Ambasada e Kosovës në Zagreb ka njoftuar se po e ndjek me kujdes situatën në pikat kufitare të Kroacisë me Serbinë dhe Malin e Zi. Situata aktualisht konsiderohet stabile.
"Pas bisedës telefonike mes ministrit të Punëve të Brendshme të Kosovës, Xhelal Sveçla, dhe ministrit kroat, Davor Božinović, u vendos që të gjitha sportelet në kalimet kufitare të Kroacisë të jenë të hapura, duke lehtësuar lëvizjen e qytetarëve", thuhet në njoftim.
Megjithatë, Ambasada paralajmëron se procedurat mund të jenë më të ngadalta për shkak të hyrjes në fuqi të Sistemit Evropian të Hyrjes/Daljes (EES) më 12 tetor 2025, një sistem digjital që regjistron hyrjet dhe daljet e shtetasve të vendeve të treta në zonën Shengen.
Ambasada u uron të gjithë qytetarëve që udhëtojnë drejt Kosovës për festat e fundvitit rrugë të mbarë, shëndet dhe festa të gëzuara. /Telegrafi/
Më 21 dhjetor 2017, gjykata e parë penale ndërkombëtare ad hoc e themeluar nga Kombet e Bashkuara që nga gjykatat e Nurembergut dhe Tokios pas Luftës së Dytë Botërore përfundoi punën e saj. Gjykata Penale Ndërkombëtare për Ish-Jugosllavinë, GJPNJ, e mbajti ceremoninë e saj të mbylljes në Sallën historike të Kalorësve në Hagë, ku morën […]
Kroacia ka nënshkruar marrëveshje kornizë në vlerë 125 milionë euro për prokurimin e një sistemi për mbrojtje nga mjetet ajrore pa pilot.
Zëvendëskryeministri dhe ministri i Mbrojtjes së Kroacisë, Ivan Anushiç dhe presidenti i Bordit drejtues të kompanisë “Konçar” Gordan Kolak nënshkruan marrëveshjen kornizë, me të cilin Forcat e Armatosura Kroate do të forcojnë mbrojtjen e infrastrukturës ushtarake dhe do t’u përgjigjen kërcënimeve në rritje të sigurisë ndërsa dorëzimi është planifikuar deri në vitin 2027.
“Kjo është marrëveshje kornizë pesëvjeçare midis Ministrisë së Mbrojtjes së Kroacisë dhe kompanisë Konçar Digital d.o.o., e cila nis një projekt zhvillimi shumëfazësh për të pajisur Forcat e Armatosura të Kroacisë me sisteme anti-dronë si përgjigje ndaj kërcënimeve në rritje të sigurisë dhe përdorimit gjithnjë e më intensiv të mjeteve ajrore pa pilot në operacionet moderne ushtarake”, njoftoi Ministria Kroate e Mbrojtjes.
Vlera e marrëveshjes është 125 milionë euro pa TVSH-në ndërsa dorëzimi i sistemit është planifikuar për vitin 2027.Si pjesë e projektit, është planifikuar të blihen katër sisteme anti-dronë, dy sisteme stacionare të destinuara për të mbrojtur infrastrukturën kritike ushtarake dhe dy sisteme mobile të integruara në automjete për nevojat e brigadës së mesme të këmbësorisë.
Anushiç shprehu kënaqësinë për nënshkrimin e kësaj marrëveshjeje të rëndësishme. “Kompanitë vendase, njohuritë vendase dhe njerëzit vendas janë të përfshirë në zhvillimin e këtij projekti të madh, i cili është padyshim e ardhmja e sigurisë dhe luftës ofensive”, tha ai.
Sipas tij, bëhet fjalë për katër sisteme të mëdha mbrojtjeje kundër dronëve që do të zhvillohen nga kompanitë kroate. “Sistemi është provuar dhe testuar, është me cilësi të lartë dhe së shpejti infrastrukturat tona kritike ushtarake do të mbrohen nga ky sistem. Bëhet fjalë për një brez të ri sistemesh mbrojtjeje që do ta zbatojmë në infrastrukturën tonë kritike”, tha Anushiç.
Anushiç sqaroi se së bashku me bartësit e projektit, kompaninë kroate “Konçar” dhe kompaninë polake APS, në zbatim do të përfshihen edhe kompani të tjera kroate, përfshirë “Orqa”, e cila është përgjegjëse për ofrimin e sistemit të inteligjencës artificiale.
Ai theksoi se fokusi i industrisë kroate të mbrojtjes është te dronët dhe mbrojtja kundër dronëve, të cilat aktualisht janë të domosdoshme në luftën moderne. “Kroacia, së bashku me Holandën dhe Letoninë, është kombi kryesor në Bashkimin Evropian në prodhimin dhe shpërndarjen e dronëve FPV”, tha ministri kroat.
