TIRANË, 22 janar /ATSH/ Kryetari i grupit parlamentar të Partisë Socialiste, Taulant Balla, deklaroi në seancën e sotme plenare të Kuvendit, ku po shqyrtohet miratimi i projektligjit “Për ratifikimin e marrëveshjes së pranimit të Republikës së Shqipërisë, e përfaqësuar nga Kryeministri Edi Rama, në Kartën e Bordit të Paqes”, se kryeministri Edi Rama do të jetë në Shtëpinë e Bardhë, si mik i presidentit Donald Trump, për të firmosur autorizimin që do t’i japë sot Parlamenti.

Duke iu drejtuar deputetëve të opozitës, ai u shpreh se, “sipas porosisë, por edhe sipas vlerës dhe rëndësisë, kokën poshtë, dorën lart dhe votoni marrëveshjen”.

Duke iu drejtuar kryetarit të Partisë Demokratike, Sali Berisha, Balla tha se “ne, pa u zbardhur përgjegjësia jote sa i përket urdhrave për vrasjen e katër shqiptarëve më 21 Janar, kjo forcë politike nuk ka për t’u tërhequr kurrë. Këtë ngulite mirë në mendje”.

Balla theksoi se, “kjo nuk ka të bëjë thjesht dhe vetëm me katër dëshmorë apo me shumë të plagosur të tjerë, por ka të bëjë me një prej ngjarjeve më të rënda në historinë e këtij vendi, e cila erdhi, në fakt, si një ripërsëritje e një përpjekjeje tjetër tënden për të qëlluar mbi popullin: në vitin 1997, kur urdhërove avionët të qëllonin mbi popullin e Jugut, dhe në vitin 2011, kur urdhërove të qëllohej mbi popullin opozitar në shesh”.

/gj.m/a.f/r.e/

The post Balla – Berishës: Nuk tërhiqemi pa u zbardhur përgjegjësia jote për “21 Janarin” appeared first on Agjencia Telegrafike Shqiptare.

TIRANË, 22 janar /ATSH/ Ministri i Mbrojtjes Pirro Vengu inspektoi sot kompleksin stërvitor në Bizë/Pajet, një investim strategjik që synon modernizimin dhe fuqizimin e kapaciteteve të trajnimit të Forcave të Armatosura si dhe zhvillimin e stërvitjeve ndërkombëtare sipas standardeve bashkëkohore të NATO-s.

Gjatë inspektimit, ministri Vengu u njoh nga afër me infrastrukturën dhe kapacitetet funksionale të kompleksit, i cili përfaqëson një pol të ri modernizimi për përgatitjen operacionale të trupave dhe rritjen e ndërveprimit me partnerët ndërkombëtarë.

Kompleksi stërvitor në Bizë/Pajet ka kapacitet akomodimi deri në 1200 persona dhe ofron kushte të plota fjetjeje, ushqimi, ambiente moderne dhe shërbime të tjera thelbësore, duke garantuar mbështetje logjistike dhe operacionale për zhvillimin e stërvitjeve të zgjatura dhe komplekse.

Vengu theksoi se ky investim është një element kyç për rritjen e gatishmërisë së Forcave të Armatosura dhe për forcimin e bashkëpunimit me aleatët dhe partnerët strategjikë, duke e pozicionuar Shqipërinë si një faktor aktiv dhe të besueshëm në arkitekturën e sigurisë rajonale dhe ndërkombëtare.

Ky kompleks stërvitor do të jetë funksional për stërvitjen kryesore të FA që pritet të zhvillohet në muajin shtator për certifikimin e Grupbatalionit të Këmbësorisë së Lehtë sipas standardeve të NATO-s si dhe për stërvitje dypalëshe e shumëkombëshe si ajo “Defender Europe 2027”.

1 nga 3

/gj.m/a.f/r.e/

The post Vengu: Kompleksi stërvitor në Bizë/Pajet, investim strategjik për modernizimin e FA appeared first on Agjencia Telegrafike Shqiptare.

TIRANË, 22 janar /ATSH/ Ministri i Shtetit për Marrëdhëniet me Parlamentin, Toni Gogu mbrojti në Kuvend vendimin për aderimin e Shqipërisë në Bordin e Paqes, duke theksuar se bëhet fjalë për një zgjedhje strategjike që shkon përtej diplomacisë klasike dhe lidhet drejtpërdrejt me mënyrën se si qeveriset rendi i ri botëror.

Sipas tij, ky debat nuk ka të bëjë thjesht me politikën e jashtme, por me ndërtimin e mekanizmave realë që garantojnë stabilitet dhe paqe në një botë që po përballet me kriza të thella.

Gogu argumentoi se përballë konflikteve si Gaza dhe zonave të tjera të tensionit, deklaratat politike nuk mjaftojnë për të siguruar paqen.

Ajo që mungon, tha ministri, janë mekanizmat e qartë të koordinimit, rregullat, llogaridhënia dhe një qendër përgjegjësie që të drejtojë proceset pas armëpushimeve.

Në këtë kontekst, Bordi i Paqes synon të krijojë një strukturë funksionale për mbikëqyrje, mobilizim burimesh dhe stabilizim afatgjatë.

Sipas ministrit të Shtetit për Marrëdhëniet me Parlamentin, Shqipëria duhet të jetë pjesë e këtij mekanizmi për tri arsye kryesore: nevojën për koordinim në fazën e stabilizimit, domosdoshmërinë e llogaridhënies dhe shpejtësinë e instrumentit të ri krahasuar me mekanizmat shumëpalësh klasikë.

Gogu theksoi se vendi ynë nuk merr asnjë detyrim financiar në këtë fazë dhe se aderimi forcon pozicionin e Shqipërisë si vend kandidat i Bashkimit Europian, duke e vendosur atë në tryezën ku merren vendime dhe jo jashtë saj.

/gj.m/a.f/r.e/

The post Bordi i Paqes, Gogu: Shqipëria fiton kur ulet në tryezë appeared first on Agjencia Telegrafike Shqiptare.

TIRANË, 22 janar /ATSH/ Kryeministri Edi Rama deklaroi sot në seancën plenare të Kuvendit, ku po shqyrtohet miratimi i projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”, se Shqipëria po përjeton një moment historik për pozicionin e saj ndërkombëtar.

Rama informoi Kuvendin se të hënën e ardhshme do t’i drejtohet Knesset-it, parlamentin e Izraelit, si Kryeministër i Shqipërisë, në të njëjtin format që iu është rezervuar më parë Presidentit të SHBA-së dhe një numri të kufizuar udhëheqësish të huaj në historinë e atij institucioni.

Ai e cilësoi këtë si një nder të veçantë, jo vetëm për të, por edhe për shumicën qeverisëse dhe për Shqipërinë, duke theksuar rëndësinë e përfaqësimit të vendit tonë në nivel ndërkombëtar.

Rama nënvizoi se, “për Shqipërinë, për mua dhe për ne konsiderohet nder çdo ftesë që nuk u bëhet të gjitha shteteve e botës, sepse ne nuk jemi as kërthiza e botës, as ndonjë vend me një fuqi të spikatur ekonomike ose ushtarake”.

