TIRANË, 3 shkurt/ATSH/ Ministria e Shëndetësisë dhe Mirëqenies Sociale informon qytetarët se nuk ka rritje të çmimeve të barnave për vitin 2026.

Në një njoftim publik, MShMS, thekson se “çmimet e ndryshuara janë krahasimisht më të ulta se në vitin 2025”.

Në bazë të kuadrit ligjor në fuqi, MShMS, bën me dije se data 31 dhjetor 2025 ka qenë afati i fundit për miratimin të çmimeve të barnave “CIF/EXW2026”, listë e cila i është përcjellë zyrtarisht Agjencisë Kombëtare të Barnave dhe Pajisjeve Mjekësore (AKBPM) dhe Fondit të Sigurimit të Detyrueshëm të Kujdesit Shëndetësor (FSKDSh).

“FSDKSH, për miratimin e listës së barnave që rimbursohen nga Fondi i Sigurimit të Detyrueshëm të Kujdesit Shëndetësor dhe masës së mbulimit të çmimit të tyre”, i ndryshuar, si hap të parë ka reflektuar me efekt të menjëhershëm uljen e çmimeve për barnat alternativë e vetme të Listës së Barnave të Rimbursueshme (LBR) në fuqi. Kjo praktikë është e ndjekur prej vitesh dhe është e njohur nga subjektet tregtare farmaceutike”, thuhet në njoftim.

Ministria e Shëndetësisë dhe Mirëqenies Sociale informon se përmes Komisioni të Çmimit të Barnave, çdo vit miraton çmimin e barnave, bazuar në VKM “Për ngritjen dhe mënyrën e funksionimit të Komisionit të Çmimit të Barnave”, e ndryshuar.

“Mbajtësit e autorizimit të tregtimit të barit në Shqipëri ose përfaqësuesi ligjor i autorizuar prej tij, brenda datës 31 tetor të çdo viti, deklarojnë me shkresë, sipas formularit bashkëlidhur këtij vendimi, në zarf të mbyllur, pranë ministrisë përgjegjëse për shëndetësinë, çmimet “CIF” në euro ose dollarë, për barnat e importit dhe çmimet EXW (ex-work) në lekë, për barnat e fabrikuara në vend, kur barnat janë të pajisura me autorizim për tregtim”, vijon njoftimi.

“Në rastet kur bari është në proces për t’u pajisur me autorizim për tregtim ose proces rinovimi të autorizimit për tregtim, mbajtësi i autorizimit për tregtim ose përfaqësuesi i tij ligjor i autorizuar prej tij kanë të drejtë të bëjnë deklarim të çmimit të barit por komisioni miraton çmimin e barit, pasi ai është pajisur me autorizimin për tregtim”, cilësohet në njoftim.

MShMS thekson se “çmimi i referencës për Shqipërinë” do të jetë çmimi më i ulët nga elementet si çmimi që aplikohet ndër pesë shtetet referente (Itali, Greqi, Serbi, Maqedoni dhe Kroaci); çmimi i tregtimit me pakicë të barit në vendin e origjinës dhe çmimi i barnave të importuara në Republikën e Shqipërisë, gjatë 12 muajve të fundit.

“Çmimi i barit gjenerik duhet të jetë deri në 80% të çmimit të barit origjinator, të regjistruar pranë Agjencisë. Nëse bari origjinator nuk është i regjistruar në Republikën e Shqipërisë, atëherë do të merret për bazë çmimi i tij në vendet e referencës dhe të origjinës. Barnat, për të cilat nuk është deklaruar çmim, brenda datës 31 tetor të vitit aktual, humbasin të drejtën për t’u përfshirë në listën e barnave të rimbursueshme për vitin pasardhës”, vijon njoftimi.

Sipas MSHMS, “Barnat të cilat janë në proces të pajisjes me autorizim ose rinovim autorizimi për tregtim dhe kanë deklaruar çmim brenda datës 31 tetor të vitit aktual, do të lejohen të aplikojnë për t’u përfshirë në listën e barnave të rimbursueshme, nëse bari pajiset me autorizim për tregtim deri në momentin e fillimit të procedurës së rishikimit të listës së barnave të rimbursueshme nga Fondi i Sigurimit të Detyrueshëm të Kujdesit Shëndetësor”.

/e.i/a.f/r.e/

The post Ministria e Shëndetësisë: Nuk ka rritje të çmimeve të barnave, janë më të ulta se në vitin 2025 appeared first on Agjencia Telegrafike Shqiptare.

TIRANË, 3 shkurt/ATSH/ Ministri i Turizmit, Kulturës dhe Sportit, Blendi Gonxhja, në një konferencë me gazetarët, tha se sfidat e vitit që sapo ka nisur janë të jashtëzakonshme sepse të tilla janë pritshmëritë e qytetarëve dhe ambiciet e Qeverisë.

Gonxhja nënvizoi se në zbatim të programit të Qeverisjes Shqipëria 2030 për rritjen e ekosistemit të mikpritjes, së promovimit të vendit dhe identitetit tonë, të mirëmenaxhimit të pasurive publike, si bregu ujor, plazhet dhe destinacinet turistike mbrotjes së trashëgii kulturore, mbështetja e një kalendari spektakolar aktivitetesh mes traditës dhe modernes, dhe natyrës dhe itinierarit.

“Rritja e imazhit të Shqipërisë ndërkombëtarisht, e vizitueshme 365 ditë të vitit është themeli i punës dhe përpjekejve tona. Bashkimi i kulturës, rinsië dhe sportit flet qartë për sinergjinë organike dhe natyrshmërinë e sektorëve në organika dhe mision”, tha Gonxhja.

