TIRANË, 27 janar/ATSH/- Kryeministri Edi Rama zhvilloi një vizitë zyrtare pune në Jeruzalem, në kuadër të Konferencës Ndërkombëtare për Luftën kundër Antisemitizmit, një ngjarje ndërkombëtare për adresimin e sfidave globale në luftën kundër antisemitizmit.

Rama ka ndarë në rrjetet sociale foto nga takimet e zhvilluara duke shkruar se: “Shqipëria u vendos në piedestalin e respektit më të lartë”.

Kryeministri, i cili në këtë vizitë shoqërohej edhe nga bashkëshortja e tij, Linda Rama dhe një delegacion zyrtar, u prit nga kryeministri izraelit, Benjamin Netanyahu të cilët mbajtën edhe një konferencë të përbashkët për mediet.

Në konferencën e përbashkët për mediet, Rama deklaroi sot Shqipëria vazhdon të mbështesë të gjitha përpjekjet, përfshi planin e paqes për Gazën të presidentit Trump dhe do të luajë rolin e saj brenda forcës ndërkombëtare për stabilizimin e Gazës.

Kryeministri Rama iu adresua Knessetit, Parlamentit të Izraelit në sesionin special si i ftuar nderi, me një fjalim historik sipas protokollit të posaçëm që Knesseti u ka rezervuar një numri të kufizuar udhëheqësish të huaj dhe së fundmi Presidentit të SHBA, Donald J. Trump.

Në nisje të seancës së posaçme përshëndetën Kryeministri i Izraelit Benjamin Netanyahu, Kryetari i Knessetit Amir Ohana dhe Lideri i Opozitës Yair Lapid.

Rama nënvizoi se Shqipëria duhet të përdoret si busull orientimi dhe shembull bashkëjetese fetare dhe bëri me dije se në Vlorës, do të hapet një muze për të kujtuar veprat që populli shqiptar ka bërë për të shpëtuar hebrenjtë nga torturat e nazistëve.

Gjithashtu, kryeministri Rama u drejtoi një mesazh të gjithë qytetarëve të Shtetit të Izraelit si edhe banorëve palestinezë që “t’i japin vënies së paqes një shans, t’i japin një shans dhënies fund të akteve të armiqësisë, t’i japin një jete tjetër një shans, një jete të re”.

“I bekuar qoftë kujtimi i atyre që u flijuan! Le të mbetet si busull, guximi i atyre që refuzuan të binden. Le të lulëzojë Shteti i Izraelit dhe të jetë i sigurt përjetësisht. Le të jenë palestinezët të lirë dhe të jetojnë me dinjitet në shtetin e tyre. Dhe le të mbeten dy kombet tona të vogla, por të mëdha në shpirt, të lidhura përjetë, jo vetëm nga historia, por edhe nga përkushtimi i përbashkët për ta mbajtur njerëzimin njerëzor”, përfundoi Rama fjalën në Parlamentin izraelit.

Në ditën e fundit të vizitës zyrtare në Jeruzalem, kryeministri Rama do të mbajë një fjalë në Konferencën Ndërkombëtare për Luftën kundër Antisemitizmit.

The post Rama për vizitën në Izrael: Shqipëria u vendos në piedestalin e respektit më të lartë appeared first on Agjencia Telegrafike Shqiptare.

TIRANË, 27 janar/ATSH/- Kryetari i Kuvendit, Niko Peleshi, në vijim të vizitës zyrtare në Bruksel u takua me Presidentin e Dhomës së Deputetëve, Peter De Roover si dhe me Presidentin e Senatit të Belgjikës, Vincent Blondel.

Gjatë takimit me Presidentin Peter De Roover, u vlerësuan marrëdhëniet shumë të mira dypalëshe mes Shqipërisë dhe Belgjikës, të ndërtuara mbi respektin e ndërsjellë, vlerat e përbashkëta, partneritetin në NATO dhe angazhimin për stabilitetin rajonal dhe integrimin europian të Shqipërisë dhe vendeve të Ballkanit Perëndimor.

Kryetari i Kuvendit theksoi rëndësinë e ndërveprimit parlamentar si një mekanizëm thelbësor për forcimin e bashkëpunimit politik dhe të gjithanshëm mes dy vendeve.

Peleshi falënderoi homologun belg Peter De Roover për mbështetjen e vazhdueshme të Belgjikës ndaj integrimit europian të Shqipërisë, veçanërisht gjatë lidershipit të suksesshëm të Presidencës belge të Këshillit të Bashkimit Europian. Ai riafirmoi se anëtarësimi në Bashkimin Europian mbetet një objektiv strategjik kombëtar për Shqipërinë dhe se ambicia drejt familjes europiane bazohet në parimin e meritës, në reformat transformuese dhe në rezultate konkrete.

Presidenti De Roover vlerësoi progresin e dukshëm të Shqipërisë në rrugën drejt Bashkimit Europian dhe nënvizoi se kjo mbështetje do të vijojë, duke theksuar se procesi i anëtarësimit do të mbetet në fokus të bashkëpunimit parlamentar.

