Të paktën 39 persona kanë humbur jetën dhe 12 të tjerë janë në kujdes intensiv pasi dy trena u përplasën në Spanjën jugore të dielën në mbrëmje, në atë që kryeministri, Pedro Sánchez, e quajti "një natë dhimbjeje të thellë për vendin".

Sipas raportimeve, një tren me shpejtësi të lartë i Iryo që udhëtonte nga Malaga në Madrid doli nga shinat pranë komunës Adamuz në provincën e Kordobas rreth orës 7.40 të mbrëmjes së së dielës, duke kaluar në shinën tjetër ku goditi një tren që po vinte përballë.

Treni i dytë, i cili operohej nga kompania shtetërore hekurudhore, Renfe, gjithashtu doli nga shinat dhe ra në një argjinaturë, thanë autoritetet.

"Rreth 300 persona ishin në bord në kohën e aksidentit", ka thënë Iryo.

Guardia Civile dhe zjarrfikësit po punojnë intensivisht në vendngjarje për të evakuuar të gjithë pasagjerët dhe kanë ngritur një ekip të përbashkët reagimi ndaj emergjencave.

Të hënën në mëngjes, shërbimet e emergjencës në Andaluzi thanë se 122 persona ishin trajtuar për lëndimet e tyre dhe 48 persona ishin ende në spital, nga të cilët 12 ishin në njësitë e kujdesit intensiv, përcjell Telegrafi.

“Ka shumë të lënduar - ende po dridhem”, ka thënë për El País, María San José, 33 vjeçe, një pasagjere në trenin që doli i pari nga shinat.

Një dëshmitar tjetër i tha transmetuesit publik RTVE se një nga vagonët e trenit të parë ishte përmbysur plotësisht.

Një pasagjer i paidentifikuar në trenin e dytë - i cili po shkonte nga Madridi në Huelva - i tha transmetuesit publik TVE: “Kishte njerëz që bërtisnin, çantat e tyre ranë nga raftet. Po udhëtoja për në Huelva me vagonin e katërt – të fundit, për fat të mirë”.

Shefi i zjarrfikësve të Kordobas, Paco Carmona, i tha TVE se ndërsa Iryo ishte evakuuar brenda pak orësh nga aksidenti, vagonët e Renfe ishin dëmtuar rëndë, me metal dhe sedilje të shtrembëruara.

Pamje nga vendi i ngjarjes ku ndodhi përplasja mes trenave – nga ku mbetën disa të vdekur në Spanjë

“Ka ende njerëz të bllokuar. Operacioni po përqendrohet në nxjerrjen e njerëzve nga zonat që janë shumë të ngushta”, tregoi ai. “Duhet të nxjerrim trupat për të arritur te kushdo që është ende gjallë. Po rezulton të jetë një detyrë e ndërlikuar”.

Ndërsa ministri i transportit i Spanjës, Óscar Puente, theksoi se shkaku i aksidentit ende nuk ishte përcaktuar.

Duke folur në një konferencë për shtyp në stacionin Atocha në Madrid, ai shtoi se ishte "shumë e çuditshme" që një dalje nga shinat të kishte ndodhur në një pjesë të drejtë të binarit. Ky seksion i binarit u rinovua në maj, tregoi ai.

Puente bëri të ditur se shumica e të vrarëve dhe të plagosurve kishin qenë në dy vagonët e parë të trenit të dytë.

Ndërkohë, një gazetar nga transmetuesi publik RNE, i cili po udhëtonte në një nga trenat, tha se impakti ishte ndjerë si një tërmet.

Pasagjerët kishin përdorur çekiçë emergjence për të thyer xhamat e vagonëve dhe për të dalë jashtë, tha ai.

Raportet e mediave spanjolle sugjeruan se 400 persona kishin qenë në dy trenat.

Imazhet televizive lokale treguan një qendër pritjeje të ngritur për pasagjerët në Adamuz, një qytet me 5,000 banorë, me vendasit që sillnin ushqim dhe batanije ndërsa temperaturat e natës luhateshin në rreth 6 gradë Celsius.

Adif ka pezulluar të gjitha shërbimet hekurudhore midis Madridit dhe Andaluzisë.

Aksidenti hekurudhor më vdekjeprurës në Spanjë këtë shekull ndodhi në korrik 2013, kur një tren që udhëtonte me 179 km/orë doli nga shinat në një pjesë të binarëve me një shpejtësi maksimale prej 50 km/orë në rajonin veriperëndimor të Galicisë, duke vrarë 80 persona. /Telegrafi/

Ka përfunduar xhiroe 20-të në elitën e futbollit zviceran, ku sërish futbollistë nga Kosova kanë lënë gjurmë.

Padyshim që vëmendja kryesore ka qenë në derbin Basel - Sion, ku sfida u mbyll baraz 1-1 dhe shumë futbollistë kosovarë ishin në fushë.

Por dyshja që shkëlqeu më shumë ishte Xherdan Shaqiri te Baseli me një asistim dhe Kreshnik Hajrizi i Sionit me një super paraqitje në mbrojtje.