“Hartimi dhe përditësimi i strategjive sektoriale në koordinim mes tyre janë garancia e një akritekture të qendrueshme dhe afatgjatë. Lufta jonë parësore është që të kërkojmë përtej tavaneve buxhetore, jo vetëm sepse edhe në kohët të mira ato nuk mjaftojnë, por sepse Shqipëria duhet të shpikë shumëfish fonde nëse duam të kapim kohën e humbur, të shpëtojmë thesaret tona të rrezikuara, të maksimizojmë vlerën e aseteve tona historike në funksion të zhvillimit të komunitetece të turizmit dhe ekonomisë”, vijoi Gonxhja.

vijon…

/e.i/a.f/

The post Gonxhja: Rritja e imazhit të Shqipërisë ndërkombëtarisht, themeli i punës dhe përpjekjeve tona appeared first on Agjencia Telegrafike Shqiptare.

TIRANË, 3 shkurt/ATSH/ Ministri i Shtetit për Marrëdhëniet me Parlamentin, Toni Gogu u ndal sot gjatë punimeve në Kuvend te diskutimet për projektligjin “Për kontrollin e lëndëve që përdoren për fabrikimin e paligjshëm të lëndëve narkotike dhe psikotrope””.

Gogu tha se ky projektligj i parë për barnat narkotike dhe lëndët psikotrope nuk bën gjë tjetër veçse përditëson listën e tyre në zbatim të disa protokolleve ndërkombëtare.

“Është e vërtetë që dy projektligjet që sjell qeveria sot para jush janë në dukje teknike, por janë thelbësore për shkak se kanë të bëjnë drejtpërsëdrejti me mbylljen e hapësirave të tregut të paligjshëm të barnave narkotike dhe lëndëve psikotrope. Dhe lidhen drejtpërsëdrejti me shëndetin publik, me sigurinë, me shtetin e së drejtës dhe me standardet ndërkombëtare”, tha Gogu.

“Në thelb, projektligji i parë për barnat narkotike dhe lëndët psikotrope nuk bën gjë tjetër veçse përditëson listën e tyre në zbatim të disa protokolleve ndërkombëtare. Dhe për ta thënë për specialistët e fushës që na ndjekin edhe më qartë, bëhet fjalë për përditësimin që ka bërë Komisioni për Lëndët Narkotike pranë Kombeve të Bashkuara në sesionin e 68-të, në zbatim të rekomandimeve të Organizatës Botërore të Shëndetësisë, ku ka përfshirë në këtë listë tre grupe”, vijoi ai.

Gogu nënvizoi se “një kanabinoid gjysmësintetik që është heksahidrokanabinoli dhe që po shfaqet gjithnjë e më shumë si në tregjet komerciale, po ashtu edhe në tregjet e paligjshme. Carisoprodoli është një lëndë tjetër që është relaksues muskujsh, por që me veprim në sistemin nervor qendror ka një potencial abuzimi”.

“Por ky është një nga detyrimet e anëtarësimit në Bashkimin Evropian dhe juve, që nga momenti që u larguat nga lulëzimi evropian ku e kishit integrimin në pjesën e parë të verbit tuaj politik, siç u thoshte dhe një kolege që kishit mes jush, dhe tani kemi hyrë në atë dimrin e vetmisë së madhe, ku ju mbyllin mikrofonat nëpër Evropë”, pohoi Gogu, ndërsa theksoi se me këtë projektligj mbrohet shëndeti publik, baza ligjore për institucionet ligjzbatuese bëhet më e qartë dhe më kontrolluese dhe harmonizohen standardet ndërkombëtare, duke e zhdukur zonën gri.

“Kurse projektligji i dytë, ai për kontrollin e këtyre lëndëve, merret me përkufizimet dhe i qartëson ato mirë dhe siguron forcimin dhe përditësimin e kontrollit ligjor për të mbyllur boshllëqet që krijohen nga prodhimi i këtyre lëndëve narkotike gjithmonë e më shumë në tregun botëror iu përgjigjet këtyre zhvillimeve dhe përputhet plotësisht me standardet e Bashkimit Evropian”, tha ai.

Ministri Gogu pohoi se me këto projektligje po forcohet kontrolli dhe po përditësohen direktivat e Bashkimit Evropian.

/e.i/a.f/r.e/

The post Gogu: Kontroll më i fortë për substancat me potencial abuzimi appeared first on Agjencia Telegrafike Shqiptare.

TIRANË, 3 shkurt/ATSh/ Shërbimi Onkologjik në Shqipëri përbën një hallkë të rëndësishme të sistemit shëndetësor, duke ofruar diagnostikim, trajtim dhe ndjekje për pacientët e prekur nga sëmundjet tumorale.

Ministria e Shëndetësisë dhe Mirëqenies Sociale (MShMS) bën me dije se shërbimet onkologjike ofrohen në 8 spitale rajonale, si edhe nga Qendra Shëndetësore e Shërbimit Onkologjik në Banesë, Tiranë.

Sipas MShMS, këto struktura sigurojnë trajtim dhe ndjekje të vazhdueshme për pacientët, përmes shërbimeve të specializuara onkologjike, përfshirë kimioterapinë dhe kujdesin paliativ.

Në njoftimin e MShMS thuhet se “32 mjekë dhe 312 infermierë janë çdo ditë në gatishmëri ndaj nevojave të pacientëve, duke ofruar kujdes profesional, mbështetje, dhe ndjekje të personalizuar gjatë gjithë rrugëtimit të trajtimit”.

Ky shërbim ofron trajtime të specializuara si kimioterapia, radioterapia, terapitë hormonale, si dhe kujdesin paliativ për pacientët në stadet e avancuara të sëmundjes. Krahas kësaj, funksionojnë edhe shërbime mbështetëse si imazheria, anatomia patologjike dhe laboratorët e specializuar, të domosdoshëm për diagnostikim të saktë.

/e.i/a.f/r.e/

The post 32 mjekë dhe 312 infermierë të angazhuar në shërbimet onkologjike në spitale appeared first on Agjencia Telegrafike Shqiptare.

