TIRANË, 1 shkurt /ATSh/ Drejtori i Autoritetit Rrugor Shqiptar, Ami Kozeli u shpreh sot, se rënia e masivit të dherave në fshatin Dragostunjë, ka ardhur si pasojë e fenomeneve natyrore.

Kozeli tha se rrëshqitja ka ndodhur në kilometrin e tretë në dalje të Librazhdit, rreth orës 10.15 minuta.

“Ka ndodhur një rrëshqitje  e gurit masiv në shpatin e malit. Situata vjen për shkak të reshjeve të denduara që kemi javë të tëra që i raportojmë. Ka pasur një mbingopje të shaptit me ujë, gjë që shkaktuar edhe rëshqitje”, tha Kozeli.

Sipas drejtorit të ARRSh-së, situata ka ndodhur vetëm për shkak të fenomenit natyror të reshjeve të shiut, dhe jo për shkak të punimeve që po kryhen në zonë.

“Ka gatishmëri nga ana e kontraktorit të mirëmbajtjes së këtij aksi, që ka sjellë në dispozicion të githa mjetet”, vijoi ai.

Policia Rrugore së bashku me Autoritetin Rrugor Shqiptar po bëjnë menaxhimin e trafikut, duke kërkuar edhe mirëkuptimin e qytetarëve që kanë pritur për disa orë, për mbarëvajtjen e qarkullimit.

Aksi rrugor Elbasan – Qafë Thanë, tashmë është zhbllokuar pas rrëshqitjes të masivit të dherave, që pengoi qarkullimin e automjeteve në të dy drejtimet.

/e.i/j.p/

The post Kozeli: Rrëshqitja e dherave në Dragostunjë për shkak të reshjeve të fundit appeared first on Agjencia Telegrafike Shqiptare.

TIRANË, 1 shkurt /ATSh/ Autoriteti Rrugor Shqiptar njoftoi pasditen e sotme se aksi rrugor Elbasan-Qafë Thanë është hapur për qarkullimin e mjeteve pas bllokimit që zgjati disa orë për shkak të rrëshqitjes së masivit të dherave nga shpatet në trupin e rrugës.

Bllokimi ndodhi në segmentin Librazhd-Prrenjas, rreth 3 km larg Librazhdit, në fshatin Dragostunjë, ku si rezultat i reshjeve të dendura u shkëput masiv dherash dhe shkëmbinjsh nga shpati i sipërm i hekurudhës duke bllokuar totalisht hekurudhën dhe rrugën poshtë saj.

Policia Rrugore së bashku me Autoritetin Rrugor Shqiptar po bëjnë menaxhimin e trafikut, duke kërkuar edhe mirëkuptimin e qytetarëve që kanë pritur për disa orë, për mbarëvajtjen e qarkullimit.

Më herët, Ministria e Infrastrukturës dhe Energjetikës, bëri me dije se kompania kontraktore e mirëmbajtjes së aksit rrugor Librazhd-Qafë Thanë dhe ARRSh u angazhuan për zhbollikimin e rrugës.

Sipas MIE-s, menjëherë kontraktorët janë angazhuar me 6 eskavatorë, 2 fadroma dhe punonjës për hapjen e rrugës sa më shpejt që të jetë e mundur.

Prej disa orësh, aksi rrugor Elbasan – Qafë Thanë u bllokua pas rrëshqitjes të masivit të dherave, që pengoi qarkullimin e automjeteve në të dy drejtimet.

/e.i/j.p/

The post ARRSH: Hapet aksi Elbasan–Qafë Thanë për qarkullimin e mjeteve appeared first on Agjencia Telegrafike Shqiptare.

TIRANË, 1 shkurt /ATSh/ Ministria e Infrastrukturës dhe Energjetikës bëri me dije se kompania kontraktore e mirëmbajtjes së aksit rrugor Librazhd-Qafë Thanë dhe ARRSh janë angazhuar për zhbollikimin e pjesës së bllokuar në fshatin Dragostunjë.

Në një njoftim për mediet, MIE informon se në segmentin Librazhd-Përrenjas, rreth 3 km larg Librazhdit, në fshatin Dragostunjë, si rezultat i rreshjeve të dendura është shkëputur një masiv dherash dhe shkëmbinjsh nga shpati i sipërm i hekurudhës duke bllokuar totalisht hekurudhën dhe rrugën poshtë saj.

Sipas MIE-s, menjëherë kontraktorët janë angazhuar me 6 ekskavatorë, 2 fadroma dhe punonjës për hapjen e rrugës sa më shpejt që të jetë e mundur.

“Arsyet e kësaj situate lidhen me reshjet e dendura te javëve të fundit dhe erozionin e theksuar të shpatit mbi rrugë”, thuhet në njoftim.

MIE informon se paralelisht me pastrimin e materialit të rënë po bëhet edhe çmontimi i masivit që ka lëvizur dhe që është i paqëndrueshëm, duke shmangur një rrezik të mundshëm për rënie të mëtejshme.

Ndërsa, ARRSH kërkon mirëkuptimin e të gjithë përdorueseve të mjeteve për vonesat e shkaktuar nga kjo ndërhyrje e domosdoshme për zhbllokimin e rrugës.

Prej tri orësh, aksi rrugor Librazhd – Qafë Thanë ishte i bllokuar për shkak të rrëshqitjes të masivit të dherave, duke penguar qarkullimin e automjeteve në të dy drejtimet.

/e.i/j.p/

The post MIE: 6 ekskavatorë dhe 2 fadroma të angazhuara për hapjen e rrugës Librazhd-Qafë Thanë appeared first on Agjencia Telegrafike Shqiptare.