Xherdan Shaqiri e Kreshnik Hajrizi më të mirët në derbin e shqiptarëve në Zvicër

Të dy futbollistët kanë zënë vend edhe në formacionin e javës në elitën e futbollit zviceran nga SofaScore.

Në formacionin e javës është edhe reprezentuesi zviceran Uran Bislimi që realizoi het-trik në fitoren e Luganos. /Telegrafi/

Dafina Zeqiri ka rishpërndarë së fundmi një postim në të cilin shfaqej ajo së bashku me Dua Lipën, në një fotografi të realizuar në vitin 2016.

Fotoja ishte publikuar fillimisht nga një fan-page i Dua Lipës në InstaStory, si pjesë e një trendi të ri që po qarkullon në rrjetet sociale.

“Meqënëse të gjithë po flasin për vitin 2016, këtu është një foto e Dua Lipës dhe e Dafina Zeqirit”, kanë shkruar faqja në postim.

Foto: Raredualiipa / Instagram

Të njëjtin postim e ka shpërndarë edhe Dafina Zeqiri në profilin e saj zyrtar në Instagram, duke e rikthyer vëmendjen te ky moment i veçantë nga e kaluara.

Fotoja i tregonte dy artistet e njohura duke pozuar të përqafuara me njëra-tjetrën.

Foto: Dafina Zeqiri / Instagram

Ndërkohë, në rrjetet sociale është shfaqur një trend i ri që rikujton vitin 2016, një periudhë që konsiderohet tejet interesante dhe e mbushur me trende të shumta të asaj kohe.

Për shumë njerëz, ai vit ka qenë kulmor, ndërsa së fundmi disa po spekulojnë se viti 2026 mund të sjellë të njëjtën frymë si viti 2016.

Nga Policia Financiare kanë dhënë detaje shtesë nga bastisjet në Negotinë, ku në murin e një shtëpie u gjetën 350,000 euro.
Nga Policia Financiare njoftojnë se objekti në Negotinë është pronë e prindërve të gjykatësit Gjoko Ristov.

“Në kuadër të një hetimi të gjerë dhe kompleks që po e udhëheq Prokuroria Themelore Publike për Ndjekjen e Krimit të Organizuar dhe Korrupsionit, Drejtoria e Policisë Financiare, me urdhër të gjyqtarit të procedurës paraprake, gjatë fundjavës së kaluar ka realizuar një bastisje në një lokacion në Negotinë".

Zbulohen 350 mijë euro të murosura te shtëpia e një gjytari të Shkupit

"Veprimet janë zhvilluar nën drejtimin e Drejtorisë së Policisë Financiare, në koordinim me prokurorin publik kompetent. Bastisja është kryer në shtëpinë e prindërve të një personi – gjyqtar në Gjykatën e Apelit në Shkup, i dyshuar për veprën penale “Fitim i kundërligjshëm dhe fshehje e pasurisë”".

"Gjatë bastisjes, në një hapësirë të veçantë të ndërtuar fshehurazi në murin e objektit, janë gjetur dhe sekuestruar rreth 350.000 euro, për të cilat ekzistojnë dyshime se rrjedhin nga veprimtari të paligjshme të lidhura me korrupsion dhe tregti me ndikim”, thuhet mes tjerash në njoftimin e Policisë Financiare.

Presidenti amerikan Donald Trump ka thënë se nuk ndien më detyrim të mendojë “thjesht për paqen”, në një letër dërguar kryeministrit të Norvegjisë, ku përpiqet të justifikojë kërcënimet e tij kundër Grenlandës.

Letra iu drejtua kryeministrit norvegjez Jonas Gahr Store dhe iu dërgua një numri ambasadash evropiane në Uashington.

Në të, Trump akuzoi Norvegjinë se kishte vendosur të mos i jepte Çmimin Nobel për Paqen, të cilin ai tha se e meritonte “për ndalimin e 8 luftërave”.

Si rezultat, ai tha: “Nuk ndiej më detyrimin të mendoj vetëm për paqen, megjithëse ajo do të jetë gjithmonë mbizotëruese, por tani mund të mendoj për atë që është e mirë dhe e përshtatshme për Shtetet e Bashkuara të Amerikës.”

Bëhet e ditur se parlamenti norvegjez emëron pesë anëtarët e Komitetit të Nobelit, por qeveria nuk e zgjedh drejtpërdrejt fituesin, shkkruan the Journal.

Javën e kaluar, fituesja e çmimit, udhëheqësja e opozitës venezueliane, Maria Corina Machado, i dhuroi Trumpit medaljen gjatë një vizite në Shtëpinë e Bardhë, por Komiteti i Nobelit këmbënguli se posedimi i medaljes nuk do të thotë të jesh laureat.

“Pavarësisht se çfarë mund të ndodhë me medaljen, diplomën apo shumën e çmimit, është dhe mbetet laureati origjinal ai që është regjistruar në histori si marrësi i çmimit”, tha komiteti në një deklaratë.