Gordan Kolak shprehu kënaqësinë për nënshkrimin e marrëveshjes për zhvillimin e një sistemi të ri mbrojtës kundër dronëve, teknologjikisht të përparuar, duke theksuar se është produkt kroat dhe një zgjidhje që po zhvillohet brenda industrisë vendase.
“Ky projekt tregon se ‘Konçar’ po zhvillon vazhdimisht aftësitë e tij dhe po ndërton të ardhmen mbi zbatimin e teknologjive të reja”, tha ai.
Kompania Konçar Digital d.o.o. në këtë projekt vepron si integruese e sistemit dhe prodhuese e një pjese të pajisjeve të kompanisë polake Advanced Protection Systems (APS). Si rezultat, një pjesë e prodhimit të sistemit “SKYctrl” është zhvendosur në Kroaci, gjë që mundëson transferimin e njohurive, forcimin e kapaciteteve profesionale dhe teknologjike lokale si dhe mirëmbajtjen dhe mbështetjen afatgjatë të sistemit.
Pajisja me sisteme anti-dronë është një hap strategjik përpara në zhvillimin e aftësive mbrojtëse kombëtare, forcimin e bazës industriale dhe teknologjike vendase. Një qasje e tillë lejon mbështetje më të fortë për kompanitë kombëtare, kapacitetet kërkimore dhe zhvillimore si dhe forcimin e sigurisë së Kroacisë në planin afatgjatë.
Prokurimi i sistemeve kundër dronëve është pjesë e procesit të vazhdueshëm të modernizimit të Forcave të Armatosura Kroate dhe përshtatjes ndaj sfidave të reja të sigurisë në mjedisin rajonal dhe global.
Një tërmet me magnitudë 4.0 u regjistrua sonte në orën 23:07 në Detin Adriatik pranë Mletit, konfirmoi Shërbimi Sizmologjik i Kroacisë.
"Sonte, më 17 dhjetor 2025, në orën 23:07, sizmografët e Shërbimit Sizmologjik regjistruan një tërmet mjaft të fortë me epiqendër në Detin Adriatik pranë ishullit të Mletit. Magnituda e tërmetit ishte 4.0 në shkallën Rihter, dhe intensiteti në epiqendër u vlerësua në V gradë në shkallën EMS. Tërmeti u ndje në Bregun e Dubrovnikut", tha Shërbimi Sizmologjik në një deklaratë.
Më parë, EMSC raportoi një tërmet pranë Mletit, duke deklaruar se magnituda ishte 3.9, transmeton Telegrafi.
Epiqendra ishte në koordinatat 42.657 gjerësi veriore dhe 17.618 gjatësi lindore, në një thellësi prej një kilometri.
Njerëzit kanë lënë gjithashtu një numër dëshmish rreth tërmetit në faqen e internetit të EMSC.
Në Babino Pole në Mletit dikush shkroi: "Ishte vërtet i fortë, por për fat të mirë nuk zgjati aq shumë".
Një përdorues tjetër nga Babino Pole raportoi: "U drodh mjaft mirë dhe zgjati shumë".
Në Ston, një dëshmitar përshkroi se dëgjoi fillimisht një gjëmim të fortë, të ndjekur nga kërcitja e xhamit në derë dhe një "lëvizje të lehtë horizontale", duke vënë në dukje se nuk kishte dëme.
Në Shipanska Luka (Slano), një person shkroi: "U drodh një shtëpi prej guri".
Në Orashac, dikush raportoi se tërmeti ishte i shkurtër dhe i dobët, por se "dekorimet në pemën e Krishtlindjeve u drodhën pak", duke vënë në dukje se nuk vuri re ndonjë dëm. /Telegrafi/
Kroacia nënshkroi një marrëveshje me Gjermaninë të mërkurën për të blerë 44 tanke Leopard 2A8 gjatë vizitës së kryeministrit kroat Andrej Plenkoviq në Berlin.
Sipas mediave të huaja, përcjell Telegrafi, duke folur pas ceremonisë së nënshkrimit, kancelari Friedrich Merz shprehu mirënjohje për vendimin e Kroacisë.
"Ju falënderoj sinqerisht për këtë besim", tha Merz. "Kjo i fuqizon forcat tona të armatosura si aleatë të NATO-s dhe i integron ato pa probleme dhe në mënyrë efikase përmes sistemeve tona. Kjo nuk ka qenë kurrë më e rëndësishme se sot".
"Kjo tregon se ne qëndrojmë së bashku në BE dhe në NATO. Por gjithashtu tregon se kemi mjetet për t'iu përgjigjur kërcënimeve aktuale nga Rusia dhe të tjerët ndaj sigurisë dhe integritetit tonë", shtoi Merz.
Në anën tjetër, Plenkoviq ka theksuar rëndësinë e blerjes së tankeve të përparuara Leopard për vendin e tij, duke vënë në dukje se Kroacia do të vazhdojë të modernizojë forcat e saj të armatosura, duke përfituar nga programet e mbrojtjes të sapokrijuara të BE-së dhe duke kontribuar në përpjekjet e përbashkëta të mbrojtjes.
