Ministri i Drejtësisë, Besfort Lamallari informoi se qeveria miratoi sot amnistinë penale. Përmes një deklarate për mediat, pas mbledhjes së Këshillit të Ministrave, Lamallari tha se “447 persona përfitojnë lirim të menjëhershëm nga burgu dhe 853 të tjerë ulje dënimi. Mes tyre ka gra, të mitur dhe shtetas të huaj. Numri real i përfituesve nga pushimi i ndjekjes penale është shumë më i lartë”.

“Në mbledhjen e sotme të qeverisë miratuam amnistinë penale, nismën që prezantuam rreth një muaj më parë dhe nga sot ky vendim depozitohet në Kuvend. Nga të dhënat më të fundit të rakorduara me Drejtorinë e Përgjithshme të Burgjeve, Shërbimin e Provës si dhe Prokurorinë e Përgjithshme, rezulton se plot 447 persona përfitojnë lirim të menjëhershëm dhe 853 të tjerë ulje dënimi, ndërkohë nga Shërbimi i Provës amnistohen 5077 të dënuar me masa alternative”, tha Lamallari, ndërsa theksoi se duke filluar nga viti 2024 pushohet ndjekja penale për plot 14 mijë procedime për vepra të lehta.

“Përveçse një akt i qartë human dhe një mundësi e dytë për rehabilitim dhe riintegrim, ky është një hap konkret që ul presionin e popullimit të burgjeve dhe për të fokusuar drejtësinë aty ku rreziku shoqëror është real. Nuk bëhet fjalë për tolerancë ndaj krimit, por për një qasje të matur që synon riintegimin dhe përdorimin më efikas të drejtësisë penale teksa ne po punojmë për të ulur përdorimin e panevojshëm të paraburgimit, në përputhje me shqetësimet e drejta të ngritura nga Këshilli i Evropës si dhe standardet evropiane”, u shpreh ministri Lamallari.

Ministri i Drejtësisë tha më tej se pret që Parlamenti ta shqyrtojë projektligjin pa vonesa, në mënyrë që amnistia të fillojë efektet e saj.

“Objektivi ynë ambicioz është të kemi një sistem që di të ndëshkojë fort kur duhet, por edhe të japë një shans për t’u rikthyer në shoqëri. Drejtësia nuk është vetëm ndëshkim, por edhe një mundësi e dytë e drejtuar nga humanizmi dhe rehabilitimi. Falënderoj të gjitha institucionet që kontribuuan në këtë proces dhe pres që Parlamenti ta shqyrtojë projektligjin sa më parë, në mënyrë që efektet pozitive të amnistisë të ndihen nga mijëra familje shqiptare”, deklaroi Ministri i Drejtësisë.

Nga kjo amnisi nuk përfitojnë subjektet e Prokurorisë dhe Gjykatës së Posaçme për Korrupsionin dhe Krimin e Organizuar.

Projektligji i amnistisë do të depozitohet në Kuvend, ku do të nisë shqyrtimi në komisionet parlamentare dhe më pas kalon për miratim në seancë plenare.

Një rrëshqitje e madhe dheu ka shkaktuar probleme serioze në qarkullimin rrugor në Greqinë perëndimore, duke bllokuar plotësisht autostradën Ionian Motorway në segmentin midis Arta dhe Amfilochia.

Ngjarja ka ndodhur pas reshjeve të dendura të shiut, të cilat kanë zbutur strukturën e tokës, duke shkaktuar shembjen e një sasie të madhe dheu dhe gurësh mbi të dyja korsitë e rrugës. Pamjet filmike nga ajri tregojnë një masë të konsiderueshme toke që ka mbuluar autostradën, duke e bërë kalimin e automjeteve të pamundur.

Autoritetet greke kanë mbyllur menjëherë qarkullimin në këtë pjesë të rrugës për arsye sigurie, ndërsa trafiku po devijohet përmes rrugëve alternative. Në zonë kanë mbërritur inxhinierë dhe specialistë gjeologë, të cilët po vlerësojnë situatën dhe rrezikun e rrëshqitjeve të tjera të mundshme.