“Po jemi në një vend tejet të vogël që u vetëzhduk nga harta e Europës për 50 vjet, duke mbyllur derën me çelës nga brenda. Pastaj, kur hapi derën e lidhjes me botën, u keqtrajtua nga brenda dhe nga jashtë për vite të tëra, duke u tërhequr zvarrë sa nën rrënoja piramidash e sa nëpër gropa borxhesh, sa nëpër duart e atyre që e keqqeverisën, e sa nëpër pasqyrat ndërkombëtare të atyre që u hidhnin në kurriz Shqipërisë dhe shqiptarëve plot gurë të pamerituar, një vend që askush përveç meje dhe një grushti njerëzish që besuan, kur e gjithë Partia Socialiste thoshte: “Ky është një i çmendur, mos i shkoni nga mbrapa”, as nuk e ka imagjinuar dot se do të ngjitej këtu ku është ngjitur sot me punën, vendosmërinë dhe përkushtimin e jashtëzakonshëm të një dekade që ka përmbysur historinë e mbrapshtë të Shqipërisë”, tha Rama.

Duke iu drejtuar deputetëve të opozitës, Rama u shpreh se, ata duhen në Kuvend për t’i kujtuar shqiptarëve atë “ishullin e turpit”.

“Ju na duheni këtu, sepse ju jeni këtu për t’i kujtuar shqiptarëve atë “ishullin e turpit”, ndërsa ne jemi këtu për t’i ngjitur shqiptarët në atë majën e shumë ëndërruar të Shqipërisë 2030”, tha Rama.

“Atyre që na besojnë, po edhe atyre që hezitojnë të na besojnë, unë u them vetëm kaq: kini besim dhe jeni të bindur se ne do të ngjitemi për aty ku jemi nisur, duke u rritur ekonomikisht, duke u forcuar shtetërisht dhe duke u vlerësuar ende më shumë akoma ndërkombëtarisht. Dhe mos e harroni kurrë: sa më shumë lehin qentë, aq më përpara ka shkuar karvani dhe aq më e madhe është bërë distanca mes karvanit dhe qenve”, tha Rama.

/gj.m/r.e/

The post Rama: Të hënën do t’i drejtohem Knesetit izraelit appeared first on Agjencia Telegrafike Shqiptare.

TIRANË, 22 janar /ATSH/ Kryeministri Edi Rama deklaroi sot në seancën plenare të Kuvendit, ku po shqyrtohet miratimi i projektligjit “Për ratifikimin e marrëveshjes së pranimit të Republikës së Shqipërisë në Kartën e Bordit të Paqes”, se ai që ka marrë stausin e “non gratës” nga ShBA, është i paarritshëm në të gjitha poshtërsitë, ligësitë, pabesitë që i ka bërë popullit shqiptar dhe thikat pas shpine që i ka ngulur të gjitha aleancave strategjike të Shqipërisë, duke iu referuar kryetarit të partisë demokratike, Sali Berisha,

“Mos e lini pas dore atë punën e “non gratës” për mua. Në asnjë mënyrë, se siç ju kanë dalë të tëra fjalët do ju dali dhe fjala për non gratën”, iu drejtua Rama opozitës.

Kryeministri tha se ai që e ka marrë statusin e “non gratës” e ka merituar në mënyrën më bindëse.

“E tha sot dikush: Edi Rama po mbledh parlamentin se ka ngërç. Ngërçi në fakt është se për parlamentin e Shqipërisë ka vetëm një kuotë për non gratë dhe ajo është e zënë. Dhe është e zënë me meritë. Ai që e ka marrë non gratën e ka merituar në mënyrën më bindëse dhe kishte të drejtë”, tha Rama.

Kryeministri shtoi se për këtë arsye, fjala për heqjen e statusit do të shfaqet në vitin 2025, dhe pavarësisht se jemi tashmë në vitin 2026, procesi do të ndiqet sipas kalendarit të përcaktuar.

“Juve do iu dali fjala që non grata do të hiqet në mars të 2025-ës, dhe pavarësisht se është 2026-a juve vazhdoni fort se në mars 2025-ës do ta hiqni”, tha Rama.

“Puna është që dy fjalë janë mbivendosur. Keni mbivendosur fjalë, keni thënë do hiqet dhe po vihet. Ajo po s’u hoq nuk vihet, se është një kuotë. Dhe, vallahi, ai që e ka marrë atë kuotë, ai është i paarritshëm në të gjitha poshtërsitë, ligësitë, pabesitë që i ka bërë popullit shqiptar dhe thikat pas shpine që i ka ngulur të gjitha aleancave strategjike të Shqipërisë, kështu që zor shumë se lëviz ajo kuotë”, u shpreh Rama.

/gj.m/a.f/r.e/

The post Rama: Ai që është “non grata” nga SHBA, i ka ngulur thikë pas shpine aleancave strategjike të Shqipërisë appeared first on Agjencia Telegrafike Shqiptare.

TIRANË, 22 janar /ATSh/ Kryeministri Edi Rama deklaroi sot në Kuvend se nuk ndodhej sot në Davos për të firmosur marrëveshjen e Bordit të Paqes me presidentin e ShBA, Donald Trump sepse zgjodhi të mikpriste vajzën e tij, Ivanka Trump, në Shqipëri.

Duke iu përgjigjur deputetëve të opozitës se pse nuk ishte në Davos për të firmosur marrëveshjen për Bordin e Paqes, Rama tha se, “meqë po përsëritet e njëjta pyetje, edhe që mos shqetësoheni, sepse e kuptoj që jeni shumë të shqetësuar pse unë nuk jam atje sepse mezi prisnit që të më shikonit atje, në fakt unë duhet të bëja një zgjedhje midis t’i përgjigjesha ftesës së babit apo të mikprisja vajzën këtu në Shqipëri dhe zgjodha vajzën. Dhe natyrisht vajzën e zgjodha me lejen e babait”.

Rama iu përgjigj edhe deputetit Fatmir Mediu, duke u shprehur se është ura që lidh Amerikën me “Rrugën e shpresës”.

“E dyta, duke qenë se zoti Mediu është ura që lidh Amerikën me “Rrugën e shpresës” unë prisja nga zoti Mediu në fakt që të hidhte poshtë pretendimin e Britanisë dhe të mbante anën e Amerikës, po s’ka problem, se nuk shohim ne asnjë arsye për të parë divergjenca të tilla. Kështu që, zoti Mediu, rrini i qetë, analizat i kanë bërë ata që na kanë ftuar dhe ne nuk na ka ardhur koha të analizojmë ata që na ftojnë”, tha Rama.

Kuvendi diskuton për pjesëmarrjen e Shqipërisë në Bordin e Paqes - Foto: Florian Abazaj

1 nga 4

/gj.m/a.f/r.e/

The post Rama: Nuk isha në Davos sepse mikprita Ivanka Trump në Shqipëri appeared first on Agjencia Telegrafike Shqiptare.

