Autoritetet talebane të Afganistanit kryen një ekzekutim publik në një stadium në qytetin lindor të Khost të martën, duke vrarë një burrë që Gjykata Supreme e vendit tha se kishte vrarë 13 anëtarë të një familjeje, përfshirë disa fëmijë, në fillim të këtij viti.

Dhjetëra mijëra njerëz, përfshirë të afërm të viktimave, morën pjesë në ekzekutimin në stadiumin sportiv, të cilin Gjykata Supreme e quajti të 11-tin e kryer që kur talebanët morën pushtetin në vitin 2021, pas tërheqjes kaotike të forcave të SHBA-së dhe NATO-s.

Raportuesi Special i Kombeve të Bashkuara për Afganistanin, Richard Bennet, postoi në X të martën më herët se raportet kishin sugjeruar që ekzekutimi publik ishte i afërt dhe bëri thirrje që ai të ndalet.

"Ekzekutimet publike janë çnjerëzore, një ndëshkim mizor dhe i pazakontë dhe në kundërshtim me ligjin ndërkombëtar", postoi ai.

Sundimtarët talebanë të Afganistanit kanë imponuar një interpretim të rreptë të ligjit të Sheriatit, i cili ka përfshirë një kthim të ekzekutimeve publike, si dhe ndalime për gratë dhe vajzat afgane nga shkolla e mesme dhe arsimi universitar dhe nga shumica e formave të punësimit.

Sipas një deklarate nga Gjykata Supreme, ekzekutimi u urdhërua pasi një dënim me vdekje u dha nga një gjykatë, një gjykatë apeli dhe vetë gjykata e lartë, dhe u miratua nga udhëheqësi suprem i Afganistanit, Hibatullah Akhundzada.

Burri u qëllua për vdekje nga një i afërm i atyre që ai ishte dënuar se i kishte vrarë, tha zëdhënësi i policisë së Khost, Mustaghfir Gorbaz.

Burri ishte dënuar së bashku me të tjerë për hyrjen në një shtëpi familjare në provincën Khost dhe vrasjen e një familjeje të zgjeruar, përfshirë nëntë fëmijë dhe nënën e tyre, tha Gorbaz.

Të afërmve të viktimave u ishte ofruar mundësia e faljes dhe pajtimit që do t'i kishte kursyer jetën burrit, por në vend të kësaj kërkuan dënimin me vdekje, tha gjykata.

Gjatë sundimit të tyre të mëparshëm të Afganistanit në fund të viteve 1990, talebanët kryenin rregullisht ekzekutime publike, rrahje me kamzhik dhe goditje me gurë. /Telegrafi/

Zyrtarët amerikanë kanë thënë se Rahmanullah Lakanwal, afgani i akuzuar për të shtënat ndaj dy anëtarëve të Gardës Kombëtare të mërkurën, punoi përkrah CIA-s në Afganistan përpara se të vinte në SHBA katër vjet më parë.

I dyshuari akuzohet për sulmin ndaj dy anëtarëve të trupave të Virxhinias Perëndimore - Sarah Beckstrom, 20 vjeç, dhe Andrew Wolfe, 24 vjeç - blloqe larg Shtëpisë së Bardhë.

"Ne po lutemi që ata të mbijetojnë dhe që akuza më e lartë të mos jetë vrasje e shkallës së parë", tha të enjten prokurorja e SHBA-së për Distriktin e Kolumbias, Jeanine Pirro.

Lakanwal erdhi në SHBA në vitin 2021, sipas një programi që ofronte mbrojtje të posaçme të imigracionit për afganët pas tërheqjes së Amerikës nga Afganistani.

Në një konferencë për shtyp të enjten, Pirro dhe Drejtori i FBI-së, Kash Patel, shpjeguan lidhjen e Lakanwal me forcat amerikane.

Ka konfirmim, tha Patel, se i dyshuari "kishte një marrëdhënie në Afganistan me forcat partnere", përpara se të transferohej në SHBA.

Lakanwal ndihmoi në ruajtjen e forcave amerikane në aeroportin e Kabulit, ndërsa mijëra njerëz nxituan të largoheshin nga Afganistani përpara se talebanët të merrnin pushtetin, tha për BBC një ish-komandant ushtarak që shërbeu përkrah tij.

Babai i pesë fëmijëve ishte rekrutuar në Njësinë 03 të Forcës Sulmuese të Kandaharit, nëntë vjet më parë.

Njësia e tij njihej në nivel lokal si Forcat Akrep, duke vepruar fillimisht nën CIA-n, por përfundimisht për departamentin e inteligjencës afgane të njohur si Drejtoria Kombëtare e Sigurisë.

Lakanwal ishte një specialist i gjurmimit GPS, tha ish-komandanti për BBC-në, duke e përshkruar atë si një "personazh sportiv dhe të gëzuar".

E gjithë njësia e tij u zhvendos nga Kandahari në Kabul pesë ditë para se talebanët të hynin në kryeqytet. Ata vazhduan të mbronin aeroportin për gjashtë ditë të tjera, përpara se edhe ata të transportoheshin me helikopter në SHBA.

Pas tërheqjes së SHBA-së nga Afganistani në vitin 2021, administrata Biden - me mbështetje dypartiake - krijoi një program të quajtur Operacioni "Mirë se vini aleatët" që lejoi rreth 77,000 afganë të hynin në SHBA nën mbrojtje të posaçme të imigracionit.

Programi ishte në fuqi për rreth një vit pas tërheqjes së SHBA-së.

Lakanwal, 29 vjeç, ishte midis atyre që hynë në SHBA përmes këtij programi dhe aplikuan për azil në vitin 2024. Kërkesa e tij u miratua në fillim të këtij viti. /Telegrafi/

Dy anëtarë të Gardës Kombtare amerikane, 20-vjeçarja Sarah Beckstrom dhe 24-vjeçari Andrew Wolfe, janë në gjendje kritike pasi u qëlluan pranë Shtëpisë së Bardhë në Uashington mbrëmë.

I dyshuari për sulmin është Rahmanullah Lakanwal, një shtetas afgan 29-vjeçar i cili hyri në SHBA në vitin 2021 pasi punoi me qeverinë amerikane, përfshirë CIA-n, në Afganistan.

Lakanwal u plagos gjithashtu në incident dhe u shtrua në spital.

Presidenti amerikan Donald Trump është zotuar se i dyshuari do të "paguajë çmimin më të lartë të mundshëm" për këtë "akt terrori", raporton BBC .

Sipas Prokurores së SHBA-së Pam Bondi, dy ushtarët e plagosur iu nënshtruan një ndërhyrjeje kirurgjikale.

Prokurorja Jeanine Pirro konfirmoi se gjendja e tyre është ende kritike.

Drejtori i CIA-s, John Ratcliffe, tha se se sulmuesit iu lejua të hynte në SHBA "për shkak të punës së tij të mëparshme me qeverinë amerikane".

“Pas tërheqjes katastrofike të Bidenit nga Afganistani, administrata e Bidenit e justifikoi sjelljen e sulmuesit të dyshuar në Shtetet e Bashkuara në shtator 2021 për shkak të punës së tij të mëparshme me qeverinë amerikane, përfshirë CIA-n, si anëtar i forcës partnere në Kandahar, e cila përfundoi menjëherë pas evakuimit kaotik”, tha Ratcliffe.