“Edhe nëse medalja ose diploma më vonë bie në zotërim të dikujt tjetër, kjo nuk e ndryshon se kush është vlerësuar me Çmimin Nobel për Paqen”, shtoi ajo.

Në letrën e tij drejtuar Store, Trump përsëriti pohimin se Danimarka, territor i së cilës është Grenlanda, nuk është në gjendje të mbrojë ishullin Arktik.

“Danimarka nuk mund ta mbrojë atë tokë nga Rusia apo Kina, dhe pse ata kanë një të drejtë pronësie gjithsesi. Nuk ka dokumente të shkruara, vetëm se një anije zbarkoi atje qindra vjet më parë, por edhe ne kishim anije që zbarkuan atje”, tha Trump.

Presidenti amerikan gjithashtu deklaroi se kishte bërë “më shumë për NATO-n se çdo person tjetër që nga themelimi i saj, dhe tani, NATO duhet të bëjë diçka për Shtetet e Bashkuara”.

“Bota nuk është e sigurt nëse nuk kemi kontroll të plotë dhe total të Grenlandës. Faleminderit! President DJT”, vazhdoi ai. /Telegrafi/

Vedat Muriqi vazhdon të jetë në qendër të vëmendjes gjatë janarit, jo vetëm për golat e shënuar.

Sulmuesi kosovar është duke pasur oferta të vazhdueshme, përkundër që ka shprehur dëshirën për të mbetur te Mallorca.

Ish-klubi i Muriqit, Fenerbahce po insiston për ta rikthyer në Stamboll sulmuesin dardan.

Mediumi turk, FotoMac ka raportuar se gjiganti nga Stambolli ka bërë një ofertë të parë në drejtim të Mallorcas prej 12 milionë eurove dhe dy klubet janë duke negociuar.

Mallorca synon të përfitojë 16 milionë euro nga shitja e Muriqit i cili këtë edicion ka shënuar 14 gola në La Liga, por dëshira e tij është të mbetet në klubin aktual.

telegrafi.com

"Jam i lumtur këtu dhe kam një kontratë. Kur një sulmues shënon shumë gola, vijnë oferta. Klubi do të vendos për të ardhmen time, pastaj unë do të marr vendimin tim", tha Muriqi të shtunën pasi shënoi het-trik ndaj Athletic Bilbaos.

Gjithnjë sipas mediave turke, e ardhmja e Muriqit pritet të vendoset deri në fund të kësaj jave nëse do të largohet nga Mallorca apo do të qëndrojë për ta thyer rekordin e Samuel Eto'o-s si golashënuesi më i mirë në histori të klubit.

Aktualisht Muriqi ka shënuar 48 gola dhe ndodhet vetëm gjashtë gola larg rekordit të kamerunasit i cili është golashënuesi më i mirë në histori të Mallorcas me 54 gola. /Telegrafi/

Burimi: The Telegraph
Përkthimi: Telegrafi.com

Nga të gjitha shpjegimet për përpjekjen e Donald Trumpin për të marrë Grenlandën, ai që në aspektin sipërfaqësor është më interesant është pohimi se presidenti ka demencë. Në atë rast, pse të mos bëjmë sikur ia japim? Ta çojmë diku në një vend që duket i gjelbër, të organizojmë një paradë ushtarake dhe t’i themi se kjo është ajo. Fantazia e senilitetit u përmbush.

Fatkeqësisht, kalbëzimi është shumë më i thellë. Trumpi nuk është i çmendur, por bën atë që Amerika gjithmonë bën - vetëm se këtë herë në mënyrë të vrazhdë dhe haptazi. Kjo u bë më e qartë këtë javë kur hasa rastësisht një kopje të Vajtimit për një komb [Lament for a Nation] nga filozofi kanadez George Grant, botuar në vitin 1965.

Grant ka shkruar në një pikë kthese në historinë e vendit të tij. Më 1957, Kanadaja zgjodhi një kryeministër konservator të quajtur John Diefenbaker, i cili nuk ishte ndryshe nga Nigel Farage apo, në fakt, Trumpi: populist, nacionalist, thellësisht kundër së majtës. Por, kur amerikanët kërkuan të vendosnin armë bërthamore në tokën e tij, Diefenbaker - për habinë time - tha jo.

Ai besonte se kishte të drejtë ta bënte këtë, sepse NATO është, në teori, një aleancë e të barabartëve - dhe, ishte e nevojshme ta bënte këtë sepse, nëse Kanadaja do të bëhej bazë për raketa, çdo pretendim për një politikë të jashtme të pavarur do të merrte fund.

Elita e biznesit dhe e kulturës u kthye kundër Diefenbakerit dhe publiku e hoqi nga detyra.

Amerika, duke u ngrohur nga shkëlqimi i Jack Kennedyt, atëherë admirohej si mishërim i modernitetit: nacionalizmi dukej i vjetruar dhe ekscentrik. Në këtë mënyrë, argumentonte Granti, dorëzimi bërthamor i Kanadasë përfaqësonte fazën përfundimtare të një procesi të asimilimit ekonomik dhe kulturor. Një shoqërie kaq të integruar në mënyrën amerikane, jo vetëm që i mungonin burimet, por, kryesorja, imagjinata për të qëndruar në këmbët e veta.