TIRANË, 22 janar /ATSH/ Ministrja për Evropën dhe Punët e Jashtme, Elisa Spiropali, deklaroi sot në seancën plenare të Kuvendit, ku po shqyrtohet miratimi i projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”, se ky është një moment me peshë të veçantë për mënyrën se si Shqipëria po shihet dhe po dëgjohet në arenën ndërkombëtare.

Spiropali u shpreh se pak ditë më parë presidenti i Shteteve të Bashkuara të Amerikës, Donald Trump, i ka drejtuar Kryeministrit Edi Rama një ftesë të pazakontë, e cila, sipas saj, e pozicionon Shqipërinë si anëtare themeluese të një mekanizmi të ri ndërkombëtar të quajtur Bordi i Paqes.

“Një ftesë që nuk është e zakonshme dhe që e pozicionon vendin tonë si anëtare themeluese të një mekanizmi të ri ndërkombëtar. Jo për të marrë pjesë formalisht, por për të qenë e ftuar përtej simbolikës, për të qenë aty që në fillim në ndërtimin e këtij mekanizmi. Kjo ka rëndësi”, tha Spiropali.

Ajo theksoi se kjo çështje nuk duhet parë si një debat partiak apo si përplasje mes mazhorancës dhe opozitës.

“Kjo nuk është çështje partie. Nuk është çështje mazhorance apo opozite. Kjo është çështje e shtetit shqiptar dhe e mënyrës sesi ne e kuptojmë veten dhe rolin tonë në botë”, u shpreh ministrja.

Duke iu drejtuar deputetëve në sallë, Spiropali pranoi se dallimet politike janë normale në një parlament, por theksoi se ka momente kur këto ndarje nuk ndihmojnë.

“Në këtë sallë kemi dallime politike, dhe kjo është normale. Por ka momente kur këto dallime nuk na ndihmojnë, dhe ky është njëri prej tyre”, theksoi ajo.

Duke iu përgjigjur pyetjeve të ngritura në publik se pse Shqipëria pranon anëtarësimin në Bordin e Paqes dhe nëse kjo nënkupton largim nga Bashkimi Evropian, Spiropali u shpreh se Shqipëria nuk po zgjedh mes aleancave.

“Shqipëria po vepron brenda orientimit të saj strategjik të pandryshuar. Anëtarësimi në Bashkimin Evropian mbetet vokacioni ynë historik dhe kombëtar, objektivi ynë kryesor politik, institucional dhe shoqëror. Ai nuk negociohet dhe nuk zëvendësohet nga asnjë mekanizëm tjetër”, deklaroi Spiropali.

Ajo shtoi se duhet thënë me ndershmëri se Bashkimi Evropian është destinacioni i brendshëm i Shqipërisë, ndërsa politika e jashtme e vendit është ndërtuar mbi marrëdhënie strategjike me Shtetet e Bashkuara të Amerikës dhe mbi përgjegjësinë për arkitekturën e sigurisë ndërkombëtare.

“Bordi i Paqes nuk është alternativë ndaj Bashkimit Evropian dhe nuk është strukturë integrimi. As nuk është alternativë ndaj multilateralizmit, në të cilin ne besojmë fort. Ai është një mekanizëm ndërkombëtar për ndërtimin dhe menaxhimin e paqes në një botë që po ndryshon shumë shpejt. Shqipëria nuk hyn në Bordine e Paqes të për të zëvendësuar asgjë, por për të kontribuar aty ku ka besim dhe përgjegjësi”, u shpreh ministrja.

Në përfundim, Spiropali theksoi se këto janë dy rrugë dhe nuk përjashtojnë njëra-tjetrën, përkundrazi, sipas saj, ato e forcojnë njëra-tjetrën.

/gj.m/a.f/

The post Shqipëria në Bordin e Paqes, Spiropali: Moment me peshë të veçantë, nuk është çështje partiake appeared first on Agjencia Telegrafike Shqiptare.

TIRANË, 22 janar /ATSH/ Komisioni për Evropën dhe Punët e Jashtme miratoi sot projektligjin “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”.

Ministrja për Evropën dhe Punët e Jashtme, Elisa Spiropali prezantoi me pika përmbajtjen, ndërsa ftoi deputetët që të votojnë, duke theksuar se për projektligjin janë marrë opinionet e disa ministrive të ndryshme, si Ministria e Drejtësisë, e Financave, e Mbrojtjes, e Infrastrukturës dhe Energjisë si dhe nga Ministria e Brendshme, për zbatimin e kësaj marrëveshje.

“Ky partneritet mbetet shtylla kryesore e politikës së jashtme dhe garanci për orientimin euroatlantik të vendit. Nga pikëpamja ligjore dhe kushtetuese, ky projektligj është në përputhje me dispozitat e Kushtetutës së Republikës së Shqipërisë dhe me ligjin për marrëveshjet ndërkombëtare. Karta e Bordit të Paqes parashikon që asnjë shtet nuk është i detyruar të marrë pjesë në misione pa pëlqimin e tyre dhe se sovraniteti kombëtar mbetet i paprekur”, u shpreh Spiropali.

Teksa prezantoi disa nga krerët që përmban karta e Bordit të Paqes, Spiropali theksoi se “shtetet mund të përfaqësohen në Bord nga kreu i shtetit ose kreu i qeverisë. Çdo shtet anëtar ka një mandat trevjeçar, subjekt i rinovimit nga kryetari i Bordit të Paqes”.

Sa i përket projektligjit, ajo shtoi se “në këtë fazë, projektligji nuk sjell kosto shtesë për buxhetin e shtetit. Kontributet do të jenë vullnetare dhe do të planifikohen në mënyrë transparente në buxhetin e Ministrisë për Evropën dhe Punët e Jashtme, sipas standardeve buxhetore afatmesme. Akti është hartuar nga Ministria për Evropën dhe Punët e Jashtme, në bazë të informacioneve të sjella nga ambasada e Shqipërisë në Uashington”.

Më herët Kuvendi miratoi në seancën plenare, me 80 vota pro dhe 22 vota kundër, kërkesën për shqyrtimin me procedurë të përshpejtuar të projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”.

Kryetari i Kuvendit, Niko Peleshi, u shpreh se me miratimin e kërkesës për shqyrtim me procedurë të përshpejtuar u vendos që projektligji të diskutohet dhe të miratohet brenda kësaj seance plenare.

Pas miratimit të pr.ligjit nga Komisioni për Evropën dhe Punët e Jashtme, në orën 12:00 pritet të rifillojë seanca plenare për diskutimin dhe miratimin e tij.

Projektligji synon ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes. Këshilli i Ministrave e ka miratuar në parim marrëveshjen më 21 janar.

Marrëveshja parashikon krijimin e Bordit të Paqes si një organizatë ndërkombëtare me personalitet ligjor ndërkombëtar, me qëllim promovimin e stabilitetit, rivendosjen e një qeverisjeje të besueshme dhe të ligjshme, si dhe sigurimin e paqes së qëndrueshme në zonat e prekura ose të kërcënuara nga konflikti.