Në takimin me Presidentin e Senatit të Belgjikës, Vincent Blondel, u diskutua mbi thellimin e bashkëpunimit parlamentar, forcimin e sundimit të ligjit dhe shkëmbimin e përvojave në proceset reformuese. Kryetari Peleshi vlerësoi kontributin e ekspertizës belge në fushat e drejtësisë, administratës publike dhe rendit, si si dhe bashkëpunimin e ngushtë mes institucioneve ligjzbatuese të dy vendeve.

Bisedimet përfshinë gjithashtu çështje që lidhen me migracionin, bashkëpunimin në fushën e punëve të brendshme, si dhe perspektivat për zgjerimin e marrëdhënieve ekonomike. Kryetari Peleshi nënvizoi rolin e diasporës shqiptare në Belgjikë si një urë të rëndësishme lidhëse mes dy vendeve dhe shprehu gatishmërinë për nxitjen e mëtejshme të bashkëpunimit dypalësh.

Presidenti i Senatit, Vincent Blondel, vuri në dukje vullnetin për intensifikimin e marrëdhënieve dypalëshe dhe parlamentare, duke konfirmuar mbështetjen e Belgjikës për anëtarësimin sa më të shpejtë të Shqipërisë në Bashkimin Europian.

Takimet në Bruksel konfirmuan mbështetjen e qartë të Belgjikës për integrimin europian të Shqipërisë, vullnetin e përbashkët për avancimin e partneritetit dypalësh dhe forcimin e bashkëpunimit parlamentar në funksion të integrimit europian, stabilitetit rajonal dhe paqes. Në këto takime, Kryetari i Kuvendit u shoqërua nga një delegacion parlamentar i përbërë nga deputetët Igli Hasani, Ulsi Manja, Evis Kushi, si dhe Ambasadorja e Shqipërisë në Belgjikë, Albana Dautllari.

The post Peleshi: Belgjika mbështet anëtarësimin sa më të shpejtë të Shqipërisë në BE appeared first on Agjencia Telegrafike Shqiptare.

The post Rama viziton Nova Site në Izrael: Një vend që kumbon pa fjalë appeared first on Agjencia Telegrafike Shqiptare.

TIRANË, 24 janar/ATSH/-Partia Demokratike ka reaguar pas njoftimi të Policisë së Shtetit se gjatë protestës janë plagosur 11 efektivë.

Duke i konsideruar mashtrime dhe të pabaza reagimin e policisë, PD thekson se “sipas informacioneve tona të grumbulluara në mënyrë operative në të gjitha spitalet e kryeqytetit, asnjë efektiv policie nuk është paraqitur për ndihmë të parë”.

“Përpjekja për të ngjyrosur me dhunë një protestë masive kundër narkoregjimit, nuk është gjë tjetër veçse frika e Ramës dhe shërbëtorëve të tij se zhvillimet politike në Shqipëri kanë arritur në ‘kilometrin e fundit’.
Partia Demokratike thekson se, jo vetëm nuk ka policë të plagosur, por ka dhjetëra protestues të lënduar dhe dhjetra të tjerë të arrestuar, shpesh në mënyrë të paligjshme nga patronazhistë të qeverisë, njerëz pa uniformë dhe pa simbolet e policisë”, thuhet në deklaratën për mediet të PD.

PD shton se “çdo tejkalim i ligjit do të merret shënim dhe çdo abuzues do të mbajë përgjegjësi të plota”.

“Partia Demokratike falenderon edhe njëherë të gjithë mbështetësit dhe protestuesit, dhe siguron të ndaluarit dhe familjarët e tyre, se ata do të marrin çdo ndihmë ligjore dhe mbështetje. Ky është fillimi i fundit për narkoregjimin dhe narkopolicinë. Tërbimi i demonstruar sonte me përdorim gazrash helmuese dhe dhune të shpërpjestuar është dëshmi e kësaj”, përfundon PD njoftimin për shtyp.

The post PD: Nuk ka efektivë të plagosur gjatë protestës appeared first on Agjencia Telegrafike Shqiptare.

TIRANË, 21 janar/ATSH/- Kryeministri Edi Rama ka përkujtuar ngjarjen e “21 janarin” ku në Bulevardin “Dëshmorët e Kombit” përballë kryeministrisë mbetën të vrarë katër protestues.

Rama shprehet në një postim në rrjetet sociale se “15 vite më parë ndodhi një krim shtetëror i pashembullt në historinë e demokracisë së re shqiptare”.

Kreu i qeverisë thekson se “katër të vrarë ende nuk prehen dot në paqe dhe drejtësia i ngjan një breshke që lutet për harresë”.

Rama shpreh bindjen se “sado të vonojë drejtësia për 21 janarin nuk do të harrojë”.

Më 21 Janar të vitit 2011 gjatë protestës së PS-së, humbën jetën Aleks Nika, Ziver Veizi, Faik Myrtaj dhe Hekuran Dedja, të cilët 10 vite më vonë u shpallën “Dëshmorë të Atdheut”.

Gjykata e Lartë ka vendosur në mars të 2024-ës që dosja e “21 janarit” të hetohet nga SPAK duke pranuar kërkesën e familjarëve të viktimave.

