TIRANË, 6 janar /ATSH/ Reshjet intensive kanë rritur prurjet e lumenjve në qarkun e Shkodrës, por deri tani nuk raportohen problematika.

Prefektura e qarkut Shkodër në një deklaratë për shtyp, informoi sot se deri në këto momente nuk janë konstatuar problematika në kanalet kulluese, argjinaturat dhe digën e rezervuarit Shtodër.

Sipas prefekturës, nivelet e ujit në lumenjtë Buna, Drin, Kir dhe Gjadër janë nën kuotat e rrezikut për përmbytje. Hidrovoret e Velipojës, Vilunit dhe Cas janë në funksion me nga 5 pompa secili dhe janë në gatishmëri për funksionim me kapacitet të plotë, në rast nevoje. Strukturat përgjegjëse vijojnë monitorimin e situatës në terren dhe janë në gatishmëri për të ndërhyrë në çdo moment.

Në territorin e bashkisë Vau i Dejës janë regjistruar reshje shiu me intensitet të lartë. Në fshatin Hoten është raportuar një banesë me prani uji, ku banorëve u është dhënë ndihma e menjëhershme nga grupi i Emergjencave Civile. Situata po monitorohet në vijimësi nga strukturat përkatëse.

Sipas prefektit, në territorin e bashkisë Malësi e Madhe kanë vijuar reshjet e shiut me intensitet mesatar gjatë gjithë natës dhe në orët në vijim. Fshati Flakë vijon të jetë i bllokuar si pasojë e prurjeve të përroit. Në zonat Rrazë dhe Veshtë është konstatuar prezencë uji, por pa rrezik për banesat. Po punohet për furnizimin me energji elektrike në zonën e Kelmendit. Gjithashtu po punohet për hapjen e rrugës pranë lumit në zonën e Dragovojës.

Në territorin e bashkisë Fushë-Arrëz janë evidentuar shkarje dherash dhe rënie gurësh në disa rrugë rurale. Deri në këto momente nuk raportohen dëme në njerëz apo banesa.

Në territorin e bashkisë Shkodër janë regjistruar reshje shiu me intensitet të lartë. Grupi i Emergjencave Civile po kryen inspektime në terren dhe është në monitorim të afërt të çdo situate emergjente.

Në njoftim thuhet se në kaskadën e Drinit, prurjet aktuale natyrore arrijnë vlerën 3500 m³/s, duke reflektuar një situatë hidrike të qëndrueshme.

Nivelet e liqeneve paraqiten si më poshtë:

Fierza: 281,2 m;

Koman: 174,2 m;

Vau i Dejës: 75 m.

Shkarkimet aktuale nga hidrocentralet janë të kontrolluara dhe të qëndrueshme: HEC Vau i Dejës 700 m³/s dhe HEC Koman 700 m³/s. Deri tani nuk raportohen problematika.

Prefekti i Qarkut Shkodër vijon ndjekjen nga afër të situatës në koordinimin me të gjitha strukturat vendore e qendrore për menaxhimin e emergjencave.

/e.i/r.e/a.f/

The post Shkodër, nivelet e ujit në lumenj nën kuotat e rrezikut për përmbytje appeared first on Agjencia Telegrafike Shqiptare.

TIRANË, 6 janar /ATSH/ Reshjet e dendura të shiut dhe moti i keq kanë përfshirë vendin prej disa orësh.

Burime zyrtare pranë bashkisë Tiranë, bëjnë me dije për ATSH-në se situata nuk paraqet rrezikshmëri në kryeqytet.

Të njëjtat burime shprehen se deri në orën 10:00 të paradites së sotme, në shërbimin zjarrfikës nuk ka mbërritur asnjë telefonatë emergjence.

Bashkia njofton se grupet e punës kanë kaluar në shërbim të përforcuar në terren, për të ndjekur nga afër situatën në çdo lagje dhe rrugë të kryeqytetit.

/e.i/r.e/a.f/

The post Moti i keq, bashkia Tiranë: Grupet e punës në terren, në shërbim të përforcuar appeared first on Agjencia Telegrafike Shqiptare.

TIRANË, 6 janar /ATSH/ Shërbimet e Kujdesit Shëndetësor në Banesë vazhdojnë në të gjithë vendin, duke u ardhur në ndihmë të moshuarve dhe pacientëve kronikë që e kanë të vështirë të paraqiten në qendrat shëndetësore.

Ministria e Shëndetësisë dhe Mirëqenies Sociale bën të ditur se shërbimi i kontrollit shëndetësor në banesë po garanton ndjekje të vazhdueshme për pacientët në nevojë.

Sipas MSHMS, ky shërbim vjen falë angazhimit të 3142 mjekëve dhe infermierëve në 356 qendra shëndetësore në të gjithë vendin.

MSHMS njofton se vetëm gjatë vitit 2025 janë realizuar 198.358 vizita në banesë, duke përmirësuar aksesin dhe cilësinë e shërbimit shëndetësor.

Fuqizimi i këtij modeli të kujdesit në komunitet nga Ministria e Shëndetësisë dhe Mirëqenies Sociale është kthyer në një realitet të prekshëm për mijëra qytetarë në të gjithë vendin, veçanërisht për ata që përballen me sëmundje kronike apo vështirësi në lëvizje.

Ky program po shtrihet në 36 Njësitë Vendore të Kujdesit Shëndetësor dhe 356 qendra shëndetësore.

/e.i/r.e/a.f/

The post Shërbimi shëndetësor në banesë, afro 200 mijë vizita gjatë 2025-ës appeared first on Agjencia Telegrafike Shqiptare.

TIRANË, 6 janar /ATSH/ Reshjet e dendura të ditëve të fundit kanë sjellë vështirësi në qarkullim në Shkodër dhe zonat përreth qytetit.

Prefektja e Shkodrës, Holta Duda tha sot në një prononcim për ATSH-në se situata nuk paraqet aq rrezikshmëri, sa për të nisur evakuimin e familjeve.

“Për momentin jam në Malësi të Madhe dhe po lëvizim në drejtim të Vaut të Dejës. Jemi në terren prej mëngjesit herët, me të gjitha strukturat vendore dhe ato të emergjencës për të parë nga afër situatën. Nuk ka rrezik për evakuim familjesh. Në rast të rrezikshmërisë të lartë, autoritetet janë të gjitha në koordinim për monitorim të çdo situate”, tha ajo.

Në një njoftim të Prefekturës Shkodër, lidhur me situatën nga moti i keq bëhet me dije se hidrovoret furnizohen pa ndërprerje. Prej ditës së djeshme, si pasojë e rritjes së prurjeve në kaskadën e Drinit, kanë nisur shkarkimet e kontrolluara nga HEC Koman dhe HEC Vau i Dejës, me një sasi aktuale prej 700 m³/sekondë.

Komisioni i Emergjencave civile i Qarkut është në koordinim të vazhdueshëm me KESH për monitorimin e situatës dhe, deri më tani, nuk është evidentuar asnjë problematikë.

Prurjet nga përrenj në lumenj janë shtuar në sasi të konsiderueshme, por deri tani nuk janë konstatuar probleme në kanale kullimi, argjinatura. Niveli ujit nga Ura Vjetër e Bunës është poshtë kuotës së rrezikut.

Lumenjtë Drin, Kir dhe Gjadër kanë shtuar prurje, por niveli është poshtë kuotës së rrezikut për përmbytje.

Edhe Rezervuari i Shkodrës është poshtë kuotave të rrezikut për përmbytje.

Hidrovoret Vilun e Cas janë në funksion me nga pesë pompa e në gatishmëri për funksionim me kapacitet të plotë.

Bashkia Malësi e Madhe

Gjatë gjithë natës kanë vijuar reshje shiu me intensitet mesatar, të cilat vazhdojnë edhe aktualisht.

Deri në këto momente nuk raportohen raste problematike.

