur Distriktin Faro.
Në Faro u përmbytën rrugë e u rrëzuan pemë.
Zyrtarët ende nuk e kanë konfirmuar numrin e përgjithshëm të incidenteve.
ANEPC raportoi më shumë se 2,200 thirrje në të gjithë vendin që nga e enjtja në orët e para të mëngjesit, kryesisht për përmbytje dhe pastrim rrugësh.
Setubal dhe Faro mbeten nën paralajmërime portokalli ndërsa stuhia vazhdon në lindje, megjithëse nuk u raportuan viktima në Faro.
Mijëra shtëpi mbetën pa energji elektrike, ndërsa pjesë të Seixal dhe Montijo u përballën me përmbytje të mëdha.
Stuhia goditi edhe Ishujt Kanarie dhe parashikohet të arrijë në Mbretërinë e Bashkuar. /Telegrafi/
Një nënë shqiptare e tre fëmijëve është bërë gruaja e parë që ekstradohet nga Britania në vendin e saj të lindjes për t'u përballur me burgim pas vendimit të një gjyqtari.
Lirie Delishi, 25 vjeç, u kap duke u përpjekur të përdorte një pasaportë të falsifikuar rumune kur u përpoq të fluturonte nga Tirana për në Romë në vitin 2019.
Prokurorët në Shqipëri janë përpjekur të ekstradojnë Delishin, fëmijët e të cilës përfshijnë një foshnjë të porsalindur, për të vuajtur një dënim me katër muaj burg në vend.
Tani, gjykatësi John Zani ka vendosur që rreziku që Mbretëria e Bashkuar të shihet si një “strehë e sigurt” për kriminelët ia kalonte argumentit të Delishit se ekstradimi i saj do të shkelte të drejtat e saj për një jetë familjare sipas Konventës Evropiane për të Drejtat e Njeriut (KEDNJ).
Prandaj, gjykatësi ka mbështetur ekstradimin e Delishit - megjithëse besohet se ajo është ende në Mbretërinë e Bashkuar në pritje të një apeli ndaj vendimit të tij, raporton Daily Mail.
Delishi tani pritet të vuajë dënimin me foshnjën e saj në Burgun e Pojskës, i cili është burgu i vetëm për gra në Shqipëri dhe ka kapacitet për pak më shumë se 100 gra. /Telegrafi/
Në Ditën e Përkujtimit të Mbretërisë së Bashkuar, Presidentja e Republikës së Kosovës, Vjosa Osmani, së bashku me ambasadorin britanik Jonathan Hargreaves dhe përfaqësues vendorë e ndërkombëtarë, bën homazhe për t'i nderuar pjesëtarët e Forcave të Armatosura Britanike që humbën jetën gjatë shërbimit me forcat e NATO-s në Kosovë (KFOR).
Në njoftimin e presidnces thuhet se "Katërmbëdhjetë ushtarët britanikë që sakrifikuan jetën gjatë misionit në Kosovë, u vlerësuan si urë e fortë lidhjeje dhe dëshmi e miqësisë së përhershme ndërmjet Kosovës dhe Mbretërisë së Bashkuar".
Tutje, thuhet se presidentja Osmani theksoi se ata do të nderohen në çdo përvjetor, si kujtesë e rrugës së vështirë drejt lirisë dhe gjithashtu në shenjë falënderimi për rolin vendimtar të Mbretërisë së Bashkuar, në rrugën tonë drejt lirisë, pavarësisë dhe shtetndërtimit. /Telegrafi/
Login