Bordi i Paqes do të ushtrojë funksione të ndërtimit të paqes në përputhje me të drejtën ndërkombëtare dhe me këtë Kartë, duke përfshirë zhvillimin dhe përhapjen e praktikave më të mira për t’u zbatuar nga të gjitha shtetet dhe komunitetet që kërkojnë paqe.

Seanca plenare u kërkua pasditen e djeshme nga grupi parlamentar i Partisë Socialiste, përmes një shkrese zyrtare, për ratifikimin me procedurë të përshpejtuar të marrëveshjes për pranimin e Shqipërisë në Bordin e Paqes.

Komisioni për Evropën dhe Punët e Jashtme miraton ratifikimin e marrëveshjes së Bordit të Paqes...

1 nga 3

/gj.m/a.f/r.e/

The post Komisioni për Evropën dhe Punët e Jashtme miraton ratifikimin e marrëveshjes së Bordit të Paqes appeared first on Agjencia Telegrafike Shqiptare.

TIRANË, 22 janar /ATSH/ Kuvendi u mblodh sot në seancë plenare për shqyrtimin dhe miratimin e projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”.

Në urdhrin për thirrjen e seancës nga Kryetari i Kuvendit, Niko Peleshi, thuhet se marrëveshja kërkon shumicë absolute votash për miratim.

Kreu i grupit parlamentar të Partisë Socialiste, Taulant Balla, deklaroi në fjalën e tij se Kuvendi i Shqipërisë thirret për të marrë një vendim me një peshë tepër të veçantë politike dhe historike, që shkon përtej rendit të zakonshëm të ditës dhe lidhet drejtpërdrejt me rolin e ri të Shqipërisë në arenën ndërkombëtare.

Sipas Ballës, Shqipëria është ftuar të marrë pjesë në këtë organizëm si Vend Anëtar Themelues, një ftesë që, sipas tij, përfaqëson një vlerësim të drejtpërdrejtë ndërkombëtar për rolin konstruktiv dhe të besueshëm të vendit në arenën ndërkombëtare.

“Shqipëria nuk ftohet si vëzhguese, por si bashkarkitekte në ndërtimin e një mekanizmi të ri ndërkombëtar për paqen”, u shpreh Balla, duke theksuar se ky zhvillim e vendos vendin nga periferia e diskutimeve globale, në qendër të vendimmarrjes ndërkombëtare.

Ai bëri me dije se, sipas Kartës së Bordit të Paqes, pjesëmarrja e shteteve anëtare nuk cenon sovranitetin kombëtar, ndërsa angazhimi në misione dhe financimi janë vullnetare. Po ashtu, çdo shtet anëtar gëzon të drejtë të barabartë vote dhe rol aktiv në drejtimin strategjik të organizmit.

Duke iu referuar letrës zyrtare drejtuar Kryeministrit të Shqipërisë, Balla tha se Presidenti i Shteteve të Bashkuara e ka cilësuar nismën si një përpjekje historike për ndërtimin e paqes, e bazuar në një qasje pragmatike dhe të orientuar drejt rezultateve konkrete, në përputhje me të drejtën ndërkombëtare.

Sipas Ballës, ftesa për anëtarësim konfirmon forcën e partneritetit strategjik mes Shqipërisë dhe Shteteve të Bashkuara të Amerikës dhe pasqyron besimin ndaj politikës së jashtme shqiptare si të qëndrueshme dhe të përgjegjshme.

Projektligji synon ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes. Këshilli i Ministrave e ka miratuar në parim marrëveshjen më 21 janar.

Marrëveshja synon krijimin e Bordit të Paqes si një organizatë ndërkombëtare, me personalitet ligjor ndërkombëtar, me qëllim promovimin e stabilitetit, rivendosjen e një qeverisjeje të besueshme dhe të ligjshme, si dhe sigurimin e paqes së qëndrueshme në zonat e prekura ose të kërcënuara nga konflikti.

Bordi i Paqes do të ndërmarrë funksione të ndërtimit të paqes në përputhje me të drejtën ndërkombëtare dhe me këtë Kartë, duke përfshirë zhvillimin dhe përhapjen e praktikave më të mira të mundshme për t’u zbatuar nga të gjitha shtetet dhe komunitetet që kërkojnë paqe.

Seanca plenare u kërkua pasditen e djeshme nga grupi parlamentar i Partisë Socialiste, përmes një shkrese zyrtare, për ratifikimin me procedurë të përshpejtuar të marrëveshjes për pranimin e Shqipërisë në Bordin e Paqes.

Seanca Plenare për Bordin e Paqes

1 nga 3

/gj.m/a.f/r.e/

The post Shqipëria në Bordin e Paqes, Balla: Konfirmon partneritetin strategjik me ShBA appeared first on Agjencia Telegrafike Shqiptare.

TIRANË, 22 janar /ATSH/ Kreu i grupit parlamentar të Partisë Demokratike, Gazment Bardhi, reagoi në Kuvend ndaj fjalës së kreut të grupit parlamentar të Partisë Socialiste, Taulant Balla, duke deklaruar se qytetarët shqiptarë nuk dëgjuan asnjë argument se ku qëndron nxitimi për ta përmbyllur sot procesin e ratifikimit të marrëveshjes për pranimin e Shqipërisë në Kartën e Bordit të Paqes.

“Besoj se në 10 minuta fjalë nuk u shpjegua se për çfarë arsyeje dhe ku qëndron urgjenca e shqyrtimit të këtij projektligji me rëndësi historike. U tha se 140 deputetët e Kuvendit të Shqipërisë duhet ta votojnë brenda 12 orësh nga momenti që ka mbërritur nga Këshilli i Ministrave. Dëgjuat ndonjë argument për këtë?”, u shpreh Bardhi.

Ai shtoi se çdo shqiptar priste një ndjesë publike nga mazhoranca për qëndrimet e mëparshme ndaj Presidentit të Shteteve të Bashkuara të Amerikës.

“Çdo shqiptar mendoi se kolegu do të ngrihej këtu dhe do ta niste fjalën duke kërkuar ndjesë në emër të mazhorancës suaj, pasi ai që keni në krye e ka konsideruar Presidentin e Shteteve të Bashkuara të Amerikës, njeriun që sot po vendos paqe kudo në botë, si ‘turpin e njerëzimit’. Ka qenë Edi Rama i vetmi lider botëror që i është drejtuar Presidentit të SHBA-së me këtë term”, deklaroi Bardhi.

Sa i përket procedurës, Bardhi theksoi se grupi parlamentar i Partisë Socialiste ka depozituar kërkesën për procedurë të përshpejtuar përpara se projektligji të propozohej nga Këshilli i Ministrave.

Duke iu drejtuar Kryetarit të Kuvendit, Niko Peleshi, Bardhi tha se ekzistojnë dy kërkesa që duhen shqyrtuar.

“Së pari, është kërkesa e Këshillit të Ministrave, e cila sipas rregullit duhet të depozitohej përpara kërkesës së grupit parlamentar të PS-së. Ata nuk mund të kërkojnë procedurë të përshpejtuar për një projektligj që ende nuk ka ardhur në Kuvend. Pikërisht kjo ka ndodhur: kërkesa është dorëzuar përpara se projektligji të propozohej nga Këshilli i Ministrave”, u shpreh ai.