"Ky është një hap i rëndësishëm kur bëhet fjalë për transferimin e teknologjisë në Kroaci, për kalimin në teknologjinë perëndimore, ku ne mund të vazhdojmë të forcojmë bashkëpunimin në fushën e mbrojtjes dhe sigurisë - për shembull me kompaninë DOK-ING dhe të tjera", ka thënë ndër tjerash ai. /Telegrafi/
Këshilltarja e Dubrovnikut Viktorija Knežević ka ngritur çështjen nëse Kroacia mund të padisë Shqipërinë për mbeturinat që përfundojnë në bregdetin kroat. Sipas një artikulli të medias kroate JUGinfo.hr, ajo thekson se, edhe pse teorikisht e mundur, një padi do të ishte shumë e vështirë për shkak të natyrës së ndërlikuar të lëvizjes së mbetjeve detare. Më […]
Dje, në sheshin Ban Jelaçiq në Zagreb, një burrë shkeli mbi trëndafilat e vendosur në kujtim të grave të vrara gjatë "Meshës së Heshtur".
Trëndafilat u vendosën si pjesë e një aksioni në të cilin artistja Arijana Lekiq Fridrih ka paralajmëruar publikun për pozicionin e grave, cenueshmërinë e tyre dhe ekspozimin ndaj dhunës në shoqërinë kroate për tre vitet e fundit.
Videoja u shfaq në mediat sociale dhe me sa duket tregon Toni Kumerle, një anëtar të grupit rock të Zagrebit, Izlet, transmeton Telegrafi.
Duket se i njëjti burrë mori pjesë së fundmi edhe në tubimet e lutjes së katolikëve radikalë në sheshin Ban Jelaçiq.
Në fakt, fotot nga ato ngjarje u publikuan në profilin e grupit të tij dhe ai u pa gjithashtu duke mbajtur një banderolë të madhe të Virgjëreshës Mari.
Në foto, ai është i veshur me të njëjtat rroba si burri në video duke shkelur mbi trëndafilat.
Gjatë incidentit, rojet e sigurisë dhe policia ishin të pranishme për të siguruar tubimin e besimtarëve të organizuar nga vëllazëria Kalorës të Zemrës së Papërlyer të Marisë, por askush nuk ndërmori asnjë veprim.
Pasi shkeli për herë të parë mbi trëndafilat e vendosur në kujtim të grave të vrara, me sa duket duke u siguruar që të shkelte mbi secilën prej tyre, një kalimtar iu afrua dhe - sipas asaj që mund të dëgjohet dhe shihet në videon që qarkullon në rrjetet sociale - e paralajmëroi për sjelljen e tij.
Pavarësisht kësaj, burri shkeli përsëri mbi trëndafila dhe më pas u kthye te lutëset e tjera. /Telegrafi/
Në rrjetet sociale sot është shpërndarë një video ku një polic kroat në një automjet policie rreh një burrë të arrestuar, ndërsa kolegët ia mbyllin dyert e automjetit. Siç shihet në video, i arrestuari është lidhur me pranga.
Nga Drejtoria e Policisë Split-Dalmaci kanë konfirmuar se videoja është bërë sot në Tril.
Ata thonë se policët nga Stacioni Policor Sinj, sipas urdhrit të Prokurorisë Rajonale, po punonin për sjelljen e të akuzuarit. Policia thotë se burri i arrestuar fillimisht e sulmoi verbalisht, e më pas edhe fizikisht policin. Kjo nuk shihet në video, raporton index.hr.
“Pas sulmit, punonjësi i policisë ka përdorur mjete detyruese ndaj personit – forcë fizike dhe mjete lidhëse. Gjatë prangosjes së personit ka ndodhur ngjarja që shihet në video”, thonë nga Drejtoria e Policisë Split-Dalmaci.
Ata shtojnë se kanë informuar prokurorinë dhe po zhvillojnë një hetim kriminalistik.
Policia thotë se i arrestuari nuk ka lëndime të dukshme, por për shkak të rrethanave është dërguar për kontroll mjekësor. /Telegrafi/
TIRANË, 1 dhjetor/ATSH/ Ekstradohet nga Kroacia, një 55-vjeçar, i cili akuzohet nga GJKKO-ja, si pjesëtar i një organizate kriminale që i ka shkaktuar shtetit, dëm të konsiderushëm ekonomik, nëpërmjet kontrabandës së mallrave për të cilat paguhet akcizë.
Policia njoftoi se në vijim të bashkëpunimit të ngushtë ndërmjet specialistëve të Drejtorisë së Interpolit, me homologët në Kroaci, u finalizua procedura për ekstradimin në Shqipëri, të shtetasit E. Sh., 55 vjeç, lindur në Maqedoninë e Veriut.