Fshati Flakë vijon të jetë i bllokuar si pasojë e prurjeve të Përroit.

Raportohen probleme me furnizimin me energji elektrike në disa zona të bashkisë Malësi e Madhe, konkretisht në Kelmend e Shkrel.

Bashkia Vau i Dejës

Vazhdojnë reshjet e shiut me intensitet të lartë.

Lumi Gjadër ka dalë nga shtrati, duke shkaktuar rritje të nivelit të ujit në lagjen “Kapedani”.

Bashkia Fushë-Arrëz

Në territorin e kësaj bashkie janë evidentuar shkarje dherash dhe rënie gurësh në disa rrugë rurale.

DRV Shkodër

Sipas informacioneve nga kontraktorët e mirëmbajtjes së akseve që administrohen nga DRV Shkodër nuk ka problematika në qarkullimin rrugor.

OSHEE Shkodër

Për momentin rezulton pa energji elektrike zona e Postribës, e cila për pak kohë pritet të vendoset në punë dhe në Kelmend po punohet për rikthimin e energjisë.

Kryetari i bashkisë Shkodër, Benet Beci njoftoi se që prej ditës së djeshme, si pasojë e rritjes së prurjeve në kaskadën e Drinit, kanë nisur shkarkimet e kontrolluara nga HEC Koman dhe HEC Vau i Dejës.

“Aktualisht po shkarkohet një sasi prej 700 m³/sekondë, përveç prodhimit, shkarkime këto të monitoruara dhe të menaxhuara nga specialistët e hidrocentraleve”, tha Beci.

Beci bën me dije se bashkia Shkodër është në koordinim të vazhdueshëm me KESH për menaxhimin e situatës dhe minimizimin e çdo rreziku të mundshëm për zonat e territorit të bashkisë, ndërsa deri në këto momente nuk është evidentuar asnjë problematikë.

/e.i/a.f/r.e/

The post Moti i keq në Shkodër, Duda: Vështirësi në qarkullim, strukturat në terren appeared first on Agjencia Telegrafike Shqiptare.

TIRANË, 5 janar /ATSH/ Moti i keq me reshje shiu ka përfshirë qarkun e Lezhës.

Bashkia Lezhë informoi sot qytetarët, se duke nisur nga dita e nesërme priten reshje më të dendura shiu, me intensitet të lartë deri ditën e mërkurë.

Bashkia kërkon që qytetarët të tregojë kujdes maksimal për shkak të kësaj situate.

Sipas njoftimit zyrtar të IGJEO, sot pasdite dhe nesër priten reshje me intensitet të lartë, kryesisht në veri dhe jug të vendit. Në qarqet Shkodër, Kukës, Lezhë, Vlorë dhe Gjirokastër mund të ketë vërshime të shpejta të lumenjve të vegjël malorë dhe rrëshqitje të dherave. Në zonat urbane, në këto qarqe mund të shfaqen probleme me përmbytje të lokalizuara, në varësi të gjendjes së kanalizimeve.

Bashkia Lezhë bën me dije se grupet e punës do të jenë në gatishmëri të plotë për të përballuar çdo problematikë që mund të paraqitet.

/e.i/r.e/a.f/

The post Moti i keq në Lezhë, bashkia apel qytetarëve për kujdes appeared first on Agjencia Telegrafike Shqiptare.

TIRANË, 5 janar /ATSH/ 387 rekrutë, kadetë dhe studentë të rinj, janë zyrtarisht pjesë e Forcave të Armatosura të Republikës së Shqipërisë.

Fuqia luftarake e Forcave të Armatosura bazohet në kapitalin njerëzor, disiplinën dhe gatishmërinë operacionale, të mbështetura nga programi strategjik “Mbrojtja 2030”.

Ministri i Mbrojtjes, Pirro Vengu përcolli sot mesazhet e disa prej kadetëve të rinj, pas ceremonisë së betimit, duke ndarë eksperiencën personale të tyre me uniformën e ushtarakut.

Kolonel Arjan Osmani, njëherësh pedagog në akademinë e FA shprehet se betimi është akti më solemn në jetën e ushtarakut që i përgatit ata për rrugëtimin e gjatë në radhët e Forcave të Armatosura.

Vilson Demko, kadet i Forcave të Armatosura, tha se ceremonia e betimit të ushtarakut për të është një emocion shumë i veçantë.

“Kam vendosur të jem pjesë e FA sepse më pëlqen rregulli dhe disiplina, gjithashtu dua t’i shërbej vendit tim”, tha ai.

Ndërsa, kadet Jugedia Çibaku u shpreh se momenti i betimit para shqiptarëve, të cilëve ka zgjedhur t’u shërbejë me uniformën e ushtarakut, mbetet një moment i veçantë. Çibaku tha se është ndjerë gjithnjë pjesë e ushtrisë, duke u rritur me frymë ushtarake, për shkak të të atit.

Kadet Matias Qasolli tha në mesazhin e tij se vjen nga një familje ushtarakësh.

“Kur mamaja ime bën kursin e radhës, vij dhe e takoj ndonjëherë. Ajo është një epror jo i drejtpërdrejtë sipas rregullores që kemi mësuar, por jam i detyruar ta nderoj. Është një ndjesi e çuditshme. Kur vijmë në shtëpi duket sikur s’ka ndodhur asgjë”, tha ai.

Kristina Ndreca, kadet e Forcave të Armatosura, tha se në këtë akademi ka hyrë së bashku me të vëllanë. Ndreca tha se ka qenë e pandarë me të vëllanë, që nga klasa e parë.

“Edhe në bankë kemi qenë bashkë. Jo, nuk do ndahemi as në Forcat e Armatosura do vazhdojmë gjithë rrugën bashkë”, tha Ndreca.

Në ceremoninë e betimit të kadetëve të rinj pak ditë më parë, të pranishëm ishin Presidenti Bajram Begaj dhe ministri i Mbrojtjes Pirro Vengu. Forcat e Armatosura operojnë si një strukturë moderne, ndërvepruese me aleatët dhe e aftë të përballojë kërcënime ushtarake dhe kibernetike.

/e.i/r.e/a.f/

The post Nga familje ushtarakësh, te bashkimi me vëllanë: Mesazhet e kadetëve të rinj appeared first on Agjencia Telegrafike Shqiptare.

TIRANË, 3 janar/ATSH/ Nga menaxhimi i territorit dhe investimet infrastrukturore, te përballimi i fluksit turistik dhe përmirësimi i shërbimeve publike, Durrësi mbetet një hapësirë ku vendimmarrja lokale ka ndikim të drejtpërdrejtë në jetën e përditshme të qytetarëve.

Kryebashkiakja e qytetit bregdetar, Emiriana Sako, ndan në një intervistë për ATSH-në, vizionin e saj për drejtimin e qytetit, prioritetet e institucionit që ajo drejton dhe politikat e ndjekura për një zhvillim të qëndrueshëm.

Në një bisedë që prek dimensionin ekonomik, social dhe urban, Sako flet për projektet strategjike në zbatim, sfidat e administrimit të një qyteti të madh si Durrësi, dhe përgjegjësinë për shërbime cilësore për komunitetin.

Sako u shpreh se prioritetet janë të ndërtuara mbi vizionin për ta shndërruar Durrësin në një qytet modern, dhe plotësisht të harmonizuar me standardet bashkëkohore dhe një qytet turistik evropian. Në thelb të këtij vizioni qëndrojnë disa shtylla kryesore si zhvillimi ekonomik dhe fuqizimi i bizneseve lokale, turizëm gjithëvjetor, fuqizimi dhe integrim i të rinjve në ekonominë e qytetit, mbështetje sociale për familjet në nevojë, një qytet modern, të qëndrueshëm dhe me standarde bashkëkohore.