Bardhi theksoi gjithashtu se Kuvendi mund të ndjekë një procedurë tjetër që do ta bënte marrëveshjen edhe më shpejt efektive.

“Kuvendi merr kohën që ia ngarkon Kushtetuta, pra e miraton një javë pasi ka nisur shqyrtimi. Ne jemi pro anëtarësimit të Shqipërisë në Bordin e Paqes dhe i kërkojmë autorizim Presidentit të Republikës, në përputhje me Nenin 84 të Kushtetutës, që të japë miratimin për hyrjen e menjëhershme në fuqi të këtij projektligji. Kështu zgjidhim ngërçin kushtetues, respektojmë Kushtetutën dhe arrijmë qëllimin të paktën pesë herë më shpejt nga sa propozoni ju”, tha Bardhi.

Kuvendi u mblodh sot në seancë plenare për shqyrtimin dhe miratimin e projektligjit “Për ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes”.

Në urdhrin për thirrjen e seancës nga Kryetari i Kuvendit, Niko Peleshi, thuhet se marrëveshja kërkon shumicë absolute votash për miratim.

Projektligji synon ratifikimin e marrëveshjes së pranimit të Republikës së Shqipërisë, përfaqësuar nga Kryeministri Edi Rama, në Kartën e Bordit të Paqes. Këshilli i Ministrave e ka miratuar në parim marrëveshjen më 21 janar.

Marrëveshja synon krijimin e Bordit të Paqes si një organizatë ndërkombëtare, me personalitet ligjor ndërkombëtar, me qëllim promovimin e stabilitetit, rivendosjen e një qeverisjeje të besueshme dhe të ligjshme, si dhe sigurimin e paqes së qëndrueshme në zonat e prekura ose të kërcënuara nga konflikti.

Bordi i Paqes do të ndërmarrë funksione të ndërtimit të paqes në përputhje me të drejtën ndërkombëtare dhe me këtë Kartë, duke përfshirë zhvillimin dhe përhapjen e praktikave më të mira për t’u zbatuar nga të gjitha shtetet dhe komunitetet që kërkojnë paqe.

Seanca plenare u kërkua pasditen e djeshme nga grupi parlamentar i Partisë Socialiste, përmes një shkrese zyrtare, për ratifikimin me procedurë të përshpejtuar të marrëveshjes për pranimin e Shqipërisë në Bordin e Paqes.

/gj.m/a.f/r.e/

The post Bardhi: Jemi pro anëtarësimit të Shqipërisë në Bordin e Paqes, por të respektohet Kushtetuta appeared first on Agjencia Telegrafike Shqiptare.

TIRANË, 21 janar /ATSH/ Komisioni për Evropën dhe Punët e Jashtme miratoi sot ndryshimet ligjore të propzouara nga qeveria në ligjin “Për barnat narkotike dhe lëndët psikotrope”, si dhe ndryshimet ligjore në ligjin për “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope”.

Deputetja e Partisë Socialiste, nënkryetarja e Kuvendit, Klodiana Spahiu, në fjalën e saj tha se përparësia e këtij projektligji është krijimi i një mekanizmi më të fortë dhe të efektshëm ligjor për të kontrolluar lëndët narkotike dhe psikotrope, në përputhje me standardet ndërkombëtare e në funksion të rritjes së sigurisë publike.

Zëvendësministrja e Shëndetësisë Eugena Tomini, në fjalën e saj, duke prezantuar ndryshimet ligjore në ligjin “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope”,  tha se ky përmirësim, vjen si nevojë për përputhje me legjislacionin ndërkombëtar dhe atë të Bashkimit Evropian, si dhe për forcimin e mekanizmave të parandalimit e të kontrollit, në kuadër të luftës kundër trafikut të paligjshëm të drogës. Objektivi specifik, që synohet të arrihet me këtë projektligj, është përditësimi i listës së lëndëve që përdoren në mënyrë të paligjshme për prodhimin e lëndëve narkotike dhe psikotrope.

Kryetari i grupit parlamentar të Partisë Socialiste, Taulant Balla në fjalën e tij në Komisionin për Europën dhe Punët e Jashtme, gjatë diskutimit për projektligjin që lidhet me barnat narkotike dhe lëndët psikotrope, me fokus të veçantë luftën kundër opioideve sintetike, përfshirë fentanilin deklaroi se Shqipëria është përkrah presidentit të SHBA, Donald Trump në luftën kundër drogave.

Ai theksoi se përveç fentanilit, në listën që po miratohet janë përfshirë edhe katër opioidë të tjerë sintetikë edhe më të fortë se fentanili, duke i cilësuar si jashtëzakonisht të rrezikshëm për jetën e njeriut.

Në fjalën e tij, Balla solli shifra tronditëse nga Shtetet e Bashkuara të Amerikës, duke e quajtur fentanilin një kërcënim global.

“Nga 1 janari 2021 deri më 31 dhjetor 2024, në SHBA kanë humbur jetën 262 mijë persona për shkaqe të lidhura me përdorimin e fentanilit. Më shumë amerikanë kanë vdekur nga fentanili sesa nga Lufta e Dytë Botërore, në vetëm katër vite.”

Sipas tij, edhe për vitin 2025 priten shifra shumë të larta, rreth 76 mijë viktima, çka justifikon qëndrimin e fortë të presidentit Trump ndaj kësaj çështjeje.

Balla rikujtoi se më 14 mars 2024 Shqipëria u anëtarësua në Koalicionin Global Kundër Drogave Sintetike, një iniciativë e udhëhequr nga Shtetet e Bashkuara.

“Drogat sintetike, dhe në mënyrë të veçantë fentanili, janë armë të shkatërrimit në masë që vrasin dhjetëra-mijëra njerëz çdo vit”, theksoi ai, duke paralajmëruar se Europa ende nuk është plotësisht e vetëdijshme për rrezikun që ky fenomen përbën.

Sipas Ballës, një sasi më e vogël se një kokërr kripe e fentanilit mund të marrë jetën e një njeriu, duke nënvizuar se kjo është pasojë e rrjeteve kriminale të organizuara, kufijve të dobët dhe zbatimit të pamjaftueshëm të ligjit.

“Kufijtë e fortë shpëtojnë jetë”, deklaroi ai, duke shtuar se Shqipëria duhet të rrisë kontrollet kufitare dhe të forcojë politikat e sigurisë në shkolla për të parandaluar që fëmijët dhe të rinjtë të bien pre e shpërndarësve të drogës.

Në përmbyllje, Taulant Balla vlerësoi qasjen proaktive të qeverisë shqiptare për përditësimin e listës së lëndëve narkotike dhe kërkoi më shumë vëmendje për qendrat e rehabilitimit dhe trajtimit të personave me varësi.

“Detyra e shtetit është jo vetëm të parandalojë përdorimin e drogës, por edhe të kujdeset që viktimat e saj të shpëtojnë nga varësia”, tha Balla, duke bërë thirrje që edhe opozita të mbështesë projektligjin dhe ai të miratohet sa më shpejt në seancë plenare.