Ky shtetas ishte shpallur në kërkim ndërkombëtar pasi Gjykata e Posaçme e Shkallës së Parë për Korrupsionin dhe Krimin e Organizuar, me vendimin e datë 27.05.2025, i ka caktuar masën e sigurisë “Arrest në burg”, për veprat penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”, kryer në formën e veçantë të bashkëpunimit, atë të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Shtetasi E. Sh. akuzohet se në bashkëpunim me shtetas të tjerë, duke vepruar si organizatë kriminale, ka kontrabanduar mallra (cigare) për të cilat paguhet akcizë. Me këtë veprimtari, ata i kanë shkaktuar shtetit shqiptar, dëm ekonomik 366 034 540 lekë.
Shtetasi i ekstraduar iu dorëzua Drejtorisë së Përgjithshme të Burgjeve, për ekzekutimin e vendimit të Gjykatës.
Gazetari investigativ kroat, Domagoj Margetiq, ka dhënë një intervistë për Balkan Talks në Euronews Albania, ku ka folur mbi shkrimin e tij të fundit investigativ që e lidh presidentin serb, Aleksandar Vuçiq, me një grup snajperistësh gjatë luftës në Bosnje e Hercegovinë.
Margetiq ka bërë të ditur se hetimi i tij përfshin dëshmi dhe dokumente që tregojnë përfshirjen e Vuçiqit në një njësi paraushtarake serbe, e cila vepronte pranë Sarajevës.
Sipas tij, kjo njësi paraushtarake udhëhiqej nga Mirko Blagojeviq dhe kishte leje të veçanta kalimi nga institucionet serbe të kohës.
Ai thotë se Vuçiq shoqëronte të ashtuquajturit “klientë” dhe mbante një mjet identifikimi të shërbimeve sekrete serbe.
“Në afërsi të Sarajevës, ata udhëhiqeshin nga njerëz të një njësie paraushtarake. Ajo që zbulova është se Vuçiq ishte një nga ata që shoqëronte ‘klientët’ dhe mbante identifikim të shërbimeve sekrete serbe. Mirko Blagojeviq ka thënë se Vuçiq ishte ai që mundësonte lëvizjen e tyre”, tha Margetiq.
Ai po ashtu bëri të ditur se informacionet e mbledhura vijnë nga ish-pjesëtarë të forcave paraushtarake serbe dhe nga ushtarë që kanë marrë pjesë në atë periudhë.
“Kjo ‘safari’ drejtohej nga Sllavko Aleksiq dhe Vuçiq ishte pjesë e njësisë”, tha ai, duke theksuar se në raportin e tij nuk ka fajësuar qytetarët serbë, por individët e përfshirë në aktivitetet e paligjshme.
Deklaratat e Margetiqit kanë shkaktuar reagime të shumta në rajon, duke rikthyer vëmendjen te aktivitetet paraushtarake gjatë rrethimit të Sarajevës dhe rolin e zyrtarëve të sotëm në ngjarjet e luftës. /Telegrafi/
Në qytetin kroat të Rijekës ka ndodhur një incident në një zonë ku po kryhen punë ndërtimi dhe mirëmbajtjeje, ku një automjet privat ka rënë në një gropë që ishte krijuar brenda kantierit.
Sipas raportimeve të para, ngjarja ndodhi në një segment të rrugës ku është vendosur rregullimi i përkohshëm i trafikut për të lehtësuar punimet dhe për të siguruar një rrjedhshmëri më të sigurt të qarkullimit.
Qendra e trafikut në Rijekë ka bërë të ditur se kjo është një zonë ku drejtuesit e automjeteve duhet të tregojnë kujdes të shtuar, pasi pengesat, shenjat dhe sinjalistika janë vendosur në mënyrë të qartë për të paralajmëruar për punimet në rrugë.
Autoritetet theksojnë se shenjat dhe pengesat nuk vendosen kot, por janë pjesë e masave të sigurisë, dhe se mosrespektimi i tyre, edhe në masë të vogël, mund të çojë në aksidente si ky i fundit, raporton index.hr.
Sipas informacionit jozyrtar që qarkullon për momentin, fatmirësisht askush nuk është lënduar rëndë gjatë këtij incidenti, por ngjarja shërben si një paralajmërim për të gjithë drejtuesit e automjeteve që të tregojnë kujdes maksimal në zonat ku po kryhen punime. Policia dhe ekipet e emergjencës kanë mbërritur menjëherë në vendngjarje për të ndihmuar dhe për të siguruar largimin e automjetit nga gropa.
Autoritetet lokale po shqyrtojnë gjithashtu mundësinë e përmirësimit të sinjalistikës dhe të masave të sigurisë në zonat e punimeve, në mënyrë që ngjarje të tilla të mos përsëriten në të ardhmen.