The post Rama për “21 janarin”: Katër të vrarë nuk prehen ende në paqe, drejtësia i ngjan një breshke që lutet për harresë appeared first on Agjencia Telegrafike Shqiptare.

BARCELONË, 21 janar/ATSH-EFE/- Një tjetër aksident hekurudhor ka ndodhur mbrëmjen e së martës ku humbi jetën shoferi i trenit dhe u plagosën 37 pasagjerë, katër prej të cilëve u plagosën rëndë.

Aksidenti ndodhi në një tren udhëtarësh midis qyteteve Sant Sadurní d’Anoia dhe Gelida, rreth 40 kilometra nga Barcelona ku e gjithë Katalonja është përfshirë nga shira të rrëmbyeshëm.

Aksidenti ndodhi dy ditë pas përplasjes mes dy trenave në Kordoba, në jug të Spanjës, për arsye ende të panjohura, e cila shkaktoi vdekjen e mbi 40 personave.

Claudi Gallardo, kreu i ndërhyrjes së Departamentit të Zjarrfikësve të Generalitat, tha për mediat se muri mbajtës u shemb rreth orës 21:00 ndoshta për shkak të reshjeve të fundit.

Muri ra mbi vagonin e parë të trenit të udhëtarëve, duke e deformuar atë dhe bllokuar brenda shumicën e pasagjerëve.

Shoferi i trenit vdiq në aksident dhe 37 pasagjerë u trajtuan nga ekipet e urgjencës mjekësore.

Sistemi i Emergjencave Mjekësore (SEM) dërgoi 20 ambulanca në zonë për të evakuuar të plagosurit në spitalet Moisès Broggi, Bellvitge dhe Vilafranca./a.g/

The post SPANJË – Tjetër aksident hekurudhor, një i vdekur dhe 37 të plagosur appeared first on Agjencia Telegrafike Shqiptare.

MADRID, 19 janar /ATSH-EFE/ – Një tren, i cili ishte nisur dje nga Malaga në orën 18:40 me destinacion stacionin Puerta de Atocha të Madridit, me 317 pasagjerë, nxori nga shinat tre vagonët e tij të fundit duke u përplasur me një tjetër tren Renfe që shkonte në Huelva, i cili gjithashtu doli nga shinat.

Përplasje fatale e trenave të shpejtësisë së lartë në Spanjë ka shkaktuar sipas raportimeve 39 viktima dhe 73 të plagosur ku  24 prej tyre janë në gjendje të rëndë, nga të cilët katër janë të mitur.

Një numër i madh forcash shpëtimi mbërritën në vendngjarje duke u përpjekur të nxjerrin  njerëzit e bllokuar nga rrënojat.

Sipas ministrit spanjoll të Transportit, Oscar Puente, linja ku ndodhi tragjedia ishte modernizuar së fundmi.

Ai tha të hënën se aksidenti hekurudhor në Adamuz (Córdoba) është “i çuditshëm dhe i vështirë për t’u shpjeguar” pasi treni që shkaktoi aksidentin është relativisht i ri dhe infrastruktura është rinovuar kohët e fundit.

Ndërkaq më shumë se 200 trena janë prekur nga pezullimi i trafikut hekurudhor në linjat me shpejtësi të lartë midis Madridit dhe qyteteve andaluziane të Seviljes, Kordobës, Malagës dhe Huelvës.

The post SPANJË – 39 të vdekur dhe 73 të plagosur pas përplasjes së dy trenave të shpejtësisë së lartë appeared first on Agjencia Telegrafike Shqiptare.

TIRANË, 15 janar/ATSH/- Kryeministri Edi Rama zhvilloi një vizitë në Emiratet e Bashkuara Arabe me ftesë të Presidenti Sheikh Mohammed Bin Zayed Al Nahyan, në kuadër të “Javës së Qëndrueshmërisë 2026”.

Në rrjetet sociale, Rama publikoi foto nga kjo vizitë e cila nisi me pritjen në Pallatin Presidencial të Abu Dhabit ku u nderua me medaljen “Zayed” nga presidenti i Emirateve të Bashkuara.

Ky nderim i jashtëzakonshëm vjen si shprehje e marrëdhënieve të shkëlqyera mes Shqipërisë dhe Emirateve të Bashkuara Arabe, si dhe e vlerësimit për rolin dhe angazhimin e Kryeministrit Rama në promovimin e bashkëpunimit dypalësh dhe vizionit të përbashkët për zhvillim të qëndrueshëm.

Rama e cilësoi këtë vizitë si “një mikpritje e paharrueshme në Emiratet e Bashkuara” duke theksuar se vendosën piketa të reja të bashkëpunimit kuptimplotë që po forcohet dita-ditës.

Në kuadër të pjesëmarrjes në Javën e Qëndrueshmërisë 2026, Kreu i Ekzekutivit ishte pjesë e panelit “Korridoret e Energjisë për një të Ardhme të Qëndrueshme”.