Në fund të punimeve, komsioni miratoi në parim, Nen për Nen dhe në tërësi ndryshimet ligjore, ndërsa deputetët e Partisë Demokratike nuk morën pjesë në votim.

/gj.m/r.e/a.f/

The post Ndryshimet në ligjin për narkotikët, Balla: Shqipëria në krah të SHBA-së në luftën globale kundër fentanilit appeared first on Agjencia Telegrafike Shqiptare.

TIRANË, 21 janar /ATSH/ Presidenti i Republikës, Bajram Begaj, ka përkujtuar sot Presidentin historik të Kosovës, Ibrahim Rugovën, duke e cilësuar atë si një figurë vizionare që projektoi Kosovën e pavarur dhe të lirë mbi parimet e urtësisë, durimit dhe mençurisë politike.

Në një postim në rrjetin social X, Kreu i Shtetit thekson se Presidenti Rugova e konceptoi të ardhmen e Kosovës të lidhur ngushtë me vlerat evropiane, si demokracia, të drejtat e njeriut, pluralizmi dhe shteti i së drejtës.

Presidenti Begaj nënvizon se vizioni i Rugovës është sot një realitet, ndërsa trashëgimia e tij politike mbetet një dëshmi e qartë se paqja, dialogu dhe orientimi drejt Evropës janë gurthemeli i shtetndërtimit dhe i një të ardhmeje të qëndrueshme për Kosovën.

/gj.m/a.f/

The post Begaj përkujton Ibrahim Rugovën: Vizionari i Kosovës së lirë dhe evropiane appeared first on Agjencia Telegrafike Shqiptare.

TIRANË, 21 janar /ATSH/ Kombëtarja shqiptare U-21 do të zhvillojë një ndeshje miqësore ndërkombëtare më 27 mars 2026 ndaj Japonisë U-21.

Federata Shqiptare e Futbollit ka arritur marrëveshjen me Federatën Japoneze të Futbollit që kjo përballje të luhet në Antalia, Turqi, ndërsa orari dhe stadiumi ku do të zhvillohet takimi do të bëhen të ditura në ditët në vijim.

FSHF vijon gjithashtu bisedimet për të siguruar edhe një tjetër ndeshje miqësore për Kombëtaren U-21 gjatë muajit mars.

Deri në Kampionatin Europian U-21 2027, Kombëtarja U-21 do të angazhohet vetëm në ndeshje miqësore, pasi Shqipëria është kualifikuar automatikisht në këtë turne si një nga vendet organizatore.

Këto teste miqësore kanë rëndësi të veçantë për trajnerin Alban Bushi dhe stafin teknik, duke ofruar mundësinë për të vlerësuar nga afër gjendjen e lojtarëve, për të konsoliduar grupin dhe për të testuar elementë të rinj në funksion të Europianit U-21 2027.

/gj.m/r.e/a.f/

The post Kombëtarja U-21 sfidon Japoninë më 27 mars në Antalia appeared first on Agjencia Telegrafike Shqiptare.

TIRANË, 21 janar /ATSH/ Emiratet e Bashkuara Arabe po përgatiten të presin “Open Masters Games Abu Dhabi 2026”, një nga ngjarjet më të mëdha shumë-sportëshe ndërkombëtare në botë, e cila do të zhvillohet nga 6 deri më 15 shkurt 2026, duke mbledhur sportistë 30 vjeç e lart nga mbarë globi nën moton “United by Sports, Active for Life”.

Sipas programit zyrtar, ceremonia hapëse do të mbahet më 6 shkurt në Zayed Sports City, ndërsa garat do të zhvillohen në Abu Dhabi, Al Ain dhe Al Dhafra, në një rrjet prej 22 impiantesh sportive të standardeve botërore. Mes tyre përfshihen Hazza Bin Zayed Stadium, Abu Dhabi Cricket and Sports Hub, Hudayriyat Island, ADNEC, Khalifa International Bowling Centre, Marina Al Mirfa, Al Wathba Race Track, Abu Dhabi Marine Sports Club, Al Ain Equestrian, Shooting & Golf Club, Abu Dhabi Golf Club, Yas Acres Golf Club, Yas Links Golf Club, Mubadala Arena, Al Ain Adventure, Abu Dhabi Padel Kingdom, Abu Dhabi Aquatics Club dhe Fatima Bint Mubarak Ladies Academy, duke reflektuar përmasat dhe shtrirjen gjeografike të eventit.

Programi kryesor i Lojërave do të zhvillohet nga 7 deri më 14 shkurt, me gara në më shumë se 30 sporte, përfshirë atletikë, basketboll, futboll, not, tenis, çiklizëm, triathlon, golf, xhudo, karate, jiu-jitsu, volejboll, peshëngritje, kriket, shah, sporte ujore, sporte luftarake dhe disiplina të tjera, duke krijuar një ritëm të pandërprerë aktivitetesh sportive gjatë gjithë eventit.

Një element dallues i “Open Masters Games Abu Dhabi 2026” do të jenë sportet tradicionale të Emirateve, të cilat përbëjnë një shtyllë të rëndësishme të programit. Garat Al Tabaa do të zhvillohen më 13–14 shkurt në Al Ain, garat me deve më 14 shkurt në Al Wathba, lundrimi tradicional me dhoë dhe zhytja tradicionale më 7–8 shkurt në Marina Al Mirfa, garat e qëndrueshmërisë në hipizëm nga 7 deri më 14 shkurt, si dhe garat e skifterisë (falconry) më 13–14 shkurt në Al Falah Falconry Club, duke i dhënë eventit një dimension autentik kulturor.

Lojërat do të përfshijnë gjithashtu kategori vetëm për gra në sporte si atletikë, volejboll në sallë, basketboll, paddle dhe futboll 7-a-side, të cilat do të zhvillohen në Fatima Bint Mubarak Ladies Academy, duke reflektuar angazhimin për zgjerimin e pjesëmarrjes femërore dhe krijimin e një mjedisi gjithëpërfshirës konkurrues.

Komiteti Organizues ka konfirmuar se regjistrimet do të qëndrojnë të hapura deri më 15 janar 2026, duke u mundësuar sportistëve dhe skuadrave të planifikojnë pjesëmarrjen dhe udhëtimin e tyre në kohë.

Me mbi 25,000 pjesëmarrës të pritur nga e gjithë bota, përfshirë gjashtë sporte tradicionale emirate dhe 18 disiplina të hapura për Personat me Aftësi të Kufizuara, “Open Masters Games Abu Dhabi 2026” pritet të shndërrojnë Abu Dhabin, Al Ain dhe Al Dhafran në qendra dinamike të sportit, kulturës dhe komunitetit, duke forcuar më tej pozitën e Emirateve të Bashkuara Arabe si një destinacion kryesor për evente sportive ndërkombëtare dhe stile jetese aktive.

/gj.m/a.f/

The post EBA presin “Open Masters Games Abu Dhabi 2026”, një nga ngjarjet më të mëdha sportive në botë appeared first on Agjencia Telegrafike Shqiptare.