Fatmirësisht, deri më tani nuk raportohet për viktima, por autoritetet u bëjnë thirrje drejtuesve të mjeteve të tregojnë kujdes të shtuar dhe të ndjekin udhëzimet zyrtare deri në stabilizimin e plotë të situatës.

Ministrja e Punëve të Brendshme, Albana Koçiu, priti sot Komisionerin Europian për Çështjet e Brendshme dhe Migracionin, Magnus Brunner, në kuadër të një turi rajonal vizitash.

Vizita e Komisionerit dëshmon angazhimin e fortë të Bashkimit Europian për t’i mbështetur vendet e rajonit në rrugën integruese.

Ministrja Koçiu theksoi se Shqipëria është e angazhuar që procesi teknik i integrimit me BE të përmbyllet në vitin 2027, duke e cilësuar këtë objektiv të arritshëm falë progresit të deritanishëm dhe bashkëpunimit të ngushtë me institucionet e BE-së. Ajo nënvizoi se arritja e këtij objektivi kërkon vijimin e reformave dhe zbatimin e plotë të standardeve europiane, veçanërisht në fushat e sigurisë, migracionit dhe sundimit të ligjit.

Më tej, ministrja vlerësoi mbështetjen e vazhdueshme të Komisionit Europian, veçanërisht në fushat e sigurisë, migracionit dhe procesit të integrimit, si dhe riafirmoi angazhimin e plotë të Shqipërisë për përmbushjen e detyrimeve në kuadër të Kapitullit 24.

Në fokus të diskutimit ishte gjithashtu lufta kundër krimit të organizuar, ku ministrja theksoi miratimin dhe hyrjen në fuqi të ligjit për Zyrën e Rikuperimit të Aseteve (ARO), emërimin e Drejtorit të Njësisë, avancimin e procedurave për përzgjedhjen e stafit, si dhe forcimin e kapaciteteve dhe transparencës në Agjencinë për Administrimin e Pasurive të Sekuestruara dhe të Konfiskuara (AAPSK). Vetëm gjatë vitit 2025 janë sekuestruar 726 pasuri me vlerë rreth 65 milionë euro, ndërsa 12.2 milionë euro janë alokuar për buxhetin e shtetit, mbështetje për institucionet hetimore dhe projekte komunitare.

Ministrja vuri në dukje intensifikimin e bashkëpunimit mes Policisë së Shtetit dhe SPAK, i cili vitin që lamë pas çoi në ndjekjen e 107 procedimeve penale në fushat e narkotikëve, trafikut, krimeve ekonomike dhe korrupsionit, duke dhënë rezultate konkrete në goditjen e grupeve kriminale.

Ajo theksoi se Strategjia e re Kundër Krimit të Organizuar 2026–2030 është në fazë finalizimi dhe pritet të forcojë parimin “ndiq paranë”, si dhe kapacitetet për hetimin e krimit kibernetik. Në fushën e luftës kundër drogës dhe krimit financiar, Shqipëria ka miratuar 21 akte nënligjore dhe ka ngritur Sistemin Kombëtar të Paralajmërimit të Hershëm dhe Observatorin Kombëtar të Drogave, në bashkëpunim të ngushtë me Agjencinë e BE-së për Drogat.

Në lidhje me migracionin dhe menaxhimin e kufijve, Koçiu informoi mbi zbatimin e Strategjisë së Migracionit 2024–2030, anëtarësimin e Shqipërisë si vëzhguese në Rrjetin Europian të Migracionit, ndryshimet në ligjin për të huajt, rritjen e kapaciteteve për mbrojtjen e të miturve të pashoqëruar, si dhe miratimin e Planit Kombëtar të Kontigjencës për Flukset e Përziera Migratore 2026–2028. Po ashtu, është në proces funksionalizimi Qendra Shqiptare e Koordinimit për Menaxhimin e Integruar të Kufijve.