TIRANË, 3 shkurt/ATSH/ Deputetja e Partisë Demokratike, Ina Zhupa, në një deklaratë të dhënë sot për mediet në ambientet e jashtme të Kuvendit, tha se Partia Demokratike ka hartuar një projektligj në mbështetje të mësuesve, i cili ndodhet në sirtarët e Kuvendit prej nëntorit të vitit të shkuar.

Zhupa nënvizoi se prej një viti e gjysmë mësuesve që kanë mbaruar përpara sistemit të Bolonjës, me një VKM nga ish-ministrja Ogerta Manastirliu iu hoq pagesa e kategorisë që nuk i cilëson ata më me arsim të lartë apo me master.

“Këtu filloi një problem shumë i madh për 11 172 mësues të sistemit parauniversitar në Shqipëri, të cilët nisën betejën me peticione e protesta. Këto kaluan në vesh të shurdhër. Unë atëherë kam qenë kryetare e Komisionit të Edukimit dhe kam bërë dëgjesa me ministren Manastirliu, e cila e ka mbrojtur me fanatizëm këtë vendim duke e konsideruar si barazi me punonjësit e administratës publike”, tha Zhupa.

Deputetja e PD-së, shtoi se Sindikata e Bashkuar e Arsimit Shqiptar ka shkuar në Gjykatën Kushtetuese për ta shfuqizuar këtë VKM që ishte në kundërshtim me ligjin “Për arsimin parauniversitar”.

“Në Gjykatën Kushtetuese duke qenë e ishin 8 anëtarë është bërë ndarja 4 me 4 dhe nuk kanë arritur ta rrëzojnë këtë vendimmarrje të qeverisë”, vijoi ajo.

“Qeveria doli palë kundër mësuesve për t’iu hequr atyre këtë përfitim që kishin marrë ndër vite. Kur gjykata nuk arriti të marrë një vendim, unë kam vendosur t’i mbështes mësuesit me një projektligj të ri, të cilin e kam depozituar në 21 nëntor 2025 dhe që vazhdon të jetë në sirtarët e Kuvendit”, theksoi Zhupa, ndërsa shtoi se ky projektligj parashikon ndryshimin e ligjit të Arsimit të Lartë ku edhe mësuesit që kanë mbaruar përpara sistemit të Bolonjës të cilësohen të kualifikuar.

/e.i/a.f/r.e/

The post Zhupa: Projektligji i PD-së në mbështetje të mësuesve, prej nëntorit në sirtarët e Kuvendit appeared first on Agjencia Telegrafike Shqiptare.

TIRANË, 3 shkurt/ATSh/ Kolegji i Posaçëm i Apelimit la sot në fuqi vendimin e Komisionit të Pavarur të Kualifikimit, duke konfirmuar Aulona Bodon, në detyrën e ndihmëses ligjore pranë Gjykatës së Lartë.

Në një njoftim për mediet, KPA bën me dije se me vota unanime është lënë në fuqi vendimi i Komisionit të Pavarur të Kualifikimit, duke rrëzuar kërkesën e Aulona Bodos për t’i njohur statusin e magjistratit dhe për t’u emëruar gjyqtare.

“Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Natasha Mulaj relatore, Albana Shtylla, Ina Rama, Sokol Çomo anëtarë vendosi lënien në fuqi të vendimit nr. 801, datë 19.09.2024 të Komisionit të Pavarur të Kualifikimit, që i përket subjektit të rivlerësimit Aulona Bodo”, theksohet në njoftimin e KPA-së.

Bodo nuk ka qenë dakord me këtë pjesë të vendimmarrjes së KPK-së, dhe e ankimoi vendimin në Kolegjin e Apelimit, që po ashtu e ka rrëzuar kërkesën e saj për t’u emëruar gjyqtare.

/e.i/a.f/r.e/

The post KPA konfirmon në detyrë Aulona Bodon si ndihmëse ligjore në Gjykatën e Lartë appeared first on Agjencia Telegrafike Shqiptare.

TIRANË, 3 shkurt/ATSh/ Spitalet publike dhe ato rajonale në vend po përforcohen me ekipe mjekësh dhe infermierësh të rinj, duke sjellë energjinë që i bashkohet profesionalizmit të stafeve ekzistuese.

Përfshirja e mjekëve dhe infermierëve të rinj vjen si një eksperiencë praktike që u krijon atyre kontakt të drejtpërdrejtë me problematikat e pacientëve.

Ministria e Shëndetësisë dhe Mirëqenies Sociale informon se profesionistët e rinj të Spitalit Universitar të Traumës janë dr. Anri Gongo, dr. Emiljana Toslluku, dr. Fjoralba Lapi, dr. Argjend Kosiqi dhe dr. Darjo Horjeti.

Kryeministri Edi Rama, u shpreh sot në një postim në rrjetet sociale se një brez i ri mjekësh i është bashkuar ekipit të Spitalit Universitar të Traumës.

Më herët, një grup prej pesë infermierësh të rinj iu bashkua ekipit ekzistues në këtë strukturë spitalore në kryeqytet.

Me rihapjen në vitin 2015 të programit të specializimeve afatgjata në mjekësi, po zbatohet një model i qëndrueshëm për shpërndarjen e mjekëve në të gjithë vendin, duke forcuar shërbimet shëndetësore edhe në spitalet rajonale e bashkiake.

Përgjatë viteve të fundit MShMS ka zbatuar një mekanizëm transparent dhe meritokratik të portalit “Mjekë për Shqipërinë” dhe “Infermierë për Shqipërinë” për punësimin e mjekëve dhe infermierëve.

Punësimi i mjekëve dhe infermierëve të rinj plotëson nevojat në specialitete të ndryshme në spitalet rajonale dhe bashkiake.

/e.i/r.e/ /a.g/

The post Pesë mjekë të rinj i bashkohen Spitalit Universitar të Traumës appeared first on Agjencia Telegrafike Shqiptare.

TIRANË, 2 shkurt/ATSh/ Efektivët e Batalionit të Këmbësorisë së Lehtë të Forca Tokësore zhvilloi trajnimin “Call for Fire – Artillery”, në bashkëpunim me New Jersey National Guard, në Shtetet e Bashkuara të Amerikës.