TIRANË, 21 janar /ATSH/ Kryeministri Edi Rama ka uruar sot Presidenten e Kosovës, Vjosa Osmani për marrjen e ftesës për t’u bërë pjesë e Bordit të Paqes nga presidenti i Shteteve të bashkuara të Amerikës, Donald Trump.

Rama shprehet në një postim në rrjetin social X se, ky është një gjest tejet domethënës i Presidentit Trump ndaj Kosovës.

“Urime zonja Presidente, e dashur Vjosa, për marrjen e ftesës për t’u bërë pjesë e Bordit të Paqes, një gjest tejet domethënës i Presidentit Trump ndaj Kosovës, që forcon më tej marrëdhënien e Amerikës mike me popullin shqiptar, por që edhe jep një sinjal domethënës për sigurinë e përkatësinë e Kosovës në hapësirën e interesit të gjerë amerikan në botë”, shkruan Rama.

Rama u shpreh se beson se faktorët politikë të Kosovës, do ta çmojnë këtë dorë të shtrirë nga Presidenti i SHBA

“Edhe njëherë urime dhe dua të besoj se faktorët politikë të Kosovës, do ta çmojnë këtë dorë të shtrirë nga Presidenti i SHBA, si një gjest që nuk është aspak pa lidhje edhe me respektin për ty personalisht e  për rolin tënd ndërkombëtarisht”, shkruan kryeministri Rama.

/gj.m/a.f/

The post Osmani pjesë e Bordit të Paqes, Rama: Gjest domethënës i presidentit Trump ndaj Kosovës appeared first on Agjencia Telegrafike Shqiptare.

TIRANË, 21 janar /ATSH/ Sot shënohen 15 vite nga 21 anari 2011, kur gjatë një proteste të Partisë Socialiste, në bulevardin “Dëshmorët e Kombit”, para Kryeministrisë, u vranë katër protestues nga Garda e Republikës.

Gjatë protestës u vranë Aleks Nika, Ziver Veizi, Faik Myrtaj dhe Hekuran Deda. Katër viktimat e 21 Janarit 2011 u shpallën Dëshmorë të Atdheut.

Kryeministri Edi Rama, Kryetari i Kuvendit, Niko Peleshi, ministra të kabinetit qeveritar së bashku me familjarë të katër protestuesve dhe deputetë të PS-së, kryen homazhe në bulevardin “Dëshmorët e Kombit”, pranë vendit ku më 21 Janar 2011 u vranë 4 protestues.

Kryeministri Edi Rama deklaroi sot në ceremoninë e përkujtimit të 4 viktimave të 21 Janarit se, pas 15 vitesh ende nuk është bërë drejtësi për 21 Janarin.

Duke folur përpara familjarëve të 4 viktimave të “21 Janarit”: Aleks Nikës, Ziver Veizit, Faik Myrtajt dhe Hekuran Dedës, Rama u shpreh se, “vetëm Zoti e di se me çfarë guri në zemër unë vij për në këtë godinë kur del drita e ditës së 21 janarit”.

“15 vjet pa drejtësi për 21 Janarin janë 15 vjetët e një padrejtësie të madhe, jo thjesht për disa, por mbi Shqipërinë dhe mbi popullin shqiptar”, u shpreh Rama.

Në korrik të vitit 2024 Prokuroria e Posaçme (SPAK) rinisi zyrtarisht hetimet për 21 Janarin, pasi Gjykata e Strasburgut urdhëroi Strukturën e Posaçme të hetonte kallëzimin e bërë nga Rajmonda Nika, bashkëshortja e Aleks Nikës, ndaj Sali Berishës, ish-kryeministër, Lulzim Bashës, ish-ministër i Brendshëm dhe Ndrea Prendit, ish-kreu i Gardës së Republikës.

Gjykata e Strasburgut e ka cilësuar vrasjen e katër protestuesve si “krim shtetëror që duhej zbardhur”.

1 nga 17

/gj.m/r.e/a.f/

The post Përkujtohen viktimat e “21 Janarit”, homazhe në bulevardin “Dëshmorët e Kombit” appeared first on Agjencia Telegrafike Shqiptare.

TIRANË, 21 janar /ATSH/ Kryeministri Edi Rama deklaroi sot në ceremoninë e përkujtimit të 4 viktimave të 21 janarit se, pas 15 vitesh ende nuk është bërë drejtësi për ngjarjen e 21 Janarit.

Duke folur përpara familajrëve të 4 viktimave të “21 Janarit” Aleks Nikës, Ziver Veizit, Faik Myrtajt dhe Hekuran Dedës, Rama u shpreh se, “vetëm Zoti e di se me çfarë guri në zemër unë vij për në këtë godinë kur del drita e ditës së “21 Janarit””.

“Është një gur që bëhet gjithnjë e më i madh dhe që më tregon përmes një sëkëlldije të madhe se sa më i madh bëhet në çdo 21 janar zhgënjimi juaj të dashur familjarë të 4 Dëshmorëve, hidhërimi juaj, pengu juaj  për mosardhjen e drejtësisë”, tha Rama.

“15 vjet pa drejtësi për “21 Janarin” janë 15 vjetët e një padrejtësie të madhe, jo thjesht për disa, por mbi Shqipërinë dhe mbi popullin shqiptar”, u shpreh Rama.

“Ndërsa, për ju familjarët e Dëshmorëve të “21 Janarit”, 15 vjetët e këtij boshllëku të pangushëllueshëm janë sa një jetë e tërë e jetuar në ankth, dëshpërim dhe poshtërim”, iu drejtua Rama familjarëve të viktimave.

“Atyre ndër ju që ishin gjyshër iu ka ardhur koha për t’u bërë stërgjyshër. Atyre që ishin fëmijë iu ka ardhur koha për t’u bërë prindër, ndërsa atyre 4 pjesëve të shpirtit tuaj të cilave u janë tretur trupat në dhe’, nuk u ka ardhur koha ende të prehen të qetë sepse as përmbysja e sistemit të vjetër të drejtësisë, as pavarësimi i pushtetit gjyqësor dhe as rënia e kultit të pandëshkueshmërisë së individëve të veshur me pushtet politik nuk kanë mjaftuar deri më sot për ta zhdukur hijen e padrejtësisë mbi “21 Janarin””, tha Rama.

Sot shënohen 15 vite nga 21 janari 2011, kur gjatë një proteste të Partisë Socialiste, në bulevardin “Dëshmorët e Kombit”, para Kryeministrisë, u vranë katër protestues.

Gjatë protestës u vranë Aleks Nika, Ziver Veizi, Faik Myrtaj dhe Hekuran Deda. Katër viktimat e 21 Janarit 2011 u shpallën Dëshmorë të Atdheut.

Në korrik të vitit 2024 Prokuroria e Posaçme (SPAK) rinisi zyrtarisht hetimet për 21 Janarin, pasi Gjykata e Strasburgut urdhëroi Strukturën e Posaçme të hetonte kallëzimin e bërë nga Rajmonda Nika, bashkëshortja e Aleks Nikës, ndaj Sali Berishës, ish-kryeministër, Lulzim Bashës, ish-ministër i Brendshëm dhe Ndrea Prendit, ish-kreu i Gardës së Republikës.