“Durrësi është një qytet me potencial të jashtëzakonshëm urban, ekonomik dhe social, dhe kjo na motivon çdo ditë të punojmë më fort për ta zhvilluar në mënyrë të qëndrueshme. Sot, situata urbane paraqet një përzierje progresi dhe sfidash. Ne kemi realizuar ndërhyrje të rëndësishme në infrastrukturë dhe kemi rikualifikuar disa zona që kishin nevojë për vëmendje. Po realizojmë projekte të rëndësishme infrastrukturore që synojnë përmirësimin e cilësisë së jetës, forcimin e lidhjeve brenda qytetit dhe rritjen e hapësirave publike”, tha Sako.

“Në aspektin social, jemi të fokusuar te rritja e shërbimeve komunitare, përfshirja e të rinjve dhe mbështetja e shtresave në nevojë. Gjithsej janë 400 familje që përfitojnë nga skema e ndihmës ekonomike. Ne kemi 7 qendra që ofrojnë shërbime ditore, shërbime të specializuara dhe qendra multifunksionale për moshën e tretë, për fëmijë etj. Janë mesatarisht 1700 qytetarë çdo vit që marrin shërbime nga të gjitha këto qendra”, shtoi ajo.

Sipas Sakos, Durrësi është qendra e investimeve strategjike kombëtare, një destinacion për investitorët e huaj, sidomos në aspektin e investimeve infrastrukturore, industriale, turistike dhe kulturore.

Sako u shpreh se aktualisht po zhvillohen projekte të rëndësishme, me rëndësi strategjike për infrastrukturën dhe qarkullimin rrugor si, dy unazat e qytetit: unaza Spital-Currila dhe ajo Spitallë-Currila, përfundimi i shëtitores së plazhit, duke filluar nga Ura e Dajlanit deri tek Konvaleshenca, rikonstruksioni i pallatit të kulturës “Aleksandër Moisiu”, rikonstruksioni i “Mauzoleut të Dëshmorëve” etj.

Durrësi, si qyteti i dytë më i madh pas Tiranës, po merr gjithnjë e më shumë vëmendjen e Qeverisë në aspektin e investimeve dhe projekteve të ndryshme, si Akademia Sportive e Manchester City dhe akademia e Rafael Nadal.

Sipas Sakos, tërheqja e investimeve sportive vjen pasi Durrësi ofron një kombinim faktorësh strategjikë që pak zona të tjera në vend i kanë, si qyteti i dytë më i madh në Shqipëri dhe porta kryesore detare e vendit.

Sako e cilësoi Durrësin kryeqytet të turizmit dhe shpjegoi vizionin për rritjen e cilësisë së shërbimeve turistike si edhe promovimin e destinacioneve apo atraksioneve turistike. Sipas saj, edhe sezoni i fundit veror i tejkaloi pritshmëritë.

“Vitin e kaluar ishin mbi 1 milion turistë që e kanë vizituar qytetin tonë, ndërsa këtë vit duke parë fluksin e lartë mendojmë se ky numër mund të arrijë deri në 1 milion e 500 mijë vizitorë”, tha Sako.

Në Portin e Durrësit vetëm për 9-mujorin e vitit 2025 numërohen 403.554 hyrje në total, rreth 7% më shumë në krahasim me të njëjtën periudhë të vitit të kaluar.

“Mbështetja vit pas viti e qeverisë së kryeministrit Rama me projekte madhore që e kanë transformuar dhe do të vijojnë ta transformojnë qytetin krijon një klimë të favorshme për zhvillimin e mëtejshëm të turizmit, që është motori ekonomik i Durrësit. Kemi filluar një investim të rëndësishëm siç është projekti i hyrjes së Durrësit e cila do të jetë një hyrje e denjë për një qytet turistik”, pohoi Sako.

Investime të tjera janë faza e dytë e shëtitores së plazhit, zgjerimi i brezit të rërës si dhe ndërtimi i dy unazave në qytet.

“Të tjera investime në infrastrukturë do të kryhen gjatë vitit 2026 me synim sektorin turistik. Durrësin e pret një zhvillim i mëtejshëm falë projekteve madhore si projekti i Marinës Turistike, projekti i Portit Tregtar në Porto Romano, projekti i Amfiteatrit dhe rivitalizimi i gjithë qendrës historike, rijetësimi i monumenteve të kulturës, akademia e Manchester City dhe ajo e tenisit Rafael Nadal”, vijoi ajo.

Ndërkaq, vetëm gjatë 10 muajve të vitit 2025, numri i vizitorëve vetëm në Amfiteatër dhe tek Torra Veneciane ishte 50.129 vizitorë, nga ku shënohet një rritje prej 39% në krahasim me të njëjtën periudhë të vitit 2024.

Sako informoi se bashkia ka ndërmarrë hartimin e Planit Vendor të Menaxhimit të Mbetjeve Urbane, në kuadër të angazhimit si anëtarë të Konventës së Bashkive të Ballkanit Perëndimor.

“Një risi e rëndësishme është procesi pilot i evadimit në burim, ku mbetjet zbrazen direkt nga koshat familjarë në disa lagje, me synimin për të rritur efikasitetin dhe për të eliminuar pikat problematike. Paralelisht, kryejmë kontroll të rregullt të pajisjeve dhe zëvendësim të kontejnerëve të dëmtuar, si dhe vendosje të koshave shtesë në zonat që e kërkojnë. Nëpërmjet këtyre masave dhe zbatimit të planit vendor, Durrësi po ndërton një sistem më efikas, më të pastër dhe më të orientuar drejt standardeve moderne të menaxhimit të mbetjeve, duke garantuar shërbim më cilësor për çdo lagje dhe çdo banor të qytetit”, tha Sako.

Kryetarja e bashkisë Durrës, në fund u shpreh se “vizioni ynë është të ndërtojmë një qytet modern, të qëndrueshëm dhe të drejtë për të gjithë”.

“Ne po investojmë në infrastrukturë më moderne, në hapësira publike më cilësore, në një urbanistikë që respekton historinë dhe mbron të ardhmen, shërbime më të mira, investime që sjellin zhvillim afatgjatë, si dhe në projekte që rrisin mirëqenien e qytetarëve”, përfundoi Sako.

Foto nga aktivitete ku e pranishme është edhe kryebashkiakja e Durrësit, Emiriana Sako

1 nga 10

/e.i/j.p/r.e/

The post Sako për ATSH: Investimet që po e transformojnë Durrësin në qytet turistik evropian appeared first on Agjencia Telegrafike Shqiptare.

TIRANË, 2 janar/ATSH/ Prefektja e Qarkut Shkodër, Holta Duda informon se gjatë orëve të fundit janë marrë një numër i konsiderueshëm telefonatash nga qytetarë në sallën operative të Komisariatit të Policisë Shkodër, ku raportohet se disa familje, përfshirë edhe fëmijë, ndodhen të bllokuara në segmente të ndryshme rrugore.

Sipas Prefektes Shkodër, bllokimet janë evidentuar në akse të ndryshme rrugore, nga zona e Bunit të Bajraktarit deri në zbritje në drejtim të qytetit të Koplikut.

“Aktualisht, në këtë aks rrugor po bien reshje breshëri të alternuara me dëborë dhe ka filluar formimi i ngricave, duke e vështirësuar ndjeshëm qarkullimin rrugor”, thuhet në njoftim.

Sipas raportimeve, mbi 200 mjete po tentojnë të lëvizin në drejtim të qytetit të Koplikut.

“Nga informacionet e fundit të administruara nga strukturat operacionale në terren informohemi se aksi rrugor Qafë Thore–Bogë është zhbllokuar dhe qarkullimi po vijon normalisht. Aksi rrugor Selcë–Qafë Berdelëcit paraqet probleme për shkak të ngricave të shumta, disa automjete janë kthyer në fshatin Tamarë”, vijon njoftimi.

Në njoftim thuhet se “lëvizja është rivendosur në sajë të ndërhyrjes në terren, ku ndodhen shërbimet e Policisë Rrugore dhe mjetet borëpastruese, të cilat janë në koordinim të vazhdueshëm për menaxhimin e situatës dhe garantimin e sigurisë së qarkullimit rrugor”.