Ministrja e Punëve të Brendshme informoi Komisionerin mbi përafrimin e mëtejshëm me politikën e vizave të BE-së, përfshirë heqjen e regjimit të vizave për disa vende, si dhe miratimin e një udhërrëfyesi për harmonizimin e plotë me vendet e treta. Në përfundim, Koçiu riafirmoi angazhimin që Shqipëria të mbetet një partner i besueshëm dhe proaktiv i Bashkimit Europian, i përkushtuar për forcimin e sigurisë, stabilitetit dhe integrimit europian të vendit.

Read More...

Read More...

Read More...

Detaje tronditëse dalin në dritë nga tragjedia e familjes shqiptare Kola në Itali. Katër familjarët, babai Arti Kola bashkëshortja Jonida djali Hajdar, 22 vjeç, elektricist dhe vajza Xhesika, 15 vjeçe, humbën jetën pasi u helmuan nga monoksidi i karbonit në banesën e tyre në lagjen Rughi në provincën Luka  të Toskanës.

Mediat italiane raportojnë se djali i familjes, Hajdari kishte telefonuar emergjencën në orën 19:58 duke i thënë se  motra e tij ndihej keq.

I riu arriti të fliste 11 minuta, por më pas Hajdari humbi ndjenjat për shkak të monoksidit të karbonit. Fatkeqësisht ai i kishte dhënë adresën e gabuar, duke ngatërruar numrat, 168 në vend të 186, dhe kjo vonoi ndërhyrjen e ambulancës për disa minuta vendimtare.

Në orën 20:03 ambulanca mbërriti në zonë por nuk gjeti shtëpinë dhe kërkoi ndihmën e fqinjëve dhe më pas të karabinierëve për të lokalizuar adresën e saktë. Vetëm rreth orës 21:46 ekipet e urgjencës arritën te dera e banesës.

Vëllai i kryefamiljarit Turim Kola, ishte ai që hyri në shtëpi bashkë me karabinierët dhe në dëshmi është shprehur se nuk arriti dot ta shpëtonte familjen pasi humbi ndjenjat për shkak të mungesës së oksigjenit.

Familja ishte zhvendosur në banesë prej vetëm 6-7 muajsh dhe problemet në kaldaja dyshohet se shkaktuan rrjedhjen e gazit helmues. Komuniteti në Luka u trondit nga ngjarja, ndërsa shokët e klasës së Xhesikës vendosën lule para banesës së tragjedisë./abcnews.al

As Lojërat Olimpike Dimërore nuk u kanë shpëtuar tentativave për sulme kibernetike. Në prag të nisjes së Olimpiadës Milano Cortina 2026, Italia ka penguar një seri sulmesh kibernetike.

Ministri i jashtëm italian Antonio Tajani tha se sulmet synonin disa nga zyrat e ministrisë së jashtme, përfshirë një në Uashington, si dhe faqet e internetit të Lojërave Olimpike Dimërore dhe hotelet në Cortina d’Ampezzo.

Duke folur me gazetarët gjatë një udhëtimi drejt Uashingtonit, Tajani tha se sulmet e tentuara ishin nga hakerat rusë, por nuk dha detaje shtesë.

“Janë hakerë rusë, po flasim për sulme ndaj ambasadës italiane dhe faqeve të tjera të internetit që i përkasin Ministrisë së Punëve të Jashtme. Ne i kemi njoftuar të gjitha autoritetet dhe ekziston një qendër operacionesh pikërisht për të parandaluar këto sulme, të cilat janë me origjinë ruse”-tha Tajani.

Autoritetet italiane po rrisin masat e sigurisë ndërsa udhëheqësit politikë globalë, përfshirë zëvendëspresidentin amerikan JD Vance, pritet të marrin pjesë në ceremoninë e hapjes të premten.

Sulmet kibernetike të lidhura me Lojërat Olimpike në të kaluarën ndodhën edhe në Paris në vitin 2024 dhe mendohet se pas tyre qëndronin hakerë rusë.

Shërbimet britanike të inteligjencës thonë se hakerët rusë po parashikonin gjithashtu sulme ndaj Olimpiadës në Tokio në vitin 2021./abcnews.al

Gadishulli iberik është goditur nga stuhia Leonardo, që ka shkaktuar shira të rrëmbyeshëm, erëra të forta dhe përmbytje.