Drejtuesit e automjeteve këshillohen të respektojnë gjithmonë shenjat e trafikut dhe të ngadalësojnë në zonat ku ka punime, për të shmangur aksidente dhe për të garantuar sigurinë e tyre dhe të pjesëmarrësve të tjerë në trafik. /Telegrafi/
Ministri i Mbrojtjes i Kroacisë, Ivan Anushiq, në komemoracionin për mbrojtësit dhe civilët kroatë të vrarë dhe të zhdukur në mbrojtjen e Lasllovës, foli për shërbimin ushtarak i cili së shpejti do të rikthehet në këtë vend.
Anushiq u ndal posaçërisht te pamja e personave që do të vijnë për ta kryer shërbimin ushtarak.
“Do të duhet të qethen, por jo krejtësisht tullac. Nuk mund të kenë flokë deri te supet dhe të jenë në ushtri. Flokët e gjata dhe mjekra paraqesin problem në aktivitetet e përditshme ushtarake, në kushte luftarake, në higjienë dhe në mbajtjen e pajisjeve. Ushtari duhet të duket i rregullt dhe i përshtatshëm. Kjo është baza e disiplinës, ndërsa disiplinë është baza e ushtrisë. Kjo nuk është ekskursion”, deklaroi ai.
Këto deklarata kujtojnë në mënyrë të pashmangshme kolegun e tij nga SHBA, Pete Hegseth, i cili disa herë ka theksuar se do t’u ndalojë ushtarëve të ushtrisë amerikane të mbajnë mjekra.
Gjatë kësaj ngjarje, ministri iu referua edhe paralajmërimit të kryetarit të Zagrebit, Tomislav Tomaševiq, se do të ndalojë koncertin e këngëtarit kontrovers kroat Marko Perkoviq.
“Nuk shoh arsye që sot t’i ndalohet dikujt mbajtja e koncertit, veçanërisht dikujt koncertet e të cilit deri tani i kanë ndjekur gjysmë milioni njerëz”, tha ministri kroat i mbrojtjes. /Telegrafi/
KROACI- Ministrja për Europën dhe Punët e Jashtme Elisa Spiropali u prit mëngjesin e sotëm nga Presidenti i Kroacisë Zoran Milanović. Në fokus të takimit bilateral ishte perspektiva europiane dhe mbështetja e Kroacisë për integrimin e shpejtë të Shqipërisë në BE.
Gjatë takimit, Spiropali falenderoi presidentin kroat për mbështetjen politike dhe teknike që Kroacia vijon t’i japë Shqipërisë në rrugën drejt anëtarësimit.
Eksperienca e Kroacisë përgjatë anëtarësimit në BE, sipas Spiropalit, tregon se reformat serioze dhe diplomacia proaktive japin rezultate konkrete dhe Shqipëria është e vendosur të ndjekë të njejtën rrugë.
Presidenti kroat vlerësoi angazhimin e Shqipërisë dhe kontributin e saj për paqen, sigurinë dhe stabilitetin rajonal, duke veçuar partneritetin mes dy vendeve për sigurinë e përbashkët.
Postimi i Spiropalit:
Nder dhe kënaqësi pritja nga Presidenti i Republikës së Kroacisë, Zoran Milanović, për integrimin e shpejtë dhe të merituar të Shqipërisë në BE, për sigurinë e përbashkët, si dhe për vlerat që e bëjnë marrëdhënien tonë, pikë referimi në të gjithë rajonin.
Mot i ashpër me temperatura të ulëta dhe reshje bore po godet Ballkanin.
Reshje të dendura bore kanë rënë gjatë orëve të fundit, veçanërisht në Sarajevë dhe në të gjithë Bosnjën dhe Hercegovinën, si dhe në Kroaci, Serbi dhe pjesë të tjera të rajonit.
Në kryeqytetin boshnjak, mediat rajonale raportuan se trafiku ishte i paralizuar për orë të tëra, me ekipe punëtorësh të vendosura për të pastruar rrugët nga bora.
Siç raportohet, në Bosnje janë regjistruar aksidente trafiku shkaku i motit të keq.
Edhe në Kroaci bora ka shkaktuar probleme serioze në trafikun rrugor.
Autoritetet kanë këshilluar drejtuesit e veturave që të përgatiten paraprakisht dhe të mos nisen në udhëtime pa kontrolluar gjendjen e rrugëve dhe pajisjet dimërore, për të shmangur situata të rrezikshme në rrugë.
Në Maqedoninë e Veriut, Shqipëri e Kosovë janë regjistruar shira të rrëmbyeshëm. /Telegrafi/
Dëbora që po bie sot në të gjithë Kroacinë po shkakton probleme serioze në trafikun rrugor, duke bllokuar disa akse dhe duke e bërë lëvizjen e automjeteve të vështirë.
Faqja meteorologjike Crometeo ka publikuar një video nga zonat pranë Splitit dhe Klisit, ku shihet se disa vetura kanë ngecur në dëborë, duke krijuar situata të vështira për drejtuesit e makinave dhe duke shkaktuar vonesa të konsiderueshme në rrugë.