Prefektja Duda është në ndjekje të vazhdueshme të situatës dhe ka kërkuar koordinim të menjëhershëm mes strukturave përgjegjëse për normalizimin e qarkullimit dhe garantimin e sigurisë së qytetarëve.

Në këtë kuadër, apelohet për të gjithë drejtuesit e mjeteve që të respektojnë rregullat e qarkullimit rrugor, të shmangin lëvizjet e panevojshme në akset problematike dhe të ndjekin udhëzimet e Policisë. Në rast nevoje ose problematikash, qytetarët ftohen të komunikojnë menjëherë me Policinë e Shtetit ose shërbimet e emergjencave.

/e.i/r.e/

The post Mbi 200 mjete u bllokuan në rrugën drejt Koplikut, ndërhyn policia dhe mjetet borëpastruese appeared first on Agjencia Telegrafike Shqiptare.

TIRANË, 2 janar/ATSH/ Reshjet e denduara të borës dhe shiut përfshinë sot zonat malore të vendit.

Kryeministri Edi Rama ndau në rrjetet sociale, pamje nga puna në terren e strukturave përgjegjëse në veri të vendit për pastrimin nga bora dhe hedhjen e kripës në akset rrugore.

Rama thekson se këto struktura janë në gatishmëri maksimale në zonat malore.

“Pavarësisht kushteve atmosferike, strukturat përgjegjëse janë në terren për të garantuar qarkullim dhe siguri”, tha Rama.

ARRSH dhe Policia e Shtetit u bën apel drejtuesve të mjeteve që të përdorin goma dimri ose zinxhirë, të lëvizin me shpejtësi minimale në zonat me reshje dhe të respektojnë distancat e sigurisë.

/e.i/r.e/

The post Rama: Strukturat në terren për të garantuar qarkullim dhe siguri appeared first on Agjencia Telegrafike Shqiptare.

TIRANË, 2 janar/ATSH/ Akademia e Shkencave e Shqipërisë ka shprehur sot ngushëllimet për ndarjen nga jeta të akademik Nexhat Dacit, personalitet i shquar i shkencës, arsimit universitar dhe jetës institucionale e politike në Kosovë.

Në letrën e ngushëllimit drejtuar Kryesisë së Akademisë së Shkencave dhe Arteve të Kosovës, ASHSH shprehet se “akademik Nexhat Daci do të kujtohet për kontributin e tij të jashtëzakonshëm në zhvillimin e shkencës së kimisë, për përkushtimin shumëvjeçar në formimin e brezave të rinj të studiuesve dhe pedagogëve si dhe për angazhimin e tij aktiv në ndërtimin dhe forcimin e institucioneve akademike dhe shtetërore të Kosovës”.

ASHSH thekson se veprimtaria e tij shkencore, e shoqëruar me përvojë të gjerë ndërkombëtare, ka kontribuar ndjeshëm në afirmimin e shkencës shqiptare në hapësirën akademike evropiane dhe më gjerë.

“Si anëtar e drejtues i Akademisë së Shkencave dhe të Arteve të Kosovës në periudhë të rëndësishme të historisë së saj, ai dha një kontribut të çmuar në konsolidimin e rolit të Akademisë si institucion kyç i mendimit shkencor dhe kulturor, duke nxitur bashkëpunimin ndërakademik, dialogun shkencor dhe ruajtjen e standardeve të larta akademike”, vijon letra.

“Në periudhën kur akademik Nexhat Daci ushtronte detyrën e Kryetarit të Akademisë së Shkencave dhe të Arteve të Kosovës u konsoliduan marrëdhënie të qëndrueshme bashkëpunimi ndërmjet Akademisë së Shkencave dhe të Arteve të Kosovës dhe Akademisë së Shkencave të Shqipërisë, të materializuara përmes protokolleve të bashkëpunimit dhe nismave të përbashkëta shkencore, duke kontribuar në forcimin e lidhjeve ndërinstitucionale dhe në bashkërendimin e komunitetit shkencor shqiptar”, cilësohet në të.

Sipas ASHSH, gjatë angazhimit të tij në jetën politike dhe institucionale të Kosovës, përfshirë ushtrimin e funksionit të Kryetarit të Kuvendit të Republikës së Kosovës, u shfaq si një figurë publike me cilësi të veçanta që e konsideronte dijen, përgjegjësinë institucionale dhe shërbimin ndaj shoqërisë si vlera të pandashme.

ASHSH thekson në letër se i shpreh në emër të Asamblesë së ASHSH-së, solidaritetin e plotë Akademisë së Shkencave dhe të Arteve të Kosovës, ngushëllimet më të ndiera familjes së akademik Nexhat Dacit, si dhe gjithë bashkëpunëtorëve dhe kolegëve të tij.

/e.i/r.e/

The post ASHSH letër ngushëllimi për ndarjen nga jeta të akademik Nexhat Dacit appeared first on Agjencia Telegrafike Shqiptare.

TIRANË, 2 janar/ATSH/ Aksi rrugor Kakavijë-Janinë në kryqëzimin e fshatit Kallpaq do të jetë sërish i bllokuar ditën e nesërme për shkak të protestës së fermerëve grekë.

Policia Kufitare Kakavijë, bëri të ditur se “më datë 03.01.2026, nga ora 19:00 deri në orën 22:00 (me orën greke), aksi rrugor Kakavijë–Janinë, në kryqëzimin e fshatit Kallpaq, do të jetë i bllokuar për shkak të protestës që do të zhvillojnë fermerët”.

Sipas policisë, do të lejohen të qarkullojnë vetëm automjetet që do të kenë emergjenca shëndetësore.

Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës.

/e.i/r.e/

The post Protesta e fermerëve grekë, nesër bllokohet për tri orë aksi Kakavijë-Janinë appeared first on Agjencia Telegrafike Shqiptare.

TIRANË, 29 dhjetor/ATSH/ Miratimi i projektligjit të hartuar nga Ministria e Shëndetësisë dhe Mirëqenies Sociale, “Për kujdesin alternativ” në familje, krijon për herë të parë një kuadër të veçantë ligjor duke sistemuar dhe zgjeruar mbrojtjen dhe mbështetjen për fëmijët jashtë familjes së tyre të origjinës. Ligji përcakton katër forma të kujdestarisë familjare: kujdestarinë profesionale, kujdestarinë vullnetare nga familja e zgjeruar ose rrethi i ngushtë i njohur i fëmijës, kujdestarinë e specializuar për fëmijët me aftësi të kufizuara dhe kujdesin emergjent.

Nertila Topulli, drejtore e Politikave dhe Mbrojtjes Sociale në Ministrinë e Shëndetësisë dhe Mbrojtjes Sociale në një intervistë për ATSH-në, tha se projektligji vendos procedura të detajuara për çdo hap të vendosjes së fëmijës në kujdestari, duke nisur nga vlerësimi multidisiplinar dhe plani individual i kujdesit, përgatitja e fëmijës, vendimmarrja gjyqësore ose administrative, rivlerësimi periodik dhe përfundimi i kujdestarisë.

“Një element i ri i rëndësishëm është krijimi i një regjistri elektronik kombëtar, që garanton unifikim, gjurmueshmëri, transparencë dhe raportim të qëndrueshëm, duke mundësuar vendimmarrje të bazuar në evidence”, shtoi ajo.

Topulli u shpreh se ligji qartëson dhe fuqizon rolet institucionale kur bashkitë marrin mandate të zgjeruara, Njësitë e Mbrojtjes së Fëmijës marrin përgjegjësi të qarta për identifikimin, vlerësimin dhe ndjekjen e rasteve, Shërbimi Social Shtetëror udhëheq certifikimin dhe trajnimin e familjeve kujdestare, ndërsa Inspektorati i Shërbimeve Sociale forcohet në monitorimin dhe garantimin e cilësisë së kujdesit.