TIRANË, 1 shkurt /ATSh/ Pas një beteje të gjatë me sëmundjen e kancerit të gjirit, gazetarja e njohur Rezarta Reçi ka ndërruar jetë sot, në moshën 64-vjeçare.

Reçi e nisi rrugëtimin në media përpara 30 viteve, duke u angazhuar si autore dhe prezantuese në disa formate televizive.

Gazetarja Reçi spikati me emisionin “Arratia e Peshkut të Kuq” në News24, ku intervistoi personalitete të ndryshme dhe solli për publikun histori me qasje sociale dhe njerëzore.

Reçi ka botuar edhe dy libra, me titujt “Kolonë Zanore” dhe “Zhbërja”.

Gazetarja Reçi, e ka përcjellë publikisht në daljet mediatike, betejën e saj të gjatë me kancerin e gjirit, duke shërbyer si shembull kuraje për shumë gra dhe vajza të tjera.

/e.i/j.p/

The post Ndahet nga jeta gazetarja Rezarta Reçi appeared first on Agjencia Telegrafike Shqiptare.

TIRANË, 1 shkurt /ATSh/ Kryeministri Edi Rama publikoi sot fotoalbumin me momentet kryesore të aktiviteteve të tij gjatë javës.

Gjatë kësaj jave, kreu i qeverisë zhvilloi vizitë pune në Izrael, në kuadër të Konferencës Ndërkombëtare për Luftën kundër Antisemitizmit. Në këtë vizitë, kryeministri u shoqërua edhe bashkëshortja e tij, Linda Rama dhe delegacioni zyrtar.

Ndalesa e parë e Kryeministrit Rama ishte në Nova Site, një vend simbolik i kthyer në hapësirë reflektimi pas ngjarjeve tragjike nga sulmi i Hamasit më 7 tetor 2023. Më pas, Rama u prit në takim nga Kryeministri izraelit Benjamin Netanyahu.

Gjithashtu, Rama gjatë vizitës së tij në Izrael u prit nga kryetari i Knessetit (Parlamentit të Izraelit) Amir Ohana në Knesset Plaza me një ceremoni të posaçme si dhe iu adresuar parlamentit.

Kreu i Qeverisë, mori pjesën në aktivitetin e organizuar nga AIDA, ku u prezantua platforma “Export ON”, e cila do të merret me matjen e indikatorëve të punës së përditshme të kompanive eksportuese dhe çdo vit do të publikojë raportin e vet mbi lëvizjen e volumit eksportues.

Gjatë javës, Kryeministri Rama mbajti fjalën e tij edhe në aktivitetin e organizuar për përzgjedhjen e kompanive arkitekturore fituese me projektet e Shtëpisë së Fëmijëve dhe Kompleksit të Inspektorateve Shtetërore.

Njëherësh, Rama mori pjesë në ekspozitën “Spaces in Dialogue” e çelur në COD (Qendra për Hapje dhe Dialog), një ekspozitë që sjell në vëmendje hapësirat, arkitekturën, kujtesën dhe përjetimin njerëzor.

Kreu i Ekzekutivit, mori pjesë edhe në një dëgjesë publike me fermerët në Divjakë për Skemën Kombëtare 2026. Rama u shpreh se fermerët duhet të orientohen drejt mundësive të pashfrytëzuara të financimit.

/e.i/j.p/

The post Rama publikon fotoalbumin e javës appeared first on Agjencia Telegrafike Shqiptare.

TIRANË, 1 shkurt /ATSh/ Shërbimi i Kardiologjisë në Qendrën Spitalore Univeristare “Nënë Tereza”, gjatë vitit të kaluar ka shpëtuar mijëra jetë përmes ndërhyrjeve jetike.

Kryeministri Edi Rama solli në vëmendje shifrat e referuara nga Ministria e Shëndetësisë dhe Mirëqenies Sociale.

Prej muajit janar deri në dhjetor 2025 në Shërbimin e Kardiologjisë janë kryer 599 implantime aparaturash kardiake (pacemaker, CRT-D, CRT-P, defibrilatorë intrakardiakë të implantueshëm) si dhe 143 angioplastika të planifikuara me stent.

Gjithashtu, Kryeministri Rama informon se janë kryer 2,941 procedura PCI dhe koronarografi, nga të cilat 1,366 urgjenca, ndërhyrje në momentet më kritike për jetën.

Kreu i Qeverisë, falënderon çdo mjek, infermier dhe profesionist shëndetësor që qëndron çdo ditë në vijën e parë të kujdesit.

Shërbimi i Kardiologjisë pranë Qendrës Spitalore Universitare “Nënë Tereza” në Tiranë ofron kushte dinjitoze dhe trajtim me teknologji moderne për çdo pacient.

/e.i/j.p/

The post Rama: Mijëra jetë të shpëtuara përmes ndërhyrjeve në Kardiologjinë e QSUNT appeared first on Agjencia Telegrafike Shqiptare.

TIRANË, 1 shkurt /ATSh/ Muajt e dimrit shoqërohen jo vetëm me temperatura të ulëta, por edhe me një rritje të ndjeshme të stresit dhe ankthit tek një pjesë e qytetarëve. Mungesa e dritës natyrale, izolimi social, ritmi i ngadaltë i jetës ndikojnë drejtpërdrejt në shëndetin mendor.

Në një intervistë për ATSh-në, Andia Meksi, specialiste e shëndetit mendor pranë Institutit të Shëndetit Publik (IShP) shpjegon se gjatë dimrit vërehet një shtim i konsultave për ankth, çrregullime të gjumit dhe lodhje emocionale.