Ministri i Mbrojtjes Pirro Vengu, informoi se trajnimi synon rritjen e aftësive operacionale, ndërveprueshmërisë dhe përvetësimin e standardeve më të avancuara të NATO-s, duke forcuar më tej kapacitetet profesionale të Forcave të Armatosura.

Gjatë trajnimit, pjesëmarrësit u njohën dhe u stërvitën mbi teknika bashkëkohore të komandimit, komunikimit dhe koordinimit në kushte reale operacionale, duke shkëmbyer përvojë profesionale me homologët amerikanë.

Trajnimi është një tjetër dëshmi e angazhimit të vazhdueshëm të Forcave të Armatosura të Shqipërisë për rritjen e kapaciteteve profesionale dhe operacionale, si dhe të forcimit të partneritetit strategjik me Shtetet e Bashkuara të Amerikës, në funksion të sigurisë rajonale dhe kolektive.

/e.i/a.f/r.e/

The post Forcat Tokësore trajnim me Gardën Kombëtare të ShBA-së në “Call for Fire – Artillery” appeared first on Agjencia Telegrafike Shqiptare.

TIRANË, 2 shkurt/ATSH/ Nxënësit dhe mësuesit e shkollës 9-vjeçare “Lef Sallata” në Vlorë nga dita e sotme i zhvillojnë orët mësimore në kushte më të mira dhe me infrastrukturë më moderne, pas rikonstruksionit të plotë të godinës.

Ministrja e Arsimit, Mirela Kumbaro u shpreh se “për 650 nxënësit dhe mësuesit e shkollës “Lef Sallata” në Vlorë, kjo javë nisi bukur me një shkollë krejt të re, të rilindur përmes projektit të Ministrisë së Arsimit dhe Bashkisë Vlorë”.

Kumbaro nënvizoi se ky investim siguron kushte moderne me hapësira të bollshme, të konceptuara e të mobiluara në përputhje me standardet e mësimdhënies në epokën digjitale, por edhe frymëzuese për sporte, arte e plot veprimtari kreative.

Shkollës i janë shtuar mjedise të reja, duke shmangur mësimin me dy turne, ndërkohë që është pajisur me një sistem bashkëkohor të eficiencës së energjisë, terrene sportive e klasa të reja, si dhe nga janari do të kompletohet me laboratorë smart.

/e.i/r.e/a.f/

The post Shkolla “Lef Sallata” në Vlorë hap dyert me kushte moderne për 650 nxënës dhe mësues appeared first on Agjencia Telegrafike Shqiptare.

TIRANË, 2 shkurt/ATSH/ Revista prestigjioze e arkitekturës ArchDaily ka nominuar Mozaikun e Tiranës për çmimin “Ndërtesa e Vitit 2026”.

Ministri i Turizmit, Kulturës dhe Sportit, Blendi Gonxhja bëri me dije lajmin, ndërsa tha se ky monument është një ndërthurje mes ruajtjes së trashëgimisë arkeologjike dhe arkitekturës bashkëkohore.

Sipas Gonxhes, ky nominim e pozicionon Tiranën në skenën ndërkombëtare të arkitekturës si një shembull i dialogut mes historisë dhe së tashmes.

Mozaiku i Tiranës daton që prej shek. III dhe është zbuluar në vitet ’70 të shekullit të kaluar gjatë punimeve për ndërtimin e një blloku pallatesh.

Mozaiku i Tiranës është një hapësirë e re moderne që shërben si platformë për prezantimin e mozaikëve më të rëndësishëm, ndërsa po kthehet në një destinacion të rëndësishëm kulturor për Tiranën.

Në kushte optimale konservimi dhe përmes programeve edukative me fëmijët e të rinjtë, kjo hapësirë vjen si një dritare e re e interpretimit bashkëkohor të trashëgimisë sonë arkeologjike.

Kjo godinë, përpos historikut të saj, shërben edhe si pikë informacioni vizuale për të gjithë mozaikët që mbart nëntoka e pasur arkeologjike shqiptare.

/e.i/a.f/r.e/

The post Gonxhja: Mozaiku i Tiranës nominohet për çmimin “Ndërtesa e Vitit 2026” nga ArchDaily appeared first on Agjencia Telegrafike Shqiptare.

TIRANË, 1 shkurt /ATSh/ Drejtori i Autoritetit Rrugor Shqiptar, Ami Kozeli u shpreh sot, se rënia e masivit të dherave në fshatin Dragostunjë, ka ardhur si pasojë e fenomeneve natyrore.

Kozeli tha se rrëshqitja ka ndodhur në kilometrin e tretë në dalje të Librazhdit, rreth orës 10.15 minuta.

“Ka ndodhur një rrëshqitje  e gurit masiv në shpatin e malit. Situata vjen për shkak të reshjeve të denduara që kemi javë të tëra që i raportojmë. Ka pasur një mbingopje të shaptit me ujë, gjë që shkaktuar edhe rëshqitje”, tha Kozeli.

Sipas drejtorit të ARRSh-së, situata ka ndodhur vetëm për shkak të fenomenit natyror të reshjeve të shiut, dhe jo për shkak të punimeve që po kryhen në zonë.

“Ka gatishmëri nga ana e kontraktorit të mirëmbajtjes së këtij aksi, që ka sjellë në dispozicion të githa mjetet”, vijoi ai.

Policia Rrugore së bashku me Autoritetin Rrugor Shqiptar po bëjnë menaxhimin e trafikut, duke kërkuar edhe mirëkuptimin e qytetarëve që kanë pritur për disa orë, për mbarëvajtjen e qarkullimit.

Aksi rrugor Elbasan – Qafë Thanë, tashmë është zhbllokuar pas rrëshqitjes të masivit të dherave, që pengoi qarkullimin e automjeteve në të dy drejtimet.