Drejtori i FBI-së, Kash Patel, tha se po zhvillohet një "hetim për një akt terrorizmi".

Ekipet kontrolluan banesën e fundit të njohur të të dyshuarit në shtetin e Uashingtonit dhe sekuestruan "pajisje të shumta elektronike" që aktualisht po analizohen.

"Ne do të shkojmë kudo në botë ku na çojnë provat", tha Patel.

Prokurorja Pirro tha se ishte shumë herët për të thënë diçka në lidhje me një motiv.

"Padyshim që ka fusha që po hetojmë, por nuk jemi gati të hyjmë në detaje."

Lakanwal aktualisht përballet me akuza për sulm me dashje për vrasje, të cilat mbartin një dënim me 15 vjet burg.

Pirro theksoi se akuzat do të përmirësoheshin në vrasje të shkallës së parë nëse ndonjë nga ushtarët do të ndërronte jetë nga plagët e marra.

"Ne lutemi që ata të mbijetojnë dhe që akuza më e lartë të mos jetë vrasje e shkallës së parë", tha ajo.

Incidenti ka shkaktuar një reagim të ashpër politik.

Bondi ka thënë se do të kërkojë dënimin me vdekje për personin e armatosur nëse ushtarët nuk mbijetojnë.

"Nëse ndodh diçka, do t'jua them tani dhe do t'jua them herët, do të bëjmë gjithçka që është në fuqinë tonë për të kërkuar dënimin me vdekje kundër këtij përbindëshi që nuk duhet të kishte qenë në vendin tonë", tha ajo. /Telegrafi/

Të paktën dhjetë persona kanë humbur jetën gjatë bombardimeve të forcave pakistaneze në territorin afgan gjatë natës, në një periudhë ku tensionet mes Islamabadit dhe Kabulit janë rritur ndjeshëm. Sulmet e Pakistanit ndaj Afganistanit vranë të paktën 10 persona, tha të martën zëdhënësi i qeverisë talebane, një ditë pas një sulmi në një kompleks sigurie […]

The post Pakistani kryen sulme ndaj Afganistanit, humbin jetën 9 fëmijë dhe një grua appeared first on BoldNews.al.

Bisedimet e paqes në Stamboll mes Pakistanit dhe sundimtarëve islamistë talibanë të linjës së ashpër në Afganistan kanë përfunduar pa marrëveshje, por armëpushimi mes dy shteteve fqinje do të vazhdojë të jetë në fuqi.

Zëdhënësi i talibanëve, Zabihullah Mujahid, fajësoi Pakistanin për kolapsimin e bisedimeve, duke thënë se delegacioni i Islamabadit kishte “sjellje të papërgjegjshme dhe kishte mungesë të bashkëpunimit”.

Përmes një postimi në X, Mujahid e akuzoi Pakistanin se “nuk shfaqi gatishmëri për të marrë ndonjë përgjegjësi për sigurinë e Afganistanit, apo edhe të veten”.

Ai shtoi se armëpushimi “deri më tani nuk është shkelur nga ne dhe ai do të vazhdohet që të respektohet”.

Disa runde bisedimesh të ndërmjetësuara nga Turqia dhe Katari janë mbajtur në Stamboll që nga muaji i kaluar. Rundi i fundit u mbajt më 6-7 nëntor dhe u udhëhoq nga Abdul Haq Wasiq, shefi i inteligjencës të talibanëve dhe nga gjenerallejtënant, Asim Malik, kreu i Shërbimit të Inteligjencës të Pakistanit.

Më herët, zyrtarët pakistanezë, përfshirë ministri e mbrojtjes, Khawaja Asif, thanë se dështuan bisedimet në Stamboll, duke shtuar se nuk ka plane për negociata të tjera.

Asif tparalajmëroi se nëse territori i Afganistanit përdoret për të sulmuar Pakistanin, armëpushimi do të përfundojë. Ai paraprakisht kishte paralajmëruar se dështimi për të arritur një marrëveshje do të çonte në një “luftë të hapur”.

Rundi i fundit i bisedimeve në Stamboll u përball me probleme që në fillim. Për shembull, kur nisën bisedimet pati këmbim zjarri më 6 nëntor në Spin Boldak mes ushtarëve talibanë dhe forcave pakistaneze.

Edhe pse të dyja palët akuzuan njëra-tjetrën për inicimin e zjarrit, sipas raportimeve lokale, civilët e pësuan rëndë gjatë këtij incidenti. Të paktën pesë civilë, përfshirë katër gra, u vranë dhe gjashtë të tjerë u plagosën.

Ndërkaq, gjatë përleshjeve të tetorit mes Pakistanit dhe talibanëve u vranë të paktën 50 civilë afganë dhe 450 të tjerë u plagosën. Luftimet u ndalën pas ndërmjetësimit të Turqisë dhe Katarit dhe palët arritën një armëpushim.

Pakistani po ashtu ka konfirmuar se gjatë përleshjeve janë vrarë të paktën 23 ushtarë të tij dhe janë plagosur 29 të tjerë. Dhuna erdhi pas shpërthimeve në Kabul më 9 nëntor, për të cilat autoritetet talibane fajësuan Pakistanin.

Dikur aleatë të ngushtë, që ndajnë një kufi prej 2.600 kilometrash, të dyja palët përkeqësuan raportet pas pretendimeve të Islamabadit se Afganistani strehon grupe militante, përfshirë Tehrik‑e Taliban Pakistan (TTP). Pakistani pretendon se autoritetet talibane po lejojnë TTP-në që të përdorë territorin afganë për t’u trajnuar dhe si qendër logjistike për sulme brenda Pakistanit. Qeveria talibane mohon këto pretendime./REL

Të paktën 20 persona kanë vdekur pas një tërmeti që goditi Afganistanin verior, thonë autoritetet lokale, dhe numri i viktimave pritet të rritet ndërsa përpjekjet e shpëtimit vazhdojnë.

Qindra të tjerë kanë mbetur të lënduar, thanë zyrtarët lokalë për BBC-në, përcjell Telegrafi.

Tërmeti goditi pranë Mazar-e-Sharif, një nga qytetet më të mëdha në Afganistan, shtëpi e rreth 500,000 njerëzve, në orët e para të së hënës, rreth orës 01:00 sipas orës lokale.

Sipas Shërbimit Gjeologjik të SHBA-së, tërmeti kishte një magnitudë prej 6.3 ballësh dhe një thellësi prej 28 km (17 milje), dhe ishte shënuar në një nivel alarmi portokalli, që tregon se ka të ngjarë të ketë "viktima të konsiderueshme".

Sharafat Zaman Amar, zëdhënës i ministrisë së shëndetësisë së qeverisë talebane, theksoi se më shumë se 20 persona janë vrarë dhe më shumë se 320 janë lënduar.