Në Portugali një burrë 70 vjeçar humbi jetën pasi rrjedha e ujit mori para makinën e tij, ndërsa në Spanjë një vajzë që u hodh në lumë për të shpëtuar qenin e saj, është e zhdukur.

Autoritetet arritën të gjenin qenin, por jo vajzën, pavarësisht kërkimeve intensive gjatë gjithë natës.

Ndërkohë Shërbimet e emergjencës së Andaluzisë kishin marrë pjesë në më shumë se një milion incidente deri në mesnatë të mërkurën.

Katërmbëdhjetë lumenj dhe 10 diga janë në rrezik ekstrem përmbytjeje, sipas kreut të departamentit të brendshëm të qeverisë rajonale.

Leonardo më e fundit nga stuhitë që kanë përfshirë Portugalinë dhe Spanjën këtë vit, duke shkaktuar viktima dhe dëme të mëdha.

Stuhia Marta, fronti i radhës i motit në të ashtuquajturin “treni i stuhisë”, pritet të godasë rajonin gjatë fundjavës, sipas agjencisë spanjolle të motit Aemet.

Kjo goditje vjen teksa Portugalia ende nuk është rimëkëmbur nga stuhia Kristin javën e kaluar që shkakoi mbi 4 miliardë euro dëme.

Mbrojtja Civile Kombëtare e Portugalisë tha se kishte regjistruar të paktën 70 incidente që nga mëngjesi i së enjtes./abcnews.al

Pas sëmundjeve kardiovaskulare, kanceri është shkaku i dytë i humbjes të jetës  në vend.  Specialistët e  Institutit të Shëndetit Publik i referohen shifrave të vitit 2024 dhe   thonë se ai është përgjegjës për  16 % të vdekjeve dhe rreth 7 mijë raste të reja në vit.  Më i shpeshtë është kanceri i mushkërive dhe ai i gjirit.

“Ajo që bie në sy është një rritje e vazhdueshme që nga 2015 kur kemi filluar të përdorim këtë metodologji të regjistrit të kancerit. Pra ka një rritje vjetore prej  2.5-2.6%  çdo vit.”- tha ai

Me plakjen e popullsisë projeksionet e  mjekëve janë për shtim të  numrit të rasteve vitet  e ardhshme.

“Prirja e deritanishme deri në 10 vjet,  prirjet e plakjes së popullsisë pavarësisht se popullata e Shqipërisë rezidente mund të vijë në rënie më shumë gjasë kanceret do të vijnë në rritje në Shqipëri të paktën rastet e reja. Ne shpresojmë që trendi i  vdekshmërisë të jetë ai që kemi vrejtur në dhjetë vjet, por  shëndetësia shqptare duhet te jetë e përgatitur në vitet që vijojnë të kemi dhe 10 mijë  raste te reja në vit apo dhe më shumë çka do të thotë që barra e kësaj sëmundje do të vijë vetem duke u rritur”, u shpreh mjeku.

Ministrja e Shëndetësisë  premtoi  ofrimin e shërbimit  onkologjik afër pacientit me krijimin e Institutit Kombëtar të Onkologjisë dhe Rrjetit Kombëtar të Kancerit. Ndërkohë  tha se në Qendrën Spitalore Universitare “Nënë Tereza” në Tiranë do të shtohen pajisjet diagnostikuese dhe  zgjerohet lista e barnave.

“Rrjeti Kombëtar i Kancerit do të mundësojë ofrimin e shërbimit onkologjik afër pacientit, me të njëjtat protokolle trajtimi si në Tiranë, nëpërmjet një modeli Hub and Spoke. Plotësimi i mungesave të barnave onkologjike dhe zgjerimi i listës së barnave të rimbursueshme. Përmirësimin e kapaciteteve të trajtimit me radioterapi.  Kjo ka qenë një problematikë e vazhdueshme e shërbimit onkologjik. Falë një bashkëpunimi të shkëlqyer me Agjencinë Atomike, shumë shpejt do të kemi 3 açeleratore lineare funksionale dhe sigurisht po punojmë të sjellim aparatin e ri modern të brakiterapisë sa më shpejt”, shtoi ministrja.