Gjatë diskutimit, Rama vuri theksin tek investimet e mëdha të dekadës së fundit në energjinë diellore dhe të erës, me synimin që deri në fund të vitit 2028 Shqipëria të arrijë sovranitet të plotë energjetik dhe të mos ketë më nevojë për importe.

Kryeministri nënvizoi gjithashtu rëndësinë e bashkëpunimit strategjik me Emiratet e Bashkuara Arabe dhe Italinë, duke e cilësuar këtë partneritet si një model vizionar që synon, jo vetëm sigurinë energjetike të rajonit, por edhe eksportin e energjisë së gjelbër drejt Bashkimit Europian përmes projekteve të mëdha ndërlidhëse. A

i vlerësoi rolin dhe vizionin e lidershipit të Emirateve, si dhe kontributin e Dr. Sultan Al Jaber në nxitjen e projekteve ambicioze të tranzicionit energjetik. “Ambicia jonë është që së bashku me Emiratet e Bashkuara Arabe dhe Italinë të kemi një bashkëpunim trepalësh, të krijojmë një bazë të ngarkesës në Shqipëri. Doktor Sulltani, Zoti e bekoftë, po synon që të mbërrijmë në tre giga dhe përmes kabullit ndërlidhës me Italinë, t’i shërbejmë Evropës me energji të gjelbër”  u shpreh Kryeministri Rama.

Ndër të tjera, kreu i qeverisë foli edhe për përdorimin e teknologjisë digjitale dhe inteligjencës artificiale në Shqipëri, duke theksuar se 95% e shërbimeve publike ofrohen tashmë online.

Kryeministri konfirmoi angazhimin e Shqipërisë për tranzicionin e gjelbër, inovacionin teknologjik dhe forcimin e partneriteteve strategjike ndërkombëtare, në funksion të zhvillimit të qëndrueshëm dhe integrimit europian. /a.g/

The post Rama: Piketa të reja bashkëpunimi me Emiratet e Bashkuara appeared first on Agjencia Telegrafike Shqiptare.

TIRANË, 15 janar/ATSH/- Ambasada e SHBA-ve në Tiranë ka sqaruar se cilët qytetarë shqiptarë mund të vijojnë të udhëtojnë në drejtim të SHBA-ve dhe cilat kategori janë të ndaluara.

Sipas njoftimit të ambasadës amerikane, shqiptarët që disponojnë vizë amerikane lejohet të udhëtojnë drejt SHBA-ve vetëm nëse kanë për qëllim  turizmin, pushimet, blerjet, takime biznesi apo vizite te miqtë e të afërmit.

Ambasada thekson se nuk lejohet udhëtimi drejt SHBA-ve me qëllim lindjen e fëmijës, studimi për një diplomë apo me qëllim pune.

Departamenti Amerikan i Shtetit ka marrë vendim për pezullimin e vizave të emigrantëve për 75 vende, ku mes tyre përfshihet edhe Shqipëria dhe Kosova.

“Është përgjegjësia juaj ta përdorni vizën tuaj në mënyrë korrekte”, deklaron ambasada e SHBA-ve në reagimin e saj në rrjetet sociale.

Disa aktivitete që LEJOHEN me vizë vizitori B1/B2:

Turizëm

Pushime

Blerje

Vizitë me miq ose të afërm

Takime me bashkëpunëtorë biznesi

Pjesëmarrje në një konventë ose konferencë

Aktivitete që NUK LEJOHEN me një vizë vizitori B1/B2:

Turizëm lindjeje (udhëtim me qëllim kryesor lindjen në Shtetet e Bashkuara për të marrë shtetësinë amerikane për fëmijën)

Punë që rezulton në pagesë nga një punëdhënës ose biznes amerikan

Studimi për një diplomë ose kredite akademike

Performanca të paguara

The post Ambasada amerikane sqaron se cilët qytetarë shqiptarë kanë të drejtë të udhëtojnë drejt SHBA-ve appeared first on Agjencia Telegrafike Shqiptare.

PRISHTINË, 15 janar/ATSH/- Njëzet e shtatë vjet pas masakrës në Reçak, ish-ambasadori i Shqipërisë në Organizatën e Kombeve të Bashkuara, Ksenofon Krisafi rrëfen se si kishte sensibilizuar opinionin ndërkombëtar për agresionin e Serbisë mbi popullatën e pafajshme shqiptare.

Ksenofon Krisafi ka qenë ambasador i Shqipërisë në OKB, në periudhën 1998-2002.

Në një intervistë për KosovaPress, Krisafi tregon se në atë kohë ndodhej në Gjenevë, dhe dy ditë pas kishte telefonuar disa prej drejtuesve të organizatave ndërkombëtare.

Në takimet që kishte pasur me ta, Krisafi thotë se kishte vërejtur se e kishin marrë me të lehtë gjenocidin në Reçak.