“Në kulturat perëndimore ky fenomen njihet si “winter blues” ose “depresioni dimëror”, ku individët përjetojnë humor të ulët, lodhje mendore, apati, shpërqendrim, probleme me gjumin dhe oreksin, etj. Arsyet e kësaj gjendje lidhen me klimën e ftohtë dhe ditët e shkurtra apo dhe mungesa e diellit në shumicën e ditëve gjatë sezonit të dimrit. Ekziston një lidhje, edhe pse jo e drejtpërdrejtë (shkak-pasojё) midis gjendjes së humorit dhe klimës, pra, mungesa e diellit dhe ndikimi që ka në gjendjen tonë të përgjithshme. Gjatë dimrit, trupi është i ekspozuar ndaj virozave dhe mungesës së rrezeve të diellit (vitamina D), kjo çon edhe në rënie të sistemit imunitar. Gjithashtu, kontaktet sociale bëhen me të rralla në këtë periudhë se në verë, si dhe aktiviteti fizik është i kufizuar, çka mund të çojë në një gjendje apatie, lodhjeje dhe humor të ulët”, thotë Meksi.

Meksi shton se ka disa faktorë psikologjikë, socialë dhe ekonomikë që i bëjnë disa individë më të cenueshëm ndaj këtij efekti dimëror, siç mund të jenë problemet ekzistuese të shëndetit mendor, kryesisht probleme me humorin (depresion, çrregullimi bipolar) dhe ankthit (ankth i përgjithësuar, sulme të panikut, çrregullimi obsesiv kompulsiv (OCD), etj.), por edhe individët me probleme të abuzimit me substancat si alkooli, drogat dhe individët me probleme të përshtatjes.

“Sipas Shoqatës Amerikane të Psikiatrisë (APA), gjatë stinës së dimrit individët përjetojnë simptomat si ndjenjë trishtimi, humbje interesi ose kënaqësie në aktivitetet që zakonisht pëlqehen, ndryshime në oreks, ndryshim në gjumë, humbje energjie ose ndjenjë më e lodhur pavarësisht një sasie të mirë gjumi, ngadalësim i të menduarit, përqendrimit ose vendimmarrjes, rritje e aktiviteteve si ecja, shtrëngimi i duarve ose pamundësia për t’u ulur, ose ngadalësim i lëvizjeve ose të folurit, ndjenjë e pashpresë, pa vlerë ose faji, si edhe mendime për vdekje ose vetëvrasje”, pohon Meksi, duke nënvizuar se shëndeti mendor nuk është një gjendje statike, por dinamike.

“Për ata të cilët janë duke hasur vështirësi në përmbushjen e detyrave të përditshme, që kanë probleme me gjumin, humorin dhe shqetësimet trupore apo psikoemocionale, të drejtohen pranë mjekut të familjes në qendrat socio-shëndetësore në zonat e tyre të banimit. Tashmë, pranë qendrave shëndetësore primare janë atashuar stafet psiko-sociale të cilat ofrojnë vlerësime dhe referim për trajtim të specializuar të shëndetit mendor. Këta profesionistë janë të pajisur me njohuri dhe mjetet për të bërë ndërhyrje dhe për të vlerësuar ndihmën që iu duhet”, thekson ajo.

Dimri, sipas Meksit, i kufizon individët në kryerjen e aktiviteteve në ambiente të hapura dhe në natyrë, por kurrsesi nuk ndikon në marrëdhëniet dhe jetën sociale të individëve.

“Të ndenjurit vetëm nuk është domosdoshmërisht shenjë e vetmisë apo tërheqjes sociale. Ka individë të cilët nuk ndihen të vetmuar pasi e kanë kohën të zënë duke bërë gjërat që iu pëlqejnë dhe që i bëjnë të ndihen mirë me veten. Por, dimri kufizon kryerjen e aktiviteteve në ambiente të hapura dhe në natyrë, por kurrsesi nuk ndikon në marrëdhëniet dhe jetën sociale të individëve. Izolimi apo tërheqja sociale ndaj aktiviteteve dhe kontakteve/ marrëdhënieve që më parë i kryenim me dëshirë, ndodh si pasojë e ndjenjës së pasigurisë, ankthit dhe problematikave të tjera që lidhen me shëndetin tonë mendor”, shton ajo.

Meksi ndan njëherësh edhe disa këshilla praktike për qytetarët dhe mënyrën se si duhet të veprohet për ta përballuar emocionalisht dimrin.

Ajo thekson se qytetarët duhet të jenë të vëmendshëm ndaj ndryshimeve në mendime, gjendjen emocionale dhe sjelljen e tyre.

“Duhet të komunikoni me miq dhe familjarë për vështirësitë që po kaloni dhe me punëdhënësin nëse kjo po ndikon në performancën tuaj në punë dhe të kërkoni zgjidhje për problemet që po hasni. Kujdesi ndaj vetes është i rëndësishëm, ndaj drejtojuni një specialisti të shëndetit mendor në rast nevoje. Takimet konsultuese me një profesionist ndihmojnë që të parandalojmë përkeqësimin e gjendjes dhe të adresojmë në mënyrën e duhur problemet e shëndetit tonë mendor”, thotë Meksi.

Sipas saj, e rëndësishme është që të ruhet edhe rutina e përditshme, aktiviteti fizik dhe orët e plota të gjumit.

“Angazhimi në punë, kujdesi për higjienën e shtëpisë dhe vetes, gatimi i vakteve të shëndetshme në vend që t’i blini të gatshme, shpenzimi i kohës me veten në mënyrë cilësore dhe reduktimi i ndërveprimit në rrjetet sociale dhe botën virtuale janë disa prej angazhimeve që ndihmojnë në reduktimin e gjendjes së rënduar emocionale”, thekson ajo.