“Takimi vjetor i adhuruesve të gomave verore pranë Splitit,” shkruan faqja pranë videos së publikuar, duke ironizuar mbi faktin se shumë drejtues nuk e kanë marrë seriozisht nevojën për goma dimërore, pavarësisht kushteve të motit.
Edhe pse Dalmacia zakonisht nuk përfshihet në zonat ku pajisjet dimërore të veturave janë të detyrueshme nga 15 nëntori deri më 15 prill, kjo detyrë bëhet e detyrueshme sapo shpallen kushtet dimërore.
Kjo ndodh kur ka prezencë të dëborës ose akullit në rrugë, duke rritur ndjeshëm rrezikun e aksidenteve në qarkullim, raporton index.hr.
Me pajisje dimërore nënkuptohen goma dimërore të tipit M+S ose katër goma verore me të paktën 4 mm profil, si dhe zinxhirë dëbore që duhet të jenë gjithmonë të gatshëm për t’u vendosur në rrotat e makinerisë që lëviz.
Autoritetet këshillojnë drejtuesit e makinave që të përgatiten paraprakisht dhe të mos nisen në udhëtime të gjata pa kontrolluar gjendjen e rrugëve dhe pajisjet dimërore, për të shmangur situata të rrezikshme në rrugë. /Telegrafi/
Një gazetar investigativ kroat ka paraqitur një padi te prokurorët e Milanos kundër presidentit serb, Aleksandar Vuçiq, për përfshirjen e tij të dyshuar në “Sarajevo safari”, në të cilën njerëzit dyshohet se udhëtuan në kryeqytetin boshnjak për të vrarë civilë gjatë rrethimit katërvjeçar të qytetit në vitet 1990.
Javën e kaluar, prokurorët e Milanos nisën një hetim që synonte identifikimin e italianëve të dyshuar për përfshirje në këtë ngjarje, të akuzuar për vrasje me dashje të rënduar nga mizori dhe motive të shëmtuara.
Sipas hetuesve, grupe “turistësh snajperistë” dyshohet se kanë marrë pjesë në vrasjet masive në kodrat përreth Sarajevës, duke qëlluar mbi popullsinë për kënaqësi.
Ndryshe, më shumë se 10,000 njerëz u vranë në Sarajevë nga bombardimet dhe zjarri snajper midis viteve 1992 dhe 1996 në atë që ishte rrethimi më i gjatë në historinë moderne, pasi Bosnja dhe Hercegovina shpalli pavarësinë nga Jugosllavia.
Snajperistët ishin ndoshta elementi më i frikshëm i jetës nën rrethim në Sarajevë, sepse ata qëllonin pa dallim njerëzit në rrugë, përfshirë fëmijët.
Hetimi filloi nga një ankesë ligjore e paraqitur nga Ezio Gavazzeni, një shkrimtar me bazë në Milano i cili mblodhi prova mbi akuzat, si dhe një raport të dërguar prokurorëve nga ish-kryetarja e bashkisë së Sarajevës Benjamina Kariq.
Gavazzeni tha se kishte lexuar për herë të parë raportet rreth turistëve të dyshuar si snajperistë në shtypin italian në vitet 1990, por vetëm pasi pa Sarajevo Safari , një dokumentar i vitit 2022 nga regjisori slloven Miran Zupaniq, filloi të hetonte më tej.
Për akuzat kanë reaguar media të shumta ndërkombëtare si Daily Mail dhe gazeta britanike The Telegraph.
Artikulli i Telegraph paraqiti gjithashtu dëshminë e Michael Giffoni, zëvendëskryetar i misionit diplomatik italian në Bosnjë dhe Hercegovinë, i cili tha se në vitin 1994 i ishte thënë se ekzistonin "Safari".
"E dini, organizohen safari. Shumë njerëz të pasur vijnë këtu - disa janë gjuetarë, të tjerë janë biznesmenë. Ushtria dhe formacionet paraushtarake i çojnë ata në kodra mbi Sarajevë dhe paguajnë për këtë", tha Giffoni.
Së fundmi edhe the Guardian shkroi një artikull lidhur me akuzat ndaj Vuçiqit. /Telegrafi/
Me pensionet, strehimin social, përfitimet e papunësisë, kujdesin mjekësor dhe mbështetjen për personat me aftësi të kufizuara, Evropa ka një nga sistemet më të mira të mbrojtjes sociale në botë.
Por, cilat vende të BE-së janë më bujare kur bëhet fjalë për shpenzimet publike?
Të gjitha vendet e BE-së rritën shpenzimet për mirëqenie në vitin 2024, sipas të dhënave të Eurostat-it, me një rritje globale prej gati 7 për qind, duke çuar buxhetin total social të bllokut në pothuajse 5 trilion euro.
Në krahasim me GDP-në e tyre, shpenzimet mesatare për përfitimet sociale janë tani rreth 27 për qind në të gjithë bllokun.
Por, normat ndryshojnë shumë nga një vend në tjetrin, raporton euronews.