/e.i/j.p/

The post Kozeli: Rrëshqitja e dherave në Dragostunjë për shkak të reshjeve të fundit appeared first on Agjencia Telegrafike Shqiptare.

TIRANË, 1 shkurt /ATSh/ Autoriteti Rrugor Shqiptar njoftoi pasditen e sotme se aksi rrugor Elbasan-Qafë Thanë është hapur për qarkullimin e mjeteve pas bllokimit që zgjati disa orë për shkak të rrëshqitjes së masivit të dherave nga shpatet në trupin e rrugës.

Bllokimi ndodhi në segmentin Librazhd-Prrenjas, rreth 3 km larg Librazhdit, në fshatin Dragostunjë, ku si rezultat i reshjeve të dendura u shkëput masiv dherash dhe shkëmbinjsh nga shpati i sipërm i hekurudhës duke bllokuar totalisht hekurudhën dhe rrugën poshtë saj.

Policia Rrugore së bashku me Autoritetin Rrugor Shqiptar po bëjnë menaxhimin e trafikut, duke kërkuar edhe mirëkuptimin e qytetarëve që kanë pritur për disa orë, për mbarëvajtjen e qarkullimit.

Më herët, Ministria e Infrastrukturës dhe Energjetikës, bëri me dije se kompania kontraktore e mirëmbajtjes së aksit rrugor Librazhd-Qafë Thanë dhe ARRSh u angazhuan për zhbollikimin e rrugës.

Sipas MIE-s, menjëherë kontraktorët janë angazhuar me 6 eskavatorë, 2 fadroma dhe punonjës për hapjen e rrugës sa më shpejt që të jetë e mundur.

Prej disa orësh, aksi rrugor Elbasan – Qafë Thanë u bllokua pas rrëshqitjes të masivit të dherave, që pengoi qarkullimin e automjeteve në të dy drejtimet.

/e.i/j.p/

The post ARRSH: Hapet aksi Elbasan–Qafë Thanë për qarkullimin e mjeteve appeared first on Agjencia Telegrafike Shqiptare.

TIRANË, 1 shkurt /ATSh/ Ministria e Infrastrukturës dhe Energjetikës bëri me dije se kompania kontraktore e mirëmbajtjes së aksit rrugor Librazhd-Qafë Thanë dhe ARRSh janë angazhuar për zhbollikimin e pjesës së bllokuar në fshatin Dragostunjë.

Në një njoftim për mediet, MIE informon se në segmentin Librazhd-Përrenjas, rreth 3 km larg Librazhdit, në fshatin Dragostunjë, si rezultat i rreshjeve të dendura është shkëputur një masiv dherash dhe shkëmbinjsh nga shpati i sipërm i hekurudhës duke bllokuar totalisht hekurudhën dhe rrugën poshtë saj.

Sipas MIE-s, menjëherë kontraktorët janë angazhuar me 6 ekskavatorë, 2 fadroma dhe punonjës për hapjen e rrugës sa më shpejt që të jetë e mundur.

“Arsyet e kësaj situate lidhen me reshjet e dendura te javëve të fundit dhe erozionin e theksuar të shpatit mbi rrugë”, thuhet në njoftim.

MIE informon se paralelisht me pastrimin e materialit të rënë po bëhet edhe çmontimi i masivit që ka lëvizur dhe që është i paqëndrueshëm, duke shmangur një rrezik të mundshëm për rënie të mëtejshme.

Ndërsa, ARRSH kërkon mirëkuptimin e të gjithë përdorueseve të mjeteve për vonesat e shkaktuar nga kjo ndërhyrje e domosdoshme për zhbllokimin e rrugës.

Prej tri orësh, aksi rrugor Librazhd – Qafë Thanë ishte i bllokuar për shkak të rrëshqitjes të masivit të dherave, duke penguar qarkullimin e automjeteve në të dy drejtimet.

/e.i/j.p/

The post MIE: 6 ekskavatorë dhe 2 fadroma të angazhuara për hapjen e rrugës Librazhd-Qafë Thanë appeared first on Agjencia Telegrafike Shqiptare.

TIRANË, 1 shkurt /ATSh/ Pas një beteje të gjatë me sëmundjen e kancerit të gjirit, gazetarja e njohur Rezarta Reçi ka ndërruar jetë sot, në moshën 64-vjeçare.

Reçi e nisi rrugëtimin në media përpara 30 viteve, duke u angazhuar si autore dhe prezantuese në disa formate televizive.

Gazetarja Reçi spikati me emisionin “Arratia e Peshkut të Kuq” në News24, ku intervistoi personalitete të ndryshme dhe solli për publikun histori me qasje sociale dhe njerëzore.

Reçi ka botuar edhe dy libra, me titujt “Kolonë Zanore” dhe “Zhbërja”.

Gazetarja Reçi, e ka përcjellë publikisht në daljet mediatike, betejën e saj të gjatë me kancerin e gjirit, duke shërbyer si shembull kuraje për shumë gra dhe vajza të tjera.

/e.i/j.p/

The post Ndahet nga jeta gazetarja Rezarta Reçi appeared first on Agjencia Telegrafike Shqiptare.

TIRANË, 1 shkurt /ATSh/ Kryeministri Edi Rama publikoi sot fotoalbumin me momentet kryesore të aktiviteteve të tij gjatë javës.

Gjatë kësaj jave, kreu i qeverisë zhvilloi vizitë pune në Izrael, në kuadër të Konferencës Ndërkombëtare për Luftën kundër Antisemitizmit. Në këtë vizitë, kryeministri u shoqërua edhe bashkëshortja e tij, Linda Rama dhe delegacioni zyrtar.

Ndalesa e parë e Kryeministrit Rama ishte në Nova Site, një vend simbolik i kthyer në hapësirë reflektimi pas ngjarjeve tragjike nga sulmi i Hamasit më 7 tetor 2023. Më pas, Rama u prit në takim nga Kryeministri izraelit Benjamin Netanyahu.