Sipas Topullit, në Shqipëri, kujdesi alternativ në familje ofrohet në disa forma. Përveç kujdesit të ofruar nga të afërm ose persona të afërt me fëmijën, një risi e rëndësishme që parashikohet për herë të parë është kujdesi alternativ profesional.

“Kujdesi alternativ profesional synon të krijojë kushte të qëndrueshme familjare për fëmijët që kanë nevojë për mbështetje më intensive dhe të specializuar. Ndërkohë, shërbimet e kujdesit shoqëror përbëjnë një sistem të organizuar shërbimesh dhe mbështetjesh që u ofrohen individëve dhe familjeve në nevojë nga profesionistë të fushave përkatëse. Për fëmijët, këto shërbime luajnë një rol thelbësor në parandalimin e ndarjes nga familja, mbështetjen e prindërimit, garantimin e mbrojtjes dhe ndërtimin e alternativave familjare ndaj kujdesit institucional”, tha Topulli.

Topulli u shpreh se kujdesi alternativ konsiderohet një zgjidhje më e mirë se institucionalizimi afatgjatë i fëmijëve, pasi ky i fundit ndikon negativisht në zhvillimin emocional, social dhe njohës të fëmijëve.

“Kujdesi alternativ në familje, ofron një mjedis më të ngrohtë, më individual dhe më të qëndrueshëm, që i lejon fëmijët të krijojnë lidhje emocionale, të zhvillojnë aftësi sociale dhe të integrohen më mirë në komunitet. Për këtë arsye, kujdesi alternativ konsiderohet një zgjidhje më e përshtatshme, humane dhe në përputhje me standardet e Konventës për të Drejtat e Fëmijës dhe Udhëzimi i Kombeve të Bashkuara për Kujdesin Alternativ”, pohoi ajo.

Topulli tha se familjet kujdestare përzgjidhen përmes një procesi të strukturuar vlerësimi, që përfshin verifikimin e kushteve sociale, psikologjike dhe ekonomike, si dhe motivimin për të marrë përsipër këtë rol. Trajnimi është i detyrueshëm dhe përfshin njohuri mbi zhvillimin e fëmijës, menaxhimin e traumës, të drejtat e fëmijës dhe bashkëpunimin me strukturat profesionale.

Drejtoresha e Politikave dhe Mbrojtjes Sociale në MSHMS shtoi se në bazë të këtij projektligji, familjet kujdestare përfitojnë mbështetje financiare mujore për mbulimin e nevojave të fëmijës, si dhe akses në shërbime psikologjike, këshillim profesional dhe mbështetje të vazhdueshme nga punonjësit socialë.

“Qëllimi i kësaj mbështetjeje është të sigurojë stabilitet për fëmijën dhe të parandalojë ndërprerjet e kujdesit. Familjet kujdestare profesionale përfitojnë të gjitha të drejtat dhe mbështetjet e familjeve kujdestare, duke përfshirë mbështetjen financiare për nevojat e fëmijës, dhe përveç kësaj përfitojnë pagë mujore për ofrimin e shërbimit profesional të kujdesit alternativ në familje. Prindi aplikues i familjes profesionale regjistrohet si i punësuar nga njësitë e vetëqeverisjes vendore, duke e formalizuar marrëdhënien si ofrues i shërbimit”, cilësoi Topulli, ndërsa shtoi se objektivi afatgjatë është reduktimi i ndjeshëm i kujdesit rezidencial dhe zhvillimi i një sistemi të qëndrueshëm, profesional dhe të monitoruar të kujdesit alternativ në familje.

“Shqipëria synon që çdo fëmijë pa kujdes prindëror të ketë një zgjidhje familjare të përshtatshme dhe të mbështetur. Ky ligj vendos kuadrin e përgjithshëm për organizimin, financimin dhe ofrimin e shërbimeve shoqërore në nivel qendror dhe vendor”, tha ajo.

Topulli cilësoi se familja që ofron kujdes alternativ duhet të plotësojë disa kritere themelore si prindi aplikues të jetë i rritur dhe me zotësi të plotë ligjore, të ketë shtetësi shqiptare ose leje qëndrimi të rregullt, vendbanim të përhershëm në Shqipëri, kushte të përshtatshme banimi dhe mjete të mjaftueshme jetese. Anëtarët e familjes nuk duhet të kenë dënime penale ose të jenë të regjistruar në regjistrin e të dënuarve për krime seksuale, duhet të jenë në gjendje të mirë shëndetësore dhe të ofrojnë një mjedis familjar të qëndrueshëm. Për kujdestarinë vullnetare nga të afërmit lejohet përjashtimi nga mosha pensionale, dhe të gjithë anëtarët e rritur të familjes duhet të japin pëlqimin me shkrim.

Topulli shtoi se monitorimi në familjet e kujdesit alternativ realizohet çdo dy javë gjatë tre muajve të parë dhe më pas çdo muaj, sipas një plani të hartuar mbi bazën e standardeve të kujdesit alternativ. Shërbimi Social Shtetëror, në nivel qendror dhe rajonal.

Sipas saj, në rast të shkeljeve, abuzimeve ose trajtimit të papërshtatshëm në procesin e kujdesit alternativ, çdo subjekt ka të drejtë të paraqesë ankim administrativ kundër vendimeve që lidhen me përzgjedhjen, ofrimin ose ndërprerjen e kujdesit alternativ.

Pas miratimit të projektligjit, MSHMS do të punojë për ngritjen e kapaciteteve institucionale, trajnimin e stafit dhe nisjen graduale të zbatimit në nivel vendor, me fokus monitorimin dhe cilësinë e shërbimeve.

/e.i/j.p/

The post Topulli për ATSH: Katër forma të kujdestarisë me ligjin e ri, zgjidhje për çdo fëmijë pa kujdes prindëror appeared first on Agjencia Telegrafike Shqiptare.

TIRANË, 2 janar/ATSH/ Konfirmimi i rastit të fundit me fruth te një fëmijë trevjeçar i pavaksinuar në Qendrën Spitalore Universitare “Nënë Tereza”, ka mobilizuar sërish strukturat e ISHP-së në një apel të përbashkët ndaj prindërve për të vaksinuar fëmijët ndaj kësaj sëmundjeje ngjitëse.

Sipas ISHP-së gjatë vitit 2025, në Shqipëri janë konfirmuar 18 raste me fruthi. Shumica e rasteve i përkasin grupmoshës pediatrike  0–14 vjeç, ndërsa vetëm një rast është regjistruar tek një i rritur.

Dr. Elona Kureta epidemiologe në ISHP dhe Dr. Rovena Daja shefe e Programit te Vaksinimit pranë të njëjtit institucion, shprehen për ATSH se nga analiza e statusit të vaksinimit rezulton që 89% e rasteve me fruth gjatë këtij viti janë të pavaksinuar ose vetëm me një dozë vaksinë, fakt që konfirmon edhe një herë rolin vendimtar të vaksinimit dhe sidomos vaksinimit të plotë në parandalimin e sëmundjes.

“Në lidhje me shpërndarjen, rastet janë përqendruar kryesisht në Fier ku ka patur një shpërthim epidemik në një kopsht me fëmijë të pavaksinuar dhe në Tiranë. Rastet e tjera janë regjistruar në zona të ndryshme të vendit, por falë vaksinimit rastet nuk kanë shkaktuar shpërthime epidemike. Krahasimi me vitet e mëparshme tregon se numri i rasteve në vitin 2025 është më i ulët se një vit më parë, megjithatë, vazhdojmë te kemi qarkullim të fruthit ne vend për shkak të rënies së mbulesës me vaksina sidomos me dozën e parë duke përbërë një rrezik për shpërthime epidemike”, shprehet Kureta.