“Unë u ndodha tamam-tamam në kohën e masakrës në Gjenevë. Ishte janari i vitit 1999. Më 15 janar ndodhi masakra, dy ditë më vonë, ishte ditë e hënë, e mbaj mend shumë mirë, në zyrën e ambasadorit të Shqipërisë, tek unë, trokiti dera dhe u fut vrullshëm një djalë i ri, një djalë i Kosovës, të cilin unë kisha pak ditë që e kisha njohur, ishte pikërisht Tahir Shabani, një aktivist i shquar i atyre kohëve, i cili ishte i zbehur në fytyrë, gati pa frymë, i tronditur, i tmerruar, erdhi pranë meje dhe lëshoi mbi tavolinën time një tufë fotografish saqë u mbush gjithë sipërfaqja e tavolinës dhe e CD-së. Dhe përmes lotëve, gati i ngashëryer, filloi të tregonte, ‘shiko se çfarë ka ndodhur’. I thashë Tahir, unë i di këto sepse i kam ndjekur lajmet, i kam parë, por sidoqoftë ato çka solli ai ishin jashtëzakonisht shumë prekëse. Dhe në prani të të Tahirit, unë njoftova menjëherë qeverinë time, sepse kështu është rregulli, për të marrë autorizimin e saj. I rashë telefonave të disa prej drejtuesve të organizatave ndërkombëtare me selinë në Gjenevë. Mary Robinson ishte kryetarja e Komisionit të të Drejtave të Njeriut. Sadako Ogata ishte drejtuesja e organizatës për refugjatët, Brunson McKinley ishte për migracionin, e të tjera dhe ju kërkova takime”, rrëfen ai.

Thotë se kishte insistuar që të takohej me të gjithë këta drejtues të organizatave ndërkombëtare, por ishte e çuditshme se si të njëjtit nuk ishin shqetësuar sa Krisafi për gjenocidin në fshatin Reçak.

“Unë takimet që pata me to, transmetova shqetësimin për atë çka kishte ndodhur dhe kërkova me insistim që ato të tregoheshin pakës më të vendosur, për arsye se pata përshtypjen që e kishin marrë pak lehtë. Mendonin që këto janë gjëra që ndodhin, janë gjëra që nuk duhen amplifikuar e të tjera e të tjera. I thashë, nuk është çështje e amplifikimit, është çështje e ekzistencës së një populli të tërë. Dhe nuk vonoi, opinioni u sensibilizua, bashkësia ndërkombëtare vendosi atë që vendosi, domethënë, thirrjen e Rambujesë dhe pastaj bombardimin e Jugosllavisë si përgjegjëse për këto që ndodhën, po ndodhnin këtu në në Kosovë”, tregon ai për KosovaPress.

Serbët kanë qenë gjithmonë agresori

Ish-ambasadori i Shqipërisë në OKB, Ksenofon Krisafi sot mori pjesë në tryezën shkencore të organizuar nga Forumi i Intelektualëve me temën “Mohimet serbe të krimeve dhe gjenocidit, destabilizim për ballkanin”.

Ai theksoi se serbët gjithmonë kanë qenë agresioni, por kanë luajtur rolin e viktimës.

“Ajo që ka ndodhur midis shqiptarëve dhe serbëve është gati unikale. Serbët kanë qenë gjithmonë agresori dhe kanë marrë rolin e viktimës. Kanë arritur që me mjeshtërinë e tyre dhe me djallëzinë të sensibilizojnë opinionin në favorin e tyre dhe t’ia transferojnë, t’ia delegojnë gjithë përgjegjësinë e konflikteve – shqiptarëve, njerëzve të pafajshëm. Është një gjë që nuk duhet të ndodhë, është një gjë që na obligon ne shqiptarëve që përveç përplasjeve normale, politike, për sa i përket qarkullimit në pushtet të opozitave, të mazhorancës e të tjera e të tjera, ne duhet të bëjmë kujdes se ka një gjë shumë më të madhe që është çështja kombëtare dhe për çështjen kombëtare ne duhet të bëhemi një”, shprehet ai mes tjerash.

Fshati Reçak i komunës së Shtimes, i cili gjendet rreth 30 kilometra larg Prishtinës, rreth tre dekada më parë, bëri kthesë të madhe në historinë të Kosovës.

Më 15 janar të vitit 1999 forcat serbe vranë mizorisht 45 civilë shqiptarë në fshatin Reçak të komunës së Shtimes. I pari që i tha botës se aty u krye krim kundër njerëzimit, ishte shefi i atëhershëm i Misionit Verifikues të OSBE-së në Kosovë, William Walker. Ngjarja e rëndë në Reçak nxiti reagimin e ndërkombëtarëve ku NATO vendosi të sulmoi caqet ushtarake policore serbe. /KosovaPress/

The post Rrëfimi i ish-diplomatit Krisafi se si sensibilizoi bashkësinë ndërkombëtare për masakrën në Reçak appeared first on Agjencia Telegrafike Shqiptare.

PRISHTINË, 15 janar/ATSH/- Kosova përkujton sot 27-vjetorin e masakrës së Reçakut, ku u vranë mbi 45 civilë të pafajshëm shqiptarë. Ish-shefi i misionit vëzhgues të OSBE-së në Kosovë, ambasadori William Walker, e pati cilësuar Masakrën e Reçakut si krim kundër njerëzimit.

Më 15 janar 1999, në fshatin Reçak u vranë e u masakruan barbarisht 45 shqiptarë të paarmatosur.