Gjithashtu, Rama gjatë vizitës së tij në Izrael u prit nga kryetari i Knessetit (Parlamentit të Izraelit) Amir Ohana në Knesset Plaza me një ceremoni të posaçme si dhe iu adresuar parlamentit.

Kreu i Qeverisë, mori pjesën në aktivitetin e organizuar nga AIDA, ku u prezantua platforma “Export ON”, e cila do të merret me matjen e indikatorëve të punës së përditshme të kompanive eksportuese dhe çdo vit do të publikojë raportin e vet mbi lëvizjen e volumit eksportues.

Gjatë javës, Kryeministri Rama mbajti fjalën e tij edhe në aktivitetin e organizuar për përzgjedhjen e kompanive arkitekturore fituese me projektet e Shtëpisë së Fëmijëve dhe Kompleksit të Inspektorateve Shtetërore.

Njëherësh, Rama mori pjesë në ekspozitën “Spaces in Dialogue” e çelur në COD (Qendra për Hapje dhe Dialog), një ekspozitë që sjell në vëmendje hapësirat, arkitekturën, kujtesën dhe përjetimin njerëzor.

Kreu i Ekzekutivit, mori pjesë edhe në një dëgjesë publike me fermerët në Divjakë për Skemën Kombëtare 2026. Rama u shpreh se fermerët duhet të orientohen drejt mundësive të pashfrytëzuara të financimit.

/e.i/j.p/

The post Rama publikon fotoalbumin e javës appeared first on Agjencia Telegrafike Shqiptare.

TIRANË, 1 shkurt /ATSh/ Shërbimi i Kardiologjisë në Qendrën Spitalore Univeristare “Nënë Tereza”, gjatë vitit të kaluar ka shpëtuar mijëra jetë përmes ndërhyrjeve jetike.

Kryeministri Edi Rama solli në vëmendje shifrat e referuara nga Ministria e Shëndetësisë dhe Mirëqenies Sociale.

Prej muajit janar deri në dhjetor 2025 në Shërbimin e Kardiologjisë janë kryer 599 implantime aparaturash kardiake (pacemaker, CRT-D, CRT-P, defibrilatorë intrakardiakë të implantueshëm) si dhe 143 angioplastika të planifikuara me stent.

Gjithashtu, Kryeministri Rama informon se janë kryer 2,941 procedura PCI dhe koronarografi, nga të cilat 1,366 urgjenca, ndërhyrje në momentet më kritike për jetën.

Kreu i Qeverisë, falënderon çdo mjek, infermier dhe profesionist shëndetësor që qëndron çdo ditë në vijën e parë të kujdesit.

Shërbimi i Kardiologjisë pranë Qendrës Spitalore Universitare “Nënë Tereza” në Tiranë ofron kushte dinjitoze dhe trajtim me teknologji moderne për çdo pacient.

/e.i/j.p/

The post Rama: Mijëra jetë të shpëtuara përmes ndërhyrjeve në Kardiologjinë e QSUNT appeared first on Agjencia Telegrafike Shqiptare.

TIRANË, 1 shkurt /ATSh/ Muajt e dimrit shoqërohen jo vetëm me temperatura të ulëta, por edhe me një rritje të ndjeshme të stresit dhe ankthit tek një pjesë e qytetarëve. Mungesa e dritës natyrale, izolimi social, ritmi i ngadaltë i jetës ndikojnë drejtpërdrejt në shëndetin mendor.

Në një intervistë për ATSh-në, Andia Meksi, specialiste e shëndetit mendor pranë Institutit të Shëndetit Publik (IShP) shpjegon se gjatë dimrit vërehet një shtim i konsultave për ankth, çrregullime të gjumit dhe lodhje emocionale.

“Në kulturat perëndimore ky fenomen njihet si “winter blues” ose “depresioni dimëror”, ku individët përjetojnë humor të ulët, lodhje mendore, apati, shpërqendrim, probleme me gjumin dhe oreksin, etj. Arsyet e kësaj gjendje lidhen me klimën e ftohtë dhe ditët e shkurtra apo dhe mungesa e diellit në shumicën e ditëve gjatë sezonit të dimrit. Ekziston një lidhje, edhe pse jo e drejtpërdrejtë (shkak-pasojё) midis gjendjes së humorit dhe klimës, pra, mungesa e diellit dhe ndikimi që ka në gjendjen tonë të përgjithshme. Gjatë dimrit, trupi është i ekspozuar ndaj virozave dhe mungesës së rrezeve të diellit (vitamina D), kjo çon edhe në rënie të sistemit imunitar. Gjithashtu, kontaktet sociale bëhen me të rralla në këtë periudhë se në verë, si dhe aktiviteti fizik është i kufizuar, çka mund të çojë në një gjendje apatie, lodhjeje dhe humor të ulët”, thotë Meksi.

Meksi shton se ka disa faktorë psikologjikë, socialë dhe ekonomikë që i bëjnë disa individë më të cenueshëm ndaj këtij efekti dimëror, siç mund të jenë problemet ekzistuese të shëndetit mendor, kryesisht probleme me humorin (depresion, çrregullimi bipolar) dhe ankthit (ankth i përgjithësuar, sulme të panikut, çrregullimi obsesiv kompulsiv (OCD), etj.), por edhe individët me probleme të abuzimit me substancat si alkooli, drogat dhe individët me probleme të përshtatjes.

“Sipas Shoqatës Amerikane të Psikiatrisë (APA), gjatë stinës së dimrit individët përjetojnë simptomat si ndjenjë trishtimi, humbje interesi ose kënaqësie në aktivitetet që zakonisht pëlqehen, ndryshime në oreks, ndryshim në gjumë, humbje energjie ose ndjenjë më e lodhur pavarësisht një sasie të mirë gjumi, ngadalësim i të menduarit, përqendrimit ose vendimmarrjes, rritje e aktiviteteve si ecja, shtrëngimi i duarve ose pamundësia për t’u ulur, ose ngadalësim i lëvizjeve ose të folurit, ndjenjë e pashpresë, pa vlerë ose faji, si edhe mendime për vdekje ose vetëvrasje”, pohon Meksi, duke nënvizuar se shëndeti mendor nuk është një gjendje statike, por dinamike.