“Gjithashtu, aktiviteti fizik i lehtë dhe i moderuar (të paktën 20 minuta ecje çdo ditë ose 60-90 minuta fizkulturë 3 herë në javë); 6-7 orë gjumë me orare fikse (fjetje-zgjim); pushimi, reduktimi dhe shmangia e produkteve të duhanit, alkoolit dhe drogave; mbajtja e një ditari ku të shënoni mendimet që keni; meditimi dhe kontakti me familjarët dhe miq, janë të tjerë faktorë pozitivë që ndikojnë në përmirësimin e gjendjes. Nëse gjendja juaj nuk përmirësohet, duhet ndërhyrja tek specialisti i shëndetit mendor”, përfundoi Meksi.

Andia Meksi, specialiste e shëndetit mendor pranë ISHP, foto: Andrin Hoxha

1 nga 3

/e.i/j.p/r.e/

The post Meksi për ATSh: Dimri rrit stresin dhe ankthin, kujdes me sinjalet që jep trupi dhe mendja appeared first on Agjencia Telegrafike Shqiptare.

TIRANË, 30 janar/ATSH/ Presidenti i Republikës, Bajram Begaj i dorëzoi sot flamurin kombëtar ekipit olimpik Team Albania që do të përfaqësojë Shqipërinë në Lojërat Olimpike Dimërore 2026, të cilat do të zhvillohen në datat 6-22 shkurt në Milano dhe Cortina d’Ampezzo të Italisë.

I pranishëm në ceremoninë e mbajtur në Pallatin e Brigadave, ministri i Turizmit, Kulturës dhe Sportit, Blendi Gonxhja tha se po konsultohet në publik ligji i ri i sponsorizimeve, i cili do t’i japi një energji të munguar sportit.

“Do t’i hapim një dritare krejt tjetër dhe një mundësi krejt të re për të çliruar ato energji që deri më tani kanë qenë të munguara në shërbim të sportit. Do të kemi një instrument tjetër që do të sjell një fond i cili do të jetë një fond special, që do të jetë në shërbim të artit, kulturës, sportit. Ne të gjitha këto ia dedikojmë edhe rinisë në mënyrë direkte, sepse ku ka më shumë rini sesa në këto sfera”, tha Gonxhja.

“Gjithashtu sapo kaluam në qeveri, aktet nënligjore të lojërave të fatit, që do të bëjë të kemi shumë shpejt zbatueshmërinë e një ligji, i cili do të sjellë një divident të sigurt, të menjëhershëm, goxha të lartë për sportin. Kështu që jemi në prag të ditëve shumë të mira”, vijoi ai.

Ministri Gonxhja falënderoi presidentin e Federatës së Skive, duke e etiketuar një biznesmen të shkëlqyer. Gonxhja shprehu mirënjohjen edhe për figura të tjera sportive që lartësojnë emrin e Shqipërisë në këtë disiplinë sportive si Lara Colturi, Denni Xhepa, Semire Dauti dhe Elisa Brunga.

/e.i/r.e/a.f/

The post Gonxhja: Instrumente të reja financiare në shërbim të sportit dhe rinisë appeared first on Agjencia Telegrafike Shqiptare.

TIRANË, 30 janar/ATSH/ Policia Bashkiake e Tiranës, në bashkëpunim me Komisariatin e Policisë Nr. 2, ka konstatuar një rast të depozitimit të paligjshëm të mbetjeve inerte në hapësirë publike.

Në njoftimin e bashkisë, thuhet se gjatë verifikimeve në terren, u identifikuan personat përgjegjës për këtë shkelje, të cilët u ndëshkuan administrativisht, ndërsa materialet procedurale u referuan pranë organeve kompetente për veprime të mëtejshme ligjore.

Në lidhje me këtë aksion, nënkryetari i Bashkisë së Tiranës, Blendi Sulaj, i cili ishte në krye të monitorimit të situatës, u shpreh se Policia Bashkiake vijon të kryejë me përkushtim detyrën për kontrollin e territorit.

“Policia Bashkiake Tiranë vazhdon të jetë në lartësinë e detyrës që i është besuar për kontrollin e territorit. Ky rast duhet të shërbejë si një thirrje për çdo ndërtues apo kompani që të respektojë ligjin dhe të mos e shkelë atë. Bashkia e Tiranës monitoron në mënyrë të vazhdueshme territorin dhe ka nën vëzhgim çdo kantier ndërtimi”, deklaroi Sulaj.

Bashkia e Tiranës njofton se do të vijojë kontrollet intensive në terren dhe u bën thirrje qytetarëve të denoncojnë çdo rast të ndotjes së mjedisit apo shkeljes së ligjit në hapësirat publike.

/e.i/a.f/

The post Sulaj: Asnjë tolerancë për ndotjen e territorit appeared first on Agjencia Telegrafike Shqiptare.

TIRANË, 30 janar/ATSH/ Kryeministri Edi Rama nënvizoi sot se “dyshimi i arsyeshëm” është një formulë që ka marrë më qafë shumë njerëz, duke mbajtur individë në burg pa gjyq.

Duke sjellë në vëmendje mesazhin e Nicola Lettierit, zëvendësprokuror i përgjithshëm në Gjykatën e Lartë të Kasacionit të Italisë, dhënë gjatë aktivitetit të djeshëm në Tiranë, Rama tha se kjo formulë ka marrë më qafë shumë njerëz që në fund kanë dalë të pafajshëm, po edhe të dërrmuar psikologjikisht, apo që mban sot nëpër burgje pa gjyq njerëz që nesër mund të dalin të pafajshëm.

Sipas Kreut të Ekzekutivit, çështja e paraburgimit është një ndër disa pikat mbi të cilat duhet reflektuar seriozisht, për ta bërë Shqipërinë një vend ku prezumimi i pafajësisë të mos dhunohet nga prezumimi i fajësisë.