Zyrtarët provincialë i thanë më parë BBC-së se numri i viktimave ka të ngjarë të rritet ndërsa përpjekjet e shpëtimit vazhdojnë. /Telegrafi/

Bisedimet midis Afganistanit dhe Pakistanit në Stamboll për të ndërmjetësuar një armëpushim afatgjatë kanë përfunduar pa një rezolutë, thanë të martën dy burime të njohura me çështjen, një goditje për paqen në rajon pas përleshjeve vdekjeprurëse këtë muaj.

Bisedimet synonin të arrinin paqe të qëndrueshme midis fqinjëve të Azisë Jugore, pasi dhjetëra u vranë përgjatë kufirit të tyre në dhunën më të keqe të tillë që kur talebanët morën pushtetin në Kabul në vitin 2021.

Të dy ranë dakord për një armëpushim të ndërmjetësuar në Doha më 19 tetor, por nuk mundën të gjenin terren të përbashkët në një raund të dytë bisedimesh të ndërmjetësuara nga Turqia dhe Katari në Stamboll, thanë burime afgane dhe pakistaneze të informuara për çështjen, me secilin që fajëson tjetrin për dështimin.

Një burim sigurie pakistaneze tha se talebanët nuk kishin qenë të gatshëm të angazhoheshin për të frenuar talebanët pakistanezë, një grup i veçantë militant armiqësor ndaj Pakistanit që Islamabadi thotë se vepron pa u ndëshkuar brenda Afganistanit.

Një burim afgan i njohur me bisedimet tha se ato kishin përfunduar pas "shkëmbimeve të tensionuara" mbi çështjen, duke shtuar se pala afgane tha se nuk ka kontroll mbi talebanët pakistanezë, të cilët kanë nisur sulme kundër trupave pakistaneze në javët e fundit.

Burimet kërkuan anonimitet pasi nuk ishin të autorizuar të flisnin publikisht.

Zëdhënësit e qeverisë dhe ministrisë së Mbrojtjes së talebanëve të Afganistanit, si dhe të ushtrisë, mbrojtjes dhe ministrive të jashtme të Pakistanit, nuk iu përgjigjën menjëherë kërkesave për koment.

Përleshjet e tetorit filluan pas sulmeve ajrore pakistaneze këtë muaj në Kabul, kryeqytetin afgan, ndër të tjera, duke synuar kreun e talebanëve pakistanezë.

Talebanët u përgjigjën me sulme ndaj posteve ushtarake pakistaneze përgjatë gjatësisë së kufirit prej 2,600 km.

Prishja e bisedimeve që ka tërhequr vëmendjen e presidentit të SHBA-së, Donald Trump, mund të tendosë armëpushimin midis Afganistanit të kontrolluar nga talebanët dhe Pakistanit të armatosur me armë bërthamore.

Të shtunën, ministri i mbrojtjes i Pakistanit tha se besonte se Afganistani dëshironte paqe, por se dështimi për të arritur një marrëveshje në Stamboll do të thoshte "luftë e hapur".

Për shkak se marrëdhëniet tona Tajvan-SHBA janë shumë të qëndrueshme. Pavarësisht nëse janë në siguri, tregti dhe biznes dhe fusha të tjera, ekziston bashkëpunim i ngushtë.

Pavarësisht një armëpushimi midis Pakistanit dhe talebanëve, përleshjet e fundjavës vranë pesë ushtarë pakistanezë dhe 25 militantë talebanë pakistanezë pranë kufirit me Afganistanin, tha ushtria të dielën. /Telegrafi/

Presidenti i SHBA-së, Donald Trump, tha të dielën se do ta zgjidhë krizën Afganistan-Pakistan "shumë shpejt", ndërsa bisedimet e paqes midis fqinjëve ndërluftues hynë në ditën e dytë.

Të dy vendet janë përfshirë në një debat të ashpër për sigurinë, me secilën palë që thotë se po i përgjigjej agresionit nga pala tjetër gjatë përleshjeve në fillim të këtij muaji.

Ai ishte luftimi më vdekjeprurës midis tyre në disa vite, duke shënuar një pikë të ulët në marrëdhënie, ndërsa gjithashtu shkaktoi alarm në një rajon ku grupe të armatosura si al-Kaeda po përpiqen të rishfaqen, shkruajnë mediat e huaja, përcjell Telegrafi.

Pakistani akuzon Afganistanin se po i mbyll sytë ndaj militantëve që kalojnë kufirin për sulme, një akuzë që sundimtarët talebanë të vendit e hedhin poshtë.

Raundi i dytë i bisedimeve midis tyre filloi në Stamboll të shtunën, duke u përqendruar në transformimin e një armëpushimi të brishtë, të arritur në fillim të këtij muaji në Doha, në një kornizë të qëndrueshme për paqen dhe sigurinë kufitare.

"Dëgjova se Pakistani dhe Afganistani kanë filluar...", tha Trump në margjinat e Samitit të ASEAN në Malajzi. "Por do ta zgjidh këtë shumë shpejt".

Ai i bëri komentet ndërsa mori pjesë në nënshkrimin e një marrëveshjeje paqeje midis Tajlandës dhe Kamboxhias, duke shtuar se udhëheqësit e Pakistanit ishin "njerëz të shkëlqyer". /Telegrafi/

Ministri i Mbrojtjes i Pakistanit tha të shtunën se beson që Afganistani dëshiron paqe, por se dështimi për të arritur një marrëveshje gjatë bisedimeve në Stamboll do të thotë "luftë e hapur", disa ditë pasi të dyja palët ranë dakord për një armëpushim pas përleshjeve vdekjeprurëse kufitare.

Bisedimet në Stamboll, të cilat filluan të shtunën dhe pritet të vazhdojnë deri të dielën, shënojnë përpjekjen e fundit nga Pakistani dhe Afganistani për të parandaluar një rikthim në dhunë pas luftimeve më të këqija kufitare që nga marrja e Kabulit nga talebanët në vitin 2021.

Bisedimet kanë për qëllim të hartojnë një mekanizëm për të zbatuar armëpushimin e Dohas në plan afatgjatë, transmeton Telegrafi.

Khawaja Muhammad Asif tha se nuk kishte pasur incidente në katër deri në pesë ditët që kur u ra dakord, dhe të dyja palët po i përmbaheshin armëpushimit.

"Ne kemi mundësinë, nëse nuk arrihet një marrëveshje, kemi një luftë të hapur me ta. Por pashë që ata duan paqe", shtoi ai.

Përleshjet shpërthyen në fillim të këtij muaji pasi Islamabadi kërkoi që talebanët të frenojnë militantët, që thonë se po sulmojnë Pakistanin nga strehat brenda Afganistanit.

Pakistani nisi sulme ajrore përtej kufirit dhe të dyja palët shkëmbyen zjarr të rëndë, duke vrarë dhjetëra persona dhe duke shkaktuar mbylljen e kalimeve kyçe që mbeten të mbyllura.