Kanceri  është një sfidë e përbashkët e gjithë shoqërisë dhe, si i tillë tha ministrja e shëndetësisë  kërkon një qasje të mirë-koordinuar.  Për të parandaluar  kancerin e qafës së mitrës këtë vit  u zgjerua fasha e depistimit  me moshat nga 35 në 55 vjeç dhe nisi vaksinimi kundër human papiloma virus dhe per  djemtë./abcnews.al

Ligji zgjedhor duhet të rishikohet sa më parë. Përfaqësuesit ndërkombëtare kanë shtuar thirrjet për palët politike për tu ulur në tryezën e komisionit të reformës zgjedhore për të adresuar boshllëqet ligjore dhe rekomandimet e OSBE ODHIR.

“Inkurajojmë punën e komisionit ad hoc për reformën zgjedhore dhe shpresojmë që ai të rifillojë së shpejti aktivitetin. Ka disa probleme që lidhen me ligjin zgjedhor, i cili sipas vlerësimit tonë nuk është ende në standardin e duhur. Ky është një rekomandim i përsëritur vazhdimisht nga misionet e ODIHR-it.” – tha ai.

Ping pongun e palëve politike për reformat, ambasadori i OSBE-së në Tiranë, refuzoi ta komentoi por për ligjin zgjedhor pranon se ka një dakortësi mes mazhorancës dhe opozitës.

“Kam përshtypjen se mesazhi i ODIHR-it është dëgjuar. Pa hyrë në debat politik, pasi nuk është roli ynë, duket se të gjitha partitë e përfaqësuara në Parlament janë dakord që reforma është e nevojshme dhe se duhet punuar për ta përmirësuar atë,” u shpreh ambasadori.

Mbledhja e fundit e Komisionit për Reformën Zgjedhore është zhvilluar në dhjetor të vitit të kaluar ndërsa pas ditësh bojkot dhe ultimatumesh PS ia doli të bind PD të rikthehet në tryezë e reformes territoriale.

Ndërsa Komisioni për reformën zgjedhore, përvec çështjeve të nxehta si depolizimi I komisioneve zgjedhore apo ligji për financimin e partive politike, objekt të punës pritet të ketë edhe përgatitjen e institucioneve shqiptare për mbajtjen e zgjedhjeve për parlamentin europian, në përmbushje të angazhimeve që vijnë nga anëtarësimi në Bashkimin Europian.

Mund ta ndjejë veten si një ekip me emër tepër të madh. Nuk është gjë e vogël të përfaqësosh Nju Jorkun, qytetin më të lavdishëm të historisë moderne të botës, dhe skuadra e basketbollit e di këtë shumë mirë.

Gjithsesi, të mbiquajturit “Niksat” nuk kanë qenë aspak në nivelin që kërkon qyteti i tyre, qendra e biznesit dhe e financave amerikane dhe botërore, ndonëse ky brez po përpiqet pa masë që t’ia dalë.

Nju Jork Niks arriti fitoren e 8-të radhazi këtë sezon në NBA, duke kaluar një rival shumë të fortë si Denverin me rezultatin 134-127.

U deshën dy kohë shtesë, pra 58 minuta vetëm lojë e kronometruar që të përcaktohej fituesi në “Medison Skuer Garden”, ndërsa në total rreth 20 000 spektatorët në Arenë mbetën në tribuna për rreth 3 orë.

Sfida ishte e shkëlqyer me lojë sulmuese dhe mbrojtje që shpesh nuk ekzistonin, siç është moda e viteve të fundit në NBA, ndërsa njujorkezët u udhëhoqën nga Xhejlën Braun, më I miri I tyre me 42 pikë, 8 topa në tabela e 9 asistë.

U dalluan edhe Karl-Entoni Tauns me 24 pikë e 12 topa në tabela, Anunobi me 20 pikë dhe Shamet me 16.

Denverit nuk i mjaftoi shkëlqimi i kapitenit, Nikola Jokiç, me 30 pikë, 14 topa në tabela e 10 asistë.