Njëjtë është me Evropën e sotme, ku korporatat amerikane dominojnë dhe përfitojnë, por gjithashtu shmangin shumë taksa. Irlanda, për shembull, me të drejtë ka dënuar luftën tarifore të Trumpit ndaj kombeve që kundërshtojnë marrjen agresive të Grenlandës, por vendi është model i nënshtrimit globalist me kosto të sovranitetit. Përqafoi tregjet e lira (taksat e ulëta për korporatat) dhe lëvizjen e lirë (migrimin masiv), me rezultatin që Dublini duket irlandez nga jashtë - ende i bukur - por, i papërballueshëm dhe i përfshirë në një krizë të dhunshme identiteti.

Këto janë politikat ekonomike të cilat elitat e tij i justifikojnë si thelbësore për ndërtimin modern të kombit (“na duhen para, na duhen punëtorë”), dhe është e habitshme që [partia] SNP ka propozuar të bëjë gjëra të ngjashme nëse Skocia fiton pavarësinë. Siç vërejti Granti në vitin 1965, shteti modern kombëtar mund të zhvillohet vetëm duke hapur krahët ndaj kapitalizmit global, por kapitalizmi global “nënkupton zhdukjen e atyre dallimeve autoktone që i japin substancë nacionalizmit”.

Me pak fjalë, kapitali amerikan na ka bërë të gjithëve të pasur, por gjithashtu na ka bërë kopje të ShBA-së. Jam i bindur se shumë britanikë janë thellësisht të palumtur, madje të sëmurë mendërisht, sepse nuk ndihen më si vetvetja.

Kjo është e dukshme në mënyrën se si flasim (keq) dhe shprehim emocione (shumë shpesh), por më së shumti në politikën tonë e cila është e importuar dhe e shkëputur nga historia jonë e vërtetë. Politika e identitetit është prodhuar në Amerikë: kur agjentët federalë qëlluan dhe vranë një protestues në Minesotë (vrasje, sipas meje), kryebashkiakët laburistë ndien detyrimin të shkruanin një letër mbështetjeje për kryebashkiakun demokrat të Mineapolisit. Pse?

Në anën tjetër, James Cleverly thotë se heroi i tij është Ronald Reagan, konservatorët e shesin jetën e mirë në terma të aspiratës reganiane, dhe memoja famëkeqe e Jenrickut, e shkruar për të planifikuar kalimin e tij te Reform-a, e përshkruan atë si “sherifin e ri në qytet”. Autori e kishte shkruar “favorit” pa “o”.

Partia ku bashkohet Robi [Jenrick] ka pikturuar veten në një qoshe, pasi vuri shpresat te qasja te Trumpi dhe tani detyrohet të shtiret sikur ka një distancë. Ja, edhe Brexit-i është kolonizuar. Jashtë Bashkimit Evropian, sipas mendimtarëve të djathtë, e vetmja shpresë është marrëveshja me Amerikën - një logjikë të cilën edhe Keir Starmer e ka përtypur, duke ndjekur përputhjen rregullatore për të ardhmen e inteligjencës artificiale.

Dikush dyshon se, për gjithë urrejtjen e laburistëve për Elon Muskun, ata nuk do ta ndalojnë kurrë Twitter-in, sepse Trumpi me shumë gjasë do të vendoste sanksione.

Nuk duhet ta shohim presidentin si joamerikan, siç e quajnë disa amerikanë të turpëruar, por si presidentin më amerikan deri sot - domethënë, liberalin përfundimtar.

Demokratët dhe republikanët, edhe pse nuk pajtohen për politikat praktike, të dy palët tërhiqen nga tradita filozofike e liberalizmit, e rrënjosur në dashurinë për lirinë individuale dhe çlirimin e pasioneve personale. Trumpi do diçka, prandaj e bën. Kjo është ajo që nënkupton liberalizmi - dhe na ka infektuar edhe neve.

Kjo është arsyeja pse në Mbretërinë e Bashkuar martesa dhe lindjet janë jashtë mode, kishat janë bosh, dhe emisioni ynë më i ndjekur në TV përfshin tradhtarë që vrasin besnikët për para (“po luan mjeshtërisht”, thonë ata, sikur marrëdhëniet njerëzore të ishin një sport konkurrues).

Nëse Britania është e thyer - dhe një vend ku shifrat e fundit tregojnë 299 614 aborte në vit, 40 për një buzë ose qiellzë të çarë, është me siguri vend i thyer - kjo është sepse miliona vetë kanë zgjedhur të maksimizojnë lirinë dhe pasurinë e tyre me koston e solidaritetit shoqëror.