Islamabadi akuzon Kabulin se strehon militantë që synojnë forcat pakistaneze. Talebanët e hedhin poshtë akuzën dhe thonë se operacionet ushtarake të Pakistanit shkelin sovranitetin afgan. /Telegrafi/

Ministri i Mbrojtjes së Pakistanit, Khawaja Muhammad Asif, paralajmëroi të shtunën se në rast se bisedimet me Afganistanin dështojnë, dy vendet mund të përfshihen në një “luftë të hapur”. Ai theksoi gjithsesi se Afganistani dëshiron paqe, duke shtuar se aktualisht të dyja palët po respektojnë armëpushimin e arritur kohët e fundit. Deklarata vjen pas një […]

The post Pakistani paralajmëron Afganistanin: “Luftë e hapur” nëse bisedimet dështojnë appeared first on BoldNews.al.

Pakistani dhe Afganistani kanë rënë dakord për një armëpushim të menjëhershëm gjatë bisedimeve në Doha, pas më shumë se një jave përleshjesh vdekjeprurëse që vazhduan pavarësisht një armëpushimi të mëparshëm.

Të dyja vendet kishin rënë dakord të ndalonin luftimet dhe të punonin drejt “paqes dhe stabilitetit të qëndrueshëm” në bisedimet e ndërmjetësuara nga Katari dhe Turqia.

Njoftimi vjen pasi udhëheqja e talebanëve në Afganistan akuzoi Pakistanin për kryerjen e më shumë sulmeve ajrore në territorin e saj, në një vazhdim të luftimeve më të ashpra midis dy kombeve që kur talebanët u kthyen në pushtet në Kabul në vitin 2021.

Islamabadi dhe Kabuli ranë dakord për bisedime të mëtejshme në ditët në vijim, "për të siguruar qëndrueshmërinë e armëpushimit dhe për të verifikuar zbatimin e tij në një mënyrë të besueshme dhe të qëndrueshme".

Ndryshe, dhuna midis fqinjëve përgjatë kufirit të tyre të diskutueshëm shpërtheu më 10 tetor pasi Afganistani akuzoi fillimisht Pakistanin për kryerjen e sulmeve ajrore në Kabul dhe nisi sulme hakmarrëse.

Luftimet midis dy vendeve në javët e fundit shënojnë përshkallëzimin më vdekjeprurës që kur SHBA-të u tërhoqën nga Afganistani në vitin 2021 dhe mund të sinjalizojnë një periudhë të re paqëndrueshmërie për fqinjët dikur miqësorë. /Telegrafi/

Qeveria e talebanëve ka konfirmuar se sulmoi trupat pakistaneze në disa vende malore në kufirin verior.

Një zëdhënës i talebanëve tha se 58 personel ushtarak pakistanez ishin vrarë në atë që e quajti "një akt hakmarrjeje", transmeton Telegrafi.

Ata pretenduan se Pakistani kishte shkelur hapësirën ajrore afgane dhe kishte bombarduar një treg brenda kufirit të saj të enjten.

Ministri i Brendshëm i Pakistanit, Mohsin Naqvi, tha se sulmet afgane ishin "të paprovokuara" dhe se civilët u qëlluan, duke paralajmëruar se forcat e vendit të tij do të përgjigjeshin "me një gur për çdo tullë".

Islamabadi ka akuzuar Kabulin se strehon terroristë që synojnë Pakistanin në tokën e tij, një pretendim që qeveria e talebanëve e hodhi poshtë.

Si pala afgane ashtu edhe ajo pakistaneze thuhet se kanë përdorur armë të vogla dhe artileri në rajonin Kunar-Kurram, sipas BBC.

Në një konferencë për shtyp të dielën, zëdhënësi i talebanëve, Zabihullah Mujahid, tha se përveç 58 vdekjeve të ushtarakëve pakistanezë, rreth 30 të tjerë ishin plagosur.

Ai shtoi se nëntë luftëtarë talebanë kishin vdekur dhe midis 16 dhe 18 persona ishin plagosur.

Ministri i jashtëm afgan tha në një konferencë për shtyp në New Delhi se "nuk kemi probleme" me popullin e Pakistanit dhe udhëheqjen e tij, por shtoi se "ka disa grupe në Pakistan që po përpiqen ta prishin situatën.

Afganistani ka të drejtë të mbajë territorin dhe kufijtë e tij të sigurt, dhe për këtë arsye është hakmarrë ndaj shkeljes".

Ministri i Brendshëm i Pakistanit tha se "dënon fuqimisht" sulmet e talebanëve: "Qëllimi nga forcat afgane ndaj popullatës civile është një shkelje e hapur e ligjeve ndërkombëtare”.

"Afganistani po luan një lojë zjarri dhe gjaku", tha ai në një postim në X.

Dy kalimet kryesore midis Pakistanit dhe Afganistanit - Torkham në veri dhe Chaman në jug - janë mbyllur, duke lënë qindra kamionë që transportonin mallra të bllokuar në të dyja anët. /Telegrafi/

Zëdhënësi kryesor i talebanëve ka hedhur poshtë me vendosmëri kërkesën e Donald Trump për të "marrë përsëri" Bazën Ajrore të Bagramit në Afganistan.

Në një intervistë ekskluzive me Sky News, Zabihullah Mujahid tha: "Afganët nuk do të lejojnë kurrë që toka e tyre t'i dorëzohet askujt në asnjë rrethanë".

Por anëtari i lartë i talebanëve theksoi se qeveria e tij kishte zhvilluar bisedime me SHBA-në për rihapjen e ambasadës afgane në Uashington DC dhe ambasadës amerikane në Kabul, përcjell Telegrafi.

Ai tha: "Ne e kemi diskutuar këtë çështje dhe dëshirojmë të shohim ambasadat të rihapen si në Kabul ashtu edhe në Uashington".

Kanë kaluar katër vjet që kur talebanët erdhën në pushtet dhe vetëm Rusia e ka njohur zyrtarisht qeverinë e tyre.

Por Mujahid mohoi se ata kanë një "problem legjitimiteti", duke pretenduar se shumë vende privatisht e kishin njohur udhëheqjen e tyre.

Afganistani është në mes të një krize ekonomike dhe ka përjetuar thatësira të rënda.

Por në një intervistë të gjerë, Zabihullah Mujahid tha se vendi kishte gëzuar "paqe dhe stabilitet relativ nën një qeveri të bashkuar" me më shumë siguri dhe "shenja të dukshme të rimëkëmbjes ekonomike". /Telegrafi/

Qeveria talebane në Afganistan ka vendosur një mbyllje mbarëkombëtare të telekomunikacionit, disa javë pasi filloi të ndërpresë lidhjet e internetit me fibra optike.

Vendi aktualisht po përjeton një "ndërprerje totale të internetit", raporton mbikëqyrësi i internetit Netblocks, transmeton Telegrafi.

Agjencitë ndërkombëtare të lajmeve thonë se kanë humbur kontaktin me zyrat në kryeqytetin Kabul. Interneti celular dhe televizioni satelitor janë ndërprerë gjithashtu rëndë në të gjithë Afganistanin.

Talebanët ende nuk kanë dhënë një arsye zyrtare për mbylljen. Që nga marrja e pushtetit në vitin 2021, talebanët kanë vendosur kufizime të shumta në përputhje me interpretimin e tyre të ligjit islamik të Sheriatit.

Një zyrtar taleban tha se mbyllja e telekomunikacionit do të zgjasë deri në njoftim të mëtejshëm.