Ylli serb u ngjit në vendin e dytë në renditjen e të gjitha kohëve për tripëll dabëlla, me 181, po aq sa Oskar Robertson, dhe kjo ndodhi pasi shërbeu asist për Harduejn kur duheshin edhe 46 sekonda deri në përfundim të ndeshjes.

Niksat janë në vendin e dytë në Lindje me 33 fitore e 18 humbje, lënë pas vetëm nga kryesuesi Detroit që ka vetëm 12 humbje.

Gjithsesi, shanset janë të mira që të synohet titulli këtë sezon. Do të ishte titulli i tretë në histori dhe i pari pas plot 53 viteve.

Duhej të ishte thjesht një ndeshje. Edhe pse luhejn në nivelin e Ligës së Kampionëve, sërish flasim për 19-vjeçarët, dhe nëse në stadium mund të jenë 2 apo 3 mijë njerëz kjo është mjaft.

Nuk ndodh kështu në Gjermani, dhe këtë herë u vendos një rekord.

Plot 50 000 spektatorë mbushën stadiumin e Këlnit, me emrin e sponsorit “Rain Energi”, ndërtuar mbi stadiumin e vjetër Myngersdorfer.

Luanin Këlni vendas dhe Interi milanez, e tifozët vendas dhanë një spektakël në tribuna, duke thyer rekordin e mëparshëm që ishte 40 368 spektatorë, kur Interi luajti ndaj Trabzonsporit në prill të vitit të kaluar.

Për skuadrën zikaltër, titullar ishte portieri i Shqipërisë U19, Alen Taho, i cili bëri disa pritje, ndërsa nuk mund të quhet fajtor për golin.

Ekipi i Shpresave të Interit ia doli vetëm në fund, pasi ndeshja e Championsit për të rinj ishte në barazim 1-1 deri minutën e shtatë shtesë.

Pikërisht në fund, italianët shënuan dy gola.

Duket se tifozët e Këlnit janë të pakënaqur me skuadrën e të rriturve që po kalon sezon të vështirë në Bundesligë, dhe kanë vendosur të ndjekin të rinjtë./abcnews.al

Vitet kalojnë, por ata jabë vetëm një numër për Cristiano Ronaldo. Ylli portugez i futbollit feston këtë të enjte ditëlindjen e tij të 41, por nuk ka ndërmend të ndalet.

Këtë e konfirmon foto e postuar nga ai në rrjetet sociale, duke u stërvitur me Al Nassr, si shenjë edhe e mbylljes së rebelimit pas përplasjes me klubin saudit për shkak të merkatos.

Tani të gjithë presin që ai të jetë në fushë në ndeshjen e ardhshme kundër Al Ittihad, për të thelluar më shumë rekordet personale që e shoqërojnë në këtë ditë të shënuar.

Me 1,308 ndeshje të luajtura dhe një shifër të pabesueshme prej 961 golash zyrtarë, portugezi është ndër golashënuesit më të mirë të të gjitha kohërave, ndërsa mision ka arritjen e 1 mijë realizimeve në karrierë. CR7 mund të krenohet me pesë “Topa të Artë” dhe katër “Këpucë të Arta”, por është aftësia e tij për të rishkruar statistikat në çdo garë që e bën atë unik.

Megjithëse prej vitesh është larguar nga skena e madhe e futbollit europian, lidhja e Cristiano Ronaldo me Champions League kufizohet me përsosmërinë. Ai mban rekordin për më shumë paraqitje, gola dhe asiste në historinë e turneut. Portugezi ishte i pari që theu barrierën e 100 golave ​​në këtë garë, duke dominuar çdo fazë: nga grupet deri në finale, pa harruar një seri të pafundme tregolëshash dhe golash të njëpasnjëshëm.

I njëjti diskutim vlen edhe me kombëtaren e Portugalisë, si golashënuesi më i mirë i të gjitha kohërave në historinë e ekipit kombëtar, rekordi për gola dhe asiste në historinë e Kampionatit Evropian dhe më shumë gola në turnetë kualifikuese dhe finale evropiane.