Në orët e hershme të mëngjesit të 15 janarit Reçaku u zgjua i rrethuar. Sipas dëshmitarëve, aty rreth orës 6:30 forcat serbe me artileri të rëndë kanë filluar të bombardojnë fshatin. Pas ndërprerjes së bombardimeve, forcat serbe janë futur në fshat dhe kanë filluar bastisjet.

Masakra e Reçakut tmerroi botën dhe zgjoi ndërgjegjen e diplomacisë botërore duke u mobilizuar për Kosovën. Tmerret e shkaktuara në fshatin Reçak sollën në vëmendje të gjithë botën e civilizuar dhe shpalosi të vërtetën rreth planit gjenocidal të ish-kriminelit Sllobodan Millosheviç.

Pas Reçakut, çështja e Kosovës do të jetë në një konferencë ndërkombëtare në Rambuje e në Paris, mossuksesi i të cilës do të ndikonte në ndërhyrjen e NATO-së kundër forcave ushtarake serbe, largimin e tyre nga Kosova dhe vendosjen e administratës ndërkombëtare në Kosovë.

Reçaku atëbotë kishte zënë vend në mediat dhe kancelaritë e shteteve më me ndikim në botë. Ish-sekretarja e Shtetit, Madeleine Albright, e kishte dëgjuar lajmin dhe ishte zgjuar me ankth se ç’do t’i sillnin orët në vijim Kosovës.

Ndërkaq, shefi i misionit të OSBE-së, William Walker kishte shkuar në vendin e krimit shumë shpejt dhe kishte drejtuar gishtin nga lugina e masakrës duke e përcaktuar krimin me tri fjalë: Krim kundër njerëzimit.

Pas Masakrës së Reçakut, rifilluan luftimet 48 orësh mes UÇK-së dhe forcave serbe për marrjen e trupave. Serbia donte t’i zhdukte gjurmët e krimit, por kjo tentativë e tyre dështoi. Bota e pa krimin.

Për herë të parë nga skenat rrëqethëse dhe masakrat barbare që bënë forcat serbe në popullatën civile shqiptare, kishin tmerruar edhe misionarë dhe diplomatë të botës.

/Kosovapress/

The post 27 vjet nga Masakra e Reçakut që tmerroi botën dhe zgjoi ndërgjegjen e diplomacisë botërore appeared first on Agjencia Telegrafike Shqiptare.

TIRANË, 14 janar/ATSH/- Kryeministri Rama është nderuar me medaljen më të lartë të Emirateve të Bashkuara Arabe nga Presidenti Sheikh Mohammed Bin Zayed Al Nahyan.

Rama ka publikuar në rrjetet sociale momente nga pritja në Pallatin Presidencial të Abu Dhabit duke e cilësuar “videokartolinë e një momenti të paharrueshëm”.

Medalja, që mban emrin e themeluesit të Emirateve të Bashkuara Arabe, Sheikut Zayed përfaqëson vlerësimin më të lartë shtetëror dhe i akordohet personaliteteve që kanë kontribuar në forcimin e marrëdhënieve miqësore dhe bashkëpunimit ndërkombëtar.

Ky nderim i jashtëzakonshëm vjen si shprehje e marrëdhënieve të shkëlqyera mes Shqipërisë dhe Emirateve të Bashkuara Arabe, si dhe e vlerësimit për rolin dhe angazhimin e Kryeministrit Rama në promovimin e bashkëpunimit dypalësh dhe vizionit të përbashkët për zhvillim të qëndrueshëm.

Rama ka theksuar se ky vlerësim i dedikohet çdo shqiptari që i ka besuar udhëheqjen dhe përfaqësimin e vendit, duke e konsideruar medaljen një nder për Shqipërinë dhe përfaqësimin e saj në arenën ndërkombëtare.

Kryeministri Rama po zhvillon një vizitë në Emiratet e Bashkuara Arabe në kuadër të “Javës së Qëndrueshmërisë 2026”, me ftesë të Presidentit të Emirateve të Bashkuara Arabe.

The post Rama ndan pamje nga pritja në Pallatin Presidencial të Abu Dhabit ku u nderua me urdhrin “Zayed” appeared first on Agjencia Telegrafike Shqiptare.

TIRANË, 13 janar/ATSH/- Kryeministri Edi Rama ndodhet në Emiratet e Bashkuara Arabe ku po merr pjesë në Javën e Qëndrueshmërisë “Abu DhabiSustainability Week 2026” (ADSË).

Rama ka publikuar në rrjetet sociale foto nga sisja e Samitit të Javës së Zhvillimit të Qëndrueshëm që organizohet nën kujdesin e veçantë të Presidentit Sheikh Mohammed bin Zayed Al Nahyan.

Kreu i Ekzekutivit është i pranishëm në këtë event me ftesë të Presidentit të Emirateve të Bashkuara Arabe, të cilin e cilëson “një mik të madh të Shqipërisë”.

Ky forum ndërkombëtar bën bashkë kryetarë shtetesh dhe qeverish, liderë të biznesit dhe shoqërisë civile, për të diskutuar sfidat dhe perspektivat e zhvillimit të qëndrueshëm në nivel global.