Tolo News, një kanal privat lajmesh afgan, u tha njerëzve të ndiqnin faqet e tij në mediat sociale për përditësime pasi priste ndërprerje në rrjetet e tij televizive dhe radiofonike.

Fluturimet nga aeroporti i Kabulit janë ndërprerë gjithashtu, raportuan mediat lokale.

Sipas shërbimit të gjurmimit të fluturimeve Flightradar24, të paktën tetë fluturime të planifikuara të niseshin ose të mbërrinin në Aeroportin Ndërkombëtar të Kabulit të martën janë anuluar.

Zyrtarët diplomatikë i kanë thënë BBC-së, se ndërprerjet e internetit mund të ndikojnë në sistemet bankare dhe të tregtisë elektronike në të gjithë vendin.

Disa njerëz në Kabul i kanë thënë BBC-së se interneti i tyre me fibra optike ndaloi së punuari drejt fundit të ditës së punës, rreth orës 17:00.

Për shkak të kësaj, kuptohet që shumë njerëz nuk do ta vënë re ndikimin deri të martën në mëngjes, kur shërbimet bankare dhe bizneset e tjera pritet të rifillojnë.

Kabllot me fibra optike transferojnë të dhëna shumë shpejt dhe përdoren për pjesën më të madhe të internetit në botë.

Në një postim në rrjetin social Mastodon.social, Netblocks tha: "Afganistani tani është në mes të një ndërprerjeje totale të internetit, ndërsa autoritetet talebane lëvizin për të zbatuar masa morale, me rrjete të shumta të shkëputura gjatë mëngjesit në një mënyrë graduale; shërbimet telefonike aktualisht janë gjithashtu të prekura".

Për javë të tëra, përdoruesit e internetit në disa provinca afgane janë ankuar ose për qasje të ngadaltë në internet ose për mungesë lidhjeje.

Disa banorë, të cilët kërkuan anonimitet, i thanë më parë BBC-së se bizneset dhe jeta e tyre ishin prekur seriozisht nga ndërprerjet e internetit. /Telegrafi/

Presidenti i Shteteve të Bashkuara, Donald Trump, ka kërkuar që talebanët në pushtet në Afganistan t'ia dorëzojnë bazën ajrore të vendit në Bagram, Uashingtonit - pesë vjet pasi nënshkroi një marrëveshje me grupin që hapi rrugën për tërheqjen e SHBA-së nga Kabuli.

Në një konferencë shtypi me kryeministrin e Mbretërisë së Bashkuar, Keir Starmer, më 18 shtator, Trump u tha gazetarëve se qeveria amerikane "po përpiqej ta merrte [Bagramin] përsëri".

"Ne ua dhamë [talebanët] falas. Ne e duam atë bazë përsëri", tha ai.

Dy ditë më vonë, më 20 shtator, ai e pasoi këtë kërkesë me një kërcënim të theksuar në platformën e tij Truth Social: "Nëse Afganistani nuk ua jep Bazën Ajrore të Bagramit atyre që e ndërtuan, Shteteve të Bashkuara të Amerikës, GJËRA TË KEQIJA DO TË NDODHIN!!!".

Dhe talebanët e kanë refuzuar kërkesën e Trump.

Megjithatë, kjo nuk është hera e parë që Trump ka treguar interesin e tij për të rimarrë ish-bazën ushtarake amerikane, shkruan Al Jazeera, përcjell Telegrafi.

Në një konferencë për media në shkurt 2025, tani të fshirë nga faqja e internetit e Shtëpisë së Bardhë, Trump u citua të thoshte: "Ne do ta mbanim Bagramin. Do të mbanim një forcë të vogël në Bagram".

Pra, çfarë është baza e Bagramit, pse Trump e dëshiron kaq shumë, cila është rëndësia e saj strategjike dhe a mund ta rimarrë SHBA-ja atë?

Çfarë është baza ajrore e Bagramit?

Katër vjet pasi forcat amerikane evakuuan bazat e tyre ushtarake në Afganistan, Bagrami mbetet një pronë e diskutueshme që administrata Trump dëshiron ta rimarrë nga talebanët.

Baza, e cila ka dy pista - njëra 3.6 km e gjatë (2.2 milje), tjetra 3 km (1.9 milje) - shtrihet rreth 50 km (31 milje) jashtë kryeqytetit të Afganistanit, Kabul.

Ajo ka qenë një fortesë strategjike për shumë fuqi ushtarake që kanë kontrolluar Afganistanin - dhe kanë luftuar për të - gjatë gjysmës së shekullit të kaluar.

Aeroporti u zhvillua për herë të parë nga Bashkimi Sovjetik në vitet 1950. Por qeveria afgane e asaj kohe kontrollonte bazën.

Kjo ndryshoi pasi Bashkimi Sovjetik pushtoi Afganistanin në vitin 1979 - trupat e tij qëndruan në krye të bazës për një dekadë, përpara se Moska të tërhiqej nga vendi.

Në vitin 1991, qeveria e mbështetur nga sovjetikët e Mohammad Najibullah humbi kontrollin e Bagramit ndaj Aleancës Veriore, një nga grupet më me ndikim të opozitës që luftonte për pushtet.

Por Aleanca Veriore vetë do të humbiste kontrollin e bazës ndaj talebanëve.

Pas pushtimit të Afganistanit nga NATO në vitin 2001, baza u bë një qendër strategjike e pranisë së ushtrisë amerikane në vend, e përdorur si një komandë speciale për divizione të ndryshme ushtarake, duke u rritur vazhdimisht në madhësi, kapacitet dhe dobi.

Në kulmin e saj në vitin 2009, baza mund të strehonte rreth 10,000 njerëz.

Ndërsa forcat amerikane kontrollonin bazën, ajo ndahej me anëtarë të tjerë të NATO-s, duke përfshirë njësi nga Marina Mbretërore e Mbretërisë së Bashkuar.

Përveç njësive ushtarake, baza strehonte një burg të madh që u bë i njohur për abuzimin dhe torturën e të burgosurve afganë nga forcat amerikane dhe partnerët e tyre vendas.

Bagrami ishte gjithashtu shtëpia e një spitali plotësisht funksional, ku strehoheshin kazerma për mijëra ushtarë, dhe disa restorante zinxhirësh amerikanë, si Pizza Hut dhe Subway.

Baza dhe objektet u evakuuan, me shumicën e armëve dhe pajisjeve të shkatërruara, nga forcat amerikane gjatë tërheqjes së gushtit 2021. Ajo që mbeti u plaçkit nga grupet vendase para se talebanët të merrnin kontrollin.

Pse Trump dëshiron që baza e Bagramit të kthehet?

Trump është ankuar shpesh se si SHBA-të lanë pas armë të mëdha në evakuimin e tyre të nxituar në vitin 2021, duke ia dorëzuar ato në fakt talebanëve dhe grupeve të tjera të armatosura në Afganistan, përcjell Telegrafi.

Por ekspertët thonë se tërheqja e vërtetë e Bagramit nuk qëndron në pajisjet ushtarake kryesisht të shkatërruara atje, as në restorantet zinxhirësh të braktisura në kompleks.