Kanadaja e vjetër e John Diefenbakerit, pohonte Granti, ishte ndryshe sepse kombinonte paternalizmin konservator të Anglisë me etikën e katolicizmit francez, që thoshte se “virtyti duhet të vijë përpara lirisë”. Por, këto janë zhdukur, dhe Granti përfundoi se zhdukja e tyre ishte e pashmangshme, sepse asnjë komb nuk mund të rezistojë ndaj fuqisë së Amerikës apo tundimit të individualizmit.

Liberalizmi përfundon, nëse jo në një qeveri botërore, atëherë në një botë që duket njësoj. Çfarë hanë japonezët për Krishtlindje? KFC.

Kjo është arsyeja pse e shoh luftën tregtare për Grenlandën me shqetësim dhe, për fat të keq, pesimizëm. Po, Trumpi duhet kundërshtuar. Është çështje dinjiteti.

Mirëpo, derisa ne evropianët të shkëputemi nga Amerika - jo vetëm ushtarakisht apo ekonomikisht, por në aspektin psikologjik - ne vërtet nuk mund të funksionojmë pa të dhe do të dorëzohemi gjithmonë. Ajo na ka dominuar për një kohë të gjatë; kemi filluar ta kuptojmë vetëm kur perandoria që dikur nxiste investime ka nisur t’i thithë ato përsëri, një fenomen i cili, prapëseprapë, nuk është i veçantë për Trumpin. Joe Biden përdori subvencione dhe lehtësime tatimore për të rikthyer vendet e punës në ShBA, larg kontinentit.

Ironia është se ekzistojnë tradita të tjera, më të buta, të politikës amerikane, por ato gjithmonë janë hedhur poshtë nga evropianët si naive ose të rrezikshme, sepse nuk do të financonin mbrojtjen tonë: ajo libertariane midis republikanëve, ajo socialiste midis demokratëve. Sikur të kishim pasur president Ron Paulin apo president Bernie Sandersin, Grenlanda do të mbetej e paprekur. /Telegrafi/

Një aksion po zhvillohet në Prishtinë në koordinim mes Prokurorisë Themelore dhe Policisë së Kosovës.

Zëdhënësja e Prokurorisë Themelore në Prishtinë, Kaltrina Shala ka konfirmuar për Telegrafin se është duke u zhvilluar një aksion ndaj katër personave për vepra të ndryshme penale.

Sipas Shalës, dy persona po hetohen për veprën penale “Keqpërdorim i pozitës apo autoritetit zyrtar”, në bazë të nenit 414, paragrafi 1, të Kodit Penal të Republikës së Kosovës.

Ndërkohë, dy persona të tjerë janë nën hetime për veprën penale “Pranimi i ryshfetit në sektorin privat”, sipas nenit 309 të KPRK-së.

Zëdhënësja Shala ka shtuar se aksioni është duke vazhduar ende dhe se për më shumë detaje do ju njoftojmë me kohë. /Telegrafi/

Hakerët ndërprenë transmetimet satelitore të televizionit shtetëror iranian për të transmetuar pamje që mbështesnin Princin e Kurorës në mërgim të vendit dhe u bënin thirrje forcave të sigurisë të mos "i drejtonin armët nga populli".

Sulmi kibernetik vjen në një kohë kur numri i të vdekurve në protesta arriti në të paktën 3,919 persona të vrarë, thanë aktivistët.

Pamjet u transmetuan në shumë kanale të transmetuara me satelit nga Islamic Republic of Iran Transmeting, transmetuesi shtetëror i vendit i cili ka monopolin në transmetimet televizive dhe radiofonike, shkruan Abc News.

Videoja transmetoi dy klipe të Princit të Kurorës në mërgim Reza Pahlavi, më pas përfshinte pamje të forcave të sigurisë.

“Ky është një mesazh për ushtrinë dhe forcat e sigurisë”, shkruhej në një grafikë.

“Mos i drejtoni armët nga populli. Bashkohuni me kombin për lirinë e Iranit.”

“Kam një mesazh të veçantë për ushtrinë. Ju jeni ushtria kombëtare e Iranit, jo ushtria e Republikës Islamike”, tha Pahlavi në transmetimin e hakuar.

“Ju keni detyrë të mbroni jetën tuaj. Nuk ju ka mbetur shumë kohë. Bashkohuni me popullin sa më shpejt të jetë e mundur”, shtoi ai. /Telegrafi/

Edhe në një treg të drejtuar nga cikle të shpejta modelesh dhe inovacion të pandërprerë, disa automjete vërtetohen çuditërisht rezistente ndaj ndryshimit.

Toyota HiAce e Japonisë është ky përjashtim nga rregulli.

Ndërsa pjesa më e madhe e botës kaloi në një brez të ri në vitin 2019, ky furgon ka qenë në përdorim që nga viti 2004.

Megjithatë, pavarësisht moshës së tij, automjeti mbetet mjaftueshëm popullor në Japoni për të justifikuar praninë e tij të vazhdueshme, dhe për vitin 2026, ai merr përditësimin e tij më të plotë në më shumë se një dekadë.