Ndër të tjera, Lettieri u shpreh se ajo çfarë sugjerohet është që të përdoret në një dispozitë specifike, 228 e Kodit Penal, një formulim specifik i “bazës së arsyeshme” për prova apo indicie serioze në vend të formulimit aktual që është “dyshim i arsyeshëm”.

“Nuk ka një prag, një kufi të shprehur të veprës penale për t’u ndaluar. Prokurori mund ta kërkojë këtë gjë, gjyqtari mund ta miratojë masën e sigurimit për çdo vepër penale. Kjo nuk është koherente me të njëjtin Kod në Shqipëri sepse Neni 241, parashikon se masat e ndërmjetme apo ndaluese që janë më pak ndëshkuese se masa e paraburgimit, mund të zbatohen vetëm në procese që përfshijnë vepra penale të ndëshkueshme me ligj me një dënim me më shumë se 1 vit burg”, pohoi ai.

Zëvendësprokurori i përgjithshëm i Gjykatës së Lartë të Kasacionit të Italisë tha se njëherësh duhen mbajtur në fokus edhe kriteret e arsyetimit ligjor.

“Ajo çfarë kemi dashur të shmanget është që gjyqtari mund të miratojë një masë duke iu referuar vetëm kërkesës që vjen nga prokurori, pa bërë asnjë përpjekje për të parë dosjen dhe për të krijuar opinionin e tij, të shmangë formulat stereotipe. Ndaj ne sugjerojmë dy ndryshime, ndryshime në nenin 245. I pari është kur kërkohet paraburgim, gjykata duhet të kërkojë arsye specifike pse e konsideron këtë ndalim të përshtatshëm ose jo, duke e përcaktuar atë në nenin 237”, tha Lettieri, ndërsa theksoi se gjykata nuk mund të kufizohet në miratimin e kësaj mase dhe duhet të thotë shprehimisht pse masat alternative nuk mund të zbatohen.

Sipas tij, gjyqtari nuk mund t’i referohet vetëm kërkesës që vjen nga prokurori, por duhet të provojë se kryen një vlerësim/shqyrtim autonom dhe në qoftë se kjo nuk bëhet, atëherë gjykata e një shkalle më të lartë mund ta anulojë këtë masë.

/e.i/a.f/r.e/

The post Lettieri: Gjyqtari të bëjë vlerësim autonom për paraburgimin, të arsyetojë pse nuk zbatohen masat alternative appeared first on Agjencia Telegrafike Shqiptare.

TIRANË, 30 janar/ATSH/ Ministrja e Shtetit për Administratën Publike dhe Antikorrupsionin, Adea Pirdeni mori pjesë në Dialogun Politik në Romë, mbi procesin e anëtarësimit të Shqipërisë dhe Malit të Zi në Bashkimin Evropian.

Në njoftimin për shtyp thuhet se dialogu shërbeu si një platformë për diskutime të thelluara mbi sfidat e procesit të negociatave, me fokus të veçantë në fushat e shtetit të së drejtës.

Ministrja Pirdeni theksoi angazhimin e pandërprerë të Shqipërisë për të ruajtur ritmin e procesit të negociatave dhe për t’i qëndruar besnikë zotimit për mbylljen e negociatave në nivel teknik brenda vitit 2027.

/e.i/r.e/a.f/

The post Integrimi në BE, Pirdeni merr pjesë në Dialogun Politik në Romë appeared first on Agjencia Telegrafike Shqiptare.

TIRANË, 30 janar/ATSH/ Korrupsioni dhe pastrimi i parave vijojnë të mbeten ndër sfidat kryesore që kërkojnë angazhim të vazhdueshëm institucional dhe bashkëpunim ndërkombëtar.

Në këtë kuadër, Zvicra, në partneritet me Këshillin e Evropës, ka nisur një mbështetje të re për forcimin e kapaciteteve të institucioneve shqiptare në luftën kundër këtyre fenomeneve dhe në përmirësimin e sundimit të ligjit.

Ambasada e Zvicrës, bën me dije se kjo mbështetje e re do të forcojë institucionet shqiptare për të luftuar korrupsionin dhe për të përmirësuar sundimin e ligjit, duke punuar specifikisht me Agjencinë e Inteligjencës Financiare, Zyrën e Menaxhimit të Pasurive dhe Zyrën e sapokrijuar të Rimëkëmbjes së Pasurive.

Në njoftimin e ambasadës zvicerane, theksohet se këto dy iniciativa të reja të nisura sot do të synojnë përpjekjet kundër korrupsionit në sektorin publik dhe luftën kundër pastrimit të parave të financuara përkatësisht nga Agjencia Zvicerane për Zhvillim dhe Bashkëpunim SDC dhe Sekretariati Shtetëror Zviceran për Çështjet Ekonomike SECO.

“Luftimi i korrupsionit duhet të jetë një përparësi politike, ekonomike dhe shoqërore, dhe një qëllim i përbashkët dhe me të cilin angazhohemi të gjithë”, tha ambasadorja zvicerane Ruth Huber.

/e.i/r.e/a.f/

The post Zvicra dhe Këshilli i Evropës, dy iniciativa të reja kundër korrupsionit në Shqipëri appeared first on Agjencia Telegrafike Shqiptare.

TIRANË, 30 janar/ATSh/ Përfaqësues të Policisë së Shtetit të Shqipërisë dhe Policisë së Kosovës kanë përfunduar një kurs intensiv pesëditor mbi ekzaminimet kompjuterike të pajisjeve celulare, duke u certifikuar në rikuperimin dhe analizën e avancuar të të dhënave digjitale.

Ambasada e Shteteve të Bashkuara të Amerikës në Tiranë në një njoftim ka uruar pjesëmarrësit nga Policia e Shtetit dhe Policia e Kosovës për përfundimin me sukses të këtij kursi pesëditor.