Gjykata e Strasburgut e ka cilësuar vrasjen e katër protestuesve si “krim shtetëror që duhej zbardhur”.

/gj.m/a.f/

The post Rama: Pavarësimi i gjyqësorit nuk zhduku hijen e padrejtësisë mbi “21 janarin” appeared first on Agjencia Telegrafike Shqiptare.

TIRANË, 21 janar /ATSH/ Sot shënohen 15 vite nga 21 janari 2011, kur gjatë një proteste të Partisë Socialiste, në bulevardin “Dëshmorët e Kombit”, para Kryeministrisë, u vranë katër protestues.

Gjatë protestës u vranë Aleks Nika, Ziver Veizi, Faik Myrtaj dhe Hekuran Deda. Katër viktimat e 21 Janarit 2011 u shpallën Dëshmorë të Atdheut.

Në korrik të vitit 2024 Prokuroria e Posaçme (SPAK) rinisi zyrtarisht hetimet për 21 Janarin, pasi Gjykata e Strasburgut urdhëroi Strukturën e Posaçme të hetonte kallëzimin e bërë nga Rajmonda Nika, bashkëshortja e Aleks Nikës, ndaj Sali Berishës, ish-kryeministër, Lulzim Bashës, ish-ministër i Brendshëm dhe Ndrea Prendit, ish-kreu i Gardës së Republikës.

Gjykata e Strasburgut e ka cilësuar vrasjen e katër protestuesve si “krim shtetëror që duhej zbardhur”.

Drejtues të Partisë Socialiste kanë kërkuar zbatimin e vendimit të GJEDNJ-së për ngjarjen e “21 janarit”. Disa ditë më parë në mbledhjen e grupit parlamentar të PS-së, kreu i grupit Taulant Balla vuri në dukje se presin nga drejtësia, veçanërisht nga Prokuroria e Posaçme, zbatimin e vendimeve të GJEDNJ-së dhe Gjykatës së Lartë të Republikës së Shqipërisë, lidhur me plot aspekte të asaj ngjarjeje.

“Ne nuk kemi hyrë asnjëherë në meritën apo përmbajtjen e dosjeve penale, por Kuvendi i Shqipërisë ka përgjegjësi në kontrollin e zbatimit të vendimeve të GJEDNJ-së bashkë me Ministrinë e Drejtësisë”, theksoi Balla.

/gj.m/j.p/

The post Sot shënohen 15 vite nga “21 Janari”, çështja në rihetim nga SPAK appeared first on Agjencia Telegrafike Shqiptare.

TIRANË, 20 janar /ATSH/ Nesër shënohen 15 vite nga 21 janari 2011, kur gjatë një proteste të Partisë Socialiste, në bulevardin “Dëshmorët e Kombit”, para Kryeministrisë, u vranë katër protestues nga Garda e Republikës.

Kreu i grupit parlamentar të Partisë Socialiste , Taulant Balla u shpreh sot se, shqiptarët dhe familjet e të rënëve të 21 Janarit duan drejtësi.

“Gjykata e Lartë, në dritën e vendimit historik të Gjykatës Europiane për të Drejtat e Njeriut, ka konkluduar me emra të përveçëm”, theksoi Balla duke sjellë vendimin e gjykatës.

“Asnjëherë nuk është tentuar për të shtrirë hetimet – lidhur me “ngjarjen e 21 janarit” – ku mbeten të vrarë katër demostrues dhe të plagosur dhjetëra të tjerë – nga zjarri i armëve të përdorura nga efektive të Gardës…, përtej nivelit të mirëfilltë ekzekutues të krimit (krimeve) – të sipërcituar (efektivë dhe drejtues të Gardës) – por edhe të paballafaquar minimalisht (në të njëjtën kohë) me indiciet individualizuese – evidentuese të implikimit të nivelit më të lartë drejtues shtetëror – përfshirë Kryeministrin dhe Ministrin e Brendshëm të kohës – përtej atij të mirëfillte ekzekutues – të vëna në dispozicion të organit të procedimit”, thuhet në vendim.

Gjatë protestës së 21 Janarit 2011 u vranë Aleks Nika, Ziver Veizi, Faik Myrtaj dhe Hekuran Deda. Katër viktimat e 21 Janarit 2011 u shpallën Dëshmorë të Atdheut.

Në korrik të vitit 2024 Prokuroria e Posaçme (SPAK) nisi zyrtarisht hetimet për 21 Janarin, pasi Gjykata e Strasburgut urdhëroi Strukturën e Posaçme të hetonte kallëzimin e bërë nga Rajmonda Nika, bashkëshortja e Aleks Nikës, ndaj Sali Berishës, ish-kryeministër, Lulzim Bashës, ish-ministër i Brendshëm dhe Ndrea Prendit, ish-kreu i Gardës së Republikës.

Gjykata e Strasburgut e ka cilësuar vrasjen e katër protestuesve si “krim shtetëror që duhej zbardhur”.

/gj.m/j.p/

The post Balla: Shqiptarët dhe familjet e të rënëve të 21 Janarit duan drejtësi appeared first on Agjencia Telegrafike Shqiptare.

TIRANË, 20 janar /ATSH/ Këshilli i Lartë Gjyqësor bëri sot me dije se, deri në orën 20:30 në adresë të tij nuk ka mbërritur asnjë dokument zyrtar nga Prokuroria e Përgjithshme lidhur me njoftimin e sotëm për miratimin e rezultateve të verifikimit të thelluar të deklarimeve të bëra në Formularin e Vetëdeklarimit për gjyqtaren në Gjykatën e Posaçme Kundër Korrupsionit dhe Krimit të Organizuar, Irena Gjoka (Shpata, Maneku).

Sipas njoftimit, sapo shkresa e Prokurorisë së Përgjithshme të mbërrijë zyrtarisht, ajo do të administrohet nga Komisioni i Zhvillimit të Karrierës pranë KLGJ-së dhe më pas do të ndiqet procedura përkatëse ligjore, në përputhje me legjislacionin në fuqi.

Prokuroria e Përgjithshme njoftoi sot se ka përfunduar verifikimet brenda dhe jashtë vendit për gjyqtaren e Gjykatës së Posaçme Kundër Korrupsionit dhe Krimit të Organizuar, Irena Gjoka.

Prokuroria e Përgjithshme bëri të ditur se ka miratuar rezultatet e procesit të verifikimit dhe e ka përcjellë vendimin në Këshillin e Lartë Gjyqësor.

Prokuroria e Përgjithshme nisi verifikimin për gjyqtaren Irena Gjoka pas një shkrimi të publikuar në mediet greke se është dënuar në vendin fqinj për falsifikim dokumentesh.

Irena Gjoka ështe edhe gjyqtarja paraprake e dosjes “Partizani”, në të cilën është marrë i pandehur ish-kryeministri Sali Berisha.

/gj.m/j.p/

The post KLGJ: Nuk kemi ende shkresën zyrtare të Prokurorisë së Përgjithshme për gjyqtaren Irena Gjoka appeared first on Agjencia Telegrafike Shqiptare.