Ekziston vlera simbolike e shfaqjes së kontrollit të SHBA-së mbi një bazë të ndërtuar nga një rival gjeopolitik.

"Gjithmonë ka qenë me vlerë të rëndësishme strategjike, që kur u ndërtua nga Bashkimi Sovjetik", thotë Ibraheem Bahiss, analist i lartë në Grupin e Krizave.

Terreni i thyer dhe malor i Afganistanit e bën të vështirë kontrollin e hapësirës ajrore të tij, me pak vende të përshtatshme për uljen e aeroplanëve të mëdhenj ushtarakë dhe transportuesve të armëve.

Bagrami - baza ajrore më e madhe e vendit - ofron një “vendpushim” të rrallë.

Baza e Bagramit luajti një "rol vendimtar" në të ashtuquajturën "luftë kundër terrorizmit" të Uashingtonit pas vitit 2001, tha Hekmatullah Azamy, analist sigurie në Qendrën për Studime të Konfliktit dhe Paqes (CAPS), një grup ekspertësh me seli në Kabul.

Misione të mëdha ajrore u nisën nga Bagrami, përfshirë ato që çuan në vrasje civile, siç ishte bombardimi i vitit 2015 i një spitali të drejtuar nga Mjekët pa Kufij, të njohur me inicialet franceze MSF, në Kunduz, në të cilin u vranë 42 persona dhe të paktën 30 u plagosën.

Komandanti amerikan në Afganistan e ndryshoi vazhdimisht rrëfimin e tij mbi atë që shkaktoi bombardimin, përpara se përfundimisht të pranonte se ishte një gabim. Pastaj Presidenti amerikan Barack Obama kërkoi falje.

Por edhe pse SHBA-të tani janë larguar nga Afganistani, vlera e Bagramit është rritur vetëm, tha Azamy, me rritjen e ndikimit kinez në rajon.

"Ndërsa prioritetet ndryshuan dhe SHBA-të filluan ta shihnin Kinën si kërcënimin numër një, kjo bazë duket se është përsëri e rëndësishme, kryesisht për shkak të afërsisë së saj me Kinën dhe rëndësisë që ka", thekson ai.

Bagrami është rreth 800 km (rreth 500 milje) nga kufiri kinez dhe rreth 2,400 km (rreth 1,500 milje) nga fabrika më e afërt kineze e raketave në Xinjiang.

Trump gjithashtu i është referuar Kinës si një arsye kryesore për të dashur të rimarrë kontrollin e Bagramit, duke thënë këtë muaj në Londër se baza është "një orë larg nga vendi ku [Kina] prodhon armët e saj bërthamore".

Në shkurt, Trump gjithashtu pretendoi se baza ishte "saktësisht një orë larg nga vendi ku Kina prodhon raketat e saj bërthamore".

Zyrtarët kinezë, nga ana e tyre, kanë kundërshtuar një veprim të tillë.

“E ardhmja e Afganistanit duhet të vendoset nga populli i tij. Nxitja e tensionit dhe krijimi i konfrontimit në rajon nuk do të jetë popullor”, tha zëdhënësi i Ministrisë së Jashtme kineze, Lin Jian, pas komenteve të Trump së bashku me kryeministrin e Mbretërisë së Bashkuar, Keir Starmer.

A mund ta rimarrin SHBA-të Bagramin?

Kjo është e dyshimtë, thonë ekspertët.

“Në teori, Bagrami është një bazë strategjike për SHBA-në në aspektin e projektimit të fuqisë në rajon”, mendon Ashley Jackson, bashkëdrejtoreshë në Qendrën për Grupet e Armatosura me seli në Gjenevë.

Megjithatë, ajo theksoi se “ky veprim duket se është në kundërshtim të drejtpërdrejtë me politikën amerikane për t’i dhënë fund misionit ushtarak në Afganistan”.

“Logjistika e negociatave për ripozicionimin dhe dorëzimin do të ishte jashtëzakonisht sfiduese dhe e gjatë, dhe nuk është e qartë nëse kjo do t’i shërbente interesave strategjike të secilës palë”, shtoi Jackson.

Si Azamy ashtu edhe Bahiss besojnë se edhe talebanët nuk kanë asnjë nxitje për të dashur të heqin dorë nga Bagrami.

Një veprim i tillë do të “dëmtonte legjitimitetin e talebanëve”, vlerëson Azamy.

Bahiss tha se grupi "nuk do të ishte i gatshëm të pranonte një gjurmë të huaj në Afganistan, përfshirë bazën ajrore të Bagramit".

Lëvizja talebane u ndërtua kryesisht mbi idenë e luftimit të pushtimit dhe ndikimit të huaj, theksoi Bahiss me bazë në Kabul.

Grupi shpesh ka argumentuar se "për sa kohë që trupat e huaja mbajnë edhe një metër tokë, xhihadi ose lufta e shenjtë është një detyrim".

"Çdo negociatë me një ushtri të huaj do të shkatërronte forcën e tyre dhe do të rrezikonte që anëtarët e tyre ta braktisnin lëvizjen në grupe të mëdha", tha Bahiss.

Si janë përgjigjur talebanët?

Në të vërtetë, talebanët, nga ana e tyre, kanë qenë shumë të qartë dhe kanë hedhur poshtë vazhdimisht kërkesat e Trump.

Më 21 shtator, grupi përmendi marrëveshjen e vitit 2020 që administrata e Trump nënshkroi me talebanët në Doha.

"Duhet të kujtojmë se, sipas Marrëveshjes së Dohas, SHBA-të u zotuan se ‘nuk do të përdorin ose kërcënojnë forcën kundër integritetit territorial ose pavarësisë politike të Afganistanit, as nuk do të ndërhyjnë në punët e tij të brendshme’", tha Hamdullah Fitrat, zëvendës zëdhënës i talebanëve, në mediat sociale.

“SHBA-të duhet t’u qëndrojnë besnike angazhimeve të tyre”.

Komentet e Fitrat pasuan kërcënimin e Trump se “gjëra të këqija” do t’i ndodhnin Afganistanit nëse talebanët nuk do ta dorëzonin Bagramin.

Cili është plani i lojës së SHBA-së?

Refuzimi i talebanëve për të negociuar për bazën nuk e ka dekurajuar Trumpin deri më tani, dhe analistët besojnë se SHBA-të mund ta përdorin kërkesën për Bagram si një monedhë negociuese.

Mund të jetë “një mjet për të kërkuar diçka madhështore, si Bagrami, dhe për t’u pajtuar me diçka më të vogël dhe më simbolike në të ardhmen, [si] kthimin e disa armëve dhe pajisjeve, për të cilat presidenti ka folur më parë”, tha Jackson i Qendrës për Grupet e Armatosura.

Një vlerësim i vitit 2022 nga Departamenti i Mbrojtjes i SHBA-së i atëhershëm, tani Departamenti i Luftës, zbuloi se më shumë se 7 miliardë dollarë armë ishin braktisur në Afganistan, shumica e të cilave tani besohet se janë nën kontrollin e talebanëve.