Sipas ambasadës, “ky program intensiv, i mbajtur në partneritet me Zyrën tonë Rajonale të Sigurisë dhe Zyrën e Ndihmës për Antiterrorin, mblodhi së bashku njëmbëdhjetë ekspertë të ekzaminimeve kompjuterike për të përvetësuar aftësitë e nevojshme për kryerjen e hetimeve në përputhje me ekspertizën ligjore”.

Ambasada e ShBA-së, cilëson se drejtuesi në detyrë i Zyrës së Sigurisë Rajonale, Jonathan Ellis, ishte i pranishëm për të përgëzuar të diplomuarit dhe për të vlerësuar angazhimin e tyre në fuqizimin e zbatimit të ligjit në hetimet digjitale.

Ky trajnim përfaqëson një hap të rëndësishëm drejt rritjes së kapaciteteve hetimore dhe thellimit të bashkëpunimit ndërinstitucional mes Shqipërisë dhe Kosovës në fushën e sigurisë dhe hetimeve digjitale.

/e.i/a.f/r.e/

The post ShBA certifikon 11 ekspertë kompjuterikë nga Shqipëria e Kosova appeared first on Agjencia Telegrafike Shqiptare.

TIRANË, 29 janar/ATSh/ Kryekomisioneri i Zgjedhjeve Ilirjan Celibashi, së bashku me organizatën “Qëndresa Qytetare” zhvilluan një seminar për përmirësimin e mekanizmave të monitorimit të fushatave zgjedhore dhe të hetimit administrativ.

Celibashi bën me dije se në këtë aktivitet morën pjesë anëtarë të organeve drejtuese të KQZ dhe përfaqësues të organizatave të shoqërisë civile që veprojnë në fushën e zgjedhjeve.

Takimi u shfrytëzua si një platformë e strukturuar për diskutim dhe shkëmbim përvojash.

Sipas Celibashit, qëllimi kryesor i takimit ishte identifikimi i vështirësive të zbuluara në zgjedhjet e kaluara dhe prezantimi i propozimeve konkrete për forcimin e monitorimit të fushatave zgjedhore dhe të procesit të hetimit administrativ.

Gjatë punimeve u diskutuan tema të rëndësishme, si rekrutimi, trajnimi dhe certifikimi i monitoruesve të KQZ-së, metodologjia e monitorimit të fushatës zgjedhore, krijimi i një sistemi të aksesueshëm për gjurmueshmërinë e ankesave, rregullat e sjelljes gjatë periudhës zgjedhore dhe masat për parandalimin e keqpërdorimit të burimeve publike.

“Përmirësimi i këtyre mekanizmave synon ta bëjë monitorimin e procesit zgjedhor më efektiv, transparent dhe parandalues, duke kontribuar në rritjen e besueshmërisë dhe integritetit të zgjedhjeve. Të gjitha sugjerimet dhe rekomandimet e paraqitura nga “Qendresa Qytetare” dhe organizatat e tjera të shoqërisë civile do të merren parasysh nga KQZ gjatë rishikimeve të kuadrit ligjor për zgjedhjet e ardhshme”, tha Celibashi.

/e.i/r.e/a.f/

The post KQZ diskutime për forcimin e mekanizmave të monitorimit të fushatave zgjedhore appeared first on Agjencia Telegrafike Shqiptare.

TIRANË, 29 janar/ATSh/ Qumështi për foshnja “APTAMIL 1 PRONUTRA” është duke u hequr nga tregu, pas vendimit të marrë nga Agjencia e Kontrollit të Ushqimit (AKU).

Autoriteti Kombëtar i Ushqimit informon opinionin publik se gjatë kontrolleve zyrtare të kryera në Gjermani, është konstatuar prani e substancës cereulide, një toksinë e prodhuar nga bakteri Bacillus cereus në qumështin formulë për foshnjat. Të dhënat e produktit:

AKU njofton se emri i produktit është APTAMIL 1 PRONUTRA 800G ADVANCED dhe data e skadencës është 10/11/2026.

Sipas njoftimit të AKU-së, trupat inspektuese në terren janë angazhuar në verifikimin dhe tërheqjen e menjëhershme të produktit nga tregu.

AKU i bën thirrje konsumatorëve nëse e kanë blerë këtë produkt dhe e kanë gjendje, ta kthejnë atë në pikat e shitjes.

/e.i/r.e/a.f/

The post Substanca toksike tek qumështi për foshnja, AKU tërheq produktin nga tregu appeared first on Agjencia Telegrafike Shqiptare.

TIRANË, 29 janar /ATSh/ Në Qendrën për Hapje dhe Dialog (COD) është çelur ekspozita “Spaces in Dialogue”, një ekspozitë që sjell në vëmendje hapësirat, arkitekturën, kujtesën dhe përjetimin njerëzor.

Në çeljen e ekspozitës, i pranishëm ishte edhe Kryeministri Edi Rama, i cili u shpreh se “Spaces in Dialogue” është një udhëtim në 22 vite projekte (2003–2025), të sjella si një arkiv i përbashkët.

Rama tha se “projektet konkurruese dhe fituese janë të integruara në skulpturën e sallës, ndërsa botimet origjinale mund të shihen në hapësirën tjetër”.

Sipas Ramës, ekspozita frymëzohet nga vepra e artistit konceptual gjerman Thomas Demand, që eksploron kujtesën kolektive përmes hapësirave dhe momenteve të rikrijuara.

Ekspozita “Spaces in Dialogue”, përcjellë te vizitorët një arkiv që nuk qëndron i heshtur, por ndërtohet, diskutohet dhe riformësohet.

Nëpërmjet tullave, mermerëve dhe dokumenteve arkitekturore, COD sjell në këtë ekspozitë 22 vite konkurse arkitekturore që kanë lindur nga dialogu dhe përgjegjësia kolektive.