“Për ata të cilët janë duke hasur vështirësi në përmbushjen e detyrave të përditshme, që kanë probleme me gjumin, humorin dhe shqetësimet trupore apo psikoemocionale, të drejtohen pranë mjekut të familjes në qendrat socio-shëndetësore në zonat e tyre të banimit. Tashmë, pranë qendrave shëndetësore primare janë atashuar stafet psiko-sociale të cilat ofrojnë vlerësime dhe referim për trajtim të specializuar të shëndetit mendor. Këta profesionistë janë të pajisur me njohuri dhe mjetet për të bërë ndërhyrje dhe për të vlerësuar ndihmën që iu duhet”, thekson ajo.

Dimri, sipas Meksit, i kufizon individët në kryerjen e aktiviteteve në ambiente të hapura dhe në natyrë, por kurrsesi nuk ndikon në marrëdhëniet dhe jetën sociale të individëve.

“Të ndenjurit vetëm nuk është domosdoshmërisht shenjë e vetmisë apo tërheqjes sociale. Ka individë të cilët nuk ndihen të vetmuar pasi e kanë kohën të zënë duke bërë gjërat që iu pëlqejnë dhe që i bëjnë të ndihen mirë me veten. Por, dimri kufizon kryerjen e aktiviteteve në ambiente të hapura dhe në natyrë, por kurrsesi nuk ndikon në marrëdhëniet dhe jetën sociale të individëve. Izolimi apo tërheqja sociale ndaj aktiviteteve dhe kontakteve/ marrëdhënieve që më parë i kryenim me dëshirë, ndodh si pasojë e ndjenjës së pasigurisë, ankthit dhe problematikave të tjera që lidhen me shëndetin tonë mendor”, shton ajo.

Meksi ndan njëherësh edhe disa këshilla praktike për qytetarët dhe mënyrën se si duhet të veprohet për ta përballuar emocionalisht dimrin.

Ajo thekson se qytetarët duhet të jenë të vëmendshëm ndaj ndryshimeve në mendime, gjendjen emocionale dhe sjelljen e tyre.

“Duhet të komunikoni me miq dhe familjarë për vështirësitë që po kaloni dhe me punëdhënësin nëse kjo po ndikon në performancën tuaj në punë dhe të kërkoni zgjidhje për problemet që po hasni. Kujdesi ndaj vetes është i rëndësishëm, ndaj drejtojuni një specialisti të shëndetit mendor në rast nevoje. Takimet konsultuese me një profesionist ndihmojnë që të parandalojmë përkeqësimin e gjendjes dhe të adresojmë në mënyrën e duhur problemet e shëndetit tonë mendor”, thotë Meksi.

Sipas saj, e rëndësishme është që të ruhet edhe rutina e përditshme, aktiviteti fizik dhe orët e plota të gjumit.

“Angazhimi në punë, kujdesi për higjienën e shtëpisë dhe vetes, gatimi i vakteve të shëndetshme në vend që t’i blini të gatshme, shpenzimi i kohës me veten në mënyrë cilësore dhe reduktimi i ndërveprimit në rrjetet sociale dhe botën virtuale janë disa prej angazhimeve që ndihmojnë në reduktimin e gjendjes së rënduar emocionale”, thekson ajo.

“Gjithashtu, aktiviteti fizik i lehtë dhe i moderuar (të paktën 20 minuta ecje çdo ditë ose 60-90 minuta fizkulturë 3 herë në javë); 6-7 orë gjumë me orare fikse (fjetje-zgjim); pushimi, reduktimi dhe shmangia e produkteve të duhanit, alkoolit dhe drogave; mbajtja e një ditari ku të shënoni mendimet që keni; meditimi dhe kontakti me familjarët dhe miq, janë të tjerë faktorë pozitivë që ndikojnë në përmirësimin e gjendjes. Nëse gjendja juaj nuk përmirësohet, duhet ndërhyrja tek specialisti i shëndetit mendor”, përfundoi Meksi.

Andia Meksi, specialiste e shëndetit mendor pranë ISHP, foto: Andrin Hoxha

1 nga 3

/e.i/j.p/r.e/

The post Meksi për ATSh: Dimri rrit stresin dhe ankthin, kujdes me sinjalet që jep trupi dhe mendja appeared first on Agjencia Telegrafike Shqiptare.

TIRANË, 30 janar/ATSH/ Presidenti i Republikës, Bajram Begaj i dorëzoi sot flamurin kombëtar ekipit olimpik Team Albania që do të përfaqësojë Shqipërinë në Lojërat Olimpike Dimërore 2026, të cilat do të zhvillohen në datat 6-22 shkurt në Milano dhe Cortina d’Ampezzo të Italisë.

I pranishëm në ceremoninë e mbajtur në Pallatin e Brigadave, ministri i Turizmit, Kulturës dhe Sportit, Blendi Gonxhja tha se po konsultohet në publik ligji i ri i sponsorizimeve, i cili do t’i japi një energji të munguar sportit.

“Do t’i hapim një dritare krejt tjetër dhe një mundësi krejt të re për të çliruar ato energji që deri më tani kanë qenë të munguara në shërbim të sportit. Do të kemi një instrument tjetër që do të sjell një fond i cili do të jetë një fond special, që do të jetë në shërbim të artit, kulturës, sportit. Ne të gjitha këto ia dedikojmë edhe rinisë në mënyrë direkte, sepse ku ka më shumë rini sesa në këto sfera”, tha Gonxhja.