Dr. Kureta tha se nga perspektiva e shëndetit publik, elementi më i rëndësishëm për ndërprerjen e transmetimit të fruthit është vaksinimi në kohë dhe i plotë i fëmijëve dhe të gjithë atyre që nuk janë vaksinuar më parë, sipas kalendarit kombëtar të vaksinimit.

“Të dhënat për vitet 2017–2024 tregojnë që mbulesa vaksinale me dy doza për 5-vjeçarët ka mbetur relativisht e qëndrueshme, 92% por sipas Organizatës Botërore e Shëndetësisë (OBSH), për eliminimin e fruthit kërkohet mbulim me më shumë se 95% të popullësisë me dy doza. Rënia e mbulimit për dozën e parë dhe të dytë paraqet një rrezik serioz për rikthimin e shpërthimeve”, tha Daja.

Sipas Dajës, një nga arsyet kryesore të vonesës në vaksinim është shtyrja e qëllimshme e dozës së parë nga prindërit. Shpesh, sipas saj prindërit presin që fëmija të fillojë të ecë dhe të flasë, duke e aplikuar dozën e parë të vaksinës FRP jo në moshën e rekomanduar 12 – 15 muaj por me vonesë ose duke e vonuar atë edhe pas moshës 2 vjeç ose duke mos e aplikuar fare atë.

“Kjo praktikë e lë fëmijën të pambrojtur për një periudhë kritike ndaj fruthit. Kjo vonesë lidhet kryesisht me frikën e pabazuar nga një lidhje e supozuar mes vaksinës FRP dhe autizmit, një pretendim i rrëzuar plotësisht nga studime të shumta shkencore. Në përhapjen e kësaj frike ndikon ndjeshëm edhe dezinformimi në rrjetet sociale dhe media jo të besueshme, të cilat shpesh amplifikojnë mesazhe të pasakta dhe jo shkencore. Po ashtu edhe mjekët nuk punojnë sa duhet me prindërit për t’u dhënë mesazhet e sakta. Gjithashtu, pandemia COVID-19 ka pasur ndikimin e saj, duke shkaktuar hezitim për paraqitje në qendrat shëndetësore dhe shtyrje të vaksinimeve, veçanërisht për dozën e parë të FRP”, vijoi Daja.

Dr. Kureta dhe Dr. Daja thonë se fëmijët e paimunizuar nën 5 vjeç, dhe sidomos të porsalindurit, janë shumë të riskuar përballë fruthit dhe komplikacioneve të tij, duke çuar deri në vdekje.

“Neonatët e infektuar me fruth mund të vuajnë nga diarrea, e cila mund të shkaktojë dehidratim. Fëmijët mund të zhvillojnë inflamacion të veshit të mesëm dhe infeksione të ndryshme të traktit respirator. Pneumonia është shkaku kryesor i vdekjeve që lidhen me fruthin. Kjo ndodh sepse virus i fruthit dobëson sistemin imunitar. Pneumonia mund të shkaktohet nga virus i fruthit direkt ose nga infeksione bakteriale sekondare. Encefaliti, një inflamacion i rrezikshëm i trurit është një nga komplikacionet e rënda të fruthit duke cuar në prapambetje mendore dhe belbëzim”, theksuan ato.

Mjeket e ISHP-së, përsërisin apelin drejtuar prindërve për të vaksinuar fëmijët ndaj fruthit, si e vetmja mënyrë efektive për të parandaluar këtë sëmundje.

“Të gjithë fëmijët duhet të vaksinohen kundër fruthit. Vaksina FRP është e sigurt, efektive dhe nuk ka asnjë lidhje me autizmin. Vonesat në vaksinim i lënë fëmijët të pambrojtur ndaj një sëmundjeje shumë ngjitëse dhe potencialisht fatale. Duke vaksinuar fëmijët në kohë, prindërit mbrojnë jo vetëm fëmijën e tyre, por edhe komunitetin”, përfundoi Daja.

1 nga 2

/e.i/j.p/

The post Daja dhe Kureta apel prindërve: Vaksinoni fëmijët ndaj fruthit, lidhja me autizmin e rrëzuar shkencërisht appeared first on Agjencia Telegrafike Shqiptare.

TIRANË, 1 janar/ATSH/ Ministri i Drejtësisë, Besfort Lamallari u shpreh sot në një intervistë televizive, se kriteri që udhëheq Amnistinë Penale është rrezikshmëria e ulët shoqërore.

Lamallari tha se përzgjedhja e kategorive që përfitojnë nga kjo amnisti është bërë në mënyrë që të mos cenohet siguria publike dhe të favorizohet një qasje humane dhe e drejtë.

“Kriteri që ka udhëhequr këtë amnisti ka qenë rrezikshmëria e ulët shoqërore. Sa i përket burrave, përfitojnë të gjithë ata që janë të dënuar me vendim të formës së prerë me burgim deri në tre vjet, ose nëse kanë një vendim mbi tre vjet por që u ka mbetur tre vjet e poshtë për të shlyer dënimin, duke përfshirë faktin se nuk janë të dënuar për vepra që përjashtohen nga amnistia, vepra me karakter të theksuar të rrezikshmërisë shoqërore”, tha Lamallari.

Ministri Lamallari tha se “sa i përket grave, janë ato të cilat janë të dënuara me vendim gjykate deri në katër vite burg, dhe të gjitha ato gra që kanë dënim më të madh por që kanë shlyer pjesën e dënimit që kanë pasur dhe periudha e mbetur është më pak se katër vite”.

“Gjithashtu përfituese kemi gratë e dënuara që janë mbi moshën 50 vjeç në momentin e hyrjes në fuqi të amnistisë, si dhe të dënuarit burra që janë mbi moshën 60 vjeç. Po ashtu kemi treguar një akt humanizmi për një kategori shumë vulnerabël, që janë të miturit ku të gjithë personat nën moshën 18 vjeç do të lirohen, sigurisht duke përjashtuar veprat e karakterit të rrezikshmërisë së lartë shoqërore”, tha Lamallari.

Ministri i Drejtësisë njoftoi se me Amnistinë Penale, 380 persona do të përfitojnë lirim të menjëhershëm dhe rreth 900 të tjerë përfitojnë ulje dënimi. Numri real i përfituesve është edhe më i lartë, duke përfshirë ata që përfitojnë nga pushimi i ndjekjes penale si dhe masat alternative.

/e.i/j.p/

The post Lamallari: 380 të dënuar lirohen menjëherë nga amnistia penale appeared first on Agjencia Telegrafike Shqiptare.

TIRANË, 1 janar/ATSH/ Në ditën e parë të vitit 2026, Korça është mbushur nga gjallëria e turistëve, qytetarëve vendas dhe atyre të huaj që kanë zgjedhur këtë qytet për të kaluar natën e ndërrimit të viteve.

Korça vazhdon të mbetet destinacioni i preferuar i qindra qytetarëve që zgjedhin këtë qytet për të kaluar festat e fundvitit.

Kryeministri Edi Rama ndau në rrjetet sociale pamje nga Korça, plot me turistë të huaj e qytetarë të shumtë.

Dekori shumëngjyrësh i shtrirë në lagjet kryesore të qytetit, shtëpizat e drurit, pista e patinazhit për fëmijët dhe të rinjtë, janë vetëm disa prej atraksioneve që ofron Korça për festa.

Qytetarët kanë zgjedhur Pazarin e Vjetër, Pedonalen e qytetit si dhe zonën përreth Katedrales, për të shijuar bukuritë magjepsëse të Korçës për festat e fundvitit.

/e.i/j.p/

The post Dita e parë e 2026-ës në Korçë appeared first on Agjencia Telegrafike Shqiptare.

TIRANË, 1 janar/ATSH/ Në këtë fillimvit, zëvendësministrja e Shëndetësisë dhe Mirëqenies Sociale, Eugena Tomini, vizitoi paraditen e sotme, bebet e ardhura në jetë në minutat e para të vitit 2026, përkatësisht Adea, e lindur në SUOGJ “Mbretëresha Geraldinë”, dhe Sibel, e lindur në SUOGJ “Koço Gliozheni”.