Dhe nëse kërkesa për Bagram është një hap i vogël në një negociatë më të gjerë, ky mund të jetë një lajm i mirë edhe për talebanët, thonë analistët.

Sundimtarët e Afganistanit kanë kërkuar legjitimitet më të gjerë ndërkombëtar dhe bisedimet me SHBA-në janë një hap drejt kësaj.

"Në disa mënyra, administrata Trump thotë se është e hapur ndaj idesë së angazhimit me talebanët", tha Bahiss me bazë në Kabul, duke treguar shembuj të tjerë të presidentit amerikan që tregon gatishmëri për të ndërtuar lidhje me udhëheqësit që Uashingtoni më parë i ka trajtuar si armiq: nga Ahmed al-Sharaa në Siri te Vladimir Putin në Rusi dhe Kim Jong Un në Korenë e Veriut.

Por në fund të fundit, tha Bahiss, dëshira e Trump për të bërë biznes me talebanët do të varet gjithashtu nga ajo që është në tryezë për të.

"Çfarë mund të ofrojnë talebanët? A do të jenë investime private, minerale apo asete ushtarake si Bagrami?", pyet Bahiss.

"Varet vërtet nga talebanët të tregojnë se çfarë mund të ofrojnë". /Telegrafi/

Një djalë afgan 13-vjeçar bëri një udhëtim të rrezikshëm nga Kabuli në Delhi, duke u fshehur në ndarjen e rrotave të një aeroplani pasagjerësh të Kam Air.

Zyrtarët thonë se adoleshenti, i cili është nga qyteti Kunduz në Afganistanin verior, u gjet duke bredhur në pistën e aeroportit ndërkombëtar të Delhit pasi aeroplani u ul të hënën, shkruajnë mediat e huaja, përcjell Telegrafi.

Ai u ndalua nga personeli indian i sigurisë dhe u mor në pyetje për disa orë para se të dërgohej përsëri në Kabul me të njëjtin fluturim.

Djali thuhet se u tha autoriteteve se e bëri udhëtimin nga kurioziteti.

Distanca midis Kabulit dhe Delhit është rreth 1.000 kilometra (621 milje) dhe fluturimi zgjati rreth një orë e gjysmë.

Një zëdhënës i Forcës Qendrore Indiane të Sigurisë Industriale (CISF) tha se djali arriti të udhëtonte i pazbuluar në fluturimin RQ-4401 të Kam Airlines, i cili u ul në Delhi, të dielën.

Policia e gjeti atë duke bredhur vetëm dhe e mori mënjanë për ta marrë në pyetje.

Djali thuhet se u tha autoriteteve se ishte fshehur në ndarjen e pasme të rrotave të uljes qendrore të aeroplanit.

Stafi i linjës ajrore gjeti gjithashtu një altoparlant të vogël me ngjyrë të kuqe pasi u kryen inspektime të mëtejshme sigurie.

Gazeta Indian Express raportoi se 13-vjeçari donte të udhëtonte për në Iran dhe nuk e dinte se fluturimi në të cilin kishte hipur ishte i destinuar për në Delhi, jo për në Teheran.

Sipas gazetës, djali hyri fshehurazi në aeroportin e Kabulit, ndoqi një grup pasagjerësh dhe u fsheh në hapësirën e rrotave të pasme të avionit - ndarjen e brendshme ku ndodhet sistemi i uljes. Ai mbante me vete vetëm altoparlantin me ngjyrë të kuqe.

Kohët e fundit ka pasur incidente të udhëtarëve që fshihen në aeroplane për në SHBA ose Evropë, shpesh duke ikur nga vendet e tyre të origjinës. Por shumë pak prej tyre ia dalin të gjallë. /Telegrafi/

Presidenti i SHBA-së, Donald Trump, mbrëmë kërcënoi se "gjëra të këqija" do t'i ndodhnin Afganistanit nëse SHBA nuk do të kthente kontrollin e Bazës Ajrore të Bagramit dhe refuzoi të përjashtonte dërgimin e trupave për ta rimarrë atë.

"Nëse Afganistani nuk ua kthen Bazën Ajrore të Bagramit atyre që e ndërtuan, Shteteve të Bashkuara të Amerikës, GJËRA TË KËQIJA DO TË NDODHIN!", shkroi Trump në një postim në Truth Social.

Trump tha se Shtetet e Bashkuara ishin përpjekur të rifitonin kontrollin e bazës së përdorur nga forcat amerikane pas sulmeve të 11 shtatorit 2001.

Ai njoftoi gjithashtu se po e diskutonte çështjen me Afganistanin, shkruan Reuters.

Bëhet e ditur se tërheqja e forcave amerikane në vitin 2021 çoi në marrjen e bazave amerikane nga talebanët dhe rrëzimin e qeverisë së mbështetur nga SHBA në Kabul.

Zyrtarët afganë kanë shprehur kundërshtim ndaj kthimit të pranisë ushtarake amerikane.

Zyrtarë aktualë dhe ish-zyrtarë amerikanë po paralajmërojnë privatisht se rimarrja e Bazës Ajrore të Bagramit në Afganistan mund të duket si një pushtim i ri i vendit, që kërkon më shumë se 10,000 trupa dhe vendosjen e sistemeve të përparuara të mbrojtjes ajrore.

Trump, i cili më parë ka thënë se dëshiron që SHBA të fitojë territore dhe vende strategjike që variojnë nga Kanali i Panamasë deri në Grenlandë, është dukur veçanërisht i përqendruar në Bagram për vite me radhë.

I pyetur dje nëse do të dërgonte trupa amerikane për të rimarrë bazën, Trump nuk u përgjigj drejtpërdrejt, duke thënë: "Nuk do të flasim për këtë."

"Po flasim me Afganistanin tani dhe e duam atë përsëri, e duam përsëri së shpejti, menjëherë. Dhe nëse nuk e bëjnë - nëse nuk e bëjnë, do ta zbuloni se çfarë do të bëj unë", u tha ai gazetarëve në Shtëpinë e Bardhë.

Ndryshe, aeroporti i gjerë ishte baza kryesore për forcat amerikane në Afganistan gjatë dy dekadave të luftës që pasuan sulmet e 11 shtatorit 2001 në New York dhe Uashington.

Baza dikur strehonte restorante të ushqimit të shpejtë si Burger King dhe Pizza Hut për ushtarët amerikanë, si dhe dyqane që shisnin gjithçka, nga elektronika te qilimat afganë. Ajo gjithashtu strehonte një kompleks të madh burgu.

Ekspertët thonë se baza ajrore fillimisht do të ishte e vështirë për t'u siguruar dhe do të kërkonte një fuqi të madhe njerëzore për ta operuar dhe mbrojtur atë.

Edhe nëse talebanët do të pranonin një kthim të SHBA-së në Bagram pas negociatave, baza do të duhej të mbrohej nga një numër kërcënimesh, duke përfshirë luftëtarët e Shtetit Islamik dhe al-Kaedas brenda Afganistanit.