Ekspozita do të qëndrojë e hapur deri më 11 shkurt.

/e.i/r.e/a.f/

The post “Spaces in Dialogue”, 22 vite projekte arkitekturore në një ekspozitë appeared first on Agjencia Telegrafike Shqiptare.

TIRANË, 29 janar /ATSh/ Nga ora 20:00 e mbrëmjes së sotme nis zhbllokimi i pikës kufitare të Qafë Thanës dhe i të gjitha pikave të tjera kufitare mes Shqipërisë dhe Maqedonisë së Veriut.

Drejtoria Vendore e Kufirit dhe Migracionit Korçë bën me dije se autoritetet e Maqedonisë së Veriut, kanë njoftuar nëpërmjet Qendrës së Shkëmbimit të Informacionit, se protesta e nisur që prej datës 26.01.2026, nga shoferët e kamionëve, do të pezullohet sot më datë 29.01.2026 dhe në orën 20:00, në të gjitha pikat kufitare që lidhen me Maqedoninë e Veriut do të fillojë qarkullimi normal i kamionëve.

Bllokada u organizua nga Shoqata e Transportuesve të Maqedonisë së Veriut, me pjesëmarrjen e rreth 370 kamionistëve në 10 pika kufitare, në kundërshtim të sistemit të ri elektronik të hyrje-daljeve në zonën Schengen.

Zgjidhja erdhi pas ndërhyrjes së Komisionit Evropian, i cili do të lëshojë viza për transportuesit.

/e.i/a.f/r.e/

The post Protesta e shoferëve të kamionëve, zhbllokohet pika kufitare e Qafë Thanës appeared first on Agjencia Telegrafike Shqiptare.

TIRANË, 29 janar /ATSh/ Agjencia Shqiptare e Zhvillimit të Investimeve (AIDA) organizoi ditën e sotme një aktivitet në kuadër të prezantimit të platformës ExportON 2026.

Zëvendësministrja e Ekonomisë dhe Inovacionit, Olta Manjani, e pranishme në këtë tryezë, theksoi nevojën që prodhuesit shqiptarë të kalojnë në një nivel më të avancuar, përmes zinxhirëve të prodhimit me cikël të mbyllur, rritjes së përdorimit të inovacionit dhe forcimit të infrastrukturës së cilësisë sipas standardeve të BE-së.

Në aktivitetin e organizuar nga AIDA u mblodhën përfaqësues të institucioneve qendrore, autoriteteve rregullatore, sistemit financiar, organizatave të biznesit dhe sipërmarrjeve prodhuese e eksportuese, duke krijuar një platformë gjithëpërfshirëse dialogu mbi sfidat dhe perspektivat e sektorit.

Nga ana e qeverisë dhe institucioneve qendrore morën pjesë përfaqësues të Ministrisë së Ekonomisë dhe Inovacionit, Ministrisë së Financave, Bankës së Shqipërisë, si dhe drejtues të Drejtorisë së Përgjithshme të Tatimeve, Doganave dhe Metrologjisë, të cilët adresuan çështje fiskale, doganore, monetare dhe të infrastrukturës së cilësisë, me ndikim të drejtpërdrejtë në prodhim dhe eksport.

Në tryezë kontribuuan gjithashtu Këshilli Ekonomik Kombëtar, Pro Export Albania, përfaqësues të industrisë së çimentos, industrisë së plastikës, si dhe shoqata të tjera të sektorëve të manifakturës, duke sjellë problematika konkrete dhe propozime për politika mbështetëse.

Gjatë diskutimeve u identifikuan sfida kryesore si mungesa e fuqisë punëtore, kostot e certifikimeve dhe teknologjisë, çmimet e energjisë dhe sfidat mjedisore.

/e.i/a.f/

The post Manjani: Prodhuesit shqiptarë të rrisin përdorimin e inovacionit appeared first on Agjencia Telegrafike Shqiptare.

TIRANË, 29 janar /ATSh/ Sheshi para stadiumit “Elbasan Arena” u kthye këtë të enjte në një pikëtakim të institucioneve, komuniteteve fetare, arsimit dhe qytetarëve, në kuadër të aktivitetit ndërgjegjësues “Mjedisi – përgjegjësi e përbashkët për paqen dhe jetën”, organizuar nga Qendra e Bashkëpunimit Ndërfetar (QBNFE).

Marshimi u parapri nga një aktivitet, që u hap nën moderimin e Ilirian Gjonit, anëtar i Bordit të QBNFE, ndërsa fjalën e mbajti dr. Arben Ramkaj, kryetar i Qendrës së Bashkëpunimit Ndërfetar. Në fjalën e tij, dr. Ramkaj theksoi se mjedisi nuk është një çështje e largët, por pjesë e drejtpërdrejtë e jetës së përditshme, duke nënvizuar se nuk mund të ketë paqe të qëndrueshme pa një mjedis të shëndetshëm.

“Paqja fillon aty ku njeriu kujdeset për jetën, për shëndetin e tjetrit dhe për të ardhmen e brezave që vijnë,” u shpreh Ramkaj, duke bërë thirrje për bashkëpunim konkret mes institucioneve, komuniteteve fetare dhe qytetarëve.

Në vijim, pjesëmarrësit ndoqën fjalimet e përfaqësuesve të pushtetit vendor dhe qendror, ku u trajtuan politikat mjedisore, zhvillimi i qëndrueshëm dhe roli i qytetarit në mbrojtjen e natyrës. Mes tyre, drejtuesi politik i qarkut Elbasan, Arbjan Mazniku, vlerësoi Elbasanin si një model të bashkëjetesës, tolerancës dhe ndërveprimit mes njerëzve përtej besimit të tyre, duke theksuar se kjo harmoni sociale është një vlerë e jashtëzakonshme që duhet ruajtur dhe forcuar, veçanërisht në kohët e sotme.