The post Rama: Presidenti Sheikh Mohammed bin Zayed Al Nahyan, mik i madh i Shqipërisë appeared first on Agjencia Telegrafike Shqiptare.

TIRANË, 13 janar/ATSH/- Policia e Shtetit shënon sot 113-vjetorin e themelimit, një ditë për të kujtuar dhe vlerësuar sakrificën dhe përkushtimin e brezave të tërë të punonjësve të policisë në shërbim të ligjit, rendit dhe sigurisë për qytetarët shqiptarë.

Kryeministri Edi Rama ka vlerësuar rolin e efektivëve të Policisë së Shtetit në shërbim të vendit dhe qytetarëve çdo ditë.

Ministrja e Brendshme, Albana Koçiu nënvizon se në këtë 113-vjetor, me mijëra burra e gra në uniformë, mijëra aksione, mijëra sakrifica me një mision të vetëm, në shërbim të vendit dhe qytetarëve.

Më 13 janar të vitit 1913, qeveria e Ismail Qemalit vendosi krijimin e forcave të rendit duke ngarkuar për organizmin e xhandarmërisë Alem Tragjasin, Hysni Toskën, Sali Vranishtin dhe Hajredin Hekalin. Halim Gostivari do të ishte drejtori i parë i Policisë së Shteti. Ndërsa më 3 qershor 1913 u vu në zbatim rregullorja e Qeverisë së Vlorës “mbi formimin e Milicisë shqiptare”.

The post 113-vjetori i Policisë së Shtetit, mijëra aksione e sakrifica në shërbim të vendit dhe qytetarëve appeared first on Agjencia Telegrafike Shqiptare.

TIRANË, 11 janar/ATSH/- Ministri i Bujqësisë dhe Zhvillimit Rural, Andis Salla, ishte sot në bashkitë Dimal dhe Kuçovë, së bashku me kryetaren e Bashkisë Dimal, Juliana Memaj, dhe kryetarin e Bashkisë Kuçovë, Kreshnik Hajdari, ku po ndjek nga afër situatën e krijuar nga reshjet intensive të ditëve të fundit.

Gjatë takimeve, ministri Salla zhvilloi bashkëbisedim me banorët, fermerët dhe blegtorët e zonës mbi dëmet e shkaktuara nga reshjet intensive të ditëve të fundit.

Ai theksoi se institucionet janë pranë çdo qytetari dhe po ndjekin nga afër situatën.

“Jemi në terren dhe pranë çdo qytetari. Verifikimi i dëmeve po vijon dhe çdo qytetar, fermer e blegtor i prekur do të dëmshpërblehet”, u shpreh ai.

Ministrit Salla deklaroi se procesi i verifikimit po kryhet në bashkëpunim me bashkitë dhe strukturat përkatëse, me qëllim evidentimin e plotë të dëmeve në bujqësi dhe blegtori, si dhe garantimin e mbështetjes për të gjithë të prekurit.

The post Salla në Dimal e Kuçovë: Vijon verifikimi i dëmve, çdo qytetar dhe fermer do të dëmshpërblehet appeared first on Agjencia Telegrafike Shqiptare.

TIRANË, 10 janar/ATSH/- Ministrja për Europën dhe Punët e Jashtme, Elisa Spiropali, zhvilloi një takim online me anëtarët e Këshillit Koordinues të Diasporës, me fokus bashkëpunimin dhe fuqizimin e rolit të diasporës në sfidat e zhvillimit të vendit.

Spiropali bën të ditur se në takim u fol për tri çështje konkrete: Strategjia Kombëtare e Diasporës 2026-2030, risitë e Ligjit të Ri për Diasporën, si dhe përgatitjet për samitin e 4-t të Diasporës.

Ajo thekson se Strategjia Kombëtare e Diasporës 2026-2030, e ngre në një tjetër nivel ndërveprimin me shqiptarët përtej kufijve.

Kryediplomatja shton se gjatë takimit onlime u diskutua për risitë e Ligjit të Ri për Diasporën, përfshirë krijimin e Qendrave të Kulturës shqiptare në botë, fuqizimin e Agjencisë Kombëtare për Diasporën dhe shtimin e numrit të anëtarëve të Këshillit Koordinues të Diasporës.

Gjithashtu, shton ministrja Spiropali, u diakutua edhe për përgatitjet për samitin IV të Diasporës që do të mbahet në Tiranë në datat 14 dhe 15 prill, si një platformë konkrete e bashkëpunimit.

The post Spiropali: Në prill mbahet Samiti IV i Diasporës appeared first on Agjencia Telegrafike Shqiptare.

TIRANË, 10 janar/ATSH/-Në zonën e Matogjinit të Bashkisë së Selenicës është shkëputur një pjesë mali duke shfaqur problematika në aksesin rrugor drejt lagjes Bashaj.

Ministria e Mbrojtjes bëri me dije se aksesi është i bllokuar për lëvizje me automjete dhe se banorët janë jashtë rrezikut.