Për vitin 2026, Toyota i ka mbajtur ndryshimet delikate, duke i kufizuar përditësimet e jashtme në dritat e reja.

Brenda, HiAce LCV më në fund merr një prekje më moderne.

Të gjitha variantet tani vijnë standard me një ekran me prekje që është i shoqëruar me një panel instrumentesh.

Padyshim ndryshimet më domethënëse janë në departamentin e sigurisë. HiAce i përditësuar përfiton nga paketa më e fundit Safety Sense e Toyota-s, e cila tani përfshin veçori më të përparuara të asistencës për shoferin.

Opsionet e sistemit të fuqisë janë gjithashtu të vlefshme, me një motor benzine 2.0 litra që prodhon 158 kuaj fuqi si dhe një motor nafte 2.8 litra që prodhon 149 kuaj fuqi.

Të dy motorët janë të çiftëzuar me një transmision automatik me gjashtë shpejtësi dhe ofrohen në konfigurime me tërheqje në të pasmet dhe në të katër rrotat. /Telegrafi/

Deputeti i zgjedhur i PDK-së, Nait Hasani ka reaguar lidhur me manipulimin e votave ku nga procesi i rinumërimit të disa vendvotimeve atij i janë larguar deri më tani 3 mijë e 414 vota.

Sipas tij, procesi ka shkaktuar cenim të rëndë të vullnetit të lirë të qytetarëve dhe manipulim të emrit të tij.

“Me atë që pash në rinumërim, votat e mia janë rritur në mënyrë të padrejtë, duke u përdorur emri im për manipulime të papranueshme zgjedhore. Ky veprim përbën jo vetëm shkelje ligjore, por edhe akt të rëndë moral dhe politik”, ka shkruar Hasani.

Ai refuzon çdo votë që nuk buron nga vullneti i lirë i qytetarëve dhe siguron se qëndron pranë demokracisë dhe transparencës.

“Unë refuzoj kategorikisht çdo votë që nuk buron nga vullneti i lirë i qytetarit. Nuk kam hyrë në politikë për të fituar me mashtrime, por për të fituar me besim. Nuk kam nevojë për vota të vjedhura, sepse respektoj votën e ndershme më shumë se çdo rezultat”, u shpreh Hasani.

Hasani thekson gjithashtu rëndësinë e drejtësisë dhe përkushtimin e tij për të mbrojtur të ardhmen demokratike të vendit.

“Drejtësia nuk duhet të heshtë. As unë nuk do të hesht. Unë do të vazhdoj të qëndroj në anën e qytetarëve, në anën e votës së lirë dhe në anën e së vërtetës, edhe nëse kjo rrugë është më e vështirë. Ky reagim nuk është për të mbrojtur vetëm emrin tim, por për të mbrojtur të ardhmen demokratike të Kosovës”, ka shkruar ai. /Telegrafi/

Njësia për Siguri në Trafikun Rrugor e Sektorit për Punë të Brendshme Shkup, sot do të vendosë regjim të veçantë trafiku për rrugë të caktuara në Shkup, për shkak të festës së Epifanisë.

Në qendër të Shkupit, rruga "Filip Vtori Makedonski" do të jetë e mbyllur për trafik nga kryqëzimi me bulevardin "Goce Delchev" deri në kryqëzimin me rrugën "11 Tetori" në të dy drejtimet.

Në komunën e Gjorçe Petrovit, rrugët nga kisha "Shën Pjetri dhe Pali", bulevardi "Aradhat Partizane" deri në rrugën "Gjorçe Petrov", rruga "Gjorçe Petrov" deri në rrugën "Vasil Çakalarov", si dhe nga kisha "Shën Pantelejmon", rruga "Kozle", pjesë e rrugës "Vasil Çakalarov" deri në Urën Hekurudhore në lumin Vardar do të jenë të mbyllura për trafik. Në komunën e Aerodromit, rruga lokale për në Lisiçe të Epërme dhe të Poshtme do të jetë e mbyllur për trafik.

SPB Shkup u bën thirrje të gjithë pjesëmarrësve në trafik që t'i respektojnë urdhrat e dhëna nga policët e uniformuar.

Finalja e Kupës së Kombeve të Afrikës midis Marokut dhe Senegalit mund të mos ketë ofruar lëvizje të bukura futbolli, por ofroi shumë emocione, dhe një prej tyre ishte drama e vërtetë që u zhvillua pas portës së portierit senegalez Edouard Mendy.

Marokenët u vlerësuan nga të gjithë pjesëmarrësit në Turneun Afrikan të Kombeve për organizimin e shkëlqyer të turneut, por që në gjysmëfinale, vendasit treguan mungesën e mikpritjes dhe vrazhdësinë e tyre që shihet rrallë.

Konkretisht, portieri nigerian Stanley Nwabali i fshiu dorezat me një peshqir në një moment të ndeshjes dhe e la atë pranë vijës së portës, dhe një nga rojet e sigurisë ia vodhi atë.

Të gjithë mendonin se një gjë kaq e çuditshme nuk mund të ndodhte në finale, por marokenët e çuan paturpësinë e tyre në një nivel tjetër.