Gjatë vizitës, zv.ministrja Tomini u takua nga afër me nënat dhe foshnjet, duke shprehur urimet për ardhjen e tyre në jetë, si dhe u dhuroi çekun e “Bonusit të bebes” mbështetja direkte financiare e qeverisë për çdo të porsalindur.

Programi universal “Bonusi i bebes” është një ndër prioritetet kryesore të qeverisë për mbështetjen e çdo fëmije dhe familjeve të tyre, duke garantuar shpërblim financiar për çdo lindje, pavarësisht statusit social apo ekonomik, si dhe në kuadër të incentivave për rritjen e natalitetit. Që nga viti 2019, janë shpërndarë mbi 245 mijë bonuse për të porsalindurit.

Masa financiare e “Bonusit të bebes” varion nga 40 000 deri në 120 000 lekë, në varësi të rendit të lindjes, ndërsa për lindjet e shumëfishta përfitimi është 80 000 lekë për secilën foshnjë në rastin e binjakëve dhe 120 000 lekë për secilën foshnjë në rastin e trinjakëve ose më shumë.

Ministria e Shëndetësisë dhe Mirëqenies Sociale vijon angazhimin për forcimin e politikave sociale në mbështetje të familjeve dhe garantimin e një fillimi të sigurt dhe dinjitoz për çdo fëmijë që vjen në jetë.

/e.i/j.p/

The post Foshnjet e para të vitit 2026 marrin “Bonusin e bebes” appeared first on Agjencia Telegrafike Shqiptare.

TIRANË, 31 dhjetor/ATSH/ Qendrat shëndetësore 24-orëshe në Tiranë përballen me një rritje të ndjeshme të fluksit të pacientëve, sidomos gjatë fundvitit. Virozat sezonale, komplikacione të sëmundjeve kronike dhe urgjencat e lehta shëndetësore janë vetëm disa prej problematikave që përballen mjekët dhe inferimierët gjatë turneve në këto qendra shëndetësore.

Marsida Dhimitri, mjeke familje pranë Qendrës së Mjekësisë Familjare Nr.10 në kryeqytet, shprehet për ATSH se aktualisht kjo qendër shëndetësore është në një periudhë me shtim të numrit të pacientëve me viroza sezonale, për shkak të komplikimeve nga ulja e temperaturave, grumbullimit të njerëzve për të festuar së bashku duke u bërë burim infeksioni edhe për të tjerët.

“Qendra Shëndetësore përballet me një ngarkesë të rritur ku numri i vizitave për mjek mund të shkojë mbi 30 pacientë në ditë, por përmes një mirëorganizimi të punës shërbimi ofrohet në mënyrë efektive. Në këtë periudhë kemi shtim të rasteve me viroza stinore, infeksione respiratore sezonale si dhe raste me probleme gastrointestinale të lidhura me ushqyerjen e rënduar”, tha ajo.

Dhimitri tha se për shkak të festave, ka edhe një rritje të dukshme të rasteve që lidhen me konsumim të tepruar të alkoolit dhe ushqimeve, gjë që manifestohen me çrregullime gastrointestinale, rritje të glicemisë, të nivelit të yndyrnave si dhe të tensionit arterial.

“Për të përballuar fluksin e shtuar gjatë festave, janë marrë masa organizative që përfshijnë rritjen e gatishmërisë së stafit mjekësor, mirëorganizim të punës, sigurimin e medikamenteve dhe materialeve të nevojshme për shërbimin e urgjencës. Shërbimi mjekësor është mirëorganizuar në mënyrë efektive për të siguruar vijimësinë e shërbimit edhe gjatë ditëve festive për të gjithë grup moshat”, pohoi Dhimitri.

Dhimitri theksoi se koordinimi realizohet në mënyrë të vazhdueshme dhe efikase përmes protokolleve të përcaktuara duke siguruar referimin e menjëhershëm të rasteve që kërkojnë trajtim të specializuar.

Mjekja e QMF-së Nr.10 në Tiranë, jep edhe disa udhëzime për qytetarët, që edhe pse në periudhë festash t’i kalojnë ato me shëndet dhe të sigurt për veten dhe familjarët e tyre.

“Në këtë periudhë festash duhet që të shmanget konsumi i tepruar i alkoolit, të ushqehen shëndetshëm, të mos mbingarkohen me ushqim me sasi të tepruar, të pushojnë mirë dhe nëse vërejnë simptoma të virozave të shmangin sa munden grumbullimet me shumë njerëz që mos të bëhen burim infeksioni. Për çdo shqetësim shëndetësor të kontaktojnë mjekun dhe të paraqiten pranë qendrës shëndetësore”, tha Dhimitri.

/e.i/j.p/

The post Dhimitri për ATSH: Fluks pacientësh në qendrat shëndetësore 24-orëshe appeared first on Agjencia Telegrafike Shqiptare.

TIRANË, 31 dhjetor/ATSH/ Në prag të ndërrimit të viteve, drejtuesi i Policisë së Shtetit, Ilir Proda uroi festa të mbara.

Proda shprehu mirënjohjen e tij për çdo punonjës të Policisë së Shtetit, për angazhimin, përkushtimin dhe sakrificën e treguar çdo ditë, duke vënë shpesh në plan të dytë familjen dhe sigurinë e tyre.

Proda tha se “viti që po lëmë pas nuk ka qenë i thjeshtë, ka qenë sfidues, një vit përgjegjësish të mëdha dhe sakrificash, të cilat na kanë lidhur më fort me njëri-tjetrin, me qytetarët dhe me partnerët, na kanë forcuar dhe na kanë bërë më të qartë se si duhet të jemi dhe çfarë duhet të bëjmë, për të qenë të denjë për misionin tonë”.

“Me përzemërsi të thellë uroj familjarët e Dëshmorëve të Policisë, të cilët kanë në tryezë një pjesëtar më pak, por në historinë e kombit, një hero më shumë”, u shpreh Proda.

Po ashtu, ai përcolli falënderim dhe urim të sinqertë për qytetarët, për rolin e tyre të rëndësishëm, të cilët, nëpërmjet besimit dhe bashkëpunimit, kanë përforcuar pozitën e tyre si aleat kryesor për Policinë. “Për gazetarët dhe mediat, për rolin e tyre të rëndësishëm në informimin e publikut dhe forcimin e transparencës; si dhe për partnerët tanë kombëtarë e ndërkombëtarë, bashkëpunimi me të cilët ka qenë sinergji kapacitetesh, investimesh, angazhimi dhe profesionalizmi, në funksion të garantimit të sigurisë”, vijoi Proda.

Proda nënvizoi se Policia e Shtetit është në gatishmëri për përmbushjen e detyrave, në çdo cep të vendit, për të garantuar një ndërrim vitesh të sigurt dhe të qetë.

Në fund, Proda uroi një Vit të Ri të gëzuar, shëndet, paqe dhe mbarësi!

“Bashkë, me përgjegjësi dhe besim, për të ndërtuar përgjatë vitit 2026, një vend edhe më të sigurt”, tha ai.

/e.i/j.p/

The post Proda uron festat: Qytetarët, aleati kryesor i Policisë appeared first on Agjencia Telegrafike Shqiptare.

TIRANË, 31 dhjetor/ATSH/ Presidenti i Federatës së Futbollit, Armand Duka, në prag të festës së ndërrimit të viteve uron të gjithë komunitetin shqiptar të futbollit përmes një video-mesazhi për një vit sa më të mbarë.

Në një video-urim, kreu i qeverisë së futbollit shqiptar shpreh mirënjohjen e tij për të gjithë ata që kontribuojnë çdo ditë që futbolli shqiptar të zhvillohet, ndërsa vlerëson vitin 2025 si historik për lojën tonë të bukur.