Ajo do të ishte gjithashtu e ndjeshme ndaj kërcënimit të raketave të përparuara nga Irani, i cili sulmoi një bazë të madhe ajrore amerikane në Katar në qershor, pasi Shtetet e Bashkuara kryen sulme ndaj objekteve bërthamore iraniane. /Telegrafi/

Faqja e internetit për çështjet ushtarake të Zonës së Luftës tha të martën e kaluar se Komanda Kontraktuese e Ushtrisë Amerikane kishte njoftuar një kontratë trevjeçare me burim të vetëm për Textron, për të prodhuar 65 njësi MSFV së bashku me furnizimin njëvjeçar të pjesëve rezervë duke përdorur fondet e Iniciativës së Ndihmës për Sigurinë e Ukrainës (USAI).

MSFV është një version i përmirësuar i automjetit të blinduar të sigurisë (ASV) M1117 “Guardian” me rrota, që u zhvillua për t’i siguruar Ushtrisë Kombëtare Afgane (ANA) një transportues të blinduar personeli (APC) të lehtë, të lëvizshëm dhe të mbijetueshëm, transmeton Telegrafi.

Trupi i automjetit u zgjat, u instalua blindazh shtesë dhe u përfshi mbrojtje e përmirësuar nga minat tokësore nën trupin e tij. Ukraina mori qindra automjete standarde M1117 (ASV) – 250 automjete të rinovuara si pjesë e një pakete ndihme ushtarake amerikane prej 400 milionë dollarësh në nëntor 2022, me ASV shtesë që u dorëzuan më pas nga rezervat e ushtrisë amerikane, përfshirë si pjesë të paketës së 66-të të Autoritetit të Tërheqjes Presidenciale (PDA) të shtatorit 2024.

Imazhet e para të M1117 që përdoren nga Forcat e Armatosura të Ukrainës (AFU) u shfaqën në Telegram në mars 2024, duke u operuar nga një njësi e Batalionit të 425-të “Skala”.

Përveç rolit të transportit të trupave, MSFV ofron gjithashtu një version ambulance për evakuimin e viktimave. Armatimi standard përfshin mitralozin M2 Browning, lëshuesin automatik të granatave Mk 19 dhe mitralozat M240 dhe M249, megjithëse është e mundshme që Ukraina të pajisë armët e veta në shërbim.

Shumë komentues sugjerojnë se, ndërsa M1117 dhe varianti MSFV janë shumë të lëvizshëm – ato kanë një shpejtësi maksimale rrugore prej rreth 100 km/orë dhe performancë të mirë dhe mbrojtje nga zjarri i armëve të vogla dhe fragmentimi i artilerisë, ato janë të ndjeshme ndaj dronëve si dhe raketave të drejtuara antitank dhe sulmeve me artileri.

Megjithatë, imazhet e autoblindave në Ukrainë kanë treguar se njësitë tashmë po instalojnë “kafaze përballimi” anti-dronë dhe mbrojtje të tjera në automjetet e tyre operative. /Telegrafi/

The post Ukraina do të marrë versionin ‘afgan’ të automjeteve të blinduara amerikane M1117 appeared first on Telegrafi.

Presidenti amerikan, Donald Trump e ka nënshkruar një urdhër ekzekutiv që parasheh shpalljen e shteteve që ndalojnë padrejtësisht shtetas amerikanë, si sponsore shtetërore të terrorizmit, përfshirë Iranin, Afganistanin, Rusinë dhe Kinën.

Zyrtarë të lartë të administratës kanë thënë para gazetarëve më 5 shtator se Uashingtoni do t’i shënjestrojë shtetet që mbajnë padrejtësisht amerikanë, si dhe ata që përfshihen në “diplomaci pengjesh”.

“Sikurse me listën e sponsorëve shtetërorë të terrorizmit, asnjë shtet nuk do të ketë dëshirë të përfundojë në këtë listë”, ka thënë Sekretari amerikan i Shtetit, Marco Rubio përmes një deklarate.

Urdhri parasheh masa të ashpra, përfshirë sanksionet, ndaj shteteve që Uashingtoni beson se po mbajnë gabimisht amerikanë.

Një zyrtar tjetër i lartë i administratës amerikane u ka thënë gazetarëve se masat ndëshkuese do të jenë të ngjashme me ato që vendosen ndaj organizatave që shpallen terroriste.

“Sot ndryshon gjithçka sa u përket regjimeve mashtruese dhe regjimeve që mendojnë se amerikanët mund të trajtohen si pengje”, ka thënë një zyrtar tjetër i administratës, në kushte anonimiteti.

Administrata amerikane ka thënë se ka siguruar lirimin e 72 shtetasve amerikanë, përfshirë prej vendeve sikurse Rusia dhe Afganistani.

“Kemi nxjerrë shumë njerëz dhe do të vazhdojmë”, ka thënë presidenti amerikan, Donald Trump më 5 shtator.

Sipas politikës së re, Uashingtoni do t’i paralajmërojë shtetet që mund të futen në listën e re dhe ato do të kenë një periudhë kohore që të veprojnë para se të vendosen sanksionet. Zyrtarët amerikanë kanë thënë se besojnë që Rusia është duke mbajtur padrejtësisht nëntë amerikanë, ndërsa Irani tetë.

Tërmet me magnitudë 5.2 shkallësh të Rihterit goditi juglindjen e Afganistanit, vetëm dy ditë pasi një tërmet me magnitudë 6 vrau më shumë se 1400 persona dhe plagosi mijëra të tjerë në të njëjtën rajon, çka ka shtuar frikën për dëme dhe shkatërrime të mëtejshme.

Tërmeti i sotëm ishte në një thellësi relativisht të vogël, prej 10 kilometrash, njësoj si ai që goditi vendin të dielën në mesnatë.

Ai ishte një nga tërmetet më të rënda në Afganistan në shumë vite, duke rrafshuar shtëpi në fshatra të izoluara. Ende nuk dihen përmasat e dëmeve të tërmetit të ri.

Lexo po ashtu Të paktën 500 të vdekur nga një tërmet që goditi Afganistanin

Terreni i vështirë po pengon seriozisht përpjekjet e ekipeve të shpëtimit për të ofruar ndihmë në fshatrat e izoluara të rajonit malor të prekur, raporton aljazeera.

Deri tani dihet se të paktën 1,411 persona kanë humbur jetën, 3124 janë lënduar dhe më shumë se 5400 shtëpi janë shkatërruar, ka deklaruar zëdhënësi i administratës talebane, Zabihullah Mujahid.

Ka frikë se më shumë njerëz janë ende të bllokuar nën rrënoja, ka bërë të ditur Gjysmëhëna e Kuqe Afgane, një organizatë humanitare që vepron në rajon. Koordinatori i OKB-së në Afganistan ka thënë se numri i viktimave pritet të rritet edhe më tej.

Ky vend i izoluar është i prirur ndaj tërmeteve vdekjeprurëse, veçanërisht në vargun malor Hindukush, ku takohen pllakat tektonike indiane dhe euroaziatike. Provincat lindore Kunar dhe Nangarhar janë goditur më rëndë nga tërmeti i së dielës në mbrëmje. /Telegrafi/

The post Pas tërmetit të kaluar që la mbi 1400 të vdekur, një tjetër ka goditur Afganistanin appeared first on Telegrafi.