“Gjithashtu sapo kaluam në qeveri, aktet nënligjore të lojërave të fatit, që do të bëjë të kemi shumë shpejt zbatueshmërinë e një ligji, i cili do të sjellë një divident të sigurt, të menjëhershëm, goxha të lartë për sportin. Kështu që jemi në prag të ditëve shumë të mira”, vijoi ai.

Ministri Gonxhja falënderoi presidentin e Federatës së Skive, duke e etiketuar një biznesmen të shkëlqyer. Gonxhja shprehu mirënjohjen edhe për figura të tjera sportive që lartësojnë emrin e Shqipërisë në këtë disiplinë sportive si Lara Colturi, Denni Xhepa, Semire Dauti dhe Elisa Brunga.

/e.i/r.e/a.f/

The post Gonxhja: Instrumente të reja financiare në shërbim të sportit dhe rinisë appeared first on Agjencia Telegrafike Shqiptare.

TIRANË, 30 janar/ATSH/ Policia Bashkiake e Tiranës, në bashkëpunim me Komisariatin e Policisë Nr. 2, ka konstatuar një rast të depozitimit të paligjshëm të mbetjeve inerte në hapësirë publike.

Në njoftimin e bashkisë, thuhet se gjatë verifikimeve në terren, u identifikuan personat përgjegjës për këtë shkelje, të cilët u ndëshkuan administrativisht, ndërsa materialet procedurale u referuan pranë organeve kompetente për veprime të mëtejshme ligjore.

Në lidhje me këtë aksion, nënkryetari i Bashkisë së Tiranës, Blendi Sulaj, i cili ishte në krye të monitorimit të situatës, u shpreh se Policia Bashkiake vijon të kryejë me përkushtim detyrën për kontrollin e territorit.

“Policia Bashkiake Tiranë vazhdon të jetë në lartësinë e detyrës që i është besuar për kontrollin e territorit. Ky rast duhet të shërbejë si një thirrje për çdo ndërtues apo kompani që të respektojë ligjin dhe të mos e shkelë atë. Bashkia e Tiranës monitoron në mënyrë të vazhdueshme territorin dhe ka nën vëzhgim çdo kantier ndërtimi”, deklaroi Sulaj.

Bashkia e Tiranës njofton se do të vijojë kontrollet intensive në terren dhe u bën thirrje qytetarëve të denoncojnë çdo rast të ndotjes së mjedisit apo shkeljes së ligjit në hapësirat publike.

/e.i/a.f/

The post Sulaj: Asnjë tolerancë për ndotjen e territorit appeared first on Agjencia Telegrafike Shqiptare.

TIRANË, 30 janar/ATSH/ Kryeministri Edi Rama nënvizoi sot se “dyshimi i arsyeshëm” është një formulë që ka marrë më qafë shumë njerëz, duke mbajtur individë në burg pa gjyq.

Duke sjellë në vëmendje mesazhin e Nicola Lettierit, zëvendësprokuror i përgjithshëm në Gjykatën e Lartë të Kasacionit të Italisë, dhënë gjatë aktivitetit të djeshëm në Tiranë, Rama tha se kjo formulë ka marrë më qafë shumë njerëz që në fund kanë dalë të pafajshëm, po edhe të dërrmuar psikologjikisht, apo që mban sot nëpër burgje pa gjyq njerëz që nesër mund të dalin të pafajshëm.

Sipas Kreut të Ekzekutivit, çështja e paraburgimit është një ndër disa pikat mbi të cilat duhet reflektuar seriozisht, për ta bërë Shqipërinë një vend ku prezumimi i pafajësisë të mos dhunohet nga prezumimi i fajësisë.

Ndër të tjera, Lettieri u shpreh se ajo çfarë sugjerohet është që të përdoret në një dispozitë specifike, 228 e Kodit Penal, një formulim specifik i “bazës së arsyeshme” për prova apo indicie serioze në vend të formulimit aktual që është “dyshim i arsyeshëm”.

“Nuk ka një prag, një kufi të shprehur të veprës penale për t’u ndaluar. Prokurori mund ta kërkojë këtë gjë, gjyqtari mund ta miratojë masën e sigurimit për çdo vepër penale. Kjo nuk është koherente me të njëjtin Kod në Shqipëri sepse Neni 241, parashikon se masat e ndërmjetme apo ndaluese që janë më pak ndëshkuese se masa e paraburgimit, mund të zbatohen vetëm në procese që përfshijnë vepra penale të ndëshkueshme me ligj me një dënim me më shumë se 1 vit burg”, pohoi ai.

Zëvendësprokurori i përgjithshëm i Gjykatës së Lartë të Kasacionit të Italisë tha se njëherësh duhen mbajtur në fokus edhe kriteret e arsyetimit ligjor.

“Ajo çfarë kemi dashur të shmanget është që gjyqtari mund të miratojë një masë duke iu referuar vetëm kërkesës që vjen nga prokurori, pa bërë asnjë përpjekje për të parë dosjen dhe për të krijuar opinionin e tij, të shmangë formulat stereotipe. Ndaj ne sugjerojmë dy ndryshime, ndryshime në nenin 245. I pari është kur kërkohet paraburgim, gjykata duhet të kërkojë arsye specifike pse e konsideron këtë ndalim të përshtatshëm ose jo, duke e përcaktuar atë në nenin 237”, tha Lettieri, ndërsa theksoi se gjykata nuk mund të kufizohet në miratimin e kësaj mase dhe duhet të thotë shprehimisht pse masat alternative nuk mund të zbatohen.

Sipas tij, gjyqtari nuk mund t’i referohet vetëm kërkesës që vjen nga prokurori, por duhet të provojë se kryen një vlerësim/shqyrtim autonom dhe në qoftë se kjo nuk bëhet, atëherë gjykata e një shkalle më të lartë mund ta anulojë këtë masë.

/e.i/a.f/r.e/

The post Lettieri: Gjyqtari të bëjë vlerësim autonom për paraburgimin, të arsyetojë pse nuk zbatohen masat alternative appeared first on Agjencia Telegrafike Shqiptare.