Në njoftim sqarohet se autoritetet vendore, në bashkëpunim me Policinë e Shtetit janë në komunikim të vazhdueshëm me banorët.

Agjencia Kombëtare e Mbrojtjes Civile (AKMC), në bashkëpunim me Repartin e Xhenios, po merr masat e nevojshme për mbështetje dhe ndërhyrje në terren, me qëllim normalizimin e situatës dhe rikthimin e lëvizshmërisë.

The post Rrëshqet rruga në Matogjinë të Selenicës, autoritetet masa për rikthimin e lëvizjes appeared first on Agjencia Telegrafike Shqiptare.

TIRANË, 8 janar/ATSH/- Prefekti i Tiranës, Afrim Qendro ka deklaruar se në Tiranë dhe në të gjitha fshatrat e këtij qarku ku ka problematika, ekipet e emergjencave janë në terren prej orëve të para të ditës dhe deri tani në mbrëmje.

Qendro nënvizon se “me gjithçka mundemi dhe kemi në dorë po punohet për normalizimin e situatës”.

Prefekti bën me dije se janë kryer disa evakuime dhe se strukturat janë në gatishmëri për të ndërhyrë në çdo rast që do të kërkohet ndihmë.

Ai apelon qytetarët që të evitojnë lëvizjet e panevojshme teksa parashikimet thonë se reshjet do të jenë intensive edhe gjatë ditës së nesërme.

The post Qendro: Strukturat në gatishmëri për të ndërhyrë në çdo rast appeared first on Agjencia Telegrafike Shqiptare.

TIRANË, 8 janar/ATSH/- Situata në njësinë administrative Novoselë po rëndohet, si pasojë e rritjes së nivelit të ujit, duke krijuar rrezik për banorët dhe pronat e zonës.

Bashkia e Vlorës njoftoi sot se në bashkëpunim me strukturat përgjegjëse të emergjencave civile, Agjencinë Kombëtare të Mbrojtjes Civile dhe Forcat e Armatosura, ka angazhuar të gjitha kapacitetet e nevojshme në terren dhe ndodhet në gatishmëri të plotë për të asistuar banorët, si në rast nevoje për evakuim, ashtu edhe për marrjen e masave të duhura për shpëtimin dhe sigurinë e bagëtive.

Bashkia u bën thirrje banorëve të ndjekin me përpikëri udhëzimet e strukturave në terren dhe të shmangin lëvizjet e panevojshme në zonat e rrezikuara, deri në normalizimin e situatës.

Gjithashtu, Bashkia ka vënë në dispozicion të banorëve numrat e kontaktit:

Emergjencat Civile

+355 69 213 9738

Ndërmarrja e Shërbimeve Publike

+355 69 541 9296

Ujësjellës-Kanalizime

+355 69 930 8090

The post Rëndohet situata në Novoselë, strukturat në gatishmëri për evakuimin e banorëve appeared first on Agjencia Telegrafike Shqiptare.

TIRANË, 7 janar/ATSH/- Ministria e Shëndetësisë dhe Mirëqenies Sociale informon se, në bashkëpunim me Operatorin e Shërbimeve të Kujdesit Shëndetësor (OSHKSH), po ndjek në mënyrë të vazhdueshme situatën në terren dhe funksionimin e strukturave shëndetësore në të gjithë vendin, për shkak të kushteve të motit.

MSHMS bën të ditur në njoftimin zyrtar se nëpërmjet komunikimit të drejtpërdrejtë me 36 Njësitë Vendore të Kujdesit Shëndetësor dhe 4 Drejtoritë Rajonale, po sigurohet raportim i detajuar dhe i përditësuar mbi gjendjen e qendrave shëndetësore, pikave ambulatore dhe strukturave spitalore.

Ndërkohë, strukturat shëndetësore kanë marrë masat e nevojshme për ofrimin e kujdesit shëndetësor të pandërprerë dhe të sigurt për qytetarët gjatë këtyre ditëve me mot të keq.

Në këtë kuadër, vijon monitorim i pandërprerë 24/7 i situatës në terren, verifikim i infrastrukturës, pajisjeve dhe rezervave bazë medikamentoze të emergjencës, sigurim i aksesueshmërisë së transportit të urgjencës dhe koordinim me autoritetet vendore dhe emergjencat civile si dhe caktim i personave përgjegjës për monitorimin e situatës në çdo institucion shëndetësor

Ndërsa në nivel spitalor, MSHMS nënvizon se janë marrë një sërë masash si aktivizim i plotë i shërbimit të urgjencës me gatishmëri 24/7, forcim i koordinimit operacional me OSHKSH-në, pushtetin vendor dhe strukturat e emergjencave, monitorim i situatës çdo 3 orë dhe kontroll i vazhdueshëm i infrastrukturës si dhe verifikim i rezervave kritike: medikamente, materiale mjekësore, ujë të pijshëm, karburant për gjeneratorë dhe pajisje emergjente.

The post MSHMS: Strukturat shëndetësore në gatishmëri, aktivizim i plotë i shërbimit të urgjencës 24/7 appeared first on Agjencia Telegrafike Shqiptare.