Konkretisht, në mes të ndeshjes, kapiteni i Marokut, Achraf Hakimi, mori peshqirin e Mendyt dhe e hodhi pas reklamave.

Mbrojtësi i Senegalit, El Hadji, Malick Diouf, reagoi menjëherë, duke kërcyer mbi reklamat dhe duke ia kthyer peshqirin Mendyt, por ajo copë e vlefshme pëlhure u zhduk përsëri.

Në atë moment, portieri rezervë i Marokut, Yehvan Diouf, hyri në skenë dhe solli peshqirin e tij pas portës së Mendyt dhe ia dha shokut të tij të skuadrës që t’i fshinte dorezat, duke pasur parasysh se po binte shi gjatë ndeshjes.

Por trajneri i Marokut më pas e zëvendësoi mesfushorin e tij, Ismael Saibari, dhe e dërgoi atë pas portës së Senegalit për të penguar Dioufin t’ia kalonte peshqirin Mendyt.

Portieri rezervë i Senegalit arriti të anashkalonte Saibarin dhe t’ia kalonte peshqirin Mendyt, por më pas marokenët vendosën të punësonin fëmijët që presin topat.

Në një moment, gjatë aksionit maroken në gjysmën e fushës së Senegalit, katër djem sulmuan Dioufin dhe u përpoqën t’i vidhnin peshqirin disa herë.

Diouf luftoi fjalë për fjalë me fëmijët për të shpëtuar peshqirin, dhe në një moment ai madje ra në fushë ndërsa marokenët ishin përpara zonës së penalltisë së Senegalit.

Një roje sigurie ndërhyri në gjithçka, por as ai nuk arriti t’i vidhte peshqirin Dioufit.

Ju kujtojmë se Senegali fitoi në kohën shtesë me rezultatin 1:0 dhe u bë kampion i Afrikës, dhe pa asnjë dyshim portieri rezervë Diouf meriton të gjitha lëvdatat dhe një pjesë të meritës për trofeun. /Telegrafi/

Kourtney Kardashian po dëshmon se ende di të jetë shpirti i festës, edhe pa alkool, duke shijuar një ‘mocktail’.

Nëna e katër fëmijëve ndau me ndjekësit e saj se është prej tre vjetësh esëll, në një video të publikuar në Instagram Stories të premten, më 16 janar.

Kardashian, 46 vjeçe, e zbuloi këtë arritje personale gjatë festimit të lançimit të shijes më të re të kokoshkave Khloud, brend i motrës së saj Khloe.

“@Khloudfoods @KhloeKardashian patjetër ua kanë treguar që nuk kam konsumuar alkool prej 3 vjetësh”, shkroi ajo mbi videon.

Videoja tregonte themeluesen e Poosh, e cila kishte hequr dorë edhe nga Botox-i për një arsye të pazakontë, teksa trajtohej si VIP nga një shërbyes me doreza të bardha, i cili i shërbeu një sasi të kokoshkave të reja Khloud me shije trufe dhe djathë të bardhë cheddar në një gotë të madhe martini.

Drejtori i komanduar i Burgut të Durrësit, Edmond Llabani, ka pësuar hemorragji cerebrale dhe është shtruar me urgjencë në Shërbimin e Neurokirurgjisë në Qendrën Spitalore Universitare Nënë Tereza në Tiranë.

Llabani u komandua javën e kaluar në këtë detyrë, pas shkarkimit të drejtorit Indrit Cërloj, i cili edhe u arrestua më pas, i akuzuar për shpërdorim detyre, pas arratisjes së të paraburgosurit Altin Ndoci, gjatë një vizite shëndetësore në Spitalin e Durrësit.

Përveç Cërlojit u arrestuan edhe punonjës të tjerë të burgut dhe spitalit.

Llabani është profesionist në fushën e drejtësisë dhe administratës publike dhe ka përvojë të gjerë në menaxhimin e institucioneve të ngjashme, shkruan A2CNN. Më parë ka drejtuar Burgun e Peqinit. (A2 Televizion)

Pas tragjedisë së rëndë të ndodhur këtë të diel në Adamuz, Spanjë, ku përplasje e dy trenave ka shkaktuar mbi 30 viktima, Kryeministri i Shqipërisë, Edi Rama, ka shprehur ngushëllimet e tij.

Në një status në X, Rama i drejtohet këtë të hënë drejtpërdrejt kryeministrit spanjoll, Pedro Sánchez, duke shkruar: “I dashur Pedro @sanchezcastejon, Kam marrë me trishtim të thellë lajmin për aksidentin tragjik hekurudhor që ndodhi në Adamuz. Në emër të popullit të Shqipërisë dhe në emrin tim, dua të shpreh ngushëllimet më të sinqerta për familjet e viktimave dhe solidaritetin tim me popullin dhe Qeverinë e Spanjës në këtë moment dhimbjeje. Mendimet tona janë me ata që kanë humbur të dashurit e tyre dhe me të gjitha ekipet që po punojnë pa pushim për t’u përgjigjur kësaj tragjedie”. /Euronews.al/

Shkalla e lindjeve në Kinë ka rënë në nivelin më të ulët që nga themelimi i Republikës Popullore në vitin 1949, sipas një raporti të hënën.