Përveç rekordeve të tij me Real Madridin si realizuesi më i mirë i të gjitha kohërave, Ronaldo ishte lojtari i parë që përfundoi golashënuesi më i mirë në katër liga të ndryshme dhe shënoi mbi 50 gola në secilën prej tyre.

Nga Premier League me Manchester United, në La Liga me Real Madrid, nga Serie A me Juventus dhe tani në Ligën Profesionale Saudite me Al Nassr, “marka” e CR7 nuk ka njohur kufij, duke i dhuruar atij një vend nderi në “Olimpin” e futbollit botëror./abcnews.al

Asnjë surprizë në gjysmëfinalen e dytë të Kupës së Ligës në Angli. Ashtu si titulli kampion në Premier edhe ky trofe do të diskutohet nga dy rivalët e mëdhenj të këtij sezoni, Arsenal dhe Manchester City.

Pas “Topçinjve”, biletën për në finalen e “Wembley” siguroi edhe Manchester City.

Skuadra e Guardiolës mundi 3-1 Neëcastle në sfidën e kthimit, ndërsa kishte fituar 2-0 edhe ndeshjen e parë në transfertë.

Gjithçka e lehtë për “Cityzens”, që në fushën e tyre e vranë garën që në pjesën e parë.

Pas vetëm shtatë minutash, Marmoush ndali topin në rrjetë për epërsinë e të zotëve të shtëpisë.

Nuk mund të flitet për reagimin e Neëcastle, që u dorëzua përpara pushimit.

Marmoush dyfishoi po vetë diferencën në rezultat në minutën e 29-të, ndërsa vetëm tre minuta më pas, Tijani Reijnders shënoi edhe golin e tretë për Manchester City.

Në pjesën e dytë, miqtë vetëm sa zbutën humbjen me golin e Elanga, por nuk arritën të prishinin festën e Guardiolës dhe skuadrës së tij.

Kështu, rivaltiteti mes Mancester City dhe Arsenal në këtë sezon të futbollit anglez pasurohet me një tjetër kapitull. Dy skuadrat do të diskutojnë trofeun e Kupës së Ligës më 22 mars në stadiumin “Wembley”.

Habia e parë ishte se përse shkuan në një stadium tjetër.

Interi e kishte në shtëpi ndeshjen çerekfinale të Kupës së Italisë ndaj Torinos, por ajo nuk u luajt në “San Siro”, veçse në Monzë.

Çfarë ndodhi?

Arsyeja është e thjeshtë dhe e rëndësishme, në impiantin legjendar të Milanos do të mbahet këtë të premte ceremonia e hapjes së Lojrave Olimpike Dimërore, ndaj edhe nuk mund të luhej futboll.

Interi gjithsesi nuk e vuajti aq shumë këtë zhvendosje, duke fituar 2-1 e duke kaluar në gjysmëfinale.

Trajneri Kristian Kivu bëri ndryshime të rëndësishme në formacion, dhe nuk kishte si ndodhte ndryshe për shkak të ngarkesës së madhe sezonale në Serinë A dhe në Champions, plus Superkupën e Italisë dhe Kupën e Botës për Klubet që në verë.

Vetëm të tillë si Mkitarian, Açerbi apo Turam ishin ndër titullarët e aktivizuar.

Golat u shënuan nga Boni në pjesën e parë dhe Diuf menjëherë pas pushimit, ndërsa për Torinon realizoi sulmuesi kroat I ardhur tani në janar, Sandro Kulenoviç.

Interi kërkon Kupën e 10-të të Italisë, ndërsa për herë të fundit fitoi në 2023, dhe pret rivalët në gjysmëfinale.

Sonte do të luhen sfidat Atalanta-Juventus, Napoli-Komo dhe Bolonja-Lacio./abcnews.al

Read More...

Read More...

Gjykata e Tiranës ka dënuar me 24 vite burg Ilir Beqarajn, i akuzuar si autor i vrasjes se Gentian Bejtjes ne Larushk te Fushë Krujës. Beqaraj akuzohet për “Vrasje me paramendim”, “Mbajtje pa leje dhe prodhim i armëve, armëve shpërthyese dhe i municionit” dhe “Falsifikim apo përdorim të dokumenteve të falsifikuara”.