Në mesazhin e tij, Presidenti Duka përmend organizimet e suksesshme të FSHF-së, finalet e Euro U-17 dhe mbledhjen e Komitetit Ekzekutiv të UEFA-s në Tiranë, si edhe kualifikimin historik të Kombëtares shqiptare në fazën play-off të Botërorit 2026.

“Në prag të ndërrimit të viteve, dua t’i drejtohem të gjithë komunitetit të futbollit shqiptar për të shprehur mirënjohjen time të sinqertë për një vit që do të mbetet gjatë në kujtesën tonë.

Viti që po lëmë pas ka qenë një vit historik për futbollin shqiptar. Një vit ku puna, vizioni dhe përkushtimi u kthyen në rezultate konkrete. Në fushë, në organizim dhe në rritjen e gjithë sistemit tonë futbollistik”, tha ai.

“Shqipëria u konfirmua si një vend dhe partner i besueshëm për futbollin europian, duke pritur me sukses finalet e Kampionatit Europian U-17 dhe duke mikpritur për herë të parë në Tiranë Komitetin Ekzekutiv të UEFA-s. Këto ngjarje treguan se futbolli ynë ka arritur një nivel të ri profesionalizmi dhe organizimi”, u shpreh Duka.

Duka nënvizoi se emocionet më të forta i dhuroi Kombëtarja, e cila për herë të parë në histori siguroi kualifikimin në fazën play-off të Botërorit 2026.

“Një arritje që na bëri krenarë dhe që dëshmon se ëndrrat e mëdha janë të arritshme kur punohet me seriozitet dhe besim. Uroj shumë që ky rrugëtim i bukur të kurorëzohet me kualifikimin për herë të parë në finalet e Botërorit”, tha Duka.

Presidenti i FSHF-së shtoi se “gjatë këtij viti kemi vijuar të investojmë në bazat e së ardhmes: në fëmijët dhe të rinjtë, në futbollin e vajzave, në infrastrukturë dhe në mbështetjen e klubeve. Futbolli shqiptar po rritet në numra, në cilësi dhe në ndikim shoqëror”.

“Dua të falënderoj nga zemra të gjithë ata që kontribuojnë çdo ditë në këtë rrugëtim: futbollistët, trajnerët, arbitrat, drejtuesit e klubeve, stafet teknike, administratën e FSHF-së, partnerët tanë, institucionet shtetërore, qeverinë shqiptare për ndihmën e madhe dhe mbështetjen e tyre”, tha Duka.

Në mbyllje të mesazhit, Duka shtoi se me këtë frymë pozitive, hyhet në vitin 2026 me ambicie të forta për të bërë akoma më shumë, për ta çuar më përpara futbollin shqiptar dhe me një ëndërr të madhe për të qenë pjesë Botërorit 2026.

/e.i/j.p/

The post Duka uron Vitin e Ri 2026: Mirënjohje për të gjithë kontributorët e zhvillimit të futbollit appeared first on Agjencia Telegrafike Shqiptare.

TIRANË, 31 dhjetor/ATSH/ Në prag të mbylljes së vitit 2025, qyteti i Durrësit është gjallëruar mes muzikës, koncerteve dhe aktiviteteve për të gjitha grup-moshat. Sheshet dhe rrugët kryesore të qytetit janë veshur me dekore festive, ndërsa organizimet argëtuese kanë shtuar ndjesinë e festës në çdo cep të qytetit.

Migena Muhaj, drejtore pranë Drejtorisë së Arsimit, Kulturës, Rinisë, Sporteve dhe Komuniteteve Fetare në bashkinë Durrës, tha për ATSH-në se “programi i festimeve ka përfshirë një gamë të larmishme aktivitetesh, duke nisur nga panairet e Krishtlindjes dhe Panairi i Fundvitit, të cilët kanë krijuar hapësira takimi për familjet dhe vizitorët, si dhe kanë shërbyer si platforma promovimi për produktet artizanale dhe punimet tradicionale të bizneseve dhe artizanëve të Durrësit”.

“Një vend të rëndësishëm në kalendar kanë zënë edhe ekspozitat artistike, ku veçohet aktiviteti i ekspozitave “Magjia e Dhjetorit” dhe “Ekspresione Urbane”, të cilat kanë pasqyruar krijimtarinë bashkëkohore dhe frymën festive përmes formave të ndryshme të artit vizual. Një pjesë kyçe e programit kanë qenë edhe koncertet festive, si Koncerti i Rinisë dhe “Tingujt e Adriatikut” për fëmijë, të cilat kanë sjellë në skenë artistët e rinj Durrsakë, duke ofruar programe muzikore për audienca dhe grupmosha të ndryshme”, tha Muhaj.

Muhaj tha se kalendari i festimeve të dhjetorit në Durrës pasqyron angazhimin e bashkisë Durrës për të ofruar aktivitete cilësore, gjithëpërfshirëse dhe me ndikim kulturor, social dhe ekonomik, duke e kthyer qytetin në një hapësirë aktive, dinamike dhe festive gjatë gjithë muajit dhjetor.

Sipas Muhajt, programi festiv shtrihet përgjatë gjithë muajit dhjetor, duke u ndërtuar si një kalendar i vazhdueshëm aktivitetesh që i jep qytetit një atmosferë festive nga fillimi deri në ditët e para të vitit të ri.

Muhaj shtoi se kalendari i festimeve sjell disa risi të rëndësishme krahasuar me vitet e mëparshme, të cilat synojnë pasurimin e përvojës kulturore, rritjen e përfshirjes së publikut dhe forcimin e lidhjes mes artit, komunitetit dhe institucioneve vendore.

“Brenda këtij programi të zgjeruar, përqendrimi i veçantë te të rinjtë e qytetit përbën risinë më domethënëse të këtij viti. Arti pamor, teatri dhe muzika kanë zënë një vend të rëndësishëm përmes ekspozitave, shfaqjeve dhe koncerteve, duke nxitur pjesëmarrjen aktive të brezit të ri në jetën kulturore dhe duke i kthyer të rinjtë jo vetëm në spektatorë, por edhe në kontribues të drejtpërdrejtë”, vijoi ajo.

“Një vëmendje e posaçme i është kushtuar gjithashtu fëmijëve, përmes shfaqjeve artistike dhe aktiviteteve interaktive të dedikuara për ta, si dhe përmes bashkëpunimeve me kopshtet dhe shkollat e qytetit dhe të rrethit, duke e kthyer festën në një përvojë njëkohësisht edukative dhe argëtuese për brezin më të vogël”, tha Muhaj, teksa theksoi se një vëmendje e veçantë i është dhënë traditës dhe identitetit kulturor, duke ndërthurur elementë bashkëkohorë me vlerat kombëtare dhe lokale, në mënyrë që festimet të pasqyrojnë më qartë identitetin kulturor të Durrësit.

Muhaj tha se njëherësh janë parashikuar edhe masa për menaxhimin e fluksit të qytetarëve dhe vizitorëve përgjatë ditëve festive.

“Në bashkëpunim me forcat e rendit dhe policinë bashkiake, janë marrë masa për rregullimin e qarkullimit në hapësirat publike. Për aktivitetet që zhvillohen në ambiente të mbyllura, si Pallati i Sportit, galeritë apo qendrat kulturore, është marrë parasysh kapaciteti maksimal i hapësirave, në mënyrë që çdo pjesëmarrës të ketë një eksperiencë të sigurt dhe të rehatshme. Në këtë mënyrë, sigurojmë që festimet e dhjetorit të jenë të gjalla, por të menaxhueshme dhe të sigurta, duke garantuar një përvojë pozitive për të gjithë qytetarët dhe vizitorët”, përfundoi ajo.

Momente nga dhjetori festiv në Durrës

1 nga 16

/e.i/j.p/r.e/

The post Panaire, ekspozita dhe aktivitete për të gjitha grup-moshat në Durrës appeared first on Agjencia Telegrafike Shqiptare.