Të dhënat zyrtare të publikuara nga Byroja Kombëtare e Statistikave treguan se lindjet ranë në 5.6 për 1.000 banorë vitin e kaluar, me numrin total të të porsalindurve që ranë në 7.9 milionë, një rënie e ndjeshme prej 1.6 milionësh dhe më e larta që nga viti 2020, raportoi Bloomberg.

Rënia e uli popullsinë e përgjithshme të Kinës me 3.4 milionë, duke shënuar rënien e katërt vjetore radhazi.

Shifrat i dhanë goditje përpjekjes së Pekinit për një shoqëri "miqësore ndaj fertilitetit" nën presidentin Xi Jinping, edhe pse autoritetet nxisin subvencione në para të gatshme, zgjatjen e lejes prindërore dhe stimuj të tjerë.

Kina gjithashtu regjistroi numrin e saj më të ulët të martesave që nga viti 1980 në vitin 2024, me vetëm 6.1 milionë çifte që lidhën kurorë, një rënie prej 20.5 për qind nga viti 2023 ndërsa shkalla e divorcit u rrit me 1.1 për qind.

Presionet demografike të vendit u thelluan ndërsa normat e ulëta të lindjeve vazhduan, të nxitura nga më pak gra në moshë lindjeje, së bashku me vonesën në martesë dhe prindërimin midis brezave të rinj për shkak të presioneve sociale dhe ekonomike.

Pekini ka zbatuar politika për të kundërshtuar rënien e normave të martesave dhe lindjeve, por ato ende nuk kanë treguar efekte të rëndësishme.

Popullsia e Kinës ishte 1.4 miliardë në vitin 2024, duke shënuar rënien e tretë vjetore radhazi që nga viti 2021. /AA/

I rëndësishëm në strukturën mbrojtëse të Juventusit, ndikimi i Pierre Kalulu nuk ka kaluar pa u vënë re në tregun e transferimeve.

Mediat italiane kanë zbuluar tashmë tre klube të Ligës Premier që po ndjekin me interes situatën e mbrojtësit francez në prag të afatit kalimtar së verës.

Çdo afat kalimtar sjell spekulime dhe zhvillime të shumta rreth planeve të klubeve më të mëdha të futbollit evropian.

Këtë herë, vëmendja është përqendruar te Juventusi, i cili vjen pas një ndalese të papritur në Serie A, pas humbjes ndaj Cagliarit.

Sa i përket organikës, drejtuesit bardhezinj janë të kënaqur me paraqitjet dhe autoritetin e treguar nga një prej shtyllave të repartit defensiv.

Bëhet fjalë për Pierre Kalulu (25 vjeç), i cili është shndërruar në një element kyç në skemat taktike të ekipit torinez.

Edhe pse kontrata e tij me Juventusin është e vlefshme deri në verën e vitit 2029, forma e shkëlqyer e francezit ka tërhequr vëmendjen e disa klubeve angleze për afatin e ardhshëm të transferimeve.

Sipas asaj që raporton CalcioMercato, Aston Villa, Tottenham Hotspur dhe Manchester United janë të interesuara për të siguruar shërbimet e mbrojtësit në verë.

Një garë e trefishtë që mund të shkaktojë shqetësim në kampin bardhezi, duke qenë se Kalulu konsiderohet një lojtar që po fiton gjithnjë e më shumë vlerë në tregun evropian. /Telegrafi/

Basketbollisti slloven Luka Doncic u rikthye në fushë pas mungesës në ndeshjen e fundit për shkak të një dëmtimi në ijë, dhe menjëherë u shndërrua në një nga protagonistët kryesorë të fitores së Los Angeles Lakers.

Lakers mposhtën Toronto Raptors në shtëpi me rezultatin 110:93, duke shënuar fitoren e tyre të 25-të të sezonit.

Doncic dhe Deandre Ayton ishin më të mirët te Lakers, duke shënuar nga 25 pikë secili. Ayton regjistroi edhe 13 kërcime, ndërsa Doncic shpërndau 7 asistime.

LeBron James shtoi 24 pikë për skuadrën e tij. Tek Raptors, Scottie Barnes, lojtari më i dalluar i sezonit, kontribuoi me 22 pikë dhe 9 ribaunde.

Me këtë fitore, Lakers renditen në vendin e gjashtë në Konferencën Perëndimore me rekord 25-16, duke vazhduar luftën për një vend të drejtpërdrejtë në playoff.

Rezultatet:

Memphis - Orlando 126:109

Houston - New Orleans 119:110

Denver - Charlotte 87:110

- YouTube www.youtube.com

Sacramento - Portland 110:117

- YouTube www.youtube.com

Lakers - Toronto 110:93

- YouTube www.youtube.com