Finlanda, Franca dhe Austria janë anëtarët më bujarë të BE-së, secili duke shpenzuar rreth 32 për qind të GDP-së së tyre për përfitimet sociale.
Shpenzimet e parashikuara të PBB-së për mirëqenie dhe përfitime sociale
Irlanda renditet e fundit me vetëm 12 për qind, një shifër më e ulët se disa vende jashtë BE-së si Bosnja-Hercegovina (20 për qind) dhe Serbia (18 për qind), sipas Eurostat. Por, sipas ekspertëve, ka arsye për këtë, përfshirë demografinë e vendit.
Shoqëria irlandeze është ende relativisht e re krahasuar me ekonomitë e tjera, dhe për këtë arsye shpenzimet për pensione, kujdes afatgjatë dhe kujdes shëndetësor të lidhur me moshën janë më të ulëta, tha profesori Bernhard Ebbinghaus, kryetar i makrosociologjisë në Universitetin e Mannheimit, për Europe in Motion.
"Për më tepër, GDP-ja është paksa e fryrë në Irlandë - si në Luksemburg - për shkak të kompanive ndërkombëtare që përdorin vendin për qëllime tatimore. Për Irlandën, PNP-ja (të ardhurat totale të fituara nga banorët) është një tregues më i mirë se GDP-ja për të kuptuar standardet e jetesës së banorëve të saj", shtoi ai.
Megjithatë, Irlanda nuk është shpenzuesi më i vogël për të gjitha përfitimet sociale: ajo renditet e dyta në BE për sa i përket shpenzimeve për strehim social, proporcionalisht me GDP-në e saj.
Pensionet, papunësia, strehimi - ku janë përfitimet më të mëdha?
Në përgjithësi, pensionet përbëjnë pjesën më të madhe të shpenzimeve sociale të BE-së: 2 trilion euro nga totali i shpenzimeve të bllokut për përfitimet sociale.
Sëmundja dhe kujdesi shëndetësor renditen të dytat me gati 1.5 trilion euro, të ndjekura nga masat e mbështetjes për familjet dhe fëmijët me 0.4 trilion euro dhe mbështetja për personat me aftësi të kufizuara me 0.3 trilion euro.
Pavarësisht reformës së fundit të diskutueshme të pensioneve (aktualisht e pezulluar), e cila kishte për qëllim të kufizonte shpenzimet qeveritare për pensionet, Franca nuk është shpenzuesi më i madh i BE-së për përfitimet e moshës së tretë, duke i kushtuar vetëm 13 për qind të GDP-së së saj.
Tre vendet kryesore janë në fakt Austria (14.7 për qind), Italia (14.6 për qind) dhe Finlanda (14.5 për qind).
Sa i përket kujdesit shëndetësor dhe sëmundjes, Gjermania investon më shumë (9.9 për qind), e ndjekur nga Franca dhe Holanda (9.5 për qind).
Sa i përket mbështetjes për strehimin, Finlanda mban vendin e parë (0.99 për qind e GDP-së), duke kaluar Irlandën (0.72 për qind) dhe Gjermaninë (0.63 për qind), por duket se evropianët do të vlerësonin një rritje të mëtejshme të shpenzimeve në këtë drejtim.
Në një sondazh Eurobarometer të vitit 2025, mungesa e strehimit të përballueshëm u identifikua si problemi më “i menjëhershëm dhe urgjent” në BE, të theksuar nga 40 për qind e të anketuarve (51 për qind mes atyre që jetojnë në qytete).
Bumi i mirëqenies në Estoni - sa lidhet me inflacionin?
Pavarësisht ndarjes lindje-perëndim, shumë nga vendet që shpenzojnë më pak duket se po afrohen me shpenzuesit më të mëdhenj.
Vitit të kaluar, Estonia rriti shpenzimet e saj për mirëqenie me gati 20 për qind - ritmi më i shpejtë në të gjitha vendet e BE-së - e ndjekur nga Kroacia me gati 18 për qind dhe Rumania me 17.5 për qind.
Megjithatë, rritja e shpenzimeve sociale në Estoni është kryesisht rezultat i indeksimit të pensioneve së bashku me rritjen e fortë të pagave, dhe jo për shkak të një ndryshimi politik drejt zgjerimit të shtetit të mirëqenies, sipas Laurit Triin, profesoreshë e politikave publike krahasuese në Universitetin e Tallinn-it.
“Indeksi i pensioneve për vitin 2024 u rrit ndjeshëm për shkak të inflacionit të lartë të mëparshëm dhe pagave që rriteshin shpejt”, tha ajo për Europe in Motion dhe shtoi se “me një popullsi të konsiderueshme pensionistësh, kjo automatikisht rrit shpenzimet”.
“Përfitimet prindërore në Estoni bazohen në paga, kështu që kur pagat mesatare u rritën rreth 10 për qind, edhe kostoja totale e këtyre përfitimeve u rrit. Ndryshimet në pragun e të ardhurave pa taksa dhe presionet e përgjithshme të kostos së jetesës i shtojnë këtij efekti”, deklaroi Triin.