Nga ana e tij, kryetari i bashkisë Elbasan, Gledian Llatja theksoi angazhimin e vazhdueshëm të bashkisë në mbrojtje të mjedisit, përmes shtimit të sipërfaqeve të gjelbra, investimeve në hapësira publike dhe futjes së modeleve të suksesshme të diferencimit të mbetjeve në shkolla. Ai nënvizoi se këto iniciativa synojnë ta bëjnë Elbasanin një qytet më të pastër, më të gjelbër dhe më të jetueshëm për qytetarët dhe veçanërisht për fëmijët.

Ministri i Bujqësisë dhe Zhvillimit Rural, Andis Salla e cilësoi mjedisin si një prioritet strategjik kombëtar, duke theksuar se toka është pasuri e përbashkët dhe amanet për brezat që vijnë. Ai bëri thirrje për përgjegjësi të përbashkët në ruajtjen e tokës dhe natyrës, si bazë e zhvillimit të qëndrueshëm dhe mirëqenies shoqërore.

Ndërkohë, kryetarja e këshillit të qarkut Elbasan, Ermira Urupi e vuri theksin te përgjegjësia morale, personale dhe qytetare për mbrojtjen e mjedisit, duke theksuar se respekti për natyrën është një detyrim që u përket të gjithëve dhe që reflektohet drejtpërdrejt në cilësinë e jetës.

Në vijim, drejtoresha e Zyrës Vendore të Arsimit, Vesa Llanaj Liço, theksoi se shkollat kanë një rol të rëndësishëm në edukimin e qytetarit të ri. Ajo nënvizoi se të gjithë së bashku duhet të mblidhemi dhe të veprojmë si një trup i vetëm për të edukuar brezin e ri dhe për të ndërtuar një të ardhme më të mirë.

Një vëmendje e veçantë iu kushtua rolit të arsimit dhe edukimit mjedisor, me kontribute nga drejtues të institucioneve arsimore dhe prezantimin simbolik të nxënësve të shkollës “Qamil Guranjaku”, të cilët përcollën mesazhe ndërgjegjësuese për mbrojtjen e mjedisit dhe formimin e qytetarit të përgjegjshëm.

Marshimi dhe aktiviteti u përshëndetën gjithashtu edhe nga përfaqësues të komuniteteve fetare në qytet, të cilët përcollën mesazhe të përbashkëta për paqen, bashkëjetesën, tolerancën dhe kujdesin ndaj mjedisit si vlerë e përbashkët shoqërore.

Pas fjalimeve, aktiviteti vijoi me një marshim simbolik përgjatë bulevardit “Aqif Pasha”, me ndalesa pranë busteve të figurave të shquara të qytetit. Në këto ndalesa, përfaqësues të komuniteteve fetare dhe të arsimit reflektuan mbi raportin mes besimit, shkencës dhe ruajtjes së ekuilibrave natyrorë, duke përcjellë mesazhe të përbashkëta për kujdesin ndaj “shtëpisë sonë të përbashkët”.

Aktiviteti u mbyll në sheshin “Aqif Pasha” me thirrje për aktivizëm qytetar dhe veprime konkrete në mbrojtje të mjedisit, si dhe me një moment artistik të interpretuar nga Lukë Mllugja. Në përmbyllje, u përcoll urimi për një vit 2026 më të gjelbër, më të shëndetshëm dhe më të qetë për qytetin e Elbasanit.

Nga marshimi ndër fetar në Elbasan

1 nga 5

/e.i/a.f/r.e/

The post Marshim ndërfetar në Elbasan për paqen dhe mjedisin appeared first on Agjencia Telegrafike Shqiptare.

TIRANË, 29 janar /ATSh/ Ministrja e Arsimit, Mirela Kumbaro njoftoi sot, se 140 tekste të arsimit parauniversitar janë në proces përditësimi, mes tyre 44 janë në gjuhë të huaj.

Në një takim me stafin e Agjencisë së Sigurimit të Cilësisë në Arsimin Parauniversitar (ASCAP), Kumbaro tha se po bëhet një punë voluminoze, me ekspertët më të mirë, për 140 tekste që po përditësohen për vitin e ardhshëm shkollor, duke përfshirë 44 tekste në gjuhë të huaj, por edhe për tekste krejtësisht të reja si Qytetaria dhe Gjuha Shqipe në klasat I, VI dhe X.

“Kjo agjenci ka në dorë dhe në zemër cilësinë e shkollës, përgatitjen e të gjithë kurrikulave, lëndëve, formimin e fëmijëve tanë, por dhe formimin e mësuesve të fëmijëve tanë”, tha Kumbaro.

Ministrja e Arsimit, pohoi se pas një periudhe 10-vjeçare ka ardhur koha për të përditësuar kurrikulat e reja në arsimin parauniversitar.

“Janë 140 tekste që do të përditësohen, është një punë që nuk ka orar. Është një punë që bëhet nga ekspertë më të mirë lëndëve dhe kurrikulave në Shqipëri. Sivjet, për herë të parë ne do të bëjmë lëndë të reja, siç është Edukimi Qytetar për klasën e parë, të gjashtë dhe të dhjetë”, vijoi ajo.

Sipas Kumbaros, do të ketë përditësim edhe në lëndën e gjuhës shqipe dhe lëndët e teknologjisë së informacionit që nga klasa e parë fillore, deri në maturë.

/e.i/a.f/r.e/

The post Kumbaro: 140 tekste të arsimit parauniversitar në proces përditësimi, 44 në gjuhë të huaj appeared first on Agjencia Telegrafike Shqiptare.