I pandehur për këtë ngjarje është edhe Edison Haxhiu, i dënuar më parë me dy vite burg si dhe Florian Plaku, i arrestuar verën e kaluar në Vlorë dhe që po gjykohet i ndarë.

Sipas hetimeve Beqaraj dhe Plaku kanë kryer vrasjen në bashkëpunim, ndërsa Haxhiu ka siguruar kushtet për ekzekutimin e saj. Krimi dyshohet të ketë qenë i porositur nga subjekte kriminale jashtë vendit, në konflikt me Bejtjan.

Sipas dosjes hetimore ka rezultuar se persona të armatosur, pasi kanë kaluar rrethimin e jashtëm të banesës së Gentian Bejtjes kanë hyrë brenda oborrit dhe kanë qëlluar disa herë me armë zjarri ku si pasojë e të shtënave ka gjetur vdekjen e menjëhershme.

Pak minuta pas ngjarjes në rrugën dytësore në fshatin Hasan, Fushë Krujë u gjet i djegur një automjet tip Land Rover, që është përdoruar nga autorët në vendngjarje. Nga provat e administruara rezulton se Ilir Beqaraj në kohë të ndryshme përpara kësaj ngjarje me mjetin e tij ka qenë në afërsi të vendit ku ndodhet banesa e Bejtjes, kjo gjë provohet nga këqyrja e GPS të automjetit të cilin e ka të marrë me qira.

Viktima i kishte shpëtuar disa atentateve më herët, ndërsa më 4 korrik 2023 iu vra kunati në atentat në banesën e Bejtjes./abcnews.al

Izraeli dhe Shqipëria po thellojnë bashkëpunimin ekonomik, me një investim strategjik prej 100 milionë eurosh në sektorin e teknologjisë. Një kompani izraelite do të ndërtojë në Tiranë një qendër të madhe të të dhënave.

Qendra do të bazohet në procesorë grafikë të teknologjisë Nvidia dhe do të ketë një kapacitet fillestar prej 32 megavatësh, me mundësi zgjerimi deri në 100 megavatë. Investimi po realizohet nga kompania izraelite ADC, në bashkëpronësi të Happy Technologies dhe kompanisë konsulente DIT.

Si projekt qeveritar në një vend anëtar të NATO-s dhe kandidat për Bashkimin Europian, investimi ka përfituar procedura të përshpejtuara. Leja e ndërtimit është dhënë brenda 60 ditësh, ndërsa objekti po ndërtohet në një sipërfaqe prej 4.5 hektarësh tokë shtetërore në zonën e lirë ekonomike TEDA, në perëndim të Tiranës.

Qendra do të furnizohet me energji të gjelbër, ndërsa infrastruktura energjetike dhe e komunikimit është ndërtuar paraprakisht. Në aspektin financiar, ADC ka siguruar një kredi nga Banka Europiane për Rindërtim dhe Zhvillim, e cila mbulon 75 për qind të kostos totale të projektit.

Edhe pse ndërtimi nuk ka përfunduar ende, qendra ka siguruar tashmë tre klientë të mëdhenj, një kompani shqiptare të teknologjisë, një kompani gjermane të ruajtjes se të dhënave dhe një institucion qeveritar shqiptar, identiteti i të cilit mbetet konfidencial

Investimi vjen pas forcimit të ndjeshëm të marrëdhënieve mes Izraelit dhe Shqipërisë gjatë dy viteve të fundit, veçanërisht pas sulmit kibernetik Iranian ndaj vendit tonë në 2022-shin, pas të cilit Shqipëria nisi të perdorë teknologji izraelite të sigurisë kibernetike per mbrojtjen e institucioneve shteterore dhe subjekteve private. Gjate luftes, raportet mes dy vendeve u ngrohen edhe më tej, ndërsa Shqipëria u dallua si një nga aleatet më të afërta të Izraelit në Europë. Kryeministri shqiptar Edi Rama vizitoi Izraelin në kulmin e luftimeve dhe, në fjalimin e tij në OKB, dënoi Hamasin dhe mbajti simbolin e verdhë në mbështetje të lirimit të pengjeve.