A do të vazhdojë Gjermania të shpenzojë?
Në të njëjtën kohë, rritjet më të ngadalta u panë në Greqi (+3.2 për qind), Suedi (+3.9 për qind), Itali dhe Danimarkë (+4.3 për qind secila), por, në përgjithësi, të gjitha vendet e BE-së rritën shpenzimet për përfitimet sociale.
Sipas vlerësimeve të hershme, rritja e shpenzimeve sociale të Gjermanisë - rreth 6.5 për qind - ishte relativisht e vogël krahasuar me shumicën e vendeve të tjera të BE-së, por ekspertët dyshojnë se vendi do të mbyllë fuqimisht thesarin publik në një të ardhme të afërt.
“Në Gjermani janë ndërmarrë reforma të pensioneve dhe po diskutohen hapa të mëtejshëm, por në 2024, kostot shtesë për shkak të refugjatëve nga Ukraina dhe ngadalësimi ekonomik (pra rritje më e ulët e PBB-së dhe më shumë papunësi) kanë shkaktuar presion më të madh mbi shpenzimet”, tha Ebbinghaus. /Telegrafi/
Më shumë se 150 ushtarë kroatë po i bashkohen operacionit paqeruajtës KFOR në Kosovë, një vend siguria e të cilit është e rëndësishme për stabilitetin e të gjithë rajonit, njoftoi sot Ministria e Mbrojtjes e Kroacisë
Forcat kroate kanë marrë pjesë në KFOR që nga viti 2009 me rreth 2.400 persona, 140 prej të cilëve gra. Tani, 151 anëtarë të Forcave të Armatosura po dërgohen në atë vend, të cilët u shoqëruan në kazermat "Brigada e 3-të e Gardës Kuna" në Gjakovë.
Komponenti më i madh i kontingjentit të 44-të, i cili do të vendoset në tre lokacione, është një kompani këmbësorie e motorizuar, dhe gjithashtu përbëhet nga një komponent i aviacionit dhe selisë, si dhe ata për këshillimin dhe zhvillimin e Forcës së Sigurisë së Kosovës dhe një ekip mjekësor.
Ushtarët kroatë po marrin pjesë në dhjetë operacione, misione dhe aktivitete ndërkombëtare me një total prej 297 anëtarësh.
Zëvendëskryeministri dhe Ministri i Mbrojtjes Ivan Anushiq tha se të gjithë kanë fjalë lavdërimi për anëtarët e Forcave të Armatosura në misione dhe operacione në të gjithë botën, thuhet në njoftim. /kp/
Në oborrin e shkollës fillore Strozhanac pranë Splitit të Kroacisë, persona të panjohur hodhën një mjet shpërthyes mbrëmë.
Incidenti ndodhi në një vend ku ndizeshin qirinj në nder të viktimave të Vukovarit dhe Shkabërnjës, transmeton Telegrafi.
Një regjistrim tregon katër persona të panjohur të veshur me të zeza, me kapele në kokë, duke ndezur një mjet shpërthyes. Pasi ata ikën nga vendi i ngjarjes, mjeti shpërtheu.
Departamenti i policisë Split-Dalmaci kanë deklaruar se kanë pranuar një raport dhe përcaktuan se xhami i derës së shkollës ishte dëmtuar për shkak të shpërthimit.
"Ne morëm një raport për fishekzjarrë të hedhur para shkollës fillore Strozhanac më 15 nëntor 2025 në mbrëmje. Oficerët e policisë nuk gjetën askënd, ata përcaktuan se një xham në derën e shkollës ishte dëmtuar”, u tha nga policia kroate.
Drejtoresha e shkollës konfirmoi se incidenti ndodhi mbrëmë dhe se të gjithë në shkollë ishin thellësisht të tronditur nga ngjarja.
"Ne reaguam menjëherë herët në mëngjes dhe paraqitëm një kallëzim policor, edhe pse policia dhe zjarrfikësit ishin tashmë në vendngjarje mbrëmë. Si shkollë, morëm të gjitha masat e nevojshme. Kjo është vërtet e tmerrshme. Në prag të Ditës së Përkujtimit për Viktimat e Vukovarit dhe Shkabrnjës, është e vështirë të besohet se diçka e tillë mund të ndodhë në komunitetin tonë. Ne të gjithë u habitëm dhe u tronditëm që dikush do të guxonte të bënte diçka të tillë", tha drejtoresha Zhana Prizmiq.
Ajo shtoi se të premten, si pjesë e orës së mësimit, nxënësit dhe mësuesit ndezën qirinj në kujtim të viktimave të Vukovarit, ndërsa të dielën, vendasit me fëmijët e tyre erdhën për të bërë të njëjtën gjë me iniciativën e tyre. Pasi tubimi u shpërnda, ndodhi incidenti. /Telegrafi/
Login
